ក្រុមហ៊ុនយក្ស Facebook មានគម្រោងជួលមនុស្ស១០.០០០នាក់នៅសហភាពអឺរ៉ុប ដើម្បីបង្កើតពិភពMetaverse ដ៏អស្ចារ្យ

ដោយៈសុខុម

សេអ៊ូល: ក្រុមហ៊ុនបណ្ដាញទំនាក់ទំនងសង្គមខ្នាតយក្ស Facebook នៅថ្ងៃច័ន្ទ ទី១៨ តុលា នេះបានប្រកាសផែនការជួលមនុស្ស រហូតដល់ទៅ១០.០០០នាក់នៅសហភាពអឺរ៉ុប ដើម្បីបង្កើតពិភព Metaverse ដ៏អស្ចារ្យ។

យោងតាមការចុះផ្សាយរបស់សារព័ត៌មាន Korea Times បានឱ្យដឹងថា ការបង្កើតពិភព Metaverse នេះគឺជាគំនិតផ្ដួចផ្ដើមរបស់លោក Mark Zuckerberg នាយកប្រតិបត្តិក្រុមហ៊ុន Facebook។

តើអ្វីទៅជា Metaverse?

Metaverse គឺជាពិភពសិប្បនិម្មិត ដែលអាចឱ្យយើងចូលលេងទីនោះបានតាមរយៈការភ្ជាប់អ៊ីនធឺណិត និងពាក់វែនតាបច្ចេកវិទ្យារបស់ VR (Virtual Reality)។ ពេលភ្ជាប់រួចរាល់ហើយ វានឹងធ្វើឱ្យមនុស្ស២នាក់ ដែលនៅកន្លែងផ្សេងគ្នាមានអារម្មណ៍ហាក់ដូចជួបគ្នាគ្នាដោយផ្ទាល់យ៉ាងអស្ចារ្យ ទោះបីជាពួកគេនៅឆ្ងាយពីគ្នាចម្ងាយរាប់ពាន់គីឡូម៉ែត្រក្ដី។

ក្រុមហ៊ុន Facebook បានលើកឡើងតាមរយៈប្លក់មួយថា ” Metaverse មានសក្តានុពលជួយត្រួសត្រាយផ្លូវ ឆ្ពោះទៅកាន់ឱកាសសេដ្ឋកិច្ច និងសង្គមប្រកបដោយភាពច្នៃប្រឌិតថ្មី។ ហើយពលរដ្ឋអឺរ៉ុប នឹងក្លាយជាអ្នកអភិវឌ្ឍវាឡើងពីចំណុចចាប់ផ្ដើមដំបូង។ ថ្ងៃនេះ យើងប្រកាសផែនការបង្កើតការងារជំនាញ កម្រិតខ្ពស់ថ្មីៗចំនួន១០,០០០កន្លែងនៅសហភាពអឺរ៉ុប ក្នុងរយៈពេល៥ឆ្នាំខាងមុខ”។

ការជួលមនុស្សធ្វើការនៅសហភាពអឺរ៉ុប នេះនឹងរួមមានទាំងវិស្វករជំនាញជាន់ខ្ពស់ផងដែរ។ ទោះជាយ៉ាងណា ក្រុមហ៊ុននេះបានផ្តល់ព័ត៌មានលម្អិត តិចតួចណាស់អំពីផែនការរបស់ខ្លួនសម្រាប់ក្រុមបង្កើត Metaverse ថ្មីនេះ។

ក្រុមហ៊ុន Facebook បានធ្វើការកត់សម្គាល់ថា “សហភាពអឺរ៉ុប មានគុណសម្បត្តិជាច្រើន ដែលធ្វើឱ្យវាក្លាយជាកន្លែងដ៏ល្អ សម្រាប់បណ្ដាក្រុមហ៊ុនបច្ចេកវិទ្យា បោះទុនវិនិយោគ ព្រោះវាជាទីផ្សារធំដែលមានអ្នកប្រើប្រាស់ច្រើន សម្បូរដោយសាកលវិទ្យាល័យលំដាប់ថ្នាក់លេខ១ ហើយចំណុចដ៏សំខាន់មួយទៀត គឺទីនេះសម្បូរដោយមនុស្សដែលមានទេពកោសល្យខ្ពស់”៕  Korea Times ៕

ធនាគារអភិវឌ្ឍន៍អាស៊ីផ្ដល់កម្ចី៤០លានដុល្លារសម្រាប់ការអភិវឌ្ឍវិស័យSMEs នៅកម្ពុជា

         ដោយៈលក្ខិណា

ភ្នំពេញៈ ធនាគារអភិវឌ្ឍន៍អាស៊ី(ADB) បានអនុម័តប្រាក់កម្ចីផ្តោតលើគោលនយោ​បាយចំនួន៤០លានដុល្លារ ដើម្បីគាំទ្រដល់កិច្ចខិតខំប្រឹងប្រែង របស់រាជរដ្ឋាភិបាលកម្ពុជា ក្នុងការពង្រីកលទ្ធភាពទទួលបានឥណទាន ក្នុងចំណោមសហគ្រាសធុនតូច និងមធ្យម (MSMEs) និងអនុវត្តកំណែទម្រង់ ដើម្បីជំរុញស្ថិរភាពហិរញ្ញវត្ថុនិងធ្វើឱ្យប្រសើរឡើងនូវ ហេដ្ឋា រចនាសម្ព័ន្ធវិស័យហិរញ្ញវត្ថុ។

យោងតាមសេចក្ដីប្រកាសព័ត៌មានរបស់ធនាគារអភិវឌ្ឍន៍អាស៊ីឱ្យដឹងថា ប្រាក់កម្ចីនេះជាកម្មវិធីរងទី៣នៃកម្មវិធីអភិវឌ្ឍន៍ វិស័យហិរញ្ញវត្ថុប្រកបដោយបរិយាប័ន្ន បន្ទាប់ពីកម្មវិធីរង ចំនួនពីរពីមុនដែលត្រូវបានអនុវត្តពីឆ្នាំ ២០១៦ ដល់ឆ្នាំ ២០១៩ ដើម្បីជួយកម្ពុជាអភិវឌ្ឍវិស័យហិរញ្ញវត្ថុ ប្រកបដោយប្រសិទ្ធភាព និងស្ថិរភាពតាមរយៈការជំរុញបរិយាប័ន្នហិរញ្ញវត្ថុនិងស្ថិរភាពហិរញ្ញវត្ថុ។

លោកស្រីBenita Ainabe អ្នកឯកទេសផ្នែកហិរញ្ញវត្ថុ របស់ធនាគារអភិវឌ្ឍន៍អាស៊ី បានមានប្រសាសន៍ថា រាជរដ្ឋាភិបាលកម្ពុជាបានបោះជំហានយ៉ាងសំខាន់ ក្នុងការរក្សាស្ថិរភាពហិរញ្ញវត្ថុ និងធ្វើឱ្យការគ្រប់គ្រងវិបត្តិមានភាពប្រសើរឡើង ក្នុងពេលមានជំងឺរាត​ត្បាតកូវីដ១៩។ តាមរយៈកម្មវិធីរងថ្មីនេះ រាជរដ្ឋាភិបាលបានអនុម័តច្បាប់សំខាន់ៗ ដែលគាំទ្រដល់យុទ្ធសាស្រ្តបរិយាប័ន្នហិរញ្ញវត្ថុជាតិ និងបានផ្តួចផ្តើមគំនិតជាច្រើន ដើម្បីបង្កើនលទ្ធភាពទទួលបានហិរញ្ញវត្ថុ រួមទាំងគម្រោងធានាឥណទានសាធារណៈ (public credit guarantee scheme)សម្រាប់សហគ្រាសធុនតូច និងមធ្យមដំបូងគេនៅកម្ពុជាផងដែរ។

នៅកម្ពុជាលទ្ធភាពទទួលបានផលិតផល និង សេវាកម្មហិរញ្ញវត្ថុ សម្រាប់ពលរដ្ឋក្រីក្រ នៅមានកម្រិត ហើយចំណេះដឹងផ្នែកហិរញ្ញវត្ថុនៅទាប។ មានតែ២១,៧% នៃប្រជាពលរដ្ឋពេញវ័យរបស់ប្រទេស ប៉ុណ្ណោះដែលមានគណនីធនាគារ ហើយMSMEs ប្រឈ​មការលំបាក ដើម្បីទទួលបានហិរញ្ញប្បទាន និងធានារ៉ាប់រងខ្នាតតូច។ អាជីវកម្មជារឿយ​ៗ ត្រូវបានរារាំងដោយលទ្ធភាពទទួលបានហិរញ្ញវត្ថុរយៈពេល វែងដោយសារកង្វះវត្ថុបញ្ចាំ ការមិនទាន់ទទួលបានការគាំទ្រពីរាជរដ្ឋាភិបាល ដូចជាសម្រាប់ការធានា និងអន   ក្ខរភាពហិរញ្ញវត្ថុ។ មានតែប្រជាពលរដ្ឋកម្ពុជា១៨% ប៉ុណ្ណោះដែលត្រូវបានចាត់ទុកថាមានចំណេះដឹងផ្នែកហិរញ្ញវត្ថុ។

ជំងឺរាតត្បាត ការផ្តល់ប្រាក់កម្ចីអចលនទ្រព្យ (real estate lending) និង កំណើនឥណទាន លឿន (faster credit growth) បានបង្កើនហានិភ័យ ដល់ស្ថិរភាពហិរញ្ញវត្ថុរបស់កម្ពុជា។ ហេដ្ឋារចនា សម្ព័ន្ធហិរញ្ញវត្ថុរបស់ប្រទេស មិនទាន់បានអភិវឌ្ឍពេញលេញ ដែលជាកត្តាប្រឈមដល់លទ្ធភាពទទួល បានហិរញ្ញវត្ថុនិងការអភិវឌ្ឍទីផ្សារ។

កម្មវិធីរងថ្មីនេះ គាំទ្រកិច្ចខិតខំប្រឹងប្រែងរបស់រាជរដ្ឋាភិបាល ក្នុងការជួយដល់សហ​គ្រាសធុនតូច និងមធ្យម (MSMEs) ឱ្យងើបឡើងពីជំងឺរាតត្បាត តាមរយៈការពង្រី​កលទ្ធភាពទទួលបានឥណទាន។ វាក៏ជួយដល់កំណែទម្រង់ហិរញ្ញវត្ថុ ដើម្បីពង្រឹងស្ថិរភាពហិរញ្ញវត្ថុ រួមទាំងការត្រួតពិនិត្យស្ថាប័នអន្តរវិស័យ ឱ្យកាន់តែប្រសើរឡើង ពង្រឹងការគ្រប់គ្រងហានិភ័យឥណទាន និងគាំទ្រប្រព័ន្ធទូទាត់ប្រកបដោយភាពច្នៃប្រឌិត៕

វិបត្តិក្រុមហ៊ុនអភិវឌ្ឍន៍ Evergrande ឆ្លុះបញ្ចាំងពីវិបត្តិយ៉ាងធំក្នុងទីផ្សារអចលនទ្រព្យចិន ដែលសម្បូរទៅដោយទីក្រុងខ្មោច

ដោយ សុខុម

វិភាគ: ស្ថានភាពវិបត្តិក្រុមហ៊ុនអភិវឌ្ឍន៍អចលនទ្រព្យចិន Evergrande នៅតែធ្វើឱ្យពិភពលោកផ្ដោតការចាប់អារម្មណ៍យ៉ាងខ្លាំងនៅរយៈពេលចុងក្រោយនេះ។ ទោះជាយ៉ាងណា វាគ្រាន់តែជាចំណែកតូចមួយប៉ុណ្ណោះនៃវិបត្តិយ៉ាងធំនៅក្នុងទីផ្សារអចលនទ្រព្យចិន ដែលសម្បូរទៅដោយទីក្រុងខ្មោចដែលយើងនឹកស្មានមិនដល់។

រយៈពេលជាច្រើនសប្តាហ៍មកនេះ វិបត្តិក្រុមហ៊ុនអភិវឌ្ឍន៍អចលនទ្រព្យចិន មួយនេះត្រូវបានសារព័ត៌មានជាតិ និងអន្តរជាតិចុះផ្សាយព្រោងព្រាតទូទាំងពិភពលោក ខណៈបណ្ដាវិនិយោគិនរង់ចាំមើលថាតើនឹងមានអ្វីកើតឡើងចំពោះបំណុលគរដូចភ្នំរហូតដល់ទៅជាង៣០០ពាន់លានដុល្លារអាមេរិក ដែលក្រុមហ៊ុននេះជំពាក់។

ហើយខណៈវិបត្តិក្រុមហ៊ុននេះមិនទាន់ដោះស្រាយចប់ ក្រុមអ្នកវិភាគបានធ្វើការវិភាគលើបញ្ហាមួយដែលកាន់ស៊ីជម្រៅជាងនេះ។ ការវិភាគនោះគឺ៖ ទីផ្សារអចលនទ្រព្យរបស់ប្រទេសចិន កំពុងដាំក្បាលចុះយ៉ាងខ្លាំង បន្ទាប់ពីការផ្គត់ផ្គង់មានច្រើនលើសលប់បើធៀបនឹងតម្រូវការជាក់ស្ដែងក្នុងរយៈពេលជាច្រើនឆ្នាំមកនេះ។

នៅទីបំផុត អាជ្ញាធរចិន បានចេញមុខអន្តរាគមន៍ដោះស្រាយវិបត្តិក្រុមហ៊ុនអភិវឌ្ឍន៍អចលនទ្រព្យ Evergrande កាលពីថ្ងៃសុក្រ សប្ដាហ៍កន្លងទៅ។ ធនាគារប្រជាជនចិន (People’s Bank of China) ដែលជាធនាគារកណ្ដាលនៃប្រទេសចិន បាននិយាយថា ក្រុមហ៊ុនអភិវឌ្ឍន៍មួយនេះគ្រប់គ្រងអាជីវកម្មរបស់ខ្លួនមិនបានល្អឡើយ ប៉ុន្តែអះអាងថា ហានិភ័យដែលវិបត្តិក្រុមហ៊ុននេះបង្កឡើងចំពោះប្រព័ន្ធហិរញ្ញវត្ថុគឺអាចគ្រប់គ្រងបាន។

មន្ត្រីជាន់ខ្ពស់ Zou Lan ដែលជាប្រធាននាយកដ្ឋានទីផ្សារហិរញ្ញវត្ថុនៃធនាគារកណ្តាលចិន បានថ្លែងក្នុងសន្និសីទសារព័ត៌មានកាលពីពេលថ្មីៗនេះថា “ក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុននេះគ្រប់គ្រងអាជីវកម្មរបស់ខ្លួនមិនបានល្អ និងមិនបានសម្របខ្លួនទៅតាមការប្រែប្រួលនៃទីផ្សារឡើយ។ ផ្ទុយទៅវិញ ក្រុមហ៊ុននេះបែរជាធ្វើពិពិធកម្ម និងពង្រីកអាជីវកម្មរបស់ខ្លួនដោយងងឹតងងល់ ដែលជាហេតុធ្វើឱ្យប្រតិបត្តិការ និងហិរញ្ញវត្ថុរបស់ខ្លួនមានបញ្ហាកាន់តែធ្ងន់ធ្ងរដែលទីបំផុតឈានទៅដល់ហានិភ័យ”។

តាមពិតទៅ នៅមុនពេលផ្ទុះវិបត្តិក្រុមហ៊ុនហ៊ុន Evergrande គឺលេចចេញសញ្ញាព្រមានជាយូរមកហើយ នោះគឺអាផាតម៉ិនរាប់សិបលានយូនីតនៅទំនេរចោលដែលគ្មានមនុស្សរស់នៅមានពាសពេញប្រទេសចិន។ ក្នុងរយៈពេលប៉ុន្មានឆ្នាំចុងក្រោយនេះ បញ្ហានេះកាន់តែធ្ងន់ធ្ងរទៅៗ។

លោក Mark Williams សេដ្ឋវិទូជាន់ខ្ពស់ប្រចាំតំបន់អាស៊ី នៃក្រុមហ៊ុនស្រាវជ្រាវសេដ្ឋកិច្ចឯករាជ្យ Capital Economics ដែលមានមូលដ្ឋាននៅប្រទេសអង់គ្លេស បានប៉ាន់ប្រមាណថា ប្រទេសចិន នៅមានលំនៅដ្ឋានលក់មិនទាន់ចេញប្រហែល៣០លានយូនីត ដែលអាចផ្ទុកមនុស្សបានរហូតដល់ទៅ៨០លាននាក់ ពោលគឺស្ទើរតែស្មើចំនួនប្រជាជនអាល្លឺម៉ង់ ទូទាំងប្រទេសទៅហើយ។

ក្រុមហ៊ុន Capital Economics ប៉ាន់ប្រមាណថា លើសពីនេះទៀតលំនៅដ្ឋានប្រហែល១០០លានយូនីតដែលអាចផ្ទុកមនុស្សបានប្រហែល២៦០លាននាក់ ទំនងជាត្រូវបានទិញទុកចោលដោយគ្មានមនុស្សរស់នៅ។ គម្រោងបែបនេះបានទាក់ទាញឱ្យអាជ្ញាធរមានសមត្ថកិច្ចចុះត្រួតពិនិត្យជាច្រើនឆ្នាំមកហើយ ហើយថែមទាំងត្រូវបានគេហៅថា “ទីក្រុងខ្មោច” របស់ប្រទេសចិន ថែមទៀតផង។

ឥឡូវសូមងាកមកស្វែងយល់អំពីគម្រោងមួយចំនួនក្នុងចំណោមគម្រោងទាំងនោះ និងសិក្សាពីឫសគល់នៃបញ្ហាដែលបានកើតឡើង។

យោងតាមលោក Mark Williams ដែលជាអ្នកជំនាញអន្តរជាតិឱ្យដឹងថា វិស័យអចលនទ្រព្យ និងវិស័យពាក់ព័ន្ធគឺជាចំណែកដ៏ធំមួយនៃសេដ្ឋកិច្ចរបស់ប្រទេសចិន ដែលគ្របដណ្ដប់រហូតដល់ទៅ៣០%នៃផលិតផលក្នុងស្រុកសរុប (GDP)។

អស់រយៈពេលរាប់ទសវត្សរ៍មកហើយដែលវិស័យអចលនទ្រព្យ និងវិស័យពាក់ព័ន្ធបានជួយប្រទេសនេះឱ្យទទួលបានកំណើនសេដ្ឋកិច្ចយ៉ាងឆាប់រហ័ស។

ប៉ុន្តែរយៈពេលជាច្រើនឆ្នាំមកនេះ ក្រុមអ្នករិះគន់បានចោទសួរថា តើវិស័យអចលនទ្រព្យ និងវិស័យពាក់ព័ន្ធដែលជាក្បាលម៉ាស៊ីនជំរុញកំណើនសេដ្ឋកិច្ចរបស់ប្រទេសចិន ដែលជាសេដ្ឋកិច្ចធំបំផុតទី២ ក្នុងពិភពលោកអាចនឹងផ្ទុះវិបត្តិធ្ងន់ធ្ងរនៅពេលណា? ការចោទសួរបែបនេះធ្វើឡើងដោយសារតែក្រុមហ៊ុនអភិវឌ្ឍន៍អចលនទ្រព្យជាច្រើនបានខ្ចីបុលយ៉ាងច្រើនសន្ធឹកសន្ធាប់ ដើម្បីយកលុយមកចាប់ផ្ដើមគម្រោងរបស់ពួកគេ។

តួយ៉ាង ក្រុមហ៊ុន Evergrande បានក្លាយជាក្រុមហ៊ុនអភិវឌ្ឍន៍អចលនទ្រព្យដែលជំពាក់បំណុលច្រើនបំផុតរបស់ប្រទេសចិន រហូតដល់ទៅជាង៣០០ពាន់លានដុល្លារ ហើយវាបានក្លាយជាករណីមួយដែលឆ្លុះបញ្ចាំងពីកំណើនសេដ្ឋកិច្ចដែលមិនប្រកបដោយនិរន្តរភាពរបស់ប្រទេសចិន។

លោកស្រី Christina Zhu អ្នកជំនាញសេដ្ឋកិច្ចនៅក្រុមហ៊ុនវិភាគទីផ្សារន្តរជាតិ Moody’s Analytics បានលើកឡើងថា “មិនមែនមានតែក្រុមហ៊ុន Evergrande មួយទេដែលកំពុងជួបការលំបាក”។ ក្នុងរយៈពេលប៉ុន្មានថ្ងៃចុងក្រោយនេះ ក្រុមហ៊ុនអភិវឌ្ឍន៍អចលនទ្រព្យជាច្រើនផ្សេងទៀតបានទម្លាយឱ្យដឹងថា ពួកគេកំពុងមានបញ្ហារំហូរសាច់ប្រាក់ ពោលគឺស្ទះលុយយ៉ាងខ្លាំង ហើយបានស្នើសុំទៅម្ចាស់បំណុលដើម្បីពន្យារពេលសងបំណុល ឬបានជូនដំណឹងជាមុនថា ខ្លួនអាចនឹងខកខានក្នុងការសងបំណុលទាន់ពេលវេលា។

នៅក្នុងរបាយការណ៍កាលពីពេលថ្មីៗនេះ លោកស្រី Christina Zhu បានសរសេរថា ក្រុមហ៊ុនអចលនទ្រព្យចិន ចំនួន១២ហើយដែលបានខកខានក្នុងការសងបំណុលថ្លៃសញ្ញាប័ណ្ណសរុបជិត៣ពាន់លានដុល្លារ នៅឆមាសទី១ ដើមឆ្នាំ២០២១ នេះ។

លោកស្រីបានបន្ថែមថា “តួលេខនេះគឺស្មើជិត២០%នៃការខកខានសងបំណុលថ្លៃសញ្ញាប័ណ្ណសរុបក្នុងរយៈពេល៦ខែដំបូងនៃឆ្នាំនេះ ដែលជាអត្រាខ្ពស់បំផុតនៅគ្រប់វិស័យ” នៅចិនដីគោក។

វិបត្តិកូវីដ-១៩ បានធ្វើឱ្យសកម្មភាពនានាស្ទើរតែជាប់គាំងទាំងស្រុង។ ប៉ុន្តែក្រោយមកសកម្មភាពសាងសង់បានផ្ដើមដំណើរការឡើងវិញ នៅពេលប្រទេសចិន បើកប្រទេសឡើងវិញ ហើយទីផ្សារអចលនទ្រព្យរបស់ប្រទេសចិន ក៏ទទួលបានកំណើនរយៈពេលខ្លី។ ទោះជាយ៉ាងណា ចាប់តាំងពីពេលនោះមកទីផ្សារនេះបានដាំក្បាលចុះជាថ្មីឈានទៅដល់វិបត្តិធ្ងន់ធ្ងរ ដែលបានបង្កចលាចលពេញវិស័យអចលនទ្រព្យក្នុងប្រទេសចិន និងបានធ្វើឱ្យទីផ្សារពិភពលោករងភាពរង្គោះរង្គើ។

អ្នកជំនាញមើលឃើញថា វិបត្តិធ្ងន់ធ្ងរក្នុងវិស័យអចលនទ្រព្យក្នុងប្រទេសចិន មិនងាយនឹងធូរស្រាលក្នុងពេលឆាប់ៗនេះឡើយ៕ CNN៕

នាវា HMAS Anzac របស់កងនាវាចរភូមិន្ទអូស្រ្តាលី នឹងមកទស្សនកិច្ចនៅកម្ពុជានៅថ្ងៃនេះ

ដោយៈ សុផារី

ព្រះសីហនុៈ នាវាចម្បាំង HMAS Anzac នឹងធ្វើទស្សនកិច្ច នៅខេត្តព្រះសីហនុ ចាប់ពីថ្ងៃទី១៨ ដល់ថ្ងៃទី២០ ខែតុលា ដែលជាផ្នែកមួយនៃសកម្មភាពចូលរួម ក្នុងតំបន់របស់នាវាបញ្ជាការ IPE 21។

នេះជាដំណើរទស្សនកិច្ច របស់កងនាវាចរភូមិន្ទអូស្រ្តាលី លើកដំបូងមកកាន់ប្រទេសកម្ពុជា ចាប់តាំងពីឆ្នាំ ២០១៦ មក ហើយនឹងធ្វើដំណើរទស្សនកិច្ច ដោយគ្មានការប៉ះពាល់ផ្ទាល់ ដោយសារជំងឺកូវីដ-១៩។ នេះបើយោងតាមការផ្សព្វផ្សាយរបស់ ស្ថានទូតអូស្រ្តាលីប្រចាំនៅកម្ពុជា នាព្រឹកថ្ងៃទី១៧ ខែតុលា ឆ្នាំ២០២១ នេះ។

តាមរយៈការប្រកាសនេះដែរ នាវា HMAS Anzac នាំយកមកជាមួយនូវសម្ភារៈការពារផ្ទាល់ខ្លួន (PPE) និងសម្ភារៈវេជ្ជសាស្រ្តទាក់ទងនឹងជំងឺកូវីដ-១៩ មួយចំនួនទៀត ដើម្បីជួយដល់ខេត្តព្រះសីហនុ និងកងយោធពលខេមរភូមិន្ទកម្ពុជា ក្នុងការប្រយុទ្ធប្រឆាំងនឹងជំងឺកូវីដ-១៩ ។

អូស្រ្តាលីបានបង្ហាញក្តីរីករាយ ក្នុងការនាំយកសកម្មភាពចូលរួម ក្នុងតំបន់របស់ខ្លួន ដែលមានឈ្មោះថា សកម្មភាពចូលរួមក្នុងតំបន់របស់នាវាបញ្ជាការ Indo-Pacific Endeavour 2021 ត្រលប់មកអាស៊ីអាគ្នេយ៍នៅឆ្នាំនេះ។

បន្ថែមលើសនេះ ដំណើរទស្សនកិច្ចនេះ ក៏ផ្តល់ឱកាសសម្រាប់ការបង្កើតកិច្ចសហប្រតិបត្តិការកងទ័ពជើងទឹកជាក់ស្តែងរបស់យើង និងផ្លាស់ប្តូរយោបល់អំពីសន្តិភាព និងសន្តិសុខស្ត្រី តាមរយៈសិក្ខាសាលាអនឡាន ដែលនឹងត្រូវរៀបចំឡើងក្នុងអំឡុងពេលដំណើរទស្សនកិច្ចនេះ៕

ក្រុមហ៊ុនថ្មីមួយគ្រោងបោះទុនជាង៤លានដុល្លារបង្កើតរោងចក្រកាត់ដេរសម្លៀកបំពាក់នៅខេត្តកំពង់ស្ពឺ

ដោយៈ សុផារី

ខេត្តកំពង់ស្ពឺៈ ដោយមើលឃើញឱ្យកាសវិនិយោគនៅក្នុងប្រទេសកម្ពុជា មានក្រុមហ៊ុនជាច្រើន បានមកដាក់ពាក្យស្នើសុំធ្វើការវិនិយោគ នៅក្នុងប្រទេសកម្ពុជាជាបន្តបន្ទាប់។ ហើយថ្មីៗនេះ ក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញវិញ្ញាបនបត្រចុះបញ្ជីជាស្ថាពរជូនដល់ក្រុមហ៊ុន LASTINGWINNER GARMENT (CAMBODIA) CO., LTD ដើម្បីបង្កើតរោងចក្រកាត់ដេរសម្លៀកបំពាក់នៅកម្ពុជា។

យោងតាមក្រុមប្រឹក្សាអភិវឌ្ឍន៍កម្ពុជា(CDC)បានឱ្យដឹងថា តាមសំណើរវិនិយោគលើគម្រោងបង្កើតរោងចក្រ កាត់ដេរសម្លៀកបំពាក់របស់ក្រុមហ៊ុន LASTINGWINNER GARMENT (CAMBODIA) CO., LTD គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនខាងលើនេះ ដែលមានទីតាំងវិនិយោគ ស្ថិតនៅតាមបណ្តោយផ្លូវជាតិលេខ៣ នៅក្នុងភូមិល្វា ឃុំអង្គពពេល ស្រុកគងពិសី ខេត្តកំពង់ស្ពឺ ដែលមានទុនវិនិយោគប្រមាណជា ៤,២លានដុល្លារអាមេរិក និងអាចបង្កើតការងារជូនពលរដ្ឋធ្វើបានចំនួន ១.៣១៤កន្លែង។

វិស័យកាត់ដេរសម្លៀកបំពាក់ និងស្បែកជើងបានដើរតួនាទីយ៉ាងសំខាន់ក្នុងការអភិវឌ្ឍន៍សេដ្ឋកិច្ចកម្ពុជា។
បើយោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជាបានឱ្យដឹងថា កម្ពុជាបាននាំចេញផលិតផលសម្លៀកបំពាក់ ស្បែកជើង ផលិតផលធ្វើដំណើរ និងផលិតផលវាយនភណ្ឌផ្សេងទៀតក្នុងតម្លៃជាង៤,៧ពាន់លានដុល្លារ កាលពីឆមាសទី១ ឆ្នាំ ២០២១គឺមានការកើនឡើងតិចតួច បើធៀបនឹងរយៈពេលដូចគ្នាកាលឆ្នាំមុន៕

មហាយក្សចិនឆេះដុំ ខណៈអាមេរិក និងកាណាដាបញ្ជូននាវាចម្បាំងឆ្លងកាត់ច្រកសមុទ្រតៃវ៉ាន់

ដោយៈសុខុម

តៃប៉ិ: យោធារបស់មហាយក្សចិន កាលពីថ្ងៃអាទិត្យ ទី១៧ តុលា បានថ្កោលទោសសហរដ្ឋអាមេរិក និងកាណាដា ធ្ងន់ៗចំពោះការបញ្ជូននាវាចម្បាំងរបស់ខ្លួន ឆ្លងកាត់ច្រកសមុទ្រតៃវ៉ាន់ ឬ Taiwan Strait កាលពីមួយសប្តាហ៍មុននេះ ហើយអះអាងថា ប្រទេសទាំង២ កំពុងគំរាមកំហែងដល់សន្តិភាព និងស្ថិរភាពក្នុងតំបន់។

ប្រទេសចិន តែងតែអះអាងរហូតមកថា កោះតៃវ៉ាន់ ដែលគ្រប់គ្រងតាមលទ្ធិប្រជាធិបតេយ្យ ជាផ្នែកមួយនៃដែនដីរបស់ខ្លួន និងបានបញ្ជូនយន្តហោះចម្បាំងចូលទៅក្នុងតំបន់ការពារដែន អាកាសរបស់តៃវ៉ាន់ម្តងហើយម្តងទៀត ក្នុងរយៈពេលមួយឆ្នាំចុងក្រោយនេះ ដែលធ្វើឱ្យរដ្ឋាភិបាលក្រុងតៃប៉ិ នៃកោះតៃវ៉ាន់ ផ្ទុះកំហឹងយ៉ាងខ្លាំង។

ប្រទេសចិន បានបញ្ជូនយន្តហោះចម្បាំងប្រហែល១៥០គ្រឿង ចូលទៅក្នុងតំបន់ខាងលើនេះរយៈពេល៤ថ្ងៃ ចាប់ផ្តើមពីថ្ងៃទី១ តុលា ដល់ថ្ងៃទី៤ តុលា ហើយទង្វើនេះបានបង្កភាពតានតឹងកាន់តែខ្លាំង រវាងរដ្ឋាភិបាលក្រុងប៉េកាំង និងរដ្ឋាភិបាលក្រុងតៃប៉ិ ដែលបានធ្វើឱ្យអន្តរជាតិមានការព្រួយបារម្ភយ៉ាងខ្លាំង។

ជុំវិញបញ្ហានេះ យោធាអាមេរិក បានចេញសេចក្តីថ្លែងការណ៍ថា នាវាពិឃាតរបស់ខ្លួនធុន USS Dewey ដែលបំពាក់មីស៊ីលនាំផ្លូវឈ្មោះ Arleigh Burke បានធ្វើដំណើរឆ្លងកាត់ផ្លូវទឹកតូចចង្អៀត ដែលខណ្ឌចែកកោះតៃវ៉ាន់ ពីប្រទេសចិន រួមជាមួយនាវាចម្បាំង HMCS Winnipeg របស់កាណាដា កាលពីថ្ងៃព្រហស្បតិ៍ និងថ្ងៃសុក្រ កន្លងទៅ។

យោធាសហរដ្ឋអាមេរិកបានបន្ថែមថា “ការឆ្លងកាត់របស់នាវា Dewey និងនាវា Winnipeg កាត់តាមច្រកសមុទ្រតៃវ៉ាន់ បង្ហាញពីការប្តេជ្ញាចិត្តរបស់សហរដ្ឋអាមេរិក និងសម្ព័ន្ធមិត្ត ព្រមទាំងដៃគូរបស់យើង ចំពោះការរក្សាការពារតំបន់ឥណ្ឌូ-ប៉ាស៊ីហ្វិក ឱ្យមានលក្ខណៈសេរី និងបើកចំហ”។

ជាការឆ្លើយតបយោធាចិន បានចេញសេចក្ដីថ្លែងការណ៍ថា “សហរដ្ឋអាមេរិក និងកាណាដា បានឃុបឃិតគ្នាដើម្បីបង្កបញ្ហា ដែលធ្វើឱ្យប៉ះពាល់យ៉ាងធ្ងន់ធ្ងរ ដល់សន្តិភាព និងស្ថិរភាពនៃច្រកសមុទ្រតៃវ៉ាន់។ តៃវ៉ាន់ គឺជាផ្នែកមួយនៃទឹកដីរបស់ប្រទេសចិន។ កងទ័ពចិន តែងតែរក្សាការប្រុងប្រយ័ត្នកម្រិតខ្ពស់ និងប្រឆាំងដាច់ខាតចំពោះរាល់ការគំរាមកំហែង និងការបង្កហេតុ”។

នាវាកងទ័ពជើងទឹករបស់សហរដ្ឋអាមេរិក បានឆ្លងកាត់ច្រកសមុទ្រនេះ ប្រចាំខែ ដែលធ្វើឱ្យរដ្ឋាភិបាលក្រុងប៉េកាំងខឹងឆេះដុំ ហើយចោទប្រកាន់រដ្ឋាភិបាលក្រុងវ៉ាស៊ីន​តោនថា បានបង្កភាពតានតឹងក្នុងតំបន់។ ម្ដងម្កាលផងសម្ព័ន្ធមិត្តរបស់សហរដ្ឋអាមេរិក ក៏បញ្ជូននាវាចម្បាំងរបស់ខ្លួនឆ្លងកាត់ច្រកសមុទ្រនេះ ហើយក្នុងនោះរួមទាំងប្រទេសអង់គ្លេ​ស ដែលបានបញ្ជូននាវាចម្បាំងកាលពីខែមុនផងដែរ៕ Reuters៕

តំបន់ភ្នំវល្លរ៍នឹងទាក់ទាញការវិនិយោគរមណីដ្ឋាននិងដីឡូត៍លំហែរកាយកាន់តែច្រើន

ដោយៈគង់ សូរិយា

ភ្នំពេញៈ តំបន់ភ្នំវល្លរ៍ដែលមួយផ្នែកស្ថិតនៅក្នុងទឹកដីខេត្តកំពត និងមួយផ្នែកស្ថិតនៅក្នុងទឹកដីខេត្តកែប បាននិងកំពុងទាក់ទាញការវិនិយោគ លើរមណីយដ្ឋានលំហែរកាយ និងដីឡួត៍ប្រភេទលំហែរកាយកាន់តែច្រើននាពេលអនាគត។

ជាទីតាំងមួយមានភូមិសាស្រ្តអំណោយផល ដែលមានជួរភ្នំខៀវស្រងាត់ ដងព្រែក សណ្ឋានដីខ្ពស់ និងមានជីវជាតិ តំបន់នេះកំពុងមានប្រជាប្រិយភាពកាន់តែខ្លាំងពីមួយឆ្នាំ ទៅមួយឆ្នាំ។

អ្នកនាងឆយ ហ្រ្វីដាអគ្គនាយិកាក្រុមហ៊ុន Angel Realty បានមានប្រសាសន៍ឲ្យដឹងកាលពីថ្ងៃទី១៧ តុលាកន្លងមកថា តំបន់ភ្នំវល្លរ៍មានអតីតកាលដ៏ល្បីល្បាញ សម័យខ្មែរក្រហម ប៉ុន្តែអតីតកាលត្រូវបានជីកកប់ដោយពេលវេលា និងនាំមកនូវការអភិវឌ្ឍក្រោម​ការដឹកនាំរបស់ប្រមុខរាជរដ្ឋាភិបាលកម្ពុជា ដែលធ្វើឲ្យតំបន់នេះទាក់ទាញការវិនិយោគយ៉ាងច្រើន ពីអ្នកមានធនធាននានាពីរាជធានីភ្នំពេញ ដោយពួកគេវិនិយោគលើការដាំម្រេច ស្វាយ ធូរ៉េន ពិសេសវិនិយោគលើរមណីយដ្ឋានលំហែរកាយ និងដីឡួត៍លំហែរកាយផង និងកសិទេសចរណ៍ផង។

អ្នកនាងបានបន្តថា “ជាមួយនឹងលក្ខខ័ណ្ឌធម្មជាតិ អាចគយគន់ទេសភាពព្រៃភ្នំ ដងអូ និងអាចមើលឃើញសមុទ្រផង បានធ្វើឲ្យតំបន់នេះ ទាក់ទាញគំរោងវិនិយោគជាច្រើន”។ អ្នកនាងបន្តថា “នាពេលអនាគត ខ្ញុំគិតថាតំបន់នេះនឹងរីកចម្រើនលឿនលើគំរោងលំហែរកាយ ព្រោះដីតំបន់នេះមានតម្លៃសមរម្យនៅឡើយ ពិសេសមានទីតាំងមិនឆ្ងាយពីក្រុងកំពត និងក្រុងកែបនោះទេ”។

អ្នកនាងឆយ ហ្រ្វីដាបានបន្តថា បច្ចុប្បន្នអ្នកភ្នំពេញជាច្រើន បាននិងកំពុងទាក់ទងស្វែងរកទិញដីជាច្រើននៅតំបន់់នេះ ដែលធ្វើឲ្យអ្នកនាងកាន់តែមមាញឹក និងត្រូវឡើងចុះរវាងរាជធានីភ្នំពេញ និងខេត្តកំពត កែបកាន់តែញឹកញាប់បណ្តើរៗហើយ ខណៈខេត្តនេះ​នឹងមានការរីកចម្រើនលឿននាពេលអនាគតឆាប់ៗនេះ។

ជាមួយគ្នានេះ លោកទេព រាជបញ្ញាដែលជាម្ចាស់ក្រុមហ៊ុនអចលនទ្រព្យ និងវិនិយោគលើគំរោងមួយចំនួននៅខេត្តកំពត កែបបានមានប្រសាសន៍ឲ្យដឹងផងដែរថា តំបន់ភ្នំវល្លន៍កាន់តែមានភាពល្បីល្បាញខ្លាំង និងកំពុងទាក់ទាញការវិនិយោគច្រើន ដោយសារតែលក្ខខ័ណ្ឌទីតាំង ភាពអំណោយផលនៃធនធានធម្មជាតិ និងតម្លៃដីពិតជាមានភាពសមរម្យមែនទែន បើធៀបនឹងតំបន់ភាគច្រើននៃខេត្តកំពត និងខេត្តកែប។

លោកបន្តថា “តំបន់ភ្នំវល្លរ៍ប្រៀបដូចជាកូនក្រមុំមួយ ដែលមិនទាន់សូវចេះរៀបចំខ្លួននៅឡើយ និងកំពុងស្ថិតនៅចូលម្លប់ ប៉ុន្តែនៅពេលអនាគត តំបន់នេះនឹងរីកចម្រើនលឿន ពេលរដ្ឋាភិបាលប្រកាសបើកប្រទេសឡើងវិញ”។ លោកបន្តថា “និន្នាការទិញដីលំហែរកាយកំពុងកើនឡើង ដោយសារប្រជាពលរដ្ឋកាន់តែមានជីវភាពប្រសើរឡើង និងពលរដ្ឋកម្ពុជាកាន់តែផ្លាស់ប្តូរបែបផែនជីវិតថ្មី ដែលត្រូវការផ្ទះលំហែរ ក្រៅពីផ្ទះរស់នៅប្រចាំថ្ងៃ”៕

ខេត្តស្ទឹងត្រែងត្រៀមទទួលបានស្ពានថ្មីមួយទៀតនៅក្នុងស្រុកសេសាន

ដោយៈសុផារី

ស្ទឹងត្រែងៈ លោកស្វាយ សំអ៊ាង អភិបាលខេត្តស្ទឹងត្រែង បានដឹកនាំមន្រ្តីបច្ចេ​កទេស ចុះពិនិត្យវឌ្ឍនភាពការងារស្ថាបនាបេតុងមួយកន្លែងប្រវែង៦០ម៉ែត្រ ទទឹង៨ម៉ែត្រ ស្ថិតនៅភូមិបាដើម ឃុំសាមឃួយ ស្រុកសេសាន ដែលជាគម្រោងរបស់រាជរដ្ឋាភិបាល តាមរយៈមន្ទីរសាធារណការ និងដឹកជញ្ជូនខេត្ត គ្រោងនឹងបញ្ចប់នៅការដ្ឋាននៅចុងខែធ្នូ ឆ្នាំ២០២១។

លោកសរ គឹមណាត ប្រធានមន្ទីរសាធារណការខេត្តបានមានប្រសាសន៍ឲ្យដឹងកាលពីថ្ងៃម្សិលម៉ិញនេះថា ដើមឡើយ ស្ពានអូរបាដើមនេះ គឺជាស្ពានដែកបាឡេ ដែលមានលក្ខណៈ ចាស់ទ្រុឌទ្រោម នឹងបានរងការខូចខាតផងដែរ។ ក្រោយពីមើលឃើញពីការលំបាករបស់ប្រជាពលរដ្ឋក្នុងការធ្វើដំណើរ ទើបរាជរដ្ឋាភិបាលក៏បានជំរុញឲ្យស្ថាបនាឡើងវិញ ដោយធ្វើជាស្ពានបេតុង នេះហើយនឹងត្រូវដាក់ឲ្យប្រជាពលរដ្ឋ អាចធ្វើដំណើរបាននាចុងឆ្នាំ២០២១ ខាងមុខនេះ។

លោកស្វាយ សំអ៊ាង អភិបាលខេត្ត បានមានប្រសាសន៍ជំរុញមន្ត្រីជំនាញទាំងអស់ត្រូវសាងសង់ស្ថាបនា ស្ពានបេតុងមួយនេះឲ្យមានភាពរឹងមាំ និងយូអង្វែង ដោយមិនបង្កផលលំបាកដល់ប្រជាពលរដ្ឋ ក្នុងតំបន់មានការលំបាកធ្វើដំណើរទៀតឡើយ ដោយមិនចាំបាច់ព្រួយបារម្ភពីផលលំបាក់ដូចពីមុនៗទៀតឡើយ។

ក្នុងនោះដែរ លោក ស្វាយ សំអ៊ាង បានណែនាំមន្ត្រីជំនាញ ត្រូវចុះត្រួតពិនិត្យជាប់ជាប្រចាំ និងយកចិត្តទុកដាក់ខ្ពស់ ចំពោះសាងសង់ស្ពានបេតុង នេះឲ្យមានគុណភាពខ្ពស់ដើម្បីធានានូវភាពរឹងមាំ និងប្រើប្រាស់បានយូរអង្វែង។ ដោយក្នុងនោះដែរ លោកបញ្ជាក់បន្ថែមទៀតថា ផ្លូវ ស្ពាន ជាសរសៃឈាមសេដ្ឋកិច្ចរបស់ប្រជាពលរដ្ឋ ក្នុងមូលដ្ឋាន ក៏ដូច សេដ្ឋកិច្ច របស់ប្រទេសជាតិយើងផងដែរ៕

ដំណឹងល្អ ផ្សារសំខាន់ៗចំនួន៣ក្នុងក្រុងសៀមរាបគ្រោងនឹងបើកឲ្យដំណើរការឡើងវិញក្នុងពេលឆាប់ៗខាងមុខនេះ

ដោយៈ សុផារី

សៀមរាបៈ លោក នួន ពុទ្ធារ៉ា អភិបាលក្រុងសៀមរាបបានមានប្រសាសន៍ថា រដ្ឋបាលខេត្តសៀមរាប គ្រោងនឹងបើកឲ្យដំណើរការផ្សារសំខាន់ៗចំនួន៣ទីតាំង នៅក្នុងក្រុងសៀមរាបឡើងវិញនាពេលឆាប់ៗខាងមុខនេះ។

ផ្សារសំខាន់ៗទាំងនោះរួមមាន៖ ផ្សារសាមគ្គី-ហ៊ុយគាំង ផ្សារលើធំថ្មី និងផ្សារសម្តេចតេជោ ហ៊ុន សែន ដើមក្រឡាញ់ ក្នុងពេលឆាប់ៗខាងមុខនេះ បន្ទាប់ពីមានការបិទខ្ទប់ជាច្រើនលើកនិងជាច្រើនសប្តាហ៍ កន្លងមកហើយនោះ។

លោកនួន ពុទ្ធារ៉ា មានប្រសាសន៍យ៉ាងដូច្នេះក្នុងឱកាសអមដំណើរលោក ទៀ សីហា អភិបាលខេត្តសៀមរាប ក្នុងការដឹកនាំក្រុមការងារចម្រុះ ចុះត្រួតពិនិត្យនិងវាយតម្លៃស្ថានភាពទីតាំងផ្សារទាំងនោះ កាលពីរសៀលថ្ងៃទី១៦ ខែតុលា ខណៈពេលដែលទីតាំងផ្សារទាំងនេះ បាននឹងកំពុងដំណើរការសាកល្បងជាបណ្តោះអាសន្ន អស់រយៈពេល៣ថ្ងៃកន្លងមកហើយនោះ។

លោកអភិបាលក្រុងសៀមរាបមានប្រសាសន៍ទៀតថា ការបើកឲ្យដំណើរការឡើងវិញនេះ គឺដោយសារតែបានពិនិត្យឃើញថា៣ថ្ងៃកន្លងមក ក្នុងការបើកឲ្យដំណើរការសាកល្បង ទីតាំងផ្សារទាំងនោះអនុវត្តល្អ តាមការណែនាំរបស់ក្រុមការងារ ហើយអត្រាខ្ពស់នៃប្រជាជន ដែលបានទទួលការចាក់វ៉ាក់សាំងបង្ការឆ្លងកូវីដ-១៩ គឺជាឋាមពលមួយផ្នែក ក្នុងការជំរុញឲ្យមានការសម្រេចចិត្ត ក្នុងការប្រើប្រាស់យន្តការបើកចរន្តសេដ្ឋកិច្ចគ្រួសារពលរដ្ឋ និងសហគមន៍ជាបណ្តើរៗឡើងវិញ ។

លោកទៀ សីហា អភិបាលខេត្តសៀមរាបបានមានប្រសាសន៍ថា ក្នុងគោលបំណងចង់ឲ្យផ្សារទាំងនេះ បានដំណើរការឡើងវិញកន្លងមកនេះ ក្រុមការងារចម្រុះបានចុះណែនាំ និងផ្សព្វផ្សាយដល់អាជីវករឲ្យបានយល់ និងបានដឹងអំពីអត្ថប្រយោជន៍នៃការប្រើប្រាស់ប្រព័ន្ធស្កែន QR Code ព្រោះវាជាជំនួយដល់ការគ្រប់គ្រង និងតាមដានការរាតត្បាតនៃជំងឺកូវីដ-១៩ អាចនឹងច្បាស់លាស់ក្នុងការកំណត់តូប ឬទីតាំងពាក់ព័ន្ធ ដើម្បីជៀសវាងការបិទផ្សារទាំងមូល ក្នុងករណីជួបប្រទះករណីឆ្លងជាយថាហេតុនោះ។

លោកថា នេះគឺជាយន្តការថ្មីមួយទៀត ជួយសម្រួលឲ្យអាជីវកម្មផ្តល់កិច្ចសហការជាមួយក្រុមការងារ បង្កើនភាពរហ័សទាន់សភាពការណ៍ ក្នុងការស្វែងរកអ្នកដែលពាក់ព័ន្ធ។ សំខាន់ជាងនេះ គឺក្រុមការងារបានណែនាំឲ្យមានការរៀបចំ សណ្តាប់ធ្នាប់ក្នុងផ្សារឡើងវិញ ស្របតាមវិធានការរបស់រាជរដ្ឋាភិបាល ៣ការពារ និង៣កុំ វិធានសុវត្ថិភាពនានាដែលដាក់ចេញដោយក្រសួងសុខាភិបាល និងការប្រតិបត្តិលើការរៀនរស់តាមគន្លងថ្មីនៃបរិបទកូវីដ-១៩។

លោកអភិបាលខេត្តសៀមរាប មានប្រសាសន៍ទៀតថា អត្រាភាគរយនៃចំនួនប្រជាជនខេត្តសៀមរាប ដែលទទួលបានការចាក់វ៉ាក់សាំងបង្ការ គឺជាភាពកក់ក្តៅមួយដែលជម្រុញឲ្យរដ្ឋបាលខេត្ត ប្រើប្រាស់យន្តការបង្ហើបឲ្យមានដង្ហើម នៃចរន្តសេដ្ឋកិច្ចឡើងវិញ ដោយការចាប់ផ្តើមចេញ ពីដំណោះស្រាយជីវភាពរស់នៅប្រចាំថ្ងៃ របស់គ្រួសារប្រជាពលរដ្ឋ និងសហគមន៍។ ការរៀនរស់ជាមួយកូវីដ-១៩ គឺជាកម្រាលផ្លូវឆ្ពោះទៅរកគោលដៅមួយ ដែលនៅទីនោះយើងនឹងអាចនិយាយបានថា កូវីដ១៩ វាគ្រាន់តែជាវិបត្តិមេរៀនរបស់អតីតកាលតែប៉ុណ្ណោះ៕

៊រោងចក្រផលិតសំបកកង់រថយន្តចំនួន ៨ ក្នុងខេត្តស្វាយរៀងនឹងសាងសង់ក្នុងពេលឆាប់ៗ នេះ

ដោយ: កុសមា

ស្វាយរៀង៖ អ្នកវិនិយោគធំៗដែលបានបង្កើតរោងចក្រសហគ្រាសធំៗ និងបង្កើរការងារធ្វើជូនដល់ប្រជាពលរដ្ឋនៅក្នុងតំបន់សេដ្ឋកិច្ចពិសេឈីលូ ជៀនពុចាយ នៅសង្កាត់ស្វាយតឿ ក្រុងស្វាយរៀង បាននិងកំពុងដំណើរការផលិតកម្មរបស់ខ្លួនមានចំនួន៨រោងចក្រ ក្នុងចំណោម១១រោងចក្រដែលបានចុះបញ្ជីររួចរាល់ទៅក្រសួង នឹងត្រូវសាងសង់នៅពេលបន្តបន្ទាប់ខាងមុខនេះ។

នេះបើតាមការលើកឡើងរបស់ លោក ម៉ែន វិបុល អភិបាលខេត្តស្វាយរៀង បានអញ្ជើញចុះពិនិត្យមើលវឌ្ឍនភាពនៃដំណើរការសាងសង់រោងចក្រផលិតសំបកកង់រថយន្ត ក្នុងតំបន់សេដ្ឋកិច្ចពិសេសឈីលូជៀនពុចាយ នៅព្រឹកថ្ងៃទី១៥ ខែតុលា ឆ្នាំ២០២១នេះ។

ដំណើរទស្សនកិច្ចនេះ មានការញ្ជើញចូលរួមអមដំណើរពីឯកឧត្តម អភិបាលរងខេត្ត លោកប្រធានមន្ទីរសាធារណការ និងដឹកជញ្ជូនខេត្ត លោកប្រធានមន្ទីរដែនដីនគររូបណីយកម្ម និងសំណង់ខេត្ត លោកប្រធានតំបន់សេដ្ឋកិខច្ចពិសេស លោកអភិបាលរងក្រុងនិងតំណាងរោងចក្រមួយចំនួនទៀត។

បន្ទាប់ពីបានចុះពិនិត្យរោងចក្រ ឯកឧត្តមនិងសហការីក៏បានបន្តដំណើរទៅពិនិត្យមើលហេដ្ឋារចនាសម្ព័ន្ធ ផ្លូវ និងស្ថានភាពនៅតាមច្រកទ្វាព្រំដែននានារវាងកម្ពុជា-វៀតណាមនៅព្រឹកថ្ងៃដដែលនេះផងដែរ៕