ដោយៈ ប៊ី

ដោយៈ ក្រសួងបរិស្ថាន កាលពីម្សិលមិញ បានចេញប្រកាសស្តីពីនីតិវិធី និងការអនុវត្តន៍ការណែនាំសម្រាប់តារាងផ្ទៀងផ្ទាត់ ក្នុងការរៀបចំរបាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង លើគម្រោងសំណង់អគារគ្រប់ប្រភេទ។

ប្រកាសថ្មីនេះ ទាមទារឱ្យ ម្ចាស់គម្រោងអភិវឌ្ឍន៍៥ប្រភេទធំៗ អនុវត្តតាមការណែនាំស្ដីពីរបៀបវាយតម្លៃហេតុប៉ះពាល់បរិស្ថាន និងសង្គម ឱ្យបានត្រឹមត្រូវ និងគ្រប់ជ្រុងជ្រោយ។

គម្រោងអភិវឌ្ឍន៍៥ប្រភេទធំៗ ដែលត្រូវអនុវត្តតាមការណែនាំស្ដីពីរបៀបវាយតម្លៃហេតុប៉ះពាល់បរិស្ថាន និងសង្គម មានដូចជាៈ

ទី១ គម្រោងសំណង់អគារគ្រប់ប្រភេទ ដែលមានផ្ទៃក្រឡាចាប់ពី១៥០០០ម៉ែត្រការ៉េ ដល់៤៥,០០០ម៉ែត្រការ៉េ លើកលែងតែសំណង់អគារក្នុងវិស័យឧស្សាហកម្ម កសិកម្ម ទេសចរណ៍ សុខាភិបាល និងហេដ្ឋារចនាសម្ព័ន្ធ ដែលកំណត់ដោយក្រសួងបរិស្ថាន។

ទី២ គម្រោងអភិវឌ្ឍន៍តំបន់ទេសចរណ៍ ដែលស្ថិតលើទំហំផ្ទៃដីលើសពី ១០ ហិកតា ដល់ ៥០ ហិកតា។
ទី៣ គម្រោងស្ថានីយប្រេងឥន្ទនៈ និងស្ថានីយរួមប្រេងឥន្ទនៈ និងឧស្ម័នឥន្ទនៈ ដែលមានចំណុះចាប់ពី៤០ ០០០លីត្រ ទៅ៩០០០០លីត្រ។

ទី៤ គម្រោងរោងចក្រធុនស្រាល និងមធ្យម និងទី៥ កសិដ្ឋានដែលចិញ្ចឹមសត្វពាហនៈ និងសត្វក្រពើ ចាប់ពី៥០០ ក្បាលឡើងទៅ ឬចិញ្ចឹមសត្វទា ចាប់ពី១០,០០០ ក្បាលឡើង។ វារីវប្បកម្មចិញ្ចឹមត្រី ក្តាម បង្កង គន្ធាយ និងបង្គា ដែលមានទំហំចាប់ពី១០ ហិកតាឡើងទៅ ឬដំាសារាយចាប់ពី២០ ហិកតាឡើងទៅ។

ក្រសួងបរិស្ថានបានឱ្យដឹងថា ប្រកាសនេះ មានគោលបំណងបង្កលក្ខណៈងាយស្រួលដល់ម្ចាស់គម្រោងក្នុងការរៀបចំរបាយការណ៍ វាយតម្លៃហេតុប៉ះពាល់បរិស្ថាន និងសង្គមដំបូង និងពន្លឿននីតិវិធីនៃការឯកភាពលើរបាយការណ៍វាយតម្លៃ ហេតុប៉ះពាល់បរិស្ថាន និងសង្គមដំបូង លើគម្រោងសំណង់អគារគ្រប់ប្រភេទ។

ម្ចាស់គម្រោងអភិវឌ្ឍន៍ឯកជន និងសាធារណៈ ត្រូវរៀបចំរបាយការណ៍វាយតម្លៃហេតុប៉ះពាល់ បរិស្ថាន និងសង្គមដំបូង ដោយខ្លួនឯងផ្ទាល់ និង/ឬជួលទីប្រឹក្សាវាយតម្លៃហេតុប៉ះពាល់បរិស្ថាន ជា នីតិបុគ្គល/រូបវន្តបុគ្គល អនុលោមតាមគោលការណ៍ណែនាំសម្រាប់តារាងផ្ទៀងផ្ទាត់ ក្នុងការរៀបចំ របាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង។

របាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង លើគម្រោងសំណង់អគារគ្រប់ប្រភេទ តម្រូវឱ្យមានការពិគ្រោះយោបល់ជាមួយប្រជាពលរដ្ឋដែលរងការប៉ះពាល់ និងអាជ្ញាធរភូមិ ឃុំ សង្កាត់ ពាក់ព័ន្ធ។ ក្នុងករណីចាំបាច់ ត្រូវមានការពិគ្រោះយោបល់ជាមួយរដ្ឋបាលក្រុង ស្រុក ខណ្ឌ រាជធានី ខេត្ត មន្ទីរជំនាញពាក់ព័ន្ធ និងកិច្ចប្រជុំអន្តរក្រសួង៕

ដោយៈវឌ្ឈនៈ

ព្រះសីហនុៈ គម្រោងបង្កើតទីក្រុងរាម ក្នុងខេត្តព្រះសីហនុ ដែលវិនិយោគទឹកប្រាក់១៦ពាន់លានដុល្លារអាមេរិក គឺជាដែកឆក់មួយក្នុងការទាក់ទាញ វិនិយោគិនបរទេសជាពិសេសវិនិយោគិនចិន ចូលទៅបណ្ដាក់ទុនវិនិយោគក្នុងខេត្តព្រះសីហនុ ខណៈរដ្ឋាភិបាលកម្ពុជា ក៏បានប្រកាសយកខេត្តព្រះសីហនុជាគំរូអភិវឌ្ឍន៍ តាមទីក្រុងស៊ិនជិនរបស់ប្រទេសចិន។

អ្នកជំនាញនៃវិស័យអចលនទ្រព្យបានលើកឡើងផងដែរថា រាល់គម្រោងធំៗនានាតែងតែផ្ដល់អត្ថប្រយោជន៍ និងទាក់ទាញវិនិយោគិនដទៃទៀត ឲ្យចូលមកបណ្ដាក់ទុនវិនិយោគនៅនៅក្បែរៗគម្រោងនោះ ។ ជាក់ស្ដែងគម្រោងទីក្រុងរាមនេះ វានឹងក្លាយជាសក្ដានុពលទាក់ទាញ វិនិយោគិនដទៃទៀតចូលទៅបណ្ដាក់ទុនវិនិយោគនៅក្នុងតំបន់នោះ ។

លោកសន សៀប ស្ថាបនិក និងជានាយកក្រុមហ៊ុន ឃីរៀលអ៊ីស្ទេតបានឱ្យដឹងថាកំពង់សោមនៅតែមានកត្តាទាក់ទាញវិនិយោគិន ឲ្យចូលទៅបណ្ដាក់ទុនវិនិយោគជាបន្តបន្ទាប់ ក៏ប៉ុន្តែមួយរយៈនេះខេត្តព្រះសីហនុ ហាក់នៅមានភាពស្ងប់ស្ងាត់ តែមិនមែនមានន័យថាវាឆ្អែតដល់កម្រិត និងលែងមានវិនិយោគិនចូលទៅបណ្ដាក់ទុននោះទេ ។

លោកបន្តថា “វិនិយោគិនបរទេស នឹងចូលមកកម្ពុជាហើយស្វែងរកការវិនិយោគនៅក្នុងខេត្តព្រះសីហនុនៅពេលឆាប់ៗខាងមុខនេះ ជាពិសេសវិនិយោគិនចិន ពីព្រោះយើងមើលគំរូនៃការអភិវឌ្ឍ នៅក្នុងខេត្តព្រះសីហនុ គឺមានភាពទាក់ទាញសម្រាប់វិនិយោគិនចិន”។លោកបន្តថា “ក្រុងព្រះសីហនុអាចចាត់ទុកថា ជាបណ្ដុំវិនិយោគិនចិនដ៏មានសក្ដានុពលនៅពេលខាងមុខនេះ ខណៈខេត្តមួយនេះ ក៏បានត្រៀមខ្លួនក្នុងការស្វាគ​មន៍វិនិយោគិននានា ចូលទៅបណ្ដាក់ទុនរួចជាស្រេច ដូចជា ហេដ្ឋារចនាសម្ព័ន្ធខ្វាត់ខ្វែង មានបណ្ដុំរោងចក្រ ឧស្សាហកម្មធំៗ ជាពិសេសតំបន់សេដ្ឋកិច្ចពិសេស នៅក្នុងខេត្តនេះផ្ទាល់តែម្ដង”។

ជាមួយគ្នានេះ លោកប៉ូ អ៊ាវគង់ នាយកគ្រប់គ្រងក្រុមហ៊ុនអចលនទ្រព្យAdvance ក៏បានឱ្យដឹងផងដែរថា គម្រោងរាមស៊ីធីនេះដែរ វាអាចចាត់ទុកជាគម្រោងមួយធំនៅក្នុងខេត្តព្រះសីហនុ ហើយវានឹងក្លាយជាកត្តាទាក់ទាញវិនិយោគិននៅក្នុងខេត្តព្រះសីហនុ។

លោកបន្តថា “ការវិនិយោគទៅលើគម្រោងដ៏ធំនេះ ជាជំហានដំបូងនឹងត្រូវការវិនិ​យោគទៅលើហេដ្ឋារចនាសម្ព័ន្ធនានា នៅជុំវិញគម្រោង និងតភ្ជាប់ពីផ្លូវធំពីទីក្រុងទៅកាន់ទីតាំងគម្រោង”។លោកបន្តថា “ដូច្នេះវានឹងជួយអភិវឌ្ឍន៍ទាក់ទាញ និងជំរុញសក្ដានុពលនៅក្នុងខេត្តនេះ បានមួយកម្រិតទៀតផងដែរ”។

លោកប៉ូ អ៊ាវគង់បានបន្តថា វាជាចំនុចទាក់ទាញមួយល្អប្រសើរ ពីព្រោះបើយើងក្រលេកទៅមើលសណ្ឋានដីនៅរាម ក៏មានលក្ខណៈខុសប្លែកពីតំបន់កណ្ដាល ក្រុងព្រះសីហនុ ហើយបើតាមការសន្និដ្ឋាន គម្រោងរាមស៊ីធីនេះអាចជាគម្រោងរីសត លក្ខណៈទេស​ចរណ៍ច្រើនអគារខ្ពស់ៗ។

បើតាមលោកឃាង ភារម្យអ្នកនាំពាក្យសាលាខេត្តព្រះសីហនុបានឱ្យផងដែរថា គម្រោងរាមស៊ីធីបាន និងកំពុងមមាញឹកក្នុងអភិវឌ្ឍន៍ បើទោះបីជាកម្ពុជាកំពុងប្រឈមនឹងវិបត្តិកូវីដ១៩ក្ដី ហើយតាមរយៈគម្រោងនេះដែរ វាបានជួយផ្ដល់ការងារដល់ប្រជាពលរដ្ឋក្នុងមូលដ្ឋាននិងមកពីតំបន់ផ្សេងៗជាច្រើនផងដែរ ។

លោកបន្តថា “បច្ចុប្បន្ននេះ រដ្ឋបាលខេត្តព្រះសីហនុ បាននិងកំពុងជំរុញការចាក់វ៉ាក់សាំងជូនពលរដ្ឋ ដើម្បីបញ្ចប់ព្រឹត្តិការណ៍២០កុម្ភៈឱ្យឆាប់ និងចាប់ផ្ដើមស្វាគមន៍វិនិយោគិ​នក៏ដូចជាដំណើរការអាជីវកម្មនានាក្នុងខេត្តនេះឡើយវិញ”៕

ដោយៈគង់ សូរិយា

ភ្នំពេញៈ អ្នកជំនាញបានមើលឃើញថា ទីផ្សារអចលនទ្រព្យនៅតែមានឱកាសរីកចម្រើន និងទាញយកផលចំណេញ ហេតុនេះទើបក្រុមហ៊ុនអចលនទ្រព្យថ្មីៗបានឈាន​មកកាន់ទីផ្សារកម្ពុជា។

លោកស្រីអាន សុធីតាអ្នកជំនាញនិងវិភាគអចលនទ្រព្យនៅកម្ពុជាបានមានប្រសា​សន៍ឲ្យដឹងកាលពីថ្ងៃម្សិលម៉ិញនេះថា ទីផ្សារកម្ពុជានៅមានឱកាសច្រើន សំរាប់ការវិនិ​យោ​គ ដូចជា ទី១ ទីផ្សារនៅតែផ្តល់ផលចំណេញដល់អតិថិជន និងអ្នកវិនិយោគ ទី២ ការចូលមករបស់ក្រុមហ៊ុនអចលនទ្រព្យអន្តរជាតិ នឹងជួយពង្រឹងជំនាញដល់ធនធានមនុ​ស្សរបស់យើង ទី៣ ជួយផ្តល់ការប្រឹក្សាល្អដល់អ្នកវិនិយោគ ដែលអាចបង្កើតប្រាក់ចំណេញបាន និងទី៤ ជំរុញឲ្យវិស័យនេះកាន់តែទទួលបានទំនុកចិត្តពីអតិថិជន។

លោកស្រីបន្តថា “ការចូលមកកាន់ទីផ្សារកម្ពុជា របស់ក្រុមហ៊ុនអចលនទ្រព្យអន្តរជាតិថ្មីៗ ក្រុមហ៊ុនភ្នាក់ងារអចលនទ្រព្យនានាបង្ហាញថា ទីផ្សាររបស់យើងនៅតែមានឱកា​សរីកចម្រើន”។

ជាមួយគ្នានេះ អ្នកវិភាគដទៃទៀតក៏បានមើលឃើញថា ទីផ្សារកម្ពុជាប្រៀបដូចជាអេប៉ុងមិនទាន់ជក់ទឹក ដែលមានឱកាសស្រូបទឹក ឬស្រូបយកឱកាសចំណេញបានច្រើនបន្ថែមទៀត។

យោងតាមការសិក្សារបស់ក្រុមហ៊ុនCBRE Cambodiaនាពេលកន្លងមកបានបង្ហា​ញថា ផលចំណេញពីការវិនិយោគនៅកម្ពុជាមានកម្រិតខ្ពស់ ធៀបជាមួយបណ្តាប្រទេសក្នុងតំបន់ ដោយកម្ពុជាមានអត្រាចំណេញពីការវិនិយោគចន្លោះពី៥ទៅ៧ភាគរយក្នុងមួយឆ្នាំ ខណៈប្រទេសក្នុងតំបន់មានចន្លោះពី៤ទៅ៥ភាគរយប៉ុណ្ណោះ៕

ដោយៈគង់ សូរិយា

ភ្នំពេញៈ អ្នកជំនាញបានអះអាងថា វិនិយោគិនក្នុងស្រុកបានចាប់ផ្តើមបោះទុនកាន់តែធំលើគំរោងវិនិយោគរបស់ពួកគេ ពិសេសការវិនិយោគលើដីធ្លី ដើម្បីស្វែងរកផលចំណេញ និងគំរោងអភិវឌ្ឍន៍នាពេលអនាគត។

លោកស្រី Grace Rachny Fong នាយិកាក្រុមហ៊ុន Century21 Cambodia បានមានប្រសាសន៍ឲ្យដឹងកាលពីចុងសប្តាហ៍មុនថា បច្ចុប្បន្នអ្នកវិនិយោគក្នុងស្រុកបាននិងកំពុងវិនិយោគ លើគំរោងអភិវឌ្ឍន៍នានាកាន់តែច្រើន ពិសេសការវិនិយោគលើដីធ្លីនិងអាជីវកម្មនានា ដែលមានទំហំទឹកប្រាក់ចាប់ពី១លានដុល្លារអាមេរិកឡើងទៅ។

លោកស្រីបន្តថា “ការបង្កើនទំហំទុនវិនិយោគ ដោយសារពួកគេជឿជាក់លើទីផ្សារ និងស្ថានភាពសេដ្ឋកិច្ចកម្ពុជា នឹងងើបឡើងវិញលឿននៅបណ្តាឆ្នាំខាងមុខ និងផលចំណេ​ញពីការវិនិយោគនៅកម្ពុជានៅតែមានកម្រិតខ្ពស់”។ លោកស្រីបន្ថែមថា “ប្រជាពល​រដ្ឋកម្ពុជាបាន និងកំពុងរៀនរស់នៅជាមួយជំងឺកូវីដ ដែលជំងឺនេះវានឹងមិនទៅណានោះទេ ប៉ុន្តែយើងនៅតែបង្កើនការប្រុងប្រយ័ត្ន”។

លោកស្រី Grace Rachny Fong បានបន្តថា ការវិនិយោគរបស់វិនិយោគិនក្នុងស្រុកបានងើបឡើងវិញហើយ ដោយគំរោងធំៗជាច្រើន បានចាប់ផ្តើមប្រកាសសាងសង់ និងការវិនិយោគហេដ្ឋារចនាសម្ព័ន្ឋរបស់រដ្ឋាភិបាល នៅតែបន្តឆ្ពោះទៅមុខ ដែលបានចូលរួមលើកកំពស់វិស័យអចលនទ្រព្យនៅកម្ពុជា ឲ្យកាន់តែមានភាពប្រសើរឡើង។

ជាមួយគ្នានេះ លោកស្រីអាន សុធីតាអ្នកជំនាញនិងវិភាគអចលនទ្រព្យបានមានប្រ​សាសន៍ឲ្យដឹងផងដែរថា បច្ចុប្បន្នវិនិយោគិនអន្តរជាតិ មិនទាន់ចូលមកនៅឡើយទេ ហេតុនេះ វិនិយោគិនក្នុងស្រុកកំពុងដើរតួជំនួស និងចូលរួមចំណែកយ៉ាងសកម្មនៅក្នុងការជំរុញសេដ្ឋកិច្ចជាតិ ប៉ុន្តែលំហូរទុនវិនិយោគពីបរទេស ទើបធ្វើឲ្យកម្ពុជាមានភាពរីកចម្រើនលឿន ដោយសារទំហំទុនរបស់ពួកគេ និងធនធានមនុស្ស បច្ចេកទេសរបស់ពួកគេមានភាពប្រសើរ ដែលជួយឲ្យកម្ពុជាអាចរៀនសូត្របានច្រើនពីអន្តរជាតិ។

លោកស្រីបន្តថា “វិនិយោគិនក្នុងស្រុកពិតជាសំខាន់ ប៉ុន្តែយើងត្រូវការទុនវិនិយោ​គពីបរទេសកាន់តែច្រើនកាន់តែល្អ ដើម្បីធ្វើឲ្យវិស័យអចលនទ្រព្យ ក៏ដូចជាសេដ្ឋកិច្ចជាតិរីកចម្រើនលឿនថែមទៀត”៕

ដោយៈសុខុម

ប៉េកាំង: ក្រុមហ៊ុនមូលនិធិទុនឯកជនខ្នាតយក្ស របស់សហរដ្ឋអាមេរិក Warburg Pincus ទម្លាយឱ្យដឹងកាលពីថ្ងៃច័ន្ទ ទី៥ កក្កដា ថា ខ្លួនបានបង្កើតការវិនិយោគរួមគ្នាថ្មីមួយ ដោយបោះទុនយ៉ាងច្រើន ដើម្បីហក់ចូលប្រឡូកក្នុងវិស័យអចលនទ្រព្យ ក្នុងប្រទេសចិន។ នេះបើយោងការចុះផ្សាយរបស់សារព័ត៌មាន CNA។

ក្រុមហ៊ុន Warburg Pincus បានចេញសេចក្ដីថ្លែងការណ៍ថា ខ្លួន និងក្រុមហ៊ុន Wensheng Asset Management ដែលមានទីស្នាក់ការកណ្ដាល នៅក្រុងសៀងហៃ ប្រទេសចិន បាននឹងបោះទុនវិនិយោគ ក្នុងទឹកប្រាក់៦០០លានដុល្លារអាមេរិក ក្នុងក្រុមហ៊ុនវិនិយោគរួមគ្នា ដែលមានឈ្មោះថា Wensheng Special Situations Asset Management Co។

ទោះជាយ៉ាងណា ក្រុមហ៊ុនទាំងពីរ មិនបានបញ្ជាក់លម្អិត អំពីការបែងចែកភាគហ៊ុនដែលខ្លួនកាន់កាប់រៀងៗខ្លួន នៅក្នុងការវិនិយោគរួមគ្នានេះឡើយ។

ក្រុមហ៊ុនWarburg Pincus បានបញ្ជាក់ថា ក្រុមហ៊ុន Wensheng Asset Management បានដាក់ពាក្យស្នើសុំអាជ្ញាប័ណ្ណ បង្កើតក្រុមហ៊ុនទ្រព្យសកម្ម ក្នុងស្រុកសម្រាប់ការវិនិយោគរួមគ្នានេះរួចហើយ ហើយរំពឹងថានឹងទទួលបានវា ត្រឹមដំណាច់ឆ្នាំនេះ។

គម្រោងបណ្តាក់ទុនថ្មីនេះកើតមានឡើង ស្របពេលដែលយុទ្ធនាការរបស់ក្រុមនិយ័តករ ដើម្បីកាត់បន្ថយពពុះហិរញ្ញវត្ថុ (Financial Bubbles) ក្នុងវិស័យអចលនទ្រព្យបានបង្កើតឱកាសថ្មីៗ សម្រាប់បណ្ដាវិនិយោគិនផ្នែកបំណុល និងស្របពេលដែលប្រទេ​សចិន បន្ធូរបន្ថយដោយបង្កលក្ខណៈងាយស្រួលជាងមុន សម្រាប់ឱ្យវិនិយោគិនបរទេសឈានជើងចូលទីផ្សារបំណុលដ៏អាក្រក់របស់ខ្លួន។

ក្រុមហ៊ុនឯកទេសខាងបំណុលបរទេស រួមមាន ទាំងក្រុមហ៊ុនអាមេរិក BlackRock Group Inc ក្រុមហ៊ុនកាណាដា Brookfield Asset Management និងក្រុមហ៊ុនអាមេរិក CarVal Investors ផងសុទ្ធតែធ្វើប្រតិបត្តិការយ៉ាងសកម្ម ច្រើនឆ្នាំមកហើយនៅក្នុងទីផ្សារទ្រព្យសកម្ម មិនដំណើរការ (Non-performing Asset)របស់ប្រទេសចិន ជាពិសេសវិស័យអចលនទ្រព្យ។

ក្រុមហ៊ុន Warburg Pincus បានគូសបញ្ជាក់ថា ការបណ្តាក់ទុនរួមគ្នាថ្មីនេះនឹង ផ្តោតលើការទិញយក គម្រោងអចលនទ្រព្យដាច់ៗតែឯង នៅក្នុងក្រុងសៀងហៃ ខេត្តចឺជាំង (Zhejiang) ភាគខាងកើត និងខេត្តហៃណា (Hainan) ភាគខាងត្បូងប្រទេសចិន។

ក្រុមហ៊ុន Warburg Pincus ស្ថិតក្នុងចំណោមក្រុមហ៊ុន ដែលមានមូលនិធិឯកជនធំៗ បំផុតក្នុងវិស័យអចលនទ្រព្យប្រចាំទ្វីបអាស៊ី។

យោងតាមសេចក្ដីថ្លែងការណ៍របស់ខ្លួនឱ្យដឹងថា ក្រុមហ៊ុននេះ មានទ្រព្យសកម្មដែលស្ថិតក្រោមការគ្រប់គ្រង រហូតដល់ទៅជាង២២ពាន់លានដុល្លារ នៅតំបន់អាស៊ីអាគ្នេយ៍ និងប្រទេសចិន៕