រដ្ឋាភិបាលប្រមូលចំណូលពីពន្ធដារបានជាង១៥៩០លានដុល្លារគិតត្រឹម

ដោយៈ សាវុធ

ភ្នំពេញៈ អគ្គនាយកដ្ឋានពន្ធដារ ប្រមូលចំណូលពន្ធ-អាករគ្រប់ប្រភេទ តាមប្រព័ន្ធគ្រប់គ្រងទិន្នន័យចំណូលអនឡាញ សរុបជាទឹកប្រាក់មានចំនួនជាង៦ ៤៤១ប៊ីលានរៀល ស្មើនឹងប្រមាណ១ ៥៩០,២៩លានដុល្លារអាមេរិកគិតត្រឹមថ្ងៃទី ២០ ខែ កក្កដា ឆ្នាំ២០២១។

នេះបើយោងតាមសេចក្តីប្រកាសព័ត៌មាន ស្តីពីកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែ មិថុនា និងប្រចាំឆមាសទី១ ឆ្នាំ ២០២១ របស់អគ្គនាយកដ្ឋានពន្ធដារ នៅថ្ងៃទី២០ ខែកក្តដា ឆ្នាំ ២០២១នេះ។

ការប្រមូលចំណូលពន្ធ និងអាករគ្រប់ប្រភេទ របស់អគ្គនាយកដ្ឋានពន្ធដារ ប្រមូលចំណូលបានមានចំនួនជាង ៦៧៨ ប៊ីលានរៀល ត្រូវប្រមាណជិត១៦៨លានដុល្លារអាមេរិក ស្មើជាង៧% នៃផែនការច្បាប់ហិរញ្ញវត្ថុ សម្រាប់ការគ្រប់គ្រងឆ្នាំ២០២១ ប្រៀបធៀបនឹងចំណូលពន្ធ-អាករ ប្រចាំខែមិថុនា ឆ្នាំ២០២០ ឃើញថា ចំណូលនេះបានថមថយចុះជាង១៣០ប៊ីលានរៀល ត្រូវប្រមាណជា៣២លានដុល្លារអាមេរិក ស្មើ-១៦,១១%។

ដោយឡែកការប្រមូលចំណូលនៅក្នុងឆមាសទី១ ឆ្នាំ២០២១ នេះវិញ ចំណូលពន្ធ-អាករដែលអគ្គនាយកដ្ឋានពន្ធដារប្រមូលបាន តាមប្រព័ន្ធគ្រប់គ្រងទិន្នន័យចំណូលអនឡាញ សរុបមានចំនួនជាង៦ ១៣៩ពាន់លានរៀល ត្រូវជិត១ ៥១៦លានដុល្លារអាមេរិក ស្មើជាង៦៧% នៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ ២០២១ ក្នុងនោះបើធៀបចំណូលពន្ធ-អាករ ក្នុងរយៈពេលដូចគ្នាឆ្នាំ២០២០ ឃើញថា ថយចុះជិត ៧២៨ ប៊ីលានរៀល ត្រូវប្រមាណជាង១៧៩លានដុល្លារអាមេរិក ស្មើ-១០,៦០%។

បើគិតមកដល់ថ្ងៃទី ២០ ខែកក្កដា ឆ្នាំ២០២១ នេះវិញ អគ្គនាយកដ្ឋានពន្ធដារប្រមូលចំណូលពន្ធ-អាករគ្រប់ប្រភេទ បានចំនួនជាង ៦ ៤៤១ ប៊ីលានរៀល ត្រូវជាង ១ ៥៩០ លានដុល្លារអាមេរិក ខណៈដែលក្នុងរយៈពេល ២០ ថ្ងៃ នៃខែកក្កដា ឆ្នាំ ២០២១ នេះ បានប្រមូលចំណូលសរុបចំនួនជាង ៣០១ ប៊ីលានរៀល ត្រូវជាង ៧៤ លានដុល្លារអាមេរិក។

លោកគង់ វិបុល រដ្ឋមន្ត្រីប្រតិភូអមនាយករដ្ឋមន្រ្តី និងទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានបញ្ជាក់ថា ការអូសបន្លាយនៃការរាតត្បាតនៃជំងឺកូវីដ-១៩ ក្នុងឆ្នាំ២០២០ និងការផ្ទុះឡើងនៃព្រឹត្តិការណ៍សហគមន៍ “២០កុម្ភៈ” បានជះឥទ្ធិពលជាអវិជ្ជមាន មកលើការគ្រប់គ្រងប្រមូលចំណូលពន្ធ-អាករយ៉ាងខ្លាំង។

លោកបានថ្លែងបន្តថា ក៏ប៉ុន្តែការដាក់ចេញនូវវិធានការ និងការអនុវត្តតាមប្រព័ន្ធអនឡាញ និងប្រព័ន្ធបច្ចេកវិទ្យាព័ត៌មាន ដែលអគ្គនាយកដ្ឋានពន្ធដារបានបង្កើតជាបន្តបន្ទាប់ គឺជាការអនុវត្តប្រកបដោយបុរេសកម្ម និងបានឆ្លើយតបទៅនឹងបញ្ហាប្រឈមព្រមទាំងការលំបាកនានាក្នុងបរិបទនៃការរីករាតត្បាតនៃជំងឺកូវីដ-១៩នេះ ដែលបានឆ្លុះបញ្ចាំងតាមរយៈលទ្ធផលប្រមូលចំណូលក្នុងឆមាសទី១ ឆ្នាំ២០២១ សម្រេចបានរហូតដល់ ៦៧,៥៨% នៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០២១៕

សឹង្ហបុរីគ្រោងចំណាយប្រាក់៤៧០លានដុល្លារសាងសង់ស្ថានីយ៍រថភ្លើងដ៏ទំនើបមួយ

ដោយៈសុខុម

សិង្ហបុរី: អាជ្ញាធរដឹកជញ្ជូនតាមផ្លូវគោក (LTA) របស់សិង្ហបុរី បានបញ្ជាក់នៅថ្ងៃអង្គារ ទី២០ កក្កដា នេះថា ការសាងសង់ស្ថានីយរថភ្លើង Ang Mo Kio Station ដែលជាចំណុចខ្សែភ្លើងជៀសគ្នាលើផ្លូវដែក Cross Island Line គ្រោងចាប់ផ្ដើមក្នុងត្រីមាសទី៤ ចុងឆ្នាំ២០២១ នេះ។ នេះបើយោងតាមការចុះផ្សាយរបស់សារព័ត៌មាន CNA។

អាជ្ញាធរនេះបានបន្ថែមថា តាមការរំពឹងទុក សេវាកម្មដឹកអ្នកដំណើរអាចនឹងចាប់ ផ្តើមនៅឆ្នាំ២០៣០។ នៅពេលការសាងសង់បញ្ចប់ជាស្ថាពរ ស្ថានីយនេះនឹងក្លាយជាចំណុចជៀសគ្នារវាងផ្លូវដែក Cross Island Line និងផ្លូវដែក North-South Line។

ស្ថានីយថ្មីនេះ នឹងមានច្រកចូលដែលតភ្ជាប់ដោយផ្ទាល់ ទៅនឹងប្លុកអគារលំនៅ ដ្ឋានខុសៗគ្នា ផ្សារទំនើប AMK Hub ស្ថានីយ Ang Mo Kio Integrated Transport Hub និងឧទ្យាន Ang Mo Kio Town Garden East។
យោងតាមតាមអាជ្ញាធរដឹកជញ្ជូនតាមផ្លូវគោកបានឱ្យដឹងថា ពេលមានស្ថានីយផ្លូវដែក Cross Island Line ថ្មីនេះ ការធ្វើដំណើរពីស្ថានីយ Ang Mo Kio Integrated Transport Hub ទៅកាន់ឧទ្យាន Aviation Park ដែលត្រូវចំណាយពេលប្រមាណ៧០នាទី នឹងត្រូវកាត់បន្ថយមកនៅត្រឹម៣៥នាទី។

ការធ្វើដំណើរទៅមករវាងតំបន់ Pasir Ris និងស្ថានីយ Ang Mo Kio Integrated Transport Hub ដែលបច្ចុប្បន្នត្រូវប្រើពេល១មួយម៉ោង នឹងត្រូវកាត់បន្ថយមកនៅត្រឹម២៥នាទី។

កិច្ចសន្យាមួយដែលមានតម្លៃ៤៧០,៨៧លានដុល្លារអាមេរិក សម្រាប់ការឌីហ្សាញ និងការសាងសង់ស្ថានីយរថភ្លើង Ang Mo Kio Station និងផ្លូវក្រោមដី ត្រូវបានប្រគល់ ឱ្យទៅគម្រោងបណ្តាក់ទុនរួមគ្នាមួយ រវាងក្រុមហ៊ុន Bachy Soletanche Singapore និងក្រុមហ៊ុន Gammon Construction and Engineering។

អាជ្ញាធរដឹកជញ្ជូនតាមផ្លូវគោកនិយាយថា បច្ចុប្បន្នក្រុមហ៊ុនទាំង២នេះ កំពុងចូលរួមក្នុងគម្រោងហេដ្ឋារចនាសម្ព័ន្ធ និងគម្រោងសាងសង់នានាក្នុងប្រទេសសិង្ហបុរី៕

អ្នកជំនាញៈទីផ្សារខុនដូនៅកម្ពុជានៅតែមានតម្រូវការខ្ពស់ ទោះបីជាមានកំណើនផ្គត់ផ្គង់មានច្រើនក្ដី

ដោយៈវឌ្ឈនៈ

ភ្នំពេញៈ ទោះបីជាបច្ចុប្បន្ននេះ កំណើននៃខុនដូនៅក្នុងប្រទេស មានចំនួនច្រើនជាងមុនក៏ពិតមែន និងមានក្រុមហ៊ុនអភិវឌ្ឍន៍ខុនដូថ្មីៗ ជាបន្តបបន្ទាប់ក្ដី តែតម្រូវការទីផ្សារខុនដូ នៅតែមានខណៈប្រជាពលរដ្ឋកម្ពុជកាន់តែច្រើន ក៏បានចាប់ផ្ដើមផ្លាស់ប្តូរឥរិយាបទងាកទៅរស់ក្នុងខុនដូជាបន្តបន្ទប់។

លោកខន គង្គា អគ្គនាយកក្រុមហ៊ុន ERA Cambodiaបានឱ្យដឹងកាលពីថ្ងៃទី២០ កក្កដាកន្លងមកថា ទីផ្សារខុនដូនៅក្នុងប្រទេសកម្ពុជាមកដល់ពេលនេះ នៅតែមានតម្រូវការ ទោះបីការផ្គត់ផ្គង់មានកំណើនជាងមុនក្ដី ពីព្រោះបច្ចុប្បន្ននេះ ប្រជាជនកម្ពុជាជាច្រើនបានចាប់ផ្ដើមស្វែងយល់ និងបានផ្លាស់ប្តូរមករស់នៅក្នុងខុនដូជាបន្តបន្ទាប់ផងដែរ ។

លោកបន្តថា “ដូច្នេះទោះបីមានក្រុមហ៊ុនមកអភិវឌ្ឍន៍ខុនដូ៣ ទៅ៤ម៉ឺនយូនីតទៀត ក៏មិនទាន់លើសតម្រូវការដែរ ដូច្នេះកម្ពុជានៅតែត្រូវការអ្នកអភិវឌ្ឍន៍វិស័យខុនដូបន្តទៀត”។ លោកបន្តថា “ប្រជាពលរដ្ឋមួយចំនួនដែលរស់នៅភ្នំពេញ ហើយបានទៅទិញផ្ទះនៅឆ្ងាយពីកន្លែងការងារនៅកណ្ដាលក្រុង ក៏ចាប់ផ្ដើមស្វែងរកខុនដូនៅក្បែរកន្លែងធ្វើការវិញ ដែលជាការសម្រួលដល់ការធ្វើដំណើរ មិនខាតពេលវេលាក្នុងការធ្វើដំណើរ ចំណេញថវិកាបានមួយកម្រិតផងដែរ”។

អ្នកខ្លះទៀតក៏បានទិញខុនដូ សម្រាប់ស្នាក់នៅថ្ងៃធ្វើការរបស់គាត់ ហើយថ្ងៃសៅរ៍អាទិត្យ ក៏ទៅស្នាក់ជុំគ្រួសារនៅផ្ទះមួយទៀតឯជាយក្រុង ដែលជាផ្ទះជាប់ដីព្រោះខ្មែរយើងមួយចំនួន នៅតែប្រកាន់ខ្ជាប់នូវផ្ទះជាប់ដី ហើយក៏មានអ្នកខ្លះទៀតទិញផ្ទះឆ្ងាយពីភ្នំពេញនៅតាមខេត្ត និងស្នាក់នៅខុនដូនៅថ្ងៃធ្វើការ។

លោកថា “អ្នកទិញខុនដូជាជនជាតិខ្មែរ ភាគច្រើនជាមនុស្សសម័យថ្មី វ័យក្មេង ធ្លាប់រស់នៅបរទេស និងអ្នកដែលចូលចិត្តស៊ីវិល័យ និងមានអាយុក្រោម៣០ឆ្នាំ” ។លោកបន្ថែមថា “ការផ្លាស់ប្តូរឥរិយាបថរបស់ជនជាតិខ្មែរនេះហើយ ដែលអាចនិយាយថាតម្រូវការខុនដូ នៅតែមានខ្ពស់បើទោះបីជាមានការអភិវឌ្ឍ និងផ្គត់ផ្គង់ថ្មីៗបន្តបន្ទាប់ក៏ដោយ”។

ចំនួនតម្រូវការនេះ មិនទាន់រាប់ដល់ទីផ្សារអាស៊ាន ដែលចូលមកធ្វើការនិងវិនិយោគនៅក្នុងប្រទេសកម្ពុជា ក៏ដូចជាជនបរទេសផ្សេងទៀតផង ដូច្នេះបើសរុបទាំងជនបរទេសទៀត ឃើញថាតម្រូវការខុនដូវាពិតជាមានច្រើនណាស់ ។

ជាមួយគ្នានេះ លោកសំ សុខនឿនប្រធានសមាគមអចលនទ្រព្យសកលក៏បានឱ្យដឹងផងដែរថា ក្នុងពេលដែលទីផ្សារខុនដូចាប់ផ្ដើម មានប្រជាជនក្នុងស្រុក អ្នកអភិវឌ្ឍន៍ខុនដូ គួរតែផ្លាស់ប្តូរការអភិវឌ្ឍរបស់ខ្លួន ដើម្បីបំពេញទៅតាមតម្រូវការទីផ្សារក្នុងស្រុកដែរ ដូចជា ត្រូវមានចំណតយានយន្តគ្រប់គ្រាន់ ការរចនាបែបខ្មែរខ្លះៗជាដើម ។
ក្នុងបរិបទកូវីដ១៩នេះ គេមិនទាន់ឃើញមានគម្រោងណាមួយ ត្រូវគាំងផ្អាកដំនើរការទាំងស្រុងនោះទេ ពោលគឺនៅតែមានសកម្មភាពសាងសជាបន្តបន្ទាប់ គ្រាន់តែការដ្ឋានខ្លះត្រូវធ្វើសកម្មភាពយឺតៗ ព្រោះតែខ្វះខាតកំលាំងពលកម្ម ឬកម្មករត្រូវជាប់ពាក់ព័ន្ធនឹងកូវីដ១៩ជាដើម៕

តើក្រុមហ៊ុនអាកាសចរណ៍មួយណាជាប់ឈ្មោះជាក្រុមហ៊ុនល្អដាច់គេក្នុងពិភពលោកប្រចាំឆ្នាំ២០២១?

ដោយៈសុខុម

CNN: ឆ្នាំ២០២០ ជាឆ្នាំមហាសែនស៊យ សម្រាប់ឧស្សាហកម្មអាកាសចរណ៍ទូទាំងពិភពលោក ដោយយន្តហោះរបស់ក្រុមហ៊ុនជាច្រើន មិនអាចហោះហើរបាន ពោលគឺបានត្រឹមតែចតចោលប៉ុណ្ណោះ ដោយសារការផ្ទុះវិបត្តិកូវីដ-១៩។

ប៉ុន្តែនៅពេលស្ថានភាពធ្វើដំណើរតាមផ្លូវអាកាស បានចាប់ផ្តើមវិលមករកភាពប្រក្រតីជាបណ្ដើរៗវិញនៅតំបន់ខ្លះ នៃពិភពលោក AirlineRatings.com ដែលជាទីភ្នាក់ងារដាក់ចំណាត់ថ្នាក់ក្រុមហ៊ុនអាកាសចរណ៍ បានប្រកាសលទ្ធផលដាក់ចំណាត់ថ្នាក់ប្រចាំឆ្នាំរបស់ខ្លួន ដោយប្រមូលចងក្រង នូវក្រុមហ៊ុនអាកាសចរណ៍ល្អៗដាច់គេរបស់ពិភពលោក ដែលត្រៀមខ្លួនរួចជាស្រេចចាំទទូលស្វាគមន៍អ្នកដំណើរ និងជួយពួកគេសម្រេចចិត្តថា តើគួរជ្រើសរើសក្រុមហ៊ុនអាកាសចរណ៍មួយណា សម្រាប់ការធ្វើដំណើរតាមផ្លូវអាកាសជាថ្មីឡើងវិញរបស់ខ្លួន។

ទីភ្នាក់ងារដាក់ចំណាត់ថ្នាក់ក្រុមហ៊ុនអាកាសចរណ៍ ដែលមានមូលដ្ឋាននៅប្រទេសអូស្ត្រាលី មួយនេះបានប្រកាសផ្ដល់ “ពានរង្វាន់ក្រុមហ៊ុនអាកាសចរណ៍ល្អដាច់គេ” (Airline Excellence Awards) របស់ខ្លួន។ លក្ខខណ្ឌនៃការដាក់ពិន្ទុត្រូវបានធ្វើឡើងដោយផ្អែកលើចំណុចសំខាន់ៗ រួមមាន អាយុកាលនៃយន្តហោះ សុវត្ថិភាព និងការបម្រើសេវាកម្មជាដើម។ នៅឆ្នាំនេះ គណៈវិនិច្ឆ័យទូទាំងពិភពលោក ក៏បូកបញ្ចូលពិន្ទុឆ្លើយតបរបស់ក្រុមហ៊ុនអាកាសចរណ៍នានា ទៅនឹងការឆ្លងរាតដាលវីរុសកូវីដ-១៩ ផងដែរ។

សម្រាប់ឆ្នាំ២០២១ នេះ ក្រុមហ៊ុនអាកាចរណ៍ Qatar Airways នៃប្រទេសកាតា បានជាប់ចំណាត់ថ្នាក់លេខ១ ដោយផ្ដួលជើងឯកចាស់គឺក្រុមហ៊ុនអាកាសចរណ៍ Air New Zealand ដែលបានគ្រងតំណែងកំពូលនេះរយៈពេល៦ឆ្នាំ។ នៅឆ្នាំនេះ ក្រុមហ៊ុនអាកាសចរណ៍ Air New Zealand បានធ្លាក់មកនៅត្រឹមចំណាត់ថ្នាក់លេខ២។

លោក Geoffrey Thomas អគ្គនិពន្ធនាយកនៃទីភ្នាក់ងារដាក់ចំណាត់ថ្នាក់ក្រុមហ៊ុនអាកាសចរណ៍ AirlineRatings.com បានប្រាប់សារព័ត៌មាន CNN Travel ដែលបានចុះផ្សាយកាលពីថ្ងៃទី២០ កក្កដា ថា ក្រុមហ៊ុនអាកាសចរណ៍ Qatar Airways បានជាប់ចំណាត់ថ្នាក់កំពូល ដោយសារក្រុមហ៊ុននេះឆ្លើយតប ទៅនឹងវិបត្តិឆ្លងរាលដាលវីរុសកូវីដ-១៩ បានយ៉ាងល្អ។

លោកគូសបញ្ជាក់ថា “ក្រុមហ៊ុនអាកាសចរណ៍ Qatar Airways តែងតែទទួលបានចំណាត់ថ្នាក់ខ្ពស់ នៅក្នុងការដាក់ចំណាត់ថ្នាក់របស់យើង ដោយឈ្នះពានរង្វាន់ជាច្រើនដូចជាពានរង្វាន់ Best Business Class ជាដើម ហើយការប្តេជ្ញាចិត្តរបស់ក្រុមហ៊ុនមួយនេះ នៅក្នុងការរក្សាដំណើរការបណ្តាញ ផ្លូវហោះហើរភាគច្រើនរបស់ខ្លួន ទទួលបានការសរសើរយ៉ាងខ្លាំង និងការបោះឆ្នោតគាំទ្រយ៉ាងច្រើនពីក្រុមអ្នកកាត់សេចក្ដី”។

លោកក៏បានគូសបញ្ជាក់ពីជើងហោះហើរ និងការប្ដេជ្ញាចិត្តរបស់ក្រុមហ៊ុននេះផងដែរ ចំពោះការធ្វើឱ្យអ្នកធ្វើដំណើរ ទទួលបានបទពិសោធន៍ហោះហើរ ប្រកបដោយសុវត្ថិភាពខ្ពស់តាមដែលអាចធ្វើទៅបានអំឡុងវិបត្តិកូវីដ-១៩។

ទីភ្នាក់ងារដាក់ចំណាត់ថ្នាក់ក្រុមហ៊ុនអាកាសចរណ៍ AirlineRatings.com ប្រកាសលទ្ធផលក្រុមហ៊ុនអាកាសចរណ៍កំពូលៗ របស់ខ្លួននៅខែវិច្ឆិកា ប៉ុន្តែវិបត្តិកូវីដ-១៩ បានបង្ខំឱ្យទីភ្នាក់ងារមួយនេះ ធ្វើការប្រកាសមុនពេលកំណត់៕

លោកស្រីឱ វណ្ណឌីនៈ ឱសថ LIANHAU GINGWEN របស់ចិនជាការខិតខំរបស់រដ្ឋាភិបាលដើម្បីសង្រ្គោះអាយុជីវិតប្រជាពលរដ្ឋពីជំងឺកូវីដ

ដោយៈគង់ សូរិយា

ភ្នំពេញៈ មន្រ្តីជាន់ខ្ពស់ និងជាអ្នកនាំពាក្យក្រសួងសុខាភិបាល លោកស្រីឱ វណ្ណឌឌីនបានមានប្រសាសន៍ឲ្យដឹងថា ការប្រើប្រាស់ឱសថបុរាណចិន Lianhua Qingwen ត្រូវជាវិធីសាស្ត្រមួយ ក្នុងចំណោមវិធីសាស្ត្រជាច្រើនទៀត ដែលរាជរដ្ឋាភិបាលខិតខំស្វះស្វែងរក ដើម្បីជួយសង្គ្រោះអាយុជីវិតប្រជាពលរដ្ឋពីជំងឺកូវីដ១៩។

លោកស្រីបន្តថា ឱសថបុរាណចិន Lianhua Qingwen ត្រូវបានអះអាងថា ដោយក្រុមហ៊ុនឱសថបុរាណចិនថា មានមុខងារព្យាបាលដូចជា បន្សាបជាតិពុល និងបញ្ចុះកំដៅពីក្នុងសួត។ វាត្រូវបានប្រើសម្រាប់ព្យាបាលជំងឺគ្រុនផ្តាសាយ គ្រុនក្តៅ ឈឺសាច់ដុំ ហៀរសំបោរ ក្អក ឈឺក្បាល ស្ងួតបំពង់ក ឬឈឺបំពង់ក អណ្តាតឡើងពណ៌ក្រហមជាដើម។

លោកស្រីឱ វណ្ណឌីន បានបញ្ជាក់ថា ឱសថបុរាណចិន LIANHAU GINGWEN អាចជួយសម្រាលរោគសញ្ញាដូចជាក្ដៅខ្លួន ក្អក ផ្ដាសសាយ ឈឺបំពង់ក តឹងច្រមុះ ដើម្បីទប់កុំឱ្យស្ថានភាពជំងឺមានការវិវត្តន៍ធ្ងន់ធ្ងរ។ ក្នុងករណីឱសថនេះ ជួយដល់ផ្លួវដង្ហើម ជួយដល់ស្ថានភាព នៃការផ្ដាសសាយរបស់អ្នកជំងឺ ដូច្នេះសរីរាង្គរបស់មនុស្សនឹងមានការឆ្លើយតបមួយល្អប្រសើរ ហើយអ្នកជំងឺអាចវិវត្តន៍ទៅរកការជាសះស្បើយផងដែរ។

លោកស្រីបានអះអាងថា ឱសថនេះបានប្រើប្រាស់ដំបូងនៅប្រទេសចិន ពេលមានអ្នកជំងឺកូវីដ១៩ ឆ្លងទ្រង់ទ្រាយធំនៅទីនោះ ហើយក៏មានការធូរស្បើយមួយចំនួនធំ។ ឱសថនេះ ក៏មានការប្រើប្រាស់នៅប្រទេសប្រេស៊ីល ហ្វីលីពីន ឥណ្ឌូនេស៊ី កាណាដា ម៉ូ ហ្ស៉ប៊ិច រ៉ូម៉ានី ថៃ ឡាវ និងសិង្ហបុរីជាដើម។

ការប្រើឱសថនេះ ជាវិធីសាស្ត្រក្នុងការជួយសង្គ្រោះប្រជាពលរដ្ឋ ពីជំងឺកូវីដ១៩ ដោយមានការគិតពិចារណាខ្ពស់ មិនមែនជាការប្រើប្រាស់ប្រថុយប្រថាន ដូចការលើកឡើងរបស់ជនមួយចំនួននោះឡើយ។

លោកស្រីឱ វណ្ណឌីនបានបន្តថា “នេះគឺជាវិធីសាស្ត្រមួយ ក្នុងចំណោមវិធីសាស្ត្រផ្សេងៗទៀត ដែលរាជរដ្ឋាភិបាល ក៏ដូចជាក្រសួងសុខាភិបាល បានខិតខំស្វះស្វែងរកអស់លទ្ធភាពរបស់ខ្លួន ដើម្បីជួយសង្គ្រោះអាយុជីវិតបងប្អូនប្រជាពលរដ្ឋ។ មិនមែនធ្វើដើម្បីសម្លាប់ប្រជាពលរដ្ឋទេ”។ លោកស្រីក៏បានផ្ដល់ដំបូន្មានមួយចំនួន លើការប្រើប្រាស់ឱសថនេះផងដែរ។

លោកស្រីឱ វណ្ណឌីន សម្រាប់អ្នកវិជ្ជមានជំងឺកូវីដ១៩ មនុស្សធំ ប្រើម្ដង៤គ្រាប់ ហើយមួយថ្ងៃ៣ដង។ អាចប្រើបានក្នុងកម្រិតពី៧ថ្ងៃ ទៅ១០ថ្ងៃប៉ុណ្ណោះ មិនអាចប្រើយូរជាងនេះបានទេ។

ដោយឡែកកុមារ មិនមានការណែនាំឱ្យប្រើប្រាស់នោះទេ តែបើប្រើគឺប្រើត្រឹមកម្រិតទាបបំផុត។

លោកស្រីផ្តល់ដំបូន្មានបន្តថា ក្នុងករណីអ្នកជំងឺមានអាការៈធ្ងន់ធ្ងរ ឬមានបញ្ហាអ្វីកើតឡើងនៅពេលប្រើប្រាស់ សូមប្រញាប់ទៅជួបគ្រូពេទ្យជំនាញជាបន្ទាន់ កុំសាកល្បងព្យាបាលដោយគ្មានការពិគ្រោះជាមួយក្រុមគ្រូពេទ្យ៕

ប្រទេសចិនឈរនៅលំដាប់ទី១នៃវិនិយោគិនអន្តរជាតិនៅកម្ពុជា ខណៈអាមេរិកជាទិសដៅនាំចេញដ៏ធំសម្រាប់កម្ពុជា

ដោយៈ ម៉ាណេត

ភ្នំពេញៈ មហាយក្សចិន បានឈរនៅលំដាប់លេខរៀងទី១ ដែលបានបោះទុនវិនិយោគច្រើនជាងគេនៅកម្ពុជា ក្នុងឆមាសទី១ ឆ្នាំ២០២១ ខណៈសហរដ្ឋអាមេរិក បានក្លាយជាគោលដៅនាំចេញដ៏ធំ សម្រាប់ផលិតផលកម្ពុជាក្នុងរយៈពេល៦ ខែដំបូង ឆ្នាំនេះ។

យោងតាមទិន្នន័យរបស់ក្រុមប្រឹក្សាអភិវឌ្ឍន៍កម្ពុជា (CDC) រយៈពេល៦ខែ គិតចាប់ពីខែមករា ដល់ខែមិថុនាឆ្នាំ២០២១នេះ ចិនបានវិនិយោគនៅក្នុងប្រទេសកម្ពុជាមានទឹកប្រាក់សរុបប្រមាណ២ពាន់លានដុល្លារអាមេរិក ស្មើនឹង៦៩%នការវិនិយោគសរុបរបស់កម្ពុជា។

របាយការណ៍របស់ CDC បញ្ជាក់ថា ប្រទេសចិន បានឈរនៅលំដាប់លេខរៀងទី១ ដោយចូលរួមចំណែកប្រមាណ៦៩% នៃការវិនិយោគសរុបក្នុងឆមាសទី១ ឆ្នាំ២០២១។

ទីផ្សារសហរដ្ឋអាមេរិក បានក្លាយជាគោលដៅនាំចេញដ៏ធំ សម្រាប់ផលិតផលកម្ពុជាក្នុងរយៈពេល៦ ខែដំបូង ឆ្នាំ២០២១ ដោយសារប្រទេសទាំងពីរបានបញ្ជាក់ពីការប្តេ ជ្ញាចិត្ត ក្នុងការបន្តពង្រឹងកិច្ចសហប្រតិបត្តិការទ្វេភាគី ជាពិសេសលើវិស័យពាណិជ្ជកម្ម។

យោងតាមតួលេខពីក្រសួងពាណិជ្ជកម្មសម្រាប់ឆមាសទី១ ឆ្នាំនេះបានបង្ហាញថា ពាណិជ្ជកម្មទ្វេភាគីរវាងកម្ពុជា និងសហរដ្ឋអាមេរិកសម្រេចបាន ទំហំទឹកប្រាក់ជាង៣,១៩ពាន់លានដុល្លារក្នុងឆមាសទី១ ឆ្នាំ២០២១ កើនឡើង៣៦ភាគរយ ធៀបនឹងរយៈពេលដូចគ្នាកាលពីឆ្នាំមុន។

ការនាំចេញរបស់កម្ពុជាទៅទីផ្សារសហរដ្ឋអាមេរិក ស្មើនឹងប្រមាណ៣៦ភាគរយ នៃការនាំចេញសរុបរបស់កម្ពុជា គិតពីខែមករា ដល់ខែមិថុនា។

កម្ពុជាបាននាំចេញនូវផលិតផល មានតម្លៃជាង៣,០១ពាន់លានដុល្លារទៅកាន់សហរដ្ឋអាមេរិក។ ចំនួននេះតំណាងឱ្យការកើនឡើង៣៥ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។ កម្ពុជាបាននាំចូលទំនិញពីអាមេរិក គិតជាទឹកប្រាក់តម្លៃ១៧៣លានដុល្លារក្នុងឆមាសទី១ ឆ្នាំ២០២១នេះ កើនឡើង៤១ភាគរយ បើធៀបនឹងរយៈពេលដូចគ្នាកាលពីឆ្នាំមុន៕

គម្រោងវិនិយោគព្រលានយន្តហោះថ្មីនៅខេត្តកោះកុងត្រូវបានពន្យាពេលសាងសង់

ដោយៈ ប៊ី

ភ្នំពេញៈ គម្រោងសាងសង់ព្រលានយន្តហោះថ្មី ដែលជាការវិនិយោគរួមគ្នា ដោយក្រុមហ៊ុនអ្នកឧកញ៉ាលី យ៉ុងផាត់ និងក្រុមហ៊ុន Bangkok Airway របស់ថៃ នៅក្នុងខេត្តកោះកុង ត្រូវបានពន្យារពេលសាងសង់ ដោយសារវិបត្តិកូវីដ១៩។

អនុរដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិល លោក ស៊ីន ចាន់សិរី វុត្ថាបានមានប្រសាសន៍ឱ្យដឹងកាលពីថ្មីៗនេះថា អ្នកវិនិយោគព្រលានយន្តហោះថ្មី នៅក្នុងខេត្តខេត្តកោះកុង, បាត់ដំបង និងមណ្ឌលគិរី បានពន្យាពេលសាងសង់ព្រលានយន្តហោះ ដោយរង់ចាំមើលលើវិស័យដឹកជញ្ជូនល្អប្រសើរឡើងវិញ ដោយសារការរីករាលដាលនៃជំងឺកូវីដ១៩។

លោកបានឱ្យដឹងថា “អ្នកវិនិយោគព្រលានយន្តហោះ ពិតជាមានការបារម្ភ ដោយសារថាការរីករាលដាលជំងឺកូវីដ១៩ មានស្ថានភាពធ្ងន់ធ្ងរ។ ដូច្នេះអ្នកវិនិយោគពួកគាត់ មិនមានភាពច្បាស់លាស់ ក្នុងការគណនាថា ពេលណាជំងឺនេះ មានភាពធូរស្បើយ ហើយពេលណាទើបការដឹកជញ្ជូន មានការរីកចម្រើនឡើងវិញ នេះហើយជាកត្តាធ្វើឲ្យពួកគាត់ មានការពន្យារពេលវិនិយោគ ទៅលើព្រលានយន្តហោះ”។

លោកបានឲ្យដឹងទៀតថា ការពន្យារពេលវិនិយោគ ទៅលើព្រលានយន្តហោះនេះ រួមមាន ព្រលានយន្តហោះ ដែលស្ថិតនៅខេត្តកោះកុង ដែលត្រូវវិនិយោគដោយ ក្រុមហ៊ុន Bangkok Airway ជាមួយក្រុមហ៊ុនរបស់អ្នកឧកញ៉ា លី យ៉ុងផាត់។

គម្រោងវិនិយោគព្រលានយន្តហោះថ្មី នៅខេត្តកោះកុង ជាការវិនិយោគរួមគ្នា ដោយក្រុមហ៊ុនអ្នកឧកញ៉ា លី យ៉ុងផាត់ និងក្រុមហ៊ុន Bangkok Airway របស់ថៃ ដែលមានទំហំទឹកប្រាក់ប្រមាណ៤០លានដុល្លារអាមេរិក។

ដំបូងឡើយ គម្រោងវិនិយោគនេះ គ្រោងសាងសង់លើដីអតីតព្រលានយន្តកោះកុង ស្ថិតនៅក្រុងខេមរភូមិន្ទ ប៉ុន្តែដោយសារមានផលប៉ះពាល់ច្រើននោះ ទើបមានការផ្លាស់ប្តូរទីតាំងថ្មី ស្ថិតនៅភូមិកោះប៉ោ ឃុំប៉ាក់ខ្លង ស្រុកមណ្ឌលសីមា ខេត្តកោះកុង លើផ្ទៃដី៤០០-៦០០ហិកតា៕

តម្លៃប្រេងសកលធ្លាក់ចុះក្រោម ៧០ដុល្លារដោយសារ OPEC+ ឈានដល់កិច្ចព្រមព្រៀងស្តីពីការជំរុញទិន្នផល

ដោយ: ហ៊ុយ ក្រេង

អន្តរជាតិៈ សន្ទស្សន៍ប្រេងឆៅពិភពលោក Brent និង WTI បានបន្តធ្វើពាណិជ្ជកម្មក្រោម ៧០ ដុល្លារក្នុងមួយបារ៉ែលកាលពីថ្ងៃអង្គារ បន្ទាប់ពីអង្គការប្រទេសនាំប្រេងចេញ (OPEC) និងសម្ព័ន្ធមិត្តបានឈានដល់កិច្ចព្រមព្រៀង ដើម្បីបង្កើនផលិតកម្មប្រេង។

ប្រេងឆៅប្រភេទ WTI របស់អាមេរិកបានធ្លាក់ចុះជិត ៨% និងបានបិទជិតប្រហែល ៦៦ ដុល្លារក្នុងមួយបារ៉ែលកាលពីថ្ងៃចន្ទដែលជាការធ្លាក់ចុះខ្លាំងបំផុតក្នុងរយៈពេលមួយថ្ងៃចាប់តាំងពីខែកញ្ញាឆ្នាំ ២០២០ ។

ការជួញដូរកាលពីថ្ងៃច័ន្ទកន្លងមកនេះ ក៏បានមើលឃើញថាប្រេងឆៅប្រភេទ Brent អន្តរជាតិបានធ្លាក់ចុះជិត ៧% និងធ្លាក់ចុះក្រោម ៦៩ ដុល្លារក្នុងមួយបារ៉ែល។

តម្លៃប្រេងបានធ្លាក់ចុះបន្ទាប់ពីអង្គការ OPEC + បានឈានដល់កិច្ចព្រមព្រៀងស្តីពីការជំរុញផលិតកម្មប្រេងចំនួន ៤០០,០០០ បារ៉ែលក្នុងមួយថ្ងៃក្នុងមួយខែៗ ចាប់ផ្តើមពីខែសីហា ចំពេលមានតម្រូវការពិភពលោកកើនឡើង។ កិច្ចព្រមព្រៀងនេះ ត្រូវបានរាំងស្ទះដោយអេមីរ៉ាតអារ៉ាប់រួម នៅពេលដែលខ្លួនទាមទារឲ្យក្រុមកាតាឡុក បង្កើនកូតាផលិតកម្មមូលដ្ឋានរបស់ខ្លួន ដែលឥឡូវនេះត្រូវបានលើកឡើង។

បណ្តាប្រទេសសមាជិកអង្គការ OPEC + បានគ្រោងនឹងជំរុញផលិតកម្មបន្តិចម្តងៗ រហូតដល់ខែកញ្ញាឆ្នាំ២០២២ ដែលជាកន្លែងផលិតប្រេងត្រូវបានគេរំពឹងថា នឹងមានមុនកម្រិតវិបត្តិជម្ងឺកូវីត ១៩។

បច្ចុប្បន្នក្រុមនេះ កំពុងដកហូតប្រេងឆៅប្រមាណ៦លានបារ៉ែល ក្នុងមួយថ្ងៃក្នុងចំណោម១០លានបារ៉ែល ដែលត្រូវបានកាត់ចេញពីទីផ្សារ ក្នុងកំឡុងពេលដែលមានការរីករាលដាលធ្ងន់ធ្ងរបំផុត។ (Source: RT)៕

រដ្ឋាភិបាលអនុម័តគំរោងវិនិយោគថ្មីៗចំនួន៤ ជាមួយទឹកប្រាក់ទំហំជាង៥១លានដុល្លារ

ដោយៈ ម៉ាណេត

ភ្នំពេញៈ រដ្ឋាភិបាលតាមរយៈក្រុមប្រឹក្សាអភិវឌ្ឍន៍កម្ពុជា នៅថ្ងៃទី២០ ខែកក្កដា ឆ្នាំ២០២១ សម្រេចអនុម័តគម្រោងថ្មីៗចំនួន៤ ដែលគ្រោងបោះទុនវិនិយោគប្រមាណ៥១,១លានដុល្លារនៅកម្ពុជា និងបង្កើតការងារថ្មីៗរាប់ពាន់កន្លែងដល់ប្រជាជនស្រុក។

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុនដូចជា ទី១-ក្រុមហ៊ុន HONG CEN MAX LEATHER PRODUCTS CO., LTD : គម្រោងបង្កើតរោងចក្រផលិតកាបូបគ្រប់ប្រភេទ និងខ្សែក្រវាត់ ដែលមានទីតាំងវិនិយោគស្ថិតនៅភូមិត្រពាំងប្រុយ ឃុំបែកចាន ស្រុកអង្គស្នួល ខេត្តកណ្តាល មានទុនវិនិយោគប្រមាណ ២,៦លានដុល្លារអាមេរិក និងអាចបង្កើតការងារបានចំនួន ៦៧៦កន្លែង។

ទី២-ក្រុមហ៊ុន REMSTEX FASHION CO., LTD : គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិតាឌូ សង្កាត់រកាក្រៅ ក្រុងដូនកែវ ខេត្តតាកែវ មានទុនវិនិយោគប្រមាណ ៦លានដុល្លារ អាមេរិក និងអាចបង្កើតការងារបានចំនួន ១.៩២៩កន្លែង។

ទី៣-ក្រុមហ៊ុន TOP FORM (CAMBODIA) MANUFACTURING COMPANY LIMITED: គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិពោធិ៍មង្គល ឃុំព្រែកតាទែន ស្រុកពញាឮ ខេត្តកណ្តាល មានទុនវិនិយោគប្រមាណ៩,៥លានដុល្លារអាមេរិក និងអាចបង្កើតការងារបានចំនួន ១.៨៥០កន្លែង។

ទី៤-ក្រុមហ៊ុន NEW WIDE APPAREL CO., LTD: គម្រោងបង្កើតរោងចក្រកាត់ដេរ ចាក់សម្លៀកបំពាក់ និងផលិត ម៉ាស ដែលមានទីតាំងវិនិយោគស្ថិតនៅភូមិបុណ្ណា ឃុំព្រះពុទ្ធ ស្រុកកណ្តាលស្ទឹង ខេត្តកណ្តាល មានទុន វិនិយោគប្រមាណ៣៣លានដុល្លារអាមេរិក និងអាចបង្កើតការងារបានចំនួន ៣.៧០០កន្លែង៕

ក្រសួងពាណិជ្ជកម្មបញ្ជាក់ពីមូលហេតុដែលតម្លៃប្រេងឥន្ធនៈកើនឡើងនៅ រយៈពេលចុងក្រោយនេះ

ដោយៈ សាវុធ

ភ្នំពេញៈ មន្ដ្រីជាន់ខ្ពស់ក្រសួងពាណិជ្ជកម្ម បានបញ្ជាក់ពីមូលហេតុដែលតម្លៃប្រេងឥន្ធនៈកើនឡើងនៅរយៈពេលចុងក្រោយនេះ បន្ទាប់មហាជនមានចម្ងល់ និងមានជជែកវែកញែកពីការកើនឡើងនៃតម្លៃប្រេងឥន្ធនៈនេះ។

ក្រសួងពាណិជ្ជកម្ម នាពេលថ្មីៗនេះ បានចេញសេចក្តីជូនដំណឹងស្តីពី ការកំណត់ថ្លៃប្រេងឥន្ធនៈ ត្រូវលក់រាយតាមស្ថានីយ ចាប់ពីថ្ងៃទី១៦ ដល់ថ្ងៃទី៣១ ខែកក្កដា ឆ្នាំ២០២១ ដោយសាំងធម្មតាត្រូវលក់តម្លៃ៤,១០០រៀល ក្នុងមួយលីត្រ និងម៉ាស៊ូតលក់ក្នុងតម្លៃ៣,៦៥០រៀល ក្នុង១លីត្រ។

លោកប៉ែន សុវិជាតិអនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានប្រាប់អ្នកសារព័ត៌មាននៅថ្ងៃទី២០ ខែកក្កដា ឆ្នាំ២០២១នេះថា ការឡើងថ្លៃនៃតម្លៃប្រេងនេះ ដោយសារតែតម្លៃប្រេង នៅលើទីផ្សារពិភពលោកមានការឡើងថ្លៃ ហើយមានតម្រូវការច្រើន។

លោកបានឱ្យដឹងទៀតថា “កម្ពុជាមិនមែនជាប្រទេសផលិតប្រេងនោះទេ គឺកម្ពុជានៅទិញប្រេង ដែលចម្រាញ់រួច ពីប្រទេសសិង្ហបុរី និងពីប្រភពផ្សេងៗ ហើយប្រេង ដែលកម្ពុជាទិញ គឺផ្អែកទៅលើការឡើងចុះ នៃតម្លៃប្រេងឆៅអន្ដរជាតិ”។លោកបានបញ្ជាក់ថា “តម្លៃប្រេងឆៅអន្ដរជាតិក្នុងមួយរយៈនេះ ជាពិសេសនៅក្នុងមិថុនា និងកក្កដាមានការកើនឡើង”។

លោកបានឱ្យដឹងថា ការកើនឡើងតម្លៃប្រេងនេះ ដោយសារតែក្រុមប្រទេសOPECបានកាត់បន្ថយការផលិតកម្មប្រេង ហើយប្រភពធំៗ២ ដែលនាំចេញប្រេងឆៅ គឺប្រទេសអារ៉ាប៊ី សាអូឌីត និងប្រទេសអារ៉ាបរួម ក៏បានកាត់បន្ថយការផលិតប្រេងរបស់ខ្លួនដែរ។

លោកប៉ែន សុវិជាតិបានបន្ថែមទៀតថា តម្រូវការប្រេងឥន្ទនៈនៅលើទីផ្សារអន្ដរជាតិ មានការកើនឡើងក្នុងរយៈពេល២ខែចុងក្រោយនេះ ក្រោយពីប្រទេសនៅតំបន់អ៊ឺរ៉ុបមួយចំនួន បានបិទបញ្ចប់ការ LOCK DOWN ប្រទេសខ្លួន ហើយក្រុមប្រទេស OPEC នៅរក្សារលំនឹង នៃការផលិតប្រេង ដែលធ្វើឲ្យតម្លៃប្រេងមានការកើនឡើង។

បន្ថែមពីនោះទៀត លោកប៉ែន សុវិជាតិបានបន្ដថា ទន្ទឹមគ្នានេះប្រទេសធំៗ ដូចជា ប្រទេសអារ៉ាប៊ី សាអូឌីត និងប្រទេសអារ៉ាបរួមជាដើម -ល- ដែលនៅក្នុងតំបន់ OPEC នោះ បានកាត់បន្ថយការផលិតប្រេងរបស់ខ្លួនទៀត ដែលធ្វើឲ្យតម្លៃប្រេងកាន់តែហក់ឡើងខ្ពស់។

1...1,8291,8301,831...3,264 Page 1,830 of 3,264