ដោយៈ សុជាតា

ភ្នំពេញៈ មន្ត្រីជាន់ខ្ពស់កំពង់ផែស្វយ័តភ្នំពេញបានអះអាងថា កំពង់ផែស្វយ័តភ្នំពេញគ្រោងចំណាយទុនវិនិយោគប្រមាណ១០លានដុល្លារ ក្នុងការការពង្រីកហេដ្ឋារចនាសម្ព័ន្ធនៅកំពង់ផែនេះ ដើម្បីឆ្លើយតបទៅនឹងកំណើនកុងតឺន័រឆ្លងកាត់ជាបន្តបន្ទាប់។

លោកហ៊ឺ បាវីអគ្គនាយកកំពង់ផែស្វយ័តភ្នំពេញ បានបញ្ជាក់ប្រាប់ Property Area Asia កាលពីថ្ងៃទី៩ ខែសីហា ឆ្នាំ២០២១ ថា ការអភិវឌ្ឍចំណតកុងតឺន័រនេះ គឺធ្វើឡើងតាមដំណាក់កាលរយៈពេលខ្លី និងដំណាក់កាលរយៈវែង ដើម្បីងាយស្រួលដល់ការធ្វើចរាចរ ជាពិសេសរថយន្តកុងតឺន័រចេញ ចូលឆ្លងកាត់ផ្លូវជាតិលេខ១មកកាន់កំពង់ផែ។

លោកបានថ្លែងបន្តថា ចំពោះដំណាក់កាលទីបី ខ ឆ្នាំ២០២១នេះ កំពង់ផែភ្នំពេញ បានពង្រីកនៅផ្ទៃដី៥.៥ហិកតា ដើម្បីឈានទៅការពង្រីកចំណតដំណាក់កាលទីបីនេះ ដែលរយៈពេលរហូតដល់ឆ្នាំ២០២៣ ខាងមុខ។

លោកបញ្ជាក់បន្ថែមទៀតថា កំណើននៃចរាចរតាមកំពង់ផែភ្នំពេញ គឺត្រូវបានប៉ាន់ស្មានថាកើនឡើងក្នុងរង្វង់១០ភាគរយ នៅឆមាសទី១ ឆ្នាំ២០២១នេះ បើប្រៀបធៀបនឹងរយៈពេលដូចគ្នាកាលពីឆ្នាំ២០២០។ ចំពោះទំនិញ ដែលបានឆ្លងកាត់កំពង់ផែភ្នំពេញ គឺភាគច្រើនការនាំចូលទំនិញ ដូចជាវត្ថុធាតុដើមនៃវិស័យកាត់ដេរ និងនាំចេញទំនិញ និងផលិតផលសម្រេចដូចជា ខោអាវ កសិផល និងអង្ករជាដើម។

កំពង់ផែស្វយ័តភ្នំពេញ បានចាប់ផ្តើមសាងសង់ចំណតផែកុងតឺន័រជំហាទី១ ចាប់តាំងពីឆ្នាំ២០១១ មក ដែលមានសមត្ថភាពអាចផ្ទុកកុងតឺន័របាន១៥ ម៉ឺនTeus ក្នុងមួយឆ្នាំ ហើយគម្រោងជំហានទីពីរ ចំណាយថវិការប្រមាណ៩លានដុល្លារមានសមត្ថភាពផ្ទុកកុងតឺន័រ បានចំនួន៣០ម៉ឺន Teus។ ចំណែកគម្រោងទី៣ ចាប់ពីឆ្នាំ ២០១៩ ដល់ឆ្នាំ ២០២៣ គ្រោងចំណាយថវិកាប្រមាណ៣៥លានដុល្លារ ដែលមានសមត្ថភាពផ្ទុកកុងតឺន័ររហូត ៥០ ម៉ឺន Teus ក្នុងមួយឆ្នាំ។

ដោយៈ សុខុម

បាងកក: យោងតាមអាជ្ញាធរអចលនទ្រព្យឧស្សាហកម្មថៃ (IEAT) ឱ្យដឹងថា ក្រុមវិនិយោគិនដែលមានសក្ដានុពលត្រូវបានអញ្ជើញឱ្យចូលរួមដេញថ្លៃគម្រោងអភិវឌ្ឍន៍ដំណាក់កាលទី៣ នៃកំពង់ផែទឹកជ្រៅ Map Ta Phut Port នៅខេត្តរ៉ាក់យ៉ង (Rayong)។

យោងតាមកាសែត Bangkok Post ចុះផ្សាយនៅថ្ងៃទី១០ សីហា នេះឱ្យដឹងថា អាជ្ញាធរដដែលគ្រោងប្រកាសអំពីលក្ខខណ្ឌនៃគម្រោងនេះទៅដល់ក្រុមអ្នកដេញថ្លៃ ដែលមានចំណាប់អារម្មណ៍នៅចុងឆ្នាំនេះ។

កំពង់ផែថ្មីនេះគឺសម្រាប់នាវាចូលចតដើម្បីលើកឡើង និងដាក់ចុះនូវទំនិញផលិតផលរាវរួមមានទាំងគីមីឥន្ធនៈ (petrochemical) ផងដែរ។ កំពង់ផែនេះនឹងសមត្ថភាពទទួលទំនិញបាន៤លានតោនក្នុងមួយឆ្នាំៗដែលគិតជាទំហំទឹកប្រាក់ប្រមាណ៤,៣ពាន់លានបាត (១២៨,៥លានដុល្លារអាមេរិក)។

លោក Veeris Ammarapala អាជ្ញាធរអចលនទ្រព្យឧស្សាហកម្មថៃ (IEAT) រំពឹងថានឹងអាចចុះកិច្ចព្រមព្រៀងជាមួយវិនិយោគណាម្នាក់នៅខែតុលា ឆ្នាំ២០២២។ ដំណើរការសាងសង់កំពង់ផែនេះគ្រោងនឹងចាប់ផ្តើមនៅឆ្នាំ២០២៤ ហើយការដំណើរការគ្រោងចាប់ផ្ដើមនៅឆ្នាំ២០២៦។

បន្ទាប់ពីអាជ្ញាធរអចលនទ្រព្យឧស្សាហកម្មថៃ (IEAT) កាលពីពេលថ្មីៗនេះបានរៀបចំសិក្ខាសាលាតាមបណ្ដាញអ៊ីនធឺណិតមួយដើម្បីស្ទង់មតិបណ្ដាវិនិយោគិនអំពីគម្រោងអភិវឌ្ឍន៍បែបនេះ លោក Veeris Ammarapala បានថ្លែងថា “ក្រុមវិនិយោគិនដែលមានសក្ដានុពលមានចំណាប់អារម្មណ៍លើការអភិវឌ្ឍដំណាក់កាលទី៣ នៃកំពង់ផែទឹកជ្រៅ Map Ta Phut Port នៅខេត្តរ៉ាក់យ៉ង”។

ខេត្តរ៉ាក់យ៉ង រួមជាមួយខេត្តឈុនប៊ូរី (Chon Buri) និងខេត្តឆាក់ឆឺនសៅ (Chachoengsao) ស្ថិតក្រោមគម្រោងច្រករបៀងសេដ្ឋកិច្ចភាគបូព៌ា (Eastern Economic Corridor) របស់រដ្ឋាភិបាលថៃ ដែលមានបំណងសាងសង់មជ្ឈមណ្ឌលឧស្សាហកម្មបំពាក់បច្ចេកបំពាក់វិទ្យាខ្ពស់កម្រិតថ្មីនៅក្នុងប្រទេសថៃ។

ការអភិវឌ្ឍដំណាក់កាលទី៣ នៃកំពង់ផែទឹកជ្រៅ Map Ta Phut Port មានទំហំវិនិយោគសរុប៥៥ពាន់លានបាត (១,៦៤ពាន់លានដុល្លារអាមេរិក)៕