ជ្រុងមួយនៃគំនិតៈអចលនទ្រព្យហុងកុងនិងឱកាសរៀនសូត្ររបស់កម្ពុជា ដើម្បីឆ្ពោះទៅមុខ

ដោយៈ បញ្ញា

ហុងកុងៈ ទីក្រុងហុងកុងឆ្នាំ1964 និងបច្ចុប្បន្នបានពីមុនជាវាលស្មៅ និងព្រៃនៅក្បែរឆ្នេរសមុទ្រ ភ្នំ កោះ តែឥឡូវនេះមានផ្លូវខ្វែងខ្វាត់ សុទ្ធតែអគារកប់ពពក មានរថភ្លើងក្រោមដី អចលនទ្រព្យមានតម្លៃខ្ពស់កបពពក ដូចជាផ្ទះ ខុនដូអគារពាណិជ្ជកម្ម ជាពិសេសដីធ្លី។

ត្រឹមរយៈពេល១២ឆ្នាំចុងក្រោយនេះ ទីក្រុងហុងកុងមានការកើនឡើងតម្លៃអចលនទ្រព្យលំនៅឋានខ្ពស់រហូតដល់262% (ធៀបនឹងអតិផរណា 162%) ក្នុងនោះតាមការគណនាឆ្នាំ2009 កើនឡើង28.5% ឆ្នាំ2010 កើន21%  ឆ្នាំ2012 កើនឡើង25.7% ឆ្នាំ2014 13.6% និង14.7% ក្នុងឆ្នាំ2017 (globalpropertyguide.com)។  នេះជាមេរៀនយើងគួររៀនសូត្រ ឬយកតម្រាប់តាម លើការវិនិយោគដីនៅតំបន់សមុទ្រ ក្បែរឆ្នេរអភិវឌ្ឍន៍ ព្រោះតម្លៃអចលនទ្រព្យក្នុងប្រទេសកម្ពុជា នៅតំបន់ទាំងនេះមានតម្លៃធូរច្រើននៅឡើយ ពិសេសខេត្តកែប និងកំពត។

ដោយឡែកខេត្តព្រះសីហនុ ដីធ្លីហក់ឡើងខ្ពស់រួចទៅហើយ ដែលជាឪកាសល្អសម្រាប់យើង បើទោះបីជាអនាគតទៅមុខតំបន់ទាំង2នេះ អភិវឌ្ឍត្រឹមតែ10% ឬ5% នៃទីក្រុងហុងកុង ក៏ដោយសារមូលហេតុខុសគ្នាលើកត្តាភូមិសាស្រ្ត ដង់ស៊ីតេប្រជាជន (Density) ចំណូលប្រចាំឆ្នាំប្រជាជន(GDP Per Capita) និងពាណិជ្ជកម្ម។

កត្តាធំៗចំនួន3ដែលយើងគួរតែវិនិយោគនៅខេត្តកែប និងខេត្តកំពត

        ខេត្តជាប់តំបន់ឆ្នេរទាំងនេះ មានមូលដ្ឋាននៃសក្តានុពល ដែលអាចផ្តល់នូវកាលានុវត្តន៍ភាពជាច្រើ់ន សម្រាប់ការវិនិយោគ ព្រោះខេត្តទាំងពីរនេះមានឱកាសរីកចម្រើនខ្លាំង​នាពេលអនាគត ដោយឈរលើមូលដ្ឋានជាក់លាក់មួយចំនួនដូចជា ទី១ ជាតំបន់សេដ្ឋកិច្ចទេសចរណ៍ មានឆ្នេរសមុទ្រ កោះ ភ្នំ ស្ទឹងបឹងបួរ និងទេសភាពស្រស់ស្អាតជាច្រើនទៀត (ជាបទពិសោធន៍លើពិភពលោក តំបន់ឆ្នេរស្អាតត្រូវតែអភិវឌ្ឍ មិនដែលទុកចោលនោះទេ)។

ទី២ ជាតំបន់សេដ្ឋកិច្ចពាណិជ្ចកម្ម មានចរន្តធ្វើពាណិជ្ជកម្មរស់រវើករបស់ប្រជាជនក្នុងខេត្តកំពត& កែប និងឆ្លងតំបន់ផ្សេងៗទៀត ទី៣ ជាតំបន់សេដ្ឋកិច្ចព្រំដែនកម្ពុជា- វៀតណាមទាំងព្រំដែនគោក និងព្រំដែនទឹកសមុទ្រ (ព្រំដែនគោកព្រែកចាក) មានសកម្ម​ភាពរថយន្តដឹកទំនិញចេញ-ចូល យ៉ាងមមាញឹក ដែលថ្ងៃអនាគតជាតំបន់ខឿនសេដ្ឋកិច្ចដ៏សំខាន់មួយ៕

ដោយទេព រាជ បញ្ញាៈនាយកប្រតិបត្តិឡាម៉ូនប្រ៉ភើធី៕

កំណាត់ផ្លូវហាយវេអាស៊ានពីបាត់ដំបង-សិរីសោភ័ណ និងផ្លូវល្បឿនលឿនវាងក្រុងបាត់ដំបងបើកឱ្យធ្វើចរាចរណ៍ជាផ្លូវការ

ដោយៈតារា

បាត់ដំបងៈ គម្រោងធ្វើឱ្យប្រសើរឡើងវិញនូវ កំណាត់ផ្លូវជាតិលេខ៥ (ហាយវេអាស៊ាន) ភាគខាងជើង បាត់ដំបង-សិរីសោភ័ណ ដែលមានប្រវែងជាង៨៤គីឡូម៉ែត្រ និងផ្លូវល្បឿនលឿនវាងក្រុងបាត់ដំបង ត្រូវបានប្រកាសដាក់ឲ្យធ្វើចរាចរណ៍ជាផ្លូវការចាប់ពីថ្ងៃទី២៣ ខែ កញ្ញា ឆ្នាំ២០២១នេះហើយ ។

លោកតូច ចាន់កុសល រដ្ឋលេខាធិការប្រចាំការ និងជាតំណាង ឯកឧត្តមទេសរដ្ឋមន្រ្តីស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនបានថ្លែងថា គម្រោងធ្វើឱ្យ​ប្រសើរឡើងកំណាត់ផ្លូវជាតិលេខ៥ បាត់ដំបង-ខេត្តបន្ទាយមានជ័យ មានប្រវែងសរុប ៨៤,៧៤គីឡូម៉ែត្រ ចំណាយថវិកាអស់ជាង១៦០លានដុល្លារ បានបើកការដ្ឋានសាងសង់​កាលពីឆ្នាំ២០១៨ ក្រោមអធិបតីភាពដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្រ្តីនៃកម្ពជា ហើយដំណើរការសាងសង់បានប្រព្រឹត្តទៅយ៉ាងសកម្ម។

លោកបន្ថែមថា កំណាត់ផ្លូវនេះមាន៤គន្លង  មានទទឹង២៨ម៉ែត្រសម្រាប់តំបន់ជនបទ និង២៣ម៉ែត្រសម្រាប់ទីប្រជុំជន។ កំណាត់ផ្លូវនេះមានដាំលម្អដើមត្របែកព្រៃ នៅចំកណ្ដាលទ្រូងផ្លូវ ប្រមាណជាង១ម៉ឺនដើម ចាប់ក្រុងបាត់ដំបង រហូតដល់ក្រុងសិរីសោភ័ណ។ ដោយឡែកផ្លូវវាងក្រុងបាត់ដំបង មានដាំលម្អដើមក្ងោកនៅអមសងខាងផ្លូវរាប់ពាន់ដើម ដើម្បីការពារការទន្ទ្រានដីចំណីផ្លូវ បង្កើនសោភ័ណភាព និងជួយទាក់ទាញអ្នកបើកបរ ក៏ដូចជាអ្នកធ្វើដំណើរឱ្យទទួលបាននូវអារម្មណ៍ស្រស់ស្រាយផងដែរ។

កំណាត់ផ្លូវនេះ ជាគោលការណ៍នឹងទទួលបានការថែទាំ រយៈពេលមួយឆ្នាំពីដៃគូជប៉ុន គិតចាប់ពីថ្ងៃប្រកាសដាក់ឲ្យប្រើប្រាស់ជាផ្លូវការនេះទៅ។ ហើយចំពោះអ្នករំលោភបំពានលើដីចំណីផ្លូវនឹងត្រូវចាត់វិធានការតាមផ្លូវច្បាប់ជាធរមាន។

លោកតូច ចាន់កិសលបានឱ្យដឹងទៀតថា បច្ចុប្បន្ននេះ វិស័យដឹកជញ្ជូននៅកម្ពុជា មានតម្លៃថ្លៃជាងបណ្ដាប្រទេសជិតខាង ដូច្នេះបន្ទាប់ពីផ្លូវវាងក្រុងបាត់ដំបងនេះ បើកឱ្យធ្វើចរាចរណ៍ នឹងជួយបង្កើនល្បឿននៃការដឹកជញ្ជូនទំនិញ កាត់បន្ថយថ្លៃប្រេង និងការចំណាយផ្សេងៗ។

គម្រោងធ្វើឱ្យប្រសើរឡើងវិញ កំណាត់ផ្លូវជាតិលេខ៥ គឺជាគម្រោងក្រោមកម្ចីឥណទាន សម្បទានពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុនប្រចាំកម្ពុជា ដែលផ្តើម សាងសង់ចេញពីព្រែកក្តាម រហូតដល់ក្រុងប៉ោយប៉ែត ឆ្លងកាត់ខេត្តកណ្តាល កំពង់ឆ្នាំង ពោធិ៍សាត់ បាត់ដំបង និង ខេត្តបន្ទាយមានជ័យ មានប្រវែងសរុប៣៦៦ គីឡូម៉ែត្រ គ្រោងចំណាយថវិកាប្រមាណ៥០០លានដុល្លារ ហើយការស្ថាបនាត្រូវបានបែងចែកជាបីផ្នែកធំៗគឺ ភាគខាងជើង ភាគខាងត្បូង និងភាគកណ្តាល។

ផ្លូវជាតិលេខ៥ គឺជាផ្លូវយុទ្ធសាស្ត្រយ៉ាងសំខាន់ ជាផ្លូវអាស៊ានហាយវេលេខ១ ហើយក៏ជាផ្លូវរបៀងសេដ្ឋកិច្ចកើត-លិចទី២ ដ៏មានសក្ដានុពលសម្រាប់ប្រកួតប្រជែងពា​ណិ​ជ្ជកម្ម ទេសចរណ៍ ភស្តុភារកម្ម វិនិយោគ និងសេដ្ឋកិច្ចនៃមហាតំបន់មេគង្គ GMS ដែលតភ្ជាប់រវាង បាងកក-ភ្នំពេញ-ហូជីមិញ៕

គម្រោងប្រណីត អ័រគីដេ ដឹប៊ូតានិច ផាលេស ចាប់ផ្តើមបើកសម្ពោធការដ្ឋានសាងសង់ និងបើកលក់ជាផ្លូវការហើយ

ភ្នំពេញ៖ ក្រោយពីធ្វើការបើកលក់មុនសម្ពោធគម្រោងកាលពីចុងខែកក្កដាកន្លងទៅ ជាមួយនឹងភាពជោគជ័យនៃការលក់ត្រឹមតែ១សប្តាហ៍ដំបូង នៅក្នុងថ្ងៃនេះយើងឃើញថា ក្រុមហ៊ុន អ័រគីដេ ឌីវែលឡុបម៉ិន បានចាប់ផ្តើមធ្វើការបុកគ្រឹះសាងសង់ និងសម្ពោធការបើកលក់ជាផ្លូវការ ហើយនាថ្ងៃទី២២ ខែកញ្ញា ឆ្នាំ២០២១ នៅទីតាំងការដ្ឋានក្នុងគម្រោងអ័រគីដេ ដឹប៊ូតានិចស៊ីធី ខណ្ឌជ្រោយចង្វារ។

 

គម្រោង ដឹប៊ូតានិច ផាលេស គឺជាគម្រោងដែលមានភាពល្អប្រណិតដាច់គេ នៅក្នុងគម្រោងមេ ដឹប៊ូតានិច ស៊ីធី ដែលមានទំហំផ្ទៃដីជាង​ ២៣ ហិចតា មានគេហដ្ឋានសរុបជាង ៥០០ខ្នង។ គេហដ្ឋានប្រណិតៗមានចំនួន ៣ប្រភេទ គឺ វីឡាទោល ដឹអ៊ីមប្រ៊េស លេក មានទីតាំងនៅជាប់បឹងប៊ូតានិច  វីឡាទោល ដឹអ៊ីមប្រ៊េស មានទីតាំងនៅទល់មុខសួនច្បារដ៏ស្រស់ស្អាត និងចម្រុះពណ៌ ចុងក្រោយគឺ វីឡាភ្លោះ ដឹអ៊ីមប្រ៊េស ដែលមានរចនាបថដ៏ទំនើប និងក្លាស្សិក ដែលអតិថិជននឹងមានវេលាដ៏ល្អប្រណិត ប្រកបដោយឯកជនភាព និងសុភមង្គល​នូវគម្រោងមួយនេះផ្ទាល់។

 

 

ក្នុងឱកាសនៃពិធី បើកការដ្ឋានសាងសង់ និងបើកសម្ពោធការលក់ជាផ្លូវការ ក្រុមហ៊ុនក៏មានផ្តល់ជូននូវប្រម៉ូសិនជាពិសេស។ អតិថិជន បង់ប្រាក់ត្រឹមតែ ០.៨% តែប៉ុណ្ណោះក្នុងមួយខែរហូតដល់ ២៤ខែ ដោយពុំមានការប្រាក់ និងពុំមានប្រាក់កក់ទេ។ សម្រាប់ព័ត៌មានបន្ថែម លោកអ្នកអាចមកសាកសួរព័ត៌មានបាននៅទីតាំងការិយាល័យលក់ តាមបណ្តោយផ្លូវជាតិលេខ ៦អា ចម្ងាយពីស្ពានជ្រោយចង្វារ ៧គ.ម ឬទំនាក់ទំនងតាមរយះលេខទូរស័ព្ទ 098 73 3333​ ឬ​ តេឡាមក្រាម៖ orkide_development។

 

ដឹប៊ូតានិច ផាលេស រួមមានបរិក្ខារជាច្រើនសម្រាប់អតិថិជនដូចជា៖ ផ្សារទំនើប ប៊ូតានិចម៉ល ដែលអនុញ្ញាតឲ្យអតិថិជនរីករាយ និងងាយស្រួល​ ការទិញទំនិញ និងសម្រាកកម្សាន្ត- ក្លឹបហ្សោសន៍ អីមផើរៀ អាចរៀបចំកម្មវិធីតូចធំបានគ្រប់ពេល- សួនប៊ូតានិច មានផ្កាសម្បូរបែប ចម្រុះពណ៌ ដើមឈើ ដ៏ត្រឈឹងត្រឈៃ – បឹងប៊ូតានិច មានទេសភាពដ៏ស្រស់ស្អាតគួរឲ្យចង់គយគន់។ ទាំងនេះជាអភយឯកសិទ្ធិពិសេសបំផុតសម្រាប់អតិថិជនដែររស់នៅក្នុងគម្រោង ដឹប៊ូតានិច ផាលេស ផ្ទាល់តែម្តង ហើយអ្វីដែរកាន់តែពិសេសនោះ គឺជាគម្រោងដែរផ្តោតសំខាន់ទៅលើ បរិស្ថាន និង ធម្មជាតិ ដោយគ្រប់គេហដ្ឋានទាំងអស់ត្រូវបានរចនាយ៉ាងយកចិត្តទុកដាក់ មានខ្យល់ និងពន្លឺចេញចូលគ្រប់គ្រាន់។

http://https://t.me/orkide_development

តាមរយៈលេខទូរស័ព្ទ 098 73 3333 ឬ តេឡេក្រាម

មហាយក្សចិនគ្រោងទិញយន្តហោះថ្មីរហូតដល់ទៅ៨.៧០០គ្រឿងដើម្បីពង្រីក មហិច្ឆតាផ្លូវអាកាស

ដោយៈសុខុម

ប៉េកាំង: ក្រុមហ៊ុនផលិតយន្តហោះខ្នាតយក្ស របស់សហរដ្ឋអាមេរិក Boeing បានទម្លាយឱ្យដឹងនៅថ្ងៃព្រហស្បតិ៍ ទី២៣ កញ្ញា នេះថា ក្រុមហ៊ុនអាកាសចរណ៍នានារបស់មហាយក្សចិន ទំនងជានឹងទិញយន្តហោះថ្មីៗរហូតដល់ទៅ៨.៧០០គ្រឿង។

យោងតាមការចុះផ្សាយរបស់ទីភ្នាក់ងារព័ត៌មាន Reuters ឱ្យដឹងថា ការទិញយន្តដែលមានតម្លៃសរុបរហូត ដល់ទៅ១.៤៧ទ្រីលានដុល្លារអាមេរិក ដ៏គួរឱ្យភ្ញាក់ផ្អើលនេះគឺជាគម្រោងសម្រាប់រយៈពេល២០ឆ្នាំខាងមុខ។

ការប៉ាន់ប្រមាណលើកចុងក្រោយ របស់ក្រុមហ៊ុនផលិតយន្តហោះ របស់សហរដ្ឋអាមេរិក មួយនេះសម្រាប់រយៈពេលដល់ឆ្នាំ២០៤០ គឺខ្ពស់ជាង១,២ភាគរយ បើធៀបនឹងការព្យាកររបស់ខ្លួន កាលពីឆ្នាំមុនដែលមានចំនួន៨.៦០០គ្រឿង។

ក្រុមហ៊ុន Boeing បាននិយាយថា ក្នុងពេលជាមួយគ្នានេះ ប្រទេសចិន ក៏នឹងត្រូវការចំណាយរហូតដល់ ទៅជិត១,៨ទ្រីលានដុល្លារអាមេរិកផងដែរ ទៅលើសេវាកម្មពាណិជ្ជកម្មសម្រាប់យន្តហោះរបស់ខ្លួន។

យោងតាមគេហទំព័រព័ត៌មាន statista.com ដែលបានចុះផ្សាយកាលពីថ្ងៃទី១៨ សីហា ឆ្នាំ២០២១ ឱ្យដឹងថា គិតត្រឹមឆ្នាំ២០២០ មានអាកាសយានដ្ឋានស៊ីវិលរហូតដល់ទៅ២៤១កន្លែងនៅចិនដីគោក ដែលនេះមិនទាន់រាប់បញ្ចូលចំនួន អាកាសយានដ្ឋាននៅក្រុងហុងកុង ម៉ាកាវ និងកោះតៃវ៉ាន់ ផងទេ៕  Reuters៕

សហរដ្ឋអាមេរិកបើកការិយាល័យក្រសួងកសិកម្មលើកដំបូងនៅកម្ពុជា

ដោយៈវឌ្ឍនៈ

ភ្នំពេញៈ សហរដ្ឋអាមេរិកបានបើកការិយាល័យរបស់ក្រសួងកសិកម្ម (USDA​)ដំបូងរបស់ខ្លួននៅកម្ពុជា នៅខែកញ្ញានេះ ដើម្បីទ្រទ្រង់ពាណិជ្ជកម្ម ទាក់ទងនឹងកសិកម្ម ដែលកំពុងមានកំណើន រវាងប្រទេសទាំងពីរ។ នេះបើតាមសេចក្តីប្រកាសព័ត៌មានរបស់ស្ថានទូតសហរដ្ឋអាមេរិកប្រចាំនៅកម្ពុជា។

ក្នុងសេចក្តីប្រកាសឱ្យដឹងថា ថ្វីត្បិតតែការិយាល័យផ្នែកសេវាកម្ម ជាមួយបរទេសរបស់ក្រសួងកសិកម្មអាមេរិក (USDA) ស្ថិតនៅក្នុងស្ថានទូតអាមេរិក នៅភ្នំពេញមែន ប៉ុន្តែការងាររបស់ក្រសួងនេះ មាននៅទូទាំងព្រះរាជាណាចក្រកម្ពុជា ដើម្បីទ្រទ្រង់កិច្ចសហការ និងពាណិជ្ជកម្មទ្វេភាគី ផ្នែកកសិកម្ម សម្រាប់ជាផលប្រយោជន៍នៃប្រទេសទាំងពីរ។

លោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជា បានមានប្រសាសន៍ថា នៅប្រទេសកម្ពុជាគេចូលចិត្តផលិតផល និងបច្ចេកវិទ្យាកសិកម្មរបស់អាមេរិក ហើយការិយាល័យថ្មីរបស់ USDA នេះ នឹងជំរុញកិច្ចការនេះដើម្បីឱ្យអតិថិជន និងផលិតករកម្ពុជាទទួលបានផលិតផល និងបច្ចេកវិទ្យាទាំងនោះឲ្យបានកាន់តែច្រើន។ វាជាដំណឹងល្អសម្រាប់ប្រទេសទាំងពីរ ហើយវាក៏បានឆ្លុះបញ្ចាំងឲ្យឃើញអំពីការប្តេជ្ញាចិត្តយូរអង្វែងរបស់យើង ក្នុងការធ្វើឲ្យប្រជាជនកម្ពុជាទទួលបានទំនិញ និងសេវាប្រកបដោយគុណភាព ពីសហរដ្ឋអាមេរិក ។

លោកបន្តថា “ទីផ្សារប្រទេសកម្ពុជាកំពុងមានកំណើន សម្រាប់ទំនិញកសិកម្មនាំចេញរបស់សហរដ្ឋអាមេរិក ដោយក្នុងឆ្នាំ២០២០ គេលក់បានក្នុងតម្លៃ៧២,២លានដុល្លា​រអាមេរិក គឺបានកើនឡើង៤៧៤ភាគរយក្នុងរយៈពេលជិត១០ឆ្នាំមកនេះ”។

ការិយាល័យផ្នែកសេវាកម្មជាមួយបរទេសរបស់USDA ក៏នឹងជួយផងដែរដល់កសិ​ករ និងសិស្សសាលានៅកម្ពុជា ក្នុងទំហំទឹកប្រាក់រាប់សិបលានដុល្លារ តាមរយៈកម្មវិធីជំនួយអភិវឌ្ឍន៍ជាបន្តរបស់USDA ដូចជាកម្មវិធី McGovern-Dole International Food For Education ដែលផ្ដល់អាហារសម្រាប់កូនសិស្ស នៅសាលាបឋមសិក្សា និងកម្មវិធី Food For Progress ដែលលើកកម្ពស់ផលិតភាពកសិកម្មផងដែរ៕

ការចាក់ដីបំពេញនៅទីក្រុងកោះនរានឹងបញ្ចប់នៅចុងឆ្នាំនេះ ខណៈគំរោងមួយចំនួន បានត្រៀមចាប់ផ្តើម

ដោយៈសិរី ជេស៊ីកា

        ភ្នំពេញៈ ការចាក់បំពេញដី និងខ្សាច់លើទីក្រុងកោះនរា ដែលមានទំហំ១២៥ហិកតានឹងបញ្ចប់នៅដំណាច់ឆ្នាំនេះ ខណៈគម្រោងហេដ្ឋារចនាសម្ព័ន្ឋទាំងមូល ដែលគ្រោងចំណាយប្រាក់រហូតដល់២៥០០លានដុល្លារ នឹងបញ្ចប់នៅឆ្នាំ២០២៣ខាងមុខ។

អគ្គនាយករងក្រុមហ៊ុនOCIC លោកទូច សំណាងបានមានប្រសាសន៍ឲ្យដឹងតាមទូរស័ព្ទកាលពីពេលថ្មីៗនេះថា ការចាក់បំពេញដីបាននិងកំពុងធ្វើឡើងយ៉ាងសកម្ម ដែលតាមផែនការគំរោងចាក់ដី នឹងបញ្ចប់នៅចុងឆ្នាំ២០២១នេះ ស្របពេលគំរោងមួយចំនួនបាននិងកំពុងត្រៀមចាប់ផ្តើមសាងសង់បណ្តើរៗហើយ។

លោកបន្តថា “ក្រុមហ៊ុនគ្រោងវិនិយោគទឹកប្រាក់ ប្រមាណ៣០លានដុល្លារអាមេរិក ដើម្បីសាងសង់មជ្ឈមណ្ឌលពាណិជ្ជកម្ម ជាលើកដំបូងលើទីក្រុងនេះ ដែលគំរោងនេះស្ថិតនៅលើផ្ទៃដីជាង១ហិកតា”។លោកបន្តថា “វាជាមជ្ឈមណ្ឌលពាណិជ្ជកម្មចម្រុះ ដែលស្រដៀងគ្នានឹងគំរោងAlyseeនៅលើទីក្រុងកោះពេជ្រ”។

ទោះជាយ៉ាងណាការឌីសាញគំរោងនេះ មិនទាន់បានបញ្ចប់ និងដាក់លក់នៅឡើយទេ តែវាជាប្រភេទផ្ទះសម្រាប់ពាណិជ្ជកម្ម ដែលមានកំពស់ពី៧ជាន់ដល់១៣ជាន់ និងមានទំហំទទឹង៨ម៉ែត្រ គុណនឹង២០ម៉ែត្រ។

លោកទូច សំណាងបានបន្តថា ជាមួយនឹងផែនការអភិវឌ្ឍរបស់ទីក្រុងកោះនរា ក្រុមហ៊ុនOCIC នឹងសាងសង់អាគារកប់ពពកមួយ នៅលើក្បាលកោះនរា ដែលវានឹងជាLand Markដ៏អស្ចារ្យមួយសម្រាប់លើកកំពស់មុខមាត់ និងកិត្យានុភាពរបស់កម្ពុជា។

លោកបន្តថា “ទស្សនទាននៃការអភិវឌ្ឍរបស់យើង មានភាពស្រដៀងគ្នានឹងទីក្រុងកោះពេជ្រ ដែលបច្ចុប្បន្នទីក្រុងនេះបាន និងកំពុងលេចចេញនូវវត្តមានអាគារកប់ពពកព្រោងព្រាត ប៉ុន្តែបច្ចុប្បន្នការប្រើប្រាស់ដីសម្រាប់គំរោងនេះ ទើបសម្រេចបាន៥០ភាគរយប៉ុណ្ណោះ”។

ក្រុមហ៊ុនOCICជាក្រុមហ៊ុនលំដាប់យក្សក្នុងស្រុកមួយ ដែលបានវិនិយោគលើគំរោងធំៗជាច្រើន ដូចជាទីក្រុងរណបកោះពេជ្រ ទីក្រុងរណបជ្រោយចង្វារ ទីក្រុងនៃអនាគត ទីក្រុងកោះនរា ព្រលានយន្តហោះអន្តរជាតិភ្នំពេញថ្មី វិមានកាណាឌីយ៉ា បុរីទេសចរណ៍ខេត្តសៀមរាបជាដើម៕

លោកឧកញ៉ាគីម ហ៊ាងៈដើម្បីឲ្យសេដ្ឋកិច្ចដីធ្លីដំណើរការឡើងវិញត្រូវធ្វើរឿង សំខាន់ៗចំនួនបី

        ដោយៈស៊ីវ ម៉េង

        ភ្នំពេញៈ ស្របពេលទីផ្សារអចលនទ្រព្យកំពុងជាប់ផុងក្នុងវិបត្តិ អ្នកជំនាញជើងចាស់ក្នុងវិស័យនេះ បានបង្ហើបនូវកត្តាដំណោះស្រាយចំនួន៣ ដើម្បីឲ្យសេដ្ឋកិច្ចដំណើរការឡើងវិញល្អប្រសើរ ពិសេសការវិនិយោគលើដីធ្លី។

លោកឧកញ៉ាគីម ហ៊ាងប្រធានKW Cambodiaបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២៣ កញ្ញានេះថា ដើម្បីឲ្យទីផ្សារអចលនទ្រព្យ ពិសេសសេដ្ឋកិច្ចងើបឡើងវិញទាមទារនូវដំណោះស្រាយចំនួនបី ទី១ ការវិនិយោគពីអ្នកមានក្នុងស្រុកឲ្យបានច្រើន ទី២ អ្នកមាននៅបរទេសចូលមកវិនិយោគ ក្នុងស្រុកឲ្យបានច្រើន និងទី៣ អ្នកមាននៅក្នុងស្រុក ដែលយកលុយទៅផ្ញើរនៅបរទេស ជួយបង្វែរលុយទាំងនោះមកវិនិយោគក្នុងស្រុកវិញ។

លោកបន្តថា “បើពឹងតែអ្នកវិនិយោគក្នុងស្រុកតែមួយមុខ ទីផ្សារអចលនទ្រព្យមិនអាចដើរបានល្អទេ វាទាមទារនូវលំហូរទុនវិនិយោគ ពីគ្រប់ប្រទេសមកកាន់កម្ពុជា និងអ្នកមាននៅបរទេស និងក្នុងស្រុកចាប់ផ្តើមវិនិយោគនៅកម្ពុជា”។

លោកឧកញ៉ាបណ្ឌិតគីម ហ៊ាងបានបន្តថា ក្នុងរយៈពេលជិត២ឆ្នាំហើយ មិនសូវឃើញមានអ្នកលក់ដីបានតម្លៃ១០លានដុល្លារ ហើយយកលុយនោះទៅវិនិយោគបនន្តទេ ព្រោះធម្មតា អ្នកលក់ដីបាន១០លានដុល្លារ ពួកគេអាចនឹងចំណាយ៥លានដុល្លារទិញដីឡើងវិញ ទិញដីធំជាងមុន អាចឆ្ងាយជាងមុន។ ចំណែកអ្នកលក់ដីបាន៥លានដុល្លារ អាចយកលុយ២ទៅ៣លានដុល្លារ ហើយអ្នកលក់ដីបាន៣លានដុល្លារ អាចចំណាយប្រាក់១លានឬ២លានដុល្លារដើម្បីទិញដីវិនិយោគបន្ត។

លោកបន្តថា “ប៉ុន្តែក្នុងស្ថានភាពនេះ អ្វីៗហាក់បានស្ងប់ស្ងាត់ ប៉ុន្តែវាជាពេលដែលអ្នកមានលុយច្រើន មានឱកាសចំណេញច្រើន ព្រោះពួកគេអាចទិញដីបានតម្លៃល្អៗច្រើន និងមានផលចំណេញខ្ពស់”៕

ខេត្តចំនូន១២បាននិងកំពុងយកចិត្តទុកដាក់លើការថែរទាំផ្លូវជាតិចំនួន២០

ដោយៈគង់ ម៉ាលីនណា

ភ្នំពេញៈ មន្ទីរសាធារណៈការ និងដឹកជញ្ជូននៅតាមបណ្តាខេត្តចំនួន១២ បាននិងកំពុងថែរទាំផ្លូវជាតិសំខាន់ៗចំនូន២០ នៅក្នុងមូលដ្ឋាននិងដែលសមត្ថកិច្ចរបស់ខ្លួន។

មន្ទីរជំនាញទាំងនោះ កំពុងបង្កើនការខិតខំយកចិត្តទុកដាក់ថែទាំ លើកំណាត់ផ្លូវជាតិ តាមបណ្តារខេត្ត ជួយសម្រួលដល់បងប្អូនប្រជាពលរដ្ឋ ក្នុងការធ្វើដំណើរ និងដឹកជញ្ចូនឆ្លងកាត់ កាន់តែមានភាពងាយស្រួល។
កម្មវិធីថែរទាំ និងជួសជុលផ្លូវនេះ ធ្វើឡើងនៅថ្ងៃទី១៦-២១ ខែកញ្ញា ឆ្នាំ២០២១ មន្ទីរសាធារណការ និងដឹកជញ្ជូន ខេត្តកណ្តាល បាត់ដំបង ប៉ៃលិន បន្ទាយមានជ័យ ឧត្តរមានជ័យ ព្រះវិហារ សៀមរាប ត្បូងឃ្មុំ ក្រចេះ រតនគីរី កំពង់ស្ពឺ និងខេត្តកោះកុង។

ផ្លូវជាតិសំខាន់ៗ ដែលបានបង្កើនយកចិត្តទុកដាក់ថែទាំលើ កំណាត់ផ្លូវជាតិលេខ៤ លេខ៥ លេខ៦ លេខ៨ លេខ៩៥ លេខ២១បេ លេខ៤៤ លេខ៥៦ លេខ៥៨ លេខ៦៨ លេខ៦២ លេខ៦៤ លេខ៥៩ លេខ៥៧ លេខ៦៧ លេខ៧២ លេខ៧៣ លេខ៧៦ លេខ៧៨ លេខ៥៧បេ និងផ្លូវថ្នល់មួយចំនួនផ្សេងទៀត ដែលបានរងការខូចខាតដោយ​សាររងជំនន់ទឹកភ្លៀង កំណាត់ផ្លូវខ្លះក្លាយជាជង្ហុកសំប៊ុកមាន់ ក៏ត្រូវបានជួសជុលផងដែរ។

ក្រសួងសាធារណៈការបានឲ្យដឹងថា ប្រសិនជួបបញ្ហាផ្លូវថ្នល់ខូច មានជង្ហុកសំបុកមាន់ សូមថតរាយការណ៍មកក្រសួង ដោយប្រើប្រាស់កម្មវិធីថែទាំផ្លូវ (Road Care Mobile App) ដើម្បីចូលរួមថែរក្សាផ្លូវថ្នល់របស់យើង អាចប្រើប្រាស់បានយូរអង្វែង៕

វិភាគ: តើកិច្ចព្រមព្រៀង TPP របស់សហរដ្ឋអាមេរិកកំពុងប្រជែងនឹងកិច្ចព្រមព្រៀង RECP របស់មហាយក្សចិន?

ដោយៈសុខុម

អន្តរជាតិៈ មហាអំណាចពិភពលោកទាំងពីរ ទោះបីជាមិនអាចចាត់ទុកគ្នាជាគូសត្រូវផ្លូវការក៏ដោយ ក៏៏អាមេរិកបាននិងកំពុងប្រើប្រាស់វិធីគ្រប់យ៉ាង ដើម្បីបង្អាក់ការងើបឡើងរបស់មហាយក្សចិន មិនឲ្យសម្រេចបានក្តីសុបិន ក្នុងការក្លាយជាមហាអំណាចលេខ១លើពិភពលោកលឿនពេកនោះទេ។

ការប្រជែងផ្នែកសេដ្ឋកិច្ច សព្វាវុធ បច្ចេកវិទ្យា បាននិងកំពុងក្លាយជាភ្នក់ភ្លើងដ៏ក្តៅ ដែលប្រទេសទាំងពីរនេះ បាននិងកំពុងព្យាយាមដុតគ្នាទៅវិញទៅមក ក្នុងសមរភូមិកាទូត ភូមិសាស្រ្តនយោបាយ និងផលប្រយោជន៍ផ្នែកសេដ្ឋកិច្ច។

ជាក់ស្តែង កិច្ចព្រមព្រៀងភាពជាដៃគូអន្តរប៉ាស៊ីហ្វិក (TPP) គឺជាកិច្ចព្រមព្រៀងពាណិជ្ជកម្មសេរី (FTA) មួយដែលមានសហរដ្ឋអាមេរិក ជាខ្នងបង្អែក ខណៈកិច្ចព្រមព្រៀងភាពជាដៃគូសេដ្ឋកិ្ចគ្រប់ជ្រុងជ្រោយ (RECP) គឺជាកិច្ចព្រមព្រៀងពាណិជ្ជកម្មសេរីដែលមានមហាយក្សចិន ជាខ្នងបង្អែក។

កិច្ចព្រមព្រៀង RECP ដែលមានការចូលរួមពីប្រទេសជាច្រើន រួមមាន អូស្ត្រាលី ព្រុយណេ ចិន ឥណ្ឌូនេស៊ី ជប៉ុន ឡាវ ម៉ាឡេស៊ី មីយ៉ាន់ម៉ា នូវែលសេឡង់ ហ្វីលីពីន សិង្ហបុរី កូរ៉េខាងត្បូង ថៃ វៀតណាម និងកម្ពុជា ពោលគឺ១៥ប្រទេសនេះ គ្របដណ្ដប់ប្រមាណ៣០%នៃចំនួនប្រជាជនទូទាំងពិភពលោក (២,២ពាន់លាននាក់) និង៣០%នៃផលិត​ផលក្នុងស្រុកសរុប (GDP) ទូទាំងពិភពលោក (២៦,២ទ្រីលានដុល្លារ) គិតត្រឹមឆ្នាំ២០២០។

ចុះកិច្ចព្រមព្រៀង TPP? តើកិច្ចព្រមព្រៀងនេះវិវឌ្ឍដល់ណាហើយ? រហូតមកទល់ពេលនេះ ខណៈប្រទេសចិនបាននិងកំពុងស្នើ សុំចូលរួមជាសមាជិក ក្នុងកិច្ចព្រមព្រៀងនេះផងដែរនោះ?។

កិច្ចព្រមព្រៀង TPP គឺជាចំណុចស្នូល នៃយុទ្ធសាស្ត្ររបស់សហរដ្ឋអាមេរិក ឆ្ពោះមកកាន់អាស៊ី-ប៉ាស៊ីហ្វិក (Pivot to Asia-Pacific Strategy) ក្រោមរដ្ឋការប្រធានាធិបតី បារ៉ាក់ អូបាម៉ា។ មុនពេលប្រធានាធិបតី ដូណាល់ ត្រាំ ដកសហរដ្ឋអាមេរិក ចេញក្នុងឆ្នាំ២០១៧ ក្នុងថ្ងៃដំបូងនៃការឡើងកាន់អំណាចរបស់លោក កិច្ចព្រមព្រៀង TPP នឹងត្រូវក្លាយជាកិច្ចព្រមព្រៀងពាណិជ្ជកម្មសេរី (FTA) ធំបំផុតរបស់ពិភពលោក ដែលគ្របដ ណ្តប់រហូតដល់ទៅ៤០%នៃសេដ្ឋកិច្ចពិភពលោក។

សម្រាប់អ្នកគាំទ្រមើលឃើញថា កិច្ចព្រមព្រៀងនេះនឹងជួយពង្រីកពាណិជ្ជកម្ម និងការវិនិយោគរបស់សហរដ្ឋអាមេរិកនៅបរទេស ជំរុញកំណើនសេដ្ឋកិច្ច ធ្វើឱ្យថ្លៃទំនិញប្រើប្រាស់ចុះថោក និងជួយបង្កើតការងារថ្មីៗ ព្រមទាំងជំរុញផលប្រយោជន៍ ជាយុទ្ធសាស្ត្ររបស់អាមេរិក នៅក្នុងតំបន់អាស៊ី-ប៉ាស៊ីហ្វិកផងដែរ។

ទោះជាយ៉ាងណា សម្រាប់អ្នកប្រឆាំង រួមទាំងលោកដូណាល់ ត្រាំ ផងនោះបានមើលឃើញថា កិច្ចព្រមព្រៀងនេះ ទំនងជាធ្វើឱ្យផលិតកម្មរបស់សហរដ្ឋអាមេរិក ធ្លាក់ចុះកាន់តែលឿន ធ្វើឱ្យប្រាក់ឈ្នួលធ្លាក់ចុះកាន់ទាប និងធ្វើឱ្យវិសមភាពកើនឡើង។

ក្រោយពីសហរដ្ឋអាមេរិក ដកខ្លួនចេញ បណ្ដាប្រទេសហត្ថលេខី នៃកិច្ចព្រមព្រៀង TPP ដែលនៅសេសសល់បានបន្តអនុវត្តកិច្ចព្រមព្រៀងនេះ ដោយគ្រាន់តែប្ដូរឈ្មោះវាមកជាកិច្ចព្រមព្រៀងគ្រប់ជ្រុងជ្រោយ និងវឌ្ឍភាពសម្រាប់ភាពជាដៃគូអន្តរប៉ាស៊ីហ្វិក (CPTPP) ប៉ុន្តែបានរក្សាទុកខ្លឹមសារដើមស្ទើរតែទាំងស្រុង។

អ្វីដែលគួរឱ្យកត់សម្គាល់ គឺនៅខែកញ្ញា ឆ្នាំ២០២១ មហាយក្សចិន បានដាក់ពាក្យសុំចូលរួមក្នុងកិច្ចព្រមព្រៀងនេះ ដោយដាក់សម្ពាធលើសហរដ្ឋអាមេរិកកាន់តែខ្លាំង។

ប្រធានាធិបតីសហរដ្ឋអាមេរិក លោកចូ បៃដិន បានបញ្ជាក់ជំហរថា លោកមិនគាំទ្រការចូលរួម ក្នុងកិច្ចព្រមព្រៀងTPPឡើងវិញនោះឡើយ ប៉ុន្តែថាលោកអាចនឹងព្យា​យាមចរចាឡើងវិញ ដើម្បីដាក់បញ្ចូលបទប្បញ្ញត្តិ កាន់តែរឹងមាំស្ដីកម្លាំងពលកម្ម និងបរិស្ថាន។

*តើកិច្ចព្រមព្រៀង TPP មានដើមកំណើតមកពីណា?
កិច្ចព្រមព្រៀងTPP គឺជាកិច្ចព្រមព្រៀងពាណិជ្ជកម្មសេរី (FTA) មួយដែលត្រូវបានបង្កើតឡើងនៅក្នុងឆ្នាំ២០០៥ រវាងប្រទេសមួយក្រុមតូចនៅតំបន់អាស៊ី-ប៉ាហ្វិក ដែលរួមមានប្រទេសព្រុយណេ ប្រទេសស៊ីលី ប្រទេសនូវែលសេឡង់ និងប្រទេសសិង្ហបុរី។

នៅឆ្នាំ២០០៨ ប្រធានាធិបតី ចច ដាប់ប៊ឹលយូប៊ូស បានប្រកាសថា សហរដ្ឋអាមេរិក នឹងចាប់ផ្តើមកិច្ចចរចាពាណិជ្ជកម្ម ជាមួយក្រុមប្រទេសនេះ ដោយបានដឹកនាំប្រទេសអូស្ត្រាលី ប្រទេសវៀតណាម និងប្រទេសប៉េរូ ឱ្យចូលរួមផងដែរ។ ក្រោយពីកិច្ចចរចា ក្រុមប្រទេសទាំងនេះ បានពង្រីកសមាជិកដោយរាប់បញ្ចូលប្រទេសកាណាដា ប្រទេសជប៉ុន ប្រទេសម៉ាឡេស៊ី និងប្រទេសម៉ិកស៊ិក សរុបគឺ១២ប្រទេស។

នៅពេលឡើងកាន់អំណាចក្នុងឆ្នាំ២០០៩ លោក បារ៉ាក់ អូបាម៉ា បានបន្តកិច្ចចរចានេះ។

នៅឆ្នាំ២០១១ លោកស្រី ហ៊ីលឡារី គ្លីនតុន រដ្ឋមន្រ្តីក្រសួងការបរទេសសហរដ្ឋអាមេរិក បានកំណត់យកកិច្ចព្រមព្រៀង TPP ជាចំណុចស្នូលនៃយុទ្ធសាស្ត្រ របស់សហរដ្ឋអាមេរិក ឆ្ពោះមកកាន់អាស៊ី-ប៉ាស៊ីហ្វិក (Pivot to Asia-Pacific Strategy)។

បន្ទាប់ពីការចរចាជាផ្លូវការចំនួន១៩លើក និងជំនួបដាច់ដោយឡែកជាច្រើនលើកផ្សងេទៀត បណ្ដាប្រទេសដែលចូលរួម បានឈានដល់ការព្រមព្រៀងគ្នា នៅខែតុលា ឆ្នាំ២០១៥ ហើយបានចុះកិច្ចព្រមព្រៀងនេះនៅដើមឆ្នាំ២០១៦។

ការចរចាទាំងនេះ បានយកឈ្នះឧបសគ្គនយោបាយធំៗជាច្រើន ដោយប្រទេសនានាបានឯកភាពគ្នា លើការកែទម្រង់ដ៏លំបាក នៃសេដ្ឋកិច្ចរបស់ពួកគេ។

ជាឧទាហរណ៍ ជប៉ុន បានជំទាស់នឹងការបញ្ចុះពន្ធគយ លើទំនិញកសិកម្ម ខណៈប្រទេសនេះ យល់ព្រមឱ្យកាត់បន្ថយឧបសគ្គនានា ចំពោះទីផ្សាររថយន្តរបស់ខ្លួន។

ប្រទេសកាណាដា បានយល់ព្រមអនុញ្ញាតឱ្យបរទេសបន្ថែមទៀត ចូលទៅក្នុងទីផ្សារផលិតផលទឹកដោះគោ ដែលត្រូវបានគាំពារយ៉ាងខ្លាំងរបស់ខ្លួន ខណៈប្រទេសព្រុយណេ ប្រទេសម៉ាឡេស៊ី និងប្រទេសវៀតណាម សន្យាធ្វើកំណែទម្រង់ច្បាប់ការងាររបស់ពួកគេ ហើយក្រុមអ្នកចរចារបស់សហរដ្ឋអាមេរិក បានសម្របសម្រួលលើការទាមទារខ្លះរបស់ពួកគេ ដែលចង់ឱ្យមានការការពារកាន់តែតឹងរ៉ឹង ចំពោះប៉ាតង់ផលិតឱសថ។

ទោះជាយ៉ាងណា កិច្ចព្រមព្រៀងនេះ មិនដែលទទួលបានការផ្តល់សច្ចាប័នពីសភាសហរដ្ឋអាមេរិកឡើយ ព្រោះកិច្ចព្រមព្រៀងនេះ បានក្លាយជាប្រធានបទដ៏ក្ដៅគគុកទាំងសម្រាប់បេក្ខភាពមកពីគណបក្សសាធារណរដ្ឋ និងបេក្ខភាពមកពីគណបក្សប្រជាធិបតេយ្យ អំឡុងយុទ្ធនាការឃោសនាបោះឆ្នោត ប្រជែងតំណែងប្រធានាធិបតីក្នុងឆ្នាំ២០១៦ ។

លោក ដូណាល់ ត្រាំ បានដកខ្លួនចេញពីកិច្ចព្រមព្រៀង TPP ជាផ្លូវការនៅថ្ងៃឡើងកាន់អំណាចថ្ងៃដំបូង ពោលគឺនៅខែមករា ឆ្នាំ២០១៧។

*តើបណ្ដាប្រទេសភាគីហត្ថលេខីបានព្រមព្រៀងគ្នាលើចំណុចអ្វីខ្លះ?
កិច្ចព្រមព្រៀង TPP មានចំនួន៣០ជំពូក ដែលគ្របដណ្តប់ពន្ធលើទំនិញ និងសេវាកម្ម កម្មសិទ្ធិបញ្ញា ច្បាប់ស្ដីពីពាណិជ្ជកម្មតាមប្រព័ន្ធអេឡិចត្រូនិក (E-commerce) ស្តង់ដារការងារ និងបរិស្ថាន យន្តការដោះស្រាយវិវាទ និងទិដ្ឋភាពជាច្រើនទៀតនៃពាណិជ្ជកម្មពិភពលោក។

គោលដៅធំចម្បងនៃកិច្ចព្រមព្រៀង ដែលគ្រប់ដណ្ដប់ទ្វីបមួយចំនួន និងប្រហែល៤០%នៃពាណិជ្ជកម្មពិភពលោកនេះ គឺដើម្បីបង្កើតតំបន់សេដ្ឋកិច្ចរួមបញ្ចូលគ្នា ដែលមានលក្ខណៈពេញលេញមួយ ហើយបង្កើតច្បាប់ដែលមានសង្គតភាព (ស៊ីសង្វាក់គ្នា) សម្រា​ប់ការវិនិយោគទូទាំងពិភពលោក។

សម្រាប់អតីតប្រធានាធិបតីអាមេរិក លោកបារ៉ាក់ អូបាម៉ា គឺលោកចង់ឱ្យកិច្ចព្រមព្រៀងនេះ ធានាបានថា “សហរដ្ឋអាមេរិក” គឺជាប្រទេសតែមួយគត់ក្នុងលោក ដែលជាអ្នកតាក់តែងច្បាប់ប្រចាំសតវត្សរ៍ទី២១នេះ សម្រាប់សេដ្ឋកិច្ចពិភពលោក គឺមិនមែនប្រទេ​សផ្សេងដូចជាមហាយក្សចិន នោះឡើយ។

*តើកិច្ចព្រមព្រៀងនេះនឹងផ្តល់ផលប្រយោជន៍អ្វីខ្លះដល់សហរដ្ឋអាមេរិក?
សម្រាប់ពលរដ្ឋអាមេរិក ដែលគាំទ្រកិច្ចព្រមព្រៀងTPP នឹងយល់ថា កិច្ចព្រមព្រៀងនេះ នឹងក្លាយជាមជ្ឈមណ្ឌល នៃយុទ្ធសាស្ត្រផ្តោតលើតំបន់អាស៊ី ដើម្បីបន្តរក្សាផលប្រ​យោជន៍របស់សហរដ្ឋអាមេរិក ទាំងផ្នែកសេដ្ឋកិច្ច និងភូមិសាស្ត្រនយោបាយ។

*ផលប្រយោជន៍ផ្នែកសេដ្ឋកិច្ច
រដ្ឋការរបស់លោក បារ៉ាក់ អូបាម៉ា និងអ្នកជំនាញសេដ្ឋកិច្ចពាណិជ្ជកម្មជាច្រើនបានទាញទឡ្ហីករណ៍ថា ការបញ្ចុះពន្ធ និងការបង្កើនឱកាសចូលទៅកាន់ទីផ្សារ ដែលមានចែងក្នុងកិច្ចព្រមព្រៀងនេះ នឹងជួយធ្វើឱ្យថ្លៃទំនិញប្រើប្រាស់ចុះថោក ជំរុញការវិនិយោគឆ្លងដែន និងបង្កើនការនាំចេញរបស់សហរដ្ឋអាមេរិក។

ពួកគេនិយាយថា ច្បាប់ដែលកាន់តែមានសង្គតភាព និងកំណែទម្រង់ដែលផ្តោតលើទីផ្សារ នៅក្នុងប្រទេសកំពុងអភិវឌ្ឍន៍ ដូចជា ប្រទេសវៀតណាម និងប្រទេសម៉ាឡេស៊ី ជាដើម នឹងធ្វើឱ្យសេដ្ឋកិច្ចទាំងអស់ ដែលចូលរួមពាក់ព័ន្ធ កាន់តែមានប្រសិទ្ធភាពក្នុងការបង្កើនផលិតភាព និងកំណើន។

បណ្ដាប្រទេសហត្ថលេខី នៃកិច្ចព្រមព្រៀង TPP គ្របដណ្ដប់ប្រហែល៤០%នៃផលិតផលក្នុងស្រុកសរុប (GDP) របស់ពិភពលោក ហើយកិច្ចព្រមព្រៀងនេះ នឹងក្លាយជាកិច្ចព្រមព្រៀងធំបំផុត ដែលសហរដ្ឋអាមេរិក មិនធ្លាប់សម្រេចបានបើគិតទាំងចំនួនប្រទេស និងរំហូរពាណិជ្ជកម្មសរុប។

យោងតាមទិន្នន័យរបស់គណៈកម្មាធិការ ពាណិជ្ជកម្មអន្តរជាតិរបស់សហរដ្ឋអាមេរិក (USITC) បានបង្ហាញថា ការធ្វើពាណិជ្ជកម្មរបស់សហរដ្ឋអាមេរិក ជាមួយបណ្តាប្រទេសហត្ថលេខីនៃកិច្ចព្រមព្រៀង TPP មានទំហំជាង១.៥ទ្រីលានដុល្លារ ឬប្រហែល៤០% នៃពាណិជ្ជកម្មសរុបរបស់សហរដ្ឋអាមេរិក ក្នុងឆ្នាំ២០១៥។

សហរដ្ឋអាមេរិក មានកិច្ចព្រមព្រៀងពាណិជ្ជកម្មសេរី (FTA) ដែលមានស្រាប់ជា​មួយប្រទេសហត្ថលេខី នៃកិច្ចព្រមព្រៀង TPP ជាច្រើនរួមទាំងប្រទេសអូស្ត្រាលី ប្រទេសកាណាដា និងប្រទេសម៉ិកស៊ិកផងដែរ ប៉ុន្តែនៅពេលដែលកិច្ចព្រមព្រៀង TPP ត្រូវបានចុះហត្ថលេខា គឺខ្វះប្រទេសជប៉ុន ដែលជាសេដ្ឋកិច្ចធំទី៣ របស់ពិភពលោក។

នៅឆ្នាំ២០១៩ រដ្ឋការរបស់លោក ដូណាល់ ត្រាំ បានចរចាកិច្ចព្រមព្រៀងពាណិជ្ជកម្មទ្វេភាគីមួយ ជាមួយរដ្ឋាភិបាលក្រុងតូក្យូ ដែលលោក Robert Lighthizer តំណាងពាណិជ្ជកម្មសហរដ្ឋអាមេរិក បានទាញទឡ្ហីករណ៍ អំពីអត្ថប្រយោជន៍សេដ្ឋកិច្ចជាច្រើនដែលសហរដ្ឋអាមេរិក ទទួលបានពីកិច្ចព្រមព្រៀង TPP។

ការសិក្សាផ្នែកសេដ្ឋកិច្ចជាច្រើន រួមទាំងការសិក្សាដោយបណ្ដា ទីភ្នាក់ងាររដ្ឋាភិបាលរបស់សហរដ្ឋអាមេរិកបានព្យាករថា កិច្ចព្រមព្រៀង TPP នឹងជួយជំរុញកំណើនសេដ្ឋកិច្ចរបស់សហរដ្ឋអាមេរិក ដោយការសិក្សាមួយបានព្យាករថា កិច្ចព្រមព្រៀងនេះនឹងជួយបន្ថែមប្រាក់ចំណូល១៣០ពាន់លានដុល្លារទៅលើ GDP របស់សហរដ្ឋអាមេរិក នៅត្រឹមឆ្នាំ២០២៣។

ទោះជាយ៉ាងណា គំរូ ឬ Model មួយចំនួននៃកិច្ចព្រមព្រៀនេះ បានបង្ហាញពីផលប៉ះពាល់ចម្រុះទៅលើការងារ ដោយធ្វើឱ្យបាត់បង់ការងារ នៅក្នុងវិស័យផលិតកម្ម ខណៈទទួលបានកំណើននៅក្នុងវិស័យកសិកម្ម និងសេវាកម្ម។

*ផលប្រយោជន៍ផ្នែកភូមិសាស្ត្រនយោបាយ
អតីតរដ្ឋការរបស់លោក ប៉ារ៉ាក់ អូបាម៉ា បានអះអាងថា កិច្ចព្រមព្រៀង TPP នឹងពង្រឹងភាពជាអ្នកដឹកនាំ របស់សហរដ្ឋអាមេរិក នៅតំបន់អាស៊ី និងពង្រឹងសម្ព័ន្ធភាពរបស់ខ្លួននៅក្នុងតំបន់។

អំឡុងឆ្នាំ២០១១ លោកស្រី ហ៊ីលឡារី គ្លីនតុន បានថ្លែងថា កិច្ចព្រមព្រៀង TPP នឹងជំរុញកិច្ចខិតខំប្រឹងប្រែ ងធ្វើសមាហរណកម្មអាស៊ី ឱ្យកាន់តែទូលំទូលាយ ដោយគាំទ្រដល់ស្ថាប័នថ្នាក់តំបន់ ដូចជា វេទិកាកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ជាដើម។

កិច្ចព្រមព្រៀង TPP ក៏នឹងធានាបានផងដែរថា សហរដ្ឋអាមេរិក បាននាំមុខគេផ្នែកច្បាប់ពាណិជ្ជកម្មពិភពលោក។

*តើអ្វីដែលជំរុញឱ្យមានការប្រឆាំងជំទាស់នឹងកិច្ចព្រមព្រៀង TPP?
កិច្ចព្រមព្រៀងTPP បានក្លាយជាប្រធានបទក្ដៅគគុក នៅក្នុងប្រព័ន្ធនយោបាយរបស់សហរដ្ឋអាមេរិក ជាពិសេសអំឡុងយុទ្ធនាការឃោសនាបោះឆ្នោត ប្រជែងតំណែងប្រធានាធិបតីក្នុងឆ្នាំ២០១៦ ហើយក៏មានការជំទាស់ ពីប្រទេសហត្ថលេខីមួយចំនួននៃកិច្ចព្រមព្រៀងនេះផងដែរ។

អតីតប្រធានាធិបតីអាមេរិក លោកដូណាល់ ត្រាំ បានរិះគន់កិច្ចព្រមព្រៀងនេះជាយូរមកហើយ ដោយអះអាងថា វានឹងជំរុញឱ្យការងារផលិតកម្ម នៅក្រៅប្រទេសកើនឡើង បង្កើនឱនភាពពាណិជ្ជកម្មរបស់សហរដ្ឋអាមេរិក និងមិនអាចដោះស្រាយបាននូវបញ្ហាក្រឡុកតម្លៃរូបិយប័ណ្ណ ពីសំណាក់ដៃគូពាណិជ្ជកម្មនានា របស់សហរដ្ឋអាមេរិក៕ cfr.org៕

ប្រទេសចិនចេញសេចក្តីណែនាំសម្រាប់ការអភិវឌ្ឍកម្មសិទ្ធិបញ្ញាលើផ្នែកអចលនទ្រព្យ

ដោយៈ សុជាតា

ប្រទេសចិនៈ ប្រទេសចិនបានចេញផ្សាយនៅថ្ងៃពុធនេះ នូវផែនការរយៈពេល១៥ ឆ្នាំ ទៅលើការអភិវឌ្ឍកម្មសិទ្ធិបញ្ញាខាងផ្នែកអចលនទ្រព្យ (intellectual property right ) នេះបើយោងតាមភ្នាក់ងារព័ត៌មានរដ្ឋ Xinhau របស់ប្រទេសចិន។

តាមរយៈផែនការនេះ គឺទាមទារការពារតឹងតែង ទៅលើកម្មសិទ្ធបញ្ញាដែលជាបំពេញចិត្តជាសាធារណៈ និងធ្វើអោយតម្លៃទីផ្សារកើនឡើងនៅត្រឹមឆ្នាំ ២០២៥ នេះបើតាមចេញផ្សាយដោយកម្មាធិការកណ្តាល នៃគណបក្សកុំមុយនីស្តចិន និងក្រុមប្រឹក្សារដ្ឋ​។

តាមសេចក្តីណែនាំបានលើកឡើងថា គិតត្រឹមឆ្នាំ២០៣៥ ភាពប្រកួតប្រជែងទៅលើកម្មសិទ្ធិបញ្ញា ខាងផ្នែកអចលទ្រព្យរបស់ប្រទេសចិន នឹងកើនឡើងដល់កំពូលនៅជុំវិញពិភពលោក។

ផែនទីសេចក្តីណែនាំ នឹងបង្ហាញពីចំនួនកិច្ចការដ៏សំខាន់មូយចំនួន ក្នុងការកសាងប្រព័ន្ធការពារកម្មសិទ្ធិបញ្ញា ក្នុងការគាំទ្រអាជីវកម្មថ្នាក់ពិភពលោក ព្រមទាំងយន្តការប្រតិបត្តិការទីផ្សារអចលនទ្រព្យ ដែលលើកទឹកចិត្តខាងផ្នែកនវានុវត្តន៍ ប្រព័ន្ធសេវាកម្មសាធារណៈខាងផ្នែកអចលនទ្រព្យ ដែលមានសារៈសំខាន់ ទៅដល់សាធារណៈជនក្នុងការចូលរួមនៅក្នុងអភិបាលកិច្ចពិភពលោកផងដែរ៕