ដោយៈគង់ សូរិយា

ព្រះសីហនុៈលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការជាតិ គ្រប់គ្រងនិងអភិវឌ្ឍ តំបន់ឆ្នេរសមុទ្រកម្ពុជា(គ.អ.ឆ.ក.) បានចុះពិនិត្យដំណើរការស្ថានីយប្រព្រឹត្តិកម្មទឹកកខ្វក់ទី១ និងទី២ និងការពិនិត្យទីតាំងសម្រាប់ស្ថាបនាស្ថានីយ៍ប្រព្រឹត្តិកម្មទឹកកខ្វក់ទី៣ ស្ថិតនៅជាប់ស្ពានពយអូរឈើទាល ដែលមានសមត្ថភាពប្រព្រឹត្តកម្មទឹកកខ្វក់ ២០,០០០ ម៉ែត្រគូបក្នុងមួយថ្ងៃ នៅខេត្តព្រះសីហនុ។

ក្នុងពិធីចុះត្រួតពិនិត្យនាថ្ងៃទី២៣ កក្កដានេះ មានការចូលរួមពីសំណាក់ លោក ថោង ខុន រដ្ឋមន្រ្តីក្រសួងទេសចរណ៍ និងជាអនុប្រធានអចិន្រ្តៃយ៍ គ.អ.ឆ.ក., លោក សាយ សំអាល់ រដ្ឋមន្រ្តីក្រសួងបរិស្ថាន និងជាអនុប្រធាន គ.អ.ឆ.ក, លោក គួច ចំរើន អភិបាលខេត្តព្រះ សីហនុ រួមទាំងមន្រ្តីជំនាញជារូបផងដែរ។

នាឱកាសនោះដែរ ឧបនាយករដ្ឋមន្ត្រី ជា សុផារ៉ា ព្រមទាំងថ្នាក់ដឹកនាំផ្សេងៗទៀត បានបន្តពិនិត្យការស្ថាបនាផ្លូវពយតាមូង និងទីតាំងស្ថាបនាបដិមាព្រះស្កន្ទទ្រង់លើក្ងោក ស្ថិតនៅចំណុចប្រសព្វត្រីកោណ។

ស្ថានីយប្រព្រឹត្តិកម្មទឹកកខ្វក់ទី១ មានសមត្ថភាព ប្រព្រឹត្តិកម្មទឹកកខ្វក់៥,២០០ម៉ែត្រគូប ក្នុង១ថ្ងៃ ឯស្ថានីយប្រព្រឹត្តិកម្មទឹកកខ្វក់ទី២ មានសមត្ថភាពប្រព្រឹត្តិកម្មទឹកកខ្វក់៧,២០០ម៉ែត្រគូបក្នុង១ថ្ងៃ។

គម្រោងសាងសង់ស្ថានីយប្រព្រឹត្តិកម្មទឹកកខ្វក់ទាំងពីរ នៅក្នុងខេត្តព្រះសីហនុនេះ ដើម្បីដោះស្រាយការបង្ហូរទឹកកខ្វក់ ចូលទៅក្នុងសមុទ្រ ដោយប្រើបច្ចេកវិទ្យាចុងក្រោយបំផុត៕

ដោយៈ ប៊ី

ភ្នំពេញៈ គម្រោងមជ្ឈមណ្ឌលណាហ្គា៣ (Naga3) ដែលជាមជ្ឈមណ្ឌលកម្សាន្តចំរុះដ៏ធំ និងល្បីល្បាញបំផុតរបស់ប្រទេសកម្ពុជា បាននិងកំពុងដំណើរការសាងសង់យ៉ាងសកម្ម ខណៈនេះគម្រោងនេះ នឹងអាចក្លាយជាអាគារខ្ពស់ជាងគេនៅកម្ពុជា បន្ទាប់ពីការសាងសង់បញ្ចប់។

យោងតាមទិដ្ឋភាពជាក់ស្តែង រហូតខែកក្កដា ឆ្នាំ២០២១ ក្រុមការងារគេហទំព័រ Propertyarea.asia បានសង្កេតឃើញថា សកម្មភាពនៅការដ្ឋានសាងសង់គម្រោងមជ្ឈមណ្ឌលណាហ្គា៣ មានភាពមមាញឹក ដោយមានគ្រឿងម៉ាស៊ីនធំៗ រាប់ចាប់ពីម៉ាស៊ីនដងស្ទួច រហូតម៉ាស៊ីនបុកគ្រឹះធំ បាននិងកំពុងដំណើរការក្នុងការសាងសង់។

នេះបញ្ជាក់ថា ទោះស្ថិតកូវីដ១៩ក៏ដោយ ក្រុមហ៊ុនណាហ្គា នៅតែបន្តការសាងសង់គម្រោងមជ្ឈមណ្ឌលណាហ្គា៣ ទៅតាមគម្រោងរបស់ខ្លួន។

ក្រុមហ៊ុនធ្លាប់បានបញ្ជាក់ថា កាលពីខែមករា ក្រុមកម្មករ បានចាប់ផ្តើមបុកគ្រឹះ សម្រាប់គម្រោងដ៏ធំមួយនេះ។ ផ្អែកលើការគម្រោងរចនា លក្ខណៈពិសេសរបស់ណាហ្គា៣នឹងជាប៉មសណ្ឋាគារកម្ពស់៧៥ជាន់។

ក្រុមហ៊ុនអភិវឌ្ឍគម្រោងនេះ បានឲ្យដឹងថា “គម្រោងនេះ នឹងក្លាយជាអាគារខ្ពស់ជាងគេ នៅកម្ពុជា នៅពេលបញ្ចប់ការសាងសង់”។

គម្រោង ដែលមានទំហំគិតជាទឹកប្រាក់ ចំនួន៣,៥ពាន់លានដុល្លារ ដែលស្ថិតនៅសង្កាត់ទន្លេបាសាក់ រាជធានីភ្នំពេញ ក៏នឹងរួមបញ្ចូលទាំងប្លុកអគារសណ្ឋាគារកម្ពស់៥២ជាន់ចំនួនពីរផងដែរ។

នៅក្នុងបរិវេណនោះ នឹងមានប្លុកវេទិកាពហុមុខងារចំនួន១៧ជាន់ (ផលិតផលរចនាបថជីវិត សួនឧទ្យានបច្ចេកវិទ្យាខ្ពស់ ការកម្សាន្ត បន្ទប់ប្រជុំ ការលើកទឹកចិត្ត មជ្ឈ​មណ្ឌលសន្និសីទ និងកន្លែងតាំងពិព័រណ៍នានា (MICE) ជាដើម)។ ជាមួយគ្នានេះដែរ ក៏មានជាន់ក្រោមដីចំនួន៤ជាន់សម្រាប់ចំណតរថយន្ត និងសេវាគាំទ្រផ្សេងៗទៀតផងដែរ​។

Naga3 នឹងបន្ថែមបន្ទប់សណ្ឋាគារ និងបន្ទប់ប្រណីតជិត៣.០០០ ទៅលើមជ្ឈម ណ្ឌលណាហ្គាវើលដ៍ ដែលមានស្រាប់ផងដែរ។ ផ្ទៃដីសរុប សម្រាប់គម្រោងមានចំនួន៥០០ ០០០ម៉ែត្រការ៉េ។ អ្នកអភិវឌ្ឍន៍ អ្នកម៉ៅការ និងអ្នករចនា សម្រាប់គម្រោងនេះ នឹងសាងសង់ ស្របតាមស្តង់ដារអន្តរជាតិ៕

ដោយៈស៊ីវ ម៉េង

ភ្នំពេញៈ គម្រោង​អភិវឌ្ឍន៍​អគារ​ពាណិជ្ជកម្ម​លំដាប់​ពិភពលោក Thai Boon Roong Twin Towers ​កម្ពស់​​៥៦៧​ម៉ែត្រ​ ស្មើនឹង១៣៣​ជាន់ និងគ្រោង​ទុន​វិនិយោគ​ជាង៣០០០​លាន​ដុល្លារ បាននិងកំពុងត្រៀមខ្លួន ដើម្បីចាប់ផ្តើមសាងសង់នាពេលខាងមុខ។

លោកសាស្រ្តាចារ្យទួស សាភឿនប្រធានក្រុមវិស្វករ គ្រប់គ្រងគំរោងនេះបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី២៣ កក្កដានេះថា រហូតមកទល់ពេលនេះ ការសាងសង់ជញ្ជាំងទប់ដី ការងារគម្រោងប្លង់ និងការងារបច្ចេកទេសដទៃៗទៀតបានបញ្ចប់ហើយ នៅរង់ចាំតែពេលវេលាចាប់ផ្តើមសាងសង់ប៉ុណ្ណោះ។

លោកសាស្រ្តាចារ្យបានបន្តថា “រហូតមកទល់ពេលនេះ ខ្ញុំមិនទាន់អាចបញ្ជាក់ពីពេលវេលាបើកការដ្ឋាននៅឡើយទេ ព្រោះបញ្ហាកូវីដដែលធ្វើឲ្យយើងមិនអាចដឹកជញ្ជូនសម្ភារៈសាងសង់មកពីប្រទេសចិនបាន”។លោកបន្តថា “គំរោងនេះមិនជាប់គាំងទេ យើងនៅតែសាងសង់ ដោយមិនមានបញ្ហាទុនសំរាប់សាងសង់ទេ ព្រោះយើងបានរៀបចំរួចរាល់ហើយ”។

ទាក់ទងនឹងប្លង់ស្ថាបត្យកម្មរបស់អាគារកប់ពពកនេះ បានផ្លាស់ប្តូរឬយ៉ាងណា លោកសាស្រ្តាចារ្យទួស សាភឿនបានបញ្ជាក់ថា “ប្លង់ស្ថាបត្យកម្មរបស់អាគារនេះ នៅដដែល មិនបានផ្លាស់ប្តូរនោះទេ”។

ប្រសិនជាសាងសង់ចប់ Thai Boon Roong Twin Towers គឺជា​គម្រោង​សាងសង់​អគារ​ដ៏ធំ និង​ខ្ពស់​ជាងគេ​នៅ​កម្ពុជា ដែល​គ្រោង​សាងសង់​លើ​ផ្ទៃដី​ទំហំ​ជាង៥​ហិកតា​ទល់មុខ​សណ្ឋាគារ និង​កាស៊ីណូ Naga World​។ មជ្ឈមណ្ឌល​ពាណិជ្ជ​កម្មនេះ​នឹង​មាន​ក្រឡា​ផ្ទៃ​សរុប១,៤លាន​ម៉ែត្រការ៉េ ដែល​រួមបញ្ចូល​នូវ​សណ្ឋាគារ​កម្រិត​ផ្កាយ​៥ អាផាតមិន​ខុនដូ ការិយាល័យ​លំដាប់​អន្តរជាតិ ផ្សារ​ទំនើប ភោជនីយដ្ឋាន កន្លែង​គយគន់​ទេសភាព និង​សេវាកម្ម​កម្សាន្ត​លំដាប់​ពិភពលោក​ជាច្រើន​ទៀត​។

លោកទួស សាភឿន បានសរសេរនៅលើ​បណ្តាញ​សង្គម​ផ្លូវការ​ កាលពី​ថ្ងៃទី​ ២១ ខែកក្កដាថa “ រយៈពេល៤​ឆ្នាំ​កន្លង​ទៅហើយ ​មាន​មិត្តភក្តិ​ជាច្រើន​សួរ​ខ្ញុំ​ថា គម្រោង​មជ្ឈមណ្ឌល​ពាណិជ្ជកម្ម​ថៃប៊ុនរ៉ុង កម្ពស់៥៦៧ ​ម៉ែត្រ​នៅតែ​បន្ត​សាងសង់ឬទេ​! មហា​គម្រោង​នេះ ​នឹងមិន​មាន​អ្វី​ប្រែប្រួល​ទេ គម្រោង​ប្លង់​បច្ចេកទេស​បាន​គូរ​បញ្ចប់១០០ ​ភាគរយ ចំណែក​ជញ្ជាំង​ទប់ដី ការពារ​បាក់ដី ការពារ​ជម្រាប​ទឹកទន្លេ ជម្រៅ២៦​ម៉ែត្រ​ក៏បាន​ចាក់​បេតុង​បញ្ចប់​រួចរាល់ ១០០ ​ភាគរយ​ហើយ”។

លោក​បន្ថែមទៀត​​ថា​ “នៅពេលនេះ​ក្រុមការងារ​សាងសង់ និង​ក្រុមការងារ​ផ្នែក​បច្ចេកទេស​ផ្សេងៗ​ ក៏បាន​ត្រៀមខ្លួន​រៀបចំ​រួចរាល់​ផងដែរ ដោយនៅ​រង់ចាំតែ​ឱកាសល្អ និង​ការបញ្ចប់​ស្ថានការណ៍​អួអាប់​ដោយសារ​ជំងឺ​កូវីដ គម្រោង​នេះ​នឹង​ចាប់ផ្តើម​ហើយ ក្រោ​ម​ការដាក់ចេញ​ផែនការ និង​បទបញ្ជា​យ៉ាងម៉ឺងម៉ាត់​ពី​អ្នកឧកញ៉ា​អគ្គនាយក​ក្រុមហ៊ុន ថៃ ប៊ុនរ៉ុង​។

លោក​បាន​ថ្លែងថា “​មិនមែន​ប្រទេស​ទាំងអស់​ សុទ្ធតែ​មាន​សមត្ថភាព​កសាង​អគារ​ធំ​បែបនេះ​បានទេ ជួនកាល​គេ​មាន​លុយ តែ​មិន​ប្រាកដថា​អាច​សាងសង់​បាន​នោះឡើយ”។

យោងតាមរបាយការណ៍​និន្នាការ​សេដ្ឋកិច្ច​សង្គម ​នៃ​ក្រសួង​សេដ្ឋកិច្ច និង​ហិរញ្ញវត្ថុ ចេញផ្សាយ​នៅ​ដើមខែ​កក្កដា​ឱ្យ​ដឹងថា ក្នុង​រយៈពេល៥​ខែ​ដើមឆ្នាំ​ ២០២១ រដ្ឋាភិបាល​កម្ពុជា បាន​អនុម័ត​លើ​គម្រោង​សាងសង់​សរុប​១៨២៣ គម្រោង បើ​ធៀប​ទៅនឹង​រយៈពេល​ដូចគ្នា​ឆ្នាំ​ ២០២០ គឺ​បាន​ធ្លាក់ចុះ​ប្រមាណ២៧៨​គម្រោង​៕

ដោយៈគង់ សូរិយា

ភ្នំពេញៈ ប្រជាជនកម្ពុជាត្រូវបានគេមើលឃើញថា មានភាពរសរវើក ដោយវ័យរបស់ពូកគេភាគច្រើនក្មេង និងពោរពេញដោយថាមពល ដែលធ្វើឲ្យប្រទេសនេះមានភាពលេចធ្លោក្នុងតំបន់អាស៊ាន។

តោះទៅមើលទន្នន័យត្រូសៗពីភាពលេចធ្លោរបស់ប្រទេសកម្ពុជា ដែលកំពុងមានឧត្តមភាពលើសេដ្ឋកិច្ចបែបឌីឌីថល។

ចំណុចទី១ ព្រះរាជាណាចក្រកម្ពុជា មានប្រជាជន​វ័យក្មេង​មាន​ចំនួន​ច្រើនជាងគេ​បំផុត​មួយ​នៅក្នុង​តំបន់ ដោយ​ចំនួន​ប្រជាជន​កម្ពុជា​មាន​ប្រមាណ​១៦​លាន​នាក់ ក្នុងនោះ​អាយុ​ជា​មធ្យម​២៥​ឆ្នាំ​។

ចំណុចទី២ វិស័យ​សេវាកម្ម​ហិរញ្ញវត្ថុ​ ដែល​កំពុង​រីកចម្រើន​យ៉ាង​ឆាប់រហ័ស ជាមួយ​ប័ណ្ណ​ឥណ​ពន្ធ​ចំនួន ២,៦៥ លានប័ណ្ណ​នៅ​ឆ្នាំ​ ២០១៩ ដែល​តួលេខ​នេះ​បាន​កើនឡើង​ទ្វេដង​ក្នុង​រយៈពេល​៥​ឆ្នាំ​។

ចំណុចទី៣ អត្រា​ប្រើប្រាស់​ទូរសព្ទ័​ចល័ត​ខ្ពស់ ប្រទេស​កម្ពុជា​មាន​អត្រា​ប្រើប្រាស់​ទូរស័ព្ទ​ចល័ត​ខ្ពស់បំផុត​មួយ​នៅលើ​ពិភពលោក ដែល​មាន​ចំនួន២០,៨លាន​ស៊ីមកាត ឬ​ស្មើនឹង១២៤% នៃ​ចំនួន​ប្រជាជន​សរុប​។

ចំណុច៤ ​អត្រា​ប្រើប្រាស់​ស្មាតហ្វូន​ខ្ពស់ ទូរស័ព្ទ​ស្មាតហ្វូន​មាន​ចំនួន​ ១០,៧ ​លាន​គ្រឿង​ត្រូវបាន​ភ្ជាប់​អ៊ីនធើណិត​។ អត្រា​ទិន្នន័យ​មាន​តម្លៃ​ថោក​បំផុត​មួយ​នៅក្នុង​តំបន់​គឺ​ ១ ​ដុល្លារ​ប្រើ​បាន​ 10GB កម្រិត​សេវា 4G និង 3G ​ដែល​គ្របដណ្តប់​ប្រមាណ​ ៨០% និង​ ៨៥% នៃ​ចំនួន​ប្រជាជន​។

ទី៥ ការប្រើប្រាស់​បណ្តាញ​សង្គម គិត​ត្រឹម​ពាក់កណ្តាល​ឆ្នាំ​ ២០២០ អ្នកប្រើប្រាស់​ហ្វេសប៊ុក​មាន​ចំនួន ១០,៨ លាន​គណនី​។

ទី៦ ឱកាស​នៅក្នុង​ផ្នែក MSME ប្រទេស​កម្ពុជា​មាន​សហគ្រាស​ធុន​តូច​បំផុត តូច និង​មធ្យម (MSMEs) ប្រមាណ ៥០០,០០០ ក្នុងនោះ ៩៥% ជា​អាជីវកម្ម​ក្រៅផ្លូវការ​ដែល​មិនបាន​ចុះបញ្ជី​។ មានតែ​អាជីវកម្ម​មួយចំនួន​តូច​ប៉ុណ្ណោះ​ បាន​ចុះបញ្ជី​ត្រឹមត្រូវ​៖ តូច​បំផុត (០,០២%) តូច (៣,៨៩%) មធ្យម (២៤,១១%)៕

ដោយៈសុខុម

អន្តរជាតិៈ អត្រាការប្រាក់នឹងធ្លាក់ចុះទាបរយៈពេលវែងនៅទ្វីបអឺរ៉ុប នៅពេលដែលក្រុមធនាគារិកនៃធនាគារកណ្តាលអឺរ៉ុប (ECB) បន្ថែមក្រដាសប្រាក់រាប់ទ្រីលានដុល្លារ ដែលពួកគេបានបោះពុម្ពរួចទៅហើយ ចូលទៅក្នុងទីផ្សារដើម្បីជួយស្រោចស្រង់សេដ្ឋកិច្ច។ នេះបើយោងតាមការចុះផ្សាយរបស់សារព័ត៌មាន CNN។

ធនាគារកណ្តាលអឺរ៉ុប កាលពីថ្ងៃព្រហស្បតិ៍ ទី២២ កក្កដា បានឱ្យសញ្ញាថា ខ្លួននឹងរក្សាអត្រាការប្រាក់ឱ្យនៅទាបរយៈពេលវែង បន្ទាប់ពីផ្លាស់ប្តូរវិធីសាស្រ្តរបស់ខ្លួន ចំពោះអត្រាតម្លៃ ដែលនឹងអនុញ្ញាតឱ្យក្រុមអ្នកធ្វើគោលនយោបាយ បន្តផ្គត់ផ្គង់ក្រដាសប្រាក់ដើម្បីជួយស្រោចស្រង់សេដ្ឋកិច្ច រហូតដល់ពួកគេមានទំនុកចិត្តថា អតិផរណានឹងធ្លាក់ចុះមកនៅត្រឹម២% ហើយនឹងនៅទ្រឹងក្នុងអត្រានោះ។

លោក Andrew Kenningham ប្រធានក្រុមអ្នកជំនាញសេដ្ឋអឺរ៉ុប ប្រចាំក្រុមហ៊ុនពិគ្រោះ & ស្រាវជ្រាវផ្នែកសេដ្ឋកិច្ច Capital Economics បានលើកឡើងថា “មានការបញ្ជាក់អះអាងថា ធនាគារកណ្តាលអឺរ៉ុប នឹងរក្សាទុកការកំណត់គោលការណ៍របស់ខ្លួនដដែលដោយគ្មានការផ្លាស់ប្តូរ ហើយនឹងបន្តអនុវត្តគោលនយោបាយធូររលុង រយៈពេលវែងជាងអ្វី ដែលត្រូវបានប្រកាសតាមរយៈសេចក្ដីថ្លែងការណ៍មុនៗ”។

*កំណត់សម្គាល់

ធនាគារកណ្តាលអឺរ៉ុប បានប្រកាសកាលពីដើមខែនេះថា ខ្លួនបានបោះបង់ចោលគោលនយោបាយចាស់របស់ខ្លួនឡើយ នៅក្នុងការកំណត់អតិផរណាឱ្យមកនៅ “ក្រោម ប៉ុន្តែជិត២%” ជាគោលដៅមួយដែលវិនិយោគិន និងអ្នកជំនាញសេដ្ឋកិច្ចជាច្រើនយល់ថាមានភាពមិនច្បាស់លាស់ និងបង្កការភាន់ច្រឡំ។

ប៉ុន្តែក្រោយមក ស្រាប់តែធនាគារនេះបានកំណត់គោលដៅអតិផរណាថ្មី ក្នុងអត្រា២%សម្រាប់រយៈពេលមធ្យម។

ការផ្លាស់ប្ដូរនេះធ្វើឡើង នៅពេលធនាគារកណ្ដាលអឺរ៉ុប បន្តប្រមូលទិញប័ណ្ណ​បំណុល (Bond) ជាផ្នែកមួយនៃកិច្ចប្រឹងប្រែងស្រោចស្រង់សេដ្ឋកិច្ច។

តើការប្រមូលទិញនោះច្រើនកម្រិតណា? គម្រោងសាកល្បងគឺចំនួន១,៤ទ្រីលានដុល្លារ! ធនាគារកណ្ដាលអឺរ៉ុប បានទិញប័ណ្ណបំណុលចំនួន១,៤ទ្រីលានដុល្លារ ចាប់តាំងពីខែមីនា ឆ្នាំ២០២០ ដែលជាផ្នែកមួយនៃកម្មវិធីរបស់ខ្លួន ដើម្បីឆ្លើយតបទៅនឹងគ្រោះអាសន្នដែលបង្កឡើងដោយវិបត្តិកូវីដ-១៩។

ប៉ុន្តែការប្រមូលទិញគឺច្រើនជាងនេះទៀត! ធនាគារកណ្តាលអឺរ៉ុប នៅតែបន្តទិញប័ណ្ណបំណុលក្នុងអត្រា៩៤ពាន់លានដុល្លារ ក្នុងមួយខែក្នុងនាមជាជំនួយសង្គ្រោះបន្ទាន់ ដោយការទិញ សរុបមានចំនួន២,២ទ្រីលានដុល្លារ ដែលទទួលបានការអនុញ្ញាតក្រោមកម្មវិធីនេះ។

ចំនួននោះ គឺបន្ថែមពីលើការទិញប័ណ្ណបំណុល២៤ពាន់លានដុល្លារ ក្នុងមួយខែដែលធនាគារកណ្ដាលអឺរ៉ុប ជាអ្នកទិញក្រោមកម្មវិធីស្ដារសេដ្ឋកិច្ច ដាច់ដោយឡែកមួយមានឈ្មោះថា Asset Purchase Program (កម្មវិធីទិញទ្រព្យសកម្ម) ដែលត្រូវបានផ្តួចផ្តើមឡើងក្នុងឆ្នាំ២០១៤។

ក្រុមអ្នកជំនាញសេដ្ឋកិច្ចរំពឹងថា នឹងមានឱកាសសិក្សាស្វែងយល់បន្ថែមទៀត អំពីអនាគតនៃកម្មវិធីទិញប័ណ្ណបំណុលនេះ បន្ទាប់ពីកិច្ចប្រជុំរបស់ធនាគារកណ្ដាលអឺរ៉ុប ដែលគ្រោងរៀបចំឡើងនៅក្នុងខែកញ្ញា ឬខែធ្នូ ចុងឆ្នាំ២០២១ នេះ៕

ភ្នំពេញៈ អត្ថបទ​នេះ​មាន​គោលបំណង​ពិភាក្សា​អំពី​អ្វី​ទៅ ​ដែល​គួរតែ​ជា​ពហុភាគី​និយម និង​អ្វីដែល​មិនគួរ​ជា​ពហុភាគី​និយម ហើយ​លើក​ពី​សារៈសំខាន់​នៃ​ពហុភាគី​និយម​សម្រាប់​មនុស្សជាតិ​។

នៅពេល​យើង​ពិភាក្សា​អំពី​ពហុភាគី​និយម ​យើង​ត្រូវ​ត្រឡប់​ទៅរក​ព្រឹត្តិការណ៍​ពិភពលោក​ និង​តំបន់​ជា​ប្រវត្តិសាស្ត្រ​ឡើងវិញ​ ហើយ​សួរថា ហេតុអ្វី​បានជា​អង្គការ​សហប្រជាជាតិ​ត្រូវបាន​បង្កើត​? ហេតុអ្វី​បានជា​អាស៊ាន​ត្រូវបាន​បង្កើតឡើង​? ហេតុអ្វី​អាស៊ាន​មាន​សមាជិក១០?។

ប្រសិនបើ​យើង​មិន​បិទខ្ទប់​ខ្លួនឯង ​ទៅនឹង​គំនិត​មនោគមន៍វិជ្ជា​ ឬ​ភូមិសាស្ត្រ​នយោ​បាយ​ទេ ​យើង​អាច​ទទួលបាន​ចម្លើយ​សាមញ្ញ​សម្រាប់​មនុស្ស​គ្រប់គ្នា​។ នោះ​គឺថា ស្ថាប័ន​ពហុភាគី​ត្រូវបាន​បង្កើតឡើង​ ពីព្រោះ​យើង​ចង់បាន​សន្តិភាព​ភាពសុខដុម ​ការអភិវឌ្ឍ​សេរីភាព​ចេញពី​ភាពវេទនា និង​ភាពក្រីក្រ​ និង​ការចង់បាន​អនាគត​ភ្លឺស្វាង​សម្រាប់​មនុស្ស​ជំនាន់ក្រោយ​។

គោលការណ៍​ និង​គោលបំណង​របស់​អង្គការ​ពហុភាគី​ទាំងអស់ ​តែងតែ​មាន​គោលដៅ​រួមទាំង​នេះ ​សម្រាប់​មនុស្សជាតិ​ដោយ​មិន​ទុក​នរណាម្នាក់​ចោល​ឡើយ​។ បន្ទាប់ពី​ឆ្លងកាត់​សង្គ្រាមលោក​ មហា​បំផ្លិចបំផ្លាញ​ចំនួន​២លើក ពិភពលោក​យើង​បាន​សម្រេច​ចិត្ត​អង្គុយ​តុ​ចរចា ខិតខំ​ត្រិះរិះ​ពិចារណា​រក​វិធី​បង្កើត​យន្តការ​នានា ដែល​យើង​អាច​គ្រប់គ្រង​អស្ថិរភាព ភាពមិន​ទៀងទាត់​ហានិភ័យ​នៃ​ជម្លោះ​ និង​ការមិន​ទុក​ចិត្ត​គ្នា និង​កាត់បន្ថយ​ ឬ​លុបបំបាត់​នូវ​ភាពវេទនា​ទាំងឡាយ ដែល​មនុស្សលោក​អាច​ជួបប្រទះ​។

ទោះបី​ជា​មាន​ឧត្តមគតិ​រួម​ក៏ដោយ ប៉ុន្តែ​ពិភពលោក​នៅតែ​មាន​គម្លាត​លើ​វិធីសាស្ត្រ​អនុវត្ត​ន៍។

សង្គម​ខ្លះ​កំពុងតែ​ខិតខំ​ស្វែងរក​ភាព​ល្អឥតខ្ចោះ​។ សង្គម​ខ្លះទៀត​កំពុងតែ​ត្រដរខ្យល់​នៅឡើយ សូម្បីតែ​បំពេញតម្រូវការ​ចាំបាច់​ប្រចាំថ្ងៃ​របស់​ពលរដ្ឋ​។

នៅពេល​ដែល​សង្គម​ទាំងនេះ ​មាន​ទំនាក់ទំនង​គ្នា​ទៅវិញ​ទៅមក ពួកគេ​ត្រូវបាន​បែងចែក​ដោយ​គម្លាត​អំណាច​ មនោគមន៍វិជ្ជា ​ឧទាហរណ៍ ​ដូច​ក្នុង​សម័យ​សង្គ្រាមត្រជាក់ និង​អភិក្រម​នានា ​ដែល​រដ្ឋ​នីមួយៗ​ប្រកាន់យក​នៅក្នុង​អភិបាលកិច្ច​ និង​មាគ៌ា​អភិវឌ្ឍន៍​របស់​ពួកគេ​។

អន្តរកម្ម​ទាំងនេះ ​បាន​បង្កើត​ជា​ការតតាំង​ដាក់គ្នា​ទៅវិញ​ទៅមក ​នៅក្នុង​ចំណោម​រដ្ឋ ក៏ដូចជា​នៅក្នុង​យន្តការ​ពហុភាគី​និយម​។

ពេលខ្លះ​ពហុភាគី​និយម​អាច​រំឭក​យើង​ឡើងវិញ​ អំពី​អ្វីដែល​មនុស្សជាតិ​ត្រូវការ ប៉ុន្តែ​ពេលខ្លះ​ពហុភាគី​និយម​ ក៏ត្រូវ​បាន​គេ​ប្រើ​ដើម្បី​ជំរុញ​ដល់​ការតស៊ូ និង​តតាំង​រវាង​រដ្ឋ​ដោយ​ផ្អែកលើ​ការបែងចែក​ភូមិសាស្ត្រ​នយោបាយ និង​មនោគមន៍វិជ្ជា​។

យោងតាម​បទពិសោធ​ដ៏ជូរចត់​របស់​កម្ពុជា ពហុភាគី​និយម​មិនគួរ​ផ្តល់​អាសនៈ​នៅ​អង្គការ​សហប្រជាជាតិ​ ដល់​របប​ប្រល័យ​ពូជសាសន៍​ប៉ុល ពត ​ដែល​បានសម្លាប់​មនុស្ស​ជាង​២​លាន​នាក់​ឡើយ​។ ​ពហុភាគី​និយម​មិនគួរ​ដាក់​ទណ្ឌកម្ម​ការទូត​ និង​សេដ្ឋកិច្ច​រយៈពេល​១២​ឆ្នាំ ​ទៅលើ​អ្នក​រស់រាន​មាន​ជីវិត​ពីរ​បប​ប៉ុលពត​ឡើយ​។

ពហុភាគី​និយម​មិនគួរ​ជា​ក្បាលម៉ាស៊ីន​ ដើម្បី​គាំទ្រ ពង្រីក​ និង​អូសបន្លាយ​សង្គ្រាម​ដោយ​តួអង្គ​តំណាង ហើយ​គាំទ្រ​ដល់​ភាគី​ណាមួយ ​នៅក្នុង​ជម្លោះ​នយោបាយ​ ឬ​ជម្លោះទឹកដី​ឡើយ​។

ពហុភាគី​និយម​មិនគួរ​ដាក់​ទណ្ឌកម្ម​សេដ្ឋកិច្ច​នោះទេ​ នៅពេល​ដែល​ប្រជាជន​កំពុងតែ​រង​ផលប៉ះពាល់​ពី​ការរីករាលដាល​នៃ​ជំងឺ​កូវីដ​១៩​។ ពហុភាគី​និយម​គួរតែ​ដាក់​សន្តិភាព​ និង​ស្ថិរភាព​ខ្ពស់ជាង​អ្វីៗ​ទាំងអស់ ​ហើយ​មិនគួរ​ត្រូវបាន​កំណត់ ​ដោយ​ការដាក់​ឆន្ទៈ​ខាង​មនោគមន៍វិជ្ជា​ ឬ​ភូមិសាស្ត្រ​នយោបាយ​ទៅលើ​អ្នកដទៃ​ឡើយ​។

ដោយៈគង់ សូរិយា

ភ្នំពេញៈ បុរីថ្មីមួយដែលមានទីតាំងនៅក្បែរ ព្រលានយន្តហោះអន្តរជាតិភ្នំពេញថ្មី បាននិងកំពុងបង្ហាញសក្តានុពល សម្រាប់តំបន់នេះជាមួយលំនៅដ្ឋានបែបវីឡាប្រណីត និងផ្ទះអាជីវកម្មដែលអាចប្រកបរបរឬធ្វើអាជីវកម្មបាន។

គំរោងនេះក៏មានផ្សារបែបសហគមន៍ ដើម្បីធ្វើឲ្យអ្នករស់នៅគំរោងនេះអាចប្រកបអាជីវកម្ម និងទាក់ទាញអ្នករស់នៅជុំវិញតំបន់នេះ មកកាន់ទីតាំងនេះ ដែលធ្វើឲ្យតំបន់នេះកាន់តែមានភាពអ៊ូរអរផងដែរ។

អ្នកនាងឆយ ហ្រ្វីដានាយិកាក្រុមហ៊ុនAngel Realty ដែលបានទទួលសិទ្ឋលក់បុរី

ហ៊ួត ជា ម៉ាកិត្យាផ្តាច់មុខ បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២៣ កក្កដានេះថា តំបន់ជុំវិញព្រលានយន្តហោះអន្តរជាតិភ្នំពេញថ្មី កំពុងទាក់ទាញការវិនិយោគពីអ្នកវិនិយោគជាតិ និងអន្តរជាតិ ដោយសារតំបន់នេះនឹងទាក់ទាញការរស់នៅច្រើន ពីប្រជាពល​រដ្ឋ គួបផ្សំជាមួយសក្តានុពលជុំវិញដែលមានស្រាប់ ដូចជារមណីយដ្ឋានស្អាងភ្នំ តំបន់ទីប្រជុំជនច្រើន មានប្រចាពលរដ្ឋរស់នៅច្រើន ពិសេសជាទីតាំងអាចប្រកបអាជីវកម្មបាន ព្រោះនៅជិតព្រលានយន្តហោះថ្មី។

អ្នកនាងបន្តថា “ផ្ទះក្នុងគំរោងនេះមានទាំងវីឡាប្រណីត និងផ្ទះអាជីវកម្មដែកលលក់ក្នុងតម្លៃសមរម្យបំផុត ហើយសំណង់មានគុណភាព និងសោភ័ណភាពខ្ពស់ ដោយ​សារលោកឧកញ៉ាហ៊ួត ជាជាអ្នកផ្គត់ផ្គង់គ្រឿងសំណង់ស្រាប់”។លោកបន្តថា “មូលហេតុនេះហើយ ទើបធ្វើឲ្យលំនៅដ្ឋានរបស់បុរីហ៊ួត ជាមានតម្លៃសមរម្យ ប៉ុន្តែលោកបានផ្តោតលើគុណភាព និងប្រ ណីតភាពជាចម្បង”។

គម្រោងនេះមានទីតាំង ស្ថិតនៅភូមិគោកសណ្តែក ឃុំស្អាងភ្នំ ស្រុកស្អាង ខេត្តកណ្តាល ចំងាយ ៣គីគីឡូមម៉ែត្រពីព្រលានយន្តហោះថ្មី។

អ្នកនាងឆយ ហ្រ្វីដាបានបន្តឲ្យដឹងទៀតថា លំនៅដ្ឋានក្នុងបុរីហ៊ួត ជាមានផ្ទះចំនួនបួនប្រភេទ ដូចជាទី១  វីឡាទោល តម្លៃ 68,000$ ទំហំផ្ទះ 6mX14m ទំហំដី 9mX18m ទី២ វីឡា Link House តម្លៃ 48,000$ ទំហំផ្ទះ 4.5mX11m និងទំហំដី 4.5mX16m ទី៣  ផ្ទះល្វែងអាជីវកម្ម២ជាន់ តម្លៃ 38,000$ ទំហំផ្ទះ 4.1mX13m និង ទំហំដី 4.1mX18m និងទី៤ ផ្ទះអាជីវកម្ម៣ជាន់ តម្លៃ 58,000$ ទំហំផ្ទះ 4.1mX13m និងទំហំដី 4.1mX18m។

អ្វីកាន់តែពិសេសអតិថិជនអាចមានជម្រើសបង់ប្រាក់ល្អ ជាមួយនឹងការបង់រំលស់សុទ្ឋ និងមិនគិតការប្រាក់ ដែលលក្ខខ័ណ្ឌទាំងនោះមានដូចជា ទី1. អតិថិជនបង់ផ្តាច់100% ចុះ 10% ទី 2. អតិថិជនបង់ 50% ចុះ 5% ទី 3. អតិថិជនបង់ 30% ចុះ 3% ទី 4. អតិថិជនបង់ 10%  ចុះ 1%៕

ដោយៈសុខុម

សិង្ហបុរី: តម្លៃផ្ទះឯកជននៅប្រទេសសិង្ហបុរី បានហក់ឡើង០,៨%ក្នុងត្រីមាសទី២ ឆ្នាំ២០២១ ពោលគឺទាបជាងបន្តិចបើធៀបនឹងការព្យាករមុននេះ ស្របពេលវិធានការកូវីដ-១៩ មានការរឹតបន្តឹងខ្ពស់។ នេះបើយោងតាមសារព័ត៌មាន CNA ចុះផ្សាយនៅថ្ងៃទី២៣ កក្កដា។

ស្ថិតិអចលនទ្រព្យដែលចេញផ្សាយ ដោយអាជ្ញាធរអភិវឌ្ឍន៍ទីក្រុង (URA) នៅថ្ងៃសុក្រ ទី២៣ កក្កដា នេះបង្ហាញថា សន្ទស្សន៍តម្លៃអចលនទ្រព្យប្រភេទលំនៅដ្ឋានឯកជនបានកើនឡើង១៦២,២ពិន្ទុ ក្នុងត្រីមាសទី១ ដល់១៦៣.៥ពិន្ទុក្នុងត្រីមាសទី២ នៃឆ្នាំ២០២១។

ការហក់ឡើងនេះគឺទាបជាងត្រីមាសទី១ ដែលនៅពេលនោះតម្លៃបានហក់ឡើង៣,៣ភាគរយ។

*តម្រូវការលក់ចេញវិញ

ការលក់ផ្ទះឯកជនថ្មីៗ ក៏បានកើនឡើងដែរក្នុងត្រីមាសទី២ ដោយគម្រោងអភិវឌ្ឍន៍តិចតួចបានចាប់ផ្ដើមដំណើរការ។

បណ្ដាក្រុមហ៊ុនអភិវឌ្ឍន៍បានដាក់លក់ផ្ទះឯកជន ដែលមិនទាន់សាងសង់រួចរាល់ចំនួន២,៣៥៦យូនីត (មិនរាប់បញ្ចូលខុនដូ) ក្នុងត្រីមាសទី២ បើធៀបនឹងចំនួន៣.៧១៦យូនីតនៅចន្លោះខែមករា ដល់ខែមីនា។ ពួកគេលក់បានចំនួន២,៩៦៦យូនីតក្នុងត្រីមាសទី២ បើធៀបនឹងត្រីមាសទី១ ដែលលក់បានចំនួន៣.៤៩៣យូនីត។

នៅក្នុងផ្នែកខុន ក្រុមហ៊ុនអភិវឌ្ឍន៍បានបើកលក់ផ្ទះចំនួន៤១៣យូនីត នៅត្រីមាសទី២ ពោលគឺធ្លាក់ចុះបើធៀបនឹងចំនួន៧០០យូនីតក្នុងត្រីមាសទី១។ ពួកគេលក់បានចំនួន៤៩៥យូនីតបើធៀបនឹង៦៤៧ក្នុងត្រីមាសទី១។

ពលរដ្ឋកាន់តែច្រើនបានទិញផ្ទះឯកជន ក្នុងទីផ្សារលក់បន្តក្នុងត្រីមាសទី២ ដោយប្រតិបត្តិការទិញលក់បែបនេះ មានចំណែកដល់ទៅ៦៣,១ភាគរយ នៃការលក់អចលនទ្រព្យប្រភេទលំនៅដ្ឋានឯកជន ពោលគឺខ្ពស់ជាងបើធៀបនឹ៥៥,៨%ក្នុងត្រីមាសទី១។

សរុបមក ប្រតិបត្តិការទិញលក់បន្តមានចំនួន៥.៣៣៣ប្រតិបត្តិការក្នុងត្រីមាសទី២ បើធៀបនឹងត្រីមាសទី១ ដែលមានចំនួន៤.៥១៩ប្រតិបត្តិការ។

*ការជួល

អត្រាជួលទទួលបានកំណើនខ្ពស់ក្នុងត្រីមាសទី២ ឆ្នាំនេះ ដោយកើនឡើង២,៩% បើធៀបនឹង២,២%ក្នុងត្រីមាសទី១។

កំណើននេះ ទទួលបានដោយសារផ្នែកលំនៅដ្ឋានសង់លើរដ្ឋ ដែលការជួលបានកើនឡើង៣,១%ក្នុងទីមាសទី២ បើធៀបនឹង២,៤%ក្នុងត្រីមាសទី១។

ការជួលផ្ទះសង់លើដីឯកជន ក៏បានកើនឡើងពី០,៦%ក្នុងត្រីមាសទី១ ដល់១,៤%ក្នុងត្រីមាសទី២ផងដែរ។

*ការផ្គត់ផគង់ដែលស្ថិតក្នុងផែនការ

គិតត្រឹមដំណាច់ត្រីមាសទី១ ផ្ទះឯកជនដែលកំពុងស្ថិតក្នុងគម្រោង មិនទាន់សាងសង់រួចមានចំនួន១៩.៣៨៤យូនីត បើធៀបនឹង២១.៦០២យូនីតក្នុងត្រីមាសទី១៕