ដោយៈ ម៉ាណេត

ភ្នំពេញៈ កម្ពុជាទទួលបានចំណូលដុល ចំនួន៧២៦,៩៤លានដុល្លារសហរដ្ឋអាមេរិក ពីការនាំចេញស្រូវអង្ករ ខណៈការនាំចេញអង្ករក្នុងខែទីមួយ នៃឆមាសទី២ ឆ្នាំ២០២១ ចាប់ផ្តើមរើបឡើងបន្តិច។ នេះបើតាមសេចក្តីប្រកាសព័ត៌មានរបស់សហព័ន្ធស្រូវអង្ករកម្ពុជា។

សហព័ន្ធបានឱ្យដឹងថា ជារួមការនាំចេញអង្ករសរុប ក្នុងរយៈពេល៧ខែ ឆ្នាំ២០២១ បានចំនួន៣០៩៨៦៥ តោន គិតជាទឹកប្រាក់ចំនួន២២៣.៨៥លានដុល្លាសហរដ្ឋអាមេរិក ហើយការនាំចេញស្រូវបានចំនួនជាង២លានតោន គិតជាទឹកប្រាក់ចំនួនជាង៥០៣.០៩លានដុល្លារសហរដ្ឋអាមេរិក។

ជាមួយគ្នានេះ សហព័ន្ធបានឱ្យដឹងថា ការនាំចេញអង្ករក្នុងខែទីមួយ នៃឆមាសទី២ ឆ្នាំ២០២១ ចាប់ផ្តើមងើបឡើងបន្តិច ខណៈរយៈពេល៧ខែ កម្ពុជានាំចេញអង្ករបាន៣០ម៉ឺនតោនទទួលចំណូល២២៣លានដុល្លារ។

សហព័ន្ធស្រូវអង្ករបានឱ្យថា ក្នុងខែកក្កដា ឆ្នាំ២០២១នេះ ការនាំចេញអង្កររបស់កម្ពុជា បានចំនួន២៩,៤១៥ តោនគិតជាទឹកប្រាក់ចំនួន២១.១៨លានដុល្លារ មានការកើនឡើងចំនួន៣.៥៣% បើធៀបទៅនឹងបរិមាណនាំចេញ ក្នុងខែកក្កដា ឆ្នាំ២០២០ ឬ កើន ១១.១០% បើធៀបទៅបរិមាណនាំចេញក្នុងខែកក្កដា ឆ្នាំ២០១៩។

ទោះបីជា ស្ថានភាពនៃកង្វះទូកុងតែន័រនៅតែបន្ត តម្លៃកប៉ាល់ទៅកាន់ទីផ្សារនៅក្នុងសហគមន៍អ៊ឺរ៉ុបនៅតែបន្តឡើងថ្លៃ តែស្ថានភាពទីផ្សារតម្រូវបានជំរុញ ឱ្យការនាំចេញអង្ករកម្ពុជា ចាប់ផ្តើមដំណើរការ ជាពិសេសការបំពេញការនាំចេញ លើកិច្ចសន្យាដែលខកខាន ឬពន្យារពេលកន្លងមក។

សម្រាប់ខែកក្កដានេះ ការនាំចេញអង្ករក្រអូបប្រណិតបានចំនួន៤៥% អង្ករក្រអូបធម្មតា( សែនក្រអូប) ៣៥%, អង្ករស បាយទន់១៧% ហើយអង្ករចំហុយបានចំនួន៣% ដែលអង្ករទាំងនោះចំនួន៣៦.២១% ទៅកាន់សហគមន៍អឺរ៉ុប ៣៦.១៣%នាំទៅកាន់ប្រទេសចិន ៧.៨៨%ទៅកាន់ទីផ្សារសហគមន៍អាស៊ាន និង ១៩.៧៩%ទៅកាន់ទីផ្សារផ្សេងៗចំនួន ២២ គោលដៅដូចជា ហ្កាប៊ុង អូស្ត្រាលី អង់គ្លេស ញ៉ូហ្សេលេន..ជាដើម។

សម្រាប់ការនាំចេញស្រូវ ជាពិសេសស្រូវប្រាំង ដែលបាននិងកំពុងប្រមូលផល ក្នុងខែកក្កដា នេះបានចំនួន៣២៥,៤២៨តោន គិតជាទឹកប្រាក់ចំនួនប្រមាណ៧៨លានដុល្លាសហរដ្ឋអាមេរិក។ ការនាំចេញស្រូវក្នុងខែកក្កដា ឆ្នាំ២០២១ នេះមានការកើនឡើងគួរឱ្យកត់សំគាល់ ទោះបីជាមានការរាំងស្ទះខ្លះ ដោយសាវិធានការសុវត្ថិភាពប្រឆាំងកូវីដ១៩ នៅតាមព្រំដែនជាមួយប្រទេសវៀតណាម ត្រូវបានរឹតបន្តឹងក៏ដោយ។

ប្រទេសកម្ពុជាបាន និងកំពុងប្រមូលផលស្រូវប្រាំងជុំទី២ ចន្លោះពីខែកក្កដា ដល់ខែកញ្ញា ឆ្នាំ២០២១ លើផ្ទៃដី៥៦៣,៣៩៤ហិកតា ហើយរំពឹងនឹងទទួលបានទិន្នផល ប្រមាណ២.៨២លានតោន៕

ដោយ សុជាតា

ភ្នំពេញៈ សាជីវកម្មហិរញ្ញវត្ថុ HSBC បានព្យាករណ៍ពីកំណើនប្រាក់ចំណេញនៅឆមាសទីមួយ កើនឡើង ទ្វេដង រហូតដល់ជាង៧ពាន់លានដុល្លារ ដោយសារកំណើនការទិញភាគហ៊ុនត្រឡប់មកវិញ ស្របពេលដែលបំណុលអាក្រក់ កើតឡើងដោយសារវិបត្តិ Covid 19 ។

ដោយសារតែមានប្រសើរឡើង នូវសកម្មភាពសេដ្ឋកិច្ច នៅទីផ្សារហិរញ្ញវត្ថុធំបំផុតៗចំនួនពីរទីក្រុងហុងកុង និងចក្រភពអង់គ្លេស បានធ្វើអោយសាជីវកម្មហិរញ្ញវត្ថុ HSBC បានប្រាក់ចំណេញមុនបង់ពន្ធប្រមាណ១០ ពាន់ ៨រយលានដុល្លារ ពោលគឺកើនឡើងទ្វេរដងពី៤៣០០លានដុល្លារនៅរយៈពេលដូចគ្នាកាលពីឆ្នាំមុន។

ចំពោះប្រាក់ចំណូលបានធ្លាក់ចុះ៤ភាគរយ ដោយសារបរិយាកាសអត្រាប្រាក់ទាប ជាពិសេសនៅទីផ្សារអាស៊ី និង ដំណើរការទាបនៃធនាគារវិនិយោគ។

បើតាមលោក ណូអែល ធ្យូអ៊ីន (notel Quinn) នាយកប្រតិបត្តិធនាគារ HSBC បានប្រាប់រ៉យទ័រថា កំណើនប្រាក់ចំណេញនេះ បណ្តាលមកពីការគ្រប់គ្រងអតិថិជន ដែលមានទ្រព្យសម្បត្តិច្រើននិង កើនឡើងពីបង្វែរធនធានធនាគារវិនិយោគ ពីទីផ្សារអឺរ៉ុប និង សហរដ្ឋអាមេរិចទៅកាន់ទីផ្សារអាស៊ី។

លោក Quinn និយាយថា “ពួកយើងស្ថិតនៅពេលចាប់ផ្តើម នូវភាពប្រសើរឡើងនូវកំណើនសេដ្ឋកិច្ច យើងត្រូវការគ្រប់ចំណុចទាំងនេះ ក្លាយទៅជានិន្នាការអនាគត. ហើយលោកមិនរំពឹងទុក មានធ្លាក់ចុះនូវការវិនិយោគនៅទីផ្សារចិនទេ ដោយសារបទ ប្បញ្ញត្តិនានា សំដៅធានាបាននូវកំណើនសេដ្ឋកិច្ច សម្រាប់បច្ចេកវិទ្យា អចលនទ្រព្យ និង វិស័យឯកជន”។

លោកបញ្ជាក់បន្ថែមទៀតថា សាជីវកម្មហិរញ្ញវត្ថុបានដាក់គោលដៅ ក្នុងការទទួលសិទ្ធិនៅទីផ្សារអាស៊ី ក្រៅពីប្រទេសចិន ដោយពង្រីកទៅអាជីវកម្ម គ្រប់គ្រងទ្រព្យសម្បត្តិ រួមបញ្ចូលទាំង ធានារ៉ាប់រ៉ង និងគ្រប់គ្រងទ្រព្យសកម្ម។

សាជីវកម្មហិរញ្ញវត្ថុ HSBC បានលើកឡើងក្នុងរបាយការណ៍ថា ទស្សនៈវិស័យភ្លឺស្វាងនៃសេដ្ឋកិច្ចពិភពលោក ដែលងើបឡើងវិញ លឿនហួសពីការរំពឹងទុក ដោយរំពឹងទុកថា ឥណទានអាក្រក់ ក្រោមការព្យាករណ៍០.៣ ភាគរយទៅ០.៤ ភាគរយនៅរយៈពេលមធ្យម។

សាជីវកម្មហិរញ្ញវត្ថុ HSBC បាននិយាយថា នឹងផ្តល់ការបែងចែកភាគលាភ០.០៧ ភាគរយ ក្នុងមួយហ៊ុន​សម្រាប់រយៈពេលមួយឆមាសទីមួយ ឆ្នាំ២០២១។

លទ្ធផលកំណើនរបស់ HSBC បានបង្ហាញសុទិដ្ឋនិយមដោយប្រុងប្រយ័ត្នថា ការបន្តរាតត្បាតវីរុសកូរូណា នឹងបន្តដាក់ទម្ងន់ដល់សេដ្ឋកិច្ចសកល៕

ដោយៈលក្ខិណា

ភ្នំពេញៈ ទោះបីជាកម្ពុជាជួបវិបត្តិកូវីដ១៩ ដោយអូសបន្លាយប្រមាណជាងកន្លះឆ្នាំមកនេះក្ដី តែកម្ពុជានៅតែទទួលបានចំណូលពីពន្ធដារ និងពន្ធគយរាប់ពាន់លានដុល្លារសម្រាប់ដោះស្រាយការចំណាយរបស់ខ្លួនដដែល។

ជាក់ស្ដែងកក្នុងរយៈពេល៧ខែ​ កម្ពុជាទទួលបានចំណូលពន្ធដារ និងពន្ធគួប្រមា​ណ៣.០៦១លានដុល្លារអាមេរិក នឹងរំពឹងថាដល់ដំណាច់ឆ្នាំ២០២១នេះ កម្ពុជានឹងទទួ​លបានចំណូលពន្ធទាំងពីរ យ៉ាងហោចណាស់៥ពាន់លានដុល្លារអាមេរិក ។ នេះបើតាមប្រសាសន៍សម្ដេចតេជោហ៊ុន សែននាយករដ្ឋមន្ត្រីថ្លែងកាលថ្ងៃទី១សីហា២០២១ កន្លងទៅនេះ ។

សម្ដេចមានប្រសាសន៍ថា “ទោះបីជាចំណូលពន្ធទាំងពីរនេះ បានថយចុះបន្តិចមែនក្ដី ប៉ុន្តែចំណូលចរន្តទាំងនេះ នៅតែអាចរក្សាបានក្នុងមួយខែ ជាមធ្យម៤០០លានដុល្លារអាមេរិកដែលអាចទ្រទ្រង់ដល់ការចំណាយនានាបានទៀតផង”។

សម្ដេចមានប្រសាសន៍បន្ថែមថា ទោះបីជាកម្ពុជាបានបង្កើនការចំណាយទៅលើការទប់ស្កាត់កូវីដ១៩ ច្រើនជាងរាល់ឆ្នាំក្ដី តែកម្ពុជានៅតែប្រើប្រាស់ថវិកាសន្សំរបស់ខ្លួនដដែល ដោយមិនទាន់យកថវិកា និងមាសដែលផ្ញើនៅខាងក្រៅប្រទេស មកប្រើប្រាស់នៅឡើយទេ ហើយក៏មិនធ្វើឱ្យសេដ្ឋកិច្ចកម្ពុជា ដួលរលំនោះដែរក្នុងបរិបទកូវីដ១៩នេះ។

យ៉ាងណាក្ដីប្រមុខរដ្ឋាភិបាលទទួលស្គាល់ថា សេដ្ឋកិច្ចកម្ពុជាឆ្នាំ២០២១នេះ នឹងមិនអាចសម្រេចបាន តាមការព្យាករណ៍កាលពីចុងឆ្នាំ២០២០នោះទេ ខណៈមេរោគរាតត្បាតនេះនៅបន្តកើនឡើង ។

លោកវង្សី វិស្សុតរដ្ឋមន្ត្រី អមនាយករដ្ឋមន្ត្រី និងជារដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុក៏បានលើកឡើងថា បើសិនជាកូវីដ១៩នៅបន្តអូសបន្លាយបន្តទៀត ច្បាស់ណាស់ វានឹងប៉ះពាល់ដល់ការព្យាករសេដ្ឋកិច្ចរបស់កម្ពុជា ដែលព្យាករទុកកាលពី២០២០​មែន ខណៈវិស័យច្រើនជាច្រើន នៅតែបន្តរងផលប៉ះពាល់ពីជំងឺនេះ។

លោកបន្តថា “យ៉ាងណាក្ដី តាមរយៈចំណូលពន្ធ តាមរយៈទំហំទឹកប្រាក់នាំចេញរបស់កម្ពុជាយើងអាចនិយាយថា សេដ្ឋកិច្ចកម្ពុជានឹងមិនដួលរលំ នៅក្នុងវិបត្តិកូវីដ១៩ឡើយ”៕

ដោយៈសុខុម

អន្តរជាតិៈ “ទុនបម្រុងអន្តរជាតិ” (Foreign-exchange reserves ឬ Forex reserves)មានសារៈសំខាន់ដូចម្តេចសំរាប់សេដ្ឋកិច្ចរបស់ប្រទេសណាមួយ? តើ់អ្វីជាទុនបំរ៉ុងអន្តរជាតិ វាមានសារៈសំខាន់ដូចម្តេចដើម្បីរក្សាស្ថេរភាពម៉ាក្រូសេដ្ឋកិច្ច?។

ទុនបម្រុងអន្តរជាតិនៃប្រទេសមួយ សំដៅលើទ្រព្យសម្បត្តិ ដែលមានទទួលស្គាល់ជាអន្តរជាតិ ដែលប្រទេសមួយមាន និងត្រូវបានគ្រប់គ្រងដោយអាជ្ញាធររូបិយវត្ថុរបស់ប្រទេសនោះ។ ទុនបម្រុងអន្តរជាតិអាចមានទម្រង់ជាមាស និងរូបិយប័ណ្ណនានាដែលមូលនិធិរូបិយវត្ថុអន្តរជាតិ (IMF) ទទួលស្គាល់ជាអន្តរជាតិ ដូចជា ប្រាក់ដុលា្លរអាមេរិក ប្រាក់អឺរ៉ូ ប្រាក់ផោនអង់គ្លេស ប្រាក់យេនរបស់ជប៉ុន និងប្រាក់យ័ន របស់ចិនជាដើម។

តើកត្តាអ្វីដែលនាំឱ្យប្រទេសនីមួយៗ ប្រឹងប្រែងបង្កើនទុនបម្រុងអន្តរជាតិរបស់ខ្លួន? តើទុនបម្រុងអន្តរជាតិមានសារៈសំខាន់បែបណា សម្រាប់ស្ថិរភាពសេដ្ឋកិច្ចរបស់ប្រទេសមួយ?។

ទុនបម្រុងអន្តរជាតិពិតជាមានសារៈសំខាន់ណាស់ សម្រាប់រក្សាស្ថិរភាពសេដ្ឋកិច្ចរបស់ប្រទេសមួយ ព្រោះវាជាទុនបម្រុង ដែលគេទុកសម្រាប់ប្រើប្រាស់ ក្នុងករណីចាំបាច់ដូចជា ការផ្តល់ហិរញ្ញប្បទានដល់ជញ្ជីងទូទាត់ ក្នុងករណីមានតម្រូវការ ការធ្វើអន្តរាគមន៍លើទីផ្សារប្តូរប្រាក់ ដើម្បីគ្រប់គ្រងការប្រែប្រួលនៃអត្រាប្តូរប្រាក់ ហើយចំណុចសំខាន់មួយទៀត គឺដើម្បីរក្សាបាននូវជំនឿទុកចិត្តមកលើរូបិយវត្ថុ និងសេដ្ឋកិច្ចជាតិ។

តើការគ្រប់គ្រងទុនបម្រុងអន្តរជាតិមានការលំបាក ឬបញ្ហាប្រឈមអ្វីខ្លះ?
យោងតាមក្រុមអ្នកជំនាញខាងសេដ្ឋកិច្ចឱ្យដឹងថា ការគ្រប់គ្រងទុនបម្រុងអន្តរជាតិអាចប្រឈមនឹងហានិភ័យជាច្រើន ដូចជា ហានិភ័យទីផ្សារ ហានិភ័យសន្ទនីយភាព ហានិភ័យឥណទាន និងប្រតិបត្តិការជាដើម ហើយដើម្បីធានាបាននូវសុវត្ថិភាព និងប្រសិទ្ធភាព ការវិនិយោគទុនបម្រុងអន្តរជាតិ ត្រូវបានធ្វើឡើងដោយគោរព តាមលំដាប់អាទិភាព៖ ទី១ ការរក្សាដើមទុន ទី២ សន្ទនីយភាព និងទី៣ ចំណូល។

ម្យ៉ាងទៀត ទុនបម្រុងអន្តរជាតិ ត្រូវបានវិនិយោគដោយយកចិត្តទុកដាក់ លើគោលការណ៍បរិស្ថាន សង្គម និងអភិបាលកិច្ច ដោយមិនត្រូវបានអនុញ្ញាតឱ្យវិនិយោគលើសញ្ញាប័ណ្ណសាជីវកម្មដែលពាក់ព័ន្ធ និងការបំពុលបរិស្ថាន អាវុធជាតិផ្ទុះ និងគ្រឿងស្រវឹងឡើយ ដើម្បីបញ្ចៀសនូវហានិភ័យពាក់ព័ន្ធផ្សេងៗ ដូចជា ហានិភ័យកេរ្តិ៍ឈ្មោះជាដើម។

ប្រទេសណាដែលមានទុនបម្រុងច្រើនជាងគេបំផុតក្នុងពិភពលោក?
យោងតាមរយៈការចុះផ្សាយ កាលពីពេលថ្មីៗនេះលើគេហទំព័រ Property Area Asia ឱ្យដឹងថា មហាយក្សចិន ជាប្រទេសដែលមានទុនបម្រុងអន្តរជាតិ ច្រើនជាងគេបំផុតក្នុងពិភពលោក ជាមួយនឹងទុនបម្រុងអន្តរជាតិ រហូតដល់ទៅជាង៣,២ទ្រីលានដុល្លារអាមេរិក ដែលស្មើនឹង៣៣,១៦%នៃទុនបម្រុងអន្តរជាតិ របស់ពិភពលោកទាំងមូល គឺមិនមែនជាសហរដ្ឋអាមេរិកឡើយ។

ប្រទេសជប៉ុន ជាប់ចំណាត់ថ្នាក់លេខ២ ប្រទេសឥណ្ឌា ជាប់ចំណាត់ថ្នាក់លេខ៣ សហព័ន្ធរុស្ស៊ី ជាប់ចំណាត់ថ្នាក់លេខ៤ និងប្រទេសសិង្ហបុរី ជាប់ចំណាត់ថ្នាក់លេខ៥៕

ដោយៈម៉ាណេត

អន្តរជាតិៈ ការងើបឡើងយ៉ាងលឿននៃឥទ្ឋិពលសេដ្ឋ នយោបាយ និងយោធាចិនយ៉ាងលឿនក្នុងប៉ុន្មានទសវត្សរ៍ចុងក្រោយនេះ បានធ្វើឲ្យមេដឹកនាំពិភពលោក ពិសេសសហរដ្ឋអាមេរិកភ័យញ័រខ្លួន និងរិះរកគ្រប់វិធី ដើម្បីបង្អាក់ដំណើររបស់មហាយក្សនេះកុំឲ្យ​ឆ្ពោះទៅមុខលឿនពេក។

ជាលទ្ឋផលក្នុងរយៈពេលប៉ុន្មានឆ្នាំចុងក្រោយនេះ មេដឹកនាំអាមេរិករាប់ចាប់តាំងពី​លោកប្រធានាធិបតីបារ៉ាក់ អូបាម៉ា និងដូណាល់ ត្រាំ និងលោកប្រធានាធិបតីចូ បៃដិនតែងតែលើកឡើងជារឿយៗ ម្តងហើយម្តងទៀត ដើម្បីរិះរកវិធីទប់ទល់ឥទ្ឋិពលរបស់មហា​យក្សចិន។

តើអ្នកវិភាគពីនយោបាយ សេដ្ឋកិច្ច និងភូមិសាស្រ្តនយោបាយមើលឃើញដូចម្តេចលើបញ្ហានេះ?
ក្រុមអ្នកជំនាញបាននិយាយថា ប្រទេសចិននឹងវ៉ាដាច់សហរដ្ឋអាមេរិក ដើម្បីក្លាយជាប្រទេសមានសេដ្ឋកិច្ចធំបំផុត របស់ពិភពលោកនៅឆ្នាំ២០២៨ ដែលមានរយៈត្រឹមតែ៥ឆ្នាំ លឿនជាងការប៉ាន់ស្មានលើកមុន ដោយសារតែការស្ទុះងើបឡើងវិញពីវិបត្តិកូវិដ​១៩ របស់ប្រទេសទាំងពីរមានភាពខុសគ្នា ប៉ុន្តែវាហាក់ដូចមិនមានភាពងាយស្រួលនោះទេ សម្រាប់ចិនក្នុងការសម្រេចបានគោលដៅ ​ក្លាយមហាទាំងផ្នែកសេដ្ឋកិច្ច និងនយោ​បាយនៅលើពិភពលោក។

មជ្ឈមណ្ឌលស្រាវជ្រាវសេដ្ឋកិច្ច និងពាណិជ្ជកម្មរបស់អង់គ្លេស (CEBR) បានឱ្យដឹងនៅក្នុងរបាយការណ៍ប្រចាំឆ្នាំថា “មួយរយៈកាលមួយ ប្រធានបទដ៏សំខាន់មួយនៃសេដ្ឋកិច្ចសកលគឺការតស៊ូខាងសេដ្ឋកិច្ច និងអំណាចរវាងសហរដ្ឋអាមេរិក និងចិន”។

របាយការណ៍បានបន្តថា “វិបត្តិកូវីដ១៩ និងការឆ្លើយតបនឹងវិបត្តិសេដ្ឋកិច្ច ពិតជាបានផ្តល់ប្រយោជន៍ដល់ប្រទេសចិន”។ CEBR បានឱ្យដឹងថា “ការគ្រប់គ្រងដ៏ប៉ិនប្រសប់នៃជំងឺរាតត្បាត”របស់ប្រទេសចិន ជាមួយនឹងការបិទទ្វារប្រទេសយ៉ាងតឹងរឹង និងកំណើនសេដ្ឋកិច្ចរយៈពេលវែង នៅភាគខាងលិចប្រទេស មានន័យថា លទ្ធផលនៃសេដ្ឋកិច្ចរបស់ប្រទេសចិនមានភាពប្រសើរឡើង”។

បន្ទាប់ពីចេញរបាយការណ៍នេះ កាលពីចុងឆ្នាំ២០២០ ប្រទេសសេដ្ឋកិច្ចធំៗចំនួន៤ បានបើកកិច្ចប្រជុំលើកដំបូង អំពីភាពតានតឹងជាមួយប្រទេសចិន ដែលបង្ហាញថា វាហាក់ដូចជា ការបង្កើតកិច្ចសហកិច្ចសហប្រតិបត្តិការ ដើម្បីរាំងខ្ទប់ការហក់ឡើងរបស់ចិនទៅរកការក្លាយប្រទេសមហាសេដ្ឋកិច្ច និងនយោបាយលើពិភពលោក។

រដ្ឋាភិបាលសហរដ្ឋអាមេរិក និងឥណ្ឌាប្រកាសថា មេដឹកនាំអាមេរិក ជប៉ុន ឥណ្ឌា និងអូស្ត្រាលី បានជួបគ្នាតាមវីដេអូកាលពីពេលថ្មីៗនេះ ដែលជាកិច្ចពិភាក្សាលើកដំបូងរវាងប្រមុខរដ្ឋ នៃក្រុមប្រទេស «Quad» ខណៈភាពតានតឹងរវាងប្រទេសទាំង៤ ជាមួយចិនកំពុងតែកើនឡើង។

កាលពីខែមិថុនា ឆ្នាំមុន កងទ័ពឥណ្ឌា និងចិន បានប៉ះទង្គិចគ្នានៅតាមបណ្ដោយបន្ទាត់គ្រប់គ្រងជាក់ស្តែង (LAC) ដែលជាតំបន់ព្រំដែនមានជម្លោះ នៅជួរភ្នំហិមាល័យ បណ្ដាលឱ្យទាហានទាំងសងខាងស្លាប់ បន្ទាប់ពីការប្រយុទ្ធគ្នាដោយដៃ ដំបង និងខែល។ ក្រៅពីនេះ ចំណុចក្ដៅរវាងក្រុងប៉េកាំង និងក្រុងញូវដេលី រួមមានជម្លោះពាណិជ្ជកម្ម និងបច្ចេកវិទ្យាផងដែរ។

ប្រទេសជប៉ុន និងចិន នៅតែមានភាពតានតឹងជុំវិញ ប្រជុំកោះមានជម្លោះសេនកាគូឬតាវយូ។ ក្រុងប៉េកាំង បានបង្កើនវត្តមានរបស់នាវាឆ្មាំសមុទ្ររបស់ខ្លួន នៅជិតប្រជុំកោះសមុទ្រចិនខាងកើតមួយនេះ ដែលជាកោះគ្មានមនុស្សរស់នៅ។ រដ្ឋាភិបាលជប៉ុនក៏បានបង្ហាញការព្រួយបារម្ភចំពោះច្បាប់ចិនថ្មី ដែលអនុញ្ញាតឱ្យនាវាឆ្មាំសមុទ្រធ្វើការបាញ់ប្រហារទៅលើនាវាបរទេស។

ទំនាក់ទំនងរវាងចិន និងអូស្ត្រាលីបានធ្លាក់ចុះ បន្ទាប់ពីចិនដាក់កម្រិតលើការនាំចូលផលិតផលអូស្ត្រាលីដូចជាធ្យូងថ្ម ស្រាទំពាំងបាយជូរ សាច់គោ និងស្រូវសាលីជាដើម ខណៈពេលដែលអូស្ត្រាលី បានទាមទារឱ្យមានការបើកការស៊ើបអង្កេត រកប្រភពជំងឺកូវីដ១៩នៅចិន។

ទន្ទឹមនឹងនេះដែរ សហរដ្ឋអាមេរិក បានបង្កើនចំនួនបេសកកម្មកងទ័ពជើងទឹក និងអាកាសរបស់ខ្លួន នៅក្នុងសមុទ្រចិនខាងត្បូង និងច្រានចោលការកាន់កាប់របស់ចិនលើផ្លូវទឹកដ៏ធំនេះ។ អាមេរិកក៏បានបង្កើនការគាំទ្រ ចំពោះកោះតៃវ៉ាន់ ដែលចិនចាត់ទុកថា ជាដែនដីអធិបតេយ្យរបស់ខ្លួន។

សហរដ្ឋអាមេរិកគឺនៅសហរដ្ឋអាមេរិក។ មិនខុសពីលោកដូណាល់ ត្រាំ ប្រធានា​ធិបតីសហរដ្ឋអាមេរិកលោកចូ បៃដិន (Joe Biden) ដែលបានឡើងកាន់តំណែងមិនទាន់មួយខែផងនោះ ធ្លាប់បាននិយាយថា លោកនឹងមិនចាត់វិធានការភ្លាមៗ ដើម្បីលុបចោលកិច្ចព្រមព្រៀង ពាណិជ្ជកម្មដំណាក់កាលទី១ ដែលប្រធានាធិបតីដូណាល់ត្រាំបានចុះហត្ថលេខាជាមួយប្រទេសចិននោះទេ។

លោក Biden បាននិយាយនៅក្នុងបទសម្ភាសន៍ជាមួយកាសែតខាងលើថា “ខ្ញុំនឹងមិនចាត់វិធានការភ្លាមៗទេ ហើយការអនុវត្តដូចគ្នាចំពោះពន្ធគយ។ ខ្ញុំនឹងមិនលម្អៀងលើជំរើសរបស់ខ្ញុំទេ”។

ក្រោមកិច្ចព្រមព្រៀងនេះ ប្រទេសចិនបានយល់ព្រម បង្កើនការទិញផលិតផល និងសេវាកម្មរបស់អាមេរិក យ៉ាងតិច២០០ពាន់លានដុល្លារអាមេរិក នៅឆ្នាំ២០២០ និង២០២១។

កិច្ចព្រមព្រៀងដំណាក់កាលទី១ ដែលបានចុះហត្ថលេខាកាលពីដើមឆ្នាំនេះ ក៏នឹងបន្សល់នូវការដាក់ពន្ធ ២៥ភាគរយ លើទំនិញឧស្សាហកម្ម និងគ្រឿងបន្លាស់ចិនចំនួន២៥០ពាន់លានដុល្លារ ដែលប្រើប្រាស់ដោយក្រុមហ៊ុនផលិតអាមេរិក និងពន្ធសងសឹករបស់ចិនលើទំនិញអាមេរិកមានតម្លៃ១០០ពាន់លានដុល្លារ៕