ដោយ៖ សុធារី

ត្បូង ឃ្មុំ៖ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងពិធីសម្ពោធ “ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ” និងពិធីប្រកាសបេីកការដ្ឋានសាងសង់ផ្លូវជាតិលេខ “៧១C” បានមានប្រសាសន៍បង្ហាញពីផែនការរបស់សម្តេចក្នុងការកសាងស្ពានឆ្លងកាត់ស្ទឹងនិងទន្លេបន្ថែមទៀត ដោយដាក់ ២ទៅ៣គីឡូម៉ែត្រមួយ។

សម្តេចបានមានប្រសាសន៍ថា កូវីដ១៩បានធ្វើស៊ីស្ពានរបស់កម្ពុជាអស់ជាង២០ស្ពាន នេះបើតាមការគិតតម្លៃខ្ពស់ៗ។ សម្រាប់ “ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ” បានចំណាយថវិកាប្រមាណ៥៦លានដុល្លាអាមេរិក ដែលជាជំនួយពីមិត្តចិន និងថវិកាសរុបតាមការគណនារបស់ក្រសួងសេដ្ឋកិច្ចសរុបប្រមាណ៧១លានដុល្លាអាមេរិក។

សម្តេចបានបង្ហើបថា រដ្ឋាភិបាលបានត្រៀមថវិកាជាទឹកប្រាក់សន្សំក្នុងផែនការរបស់ក្រសួងសេដ្ឋកិច្ចនិងហិរញ្ញវត្ថុប្រមាណ ៣៥០០លានដុល្លាអាមេរិក ដោយមានគោលដៅ២ភាគ៣សម្រាប់ការកសាងហេដ្ឋារចនាសម្ព័ន្ធសំខាន់ៗ ដោយដាក់គោលដៅការកសាង២គីឡូម៉ែត្រស្ពានមួួយ។

សម្តេចបានថ្លែងថា “នៅពេលប្រាក់សន្សំរបស់យើងកើនដល់កម្រិតមួយហើយ ខ្ញុំនឹងចង្អុលការណ៍យកតែម្តង ធ្វើស្ពាននេះ ធ្វើស្ពាននោះ។ ខ្ញុំចង់លេងថាដូចជា ព្រែកត្នោត ខ្ញុំចង់ឱ្យព្រែកត្នោត២គីឡូស្ពានមួយៗ ទន្លេតូច ស្ទឹងពោធិ៍សាត់ ស្ទឹងមង្គលបូរី ស្ទឹងសង្កែ ស្ទឹងដែល២គីឡូស្ពានមួយ៣ គីឡូស្ពានមួយ។”

សម្តេចបានបន្តថា “ស្ពានមួយថាអស់១លានដុល្លាចុះ ប្រើតែមួយរយលានបាន១០០ស្ពាន។” សម្តេចតេជោក៏បញ្ជាក់ថានឹងកសាងស្ពានឆ្លងកាត់ ទន្លេមេគង្គនិងទន្លេបាសាក់បន្ថែមទៀត តែជាអកុសល កូវីដ១៩ បានទាញយកថវិកាអស់ប្រមាណ២៣០០លានដុល្លាអាមេរិក៕

ដោយៈគង់ សូរិយា

ភ្នំពេញៈ មន្រ្តីជាន់ខ្ពស់ក្រសួងសាធារណៈការ និងដឹកជញ្ជូនបានពិនិត្យលើវឌ្ឍនភាពការងារស្ដីពី ការសុំជំនួយបច្ចេកទេស ក្នុងការសិក្សាគម្រោងផ្លូវចំនួន៦ខ្សែសម្រាប់ស្នើសុំកម្ចីឥណទានពីព្រះរាជាណាចក្រថៃឡង់។

កិច្ចប្រជុំនេះត្រូវបានធ្វើឡើង រវាងលោករដ្ឋលេខាធិការប្រចាំការ តូច ចាន់ កុសល និងលោក Col Saranyu Viriyavejakul D. Sc អនុប្រធានទីភ្នាក់ងារសហប្រតិបត្តិការដើម្បីអភិវឌ្ឍន៍ សេដ្ឋកិច្ចនៃប្រទេសជិតខាងនៃព្រះរាជាណាចក្រថៃឡង់ដ៏(NEDA)។

កិច្ចប្រជុំដែលបានធ្វើឡើងកាលពីថ្ងៃទី២២ វិច្ឆិកា ឆ្នាំ២០២១នេះ ជាលទ្ធផលនៃកិច្ចប្រជុំ ក្រសួងសាធារណការ និងដឹកជញ្ជូននៃកម្ពុជា បានស្នើសុំឱ្យទីភ្នាក់ងារ NEDA ជួយសិក្សាលើខ្សែផ្លូវចំនួន៦ខ្សែ ឋិតនៅក្នុងភូមិសាស្រ្តទឹកដីខេត្តសៀមរាប ខេត្តឧត្តរមានជ័យ ខេត្តបន្ទាយ មានជ័យ និងខេត្តបាត់ដំបងដើម្បីតភ្ជាប់ការដឹកជញ្ជូន និងជំរុញកំណើនសេដ្ឋកិច្ចនៃប្រទេសទាំងពីរ៕

ដោយៈសុខុម

ប៉េកាំងៈ ប្រភពច្បាស់ការបានទម្លាយប្រាប់ទីភ្នាក់ងារព័ត៌មាន Reuters កាលពីថ្ងៃច័ន្ទ ទី២២ វិច្ឆិកា ថា ក្រុមនិយ័តករហិរញ្ញវត្ថុចិន បានចេញសេចក្ដីណែនាំឱ្យធនាគារចិន មួយចំនួន ផ្ដល់ឥណទានបន្ថែមដល់ បណ្ដាក្រុមហ៊ុនអចលនទ្រព្យ សម្រាប់ការអភិវឌ្ឍគម្រោង ដើម្បីបន្ធូរវិបត្តិសាច់ប្រាក់នៅក្នុងវិស័យអចលនទ្រព្យទាំងមូល។

ក្រុមនិយ័តករហិរញ្ញវត្ថុចិន មិនទាន់បើកភ្លើងខៀវជាសាធារណៈនៅឡើយទេថានឹងបន្ធូរបន្ថយ “ខ្សែបន្ទាត់ក្រហមទាំង៣” ជាលក្ខខណ្ឌហិរញ្ញវត្ថុ ដែលធនាគារកណ្ដាលចិន បានដាក់ចេញកាលពីឆ្នាំមុនថា បណ្ដាក្រុមហ៊ុនអភិវឌ្ឍន៍ត្រូវតែបំពេញឱ្យបាន ដើម្បីទទួលបានឥណទានថ្មីៗពីធនាគារ។

ប៉ុន្តែស្រាប់តែកាលពីពេលថ្មីៗ ធនាគារនានាបានធ្វើការកែសម្រួល ការអនុវត្តផ្ដល់ឥណទានរបស់ខ្លួន ដើម្បីឱ្យស្របទៅនឹងសេចក្ដីណែនាំចុងក្រោយ របស់ធនាគារប្រជាជនចិន (PBOC) ជាធនាគារកណ្តាលចិន ដែលជំរុញឱ្យ “បំពេញតម្រូវការហិរញ្ញប្បទានជាប្រក្រតី” ដល់វិស័យអចលនទ្រព្យ។

ប្រភព២ចេញពីធនាគារផ្សេងគ្នា ដែលទទួលបានការណែនាំនេះ ពីក្រុមនិយ័តករចិន បានលើកឡើងថា ថ្វីដ្បិតតែមានការបន្ធូរបន្ថយតិចតួច ចំពោះគោលនយោបាយផ្តល់ឥណទាន ដល់បណ្ដាក្រុមហ៊ុនអភិវឌ្ឍន៍ក្ដី ក៏នៅតែប្រកាន់ខ្ជាប់គោលការណ៍សំខាន់ ដែលថា “ផ្ទះគឺសម្រាប់រស់នៅ មិនមែនសម្រាប់ទិញទុកលក់យកចំណេញឡើយ”។

ប្រភពដដែលបញ្ជាក់ថា ក្រុមនិយតករហិរញ្ញវត្ថុចិន បានណែនាំឱ្យធនាគារនានាពន្លឿនការអនុម័ត ជាពិសេសនូវឥណទាន សម្រាប់អភិវឌ្ឍគម្រោងនានា និងដើម្បីធានាថា ឥណទាននៅជំពាក់ (Outstanding Loan) ដែលផ្ដល់សម្រាប់ការអភិវឌ្ឍគម្រោងនឹងបង្ហាញកំណើនវិជ្ជមាន នៅក្នុងបញ្ជីឥណទានរបស់ពួកគេ ក្នុងខែវិច្ឆិកា បើធៀបនឹងខែតុលា។

ប្រភពទាំង២បានសុំមិនបញ្ចេញ អត្តសញ្ញាណរបស់ខ្លួនឡើយ ដោយសារនេះរឿងនេះជាបញ្ហាដ៏រសើប។
ធនាគារកណ្ដាលចិន PBOC និងគណៈកម្មាធិការនិយ័តកម្មធនាគារ និងធានារ៉ាប់រងចិន (CBIRC) មិនបានឆ្លើយតបភ្លាមៗ ចំពោះសំណើសុំការឆ្លើយបំភ្លឺជុំវិញបញ្ហានេះឡើយ។

ទិន្នន័យរបស់ធនាគារកណ្តាលចិន បានបង្ហាញថា គិតត្រឹមដំណាច់ខែកញ្ញា ឆ្នាំ២០២១ ឥណទាននៅជំពាក់ (Outstanding Loan) ដែលផ្ដល់សម្រាប់ការអភិវឌ្ឍគម្រោងមានចំនួន១២,១៦ទ្រីលានយ័ន (១,៩១ទ្រីលានដុល្លារអាមេរិក) ដោយកើនឡើង០,០២%បើធៀបនឹងឆ្នាំ២០២០៕ Reuters៕

ដោយៈជេស៊ីកា

ភ្នំពេញៈ ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA)​ លោកច្រឹក សុខនីម បានមានប្រសាសន៍ឲ្យដឹងថា សកម្មភាពនៃការទិញ លក់ក្នុងវិស័យអចលទ្រព្យកំពុងមានការវិវត្តល្អប្រសើរ។

លោកបានមានប្រសាសន៍ឲ្យដឹងតាមបណ្តាញ តេឡេក្រាមកាលពីថ្ងៃទី២២ វិច្ឆិកាកន្លងមកថា បច្ចុប្បន្នយើងមើលឃើញថា អ្នកនៅក្នុងវិស័យនេះ បានចាប់ផ្តើមមមាញឹកឡើងវិញ បន្ទាប់ពីរដ្ឋាភិបាលប្រកាសបើកប្រទេសឡើងវិញ ដោយមិនចាំបាច់ធ្វើចត្តាឡីស័កសម្រាប់អ្នកដំណើរជាតិ និងអន្តរជាតិ។

លោកបន្តថា “វិស័យនេះចាប់ផ្តើមមានសញ្ញាល្អ និងវិលត្រលប់ទៅរកភាពប្រក្រតីវិញនៅឆ្នាំ២០២២ ២០២៣ខាងមុខនេះ”។ លោកបន្តថា “សកម្មភាពដែលលេចធ្លោជាងគេក្នុងវិស័យអលនទ្រព្យ គឺការទិញលក់ដីធ្លីមានភាពមមាញឹកជាងគេ”។

លោកច្រឹក សុខនីមបានបន្តថា វិស័យអចលនទ្រព្យនឹងបន្តក្លាយជាមូលដ្ឋានស្នូល ដែលជួយលើកស្ទួយសេដ្ឋកិច្ចជាតិ សម្រាប់រយៈពេលវែងបន្តទៀត ខណៈអ្នកវិនិយោគចិនបាននិងកំពុងចាប់ផ្តើមវិល ត្រលប់មកកម្ពុជាបណ្តើរៗឡើងវិញហើយ។

លោកបន្តថា “អ្វីសំខាន់ដែលយើងឃើញនាពេលនេះ គឺប្រជាពលរដ្ឋបានធ្វើដំណើរដែលបាននាំាំឲ្យមានការកកស្ទះចរាចរណ៍៍ លើដងផ្លូវឡើងវិញហើយ”៕

ដោយៈគង់ សិរីជេស៊ីកា

កំពង់ចាម/ត្បូងឃ្មុំៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបាននិងកំពុងអញ្ជើញជាអធិបតីដ៏ខ្ពង់ខ្ពស់ ក្នុងការសម្ភោធបើកឲ្យដំណើរការស្ពានមិត្តភាពកម្ពុជា ចិនស្ទឹងត្រង់ ក្រូចឆ្មារ និងបើកការដ្ឋានស្ថាបនាផ្កូវជាតិលេខ៧១C នៅព្រឹកថ្ងៃទី២៣ ខែ វិច្ឆិកា ឆ្នាំ២០២១នេះ។

សម្តេចនាយករដ្ឋមន្ត្រី ពិធីបើកការដ្ឋានគម្រោងសាងសង់ផ្លូវជាតិលេខ៧១C ដែលអនុវត្តដោយក្រុមហ៊ុនសំណង់សៀងហៃ (SCG) ក្រោមហិរញ្ញប្បទានសម្បទាន និងជំនួយឥតសំណងពីរដ្ឋាភិបាលនៃសាធារណរដ្ឋប្រជាមានិតចិន។

ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ស្ថិតនៅត្រង់ចំណុចភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម ឆ្លងកាត់ទន្លេមេគង្គទៅត្រើយខាងកើតស្ថិតនៅភូមិក្តុលលើ ឃុំទ្រា ស្រុកក្រូចឆ្មារ ខេត្តត្បូងឃ្មុំ ជាស្ពានឆ្លងកាត់ទន្លេមេគង្គថ្មីមួយទៀតតភ្ជាប់ទឹកដី នៃខេត្តកំពង់ចាមទៅកាន់ទឹកដីនៃខេត្តត្បូងឃ្មុំ ត្រូវ បានបើកការដ្ឋានសាងសង់នៅថ្ងៃទី៨ ខែកុម្ភៈ ឆ្នាំ២០១៨ ក្រោមអធិបតីភាពដ៏ខ្ពង់ខ្ពស់របស់សម្តេចនាយករដ្ឋមន្ត្រី។

ស្ពាននេះមានប្រវែងសរុប១.១៣១ម៉ែត្រ និងទទឹង១៣,៥០ម៉ែត្រ ជាប្រភេទស្ពានបេតុង អាម៉េ ប្រើរយៈពេលសាងសង់ចំនួន៤២ខែ ដោយចំណាយថវិកាសរុបជាង ៥៦លានដុល្លារអាមេរិក។

ស្ពាននេះគឺជាស្ពានយុទ្ធសាស្ត្រមួយយ៉ាងសំខាន់​ សម្រាប់តភ្ជាប់ទំនាក់ទំនងការដឹកជញ្ជូន និងការធ្វើ ដំណើររបស់ប្រជាពលរដ្ឋខេត្តកំពង់ចាម និងខេត្តត្បូងឃ្មុំឱ្យបានងាយស្រួល និងឆាប់រហ័សដែលកន្លងមក ពួកគាត់ធ្វើដំណើរឆ្លងកាត់តំបន់នេះ តាមរយៈការឆ្លងសាឡាង និងជាស្ពានផ្តល់សក្តានុពលខ្ពស់ សម្រាប់បម្រើវិស័យសេដ្ឋកិច្ចជាតិ ធ្វើឱ្យប្រសើរឡើងដល់ជីវភាពរស់នៅកាន់តែល្អប្រសើរ តាមរយៈកំណើននៃការអភិវឌ្ឍ វិនិយោគ និងទេសចរណ៍ផងដែរ៕

ដោយៈ សុធារី

ភ្នំពេញៈ ប្រជាពលរដ្ឋខ្មែរមួយចំនួន ប្រហែលទើបតែលឺពាក្យខុនដូ (Condo) ឬអាផាតមិន (Apartment) ដែលជាភាសាបរទេស ដែលយកមកប្រើប្រាស់នៅក្នុងប្រទេសកម្ពុជា ក្នុងយៈពេលប៉ុន្មានឆ្នាំកន្លងមកនេះ នៅពេលដែលមានវត្តមានអគារខ្ពស់ៗជាច្រើនបានរីកដុះដាលនៅក្នុងទីក្រុងភ្នំពេញ។

ប្រជាពលរដ្ឋខ្មែរមួយចំនួន ហាក់មិនទាន់យល់ដឹងងច្បាស់ពីមុខងារ នៃការប្រើប្រាស់ខុនដូ (Condo) ឬអាផាតមិន (Apartment)នេះ នៅឡើយទេ ខណៈសំណង់អាគារស្នាក់នៅ ដែលពេញនិយមបំផុត គឺចែកចេញជាពីរប្រភេទធំៗគឺ ខុនដូ និងអាផាតមិន។ តើសំណង់ទាំងពីរប្រភេទនេះ មានភាពខុសគ្នាដូចម្តេចខ្លះទៅ?

ខាងក្រោមនេះគឺជាចំនុចខុសគ្នាធំៗនៃអាគារទាំងពីរប្រភេទ

១.ទំហំអាគារ ជាទូទៅខុនដូច្រើន តែមានទំហំធំៗជាងអាផាតម៉ិន ព្រោះផ្ទះល្វែងធម្មតាក៏អាចចាត់ទុកជាអាផាតមិនផងដែរ។

២. ភាពជាម្ចាស់កម្មសិទ្ធិ ខុនដូជាសំណង់អាគារធំៗ ដែលបើកលក់ជាបន្ទប់មួយ (Unit) ឲ្យទៅភ្ញៀវដោយភ្ញៀវទាំងនោះ គឺទទួលបានសិទ្ធិជាម្ចាស់ផ្ទះតែម្តង ខណះដែលអាផាតមិន គឺជាបន្ទប់ (Unit) សម្រាប់ជួលទៅអោយភ្ញៀវស្នាក់នៅ ខុនដូជាធម្មតាត្រូវបានគ្រប់គ្រងដោយសមាគមម្ចាស់ផ្ទះ (HOA)។

ប្រភេទឬផ្នែកនីមួយៗ មានម្ចាស់ដាច់ដោយឡែកពីគ្នា។ អ្នកមានជម្រើសក្នុងការទិញខុនដូដូចការទិញផ្ទះដែរ។ រីឯអាផាតមិនវិញអ្នកមិនអាចទិញឯកតានីមួយៗ ដាច់ដោយឡែកពីគ្នាទេបានទេ ហើយជាទូទៅអគារនីមួយៗមានម្ចាស់តែម្នាក់គត់ ដែលភាគច្រើនជាក្រុមហ៊ុនអចលនទ្រព្យ។

៣. តម្លៃ ថ្លៃជួលអាផាតមិនតែងមានភាពឋិតឋេរ ក្នុងកំឡុងពេលអ្នកកំពុងជួល ប៉ុន្តែមានករណីខ្លះ ដែលវាអាចឡើងថ្លៃជាពិសេស នៅពេលដែលជិតដាច់កុងត្រាដែលភាគច្រើនមានសុពលភាព១ឆ្នាំ។ រីឯតម្លៃវិញគឺអាស្រ័យទៅលើអត្រាទីផ្សារនិងចំនួនឯកតា ហើយអាផាតមិនតម្រូវអោយអ្នកបង់ថ្លៃធ្វើក្រដាសស្នាម ធានារ៉ាប់រង សេវាកម្មសន្តិសុខ និងសត្វចិញ្ចឹមជាដើម។ ចំណែកឯខុនដូវិញ តម្លៃគឺសម្រេចដោយម្ចាស់ខុនដូហើយតម្លៃឡើងចុះ អាស្រ័យលើការព្រមព្រៀងរវាងអ្នកនិងម្ចាស់អគារ។

សម្រាប់ខុនដូខ្លះ តម្រូវអោយអ្នកបង់ថ្លៃសេវាកម្មសមាគមម្ចាស់ផ្ទះ (HOA) និងសេវាកម្មផ្សេងៗទៀតរួមមានខ្សែកាប ទឹកភ្លើង អនាម័យ និងចំណតឡានជាដើមដូចអាផាតមិនដែរ។

៤. ច្បាប់ទម្លាប់ ចំពោះអាផាតមិន ការចែងច្បាប់ទម្លាប់គឺចេញដោយក្រុមហ៊ុនគ្រប់គ្រងទ្រព្យសម្បត្តិ ហើយរាល់ឯកតាទាំងអស់សុទ្ធតែមានច្បាប់ដូចៗគ្នា។ ច្បាប់ទាំងអស់នោះតែងរួមមាន អនុវត្តតាមវិធានការ និងគោលការណ៍ណែនាំនៃការជួល បង់ថ្លៃជួលឱ្យទាន់ពេលវេលា មិនបង្កសម្លេងរំខានដល់អ្នកជិតខាង ចោលសំរាមអោយបានត្រឹមត្រូវ និងមានសណ្តាប់ធ្នាប់។ល។

ច្បាប់សម្រាប់ខុនដូត្រូវបានរៀបចំដោយ HOA ជាទូទៅវាមានលក្ខណៈស្រដៀងនឹងអាផាតមិនដែរ។ លើសពីនេះទៅទៀត ម្ចាស់អគារនិមួយៗមានសិទ្ធក្នុងការដាក់ច្បាប់បន្ថែមទៀត ដូចនេះអ្នកគួរតែអានកុងត្រា អោយច្បាស់លាស់មុននឹងសម្រេចចិត្តថា ជួលបន្ទប់។

៥. សម្ភារៈបរិក្ខារប្រើប្រាស់ ខុនដូ តែងតែមានបំពាក់គ្រឿងបរិក្ខារ សម្បូរបែបដូចជាអាងហែលទឹក កន្លែងចតឡាន កន្លែងកំសាន្ត ក្លឹបហាត់ប្រាណ បន្ទប់ស្ទីមសោណា ឬភោជនីយដ្ឋានជាដើម។ ផ្ទុយទៅវិញ អាផាតមិនអាចមិនមានគ្រឿងបរិក្ខារទាំងនេះ ឬមានត្រឹមតែតិចតួចនៃពួកវាតែប៉ុណ្ណោះ។ ចំណុចដូចគ្នាភាគច្រើនរួមមាន ចំណតរថយន្ត អាងហែលទឹក កន្លែងហាត់ប្រាណ កន្លែងក្មេងលេង ការិយាល័យកណ្តាល។

សោភ័ណភាពនិងគុណភាពសំណង់អគារក្នុងក្រៅ និងគ្រឿងសង្ហារឹមមានការខុសគ្នាទៅតាមតម្លៃ ទីតាំងនិងគម្រោងប្លង់របស់អគារនោះ។ បន្ទប់របស់អាផាតមិនគឺសុទ្ធតែដូចៗគ្នា រីឯខុនដូវិញអាចមានភាពខុសគ្នាខ្លះ អាស្រ័យលើការតុបតែងរបស់ម្ចាស់ឯកតា។

៦. ការថែទាំ និងជួសជុល

អាផាតមិនភាគច្រើន តែងផ្តល់សេវាកម្មជួសជុលដោយឥតគិតថ្លៃ។ ពេលជួបប្រទះបញ្ហា អ្នកគួរទាក់ទងទៅខាងផ្នែកគ្រប់គ្រងអគារ ដើម្បីអោយពួកគេជួយរកដំណោះស្រាយ។ នោះអ្នកមិនចាំបាច់ចំណាយពេល និងថវិការបន្ថែមដើម្បីរកជាងមកជួលជុល។

សម្រាប់អ្នករស់នៅក្នុងខុនដូវិញ ពេលជួបបញ្ហាអ្នកគឺត្រូវទាក់ទងខាងម្ចាស់ផ្ទះ ឬចាត់ការបញ្ហានេះដោយខ្លួនឯង។ នេះមានន័យថា អ្នកអាចនឹងត្រូវចំណាយថ្លៃជួសជុលបន្ថែមលើថ្លៃសេវាផ្សេងៗទៀត ហើយម្យ៉ាងទៀតម្ចាស់ផ្ទះខ្លះអាចពិបាក ក្នុងការទាក់ទងដូច្នេះបញ្ហារបស់អ្នក មិនអាចដោះស្រាយភ្លាមៗនោះឡើយ។

ដូចនេះ អ្នកត្រូវអានកិច្ចព្រមព្រៀងអោយច្បាស់ថា អ្នកណាជាអ្នកទទួលខុសត្រូវក្នុងការជួសជុលផ្ទះរបស់អ្នកមុននឹងអ្នកសម្រេចចិត្តជួល៕