ផ្សារបោះដុំ MAKRO គ្រោងបង្ហាញវត្តមាននៅតំបន់ពហុកីឡដ្ឋានមរតកតេជោនាពេលខាងមុខ

ដោយៈ ម៉ាលីនណា
ភ្នំពេញៈ ប្រភពព៌តមានច្បាស់ការណ៍បានឲ្យដឹងថា ក្រុមហ៊ុនបោះដុំមុខទំនិញដ៏ធំMAKRO គ្រោងបង្ហាញវត្តមាននៅតំបន់អភិវឌ្ឍន៍៍ នៃទីក្រុងតេជោមរកត(តំបន់ពហុកីឡដ្ឋានតេជោ)នាពេលខាងមុខនេះ។

បុគ្គលិកជាន់ខ្ពស់នៃផ្សារទំនើបMAKRO បានមានប្រសាសន៍ឲ្យដឹងក្នុងលក្ខខ័ណ្ឌមិនបញ្ចេញឈ្មោះថា ក្រុមហ៊ុនបាននិងកំពុងរៀបចំ និងសិក្សាលើផែនការដែលគ្រោង បើកដំណើរការផ្សារនេះ នៅតំបន់អភិវឌ្ឍទីក្រុងរណប តេជោមរកតរបស់អ្នកឧកញ៉ាលី យ៉ុងផាត់នាពេលខាងមុខនេះ។

លោកបន្តថា នេះជាការពង្រីកទីផ្សារទី២នៅទីក្រុងភ្នំពេញ ដែលតំបន់នេះកំពុងមានការអភិវឌ្ឍលឿន និងកំពុងទាក់ទាញគំរោងអភិវឌ្ឍន៍លំនៅដ្ឋាន ប្រណីតៗជាច្រើន ដែលបាននិងកំពុងទាក់ទាញប្រជាជន ដែលមានជីវភាពធូរធារ ចូលទៅរស់នៅតំបន់នេះកាន់តែច្រើននាពេលអនាគត។

បច្ចុប្បន្ននៅកម្ពុជា ក្រុមហ៊ុនMAKROបានបើកផ្សារបោះដុំទំនិញ និងលក់រាយនូវផលិតផលប្រើប្រាស់ និងអាហារ២សាខាហើយ ដោយមួយមានទីតាំងនៅជិតផ្សារទំនើបAEON Mall2 និងសាខាមួយទៀតស្ថិតនៅក្នុងក្រុងសៀមរាប។ ផ្សារទំនើបដ៏ល្បីនេះត្រូវបានវិនិយោគរូមគ្នាដោយអ្នកឧកញ៉ាលី យ៉ុងផាត់ និងមហាសេដ្ឋីជំនួញរបស់ប្រទេសថៃ។

តំបន់អភិវឌ្ឍទីក្រុងតេជោមរកត បាននិងកំពុងក្លាយជារមណីយដ្ឋានដ៏ប្រណីតមួយនៅរាជធានីភ្នំពេញ ដោយបច្ចុប្បន្ននេះរៀងរាល់ពេលរសៀល ពិសេសថ្ងៃចុងសប្តាហ៍ប្រជាជនរស់នៅជុំវិញតំបន់នេះ និងមកពីតាមបណ្តាខេត្តបានមកទស្សនា កំសាន្តនៅទីលានវិមានឈ្នះ ឈ្នះ នៅសួនទឹកដ័ធំ និងកំសាន្តនៅសួនសតហវាសាហ្វារីវើលដ៏ និងពហុកីឡដ្ឋានមរតកតេជោ ដែលបានបញ្ចប់ការសាងសង់កាលពីពេលថ្មីៗនេះ ពិសេសមានការអញ្ជើញមកប្រគល់ ដោយផ្ទាល់ពីថ្នាក់ដឹកនាំជាន់ខ្ពស់ចិន គឺលោកវ៉ាង យីទីប្រឹក្សារដ្ឋនិងជារដ្ឋមន្រ្តីការបរទេសចិន ជូនសម្តេចតេជោហ៊ុន សែននាយករដ្ឋមន្រ្តីនៃកម្ពុជាកាលពីថ្ងៃទី១២កញ្ញាកន្លងមកនេះ។

ទោះជាយ៉ាងណាមន្រ្តី ផ្នែកច្បាប់របស់ក្រុមហ៊ុននេះបានបញ្ជាក់ថា ក្រុមហ៊ុនបានសិក្សាលើទីតាំងខាងលើ និងតំបន់ផ្លូវ៦០ម៉ែត្រ ប៉ុន្តែរហូតមកទល់ពេលនេះ ក្រុមហ៊ុនមិនទាន់សម្រេចជ្រើសរើសទីតាំងណានៅឡើយទេ៕

ក្រុមហ៊ុន Sky Angkor Airline គ្រោងវិនិយោគលើសេវាកម្មជិះទូកប្រពៃណីនៅកសិន្ទប្រាសាទអង្គរ

ដោយៈស៊ីវ ម៉េង

ភ្នំពេញៈ ក្រុមហ៊ុនអាកាសចរណ៍ក្នុងស្រុកមួយ គឺ Sky Angkor Airline បានដាក់សំណើរទៅរដ្ឋាភិបាល ដើម្បីរៀបចំសេវាកម្មជិះទូកកំសាន្តនៅកសន្ទប្រាសាទអង្គរ ជាផលិតផលថ្មីមួយសម្រាប់វិស័យទេសចរណ៍។

គម្រោងវិនិយោគបង្កើតផលិតផលទេសចរណ៍ថ្មីៗ នៅសៀមរាប-អង្គរនេះ ត្រូវបានលើកឡើង ដោយក្រុមហ៊ុនអាកាសចរណ៍ Sky Angkor Airline ក្នុងជំនួបជាមួយរដ្ឋមន្ត្រីក្រសួងទេសចរណ៍ លោក ថោង ខុនកាលពីថ្ងៃទី២១ កញ្ញាកន្លងមកនេះ។

លោកថោង ខុន បានបង្ហាញការគាំទ្រយ៉ាងពេញទំហឹង ប៉ុន្តែលោកក៏បានស្នើឱ្យមានការពិភាក្សាលម្អិតលើបញ្ហាអភិវឌ្ឍន៍ និងអភិរក្ស ពីព្រោះតំបន់រមណីយដ្ឋានអង្គរ គឺជាតំបន់បេតិកភណ្ឌពិភពលោក ដែលស្ថិតក្រោមការគ្រប់គ្រងរបស់អាជ្ញាធរជាតិអប្សរា ក៏ដូចជាអង្គការយូណេស្កូផងដែរ។

គម្រោងវិនិយោគថ្មីនេះ ត្រូវបានលើកឡើងក្នុងកិច្ចពិភាក្សារវាងលោករដ្ឋមន្ត្រី ថោង ខុន ជាមួយតំណាងក្រុមហ៊ុនអាកាសចរណ៍ Sky Angkor Airline ដែលដឹកនាំដោយលោក គូ ថេអូ (Koo Taeoh) អ្នកគ្រប់គ្រងទូទៅរបស់ក្រុមហ៊ុន។

លោកគូ ថេអូអ្នកគ្រប់គ្រងក្រុមហ៊ុនអាកាសចរណ៍ Sky Angkor Airline បានមាន​ប្រសាសន៍ឲ្យដឹងថា ក្រុមហ៊ុនអាកាសចរណ៍ Sky Angkor Airline កំពុងពិចារណាគម្រោងជិះទូកប្រពៃណី នៅកសិន្ធុប្រាសាទអង្គរវត្ត នៃរមណីដ្ឋានអង្គរ។ ដូច្នេះហើយទើបក្រុមហ៊ុន ស្នើសុំការគាំទ្រពីក្រសួងទេសចរណ៍ ក៏ដូចជារាជរដ្ឋាភិបាលកម្ពុជា ដើម្បីឱ្យគម្រោងនេះអាចដំណើរការទៅបាន។

លោកបន្តថា “ប្រសិនបើគម្រោងនេះអាចដំណើរការទៅបាន នឹងក្លាយជាផលិត​ផលទេសចរណ៍ថ្មី រួមចំណែកក្នុងទាក់ទាញទេសចរកូរ៉េ ក៏ដូចជាទេសចរចិនមកកម្សាន្តនៅកម្ពុជាបន្ថែមទៀត ដែលអាចជួយដល់គោលនយោបាយ របស់រាជរដ្ឋាភិបាលក្នុងការបើកទេសចរណ៍ឡើងវិញ”។

លោករដ្ឋមន្ត្រី ថោង ខុន បានថ្លែងអំណរគុណតំណាង ក្រុមហ៊ុនអាកាសចរណ៍ Sky Angkor Airline ដែលបានគិតគូរដល់ការដាក់ចេញ នូវផលិតផលទេសចរណ៍ថ្មី សម្រាប់លើកស្ទួយវិស័យទេសចរណ៍នៅខេត្តសៀមរាប។

លោករដ្ឋមន្ត្រីបានបញ្ជាក់ថា “គម្រោងអភិវឌ្ឍន៍ទេសចរណ៍ នៅក្នុងតំបន់រមណី ដ្ឋានអង្គរ គឺស្ថិតនៅក្រោមសមត្ថកិច្ចរបស់អាជ្ញាធរជាតិអប្សរា តែយ៉ាងណាក្រសួងទេសចរណ៍ នឹងសហការសម្របសម្រួល ជាមួយក្រុមហ៊ុនបន្ថែមលើសំណើនេះ”។

លោកបន្តថា រាជរដ្ឋាភិបាលកម្ពុជាបានដាក់ចេញនូវ “ផែនទីចង្អុលផ្លូវស្តីពីការស្តារនិងលើកស្ទួយវិស័យទេសចរណ៍កម្ពុជា ក្នុងនិងក្រោយវិបត្តិកូវីដ-១៩” និងផែនការមេអភិវឌ្ឍន៍វិស័យទេសចរណ៍ខេត្តសៀមរាប” ខណៈពេលបច្ចុប្បន្ន ក្រសួងទេសចរណ៍ក៏កំពុងរៀបចំឯកសារផែនការយុទ្ធសាស្ត្រស្តីពី ការបើកទទួលទេសចរណ៍សុវត្ថិភាព ក្នុងដំណាក់កាលកូវីដ-១៩ ផងដែរ៕

ការសិក្សាៈវិស័យអចនលទ្រព្យផ្នែកពាណិជ្ជកម្មនៅតំបន់អាស៊ីប៉ាស៊ីហ្វិចនៅតែបន្ត មានស្ថេរភាព និងរឹងមាំ

ដោយៈសុជាតា

សឹង្ហបុរីៈ បើយោងតាមរបាយការណ៍សិក្សាថ្មីមួយ របស់ក្រុមហ៊ុនអន្តរជាតិCBRE បានបង្ហាញថា តំរូវការអាគារការិយាល័យទំនើបនៅតំបន់អាស៊ី ប៉ាស៊ីហ្ចិចបន្តធ្លាក់ចុះ ស្របពេលដែលអាគារការិយាល័យបែបប្រពៃណីបានកើនឡើង។

យោងតាមការសិក្សាដដែល ដែលបានធ្វើចំពោះអ្នកមានវិជ្ជាជីវៈប្រមាណ១៥៨ នាក់ នៅតាមបណ្តាប្រទេសអាស៊ីប៉ាស៊ីហ្វិកបានលើកឡើងថា ទីផ្សារអចលនទ្រព្យនៅតែស្ថេរភាព និងត្រូវបានពង្រឹង ពោលគីកើនឡើង ក្នុងចំណោមបណ្តាប្រទេសធំៗដូចជា ប្រទេសចិន និង ប្រទេសឥណ្ឌាផងដែរ។

បើយោងតាមរបាយការណ៍ដដែលបានលើកឡើងថា បើទោះបីជាចរន្តទិញលក់ពីសំណាក់អតិថិជន មិនមានការផ្លាស់ប្តូរ ប៉ុន្តែការចុះមើលទីតាំង (site Viisite )ជាក់ស្តែងបានធ្លាក់ចុះ ដោយសារតែការត្រួតពិនិត្យជំងឺ កូវិដ ១៩ តឹងតែងនៅតាមប្រទេសអូស្រា្តលី អាស៊ីអាគ្នេយ៍ និងប្រទេសជប៉ុន។

ក្នុងការសិក្សានេះ អ្នកឆ្លើយតបសរុបប្រមាណ៣៨ភាគរយ បានចង្អុលបង្ហាញថា ពួកគេត្រូវការទីកន្លែងអាគារជួលបន្ថែមទៀត នេះបើធៀនឹងខែសីហាកន្លងទៅនេះ។ចំនែក៥២ភាគរយ នៃអ្នកឆ្លើយតបបានផ្លាស់ប្តូរទីតាំងជួល និងសាងសង់ថ្មីឡើងវិញ។ចំណែ​ក​នៅសល់១០ភាគរយ គឺស្វែងរកអាគារដែលមានទំហំតូច និងតម្លៃទាបជាងមុន។

បើតាមរបាយការណ៍ដដែលនេះ បានបង្ហាញអោយដឹងថា ចំពោះការជួលអាគារការិយាល័យ បានប្រសើរឡើងវិញនៅខែកញ្ញានេះ ដោយសារតែតំរូវការកើនឡើងនៅចំណោមបណ្តា ដែលមានសេដ្ឋកិច្ចលូតលាស់លឿន ដូចជា ប្រទេសចិន ឥណ្ឌា និង តំបន់អាស៊ីអាគ្នេយ៍ជាពិសេស ប្រទេសសិង្ហបុរី៕

សម្តេចតេជោៈកម្ពុជាមានលទ្ឋភាពអាចបានបំពេញលក្ខខ័ណ្ឌUNក្នុងឋានៈជា ប្រទេសអភិវឌ្ឍន៍តិចតួច

        ដោយៈគង់ សូរិយា

        ភ្នំពេញៈ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជាបានថ្លែងថា តាមការវាយចុងក្រោយរបស់អង្គការសហប្រជាជាតិ (UN) ដែលធ្វើឡើងនៅរៀងរាល់៣ឆ្នាំម្តងបង្ហាញថា ជាលើកដំបូងក្នុងប្រវត្តិសាស្រ្តរបស់កម្ពុជា កម្ពុជាមានលទ្ធភាពអាចបំពេញតាមលក្ខខណ្ឌ ដែលអាចចាត់ទុកថារួចផុតពីឋានៈ ជាក្រុមប្រទេសមានការអភិវឌ្ឍតិចតួច។

ការលើកឡើងរបស់សម្តេចតេជាយ៉ាងដូច្នេះ តាមរយៈសារលិខិតអបអរសាទរ ក្នុងឱកាសនៃទិវាសន្តិភាពអន្តរជាតិ ថ្ងៃទី២១ ខែកញ្ញា ឆ្នាំ២០២១។

សម្តេចតេជោហ៊ុន សែនបានបន្តថា អស់រយៈពេលជាងពីរទស្សវត្សរ៍កន្លងមកនេះ កំណើនសេដ្ឋកិច្ចកម្ពុជា បានកើនឡើងជាមធ្យមប្រមាណ៧ភាគរយ ជារៀងរាល់ឆ្នាំ ហើយសន្ទុះនៃការរីកចម្រើននេះ បានត្រួសត្រាយផ្លូវសម្រាប់កម្ពុជា ទទួលបានឋានៈជាប្រទេសមានចំណូលមធ្យមកម្រិតទាប ក្នុងឆ្នាំ២០១៥ ហើយអាចនឹងឈានទៅសម្រេចបានឋានៈ ជាប្រទេសមានចំណូលមធ្យមកម្រិតខ្ពស់ ត្រឹមឆ្នាំ២០៣០ និងប្រទេសមានចំណូលកម្រិតខ្ពស់នៅឆ្នាំ២០៥០។

សម្តេចតេជោបញ្ជាក់ថា “តាមការវាយតម្លៃចុះក្រោយ របស់អង្គការសហប្រជាជាតិ ដែលធ្វើឡើងនៅរៀងរាល់៣ឆ្នាំម្តង ទិន្នន័យក្នុងឆ្នាំ២០២១ បង្ហាញថា ជាលើកដំបូងក្នុងប្រវត្តិសាស្ត្ររបស់កម្ពុជា កម្ពុជាមានលទ្ធភាពអាចបំពេញតាមលក្ខខណ្ឌ ដែលអាចចាក់ទុកថា រួចផុតពីឋានៈជាក្រុមប្រទេសមានការអភិវឌ្ឍតិចតួច”។

សម្តេចតេជោបន្តថា ជាការកត់សម្គាល់ បើទោះជាកម្ពុជា កំពុងទទួលរងផលប៉ះពាល់ដោយសារវិបត្តិជំងឺកូវីដ១៩ យ៉ាងណាក៏ដោយ ក៏អាត្រាកំណើនសេដ្ឋកិច្ចកម្ពុជា សម្រាប់ ឆ្នាំ២០២១ រំពឹងថានឹងអាចងើប ឡើងមកវិញស្ថិតនៅក្នុងរង្វង់២.៥ភាគរយ បន្ទា​ប់ពីមានការធ្លាក់ចុះក្នុងកម្រិត-១,៩% ក្នុងឆ្នាំ២០២០៕

 

ព្រឹទ្ធសភាគាំទ្រច្បាប់ស្ដីពីវិនិយោគរបស់រាជរដ្ឋាភិបាលដើម្បីបង្កើនរំហូរ វិនិយោគកាន់តែច្រើន

        ដោយៈវឌ្ឍនៈ

ភ្នំពេញៈ ដើម្បីបង្កើនរំហូរវិនិយោគ នៅក្នុងប្រទេសកម្ពុជាទាំងវិនិយោគិនជាតិ និងអន្តរជាតិ ព្រឹទ្ធសភាជាតិកម្ពុជាបានប្រកាសគាំទ្រច្បាប់ស្ដីពីវិនិយោគ ដែលបានស្នើឡើងដោយរាជរដ្ឋាភិបាល ។ នេះបើតាមសេចក្តីប្រកាសព័ត៌មានរបស់ព្រឹទ្ធសភាកម្ពុជានៅថ្ងៃទី២១កញ្ញា២០២១នេះ ។

លោកម៉ម ប៊ុននាង សមាជិក និងជាអ្នកនាំពាក្យព្រឹទ្ធសភា មានប្រសាសន៍ថា អង្គប្រជុំព្រឹទ្ធសភាកាលពីថ្ងៃទី២១ កញ្ញា បានពិនិត្យ និងឱ្យយោបល់លើសេចក្តីព្រាងច្បាប់ស្ដីពីវិនិយោគនៃព្រះរាជាណាចក្រកម្ពុជា ដោយឥតកែប្រែចំនួន៣៨សំឡេងនៃចំនួនសមា​ជិក ព្រឹទ្ធសភាទាំងមូល។

លោកបន្តថា “សេចក្ដីព្រាងច្បាប់នេះ ពិតជាមានសារសំខាន់ណាស់ សម្រាប់ប្រ​ទេសកម្ពុជា ដើម្បីបង្កើនការវិនិយោគនៅក្នុងស្រុក និងក្រៅប្រទេសបានកាន់តែច្រើនបន្ថែមទៀត”។

ជាមួយគ្នានេះ លោក ជិន ប៊ុនស៊ាន ទេសរដ្ឋមន្ត្រីទទួលបន្ទុកបេស កកម្មពិសេស អនុប្រធានក្រុម ប្រឹក្សាអភិវឌ្ឍន៍កម្ពុជាបានលើកឡើងថា សេចក្តីព្រាង ច្បាប់នេះតាក់តែងឡើងក្នុងគោលបំណងបង្កើតនូវក្រប ខ័ណ្ឌគតិយុត្តដែលបើកចំហ មានតម្លាភាព អាចប៉ាន់ប្រមា ណទុកជាមុនបានប្រកប ដោយភាពអំណោយផលសម្រាប់ការវិនិយោគ ដើម្បីទាក់ទាញ និងលើកកម្ពស់ការវិនិយោគដោយបុគ្គលសញ្ជាតិខ្មែរ ឬបរទេសប្រកបដោយ គុណភាព ប្រសិទ្ធភាព និងប្រសិទ្ធផល សំដៅអភិវឌ្ឍសង្គមសេដ្ឋកិច្ចនៅក្នុងព្រះរាជាណាចក្រកម្ពុជា តាមរយៈការបង្កើតរបបលើក ទឹកចិត្តវិនិយោគមួយដែលមានតម្លាភាព ភាពអាចប៉ាន់ ប្រមាណទុកជាមុនបាន គ្មានការរើសអើង មានលក្ខណៈប្រកួតប្រជែង និងគាំទ្រគោល នយោបាយសង្គម សេដ្ឋកិច្ច។

លោកបន្តថា ការងារជាអាទិភាពចម្បងៗនៅក្នុងច្បាប់នោះ រួមមានដូចជា ទី១ ការធ្វើទំនើបកម្ម ការបង្កើនផលិតភាព នៃឧស្សាហកម្មក្នុងស្រុក ការពង្រឹងការតភ្ជាប់ទៅក្នុងខ្សែសង្វាក់ផ្គត់ផ្គង់ក្នុងតំបន់ និងសកលលោក តាមរយៈការជំរុញកំណើនរំហូរចូលមូលធន ការផ្ទេរបច្ចេកវិទ្យា ចំណេះដឹង និងចំណេះធ្វើ។

ទី២ ការបង្កើនភាពប្រកួតប្រជែងរបស់កម្ពុជា ដើម្បីធ្វើឱ្យរចនា សម្ព័ន្ធសេដ្ឋកិច្ច អាចធ្វើពិពិធកម្មបាន និងធន់ទៅនឹងវិបត្តិក្នុងតំបន់និងសកលលោក។ ការផ្តល់ការការពារនូវសិទ្ធិ និង ផលប្រយោជន៍ស្របច្បាប់ ដល់វិនិយោគិននៅព្រះរាជាណាចក្រកម្ពុជា តាមរយៈការបង្កើតនូវក្របខ័ណ្ឌគតិយុត្ត ដែលមានលក្ខណៈគ្រប់ជ្រុងជ្រោយ និងមានតុល្យ​ភាពស្របទៅនឹងផលប្រយោជន៍ជាតិ ។

សេចក្តីព្រាងច្បាប់នេះ តាក់តែងឡើងមាន១២ជំពូក និង៤២មាត្រា ត្រូវបានរដ្ឋសភានៃព្រះរាជា- ណាចក្រកម្ពុជាអនុម័តយល់ ព្រមជាលើកដំបូងចំនួន៩២សំឡេងនៃចំនួនសមាជិករដ្ឋសភាទាំងមូល កាលពីថ្ងៃទី៩ ខែកញ្ញា ឆ្នាំ២០២១ នាសម័យប្រជុំរដ្ឋសភាលើកទី៦ នីតិកាលទី៦៕

ក្រសួងសាធារណៈការគ្រោងសិក្សាដើម្បីសាងសង់ផ្លូវដែកទៅកាន់កំពង់ផែ ស្វយ័ត្នភ្នំពេញ

ដោយៈគង់ សូរិយា

        ភ្នំពេញៈ ក្រសួងសាធារណការ និងដឹកជញ្ជូន បានបង្ហាញគម្រោងសិក្សាផ្លូវរថភ្លើង តភ្ជាប់ទៅកាន់កំពង់ផែស្វយ័តភ្នំពេញ ស្ថិតនៅស្រុកកៀនស្វាយ ខេត្តកណ្តាល ដើម្បីផ្តល់ភាពងាយស្រួលក្នុងការដឹកជញ្ជូនទំនិញ និងជំរុញកំណើនសេដ្ឋកិច្ច។​

គម្រោងវិនិយោគនេះ ត្រូវបានលើកឡើង នៅគ្រាដែលចំនួនកុងតឺន័រឆ្លងកាត់កំពង់ផែស្វយ័តភ្នំពេញកើនឡើង។

លោកទេសរដ្ឋមន្ត្រី ស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានមានប្រសាសន៍ក្នុងពិធីសម្ភោធដាក់ឲម្យប្រើប្រាស់ចំណតផែកុងទីណ័រLM17កាលពីថ្ងៃទី២០ កញ្ញាកន្លងមក ដោយបានណែនាំ ឱ្យមន្រ្តីជំនាញពាក់ព័ន្ធ សិក្សាផ្លូវដែកតភ្ជាប់មកកំពង់ផែស្វយ័តភ្នំពេញ។

លោកបន្តថា “ត្រូវតែពិចារណាសិក្សាមើល ការតភ្ជាប់ពីផ្លូវដែករបស់យើងនេះ ដែលមានស្រាប់ មកកំពង់ផែបានឬមិនបាន ឬតភ្ជាប់ទៅតំបន់សេដ្ឋកិច្ចពិសេស ដែលកំពង់ផែស្វយ័ត មានទីតាំងរបស់ខ្លួន”។

​លោកស៊ុន ចាន់ថុល បានស្នើមន្រ្តីពិនិត្យលើកការជួសជុលផ្លូវដែក តភ្ជាប់ទៅគីឡូលេខ៦ ក្នុងខណ្ឌឬស្សីកែវឡើងវិញផងដែរ ដែលជាចំណតផែរណប ដើម្បីបម្រើសេវាកម្មដឹកជញ្ជូនសាធារណៈ  កាត់បន្ថយភាពកកស្ទះចរាចរណ៍៕

 

ព្រះលានយន្តហោះតារាសាគរត្រៀមបើកដំណើរការសាកល្បងនៅថ្ងៃទី៣០ ធ្នូ ឆ្នាំ២០២១ខាងមុខ

ដោយៈសុជាតា

ភ្នំពេញៈ មន្រ្តីជាន់ខ្ពស់អាកាសចរស៊ីវិល បានលើកឡើងថា តំណាងក្រុមហ៊ុនសាងសង់អាកាសយានដ្ឋានអន្តរជាតិ តារាសាគរនៅខេត្តកោះកុង ត្រៀមនឹងបញ្ចប់ការងារសាងសង់ក្នុងខែតុលាខាងមុខនេះ និងការត្រៀមបើកដំណើរការសាកល្បងនៅថ្ងៃទី៣០ ខែធ្នូ ឆ្នាំ២០២១ ខាងមុខ។

នៅក្នុងជំនួបរវាងលោកម៉ៅ ហាវណ្ណាល់រដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិល និងតំណាងក្រុមហ៊ុនសាងស ង់ព្រះលានយន្តហោះអន្តរជាតិ នៅព្រឺកថ្ងៃទី ២១ ខែកញ្ញា ឆ្នាំ ២០២១ នេះ តំណាងក្រុមហ៊ុនដ៏ធំរបស់ប្រទេសចិន បានលើកឡើងពីការងារដែលនៅសេសសល់ និងបញ្ហាប្រឈមមុខនានាផងដែរ។

រដ្ឋមន្ត្រីប្រតិភូអមនាយករដ្ឋមន្រ្តី លោកម៉ៅ ហាវណ្ណាល់ បានឯកភាពក្នុងការត្រៀមបញ្ចប់ការសាងសង់ និងការដាក់ឱ្យដំណើរការសាកល្បងស្រប តាមលក្ខណៈបច្ចេកទេស ចំពោះការសម្ភោធដាក់ឱ្យប្រើប្រាស់ជាផ្លូវការ នឹងត្រូវធ្វើនៅពេលក្រោយតាមពេលវេលាសមស្របណាមួយ។

តាមផែនការគម្រោងព្រលានយន្តហោះនេះ ត្រូវចំណាយទឹកប្រាក់ប្រមាណ២០០ លានដុល្លារ ដោយគម្រោងទាំងមូល រួមមាន ការស្ថាបនាផ្លូវសម្រាប់យន្តហោះរត់ ដែលមានប្រវែងបណ្តោយ៣២០០ម៉ែត្រ និង ទទឹង៦០ម៉ែត្រ និងស្ថានីយអ្នកដំណើរ។ក្រោយសាងសង់រួច អាកាសយានដ្ឋានអន្តរជាតិនេះ នឹងអនុញ្ញាតអោយយន្តហោះធុនយក្ស ប្រភេទប៊ូអីង៧៧៧ និង Airbus  A340  បានចុះចតបាន។

អាកាសយានដ្ឋានអន្តរជាតិតារាសាគរនេះ អភិវឌ្ឍន៍ដោយក្រុមហ៊ុនចិនដែលមានឈ្មោះថា Tianjin Union Development Group  គឺជាផ្នែកមួយនៃគម្រោងតំបន់វិស្សមកាលតារសាគរតម្លៃរាប់ពាន់លានដុល្លារ៕

ធនាគារពិភពលោកបោះទុន៥៤លានដុល្លារវិនិយោគលើគំរោងនិរន្តរភាពតំបន់ ទេសភាព និងទេសចរណ៍ធម្មជាតិកម្ពុជា

        ដោយៈ ឧត្តម

        ភ្នំពេញៈ ធនាគារពិភពលោក បានបោះទុនវិនិយោគ៥៤លានដុល្លារអាមេរិក លើគំរោងននិរន្តរភាពតំបន់ទេសភាព និងទេសចរណ៍ធម្មជាតិ(CSLEP) នៅខេត្តរាជធានី ខេត្តចំនួន៧ ដោយផ្តោតលើតំបន់អេកូទេសចរណ៍ចំ​នួន១៦កន្លែង។

គម្រោង CSLEP ដែលមានទំហំចំណាយ៥៤លានដុល្លារអាមេរិក តំណាងឱ្យការវិនិយោគវិស័យទេសចរណ៍ ធំបំផុតរបស់ធនាគារពិភពលោក (World Bank) នៅកម្ពុជា​។ គម្រោងផ្តួចផ្តើមដែលមានរយៈពេល៥ឆ្នាំនេះ នឹងគ្របដណ្ដប់លើខេត្តចំនួន៧ ដោយរួមបញ្ចូលទាំងជួរភ្នំក្រវាញ ដែលមានព្រៃនាំទឹកភ្លៀង គ្មានអ្នកប៉ះពាល់ធំបំផុតប្រចាំអាស៊ីអាគ្នេយ៍ ព្រៃលិចទឹកនៅបឹងទន្លេសាប និងភ្នំគូលែន ស្ថិតក្នុងខេត្តសៀមរាបផងដែរ។

រហូតមកដល់ពេលនេះ គម្រោងCSLEP បានកំណត់ទីតាំងអេកូទេសចរណ៍ចំនួន១៦កន្លែង ដែលនឹងទាក់ទាញភ្ញៀវទេសចរជាតិ និងអន្តរជាតិ។ ថវិកានៃគម្រោងនេះនឹងត្រូវចំណាយទៅលើការកែលម្អផ្លូវ ចូលទៅកាន់តំបន់ដាច់ស្រយាលទាំងនេះ ដោយអភិ​វ ឌ្ឍផ្លូវឡើងភ្នំ ផ្លូវជិះកង់ និងមជ្ឈមណ្ឌលទេសចរណ៍ ហើយបណ្តុះបណ្តាលពលរដ្ឋក្នុងមូលដ្ឋានផ្នែកបដិសណ្ឋារកិច្ច ការគ្រប់គ្រងសំរាម និងការយល់ដឹងអំពីសំរាម។

នៅទីបំផុត ផ្ទះសំណាក់បែបធម្មជាតិ នឹងត្រូវសាងសង់ឡើង ប៉ុន្តែជាដំបូងនឹងលេចចេញជំរំបោះតង់សិន។

គម្រោងសាកល្បងចំនួន៣ នឹងចាប់ផ្តើមអនុវត្តកម្មវិធី CSLEP ដូចជាតំបន់ទេសច​រណ៍ទឹកធ្លាក់ជ្រាវ ក្នុងខេត្តកំពង់ស្ពឺ តំបន់ទេសចរណ៍ច្រកល្អៀង ក្នុងខេត្តពោធិ៍សាត់ និងភូមិអន្លង់ធំ ស្ថិតក្នុងឧទ្យានជាតិភ្នំគូលែន កន្លែងដែលកម្មវិធីភ្នំគូលែន ដែលទទួលបានជំនួយពីអង្គការ NGO Archaeology and Development Foundation បានដំណើរការតាំងពីឆ្នាំ២០០៨។

លោក JB Chevance នាយកអង្គការ NGO Archaeology and Development Foundation មានប្រសាសន៍ថា “យើងលាយបញ្ចូលគ្នានូវការអភិរក្ស ការអភិវឌ្ឍ និងការស្រាវជ្រាវបុរាណវិទ្យា។ ហើយមានសហគមន៍ក្រីក្រខ្លាំងរស់នៅទីនេះ”។

ជាមួយគ្នានេះ លោក Bill Barnett នាយកគ្រប់គ្រងក្រុមហ៊ុនផ្ដល់ប្រឹក្សាយោបល់ ផ្នែកបដិសណ្ឋារកិច្ចអន្តរជាតិ C9 Hotelworks មានប្រសាសន៍ថា វាពិតជាចាំបាច់ណាស់ ដែលសហគមន៍នានា ត្រូវបានដាក់បញ្ចូលជាចំណុចស្នូលនៃកម្មវិធីផ្ដួចផ្ដើមបែបនេះ។

លោកបានពន្យល់ថា “ត្រូវឱ្យសហគមន៍នានាចូលរួម ហើយធ្វើការជាមួយពួកគេ។ ការធ្វើដូច្នេះនឹងជួយបញ្ចៀសការទន្ទ្រានចូល ការបរបាញ់សត្វ និងការកាប់ឈើខុសច្បាប់។ នៅចុងបញ្ចប់ ប្រទេសកម្ពុជា នឹងមិនចាំបាច់ពឹងផ្អែកលើក្រុងសីហនុ ឬមជ្ឈមណ្ឌទេសចរណ៍ដែលផ្ដោតលើល្បែងស៊ីសង ដែលសម្រាប់តែជនបរទេសទៀតឡើយ”។នេះបើតាមSouth China Morning Post។

លោក Nick Ray អ្នកប្រឹក្សាយោបល់ផ្នែកវិស័យទេសចរណ៍សម្រាប់គម្រោង “និរន្តរភាពតំបន់ទេសភាព និងទេសចរណ៍ធម្មជាតិកម្ពុជា” (Cambodia Sustainable Landscape and Ecotourism Project) ហៅកាត់ CSLEP មានប្រសាសន៍ថា “អេកូទេសចរណ៍ កំពុងបោះជំហានឆ្ពោះទៅមុខទូទាំងពិភពលោក ហើយវាពិតជាមានសារៈសំខាន់ណាស់នៅកម្ពុជា”។

អ្នកជំនាញរូបនេះបានបន្ថែមទៀតថា ការរីករាលដាលវីរុសកូវីដ-១៩ បានផ្លាស់ប្តូរស្ថានភាពនេះកាន់តែខ្លាំង នៅពេលមនុស្សចាប់ផ្ដើមងាកទៅស្វែងរកកន្លែងវាលៗ ដែលមិនមានការបិទជិត ដើម្បីជៀសផុតពីការឆ្លងវីរុសកូវីដ-១៩ ហើយពួកគេរីករាយនឹងដំណើរកម្សាន្តដើម្បីគយគន់សម្រស់ធម្មជាតិ។

គម្រោងសាកល្បងចំនួន៣ នឹងចាប់ផ្តើមអនុវត្តកម្មវិធី CSLEP ដូចជាតំបន់ទេសច​រណ៍ទឹកធ្លាក់ជ្រាវ ក្នុងខេត្តកំពង់ស្ពឺ តំបន់ទេសចរណ៍ច្រកល្អៀង ក្នុងខេត្តពោធិ៍សាត់ និងភូមិអន្លង់ធំ ស្ថិតក្នុងឧទ្យានជាតិភ្នំគូលែន កន្លែងដែលកម្មវិធីភ្នំគូលែន ដែលទទួលបានជំនួយពីអង្គការ NGO Archaeology and Development Foundation បានដំណើរការតាំងពីឆ្នាំ២០០៨។

លោក Bill Barnett នាយកគ្រប់គ្រងក្រុមហ៊ុនផ្ដល់ប្រឹក្សាយោបល់ ផ្នែកបដិសណ្ឋារកិច្ចអន្តរជាតិ C9 Hotelworks មានប្រសាសន៍ថា វាពិតជាចាំបាច់ណាស់ ដែលសហគមន៍នានា ត្រូវបានដាក់បញ្ចូលជាចំណុចស្នូលនៃកម្មវិធីផ្ដួចផ្ដើមបែបនេះ។

លោកបានពន្យល់ថា “ត្រូវឱ្យសហគមន៍នានាចូលរួម ហើយធ្វើការជាមួយពួកគេ។ ការធ្វើដូច្នេះនឹងជួយបញ្ចៀសការទន្ទ្រានចូល ការបរបាញ់សត្វ និងការកាប់ឈើខុសច្បាប់។ នៅចុងបញ្ចប់ ប្រទេសកម្ពុជា នឹងមិនចាំបាច់ពឹងផ្អែកលើក្រុងសីហនុ ឬមជ្ឈមណ្ឌទេសចរណ៍ដែលផ្ដោតលើល្បែងស៊ីសង ដែលសម្រាប់តែជនបរទេសទៀតឡើយ”៕  South China Morning Post៕

ក្រុមហ៊ុនអាកាសចរណ៍វៀតណាមBamboo Airways ចុះកិច្ចព្រមព្រៀងទិញម៉ាស៊ីន យន្តហោះតម្លៃ២ពាន់លានដុល្លារ

ដោយៈសុខុម

ហាណូយ: ក្រុមហ៊ុនអាកាសចរណ៍វៀតណាម Bamboo Airways នឹងចុះកិច្ចព្រមព្រៀងមួយ ដែលមានតម្លៃជិត២ពាន់លានដុល្លារ ជាមួយក្រុមហ៊ុនអាមេរិក General Electric ដើម្បីទិញម៉ាស៊ីន GEnx សម្រាប់បំពាក់លើយន្តហោះ Boeing 787-9 Dreamliner។

ក្រុមហ៊ុន Bamboo Airways បានចេញសេចក្តីថ្លែងការណ៍មួយនៅថ្ងៃអង្គារ ទី២១ កញ្ញា នេះថា កិច្ចព្រមព្រៀងនេះ នឹងត្រូវចុះហត្ថលេខាក្នុងសហរដ្ឋអាមេរិក នៅថ្ងៃអង្គារ នេះក្រោមវត្តមានប្រធានាធិបតីវៀតណាម លោក ង្វៀន សួនហ៊្វុក។

ក្រុមហ៊ុននេះនិយាយថា ម៉ាស៊ីន GEnx ដែលនឹងត្រូវប្រគល់ជូននៅឆ្នាំ២០២២ គឺសម្រាប់បំពាក់លើយន្តហោះ Boeing 787-9 Dreamlinerរបស់ខ្លួន។ យន្តហោះដែលមានតួធំទូលាយទាំងនេះ គ្រោងធ្វើការហោះហើរដោយមិនឈប់សំចត តាមផ្លូវរវាងប្រទេសវៀតណាម និងសហរដ្ឋអាមេរិក។

សេចក្តីថ្លែងការណ៍ដដែលលើកឡើងថា “ការចុះកិច្ចព្រមព្រៀងថ្មីនេះ គឺជាសមិទ្ធផលដ៏ធំមួយ សម្រាប់ក្រុមហ៊ុនអាកាសចរណ៍មួយនេះ ដើម្បីពង្រីកបណ្តាញហោះហើរឆ្លងទ្វីបរបស់ខ្លួន ដោយតភ្ជាប់ប្រទេសវៀតណាម ជាមួយទីផ្សារហោះហើរចម្ងាយមធ្យម និងចម្ងាយឆ្ងាយ”។

ក្រុមហ៊ុនអាកាសចរណ៍នេះបញ្ជាក់ថា ខ្លួននឹងបើកការិយាល័យតំណាងមួយនៅសហរដ្ឋអាមេរិក ហើយនឹងចុះកិច្ចព្រមព្រៀងជាមួយ អាកាសយានដ្ឋានអន្តរជាតិក្រុងសានហ្វ្រានស៊ីស្កូ (San Francisco International Airport) និងអាកាសយានដ្ឋានអន្តរជាតិក្រុងឡូសអែនជើឡេស (Angeles International Airport) នៅសប្តាហ៍នេះ ដោយត្រួសត្រាយផ្លូវ សម្រាប់ការសាកល្បងជើងហោះហើរ មិនឈប់សំចតលើកដំបូងរវាងប្រទេសទាំងពីរនៅថ្ងៃព្រហស្បតិ៍ សប្ដាហ៍នេះ។

ក្រុមហ៊ុននេះនិយាយទៀតថា ខ្លួនមានបំណងបង្ហើយនីតិវិធី សម្រាប់ជើងហោះហើរពាណិជ្ជកម្ម ដែលមិនឈប់សំចតទៅកាន់សហរដ្ឋអាមេរិក នៅដើមឆ្នាំក្រោយ ដោយរង់ចាំតែការអនុម័តពីរដ្ឋាភិបាលបុណ្ណោះ។

ក្រុមហ៊ុននេះក៏បង្ហើបឱ្យដឹងដែរថា ខ្លួនកំពុងព្យាយាមពង្រីកបណ្តាញជើងហោះហើរអន្តរជាតិរបស់ខ្លួន ហើយនឹងបើកផ្លូវហោះហើរបន្ថែមទៀត ទៅកាន់ប្រទេសអូស្ត្រាលី អង់គ្លេស និងអាល្លឺម៉ង់ ដោយប្រើប្រាស់យន្តហោះ Boeing 787-9 Dreamliner របស់ខ្លួន៕ Reuters៕

រដ្ឋាភិបាលអនុម័តគម្រោងអភិវឌ្ឍន៍តម្លៃជាង២២លានដុល្លារអាមេរិកលើគំរោង វិនិយោគចំនូន៤

        ដោយៈវឌ្ឍនៈ

ភ្នំពេញៈ យោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជានៅថ្ងៃទី២១ កញ្ញា២០២១នេះ ឱ្យដោយដឹងថា ខ្លួនបានសម្រេចចេញវិញ្ញាបនបត្រជូនក្រុមហ៊ុនវិនិយោគចំនួន៤គម្រោងបន្ថែមទៀត នៅខេត្តព្រះសីហនុងនិងបន្ទាយមានជ័យ ។

យោងតាមសេចក្តីឱ្យដឹងថា គម្រោងទាំងនោះ៤នោះ មានទឹកប្រាក់វិនិយោគសរុបប្រមាណជាង២២លានដុល្លារអាមេរិក និងបង្កើតការងារជាង៥០០កន្លែងដល់ពលរដ្ឋក្នុងប្រទេសកម្ពុជាផងដែរ។

គម្រោងទាំងនោះនោះរួមមាន ទី១ គម្រោងបង្កើតរោងចក្រផលិតក្តាបន្ទះ ក្តាប៉ាកេ

គ្រឿងសង្ហារឹម គ្រឿងបង្គុំគ្រឿងសង្ហារឹម សម្ភារៈតុបតែងពីបន្ទះឈើ និងដុំកម្ទេចឈើរបស់ក្រុមហ៊ុន “MOUNTAIN FOREST PRODUCT CO., LTD.” ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ ២ លានដុល្លារអាមេរិក និងអាចបង្កើតការងារបានចំនួន ១៦៥កន្លែង។

ទី២ គម្រោងបង្កើតរោងចក្រផលិតទ្វា បង្អួច និងផលិតផលធ្វើអំពីអាលុយមីញ៉ូម របស់ក្រុមហ៊ុន KINGMALL INDUSTRIAL (CAMBODIA) CO., LTD.មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ៥,៥ លានដុល្លារអាមេរិក និងអាចបង្កើតការងារបានចំនួន១២០កន្លែង។

ទី៣ គម្រោងបង្កើតរោងចក្រផ្គុំ និងតម្លើងរថយន្តរបស់ក្រុមហ៊ុន HGB MOTORS ASSEMBLY CO., LTD. ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស ប៉ោយប៉ែត ភីភី ក្រុងប៉ោយប៉ែត ខេត្តបន្ទាយមានជ័យ ដែលមានទុនវិនិយោគប្រមាណ ៧ លានដុល្លារអាមេរិក និងអាចបង្កើតការងារបានចំនួន ១៦៥កន្លែង និងទី៤ គម្រោងបង្កើតរោងចក្រផលិតគ្រឿងសង្ហារឹមរបស់ក្រុមហ៊ុន CAMBODIAN BIRCHEVER FURNITURE CO., LTD.”ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជី ខេត្តព្រះសីហនុ មានទុនវិនិយោគប្រមាណ ៧,៦ លានដុល្លារអាមេរិក និងអាចបង្កើតការងារបានចំនួន ៩០កន្លែង៕