ដោយ៖ សុផារី

ភ្នំពេញ៖ ក្នុងពិធីសម្ភោធអគារទីស្តីការក្រសួងរៀបចំដែនដី នគរូបនីយកម្ម និងសំណង់នៅថ្ងៃទី០៨ ខែវិច្ឆិកា ឆ្នាំ២០២១នេះ សម្តេចតេជោ ហ៊ុន សែន បានផ្តាំផ្ញើការងារចំនួន៣ ជូនទៅក្រសួងរៀបចំដែនដី នគរូបនីយកម្ម និងសំណង់ ឱ្យខិតខំបំពេញបន្ថែម។

ការងារទាំង៣នោះរួមមាន៖
ការងារទី១ បន្តខិតខំដោះស្រាយការចេញបណ្ណកម្មសិទ្ធជូនប្រជាពលរដ្ឋ ខិតខំដោះស្រាយជម្លោះដីធ្លីដែលនៅសេសសល់ ឬទើបកើត ដោយប្រើយន្តការសម្របសម្រួល ក្រៅប្រព័ន្ធតុលាការ។

ការងារទី២ ខិតខំដោះស្រាយការចេញបណ្ណកម្មសិទ្ធប្រកបដោយសុចរិតភាពលើការដោះស្រាយ។ ប្រសិនបើមានការដោះស្រាយ ប្រកបដោយសុចរិតភាព បញ្ហាប្រកដជាដោះស្រាយបាន។

ការងារទី៣ ខិតខំដោះស្រាយបញ្ហាដីសង្គមកិច្ច។

សម្តេចបានថ្លែងថា “ការខិតខំដោះស្រាយបញ្ហាដីសង្គមកិច្ច ជាកិច្ចការអាទិភាពមួយក្នុងចំណោមកិច្ចការអាទិភាពផ្សេងទៀត របស់រាជរដ្ឋាភិបាលដែលត្រូវធ្វើ។ កន្លងមក យើងបានធ្វើផ្ទះជូនពូកគាត់ ដូច្នេះដីធ្លីក៏ត្រូវរៀបចំជូនសម្រាប់អ្នកខ្វះដីផងដែរ”៕

ដោយ៖ សុធារី

ភ្នំពេញ៖ បញ្ហាដីធ្លីមិនមែនកើតឡើងឥលូវនោះទេ ពេលមានការអភិវឌ្ឍ វាតែងតែប៉ះពាល់ហើយ។ នេះបើតាមការថ្លែងរបស់សម្តេចតេជោ ហ៊ុន សែន ក្នុងពិធីបើកសម្ពោធជាផ្លូវការអគារទីស្តីការក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី០៨ ខែវិច្ឆិកា ឆ្នាំ២០២១នេះ។

សម្តេចតេជោបានមានប្រសាសន៍ថានៅលើពិភពលោកតែងតែមានការអភិវឌ្ឍជារឿងធម្មតា។ ប្រជាជនកើនឡើង តែងតែមានការបាត់បង់ដីហើយ វាគ្មានការអភិវឌ្ឍណាមួយដែលគ្មានសម្ពាធលើបរិស្ថាននោះទេ។

សម្តេចបានរំលឹកថា ប្រវត្តិនៃការឡើងថ្លៃដីធ្លីក្នុងប្រទេសកម្ពុជាមានពីរដំណាក់កាល។ ដំណាក់កាលទី១ គឺសម័យសង្គមរាស្ត្រនិយម ព្រោះមានការអភិវឌ្ឍ តែមានមន្រ្តីមួយចំនួយក្នុងសម័យនោះជាមន្ត្រី ដែលកឹបកេងយកដីធ្លី។ ចំណែកការបាត់បង់តម្លៃរបស់ដីគឺ បាត់បង់តម្លៃ ព្រោះសង្គ្រាម។

សម្តេចបានមានប្រសាសន៍ពន្យល់ថា បានជាខេត្តព្រៃវែងព្រោះមានព្រៃវែង តែឥឡូវនេះក្លាយជាវាលវែង ដោយសារតែមនុស្សមានការកើនឡើង ប៉ុន្តែដីនឹងត្រូវបាត់បង់តម្លៃនៅពេលសង្គ្រាមកើតឡើង ជាក់ស្តែង នៅក្នុងសម័យប៉ុលពត និងក្រោយប៉ុលពត៕

ដោយ៖ សុធារី

ភ្នំពេញ៖ ក្នុងពិធីបើកសម្ពោធជាផ្លូវការអគារទីស្តីការក្រសួងរៀបចំដែនដី នគរូបនីយកម្ម និងសំណង់ មានទីតាំងស្ថិតនៅ ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ នៅថ្ងៃទី០៨ ខែវិច្ឆិកា ឆ្នាំ២០២១សម្តេចតេជោ ហ៊ុន សែន បានថ្លែងថា អ្នករិះគន់រឿងការជន់លិចនៅភ្នំពេញ គឺជាការច្រណែនចំពោះសមិទ្ធផលនៃការអភិវឌ្ឍ។

សម្ដេចបានមានប្រសាសន៍ថា “ខ្ញុំយល់ការពិត ប្រណែន ប្រណែននឹងការអភិវឌ្ឍ”។

សម្តេចបានមានបញ្ជាក់ថា ដីដែលធា្លប់តែមានក្រលុក ថ្លុក ត្រពាំង វាលស្រែ សព្វថ្ងៃក្លាយជាផ្ទះ អគារខ្ពស់ៗ។ ទីក្រុងភ្នំពេញ តាំងពីមានទំហំជាង៣០០ គីឡូម៉ែត្រការ៉េ រហូតដល់ ៧០០ គីឡូម៉ែត្រការ៉េ។ កាលពីមុនសំណង់មានត្រឹមតែ៥០០០ ម៉ែត្រការ៉េ ក្នុងទំហំដី១ហិចតា រហូតដល់ពេលនេះកើនឡើងរហូតដល់៥០០០០ ម៉ែត្រការ៉េ។

ពាក្យថា ជំនន់ កើតឡើងប្រសិនបើក្បាលចេញនិងក្បាលចូលមិនស្មើគ្នា។ មិនត្រឹមតែព្រែកត្នោតនោះទេ សូម្បីតែទន្លេមេគង្គក៏ធ្លាប់មានជំនន់ដែរ។ សម្តេចបានថ្លែងថា យើងគ្មានរឿងអ្វីត្រូវបារម្ភរឿងការបាក់ទំនប់កប់ស្រូវនោះទេ ដោយសម្តេចបានបញ្ជាឱ្យចាប់ដីទប់មិនឱ្យបាក់។

សម្តេចតេជោ ហ៊ុន សែន ក៏បានមានប្រសាសន៍គាំទ្រការលុបស្រះទឹកមួយនៅក្នុង ហ្គ្រេនស៊ីធី របស់ក្រុមហ៊ុនជីបម៉ុង ដោយសារក្លិនអាក្រក់និងធ្វើឱ្យត្រីងាប់ ជាពិសេសត្រង់ឡូតិ៍ទី១១ និង១៣។ សម្តេចបានសង្កត់ថា “ប្រសិនបើខ្ញុំជាម្ចាស់ការដ្ឋាន ខ្ញុំលប់វាចោលយូរហើយ”៕ សម្តេចថានេះជាការចំណេញដីនិងលុបបំបាត់កាកសំណលកង្វក់៕

ដោយ៖ សុផារី

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានគូសបញ្ជាក់ថា អគារទីស្តីការក្រសួងមហាផ្ទៃថ្មីបានចំណាយថវិកាសាងសង់ប្រមាណជាង៦០លានដុល្លារ ដែលនឹងធ្វើពិធីចុះបឋមសិលាសាងសង់នៅទីតាំងចាស់ នៅថ្ងៃទី១១ ខែវិច្ឆិកា ឆ្នាំ២០២១ខាងមុខនេះ។

ក្នុងពិធីបើកសម្ពោធអគារទីស្តីការក្រសួងរៀបចំដែនដីនគរូបនីយកម្ម និងសំណង់ នាព្រឹកថ្ងៃទី០៨ ខែវិច្ឆិកា ឆ្នាំ២០២១នេះ សម្ដេចតេជោ ហ៊ុន សែន បានថ្លែងថា “នេះហើយដែលហៅថា ការរស់នៅតាមរបៀបថ្មីក្នុងបរិបទកូវីដ ឬការរស់ជាប្រក្រតីតាមគន្លងថ្មី។ ពីសាលដាក់បានជាង២ពាន់ យើងដាក់បានមនុស្សតែ៥០០នាក់ប៉ុណ្ណោះ។ កូវីដ១៩ អាចបំផ្លាញយើងបាន ប៉ុន្តែមិនអាចទប់ស្កាត់នូវដំណើរឈានរបស់យើងបានឡើយ”។

សម្តេចតេជោបានលើកឡើងថា ក្នុងឆ្នាំនេះមានក្រសួងចំនួន៣បានដាក់សម្ពោធឱ្យដំណើរដូចជា ក្រសូងសាធារណការ និងដឹកជញ្ជូន ក្រសួងរៀបចំដែនដីនគរូបនីយកម្ម និងសំណង់ និងក្រសួងដែលនឹងត្រូវសម្ពោធខួបលើកទី២៣ នៅថ្ងៃទី២៩ ខែធ្នូ ឆ្នាំ២០២១នោះ គឺក្រសួងការពារជាតិ។

សម្តេចតេជោនាយករដ្ឋមន្រ្ដីបានបន្ដែមថា បើតាមសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្រ្ដីក្រសួងមហាផ្ទៃបានឱ្យដឹងថា នៅថ្ងៃទី១១ ខែវិច្ឆិកា ឆ្នាំ២០២១ខាងមុខ នឹងធ្វើពិធីបញ្ចុះបឋមសិក្សាធ្វើក្រសួងមហាផ្ទៃថ្មី ដែលចំណាយថវិកាអស់ ប្រមាណជាង៦០លានដុល្លារ។

សម្តេចតេជោបានបញ្ជាក់ទៀតថា “យើងមានថវិការួចទៅហើយ ដើម្បីសាងសង់ពីព្រោះដល់ពេលដែលយើងត្រូវមានកន្លែងធ្វើការ។ ចំណុចនេះ យើងទាំងអស់គ្នាបានមើលឃើញ បានដឹងអំពីដំណើរវិវត្តន៍របស់ជាតិ នៅពេលដែលយើងចូលមកដល់ភ្នំពេញតើយើងមានអ្វីខ្លះ។ សម្រាប់ក្រសួង ដែលកាន់កាប់ក្រសួងចាស់ ក្នុងនោះ មានក្រសួងការពារជាតិ ក្រសួងការបរទេសជាដើម”៕

ដោយ៖ សូរិយា

ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានអនុញ្ញាតឱ្យប្រជាពលរដ្ឋរៀបចំពិធីមង្គលការឡើងវិញ ក្រោយប្រកាសបើកប្រទេស ប៉ុន្តែមង្គលការនោះ ត្រូវកំណត់ឱ្យមានភ្ញៀវចូលរួមច្រើនបំផុតត្រឹម២០០នាក់ប៉ុណ្ណោះ ហើយក្នុងនោះមិនរាប់បញ្ចូលទាំងអ្នកផ្តល់សេវានានានោះឡើយ។

ការប្រកាសរបស់សម្តេចតេជោ ហ៊ុន សែន បានធ្វើឡើងក្នុងឱកាសសម្តេចអញ្ជើញសម្ពោធ អគារទីស្តីការក្រសួងរៀបចំដែនដី នគរូបនីយកម្ម និងសំណង់ ដែលជាសមិទ្ធផលថ្មីដ៏ពិសិដ្ឋនៃស្ថាបត្យកម្មរបស់ជាតិកម្ពុជា តម្លៃជាង២៨លានដុល្លារអាមេរិក នៅថ្ងៃទី០៨ ខែវិច្ឆិកា ឆ្នាំ២០២១នេះ។

សម្តេចតេជោ ហ៊ុន សែន បានបញ្ជាក់ដូច្នេះថា៖ «រៀបការ ម្សិលមិញខ្ញុំបញ្ជាក់ហើយ អនុញ្ញាតឱ្យចូលរួមច្រើនបំផុត២០០នាក់ តែមិនគិតចំពោះអ្នកបម្រើសេវា ព្រោះបើមិនអញ្ចឹងអនុវត្តមិនបានទេ»។

សម្តេចបានបន្ថែមថា អ្នកបម្រើសេវានេះ មានទាំងអ្នករត់តុ ចុងភៅ និងអ្នកបម្រើសេវាអាពាហ៍ពិពាហ៍ផ្សេងៗទៀត។

រាជរដ្ឋាភិបាលកម្ពុជា បានប្រកាសបើកដំណើរការប្រទេសពេញលេញឡើងវិញ លើគ្រប់វិស័យ និងការរស់នៅជាមួយកូវីដ១៩ តាមបែបគន្លងថ្មី ចាប់ពីថ្ងៃទី០១ ខែវិច្ឆិកា ឆ្នាំ២០២១ បន្ទាប់ពីការរីករាលដាលនៅក្នុងប្រទេសបានធ្លាក់ចុះ ហើយពលរដ្ឋស្ទើរគ្រប់គ្នាទទួលបានវ៉ាក់សាំង។ ជាមួយនឹងការប្រកាសបើកប្រទេសនេះ អាជីវកម្មស្ទើរតែទាំងអស់ លើកលែងតែខារ៉ាអូខេ ត្រូវបានអនុញ្ញាត ក្នុងនោះក៏មានការអនុញ្ញាតឱ្យរៀបអាពាហ៍ពិពាហ៍ផងដែរ។

សម្តេចតេជោ ហ៊ុន សែន បានបន្តថា សម្តេចនឹងតាមដានស្ថានភាពបន្តទៀត ដែលថ្ងៃខាងមុខអាចនឹងបើកឱ្យមានភ្ញៀវចូលរួមមង្គលការច្រើនជាងនេះ៕