ដោយៈសុជាតា
ភ្នំពេញៈ គំនិតផ្តួចផ្តើមខ្សែក្រវ៉ាត់១ ផ្លូវ១ កំពុងនាំវិបុលភាពដល់កម្ពុជាបណ្តើរៗ តាមរយៈទំនាក់ទំនងល្អប្រសើររវាងរដ្ឋាភិបាលកម្ពុជា ចិន ដែលផ្តល់នូវកាលានុវត្តន៍ភាពយ៉ាងច្រើនសំរាប់សេដ្ឋកិច្ចកម្ពុជា។
យោងតាមចេញផ្សាយភ្នាក់ងារសារព័ត៌មាន ផ្លូវការរបស់ប្រទេសចិន Xinhua បានបង្ហាញអោយដឹងថា ថ្វីបើវិបត្តិCovid19 បន្តរាលដាលទូទាំងប្រទេស ក៏ប៉ុន្តែវិស័យសំណង់នៃគម្រោងធំមួយចំនួន ដូចជា ផ្លូវល្បឿនលឿនភ្នំពេញ និង ក្រុងព្រះស៊ីហនុ និង រោងចក្រផលិតថាមពលទំហំ៧០០មេហ្គាវ៉ាត នៅក្រុងព្រះសីហនុបានដំណើរបន្តទៅមុខ។ ប៉ុន្តែគម្រោងទាំងនេះ បញ្ចប់វានឹងដើរតួនាទីដ៏សំខាន់ សម្រាប់កំណើនសេដ្ឋកិច្ចនៅក្រោយវិបត្តិ Covid 19 ។
លោកផៃ ស៊ីផានអ្នកនាំពាក្យរដ្ឋាភិបាលកម្ពុជាបាននិយាយថា គម្រោង BRI ដូចជាសំណង់ផ្លូវល្បឿនលឿនភ្នំពេញ និង ក្រុងព្រះសីហនុ អាកាសយានអន្តរជាតិសៀមរាប ស្តាតពហុកីឡាដ្ឋានថ្មី និង តំបន់សេដ្ឋកិច្ចពិសេសព្រះសីហនុ បានផ្តល់សារៈសំខាន់ដ៏ធំសំបើមសម្រាប់ការអភិវឌ្ឍសេដ្ឋកិច្ចកម្ពុជា ក្នុងអំឡុងវិបត្តិ Covid 19 នេះ។
ក្នុងនោះដែរ តំបន់សេដ្ឋកិច្ចពិសេស បានដើរតួនាទីដ៏សំខាន់គាំទ្រ ការនាំចេញ និង រោងចក្រថាមពលអគ្គិសនី ដែលរក្សាស្ថេរភាពអគ្គិសនី ដែលធានាដល់ការរស់នៅប្រចាំថ្ងៃ និង អាជិវកម្មនានា។
លោកផៃ ស៊ីផានបានបញ្ជាប់ប្រាប់ភ្នាក់ងារព័ត៌មាន Xihua ថា ចាប់តាំងពីបង្កើតឡើងនៅឆ្នាំ ២០១៣ គម្រោងBRI បានក្លាយទៅជាក្បាលម៉ាស៊ីនថ្មី សម្រាប់កំណើនសេដ្ឋកិច្ចពិភពលោក។ គម្រោងនេះផ្តល់សហប្រតិបត្តិការតំបន់ និងពិភពលោក តាមរយៈហេដ្ឋារចនាសម្ពន្ធទាំងផ្នែកទន់ និង ផ្នែករឺងសេដ្ឋកិច្ច និងពាណិជ្ជកម្ម ឱកាសវិនិយោគ ការផ្លាស់ប្តូរវប្បធម៌ផងដែរ។
ជាមួយគ្នានេះ លោក នាក់ ចាន់ដារ៉ារិទ្ធិ អគ្គនាយកមជ្ឍមណ្ឌលស្រាវជ្រាវវិថីសូត្រសតវត្សទី២១ បានលើកឡើងថា គម្រោងBRI បានដើរតួនាទីក្នុងការរក្សាស្ថេរភាពការអភិវឌ្ឍសេដ្ឋកិច្ចកម្ពុជា ក្នុងអំឡុងពេលវិបត្តិCovid 19 ។
លោកបន្ថែមទៀតថា បើយោងតាមរបាយការណ៍ប្រតិបត្តិការ តំបន់សេដ្ឋកិច្ចព្រះសីហនុបានកើនឡើង៤៤ភាគរយ ដោយតំលៃនាំចេញ នាំចូលបានកើនឡើងដល់ ១១៨៥លានដុល្លារ នៅរយៈពេល៧ ខែឆ្នាំ២០២១។ ជាងនេះទៀត គម្រោងសាងសង់ផ្លូវល្បឿនលឿនភ្នំពេញ ក្រុងព្រះសីហនុ រំពឹងទុកថានឹងបញ្ចប់តាមពេលវេលាកំណត់ ដែលបានបង្កើតការងាររាប់ពាន់កន្លែងសម្រាប់ប្រជាជនកម្ពុជា។
តាមរយៈគម្រោង BRI នឹងផ្តល់សារៈប្រយោជន៍ដ៏សំខាន់ សម្រាប់ការអភិវឌ្ឍសេដ្ឋកិច្ចកម្ពុជាក្រោយវិបត្តិ Covid 19 ព្រមទាំងសមាហរណកម្ម សេដ្ឋកិច្ចកម្ពុជា ជាមួយបណ្តាសេដ្ឋកិច្ចនៅក្នុងពិភពលោក៕
