ដោយ សុខុម

បាងកក: បន្ទាប់ពីការបិទខ្ទប់ត្រូវបានពន្យារពេលរហូតដល់ខែសីហា នេះ ការធ្លាក់ចុះនៃទីផ្សារការិយាល័យនឹងនៅតែបន្តក្នុងត្រីមាសទី៣ នេះ ហើយអត្រាជួលការិយាល័យនឹងធ្លាក់ចុះបន្ថែមទៀត។ នេះបើយោងតាមកាសែត Bangkok Post ចុះផ្សាយកាលពីថ្ងៃទី៥ សីហា។

លោកស្រី Neeranuch Kanokvilairat នាយកគ្រប់គ្រងផ្នែកស្រាវជ្រាវ និងប្រឹក្សាយោបល់នៃក្រុមហ៊ុនអចលនទ្រព្យថៃ Edmund Tie & Co Thailand លើកឡើងថា អ្នកជួលការិយាល័យមួយចំនួនបានកាត់បន្ថយការប្រើប្រាស់ផ្ទៃ ឬ space ការិយាល័យ នៅពេលពួកគេជម្រុះបុគ្គលិកដើម្បីកាត់ចំណាយដោយសារវិបត្តិរីករាលដាលនៃវីរុសកូវីដ-១៩។

នៅក្នុងត្រីមាសទី២ ឆ្នាំ២០២១ អត្រាជួលការិយាល័យក្នុងសង្កាត់ពាណិជ្ជកម្មនៃក្រុងបាងកក បានធ្លាក់ចុះពី៩០,៨៥%ក្នុងត្រីមាសទី១ មកនៅត្រឹម៨៩,៤៣%។

និន្នាការធ្លាក់ចុះនេះនឹងនៅតែបន្តក្នុងត្រីមាសទី៣នេះ ក្រោយពីមានវិធានការបិទខ្ទប់ក្នុងខែកក្កដា កន្លងទៅ និងខែសីហា នេះ។ លោកស្រី Neeranuch Kanokvilairat បានគូសបញ្ជាក់ថា វាជាការធ្លាក់ចុះជាប់ៗគ្នាចាប់តាំងពីត្រីមាសទី២ ឆ្នាំ២០២០ ដែលជាការធ្លាក់ចុះលើកដំបូងមិនធ្លាប់មានក្នុងរយៈពេលជាច្រើនឆ្នាំមកនេះ។

អត្រាជួលជាមធ្យមក្នុងសង្កាត់ពាណិជ្ជកម្មនៃក្រុងបាកក ក៏បានធ្លាក់ចុះពីមួយម៉ែត្រការ៉េតម្លៃ១.០៦៥បាត (៣២,០២ដុល្លារ) ក្នុងមួយខែនៅក្នុងត្រីមាសទី១ ដើមឆ្នាំ២០២១ មកនៅត្រឹមមួយម៉ែត្រការ៉េតម្លៃ១.០៥៥បាត (៣១,៧២ដុល្លារ) ក្នុងត្រីមាសទី២ ផងដែរ ពោលគឺធ្លាក់ចុះ១%។

ការធ្លាក់ចុះប្រចាំត្រីមាសដែលធ្ងន់ធ្ងរបំផុតគឺនៅក្នុងត្រីមាសទី២ ឆ្នាំ២០២០ ដែលបានធ្លាក់ចុះជិត២%។

ចំពេលមានវិបត្តិកូវីដ-១៩ ដែលបានបង្កការឆ្លងក្នុងចំនួនច្រើនក្នុងទីក្រុងបាងកក និងខេត្តមួយចំនួនទៀតរបស់ថៃ មានការរំពឹងទុកថា បណ្ដាក្រុមហ៊ុនអភិវឌ្ឍន៍នឹងពន្យារពេលបើកដំណើរការអគារការិយាល័យថ្មីៗរហូតដល់ដំណាច់ឆ្នាំនេះ។

លោកស្រី Neeranuch Kanokvilairat ថ្លែងថា ផលប៉ះពាល់ដែលបង្កឡើងដោយសារការរីករាលដាលនៃវីរុសកូវីដ-១៩ នឹងបណ្ដាលឱ្យអាជីវកម្មកាន់តែច្រើនបិទទ្វារ ហើយបង្ខំឱ្យអាជីវកម្មជាច្រើនទៀតពង្រីកវិធានការកាត់បន្ថយការចំណាយ ឬកាត់បន្ថយប្រតិបត្តិការរបស់ខ្លួន។ ក្រុមហ៊ុនជាច្រើននឹងពិនិត្យមើលតម្រូវការផ្ទៃការិយាល័យរបស់ខ្លួនឡើងវិញ ដែលកត្តានេះបានដាក់សម្ពាធបន្ថែមទៀតមកលើអត្រាជួល។

ម្ចាស់អគារការិយាល័យទំនងជាបន្តអនុវត្តវិធានការបន្ធូរបន្ថយផ្នែកហិរញ្ញវត្ថុដូចជា ការផ្អាកយកថ្លៃឈ្នួលជាបណ្ដោះអាសន្ន និងការបញ្ចុះថ្លៃឈ្នួលជាដើម ដើម្បីរក្សាទុកអ្នកជួលដែលមានស្រាប់ស្របពេលមិនសូវមានតម្រូវការជួល។ ទន្ទឹមនេះការផ្គត់ផ្គង់ការិយាល័យដ៏ច្រើននៅក្នុងទីផ្សារក៏បង្ខំឱ្យពួកគេបត់បែនជាងមុនផងដែរ ជាពិសេសអត្រាថ្លៃឈ្នួល និងលក្ខខណ្ឌជួលដើម្បីជួលការិយាល័យឱ្យបានច្រើនតាមដែលអាចធ្វើទៅបាន។

អគារការិយាល័យថ្មីៗនឹងត្រូវបំពាក់ដោយបច្ចេកវិទ្យាស្វ័យប្រវត្តិ និងស៊ិនស័រ (sensor) និងការច្នៃប្រឌិតផ្នែកឌីជីថលដើម្បីធ្វើឱ្យការិយាល័យរបស់ពួកគេកាន់តែមានភាពទំនើប ស៊ីវិល័យស្របទៅនឹងសម័យកាលឌីជីថល។

យោងតាមកំណត់ត្រាបង្ហាញថា ការផ្គត់ផ្គង់ការិយាល័យក្នុងក្រុងបាងកក មានសរុបចំនួន៩លានម៉ែត្រការ៉េ ដោយធ្លាក់ចុះតិចតួចចំនួន០,៨%បើធៀបទៅនឹង៨,៩លានម៉ែត្រការ៉េនៅក្នុងត្រីមាសទី១ ដើមឆ្នាំ២០២០៕

ដោយៈ សុជាតា

ភ្នំពេញៈ រដ្ឋាភិបាលកម្ពុជា បានសម្រេចបញ្ចេញកញ្ចប់ថវិការ១៥០លានដុល្លារ ដើម្បីស្ថាបនាផ្លូវចំនួន៣៨ខ្សែឡើងវិញក្នុងក្រុងសៀមរាប ដោយរំពឹងថាបញ្ចប់នៅចុងឆ្នាំ២០២១នេះ ខណៈការសាងសង់ប្រព័ន្ធហេដ្ឋារចនាសម្ព័ន្ធនេះនឹងជួយលើកកម្ពស់តម្លៃចលនទ្រព្យនៅក្នុងទីក្រុងនេះបន្ថែម។

លោកឧកញ៉ានួន រិទ្ធីអគ្គនាយកក្រុមហ៊ុន Khmer Foundation Appraisal បានប្រាប់គេហទំព័រ Property Area asia នៅថ្ងៃទី៥ ខែសីហា ឆ្នាំ២០២១ថា ទន្ទឹមនឹងវិបត្តិកូវីដ១៩ នេះ គម្រោងផ្លូវ៣៨ខ្សែនឹងកែប្រែមុខមាត់ខេត្តសៀមរាបថ្មីឡើងវិញ ពិសេសវិស័យអចលនទ្រព្យនៅទីក្រុង ក្នុងខេត្តមួយនេះ។

លោកឧកញ៉ាបានថ្លែងថា ជាក់ស្តែង ការបង្កើនសោភ័ណនៃទីក្រុង សុវត្ថិភាព និងអនាម័យល្អ នឹងធ្វើទេសចរមកទស្សនាកាន់តែច្រើន និងជំរុញឱ្យសេដ្ឋកិច្ចក្នុងតំបន់នេះកាន់តែប្រសើរឡើង។ លោកឧកញ៉ាបានបន្តថា ការអភិវឌ្ឍន៍នៅតំបន់ផ្សារថ្មី និងផ្លូវក្រវ៉ាត់ក្រុង ការតភ្ជាប់ផ្លូវថ្មីទៅប្រលានយន្តហោះខាងកើតសៀមរាប និងការកសាងផ្លូវ៣៨ខែ្សនៅខេត្តសៀមរាប នឹងពិតជាធ្វើឱ្យអចលនទ្រព្យមានទីផ្សារល្អប្រសើរ នៅថ្ងៃអនាគតផងដែរ។

ជាមួយគ្នានេះដែរ យោងលោកឧកញ៉ានួន រិទ្ធីបានឱ្យដឹងថា ចំពោះ ដីនៅតំបន់ទីប្រជុំជន commercial land កម្រិតទីមួយមានតម្លៃ១៥០០ដុល្លារ ទៅ២៥០០ដុល្លារក្នុងមួយការ៉េ កម្រិតទីពីរចាប់ពី១០០០ដូល្លារ ទៅដល់ ១៥០០ដុល្លារ ក្នុងមួយម៉ែត្រការ៉េ កម្រិតទីបី៥០០ ដុល្លារទៅដល់ ១០០០ដុល្លារក្នុងមួយម៉ែត្រការ៉េ។

យោងតាមក្រសួងសារធារណការ និងដឹកជញ្ជូន ផ្លូវទាំង ៣៨ខ្សែដែលមានប្រវែងសរុបជាង៩៨គីឡូម៉ែត្រ ដែលជាបណ្តុំបណ្ដាញផ្លូវមេយ៉ាងប្រទាក់ក្រឡាក្នុងក្រុងសៀមរាប នឹងជួយសម្រួលដល់ការធ្វើដំណើររបស់ប្រជាពលរដ្ឋ ក៏ដូចជាភ្ញៀវទេសចរណ៍ក្នុងខេត្តនេះផងដែរ។

ក្រសួងបានអះអាងថា គម្រោងផ្លូវនេះ នឹងចូលរួមជំរុញ និងលើកកម្ពស់កំណើនសេដ្ឋកិច្ច តាមរយៈតំបន់ទេសចរណ៍នានា ជាពិសេសតំបន់ភាគខាងត្បូង និងការធ្វើសមាហរណកម្មប្រជាពលរដ្ឋដែលនៅជាយក្រុងដាច់ស្រយាល មកកាន់តែជិតក្រុងតភ្ជាប់ទីប្រជុំជនក្រុងសៀមរាប។

ក្រសួងទេសចរណ៍បានបង្ហាញគម្រោងបង្កើតទីក្រុងសៀមរាបថ្មី មានទីតាំងនៅជិត អាកាសយានដ្ឋានសៀមរាបថ្មី ដែលកំពុងស្ថិតនៅក្រោមការសាងសង់ ស្រុកសូត្រនិគម ខេត្តសៀមរាប ។ គម្រោងទីក្រុងថ្មីនេះស្ថិតនៅក្នុងផែនការមេអភិវឌ្ឍន៍វិស័យទេសចរណ៍នៅខេត្តសៀមរាប ។

គម្រោងធំៗទាំងនេះ និងគម្រោងផ្សេងៗទៀតកំពុងធ្វើឱ្យតម្លៃដីធ្លីមានការកើនឡើងក្រោយពីខេត្តសៀមរាបទទួលបានការអភិវឌ្ឍន៍ហេដ្ឋារចនាសម្ព័ន្ធ និងការវិនិយោគជាច្រើនបន្តបន្ទាប់ធ្វើឱ្យខេត្តមួយនេះក្លាយជាប៉ូលសេដ្ឋកិច្ចដ៏សំខាន់មួយរបស់ប្រទេសកម្ពុជា៕

ដោយៈ ម៉ាណេត

ភ្នំពេញៈ អ្នកជំនាញបានអះអាងថា រដ្ឋាភិបាលបានអនុម័តគម្រោងវិនិយោគលើការបង្កើតរោងចក្រ និងទីតាំងផលិតកម្មជាបន្តបន្ទាប់ ដែលកត្តាជំរុញឱ្យតម្រូវដីឧស្សាហកម្មមានការបន្តបន្ទាប់ ក៏ដូចជាវិស័យអចលនទ្រព្យនៅកម្ពុជា ទោះស្ថិតក្នុងវិបត្តិកូវីដ១៩ ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកច្រឹក សុខនីមបានថ្លែងប្រាប់នៅថ្ងៃទី៥ ខែសីហា ឆ្នាំ២០២១ អចលនទ្រព្យ ឬដីប្រភេទឧស្សាហកម្មនៅតែមានតម្រូវការបន្តបន្ទាប់ ដោសាររដ្ឋាភិបាលបានអនុម័តគម្រោងវិនិយោគលើការបង្កើតរោងចក្រ និងទីតាំងផលិតកម្មជាច្រើន ទោះស្ថិតក្នុងស្ថិតក្នុងវិបត្តិកូវីដ១៩។

លោកបានថ្លែងថា “ភាគច្រើន ដីឧស្សាហកម្ម ត្រូវបានក្រុមហ៊ុន ជ្រើសរើសយកជាទីតាំងផលិតម្ម ដោយសារតែទីតាំងទាំង២ អំណោយផលដល់ការដឹកជញ្ជូន ហើយការជ្រើសរើសដីធ្វើជាទីតាំងផលិតកម្មរបស់ក្រុមហ៊ុនទាំងនេះ ភាគច្រើន ធ្វើតាមរយៈពេលដៃគូពាណិជ្ជកម្ម និងក្រុមប្រឹក្សាអភិវឌ្ឍន៍កម្ពុជា ដែលអាចផ្តល់ព័ត៌មានដល់ក្រុមហ៊ុនវិនិយោគទាំងនេះ”។

លោកបានថ្លែងបន្តថា ការប្រើប្រាស់ដីឧស្សាហកម្មនេះមានចំនួន២យន្តការ។ យន្តការទី១ គឺការផ្លាស់ប្តូរទីតាំងរោងចក្រពីក្នុងទីក្រុងភ្នំពេញ ទៅក្រៅក្រុងភ្នំពេញ ដែលតម្រូវឱ្យមានការរៀបចំរួចរាល់នៅចុងឆ្នាំ២០២១ ឬដើមឆ្នាំ២០២២ ហើយយន្តការទី២ រោងចក្រថ្មីៗ ដែលចាប់ផ្តើមការវិនិយោគនៅកម្ពុជា និងបំណងចង់ធ្វើជាឧស្សាហកម្មធំៗ ដើម្បីបម្រើឱ្យតម្រូវការរបស់ពួកគាត់ជ្រើសរើសទីតាំងដែលងាយស្រួលក្នុងការដឹកជញ្ជូន។

លោកបានឱ្យដឹងថា “ប្រាកដណាស់ ការឈានចូលរបស់ក្រុមហ៊ុនវិនិយោគលើវិស័យឧស្សាហកម្ម ឬរោងចក្រ នឹងលើកកម្ពស់សេដ្ឋកិច្ចក្នុងតំបន់ ដែលក្រុមហ៊ុនបានបោះទីទាំងផលិតកម្ម ដោយសារវានឹងបង្កើតការងារដល់ប្រជាជន និងលើកម្ពស់កម្រិតជីវភាពមួយកម្រិតទៀត”។

អ្នកជំនាញអចលនទ្រព្យជាច្រើនទៀតបានឱ្យដឹងថា នៅក្នុងដំណាក់កាលនេះ ការវិនិយោគទៅលើរោងចក្រ ដូចជា ការទិញដីសម្រាប់សង់រោងចក្រ និងការសង់ឃ្លាំងសម្រាប់ជួលបម្រើ ក្នុងវិស័យឧស្សាហកម្មកាត់ដេរ នៅតែមានកំណើនជាក់ស្ដែង ក្រុមប្រឹក្សាអភិវឌ្ឍន៍កម្ពុជា បានចេញប្រកាសជាហូរហែពីការវិនិយោគលើវិស័យរោងចក្រនេះ។

ពួកគេបានឱ្យដឹងទៀតថា នៅក្នុងពេលនេះ វិស័យ ដែលសំខាន់សម្រាប់សេដ្ឋកិច្ចកម្ពុជា គឺនៅតែជាវិស័យឧស្សាហកម្មកាត់ដេរ ដូច្នេះរាជរដ្ឋាភិបាលបានយកចិត្តទុកដាក់និងសម្រួលដល់ការវិនិយោគសម្រាប់វិស័យនេះ និងវិស័យផ្សេងៗជាច្រើនទៀត៕

ដោយៈ វឌ្ឍនៈ

ភ្នំពេញៈ ទោះស្ថិតវិបត្តិកូវីដ១៩ ការអភិវឌ្ឍលំនៅឋាននៅក្នុងប្រទេសកម្ពុជា នៅតែបន្តសកម្មភាពដោយរលូន ក្នុងនោះដែរអ្នកវិនិយោគក្នុងស្រុកមួយចំនួន បាននិងកំពុងសម្លឹងមើលពីសក្ដានុពលអភិវឌ្ឍន៍លំនៅឋានតម្លៃខ្ពស់ (រាប់លានដុល្លារអាមេរិក) សម្រាប់ផ្ដល់ជូនអតិថិជននៅក្នុងប្រទេសកម្ពុជា។

អ្នកអភិវឌ្ឍន៍លំនៅឋានពីររូបនៅកម្ពុជាបានប្រកាសពីការអភិវឌ្ឍលំនៅឋានតម្លៃរាប់លាននៅជាយរាជធានីភ្នំពេញ ក្នុងនោះ មានអ្នកឧកញ៉ាឡេង ណាវ៉ាត្រា និងលោកឧកញ៉ាបណ្ឌិត គីមហ៊ាង។ វិនិយោគិនទាំងពីររូបនេះត្រូវបានគេស្គាល់ជាអ្នកអភិវឌ្ឍន៍លំនៅឋាននៅក្នុងប្រទេសកម្ពុជា និងមានការគាំទ្រពីអតិថិជនជាច្រើនផងដែរ។

នៅលើបណ្ដាញសង្គមរបស់លោកឧកញ៉ាបណ្ឌិតគីមហ៊ាង បានសរសេរលោកចង់អភិវឌ្ឍន៍លំនៅឋានលក្ខណៈជាភូមិគ្រឹះ។ លោកសរសេរផ្ទះដែលត្រូវសាងសង់លើផ្ទៃដី១៥០០ម៉ែត្រការ៉េ ហើយស្ថិតនៅទីតាំងប្រមាណ៥គីឡូម៉ែត្រពីផ្សារទំនើបអ៊ីអន២ ស្ថិតនៅក្នុងតំបន់សម្រាប់អ្នកមានរស់នៅ ដោយលោកគ្រោងនឹងសង់ប្រមាណ១០ផ្ទះប៉ុណ្ណោះ ក្នុងតម្លកៃ២លានដុល្លារអាមេរិក។

កន្លងមកអ្នកឧកញ៉ាឡេង ណាវ៉ាត្រាក៏បានប្រកាសពីការអភិវឌ្ឍគម្រោងវិមាន ដែលមានតម្លៃប្រមាណជិត៣លានដុល្លារអាមេរិក មានទីតាំងស្ថិតនៅបណ្ដោយផ្លូវជាតិលេខ៦អា ដែលជាតំបន់សក្ដានុពលមួយសម្រាប់ទីផ្សារលំនៅឋាន និងជាតំបន់នៅជិតគម្រោងអភិវឌ្ឍន៍របស់រាជរដ្ឋាភិបាលជាច្រើនផងដែរ។

បើតាមលោកសំ សុខនឿន ប្រធានសមាគមអចលនទ្រព្យសកលបានលើកឡើងថា សម្រាប់ទីផ្សារលំនៅឋានតម្លៃខ្ពស់នៅកម្ពុជា ក្នុងបរិបទកូវីដ១៩នេះ គឺមិនសូវជារងផលប៉ះពាល់នោះទេ ឬស្ទើរតែមិនប៉ះពាល់តែម្ដង ខណៈទីផ្សារលំនៅឋានតម្លៃចាប់ពី៥ម៉ឺនដល់១០ម៉ឺនដុល្លារគឺមានផលប៉ះពាល់ខ្លាំងជាងគេ។

លោកបន្តថាអ្នកដែលទិញ ឬគ្រោងនឹងទិញផ្ទះតម្លៃថ្លៃៗ រាប់លានដុល្លារអាមេរិកនោះ គឺជាប្រភេទអ្នកមានដូច្នេះបើពួកគាត់ចង់ទិញហើយគឺពួកគាត់នឹងទិញ ព្រោះពួកគាត់មានលុយស្រាប់ អត់ត្រូវការខ្ចីធនាគារមកទិញផ្ទះឬក៏រំលស់នោះទេ។ លោកថា “ទីផ្សារលំនៅឋានប្រភេទនេះក្នុងបរិបទកូវីដ១៩គឺមានផលប៉ះពាល់ប្រមាណតែ៥ភាគរយប៉ុណ្ណោះ”៕