រដ្ឋាភិបាលគ្រោងសាងសង់ផ្លូវថ្មីមួយខ្សែតភ្ជាប់ពីតំបន់ល្វាឯមទៅកាន់ក្រុងព្រៃវែង

ដោយៈគង់ សូរិយា

ភ្នំពេញៈ រដ្ឋាភិបាលគ្រោងសាងសង់ផ្កូវជាតិថ្មីមួយខ្សែ ដែលតភ្ជាប់ពីតំបន់ល្វាឯម ក្នុងស្រុកខ្សាច់កណ្តាល ទៅកាន់ទីរួមខេត្តព្រៃវែងនាពេលខាងមុខនេះ។

អនុរដ្ឋលេខាធិការក្រសួងសាធារណៈការ និងដឹកជញ្ជូន លោកវ៉ាស៊ីម សូរិយាបានមានប្រសាសន៍ឲ្យដឹង តាមទូរស័ព្ទកាលពីថ្ងៃទី២០ មករាកន្លងមកថា ផ្លូវថ្មីនេះមិនគ្រាន់តែស្ថិតនៅក្នុងផែន​ការនៅឡើយ មិនទាន់បានសិក្សាច្បាស់លាស់នៅឡើយទេ ប៉ុន្តែបើផ្លូវនេះ​សាងសង់ វានឹងជាផ្លូវកាត់មួយពីភ្នំពេញ ទៅកាន់ខេត្តព្រៃវែង ព្រោះផ្លូវជាតិលេខ១មានចម្ងាយឆ្ងាយ។

លោកបន្តថា “មែនទែនទៅផ្លូវនេះ មានខ្សែផ្លូវដែលមានស្រាប់មួយចំនួនហើយ ប៉ុន្តែបើសាងសង់គឺត្រូវសាងសង់ផ្កូវថ្មី ប្រវែងប្រមាណ ២៦គីឡូម៉ែត្រ ដើម្បីតភ្ជាប់ផ្លូវនេះ”។ លោកបន្តថា ទោះជាយ៉ាងណា វាមិនទាន់​ស្ថិតក្នុងផែនការអាទិភាពនៅឡើយទេ”។

លោកវ៉ាស៊ីម សូរិយា បានបន្តទៀតថា ការស្ថាបនាផ្កូវជាតិនិមួយៗ ត្រូវធ្វើតាមជំហ៊ាន និងតាមកញ្ចប់ថវិកាអាទិភាពរបស់រដ្ឋាភិបាល ជាក់ស្តែងគំរោងមួយចំនួនត្រូវបានលើកពេល ដោយសារគំរោងអាទិភាពត្រូវបានដាក់ក្នុងផែនការសាងសង់ជាមុន ព្រោះវាជាការបន្ទាន់និងចាំបាច់ ដើម្បីដោះស្រា​យបញ្ហាចរាចរណ៍ផង និងលើកស្ទួយសេដ្ឋកិច្ចសង្គមផង៕

រដ្ឋាភិបាលចេញប្រកាសស្ដីពី បែបបទនិងបរិបថ នៃការផ្ដល់លិខិតអនុញ្ញាតសាងសង់សំណង់

ដោយៈគង់ សូរិយា

ភ្នំពេញៈ រដ្ឋាភិបាលតាមរយៈក្រសួងរៀបចំដែនដី នគរូបនីយកម្ម និងសំណង់ បានចេញប្រកាសស្ដីពី បែបបទនិងបរិបថ នៃការផ្ដល់លិខិតអនុញ្ញាតសាងសង់សំណង់ ដោយរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។

យោងតាមប្រកាស ដែលបណ្តាញព័ត៌មានទទួលបាននៅថ្ងៃទី២០ ខែមករា ឆ្នាំ២០២២កន្លងមក បានលំអិតនូវលិខិតខាងក្រោមនេះ។

បុរីប៉េង ហួតផ្តល់ការបញ្ចុះតម្លៃរហូតដល់8% + 1% និងអាំងប៉ាវហេងៗរហូតដល់8,000ដុល្លារ

ដោយៈសហការី

ភ្នំពេញៈ ជូនពរឆ្នាំថ្មីពីបុរី ប៉េង ហួត! ក្នុងឱកាសពិសេសសម្រាប់ដើមឆ្នាំ២០២២ ជាមួយប្រូម៉ូសិនអបអរសាទរ ក្នុងឱកាសពិធីបុណ្យចូលឆ្នាំថ្មី ប្រពៃណីចិន អតិថិជនដែលកក់ផ្ទះនៅគ្រប់គម្រោងទាំងអស់ ចាប់ពីថ្ងៃនេះ នឹងមានឱកាសទទួលបាន ការបញ្ចុះតម្លៃមិនធ្លាប់មាន ព្រមជាមួយការចាប់អាំងប៉ាវណាមួយក្នុងចំណោមអាំងប៉ាវហេងៗទាំង៦ពីបុរី ប៉េង ហួត។

តើការផ្ដល់ជូនសម្រាប់ប្រូម៉ូសិនចូលឆ្នាំចិនពី បុរី ប៉េង ហួត​ មានអ្វីខ្លះ?

  • ការបញ្ចុះតម្លៃរហូតដល់ 8%
  • ការបញ្ចុះតម្លៃបន្ថែម 1% សម្រាប់គ្រប់គម្រោង
  • ការបង្វិលកងសំណាងដើម្បីទទួលបានអាំងប៉ាវហេងៗដែលមានដូចជា ការបញ្ចុះតម្លៃរហូតដល់ $8,000,​ ទូរសព្ទដៃ iPhone 13 Pro Max, ម៉ូតូអាគុយដ៏ទំនើប, ឈុតកង់ Giant, ទូសម្លាប់មេរោគ, ម៉ាស៊ីនបន្សុទ្ធខ្យល់ និងរង្វាន់ជាច្រើនទៀត

4 មិនតែប៉ុណ្ណោះ អតិថិជនក៏នឹងមានជម្រើសបង់ប្រាក់ កាន់តែងាយស្រួល ដោយការបង់រំលស់ជាមួយធនាគារដៃគូសហការ ដោយអត្រាការប្រាក់ចាប់ពី 4.39% ឡើងទៅ និងទំហំកម្ចីរហូតដល់ 100% ថែមទៀតផង។

ការផ្ដល់ជូននេះមានសុពលភាពចាប់ពីថ្ងៃនេះ រហូតដល់ថ្ងៃទី៣១ ខ មករា ឆ្នាំ២០២២ ប៉ុណ្ណោះ។

ដូច្នេះសូមរួសរាន់ឡើងដើម្បីកុំឱ្យឱកាសចំណេញដ៏ច្រើនសន្ធឹកសន្ធាប់នេះរំលងផុតឱ្យសោះ!។

ដើម្បីជ្រាបព័ត៌មានកាន់តែច្បាស់ សូមទាក់ទងទៅបុគ្គលិកផ្នែកលក់របស់បុរី ប៉េង ហួត តាមរយៈលេខទូរសព្ទ៖ 098 / 016 / 017 596 789 ឬចូលរួមជាមួយ Telegram Channel https://t.me/boreypenghuoth ៕

 

 

 

គំរោងសាងសង់Express Trainភ្នំពេញ ព្រះសីហនុ សៀមរាប និងប៉ោយប៉ែតស្ថិតក្នុងជម្រើសសិក្សាចំនួនពីរ

ដោយៈ គង់ សូរិយា

ភ្នំពេញៈ មន្រ្តីអ្នកនាំពាក្យ និងជាអនុរដ្ឋលេខាធិការក្រសួងសាធារណៈការ និងដឹកជញ្ជូន លោកវ៉ាស៊ីម សូរិយាបានមានប្រសាសន៍ថា គំរោងសិក្សាសាងសង់ ផ្លូវរថភ្លើងល្បឿនលឿនភ្នំពេញ ព្រះសីហនុ ភ្នំពេញ សៀម​រាប និងក្រុងប៉ោយប៉ែត កំពុងសិ្ថតក្នុងការពិចារណាលើជម្រើសចំនួនពីរ។

លោកបានមានប្រសាសន៍ឲ្យដឹងតាមទូរស័ព្ទ នៅរសៀលថ្ងៃទី២០ មក​រានេះថា បន្ទាប់ពពីមានអនុសាសន៍ចង្អូល បង្ហាញពីសម្តេចតេជោហ៊ុន សែននាយករដ្ឋមន្រ្តីនៃកម្ពុជា ក្រសួងសាធារណៈការ និងក្រសួងសេដ្ឋកិច្ចនិងហិរញ្ញវត្ថុបានលើកឡើងនូវជម្រើសចំនួនពីរ ទី១ សាងសង់លើផ្លូវចាស់ ដែលមានស្រាប់ពីភ្នំពេញ ទៅកាន់ខេត្តព្រះសីហនុ ប៉ុន្តែបើធ្វើបែបនេះទូរថភ្លើង និងជំរឹងផ្លូវរថភ្លើងចាស់ នឹងត្រូវចោលទាំងអស់។

ជម្រើសទី២ គឺសាងសង់ផ្លូវថ្មីតែម្តង ដែលជម្រើសបែបនេះ ប្រទេសវៀតណាមបានធ្វ់រួចហើយ។

លោកវ៉ាស៊ីម សូរិយាបានបន្តថា យ៉ាងណាក៏ដោយ បើយើងតភ្ជាប់ផ្លូវ​រថភ្លើងពីភ្នំពេញ ទៅកាន់ខេត្តសៀមរាប ហើយឆ្ពោះទៅកាន់ក្រុងប៉ោយប៉ែត ខេត្តបន្ទាយមានជ័យ ក៏ជាចំណុចប្រឈមផងដែរ ដោយសារប្រទេសថៃគ្មាន​ផែនការសាងសង់Express Trainមកកាន់ក្រុងប៉ោយប៉ែតទេ ប៉ុន្តែបើ​សាងសង់តភ្ជាប់តាមរយៈផ្លូវជាតិលេខ១ ទៅកាន់ក្រុងបាវិត ខេត្តស្វាយរៀងភាគីវៀតណាម នឹងយល់ព្រមសាងសង់ផ្លូវរថភ្លើងល្បឿនលឿនឬExpress Way មកកាន់ព្រំដែនបាវិត។

លោកបន្តឲ្យដឹងទៀតថា ទោះជាយ៉ាងណារហូទមកទល់ពេលនេះ ផែន​ការនេះ មិនទាន់សម្រេចសិក្សាដោយក្រសួងសាធារណៈការ និងក្រសួ​ង​​សេដ្ឋកិច្ច និងហិរញ្ញវត្ថុនៅឡើយទេ ប៉ុន្តែបើត្រូវសិក្សាគឺក្រុមហ៊ុនចិននឹងសិក្សាលើគំរោងនេះ តែយ៉ាងណារហូតមកទល់ពេលនេះ លោកមិនទាន់មានព៌តមានពីក្រុមហ៊ុនណាមកសិក្សានៅឡើយទេ។

យ៉ាងណាក៏ដោយនៅឆ្នាំាំ២០២១កន្លងមកនេះ ក្រុមហ៊ុនលំដាប់យក្សដែលសាងសង់ផ្លូវរថភ្លើងច្រើនជាងគេ នៅប្រទេសចិនChina Railwaysបានមកបោះទីតាំង និងបង្កើតការិយាល័យតំណាងនៅកម្ពុជារួចហើយ។ ក្រុមហ៊ុននេះ ក៏បានបញ្ជាក់ពីការសិក្សាផ្លូវល្បឿនលឿនភ្នំពេញ បាវិតបញ្ចប់ដោយគ្រោងចំណាយថវិកាសាងសង់ ប្រមាណ២០០០លានដុល្លារអាមេរិកផងដែរ៕

ក្រុមហ៊ុនដ៏ធំរបស់សឹង្ហបុរីគ្រោងពង្រីកទុនវិនិយោគ៤០០លានដុល្លារបន្ថែមនៅកម្ពុជា

ដោយៈជេស៊ីកា

ភ្នំពេញៈ ក្រុមហ៊ុនHLHដ៏ធំរបស់សឹង្ហបុរី គ្រោងបោះទុនវិនិយោគទឹកប្រាក់៤០០លានដុល្លារបន្ថែមទៀតនៅកម្ពុជា ខណៈក្រុមហ៊ុននេះបានបោះទុនរាប់រយលានដុល្លាររួចហើយនៅប្រទេសនេះ។

យោងតាមរបាយការណ៍របស់ក្រុមហ៊ុននេះបានឲ្យដឹងថា គម្រោងអចលនទ្រព្យធំៗចំនួន២របស់ក្រុមហ៊ុន Hong Lai Huat (HLH) នៅប្រទេសកម្ពុជា Royal Platinum និងD’Seaview កំពុងដំណើរការទៅដោយរលូនទាំងការសាងសង់ និងការលក់បានដោយរលូន ទោះប្រឈមមុខនឹងវិបត្តិកូវីដ១៩ក្តី។

យោងរបាយការណ៍សរុបស្ថានភាពអាជីវកម្មបស់ក្រុមហ៊ុន គម្រោង Royal Platinum នៅភ្នំពេញ បានសាងសង់ដល់ជាន់ទី១០ហើយ ដែលនៅសល់១៨ជាន់ទៀត ខណៈការលក់សម្រេចបានប្រមាណ៩០ភាគរយ។

ជាមួយគ្នានេះ គម្រោង D’Seaview នៅខេត្តព្រះសីហនុ ក៏ដំណើរការដោយរលូន ដោយកាលពីឆ្នាំមុន ត្រូវបានលក់ផ្នែកសណ្ឋាគារ ដោយជោគជ័យ។

ក្រុមហ៊ុន HLH ក៏បានទិញដី២កន្លែងទៀតដែរ ដោយមួយកន្លែងនៅភ្នំពេញ និងមួយទៀតនៅខេត្តព្រះសីហនុ។

យោងតាម Edge Prop គម្រោងទាំង២របស់ក្រុមហ៊ុនHLH នាពេលបច្ចុប្បន្ន កំពុងស្ថិតក្រោមការសិក្សាពីលទ្ធភាព ហើយត្រូវបានគេរំពឹងថាមានតម្លៃវិនិយោគប្រមាណ៤០០លានដុល្លារអាមេរិក។

កាលពីខែតុលា ឆ្នាំមុន ក្រុមហ៊ុននេះ ក៏បានបានចុះហត្ថលេខាលើកិច្ចព្រមព្រៀងបណ្តាក់ទុនរួមជាមួយនឹង HSC Group ដើម្បីស្វែងរករ៉ែនៅខេត្តកំពង់ស្ពឺ។

លើសពីនេះនេះ ក្រុមហ៊ុនHLH Development (HLHD) និង Smart Winner កាលពីថ្មីៗនេះ ក៏បានព្រមព្រៀងវិនិយោគរួមគ្នាបង្កើតគម្រោងអភិវឌ្ឍចម្រុះថ្មីមួយកន្លែង តម្លៃប្រមាណ៥០លានដុល្លារ ស្ថិតនៅលើផ្ទៃដី១១,៥ ហិកតា ក្នុងក្រុងព្រះសីហនុផងដែរ៕

 

គម្រោងព្រលាយន្តហោះអន្តរជាតិតេជោចំណាយទឹកប្រាក់អស់៣៩០លានដុល្លារហើយគិតមកត្រឹមថ្ងៃនេះ

ដោយៈ លក្ខិណា

ភ្នំពេញៈ គិតត្រឹមថ្ងៃទី២០ មករា ២០២២ គម្រោងអភិវឌ្ឍន៍ព្រលានយន្តហោះអន្តរជាតិតេជោ បានចំណាយទឹកប្រាក់ក្នុងការសាងសង់៣៩០ លានដុល្លារអាមេរិក និងសម្រេចបានប្រមាណ៣០ភាគរយ នៃសំណង់ទាំងមូល។

ទឹកប្រាក់៣៩០លានដុល្លារអាមេរិក ដែលបានចំណាយលើការសាងសង់គម្រោងព្រលានយន្តហោះអន្តរជាតិនេះ មិនទាន់រាប់បញ្ចូលនូវថ្លៃដីដែលវិនិយោគដោយក្រុមហ៊ុនCAICនៅឡើយ ។នេះបើតាមសេចក្ដីប្រកាសព័ត៌មានរបស់ក្រុមហ៊ុនអភិវឌ្ឍន៍ ព្រលានយន្តហោះអន្តរជាតិមួយនេះនៅរសៀលថ្ងៃទី២០មករា ២០២២ ។

គម្រោងអភិវឌ្ឍន៍ព្រលានយន្តហោះអន្តរជាតិតេជោ ក៏បានលក់សញ្ញាបណ្ណបំណុលទៅដល់ធនាគារនានា នៅក្នុងប្រទេសកម្ពុជាជាច្រើនផងដែរជាក់ស្ដែងនៅរសៀលថ្ងៃទី២០ មករា ២០២២នេះ គម្រោងអភិវឌ្ឍន៍ព្រលានយន្តហោះអន្តរជាតិតេជោ បានចុះហត្ថលេខាជាមួយធនាគារវីង ក្នុងការលក់មូលបត្របំណុល ទៅកាន់ធនាគារវីងចំនួន២លានដុល្លារអាមេរិក។

តាមសេចក្ដីព័ត៌មាន ក្រោយពិធីចុះហត្ថលេខានេះបានឱ្យដឹងថា ទឹកប្រាក់ដែលទទួលបាន ពីការលក់សញ្ញាបណ្ណនេះ នឹងត្រូវប្រើប្រាស់សម្រាប់ការសាងសង់ និងការអភិវឌ្ឍគម្រោងសាងសង់ អាកាសយានដ្ឋានអន្តរជាតិតេជោ នៅខេត្តកណ្ដាល។

ក្រៅពីធនាគារវីង គម្រោងអភិវឌ្ឍន៍អាកាសយានដ្ឋានអន្តរជាតិតេជោ បានលក់សញ្ញាបណ្ណបំណុល ឬសញ្ញាប័ណ្ណ ទៅកាន់ធនាគារជាច្រើននៅកម្ពុជា រួមមានធនាគារអេស៊ីលីដា ទិញសញ្ញាបណ្ណ៣០លានដុល្លារអាមេរិក ធនាគារ ធនាគារពាណិជ្ជអាល់ហ្វា ទិញ១០លានដុល្លារអាមេរិក ធនាគារប្រៃសណីយ៍ទិញ១០លានដុល្លារអាមេរិក ធនាគារវឌ្ឍនៈអាស៊ីចំកាត់ (ABA ) ទិញសញ្ញាបណ្ណ៣០លានដុល្លារអាមេរិក ធនាគារទិញចំនួន២០លានដុល្លារ​អាមេរិក ។

សម្ដេចតេជោហ៊ុនសែន នាយករដ្ឋមន្ត្រីនៃកម្ពុជាធ្លាប់បានអំពាវនាវឱ្យធនាគារ និងក្រុមហ៊ុនក្នុងស្រុកចូលរួមក្នុងទិញ សញ្ញាបណ្ណពីក្រុមហ៊ុនអភិវឌ្ឍន៍ គម្រោងព្រលានយន្តហោះអន្តរជាតិតេជោ ដើម្បីឱ្យគម្រោងនេះអាចដំណើរការទៅមុខបានលឿន និងឆាប់រហ័ស បម្រើដល់យន្តហោះធំៗចុះចតនៅក្នុងប្រទេសកម្ពុជាបាន៕

អាថ៌កំបាំង៧យ៉ាងដែលអ្នកវិនិយោគលើវិស័យអចលនទ្រព្យមិនគួរអានរំលង

ដោយ: ម៉ាលីស

ភ្នំពេញ: វិស័យអចលនទ្រព្យបានដើរតួនាទីយ៉ាងសំខាន់ ក្នុងការ លើ​កស្ទួយនូវសេដ្ឋកិច្ចកម្ពុជាហើយ វាកំពុងមានការរីកចំរើនខ្លាំងផងដែរ ស្របពេលចំនួ​នអ្នកវិនិយោគ លើផ្នែកអចលនទ្រព្យនេះបានកើនជាលំដាប់។

ដូចនេះតើធ្វើដូចម្តេច ដើម្បីមានឱកាសក្នុងការវិនិយោគទុនលើអចលនទ្រព្យ? យោងតាមសៀវភៅ “Get Rich through Property without Money” បានរៀបរាប់ពី អាថ៍កំបាំមួយចំនួនក្នុងការវិនិយោគទុនលើអចលនទ្រព្យដែលមានដូចខាងក្រោម៖

១. ចូរខ្លាច ខណៈពេលអ្នកដទៃហ៊ាន

បើអ្នកវិនិយោគទុនលើអចលនទ្រព្យ រឺក្នុងទីផ្សារភាគហ៊ុនខណៈពេលដែលអ្នកដទៃ មិនហ៊ានរឺសូម្បីតែខ្លួនអ្នកក៏មិនហ៊ាន អ្នកត្រូវតស៊ូជាមួយនឹងការភ័យខ្លាច ក្នុងចិត្តខ្លួនឯងឱ្យខ្លាំងតាមដែលអាចធ្វើបាន។ អ្នកកំពុងតែវិនិយោគ ធ្វើត្រូវកាលៈទេសៈហើយ ហេតុផលមួយផ្នែក គឺដោយសារតែខណៈនោះអ្នកនឹងវិនិយោគទុន ដោយការប្រុងប្រយ័ត្នមិនប្រមាថ ដោយយុទ្ធវិធីល្អិតល្អន់និងគ្រប់ជ្រុងជ្រោយ អ្នករមែងសម្រេចនូវជោគជ័យ។

២. កុំរង់ចាំដល់ចំណុចខ្ពស់បំផុត ឬទាបបំផុត

ចូរកុំព្យាយាមប៉ាន់ស្មានស្ថានការណ៍សេដ្ឋកិច្ចថា នឹងទៅជាយ៉ាងម៉េចព្រោះវាតែងតែខុសគ្នាជានិច្ច។ ការព្យាយាមទិញឲ្យបានថោកបំផុត ឬថោកជាងនេះ ធ្វើឲ្យភ្លាត់ឱកាសក្លាយជាម្ចាស់អចលនទ្រព្យល្អៗ បានដោយគួរ ឲ្យស្ដាយ។

ជាច្រើនលើកយើងឃើញហើយថា តម្លៃដីបរិវេណនេះ នឹងឡើងថ្លៃយ៉ាងពិតប្រាកដ ដោយសារតែមានការវិនិយោគទុនហាងខ្នាតធំ ឬមានការធ្វើផ្លូវថ្នល់ឆ្លងកាត់ តែយើងក៏នៅតែចង់រង់ចាំ។ ជាពិសេសប្រសិនបើពេលនោះសេដ្ឋកិច្ចមិនល្អ ហើយយើងគិតវិភាគ ឬប៉ាន់ប្រមាណថាសេដ្ឋកិច្ចក្នុងអនាគត នឹងធ្លាក់ចុះជាងនេះទៅទៀត។

៣. គ្រប់ទីតាំងទាំងអស់ជារបស់ល្អបាន ស្ថិតនៅលើតម្លៃ

ទោះបីជានៅទីតាំងមិនល្អ រឺមានអត្រានៃការរីកចម្រើនទាប ក៏មានរបស់ល្អដែរ បើតម្លៃអចលនទ្រព្យ លក់ថោកជាងតម្លៃទីផ្សារខ្លាំង ទើបយើង គួរដឹងតម្លៃទីផ្សាររបស់ទីតាំង កន្លែងឲ្យបានច្រើនបំផុត ដើម្បីកុំឱ្យភ្លាត់ឳកាសល្អៗ។

សម្រាប់ទីតាំងមិនសូវល្អ មនុស្សភាគច្រើនតែងតែចង់ទិញ ក្នុងតំលៃថោកជាងតម្លៃទីផ្សារច្រើនគួរសម បើមិនអញ្ចឹងទេពួកគេនឹងមិនទិញទេ។ ដូច្នេះ ទើបតម្លៃដែលថោកជាងតម្លៃទីផ្សារ ក្លាយទៅជាតម្លៃទីផ្សារដោយស្វ័យប្រវត្តិ ហើយអ្នកជំនាញត្រូវទិញឲ្យបាន “ថោកជាង” តម្លៃទីផ្សារនោះដើម្បីមានឱកាស ក្នុងការលក់បន្ត ក្នុងតម្លៃ ”ថោក” ដែលនឹងនាំអោយបានចំណេញ។

៤. រកមើលមនុស្សដែលចង់ទិញព្រមគ្នា នឹងការរកមើលអចលនទ្រព្យ

មនុស្សជាច្រើនគ្មានពេលវេលា នឹងមិននៅក្នុងធុរកិច្ចអចលនទ្រព្យទេ តែចង់ទិញដើម្បីធ្វើធុរកិច្ចស្នាក់នៅ។ យើងអាចស្វែងរកដីធំមួយកន្លែងហើយបែងលក់ដើម្បីកេងចំណេញ ដោយរក្សាដីដែលនៅសល់ទុកខ្លួនឯង ដែលនេះ នឹងអាចជួយកាត់បន្ថយដើមទុនរបស់យើងបាន។

៥. បន្ថែមតំលៃ

យើងអាចបន្ថែមតម្លៃ រឺValue Added ឲ្យដល់អចលនទ្រព្យ ដើម្បីសាងប្រាក់ចំណូលច្រើនឡើង ដូចជាការរចនាម៉ូដថ្មីៗទាន់សម័យ ប្លែកភ្នែក កាត់ដីមួយផ្នែកលក់ទិញដីបន្ថែម ស្វែងរកសេវាកម្មបន្ថែម ដូចជា spa កន្លែ​ងហាត់ប្រាណ អាងហែលទឹក។ អចលនទ្រព្យនិងជាធុរកិច្ចដ៏ល្អ សម្រាប់អ្នកមានគំនិតច្នៃប្រឌិត។

៦. រួបរួមថាមពលអចលនទ្រព្យយ៉ាងតិចពីរប្រភេទ

ធុរកិច្ចនិងអចលនទ្រព្យ រួមទាំងការពង្រាយភាគហ៊ុន ចូលទៅកាន់ទីផ្សារភាគហ៊ុនអាចរួមគ្នាបាន ដូចជា យកធុរកិច្ចចូលទៅក្នុងចុះបញ្ជី ក្នុងទីផ្សារភាគហ៊ុន ឬផ្គួបសហគ្រាសដទៃទៀត ជាមួយនិងធុរកិច្ច ដែលអាចបំពេញបន្ថែមឲ្យគ្នាទៅវិញទៅមកបាន។

៧ ជាធនាគារដោយខ្លួនឯង

មនុស្សជាច្រើនមានប្រក្រតីកម្ម ចង់ទិញផ្ទះតែទាក់ត្រង់បញ្ហាការសុំខ្ចីលុយពីធនាគា អ្នកអាចលក់ក្នុងលក្ខណៈទិញបណ្តាក់ ដោយមិនចាំបាច់ឆ្លងកាត់ធនាគារជា និងធ្វើកិច្ចសន្យាទិញលក់ជាមួយគ្នាឯង នេះនឹងធ្វើឲ្យអ្នកអាចលក់បានងាយឡើង ព្រមទាំងបានការប្រាក់ ក្នុងអត្រាដ៏ល្អទៀតផង បើអ្នកទិញមិនចង់បង់បន្ត អ្នកក៏អាចយកអចលនទ្រព្យ មកលក់ឱ្យអ្នកដទៃបាន នេះដូចគ្នានឹងប្រព័ន្ធដែលប្រើក្នុងធនាគារដែរ៕

ថៃដំឡើងថ្លៃសេវាផ្ទេរកម្មសិទ្ធិអចលនទ្រព្យ និងបញ្ចុះថ្លៃសេវាឥណទានគេហដ្ឋានដើម្បីជំរុញវិស័យអចលនទ្រព្យ

ដោយៈស្រីលីស

បាងកក: ប្រទេសថៃបានប្រកាសផែនការដំឡើងថ្លៃ សេវាផ្ទេរកម្មសិទ្ធិអចលនទ្រព្យ និងបញ្ចុះថ្លៃសេវាឥណទានគេហដ្ឋាន ដើម្បីជំរុញទីផ្សារអច​ល​នទ្រព្យ និងស្ដារសេដ្ឋកិច្ចដែលរងផលប៉ះពាល់ខ្លាំង ដោយសារការរីករាលដាលវីរុសកូវីដ-១៩។

យោងតាមអ្នកនាំពាក្យរដ្ឋាភិបាលកាលពីថ្ងៃអង្គារ ទី១៨ មករា ឱ្យដឹងថា ថ្លៃសេវាផ្ទេរកម្មសិទ្ធិអចលនទ្រព្យ និងឥណទានគេហដ្ឋាន នឹងនៅតែរក្សាទុកកម្រិត០.០១%រហូតដល់ដំណាច់ឆ្នាំ២០២២ សម្រាប់អ្នកដែលធ្វើពាណិជ្ជកម្មអចលនទ្រព្យ ដែលមានតម្លៃមិនលើសពី៣លានបាត (ប្រហែ​ល៩០.៨១០ដុល្លារអាមេរិក) និងអ្នកដែលទទួលឥណទានគេហដ្ឋានមិនលើសពី៣លានបាតក្នុងមួយប្រតិបត្តិការ។

ចំណាត់ការ ដែលបានចាប់ផ្តើមដំបូងក្នុងឆ្នាំ២០១៩ ហើយគ្រោងបញ្ចប់នៅថ្ងៃទី៣១ ខែធ្នូ ឆ្នាំ ២០២១ រួមមានទាំងការបញ្ចុះថ្លៃសេវាផ្ទេរកម្មសិទ្ធិអចលនទ្រព្យពី២% មកនៅត្រឹម០,០១% និងថ្ងៃសេវាឥណទានគេហដ្ឋានពី១%មកនៅត្រឹម០,០១%ផងដែរ។

យោងតាមសេចក្តីប្រកាសរបស់រាជរដ្ឋាភិបាលឱ្យដឹងថា ការបញ្ចុះតម្លៃលើលំណង់ប្រភេទលំនៅដ្ឋាននេះ នឹងចូលជាធរមានភ្លាមៗ។ កម្មវិធីដែលគ្របដណ្តប់ទាំងអចលនទ្រព្យថ្មី និងអចលនទ្រព្យបន្តពីម្ចាស់ដើមនេះ អនុវត្តតែចំពោះពលរដ្ឋថៃប៉ុណ្ណោះ។

ប្រព័ន្ធផ្សព្វផ្សាយក្នុងស្រុកបានចុះផ្សាយថា ក្រសួងហិរញ្ញវត្ថុថៃ រំពឹងថា វិធានការនេះ នឹងជួយបង្កើនប្រតិបត្តិការទិញ លក់អចលនទ្រព្យចំនួន២៩១ពាន់លានបាត (៨,៧៩ពាន់លានដុល្លារអាមេរិក) ហើយនឹងធ្វើឱ្យផលិតផលក្នុងស្រុកសរុប (GDP) របស់ប្រទេសនេះ ទទួលបានកំណើន០,៥៨%៕  Xinhuanet៕

កំណើនតម្លៃដីធ្លីតាមបណ្ដោយផ្លូវ៥១បានកើនឡើងពី១០ទៅ១៥ភាគរយ

ដោយ: ម៉ាលីស

ភ្នំពេញ: ផ្លូវជាតិលេខ៥១ ត្រូវបានចាត់ទុកជាផ្លូវដ៏សំខាន់ ក្នុងការធ្វើពាណិជ្ជកម្ម ឧស្សាហកម្មនិងលំនៅឋានទាំងនៅពេលបច្ចុប្បន្ន និងអនាគត ហើយតម្លៃដីធ្លីនៅតំបន់នេះក៏ឃើញថា មានកំណើនឡើងជាបន្តបន្ទាប់ ជាក់ស្ដែងឆ្នាំកន្លងទៅ តម្លៃដីធ្លីក្នុងតំបន់មួយនេះ បានកើនឡើងចន្លោះពី១០ទោ១៥ភាគរយកាលពីឆ្នាំមុន។

លោកអ៊ឹង ប៊ុនហួតប្រធានផ្នែកទីផ្សារ នៃក្រុមហ៊ុនអចលនទ្រព្យ PIXUI Property បានឱ្យដឹងតាមទូរស័ព្ទនាព្រឹកថ្ងៃទី២០ មករានេះថា តាមការប៉ាន់ស្មានតម្លៃដីធ្លី នៅតំបន់ផ្លូវ៥១នៃខេត្តកំពង់ស្ពឺ ឃើញថាមានកំណើនប្រមាណ១០ទៅ១៥ភាគរយ ដែលធ្វើឱ្យដីនៅតំបន់តាមបណ្ដោយផ្លូវជាតិលេខ៥១ ដែលជាប់ផ្លូវបច្ចប្បន្ន មានតម្លៃ៥០ដុល្លារទៅ១០០ដុល្លារអាមេរិកក្នុងមួយម៉ែត្រការ៉េ ពោលគឺជាប្រភេទដីមិនទាន់អភិវឌ្ឍន៍ ហើយដីដែលនៅឆ្ងាយពីផ្លូវជាតិបន្តិច គឺមានតម្លៃពី១៥ដុល្លារទោ៣០ដុល្លារអាមេរិកក្នុងមួយម៉ែត្រការ៉េផងដែរ។

លោកបន្តថា “សម្រាប់ដីឡូត៏នៅក្នុងតំបន់នេះ មិនសូវជាមានកំណើនប៉ុន្មាននោះទេ ពីព្រោះថាដីឡូត៏ភាគច្រើន អ្នកអភិវឌ្ឍន៍លក់ជូនអតិថិជនដោយបង់រំលស់ ដូច្នេះតម្លៃរបស់វាត្រូវបានលក់ នៅក្នុងទីផ្សាររយៈពេលបីឆ្នាំក្រោយ”។ លោកពន្យល់ថា “មានន័យថាបើដីឡូត៏នោះតម្លៃ១ម៉ឺនដុល្លារអាមេរិក គេនឹងលក់១ម៉ឺន៣ពាន់ដុល្លារអាមេរិក ពីព្រោះ រយៈពេល២ឬ៣ឆ្នាំក្រោយពេលទិញដីឡូត៏នោះ វានឹងមានតម្លៃប្រហាក់ប្រហែល នឹងតម្លៃទិញនៅពេលបច្ចុប្បន្ន”។

លោកអ៊ឹង ប៊ុនហួតបានបន្តទៀតថា សក្ដានុពលនៃការអភិវឌ្ឍដីធ្លីនៅក្នុងតំបន់ផ្លូវ៥១ ត្រូវបានមើលឃើញថាចាប់ផ្ដើម មានសកម្មភាពឡើងវិញជាបន្តបន្ទាប់ ក្នុងនោះអ្នកអភិវឌ្ឍន៍ធំៗ ក៏បានចាប់ផ្ដើមបញ្ចេញសកម្មភាពអភិវឌ្ឍន៍របស់ខ្លួនបណ្ដើរផងដែរ ដូចជាគម្រោងរោងចក្រឧស្សាហកម្ម និងការសាងសង់លំនៅឋានជាបុរីជាដើម។ លោកមានការរំពឹងទុកផងដែរថាតំលៃដីនឹងឡើងជាលំដាប់ សំរាប់ឆ្នាំ២០២២នេះ ក៏ដូចជាឆ្នាំបន្តបន្ទាប់។

វិស័យអចលនទ្រព្យជាពិសេស គឺវិស័យដីធ្លីនៅតំបន់ផ្លូវ៥១ កំពុងមានកំណើនគួរអោយកត់សំគាល់ ដោយសារផ្លូវនេះនឹងក្លាយជាផ្លូវក្រវ៉ាត់ក្រុង និងជាផ្លូវយុទ្ធសាស្ត្រមួយ សម្រាប់ជួយសម្រួលដល់ការធ្វើដំណើរ និងការដឹកជញ្ជូនទំនិញឆ្ពោះ ទៅកាន់កំពង់ផែស្វយ័តក្រុងព្រះសីហនុ។ តំបន់នេះ ជាតំបន់ដែលមានការទាក់ទាញលើការវិនិយោគ លើឧស្សាហកម្មជាងគេ បន្ទាប់ពីបើកប្រទេសឡើងវិញ ក្រៅពីវិស័យទេសចរណ៍ សេដ្ឋកិច្ច និង អចលនទ្រព្យ រដ្ឋាភិបាលក៏រំពឹងថាវិស័យឧស្សាហកម្ម នឹងកាន់តែមានសន្ទុះមួយកម្រិតទៀតនៅក្នុងឆ្នាំ ២០២២នេះផងដែរ។

លោកឧកញ៉ាបណ្ឌិតគីម ហ៊ាងប្រធានKW Cambodiaបានមានប្រ​សាសន៍ថា ការវិនិយោគដីធ្លីនៅតំបន់ជាយក្រុង នៅតតែមានផលចំណេញ ហើយលោកលើកទឹកចិត្តឲ្យការវិនិយោគ គួរធ្វើឡើងនៅតំបន់ជាយក្រុងដដែល ពិសេសតំបន់ដែលមានផ្សារ និងមនុស្សរស់នៅច្រើន។

លោកបន្តថា “ការវិនិយោគដីធ្លីនៅតែមានផលចំណេញខ្ពស់ ប៉ុន្តែវាត្រូវការពេលវេលាច្រើនជាង៥ទៅ១០ឆ្នាំមុន ទើបទទួលបានផលចំណេញញ”៕

មហាយក្សចិនមានផែនការពង្រីកបណ្ដាញផ្លូវដែកល្បឿនលឿនដែលវែងជាងប្រទេស៥រួមបញ្ចូលគ្នា

ដោយៈសុខុម

ប៉េកាំង: ប្រទេសចិន មានផែនការពង្រីកបណ្តាញផ្លូវដែក ល្បឿនលឿ​នលឿនរបស់ខ្លួនជិត៣២%នៅត្រឹមឆ្នាំ២០២៥ ខណៈរដ្ឋាភិបាលក្រុងប៉េកាំង កំពុងពឹងផ្អែកជាថ្មីលើការវិនិយោគហេដ្ឋារចនាសម្ព័ន្ធ ដើម្បីទប់ទល់ការធ្លាក់ចុះសេដ្ឋកិច្ចរបស់ខ្លួន។

យោងតាមសារព័ត៌មាន South China Morning Post ចុះផ្សាយនៅថ្ងៃព្រហស្បតិ៍ ទី២០ មករា នេះឱ្យដឹងថា ផែនការពង្រីកនេះនឹងធ្វើឱ្យបណ្ដាញផ្លូវដែកល្បឿនលឿនរបស់ប្រទេសចិន វែងជាងប្រវែងសរុបនៃបណ្ដាញផ្លូវដែកល្បឿនលឿន ក្នុងប្រទេសចំនួន៥បញ្ចូលគ្នាទៅទៀត ដែលប្រទេសទាំងនោះ សុទ្ធតែជាប្រទេសមានបណ្ដាញផ្លូវដែក ល្បឿនលឿនធំៗបំផុត។

ប្រទេសសេដ្ឋកិច្ចធំបំផុទី២របស់ពិភពលោកមួយនេះ ក៏មានគម្រោងពង្រីកប្រព័ន្ធផ្កាយរណបបង្ហាញផ្លូវBeidou របស់ខ្លួនទាំងក្នុង និងក្រៅប្រទេស ព្រមទាំងធ្វើការរឹតបន្តឹងការគ្រប់គ្រងទិន្នន័យដឹកជញ្ជូនផងដែរ នៅពេលការពឹងផ្អែកលើខ្លួនឯងផ្នែកបច្ចេកវិទ្យា និងសន្តិសុខជាតិបានក្លាយជាកិច្ចការអាទិភាពរបស់រដ្ឋាភិបាល។

យោងតាមផែនការដឹកជញ្ជូនរយៈពេល៥ឆ្នាំថ្មី ដែលក្រុមប្រឹក្សារដ្ឋ ឬ គណៈរដ្ឋមន្ត្រីរបស់ប្រទេសចិន បានបញ្ចេញកាលពីថ្ងៃអង្គារ ទី១៨ មករា ឱ្យដឹងថា ប្រទេសចិន ដែលមានបណ្តាញផ្លូវដែកល្បឿនលឿន ធំបំផុតរបស់ពិភពលោក នឹងពង្រីកប្រវែងបណ្ដាញផ្លូវដែក ល្បឿនលឿនរបស់ខ្លួនឱ្យឈានដល់៥០.០០០គីឡូម៉ែត្រ នៅត្រឹមឆ្នាំ២០២៥ ដែលវែងជាង១២.០០០គីឡូម៉ែត្របើធៀបនឹងប្រវែងត្រឹមដំណាច់ឆ្នាំ២០២០។

ផ្អែកតាមទិន្នន័យបានពី International Union of Railways ដែលជាស្ថាប័នឧស្សាហកម្មដឹកជញ្ជូនផ្លូវដែកអន្តរជាតិ ដែលមានការិយាល័យកណ្ដាលនៅទីក្រុងប៉ារីស ប្រទេសបារាំងបង្ហាញថា ប្រវែងផ្លូវដែកល្បឿនលឿ​ន ដែលពង្រីកបន្ថែមរបស់ប្រទេសចិន នេះគឺវែងជាងប្រវែងសរុបនៃបណ្ដាញផ្លូវដែកល្បឿនលឿនក្នុងប្រទេសអេស្ប៉ាញ ប្រទេសជប៉ុន ប្រទេសបារាំង ប្រទេសអាល្លឺម៉ង់ និងប្រទេសហ្វាំងឡង់ ទៅទៀតដែលមានប្រវែងបញ្ចូលគ្នាត្រឹមតែ១១.៩៥៤គីឡូម៉ែត្រ៕  South China Morning Post៕