ដោយៈជេស៊ីកា

ភ្នំពេញៈ អ្នកជំនាញអចលនទ្រព្យ និងសេដ្ឋកិច្ចកម្ពុជាបានអះអាងថា អ្នកវិនិយោគអន្តរជាតិ ពិសេសអ្នកវិនិយោគចិន បានចាប់ផ្តើមត្រលប់មកកម្ពុជា ឡើងវិញបណ្តើរៗហើយ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានមានប្រសាសន៍ឲ្យដឹងតាមទូរស័ព្ទ កាលពីល្ងាចថ្ងៃទី១៥ វិច្ឆិកាកន្លងមកថា រហូតមកទល់ពេលនេះ អ្នកវិនិយោគបរទេស ពិសេសអ្នកវិនិយោគចិនបានចាប់ផ្តើមវិលត្រលប់មក​កម្ពុជាឡើងវិញហើយ។

លោកបន្តថា “អ្នកវិនិយោគចាស់ៗ ដែលមានគំរោងនៅកម្ពុជា និងអ្នកវិនិយោគដែលមានគំរោងចង់វិនិយោគនៅកម្ពុជា បានវិលត្រលប់មកវិញ ពិសេសអ្នកវិនិយោគចិន ជប៉ុនជាដើម”។ លោកបន្តថា “ជាមួយគ្នានេះ អ្នកវិនិយោគជប៉ុនកាន់តែច្រើននឹងវិនិយោគ​នៅកម្ពុជា ដោយសារទីផ្សារកម្ពុជាមានភាពទាក់ទាញ ហើយពួកគេមិនបោះបង់ទីផ្សារនេះទេ”។

ជាមួយគ្នានេះ លោកឧកញ៉ាលឹម ហេងអនុប្រធានសភាពាណិជ្ជកម្មកម្ពុជាបានមានប្រសាសន៍ឲ្យដឹងផងដែរថា ការអនុញ្ញាត្តឲ្យភ្ញៀវទេសចរណ៍ជាតិ អន្តរជាតិ ចូលមកកាន់ប្រទេស ដោយមិនចាំបាច់ធ្វើចត្តាឡីស័ក ជារឿងមួយដែលប្រជាពលរដ្ឋកម្ពុជា ក៏ដូចជាអ្នកដំណើរអន្តរជាតិចង់បាន។ លោកបន្តថា ការដែលថ្នាក់ដឹកនាំលើកលែងការធ្វើចត្តាឡីស័កនេះ ឆ្លុះបញ្ចាំងពីការធ្វើយុទ្ឋនាការចាក់វ៉ាក់សាំង ជូនប្រជាពលរដ្ឋបានទទួលជោគ​ជ័យ និងអាចគ្រប់គ្រងជំងឺនេះបានហើយ ទើបសម្តេចបើកបែបនេះ។

លោកបន្តថា “នេះជាឱកាសល្អហើយ ដែលយើងអាចទទួលទេសចរណ៍អន្តរជាតិ និងអ្នកវិនិយោគបរទេសអាចចូលមកកាន់កម្ពុជា ដែលពួកគាត់បានទន្ទឹងរង់ចាំជាយូរមកហើយ”។លោកបន្តថា “អ្នកវិនិយោគខ្លះបានទទួលការអនុម័តគំរោងពីក្រុមប្រឹក្សាអភិវឌ្ឍ​ន៍កម្ពុជារួចហើយ តែដោយសារជំងឺកូវីដពួកគេមិនហ៊ានធ្វើដំណើរ ដូច្នេះការបើកទូលាយនេះ ពួកគាត់នឹងមកកាន់កម្ពុជាឡើងវិញហើយ”៕

ដោយៈវឌ្ឍនៈ

ភ្នំពេញៈ ជាថ្មីម្ដងទៀត នាយករដ្ឋមន្ត្រីនៃព្រះរាជាណាចក្រកម្ពុជា និងនាយករដ្ឋមន្ត្រីនៃសាធារណរដ្ឋប្រជាមានិតកម្ពុជា បានប្ដេជ្ញាក្នុងការជំរុញទំហំពាណិជ្ជកម្មទ្វេភាគីឱ្យបាន១០ពាន់លានដុល្លារអាមេរិកក្នុងមួយឆ្នាំ ក្នុងពេលឆាប់ៗខាងមុខនេះ។

ការប្ដេជ្ញារបស់ភាគីធ្វើឡើង ក្នុងជំនួបរវាងសម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីកម្ពុជានិងលោកលី ខឺឈាង នាយករដ្ឋមន្ត្រីនៃសាធារណរដ្ឋប្រជាមានិតចិន តាមប្រព័ន្ធវីដេអូកាលពីល្ងាចថ្ងៃទី១៥ វិច្ឆិកា២០២១ ។

ការប្ដេជ្ញានឹងជំរុញឱ្យបាន១០ពាន់លានដុល្លារអាមេរិក ក្នុងមួយឆ្នាំក៏ធ្វើឡើងក្នុងពេលដែលកិច្ចព្រមព្រៀងពាណិជ្ជកម្មកម្ពុជា ចិន នឹងចូលជាធរមាននៅពេលឆាប់ៗខាងមុខនេះដែររ។

សម្ដេចតេជោនាយករដ្ឋមន្ត្រី ក៏បានអបអរសាទរការប្រារព្ធខួបអនុស្សាវរីយ៍លើកទី១០០ ពីការបង្កើតបក្សកុម្មុយនិស្តចិន កាលពីខែ កក្កដា ឆ្នាំ២០២១ និងបានកោតសរសើររដ្ឋាភិបាល និងប្រជាជនចិនលុបបំបាត់ទាំងស្រុង នូវភាពទីទាល់ក្រក្នុងសង្គមចិន និងបានអបអរសាទរផងដែរ ចំពោះកំណើនសេដ្ឋកិច្ចចិន ៩,៨ភាគរយ សម្រាប់រយៈពេល៩ខែដំបូង នៅឆ្នាំ២០២១ ហើយសម្តេចជឿជាក់ថា ក្រោមការដឹកនាំរបស់ ប្រធានាធិបតីស៊ី ជីនពីង និងការចូលរួមដោ ថ្នាក់ដឹកនាំចិន នឹងបន្តរីកចម្រើនកាន់តែខ្លាំងក្លាឡើង។

នៅក្នុងជំនួបនេះ សម្ដេចតេជោ និងលោក លី ខឺឈាំង បានពិភាក្សាគ្នាទាក់ទងនឹងទំនាក់ទំនងកិច្ចសហប្រតិបត្តិការ ទ្វេភាគីរវាងប្រទេសទាំងពីរ ក៏ដូចជាពិភាក្សាគ្នាលើកិច្ចសហប្រតិបត្តិការតំបន់ និងអន្តរជាតិ។

ក្នុងក្របខណ្ឌទ្វេភាគី សម្តេចតេជោ និងលោក លី ខឺឈាំង បានពិភាក្សាគ្នាលើបញ្ហាសេដ្ឋកិច្ច និងពាណិជ្ជកម្ម បញ្ហាកសិកម្ម និងបញ្ហា ទំនាក់ទំនងរវាងប្រជាជននិងប្រជាជន ។ ដោយឡែក លើវិស័យកសិកម្ម លោក លី ខឺឈាំង បានយល់ស្របនឹងជំរុញឲ្យមានការធ្វើការរួមគ្នារវាងភាគីទាំងពីរ ធ្វើយ៉ាងណា ពិភាក្សា ចរចាគ្នា លើកូតានាំអង្ករចូលទៅប្រទេសចិន និងកសិផលកម្ពុជា ចូលទៅប្រទេសចិនដោយផ្ទាល់តែម្ដង តាមរយៈការបង្កើតយន្តការរួមគ្នាមួយ ពិនិត្យមើលលទ្ធផលទាំងឡាយណា ដែលត្រូវនាំចេញពីកម្ពុជា ទៅកាន់ប្រទេសចិន គប្បីណាទាក់ទាញធ្វើឱ្យការនាំចេញនេះ គឺនាំចេញផ្ទាល់ទៅប្រទេសចិនតែម្ដង។

មន្ត្រីជាន់ខ្ពស់នៃក្រសួងពាណិជ្ជកម្មកម្ពុជា លោកប៉ែន សុវិជាតិ ក៏បានរំពឹងថា នៅពេលកិច្ចព្រមព្រៀងពាណិជ្ជកម្មសេរីកម្ពុជា ចិនចូលជាធរមាននឹងជំរុញការនាំចេញរបស់កម្ពុជា ទៅកាន់ទីផ្សារបានកាន់តែច្រើនជាងមុន នឹងអាចធ្វើឱ្យទំហំពាណិជ្ជកម្មរបស់កម្ពុជានិងចិនកាន់តែមានសន្ទុះនិងទំហំធំឡើង។

លោកបន្តថា មិនតែប៉ុណ្ណោះ កម្ពុជាក៏អាចទទួលបានវិនិយោគចិន ចូលវិនិយោគកាន់តែច្រើនបន្ថែមទៀតផងដែរ ខណៈបច្ចុប្បន្នចិនគឺជាវិនិយោគធំជាងគេទៅហើយ៕

ដោយៈ សុផារី

វៀតណាមៈ សេដ្ឋវិទូ និងអ្នកបង្កើតគោលនយោបាយវៀតណាម បាននិយាយថា ការផ្តល់ហិរញ្ញប្បទាន ដល់ការវិនិយោគសាធារណៈ ដើម្បីបង្កើតកំណើននាពេលអនាគត និងបង្កើនល្បឿន នៃការស្តារសេដ្ឋកិច្ចឡើងវិញក្រោយកូវីដ-១៩ នៅតែជាបញ្ហាប្រឈមដ៏សំខាន់បំផុតរបស់ប្រទេសវៀតណាមនាពេលខាងមុខ។

របាយការណ៍ថ្មីមួយ របស់កម្មវិធីអភិវឌ្ឍន៍របស់អង្គការសហប្រជាជាតិបានលើកឡើងពីចំណុចខ្វះខាត និងកម្រិតមួយចំនួនរបស់សេដ្ឋកិច្ចអាស៊ីអាគ្នេយ៍។ ចាប់ពីឆ្នាំ២០០២ដល់ឆ្នាំ២០១៩ ការវិនិយោគសាធារណៈ (ជាចំណែកនៃផលិតផលក្នុងស្រុកសរុប) ត្រូវបានគេនិយាយថានឹងធ្លាក់ចុះចន្លោះពី២២ភាគរយទៅ១១ភាគរយ ខណៈពេលដែលតម្រូវការសម្រាប់ហេដ្ឋារចនាសម្ព័ន្ធកំពុងកើនឡើង។

សេដ្ឋកិច្ចអាស៊ីអាគ្នេយ៍ ក៏ត្រូវតែប្តេជ្ញាចិត្តក្នុងការវិនិយោគសំខាន់ៗ ដើម្បីកាត់បន្ថយថ្លៃដឹកជញ្ជូន ពេលវេលាដឹកជញ្ជូន ធ្វើទំនើបកម្មទីក្រុង និងកែលម្អការតភ្ជាប់ឌីជីថល ដើម្បីរក្សាការប្រកួតប្រជែងជាអន្តរជាតិ។ ខណៈពេលដែលមានការរីកចម្រើនខ្លះ ប្រទេសវៀតណាម នៅតែនៅពីក្រោយគូប្រជែងក្នុងតំបន់ ដូចជា ម៉ាឡេស៊ី និងថៃនៅឡើយ។

ចំពោះការច្នៃប្រឌិត វៀតណាមនៅមានភាពយឺតយ៉ាវ។ វៀតណាមជាធម្មតាចំណា​យត្រឹមតែ០,៥ ភាគរយនៃ GDP របស់ខ្លួនលើការស្រាវជ្រាវ និងការអភិវឌ្ឍន៍ក្នុងប៉ុន្មានឆ្នាំថ្មីៗនេះ ដែលទាបជាងអ្វីដែលតម្រូវ ឱ្យរក្សាការប្រកួតប្រជែងនៅក្នុងតំបន់។ បើប្រៀបធៀបទៅប្រទេសថៃចំណាយជាង១ ភាគរយ និងម៉ាឡេស៊ីជិត១,៥ ភាគរយ។

ការបញ្ចេញទុនវិនិយោគសាធារណៈ បានធ្លាក់ចុះដល់កម្រិតមួយ ចាប់តាំងពីដើមឆ្នាំមក ជាពិសេសបន្ទាប់ពីការផ្ទុះឡើងនៃកូវីដ១៩ លើកទីបួននៅក្នុងខែមេសា។

យោងតាមរបាយការណ៍ចុងក្រោយ របស់ក្រសួងហិរញ្ញវត្ថុវៀតណាមបានឱ្យដឹងថា ការបញ្ចេ​ញទុនវិនិយោគសាធារណៈ ក្នុងអំឡុងពេលដប់ខែដំបូងនៃឆ្នាំនេះ មានចំនួន១១,៣ ពាន់លានដុល្លារ ឬជិត៥៥,៨ភាគរយនៃគោលដៅក្នុងឆ្នាំនេះ។ នៅក្នុងរបាយការណ៍ចុងក្រោយរបស់ធនាគារពិភពលោក ការព្យាករណ៍កំណើនផលិតផល ក្នុងស្រុកសរុបរបស់វៀតណាម បានធ្លាក់ចុះមកនៅត្រឹម២,២៥ភាគរយនៅឆ្នាំនេះ។

ការស្ទង់មតិនាពេលថ្មីៗនេះ ដោយមជ្ឈមណ្ឌលសម្រាប់ការវិភាគ និងការព្យា​ករណ៍នៃបណ្ឌិត្យសភាវិទ្យាសាស្ត្រសង្គមវៀតណាម ក្នុងខែកក្កដាបានបង្ហាញថា៦៣,៥ភាគរយនៃគ្រួសារវៀតណាម បានជួបប្រទះនឹងការធ្លាក់ចុះប្រាក់ចំណូល យ៉ាងហោចណាស់៣០ភាគរយ បើធៀបនឹងកម្រិតមុនកូវីដ១៩។

លោក Jonathan Pincus អ្នកជំនាញសេដ្ឋកិច្ចអន្តរជាតិជាន់ខ្ពស់របស់ UNDP ប្រចាំតំបន់អាស៊ីអាគ្នេយ៍បាននិយាយថា “ការឆ្លើយតបសារពើពន្ធរបស់វៀតណាមចំពោះជំងឺកូវីដ១៩ គឺមិនគ្រប់គ្រាន់ទេ” ។

លោក Pincus បាននិយាយថា ការធ្លាក់ចុះនៃការប្រើប្រាស់ឯកជន នឹងបណ្តាល   ឱ្យមានការប៉ះពាល់យ៉ាងខ្លាំង និងបណ្តាលកំណើន GDP យឺតជាងការចាំបាច់។ ការងើបឡើងវិញនឹងយឺតជាងមុន ដោយសារកង្វះខាតនៃតម្រូវការ និងអាចបណ្តាលឱ្យក្ស័យធន។

លោកបានជំរុញឱ្យអ្នកបង្កើតគោលនយោបាយអនុវត្តន៍ កំណែទម្រង់ហិរញ្ញវត្ថុ និងបង្កើតស្ថាប័នហិរញ្ញវត្ថុថ្មី ដើម្បីបង្កើនការផ្គត់ផ្គង់ឥណទានរយៈពេលវែង ដើម្បីផ្តល់ហិរញ្ញប្បទានដល់ហេដ្ឋារចនាសម្ព័ន្ធថ្មី និងការប្រកួតប្រជែងថ្នាក់ជាតិ។ លោកក៏បានអំពាវនាវឱ្យមានការទប់ស្កាត់ លើការផ្តល់ប្រាក់កម្ចីលើសកម្រិតដល់អចលនទ្រព្យ និងភាគហ៊ុន ដែលជាការបញ្ឈប់លំហូរចូលមូលធន ក្នុងអំឡុងពេលនៃកំណើនឥណទានលើសលប់ និងការចំណាយលើឱនភាព ខណៈដែលតម្រូវការកំពុងធ្លាក់ចុះ។

លោក Võ Trí Thành អតីតអនុប្រធានវិទ្យាស្ថានមជ្ឈិមគ្រប់គ្រងសេដ្ឋកិច្ច (CIEM) និងជាសមាជិកក្រុមប្រឹក្សាគោលនយោបាយហិរញ្ញវត្ថុ និងរូបិយវត្ថុជាតិបាននិ​យា​យថា ជំងឺកូវីដ១៩ បានបង្ខំវៀតណាមឱ្យពិចារណាឡើងវិញនូវវិធីសាស្រ្ត ការអភិវឌ្ឍន៍ជាតិ និងអនុវត្តគោលនយោបាយ ដែលមិនធ្លាប់មានពីមុនមក។

លោក Thanh បានប្រាប់សារព័ត៌មាន Việt Nam News ថា “កំណើនអវិជ្ជមានប្រទេសកំពុងអភិវឌ្ឍន៍ ក្នុងពេលពីរត្រីមាសជាប់គ្នាជាវិបត្តិសេដ្ឋកិច្ច។ សម្រាប់វៀតណាម កំណើន២% អាចចាត់ទុកថាជាវិបត្តិសេដ្ឋកិច្ច”។

កំណើន GDP របស់វៀតណាមនៅឆ្នាំនេះត្រូវបានកាត់បន្ថយមកត្រឹម២-២,៥ភាគរយ ខណៈដែលសេដ្ឋកិច្ចពិភពលោកត្រូវបានគេរំពឹងថា នឹងកើនឡើងពី៥ ទៅ៦ភាគរយ។ កាលពីឆ្នាំមុន វៀតណាមបានកត់ត្រាកំណើន ផលិតផលក្នុងស្រុកសរុប២,៩១ភាគរយ ខណៈដែលសេដ្ឋកិច្ចពិភពលោកស្ថិតក្នុងកម្រិតអវិជ្ជមាន៤ភាគរយ។

លោកបានបន្តថា “សេដ្ឋកិច្ចរបស់ប្រទេសវៀតណាម មិនមែនគ្មានចំណុចល្អនោះឡើយ ដែលរួមមានសូចនាករម៉ាក្រូសេដ្ឋកិច្ចដ៏រឹងមាំ ការនាំចេញដែលកំពុងកើនឡើង និងលំហូរចូលនៃ FDI ដែលមានល្អ”។

ទោះជាយ៉ាងណាក៏ដោយ អាទិភាពរបស់រដ្ឋាភិបាលនាពេលនេះ គឺការជំរុញតម្រូវការ ការវិនិយោគ និងការស្តារសេដ្ឋកិច្ចឡើងវិញ។

លោក Thanh បាននិយាយថា កម្មវិធីស្តារឡើងវិញ ដែលឧបត្ថម្ភដោយរដ្ឋាភិបាលត្រូវតែគ្របដណ្តប់ និងផ្តោតលើវិស័យសំខាន់ៗរបស់សេដ្ឋកិច្ច ជាមួយនឹងគោលនយោ​បាយសារពើពន្ធ ដើម្បីដើរតួនាទីយ៉ាងសំខាន់៕