សាស្រ្តាចារ្យទួស សាភឿន: មជ្ឈមណ្ឌលពាណិជ្ជកម្មភ្លោះថៃ ប៊ុនរ៉ុងនឹងចាប់ផ្តើមសាងសង់ក្រោយបញ្ចប់ជំងឺកូវីដ

ដោយ៖ សូរិយា
ភ្នំពេញ៖ អាស៊ីជាទ្វីបមួយដែលមានការប្រកួតប្រជែងខ្លាំងទៅលើវិស័យសំណង់អគារខ្ពស់ៗ។ បើធៀបទៅនឹងទ្វីបអឺរ៉ុបឬអាមេរិក គ្រាន់តែប្រទេសចិនមួយក៏មានអគារខ្ពស់ច្រើនលើសតំបន់ទាំងនោះទៅហើយ។ មូលហេតុនេះបណ្តាលមកពី កត្តាកំណើនប្រជាជន ភាពពេញនិយម និងការឲ្យតម្លៃទៅលើអគារខ្ពស់របស់មនុស្សនៅអាស៊ី។ ស្របពេលជាមួយគ្នានេះដែរ កម្ពុជាជាប្រទេសតូចមួយដែលកំពុងរត់ប្រណាំងជាមួយប្រទេសជិតខាងលើគ្រប់វិស័យ ដូចជា វិស័យវិស្វកម្ម និងស្ថាបត្យកម្ម ជាដើម។ ប្រការនេះហើយទើបរដ្ឋាភិបាលកម្ពុជាបានអនុញ្ញាតឲ្យក្រុមហ៊ុន ថៃប៊ុនរ៉ុងគ្រុបសាងសង់អគារដ៏ខ្ពស់ស្កឹមស្កៃមានឈ្មោះថា “អគារភ្លោះមជ្ឈមណ្ឌលពាណិជ្ជកម្មថៃប៊ុនរ៉ុង”។

គម្រោងអភិវឌ្ឍន៍អគារពាណិជ្ជកម្មលំដាប់ពិភព ដែលនឹងក្លាយជាអគារខ្ពស់បំផុតនៅក្នុងតំន់អាស៊ីអាគ្នេយ៍មានឈ្មោះថា “Thai Boon Roong Twin Tower World Trade Center ឬ អគារភ្លោះមជ្ឈមណ្ឌលពាណិជ្ជកម្មថៃប៊ុនរ៉ុង” មានកម្ពស់ ៥៦៥ ម៉ែត្រ (១៣៣ ជាន់) និងមានទុនវិនិយោគ ជាង ៣ ០០០ លានដុល្លារ របស់ក្រុមហ៊ុនថៃប៊ុនរ៉ុងគ្រុប។ ផែនការនេះត្រូវបានបញ្ជូនទៅក្រសួងរៀបចំដែនដីនគរូបនីយកម្មនិងសំណង់រួចហើយនិងចាប់ផ្តើមដំណើរការ សាងសង់នៅពេលស្ថានភាពនៃជំងឺកូវីដ១៩បញ្ចប់។ នេះបើតាមការបញ្ជាក់របស់ លោក ទូស សាភឿន ប្រធានក្រុមស្ថាបត្យករនិងសំណង់ប្រចាំក្រុមហ៊ុនថៃប៊ុនរ៉ុងគ្រុប។

ប្រសិនបើការសាងសង់រួចរាល់អគារនេះនឹងក្លាយជាអគារខ្ពស់បំផុតប្រចាំតំបន់អាស៊ានដោយវាខ្ពស់ជាងអគារភ្លោះ ផេត្រូណាសរបស់ម៉ាឡេស៊ី (៤៥២ ម៉ែត្រដែលមាន ៨៨ ជាន់) អគារកាងណាំហាណូយរបស់វៀតណាម (៣៤៥ ម៉ែត្រនិង ៧៧ ជាន់) អគារម៉ាណារ៉ាតេលេខមរបស់ម៉ាឡេស៊ី (៣១០ ម៉ែត្រនិង ៥៥ ជាន់) និង អគារបាយ៉ុកថៅវើរទី២ (៣០៤ ម៉ែត្រនៅប្រទេសថៃមាន ៨៤ ជាន់)។

“អគារភ្លោះមជ្ឈមណ្ឌលពាណិជ្ជកម្មថៃប៊ុនរ៉ុង” ក៏នឹងក្លាយជាអគារខ្ពស់ជាងគេទី ៥ នៅអាស៊ីក៏ដូចជានៅលើពិភពលោកបន្ទាប់ពីអគារប៊ូជខាលីហ្វារបស់អេមីរ៉ាតអារ៉ាប់រួម (៨២៨ ម៉ែត្រ) អគារស៊ាងហៃរបស់ចិន (៦៣២ ម៉ែត្រ) សណ្ឋាគារម៉ាកការ៉ូយ៉ាល់ខ្លក់របស់អារ៉ាប៊ីសាអូឌីត (៦០១ ម៉ែត្រ) និងអគារតៃប៉ិតៃវ៉ាន់១០១ (៥០៩ ម៉ែត្រ)។

អគារភ្លោះថៃប៊ុនរ៉ុង គឺជាគម្រោងសាងសង់អគារដ៏ធំនិងខ្ពស់ ជាងគេនៅកម្ពុជាដែលគ្រោងសាងសង់លើផ្ទៃដីទំហំជាង ៥ ហិកតាទល់មុខសណ្ឋាគារនិងកាស៊ីណូណាហ្គាវើលដ៍។ មជ្ឈមណ្ឌលពាណិជ្ជកម្មនេះនឹង មានក្រឡាផ្ទៃសរុប ១,៤៧៤,៣៨៩ ម៉ែត្រការ៉េដែលរួមបញ្ចូលនូវសណ្ឋាគារ កម្រិតផ្កាយ៥ អាផាតមិន ខុនដូ ការិយាល័យលំដាប់អន្តរជាតិ ផ្សារទំនើប ភោជនីយដ្ឋាន កន្លែងគយគន់ទេសភាព និងសេវាកម្មកម្សាន្ត លំដាប់ពិភពលោកជាច្រើនទៀត។

គម្រោងនេះគឺជាការបណ្តាក់ទុនរួមគ្នារវាងក្រុមហ៊ុនថៃប៊ុនរ៉ុងគ្រុបនិងក្រុមហ៊ុនស៊ុនឃៀនអាយភីគ្រុបដែលជាអ្នកម៉ៅការជនជាតិចិនហើយគេរំពឹងថាវានឹងចំណាយពេល ៣ ឆ្នាំដើម្បីបញ្ចប់ការសាងសង់។ កាលពីពេលកន្លងទៅលោក ទូស សាភឿនបានលើកឡើងថា ការសិក្សាអំពីប្លង់បច្ចេកទេសដូចជាការសាងសង់ ជញ្ជាំងទប់ការពារកុំឱ្យបាក់ដី ការពារជម្រាបទឹកនៃគម្រោងអគារពាណិជ្ជកម្មលំដាប់ពិភពលោក អគារភ្លោះថៃប៊ុនរ៉ុង បានបញ្ចប់រួចរាល់ហើយដោយក្រុមហ៊ុនរង់ចាំពេលវិបត្តិជំងឺរាតត្បាតកូវីដ១៩បិទបញ្ចប់តែប៉ុណ្ណោះដើម្បីចាប់ផ្តើមសាងសង់។

លោក ថ្លែងថា “យើងមិនទាន់ប្រាកដថាការសាងសង់នឹងចាប់ផ្តើមនៅពេលណាទេដោយយើងរង់ចាំមើលថាជំងឺរាតត្បាតនេះនឹងចប់នៅពេលណា? ខណៈ អ្វីៗបានត្រៀមរួចរាល់ហើយ។” នៅលើបណ្តាញសង្គមផ្លូវការកាលពីពេលកន្លងទៅលោក ទូស សាភឿនបានសរសេរថា “មហាគម្រោង នេះនឹងមិនមានអ្វីប្រែប្រួលទេ គម្រោងប្លង់ បច្ចេកទេសបានគូរបញ្ចប់ ១០០ ភាគរយចំណែកជញ្ជាំងទប់ដី ការពារបាក់ដី ការពារជម្រាបទឹកទន្លេជម្រៅ ២៦ ម៉ែត្រ ក៏បានចាក់បេតុងបញ្ចប់រួចរាល់ ១០០ ភាគរយហើយ “។

លោកបន្ថែមទៀតថា “នៅពេលនេះក្រុមការងារសាងសង់ និងក្រុមការងារផ្នែកបច្ចេកទេសផ្សេងៗក៏បានត្រៀមខ្លួន រៀបចំរួចរាល់ផងដែរ ដោយនៅរង់ចាំតែឱកាសល្អ និងការបញ្ចប់ស្ថានការណ៍អួអាប់ដោយសារជំងឺកូវីដ គម្រោងនេះនឹងចាប់ផ្តើមហើយក្រោមការដាក់ចេញផែនការ និងបទបញ្ជាយ៉ាងម៉ឺងម៉ាត់ ពីអ្នកឧកញ៉ា អគ្គនាយកក្រុមហ៊ុនថៃ ប៊ុនរ៉ុង។”

លោក ទូស សាភឿនធ្លាប់បានប្រាប់ថាអគារភ្លោះថៃប៊ុនរ៉ុង នឹងក្លាយជា មោទនភាព និងជាកិត្យានុភាពសម្រាប់កម្ពុជាលើឆាកអន្តរជាតិ និង មុខមាត់ប្រទេសជាតិ ដែលជាប្រទេសធ្លាប់មានអរិយធម៌ ខ្ពង់ខ្ពស់។ អគារនេះមិនត្រឹមតែជាមោទនភាពសម្រាប់កម្ពុជាប៉ុណ្ណោះទេ ប៉ុន្តែវា នឹងទាក់ទាញក្រុមហ៊ុនលំដាប់អន្តរជាតិធំៗ ឱ្យចូលមកប្រទេសកម្ពុជា កាន់តែច្រើនថែមទៀត។

លោកទូស សាភឿនបានថ្លែងថា “មិនមែនប្រទេសទាំងអស់សុទ្ធតែមានសមត្ថភាព កសាងអគារធំបែបនេះបានទេ ជួនកាលគេមានលុយតែមិនប្រាកដថា អាចសាងសង់បាននោះឡើយ។”

ក្រុមហ៊ុនអាមេរិកធំៗមានសុទិដ្ឋិនិយមចំពោះការវិនិយោគនៅក្នុងប្រទេសកម្ពុជា

ដោយ ៖ លក្ខិណា
ភ្នំពេញ ៖ ស្របពេលរាជរដ្ឋាភិបាលកម្ពុជាបានប្រកាសពីការបើកប្រទេសបើកសង្គម សេដ្ឋកិច្ចឡើងវិញបណ្ដាអាជីវករក្នុងស្រុកក៏ដូចជាវិនិយោគិនបរទេសក៏រំពឹងថាបង្កើនល្បឿនរបស់ខ្លួនឡើងវិញ ក្នុងនោះវិនិយោគិនមកពីអាមេរិកក៏បានបង្ហាញសុទិដ្ឋិនិយមរបស់ខ្លួនចំពោះការវិនិយោគនៅក្នុងប្រទេសកម្ពុជាផងដែរ ។
នៅក្នុងជំនួបជាមួយលោកប៉ាន សូរស័ក្តិរដ្ឋមន្ត្រីក្រសួងពាណិជ្ជកម្មកម្ពុជាកាលពីថ្ងៃទី១ វិច្ឆិកា២០២១នេះ លោក Amb Michalak អនុប្រធានជាន់ខ្ពស់និងជានាយកគ្រប់គ្រងប្រចាំតំបន់ នៃក្រុមប្រឹក្សាធុរកិច្ចសហរដ្ឋអាមេរិក-អាស៊ាន បានឱ្យដឹងថា លោកសូមសាទរចំពោះកម្ពុជា ដែលទទួលបានជោគជ័យក្នុងការចាក់វ៉ាក់សាំង និងការបើកសកម្មភាពសេដ្ឋកិច្ច សង្គមឡើងវិញ ហើយក្រុមហ៊ុនអាមេរិកក៏បានសម្ដែងនូវសុទិដ្ឋិនិយមក្នុងការបន្តការវិនិយោគ និងពង្រីកអាជីវកម្មរបស់ពួកគេនៅក្នុងប្រទេសកម្ពុជា ជាពិសេសនោះ គឺជួយគាំទ្រក្នុងការស្ដារសេដ្ឋកិច្ចកម្ពុជាឡើងវិញ ក្រោយជំងឺកូវីដ១៩ ត្រូវបានបញ្ចប់ និងការគាំទ្រកម្ពុជាជាប្រធានអាស៊ានឆ្នាំ ២០២២ខាងមុខ ។
លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មក៏បានលើកឡើងពីភាពជោគជ័យក្នុងយុទ្ធនាការចាក់វ៉ាក់សាំងកូវីដ១៩ ជូនប្រជាជនកម្ពុជា និងការត្រៀមខ្លួនលើការបើកសកម្មភាពសេដ្ឋកិច្ច និងសង្គមឡើងវិញ ។ បន្ថែមពីនេះទៀត លោកបានលើកឡើងពីសក្ដានុពលពាណិជ្ជកម្មកម្ពុជា អាមេរិក ដែលបានបន្តកើនឡើងទោះក្នុងវិបត្តិកូវីដ១៩ក្ដី ជាក់ស្ដែងក្នុងរយៈពេល៨ខែដើមឆ្នាំ២០២១នេះ ទំហំពាណិជ្ជកម្មសរុបមានចំនួនជាង៥,៥ពាន់លានដុល្លារអាមេរិក ដែលកើនឡើងប្រមាណ២៨,៤៦ភាគរយ បើធៀបនឹង៨ខែដើមឆ្នាំ២០២០កន្លងទៅនេះ ។
លោកក៏បានបង្ហាញពីវឌ្ឍនភាពនៃកំណែទម្រង់ស៊ីជម្រៅរបស់រាជរដ្ឋាភិបាលកម្ពុជា ទាំងក្នុងក្របខ័ណ្ឌស្ថាប័ននិងគតិយុត្តិ ព្រមទាំងគោលនយោបាយផ្សេងៗដើម្បីស្ដារនិងជំរុញសេដ្ឋកិច្ចកម្ពុជាដែលមានដូចជា ក្របខ័ណ្ឌគោលនយោបាយសេដ្ឋកិច្ច និងសង្គមឌីជីលថលកម្ពុជា ឆ្នាំ២០២១-២០៣៥ ច្បាប់ស្ដីពីពាណិជ្ជកម្មតាមប្រព័ន្ធ អេឡិចត្រូនិក ច្បាប់ស្ដីពីការការពារអ្នកប្រើប្រាស់ ច្បាប់ស្ដីពីការប្រកួតប្រជែង មុខងារ និងតួនាទីរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំពិសេសគឺការយកចិត្តទុកដាក់ដល់ការការពារកម្មសិទ្ធិបញ្ញា ។
កន្លងមកមានក្រុមហ៊ុនអាមេរិចដែលបានចូលមកវិនិយោគក្នុងប្រទេសកម្ពុជាជាច្រើនដូចជា Century 21 Cambodia, ERA Cambodia, KW Cambodia, Coca Cola, Pizza Hut, Ford, King Burger ជាដើម។
លោកបានមានប្រសាន៍ថា កម្ពុជាក៏បានចុះហត្ថលេខាលើកិច្ចព្រមព្រៀងពាណិជ្ជកម្មសេរីកម្ពុជា-ចិនកាលពីឆ្នាំមុន និងបានចុះហត្ថលេខាលើកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ កាលពីថ្ងៃទី២៦ តុលា២០២១ រួមទាំងសមាជិកភាពរបស់កម្ពុជានៅក្នុងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់RCEP ផងដែរ ។
អ្នកវិនិយោគិននិងធុរជនក្នុងស្រុកហាក់បង្ហាញពីសុទិដ្ឋិនិយមរបស់ខ្លួនចំពោះការបើកប្រទេសឡើងវិញរបស់កម្ពុជា ដែលអាចធ្វើឱ្យវិនិយោគិនបរទេសចូលមកបណ្ដាក់ទុនវិនិយោគឡើងវិញ ធ្វើឱ្យសេដ្ឋកិច្ចកម្ពុជាមានសកម្មភាពនិងកំណើនឡើងវិញផងដែរ៕

ក្រុមហ៊ុនបច្ចេកវិទ្យាយក្ស Yahoo ចាកចេញពីប្រទេសចិន គ្មានថ្ងៃត្រលប់ ក្រោយ Microsoft ចាកចេញ

សុខុម

សៀងហៃ: ក្រុមហ៊ុនផ្ដល់សេវាអ៊ីនធឺណិត Yahoo ប្រកាសថា ខ្លួនបានឈប់ផ្ដល់សេវាកម្មរបស់ខ្លួនដល់ប្រទេសចិន ហើយ ហើយវាជាក្រុមហ៊ុនបច្ចេកវិទ្យាលោកខាងលិចទី២ ហើយដែលបានចាកចេញពីប្រទេសចិន ក្នុងប៉ុន្មានសប្តាហ៍ចុងក្រោយនេះ។ នេះបើយោងតាមសារព័ត៌មាន The Edge Markets ចុះផ្សាយនៅថ្ងៃពុធ ទី៣ វិច្ឆិកា នេះ។

យោងតាមសេចក្តីថ្លែងការណ៍មួយផ្សាយលើគេហទំព័ររបស់ខ្លួន ដែលបានបង្វែរទិសដៅអ្នកប្រើប្រាស់ Yahoo និង AOL Mail ទៅកាន់តំណភ្ជាប់ (Link) ផ្សេងៗទៀតឱ្យដឹងថា ក្រុមហ៊ុន Yahoo បានបញ្ឈប់ការផ្តល់មាតិកាព័ត៌មានសម្រាប់អ្នកប្រើប្រាស់នៅក្នុងប្រទេសចិន ចាប់ពីថ្ងៃទី០១ វិច្ឆិកា តទៅ។

អ្នកនាំពាក្យក្រុមហ៊ុន Yahoo ដែលបានឈានជើងចូលប្រទេសចិន ក្នុងឆ្នាំ១៩៩៨ បានប្រាប់ទីភ្នាក់ងារព័ត៌មាន Reuters តាមរយៈអ៊ីម៉េលកាលពីថ្ងៃអង្គារ ទី០២ វិច្ឆិកា ថា “ដោយទទួលស្គាល់ថា អាជីវកម្មមានការប្រកួតប្រជែងកាន់តែខ្លាំង ហើយបរិយាកាសច្បាប់កាន់តែលំបាក ក្រុមហ៊ុន Yahoo នឹងឈប់ផ្ដល់សេវាកម្មដល់ប្រទេសចិន នៅត្រឹមថ្ងៃទី០១ វិច្ឆិកា តទៅ”។

អ្នកនាំដដែលបានបន្ថែមទៀតថា “ក្រុមហ៊ុន Yahoo នៅតែប្តេជ្ញាគោរពសិទ្ធិអ្នកប្រើប្រាស់របស់យើង និងផ្ដល់សេវាអ៊ីនធឺណិតដែលមានលក្ខណៈសេរី និងបើកចំហ។ យើងសូមថ្លែងអំណរគុណចំពោះអ្នកប្រើប្រាស់របស់យើងសម្រាប់ការគាំទ្រ”។

ចំណាត់ការរបស់ក្រុមហ៊ុន Yahoo ធ្វើឡើង បន្ទាប់ពីក្រុមហ៊ុន Microsoft Corp បានផ្ដាច់បណ្ដាញទំនាក់ទំនងសង្គមសម្រាប់អ្នកអាជីព LinkedIn នៅក្នុងប្រទេសចិន កាលពីខែមុន ហើយ LinkedIn បានលើកហេតុផលថា ការបិទនេះបណ្ដាលមកពី “បរិយាកាសប្រតិបត្តិការកាន់តែលំបាក និងលក្ខខណ្ឌអនុលោមភាពកាន់តែច្រើននៅក្នុងប្រទេសចិន”។

ការចាកចេញរបស់ក្រុមហ៊ុន Yahoo ធ្វើឡើងនៅពេលដែលរដ្ឋាភិបាលក្រុងប៉េកាំង បានដាក់ចេញវិធានការបង្ក្រាបថ្មីៗលើបណ្ដាក្រុមហ៊ុនអ៊ីនធឺណិតលើចំណុចមួយចំនួន រាប់ចាប់ពីមាតិកាព័ត៌មានរហូតដល់សិទ្ធិឯកជនភាពរបស់អតិថិជន ព្រមទាំងច្បាប់ថ្មីៗផងដែរ។ ច្បាប់ថ្មីស្ដីពីការការពារព័ត៌មានផ្ទាល់ខ្លួនរបស់ប្រទេសចិន ដែលត្រូវបានបង្កើតឡើងដើម្បីការពារសិទ្ធិឯកជនភាពជុំវិញទិន្នន័យអ្នកប្រើប្រាស់អ៊ីនធឺណិត បានចូលជាធរមានកាលពីថ្ងៃច័ន្ទ ដើមសប្ដាហ៍នេះ៕ The Edge Markets៕

បើគ្មានការវិនិយោគពីប្រទេសទេ វិស័យអចលនទ្រព្យកម្ពុជាមិនអាចងើបឡើងលឿនទេទោះបីរដ្ឋាភិបាលប្រកាសបើកប្រទេសក្ដី

ដោយៈវឌ្ឍនៈ

ភ្នំពេញៈ ចាប់តាំងពីកម្ពុជាបានជួបប្រទះនឹងវិបត្តិកូវីដ១៩ ក្នុងឆ្នាំ២០២០កន្លងទៅការវិនិយោគរបស់វិនិយោគិនបរទេស នៅក្នុងប្រទេសកម្ពុជាចាប់ផ្ដើមធ្លាក់ចុះបន្តិចម្ដងៗ ដែលធ្វើវិស័យមួយចំនួនបានធ្លាក់ចុះ ទៅតាមនោះជាពិសេសក្នុងវិស័យអចលនទ្រព្យ ក៏ឃើញថាថមថយសកម្មភាពច្រើនដែរក្នុងវិបត្តិនោះ។

ប៉ុន្តែថ្មីៗនេះរដ្ឋាភិបាលកម្ពុជា ក៏បានប្រកាសបើកប្រទេសឡើងវិញ ជាបន្តបន្ទាប់ ដែលធ្វើឱ្យសកម្មភាព នៃការវិនិយោគនិងអាជីវកម្មត្រូវរំពឹងថា នឹងមានកំណើន តែសម្រា​ប់អចលនទ្រព្យវិញ ត្រូវបានអ្នកជំនាញលើកឡើងថា បើគ្មានការវិនិយោគពីបរទេសទេ វាពិបាកនឹងងើបឡើងឬមានសន្ទុះលឿននោះទេ។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជាបានមានប្រសាសន៍នៅក្នុងសន្និសីទសារព័ត៌មានស្ដីពី ការរៀបចំសមាជលើកទី២៣ នៃសមា​គមអ្នកវាយតម្លៃអចលនវត្ថុអាស៊ាន កាលពីថ្ងៃទី៣ វិច្ឆិកា២០២១នេះឱ្យដឹងថា ទោះបីជាកម្ពុជា បានបើកប្រទេសឡើងវិញ បើកសង្គមសេដ្ឋកិច្ចឡើងវិញមែន ប៉ុន្តែបើសិនជាគ្មានការចូលរួមវិនិយោគពីបរទេសទេ នោះវិស័យអចលនទ្រព្យនៅក្នុងប្រទេសកម្ពុជា ក៏នឹងពិបាកស្ទុះល្បឿនលឿនផងដែរ ។

លោកបន្តថា “វិស័យអចលនទ្រព្យនៅក្នុងប្រទេសកម្ពុជា នៅតែពឹងផ្អែកលើវិនិយោ​គិនបរទេស ដែលចូលមកបណ្ដាក់ទុន ជាកស្ដែងនៅក្នុងពេលបច្ចុប្បន្ននេះ គម្រោងធំៗជាច្រើន គឺជាគម្រោងក្រោមការវិនិយោគរបស់វិនិយោគិនបរទេស”។

លោកបន្ថែមថា សម្រាប់ឆ្នាំ២០២១នេះ លោកមិនទាន់រំពឹងពីការហូរចូលនៃវិនិយោគិនបរទេសចូលមកកម្ពុជានោះទេ ប៉ុន្តែលោកជឿថា នៅឆ្នាំ២០២២ជាពិសេសនៅក្រោយពិធីបុណ្យចូលឆ្នាំចិន កំណើនវិនិយោគិនបរទេសនឹងហូរចូលមកកម្ពុជា ជាបន្តបន្ទាប់ជាពិសេសវិនិយោគិនមកពីប្រទេសចិន ឬជប៉ុនជាដើម ។

អ្នកជំនាញវិស័យអចលនទ្រព្យផ្សេងទៀត ក៏បានលើកឡើងស្រដៀងនឹងលោកច្រឹកសុខនីមដែរថា វិស័យអចលនទ្រព្យកម្ពុជា បច្ចុប្បន្ននេះ ត្រូវពឹងទៅលើវិនិយោគិនបរទេស ក៏ប៉ុន្តែក្នុងពេលមានវិបត្តិនៃកូវីដ១៩នេះ វិនិយោគិនក្នុងស្រុកគឺមានតួនាទីសំខាន់ ក្នុងវិស័យអចលនទ្រព្យ និងបណ្ដាក់ទុនជាបន្តបន្ទាប់ នៅក្នុងវិស័យអចលនទ្រព្យជាពិសេសគម្រោងលំនៅឋាន ។

លោកឌឹត ចណ្ណាអគ្គនាយកក្រុមហ៊ុនអចលនទ្រព្យឡាក់គី រៀលធីក៏បានលើកឡើងផងដែរថា ឆ្នាំ២០២១នេះទោះបីជាកម្ពុជា បានបើកប្រទេសឡើងវិញមែន ប៉ុន្តែកំណើនវិនិយោគិនបរទេសចូលកម្ពុជា ប្រហែលជាមិនទាន់មានច្រើននោះទេ តែសម្រាប់ឆ្នាំ២០២២ខាងមុខ លោកជឿថាស្ថានភាពកូវីដ១៩ លើពិភពលោកនឹងធូរស្រាល ហើយវិនិយោគិនបរទេសកាន់តែច្រើន នឹងចូលមកស្វែងរកការវិនិយោគ នៅក្នុងប្រទេសកម្ពុជា ជាបន្តបន្ទាប់ ៕

លោកលី សុខឆាយ  និងក្រុមហ៊ុនសេដ្ឋីចិនអនុម័តថវិកា១០លានដុល្លារសហការជាមួយក្រុមហ៊ុនថៃ ប៊ុនរ៉ុងលើការផលិតស៊ីម៉ងត៍

         ដោយៈគង់ សូរិយា

         ភ្នំពេញៈ អគ្គនាយកក្រុមហ៊ុនLSCG លោកលី សុខឆាយបានអនុម័តទុនវិនិយោគចំនួន១០លានដុល្លារអាមេរិក សម្រាប់ស្វែងរកឱកាសហការណ៍ជាមួយក្រុមហ៊ុនថៃ ប៊ុនរ៉ុងដើម្បីបង្កើនផលិតភាពរោងចក្រស៊ីម៉ងត៍។

លោកលី សុខឆាយបានមានប្រសាសន៍ឲ្យដឹង តាមបណ្តាញតេឡេក្រាមនារសៀលថ្ងៃទី៣  ខែវិច្ឆិការនេះថា លោកនិងសេដ្ឋីចិនបានសហការគ្នា ដើម្បីចូលរួមជាមួយក្រុមហ៊ុនផលិតស៊ីម៉ងត៍ នៃក្រុមហ៊ុនថៃ ប៊ុនរ៉ុង ដើម្បីបង្កើនការផលិតស៊ីម៉ងត៍ សេវាកម្ម  គុណភាព  ក្នុងន័យឆ្លើយតបនឹងកំណើននៃតម្រូវការក្នុងស្រុក ដោយសារវិស័យសំណង់កម្ពុជាកំពុងមានភាពរីកចម្រើន និងធ្វើឲ្យមានតម្រូវការស៊ីម៉ងត៍កាន់តែច្រើន។

បច្ចុប្បន្នកម្ពុជាមានរោងចក្រផលិតស៊ីម៉ងត៍កាន់តែច្រើន ដែលឆ្លើយតបនឹងតម្រូវការក្នុងស្រុក ពិសេសបានចូលរួមកាត់បន្ថយការពឹងផ្អែក ការនាំចូលស៊ីម៉ងត៍ពីប្រទេសជិតខាងផងដែរ៕

ម៉ាឡេស៊ីស្នើឱ្យកម្ពុជា ក្នុងឋានៈជាប្រធានប្ដូរវេនអាស៊ាន រក្សាទុកបេសកជនពិសេសចាស់ដែលប្រចាំនៅមីយ៉ាន់ម៉ា

ដោយៈសុខុម

ភ្នំពេញ: ប្រទេសម៉ាឡេស៊ីបានស្នើឱ្យកម្ពុជា ក្នុងឋានៈជាប្រធានប្ដូរវេនអាស៊ាន ដែលនឹងចូលកាន់តំណែងនៅឆ្នាំក្រោយ រក្សាទុកមុខតំណែង និងការតាំងតែងលោក Erywan Yusof អនុរដ្ឋមន្ត្រីការបរទេសព្រុយណេ ជាបេសកជនពិសេសរបស់អាស៊ាន ប្រចាំនៅមីយ៉ាន់ម៉ា ឱ្យនៅដដែល។ នេះបើយោងតាមសារព័ត៌មាន The Edge Markets ដែលបានចុះផ្សាយកាលពីថ្ងៃទី២ វិច្ឆិកា។

លោក Datuk Saifuddin Abdullah រដ្ឋមន្ត្រីការបរទេសម៉ាឡេស៊ីបានថ្លែងថា វាចាំបាច់ណាស់ ដែលលេខាធិការដ្ឋានអាស៊ាន គួររក្សាទុកមុខតំណងរបស់លោក Erywan Yusof ដើម្បីជួយសម្រួលដល់កិច្ចខិតខំប្រឹងប្រែង និងការងារជាបន្ត ជាពិសេសនៅក្នុងការបញ្ចប់អំពើហិង្សា ក្នុងប្រទេសមីយ៉ាន់ម៉ា និងបើកកិច្ចចរចារវាងក្រុមមេដឹកនាំយោធា និងក្រុមប្រឆាំង។

លោកបានបន្ថែមទៀតថា “ការរាប់បញ្ចូលមេដឹកនាំស៊ីវិល គឺលោកស្រី អ៊ុង សានស៊ូជី ក្នុងជំនួបចរចាទាំងនេះ គឺមានសារៈសំខាន់ណាស់ ដើម្បីឆ្ពោះទៅរកការដោះស្រាយបញ្ហានានា ដែលកំពុងកើតមានឡើងនៅក្នុងប្រទេសមីយ៉ាន់ម៉ា”។

លោកបញ្ជាក់ថា អគ្គលេខាធិការនៃក្រសួងការបរទេស ក៏បានជូនដំណឹងមកកម្ពុជា ក្នុងឋានៈជាប្រធានប្តូរវេនអាស៊ាន ដើម្បីកោះប្រជុំក្រុមមន្ត្រីជាន់ខ្ពស់អាស៊ាន សម្រាប់បើកកិច្ចពិភាក្សាបន្ថែមអំពីជំហានបន្ទាប់ ដែលត្រូវធ្វើជុំវិញបញ្ហាប្រទេសមីយ៉ាន់ម៉ា។

រដ្ឋមន្ត្រីការបរទេសរូបនេះបានបន្ថែមថា រដ្ឋាភិបាលយោធារបស់មីយ៉ាន់ម៉ា ក៏ត្រូវធានាសុវត្ថិភាព សម្រាប់ក្រុមអ្នកស្ម័គ្រចិត្ត ដែលកំពុងផ្តល់ជំនួយមនុស្សធម៌ ឱ្យចូលជួយប្រជាជនក្នុងប្រទេសមីយ៉ាន់ម៉ាផងដែរ។

កិច្ចប្រជុំកំពូលអាស៊ាន លើកទី៣៨ និងលើកទី៣៩ ដែលបានបញ្ចប់កាលពីថ្ងៃព្រហស្បតិ៍ ទី២៨ តុលា បានកោះប្រជុំដោយគ្មានវត្តមាន មេដឹកនាំប្រទេសមីយ៉ាន់ម៉ា បន្ទាប់ពីរបបយោធាមីយ៉ាន់ម៉ា មិនព្រមបញ្ជូនតំណាង ដែលមិនមែនជាអ្នកនយោបាយ ឱ្យមកចូលរួមកិច្ចប្រជុំ ដោយសារក្រុមឧត្តមសេនីយ៍កំពូលៗរបស់ខ្លួន មិនត្រូវបានអនុ​ញ្ញាតឱ្យចូលរួមក្នុងកិច្ចប្រជុំទាំងនេះ។

ក្នុងចំណាត់ការដ៏គួរឱ្យភ្ញាក់ផ្អើល មិនធ្លាប់មានកាលពីថ្ងៃទី១៥ តុលា ក្រុមរដ្ឋមន្ត្រីការបរទេសអាស៊ាន បានសម្រេចរារាំងមេដឹកនាំយោធាមីយ៉ាន់ម៉ា គឺលោក Min Aung Hlaing ដែលបានផ្តួលរំលំរដ្ឋាភិបាលស៊ីវិលនៅថ្ងៃទី១ ខែកុម្ភៈ ដើមឆ្នាំនេះមិនឱ្យចូលរួមកិច្ចប្រជុំកំពូលប្រចាំឆ្នាំរបស់អាស៊ាន ដោយសារតែលោកមិនសូវមានសកម្មភាពចូលរួមនៅក្នុងការអនុវត្តកុងសង់ស៊ីស៥ចំណុច (Five-Point Consensus) ដើម្បីឆ្ពោះទៅរកការបញ្ចប់វិបត្តិនយោបាយ ដែលបង្កឡើងដោយរដ្ឋប្រហារ៕ The Edge Markets៕

លោកជុំ កុសលៈកម្ពុជាមិនមែនជាប្រទេសអ្នកមានទេ ប៉ុន្តែមេដឹកនាំកម្ពុជាជាអ្នកមានគំនិតនិងចក្ខុវិស័យ

ដោយៈគង់ សូរិយា

ភ្នំពេញៈ រដ្ឋលេខាធិការក្រសួងព៌ត លោកជុំ កុសលមានបានមានប្រសាសន៍ថា កម្ពុជាមិនមែនជាប្រទេសអ្នកមានទេ ប៉ុន្តែមេដឹកនាំកម្ពុជាគឺជាអ្នកមាន ។ ប្រសិនបើមេដឹកនាំកម្ពុជាមិនមានទេ ជីវិតប្រជាជនប្រាកដជាត្រូវបានមេរោគកូវីដ១៩ ឆក់យកច្រើនជាងនេះ ។

លោកជុំ កុសល ដែលជាទីប្រឹក្សាផ្ទាល់សម្តេចតេជោហ៊ុន សែននាយករដ្ឋមន្រ្តីនៃកម្ពុជាផងដែរនោះ បានសរសេរលើបណ្តាញទំនាក់ទំនងសង្គម របស់លោកកាលពីថ្ងៃទី២ វិច្ឆិកាកន្លងមកថា ភាពមានរបស់មេដឹកនាំកម្ពុជាគឺ ការមានគំនិត មានចក្ខុវិស័យ មានយុទ្ធសាស្ត្រ មានគោលនយោបាយច្បាស់លាស់ និងទទួលខុសត្រូវខ្ពស់ក្នុងការចាត់ចែងវ៉ាក់សាំង ដើម្បីចាក់ជូនប្រជាជនបានទាន់ពេលវេលា និងគ្រប់ចំនួន ហើយបានបោះជំហានដើរលឿនជាងបណ្តាប្រទេសធំៗ អ្នកមានមួយចំនួននៅលើលោកថែមទៀតផង។

លោកបន្តថា បច្ចុប្បន្នកម្ពុជា បានចាប់ផ្តើមបើកឲ្យដំណើរការសេដ្ឋកិច្ចឡើងវិញក្រោយពីបានស្រោចវ៉ាក់សាំងពេញលេញ ដោយផ្សាភ្ជាប់របៀបរស់នៅតាមគន្លងថ្មីជាមួយរោគកូវីដ១៩។ ប្រជាជនកម្ពុជា ក៏ដូចជាជនបរទេស ដែលរស់នៅប្រកបការងារក្នុងកម្ពុជាបានថ្លែងអំណរគុណ និងកោតសរសើរដល់សម្តេចអគ្គមហាសេនាបតីតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា ដែលបានដោះស្រាយបញ្ហាវ៉ាក់សាំងបានយ៉ាងល្អបំផុតក្នុងស្ថានភាពដ៏លំបាកបំផុតដូចគ្នា។

លោកជុំ កុសលក៏បានផ្តល់នូវកិត្តិយសជាឧត្តមទីប្រឹក្សា ជាឋានៈខ្ពស់បំផុតរបស់គេហទំព័រ Propertyarea.asia ផងដែរ៕

កូរ៉េខាងត្បូង គ្រោងវិនិយោគ៥.៤០០លានដុល្លារអាមេរិក ដើម្បីបង្កើតមជ្ឈមណ្ឌល ផលិតវ៉ាក់សាំងកូវីដ-១៩លំដាប់ពិភពលោក

ដោយៈសុខុម

សេអ៊ូល: នាយករដ្ឋមន្ត្រីកូរ៉េខាងត្បូង លោក Kim Boo-kyum បានលើកឡើងកាលពីថ្ងៃអង្គារ ទី២ វិច្ឆិកា ថា វិស័យឯកជនរបស់ប្រទេសលោក គ្រោងបោះទុនវិនិយោគក្នុងទំហំទឹកប្រាក់រហូតដល់ទៅ៦,៣ទ្រីលានវ៉ុន (៥,៤ពាន់លានដុល្លារអាមេរិក) លើការផលិត និងចែកចាយវ៉ាក់សាំងកូវីដ-១៩ នៅត្រឹមឆ្នាំ២០២៤។

យោងតាមការចុះផ្សាយរបស់សារព័ត៌មាន CNA ឱ្យដឹងថា គម្រោងបោះទុនវិនិយោគ ក្នុងទំហំទឹកប្រាក់យ៉ាងច្រើនសន្ធឹកសន្ធាប់នេះបានធ្វើឡើង ស្របពេលប្រទេសនេះ កំពុងស្វះស្វែងធ្វើយ៉ាងណាឱ្យក្លាយខ្លួន ជាមហាអំណាចពិភពលោកផ្នែកផលិតវ៉ាក់សាំង។

ប្រទេសកូរ៉េខាងត្បូង ទទួលបានកិច្ចព្រមព្រៀងរួចទៅហើយ សម្រាប់ការផលិតវ៉ាក់សាំងកូវីដ-១៩ ចំនួន៣ប្រភេទ ដែលអភិវឌ្ឍដោយក្រុមហ៊ុន AstraZeneca ក្រុមហ៊ុន Novavax និងប្រទេសរុស្ស៊ី។ ប្រទេសនេះក៏មានកិច្ចព្រមព្រៀងច្រកដប និងវេចខ្ចប់វ៉ាក់សាំងកូវីដ-១៩ ជាមួយក្រុមហ៊ុន Moderna ផងដែរ។

ទិន្នន័យរបស់រដ្ឋាភិបាលបង្ហាញថា ផែនការវិនិយោគនេះ រួមមាន ការចំណាយ ៣,៦ពាន់លានដុល្លារអាមេរិក ដោយក្រុមហ៊ុន Samsung BioLogics និង១,៥ទ្រីលានវ៉ុន (១,២៧ពាន់លានដុល្លារអាមេរិក) ដោយដោយក្រុមហ៊ុនផលិតឱសថ Celltion ផងដែរ។

ប្រធានាធិបតីកួរ៉េខាងត្បូង លោក Moon Jae-in កាលពីខែឧសភា បានបង្ហាញផែនការរបស់លោក ដែលចង់ប្រែក្លាយប្រទេសកូរ៉េខាងត្បូង ឱ្យក្លាយជាមជ្ឈមណ្ឌលផលិតវ៉ាក់សាំងពិភពលោក បន្ទាប់ពីព្រមព្រៀងជាមួយប្រធានាធិបតីអាមេរិក លោក ចៃ បៃឌិន លើការចាប់ដៃគូសហការ ដែលនឹងច្របាច់បញ្ចូលគ្នា នូវជំនាញឯកទេសរបស់សហរដ្ឋអាមេរិក និងសមត្ថភាពផលិតរបស់កូរ៉េខាងត្បូង។

កាលពីខែសីហា ប្រធានាធិបតី Moon Jae-in បានលើកឡើងថា លោកនឹងកំណត់យកវ៉ាក់សាំងកូវីដ-១៩ ជាបច្ចេកវិទ្យាមួយ ក្នុងចំណោមបច្ចេកវិទ្យាយុទ្ធសាស្ត្រជាតិចំនួន៣ រួមជាមួយការផលិតបន្ទះឈីប និងអាគុយ ដោយមានគោលបំណងបង្កើនការវិនិយោគ ផ្តល់ការបន្ធូរបន្ថយពន្ធ និងផ្តល់គ្រឿងលើកទឹកចិត្តផ្សេងៗទៀត ដើម្បីជួយក្រុមហ៊ុននានា៕ Reuters៕

ឧកញ៉ាគីម ហ៊ាងៈការមកដល់អ្នកវិនិយោគអចលនទ្រព្យថ្មីត្រូវការពេលវេលា

ដោយៈគង់ សូរិយា

ភ្នំពេញៈ លោកឧកញ៉ាបណ្ឌិតគីម ហ៊ាង ប្រធាន KW Cambodia បានថ្លែងថា ការមកដល់ នៃអ្នកវិនិយោគអចលនទ្រព្យថ្មីៗមកកាន់កម្ពុជា ត្រូវការពេលវេលាបន្ថែមទៀត ដែលគួររង់ចាំដល់ឆ្នាំ២០២៣។

លោកឧកញ៉ាបានមានប្រសាសន៍ឲ្យដឹងតាមទូរស័ព្ទ កាលពីថ្ងៃទី១ វិច្ឆិកាកន្លងមកថា ការសម្រេចចិត្តបើកប្រទេសឡើងវិញរបស់ប្រមុខរដ្ឋាភិបាល ជារឿងល្អ ដែលធ្វើឲ្យវិស័យសេដ្ឋកិច្ច និងអចលនទ្រព្យមានដំណើរការងើបឡើង ល្អប្រសើរបណ្តើៗឡើងវិញ នៅត្រីមាសទី៤ឆ្នាំនេះ។

លោកបន្តថា “ការពិតបើនិយាយពីត្រីមាសទី២ ទី៣ឆ្នាំនេះ វិស័យនេះស្ទើរសន្លប់ធំទៅហើយ ប៉ុន្តែចូលមកដល់ត្រីមាសទី៤នេះ យើងរំពឹងអ្វីៗនឹងមានសកម្មភាពល្អមកវិញ បណ្តើរៗ ប៉ុន្តែមិនច្រើនពេកនោះទេ”។ លោកបន្តថា “ការចាកចេញស្រួលទេ វេចបញ្ចិច តែពីរបីវ៉ាលីចេញបានហើយ តែការត្រលប់មកវិញរបស់អ្នកវិនិយោគបរទេស ជារឿងលំបាកមួយ ព្រោះពួកគេត្រូវការពេលវេលាមួយសមស្រប”។

ទាក់ទងនឹងស្ថានភាពឆ្នាំ២០២២ លោកឧកញ៉ាគីម ហ៊ាងបានមានប្រសាសន៍ពន្យល់ថា “សម្រាប់ឆ្នាំ២០២២ខាងមុខ ខ្ញុំគិតថាអ្នកវិនិយោគចាស់ៗ និងអ្នកវិនិយោគដែលរកបានផលចំណេញនៅកម្ពុជា ពួកគេនឹងត្រលប់មកវិញ ជារឿងល្អ ប៉ុន្តែអ្នកវិនិយោគថ្មីៗត្រូវការពេលវេលា”។

ទោះជាយ៉ាងណា លោករំពឹងនិងមានក្តីសង្ឃឹមសម្រាប់ឆ្នាំ២០២៣ ទោះបីជាមាន​ការបោះឆ្នោត ក៏មិនមានអ្វីគួរឲ្យបារម្ភនោះទេ ស្ថានភាពនយោយាបាយនឹងល្អប្រសើរ ដោ យសារគ្មានបក្សណាខ្លាំង មកប្រកួតប្រជែងនោះទេ៕

ដំណឹងល្អៈក្រុមហ៊ុន OCIC កំពុងសាងសង់ផ្លូវទំហំ៦០ម៉ែត្រថ្មីមួយទៀតចេញពីព្រលានយន្តហោះអន្តរជាតិភ្នំពេញថ្មី

ដោយៈសិរី ជេស៊ីកា

ភ្នំពេញៈ មន្រ្តីជាន់ខ្ពស់នៃរដ្ឋបាលខេត្តកណ្តាលបានឲ្យដឹងថា ​ហេដ្ឋារចនាសម្ព័ន្ធ​ផ្លូវ​មួយ​ខ្សែ​ប្រវែង​ជាង១០គីឡូម៉ែត្រ​ តភ្ជាប់ពីព្រលានយន្តហោះអន្តរជាតិភ្នំពេញថ្មី ​កំពុង​ស្ថាបនា ត​ភ្ជាប់​ពី​គម្រោង​ព្រលានយន្តហោះ មកកាន់​រាជធានី​ភ្នំពេញ។

អភិបាល​រង​ខេត្ត ​និង​ជា​អ្នក​នាំពាក្យ​រដ្ឋបាល​ខេត្ត​កណ្តាល​លោក នូវ ប៉េងច័ន្ទ​តារា បាន​ឲ្យដឹងតាមទូរស័ព្ទ​ថា ផ្លូវ​ថ្មីមួយ​ខ្សែ​នេះ​មាន​ទទឹង​រហូត​ដល់៦០ ម៉ែត្រ និង​ប្រវែងជាង ១០គីឡូម៉ែត្រ​ សាងសង់​ចេញ​ពី​ព្រលានយន្ត​អន្តរជាតិ​ភ្នំពេញ ​នៅ​ខេត្ត​កណ្ដាល ត​ភ្ជាប់​មក​ផ្លូវក្រវាត់ក្រុង​​ មក​តំបន់ប្រជុំជន​ក្នុង​​រាជធានី​ភ្នំពេញ។

លោក​បញ្ជាក់​​ថា “ផ្លូវ​មួយ​ខ្សែ​នេះ​សំខាន់​ណាស់ ហើយ​ក៏ជា​ខ្សែ​ផ្លូវ​មេក្នុង​គម្រោងអភិវឌ្ឍ​​​ប្រព័ន្ធ​ដឹកជញ្ជូន ​របស់​គម្រោង​ព្រលាន​យន្តហោះ​ភ្នំពេញ​ថ្មី​ ដែល​គ្រោង​ដាក់​ឲ្យ​ដំណើរការ​នៅ​ឆ្នាំ​២០២៣”។

ទោះជាយ៉ាងណា ​លោក​មិន​បាន​បញ្ជាក់​ពី​តម្លៃ​កញ្ចប់​ស្ថាបនា ​​ផ្លូវ​ថ្មីមួយខ្សែ​​នេះ ពីព្រោះ​ជា​គម្រោង​របស់​ព្រលានយន្តហោះអន្តរជាតិភ្នំពេញ ដែលវិនិយោគដោយក្រុមហ៊ុន OCIC។

ដំបូងឡើយអ្នកឧកញ៉ាពុង ឃាវសែបានប្រកាសពីការសាងសង់ស្ពានអាកាសប្រវែងជាង១០គីឡូម៉ែត្រពីព្រលានយន្តហោះថ្មី មកកាន់រាជធានីភ្នំពេញ ប៉ុន្តែតើគម្រោងនេះផ្លាស់ប្តូរមកសាងសង់ផ្លូវនេះវិញឬយ៉ាងណា យើងមិនអាចស្វែងរកការពន្យល់ពីថ្នាក់ដឹកនាំក្រុមហ៊ុននេះបាននៅឡើយទេ។

តាមផែនការរបស់​រដ្ឋាភិបាល និងក្រុមហ៊ុន OCIC ​​ប្តេជ្ញា​ឲ្យ​គម្រោង​ព្រលានយន្តហោះ​ថ្មី​ដាក់​ឲ្យ​ដំណើរការ​ឆ្នាំ​២០២៣។ ដូច្នេះ​ហេដ្ឋារចនាសម្ព័ន្ធ​សំខាន់​ណាស់។ ក្រៅ​ពី​ផ្លូវ​អាទិភាព​មួយ​ខ្សែ​ដែល​កំពុង​សាងសង់ ក៏​នឹង​មានការ​ស្ថាបនា​ផ្លូវ​ជា​ច្រើន​ខ្សែ​ទៀតប្រ ទាក់ក្រឡាគ្នា​ ដែល​នឹង​ចាយ​ថវិកា​រាប់លានដុល្លារទៀត ក្នុង​ការ​សាងសង់នាពេលខាងមុខនេះ៕