ដោយៈ វឌ្ឍនៈ
ភ្នំពេញៈ គម្រោងអភិវឌ្ឍន៍លំនៅឋានជាច្រើននៅក្នុងប្រទេសកម្ពុជា នៅតែបន្តសកម្មភាពសាងសង់ និងអភិវឌ្ឍន៍ថ្មីៗជាបន្តបន្ទាប់ បើទោះបីជាទីផ្សារទិញលក់បានថមថយក្នុងវិបត្តិកូវីដ១៩ក្ដី។
ជាមួយគ្នានេះដែរមានសំនួរលើកឡើថា តើមានកត្តាអ្វីដែលជំរុញឱ្យគម្រោងវិនិយោគលំនៅឋាននៅតែបន្តអភិវឌ្ឍន៍បែបនេះ?
លោកគាម សៀកឡុងស្ថាបនិកនៃក្រុមហ៊ុន Century 21 Dream Property បានថ្លែងប្រាប់កាលពីថ្ងៃទី១០ ខែសីហា ឆ្នាំ២០២១ថា មកដល់បច្ចុប្បន្នការទិញលក់អចលនទ្រព្យ លំនៅឋាន នៅតែបន្តមាន គ្រាន់តែបរិមាណនៃការទិញលក់បានថយចុះ ហើយបើឱ្យជាប់គាំងដូចឆ្នាំ២០០៨គឺមិនមានទេ។
លោកបានថ្លែងបន្តថា សកម្មភាពវិនិយោគក៏នៅតែបន្តមានដដែល បើទោះបីជាការទិញលក់ថមថយក្ដី ពីព្រោះគម្រោងខ្លះមិនមែនទើបតែចាប់ផ្ដើមសាងសង់ឬចាប់ផ្ដើមពេលមានវិបត្តិនេះទេ គឺវាចាប់ផ្ដើមតាំងពីមុនមានវិបត្តិ។
លោកបានបន្តថា អ្នកវិនិយោគមួយចំនួននៅតែបន្តសាងសង់គម្រោងរបស់ខ្លួន ដើម្បីកិត្យានុភាពក្រុមហ៊ុន កេរ្តិ៍ឈ្មោះ ក្រុមហ៊ុន ព្រោះបើកាលណា គម្រោងត្រូវផ្អាក ឬដូចនឹងដួលរំលំក្រុមហ៊ុនអញ្ចឹងហើយបុគ្គលិកនិងកម្មករជាច្រើនទៀតក៏នឹងអត់ការងារធ្វើ ។ ទោះបីជាយ៉ាងណាក៏គម្រោងសាងសង់នៅតែបន្តដើម្បីទុកសម្រាប់បំពេញតម្រូវការឡើងវិញពេលចប់វិបត្តិ។
លោកបានបន្តថា “ថ្វីត្បិតតែតម្រូវការលំនៅឋានជាក់ស្ដែងនៅពេលនេះមិនទាន់មានច្រើនពិតមែន ការទិញលក់ថយចុះ តែទៅថ្ងៃអនាគតវាមិនប្រាកដថាអត់ត្រូវការទៀតនោះទេ។ ការអភិវឌ្ឍរបស់វិនិយោគិនក្នុងទៅលើលំនៅឋានអាចនឹងបំពេញទៅតាមតម្រូវការជាក់ស្ដែងនៅពេលអនាគត”។
អ្នកឧកញ៉ាសៀ ឬទ្ធីអ្នកអភិវឌ្ឍន៍លំនៅឋានដ៏ធំមួយក្នុងប្រទេសកម្ពុជាក៏បានលើកឡើងផងដែរ វិនិយោគិនមិនគួរផ្អាកឬបញ្ឈប់គម្រោងសាងសង់ក្នុងពេលមានវិបត្តិនោះទេ។ ការបញ្ឈប់ឬផ្អាកគម្រោងសាងសង់ ក្នុងពេលមានវិបត្តិនេះវាប្រៀបដូចជាពន្លត់ម៉ាស៊ីនយានយន្តអញ្ចឹងដែរ។
អ្នកឧកញ៉ាបានថ្លែងបន្តថា នៅពេលដល់វេលាដែលវិបត្តិត្រូវបានបញ្ចប់ ទំរាំតែយើងបញ្ឆេះម៉ាស៊ីនដំណើរការឡើងវិញគេរត់ទៅដល់មុខមុនយើងបានទៅហើយ ដូច្នេះហើយយើងមិនអាចប្រណាំងប្រជែងជាមួយគេបានទេ។
អ្នកឧកញ៉ាបានឱ្យដឹងទៀតថា នៅក្នុងវិបត្តិកូវីដ១៩នេះ អ្នកណាៗក៏មានផលប៉ះពាល់ដូចគ្នា គ្រាន់តែវិស័យខ្លះប៉ះពាល់តិច ហើយវិស័យខ្លះទៀតប៉ះពាល់ច្រើន ដូច្នេះអ្នកវិនិយោគឆ្លាតគួរតែរកវិធីឬដំណោះស្រាយ សម្រាប់កែច្នៃបញ្ហានៅក្នុងវិបត្តិនេះពីធំមកនៅតូច និងកែច្នៃពីបញ្ហាប្រឈមទៅជាឱកាសវិញ៕
