ដោយៈគង់ សិរីជេស៊ីកា

ភ្នំពេញៈ ការវិនិយោគលើហេដ្ឋារចនាសម្ព័ន្ឋ បាននិងកំពុងបន្តជាផែនការអាទិភាពរបស់រដ្ឋាភិបាលកម្ពុជា ដើម្បីជម្រុញកំនើនសេដ្ឋកិច្ចជាតិ ក៏៏ដូចជារត់ប្រណាំងជាមួយប្រទេសក្នុងតំបន់ផង និងសមាហរណកម្មសេដ្ឋកិច្ចកម្ពុជាផ្ទៃក្នុងផង។

ដោយហេតុនេះ ទើបនៅឆ្នាំ២០២២ខាងមុខ គំរោងហេដ្ឋារចនាសម្ព័ន្ឋចំនួន៦របស់រដ្ឋាភិបាល ស្ថិតក្នុងផែនការអាទិភាពដែលត្រូវខ្ចិកម្ចីពីដៃគូអភិវឌ្ឍន៍នានា។

តាមផែនការរបស់រដ្ឋាភិបាល ដែលមានក្រសួងសាធារណៈការ និងដឹកជញ្ជូនជាសេនាធិការបានឲ្យដឹងថា រដ្ឋាភិបាលគ្រោងនឹងបើកការដ្ឋាន សាងសង់ស្ពានឆ្លងកាត់ទន្លេមេគង្គ ខេត្តក្រចេះនាពេលខាងមុខ ដោយរង់ចាំតែកាលវិភាគរបស់សម្តេចតេជោនាយករដ្ឋមន្រ្តីនៃកម្ពុជា ព្រោះស្ពាននេះបានសិក្សាបញ្ចប់រួចហើយ។

ជាមួយគ្នានេះ រដ្ឋាភិបាលនឹងសាងសង់ស្ពានឆ្លងកាត់ទន្លេសាប តភ្ជាប់ពីក្រុងកំពង់ឆ្នាំង ទៅកាន់ស្រុកកំពង់លែង និងតភ្ជាប់ទៅកាន់ខេត្តកំពង់ធំផងដែរ ដែលស្ពាននេះបានសិក្សាបញ្ចប់ហើយ និងបានដាក់សំណើរស្នើសុំជំនួយ ពីរដ្ឋាភិបាលចិនរួចផថងដែរ ប៉ុន្តែតើភាគីចិន ជួយផ្តល់កម្ចីបែបឥណទានសម្បទាននៅពេលណា មិនទាន់មានការបញ្ជាក់ ឲ្យដឹងពីក្រុមមន្រ្តីនៅឡើយទេ។

ស្ពាននេះពេលសាងសង់ចប់ នឹងអាចក្លាយជាស្ពានវែងជាងគេនៅកម្ពុជា ដោយមានប្រវែងប្រមាណជិត ៣០០០ម៉ែត្រ។

ចំណែកស្ពានតភ្ជាប់ពីតំបន់ក្តីតាកុយ ផ្លូចជាតិលេខ១ ទៅតំបន់អារិយក្សត្រ មិនទាន់មានការសិក្សា និងប្រកាសជាផ្លួវការថាបញ្ចប់ការសិក្សឬយ៉ាងណាឡើយ ដោយគ្រាន់តែមានការបង្ហើបពីលោកទេសរដ្ឋមន្រ្តីស៊ុន ចាន់ថុល រដ្ឋមន្រ្តីសាធារណៈការ និងដឹកជញ្ជូនកាលពីពេលថ្មីៗនេះថា គំរោងសាងសង់និងពង្រីកបន្ថែមផ្លូវក្រវ៉ាត់់ក្រុងទី៣នាពេលខាងមុខ នឹងមានការសាងសង់ស្ពានពីក្តីតាកុយ ទៅអរិយក្សត្រ និងស្ពានតភ្ជាប់ពីតំបន់កោះដាច់ មកកាន់ផ្លូវជាតិលេខ៦អាផងដែរ។

ចំណែកស្ពានតភ្ជាប់តំបន់ជ្រោយចង្វារ ទៅកាន់តំបន់ស្វាយជ្រុំ បាននិងកំពុងស្ថិតក្នុងការសិក្សាកម្រិតបឋមរបស់អ្នកជំនាញការកូរ៉េ និងកម្ពុជាបណ្តើរៗហើយ ដើម្បីរកទីតាំងសាងសង់ និងទំហំនៃការចំណាយជាក់ស្តែង។ នេះបើតាមការបញ្ជាក់ឲ្យដឹងពីលោកវ៉ាស៊ីម សូរិយាអ្នកនាំពាក្យ និងជាអនុរដ្ឋលេខាធិការក្រសួងសាធារណៈការ និងដឹកជញ្ជូន។

លោកបានបន្តថា ក្នុងចំណោមស្ពានធំៗខាងលើ និងរវាងស្ពានតភ្ជាប់ពីក្រុងក្រចេះ ទៅកាន់ខេត្តកំពង់ធំ និងស្ពានឆ្លងកាត់ទន្លេសាប ក្នុងខេត្តកំពង់ឆ្នាំង តាមផែនការគឺស្ពាន​ឆ្លងកាត់ទន្លេមេគង្គ ក្នុងខេត្តក្រចេះនឹងលេចរូបរាងមុនមិនខាន។

សម្តេចតេជោហ៊ុន សែននាយករដ្ឋមន្រ្តីនៃកម្ពុជាកាលពីពេលថ្មីៗនេះបានបង្ហើបថា រដ្ឋាភិបាលគ្រោងសាងសង់ស្ពានធំៗ ឆ្លងកាត់ទនហលេមេគង្គចំនួន៥ទៀត នាពេលខាងមុខនេះ៕

ដោយៈស៊ីវ ម៉េង

ភ្នំពេញៈ ឧបនាយករដ្ឋមន្ត្រី ជា សុផារ៉ារដ្ឋមន្រ្តីក្រសូងរៀបចំដែនដី នគរូបនីយកម្ម និងសំណង់បានជំរុញឱ្យអង្គភាពសាងសង់ទាំងអស់ ខិតខំប្រឹងប្រែងបញ្ចប់គម្រោងសាងសង់នេះឱ្យបានត្រឹមថ្ងៃទី២៩ ខែធ្នូ ឆ្នាំ២០២១ ឱ្យត្រូវនឹងថ្ងៃបញ្ចប់សង្គ្រាមរ៉ាំរ៉ៃនៅកម្ពុជា ដើម្បីតបស្នងសងគុណជូនចំពោះសម្ដេចតេជោនាយករដ្ឋមន្ត្រី។

លោកឧបនាយករដ្ឋមន្រ្តីបានមានប្រសាសន៍បែបនេះ ក្នុងពេលលោកអមដំណើរ​សម្តេចពិជ័យសេនាទៀ បាញ់ ឧបនាយករដ្ឋមន្រ្តី និងជារដ្ឋមន្រ្តីក្រសូងការពារជាតិ ដែលបានចុះពិនិត្យការដ្ឋានសាងសង់ផ្លួវចំនូន៣៨ខ្សែ និងការកែលំអរស្ទឹងសៀមរាបកាលពី​ចុងសប្តាហ៍មុន។

លោកបន្តថា “វាជាថ្ងៃចងចាំមិនអាចបំភ្លេចបាន និងបានស្នើឱ្យអាជ្ញាធរខេត្ត ក៏ដូចជាបងប្អូនប្រជាពលរដ្ឋ ដែលរស់នៅតាមដងផ្លូវ៣៨ខ្សែ ចូលរួមដាំស្មៅបន្ថែម ដើម្បីបង្កើនសោភ័ណភាពដងផ្លូវ និងចូលរួមចំណែកថែរក្សា ដើម្បីកែប្រែមុខមាត់ទីក្រុង យើងដើម្បីទទួលភ្ញៀវទេសចរនៅពេលខាងមុខនេះ”។

បន្ថែមពីលើនេះ លោកឧបនាយករដ្ឋមន្ត្រី បានស្នើឱ្យមន្ទីរជុំវិញខេត្តរួមមាន មន្ទីរសាធារណការ និងដឹកជញ្ជូន មន្ទីររៀបចំដែនដី នគរូបនីយកម្ម និងសំណង់ និងមន្ទីរពាក់ព័ន្ធផ្សេងទៀត ជួយសម្រប សម្រួលបញ្ហានេះជាមួយប្រជាពលរដ្ឋ ដើម្បីឱ្យគាត់បានចូលរួមសកម្មភាពនេះ និងបានស្នើឱ្យអាជ្ញាធរខេត្តបង់ជូនប្រជាពលរដ្ឋវិញ នូវសេវាតភ្ជាប់តំណលូឱ្យបានគ្រប់ចំនួន១០០% ដែលពួកគាត់បានបង់ជូន សម្រាប់ការតភ្ជាប់តំណលូពីផ្ទះគាត់ទៅកាន់ប្រព័ន្ធលូមេកន្លងមក ដោយសារយើងបានទទួលការអនុម័ត ជាគោលការណ៍ពីសម្ដេចនាយករដ្ឋមន្ត្រីតេជោរួចហើយ។

ថ្លែងក្នុងមតិស្វាគមន៍នៅពេលចាប់ផ្តើមកិច្ចប្រជុំ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានគូសបញ្ជាក់ពីទឹកចិត្តដ៏ថ្លៃថ្លារបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានយកចិត្តទុកដាក់ ជួយសម្រួលដល់ការតភ្ជាប់ប្រព័ន្ធលូទឹកភ្លៀង និងទឹកកខ្វក់ពីខ្នងផ្ទះរបស់ប្រជាពលរដ្ឋ មកកាន់ប្រព័ន្ធលូមេដោយឥតគិតថ្លៃ តាមរយៈគណៈកម្មការអន្តរក្រសួង៕

ដោយៈ ម៉ាលីស

សៀមរាបៈ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានផ្ដល់ថវិកាជាង ៣,៨លានដុល្លាបន្ថែមទៀត សម្រាប់តភ្ជាប់បណ្ដាញលូរទឹកភ្លៀង និងទឹកក្វក់ ពីផ្ទះប្រជាពលរដ្ឋចូលប្រព័ន្ធលូសាធារណ:របស់រដ្ឋ នៅលើគម្រោងផ្លូវ៣៨ខ្សែ និងដើម្បីធ្វើចំណតរថយន្ដ ក្នុងក្រុងសៀមរាប។

សម្តេចពិជ័យសេនាទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធានក្រុមការងារអន្តរក្រសួងបន្ទប់ស្ថាបនាផ្លូវ ៣៨ខ្សែ ក្នុងក្រុងសៀមរាបបានថ្លែង ឲ្យដឹងកាលពីសប្តាហ៍មុនថា សម្ដេចតេជោ ហ៊ុន សែន នាយករដ្ឋមន្ដ្រី បានផ្ដល់វិកាចំនួនជាង៣លាន៨សែនដុល្លាបន្ថែមទៀត សម្រាប់គម្រោងតភ្ជាប់បណ្ដាញលូរទឹកភ្លៀង និងទឹកក្វក់ ចូលប្រព័ន្ធលូររដ្ឋ សម្រាប់ប្រជាពលរដ្ឋដែលរស់នៅ តាមបណ្ដោយផ្លូវ៣៨ខ្សែនោះ ហើយប្រជាពលរដ្ឋមិនត្រូវចំណាយថវិកាខ្លួនឯងនោះទេ។

សម្ដេចលើកឡើងថា “ប្រព័ន្ធលូរទឹកភ្លៀង និងទឹកកខ្វក់ មានចំនួនប្រមាណ១ម៉ឺន២ពាន់កន្លែង ដែលនៅតាមសងខាងគម្រោងផ្លូវចំនួន៣៨ខ្សែ និងចំណរថយន្ដមានប្រវែងជាង២ពាន់ម៉ែត្រ ហើយគម្រោងថវិកាសម្ដេចតេជោ ជាង៣លានដុល្លានេះ គឺជាចំណងដៃថ្មីមួយទៀត សម្រាប់អ្នកខេត្ដសៀមរាប បន្ទាប់ពីគម្រោងស្ថាបនាផ្លូវ៣៨ខ្សែ”។

គម្រោងសាងសង់ផ្លូវ៣៨ខ្សែ នៅក្រុងសៀមរាប មានប្រវែងសរុប១០៦,៤២៤ គីឡូម៉ែត្រ ប្រើប្រាស់ថវិកាជាតិសរុបប្រមាណ១៤៩.២១៦.៥៩៥ដុល្លារអាមេរិក និង ​ចំណាយពេលសាងសង់ចំនួន១៣ខែ គ្រោងនឹងបញ្ចប់នៅចុងឆ្នាំ២០២១។

គម្រោងនេះ ត្រូវបានសម្ពោធបើកការដ្ឋានសាងសង់ កាលពីថ្ងៃទី៣០ ខែវិច្ឆិកា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា៕

ដោយសហការី

ភ្នំពេញ៖ នៅថ្ងៃអាទិត្យ ទី១៤ ខែវិច្ឆិកា ឆ្នាំ២០២១នេះ ក្រុមហ៊ុន ខេ អេច លែន បានធ្វើកម្មវិធីប្រគល់រង្វាន់ខ្នាតយក្សរថយន្ត Ford Wildtrak ជូនភ្នាក់ងារលក់ឆ្នើម ប្រចាំគម្រោងក្រុងថ្មីដីមាសសំរោងលើ ដែលជាគម្រោងអភិវឌ្ឍន៍ទី៦ ទំហំ៥០ហិកតា ដែលមានទីតាំងនៅ ភូមិកោះគ្របបាយ និងភូមិត្រពាំងទន្លាប់ ឃុំសំរោងលើ ស្រុកអង្គស្នួល ខេត្តកណ្តាល។

កម្មវិធីនេះបានប្រារព្ធធ្វើឡើងនៅក្នុងគម្រោង ទីក្រុងពាណិជ្ជកម្មភ្មំតូច ដែលជាគម្រោងអភិវឌ្ឍន៍ទី៧ មានទំហំរហូតដល់ ១០០ហិកតា ក្រោមវត្តមានរបស់គណៈគ្រប់គ្រង ក្រុមហ៊ុន ខេ អេច លែន ដែលមានលោក ថុន បូរ៉ា ជាអគ្គនាយក រួមទាំងភ្នាក់ងារលក់របស់ក្រុមហ៊ុន CLPR និងភ្ញៀវកិត្តិយស សរុបជាង១០០នាក់។

ក្រុមហ៊ុន ខេអេច លែន មានការរីកចំរើននិងនៅតែបន្តការអភិវឌ្ឍ រហូតមកដល់សព្វថ្ងៃនេះបាន អាស្រ័យលើការខិតខំ ប្រឹងប្រែងពីគ្រប់ផ្នែកពាក់ព័ន្ធ បុគ្គលិកគ្រប់ជាន់ថ្នាក់ រួមទាំងការគាំទ្ររបស់អតិថិជនទូទាំប្រទេស។ ក្នុងនោះ ភ្នាក់ងាលក់ ក៍ជាតួអង្គសំខាន់មួយ ដែលជួយជំរុញអោយការលក់របស់ក្រុមហ៊ុន ខេអេច លែន បានសម្រេចគោលដៅគួរជាទីកត់សម្គាល់។

គួបញ្ជាក់ផងដែរថា ជ័យលាភីភ្នាក់ងារលក់ឆ្នើម ប្រចាំគម្រោងក្រុងថ្មីដីមាសសំរោងលើ ដែលទទួលបានរង្វាន់រថយន្ត Ford Wildtrak បានទៅលើលោក បាន់​ ឆេង ដែលជាភ្នាក់ងារលក់របស់ក្រុម C ក្រោមការគ្រប់គ្រងនិងសម្របសម្រួល ដោយលោក ផូន សុអុនដែន។

ក្រុមហ៊ុន ខេអេច លែន សង្ឃឹមនិងជឿជាក់យ៉ាងមុតមាំថា ដៃគូសហការ និងអតិថិជនទូទាំងប្រទេស នៅតែបន្តការគាំទ្រគម្រោងអភិវឌ្ឍន៍របស់ក្រុមហ៊ុនតទៅមុខទៀត៕