ដោយ គង់ សូរិយា

ភ្នំពេញ៖ វត្តមានផ្សារទំនើបនៅកម្ពុជា ពិសេសក្រុងភ្នំពេញបានកើរតមានស្ទើរគ្រប់ទីលកន្លែង ប៉ុន្តែចំនូននិងទំហំផ្សារទំនើប និងផ្សារបែបសហគមន៍នៅតែបន្តកើនឡើង និងកំពុងសាងសង់ថ្មីៗកាន់តែច្រើន។

បច្ចុប្បន្ននេះ មានគម្រោងថ្មីមួយ ដែលត្រូវបានណែនាំដោយក្រុមហ៊ុន ជីស៊ីស៊ី គ្រុប ដែលធ្វើឲ្យមានភាពភ្ញាក់ផ្អើល ដល់អ្នកវិនិយោគជាខ្លាំង ដោយសារតែការវិនិយោគតិច ប៉ុន្តែទទួលបានផលចំណេញច្រើន។ គម្រោងអភិវឌ្ឍថ្មីនេះ ជាគម្រោងផ្សារលក់អាហារស្រស់នៅទីក្រុងភ្នំពេញ និងក្បែរតំបន់អភិវឌ្ឍជាច្រើន គឺផ្សារយើងដោយជីស៊ី អូរឫស្សី។

អ្នកនាងហែម ស៊ីម៉ា នាយកផ្នែកលក់ GC អូរឬស្សីបានឲ្យដឹងនៅព្រឹកថ្ងៃទី២៣កក្ក​ដា ឆ្នាំ២០២១នេះថា រហូតមកទល់បច្ចុប្បន្ន នៅមិនទាន់ឃើញមានអ្នកអភិវឌ្ឍណាផ្សេងទៀត ដែលអភិវឌ្ឍគម្រោងទីផ្សារក្នុងស្រុក ដើម្បីឆ្លើយតបទៅនឹងតម្រូវការខ្ពស់នៅឡើយទេ ដូចដែលបានឃើញ ជាទូទៅផ្សារក្នុងស្រុក ពាក់ព័ន្ធនឹងការរស់នៅរបស់ប្រជាជនកម្ពុជាជាច្រើន។

អ្នកនាងបន្តថា “មានតែទីផ្សារលក់អាហារ ក្នុងស្រុកមួយចំនួនតូចប៉ុណ្ណោះ ដែលមានទីតាំងនៅទីក្រុងភ្នំពេញ និងមានប្រវត្តិយូរណាស់មកហើយ ក្នុងការបម្រើដល់សហគមន៍ ដ៏រស់រវើកមួយនេះ”។

ជាមួយគ្នានេះ ​វត្តមានផ្សារទំនើបធំៗជាច្រើនកំពុងលេចឡើងនៅតំបន់ផ្លួវ៦០ម៉ែត្រ ដូចជាផ្សារទំនើប AEON Mall3 ផ្សារទំនើប Peng Huort Diamond, ផ្សារទំនើប Chip Mong និងនៅលើបណ្តោយផ្លូវជាតិលេខ១វិញ វត្តមានផ្សារទំនើប Peng Huorrt Eco Mall មានទំហំធំមួយ កំពុងចាប់ផ្តើមបង្ហាញរូបរាងបណ្តើរៗ ខណៈក្នុងបុរីនេះនឹងមានផ្សារទំនើបធំៗចំនូនពីរបន្ថែមទៀតផងដែរ។

ចំណែកផ្សារជីស៊ី អូរឫស្សី មានទីតាំងស្ថិតនៅបណ្តោយផ្លូវសហព័ន្ធរុស្សី ក្បែរក្រសួងពាណិជ្ជកម្ម នឹងចាប់ផ្តើមសាងសង់នៅចុងឆ្នាំ២០២១ ដោយគ្រោងបញ្ចប់នៅពាក់ឆ្នាំ២០២៤ខាងមុខ។ គម្រោងផ្សារមួយនេះ មានកម្ពស់៦ជាន់ ស្មើនឹងតូបសរុបប្រមាណ ៥ពាន់តូប ដែលបំផុសគំនិត ដោយស្ថាបត្យកម្មបែបខ្មែរ រួមបញ្ចូលគ្នាជាមួយនឹងការរចនាបែបទំនើប ព្រមទាំងមានការបែងចែកពាណិជ្ជកម្ម ទៅតាមផ្នែកផ្សេងៗគ្នានៅជាន់នីមួយ​ៗ។

អ្នកស្រីអាន សុធីតាអ្នកជំនាញអចលនទ្រព្យ និងវិភាគទីផ្សារបានមានប្រសាសន៍ឲ្យដឹងកាលពីពេលថ្មីៗនេះថា វត្តមានផ្សារទំនើបនៅរាជធានីភ្នំពេញ បានកើនដល់កម្រិតមួយខ្ពស់គួរឲ្យព្រួយបារម្ភ ដោយសារទំហំផ្សារទំនើបនៅរាជធានីភ្នំពេញ បានកើនដល់ជាង៦០ម៉ឺនម៉ែត្រការ៉េរួចទៅហើយ។

អ្នកស្រីបន្តថា “ការកើនឡើងនូវវត្តមានផ្សារទំនើប ឆ្លុះបញ្ចាំងពីកំនើនជីវភាពរបស់ប្រជាពលរដ្ឋ ប៉ុន្តែអំណាចនៃការទិញរបស់ប្រជាពលរដ្ឋនៅមានកម្រិតនៅឡើយ”។អ្នកស្រីបន្តថា “ការវិនិយោគផ្សារទំនើបមានផលចំនេញខ្ពស់ពីការវិនិយោគ ប៉ុន្តែទាមទារឲ្យមានការរចនាឡើងវិញរៀងរាល់៣ទៅ៥ឆ្នាំម្តង ដើម្បីដើរទាន់សម័យកាលសង្គម”។

ការកើនឡើងនូវវត្តមានផ្សារទំនើប កើនឡើងជាបន្តបន្ទាប់គ្នានេះ បានធ្វើឲ្យផ្សារមួយចំនួនប្រឈមមុខនឹងការបិទទ្វារផងដែរ ដោយសារការប្រកួតប្រជែងពីផ្សារទំនើបស្តង់ដាអន្តរជាតិដូចជាផ្សារទំនើប AEON Mall ជាដើម៕

ដោយៈ ម៉ាណេត

ភ្នំពេញៈ វិស័យអចលនទ្រព្យនៅកម្ពុជារំពឹងថា នឹងងើបឡើងវិញនៅត្រីមាសទី១ ឆ្នាំ២០២២ ដោយសារសេដ្ឋកិច្ចពិភពលោក រួមទាំងប្រទេសកម្ពុជា បាននិងកំពុងចាប់ផ្តើមមានកំណើនឡើងវិញ ហើយនឹងជំរុញឱ្យវិស័យសេដ្ឋកិច្ចជាច្រើន ពិសេសអចលនទ្រព្យនឹងទទួលបានវិនិយោគិនជាច្រើនឡើងវិញ។

លោក Crispian Knowles ប្រធានគ្រប់គ្រងទូទៅក្រុមហ៊ុន Coldwell Banker Cambodia បានថ្លែងប្រាប់នៅថ្ងៃទី២៣ ខែកក្កដា ឆ្នាំ២០២១ថា នាពេលបច្ចុប្បន្ននេះ សេដ្ឋកិច្ចពិភពលោក កំពុងតែទទួលផលប៉ះពាល់ ដោយសារតែវិបត្តិកូវីដ១៩ ហើយវិស័យសេដ្ឋកិច្ចជាច្រើន ក្នុងនោះវិស័យអចលនទ្រព្យក៏មានផលប៉ះពាល់ផងដែរ។
លោកបានបន្តថា វិស័យអចលនទ្រព្យនៅកម្ពុជា ក៏ជាផ្នែកមួយនៃសេដ្ឋកិច្ចរបស់កម្ពុជា ដែលទទួលរងផលប៉ះពាល់ ពីវិបត្តិសកលមួយនេះ ប៉ុន្តែវិស័យមួយនេះនៅតែមានភាពលេចធ្លោ ដោយសារតែនៅតែមានការវិនិយោគជាបន្តបន្ទាប់ ពីសំណាក់អ្នកវិនិយោគជនជាតិ និងអន្តរជាតិ។

លោកបានថ្លែងថា ជាមួយនេះដែរ បើមើលទៅលើស្ថានភាពបច្ចុប្បន្ន ទាក់ទងនឹងការដាក់ចេញនូវវ៉ាក់សាំង គម្រោងរបស់រដ្ឋាភិបាល និងគ្រោងនឹងទទួលស្វាគមន៍ភ្ញៀវទេសចរអន្តរជាតិឡើងវិញនៅចុងឆ្នាំនេះ វាជាពន្លឺមួយក្នុងការបង្ហាញថា វិស័យទេសចរ ពិសេសការធ្វើដំណើររបស់អ្នកទេសចរ ដែលក្នុងក៏នឹងអាចជួយដឹកនាំមកនូវអ្នកវិនិយោគបរទេសមកកម្ពុជា។

លោក Crispian Knowles បានថ្លែងដូច្នេះថា “វិស័យអចលនទ្រព្យកម្ពុជានឹងអាចងើបឡើងវិញនៅត្រីមាសទី១ ឆ្នាំ២០២២ ដោយសារតែយើងមើលទៅលើសេដ្ឋកិច្ចពិភពលោក ដែលកំពុងតែមានការរីកចម្រើនឡើងវិញ”។លោកបន្តថា “ការរស់នៅតាមបែបគន្លងថ្មី ដែលនឹងធ្វើឲ្យវិនិយោគិនអាចសម្របខ្លួន ទៅតាមគន្លងថ្មីនៃការវិនិយោគ ដែលជំរុញឲ្យការធ្វើដំណើរ និងការវិនិយោគមានកាន់តែច្រើនឡើងវិញ”។

បើទោះជាយ៉ាងណា លោករំពឹងទុកថា វិស័យអចលនទ្រព្យអាចនឹងងើបឡើងវិញក្នុងល្បឿនមួយយឺត ដោយសារតែវិបត្តិកូវីដ១៩ មិនទាន់អាចដឹងថាវានឹងអាចផុតរលត់នៅពេលណានោះទេ។

ជាមួយគ្នានេះ លោក Phillip Tan គ្រប់គ្រងផ្នែកទីផ្សារក្រុមហ៊ុន Propnex Cambodia ដែលបទពិសោធន៍ច្រើនឆ្នាំនៅតំបន់អាស៊ីអាគ្នេយ៍ និងកម្ពុជា បានថ្លែងផងដែរថា កម្ពុជាគឺជាទឹកដីនៃឱកាសវិនិយោគ លើវិស័យអចលនទ្រព្យសម្រាប់វិនិយោគិ​នជាតិ និងអចលនទ្រព្យ ពិសេសទីក្រុងភ្នំពេញ ហើយទោះបីជាវិបត្តិ វិនិយោគគួរមកទុនវិនិយោគលើវិស័យអចលនទ្រព្យនៅកម្ពុជា។

លោកបានថ្លែងបន្តថា “កម្ពុជានៅតែមានសក្តានុពល ក្នុងការទាញយកផលចំណេ​ញពីវិស័យអចលនទ្រព្យ ដោយសារតម្លៃអចលនទ្រព្យនៅកម្ពុជា នៅតម្លៃទាបនៅឡើយ បើប្រៀបធៀបតម្លៃអចលនទ្រព្យនៅក្នុងតំបន់”។
លោកបានឱ្យដឹងទៀតថា វិស័យអចលនទ្រព្យនៅកម្ពុជា នឹងរីកចម្រើនកាន់តែខ្លាំងថែមទៀតនាពេលអនាគត បន្ទាប់វិបត្តិកូវីដ១៩ ព្រោះវិស័យមួយនេះនៅកម្ពុជា នៅតែទាមទារឱ្យការអភិវឌ្ឍជាច្រើនទៀត៕

ដោយៈស៊ីវ ម៉េង

ភ្នំពេញៈ មជ្ឈមណ្ឌលពាណិជ្ជកម្មភ្លោះកំពស់៤២ជាន់ របស់ក្រុមហ៊ុនថៃ ប៊ុនរ៉ុងបាននិងកំពុងសាងសង់យ៉ាងសកម្ម និងគ្រោងបញ្ចប់នៅឆ្នាំ២០២៣ខាងមុខនេះ។

លោកសាស្រ្តាចារ្យទួស សាភឿនប្រធានក្រុមវិស្វករប្រចាំក្រុមហ៊ុនថៃ ប៊ុនរ៉ុងបានមានប្រសាសន៍ឲ្យដឹងនារសៀលថ្ងៃទី២៣ កក្កដាកន្លងមកថា មជ្ឈមណ្ឌលពាណិជ្ជកម្មនេះបានបញ្ចប់ការសាងសង់គ្រឹះហើយ និងកំពុងឡើងដល់ជាន់ទី៤ហើយ ដែលក្នុងដំណា​ក់កាលនេះ គឺនឹងធ្វើឲ្យការសាងសង់លឿន ដែលយើងគ្រោងនឹងបញ្ចប់នៅឆ្នាំ២០២៣ខាងមុខនេះ។

លោកបន្តថា “មជ្ឈមណ្ឌលពាណិជ្ជកម្មតម្លៃរាប់រយលានដុល្លារនេះ នឹងរួមបញ្ចូលជាមួយសណ្ឋាគារ ការិយាល័យ អាផាតម៉ិន មជ្ឈមណ្ឌលកំសាន្ត និងសេវាកម្មជាច្រើនទៀត”។ លោកបន្តថា “វានឹងផ្លាស់ប្តូរមុខមាត់ក្រុងកំពតមួយកម្រិតទៀត នៅពេលអាគារនេះសាងសង់ចប់”។

លោកសាស្រ្តាចារ្យទួស សាភឿនបានបន្តថា ដំណើរការសាងសង់គំរោងនេះ កំពុងឆ្ពោះទៅមុខយ៉ាងរលូន ដោយមិនមានឧបសគ្គអ្វីនោះទេ ហេតុនេះយើងរំពឹងថាអ្វីៗនឹងបញ្ច​ប់តាមការគ្រោងទុក។

អភិបាលខេត្តកំពត លោកជាវ តាយបានមានប្រសាសន៍ឲ្យដឹងកាលពីពេលថ្មីៗនេះផងដែរថា ក្រៅពីវត្តមានអាគារកប់ពពកថៃ ប៊ុនរ៉ុង ក្រុងកំពតនឹងមានអាគារខ្ពស់ៗជាង១០ជាន់ ២០ជាន់ជាច្រើនទៀត ដែលនឹងលេចរូបរាងនាពេលខាងមុខ ខណៈបច្ចុប្បន្នគំរោងទាំងនោះបាននិងកំពុងសាងសង់ និងខ្លះទៀតកំពុងសុំច្បាប់សាងសង់។

លោកបន្តថា “ទោះបីជាមានវិបត្តិកូវីដ១៩ ប៉ុន្តែគម្រោងវិនិយោគទាំងតូច និងធំនៅក្រុងកំពត ពិសេសទូទាំងខេត្តមិនបានបញ្ឈប់ឬផ្អាកការសាងសង់នោះទេ”៕