ដោយៈគង់ សិរីជេស៊ីកា

ភ្នំពេញៈ វិស័យសំណង់នៅតែជាផ្នែកសំខាន់ននៃសេដ្ឋកិច្ចកម្ពុជា បើទោះបីជាប្រទេសនេះរងវិបត្តិជំងឺកូវីដ១៩ក្តី ប៉ុន្តែទុនវិនិយោគហូរចូលមកក្នុងវិស័យនេះ នៅតែមានចំនួនច្រើន។

យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា ស្ថាប័នថ្នាក់ជាតិ និងថ្នាក្រោមជាតិ បានអនុម័តសំណើសុំសាងសង់សរុប ២៩០១គម្រោង ក្នុងរយៈពេល៨ខែ ដំបូងនៃឆ្នាំ២០២១ នេះនិងមានទុនវិនិយោគសរុប៣៨៤៣លានដុល្លារអាមេរិក។

ចំណែករបាយការណ៍ស្តីពី “និន្នាការសេដ្ឋកិច្ច សង្គម” នៃក្រសួងសេដ្ឋកិច្ច និងហិរញ្ញវត្ថុបានបង្ហាញថា ទំហំទុនវិនិយោគលើគម្រោងទាំងអស់នេះ បានធ្លាក់ចុះ ២៤,៤ ភាគរយ បើធៀបនឹងរយៈពេលដូចគ្នាកាលពីឆ្នាំមុន។

ទិន្នន័យដដែលបានឲ្យដឹងទៀតថា ក្នុងចំណោមគម្រោងទាំងអស់ ប្រភេទសំណង់លំនៅដ្ឋាន មាន២ ៥៣០គម្រោង ឬស្មើនឹង៨៧,២% នៃសំណើសុំសាងសង់សរុប ដែលបានធ្លាក់ចុះ១៥% ធៀបនឹងរយៈពេលដូចគ្នាកាលពីឆ្នាំមុន។

កាលពីឆ្នាំ២០២០កន្លងទៅ តម្លៃគម្រោងស្នើសុំសាងសង់សរុបមានទំហំទឹកប្រាក់​រហូតដល់ទៅ ៧,៧៥ពាន់លានដុល្លារ ធ្លាក់ចុះ៣២ភាគរយ បើធៀបនឹងឆ្នាំ២០១៩៕

ដោយៈវឌ្ឍនៈ

ភ្នំពេញៈ តាមសិក្សារបស់ក្រុមហ៊ុនអចលនទ្រព្យ Century 21 Zillion Holding បានបង្ហាញខណ្ឌចំនួនពីរ នៅរាជធានីភ្នំពេញរួមមានខណ្ឌកំបូល និងខណ្ឌពោធិ៍សែនជ័យ ជាទីតាំងដែលមានសក្ដាពលទាក់ទាញ និងទទួលបានគម្រោងវិនិយោគច្រើនជាងគេ។

ជាការកត់សម្គាល់ខណ្ឌកំបូល ប៉ែកខាងលិចរាជធានីភ្នំពេញ ហាក់មានសកម្មភាពកាន់តែផុសផុល ទៅលើគម្រោងវិនិយោគលំនៅឋានជាបុរី ដោយមានក្រុមហ៊ុនអភិវឌ្ឍន៍ជាច្រើនបានបន្តសកម្មភាពគម្រោងរបស់ខ្លួន ទាំងគម្រោងចាស់ៗ និងគម្រោងថ្មីៗ ធ្វើឱ្យខណ្ឌនេះ មានប្រជាពលរដ្ឋមករស់នៅកាន់តែច្រើនផងដែរ។

ដោយឡែកខណ្ឌ ពោធិ៍សែនជ័យក៏ដូចគ្នាផងដែរ វាជាតំបន់ដែលមានគម្រោងវិនិយោគលំនៅឋាន និងគម្រោងមួយចំនួនទៀត ក៏បានបន្តសកម្មភាពរបស់ខ្លួនជាបន្តបន្ទាប់ ទោះបីជាស្ថិតនៅក្នុងវិបត្តិនៃជំងឺកូវីដ១៩ក៏ដោយ ។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានលើកឡើងថា តំបន់ខាងលិចនៃរាជធានីភ្នំពេញ ត្រូវបានមើលឃើញថា ពិតជាមានការវិនិយោគផុសផុលនាពេលបច្ចុប្បន្ននេះ ដោយឃើញមានគម្រោងអភិវឌ្ឍន៍លំនៅឋានថ្មីៗ ជាច្រើនចាប់ផ្ដើមអនុវត្តន៍ជាបន្តបន្ទាប់ ក្នុងនោះក៏មានគម្រោងលំនៅឋានតម្លៃសមរម្យនិងតម្លៃខ្ពស់ៗផងដែរ ។

លោកបន្តថា “កត្តាដែលជំរុញឱ្យតំបន់ទាំងនោះ កាន់តែទទួលបានការវិនិយោគច្រើននោះ ដោយសារតែយើងឃើញថា មានប្រព័ន្ធហេដ្ឋារចនាសម្ព័ន្ធ របស់រដ្ឋក៏កាន់តែរីកដុះដាលមានផ្លូវខ្វាត់ខ្វែង មានប្រព័ន្ធទឹក ប្រព័ន្ធភ្លើងគ្រប់គ្រាន់”។

យោងតាមក្រុមប្រឹក្សាអភិវឌ្ឍន៍កម្ពុជា គិតចាប់ពីខែមករា ដល់ថ្ងៃទី៤ ខែតុលា ឆ្នាំ២០២១ បានអនុម័តគម្រោងវិនិយោគ ដែលគិតតែក្នុងរាជធានីភ្នំពេញមានចំនួន១៩ គម្រោង ឬស្មើនឹងទុនវិនិយោគប្រមាណ១៧៦លានដុល្លារ។ គម្រោងវិនិយោគទាំងនេះបូកបញ្ជូលគ្នាអាចបង្កើតការងារបានជាង១៤,០០០ នាក់។

ក្នុងចំណោមនោះ ខណ្ឌពោធិ៍សែនជ័យទទួលបាន គម្រោងវិនិយោគច្រើនជាងគេដល់ទៅ៧គម្រោង ខណៈដែលខណ្ឌកំបូលមាន៤គម្រោង។ ខណ្ឌទាំងពីរបូកបញ្ជូលគ្នាមានចំណែកជាង៥០ភាគរយ នៃចំនួនគម្រោងវិនិយោគសរុប១៩គម្រោង។

ទិន្នន័យដដែលបានឱ្យដឹងថា គម្រោងវិនិយោគទាំងនេះ ផ្តោតលើការវិនិយោគរោងចក្រកាត់ដេរសម្លៀកបំពាក់ ស្បែកជើង កាបូប កែច្នៃ និងវេចខ្ចប់ ផលិតផលកសិកម្ម និងគម្រោងសាងសង់សណ្ឋាគារផ្កាយ៤ជាដើម៕

ដោយៈគង់ សិរីជេស៊ីកា

ភ្នំពេញៈ ស្របពេលវិស័យអចលនទ្រព្យ កំពុងកើនឡើងប្រជាប្រិយភាពក្នុងសង្គមខ្មែរ ខណៈវិស័យនេះមានភាពចាស់ទុំរួចទៅហើយ នៅតាមបណ្តាប្រទេសអភិវឌ្ឍន៍នានា ប៉ុន្តែនៅកម្ពុជាវានៅតែមានសភាពក្មេងខ្ចីនៅឡើយ។

លោកយិន លាងគង់ ទីប្រឹក្សាសមាគមអចលនទ្រព្យសកលបានចែករំលែកនូវបទពិសោធន៍ និងចំណេះដឹងខ្លះៗ សម្រាប់អ្នកប្រឡូកក្នុងវិស័យនេះយកទៅពិចារណា ដោយ​លោកបានមានប្រសាសន៍ថា អ្នកជំនាញលំដាប់អន្តរជាតិ ដែលស្គាល់ច្បាស់ពីទិដ្ឋភាពនៃទីផ្សារនេះ នៅមានកម្រិតនៅឡើយ បើទោះបីជាមានអ្នកប្រឡូកកាន់តែច្រើនក្តី។

ហេតុនេះការលក់អចលនទ្រព្យ និងទទួលបានសិទ្ឋលក់់ផ្តាច់មុខលើគំរោងអចលនទ្រព្យណាមួយ វាជាឱកាស និងបញ្ហាប្រឈមធំផងដែរ ដូច្នេះអ្វីដែលអ្នកគួរពិចារណាដំបូងៗគឺលើបីចំណុចនេះ។

ឱកាស
ការដែលទទួលបានសិទ្ឋលក់ផ្តាច់មុខលើគំរោងណាមួយ វាជាការល្អ ក្នុងន័យថាបើក្រុមហ៊ុននោះមានអ្នកជំនាញលក់ និងបណ្តាញការងារច្បាស់លាស់ ត្រឹមត្រូវ សមស្របនឹងពេលវេលាជាក់ស្តែង។

ការទទួលបានគំរោងផ្តាច់មុខយកមកលក់ ក៏ជាឱកាសផងដែរ ដែលក្រុមហ៊ុននោះទទួលបានផលច្រើនពីកម្រៃជើងសារ និងអាចបែងចែកទៅក្រុមហ៊ុនដៃគូបានលឿន និងសមស្រប តាមលក្ខខ័ណ្ឌនៃកិច្ចសន្យាការងារ។

លើសពីនេះ ក្រុមហ៊ុននឹងទទួលបានទំនុកចិត្ត ពីអ្នកអភិវឌ្ឍន៍ច្រើនផងដែរ បើសិនជាការលក់របស់ខ្លួនមានភាពជោគជ័យ ពិសេសបើលក់លឿនជាងផែនការកំណត់ ប៉ុន្តែ​ការចងលក្ខខ័ណ្ឌ រវាងក្រុមហ៊ុនភ្នាក់ងារអចលនទ្រព្យ និងក្រុមហ៊ុនអភិវឌ្ឍន៍នានា ក៏គួរសិក្សាឲ្យបានច្បាស់លាស់ មានមេធាវីត្រឹមត្រូវផងដែរ។

បញ្ហាប្រឈម
ទន្ទឹមនឹងឱកាស បញ្ហាប្រឈមក៏កើតមានព្រមគ្នាផងដែរ ក្នុងករណីក្រុមហ៊ុនមិនទាន់បានរៀបចំរចនាសម្ព័​ន្ឋការងារបានត្រឹមត្រូវ មិនទាន់ជ្រើសរើស ឬមានអ្នកជំនាញផ្នែកលក់បានល្អ ក្រុមហ៊ុននោះនឹងប្រឈមមុខនឹងភាពបរាជ័យផងដែរ។

ហេតុនេះការជ្រើសរើសពេលវេលាមួយត្រឹមត្រូវ ជ្រើសរើសក្រុមការងារត្រឹមត្រូវ ជ្រើសរើសគំរោងបានល្អ ទាំងកេរ្ត៍ឈ្មោះអ្នកអភិវឌ្ឍន៍ ទាំងទីតាំងគំរោង ទាំាំងតម្លៃអចលនទ្រព្យ សុទ្ឋតែជាអ្វីដែលយើងអាចការពារបញ្ហាប្រឈមបានផងដែរ។

ពេលវេលាមិនស័ក្តិសម
ការទើបបង្កើតក្រុមហ៊ុនថ្មី មិនសូវមានបទពិសោធន៍ច្រើនលើការលក់ មិនទាន់មានភាពចាស់ទុំលើការចងបណ្តាញការងារ ថ្នាក់ដឹកនាំក្រុមហ៊ុននោះមិនគួរលោភលន់យកគំរោងណាមួយមកលក់ផ្តាច់មុខនោះទេ ថ្នាក់ដឹកនាំក្រុមហ៊ុននោះគួរសិក្សា និងធ្វើការជាផ្នែកតូចៗសិន ដោយចាប់ផ្តើមពីតូច ប៉ុន្តែទទួលបានលទ្ឋផលធំ។

ដួច្នេះពេលវេលាមិនស័ក្តិសម ពិតជាមិនស័ក្តិសមនោះទេ បើសិនជាអ្នកទើបប្រឡូ​កក្នុងវិស័យនេះ៕

ដោយ សការី

ភ្នំពេញ៖ ដើម្បីចូលរួមជាមួយរាជរដ្ឋាភិបាលក្នុងការទប់ស្កាត់ការរីករាលដាលជំងឺឆ្លងកូវីដ-១៩ និង ដើម្បីបើកប្រទេសឡើងវិញ ក្រុមហ៊ុន ប៉េង ហួត គ្រុប បានចូលរួមសហការផ្ដល់ទីតាំងចាក់វ៉ាក់សាំងដូសទី៣ ឬដូសជម្រុញ ជូនដល់ប្រជាពលរដ្ឋដែលរស់នៅក្នុង ខណ្ឌច្បារអំពៅ។ ការរៀបចំយុទ្ធនាការនេះប្រព្រឹត្តទៅនៅ មជ្ឈមណ្ឌល កីឡា ផ្លាទីនីម (Platinum Sports Center) ក្នុងគម្រោង បុរី ប៉េង ហួត ហ្គ្រេនស្តា ផ្លាទីនីម (បឹងស្នោ) ចាប់ពីថ្ងៃច័ន្ទទី១១ ខែតុលា រហូតដល់ ថ្ងៃច័ន្ទទី២៥ ខែតុលា ឆ្នាំ២០២១ វេលាម៉ោង ៧ព្រឹក រហូតដល់ម៉ោង ៥ល្ងាច។

កន្លងមកចាប់ពីថ្ងៃទី២០ ខែមេសា រហូតដល់ថ្ងៃទី២១ ខែមិថុនា ឆ្នាំ២០២១ ប្រជាពលរដ្ឋចំនួន ២,១២៣៤នាក់ ដែលក្នុងនោះមានបុគ្គលិក កម្មករ និងជាងសំណង់បុរី ប៉េង ហួត ចំនួនជាង ១ម៉ឺននាក់, ប្រជាពលរដ្ឋដែលរស់នៅក្នុង និងក្រៅបុរី ចំនួនជាង ១ម៉ឺននាក់ផងដែរ បានអញ្ជើញមកទទួលការចាក់វ៉ាក់សាំងស៊ីណូវ៉ាក់ដូសទី១ និងដូសទី២ បានរួចរាល់ នៅមជ្ឈមណ្ឌល កីឡា ផ្លាទីនីម ។

តំណាងក្រុមហ៊ុន ប៉េង ហួត គ្រុប លោក ចាន់ រដ្ឋា ប្រធានផ្នែកកិច្ចការសាធារណៈ បានមានប្រសាសន៍ថា៖ “ នេះជាថ្ងៃទី១នៃយុទ្ធនារកាចាក់វ៉ាក់សាំងដូសទី៣ ឬដូសជំរុញ ជូនប្រជាពលរដ្ឋក្នុងបុរីក៏ដូចជាក្នុងខណ្ឌច្បារអំពៅ ក្រុមហ៊ុន ប៉េង ហួត គ្រុប មានកិត្តិយស និង ​ក្តីរីករាយក្រៃលែង ដែលបានចូលរួមសហការជាមួយរាជរដ្ឋាភិបាល ក្នុងការរៀបចំនិងផ្តល់ទីតាំងចាក់វ៉ាក់សាំងនេះជូនដល់ប្រជាពលរដ្ឋ ដើម្បីជួយទប់ស្កាត់ និងកាត់បន្ថយការឆ្លងរីករាលដាល និងដើម្បីឈានទៅដល់ការបើកប្រទេសឡើងវិញ។ យើងខ្ញុំសូមថ្លែងអំណរគុណដល់រាជរដ្ឋាភិបាល ក្រសួងសុខាភិបាល ព្រមទាំងក្រុមគ្រូពេទ្យ និងអាជ្ញាធរគ្រប់ជាន់ថ្នាក់ដែលបានខិតខំយ៉ាងយកចិត្ដទុកដាក់ដោយមិនគិតពីភាពនឿយហត់ រហូតទទួលបានលទ្ធផលគួរជាទីមោទកភាព ដែលកម្ពុជាមានអត្រាចាក់វ៉ាក់សាំងខ្ពស់ជាងក្នុងតំបន់។”

ខណៈកម្ពុជាជិតសម្រេចបាននូវការចាក់វ៉ាក់សាំងអោយប្រជាជនពេញវ័យ ១០០% ដែលបានចាក់វ៉ាក់សាំងការពារជំងឺកូវីដ-១៩ យ៉ាងតិច១ដូស ដោយគិតត្រឹមថ្ងៃទី ១០ ខែតុលា តែ​គិតត្រឹមព្រឹក ថ្ងៃទី១១ ខែតុលា ឆ្នាំ២០២១  កម្ពុជាក៏មានអ្នកឆ្លងសរុប ចំនួន ១១៥,០៦៨នាក់ អ្នកជាសះស្បើយចំនួន១០៨,៤០៣នាក់ និងអ្នកស្លាប់ចំនួន ២,៥២៧នាក់ ៕

ដោយៈសុខុម

សឹង្ហបុរី: ការលក់លំនៅដ្ឋានម៉ៅបញ្ចូលគ្នានៅសិង្ហបុរី កំពុងមានសន្ទុះហក់ឡើងខ្ពស់ក្នុងឆ្នាំ២០២១ ដោយ២៥គម្រោងត្រូវបានដាក់លក់ លើទីផ្សារចាប់តាំងពីដើមឆ្នាំនេះ ដែលបង្ហាញពីការកើនឡើងខ្ពស់ជាងទ្វេដង បើធៀបទៅនឹង១១គម្រោងដែលបានដាក់លក់ក្នុងឆ្នាំ២០២០។ នេះបើយោងតាមសារព័ត៌មាន CNA ចុះផ្សាយនៅថ្ងៃច័ន្ទ ទី១១ តុលា នេះ។

ក្នុងនោះគម្រោងខុនដូ Chuan Park Condominium ដែលជាគម្រោងលំនៅដ្ឋានដ៏ធំបំផុតនៅក្នុងប្រទេសសិង្ហបុរី លើផ្ទៃដីស្មើនឹងផ្ទៃ១៤០ទីលានវាយតិន្នីស លក់ម៉ៅបញ្ចូ​លគ្នាបានរហូតដល់ទៅ៨០% សម្រាប់ការដាក់ដេញថ្លៃលក់ម៉ៅបញ្ចូលគ្នា ក្នុងត្រីមាសទី៣ ឆ្នាំ២០២១ បន្ទាប់ពីរកអ្នកទិញមិនបាននៅក្នុងឆ្នាំ២០១៨។

គម្រោងដ៏ធំដែលមានខុនដូ ចំនួនចន្លោះពី៩០០យូនីត ទៅ៩១៩យូនីតខាងលើនេះ មានម្លៃសរុប៩៣៨លានដុល្លារ ដោយក្នុងមួយយូនីតលក់ ក្នុងតម្លៃរហូតដល់ទៅ២,៦៦លានដុល្លារ អាស្រ័យលើផ្ទៃនៃយូនីតនីមួយៗ។

កំណើននៃការលក់លំនៅដ្ឋាននេះ បង្ហាញពីសញ្ញាវិជ្ជមានគួរឱ្យអបអរសាទរសម្រា​ប់វិស័យអចលនទ្រព្យ ក្នុងប្រទេសដែនកោះ ដែលជាមជ្ឈមណ្ឌលហិរញ្ញវត្ថុអន្តរជាតិមួយនេះ ក៏ដូចជាវិស័យអចលនទ្រព្យក្នុងតំបន់។

កំណើនខ្ពស់នៃការលក់លំនៅដ្ឋាននេះកើតមានឡើង ស្របពេលទីផ្សារលំនៅដ្ឋានក្នុងប្រទេសចិន កំពុងជួបភាពវឹកវរ ក្រោយផ្ទុះវិបត្តិបំណុលរបស់ក្រុមហ៊ុន Evergrande ដែលជាក្រុមហ៊ុនអភិវឌ្ឍន៍អចលនទ្រព្យធំបំផុតទី២ ក្នុងប្រទេសចិន និងជាក្រុមហ៊ុន ដែលជំពាក់បំណុលច្រើនបំផុត ក្នុងប្រទេសនេះជាមួយនឹងបំណុល រហូតដល់ទៅជាង៣០០ពាន់លានដុល្លារ។

វិបត្តិរបស់ក្រុមហ៊ុននេះ មិនត្រឹមតែបង្កចលចលនៅក្នុងប្រទេសចិន ប៉ុណ្ណោះទេ ប៉ុន្តែថែមទាំងធ្វើឱ្យទីផ្សារពិភពលោក រងភាពរង្គោះរង្គើផងដែរ៕ CNA៕