ដោយៈ កុសុម៉ា
ភ្នំពេញៈ ការឈានឡើងរបស់បុគ្គលម្នាក់ៗ មានលំអានខុសៗគ្នា ឬមានមធ្យោបាយមិនដូចគ្នា ប៉ុន្តែការសម្លឹងទៅកាន់គោលដៅដោយភាពជាក់លាក់ ជាមួយជំនឿចិត្ត និងពង្រឹងសមត្ថភាពរបស់ខ្លួនជាប្រចាំ ពិតជាមានសារៈសំខាន់ណាស់ ក្នុងការឆ្ពោះទៅកាន់វិថីជោគជ័យ។
ជាមួយនឹងបទពិសោធន៍៍កម្រត់កម្រ និងជាកូនកសិករស្ថិតនៅ ក្នុងខេត្តព្រៃវែង លោកឆាន គឹមម៉េន អគ្គនាយកក្រុមហ៊ុនអាណាចក្រ ហេរ៉ូមេន ប្រផឺធី ដែលធ្លាប់បំពេញការងារជាពលករនៅប្រទេសកូរ៉េ បានកសាងមូលដ្ឋានជីវិតយ៉ាងរ៉ឹងមាំ ដោយចូលរួមក្នុងវគ្គបណ្តុះបណ្តាលខ្លីៗជាច្រើន ពីវាគ្មិនល្បីៗនៅកម្ពុជា ដើម្បីអភិវឌ្ឈន៍សមត្ថភាពខ្លួនឯងជាប្រចាំ ក្នុងគោលដៅក្លាយជាសហគ្រិនម្នាក់ នៅពេលលោកត្រលប់់មកកាន់កម្ពុជាវិញ។
ជាលទ្ឋផលពេលមកដល់កម្ពុជា លោកនិងបងប្អូនប្រុសភ្លោះរបស់លោក បានចាប់ផ្តើមវិនិយោគលើអចលនទ្រព្យ ពិសេសគំរោងដីឡូត៍ ផ្ទះល្វែង វីឡា នៅខេត្តសៀមរាប និងបណ្តាខេត្តមួយចំនួនទៀត។
រំលឹកអតតីតៈកាល
ជាអ្នកកាន់ស្តុកអីវ៉ាន់នៅរោងចក្រមួយកន្លែង ក្នុងប្រទេសកួរ៉េ លោកបានរំលឹកថា “ការធ្វើការងារដំបូងនៅប្រទេសកូរ៉េ ពិតជាមានការលំបាក ខ្ញុំអត់ច្បាស់នូវភាសាកូរ៉េ ការនិយាយ និងការស្តាប់ផ្សេងៗមានការលំបាកមែនទែន តែខ្ញុំមានការតាំងចិត្តថាខ្ញុំអាចធ្វើបាន ដោយលោកបានប្រកាន់គោលការណ៍ផ្ទាល់ខ្លួនថា “ការងារគឺជាអ្នកបង្រៀនមនុស្ស” ។
ក្នុងអំឡុងពេលបំពេញការងារនៅសាធារណៈរដ្ឋកូរ៉េ លោកបានកសាងគុណសម្បត្តិជាច្រើន ដោយលោករៀបរាប់មានទាំង អគ្គីភ័យកើតឡើង ដោយការការទុស្សេ ខ្សែភ្លើង ប៉ុន្តែលោកបានចូលទៅយកធុងហ្គាសចេញ ដើម្បីកុំអោយភ្លើងឆាបឆះរោងចក្រ រហូតដល់មានការពេញចិត្តពីថៅកែកូរ៉េ ហើយជាលទ្ឋផល លោកបានទទួការកោតសរសើរ និងតំលើងប្រាក់ខែជាបន្តបន្ទាប់។
ទស្សនវិស័យ
បន្ទាប់ពីលោកបញ្ចប់បេសកម្ម ជាពលករក្នុងរយៈពេល៤ឆ្នាំ ដោយការមើលឃើញនៅវិស័យអចនទ្រព្យនៅប្រទេស កូរ៉េមានភាពរីកចំរើនខ្លាំង លោកមានប្រសាសន៍ថា “ដើម្បីជំរុញការអភិវឌ្ឍនៅកម្ពុជា ខ្ញុំមានហិច្ឆតា ដើម្បីយកខុនដូមួយទៅដាក់នៅស្រុកខ្មែរអោយបាន”។
ដោយលោកមានបទពិសោធច្រើនពីជនជាតិកូរ៉េ ដែលមានការបន្តុះគំនិត ភាពជាសហគ្រិនផង និងការអភិវឌ្ឍខ្លួនជាប្រចាំផងបានធ្វើឲ្យលោកឆាន គឹមម៉េនប្រកាន់នូវចក្ខុវិស័យភ្លឺស្វាង និងការប្តេជ្ញាចិត្តយ៉ាងមុតមាំ ដោយលោកបានមានប្រសាសន៍ថា “ខ្ញុំគិតថា នៅពេលដែលខ្ញុំត្រលប់មកកម្ពុជា ខ្ញុំនឹងក្លាយជាសហគ្រិនអោយបាននៅក្នុងវិស័យណាមួយ”។
ឆ្លងកាត់បទពិសោធន៍ការងារជាក់ស្តែង និងអនុវត្តន៍ជាប្រចាំរហូតទទូលបានជោគជ័យ លោកឆាន គឹមម៉េនបានរំលឹកទៅកាន់ពលករកម្ពុជា ដែលបាននិងកំពុងបំពេញការងារនៅប្រទេសកូរ៉េថា បងប្អូនពលករគ្រប់ប្រទេសគួររៀនសូត្រឲ្យបានច្រើន និងជាប់ជាប្រចាំ ពីការអភិវឌ្ឍនៅប្រទេសរបស់គេ ដើម្បីត្រលប់មកប្រទេសកម្ពុជាវិញ ទទួលបានឱកាសជោគជ័យ។
លោកបានបញ្ជាក់ថា “កាសេពគប់ត្រូវ នឹងធ្វើអោយយើងទទួលបានជោគជ័យ ការធ្វើសកម្មភាពត្រូវ គឺជារឿងជោគជ័យមួយដែរ ហើយត្រូវសំរេចចិត្តអោយត្រូវក្នុងសកម្មភាពមួយនោះ”។ លោកបន្តថា “ចំណុចមួយទៀត ការគិតត្រូវ យើងគិតទៅលើអ្វីដែលកំពុងតែធ្វើ និងទទួលព៌តមានអោយបានត្រឹមត្រូវ”។
លោកឆាន គឹមម៉េនបានបន្តថា “បងប្អូនមិនត្រូវធ្វើការគិតតែពីប្រាក់ខែទេ ត្រូវធ្វើការដោយប្រឹងប្រែងអស់ពីសមត្ថភាព និងតាំងចិត្អអោយដូចធ្វើការងារជារបស់ខ្លួនឯង នោះ បងប្អូននឹងមានភាពជាសហក្រិន តាំងពីបងប្អូនធ្វើការអោយគេម្ល៉េះ”។
អនុសាសន៍
ជាមួយគ្នានេះ លោកបានពន្យល់ថា ដើម្បីក្លាយជាសហគ្រិន បុគ្គលម្នាក់ៗត្រូវមាន៥ចំនុចដូចជា ទី១ ចំនង់ៈ តើខ្លួនចង់ធ្វើអ្វីដោយពិតប្រាកដ ដោយមិនមែនធ្វើតាមតែគេ ដោយគ្មានចំនង់ពីខ្លួនឯងឡើយ ទី២ ជំនឿៈ ត្រូវជឿលើសមត្ថភាពថា ខ្លួនអាចធ្វើបានរឺអត់ ទី៣ ចំណេះ បើមិនមានចំនេះដឹងលើអាជីវកម្មមួយនេះទេ នោះបងប្អូនមិនអាចបើកអាជីវកម្មមួយបានទេ។
ទី៤ ជំនាញៈ ត្រូវចេះពីជំនាញណាមួយ ពីប្រទេសគេ ហើយ យកមកបើកអាជីវកម្មអោយត្រូវ ជំនាញនៅស្រុកខ្មែរដែរ និងទី៥ បទពិសោធន៍ៈ ម្ចាស់អាជីវកម្មមួយៗ សុទ្ធតែមានបទពិសោធន៍ ធ្លាប់ធ្វើកាងារមួយនេះ មុនបើកអាជីវកម្មខ្លួនឯង។
លោកបានមានចែករំលែកនូវភាពខុសគ្នា រវាងការធ្វើការអោយគេនិងភាពជាសហគ្រិន គឺមានការខុសគ្នា ដោយការធ្វើការអោយគេមានម៉ោងកំនត់ ត្រឹម8ម៉ោងជាដើម ចំនែកភាពជាសគ្រិន ត្រូវធ្វើការច្រើនម៉ោងលើសពីនេះ និងត្រូវមានទំនួលខុសត្រូវច្រើនមុខគ្រប់បញ្ហា។
ជាមួយនឹងភាពជោគជ័យជាបន្តបន្ទាប់ បច្ចុប្បន្ននេះ លោកបានវិនិយោគលើវិស័យអចនទ្រព្យ មាន ដីឡូត៏ ផ្ទះល្វែង និងវីឡាជាដើម៕
