វិនិយោគិនបរទេសចាប់ផ្ដើមបង្កើនល្បឿនអភិវឌ្ឍន៍គម្រោងឡើងវិញ ក្រោយស្ងប់មួយរយៈ

ដោយៈវឌ្ឈនៈ

ភ្នំពេញៈ វិនិយោគិនបរទេស បានចាប់ផ្ដើមបង្កើនល្បឿនក្នុងការអភិវឌ្ឍគម្រោងរបស់ខ្លួនឡើងវិញ ក្រោយពីរាជរដ្ឋាភិបាលកម្ពុជាបានសម្រេចបើកប្រទេសឡើងវិញ ក្នុងរយៈពេលជាង២ខែកន្លងមក។

ជាក់ស្ដែងគម្រោងអគារខ្ពស់ៗ ចំនួននៅក្នុងខណ្ឌចំការមន ដែលជាគម្រោងវិនិយោគរបស់វិនិយោគិនបរទេស បានចាប់ផ្ដើមធ្វើសកម្មភាពកាន់តែខ្លាំងជាងមុន។

គម្រោងអគារខុនដូ Mesong ដែលជាគម្រោងវិនិយោគរបស់វិនិយោគិនមកពីទីក្រុងហុងកុង នៅក្នុងទីក្រុងរណបកោះពេជ្រ បានបង្ហាញពីការបង្កើនល្បឿន ក្នុងការអភិវឌ្ឍគម្រោងនេះ កាន់តែលឿនបន្តទៀត ដោយបានសហការជាមួយក្រុមហ៊ុនអភិវឌ្ឍន៍ធំៗ នៅលើពិភពលោក ក៏ដូចជាក្រុមហ៊ុនផ្គត់ផ្គង់សម្ភារៈសំណង់ ដើម្បីឱ្យគម្រោងរបស់ខ្លួនបានដំណើរទៅមុខដោយរលូនជាមួយនឹងគុណភាពរឹងមាំ ។

យោងតាមសេចក្ដីប្រកាសព័ត៌មាន របស់ក្រុមហ៊ុនអភិវឌ្ឍន៍អគារខុនដូ Mesong ឱ្យដឹងនាថ្ងៃទី១៤ មករាកន្លងមកថា ការសហការរវាងក្រុមហ៊ុនធំៗ ដែលមានបទពិសោធន៍ ក្នុងការផ្គត់ផ្គង់សម្ភារៈបរិក្ខារ នៅក្នុងអគារនឹងជំរុញ ឱ្យការអភិវឌ្ឍរបស់ Mesong បានផ្ដល់ជូននូវប្រណីតភាព និងគុណភាពដល់ការអភិវឌ្ឍ សំណង់នៅក្នុងប្រទេសកម្ពុជា និងពន្លឿនដល់ការអភិវឌ្ឍរបស់ខ្លួនផងដែរ ។

ដោយឡែកគម្រោងមួយទៀត ក្រោមការវិនិយោគរបស់វិនិយោគិនបរទេសនៅតំបន់ទួលទំពូងក៏ឃើញថា បានចាប់ផ្ដើមយ៉ាងមមាញឹកឡើងវិញ ជាមួយនឹងស្វែងរកទីផ្សារលក់ និងការសាងសង់គម្រោងរបស់ខ្លួនផងដែរ ។

គម្រោង Royal skyland ក៏ត្រូវបានចាត់ទុកជាគម្រោងអគារខ្ពស់មួយនៅកម្ពុជា ត្រូវបានមើលឃើញថា បានបង្កើនល្បឿនអភិវឌ្ឍន៍ឡើងវិញក្រោយពីរាជរដ្ឋាភិបាលកម្ពុជា បានសម្រេចបើកប្រទេស ក្នុងនោះគម្រោងអគារខុនដូ រ៉ូយ៉ាល់ស្កាយលែន ក៏បានស្វះស្វែងរកដៃគូលក់គម្រោងរបស់ខ្លួនជាច្រើន ស្របពេលជាមួយនឹងការជំរុញការសាងសង់ ឱ្យបានបញ្ចប់ទៅតាមផែនការរបស់ខ្លួន ។

លោកប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បាន ឱ្យ​ដឹងថា ក្រោយបើកប្រទេសគឺស្ថានភាពបានល្អប្រសើរ ហើយវិនិយោគិនដែលមានវត្តមាន ក្នុងប្រទេសកម្ពុជា បានចាប់ផ្ដើមបញ្ចេញសកម្មភាពរបស់ខ្លួនភ្លាម តែសម្រាប់វិនិយោគបរទេសថ្មីៗ នៅតែមិនទាន់ឃើញមានចូលមកកម្ពុជាស្វែងការវិនិយោគច្រើននោះទេ៕

វៀតណាមកំពុងរត់តាមប្រកិតកម្ពុជា ក្នុងការក្លាយជាប្រទេសដែលថ្លៃចំណាយប្រតិបត្តិការទាបបំផុតទី៣នៅអាស៊ី

ដោយៈសុខុម

ភ្នំពេញ: វៀតណាម បានក្លាយជាប្រទេស ដែលមានថ្លៃចំណាយប្រតិ​បត្តិការទាបបំផុតទី៣ ក្នុងចំណោមប្រទេសចំនួន៩នៅតំបន់អាស៊ី ដោយតាមប្រកិតពីក្រោយកម្ពុជា និងមីយ៉ាន់ម៉ា។ នេះបើតាមរបាយការណ៍របស់ក្រុមហ៊ុនប្រឹក្សាយោបល់ ផ្នែកការផ្លាស់ប្ដូរអាជីវកម្មឈានមុខ នៅអាស៊ី-ប៉ាស៊ីហ្វិក។

របាយការណ៍របស់ TMX ដែលបានចេញផ្សាយកាលពីពេលថ្មីៗនេះបង្ហាញថា ថ្លៃចំណាយប្រតិបត្តិការសរុប ជាមធ្យមសម្រាប់ក្រុមហ៊ុនផលិត​កម្មមួយនៅប្រទេសវៀតណាម គឺមានចាប់ពី៧៩.២៨០ដុល្លារអាមេរិក ដល់២០៩.០៨៧ដុល្លារអាមេរិកក្នុងមួយខែ បើធៀបនឹងសិង្ហបុរី ដែលថ្លៃជាងគេលេខ១ ជាមួយនឹងថ្លៃចំណាយ៣៦៦.៥៦១ដុល្លារអាមេរិក និងប្រទេសថៃ ថ្លៃបំផុតលេខ២ ជាមួយនឹងថ្លៃចំណាយ១៤២.៣៤៤ដុល្លារាមេរិក។

និយាយពីកម្លាំងពលកម្ម ដែលគ្របដណ្ដប់រហូតដល់ទៅ៥៥% នៃថ្លៃចំណាយសរុប ក្នុងប្រទេសទាំង៩ខាងលើនេះ វៀតណាមក្លាយប្រទេសដែលមានថ្លៃ កម្លាំងពលកម្មទាបបំផុតទី៤ តាមប្រកិតពីក្រោយកម្ពុជា មីយ៉ាន់ម៉ា និងហ្វីលីពីន ជាមួយនឹងអត្រាជាមធ្យម ត្រឹម១០៨.១៩៦ដុល្លារអាមេរិកក្នុងមួយខែ។

វៀតណាម ជាទីផ្សារការងារដែលមានទំហំធំ និងមានតម្លៃសមរម្យ។ ខណៈវៀតណាម ផ្តល់ឱកាសការងារច្រើន ប្រទេសនេះមានកម្មករជំនាញខ្ពស់ក្នុងចំនួនតិចតួចណាស់ នៅក្នុងវិស័យជាច្រើន ដោយទទួលបាន៣៥ពិន្ទុ សម្រាប់ការប្រកួតប្រជែងផ្នែកជំនាញ និងទេពកោសល្យ បើធៀបនឹង៤០ពិន្ទុសម្រាប់ហ្វីលីពីន និងថៃ។

បើនិយាយពីពិន្ទុប្រកួតប្រជែងវិញ វៀតណាម ជាប់ចំណាត់ថ្នាក់លេខ៥ តាមពីក្រោយសិង្ហបុរី ម៉ាឡេស៊ី ឥណ្ឌា និងថៃ។

ទាក់ទិននឹងការជួលឃ្លាំង វៀតណាម ក្លាយជាប្រទេសដែលមានតម្លៃជួលធូរថ្លៃបំផុតទី៤ ជាមួយនឹងអត្រាតម្លៃជាមធ្យម៥ដុល្លារអាមេរិក ក្នុងមួយម៉ែត្រការ៉េ សម្រាប់រយៈពេលមួយខែ តាមពីក្រោយប្រទេសថៃ មីយ៉ាន់ម៉ា និងកម្ពុជា៕ Vietnam News៕

អ្នកជំនាញអចលនទ្រព្យៈ ទីផ្សារដីឡូតិ៍កម្ពុជានៅឆ្នាំនេះនឹងមានដំណើរការល្អជាងឆ្នាំ២០២១

ដោយៈ សុធារី

ភ្នំពេញៈ ព្រឹត្តិការណ៍សហគមន៍ ២០កុម្ភៈ ក្នុងឆ្នាំ២០២១ បានធ្វើឱ្យចរន្តទិញ លក់ក្នុងវិស័យអចលនទ្រព្យ ក៏ទទួលរងផលប៉ះពាល់ផងដែរ ពិសេ​សការទិញលក់ដីឡូតិ៍។

ទោះយ៉ាងណាក្តី អ្នកជំនាញអចលនទ្រព្យមានសុទិដ្ឋិនិយមថា ទីផ្សារដីឡូតិ៍កម្ពុជា នឹងមានដំណើរការល្អជាងឆ្នាំ២០២១ ទោះប្រឈមនឹងវិបត្តិកូវីដ១៩បន្តក្តី​។

លោក ម៉ាន់ ច័ន្ទឌី អ្នកជំនាញមួយរូបថ្លែងថា ឆ្នាំ២០២២ វិស័យដីឡូតិ៍នៅតែមានដំណើរការ ល្អជាងឆ្នាំ២០២១ ជាក់ស្ដែងដើមឆ្នាំ២០២២ ចូលមកដល់ភ្លាម ទីផ្សារដីឡូតិ៍មានភ្លាមតែម្ដង និងមានតម្រូវការច្រើន ព្រមទាំងល្អប្រសើរទៀតផង ដោយអតិថិជននៅតែមានតម្រូវការ និងចាប់អារម្មណ៍លើការទិញ-លក់ដីឡូតិ៍។

លោកបន្តថា “បញ្ហាប្រឈមមិនមាននោះទេ ប្រសិនបើរាជរដ្ឋាភិបាលអាចគ្រប់គ្រងជំងឺកូវីដ១៩បំប្លែងថ្មី អូមីក្រុង។ ជាក់ស្ដែងថ្មីៗនេះ រាជរដ្ឋាភិបាលបានចេញ នូវយុទ្ធសាស្រ្ដមួយចំនួន ដូចជា ចាប់ផ្ដើមចាក់ដូសជំរុញចំពោះអ្នកជួរមុខ និងអ្នកនៅក្នុងក្រុងភ្នំពេញ ដូច្នេះមិនមានបញ្ហាប្រឈមចំពោះវិស័យដីឡូតិ៍ឡើយ”។

លោកម៉ាន់ ច័ន្ទឌីបានបន្ដថា ទីផ្សារដីឡូតិ៍នៅតែមានតម្រូវការ ទោះបីតម្លៃមានការប្រែប្រួលតិចតួចក្ដី ដោយសារតែបន្ទាប់ពីទទួលរងបញ្ហាកូវីដ១៩ ដីធំពិបាកលក់ ព្រោះមិនមានវិនិយោគិនបរទេសមកវិនិយោគ ដូច្នេះបើដីធំពុះជាដីឡូតិ៍លក់ គឺមានចរន្ដទិញ-លក់ច្រើន ចរន្ដនៃការទិញលក់ដីឡូតិ៍ នៅតែមានភាពល្អប្រសើរ ក្នុងឆ្នាំ២០២២៕

រឿងរ៉ាវចំនួន១០ ដែលអ្នកគួរប្រយ័ត្នប្រយែងពេលទៅកំសាន្តនៅប្រទេសវៀតណាម

ដោយៈ សុខុម

វៀតណាម: វៀតណាម ដែលជាប្រទេសជិតខាង ជាប់ភូមិផងរបងជាមួយប្រទេសកម្ពុជា គឺជាគោលដៅទេសចរណ៍ដ៏ពេញនិយម ដោយសារសម្រស់ និងភាពទាក់ទាញរបស់ប្រទេសនេះ។

ទោះជាយ៉ាងណា មានរឿងរ៉ាវអាក្រក់ធំៗចំនួន១០ចំណុច ដែលអ្នកគួរប្រយ័ត្នប្រយែង បើមិនចង់មានបញ្ហា មុនពេលសម្រេចចិត្តទៅលេងកំសាន្តនៅប្រទេសមួយនេះ។ ជនបរទេសមួយចំនួនរាងចាល មិនចង់ត្រលប់ទៅប្រទេសនេះម្ដងទៀតឡើយ ព្រោះពួកគេបានឆ្លងកាត់បទពិសោធន៍ដ៏អា​ក្រក់មិនអាចបំភ្លេចបាន អំឡុងដំណើរកម្សាន្តរបស់ពួកគេ ទៅកាន់ប្រទេសនេះ។

សូមអានអត្ថបទនេះឱ្យចប់ ដើម្បីជៀសវាងជួបស្ថានភាពអាក្រក់ និងទុកជាជំនួយដល់ការរៀបចំផែនការ ដំណើរកម្សាន្តរបស់អ្នកទៅកាន់ប្រទេសវៀតណាម។

១/ ការឆបោក
អំពើឆបោកកើតឡើងជាពិសេស ជាមួយក្រុមហ៊ុនទេសចរណ៍ ឬ ភោ​ជនីយដ្ឋាន និងហាងល្បីៗ។ នៅទីក្រុងហាណូយ ប្រទេសវៀតណាម អ្នកនឹងឃើញមានក្រុមហ៊ុនជាង១០០ ដែលស្រដៀងគ្នានឹងក្រុមហ៊ុនទេសច​រណ៍ The Sinh Tourist ប៉ុន្តែក្រុមហ៊ុនពិតប្រាកដ គឺតែមួយគត់ ក្រៅពីនោះសុទ្ធតែក្លែងបន្លំ។

ក្រុមហ៊ុនទេសចរណ៍ក្លែងក្លាយទាំងនោះ ព្យាយាមប្រមូលភ្ញៀវទេស​ចរឱ្យបានច្រើន តាមដែលអាចធ្វើទៅបាន បន្ទាប់មកបញ្ជូនពួកគេឱ្យទៅក្រុមហ៊ុនទេសចរណ៍ផ្សេងទៀត ដើម្បីទទួលបានប្រាក់កម្រៃជើងសារ។
ក្នុងដំណើរកម្សាន្តក្លែងក្លាយទាំងនេះ អ្នកនឹងមិនអាចទទួលបានសេវាកម្មដ៏ល្អឡើយ ព្រោះជាធម្មតាវាមានតម្លៃថោកជាង ដំណើរកម្សាន្តពិតប្រាកដ។

*គន្លឹះជៀសវាងដំណើរទេសចរណ៍ក្លែងក្លាយ
អ្នកត្រូវធ្វើឱ្យប្រាកដថា អ្នកប្រើប្រាស់គេហទំព័ររបស់ក្រុមហ៊ុនទេសច​រណ៍ត្រឹមត្រូវ ដើម្បីស្វែងរកដំណើរកម្សាន្ត។ គេហទំព័រក្លែងក្លាយជាច្រើនអះអាងថា ខ្លួនជាក្រុមហ៊ុនពិត ដូច្នេះហើយអ្នកត្រូវពិនិត្យមើលដោយប្រុងប្រយ័ត្ន។

ទៅកាន់អាសយដ្ឋានត្រឹមត្រូវ របស់ក្រុមហ៊ុនទេសចរណ៍នោះ ព្រោះអាចមានក្រុមហ៊ុនបែបនេះ រហូតដល់ទៅជាង១០ឯណោះ ដែលឈ្មោះដូចៗគ្នានៅលើផ្លូវតែមួយ ដូច្នេះត្រូវធ្វើឱ្យប្រាកដថា អ្នកទៅកាន់អាសយដ្ឋានដែលត្រឹមត្រូវ។

២/ អាកាសយានដ្ឋាន – ចោរលួចខ្វេះវ៉ាលី
ការបាត់អីវ៉ាន់ពីក្នុងវ៉ាលីនៅអាកាសយានដ្ឋាន ក្នុងប្រទេសវៀតណាម គឺកើតឡើងញឹកញាប់ណាស់ ដូចនេះត្រូវបង្កើនការប្រយុងប្រយ័ត្ន ឱ្យបានមែនទែន។

*គន្លឹះជៀសវាងការបាត់អីវ៉ាន់ក្នុងវ៉ាលី
បើមិនចង់ឱ្យបាត់អីវ៉ាន់ អំឡុងពេលឆែកវ៉ាលីនៅអាកាសយដ្ឋាន ដែលនឹងបំផ្លាញដំណើរកម្សាន្តរបស់អ្នក សូមកុំទុករបស់របរមានតម្លៃក្នុងវ៉ាលី។ ទោះបីជាអ្នករាងមានទំនុកចិត្តបន្តិច ពេលមានចាក់សោវ៉ាលីក្ដី ក៏ចោរនៅតែអាចខ្វេះលួចរបស់របរមានតម្លៃ របស់អ្នកបានយ៉ាងរហ័ស។

ពិតណាស់ថា អ្នកអាចតវ៉ា និងរាយការណ៍ទៅផ្នែកសេវាអាកាសយានដ្ឋានបាន ប៉ុន្តែសំណងដែលគេនឹងសងមកអ្នកវិញ គឺគិតតាមអត្រាក្នុងអីវ៉ាន់មួយគីឡូក្រាម ដែលវាមិនស័ក្ដិសមនឹងតម្លៃ របស់ដែលអ្នកបាត់នោះឡើយ។ ដូចនេះសូមទុករបស់របរមានតម្លៃរបស់អ្នក តែក្នុងកាបូយួរដៃបានហើយ។

៣/ ការឆ្លងផ្លូវ
ពេលឆ្លងផ្លូវ អ្នកត្រូវប្រុងប្រយ័ត្នឱ្យបានខ្ពស់ ព្រោះមិនសូវមានគំនូសផ្លូវនោះឡើយ បើមិនអញ្ចឹងទេ អ្នកអាចនឹងត្រូវម៉ូតូ ឬឡានបុកជាពិសេសនៅក្រុងហូជីមិញ តែម្ដង។

*គន្លឹះឆ្លងផ្លូវដោយសុវត្ថិភាព
កុំខ្លាចប្រឈមមុខនឹងម៉ូតូ រថយន្ត និងរថយន្តក្រុងជាដើម នៅពេលអ្នកឆ្លងកាត់ផ្លូវ។ ជាដំបូងអ្នកគួររង់ចាំបន្តិច ហើយដើរទៅមុខ ឈប់បន្តិច ដើរទៅមុខទៀត ហើយបន្តធ្វើបែបនេះរហូតឆ្លងផុត តែត្រូវប្រយ័ត្នផង ព្រោះយានយន្តមកពីគ្រប់ទិស បើកបរប្រសិចប្រសាចមិនដឹងទិសតំបន់។ អ្នកត្រូវជឿជាក់ថា ខ្លួនឯងអាចធ្វើបាន។ យកល្អ អ្នកគួរតែទិញធានារ៉ាប់រងលើការធ្វើដំណើរ មុនពេលទៅលេងនៅប្រទេសវៀតណាម។

៤/ គ្រោះថ្នាក់ចរាចរណ៍
យោងតាមនាយកដ្ឋានប៉ូលិសចរាចរណ៍វៀតណាម ឱ្យដឹងថា ក្នុងឆ្នាំ២០១៦មានករណីគ្រោះថ្នាក់ចរាចរណ៍ រហូតដល់ទៅជាង២១.០០០ករណី និងបណ្ដាលឱ្យស្លាប់ជិត៩.០០០ករណី។ ដូចនេះមានន័យថា ក្នុងមួយថ្ងៃៗមានមនុស្សប្រមាណ២៥នាក់ ស្លាប់ដោយសារគ្រោះថ្នាក់ចរា​ចរណ៍នៅវៀតណាម។ តួលេខនេះ មិនទាន់រាប់បញ្ចូលអ្នករងរបួសផងទេ។ ដូចនេះអ្នកត្រូវប្រុងប្រយ័ត្នឱ្យមែនទែន។

*គន្លឹះសុវត្ថិភាពលើដងផ្លូវ
ដើម្បីសុវត្ថិភាពផ្ទាល់ខ្លួន អ្នកគួរប្រើប្រាស់សេវាដឹកជញ្ជូនសាធារណៈដូចរថយន្តក្រុងជាដើម ព្រោះបើមានករណីបុកគ្នា វាអាចការពារអ្នកបានច្រើន។ ទន្ទឹមនេះ ការប្រើប្រាស់រថយន្តតាក់ស៊ីរបស់ Grab ក៏ល្អដែរ ព្រោះវាមានតម្លៃថោក និងងាយស្រួល។

៥/ ការគិតលុសលើសសម្រាប់សេវាតាក់ស៊ី
ការគិតលុយលើស សម្រាប់សេវាតាក់ស៊ី បានកើតឡើងញឹកញាប់ណាស់នៅវៀតណាម ហើយវាកើតឡើងចំពោះមនុស្សស្ទើរតែគ្រប់គ្នា។ តៃកុងច្រើនតែព្យាយាមបើកវៀង កាច់កុងចុះឡើង ដើម្បីឱ្យឃើញថាផ្លូវឆ្ងាយ និងគិតលុយឱ្យបានច្រើន។

ភ្ញៀវទេសចរខ្លះ នឹងបង់លុយឱ្យពួកគេ តាមដែលពួកគេទាមទារដោយមិនដឹងថាគេធ្វើស៊ីខ្លួន។ ក្នុងករណីខ្លះទៀត តៃកុងតាក់ស៊ីថែមទាំងសឺរ៉េកុងទ័រគីឡូ ដើម្បីគិតលុយលើសតម្លៃជាក់ស្ដែងទៀតផង។

*គន្លឹះជៀសវាងអ្នករត់តាក់ស៊ីធ្វើអ្នក
ចូរឆែក Google Map ឬ Maps.me ដើម្បីគណនាចម្ងាយគោលដៅដែលអ្នកត្រូវចុះ។ ធ្វើដូច្នេះអ្នកអាចគុណដឹងចំនួនគីឡូ និងលុយដែលត្រូវបង់។ ទន្ទឹមនេះ អ្នកគួរតែសួរតាក់ស៊ីជាមុនថា ពួកគេគិតថ្លៃប៉ុន្មាន មុននឹងចេញដំណើ។

៦/ ចោរឆក់
ករណីចោរឆក់ កើតឡើងគ្រប់កន្លែងនៅវៀតណាម ហើយករណីដែលកើតឡើងញឹកញាប់បំផុតគឺឆក់ទូរស័ព្ទ និងកាបូប។

*គន្លឹះជៀសវាងចោរឆក់
កុំនិយាយទូរស័ព្ទពេលដើរតាមផ្លូវ ឬកាន់ទូរស័ព្ទសម្ញែង។ ចំណែកឯកាបូបវិញ ត្រូវកាន់ឱ្យជាប់នឹងខ្លួន។ ហើយបើត្រូវចេញទៅក្រៅដែលមានមនុស្សអ៊ូអរ យកល្អគួរដករបស់របរសំខាន់ៗ ចេញពីកាបូប ហើយទុកនៅកន្លែងដែលអ្នកស្នាក់នៅ។ ហើយទន្ទឹមនេះ អ្នកគួរទិញធានារ៉ាប់រងលើការធ្វើដំណើរ មុននឹងទៅលេងនៅវៀតណាម។

៧/ ចោរលូកហោប៉ៅ
ចោរលូកហោប៉ៅកើតឡើងគ្រប់កន្លែង និងគ្រប់ពេលទាំងអស់នៅវៀតណាម។

*គន្លឹះជៀសវាងចោរលូកហៅប៉ៅ
អ្នកត្រូវប្រុងប្រយ័ត្ន ទ្រព្យសម្បត្តិរបស់អ្នកគ្រប់ពេល ត្រូវទុកលុយក្នុងហោប៉ៅខាងមុខ គឺកុំទុកនៅហោប៉ៅក្រោយឱ្យសោះ ហើយត្រូវឧស្សាហ៍ស្ទាបមើលក្រែងលោបាត់។

៨/ បញ្ហាអនាម័យ និងសុវត្ថិភាពចំណីអាហារ
ម្ហូបអាហារវៀតណាម ពិតជាសម្បូរបែប និងមានឱជារសឆ្ងាញ់ ប៉ុន្តែសុវត្ថិភាពចំណីអាហារ គឺជាបញ្ហាធំនៅក្នុងប្រទេសនេះ។ អាហារតាមដងផ្លូវមានរសជាតិឆ្ងាញ់ ប៉ុន្តែភាគច្រើនគឺគ្មានអនាម័យ។

*គន្លឹះជៀសវាងអាហារគ្មានអនាម័យ
អ្នកគួរតែជៀសវាងអាហារលក់តាមដងផ្លូវ ព្រោះវាមិនស្អាត ខ្វះអនាម័យដែលអាចបង្កការរាករូស ឬធ្វើឱ្យអ្នកពុលអាហារជាដើម ហើយយកល្អអ្នកគួរតែជ្រើសរើស ការទទួលទានអាហារនៅភោជនីយដ្ឋាន ឬអាហារដ្ឋាន។

៩/ សេវាអន់ – អាកប្បករិយាបុគ្គលិកមិនល្អ
ជាការពិតណាស់ មនុស្សជាច្រើនរអ៊ូរទាំ និងសម្ដែងការមិនសប្បាយចិត្ត ចំពោះសេវាដ៏អន់ នៅតាមភោជនីយដ្ឋានវៀតណាម មួយផ្នែកដោយ​សារភ្ញៀវច្រើន ហើយទន្ទឹមនេះប្រជាជនវៀតណាម មិនច្រើនទេដែលចេះនិយាយភាសាអង់គ្លេស។

*គន្លឹះជៀសវាងសេវាអន់ – អាកប្បករិយាបុគ្គលិកមិនល្អ
អ្នកគួររៀនភាសាកាយវិការ ឬរៀនភាសាវៀតណាមខ្លះៗ ដើម្បីចេះកុម្ម៉ង់អាហារ ឬ ងាយស្រួលប្រើប្រាស់សេវាដែលអ្នកត្រូវការ។ យកល្អបំផុត គឺមានមិត្តភក្ដិជនជាតិវៀតណាម ដើម្បីឱ្យពួកគេជួយនាំអ្នកទៅញ៉ាំអាហារនៅកន្លែងល្អ ហើយតម្លៃសមរម្យ។

១០/ ការគិតលុយលើស
ការគិតលុយលើស គឺកើតឡើងញឹកញាប់ណាស់ សម្រាប់ភ្ញៀវទេស​ចរណ៍ទៅទស្សនាប្រទេសនេះ។

*គន្លឹះជៀសវាងការគិតលុយលើស
អ្នកគួរជៀសវាងភោជនីយដ្ឋានណា ដែលមឺនុយមិនដាក់តម្លៃ ព្រោះគេនឹងកោរអ្នក គិតលើសតម្លៃ ព្រោះឃើញអ្នកជាជនបរទេស។ ហើយសូម្បីភោជនីយដ្ឋានខ្លះ ដែលមានមឺនុយ ក៏នៅតែអាចគិតថ្លៃកន្លែងអង្គុយពីអ្នកទៀតផង។

អ្នកត្រូវសួរឱ្យច្បាស់ អំពីតម្លៃមុននឹងកុម្ម៉ង់មុខម្ហូបណាមួយ ហើយត្រូវចាំថា សួរតម្លៃសិន មុននឹងទិញ។ បើអ្នកយល់ថាថ្លៃពេក អ្នកគួរតែចេញទៅកន្លែងផ្សេង ព្រោះមិនខ្វះហាងនោះទេ៕ Expatolife៕

វេទិកាស្មេរៈ តើអ្វីជាការប្រកួតប្រជែងនិងសេរីភាព?

ដោយៈ ព្រំម វីរៈ

ដូចជា​មិន​យល់​ទេ ប្រកួត​ប្រជែង​ដើម្បី​សេរីភាព​? ក្នុង​សកលលោក​នេះ​គ្មាន​អ្នកណា​ចូលចិត្ត ​ឱ្យមាន​ការរំលោភ​បំពាន ​ពី​ក្រុម​អ្នកគ្រប់គ្រង​ទេ​ ប៉ុន្តែ​មនុស្សម្នា​សព្វថ្ងៃ​ ក៏បាន​ចាប់ផ្តើម​ទទួលស្គាល់ថា វិស័យ​ឯកជន​ក៏​អាច​បង្ក​ព្យសនកម្ម​ដល់​សេរីភាព​បុគ្គល​ដែរ​។

បើ​នៅក្នុង​ទីក្រុង​របស់​អ្នក បើ​មាន​ហាង​តែមួយ ​ទោះជា​មុខម្ហូប​អន់​ក៏ដោយ តើ​អ្នកនឹង​ទៅ​បរិភោគ​នៅទីណា​? ពិតណាស់​អ្នកនឹង​សុខចិត្ត​បន្ត​ទំពា​ទាំង​ទើសទាល់ ​រាល់​អាទិត្យ​នៅ​ហាង​នោះ ហាក់បីដូចជា​គ្មាន​សេរីភាព​អ៊ីចឹង​។ បើ​ក្រុមហ៊ុន​ធំៗ​ និង​ក្រុមហ៊ុន​បច្ចេកវិទ្យា​បន្លំ​លួច​ យក​ព័ត៌មាន​ផ្ទាល់ខ្លួន​របស់​អ្នក​ទៅប្រើប្រាស់ តើ​អ្នកធ្វើ​អ្វី​បាន​? តើ​តួអង្គ​សេដ្ឋកិច្ច​បង្កើតឱ្យ​មាន​ភាពលំបាក​យ៉ាងណាខ្លះ ​ដែល​ប៉ះពាល់​ដល់​ជីវិត​សេរី​របស់​អ្នកជិតខាង​ និង​របស់​រូបអ្នក​ផ្ទាល់​?។

នៅពេលដែល​ក្លិន​កាហ្វេ​ឡាតេ ​បាន​ជ្រាប​ដល់​អារម្មណ៍​របស់​យើង​ភ្លាម យើង​មាន​អារម្មណ៍​ធូរស្រាល​ច្រើន​ដោយ​ជឿថា សេរីភាព​ផ្នែក​សេដ្ឋកិច្ច​អនុញ្ញាតឱ្យ​យើង ​ធ្វើ​សកម្មភាព​អ្វីដែល​យើង​ចូលចិត្ត​បំផុត​។ យើង​សាក​គិត​ទៅ​មើល មិន​ថា​ក្នុងស្រុក​ ឬ​លើ​ឆាក​អន្តរជាតិ​ទេ មិន​ថាការ​ចង់មានចង់បាន​ និង​ការចង់​ល្បី​ហ្នឹងហើយ​ ដែល​បាន​សរសេរប្រវត្តិសាស្ត្រ​មនុស្ស​គ្រប់​ទិស​ទីនោះ​?។

អ្នកខ្លះ​ទទួលបាន​នូវ​ភាពរុងរឿង​ស្ញប់ស្ញែង ខ្លះទៀត​ក៏​អភ័ព្វ​។ ប៉ុន្តែ​បើ​យើង​ពិតជា​ប្រាថ្នា​ ទទួលបាន​ផល​ពី​សេរីភាព ​ផ្នែក​សេដ្ឋកិច្ច​ដោយ​ក្តី​រីករាយ​ដោយ​មិន​លះបង់ ​សេរីភាព​បុគ្គល​មែន​នោះ (​ការពារ​ខ្លួន​យើង​ពី​អំពើ​ល្មើស​នានា​របស់​ក្រុមហ៊ុន​ធំ​) ច្បាស់​ណាស់​ហើយ​ថា យើង​ត្រូវតែ​ការពារ​ឱ្យបាន​ដាច់ខាត​ធ្វើយ៉ាងណា ​ឱ្យ​វិស័យ​ឯកជន​ត្រូវតែ​គោរព​ច្បាប់​ និង​ត្រូវ​ស្រឡាញ់​ការ​ប្រកួតប្រជែង​ក្នុង​ទីផ្សារ ជា​អមត:​តរៀង​ទៅ​។ នេះ​ជា​គោល​គំនិត​របស់​ច្បាប់​ស្តីពី​ ការប្រកួត​ប្រជែង​មិន​ថា​នៅ​ប្រទេស​ណា​ទេ​។

ឈប់​សិន ម៉េច​បានជា​និយាយ​ពី​ទីផ្សារ​អ្វី​ច្រើន​ម្ល៉េះ​? ចាំបាច់​អី​ទៅ​គ្រប់​គ្រង​លើ​ទីផ្សារ​? តាម​ការអនុវត្ត​ជាក់ស្តែង ភាគច្រើន​នៃ​រឿងក្តី​នៅ​តុលាការ​ស្រុក​អាមេរិក​ ដែល​ទាក់ទង​នឹង​ការប្រកួត​ប្រជែង គេ​តោង​ចាប់ផ្តើម​ពី​ការវែកញែក ​កំណត់​ទីផ្សារ​ជាក់លាក់​មួយ​ ដែល​ផលិតផល​ណា​នោះ ​កំពុង​តែ​ធ្វើការ​ប្រកួតប្រជែង​ជាមួយគ្នា​។

តាម​និយមន័យ​ច្បាប់ ​ក្រុមហ៊ុន​អាហារដ្ឋាន ​Kentucky Fried Chicken ​និង​ Texas Chicken មាន​ទំនាក់ទំនង​ក្នុង​ខ្សែ​ដេក ​ជាមួយគ្នា​ទោះ​ចង់​មិន​ចង់​ក៏ដោយ ​(​ដោយសារ​ប្រតិបតិ្តការ​ផលិតកម្ម​ និង​ចែកចាយ​ក្នុង​កម្រិត​ដូចគ្នា​)​។

ដោយឡែក​ក្រុមហ៊ុន​កសិដ្ឋាន​ ដែល​ផ្តល់​សាច់មាន់ ​គឺមាន​ទំនាក់ទំនង​ក្នុង​ខ្សែ​ឈរ​ ជាមួយនឹង​ក្រុមហ៊ុន​អាហារដ្ឋាន​ទាំង​២នេះ​។ ក្រៅពី​ទំនា​ក់ទំនង​ទាំង​២​ប្រភេទ​នេះ​ (​ខ្សែ​ដេក​ និង​ខ្សែ​ឈរ​) ច្បាប់​ស្តី​ការប្រកួតប្រជែង​នៅ​កម្ពុជា​មានចែង​នូវ​ស្ថានភាព​២​ទៀត ​ដែល​អាចធ្វើឱ្យ​យើង​បើកភ្នែក​ធំៗ​សម្លឹងមើលដូចជា៖

ទី១ ​ជំហរ​ឧត្តមភាព​លើ​ទីផ្សារ ​និង​ការរួម​បញ្ចូល​គ្នា​នូវ​ធុរកិច្ច​។ យើង​ត្រូវតែ​ចាប់អារម្មណ៍ ​លើ​ពាក្យ​ទីផ្សារ​ព្រោះថា​ ច្បាប់​របស់​យើង​បាន​ខិតខំ​ដល់​ថ្នាក់​ផ្តល់​និយមន័យ​ឱ្យ​ទៀត​ ទី២ ទីផ្សារ​សំដៅ​ដល់​​ទីផ្សារ​ទំនិញ ​ឬ​សេវា​ដែល​កំពុង​ប្រកួតប្រជែង រីឯ​ការប្រកួត​ប្រជែង ​សំដៅ​ដល់​សកម្មភាព​របស់​បុគ្គល​ធ្វើ​ធុរកិច្ច​នៅក្នុង​ទីផ្សារ​ ដើម្បី​ដណ្តើមយក​អតិថិជន ​ឱ្យបាន​ច្រើន​ក្នុងការ​ប្រើប្រាស់​នូវ​ទំនិញ​ ឬ​សេវា​របស់ខ្លួន​ទទួលបាន​ នូវ​ចំណែក​ទីផ្សារ​ច្រើន​ និង​ជំហរ​ឧត្តមភាព​លើ​ទីផ្សារ​។

បើ​និយាយ​ឱ្យ​ស្រួល​ស្តាប់ ទំនាក់ទំនង​ណា​ ដែល​មិន​ស្ថិត​លើ​ខ្សែ​ដេក​គឺ​ស្ថិត​លើ​ខ្សែ​ឈរ ប៉ុន្តែ​ការវិវត្ត​យ៉ាង​លឿន ​ក្នុង​​ចរិតលក្ខណ:​នៃ​ផលិតផល​និង​សេវា អាចធ្វើឱ្យ​ការបែងចែក​នេះ​ពិបាក​នឹងធ្វើ​ណាស់​។

ជាក់ស្តែង​កាលពី​២០​ឆ្នាំមុន គ្មាន​នរណា​និយាយថា Microsoft និង​ Google ជា​គូប្រជែង​គ្នា​ទេ តែ​ចាប់តាំងពី​ប៉ុន្មាន​ឆ្នាំ​ចុងក្រោយ​មកហើយ ការប្រឈមមុខ​ដាក់គ្នា ​រវាង​ក្រុមហ៊ុន​ទាំង​២នេះ គឺ​បាន​ឈានដល់​កម្រិត​ដែល​ហួសការ​ស្មាន​របស់​យើង​ទៅទៀត​។

ភាពស្មុគស្មាញ​ ពី​សមាសធាតុ​ក្នុង​ទីផ្សារ​បច្ចេកវិទ្យា ​ធ្វើឱ្យ​អ្នកជំនាញ​សេដ្ឋកិច្ច​ឈឺក្បាល​ខ្លាំងណាស់ ​ហើយ​ការដែល​ក្រុមហ៊ុន​២ ​អាច​សហការគ្នា​ក្នុង​រឿង​ខ្លះ និង​ជា​គូបដិបក្ខ​​ស្លាប់​រស់ក្នុង​រឿង​ខ្លះទៀត ​ធ្វើឱ្យ​ការព្យាយាម​របស់​អ្នកច្បាប់ ​ក្នុងការ​បង្ហាញ​ពី​អត្ថិភាព​ នៃ​ទីផ្សារ​ជាក់លាក់​ណាមួយ​រឹតតែ​លំបាក​។

ការលំបាក​នេះ​ មិនមែន​ជា​កំហុស​របស់​នរណា​ទេ​។ ដើម្បី​អាចឈាន​ទៅដល់​ការបង្កើត​ទីផ្សារ​មួយ​ ដែល​ឈរលើ​បរិស្ថាន​ប្រកួតប្រជែង ​ដែល​ល្អឥតខ្ចោះ​នោះ ​ទាល់តែ​នៅក្នុង​ទីផ្សារ​នោះ ​អ្នកលក់​ទាំងអស់​លក់​ផលិតផល​ដែល​ដូចគ្នា ​ដែល​ការទិញ​ពី​អ្នកណា​ក៏​លែង​សំខាន់ ហើយ​អ្នកលក់​មានលទ្ធភាព​ស្មើគ្នា ​ក្នុង​ការស្វែងរក​វត្ថុធាតុដើម។
អ្នកលក់​នីមួយៗ​មាន​ទំហំ​តូចៗ​ដូចគ្នា ​ដែល​បើ​អ្នកលក់​ណាមួយ​សម្រេចចិត្ត​លក់​បរិមាណ​តិច​ ឬ​ច្រើន​ក៏​មិន​ថ្វី និង​ចុងក្រោយ​បំផុត​រាល់​អ្នកចូលរួម​ក្នុង​ទីផ្សារ​ មាន​ការយល់ដឹង​ពី​តម្លៃ ​និង​មាន​ព័ត៌មាន​សព្វគ្រប់​។

ទាំង​រូបអ្នក​ទាំង​រូបខ្ញុំ​ដឹង​ច្បាស់​ណាស់​ថា លក្ខខណ្ឌ​សម្រាប់​គាំទ្រ​ឱ្យ​មាន​ការប្រកួតប្រជែង ​ល្អឥតខ្ចោះ​ខាងលើនេះមិនអាច​ទៅរួច​ទេ ក្នុង​ទីផ្សារ​មែនទែន ហើយ​យើង​ក៏​ត្រេកអរ​ដែរ ​ដែល​ការដែល​គ្មាន​ភាពល្អ​ឥតខ្ចោះ​នេះ​បាន​ជួយ​ជំរុញ​ ឱ្យមាន​ការច្នៃប្រឌិត​នានា​ជាច្រើន​។

ប៉ុន្តែ​ជាមួយ​គ្នានេះដែរ ភាពមិន​ល្អឥតខ្ចោះ​នេះ​ ក៏បាន​បើកផ្លូវ​ឱ្យ​ក្រុមហ៊ុន​ ដែល​ចង់​បានតែ​ប្រាក់ចំណេញ ​មានឱកាស​រំលោភបំពាន ​លើ​សេរីភាព​បុគ្គល​ផងដែរ​។ បទពិសោធ​នៅ​អាមេរិក​ជា​សក្ខីភាព​ស្រាប់​។
រដ្ឋបាល​ក្រោម​លោក អូបាម៉ា បាន​បិទ​ភ្នែក​អនុញ្ញាតឱ្យ Facebook និង Google ច្បាម​យក​ និង​បង្កើន​អំណាច​ឯកជន​របស់ខ្លួន​ យ៉ាង​សម្បើម តាមរយៈ​ការទិញ​យក ​ក្រុមហ៊ុន​ដទៃទៀត​ជាច្រើន​។

ការ​ច្បាម​យក​អំណាច ​ក្នុង​វិស័យ​ឯកជន ​ធ្វើឱ្យ​ការប្រកួតប្រជែង​លែងមាន ហើយ​ថែមទាំង​អាច​នាំទៅដល់​ការប៉ះពាល់ ​ដល់​សេរីភាព​បុគ្គល​ទៀតផង (​ដូចជា​ការប្តឹង​ទាក់ទង ​នឹង​ការប្រើប្រាស់​ព័ត៌មាន​ផ្ទាល់ខ្លួន ​របស់​អតិថិជន​ជាដើម​)​។

បើ​ក្រុមហ៊ុន​ធំៗ​ មិនអាច​ក្លាយជា​អ្នក​ស្រឡាញ់​សេរីភាព​បុគ្គល​បានទេ​នោះ តើ​អ្នកណា​ត្រូវ​គ្រប់គ្រង​?៕
ដោយបណ្ឌិតលោកព្រំម វីរ:បង្រៀនច្បាប់​នៅ CamEd Business School៕

គម្រោង Green Zone Residence ចាប់ដៃសហការជាមួយគេហទំព័រ Propertyarea ផ្សព្វផ្សាយដល់សាធារណៈជន

ដោយៈគង់ សូរិយា

ភ្នំពេញៈ គំរោងលំនៅដ្ឋានដ៏ស្រស់ស្អាត និងមានទីតាំងនៅជាយរាជធានីភ្នំពេញ Green Zone Residence បានចាប់ដៃសហការរយៈពេលវែង ជាមួយគេហទំព័រ Propertyarea.asia ដែលជាគេហទំព័រព៌តមានឈានមុខគេផ្នែកព៌តមានអចលនទ្រព្យ និងសេដ្ឋកិច្ច។

ពិធីចុះហត្ថលេខាសហការនេះ បានធ្វើឡើងរវាងលោកឧកញ៉ាម៉ន សុខា ប្រធានក្រុមប្រឹក្សាភិបាលគំរោង Green Zone Residence និងលោកយិន លាងគង់ ជាសហស្ថាបនិក និងអគ្គនាយកគេហទំព័រ Propertyarea កាលពីថ្ងៃទី១៣ មករាកន្លងមកនេះ។

លោកឧកញ៉ាម៉ន សុខា ប្រធានក្រុមប្រឹក្សាភិបាលគំរោងលំនៅដ្ឋានលំហែរកាយបែបប្រណណីតខាងលើនេះ និងជាប្រធានសមាគមអ្នកអភិវឌ្ឈ​ន៍ដីឡូត៍កម្ពុជាបានមានប្រសាសន៍ថា ការអភិវ​ឌ្ឍលើវិស័យអចលនទ្រព្យទាមទារយើងមានដៃគូច្រើន ទាំងផ្នែកលក់ ផ្នែកទីផ្សារ និងផ្នែកសារព៌តមា​ន ដូចជា គេហទំព័រ Propertyarea.asia ដែលជាគេហទំព័រទទួលបានការទុកចិត្ត និងផ្សព្វផ្សាយព៌តមាន ប្រកបដោយមូល​ដ្ឋានក្រមសីលធ៌មវិជ្ជាជីវៈ លឿនរហ័ស និងប្រកបដោយទំនួលខុសត្រូវសង្គម។

លោកបន្តថា “លោកយិន លាងគង់ ដែលជាអគ្គនាយកគេហទំព័រនេះ មានបទពិសោធន៍យូរឆ្នាំ លើវិស័យព៌តមាន ពិសេសព៌តមានផ្នែកអចលនទ្រព្យ ហើយលលោកបានយល់ពីជម្រៅ នៃការផ្សព្វផ្សាយព៌តមាន និងគុណតម្លៃសម្រាប់់ពង្រីកទីផ្សាររបស់យើង”។

លោកឧកញ៉ាម៉ន សុខាបានបន្តថា “ការរីកចម្រើននៅតំបន់ផ្លូវជាតិលេខ៥១ បាននិងកំពុងធ្វើឲ្យគំរោងនេះ ទទូលបានការចាប់អារម្មណ៍ច្រើន ដោយសារតម្លៃផ្ទះ មានចាប់ពីជាង ២០,០០០ដុល្លារ ដល់ជាង ៣០,០០០ដុល្លារ និងផ្តល់ការបញ្ចុះតម្លៃពិសេស សម្រាប់អតិថិជនទិញនៅពេលបើកលក់បែបហ្រ្វីសែល។

គំរោង Green Zone Residence មានទីតាំងស្ថិតនៅភូមិក្រាំង ទំនប់ ឃុំចាន់សែន ស្រុកឧដុង្គ ខេត្តកំពង់ស្ពឺ ខាងលិចផ្សារបាត់ដឹងប្រ​ហែ​ល៦គីឡូម៉ែត្រ។

លោកយិន លាងគង់សហស្ថាបនិក និងជាអគ្គនាយកគេហទំព័រ Propertyarea.asia បានសម្តែងក្តីរីករាយ ដែលបានសហការផ្សព្វផ្សាយ​លក់គំរោងនេះ ដោយលោកបានមានប្រសាសន៍ថា កាលពីពេលថ្មីនេះលោកបានទៅកាន់គំរោងនេះ ដោយលោកសង្កេតឃើញថា គំរោងនេះសាងសង់ឡើងផ្សារភ្ជាប់ជាមួយធម្មជាតិ ដែលសមស្របនឹងនិន្នាការរស់នៅបែបសម័យថ្មី និងសមស្របតាមបរិបទលក្ខខ័ណ្ឌអាកាសធាតុនៅកម្ពុជា។

លោកបន្តថា “និន្នាការវិនិយោគលំនៅដ្ឋាន លំហែរកាយបានកើនឡើង ដោយសារប្រជាពលរដ្ឋ មានការយល់ដឹងជាងមុន មានប្រាក់ចំណូលច្រើនជាងមុន ពិសេសពួកគាត់បានយល់ដឹង ពីការរស់នៅតាមបែបផែនជីវិតសម័យថ្មី”។

លោកបន្តថា “ដោយសារអាកាសធាតុកាន់់តែក្តៅ ហេតុនេះ ប្រជាជនកាន់តែ​ច្រើន ពិសេសស្ថាបត្យករនានា បានចាប់ផ្តើមគិតគូពីលំហខ្យល់ ពីបរិស្ថានបៃតង ដើម្បីផ្តល់ឲ្យអ្នករស់នៅ អាចផ្សារភ្ជាប់ជីវិតជាមួយធម្មជាតិ។

លោកយិន លាងគង់ បន្តថា គំរោងលំនៅដ្ឋានលំហែរកាយ Green Zone Residence បាននិងកំពុងដើរតាមបរិបទនេះ ដែលនៅក្នុងគំរោងនេះមានសួនទឹកកំសាន្ត មានសួនច្បារ ហាងកាហ្វេ និងសេវាកម្មកំសាន្តផ្សារភ្ជាប់ជាមួយធម្មជាតិជាច្រើនទៀត ដែលវានឹងផ្តល់ឲ្យអ្នករស់នៅអាចសំរាកលំហែរកាយចុងសប្តាហ៍ ជួបជុំមិត្តភ័ក្ត បងប្អូនអាំងសាច់ទទួលទាននិងលេងកំសាន្តបានយ៉ាងរីករាយទៀតផង៕

អគារពាណិជ្ជកម្មជីបម៉ុងតំលៃជាង ២០០លានដុល្លារបានបញ្ចប់គ្រោងអគារហើយ

ដោយ: ម៉ាលីស

ភ្នំពេញ: នាព្រឹកថ្ងៃទី១៤ មករា ២០២២ ក្រុមហ៊ុនជីប ម៉ុងបានប្រារព្ធពិធីបញ្ចប់គ្រោងអគារដល់ជាន់កំពូល នៃជីប ម៉ុងថៅវើ ដែលជាអគារពាណិ​ជ្ជកម្មចម្រុះលំដាប់អន្តរជាតិ វិនិយោគក្រោមទឹកប្រាក់២៣០លានដុល្លារសហរដ្ឋអាមេរិចទាំងថ្លៃដី និងថ្លៃសាងសង់ ស្ថិតនៅតាមបណ្ដោយមហាវិថី សហព័ន្ធរុស្ស៊ីរាជធានីភ្នំពេញ។

អ្នកឧកញ៉ាលាង ឃុនសហស្ថាបនិក និងជាប្រធានក្រុមប្រឹក្សាភិបាលក្រុមហ៊ុន ជីប ម៉ុងមានប្រសាសន៍ថា ការបញ្ចប់គ្រោងអគារដល់កំពូលជាន់ទី៤៥នេះ គឺជាសមិទ្ធផលដ៏សំខាន់មួយដែល បញ្ជាក់ឲ្យឃើញពីកិច្ចខិតខំប្រឹងប្រែងរបស់ ថ្នាក់ដឹកនាំ និងក្រុមការងារទាំងអស់ ក៏ដូចជា ការអភិវឌ្ឍឥតឈប់ឈររបស់ក្រុមហ៊ុនជីប ម៉ុង ក្រោមចក្ខុវិស័យវែងឆ្ងាយ និងយុទ្ធសាស្រ្តច្បាស់លាស់ ដើម្បីរួមចំណែកក្នុងការអភិវឌ្ឍសង្គម និងសេដ្ឋកិច្ច។

ក្រៅពីគាំទ្រផ្នែកពាណិជ្ជកម្ម និងទេសចរណ៍នៅកម្ពុជា មជ្ឈមណ្ឌលសេដ្ឋកិច្ចនេះ ក៏បានបង្កើតឱកាសការងារជាច្រើន ដែលរួមចំណែកលើកស្ទួយជីវភាពរបស់សហគមន៍ ក៏ដូចជា លើកកម្ពស់វិស័យអចលនទ្រព្យ ហេដ្ឋារចនាសម្ព័ន្ធ ជាពិសេសបានគាំទ្រដល់អាជីវកម្មតូចៗ ជុំវិញតំបន់នេះផងដែរ។ នេះបើយោងតាមការបញ្ជាក់ របស់លោក Simon DELL អគ្គនាយករងជាន់ខ្ពស់ផ្នែកយុទ្ធសាស្រ្ត និងអភិវឌ្ឍន៍ពាណិជ្ជកម្មនៃក្រុមហ៊ុនជីប ម៉ុង។

អគារជីប ម៉ុង ថៅវើ នេះមានកម្ពស់១៨៥ម៉ែត្រ សាងសង់លើផ្ទៃដី ទំហំ១៤,០៤២ ម៉ែត្រការ៉េ។ អគារនេះ ត្រូវបានសាងសង់ជាមួយស្ថាបត្យកម្មដ៏វិចិត្រ ដែលនឹង បម្រើដល់វិស័យសំខាន់ៗ ចូលរួមជំរុញសេដ្ឋកិច្ចកម្ពុជា ដូចជា ផ្នែកបដិសណ្ឋារកិច្ច ការិយាល័យសម្រាប់ក្រុមហ៊ុនសហគ្រាស ផ្សារទំនើប និងការកម្សាន្តជាដើម៕

រដ្ឋាភិបាលអនុម័តគម្រោងវិនិយោគរោងចក្រថ្មីមានទំហំទឹកប្រាក់ជាង ៧០លានដុល្លារអាមេរិក

ដោយ: លក្ខិណា

ភ្នំពេញៈ នៅដើមឆ្នាំ២០២២នេះ កម្ពុជាបន្តទទួលបានការវិនិយោគថ្មី​ៗជាបន្តបន្ទាប់ ជាក់ស្ដែងក្នុងរយៈពេល២សប្ដាហ៍ប៉ុណ្ណោះ កម្ពុជាទទួលបានគម្រោងវិនិយោគ រោងចក្រថ្មីចំនួន១២គម្រោង ដែលមានទឹកប្រាក់ជាង៧០លានដល្លារ។

គម្រោងទាំង១២ដែលបានអនុម័ត ដោយក្រុមប្រឹក្សាអភិវឌ្ឍន៍កម្ពុជា គឺសុទ្ធតែជាគម្រោងរោងចក្រ ក្នុងនោះរួមមាន ទី១ គម្រោងបង្កើតរោងចក្រផលិតម្សៅស៊ីលីកា (Micro Silica & Silica Powder) ដែលមានទីតាំងវិនិយោគស្ថិតនៅ ខេត្តព្រះសីហនុ មានទុនវិនិយោគប្រមាណ១៨,៦លានដុល្លារអាមេរិក និងអាចបង្កើតការងារបានចំនួន ២០៨កន្លែង។

ទី២ គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅ ក្រុងដូនកែវ ខេត្តតាកែវ មានទុនវិនិយោគចំនួន៣,៥លានដុល្លារអាមេរិក និងអាចបង្កើតការងារបានចំនួន៥៤៧កន្លែង។

ទី៣ គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិត រាជធានីភ្នំពេញ មានទុនវិនិយោគប្រមាណ១៤,៧លានដុល្លារអាមេរិក និងអាចបង្កើតការងារបានចំនួន ២.៩៤៧កន្លែង។

ទី៤ គម្រោងបង្កើតរោងចក្រផលិតកាបូបគ្រប់ប្រភេទ និងវ៉ាលិស ដែលមានទីតាំងវិនិយោគស្ថិតនៅ ស្រុកសំរោងទង ខេត្តកំពង់ស្ពឺមានទុនវិនិយោគប្រមា​ណ៥,៨លានដុល្លារអាមេរិក និងអាចបង្កើតការងារបាន១.៥៣០កន្លែង។

ទី៥ គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅ ស្រុកកណ្តាលស្ទឹង ខេត្តកណ្តាល មានទុនវិនិយោគប្រមា​ណ៥,៦លានដុល្លារអាមេរិក និងអាចបង្កើតការងារបានចំនួន១.៧២០កន្លែង។

ទី៦ គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅ ស្រុកពញាឮ ខេត្តកណ្តាល មានទុនវិនិយោគប្រមាណ៥លានដុល្លារអាមេរិក និងអាចបង្កើតការងារបានចំនួន១.៧៤៣កន្លែង។

ទី៧ គម្រោងបង្កើតរោងចក្រផលិតកាបូប និងថង់យួរគ្រ់ប្រភេទដែលមានទីតាំងវិនិយោគស្ថិតនៅ ស្រុកសំរោងទង ខេត្តកំពង់ស្ពឺ មានទុនវិនិយោគចំនួន៥លានដុល្លារ និងអាចបង្កើតការងារបាន១.៥៤៤កន្លែង។

ទី៨ គម្រោងបង្កើតរោងចក្រ ផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅ ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ៣លានដុល្លារអាមេរិក និងអាចបង្កើតការងារបានចំនួន៧៥៨កន្លែង។

ទី៩ គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅ ខណ្ឌសែនសុខ រាជធានីភ្នំពេញ មានទុនវិនិយោគប្រមា​ណ៣លានដុល្លារអាមេរិក និងអាចបង្កើតការងារបានចំនួន៦១៧កន្លែង។

ទី១០ គម្រោងបង្កើតរោងចក្រផលិតកេសកាតុង និងផលិតផលប្លាស្ទិក ដែលមានទីតាំងវិនិយោគស្ថិតនៅ ខេត្តព្រះសីហនុ មានទុនវិនិយោគចំនួន៦៨ម៉ឺនដុល្លារអាមេរិក និងអាចបង្កើតការងារបានចំនួន១៣០កន្លែង។

ទី១១ គម្រោងបង្កើតរោងចក្រផលិត សម្ភារៈសត្វចិញ្ចឹម ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជី ខេត្តព្រះសីហនុ មានទុនវិនិយោគចំនួន៥០ម៉ឺនដុល្លារអាមេរិក និងអាចបង្កើ​តការងារបានចំនួន៦០កន្លែង។

ទី១២ គម្រោងបង្កើតរោងចក្រកាត់ដេរសម្លៀកបំពាក់ មានទីតាំងវិនិយោគស្ថិតនៅខេត្តកំពង់ស្ពឺ មានទុនវិនិយោគប្រមាណ ៥លានដុល្លារអាមេរិក និងអាចបង្កើតការងារបានចំនួន១.៨៤៧កន្លែង៕

Land prices on Street 43 to rise after road construction is closer to develop

by Sotheary

Kompot: The National Road 43 development project, which connects National Road 3 at Kampot to National Road 4 of Kampong Speu Province, is gradually preparing for the development process, and land price along this road is expected to rise to another level.

Mr. Keo Socheat, Branch Manager of KW Cambodia Real Estate Company in Kampot Province, said the projects along National Road 43 has been increasing the odds of land along this road. In fact, land in that area used to be only 5 to 10 USD, but now it has risen to 15 USD, and some areas are even higher depending on the potential location.

He noticed some local companies have started development gradually, such as the land development project of Bokor Lane II, and some investors who bought land to be ready for development in the future.

“The developers who came to the area developed as a vacation home, a plantation, but have not seen any big development yet,” he said.

Mr. Sok Ken, Director of Kampot Street Real Estate, also said that with the immediate development of National Road 43, land prices along this road project have risen to a certain level, and once this road is built, it will rise again, and the development potential in the area has changed slightly.

He said that at present, the development is only on recreation areas and plantations, but in the future, when the road is completed, it will be developed as an industrial area, factory, enterprise, because the road is the main road to transport goods to Sihanoukville port or Kampot deep water port that has been under construction. Therefore, investors may build warehouses and transport to both ports.

ធនាគារក្នុងស្រុកមួយទៀតវិនិយោគ១០លានដុល្លារលើគម្រោងព្រលានយន្តហោះអន្តរជាតិតេជោ

ដោយ៖ លក្ខិណា

ភ្នំពេញ៖ នៅថ្ងៃទី១៤ ខែមករា ឆ្នាំ២០២២នេះ ធនាគារពាណិជ្ជអាល់ហ្វា បានចុះហត្ថលេខាទិញសញ្ញាបណ្ណ១០លានដុល្លារអាមេរិកពីក្រុមហ៊ុន Cambodia Airport Investment Co.,Ltd ដែលជាក្រុមហ៊ុនអភិវឌ្ឍន៍ព្រលានយន្តហោះអន្តរជាតិតេជោ។

ពិធីចុះហត្ថលេខានេះធ្វើឡើងរវាងក្រុមហ៊ុន Cambodia Airport Investment Co., Ltd (CAIC) តំណាងដោយលោកឆារស៍ វ៉ាន់ Charles Vann ជាអគ្គនាយករង និងធនាគារពាណិជ្ជ អាល់ហ្វា ម.ក តំណាងដោយ ឧកញ៉ា លី ឃុនថៃ ជាប្រធានក្រុមប្រឹក្សាភិបាល ក្រោមអធិបតីភាពដ៏ខ្ពង់ខ្ពស់របស់អ្នកឧកញ៉ាបណ្ឌិត ពុង ឃាវសែ។

បើតាមសេចក្ដីប្រកាសព័ត៌មានរបស់ក្រុមហ៊ុន(CAIC)ឱ្យដឹងថា ទឹកប្រាក់វិនិយោគដែលទទួលបានពីសញ្ញាបណ្ណនេះ នឹងត្រូវប្រើប្រាស់សម្រាប់ការសាងសង់ និងការអភិវឌ្ឍ គម្រោងសាងសង់អាកាសយានដ្ឋានអន្តរជាតិតេជោ នៅខេត្តកណ្តាល។

មកដល់បច្ចុប្បន្ននេះ គម្រោងអាកាសយានដ្ឋានអន្តរជាតិតេជោ សម្រេចបានការសាងសង់ប្រមាណ៣០ភាគរយ ដែលបានចំណាយទឹកប្រាក់សរុប៣៩០លានដុល្លារអាមេរិករួចហើយ ដោយមិនរាប់បញ្ចូលថ្លៃដីដែលវិនិយោគរួចដោយ CAIC។

CAIC គឺជាក្រុមហ៊ុនបណ្តាក់ទុនរួមគ្នារវាងរាជរដ្ឋាភិបាលកម្ពុជា (RGC) ដែលតំណាងដោយរដ្ឋលេខាធិការដ្ឋានអាកាសចរស៊ីវិល និង ក្រុមហ៊ុន OCIC ។ រាជរដ្ឋាភិបាលកម្ពុជាបានផ្តល់សិទ្ធិឱ្យ ក្រុមហ៊ុនCAIC ក្នុងការកាន់កាប់ រចនា ប្លង់ សាងសង់ ធ្វើហិរញ្ញប្បទាន និងគ្រប់គ្រងប្រតិបត្តិការគម្រោង អាកាសយានដ្ឋានអន្តរជាតិតេជោ៕