ធនាគារអេស៊ីលីដាវិនិយោគ៣០លានដុល្លារអាមេរិកលើមូលបត្របំណុលនៃព្រលានយន្តហោះអន្តរជាតិតេជោ

ដោយ៖ វឌ្ឍនៈ

ភ្នំពេញ ៖ នៅរសៀលថ្ងៃទី ១០ មករា ២០២២នេះ ធនាគារអេស៊ីលីដា បានសម្រេចវិនិយោគ៣០លានដុល្លារអាមេរិកលើមូលបត្របំណុលនៃគម្រោងអភិវឌ្ឍន៍អាកាសយានដ្ឋានអន្តរជាតិតេជោ។

ពិធីចុះហត្ថលេខារវាងធនាគារអេស៊ីលីដា និងក្រុមហ៊ុនអភិវឌ្ឍន៍ព្រលានយន្តហោះ Cambodia Airport Investment Co.,Ltd មានការចូលរួមពីលោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា និងអ្នកឧកញ៉ា ពុង ឃាវសែ ប្រធានក្រុមប្រឹក្សាភិបាល OCIC។

ក្នុងសេចក្ដីប្រកាសព័ត៌មានរបស់ក្រុមហ៊ុនអភិវឌ្ឍន៍ព្រលានយន្តហោះអន្តរជាតិតេជោឱ្យដឹងថា ទឹកប្រាក់វិនិយោគដែលទទួលបានពីការលក់សញ្ញាបណ្ណនេះ នឹងត្រូវប្រើប្រាស់សម្រាប់សាងសង់និងការអភិវឌ្ឍន៍គម្រោងសាងសង់អាកាសយានដ្ឋានអន្តរជាតិតេជោ នៅខេត្តកណ្ដាល។

បច្ចុប្បន្ន គម្រោងអាកាសយានដ្ឋានអន្តរជាតិបច្ចុប្បន្នសម្រេចបានប្រមាណ២៨ភាគរយ ត្រូវនឹងទឹកប្រាក់សរុបប្រមាណ៣៧៥លានដុល្លារអាមេរិក មិនទាន់រាប់បញ្ចូលនូវតម្លៃដីដែលបានវិនិយោគរួចហើយនោះទេ។

ក្រុមហ៊ុន OCIC ជាក្រុមហ៊ុនវិនិយោគក្នុងស្រុកមួយធំជាងគេនៅប្រទេសកម្ពុជា ដែលមានជំនាញនៅក្នុងការអភិវឌ្ឍលើវិស័យហេដ្ឋារចនាសម្ព័ន្ធ អចលនទ្រព្យសំណង់ ការគ្រប់គ្រងអចលនទ្រប្យ ការអប់រំ វេជ្ជសាស្ត្រ ផ្សារទំនើប សណ្ឋាគារ រោងម៉ាស៊ីនកិនស្រូវ និងសង្វាក់ផលិតកម្មជាដើម ជាមួយនឹងគម្រោងសំខាន់ៗ ជាច្រើនដូចជាអាកាសយានដ្ឋានអន្តរជាតិតេជោ ទីក្រុងកោះពេជ្រ កោះនរា ទីក្រុងរណបជ្រោយចង្វារ និងទីក្រុងទំនើប អូឡាំព្យាជាដើម៕

ធនាគារអេស៊ីលីដាវិនិយោគ៣០លានដុល្លារអាមេរិកលើមូលបត្របំណុលនៃព្រលានយន្តហោះអន្តរជាតិតេជោ

ដោយ៖ វឌ្ឍនៈ

ភ្នំពេញ ៖ នៅរសៀលថ្ងៃទី ១០ មករា ២០២២នេះ ធនាគារអេស៊ីលីដា បានសម្រេចវិនិយោគ៣០លានដុល្លារអាមេរិកលើមូលបត្របំណុលនៃគម្រោងអភិវឌ្ឍន៍អាកាសយានដ្ឋានអន្តរជាតិតេជោ។

ពិធីចុះហត្ថលេខារវាងធនាគារអេស៊ីលីដា និងក្រុមហ៊ុនអភិវឌ្ឍន៍ព្រលានយន្តហោះ Cambodia Airport Investment Co.,Ltd មានការចូលរួមពីលោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា និងអ្នកឧកញ៉ា ពុង ឃាវសែ ប្រធានក្រុមប្រឹក្សាភិបាល OCIC។

ក្នុងសេចក្ដីប្រកាសព័ត៌មានរបស់ក្រុមហ៊ុនអភិវឌ្ឍន៍ព្រលានយន្តហោះអន្តរជាតិតេជោឱ្យដឹងថា ទឹកប្រាក់វិនិយោគដែលទទួលបានពីការលក់សញ្ញាបណ្ណនេះ នឹងត្រូវប្រើប្រាស់សម្រាប់សាងសង់និងការអភិវឌ្ឍន៍គម្រោងសាងសង់អាកាសយានដ្ឋានអន្តរជាតិតេជោ នៅខេត្តកណ្ដាល។

បច្ចុប្បន្ន គម្រោងអាកាសយានដ្ឋានអន្តរជាតិបច្ចុប្បន្នសម្រេចបានប្រមាណ២៨ភាគរយ ត្រូវនឹងទឹកប្រាក់សរុបប្រមាណ៣៧៥លានដុល្លារអាមេរិក មិនទាន់រាប់បញ្ចូលនូវតម្លៃដីដែលបានវិនិយោគរួចហើយនោះទេ។

ក្រុមហ៊ុន OCIC ជាក្រុមហ៊ុនវិនិយោគក្នុងស្រុកមួយធំជាងគេនៅប្រទេសកម្ពុជា ដែលមានជំនាញនៅក្នុងការអភិវឌ្ឍលើវិស័យហេដ្ឋារចនាសម្ព័ន្ធ អចលនទ្រព្យសំណង់ ការគ្រប់គ្រងអចលនទ្រប្យ ការអប់រំ វេជ្ជសាស្ត្រ ផ្សារទំនើប សណ្ឋាគារ រោងម៉ាស៊ីនកិនស្រូវ និងសង្វាក់ផលិតកម្មជាដើម ជាមួយនឹងគម្រោងសំខាន់ៗ ជាច្រើនដូចជាអាកាសយានដ្ឋានអន្តរជាតិតេជោ ទីក្រុងកោះពេជ្រ កោះនរា ទីក្រុងរណបជ្រោយចង្វារ និងទីក្រុងទំនើប អូឡាំព្យាជាដើម៕

ក្រុមហ៊ុនអភិវឌ្ឍន៍ចិន Shimao ប្រកាសលក់គម្រោងអចលនទ្រព្យទាំងអស់របស់ខ្លួនយ៉ាងតក់ក្រហល់

ដោយ៖ សុខុម

សៀងហៃ៖ ក្រុមហ៊ុនអភិវឌ្ឍន៍ចិន Shimao Group Holdings បានប្រកាសដាក់លក់គម្រោងអចលនទ្រព្យទាំងអស់របស់ខ្លួនយ៉ាងតក់ក្រហល់ រួមទាំងអចលនទ្រព្យប្រភេទលំនៅដ្ឋាន និងអគារពាណិជ្ជកម្មផងដែរ ខណៈក្រុមហ៊ុននេះកំពុងជាប់កុនលុយខ្លាំង។ នេះបើយោងតាមសារព័ត៌មាន CNA ចុះផ្សាយនៅថ្ងៃច័ន្ទ ទី១០ មករា នេះ។

សារព័ត៌មានចិន Caixin បានទម្លាយឱ្យដឹងកាលពីចុងសប្តាហ៍មុនថា ក្រុមហ៊ុន Shimao Group ដែលបានខកខានសងបំណុលកាលពីសប្ដាហ៍មុន បានប្រកាសឱ្យភ្នាក់ងារនានាជួយស្វែងរកអ្នកទិញអចលនទ្រព្យរបស់ខ្លួន។ ទោះជាយ៉ាងណា ភ្លាមៗក្រុមហ៊ុននេះមិនបានឆ្លើយតបសំណើសុំការបំភ្លឺឡើយជុំវិញរឿងនេះ។

ក្រុមហ៊ុន Shimao ផ្តោតសំខាន់លើការអភិវឌ្ឍអចលនទ្រព្យប្រភេទលំនៅដ្ឋាន ហើយក្រុមហ៊ុនសំណង់ Shanghai Shimao Construction គឺជាបុត្រសម្ព័ន្ធអាជីវកម្មដ៏សំខាន់របស់ខ្លួននៅប្រទេសចិន។ ចំណែក ក្រុមហ៊ុន Shanghai Shimao Co Ltd ដែលគ្រប់គ្រងដោយ Shimao Group ភាគច្រើនអភិវឌ្ឍអគារពាណិជ្ជកម្ម។

សារព័ត៌មានចិន Caixin ចុះផ្សាយថា ក្រុមហ៊ុន Shimao Group បានចុះកិច្ចព្រមព្រៀងបឋមមួយជាមួយក្រុមហ៊ុនរដ្ឋរបស់ចិន ដើម្បីលក់អគារពាណិជ្ជកម្ម Shimao International Plaza Shanghai របស់ខ្លួននៅតាមបណ្ដោយផ្លូវ Nanjing Road ក្នុងក្រុងសៀងហៃ ក្នុងតម្លៃ១,៥៧ពាន់លានដុល្លារអាមេរិក។

ក្រុមហ៊ុនអភិវឌ្ឍន៍អចលនទ្រព្យមួយនេះបាននិយាយកាលពីសប្តាហ៍មុនថា ខ្លួនបានខកខានសងបំណុល ខណៈក្រុមហ៊ុនបុត្រសម្ព័ន្ធរបស់ខ្លួន Shanghai Shimao Construction បានស្នើសុំពន្យារសងបំណុលមូលបត្ររបស់ខ្លួនដែលដល់ពេលកំណត់ត្រូវទូទាត់សងនៅខែនេះ។

យោងតាមសារព័ត៌មាន Caixin ឱ្យដឹងថា ក្រុមហ៊ុន Shimao Group មានបំណុលច្រើនរហូតដល់ទៅ១១,០៨ពាន់លានដុល្លារអាមេរិក៕

ផ្លូវល្បឿនលឿនភ្នំពេញ ព្រះសីហនុនឹងមិនអនុញ្ញាត្តឲ្យបើកបកក្រោយទេ

ដោយៈគង់ ម៉ាលីនណា

ភ្នំពេញៈ ផ្លូវល្បឿនលឿនភ្នំពេញ ព្រះសីហនុនឹងបញ្ចប់នៅខែកញ្ញាខាងមុខនេះ បន្ទាប់់ពីចំណាយពេលប្រមាណ៣ឆ្នាំ និងជាការសាងសង់លឿនជាងផែនការ។

សមិទ្ឋផលប្រវត្តិសាស្រ្តនេះ មិនធ្លាប់មាននៅកម្ពុជា ហើយប្រជាជនកម្ពុជាភាគច្រើន មិនដែលបានបើកបរលើផ្លួវបែបនេះទេ ដែលទាមទារឲ្យមានការអប់រំបន្ថែមទៀត។

តើគេគួរបើកបែបណា? សំណួររនៅទីនេះបើខ្ញុំជិះហួសច្រកចេញ តើខ្ញុំអាចថយឡានទៅក្រោយទេ?

យោងតាមផេកបណ្តាញទំនាក់ទំនងសង្គមផ្លូវការ របស់់ផ្លូល្បឿនលឿនភ្នំពេញ ព្រះសីហនុបានឲ្យដឹងថា ប្រាកដជាមិនបានដាច់ខាត។ យើងត្រូវចាប់អារម្មណ៍ ទៅលើរាល់ស្លាកចរាចរណ៍ទាំងអស់ ដែលចង្អុលបង្ហាញច្រកចេញនៅលើផ្លូវល្បឿនលឿន។

ផេកដដែលបានបញ្ជាក់ថា “បើជិះហួសច្រកចេញ អ្នកត្រូវតែបើកបន្តទៅមុខ រកច្រកចេញបន្ទាប់ ការថយឡានទៅក្រោយគឺ គ្រោះថ្នាក់ខ្លាំងណាស់”៕

 

សម្តេចតេជោ៖ គោលដៅអភិវឌ្ឍន៍២ចំណុចក្រោយបញ្ចប់សង្រ្គាមឆ្នាំ១៩៩៨ សម្រេចបានលើស៩០ភាគរយហើយ

ដោយ៖ សុផារី

បាត់ដំបង៖ ថ្លែងនៅក្នុងពិធីសម្ពោធដាក់ឱ្យប្រើប្រាស់ជាផ្លូវការនូវកំណាត់ផ្លូវជាតិលេខ៥ ពីខេត្តបាត់ដំបង ទៅខេត្តបន្ទាយមានជ័យ នៅថ្ងៃទី១០ ខែមករានេះ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានថ្លែងថា សម្តេចបានដាល់ចេញនូវគោលដៅអភិវឌ្ឍន៍២ចំណុច បន្ទាប់ពីការបញ្ចប់សង្រ្គាមនៅថ្ងៃទី ២៩ ខែធ្នូ ឆ្នាំ ១៩៩៨ មកដល់ពេលនេះ សម្រេចបានលើស៩០ភាគរយទៅហើយ។

សម្តេចបានមានប្រសាសន៍ថា “មេរៀនរបស់យើងគ្រប់គ្រាន់ហើយ ដែលបានជួបពីអតីតកាល ដែលយើងត្រូវតែចូលរួមការពារសន្តិភាព។ ប្រសិនបើរក្សាសន្តិភាពមិនបានទេ កុំនិយាយរឿងផ្សេងឱ្យសោះ ដូចនៅបណ្ដាប្រទេសផ្សេងៗ ដែលកំពុងមានសង្រ្គាម តើអាចនិយាយអំពីសិទ្ធិមនុស្ស និយាយអំពីប្រជាធិបតេយ្យ និយាយអំពីសិទ្ធិបញ្ចេញមតិកើតដែរទេ នៅក្រោមគ្រាប់បែក គ្រាប់ផ្លោងបែបនេះ? ដូច្នេះត្រូវចាប់ផ្ដើមពីសិទ្ធិរស់រានមានជីវិត សិទ្ធិទទួលបានសេចក្តីសុខ កុំឱ្យមានការគំរាមកំហែងពីសង្គ្រាមសិន”។

សម្តេចតេជោ មានប្រសាសន៍ថា បន្ទាប់ពីការបញ្ចប់សង្រ្គាមនៅថ្ងៃទី ២៩ ខែធ្នូ ឆ្នាំ ១៩៩៨ សម្តេចបានដាក់ចេញនូវគោលដៅពីរសំខាន់គឺ ទី១ ប្រែក្លាយអតីតតំបន់សមរភូមិឱ្យក្លាយទៅជាទីផ្សារ ទៅជាតំបន់នៃការអភិវឌ្ឍ។ ទី២ ប្រែក្លាយតំបន់ព្រំដែនជាមួយប្រទេសជិតខាង ឱ្យទៅជាព្រំដែនមិត្តភាព សន្តិភាព និងកិច្ចសហប្រតិបត្តិការ និងការអភិវឌ្ឍ។

សម្តេចតេជោ ហ៊ុន សែន អះអាងថា គោលដៅទាំងពីរនេះអនុវត្តបានច្រើនណាស់ហើយ ក្នុងនោះបានប្រែក្លាយតំបន់អតីតសមរភូមិឱ្យទៅជាទីផ្សារ ជាតំបន់អភិវឌ្ឍន៍ មកដល់ពេលនេះ យើងអាចនិយាយបានថា លើស៩០ភាគរយទៅហើយ។

ចំណុចដែលសេសសល់ គឺ គ្រាប់មីន និងគ្រាប់មិនទាន់ផ្ទុះនៅមិនទាន់បំផ្លាញអស់ ហើយប្រសិនបើនៅឆ្នាំ ២០២៥ ដែលជាឆ្នាំគោលដៅ “សូន្យគ្រាប់មីន” ត្រូវបានអនុវត្តសម្រេចបានជោគជ័យ ការដាក់ចេញជាគោលនយោបាយប្រែក្លាយតំបន់អតីតសមរភូមិឱ្យទៅជាតំបន់អភិវឌ្ឍន៍ ទៅជាទីផ្សារ ទៅជាកន្លែងដាំដុះ ទៅជាកន្លែងផល្លិតកម្ម ជាកន្លែងទេសចរណ៍ នឹងសម្រេចជោគជ័យ។

បញ្ហាព្រំដែនជាមួយប្រទេសជិតខាង កម្ពុជាក៏បានខិតខំដើម្បីធ្វើកិច្ចសហប្រតិបត្តិការជាមួយប្រទេសជិតខាង ដែលពីអតីតកាលប្រជាជនតែងតែមានការភ័យខ្លាចពីការប្រយុទ្ធគ្នា ប៉ុន្តែពេលនេះបានក្លាយទៅជាតំបន់នៃការដោះដូរទំនិញ ហើយជាមួយថៃ ទំហំពាណិជ្ជកម្មបានកើនឡើងរហូតដល់១០ពាន់លានដុល្លារ ជាមួយវៀតណាមបានកើនឡើងជាង៩ពាន់លានដុល្លារ។ ដោយឡែកជាមួយឡាវបានកើនឡើងជាង ១០០លានដុល្លារ ហើយទំហំនេះអាចនឹងមានការកើនឡើងថែមទៀត៕

សម្តេចតេជោអនុញ្ញាតឱ្យពលរដ្ឋតាមខេត្តអាចឡើងមកចាក់វ៉ាក់សាំង Pfizer នៅភ្នំពេញបាន

ដោយ៖សុផារី

បាត់ដំបង៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នាព្រឹកថ្ងៃទី១០ ខែមករា ឆ្នាំ២០២១នេះ បានប្រកាសជាសាធារណៈឱ្យពលរដ្ឋដែលរស់នៅតាមខេត្តអាចឡើងមកភ្នំពេញ ដើម្បីចាក់វ៉ាក់សាំង Pfizer នៅភ្នំពេញបាន។

សម្តេច ហ៊ុន សែន បានថ្លែងយ៉ាងនេះស្របពែលដែលកម្ពុជាបានរកឃើញមេរោគបំប្លែងថ្មី អូមីក្រុង កើតក្នុងសហគមន៍កម្ពុជា ៣នាក់បន្ថែមទៀត គិតត្រឹមថ្ងៃទី២០ ខែមករានេះ។
សម្តេចមានប្រសាសន៍ដូច្នេះថា “បងប្អូនព្រួយបារម្ភខ្លាចថាក្រែងនាំគ្នាផ្អើលមកចាក់នៅភ្នំពេញ។ ឥឡូវខ្ញុំសូមប្រាប់ទៅចេះ វិធីដែលល្អជាងគេ ផ្អើលទៅណាទៅៗ ខ្មែរដូចតែគ្នាទេ កុំឆ្ងល់ពេក បើគេសុខចិត្តជិះពីបាត់ដំបងទៅចាក់នៅភ្នំពេញ ចាក់ឲ្យគេទៅ កុំខ្វល់ពេក ព្រោះខ្មែរដូចតែគ្នា គង់តែចាក់ដូចគ្នាទេ ចាក់ Pfizer ឲ្យអស់ទៅ”។

លើសពីនេះទៀត សម្តេចតេជោ បានប្រាប់ទៅលោកស្រី ឱ វណ្ណឌីន អ្នកនាំពាក្យក្រសួងសុខាភិបាលថា អ្នករស់នៅភ្នំពេញអ្នកណាចង់ចាក់វ៉ាក់សាំង Pfizer ក៏ចាក់ទៅ ព្រោះវ៉ាក់សាំងនេះដឹកយកទៅខេត្តអាចខូច ព្រោះអត់មានប្រព័ន្ធរក្សាទុក ៨០អង្សាក្រោមសូន្យ ដូច្នេះទាំងអ្នកខេត្ត និងភ្នំពេញ អាចចាក់បានទាំងអស់គ្នានៅរាជធានីភ្នំពេញ។

សម្តេចតេជោក៏បានសង្កាត់ធ្ងន់ថា “ខ្ញុំចង់ឱ្យទៅដណ្តើមនឹងហើយ យើងមិនពិបាកដឹកមនុស្ស ដឹកគ្រូពេទ្យយកមកចាក់នៅតាមខេត្ត”។
សម្តេចបញ្ជាក់ច្បាស់ៗថា ប្រទេសកម្ពុជា មិនបានបែងចែកតំបន់នោះទេ អ្នកណាចង់ចាក់វ៉ាក់សាំង គឺបើកសេរី អ្វីដែលសម្តេចបារម្ភ គឺមេរោគបំប្លែងអូមីក្រុងមកដល់រាយពេញប្រទេស។

ក្រសួងសុខាភិបាលនឹងបើកយុទ្ធនាការចាក់វ៉ាក់សាំងកូវីដ-១៩ ដួសទី៤ ដល់ក្រុមគោលដៅ នៅរាជធានីភ្នំពេញ ចាប់ពីថ្ងៃទី១៤ខែ មករាឆ្នាំ២០២២២ខាងមុខតទៅ៕

ក្រុមហ៊ុនលំដាប់យក្សជប៉ុន AEON Group គ្រោងវិនិយោគមជ្ឈមណ្ឌលដឹកជញ្ជូនកម្រិតអន្តរជាតិនៅកម្ពុជា

ដោយៈគង់ សូរិយា

ភ្នំពេញៈ ក្រុមហ៊ុនលំដាប់យក្សជប៉ុន Aeon គ្រោងនឹងសាងសង់មជ្ឈមណ្ឌលដឹកជញ្ជូនខ្នាតអន្តរជាតិធំមួយ នៅក្នុងតំបន់សេដ្ឋកិច្ចពិសេសក្បែរកំពង់ផែក្រុងព្រះសីហនុ។

ការវិនិយោគនេះ ធ្វើឡើងដើម្បីផ្ដល់សេវាកម្មស្តុកទំនិញ នាំចូល សម្របសម្រួលនីតិវិធីគយ និងគាំទ្រការលក់ទំនិញអនឡាញឆ្លងដែន។

យោងតាមសារព៌តមាន Nikkei Asia បានរាយការណ៍ថា មជ្ឈមណ្ឌ​លនេះ នឹងមានទំហំជាង៣០,០០០ម៉ែត្រការ៉េ ហើយរំពឹងថានឹងបើកដំណើ រការនៅឆ្នាំ ២០២៣។

មជ្ឈមណ្ឌលនេះ គឺឃ្លាំងស្ដុកលើកលែងការបង់ពន្ធនាំចូល ឬ (bonded warehouse)។ មានន័យថា ក្រុមហ៊ុននានាអាចរក្សាទុកទំនិញនាំចូលពីបរទេសក្នុងឃ្លាំងនេះសិន នៅពេលមកដល់កម្ពុជា ដោយមិនចាំបាច់ឆ្លងកាត់នីតិវិធីគយ និងបង់ពន្ធភ្លាមៗ។

ក្រុមហ៊ុនតម្រូវឱ្យបង់ពន្ធនាំចូល នៅពេលដែលដកទំនិញចេញពីឃ្លាំងយកទៅលក់ ហើយអត្រាពន្ធគឺគិតទៅតាមចំនួនទំនិញ ដែលនាំចេញពីឃ្លាំងជាក់ស្ដែង។ ការធ្វើបែបនេះ គឺអាចជួយសន្សំសំចៃ បានយ៉ាងច្រើន ដោយក្រុមហ៊ុននានា មិនចាំបាច់បង់ពន្ធសរុបម្ដងទាំងអស់។

ការវិនិយោគលើវិស័យនេះ គឺផែនការរបស់ Aeon Group ក្នុងការរកប្រភពចំណូលថ្មី ខណៈដែលតម្រូវការឃ្លាំងប្រភេទនេះ កំពុងកើនឡើងទូទាំងពិភពលោក៕

អ្នកជំនាញៈតំបន់ភាគខាងជើងកាន់តែមានសក្តានុពលខ្លាំងសម្រាប់វិស័យអចលនទ្រព្យ

ដោយៈ សុផារី

ភ្នំពេញៈ កត្តាជាច្រើនបាននិងកំពុងអូសទាញការរវិនិយោគ ឆ្ពោះទៅទិសខាងជើងរាជធានី ដែលមួយផ្នែកស្ថិតនៅលើផ្លូវជាតិលេខ៥​ ផ្លូវជាតិលេខ៥ និងផ្នែកមួយចំនួននៃមហាវិថីឈ្នះ ឈ្នះ។

យោងតាមអនុក្រឹត្យស្ដីពី “ការដាក់ឱ្យអនុវត្តប្លង់គោល ប្រើប្រាស់ដីនៅរាជធានីភ្នំពេញឆ្នាំ២០៣៥” ចេញដោយក្រសួងដែនដី នគរូបនីយកម្ម និងសំណង់ រាជធានីភ្នំពេញនឹងពង្រីកវិសាលភាព ភូមិសាស្ត្រកាន់តែធំ នៅក្នុងទម្រង់ជាកាំរង្វង់ចម្ងាយ១០០គីឡូម៉ែត្រជុំវិញ។

ជាក់ស្តែងនៅក្នុងឆ្នាំ២០២២នេះ តំបន់ប៉ែកខាងជើងត្រូវបានអ្នកជំនា​ញមើលឃើញថា ជាតំបន់ដែលកាន់តែមានសក្តានុពល សំរាប់ការវិនិយោគអចលនទ្រព្យខ្លាំង។

អ្នកឧកញ៉ា លី ហួរ ដែលជាអ្នកអភិវឌ្ឍអចលនទ្រព្យដ៏ល្បីល្បាញនៅកម្ពុជា បានអះអាងថា នៅភាគខាងជើងរាជធានីភ្នំពេញ គឺជាតំបន់នេះមានខ្យល់អាកាស និងទឹកគ្រប់គ្រាន់ ដែលអំណោយផលដល់ការរស់នៅ និងប្រកបអាជីវកម្មរបស់ប្រជាពលរដ្ឋ។ ម្យ៉ាងទៀតនៅតំបន់នោះ វាបណ្តុំដោយអាគារពាណិជ្ជកម្ម ផ្សារទំនើប សាលារៀន មន្ទីរពេទ្យ និងស្ថាប័នរដ្ឋមួយចំនួនទៀត ជាសក្ដានុពលខ្ពស់សម្រាប់ការអភិវឌ្ឍ។

ចំណែកលោក ច្រឹក សុខនីម ប្រធានសមាគមអ្នកវាយតម្លៃ និងភ្នា​ក់ងារអចលនវត្ថុមើលឃើញថា ក្រុមហ៊ុនអភិវឌ្ឍន៍អគាពាណិជ្ជកម្ម និងលំនៅឋានធំៗមួយចំនួន បាននាំគ្នាបោះទុនវិនិយោគលើការអភិវឌ្ឍន៍អគារ និងសំណង់ផ្សេងៗ នៅប៉ែងខាងជើងរាជធានីភ្នំពេញ នៅប៉ុន្មានឆ្នាំចុងក្រោយនេះ។

លោកបន្តថា “តាមរយៈការអភិវឌ្ឍរបស់ក្រុមហ៊ុនធំៗទាំងនេះ រួមជាមួយវត្តមានក្រសួង ស្ថាប័នរដ្ឋមួយចំនួន អ្នកជំនាញរូបនេះជឿជាក់ថា វានឹងធ្វើឱ្យតម្លៃអចលនទ្រព្យ និងការអភិវឌ្ឍន៍នៅតំបន់នោះ នឹងមានការរីកចម្រើនខ្លាំងនាពេលអនាគត”។

ជាមួយគ្នានេះ លោកឧកញ៉ាបណ្ឌិត គីម ហ៊ាង ប្រធានក្រុមហ៊ុន KW Cambodia បានមានប្រសាសន៍ថា ប្រសិនបើចង់អភិវឌ្ឍអ្វីម្យ៉ាង ធ្វើអ្វីមួយភ្លាមៗ ទិញដីទុកលក់ភ្លាម រយៈពេល២ទៅ៣ឆ្នាំ ឬចង់សាងសង់ផ្ទះសម្រា​ប់រស់នៅលក្ខណៈស៊ីវីល័យ ទំនើប គឺទិសខាងជើង។ តំបន់ទិសខាងជើង ជាពិសេសខណ្ឌសែនសុខ ជាតំបន់ដែលប្រមូលផ្តុំ ទៅដោយមជ្ឈមណ្ឌលនានា មានដូចជា ផ្សារទំនើបអ៊ីអនម៉ល២ ផ្សារក្លូបល ផ្សារម៉ាក្រូ ផ្សារជីប ម៉ុង និងបុរីជាច្រើន។

លោកឧកញ៉ាសំ សុខនឿន ប្រធានសមាគមអចលនទ្រព្យសកល (GRA) និងជាប្រធានក្រុមហ៊ុន សេម អេស អិន បានមានប្រសាសន៍ថា តំបន់ប៉ែកខាងជើងនៃរាជធានីភ្នំពេញ ដូចជាតំបន់បឹងទំនប់កប់ស្រូវ គឺជាតំបន់ ដែលទទួលបានការចាប់អារម្មណ៍ខ្លាំងដែរ ព្រោះតំបន់នេះមិននៅឆ្ងាយពីតំបន់ពាណិជ្ជកម្មនាពេលបច្ចុប្បន្ន។

ជាក់ស្តែង ផ្សារទំនើបអ៊ីអនម៉ល២ ក្នុងខណ្ឌសែនសុខ ដែលនាំឱ្យដីធ្លីក្នុងខណ្ឌនេះ មានការឡើងថ្លៃរហូតដល់១៥០០ ទៅ២០០០ដុល្លាអាមេរិកក្នុងមួយម៉ែត្រការ៉េតាមដងផ្លូវសំខាន់ៗ។ ការណ៍នេះ បណ្តាលឱ្យតំបន់នេះមានការរីកដុះដាលយ៉ាងខ្លាំង លើផ្នែកលំនៅដ្ឋានបែបស៊ីវិល័យ អគារខុនដូក៏បាននិងកំពុងតែរីកបណ្តើរៗផងដែរ។
លោកឧកញ៉ាព្យាករណ៍ថា “មិនយូរមិនឆាប់ទេ បឹងតាមោកនិងតំបន់ក្បែរបឹងតាមោក នឹងក្លាយជាតំបន់ពាណិជ្ជកម្មមួយ ឬការស្នាក់នៅយ៉ាងល្អប្រសើរខ្លាំងមែនទែនសម្រាប់ការវិនិយោគក្នុងតំបន់នេះ”។

បន្ថែមលើសនេះ តំបន់មួយទៀតដែលលោកឧកញ៉ា មើលឃើញថាជាតំបន់មានសក្តានុពលផងដែរនោះ គឺតំបន់ផ្លូវលី យ៉ុងផាត់ ដែលមានទីតាំងមិនឆ្ងាយពីបឹងតាមោកនោះទេ និងស្ថិតក្នុងប៉ែកខាងជើងឆៀងខាងកើតនៃរាជធានីភ្នំពេញ។ លោកជឿជាក់ថា តំបន់នេះមានសក្តានុពលទាក់ទាញវិនិយោគិនខ្លាំង នឹងក្លាយទៅជាតំបន់ អភិវឌ្ឍន៍លំនៅដ្ឋានយ៉ាងល្អប្រសើរបំផុត ដោយយើងសង្គេតឃើញមាន ស្តាតសម្តេចតេជោហ៊ុនសែន មហាវិថីឈ្នះ ឈ្នះ ការអភិវឌ្ឍបុរី ខុនដូខ្លះៗ។

រីឯឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ CPL បានគូសបញ្ជាក់ថា កត្តាដែលធ្វើឱ្យតំបន់ប៉ែកខាងជើង រាជធានីភ្នំពេញមានការទាក់ទាញខ្លាំងសម្រាប់អ្នកវិនិយោគ គឺដោយសារតំបន់នោះមានដីធំៗទំនេរច្រើន ដែលអំណោយផល ដល់ការអភិវឌ្ឍអគារពាណិជ្ជកម្ម ខុនដូ ផ្សារទំនើប និងអគារលំនៅឋានធំៗ។

លោកបន្តថា ការផ្លាស់ប្តូរទីតាំងក្រសួង ស្ថាប័នរដ្ឋមួយចំនួនទៅប៉ែកខាងជើងនៅមួយរយៈចុងក្រោយ ក៏ជាកត្តាធ្វើឱ្យតំបន់នោះ មានការទាក់ទាញខ្លាំងផងដែរ។

ជាក់ស្តែង ក្រសួងរៀបចំដែនដី នគរូបនីយកម្ម និងសំណង់ និងក្រ​សួងសាធារណការ និងដឹកជញ្ជូន រួមជាមួយពហុកីឡដ្ឋានជាតិមរតកតេជោ និងហេដ្ឋារចនាសម្ព័ន្ធសំខាន់ៗមួយចំនួនទៀត ត្រូវបានលេចត្រដែតឡើងនៅប៉ែកខាងជើងរាជធានីភ្នំពេញ៕

លោកជំទាវគង់សំណាង លើកបង្ហាញពីសក្តានុពលនៃបុរីវិមានសំណាង

ដោយៈ កុសមា

ភ្នំពេញៈ ខណៈដែលប្រទេសកម្ពុជា កំពុងមានការរីកចម្រើននៅលើគ្រប់វិស័យជាពិសេសវិស័យសំណង់ និងអចលនទ្រព្យ គម្រោងថ្មីៗជាច្រើនបានរីកដុះដាលនៅទូទាំងប្រទេស។

ទន្ទឹមនឹងនេះ បុរីវិមានសំណាងក៏កំពុងត្រដែតខ្លួន នៅភាគខាងជើងភ្នំពេញ ដែលជាតំបន់មានសក្តានុពលមួយផងដែរ។ ដូចនេះតើបុរីវិមានសំណាងមានភាពប្រណីត និងស្តង់ដាបែបណាខ្លះ?។

លោកជំទាវឧកញ៉ាគង់ សំណាង អគ្គនាយិកានៃបុរីវិមានសំណាង នៅប៉ែកខាងជើងរាជធានីភ្នំពេញ បានមានប្រសាសន៍នៅក្នុងកិច្ចសម្ភាសន៍ជាមួយគេហទំព័រ Property Area Asia កាលពីពេលថ្មីៗនេះថា កាលពីអតីត លោកជំទាវគ្រាន់តែជាភ្នាក់ងារលក់ អចលនទ្រព្យមួយរូបប៉ុណ្ណោះ ប៉ុន្តែដោយសារតែបទពិសោធន៍ និងការងារជាមួយនឹងអចលនទ្រព្យយូរឆ្នាំទៅ ហើយជំនឿជាក់ផងនោះ ធ្វើឱ្យលោកជំទាវក៏សម្រេចចិត្ត ក្លាយជាអ្នកអភិវឌ្ឍន៍អចលនទ្រព្យ។

លោកជំទាវបានមានប្រសាសន៍ថា “មុនដំបូងឡើយ ក្រុមហ៊ុនលោកជំទាវ គឺជាក្រុមហ៊ុនភ្នាក់ងារអចលនទ្រព្យ ដែលជាអ្នកលក់គម្រោងឱ្យទៅដៃគូ និងម្ចាស់អភិវឌ្ឍន៍នានា តែដោយសារតែការស្រលាញ់ជាមួយនឹងអាជីពមួយនេះ លោកជំទាវក៏បានសម្រេចបោះទុនវិនិយោគ អភិវឌ្ឍន៍បុរីនៅភ្នំពេញ”។

បុរីដំបូងដែលក្រុមហ៊ុនគឺ បុរី KS Resident ដែលលោកជំទាវបានវិនិយោគ និងអភិវឌ្ឍន៍ មានទីតាំងនៅស្រុកកៀនស្វាយ ហើយជាប្រភេទលំនៅឋាន ដែលមានតម្លៃសមរម្យមួយ រីឯគម្រោងទី២គឺបុរីវិមានសំណាង ដែលមានទីតាំងនៅជិត ក្រសួងរៀបចំដែនដី និងនគរូបនីយកម្ម និងសំណង់ ដែលស្ថិតនៅប៉ែកខាងជើងនៃរាជធានីភ្នំពេញ និងជាតំបន់មានសក្ដានុពលខ្ពស់មួយផងដែរ។

លោកជំទាវឧកញ៉ាគង់ សំណាងបានបន្តថា នៅក្នុងបុរីវិមានសំណាង មានទំហំដីសរុបប្រមាណ២៥ហិចតា ដោយអភិវឌ្ឍន៍ជាផ្ទះអាជីវកម្ម វីឡាព្រីន វីឡាឃ្វីន និងវីឡាឃីង និងកំពុងរៀបចំអភិវឌ្ឍន៍ជាផ្ទះវីឡា រ៉ូយ៉ាល់ ដែលផ្ទះប្រភេទនេះ ផ្ដោតទៅលើអតិថិជន ដែលមានប្រាក់ចំណូលខ្ពស់បែបអភិជន ។

លោកជំទាវបន្តថា ”អ្វីដែលជាចំនុចពិសេសរបស់បុរីវិមានសំណាង គឺស្ថិតនៅទីតាំងដែលមានសក្ដានុពល ដូចជា មានទីតាំងបុរីគឺស្ថិតនៅលើផ្លូវមេ ជាផ្លូវធំ ហើយមួយវិញទៀត នៅក្នុងគម្រោងក៏មានរៀបចំជាសួនច្បារធំៗ ផ្លូវធំៗ មានក្លឹបហាត់ប្រាណ សួនកុមារ និងជាពិសេសរាល់ផ្ទះរបស់វីឡាឃ្វីន និងវីឡាឃីង សុទ្ធតែបែរទៅរកមាត់ទឹក ដែលផ្ទះប្រភេទនេះពិបាករកណាស់នៅក្នុងភ្នំពេញ”។

លោកជំទាវបន្ថែមថា បុរីវិមានសំណាង ដែលក្រុមហ៊ុនអភិវឌ្ឍន៍ឡើងមកនេះ គឺផ្ដោតទៅលើអតិថិជនកម្រិតមធ្យមឡើងទៅ ដោយសារតែក្នុងបុរីសង់ឡើងសុទ្ធតែជាវីឡា ដោយវីឡានីមួយៗសង់ឡើង ដោយផ្ចិតផ្ចង់ជាទីបំផុត។

លោកជំទាវនៅតែមានការជឿជាក់ខ្ពស់ ទៅលើទីផ្សារលំនៅឋានក្នុងបុរី ជាពិសេសនៅពេលកំណើនប្រាក់ចំណូល ពលរដ្ឋកាន់តែកើនឡើង ការផ្គត់ផ្គង់លំនៅឋានតម្លៃខ្ពស់ៗ ក៏កាន់តែមានតម្រូវការ ពីព្រោះថាប្រជាពល​រដ្ឋកម្ពុជា នៅតែមានទំនោរទៅរកការរស់នៅ ក្នុងផ្ទះជាលក្ខណៈបុរី ច្រើនជាងការរស់នៅ ក្នុងអគារសហកម្មសិទ្ធិ ហើយបុរីដែលមានការអភិវឌ្ឍកាន់​តែទំនើប កាន់តែមានការទាក់ទាញដល់អតិថិជន ក្នុងប្រទេសកម្ពុជាផងដែរ៕

តើផ្លូវល្បឿនលឿនភ្នំពេញ ព្រះសីហនុមានទីតាំងឈប់សំរាកនិងផ្លូវបំបែកចំនួនប៉ុន្មានទីតាំង

ដោយៈគង់ សិរីជេស៊ីកា

ភ្នំពេញៈ ផ្លូវល្បឿនលឿនភ្នំពេញ ព្រះសីហនុគ្រោងចំណាយទឹកប្រាក់២០១៩លានដុល្លារអាមេរិក និងគ្រោងបញ្ចប់នៅខែកញ្ញា ឆ្នាំ២០២២ខាងមុខនេះ។

យោងតាមឯកសារបានបង្ហាញថា គម្រោងស្ថាបនាផ្លូវល្បឿនលឿនភ្នំពេញ-ក្រុងព្រះសីហនុ អនុវត្តនការស្ថាបនាដោយក្រុមហ៊ុន PPSHV Expressway Co., Ltd និងក្រុមហ៊ុនវិនិយោគបុត្រសម្ព័ន្ធនៃ ក្រុមហ៊ុនសាជីវកម្មស្ពានថ្នល់ចិន(CRBC) និងត្រួតពិនិត្យ បច្ចេកទេសដោយក្រុមហ៊ុន MINCONSULT SDN. BHD. គ្រោងចំណាយថវិកាប្រមាណ ២០១៩ លានដុល្លារអាមេរិក។

ផ្លូវនេះមានគន្លងផ្លូវចំនួន៤គន្លង ទទឹងផ្លូវសរុប២៤,៥ ម៉ែត្រ មានផ្លូវបំបែកទិស៧កន្លែង កន្លែងឈប់សម្រាកចំនួន៣កន្លែង ចំណតរថយន្ត១កន្លែង មណ្ឌលប្រតិបត្តិការ និងថែទាំចំនួន៤កន្លែង។ ផ្លូវល្បឿនលឿននេះ បានឆ្លងកាត់ខេត្តកំពង់ស្ពឺ ប្រវែង៨០,៨គីឡូម៉ែត្រ ខេត្តកោះកុងប្រវែង១,៩២ គីឡូម៉ែត្រ និងខេត្តព្រះសីហនុប្រវែង៨៩,៨៩គីឡូម៉ែត្រ។

ឯកសារដដែលបានបន្តថា គម្រោងស្ថាបនាផ្លូវល្បឿនលឿនភ្នំពេញ-ក្រុង ព្រះសីហនុ គឺជាគម្រោងផ្លូវល្បឿនលឿនទី១ និងជាគម្រោងផ្លូវរបៀងយុទ្ធសាស្ត្រសំខាន់បំផុតនៅកម្ពុជា ជួយកាត់បន្ថយពេលវេលា ធ្វើដំណើរពីរាជធានីភ្នំពេញ ទៅកំពង់ផែសមុទ្រក្រុងព្រះសីហនុ ពីចំនួនប្រាំម៉ោងថយមកត្រឹមតែពីរម៉ោងប៉ុណ្ណោះ និងជួយកាត់បន្ថយតម្លៃដឹកជញ្ជូនផងដែរ៕

លោកស៊ុន ចាន់ថុល បង្ហើបទីតាំងសាងសង់ស្ពានមិត្តភាពកម្ពុជា-កូរ៉េ ភ្ជាប់ពីភ្នំពេញ ទៅស្វាយជ្រុំ

ដោយ: សុផារី

សៀមរាបៈ លោកទេសរដ្ឋមន្ត្រីស៊ុន ចាន់ថុល រដ្ឋមន្ត្រីក្រសួងសាធា​រណការ និងដឹកជញ្ជូន នៅថ្ងៃទី៩ ខែមករា ឆ្នាំ២០២២កន្លងមកនេះបានបញ្ជាក់អំពីទីតាំង នៃការសាងសង់ស្ពានមិត្តភាពកម្ពុជា-កូរ៉េខាងត្បូងឬស្ពា​នស្វាយជ្រុំ ដែលគ្រោងនឹងចាប់ផ្តើម នៅឆ្នាំ២០២៣ខាងមុខនេះ ខណៈពេលនេះការសិក្សាជិតចប់សព្វគ្រប់អស់ហើយ។

លោក ស៊ុន ចាន់ថុល បានមានប្រសាសន៍បញ្ជាក់ថា ចំពោះទីតាំងតភ្ជាប់ក៏កំពុងស្ថិតក្នុងការសម្រេចផងដែរ ដោយមានជម្រើសពីរ គឺទី១ ភ្ជាប់ពីទីតាំងរដ្ឋាករទឹក ផ្លូវកែវចិន្តា ខណ្ឌជ្រោយចង្វារ ទៅកាន់ស្វាយជ្រុំតែម្តង និងទី២ ភ្ជាប់ពីម្តុំផ្សារចាស់ ទៅសណ្ឋាគារសុខា រួចទៅកាន់តំបន់អរិយក្សត្រ ដែ​លត្រូវសង់ស្ពានចំនួន២។ ដូច្នេះទីតាំងណា ដែលមានផលប៉ះពាល់តិច ចំណាយថវិកាតិចជាជម្រើសល្អ។

លោករដ្ឋមន្ត្រីបន្តថា “ស្ពានឆ្លងទន្លេមេគង្គ នៅភ្នំពេញ គឺស្ពានស្វាយជ្រុំ ឥឡូវនេះសិក្សាជិតចប់សព្វគ្រប់ហើយ ដែលមានជម្រើសស្ពាន៣ប្រភេ​ទមានស្ពានធម្មតា មានស្ពានខ្សែកាបិ៍ ដូច នៅអ្នកលឿង យើងកំពុងពិនិត្យចុងក្រោយ ដើម្បីរៀបចំដាក់ចេញថ្លៃសាងសង់”។លោកបន្តថា “ខ្ញុំគិតថាទាល់ឆ្នាំ២០២៣ ទើបយើងអាចបើកការដ្ឋានសាងសង់ស្ពាន ស្វាយជ្រុំនេះបាន”។

ការបញ្ជាក់របស់លោក ស៊ុន ចាន់ថុល ធ្វើឡើងក្នុងឱកាសចុះពិនិត្យការសាងសង់ផ្លូវទាំង៣៨ខ្សែ ក្នុងក្រុងសៀមរាប នៅថ្ងៃទី៩ ខែមករា ឆ្នាំ២០២២នេះ។

ថ្លែងក្នុងឱកាសចូលរួម ក្នុងពិធីបើកការដ្ឋានគម្រោងសាងសង់ លើកកម្រិតគុណភាព ផ្លូវជាតិលេខ៤៨ ប្រវែង១៤៨គីឡូម៉ែត្រ ក្រោមឥណទានសម្បទានពីរដ្ឋាភិបាលកូរ៉េខាងត្បូង កាលពីថ្ងៃទី៣ ខែមករា ឆ្នាំ២០២២ សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានថ្លែងការអបអរសាទរ ចំពោះសមិទ្ធផលស្ពានថ្មីមួយទៀត សម្រាប់ប្រជាពលរដ្ឋរាជធានីភ្នំពេញ ក៏ដូចជាប្រជាជនកម្ពុជាទាំងអស់។

បើតាមសម្តេចតេជោ ហ៊ុន សែន ស្ពានថ្មីនេះឆ្លងកាត់ទន្លេមេគង្គ ភ្ជាប់ពីរាជធានីភ្នំពេញ ទៅតំបន់អរិយក្សត្រ ដែលនឹងជួយឲ្យតំបន់នោះ នៅក្លាយជាទីក្រុងរណប នៅពេលខាងមុខ៕