ដោយៈ ប៊ី

ភ្នំពេញៈ និយ័តករមូលបត្រកម្ពុជា (ន.ម.ក.) បានឱ្យដឹងនៅថ្ងៃទី១៦ ខែកក្កដានេះថា ក្រុមហ៊ុន GoldFX ទទួលបានអាជ្ញាបណ្ណ ធ្វើអាជីវកម្មជាឈ្មួញជើងសាឧបករណ៍និស្សន្ទពី ន.ម.ក. ដែលតាមបទប្បញ្ញត្តិ ក្រុមហ៊ុនត្រូវបានអនុញ្ញាត ឱ្យធ្វើការជួញដូរឧបករណ៍និស្សន្ទក្នុងនាមជាភ្នាក់ងាររបស់អតិថិជនខ្លួន (ធ្វើតាមការបញ្ជាទិញ-លក់របស់អតិថិជន) និងផ្តល់ប្រឹក្សាអំពីការវិនិយោគលើឧបករណ៍និស្សន្ទ។

ក្រុមហ៊ុន GoldFX ត្រូវបានអនុញ្ញាតឱ្យភ្ជាប់ប្រព័ន្ធជួញដូរឧបករណ៍និស្សន្ទ (MT4) តែជាមួយក្រុមហ៊ុនសមភាគីកណ្តាល គឺក្រុមហ៊ុនខេមបូឌាន ដេរីវ៉េទីវ អ៊ិចឆេង ឯ.ក (Cambodian Derivatives Exchange Co., Ltd.-CDX) ដែលទទួលបានអាជ្ញាបណ្ណពី ន.ម.ក. ប៉ុណ្ណោះ។

នៅថ្ងៃទី២៩ ខែមីនា ឆ្នាំ២០២១ ក្រុមហ៊ុន GoldFX ត្រូវបានសម្រេចឱ្យព្យួរប្រតិបត្តិការជួញដូរឧបករណ៍និស្សន្ទ តាមសំណើសុំរបស់ក្រុមហ៊ុន ប៉ុន្តែន.ម.ក. ពិនិត្យឃើញថា មានអតិថិជនរបស់ក្រុមហ៊ុន GoldFXតវ៉ាតាមបណ្តាញសង្គម និងបានចាប់ផ្តើមដាក់ពាក្យបណ្តឹងទៅស្ថាប័នផ្សេងៗ ដូចនេះ ជាវិធានការបន្ទាន់ ន.ម.ក. ក៏បានចេញសេចក្តីប្រកាសព័ត៌មានចុះថ្ងៃទី៣០ ខែមីនា ឆ្នាំ២០២១ ដើម្បីឱ្យអតិថិជនរបស់ក្រុមហ៊ុន GoldFX អាចដាក់ពាក្យបណ្តឹងនៅ ន.ម.ក. តាមនីតិវិធីច្បាប់ជាធរមាន។

ទន្ទឹមនឹងនេះផងដែរ ន.ម.ក ក៏បានអញ្ជើញតំណាងក្រុមហ៊ុន GoldFX ឱ្យចូលខ្លួនមកដោះស្រាយ ដែលជាលទ្ធផលមានដូចជា ទី១.តម្រូវឱ្យក្រុមហ៊ុន GoldFX ដោះស្រាយជាបន្ទាន់ជាមួយអតិថិជនដែលបានបើកគណនីជួញដូរឧបករណ៍និស្សន្ទតាមរយៈវេទិកាជួញដូររបស់ក្រុមហ៊ុនសមភាគីកណ្តាលស្របច្បាប់ ដែលករណីនេះ ក្រុមហ៊ុន GoldFX បានទូទាត់ប្រាក់វិនិយោគទៅឱ្យអតិថិជនទាំងនេះ តាមគណនីជួញដូរនីមួយៗចប់រួចរាល់ហើយ។

ទី២ ដោយពិនិត្យឃើញថា ក្រុមហ៊ុន GoldFX មានអតិថិជនផ្សេងទៀតក្រៅពីក្រុមអតិថិជនខាងលើនេះ ក្នុងគោលដៅបន្ទាន់ នៃកិច្ចការពារផលប្រយោជន៍របស់វិនិយោគិន ន.ម.ក. បានជំរុញ និងណែនាំឱ្យក្រុមហ៊ុន GoldFX ព្យួរប្រតិបត្តិការ តែមិនឱ្យបិទក្រុមហ៊ុន និងត្រូវដោះស្រាយទូទាត់ប្រាក់ វិនិយោគឱ្យអតិថិជនទាំងនោះវិញជាបន្ទាន់ផងដែរ។

ទី៣ មកដល់ពេលបច្ចុប្បន្ននេះ ន.ម.ក. បានទទួលពាក្យបណ្តឹងជាបន្តបន្ទាប់ចំនួនជិត ៨០០ បណ្តឹងរួចហើយ ដែលបណ្តឹងខ្លះបានដាក់ដោយផ្ទាល់នៅទីស្តីការ ន.ម.ក. ខ្លះដាក់តាមរយៈអ៊ីម៉ែល និងខ្លះទៀតដាក់តាមរយៈអ្នកតំណាងរបស់ខ្លួន។ ជាចំណាត់ការលើពាក្យបណ្តឹងទាំងអស់នេះ ន.ម.ក. បានអញ្ជើញតំណាងក្រុមហ៊ុន GoldFX មកបំភ្លឺ ព្រមទាំងអ្នកតំណាងម្ចាស់បណ្តឹង និងម្ចាស់បណ្តឹងជាបន្តបន្ទាប់ ដើម្បីឱ្យចូលមកផ្តល់ព័ត៌មានបន្ថែម និងផ្តល់ឯកសារពាក់ព័ន្ធដែលចាំបាច់ ដើម្បីបន្តនីតិវិធីតាមច្បាប់ជាធរមាន។

ជាមួយគ្នានេះ ន.ម.ក. ក៏បាន និងកំពុងបន្តនីតិវិធីច្បាប់លើការងារនេះ ជាមួយស្ថាប័នតុលាការផងដែរ ដោយស្នើសុំឱ្យមានការស៊ើបអង្កេតបន្ថែម លើប្រតិបត្តិការសង្ស័យរបស់ក្រុមហ៊ុន GoldFX នេះ ព្រមទាំងបញ្ចូលការដោះស្រាយពាក្យបណ្តឹងទាំងអស់ ដែលប្តឹងក្រុមហ៊ុន GoldFX ជាមួយសំណុំរឿងព្រហ្មទណ្ឌដែលមានការពាក់ព័ន្ធគ្នានេះ និងដែលបាន និងកំពុងស្ថិតក្រោមចំណាត់ការរបស់ស្ថាប័នអយ្យការ ដើម្បីពន្លឿនការដោះស្រាយជូនទៅម្ចាស់បណ្តឹងទាំងអស់ ស្របតាមនីតិវិធីច្បាប់ជាធរមាន។

ដូចនេះ ចំពោះអតិថិជនរបស់ក្រុមហ៊ុន GoldFX ទាំងឡាយណាដែលមានបំណងដាក់ពាក្យបណ្តឹងមក ន.ម.ក. នៅតែអាចដាក់ពាក្យបណ្តឹងតាមរយៈអ៊ីម៉ែល [email protected] ឬដោយផ្ទាល់នៅទីស្តីការ ន.ម.ក. ដោយត្រូវអនុវត្តតាមវិធានសុខាភិបាលឱ្យបានខ្ជាប់ខ្ជួន ជាពិសេសប្រកាន់យកការអនុវត្តនូវវិធានការ “៣ការពារ ៣កុំ” ដែលជាអនុសាសន៍ដ៏ថ្លៃថ្លារបស់ សម្តេចតេជោនាយករដ្ឋមន្ត្រី នៃព្រះរាជាណាចក្រកម្ពុជា ដើម្បីទប់ស្កាត់ការរីករាលដាលនៃជំងឺកូវីដ-១៩៕

ដោយៈគង់ សូរិយា

ភ្នំពេញៈ អនុប្រធានសភាពាណិជ្ជកម្មកម្ពុជា លោកឧកញ៉ាលឹម ហេងបានមានប្រសាសន៍ថា ពាណិជ្ជកម្មនាំចេញកម្ពុជាបាន និងកំពុងក្លាយជាផ្នែកមួយយ៉ាងសំខាន់ ក្នុងការទ្រទ្រង់កំនើនសេដ្ឋកិច្ចជាតិ។

លោកបានមានប្រសាសន៍ឲ្យដឹងកាលពីថ្ងៃម្សិលម៉ិញថា ទំហំនៃការនាំចេញរបស់កម្ពុជា ទៅកាន់បណ្តាប្រទេសជាច្រើនបានកើនឡើង ទាំងជាមួយប្រទេសចិន សហរដ្ឋអាមេរិក សាធារណៈរដ្ឋកូរ៉េជាដើម ដែលធ្វើឲ្យសេដ្ឋកិច្ចកម្ពុជាមិនដាំក្បាលចុះ ព្រោះការនាំចេញបានជួយដល់កំណើនពាណិជ្ជកម្ម និងសេដ្ឋកិច្ចជាតិ។

លោកបន្តថា “ការនាំចេញនៅតែល្អអំឡុងវិបត្តិកូវីដ១៩ ខណៈវិស័យមួយចំនួនបានធ្លាក់ចុះខ្លាំងដូចជា វិស័យទេសចរណ៍ វិស័យសំណង់ និងអចលនទ្រព្យ និងការនាំចេញអង្ករបានធ្លាក់ចុះផងដែរ”។លោកបន្តថា “មូលហេតុនៃការធ្លាក់ចុះ ការនាំចេញអង្ករទៅកាន់ទីផ្សារអឺរ៉ុបធ្លាក់ចុះ ដោយសារតម្លៃនៃការដឹកជញ្ជូនថ្លៃខ្លាំង”។

លោកឧកញ៉ាលឹម ហេងបានមានប្រសាសន៍ឲ្យដឹងកន្លងមកថា តាមរយៈការចុះកិច្ចព្រមព្រៀងពាណិជ្ជកម្មសេរីជាមួយចិន ជាមួយសាធារណៈរដ្ឋកូរ៉េនាពេលខាងមុខ និងងការចុះកិច្ចព្រមព្រៀង ភាពជាដៃគូសេដ្ឋកិច្ចតំបន់គ្រប់ជ្រុងជ្រោយ (RCEP) នឹងធ្វើឲ្យទំហំពាណិជ្ជ​កម្មកើនឡើងខ្ពស់បន្ថែមទៀត នាពេលអនាគត។

លោកឧកញ៉ាបន្តថា “អ្នកវិនិយោគចិន អាមេរិក អឺរ៉ុបកាន់តែច្រើនថែមទៀត នឹងមកវិនិយោគនៅកម្ពុជា ដើម្បីផលិតនាំចេញទៅកាន់ប្រទេសចិនដោយរួចពន្ឋ និងនាំចេញ ទៅកាន់បណ្តាប្រទេសជាច្រើនទៀត នៅពេលកិច្ចព្រមព្រៀងពាណិជ្ជកម្មសេរីចូលជាធរមាន៕

ដោយៈគង់ សូរិយា

ភ្នំពេញៈ ការទាញយកតម្លៃបន្ថែមពីសេដ្ឋកិច្ច និងបង្កើតឲ្យមានតម្លៃបន្ថែមមានសារៈសំខាន់ណាស់សម្រាប់ប្ររទេសជាតិមួយ ក៏ដូចជាក្រុមហ៊ុនមួយ ដើម្បីជួយឲ្យប្រទេសជាតិអាចទទួលបានចំណូល និងបង្កើតការងារធ្វើបានកាន់តែច្រើន។

លោកយិន លាងគង់ដែលជាទីប្រឹក្សាសមាគមអចលនទ្រព្យសកល និងបានសិក្សាពីទិដ្ឋភាពទូទៅនៃសេដ្ឋកិច្ច នយោបាយជាច្រើន បានមានប្រសាសន៍ឲ្យដឹងតាមទូរស័ព្ទកាលពីថ្ងៃទី១៦ កក្កដាកន្លងមកថា ការរីកចម្រើនសេដ្ឋកិច្ចរបស់គ្រួសារមួយ ឬប្រទេសជាតិមួយអាស្រ័យលើរបៀបគិត របៀបធ្វើ ពិសេសការបង្កើត និងទាញតម្លៃបន្ថែមឲ្យបានច្រើន។

ការបង្កើតតម្លៃបន្ថែម
លោកយិន លាងគង់បានពន្យល់ថា ការបង្កើតតម្លៃបន្ថែមផ្នែកសេដ្ឋកិច្ច ជារឿងរបស់រដ្ឋាភិបាល ក៏ដូចជាក្រុមហ៊ុនមួយអាចធ្វើបាន ឧទាហរណ៍ រដ្ឋាភិបាលបានជំរុញឲ្យផលិតភាពកើនឡើង ក្នុងវិស័យវាយណ ភ័ណ្ឌកាត់ដេរ និងស្បែកជើង ដើម្បីឲ្យកម្មករ និយោជិត អាចផលិតទំនិញបានកាន់តែល្អជាងមុន និងមានតម្លៃខ្ពស់ជាងមុន ពិសេសបង្កើនផលិតភាពខ្ពស់ជាងមុន។

ក្នុងវិស័យអចលនទ្រព្យដូចគ្នាផងដែរ រដ្ឋាភិបាលបានវិនិយោគលើហេដ្ឋារចនាសម្ព័ន្ឋទាំងផ្លូវថ្នល់ ប្រឡាយទឹក និងព្រលានយន្តហោះជាដើម ដើម្បីកាត់បន្ថយពេលវេលា ធ្វើដំណើរ កាត់បន្ថយការចំណាយ និងសម្រួលដល់លំហូរប្រជាពលរដ្ឋ អ្វីកាន់តែពិសេសគឺធ្វើឲ្យដីធ្លីឡើងថ្លៃ ដែលបានផ្តល់ផលប្រយោជន៍ដោយផ្ទាល់ និងប្រយោលដល់ប្រជាជននៅមូលដ្ឋាន។លោកបញ្ជាក់បន្ថែម។

ការទាញយកតម្លៃបន្ថែម
ការទាញយកតម្លៃបន្ថែម ក៏បាននិងកំពុងអនុវត្តន៍ និងជាយុទ្ឋសាស្រ្តរបស់រដ្ឋាភិបាលផងដែរ ឧទាហរហ៍ រដ្ឋាភិបាលបានបង្កើនការនាំាំចេញអង្ករ ដើម្បីយកទៅលក់នៅបរទេស ជាការធ្វើឲ្យខាតបង់តម្លៃបន្ថែម។ ការលក់ស្រូវទៅប្រទេសជិតខាង មិនផ្តល់ផលចំណេញដល់សេដ្ឋកិច្ចច្រើននោះទេ ប៉ុន្តែបើការនាំចេញអង្ករបានច្រើន ទើបអាចទាញតម្លៃបន្ថែមផ្នែកសេដ្ឋកិច្ចបានច្រើន។ លោកយិន លាងគង់បញ្ជាក់ឲ្យដឹង។

ឧទាហរណ៍ជាក់ស្តែង ការនាំចេញអង្ករ គឺបានផ្តល់ការងារដល់ប្រជាពលរដ្ឋខ្មែរ នៅតាមរោងចក្រកិនអង្ករ អាចទាញបាននូវកន្ទក់ ទាញបាននូវអង្កាម ដែលអាចយកមកប្រើប្រាស់ក្នុងមូលដ្ឋានសេដ្ឋកិច្ចចាំបាច់នានាបាន។

លោកយិន លាងគង់បបានបន្តថា ការនាំចេញជ័រកៅស៊ូស្រស់ ទៅកាន់ប្រទេសជិតខាង ក៏ធ្វើឲ្យខាតបង់សេដ្ឋកិច្ច ប៉ុន្តែបើ់រដ្ឋាភិបាល ទាក់ទាញរោងចក្រផលិតកង់រថយន្ត មកពីក្រៅប្រទេសបាន រដ្ឋាភិបាលអាចទាញតម្លៃផ្នែកសេដ្ឋកិច្ចបន្ថែមបាន ព្រោះវាផ្តល់ការងារដល់ប្រជាពលរដ្ឋ នៅតាមរោងចក្រនានា មានការបង់ចំណូលចូលរដ្ឋកាន់តែច្រើន និងធ្វើឲ្យតម្លៃជ័រកៅស៊ូមានស្ថេ​រភាពផងដែរ៕