លោកស៊ុន ចាន់ថុល លើកឡើងអំពីគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវ៣៤ខ្សែនៅក្រុងព្រះសីហនុ និងខេត្តសៀមរាប

ដោយ: សុផារី

ភ្នំពេញ: លោកស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន លើកឡើងអំពីគម្រោងអភិវឌ្ឍន៍ហេដ្ឋារចនាសម្ព័ន្ធនានា ដើម្បីជំរុញកំណើនសេដ្ឋកិច្ចសង្គមក្រោយវិបត្តិជំងឺកូវីដ-១៩ ដែលក្នុងនោះរួមមាន គម្រោងអភិវឌ្ឍន៍ហេដ្ឋារចនាសម្ព័ន្ធផ្លូវ៣៤ខ្សែនៅក្រុងព្រះសីហនុ ខេត្តព្រះសីហនុ គម្រោងអភិវឌ្ឍន៍ហេដ្ឋារចនាសម្ព័ន្ធ ផ្លូវ៣៨ខ្សែនៅក្រុងសៀមរាប ខេត្តសៀមរាប ដើម្បីទទួលស្វាគមន៍ទេសចរណ៍ នៅពេលកម្ពុជាបើកប្រទេសឡើងវិញក្នុងពេលអនាគតដ៏ខ្លីខាងមុខ។
ការលើកឡើងនេះធ្វើឡើងក្នុងឱកាស ដែលលោក ស៊ុន ចាន់ថុល ដឹកនាំគណៈប្រតិភូក្រសួងចូលរួមសន្និសីទដឹកជញ្ជូនចីរភាពជាសកល នៃអង្គការសហប្រជាជាតិលើកទី២ (The 2nd United Nations Global Sustainable Transport Conference) តាមរយៈប្រព័ន្ធវីដេអូ ថ្ងៃទី១៥ ខែតុលា ឆ្នាំ២០២១ នៅទីស្ដីការក្រសួង តបតាមការអញ្ជើញរបស់លោក Li Xiaopeng រដ្ឋមន្ត្រីក្រសួងដឹកជញ្ជូននៃសាធារណរដ្ឋប្រជាមានិតចិន។

សន្និសីទនេះរៀបចំឡើងក្នុងគោលបំណង ដើម្បីពិភាក្សាលើប្រធានបទមួយចំនួនរួមមាន តួនាទីនៃការដឹកជញ្ជូនចីរភាពក្នុងការការលុបបំបាត់ភាពក្រីក្រ ការជំរុញសេដ្ឋកិច្ច និងជីវភាពរស់នៅរបស់ប្រជាជន ការតភ្ជាប់សកល ការអភិវឌ្ឍបៃតង ការអភិវឌ្ឍថ្នាក់តំបន់ នវានុវត្តន៍ និងទីក្រុងចីរភាព។

ថ្លែងក្នុងសន្ទរកថាគន្លឹះទៅកាន់អង្គសន្និសីទនាឱកាសនោះ លោក បានគូសបញ្ជាក់ពីសារសំខាន់នៃតួនាទីវិស័យដឹកជញ្ជូនក្នុងការជំរុញកំណើនសេដ្ឋកិច្ចដើម្បីកាត់បន្ថយក្រក្រី គោលនយោបាយ អាទិភាពនៃវិស័យហេដ្ឋារចនាសម្ព័ន្ធ និងដឹកជញ្ជូនដែលរួមមាន៖
(១) ការស្តារវិស័យដឹកជញ្ជូន និងបណ្តាញដឹកជញ្ជូនពហុមធ្យោបាយ ដើម្បីតភ្ជាប់ផ្ទៃក្នុងប្រទេស និងអន្តរជាតិ
(២) ការអភិវឌ្ឍប្រព័ន្ធភស្តុភារកម្មរស់រវើក ដើម្បីពង្រឹងការប្រកួតប្រជែង និងការធ្វើពិពិធកម្មសេដ្ឋកិច្ច
(៣) គោលនយោបាយបង្កើតការងារធ្វើ កាត់បន្ថយភាពក្រក្រីតាមរយៈការតភ្ជាប់ផ្លូវជនបទ ការពារបរិស្ថាន និងធ្វើប្រសើរឡើងដល់សុវត្ថិភាពចរាចរណ៍។

ឆ្លៀតក្នុងឱកាសនោះ លោកបានជម្រាបជូនផងដែរថា៖ “កម្ពុជាបានចាក់វ៉ាក់សាំងបង្ការ ជំងឺកូវីដ-១៩ ជូនប្រជាជនបានចំនួន៨៤% ដើម្បីត្រៀមខ្លួនស្វាគមន៍ភ្ញៀវទេសចរណ៍ និងវិនិយោគិន”។

លោកក៏បានថ្លែងអំណរគុណយ៉ាងជ្រាលជ្រៅដល់ប្រទេសជាមិត្ត និងដៃគូអភិវឌ្ឍន៍ទាំងឡាយ ជាពិសេស រដ្ឋាភិបាលនិងប្រជាជននៃសាធារណរដ្ឋប្រជាមានិតចិន ដែលបានផ្តល់ការគាំទ្រប្រកបដោយសប្បុរសផ្តល់វ៉ាក់សាំងជូនពលរដ្ឋបានទាន់ពេលវេលា៕

រដ្ឋាភិបាលបានអនុវត្តន៍ផែនការអាទិភាពចំនួន៤ដើម្បីធានាការប្រើប្រាស់សេវាទូរគមនាគមន៍មានគុណភាពល្អ

ដោយៈគង់ ម៉ាលីនណា

ភ្នំពេញៈ រដ្ឋមន្ត្រីក្រសួងប្រៃសណីយ៍ និងទូរគមនាគមន៍លោកជា វ៉ាន់ដេតបានថ្លែងថា រាជរដ្ឋាភិបាលកម្ពុជាបានកំពុងអនុវត្តន៍ផែនការសកម្មភាពចំនួន៤ ដើម្បីធានាឱ្យបាននូវការប្រើប្រាស់សេវាទូរគមនាគមន៍ដែលមានតម្លៃសមរម្យ គុណភាពល្អ និងប្រកបដោយបរិយាបន្ន។

លោករដ្ឋមន្ត្រីក្រសួងប្រៃសណីយ៍ និងទូរគមនាគមន៍បានថ្លែងបែបនេះ ក្នុងពេល ចូលរួមវេទិកាសហភាពទូរគមនាគមន៍អន្តរជាតិ ពិភពលោកឌីជីថល ២០២១ (ITU Digital World 2021) តាមរយៈប្រព័ន្ធសន្និសីទវីដេអូ ក្រោមប្រធានបទស្ដីពី ”ការកាត់បន្ថយចំណាយ តើការប្រើប្រាស់បច្ចេកវិទ្យា ដែលមានតម្លៃសមរម្យ អាចពន្លឿនបរិវត្តកម្មឌីជីថលបានដែរឬទេ?”។

លោកបន្តថា ទូរគមនាគមន៍ដែលមានតម្លៃសមរម្យ គុណភាពល្អ និងប្រកបដោយបរិយាបន្ន រួមមាន ទី១. ការពង្រីកហេដ្ឋារចនាសម្ព័ន្ធឆ្អឹងខ្នង ទី២. ច្បាប់និងលិខិតបទដ្ឋានគតិយុត្តស្តីពី ការប្រើប្រាស់ហេដ្ឋារចនាសម្ព័ន្ធទូរគមនាគមន៍រួម និងគុណភាពសេវា ទី៣. ក្របខណ្ឌគោលនយោបាយស្តីពីសេដ្ឋកិច្ច និងសង្គមឌីជីថល ២០២១-២០៣៥ និងសេចក្តីព្រាងគោលនយោបាយរដ្ឋាភិបាលឌីជីថល និងទី៤. ការកសាងសមត្ថភាពលើជំនាញឌីជីថល។

វេទិកានេះ ជាប្រព្រឹត្តិការណ៍ប្រចាំឆ្នាំ រៀបចំឡើងដោយសហភាពទូរគមនាគមន៍អន្តរជាតិ (ITU) ដែលមានការអញ្ជើញចូលរួមពី លោក Houlin Zhao អគ្គលេខាធិការសហភាពទូរគមនគមន៍អន្តរជាតិ (ITU) មន្ត្រីជាន់ខ្ពស់រដ្ឋាភិបាល បណ្តាប្រទេសជាសមាជិក អ្នកស្រាវជ្រាវ ព្រមទាំងប្រតិបត្តិករទូរគមនាគមន៍ ធំៗមកពីជុំវិញពិភពលោក។

ការរៀបចំព្រឹត្តិការណ៍នេះឡើង គឺមានគោលបំណងលើកកម្ពស់ការតភ្ជាប់ប្រកប​ដោយប្រសិទ្ធភាព ក្នុងការចូលរួមយ៉ាងសំខាន់ សម្រាប់បរិវត្តកម្មឌីជីថល និងពិភាក្សាពីបញ្ហាប្រឈមធំៗមួយចំនួន ដើម្បីទទួលយកការប្រើប្រាស់អ៊ីនធឺណិត សម្រាប់ប្រជាជនទូទៅ៕

ហេតុអ្វីខណ្ឌទួលគោកជាតំបន់ល្អបំផុតសម្រាប់ការស្នាក់នៅ?

ដោយៈសហសេវិក

ភ្នំពេញៈ ទួលគោកគឺជាខណ្ឌដ៏ធំមួយ ស្ថិតនៅក្នុងកណ្ដាលរាជធានីភ្នំពេញ ដែលត្រូវបានគេស្គាល់ថា ជាតំបន់ពេញនិយមបំផុតមួយសម្រាប់ការរស់នៅ បន្ទាប់ពីខណ្ឌបឹងកេងកង និងចំការមន។

ខណ្ឌទួលគោកត្រូវបានបែងចែកជា១០សង្កាត់ និង១៤៣ភូមិ មានផ្ទៃដី៧,៩៩ គីឡីម៉ែត្រការ៉េ និងមានប្រជាជនជាង ១៤៥.០០០ នាក់។

ទួលគោកមានសង្កាត់សំខាន់ៗចំនួនពីរគឺសង្កាត់បឹងកក់ ១ និងបឹងកក់ ២ ដែលជាសង្កាត់មានប្រជាប្រិយបំផុត សម្រាប់លំនៅឋានជាមួយនឹងហេដ្ឋារចនាសម្ព័ន្ធល្អ ជាពិសេ​សមានផ្លូវធំទូលាយចំនួន៣ គឺផ្លូវ២៨៩, ៣១៥ និង ៣៣៧។ នៅលើផ្លូវទាំង៣នេះ រួមមានអគារពាណិជ្ជកម្មខ្ពស់ៗ អាផាតមិន ផ្សារទំនើប ធនាគារ និងសកម្មភាពអាជីវកម្មជាច្រើនផងដែរ។

លោកសៀក នារីតីប្រធានផ្នែកវាយតម្លៃនៅក្រុមហ៊ុនអចលនទ្រព្យ ឃី រៀល អ៊ីស្ទេត បានលើកឡើងថា ខណ្ឌទួលគោកគឺជាខណ្ឌមួយដែលមានផ្លូវល្អប្រសើរ ដោយតភ្ជាប់ជាមួយផ្លូវធំៗជាច្រើន ដូចជា មហាវិថីសហព័ន្ធរុស្សី មហាវិថីម៉ៅសេទុង ផ្លូវលេខ២៧១ ផ្លូវលេខ១៨២ និងផ្លូវពាណិជ្ជកម្មជាច្រើនផ្សេងទៀត ។

លោកបានបន្តថា ទួលគោកត្រូវបានចាត់ទុកថាជាខណ្ឌ ដែលមានប្រជាប្រិយបំផុតសម្រាប់ការស្នាក់នៅ ស្ថិតនៅចំកណ្តាលទីក្រុងភ្នំពេញ ដោយមានគម្រោងអភិវឌ្ឍន៍ជាច្រើននៅទីនោះ ដូចជា អគារពាណិជ្ជកម្ម ខុនដូ អាផាតមិន ហាងទំនិញ សាលារៀនអន្តរជាតិ និងផ្លូវធំៗជាច្រើនដើម្បីទ្រទ្រង់ជីវិតរស់នៅប្រចាំថ្ងៃ។ ភាពស្រស់ស្អាតនៃខណ្ឌនេះគឺដោយសារតែផ្ទះ និងវីឡាធំៗ និងហេដ្ឋារចនាសម្ព័ន្ធដ៏ល្អប្រសើរ។

ដោយសារតែវាជាតំបន់មានការអភិវឌ្ឍន៍រីកចម្រើនខ្លាំង ទើបធ្វើឱ្យទីផ្សារអចលនទ្រព្យនៅក្នុងខណ្ឌនេះ ចេះតែកើនឡើងពីមួយឆ្នាំទៅមួយឆ្នាំ។ ខណ្ឌនេះសម្បូរទៅដោយអគារពាណិជ្ជកម្ម និងអគារលំនៅឋានល្បីៗជាច្រើនដូចជា ខុនដូ DeCastle ខុនដូ Nobeless ខុនដូ Royal Platinum ខុនដូធីខេស្តារ ផ្សារទំនើបធីខេ SAMAI square និងHCN Mall and Residence ដែលអគារទាំងនេះមានទីតាំងស្ថិតនៅក្នុងសង្កាត់បឹងកក់ ១ និងបឹងកក់ ២។

ផ្អែកលើការស្រាវជ្រាវទីផ្សាររបស់ក្រុមហ៊ុនឃី រៀល អ៊ី ស្ទេត នៅក្នុងឆមាសទី១ ឆ្នាំ២០២១តម្លៃដីនៅតាមបណ្តោយផ្លូវធំ នៃខណ្ឌទួលគោកមានតម្លៃប្រមាណពី ៣.៥០០ដុល្លារ ទៅ៥.៥០០ដុល្លារ ក្នុងមួយម៉ែត្រការ៉េ និងផ្លូវតូចមានតម្លៃចាប់ពី ២.០០០ដុល្លារ ទៅ ៣.០០០ដុល្លារ ក្នុងមួយម៉ែត្រការ៉េ។ តម្លៃដីនៅក្នុងខណ្ឌនេះត្រូវបានព្យាករណ៍ថា នឹងកើនឡើង៥ភាគរយជារៀងរាល់ឆ្នាំ។

ទន្ទឹមនឹងនេះ លោក Roshan Lal នាយកប្រតិបត្តិក្រុមហ៊ុន Rentex Property Service បានលើកឡើងថា៖ “ខណ្ឌទួលគោកសម្បូរអភិជនជាច្រើន រស់នៅក្នុងខណ្ឌនេះ បើប្រៀបធៀបទៅនឹងខណ្ឌចំការមន និងខណ្ឌផ្សេងទៀតនៅក្នុងទីក្រុងភ្នំពេញ។ ខណ្ឌនេះមានផ្លូវធំទូលាយ និងស្អាតៗជាច្រើន ដែលជាការទាក់ទាញដល់គម្រោងជាច្រើនដូចជាគម្រោងលំនៅដ្ឋាន និងផ្សារទំនើបជាដើម”។

លោក Roshan បានបន្ថែមផងដែរថា ខណ្ឌទួលគោកគឺជាជម្រើសទីមួយសម្រាប់អ្នកដែលកំពុងស្វែងរកលំនៅឋានជាលក្ខណឯកជន។ បើប្រៀបធៀបទៅនឹងតំបន់ផ្សេងទៀត ខណ្ឌទួលគោកមានសក្តានុពលច្រើន ចំពោះអចលនទ្រព្យសម្រាប់ជួល។ ក្នុងរយៈពេល៥ឆ្នាំខាងមុខ គាត់ជឿជាក់ថាខណ្ឌនេះ នឹងក្លាយជាមជ្ឈមណ្ឌលពាណិជ្ជកម្មធំជាងគេនៅកណ្តាលក្រុងភ្នំពេញ បន្ទាប់ពីខណ្ឌចំការមន និងខណ្ឌបឹងកេងកង។

អំពីសេវាកម្ម ឬចម្ងល់ផ្សេងៗសូមទំនាក់ទំនងតាមរយៈ 096 7876 902 (Telegram)/ 066 886633 ប្រភព៖ Harbor Property ៕

 

រដ្ឋាភិបាលចិនចេញមុខអន្តរាគមន៍ដោយបញ្ជាឱ្យធនាគារធំៗបន្ថូរបន្ថយលក្ខខណ្ឌសម្រាប់កម្ចីទិញផ្ទះដើម្បីសម្រាលវិបត្តិ

ដោយៈសុខុម

ប៉េកាំង: ប្រភពបានទម្លាយឱ្យដឹងថា ទីបំផុតក្រុមនិយ័តករហិរញ្ញវត្ថុ នៃប្រទេសចិន បានចេញមុខអន្តរាគមន៍ហើយ ដោយបញ្ជាឱ្យធនាគារធំៗ ជួយបន្ធូរបន្ថយលក្ខខណ្ឌ និងពន្លឿនការអនុម័ត កម្ចីទិញផ្ទះនៅក្នុងត្រីមាសទី៤ ចុងឆ្នាំនេះដើម្បីសម្រាលវិបត្តិក្នុងវិស័យអចលនទ្រព្យក្នុងប្រទេស។

ទីភ្នាក់ងារព័ត៌មាន Bloomberg News បានចុះផ្សាយនៅថ្ងៃសុក្រ ទី១៥ តុលា នេះថា ទន្ទឹមនេះធនាគារនានា ក៏ត្រូវបានអនុញ្ញាតឱ្យស្នើសុំច្បាប់អនុញ្ញាត ដើម្បីលក់ទ្រព្យសកម្ម ដែលគាំទ្រដោយកម្ចីទិញផ្ទះផងដែរ ស្របពេលមានការព្រួយបារម្ភខ្លាចវិបត្តិសាច់ប្រាក់ និងបំណុលនៅក្រុមហ៊ុនអភិវឌ្ឍន៍ China Evergrande Group រាលដាលដល់ក្រុមហ៊ុនអភិវឌ្ឍន៍ផ្សេងៗទៀត។

ប្រទេសចិន បានចាប់ផ្ដើមរឹតបន្តឹងលើទីផ្សារអចលនទ្រព្យ ចាប់តាំងពីចុងឆ្នាំ២០២០ ដោយបានដាក់ចេញវិធានការថ្មីៗដើម្បីតាមដាន និងត្រួតពិនិត្យយ៉ាងស្អិតនូវកម្រិតបំណុលរបស់បណ្ដាក្រុមហ៊ុនអភិវឌ្ឍន៍។

ប៉ុន្តែដោយសារសេដ្ឋកិច្ចធ្លាក់ចុះ ហើយការសាងសង់ថ្មីៗ ចាប់ផ្ដើមបង្អង់ល្បឿន សកម្មភាពទិញផ្ទះ ទុកលក់ចំណេញក៏បានឈានដល់កម្រិតទុំជោរ។ នេះមានន័យថា សកម្មភាពទិញលក់ស្ងប់ស្ងាត់ ជាហេតុធ្វើឱ្យបណ្ដាក្រុមហ៊ុនអភិវឌ្ឍន៍ ជួបវិបត្តិស្ទះលុយធ្ងន់ធ្ងរ មុននឹងឈានដល់ការបន្ធូរបន្ថយនេះ។

ទោះជាយ៉ាងណា ប្រភពពីក្រុមមន្ត្រីធ្វើគោលនយោបាយ និងក្រុមអ្នកវិភាគបានថ្លែងប្រាប់ទីភ្នាក់ងារព័ត៌មាន Reuters នៅសប្ដាហ៍នេះថា ក្រុមមេដឹកនាំចិន ទំនងជារក្សាការរឹតបន្តឹងលើវិស័យអចលនទ្រព្យដដែល ប៉ុន្តែអាចនឹងបន្ធូរបន្ថយខ្លះៗ ក្នុងករណីដែលចាំបាច់។

លោកយី កាង (Yi Gang) ទេសាភិបាលធនាគារប្រជាជនចិន (PBOC) ដែលជាធនាគារកណ្ដាល បានប្រាប់ស្ថាប័នហិរញ្ញវត្ថុចំនួន២៤ កាលពីចុងខែកញ្ញា ឱ្យជួយរក្សាស្ថិរភាពទីផ្សារអចលនទ្រព្យ និងការពារសិទ្ធិ និងផលប្រយោជន៍ស្របច្បាប់របស់អតិថិជនទិញលំនៅដ្ឋាន។

ទោះជាយ៉ាងណា ពេលទីភ្នាក់ងារព័ត៌មាន Reuters ទាក់ទងទៅដើម្បីសុំការបំភ្លឺ ធនាគារកណ្ដាល PBOC និងគណៈកម្មាធិការនិយតកម្មធនាគារ និងធានារ៉ាប់រងចិន (CBIRC) មិនបានឆ្លើយបំភ្លឺឡើយជុំវិញបញ្ហានេះ Reuters ៕

តើខេត្តព្រះសីហនុត្រៀមខ្លួនដូចម្តេចដើម្បីទទួលភ្ញៀវទេសចរណ៍អន្តរជាតិឡើងវិញ

ដោយៈគង់ សិរីជេស៊ីកា

ព្រះសីហនុៈ ខេត្តព្រះសីហនុ ក្លាយជាគោលដៅទេសចរណ៍ចម្បងមួយ សំរាប់ការបើកទទួលភ្ញៀវអន្តរជាតិឡើងវិញ នៅពេលខាងមុខ ខណៈរដ្ឋាភិបាលបាននិងកំពុងត្រៀមបើកទទួលភ្ញៀវទេសចរណ៍អន្តរជាតិនាពេលខាងមុខ។

ជាការត្រៀមខ្លួនលើការស្វាគមន៍ភ្ញៀវទេសចរណ៍ឡើងវិញនេះ លោកគួច ចំរើន អភិបាល នៃគណៈអភិបាលខេត្តព្រះសីហនុ អញ្ជើញបើកកិច្ចប្រជុំផ្សព្វផ្សាយ វិធានសុវត្ថិភាព និងនីតិវិធីប្រតិបត្តិស្តង់ដាអប្បរមា (SOP) ដើម្បីត្រៀមទទួលភ្ញៀវទេសចរជាតិ នៅចុងឆ្នាំ២០២១ ជាមួយសមាគមទេសចរណ៍ សមាគមសណ្ឋាគារ និងភោជនីយដ្ឋាន សមាគមភ្នាក់ងារដឹកជញ្ជូនទេសចរណ៍ជលយាន អ្នកគ្រប់គ្រងសណ្ឋាគារ និងអ្នកគ្រប់​គ្រងភោជនីយដ្ឋានក្នុងខេត្តព្រះសីហនុ។

វិធានសុវត្ថិភាព និងនីតិវិធីប្រតិបត្តិស្តង់ដាអប្បរមា ( SOP) តាមបែបកន្លងថ្មីសម្រា​ប់អាជីវកម្មភោជនីយដ្ឋាន និងអាហារដ្ឋានទេសចរណ៍មានដូចជា ទី១ គោលការណ៍ណែនាំសម្រាប់ភ្ញៀវ ទី២ គោលការណ៍ណែនាំសម្រាប់បុគ្គលិក ទី៣ ការសម្លាប់មេរោគ ទី៤ ការគ្រប់គ្រងភោជនីយដ្ឋាន ទី៥ សេវាកម្មដឹកជញ្ជូន ទី៦ ការកំណត់រចនាសម្ព័ន្ធ និងការរៀបចំភោជនីយដ្ឋាន។

លោកគួច ចំរើនបានមានប្រសាសន៍ថា ការជួបជុំគ្នានាពេលនេះ គឺដើម្បីផ្សព្វផ្សាយ ការអនុវត្តវិធានសុវត្ថិភាពទេសចរណ៍ និងនីតិវិធីប្រតិបត្តិស្រង់ដារអប្បរមា (SOP) តាមបែបកន្លងថ្មី ដូច្នេះម្ចាស់អាជីវកម្ម ត្រូវខិតខំស្វែងយល់ពីបទបង្ហាញ វិធានសុវត្ថិភាពស្តង់ដារ (SOP) ថ្វីត្បិតតែជំងឺកូវីដ-១៩ នៅខេត្តព្រះសីហនុ មានការធូរស្រាលប្រសើរឡើង ដោយសារការដឹកនាំរបស់រាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវវិធានការនានា ដូចជាវិធានសុខាភិបាល និងវិធានការ ៣.ការពារ និង ៣.កុំ និងយុទ្ធនាការចាក់វ៉ាក់សាំងជូនប្រជាពលរដ្ឋនៅទូទាំងប្រទេស។ល។

លោកបន្តថា រាជរដ្ឋាភិបាលបានខិតខំស្វែងរកវ៉ាក់សាំង និងការចាក់វ៉ាក់សាំងជូនប្រជាពលរដ្ឋ ដែលមានក្រុមគ្រូពេទ្យខេត្ត ក្រុមគ្រូពេទ្យស្ម័គ្រចិត្តសម្តេចតេជោ និងក្រុមគ្រូពេទ្យយោធាចុះចាក់វ៉ាក់សាំង ជូនប្រជាពលរដ្ឋនៅទូទាំងប្រទេស ដោយឡែកខេត្តព្រះសីហនុ ប្រជាពលរដ្ឋចាក់វ៉ាក់សាំងបានចំនួនជាង ២៩ម៉ឺននាក់ ស្មើនឹង ៩២,៧១ ភាគរយ ហើយយើងនៅបន្តចាក់វ៉ាក់សាំងដូសទី១ ជូនប្រជាពលរដ្ឋនៅសាលាបឋមសិក្សា អនុវិទ្យាល័យតេជោសែន កម្មករ ស្ថិតនៅសង្កាត់លេខ៤ ក្រុងព្រះសីហនុ។

រាជរដ្ឋាភិបាល ក៏ដូចជាអាជ្ញាធរខេត្តអត់ចង់បិទ អត់ចង់ផ្អាកអាជីវកម្មបងប្អូននោះទេ បងប្អូនត្រូវចូលរួមជាមួយរាជរដ្ឋាភិបាល ក្នុងការអនុវត្តវិធានសុវត្ថិភាព (SOP)ឱ្យបានត្រឹមត្រូវ ដើម្បីបើកទេសចរណ៍ និងសេដ្ឋកិច្ចសង្គមឡើងវិញ។

យើងត្រូវរួមគ្នារស់នៅតាមបែបកន្លងថ្មី ជាមួយកូវីដ-១៩ ដើម្បីបើកទេសចរណ៍ផ្ទៃក្នុង និងទេសចរណ៍បរទេសឡើងវិញនៅពេលខាងមុខ ក៏ដូចជាបង្កើនមុខរបររបស់បងប្អូន ដូច្នេះត្រូវមានការចូលរួមពីបងប្អូនផងដែរទើបទទួលបានជោគជ័យ៕

វៀតណាមគ្រោងវិនិយោគជាង១០០ពាន់លានដុល្លារលើការផលិតថាមពលដើរដោយធ្យូងថ្ម

ដោយៈសុខុម

ហាណូយ: ប្រទេសវៀតណាម គ្រោងបង្កើនទ្វេដងនូវសមត្ថភាព ផលិតថាមពលអគ្គិសនីដើរដោយធ្យូងថ្មនៅត្រឹមឆ្នាំ២០៣០ ដើម្បីបំពេញមហិច្ឆតាធំរបស់ខ្លួនក្រោមសេចក្តីព្រាងផែនការអភិវឌ្ឍន៍ថាមពលមួយ ដែលត្រូវបានដាក់ជូននាយករដ្ឋមន្រ្តីសុំការអនុម័តនៅសប្តាហ៍នេះ។ នេះបើយោងតាមសារព័ត៌មាន CNA ចុះផ្សាយកាលពីថ្ងៃសុក្រ ទី១៥ តុលា។

នេះសរបង្ហាញឱ្យឃើញថា ប្រទេសវៀតណាម នឹងពឹងផ្អែកលើធ្យូងថ្មកាន់តែខ្លាំងនៅក្នុងការផលិតថាមពលអគ្គិសនី សម្រាប់ផ្គត់ផ្គង់ដល់សេដ្ឋកិច្ច ដែលកំពុងលូតលាស់យ៉ាងឆាប់រហ័សរបស់ខ្លួន ខណៈប្រទេសធំៗក្នុងពិភពលោក រួមទាំងស្ថាប័នអន្តរជាតិជាច្រើនកំពុងសហការគ្នា យ៉ាងសស្រាក់សស្រាំនៅក្នុងការជំរុញ និងការងាកទៅផលិតថាមពលកកើតឡើងវិញ ដើម្បីចូលរួមចំណែកដោះស្រាយ បញ្ហាបម្រែបម្រួលអាកាសធាតុ។

អ្នកវិទ្យាសាស្ត្រទូទាំងពិភពលោកបានអះអាងជាយូរមកហើយថា ការដុតធ្យូងថ្មបង្កផលប៉ះពាលធ្ងន់ធ្ងរដល់បរិស្ថាន ព្រោះវាបំភាយឧស្ម័នផ្ទះកញ្ចក់ ចូលទៅក្នុងបរិយាកា​ស ដែលធ្វើឱ្យខូចស្រទាប់អូហ្សូនរបស់ភពផែនដី។

ផ្អែកតាមច្បាប់ចម្លងនៃផែនការទី៨ សម្រាប់ការអភិវឌ្ឍន៍ថាមពល (Power Development Plan 8) ឬហៅកាត់ថា PDP 8 ដែលទីភ្នាក់ងារព័ត៌មាន Reuters ទទួលបានបង្ហាញថា រោងចក្រថាមពលអគ្គិសនីដើរដោយធ្យូងថ្ម នឹងគ្របដណ្ដប់រហូតដល់ទៅ៣១.៤% នៃសមត្ថភាពផលិតថាមពលអគ្គិសនី ដែលនឹងឈានដល់កម្លាំង១៤៣.៨ជីហ្គាវ៉ាត់ (GW) នៅត្រឹមឆ្នាំ២០៣០។

នោះមានន័យថាការផលិតថាមពលអគ្គិសនីដើរដោយធ្យូងថ្ម នឹងឈានដល់កម្លាំង៤១ជីហ្គាវ៉ាត់នៅត្រឹមដំណាច់ទសវត្សរ៍នេះ បើធៀបនឹងសមត្ថភាពផលិតថាមពលអគ្គិសនីដើរដោយធ្យូងថ្មកម្លាំង២០,៧ជីហ្គាវ៉ាត់គិតត្រឹមឆ្នាំ២០២០។ យោងតាមទិន្នន័យផ្លូវការបង្ហាញថា សមត្ថភាពផលិតថាមពលអគ្គិសនី ពីគ្រប់ប្រភពទាំងអស់គិតមកទល់នឹងឆ្នាំ២០២០ មានកម្លាំងសរុប៦៩ជីហ្គាវ៉ាត់។

ទោះជាយ៉ាងណា ក្រសួងឧស្សាហកម្ម និងពាណិជ្ជកម្មវៀតណាម ដែលជាអ្នកធ្វើសេចក្ដីព្រាងផែនការនេះ មិនបានឆ្លើយតបអ៊ីម៉េលជាច្រើន ដែលទីភ្នាក់ងារព័ត៌មាន Reuters ផ្ញើទៅដើម្បីសុំការបំភ្លឺជុំវិញការព្យាករនេះឡើយ។

ប្រទេសវៀតណាម ដែលមានប្រជាជនចំនួន៩៨លាននាក់ កំពុងប្រឹងប្រែងបង្កើនសមត្ថភាពផលិតថាមពលអគ្គិសនីរបស់ខ្លួន ដើម្បីផ្គត់ផ្គង់ដល់មូលដ្ឋានផលិតកម្មសម្រាប់ក្រុមហ៊ុននានាដូចជាក្រុមហ៊ុនយក្ស Samsung Electronics និង LG Electronics របស់កូរ៉េខាងត្បូង ជាដើម។

ផែនការទី៨ សម្រាប់អភិវឌ្ឍន៍ថាមពល ឬ PDP 8 នេះព្យាករថា ផលិតផលក្នុងស្រុកសរុប (GDP) របស់វៀតណាម នឹងទទួលបានកំណើនប្រចាំឆ្នាំ៦,៦%នៅចន្លោះពេលនេះដល់ឆ្នាំ២០៣០ និង៥,៧%ដល់ឆ្នាំ២០៤៥។

យោងតាមផែនការដដែលបង្ហាញថា ប្រទេសនេះនឹងត្រូវបោះទុនវិនិយោគក្នុងទំហំទឹកប្រាក់១១៥.៩៦ពាន់លានដុល្លារអាមេរិក លើការសាងសង់រោងចក្រផលិតថាម​ពលថ្មីៗ និងការពង្រីកបណ្តាញបញ្ជូនថាមពលអគ្គិសនី ដល់ឆ្នាំ២០៣០ និងរហូតដល់ទៅ២២៧.៤ពាន់លានដុល្លារអាមេរិក ដល់ឆ្នាំ២០៤៥ នៅពេលសមត្ថភាពផលិតថាមព​លរបស់ខ្លួនអាចឈានដល់៣២៩.៦ជីហ្គាវ៉ាត់៕ Reuters ៕

រដ្ឋាភិបាលគ្រោងរៀបចំផែនការមេអភិវឌ្ឍន៍ទេសចរណ៍ខេត្តសៀមរាបសំរាប់រយៈពេលវែង

ដោយៈគង់ សូរិយា

ភ្នំពេញៈ រដ្ឋាភិបាលតាមរយៈក្រសួងទេសចរណ៍ គ្រោងនឹងរៀបចំពិធីប្រកាសផ្សព្វផ្សាយជាផ្លូវការ ដាក់ឱ្យអនុវត្តផែនការមេអភិវឌ្ឍន៍ ទេសចរណ៍ខេត្តសៀមរាប ឆ្នាំ២០២១-២០៣៥។

គំរោងនេះគ្រោងធ្វើឡើងនៅថ្ងៃទី២០ ខែតុលា ឆ្នាំ២០២១ ខាងមុខនេះ។ពិធីនេះ នឹងធ្វើឡើង ក្រោមអធិបតីភាពរបស់ លោកអគ្គបណ្ឌិតសភាចារ្យអូន ព័ន្ធមុនីរ័ត្ន ឧបនាយ​ករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ តាមរយៈប្រព័ន្ធអនឡាញ ដោយប្រើកម្មវិធី ដោយធ្វើការ Host ផ្ទាល់ពីសណ្ឋាគារសុខាសៀមរាប ខេត្តសៀមរាបផ្ទាល់តែម្ដង។

ផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ២០២១-២០៣៥ ត្រូវបានរាជ រដ្ឋាភិបាលកម្ពុជា អនុម័តកាលពីថ្ងៃទី៣០ ខែមីនា ឆ្នាំ២០២១។

ដើម្បីជាសក្ខីភាពនៃការប្រកាស ឱ្យអនុវត្តផែនការមេអភិវឌ្ឍន៍ទេសចរណ៍ខេត្តសៀ​មរាប ឆ្នាំ២០២១-២០៣៥ ក្រសួងទេសចរណ៍ ក៏បានអំពាវនាវឱ្យសាធារណជន ប្រព័ន្ធផ្សព្វផ្សាយព័ត៌មានជាតិ និងអន្តរជាតិ ចូលរួមយកព័ត៌មាន និងផ្សព្វផ្សាយឱ្យបានទូលំទូលាយផងដែរ៕

រដ្ឋាភិបាលរៀបចំដាក់ឱ្យប្រើប្រាស់ស្ថានីយជញ្ជីងយានយន្តដឹកជញ្ជូនលើសទម្ងន់កំណត់នៅខេត្តកែបនិងព្រះវិហារ

ដោយៈ សុផារី

ភ្នំពេញៈ ដោយសារហេដ្ឋារចនាសម្ព័ន្ធផ្លូវថ្នល់ ក្នុងប្រទេសមានការអភិវឌ្ឍ និងរីកចម្រើនច្រើន និងតម្រូវការរបស់រដ្ឋបាលខេត្ត គណៈកម្មាធិការសម្របសម្រួលអចិន្ត្រៃយ៍ នឹងរៀបចំដាក់ឱ្យប្រើប្រាស់ស្ថានីយជញ្ជីងថ្មី នៅខេត្តកែប និងខេត្តព្រះវិហារ ព្រមទាំងគ្រោងសាងសង់ស្ថានីយជញ្ជីងបន្ថែមទៀត នៅតាមខេត្តដែលមានតម្រូវការចាំបាច់។

យោងតាមរបាយការណ៍នៃការអនុវត្តការងារ លោក សេង ឈួន រដ្ឋលេខាធិការ និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្ត ដឹកជញ្ជូនលើសទម្ងន់កម្រិតកំណត់ បានបញ្ជាក់កាលពីថ្ងៃទី១៤ ខែតុលា ឆ្នាំ២០២១ ថា ក្នុងរយៈពេល៩ខែ ឆ្នាំ២០២១ យានយន្តត្រួតពិនិត្យសរុបចំនួន ១ ៨៣០,៦៣១គ្រឿង ក្នុងនោះយានយន្តលើសទម្ងន់ កម្រិតកំណត់ចំនួន៥៧៨,១០៣ គ្រឿង ស្មើនឹង៣១.៥៨% ដែលក្នុងនោះយានយន្តផ្ទុកលើសក្នុងកម្រិតអនុគ្រោះ ចំនួន ៥៧៥ ៨៥៦គ្រឿង និងយានយន្តលើសទម្ងន់កម្រិតកំណត់ ដែលបានពិន័យមានចំនួន២ ២៤៧គ្រឿង ដែលរួមទាំងយានយន្តដែលឃាត់ទុកចំនួន ២២៩គ្រឿង។

ថ្មីៗនេះ ដោយយោងតាមអនុសាសន៍ ណែនាំរបស់សម្តេច ហ៊ុន សែន យានយន្តចំនួន២២៩គ្រឿង ដែលបានពិន័យនិងឃាត់ទុក ទទួលបានអនុគ្រោះពីសម្តេចតេជោ និងបានប្រគល់ជូនម្ចាស់យានយន្តវិញ។

ក្នុងទិសដៅបន្ត គណៈកម្មាធិការសម្របសម្រួលអចិន្ត្រៃយ៍នៃគណៈកម្មាធិការ នឹងបន្តផ្សព្វផ្សាយ ពន្យល់ណែនាំដល់ម្ចាស់យានយន្ត ម្ចាស់អាជីវកម្មដឹកជញ្ជូន ដេប៉ូខ្សាច់-ថ្ម និងសាធារណជនទាំងអស់ ឱ្យបានជ្រាបកាន់តែទូលំទូលាយ អំពីបទដ្ឋានច្បាប់នានាដែលពាក់ព័ន្ធការដឹកជញ្ជូន លើសទម្ងន់កម្រិតកំណត់ ជាពិសេសច្បាប់ស្តីពី ផ្លូវថ្នល់ មាត្រា២៦ និងមាត្រា៦០ និងសេចក្ដីជូនដំណឹង លេខ០៤៩ សជណ សក. គតលទ ស្តីពីការពង្រឹងវិធានការយ៉ាងតឹងរ៉ឹងបន្ថែម ចំពោះយានយន្តដឹកជញ្ជូនធុនធ្ងន់ ដែលបើកបរលើបណ្តាញផ្លូវថ្នល់នៅទូទាំងប្រទេស។

ជាងនេះទៅទៀត ក្រុមការងារនឹងបន្តអនុវត្តច្បាប់ និងទប់ស្កាត់ការដឹកជញ្ជូនលើសទម្ងន់កម្រិតកំណត់យ៉ាងតឹងរ៉ឹងបំផុត ដោយមិនមានការលើកលែងឡើយ៕

មន្ទីរទេសចរខេត្តស្ទឹងត្រែង រៀបចំសារៈមន្ទីរសំរាប់តម្កល់ទុកឆ្អឹងផ្សោតបន្ទាប់ ពីសត្វកម្រនេះជិតផុតពូជ

ដោយៈកុសមា

ស្ទឹងត្រែងៈ សត្វផ្សោតដែលរស់នៅរមណីយដ្ឋានទេសចរ ព្រះរំកិលខេត្តស្ទឹងត្រែង ស្លាប់ជាបន្តបន្ទាប់ ដែលនៅសល់ផ្សោតតែមួយក្បាលប៉ុណ្ណោះ ដូចនេះទើបមន្ទីទេសច​រណ៍ខេត្ត ក៏បានរៀបចំអោយមានសារៈមន្ទីរ សំរាប់តម្កល់ទុកឆ្អឹងផ្សោត ដើម្បីបង្វែរទិសអោយភ្ញៀវទេសចរ ទស្សនាសំណាកឆ្អឹងផ្សោតជំនួសវិញ។

យោងតាមគេហទំព័រមានរបស់មន្ទីរព៌តមានទេសចរណ៍ខេត្តស្ទឹងត្រែង ដែលមាន​លោកអ៊ន ប៉ោសឿន ប្រធានមន្ទីរទេសចរណ៍ខេត្តបានបញ្ជាក់ថា “បើយើងមិនថែរក្សា និងអភិរក្សសំណាកឆ្អឹងសត្វ ផ្សោតនេះទេ រមណីយដ្ធានទេសចរណ៍មួយនេះ នឹងឈានទៅបាត់បង់ទៅថ្ងៃអនាគត”។

លោកបន្តថា ថវិកាក្នុងការអភិរក្សគឺបានទទួលពីមន្ទីរទេសចរ និងបានពីអង្គការជាដៃគូរ និងសប្បុរសជននានា បានរៀបចំជាបណ្ណាល័យមួយដើម្បី ទុកដាក់ឆ្អឹងសត្វផ្សោតនេះឲ្យឋិតឋេរគង់វង្សក្នុងការបំរើជីវភាព ដល់បងប្អូនប្រជាពលរដ្ឋរស់នៅតំបន់នោះ​។

ជាមួយគ្នានេះ លោកផយ វណ្ណា សមាជិកសហគមន៍រមណីយដ្ឋាន សត្វផ្សោតព្រះរំកិល បានគាំទ្របានគំនិតផ្ដួចផ្ដើមនេះ ហើយលោកនឹងប្រឹងប្រែងអនុវត្តតាមការណែនាំ និងអំពាវនាវរកអ្នក បរិច្ចាគថវិកាបន្ថែម សម្រាប់យកមកទិញសម្ភារៈ ដូចជា កញ្ចប់សំរាប់ឆ្អឹងផ្សោតជាដើម។

លោក បន្ថែមថា “នេះជាសមិទ្ធផលថ្មី ផ្ដល់ផលប្រយោជន៍រួមទាំងអស់គ្នា នៅពេលយើងរក្សាបាននូវសំណាកឆ្អឹងសត្វផ្សោត វាជាចំណែកមួយជួយទាក់ទាញភ្ញៀវទេសចរ  ឱ្យមកលេងកម្សាន្ត នៅតំបន់នេះបាន ក្នុងពេលដែលសត្វផ្សោតក្នុងទឹក ត្រូវស្លាប់បាត់បង់អស់”។

ចំណែកលោក កញ្ញា ថងបាង អាជីវករ លក់ចំណីអាហារនៅតំបន់រមណីយដ្ឋាន បានឱ្យដឹងថា កាលពីដើមឆ្នាំ២០២១ សត្វផ្សោតធំៗបានស្លាប់ចំនួនពីរក្បាល បច្ចុប្បន្ននៅតែមួយក្បាលប៉ុណ្ណោះ។

ការរៀបចំឲ្យមានបណ្ណាល័យអភិរក្សឆ្អឹងសាកសពនេះ ជាចំណុចមួយថែរក្សា នៅតំបន់អេកូទេសចរណ៍ សត្វផ្សោតព្រះអង្គអោយមាននិរន្តភាព ដើម្បីបម្រើវិស័យទេ​សចរណ៍ ក្នុងឃុំព្រះរំកិលនេះកុំឲ្យបាត់បង់ តំបន់អេកូទេសចរណ៍ មួយនេះបានកើនឡើងជាង ២០ឆ្នាំមកហើយក្រោមការឧបត្ថម្ភរបស់ អង្គការម្លប់បៃតង និងអង្គការស៊ីប៉ា និងអាជ្ញាធរមូលដ្ឋាន ដែលបានផ្ដួចផ្ដើមឡើងក្រោមការជួយគាំទ្រ ពីមន្ទីរទេសចរណ៍ខេត្តស្ទឹងត្រែង៕

អាជ្ញាធរទេសចរណ៍ថៃគ្រោងបង្កើតក្រុមហ៊ុន digital ឯកជនមួយគាំទ្រដល់ការ ផ្លាស់ប្តូរប្រពន្ធ័ធីជីថលក្នុងប្រទេស

ដោយៈកុសុមា

ប្រទេសថៃៈ អាជ្ញាធរទេសចរណ៍ថៃ(TAT) គ្រោងបង្កើតក្រុមហ៊ុន digital ឯកជនមួយ ដើម្បីគាំទ្រដល់ការផ្លាស់ប្ដូរ ប្រពន្ធ័ឌីជីថលរបស់ប្រទេស ក្នុងរយៈពេល 6ខែខាងមុខនេះ។

បេសកកម្មសំខាន់ សំរាប់ក្រុមហ៊ុននេះ ដើម្បីអភិវឌ្ឍហេដ្ឋារចនាសម្ព័ន្ធ ប្រព័ន្ធឌីជីថលសម្រាប់វិស័យទេសចរ បង្កើតទិន្នន័យធំមួយសំរាប់ឧ្សាហកម្ម និង បើកអោយដំនើរការ និមិត្តសញ្ញាឧបករណ៍ប្រើប្រាស់ ក្រោមTAT coin or non-fugible tokens (NFTs) ដែលមិនអាចប្រើប្រាស់ក្នុងការដួញដូរបាន។

ដោយមានគោលដៅ ក្នុងការបង្កើតអោយបាននូវទឹកប្រាក់ 2.4 ទ្រីលានបាត ពី អ្នកធ្វើដំនើរដែលចំនាយខ្ពស់ ក្នុងឆ្នាំ2023។ អភិបាលរបស់ TAT លោក Yuthasak Supasorn បាននិយាយអោយដឹងថា អាជ្ញាធរត្រូវបានកំនត់ ចំនែកត្រឹម40% ប៉ុណ្ណោះ ដូចនេះវាមិនអាចរាប់បញ្ចូលជា សហគ្រាសរបស់រដ្ឋបានឡើយ។ ទន្ទឹមនេះ ចំនែក 40% ផ្សេងទៀត របស់ម្ចាស់កម្មសិទ្ធ ត្រូវកាន់កាប់ដោយដៃគូយុទ្ធសាស្ត្រ ក្នុងវិស័យឌីជីថលហើយ 20% ទៀត ត្រូវចែករំលែក ដោយសមាគមទេសចរណ៍សំខាន់ៗ។

ដោយមានងារជាក្រុមហ៊ុនឯកជន អភិបាលរបស់TAT បាននិយាយផងដែរថា  ក្រុមហ៊ុអាចជួល អ្នកជំនាញការ ដោយផ្តល់ប្រាក់ខែខ្ពស់និង ការលើកទឹកចិត្ត ដែលជាសារប្រយោជន៍សំរាប់វិស័យទេសចរឌីជីថល។

យោងតាមលោក Yurhisak រហូតមកដល់ពេលនេះ ក្រុមហ៊ុនទ្រព្យសម្បត្តិឌីជីថល ដែលមានដូចជា BitKub និង Zipmex បានបង្ហាញចំនាប់អារម្មណ៍ ក្នុងការបន្តាក់ទុន ក្នុងគំរោងមួយនេះ។ លោកបាននិយាយថា គំរូរបស់ក្រុមហ៊ុនមួយនេះ មានរចនាសម្ពន្ធ័ ប្រហាក់ប្រហែលគ្នា ទៅនឹង ក្រុមហ៊ុន Thailand Longstay ដែលផ្តល់ឯកសិទ្ធដល់ភ្ញៀវដែលស្នាក់នៅយូរ។

Source: NNT-National New Bureau of Thailand៕