តើការវាយតម្លៃអចលនទ្រព្យស្តង់ដារមានសារៈប្រយោជន៍អ្វីខ្លះ?

ដោយៈ ប៊ី

ភ្នំពេញៈ ប្រសិនបើលោកអ្នកចង់លក់អចលនទ្រព្យរបស់អ្នក និងត្រូវការស្វែងរកតម្លៃលក់ដែលសមរម្យ នោះការប្រើប្រាស់សេវាវាយតម្លៃអចលនទ្រព្យ គឺជាជម្រើសដ៏ល្អបំផុត។

ការទិញអចលនទ្រព្យៈ នៅពេលដែលអ្នកមានចំណាប់អារម្មណ៍ក្នុងការទិញអចលនទ្រព្យថ្មី និងត្រូវការវាយតម្លៃមុននឹងទិញ អ្នកអាចរកព័ត៌មានទាំងអស់ ដែលអ្នកត្រូវការតាមរយៈ សេវាវាយតម្លៃអចលនទ្រព្យ។

ការអនុវត្តច្បាប់ពន្ធៈ ក្នុងករណីទាក់ទងនឹងការបង់ពន្ធ ការវាយតម្លៃអចលនទ្រព្យ ដោយអ្នកវាយតម្លៃគឺជាការចាំបាច់ ដើម្បីកំណត់ពីបំណុល ពន្ធដារ ដោយស្មើភាពគ្នា និងដោយបើកចំហរ

ការវាយតម្លៃអត្រានៃការជួលៈ ក្នុងស្ថានភាពដែលអ្នកចង់ជួលអចលនទ្រព្យរបស់អ្នក និង ត្រូវការកំណត់ពីតម្លៃជួលសមរម្យឲ្យសមស្របតាមគុណភាពនៃអចលនទ្រព្យរបស់អ្នក សេវា កម្មវាយតម្លៃមានសារៈសំខាន់ក្នុងការកំណត់ពីចំនួនដោយពឹងផ្អែកលើតម្លៃនៃអចលនទ្រព្យ របស់អ្នក។

ការដោះស្រាយទំនាស់ស្របច្បាប់ៈ សម្រាប់ការដោះស្រាយទំនាស់អចលនទ្រព្យ រវាងសមាជិកគ្រួសារ អ្នកដែលទើបរៀបអាពាហ៍ពិពាហ៍ លំនៅដ្ឋានមានជម្លោះ។ល។ អ្នកត្រូវ ដឹងពីតម្លៃសមរម្យនៃអចលនទ្រព្យដើម្បីបែងចែកឲ្យមានភាពស្មើគ្នា។

អ៊ីប៉ូតែក និងប្រាក់កម្ចីៈ ដើម្បីខ្ចីលុយពីធនាគារ អ្នកត្រូវផ្តល់ព័ត៌មានពីអចលនទ្រព្យរបស់អ្នក ដោយអាចធានាលើប្រាក់កម្ចីបាន។ ការវាយតម្លៃមួយដែលល្អនឹងធានាលើប្រាក់កម្ចី ឬ អ៊ីប៉ូតែកក្រោយៗទៀតរបស់អ្នក។

ការធានារ៉ាប់រងៈ នៅពេលអ្នកត្រូវតែធ្វើការតម្លៃនៃអចលនទ្រព្យរបស់អ្នកសម្រាប់គោលបំណង ដាក់ជាការធនារ៉ាប់រង គ្មានអ្វីដែលលឿនជាងជួលអ្នកផ្តល់សេវាកម្ម វាយតម្លៃអចលនទ្រព្យ ប្រកបដោយវិជ្ជាជីវៈទោះទេ។

ការបង្កើនតម្លៃនៃអចលនទ្រព្យរបស់អ្នកៈ តាមរយៈការស្វែងយល់ពីរបៀបបង្កើនតម្លៃទីផ្សារ អចលនទ្រព្យ យោងទៅតាមលក្ខខណ្ឌរបាយការណ៍នៃការវាយតម្លៃ អ្នកអាចបង្កើនលក្ខណៈ សម្បត្តិឲ្យអចលនទ្រព្យរបស់អ្នក ដើម្បីបង្កើនតម្លៃនៅពេលវាយតម្លៃពេលក្រោយ។ របាយណ៍នៃការនៃការវាយតម្លៃអនុញ្ញាតឲ្យអ្នកវិភាគពី អចលនទ្រព្យ ឬអាជីវកម្មណាមួយ ដែលទាក់ទងទៅនឹងអចលនទ្រព្យនោះ និងធ្វើឱ្យតម្លៃអចលលនទ្រព្យកើនឡើង៕

និយ័តករអាជីវកម្មអចលនវត្ថុនិងបញ្ចាំបង្ហាញLogoនិងត្រារបស់ខ្លួនផ្ទាល់ដើម្បីប្រើប្រាស់ជាផ្លូវការ

ដោយៈ ប៊ី

ភ្នំពេញៈ និយ័តករអាជីវកម្មអចលនវត្ថុ និងបញ្ចាំ នៃអាជ្ញាធរសេវាហិរញ្ញវត្ថុមិនមែនធនាគារ បានប្រកាសនូវនិមិត្តសញ្ញា (Logo) និងត្រារបស់ខ្លួនផ្ទាល់ ដើម្បីប្រើប្រាស់ជាផ្លូវការ។ នេះបើតាមសេចក្តីជូនដំណឹងនៅព្រឹកថ្ងៃទី៦ ខែសីហានេះ។

សេចក្តីជូនដំណឹងឱ្យដឹងថា យោងតាមព្រះរាជក្រមលេខ នស/រកម/ ០១២១/០០៣ ចុះថ្ងៃទី១៦ ខែមករា ឆ្នាំ២០២១ ដែលប្រកាសឱ្យប្រើច្បាប់ស្តីពីការរៀបចំ និងការប្រព្រឹត្តិទៅនៃអាជ្ញាធរ សេវាហិរញ្ញវតមិនមែនធនាគារ និងអនុក្រឹត្យលេខ ១១៣ អនក្រ.បក ចុះថ្ងៃទី ១៤ ខែកក្កដា ឆ្នាំ២០២១ ស្តីពីការរៀបចំនិងការប្រព្រឹត្ត ទៅរបស់អង្គភាពក្រោមឱវាទរបស់អាជ្ញាធរសេវាហិរញ្ញវត្ថុមិនមែនធនាគារ ការគ្រប់គ្រងអាជីវកម្មអចលនវត្ថុ បញ្ចាំ និងប្រាតិភោគដោយអនុប្បទាន របស់ក្រសួងសេដ្ឋកិច្ច និងហិរញ្ញវត្ថុ ត្រូវបានធ្វើសមាហរណកម្មទៅក្នុង អាជ្ញាធរសេវាហិរញ្ហាវត្ថុមិនមែនធនាគារក្រោមឈ្មោះថា «និយ័តអាជីវកម្មអចលនវត្ថុ និងបញ្ចាំ» ដែលដឹកនាំដោយលោក ជូ វណ្ណៈ ជាអគ្គនាយក។

និយ័តករអាជីវកម្មអចលនវត្ថុ និងបញ្ចាំ នឹងអនុវត្តមុខងារ និងភារកិច្ចរបស់ខ្លួនស្របតាមបទប្បញ្ញត្តិពាក់ព័ន្ធជាធរមាន។ យ័តករអាជីវកម្មអចលនវត្ថុ និងបញ្ចាំ ហៅកាត់ថា ន.អ.ប. មាននិមិត្តសញ្ញា (Logo) និងត្រារបស់ខ្លួនផ្ទាល់ ដើម្បីប្រើប្រាស់ជាផ្លូវការចាប់ពីពេលនេះតទៅ។

ជាមួយគ្នានេះ ដើម្បីចូលរួមទប់ស្កាត់ការរីករាលដាលនៃជំងឺកូវីដ១៩ ដែលបាននិងកំពុងបន្តការកើនឡើងនៅក្នុងប្រទេសកម្ពុជា និយ័តករអាជីវកម្មអចលនវត្ថុ និងបញ្ចាំ ស្នើសុំឲ្យស្ថាប័ន/ក្រុមហ៊ុនទាំងអស់ ដែលមានតម្រូវការផ្ញើឯកសារមកកាន់ និយ័តករអាជីវកម្មអចលនវត្ថុ និងបញ្ចាំ អាចធ្វើជា Soft Copy (ទម្រង់ PDF) មកកាន់ Telegram របស់ និយ័តករអាជីវកម្មអចលនវត្ថុ និងបញ្ចាំ៕

តើស្ថាប័នអន្តរជាតិ ឬប្រទេសមហាអំណាចមួយណាដែលជាអ្នកកំណត់អត្រាប្ដូរប្រាក់ពិភពលោក?

ដោយ សុខុម

ភ្នំពេញ: តើអ្នកទាំងអស់គ្នាធ្លាប់ងឿងឆ្ងល់អំពីហាងឆេងប្ដូរប្រាក់ដែរឬទេ? ឧបមាថានៅកម្ពុជា ហាងឆេងប្ដូរប្រាក់ឡើងចុះៗមិនទៀង ដោយប្រែប្រួលទៅតាមអត្រាប្ដូរប្រាក់លើទីផ្សារអន្តរជាតិ។ ដូចនេះតើអ្នកដឹងទេថាស្ថាប័នអន្តរជាតិ ឬប្រទេសមហាអំណាចមួយណាដែលជាអ្នកកំណត់អត្រាប្ដូរប្រាក់ពិភពលោក? តោះ មកស្វែងយល់ទាំងអស់គ្នា!

យោងតាមការចុះផ្សាយរបស់គេហទំព័រអន្តរជាតិ Britannica.com ឱ្យដឹងថា អត្រាប្ដូរប្រាក់ក្នុងប្រទេសនីមួយៗត្រូវផ្អែកទៅតាមអត្រាប្ដូរប្រាក់ដែលត្រូវបានកំណត់ជាអន្តរជាតិ។ ហើយអត្រាប្ដូរប្រាក់ទៀតសោតមាន២ប្រព័ន្ធខុសគ្នាគឺ “អត្រាប្តូរប្រាក់ថេរ” (fixed currency rate) និង “អត្រាប្តូរប្រាក់អណ្តែត” (floating exchange rate)។

“អត្រាប្តូរប្រាក់ថេរ” ប្រើប្រាស់រង្វាស់ស្តង់ដារមួយដែលផ្អែកលើមាស ឬលោហៈមានតម្លៃណាមួយផ្សេងទៀត ហើយតម្លៃរូបិយប័ណ្ណនីមួយៗត្រូវឆ្លើយតបទៅនឹងបរិមាណថេរនៃស្តង់ដារនោះ។ ជាឧទាហរណ៍នៅក្នុងឆ្នាំ១៩៦៨ ក្រសួងរតនាគារសហរដ្ឋអាមេរិក បានកំណត់ថា ខ្លួននឹងទិញលក់មាសក្នុង១អោន (Ounce) តម្លៃ៣៥ដុល្លារ។ ប្រទេសផ្សេងៗទៀតក៏បានកំណត់តម្លៃផ្ទាល់ខ្លួនសម្រាប់មាសក្នុងទម្ងន់១អោនដូចគ្នា។

“អត្រាប្តូរប្រាក់អណ្តែត” មានន័យថា រូបិយប័ណ្ណនីមួយៗមិនត្រូវបានគាំទ្រដោយមាសបម្រុងឡើយ។

អត្រាប្ដូរប្រាក់អន្តរជាតិបច្ចុប្បន្នត្រូវបានកំណត់ដោយ “អត្រាប្ដូរប្រាក់បណ្ដែតដែលមានការគ្រប់គ្រង” (managed floating exchange rate)។ “អត្រាប្ដូរប្រាក់បណ្ដែតដែលមានការគ្រប់គ្រង” មានន័យថា តម្លៃនៃរូបិយប័ណ្ណនីមួយៗប្រែប្រួលឡើងចុះទៅតាមវិធានការសេដ្ឋកិច្ចរបស់រដ្ឋាភិបាល ឬធនាគារកណ្ដាលរបស់ប្រទេសនោះ។

“អត្រាប្ដូរប្រាក់បណ្ដែតដែលមានការគ្រប់គ្រង” មិនត្រូវបានប្រើប្រាស់គ្រប់ពេលនោះទេ។ ស្តង់ដារមាសបានគ្រប់គ្រងអត្រាប្តូរប្រាក់អន្តរជាតិរហូតដល់ទសវត្សរ៍ឆ្នាំ១៩១០។ ប្រព័ន្ធស្រដៀងគ្នាមួយទៀតដែលគេហៅថា “ស្តង់ដារប្ដូរប្រាក់ផ្អែកលើហាងឆេងមាស” (gold-exchange standard) បានលេចធ្លោខ្លាំងនៅទសវត្សរ៍ឆ្នាំ១៩៣០។

ប្រព័ន្ធនេះបានអនុញ្ញាតឱ្យប្រទេសនានាគាំទ្ររូបិយប័ណ្ណរបស់ខ្លួនជាមួយនឹងរូបិយប័ណ្ណផ្សេងៗទៀតដោយផ្អែកលើស្ដង់សារមាស ប៉ុន្តែមិនមែនជាមាស ដូចជារូបិយប័ណ្ណដុល្លារអាមេរិក និងរូបិយប័ណ្ណផោន (Pound) របស់អង់គ្លេស ជាដើម។ មូលនិធិរូបិយវត្ថុអន្តរជាតិ (IMF) ដែលជាស្ថាប័នអន្តរជាតិគឺជាអ្នកទទួលខុសត្រូវរក្សាស្ថិរភាពអត្រាប្តូរប្រាក់រហូតដល់ទសវត្សរ៍ឆ្នាំ១៩៧០ ជាពេលដែលសហរដ្ឋអាមេរិក បានបញ្ចប់ការប្រើប្រាស់របស់ខ្លួននូវ “អត្រាប្តូរប្រាក់ថេរ”។

ចំនួនធនធានមាសដែលកាន់តែតិចទៅៗបានបង្ខំឱ្យសហរដ្ឋអាមេរិក បោះបង់ចោលស្តង់ដារដែលគ្រប់គ្រងដោយមាស ហើយប្រព័ន្ធរូបិយវត្ថុអន្តរជាតិក៏បានចាប់ផ្តើមផ្អែកលើរូបិយប័ណ្ណដុល្លារ និងរូបិយប័ណ្ណជាក្រដាសប្រាក់ផ្សេងទៀតផងដែរ។

រដ្ឋាភិបាលនានាអាចរក្សាស្ថិរភាពអត្រាប្ដូរប្រាក់របស់ខ្លួនតាមរយៈការនាំចូលទំនិញតិចជាងមុន និងនាំចេញទំនិញឱ្យបានច្រើនជាងមុន។ ស្រដៀងគ្នានេះដែរ រដ្ឋាភិបាលទាំងនោះអាចទម្លាក់តម្លៃរូបិយប័ណ្ណផ្សេងៗទៀតដើម្បីដំឡើងថ្លៃរូបិយប័ណ្ណរបស់ខ្លួនតាមរយៈការលក់ចេញរូបិយប័ណ្ណទាំងនោះទៅកាន់ប្រទេសផ្សេងៗ។

អត្រាប្តូរប្រាក់ដែលគ្រប់គ្រងដោយស្តង់ដារមាស និងស្ថាប័ន IMF បានជួយបន្ថែមស្ថិរភាពដល់ទីផ្សារពិភពលោក ប៉ុន្តែវាក៏មានគុណវិបត្តិរបស់វាដែរ។ ការភ្ជាប់រូបិយប័ណ្ណទៅនឹងមាសនឹងធ្វើឱ្យទីផ្សារគ្មានភាពបត់បែន ហើយអាចនាំឱ្យប្រទេសមួយមានលទ្ធភាពផ្ដាច់ខ្លួនផ្នែកសេដ្ឋកិច្ចពីការធ្វើពាណិជ្ជកម្ម។ ជាមួយនឹង “អត្រាប្តូរប្រាក់បណ្ដែតដែលមានការគ្រប់គ្រង” ប្រទេសនានាត្រូវបានជំរុញលើកទឹកចិត្តឱ្យធ្វើពាណិជ្ជកម្ម៕

ក្រុមហ៊ុន Alibaba បញ្ជាក់ថា ការសហការជាមួយក្រុមហ៊ុន Best នឹងបម្រើទីផ្សារកាន់តែប្រសើរនៅកម្ពុជា

ដោយៈ ម៉ាណេត

ភ្នំពេញៈ ក្រុមហ៊ុន Alibaba ដែលក្រុមហ៊ុនបច្ចេកវិទ្យា និងពាណិជ្ជកម្មអេឡិចត្រូនិកធំបំផុតរបស់ចិន បានបញ្ជាក់ថា ការសហការជាមួយក្រុមហ៊ុន Best នឹងបម្រើទីផ្សារកាន់តែប្រសើរនៅកម្ពុជា ថៃ និងវៀតណាម បន្ទាប់ក្រុមហ៊ុនយក្សមួយទទួលបានការរីកចម្រើនកាន់តែខ្លាំងនៅក្នុងប្រទេសខ្លួន និងលើពិភពលោក។

ចប្ចុប្បន្នក្រុមហ៊ុនយក្សរបស់ចិនគឺស្ថិតក្នុងដំណាក់កាលថ្មីនៃការពង្រីកវត្តមាននៅលើពិភពលោក ដោយសារនាពេលកន្លងមក ក្រុមហ៊ុន Alibaba ត្រូវបានគេរិះគន់ថាផ្តោតតែលើអាជីវកម្មនៅប្រទេសចិន នៅក្នុងវិធីសាស្រ្តអាជីវកម្មរបស់ខ្លួន។ នេះបើយោងតាមការចេញផ្សាយរបស់គេទំព័រ EMarketer នៅថ្ងៃទី៦ ខែសីហា ឆ្នាំ២០២១

ឥឡូវនេះ ដោយសារការរីកចម្រើនយ៉ាងខ្លាំងនៃក្រុមហ៊ុនពាណិជ្ជកម្មអេឡិចត្រូនិក Lazada របស់ខ្លួន នៅអាស៊ីអាគ្នេយ៍ និងក្រុមហ៊ុន AliExpress នៅអឺរ៉ុប ជាពិសេសជាងមួយភាគប្រាំនៃអ្នកទិញរបស់ខ្លួនមានមូលដ្ឋាននៅបរទេស។

លើសពីនេះទៀត នៅក្នុងត្រីមាសមិថុនា “អ្នកប្រើប្រាស់សកម្ម” ទូទាំងពិភពលោកនៅក្នុងប្រព័ន្ធអេកូឡូស៊ីរបស់ក្រុមហ៊ុន Alibaba បានកើនឡើង៤៥លាននាក់ពីត្រីមាសមុន ដល់១,១៨ពាន់លាននាក់ ស្មើនឹង៧៧,២% (៩១២ លាននាក់) ដែលមានមូលដ្ឋាននៅប្រទេសចិន។

គេហទំព័រខាងលើ បានឱ្យដឹងដូច្នេះថា “កំណើននេះបានជំរុញឱ្យក្រុមហ៊ុន Alibaba ធ្វើការវិនិយោគអន្តរជាតិសំខាន់ៗ រួមទាំងភាពជាដៃគូដែលបានប្រកាសនាពេលថ្មីៗនេះរវាងក្រុមហ៊ុន Best ដែលផ្តល់ដំណោះស្រាយខ្សែសង្វាក់ផ្គត់ផ្គង់ដ៏ឆ្លាតវៃ និងអ្នកផ្តល់សេវាកម្មភស្តុភារ និង Cainiao ដែលជាក្រុមហ៊ុនបុត្រសម្ព័ន្ធភស្តុភាររបស់Alibaba ។ ភាពជាដៃគូនេះមានគោលបំណងបម្រើទីផ្សារឱ្យកាន់តែប្រសើរនៅកម្ពុជា ថៃ និងវៀតណាម”។

លោក Au Yeong Shong Kwong ប្រធានផ្នែកដឹកជញ្ជូនឆ្លងកាត់ព្រំដែនសិង្ហបុរី និងម៉ាឡេស៊ី នៃក្រុមហ៊ុន Cainiao Network បានឱ្យដឹងថា “ដើម្បីឆ្លើយតបទៅនឹងតម្រូវការនិងតម្រូវការរបស់អ្នកប្រើប្រាស់ យើងបានបង្កើតសេវាកម្មដឹកជញ្ចូនអេឡិចត្រូនិកចិន-អាស៊ីអាគ្នេយ៍ដោយផ្ទាល់ ដែលបង្ហាញពីការផ្តោតជាយុទ្ធសាស្ត្ររបស់យើងនៅក្នុងតំបន់ជាមួយនឹងការបើកដំណើរការចុងក្រោយរបស់យើងចូលទៅក្នុងប្រទេសថៃ វៀតណាម និងកម្ពុជា និងភាពជាដៃគូជាមួយក្រុមហ៊ុន BEST គោលដៅគឺដើម្បីផ្តល់ជូនបទពិសោធន៍អតិថិជនល្អប្រសើរដល់អ្នកប្រើប្រាស់នៅតំបន់អាស៊ីអាគ្នេយ៍”៕

បណ្តាក្រុមហ៊ុននៅតំបន់អាស៊ីអាស៊ីហ្វិកបានបង្ហាញការចំណាយខ្ពស់លើការ ជួលអាគារបៃតង

អាគារការិល័យថ្មីដ៏ស្កឹមស្កៃរបស់ធនាគារហត្ថានឹងបញ្ចប់នៅត្រីមាសទី១ឆ្នាំ២០២៤

ដោយៈគង់ ម៉ាលីនណា

ភ្នំពេញៈ អាគារការិយាល័យកណ្តាលថ្មីរបស់ធនាគារហត្ថា ដ៏ស្កឹមស្កៃស្ថិតនៅលើមហាវិថីសម្តេចតេជោ នឹងបញ្ចប់ការសាងសង់នៅអំឡុងត្រីមាសទី១ ឆ្នាំ២០២៤ខាងមុខនេះ។

ប្រធានអគ្គនាយកធនាគារហត្ថា លោកឧកញ៉ាហួត អៀងតុងបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី៦ សីហានេះថា ជាមួយនឹងការចាប់ផ្តើមសាងសង់ ការិយាល័យកណ្តាលថ្មី របស់ធនាគារហត្ថានឹងបញ្ចប់នៅខែ មិនា ឆ្នាំ២០២៤ខាងមុខនេះ។ អាគារការិយាល័យកណ្តាល ដែលមានទំហំ៤០,០០០ម៉ែត្រការ៉េនេះ នឹងប្រើប្រាស់់សំរាប់ការិយាល័យរបស់ធនាគារផ្ទាល់ ដោយមិនមានទីតាំងការិយាល័យសម្រាប់ជួលដល់ក្រុមហ៊ុនផ្សេងៗឡើយ។

លោកឧកញ៉ាបានបន្តថា “ទំហំការិយាល័យធំនេះ ច្បាស់ណាស់យើងប្រើប្រាស់មិនអស់ទេ ប៉ុន្តែវាជាការបំរ៉ុងទុកសម្រាប់ពេលអនាគត”។ លោកបន្តថា “យើងនឹងប្រើប្រាស់អាគារការិយាល័យថ្មីនេះ សំរាប់ផ្ទៃក្នុងរបស់យើង ដោយយើងមានហាងកាហ្វេ ក្លឹប ហាត់ប្រាណ និងការិយាល័យបំរើសេវាកម្មនានារបស់អតិថិជន”។

ទាក់ទងនឹងសុខភាពរបស់ធនាគារក្នុងអំឡុងវិបត្តិកូវីដ១៩នេះ លោកឧកញ៉ាហួត អៀងតុងបានមានប្រសាសន៍ឲ្យដឹងថា ក្នុងស្ថានភាពនេះ សុខភាពធនាគាររបស់យើងនៅតែមានភាពរ៉ឹងមាំ និងល្អប្រសើរ បើទោះជាយើងមិនសម្រេចបានគោលដៅ១០០ភាគរយក្តី ប៉ុន្តែយើងសម្រេចបានគោលដៅ៩៥ភាគរយ ដែលនេះជាលទ្ឋផលដ៏ល្អ ព្រោះយើងបានសម្រេចវឌ្ឍនភាពដ៏ប្រសើរ បើទោះជាប្រឈមនឹងបញ្ហាជំងឺកូវីដ១៩ក្តី៕

ការសិក្សាៈ ប្រទេសកម្ពុជាបានចាកចេញយ៉ាងលឿនពីវិបត្តិជំងឺកូវីដ១៩

ដោយៈ ម៉ាណេត

ភ្នំពេញៈ ការសិក្សាមួយ ដែលចេញផ្សាយថ្មីៗនេះ បានបញ្ជាក់ថា ប្រទេសកម្ពុជាបានចាកចេញយ៉ាងលឿនពីវិបត្តិជំងឺកូវីដ១៩ ដោយក្នុងរយៈពេលមួយខែ កម្ពុជាបានលោតឡើងចំនួន២៣ចំណាត់ថ្នាក់ ពីចំណាត់ថ្នាក់១០៥ មកត្រឹមចំណាត់ថ្នាក់៨២ នៅក្នុងសន្ទស្សន៍នៃការងើបឡើងវិញពីវិបត្តិកូវីដ-១៩។

ប្រទេសកម្ពុជាបានលោតឡើងមកចំណាត់ថ្នាក់ទី៨២ ក្នុងចំណោមប្រទេស/តំបន់ចំនួន១២០ នៅជុំវិញពិភពលោក ដោយទទួលបានពិន្ទុ៤៥.០ នៅក្នុងសន្ទស្សន៍នៃការងើបឡើងវិញពីវិបត្តិកូវីដ១៩ ដែលបង្កើតឡើងដោយស្ថាប័នសារព័ត៌មាន Nikkei របស់ជប៉ុន គិតត្រឹមថ្ងៃទី៣១ ខែកក្កដា ដែលកាលពីដើមខែដដែលនេះ កម្ពុជាស្ថិតនៅចំណាត់ថ្នាក់រហូតដល់ទី១០៥ (ពិន្ទុ៣២.០) ។

ដោយឡែកប្រទេសចិន ទទួលបានពិន្ទុខ្ពស់ជាងគេ រហូតដល់៧៤.០ បន្ទាប់មកគឺប្រទេសនូវែលសេឡង់ (៦៩.៥) និងហុងគ្រី (៦៩.០) ចំណែកឯប្រទេសជប៉ុនវិញ ស្ថិតនៅក្រោមកម្ពុជាមួយលេខ គឺនៅទី៨៣ ដោយទទួលបានពិន្ទុ ៤៤.៤។

សម្រាប់ប្រទេសដទៃទៀតដែលនៅក្នុងតំបន់អាស៊ាន សិង្ហបុរីឈរនៅលេខ៧ (៦៦.០) ឡាវលេខ ១០៣ (៣៥.៥) ហ្វីលីពីនលេខ១០៦ (៣៥.០) និងម៉ាឡេស៊ី និងឥណ្ឌូនេស៊ី នៅលេខ១១៤ដូចគ្នា (៣០.០) ខណៈដែលប្រទេសវៀតណាម និងថៃ ស្ថិតនៅបាតតារាងជាមួយនឹងពិន្ទុ ២២.០ ដូចគ្នា ។

សន្ទស្សន៍នៃការងើបឡើងវិញពីវិបត្តិកូវីដ-១៩ របស់ស្ថាប័ន Nikkei បានដាក់ពិន្ទុ និងចំណាត់ថ្នាក់ឱ្យប្រទេស/តំបន់ជាង ១២០ នៅចុងខែនីមួយៗ ដោយផ្អែកទៅលើ ការគ្រប់គ្រងការឆ្លងមេរោគ យុទ្ធនាការចាក់វ៉ាក់សាំង និងការចល័តសង្គម ។

ចំណាត់ថ្នាក់ខ្ពស់បង្ហាញថា ប្រទេស/តំបន់នោះកាន់តែឈានទៅរកការងើបឡើងវិញ ជាមួយនឹងករណីឆ្លងជំងឺកូវីដ-១៩ មានចំនួនទាប អត្រានៃការចាក់វ៉ាក់សាំងខ្ពស់និង/ឬ វិធានការគម្លាតសង្គមដែលមិនសូវតឹងរ៉ឹងដូចមុន៕

ចំណេះដឹង! តើអ្នកគួរតែជ្រើសរើសយកឈ្មួញផ្ដាច់មុខឬដៃគូរសហការនៅប្រទេសកម្ពុជា?

ដោយៈ សាវុធ

ភ្នំពេញៈ នៅពេលដែលអ្នកចាប់ផ្ដើមបើកអាជីវកម្មលើកដំបូងអ្នកប្រហែលជាគិតថាតើអ្នកគួតែក្លាយជាឈ្មួញតែម្នាក់ឯងឬមួយក៏មានដៃគូសហការ? ថ្ងៃនេះយើងមានគំនិតសំខាន់ៗមួយចំនួនជូនអ្នករាល់គ្នាអំពីវាទាំងពីរ មុននឹងសម្រេចចិត្តចិត្តចាប់ផ្ដើមបើកអាជីវកម្ម។

ឈ្មួញផ្ដាច់មុខគឺជាមនុស្សដែលធ្វើការសម្រាប់ខ្លួនឯង។ មិនមែនបានន័យថាអាជីវកម្មរបស់គេមានតែគេម្នាក់បុគ្គលិកតែម្នាក់ឯងទេ ប៉ុន្តែពួកគេអាចជួលបុគ្គលិកដទៃមកធ្វើការនៅក្រុមហ៊ុនរបស់គេបានផងដែរ។ ឈ្មួញផ្ដាច់មុខ គឺជាម្ចាស់ដែលធ្វើឲ្យមានភាពដំណើរការអាជីវកម្មដោយចូលរួមទាំងស្រុងនូវដើមទុន។

តម្រូវការរាយការណ៏វត្ថុតិចតួច: ពត៌មានអំពីឈ្មួញផ្ដាច់មុខគ្មាននណាម្នាក់អាចដឹងពីកាលបរិច្ឆេទរបស់ក្រុមហ៊ុនរបស់គេបានទេ។

ម្ចាស់មានការគ្រប់គ្រងពេញលេញ: ឈ្មួញផ្ដាច់មុខមានការគ្រប់គ្រងពេញលេញនៃអាជីវកម្មរបស់ពួកគេដូច្នេះគ្មានម្ចាស់ផ្សេងទៀតទេ។

អាចបទបែនតាមកាលៈទេសៈ: ពួកគេមិនចាំបាច់ពិភាក្សាមួយម្ចាស់ដទៃទេជាពិសេសនៅពេលស្ថានភាពបន្ទាន់កើតឡើងនោះពួកគេអាចផ្លាស់ប្ដូរបានយ៉ាងឆាប់រហ័ស។

មានលទ្ធភាពក្នុងការរកដើមទុនតិច: ឈ្មួញផ្ដាច់មុខភាគច្រើនមានការលំបាកក្នុងការរៃអង្គាសប្រាក់ដើម្បីចាប់ផ្ដើមអាជីវកម្ម។ ពួកគេអាចមានការលំបាកក្នុងការពង្រីកមុខជំនូញរបស់ពួកគេនៅថ្ងៃអនាគត។

ម្ចាស់អាជីវកម្មមានបន្ទុកខ្ពស់: នៅពេលដែលមានហេតុការណ៏ណាមួយអាក្រក់កើតឡើងជាពិសេសនៅពេលដែលជំនួញរបស់គេមានការធ្លាក់ចុះគឺមានតែម្ចាស់នោះទេដែលជាអ្នករ៉ាប់រង។

ការសម្រេចចិត្ត: ការសម្រេចចិត្តទាំងអស់ត្រូវធ្វើឡើងដោយម្ចាស់ដោយផ្ដាច់មុខតែប៉ុណ្ណោះ។ គ្មាននរណាម្នាក់អាចជួយបានទេ ដូច្នេះភាពជោគជ័យឬបរាជ័យគឺអាស្រ័យទៅលើម្ចាស់អាជីវកម្មតែមួយគត់។

ជាបន្ទាប់គឺជាការសហការជាដៃគូ(សហកម្មសិទ្ធ) វាសំដៅទៅលើក្រុមហ៊ុនដែលមានម្ចាស់ចាប់ពីរឫច្រើនធ្វើការជាមួយគ្នាសហការគ្នាដើម្បីរកប្រាក់ចំណេញ។ ភាពជាដៃគូត្រូវបានបង្កើតឡើងដោយកិច្ចសន្យា។ ពួកគេត្រូវបែងចែកប្រាក់ចំណេញដោយទទូលខុសត្រូវនៃការបែងចែកប្រាក់ខែរបស់ភាគីនីមួយៗ។

មានទុនច្រើន: ដៃគូនីមួយៗនឹងផ្ដល់មូលនិធិដល់អាជីវកម្មជាមួយដើមទុនក្នុងការចាប់ផ្ដើមអាជីវកម្ម។

ចែករំលែកទំនួលខុសត្រូវ: ដៃគូនីមួយៗប្រាកដជាមានជំនាញផ្សេងគ្នា ដូចច្នេះពួកគេអាចគ្រប់គ្រងទៅលើអ្វីដែលពួកគេមានជំនាញប្រសប់ ដូចច្នេះពួកគេអាចធ្វើបានល្អបំផុតដើម្បីទទួលបានលទ្ធផលល្អមកកាន់ក្រុមហ៊ុនរបស់គេជាក់ជាមិនខាន។

ការធ្វើការសម្រេចចិត្តយឺត: វាជាការចាំបាច់ដែលដៃគូទាំងអស់ត្រូវយល់ព្រមព្រៀងគ្នានឹងរាល់អ្វីៗដែលកំពុងធ្វើ។ នេះមានន័យថានៅក្នុងស្ថានភាពទាន់ហន់ណាមួយត្រូវតែមានឆ្លងកាត់ម្ចាស់នីមួយ ដើម្បីពិនិត្យ ដូចនេះមានសេរីភាពតិចតួចក្នុងការសម្រចចិត្ត។

ការចែករំលែកប្រាក់ចំណេញ: ដៃគូរសហការត្រូវតែចែករំលែកប្រាក់ចំណេញត្រូវតែមានភាពស្មើរគ្នាដោយផ្អែកអត្រាហ៊ុនដែលគេបានចូលរួមទិញ។ នេះអាចនាំឲ្យមានភាពមិនចុះសម្រុង ពីព្រោះថាដៃគូមួយទៀតមិនបានធ្វើការឲ្យអស់ពីសមត្តភាព ដោយដៃគូសហការមួយទៀតខិតខំប្រឹងប្រែងធ្វើការតែទទួលបានប្រាក់ស្មើគ្នាដដែល។

ខ្វែងគំនិតគ្នា: នេះគឺជារឿងអាក្រក់បំផុតមួយក្នុងការសហការជាដៃគូពីព្រោះចំនួនភាគរយនៃការខ្វែងគំនិតគ្នាមានកំរិតខ្ពស់។ ដូច្នេះវាមានការលំបាកក្នុងការទំនាក់ទំនង។

ដូចដែលអ្នកបានឃើញហើយថាមានគុណសម្បត្តិក៏ដូចជាគុណវិបត្តិក្នុងការចាប់ផ្ដើមអាជីវកម្មជាឈ្មួញផ្ដាច់មុខឬមួយក៏ដៃការសហការ។ ដូចច្នេះអ្នកសម្រេចចិត្តជ្រើសរើសអ្នកគួតែសម្រចចិត្តឲ្យច្បាស់លាស់។ ដូចច្នេះសូមកុំភ្លេចគិតឲ្យបានម៉តចត់៕

រដ្ឋាភិបាលកម្ពុជា និងក្រុមហ៊ុនអូស្ត្រាលីសហការគ្នាជំរុញការអភិវឌ្ឍវិស័យ កសិកម្មតាមបែបសរីរាង្គ

ដោយៈ ម៉ាណេត

ភ្នំពេញៈ ក្រុមហ៊ុនអូស្ត្រាលី Lexmin Pty Ltd Cambodia និងអគ្គនាយកដ្ឋានកសិកម្មកម្ពុជា បានចុះអនុស្សរណ:នៃការយោគយល់គ្នា (MOU) ដើម្បីជំរុញផលិតកម្មដំណាំស្តង់ដារសរីរាង្គ និងការពង្រឹងសមត្ថភាពកសិករ ដើម្បីទទួលបានឱកាសការងារនៅតាមបណ្តាកសិដ្ឋាននានាក្នុងប្រទេសអូស្រ្តាលី។

ការចុះ MOU ត្រូវបានធ្វើឡើង នៅថ្ងៃទី៦ ខែសីហា ឆ្នាំ២០២១ នៅទីស្តីការក្រសួងកសិកម្ម រុក្ខាប្រមាញ់ និងនេសាទ រវាក្រុមហ៊ុនអូស្ត្រាលី Lexmin Pty Ltd Cambodia និងអគ្គនាយកដ្ឋានកសិកម្ម ដែលពិធីនេះស្ថិតក្រោមអធិបតីភាពលោករដ្ឋមន្ត្រីវេង សាខុន និងលោកRobert K.Chelliah នាយកក្រុមហ៊ុន។

លោករដ្ឋមន្ត្រីបានថ្លែងថា “នេះជាសមិទ្ធផលថ្មីមួយទៀត ដែលក្រសួងសម្រេចបានក្នុងការជំរុញ និងបង្កើនផលិតភាពផលិតកម្មដំណាំស្តង់ដារសរីរាង្គ ដែលផលិតផលនេះមាននិន្នាការកើនឡើងជាបន្តបន្ទាប់ គួរឲ្យកត់សម្គាល់ទាំងបរិមាណ និងគុណភាពសម្រាប់ទីផ្សារក្នុងស្រុក និងទីផ្សារអន្តរជាតិ”។ លោកបានថ្លែងថា “ថ្ងៃនេះ ក្រុមហ៊ុនអូស្រ្តាលី Lexmin Pty Ltd Cambodia បានចាប់ដៃគូជាមួយអគ្គនាយកដ្ឋានកសិកម្ម ក្នុងគោលបំណងពង្រឹង និងពង្រីកកិច្ចសហការស៊ីជម្រៅ យូអង្វែងធ្វើការអភិវឌ្ឍវិស័យកសិកម្មសរីរាង្គកម្ពុជានៅ ពេលអនាគតដ៏ខ្លីខាងមុខ”។

ក្នុងខ្លឹមសារMOUនេះ លោករដ្ឋមន្ត្រីបានរំលេចថា វាប្រាកដជានឹងជួយបំពេញនូវអត្ថប្រយោជន៍ឲ្យគ្នាទៅវិញទៅមក ក្នុងការកសាងភាពជាដៃគូអភិវឌ្ឍន៍ ខ្សែច្រវាក់តម្លៃផលិតកម្មដំណាំ ការកែច្នៃ ប្រកបដោយចីរភាព និរន្តរភាព បរិយាប័ន្ន ការប្រកួតប្រជែង ការប្រែប្រួលអាកាសធាតុ និងនវានុវត្តន៍ និងជាពិសេសការអនុវត្ត MOU នេះ ពិតជានឹងចូលរួមចំណែកអនុវត្តផែនការយុទ្ធសាស្រ្តរបស់ក្រសួង ក្នុងការជំរុញផលិតភាព និងពិពិធកម្មដំណាំសរីរាង្គឲ្យកាន់តែល្អប្រសើរឡើង។

ក្រៅពីនេះ MOU នេះពិតជាចូលរួមលើកកម្ពស់ខ្សែច្រវាក់ ផលិតកម្មកសិកម្ម ការកែច្នៃ តម្លៃបន្ថែម និងទីផ្សារក្នុង និងក្រៅប្រទេស បង្កើតឱកាសការងារ បង្កើនសមត្ថភាពបច្ចេកទេសដល់កសិករ បង្កើនប្រាក់ចំណូល និងស្របតាមអភិក្រម “រដ្ឋ -ឯកជន-ដៃគូអភិវឌ្ឍន៍-សហគមន៍កសិកម្ម”។

លោករដ្ឋមន្ត្រីបានបន្តថា ក្រសួងកសិកម្ម រុក្ខាប្រមាញ់ និងនេសាទ បាននិងកំពុងជំរុញយន្តការអនុវត្ត ប្រព័ន្ធផលិតកម្មកសិកម្មសរីរាង្គ តាមរយៈការដាក់ចេញនូវប្រកាសពាក់ព័ន្ធចំនួន២រួមមាន ១-ប្រកាសស្តីពីវិធាននៃការអនុវត្តកសិកម្មល្អកម្ពុជា (CamGAP) ឆ្នាំ២០១០ និង២- ប្រកាសស្តីពី កសិកម្មសរីរាង្គកម្ពុជាលេខ ១៦៣ ប្រក.កសក ចុះថ្ងៃទី១៦ ខែឧសភា ឆ្នាំ២០២០ (CamOrg) ជាយន្តការបចេ្ចកទេស ក្នុងការជំរុញ និងលើកកម្ពស់ផលិតកម្មកសិកម្ម ស្របតាមស្តង់ដារគុណភាព និងសុវត្ថិភាពចំណីអាហារ។

លោកបានឱ្យដឹងទៀតថា ទទួលបានសេចក្តីប្រកាសនេះ ជាបន្តបន្ទាប់យើងឃើញមានដៃគូអភិវឌ្ឍន៍ និងគម្រោងអភិវឌ្ឍន៍ជាច្រើន បានសហការជាមួយ MAFF ក្នុងការជំរុញអនុវត្តប្រព័ន្ធផលិតកម្មសរីរាង្គ ដូចជា អង្គការ FAO, GIZ, គម្រោង ASPIRE, CASDP, LEAP, AVIP, CAVAC, CHAIN, CHQ (Cambodia Quality Horticulture) Project គាំទ្រដោយប្រទេសញូស៊ឺលែន។ល។

ដើម្បីទទួលបានជោគជ័យដូចការរំពឹងទុក លោករដ្ឋមន្ត្រីបានជូនមតិទាំងអគ្គនាយកដ្ឋានកសិកម្ម និងក្រុមហ៊ុនឲ្យសហការអនុវត្ត MOU នេះបានល្អ និងហុចប្រយោជន៍ដោយត្រង់ជូនកសិករ។ ក្រុមហ៊ុនគួរស្វែងរកដៃគូ ដែលមានសក្តានុពលផលិតដំណាំបន្ថែមទៀតក្រៅពីម្រុំ ស្លឹកគ្រៃ និងខ្ញីខ្មៅដែលក្រុមហ៊ុនកំពុងផលិត និងពង្រីកផលិតកម្មកែច្នៃជាអាហារបន្ថែមសម្រាប់សុខភាពផងដែរ។

មិនតែប៉ុណ្ណោះ ក្រុមហ៊ុនគួរតែស្វែងរកជំនួយហិរញ្ញវត្ថុបន្ថែម ពីរដ្ឋាភិបាលអូស្រ្តាលី ដើម្បីពង្រីកវិសាលភាពនៃផលិតកម្មរបស់ខ្លួន ឲ្យអស់លទ្ធភាព ប្រយោជន៍ដើម្បីជួយជំរុញ និងលើកកម្ពស់ផលិតកម្មដំណាំសរីរាង្គក្នុងស្រុក និងធ្វើការនាំចេញ។

ដោយឡែក ចំពោះជំហានទី២ នៃគម្រោងផ្តល់ឱកាសការងារជូនកសិករ ទៅបម្រើការតាមបណ្តាកសិដ្ឋាននានាក្នុងប្រទេសអូស្រ្តាលី នាពេលអនាគត លោករដ្ឋមន្ត្រីបានផ្ញើក្តីសង្ឃឹមយ៉ាងមុតមាំ ឲ្យក្រុមហ៊ុនខិតខំឲ្យអស់ពីលទ្ធភាព ក្នុងការពុះពារនាំយកពលករកម្ពុជាទៅបម្រើការក្នុងវិស័យកសិកម្ម ក្នុងប្រទេសអូស្រ្តាលីត្រឹមត្រូវ ស្របច្បាប់ ដើម្បីទទួលបានមេរៀន និងបទពិសោធន៍ល្អយកមកអភិវឌ្ឍប្រទេសឲ្យ មានការរីកចម្រើន ករណីនេះ ក្រសួងនឹងរង់ចាំផ្តល់កិច្ចសហការគ្រប់បែបយ៉ាងតាមការចាំបាច់៕

ចំណេះដឹងអចលនទ្រព្យៈហេតុផល៣យ៉ាងដែលអ្នកគួរតែទិញលំនៅឋានមុនគម្រោង

ដោយៈសហការី

ភ្នំពេញៈ នៅពេលទិញលំនៅឋានមិនថាសម្រាប់វិនិយោគ ឬសម្រាប់ការរស់នៅនោះទេ ជាទូទៅយើងតែងតែសម្លឹងមើលលើស្ថានភាពលំនៅដ្ឋាន៣ប្រភេទគឺ លំនៅឋានដែលសាងសង់រួចរាល់ លំនៅឋានកំពុងតែសាងសង់ និងលំនៅឋានមុនគម្រោងសាងសង់។

ថ្ងៃនេះយើងនឹងលើកយកនូវហេតុផលសំខាន់ៗចំនួន៣ មកបកស្រាយថាតើហេតុអ្វីបានជាអ្នកគួរតែទិញលំនៅឋានមុនគម្រោងសាងសង់។

ហេតុផលទីមួយ

ប្រសិនបើអ្នកទិញលំនៅឋានមុនគម្រោង អ្នកនឹងអាចទិញបាននៅក្នុងតម្លៃក្រោមទីផ្សារ។ ជាធម្មតាអ្នកអភិវឌ្ឍន៍នៅកម្ពុជា តែងតែត្រូវការដើមទុនបន្ថែម ដោយធ្វើយុទ្ធសាស្រ្តទីផ្សារយ៉ាងណា ដើម្បីអាចលក់ចេញនូវយូនីតមួយចំនួន ទៅកាន់វិនិយោគិនដែលចង់វិនិយោគលើវិស័យនេះក្នុងរយៈពេលខ្លី ឬវែង។

ដើម្បីទទួលបាននូវដើមទុនបន្ថែមនេះ អ្នកអភិវឌ្ឍន៍មួយចំនួននឹងលក់លំនៅឋានមុនគម្រោងសាង់សង់នៅក្នុងតម្លៃក្រោមទីផ្សារទៅកាន់អតិថិជនគោលដៅរបស់ពួកគាត់។ ដូច្នេះប្រសិនបើអ្នកចង់ទិញលំនៅឋានមុនគម្រោងសាងសង់ ក្នុងគោលបំណងវិនិយោគ ឬសម្រាប់ស្នាក់នៅនេះគឺជាឱកាសមាស ពីព្រោះថានៅពេលដែលគម្រោងត្រូវបានបញ្ចប់១០០ភាគរយ អចលនទ្រព្យរបស់អ្នកអាចនឹងឡើងថ្លៃតិច ឫច្រើនទៅតាមទីផ្សារជាក់ស្ដែង។

មូលហេតុទីពីរ

មូលហេតុដែលអ្នកគួរតែទិញលំនៅឋាន មុនគម្រោងសាងសង់នោះគឺ អ្នកអាចជ្រើសរើសយូនីតដែលអ្នកពេញចិត្តមុនគេ ដោយអាចជ្រើសយកទីតាំងល្អណាមួយ និងអាចធ្វើការតុបតែងជាច្រើនផ្សេងទៀត។

ចុងក្រោយ អ្នកអាចទទួលបានលក្ខខណ្ឌបង់ប្រាក់ងាយស្រួល ជាមួយអត្រាការប្រាក់ទាបពីម្ចាស់គម្រោង នៅពេលដែលអ្នកទិញលំនៅឋានមុនគម្រោងសាងសង់នេះ។ ទោះបីជាយ៉ាងណាក៏ដោយ ការទិញលំនៅឋានមុនគម្រោងសាងសង់នេះ ក៏អាចមានហានិភ័យផងដែរ។

ប្រសិនបើម្ចាស់គម្រោងអភិវឌ្ឍមិនមានកេរ្តិ៍ឈ្មោះល្អ ក្នុងការសាងសង់គម្រោងពីមុនមកទេ និងមិនមានប្រភពទុនច្បាស់លាស់ វាអាចបណ្ដាលអោយគម្រោងត្រូវជាប់គាំង ឬលុបចោលទាំងស្រុង។

ដូច្នេះ មុននឹងសម្រេចទិញលំនៅឋានមុនគម្រោងសាង់សង់ អ្នកគួរតែសិក្សាស្វែងយល់អំពីម្ចាស់គម្រោងអភិវឌ្ឍនោះ ឱ្យបានច្បាស់លាស់ជាមុនសិនអំពីប្រភពទុន អាជ្ញាប័ណ្ណ ឬលិខិតអនុញ្ញាតការសាងសង់ជាដើម។ ប្រសិនបើលោកអ្នកមិនចង់ខាតបង់ក្នុងការវិនិយោគលើគម្រោងណាមួយ លោកអ្នកអាចស្វែងរកភ្នាក់ងារអចលទ្រព្យ ឫក្រុមហ៊ុនអចលនទ្រព្យណាមួយ តាមរយៈគេហទំព័រអចលនទ្រព្យដែលនាំមុខគេនៅកម្ពុជា ដើម្បីប្រឹក្សាយោបល់ និងជួយលោក អ្នកក្នុងការជ្រើសរើសគម្រោង ដែលអាចជឿទុកចិត្តបាន៕

ប្រភព៖ Harbor Property

សិង្ហបុរី នឹងស្វាគមន៍វត្តមានសណ្ឋាគារប្រណីតថ្មីមួយទៀតនៅឆ្នាំ២០២៣

ដោយៈសុខុម

សិង្ហបុរី: យោងតាមសារព័ត៌មាន CNA ចុះផ្សាយនៅថ្ងៃទី៦ សីហា នេះឱ្យដឹងថា ប្រទេសសិង្ហបុរីនឹងស្វាគមន៍វត្តមានសណ្ឋាគារប្រណីត បែបអភិជនថ្មីមួយនៅឆ្នាំ២០២៣ ខាងមុខនេះ។

ម៉ាកយីហោសណ្ឋាគារប៊ូទិកដ៏ល្បីល្បាញ The Standard បានប្រកាសថា គម្រោងសណ្ឋាគារថ្មីរបស់ខ្លួនខាងលើនេះ នឹងស្ថិតនៅទីតាំងដែលមានហាងឆេងខ្ពស់ តាមប ណ្ដោយមហាវិថី Orange Grove Road ទល់មុខសណ្ឋាគារប្រណីតShangri-La Singapore។

សណ្ឋាគារនេះ នឹងត្រូវរចនាឡើងតាមខន់សិប (Concept) របស់ The Standard ទាំងស្រុងមិនថា អាហារ & ភេសជ្ជៈ និងកម្មវិធីសិល្បៈ & វប្បធម៌ រួមជាមួយអាងហែលទឹកគ្មានគែម (Infinity Pool) និងបារជាប់មាត់អាងទឹក ដែលត្រូវបានហ៊ុមព័ទ្ធដោយទីធ្លាលម្អដោយរុក្ខជាតិខៀវស្រងាត់លំដាប់អភិជនដ៏គួរឱ្យទាក់ទាញ។

គម្រោងសណ្ឋាគារនេះ ស្ថិតក្នុងចំណោមសណ្ឋាគារតែមួយចំនួនតូចប៉ុណ្ណោះ ដែលត្រូវបានសាងសង់ឡើង ពីជាន់ផ្ទាល់ដីឡើងទៅលើ នៅតាមបណ្ដោយដងវិថី Orange Grove Road។ ទីតាំងសណ្ឋាគារថ្មីនេះ ស្ថិតនៅកៀកនឹងឧទ្យាន Singapore Botanic Gardens ដែលអ្នកដើរតែមួយភ្លែតដល់។

ម៉ាកយីហោសណ្ឋាគារThe Standard ត្រូវបានបង្កើតឡើងនៅក្រុង West Hollywood រដ្ឋកាលីហ្វ័រញ៉ា សហរដ្ឋអាមេរិក ក្នុងឆ្នាំ១៩៩៩ ហើយបានពង្រីកខ្លួនទៅកាន់ក្រុងមួយចំនួនទៀតរបស់សហរដ្ឋអាមេរិក ដូចជា ទីក្រុងញូវយ៉ក និងក្រុងម៉ៃអាមី (Miami) ព្រមទាំងទីក្រុងឡុងដ៍ នៃប្រទេសអង់គ្លេស ហើយពេលនេះកំពុងតែពង្រីកខ្លួនមកកាន់ទីក្រុងសំខាន់ៗនៅតំបន់អាស៊ីអាគ្នេយ៍។

តួយ៉ាង គម្រោងសណ្ឋាគារThe Standard, Hua Hin នៅហួហ៊ីន (Hua Hin) ប្រទេសថៃ គម្រោងបើកសម្ពោធនៅខែវិច្ឆិកា ឆ្នាំ២០២១ ចំណែកឯគម្រោងសណ្ឋាគារ The Standard, Bangkok Mahanakhon នៅក្រុងបាងកក គ្រោងបើកសម្ពោធនៅក្នុងឆ្នាំ២០២២។

លោក Amar Lalvani នាយកប្រតិបត្តិក្រុមហ៊ុន Standard International បានថ្លែងថា “សិង្ហបុរី ជារដ្ឋបុរី (ប្រទេសមានតែក្រុង) ដ៏មានសក្ដានុពល និងមានវប្បធម៌សម្បូរបែបដែលត្រៀមខ្លួនជាស្រេច ដើម្បីទទួលយកភាពច្នៃប្រឌិត និងបែបផែនរបស់ The Standard។ លោកបន្តថា “សិង្ហបុរី បានក្លាយជាមជ្ឈមណ្ឌល ដ៏មានសារៈសំខាន់ និងប្រកបដោយភាពច្នៃប្រឌិត មិនគួរឱ្យជឿនៅអាស៊ី ហើយយើងពិតជារំភើបរករាយណាស់ចំពោះការអភិវឌ្ឍនេះ”។

គម្រោងសណ្ឋាគារ The Standard Singapore នឹងត្រូវទទួលអភិវឌ្ឍដោយ Invictus Developments ជាក្រុមហ៊ុនវិនិយោគលើសណ្ឋាគារប៊ូទិក ដែលកាន់កាប់ដោយគ្រួសាររបស់អ្នកជំនួញឥណ្ឌូនេស៊ី ឈ្មោះ Bachtiar Karim៕

1...1,8001,8011,802...3,264 Page 1,801 of 3,264