យុវនិស្សិតកម្ពុជា មួយក្រុមផលិតដ្រូនដឹកមនុស្សបានជោគជ័យ ល្បីដល់សារព័ត៌មានអន្តរជាតិ

សុខុម

ភ្នំពេញ: ផ្ដើមចេញពីគំនិតចង់ដោះស្រាយបញ្ហាកកស្ទះចរាចរណ៍នៅក្នុងរាជធានីភ្នំពេញ យុវនិស្សិតកម្ពុជា មួយក្រុមបានឌីហ្សាញយន្តហោះដ្រូន (Drone) ម៉ូតគំរូដែលដឹកមនុស្សបានដោយជោគជ័យ ល្បីដល់សារព័ត៌មានអន្តរជាតិ CNA យកទៅចុះផ្សាយពាសពេញពិភពលោកនៅថ្ងៃទី២១ កញ្ញា នេះ។

យុវជនវ័យទំពាំងស្នងឫស្សីដ៏មានសមត្ថភាពទាំងនេះសង្ឃឹមថា នៅថ្ងៃណាមួយដ្រូនដែលពួកគេផលិតនឹងអាចយកទៅប្រើប្រាស់សម្រាប់ដឹកមនុស្សទៅមកជុំវិញរាជធានីភ្នំណេញ និងសូម្បីជួយដល់បេសកកម្មពន្លត់អគ្គិភ័យថែមទៀតផង។

ដ្រូនដែលមានកង្ហារចំនួន៨ និងប្រើប្រាស់កៅអីសាលាសម្រាប់ធ្វើជាកៅអីអ្នកបើកនេះ ត្រូវបានបង្កើតឡើងដោយក្រុមនិស្សិតមកពីវិទ្យាស្ថានជាតិពហុបច្ចេកទេសកម្ពុជា (NPIC) ដែលស្ថិតនៅជាយរាជធានីភ្នំពេញ។ នេះអាចចាត់ទុកបានថាជាមោទនភាពសម្រាប់កម្ពុជា នៅលើឆាកអន្តរជាតិ ដែលកូនខ្មែរ មានសមត្ថភាពផលិតដ្រូនដឹកមនុស្សបាន។

យុវនិស្សិត លន់ វណ្ណសិទ្ធ អាយុ២១ឆ្នាំដែលជាអ្នកបញ្ជាដ្រូននេះនិយាយថា “ពេលយើងឃើញដ្រូននេះហោះដោយគ្មានអ្នកបើក វាដូចញ័រខ្លាំង ប៉ុន្តែពេលខ្ញុំឡើងអង្គុយលើវា ហើយបញ្ជាឱ្យហោះហើរ វារាងនឹងជាងមុន ហើយខ្ញុំពិតជារំភើបខ្លាំងមែនទែន”។

យុវជនរូបនេះនិយាយទៀតថា “ពួកយើងចង់ចូលរួមដោះស្រាយបញ្ហាខ្លះសម្រាប់សង្គមរបស់យើងតាមរយៈការផលិតដ្រូនសម្រាប់ដឹកមនុស្ស និងផលិតដ្រូនសម្រាប់ក្រុមពន្លត់អគ្គិភ័យ”។

យុវជនទាំងនេះសង្ឃឹមថា ដ្រូននេះនឹងអាចហោះដល់ជាន់ខាងលើនៃអគារដើម្បីនាំយកទុយោបាញ់ទឹកបន្លត់អគ្គិភ័យ ជាពិសេសនៅកន្លែងដែលរថយន្តពន្លត់អគ្គិភ័យមិនអាចចូលទៅដល់។

ដ្រូនម៉ូតគំរូនេះអាចផ្ទុកអ្នកបើកបរបានម្នាក់ដែលមានទម្ងន់៦០គីឡូក្រាម និងអាចហោះបានចម្ងាយ១គីឡូម៉ែត្រក្នុងរយៈពេល១០នាទី។ ពួកគេបានចំណាយពេល៣ឆ្នាំនៅក្នុងការសិក្សាស្រាវជ្រាវ និងអភិវឌ្ឍដ្រូននេះឡើង ហើយបានចំណាយប្រាក់អស់ប្រមាណ២០.០០០ដុល្លារអាមេរិក សម្រាប់ការផលិតវាឡើង។

នៅពេលសាកល្បង ដ្រូននេះអាចហោះបានកម្ពស់ត្រឹមតែ៤ម៉ែត្រប៉ុណ្ណោះ ប៉ុន្តែក្រុមនិស្សិតវ័យក្មេងនេះសង្ឃឹមថា នៅទីបំផុតវានឹងហោះបានខ្ពស់ឆ្ងាយជាងនេះ។

លោក សារិន សិរីវត្ថា ប្រធានមជ្ឈមណ្ឌលស្រាវជ្រាវ និងអភិវឌ្ឍន៍បច្ចេកវិទ្យានៃវិទ្យាស្ថានជាតិពហុបច្ចេកទេសកម្ពុជា មានប្រសាសន៍ថា គម្រោងនេះត្រូវបានពន្យារពេលដោយសារការបិទខ្ទប់អំឡុងការរីករាលដាលវីរុសកូវីដ-១៩ ហើយក៏ដោយសារតែគ្រឿងបង្គុំមួយចំនួនដូចជាកង្ហារ និងគ្រោងឆ្អឹងដ្រូនជាដើមត្រូវបញ្ជាទិញពីបរទេសផងដែរ។

ក្រុមនេះមានគម្រោងកែលម្អការរចនាដ្រូននេះដើម្បីឱ្យវាអាចទ្រទម្ងន់បានបន្ថែមទៀត ព្រមទាំងហោះហើរបានកាន់តែខ្ពស់ និងមានលំនឹងកាន់តែល្អនៅពេលហោះកាន់តែខ្ពស់។

លោក សារិន សិរីវត្ថា បានគូសបញ្ជាក់ថា “ជាគោលការណ៍ ប្រសិនបើយើងផលិតដ្រូនមួយគ្រឿង ថ្លៃចំណាយខ្ពស់ណាស់ ប៉ុន្តែបើយើងផលិតវាទ្រង់ទ្រាយធំសម្រាប់លក់នៅលើទីផ្សារ ការចំណាយនឹងធ្លាក់ចុះ”៕ CNA

ព្រឹទ្ធសភាអនុម័តលើសេចក្តីព្រាងច្បាប់ស្ដីពីកិច្ចព្រមព្រៀងពាណិជ្ជកម្មដ៏សំខាន់ចំនួនពីរ

        ដោយៈវឌ្ឍ​នៈ

ភ្នំពេញៈ សេចក្ដីព្រាងច្បាប់ស្ដីពី កិច្ចព្រមព្រៀងពាណិជ្ជកម្មសេរីចំនួនពីររួមមានសេចក្តី ព្រាងច្បាប់ស្ដីពីកិច្ចព្រមព្រៀងពាណិជ្ជកម្មភាពជាដៃគូសេដ្ឋកិច្ចគ្រប់ជ្រុងជ្រោយតំបន់(RCEP) និងសេចក្តីព្រាងច្បាប់ស្ដីពីកិច្ចព្រមព្រៀងពាណិជ្ជកម្មសេរី រវាងកម្ពុជានិងចិន ត្រូវបានព្រឹទ្ធសភាអនុម័តទាំងស្រុងនៅក្នុងកិច្ចប្រជុំពេញអង្គព្រឹទ្ធសភាលើកទី៧ នីតិកាលទី៤កាលពីថ្ងៃទី២០កញ្ញា២០២១។

លោកប៉ាន សូរស័ក្តិរដ្ឋមន្ត្រីក្រសួងពាណិជ្ជកម្មបានដឹកនាំ គណៈប្រតិភូអន្តរក្រសួ​ងចូលរួមកិច្ចប្រជុំការពារ សេចក្តីព្រាងច្បាប់សំខាន់ៗចំនួន៣ រួមទាំងសេចក្តីព្រាងច្បាប់ស្ដីពីកិច្ចព្រមព្រៀងពាណិជ្ជកម្មសេរីចំនួន២នោះផងដែរ ។

នៅក្នុងកិច្ចប្រជុំនោះលោកប៉ាន សូរស័ក្តិរដ្ឋមន្ត្រីក្រសួងពាណិជ្ជកម្ម បានជម្រាបអំពីខ្លឹមសារ និងអត្ថប្រយោជន៍សំខាន់ៗ នៃសេចក្តីព្រាងច្បាប់ទាំងនេះផងដែរ។

១. កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)

– ជាកិច្ចព្រមព្រៀងពាណិជ្ជកម្មសេរីធំជាងគេមួយក្នងតំបន់ ដោយក្នុងនោះមានការចូលរួមពីប្រទេសជាសមាជិកអាស៊នចំនួន១០ និងប្រទេសជាដៃគូពាណិជ្ជកម្មសំខាន់ៗ ចំនួន ៥ រួមមាន ចិន ជប៉ុន កូរ៉េ នូវែលហ្សេទ្បង់ និងអូស្រ្តាលី។

– អាចឈានដល់បង្កើតបានទីផ្សារចំនួន២,២ពាន់លាននាក់ ឬ៣០%នៃចំនួនប្រ ជាជនពិភពលោក ដែលមានផលិតផលក្នុងស្រុកសរុបរួមគ្នា ប្រមាណ២៦,២ទ្រីលានដុល្លាអាម៉េរិក ឬ៣០%នៃផលិតផល ក្នុងស្រុកសរុបរបស់ពិភពលោក និងមានចំនួនប្រមាណ ២៨% នៃទំហំពាណិជ្ជកម្មពិភពលោក (ផ្អែកលើទិន្នន័យឆ្នាំ២០១៩)។

– កិច្ចព្រមព្រៀងអាសិប ជាកិច្ចព្រមព្រៀងដែលមានលក្ខណៈទំនើប ទូលំទូលាយ គុណភាពខ្ពស់ និងផ្តល់ផលប្រយោជន៍សេដ្ឋកិច្ចឱ្យគ្នាទៅវិញទៅមក ដែលនឹងសម្រួលដល់ការពង្រីកខ្សែច្រវាក់ផ្គត់ផ្តង់ពាណិជ្ជកម្ម និងការវិនិយោគក្នុងតំបន់ ការផ្តល់សញ្ញាទៅកាន់ពិភពលោក អំពីការគាំទ្រប្រព័ន្ធពាណិជ្ជកម្មសេរី ពហុភាគីដែលផ្អែកលើគោលការណ៍ច្បាប់ និងជាពិសេសការចូលរួមចំណែក ក្នុងការស្តារសេដ្ឋកិច្ចកម្ពុជា និងតំបន់ឡើងវិញបានឆាប់រហ័សពីវិបត្តិសកូវីដ-១៩។

– ផ្អែកតាមលទ្ធផលនៃការចរចា និងការសិក្សារបស់ វិទ្យាស្ថានស្រាវជ្រាវសេដ្ឋកិច្ច សម្រាប់អាស៊ាន និងអាស៊ីបូព៌ា (ERIA) បានបង្ហាញថា បន្ទាប់ពីបញ្ចប់កិច្ចព្រមព្រៀងអាសិបនេះ កម្ពុជាអាចនឹងមានកំណើនប្រចាំឆ្នាំ ការនាំចេញចំនួន៧,៣% វិនិយោគចំនួន ២៣,៤% និងផលិតផលក្នុងស្រុកសរុបចំនួនប្រមាណ ២% លើផលិតផលក្នុងស្រុកសរុប ដែលមានបច្ចុប្បន្ន។

២. ច្បាប់ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេរីកម្ពុជា-ចិន

– ការទទួលបានការបើកទីផ្សារឱ្យបានធំជាងមុន និងប្រសើរជាងមុន សម្រាប់មុខទំនិញកសិផល បន្លែផ្លែឈើ ផលិតផលកែច្នៃ និងសិប្បកម្ម និងផលិតផលជាច្រើនទៀត ស្របពេលដែលកម្ពុជាអាចផលិតបាន និងអនុលោមតាមវិធានអនាម័យ និងស្តង់ដារ។

– ការទទួលបានលំហូរទីផ្សារពាណិជ្ជកម្មសេវាកម្ម ដែលកម្ពុជាអាចនាំចេញ ក្នុងករណីមានការបណ្តុះបណ្តាល ជំនាញ និងមានគុណវុឌ្ឍិគ្រប់គ្រាន់ ជាពិសេសនៅពេលដែលកម្ពុជាអាចពង្រឹងខ្លួនឯងឱ្យរឹងមាំ ក្នុងវិស័យសេវាកម្មនាពេលអនាគត។

– ផ្តល់កាលានុវត្តភាពផ្នែកវិនិយោគដល់កម្ពុជា បានកាន់តែច្រើន ដែលនឹងផ្តល់ឱកាសដល់ធុរជនកម្ពុជា ដែលមានបំណងពង្រីកទីផ្សារសេវាកម្ម និងទំនិញនាំចេញឱ្យកាន់តែសម្បូរបែបទៅកាន់ទីផ្សារចិន។

– ការទទួលបានផលប្រយោជន៍ពីការផ្ទេរបច្ចេកវិទ្យា ចំណេះដឹង ចំណេះធ្វើ និងជំនាញថ្មីៗពីការវិនិយោគផ្ទាល់របស់បរទេស ព្រមទាំងបង្កើតការងារថ្មីៗជូនប្រជាជនកម្ពុជា ហើយក៏ជាកត្តាដ៏សំខាន់ចូលរួមពង្រឹងដល់វិស័យផលិតកម្មក្នុងស្រុក។

– ការកំណត់ឱ្យកាន់តែច្បាស់នូវរាល់នីតិវិធី ទាក់ទងនឹងវិធានដើមកំណើតទំនិញ គយនិងសម្រួលពាណិជ្ជកម្ម អនាម័យ និងភូតគាមអនាម័យ និងរបាំងបច្ចេកទេសលើការធ្វើពាណិជ្ជកម្ម និងការធ្វើសាមញ្ញកម្ម ដើម្បីងាយស្រួលអនុវត្ត និងសម្រួលដល់ការធ្វើពាណិជ្ជកម្ម។

– ការរៀបចំ និងការបង្កើតនូវបរិយាកាសវិនិយោគ និងនយោបាយទាក់ទាញវិនិយោគទុនពីបរទេសជាដើម៕

មូលដ្ឋានសំខាន់ចំនួន៥ គួរសិក្សាលើនិតិវិធីនៃការផ្ទេរកម្មសិទ្ឋអចលនវត្ថុ

ដោយៈគង់ សូរិយា

ភ្នំពេញៈ ការផ្ទេរកម្មសិទ្ឋអចលនទ្រព្យ ហាក់មានភាពស្មុគ្រស្មាញបន្តិច និងធ្វើឡើងច្រើនដំណាក់កាល ដែលប្រជាពលរដ្ឋគួរសិក្សាស្វែងយល់ ដើម្បីបញ្ចៀសហានិភ័យលើអចលនទ្រព្យរបស់ខ្លួន។

យោងតាមឯកសាររបស់រដ្ឋបាលសូរិយោដី នៃក្រសួងរៀបចំដែនដី នគរូបនីយកម្ម និងសំណង់បានឲ្យដឹងថា នីតិវិធីការផ្ទេរកម្មសិទ្ធិអចលនវត្ថុមាន៥ ដំណាក់កាលរួមមានដូចជា

១. បំពេញឯកសារនៅការិយាល័យភូមិបាល
ភាគីទាំងសងខាង ឬអ្នកទទួលបានសិទ្ធិ ត្រូវមកការិយាល័យរៀបចំដែនដី នគរូបនីយកម្ម សំណង់ និងភូមិបាលក្រុង ស្រុក ខណ្ឌ (ដែលជាទូទៅគេហៅថា ការិយាល័យភូមិបាល) ដែលអចលនទ្រព្យនោះស្ថិតនៅ ដើម្បីបំពេញឯកសារនានា នៅមុខមន្ត្រីភូមិ​បាល ដោយមានសាក្សីមកជាមួយផង។

គូភាគី ត្រូវភ្ជាប់មកជាមួយនូវឯកសារចាំបាច់មួយចំនួនដូចជា៖
កិច្ចសន្យាទិញ-លក់ (លិខិតលក់ផ្តាច់ សម្រាប់ការផ្ទេរកម្មសិទ្ធិក្នុងករណីទិញ-លក់)
លិខិតធ្វើអំណោយផ្តាច់ (ក្នុងករណីដីនោះ ត្រូវបានធ្វើអំណោយដល់នរណាម្នាក់)
អត្តសញ្ញាណប័ណ្ណ (មានបញ្ជាក់ពីសាលាក្រុង ស្រុក/ ខណ្ឌ)
សេចក្តីចម្លងសំបុត្រអាពាហ៍ពិពាហ៍ (ប្រសិនបើជាទ្រព្យប្តីប្រពន្ធ)
ឯកសារបញ្ជាក់អត្តសញ្ញាណ (នៅលីវ រៀបការ និង លែងលះ….)
និងឯកសារផ្សេងៗទៀត ទៅតាមតម្រូវការជាក់ស្តែងនៃអចលនទ្រព្យនោះ។

២. ប្រថាប់ត្រាដោយអាជ្ញាធរឃុំ-សង្កាត់
បន្ទាប់ពីបំពេញឯកសារ នៅការិយាល័យភូមិបាលរួចរាល់ ម្ចាស់ដី ត្រូវយកឯកសារ ទៅឱ្យអាជ្ញាធរឃុំ-សង្កាត់ ដែលអចលនទ្រព្យនោះស្ថិតនៅ ដើម្បីត្រួតពិនិត្យនូវភាពស្របច្បាប់ និងប្រថាប់ត្រាលើឯកសារទាំងអស់នោះ។

៣.កសាងសាលកបត្រក្បាលដី និងពិនិត្យទីតាំង
បន្ទាប់ពីប្រថាប់ត្រារួចហើយ ម្ចាស់ដី ត្រូវបន្តយកឯកសារនោះទៅការិយាល័យភូមិបាលវិញ ដើម្បីមន្ត្រីអនុវត្តនីតិវិធីបន្ត។ មន្ត្រីភូមិបាល នឹងធ្វើការងារផ្ទេរសិទ្ធិអចលនទ្រព្យនោះ ដោយចុះទៅពិនិត្យទីតាំង កសាងសាលកបត្រក្បាលដី សម្រង់ពត៌មានក្បាលដី កសាងកំណត់ហេតុចុះវាស់វែង និងកសាងឯកសាររណបផ្សេងៗទៀតដែលពាក់ព័ន្ធ។

៤. សុំការអនុម័តមន្ទីរសុរិយោដី និងបង់ពន្ធ
យោងតាមសេចក្តីសម្រេចលេខ០៤ សសរ ចុះថ្ងៃទី ១០ ខែ មករា ឆ្នាំ២០១៦។ មានការផ្ទេរសិទ្ធិខ្លះ គឺមិនជាប់ពន្ធនោះទេ ដូចជាការផ្ទេរអចលនទ្រព្យជាសំណង់ ឬ/និងដី៖

ចំពោះដីដែលចុះបញ្ជីរួច (ប្លង់រឹង) ម្ចាស់ដីត្រូវយកឯកសារទាំងអស់នោះ ទៅច្រកចេញចូលតែមួយនៅមន្ទីររៀបចំដែនដី នគរូបនីយកម្ម សំណង់ និងសុរិយោដី (ឬហៅថាមន្ទីរសុរិយោដី) ដែលអចលនទ្រព្យនោះស្ថិតនៅ។ មន្ត្រីសុរិយោដីនៅទីនោះ នឹងធ្វើការត្រួតពិនិត្យឯកសារទាំងនោះ។ ក្នុងករណីដែលឯកសារគ្រប់គ្រាន់ តាមច្បាប់ហើយនោះ មន្ត្រីនឹងហៅម្ចាស់មកបង់សេវាសុរិយោដី និងយកឯកសារទៅបង់ពន្ធនៅសាខាពន្ធដារដែលអចលនទ្រព្យនោះស្ថិតនៅ។

ប៉ុន្តែចំពោះដីដែលមិនទាន់ចុះបញ្ជី (ប្លង់ទន់) ក្រោយពីមន្ត្រីចុះវាស់វែង និងធ្វើកំណ​ត់ហេតុរួចរាល់ហើយ (ដំណាក់កាលទី ៣) ការិយាល័យភូមិបាល នឹងរៀបចំឯកសារ ដើម្បីឱ្យអ្នកស្នើសុំយកឯកសារទៅបង់ពន្ធប្រថាប់ត្រា៤%។
យោងតាមសេចក្តីណែនាំលេខ ៨៧២៦ របស់អគ្គនាយកដ្ឋានពន្ធដារ ចុះថ្ងៃទី១៤ ខែមិថុនា ឆ្នាំ២០១៦ ការផ្ទេរសិទ្ធិអចលនទ្រព្យ ត្រូវជាប់ពន្ធ ៤% ទាំងប្លង់រឹង និងប្លង់ទន់។ ដីដែលពុំទាន់បានចុះបញ្ជី អ្នកទទួលសិទ្ធិមានកាតព្វកិច្ច ត្រូវបង់ពន្ធប្រថាប់ត្រា៤% ដូចដីដែលបានចុះបញ្ជីដែរ។

រវាងឪពុក-ម្តាយបង្កើត និងកូនបង្កើត
រវាងប្តី និងប្រពន្ធ
រវាងយាយ-តាបង្កើតនិងចៅបង្កើត

៥. ចារឹកឈ្មោះលើប្លង់ដី
កិច្ចបង្ហើយ បន្ទាប់ពីបង់ពន្ធរួច សម្រាប់ដីដែលបានចុះបញ្ជីរួច (ប្លង់រឹង) ម្ចាស់ដី ត្រូវយកឯកសារទាំងអស់ មកមន្ទីរសុរិយោដីម្តងទៀត ដើម្បីមន្ត្រីធ្វើបច្ចុប្បន្នភាពអំពីម្ចាស់ដី នៅក្នុងកុំព្យូទ័រ និងធ្វើលេខាចារឹកលើប្លង់ដី។ ម្ចាស់ដីថ្មី នឹងទទួលបានប្លង់កម្មសិទ្ធិ នៅពេលនីតិវិធីទាំងអស់បានបញ្ចប់។

ចំណែកដីដែលមិនទាន់ចុះបញ្ជី (ប្លង់ទន់) ក្រោយពី បានបង់ពន្ធរួចរាល់ហើយ អ្នកស្នើសុំត្រូវយកបង្កាន់ដៃបង់ពន្ធរួចរាល់ ទៅការិយាល័យភូមិបាលវិញ ដើម្បីមន្ត្រីពិនិត្យ និងសម្រេច ដើម្បីបញ្ចប់ការផ្ទេរសិទ្ធិកាន់កាប់ អចលនទ្រព្យ ជូនម្ចាស់ថ្មី ត្រឹមថ្នាក់ស្រុកខណ្ឌ។  លោកអ្នកនឹងទទួលសំណុំ ឯកសារនៃការផ្ទេរសិទ្ធិអចលនទ្រព្យ ដែលបានផ្ទេរសិទ្ធិត្រឹមត្រូវឱ្យទៅឈ្មោះម្ចាស់ថ្មី៕

អ្នកជំនាញហិរញ្ញវត្ថុបង្ហាញពីរូបមន្តលំហូរសាច់ប្រាក់សម្រាប់ទិញផ្ទះ ដើម្បីជៀសវាងសម្ពាធផ្នែកហិរញ្ញវត្ថុ

ដោយៈលក្ខិណា

ភ្នំពេញៈ អ្នកជំនាញហិរញ្ញវត្ថុមួយរូបនៅកម្ពុជា បានបង្ហាញពីរូបមន្តមួយក្នុងការទិញផ្ទះតាមលទ្ធភាព ដើម្បីគេចផុតពីវិបត្តិហិរញ្ញវត្ថុនៅពេលអនាគត។

លោកង៉ែត ជូជាអ្នកវិនិយោគអចលនទ្រព្យ និងជាអ្នកជំនាញហិរញ្ញវត្ថុនៅកម្ពុជា​មួយរូបបានបង្ហាញពីរូបមន្ត៣០/ ៣០/៣ ក្នុងការទិញផ្ទះរស់នៅ ដោយសេរីភាពហិរញ្ញវត្ថុ ។

តើរូបមន្ត៣០/៣០/៣ជាអ្វី និងត្រូវអនុវត្តន៍បែបណា ដែលលោកជូបានលើកឡើង?
គោលការណ៍ទី១
ចំនួនប្រាក់បង់រំលស់ប្រចាំខែ មិនគួរលើសពី៣០% នៃចំណូលសរុបរបស់គ្រួសារនោះទេ។ ឧទាហរណ៍ ប្រសិនបើពីរនាក់ប្តីប្រពន្ធ រកបានចំណូល១៥០០ដុល្លាក្នុង១ខែ ការបង់រំលស់ផ្ទះទាំងប្រាក់ដើម និងការប្រាក់មិនគួរលើសពី៤៥០ដុល្លានោះទេ។

គោលការណ៍ទី២
បើទោះជាមានគំរោងបុរីជាច្រើន មិនតម្រូវឱ្យមានបង់ប្រាក់ដំបូងក៏ដោយ អ្នកគួរសន្សំប្រាក់ឱ្យបាន៣០ភាគរយនៃតម្លៃផ្ទះ ជាមុនសិនមុននឹងសំរេចចិត្តទិញផ្ទះ។

ឧទាហរណ៍ អ្នកទិញផ្ទះតម្លៃ៦ម៉ឺនដុល្លា អ្នកគួរសន្សំប្រាក់អោយបានយ៉ាងតិច១៨.០០០ដុល្លាជាមុនសិន។ ធ្វើដូច្នេះ ជួយអោយអ្នកមានលទ្ធភាពបង់រំលស់ទាំងប្រាក់ដើម និងការប្រាក់ប្រចាំខែ ក្នុងកំរិតទាបតាមគោលការណ៍ទី១។ ម្យ៉ាងអ្នកអាចបង់រំលស់ផ្ទាល់ជាមួយធនាគារ ដែលជាទូទៅមានអត្រាការប្រាក់ទាប ជាងអត្រាការប្រាក់បង់រំលស់ជាមួយម្ចាស់គំរោង។ ម្យ៉ាងការបង់រំលស់ជាមួយធនាគារ បានផ្តល់សុវត្ថិភាពបណ្ណ័កម្មសិទ្ធិខ្ពស់ជាងការបង់រំលស់ផ្ទាល់ជាមួយម្ចាស់គំរោង។

គោលការណ៍ទី៣
តម្លៃផ្ទះដែលអ្នកទិញសំរាប់នៅ មិនគួរមានតម្លៃលើសពី៣ដង នៃចំណូលសរុបប្រចាំឆ្នាំរបស់គ្រួសារអ្នកនោះទេ។ ឧទាហរណ៍ គ្រួសារអ្នកមានចំណូល១ខែ១៥០០ដុល្លា ក្នុង១ឆ្នាំគ្រួសារអ្នកមានចំណូល១៨,០០០ដុល្លា។ ដូច្នេះផ្ទះដែលអ្នកទិញសំរាប់រស់នៅ មិនគួរមានតម្លៃលើសពី៥៤,០០០ដុល្លានោះទេ (របៀបគណនា៖ ១៨០០០ដុល្លា គុណនឹង៣)។

ប្រសិនបើអ្នក និងប្តីឬប្រពន្ធរបស់អ្នកគ្រាន់តែជាអ្នកធ្វើការធម្មតា (គ្មានទេពកោសល្យជាសហគ្រិន ឬជាអ្នកវិនិយោគ) ខ្ញុំជូនជាយោបល់ថា អ្នកគួរប្រកាន់យកគោលការណ៍ទាំង៣ខាងលើ ដើម្បីកុំឱ្យមានសម្ពាធផ្នែកហិរញ្ញវត្ថុ និងអាចសន្សំប្រាក់បានខ្លះយកទៅចូលហ៊ុនវិនិយោគជាមួយអ្នកដទៃ ដើម្បីបានជាបទពិសោធន៍។

ផ្ទុយទៅវិញ ប្រសិនបើអ្នក និងដៃគូរបស់អ្នកជាមនុស្សមានទេពកោសល្យ ជាសហគ្រិន ឬជាអ្នកវិនិយោគ អ្នកគួរបង្កើតអាជីវកម្ម ឬវិនិយោគ ដើម្បីទទួលបានជាប្រាក់ចំណេ ញសិនមុននឹងសំរេចចិត្តទិញផ្ទះនៅ។ ធ្វើដូច្នេះបើទោះជាមានហានិភ័យខ្ពស់ ជាងការអនុវត្តគោលការណ៍ទាំង៣ខាងលើ។

អ្នកក៏អាចមានលទ្ធភាពទិញផ្ទះបាន នៅដោយមិនចំណាយពេលច្រើនដែរ ប្រសិ​នបើការធ្វើអាជីវកម្ម ឬការវិនិយោគទទួលបានជោគជ័យ ៕

ក្រុមអ្នកស្រាវជ្រាវកម្ពុជា ចុះបេសកកម្មពិសេសដើម្បីសិក្សាស្រាវជ្រាវរកប្រភពដើមនៃវីរុសកូវីដ-១៩

ដោយៈសុខុម

ស្ទឹងត្រែង: ក្រុមអ្នកស្រាវជ្រាវកម្ពុជា កំពុងប្រមូលសំណាកពីសត្វប្រចៀវនៅភាគខាងជើងប្រទេសកម្ពុជា ក្នុងគោលបំណងស្វែងរកប្រភពដើម នៃវីរុសកូវីដ-១៩ ដោយពួកគេ បានចុះទៅតំបន់មួយដែលវីរុសស្រដៀងកូវីដ-១៩ ត្រូវបានរកឃើញកាលពីមួយទសវត្សរ៍មុន។ នេះបើយោងតាមសារព័ត៌មាន CNA ចុះផ្សាយនៅថ្ងៃទី២០ កញ្ញា នេះ។

សំណាកចំនួន២ដែលយកពីប្រចៀវសេះស (Horseshoe bat) ត្រូវបានប្រមូលក្នុងឆ្នាំ២០១០ នៅខេត្តស្ទឹងត្រែងជិតព្រំដែនប្រទេសឡាវ ហើយត្រូវបានរក្សាទុកក្នុងទូក្លាស្សេនៅវិទ្យាស្ថានប៉ាស្ទ័រកម្ពុជា ក្នុងរាជធានីភ្នំពេញ។

ការធ្វើតេស្តិ៍លើសំណាកទាំងនោះ កាលពីឆ្នាំមុនបានបង្ហាញថា វាជាពូជសត្វប្រ​ចៀវមានទំនាក់ទំនងស្និទ្ធនឹងវីរុសកូវីដ-១៩ ដែលបានផ្ដាច់ជីវិតមនុស្សអស់ជាង៤,៦លាននាក់នៅទូទាំងពិភពលោក។

ក្រុមស្រាវជ្រាវមកពីវិទ្យាស្ថានប៉ាស្ទ័រ ដែលមានគ្នា៨នាក់ បាននិងកំពុងប្រមូលសំណាកពីសត្វប្រចៀវ ដើម្បីសិក្សាពីអម្បូរ ភេទ អាយុរបស់ពួកវា និងព័ត៌មានលម្អិតផ្សេងៗទៀត។ ការសិក្សាស្រាវជ្រាវស្រដៀងគ្នានេះ ក៏កំពុងធ្វើឡើងនៅក្នុងប្រទេសហ្វីលីពីន ផងដែរ។

ស្ត្រីឈ្មោះ ហែម ថាវរី ដែលជាអ្នកសម្របសម្រួល កម្មវិធីចុះសិក្សាស្រាវជ្រាវផ្ទាល់ដែលទទួលបានជំនួយមូលនិធិពីបារាំង ខាងលើនេះបានប្រាប់ទីភ្នាក់ងារព័ត៌មាន Reuters ថា “យើងសង្ឃឹមថា លទ្ធផលទទួលបានពីការសិក្សានេះ អាចជួយឱ្យពិភពលោក ស្វែងយល់កាន់តែប្រសើរជាងមុនអំពីវីរុសកូវីដ-១៩”។

លោកវេជ្ជបណ្ឌិត ដួង វាសនា ប្រធានផ្នែកវិសាណូសាស្ត្រ (ការសិក្សាអំពីវីរុស) នៅវិទ្យាស្ថានប៉ាស្ទ័របានថ្លែងថា វិទ្យាស្ថានរបស់លោក បានចុះបេសកកម្មបែបនេះចំនួន៤លើករួចមកហើយ ក្នុងរយៈពេល២ឆ្នាំមកនេះ ដោយសង្ឃឹមថាទទួលបានតម្រុយអំពីប្រភពដើម និងការវិវឌ្ឍនៃវីរុសកូវីដ-១៩ ដែលបង្កដោយសត្វប្រចៀវ។

លោកបានប្រាប់ទីភ្នាក់ងារព័ត៌មាន Reuters ថា “យើងចង់សិក្សាស្វែងយល់ថា តើវីរុសនេះនៅតែមាននៅទីនោះឬយ៉ាងណា និងដើម្បីដឹងថា តើវីរុសនេះមានការវិវឌ្ឍន៍យ៉ាងដូចម្តេច”។

ក្រុមអ្នកវិទ្យាសាស្ត្របានរកឃើញថា វីរុសកាចសាហាវជាច្រើន ដែលមានប្រភពចេញពីសត្វប្រចៀវរួមមានដូចជាអេបូឡា (Ebola) និងវីរុសស្រដៀងកូវីដ-១៩ ផ្សេងៗទៀតដូចជាសា (SARS) និងមឺស (MERS) ជាដើម។

លោកវេជ្ជបណ្ឌិតដួង វាសនា បានមានប្រសាសន៍ថា “មនុស្សលោកគឺជាអ្នកទទួលខុសត្រូវ ចំពោះការសោកនាដកម្ម ដែលបង្កឡើងដោយវីរុសកូវីដ-១៩ ព្រោះមនុស្សបានទន្ទ្រានចូល និងបំផ្លិចបំផ្លាញដែនជម្រកធម្មជាតិនានា”៕

តើនិតិវិធីចុះបញ្ជីរអចលនទ្រព្យជាអ្វី ចូរសិក្សាលើចំណុចសំខាន់ទាំងបីនេះ

ដោយៈគង់ សូរិយា

ភ្នំពេញៈ ការចុះបញ្ជីអចលនទ្រព្យ ពិតជាសំខាន់ណាស់ក្នុងការគ្រប់គ្រង ការធ្វើអាជីវកម្មលក់ដូរ និងផ្ទេរកម្មសិទ្ធិ។ វាក៏បញ្ជាក់ពីភាពស្របច្បាប់ នៃអចលនទ្រព្យនោះផងដែរ។

ការចុះបញ្ជីអចលនទ្រព្យនៅក្នុងប្រទេសកម្ពុជា ធ្វើឡើងទៅលើដី និងសំណង់ទាំងឡាយណា ដែលជាប់ពន្ធ ហើយជាទូទៅ គឺអចលនទ្រព្យមានតម្លៃលើសពី១០០លានរៀល។

ផ្អែកតាមច្បាប់ស្តីពី ពន្ធលើអចលនទ្រព្យឆ្នាំ២០០៩បានបង្ហាញថា អ្នកជាប់ពន្ធអចលនទ្រព្យទាំងអស់ មានកាត​ព្វកិច្ចត្រូវទៅចុះបញ្ជីអចលនទ្រព្យរបស់ខ្លួន នៅរដ្ឋបាលសារពើពន្ធ ក្នុងភូមិសាស្ត្រដែល​អចលន​ទ្រព្យ​របស់ខ្លួននោះស្ថិតនៅ។ ការចុះបញ្ជីនេះត្រូវទៅធ្វើយ៉ាងយឺតបំផុតគិតត្រឹមថ្ងៃទី៣០ ខែ កញ្ញា នៃឆ្នាំជាប់ពន្ធនីមួយៗ។

ការចុះបញ្ជីអចលនទ្រព្យមួយ ធ្វើឡើងតែមួយដងគត់ ដើម្បីទទួលបានលេខអត្តសញ្ញាណសម្គាល់អចលនទ្រព្យ។ សម្រាប់អចលនទ្រព្យណា ដែលបានចុះបញ្ជីរួចហើយ មិនត្រូវបានចុះបញ្ជីឡើងវិញ នៅឆ្នាំបន្តបន្ទាប់នោះទេ តែត្រូវបង់ពន្ធអចលទ្រព្យនោះ ជាប្រចាំឆ្នាំក្នុងអាត្រា០,១ភាគរយ ដោយវាអាស្រ័យទៅតាមប្រភេទអចលនទ្រព្យ និងទីតាំងដែលវាស្ថិតនៅ។

ម្យ៉ាងទៀត នៅពេលអចលនទ្រព្យដែលបានចុះបញ្ជីនោះ ត្រូវបានផ្ទេរកម្មសិទ្ធិតាមរយៈការទិញ-លក់ ឬមានការផ្លាស់ប្តូរម្ចាស់កាន់កាប់ ការផ្លាស់ប្តូរទំហំ ការបែងចែក ឬការរំលាយចូលគ្នា នោះម្ចាស់អចលនទ្រព្យ ត្រូវតែបង់ពន្ធប្រថាប់ត្រា ដាច់ដោយឡែក ក្នុងអត្រា៤%។

ឧទាហរណ៍ ពូ “ក” មានដីទំហំ ៣ ហិកតា ក្នុងក្រុងសៀមរាប។ ពូ “ក” ត្រូវតែទៅចុះបញ្ជីអចលនទ្រព្យ និងបង់ពន្ធអចលនទ្រព្យ ក្នុងអត្រា០,១ % ប្រចាំឆ្នាំ ។ ក្រោយមក ពូ «ក» បានបំបែកក្បាលដីជា ០៣ ប្លង់ ហើយផ្ទេរសិទ្ធិកាន់កាប់ឱ្យកូនគាត់បីនាក់។ ដូចនេះ ដីចំនួន០៣ ប្លង់ដែលបានចែកឱ្យកូននោះ កូនដែលត្រូវទៅចុះបញ្ជីកម្មសិទ្ធិថ្មី ត្រូវតែបង់ពន្ធប្រថាប់ត្រាក្នុងអត្រា ៤%។​

ក្នុងករណីនេះ ក្នុងឆ្នាំដែលគាត់ចែកដីឱ្យកូនគាត់ តែគាត់មិនទាន់បង់ពន្ធអចលនទ្រព្យប្រចាំ នៅពេលមានការចែកដីកូនបែបនេះ គាត់រួមនឹងកូនគាត់ត្រូវតែបង់ពន្ធ០,១% និងបង់ពន្ធប្រថាប់ត្រា៤% ក្នុងឆ្នាំនោះតែមួយ។

ជាគោលការណ៍ សម្រាប់ការចុះបញ្ជីអចលនទ្រព្យ ម្ចាស់អចលនទ្រព្យត្រូវតែវាស់វែង និងគណនាពន្ធអចលនទ្រព្យទាំងនោះដោយខ្លួនឯង។

១ តើត្រូវវាស់វែងអចលនទ្រព្យនោះយ៉ាងដូចម្តេច?
ម្ចាស់អចលនទ្រព្យ ត្រូវវាស់វែងផ្ទៃក្រឡារបស់ដី ផ្ទះ និងសំណង់ផ្សេងៗ ដូចជា ដី គឺគេត្រូវវាស់យកចំណុចកណ្តាលនៃព្រំរបង ឬព្រំដីជាគោល។ រីឯ ផ្ទះ អគារ និងសំណង់ផ្សេងៗ គឺគេត្រូវវាស់យកចំណុចកណ្តាលនៃជញ្ជាំង និងចុងដំបូល ចំពោះស្ថានីយប្រេង ភោជនីយដ្ឋាន កន្លែងលក់ ឬលាងរថយន្ត។​

២ ការគណនាប្រាក់ពន្ធលើអចលនទ្រព្យ
យោងតាមប្រកាសលេខ៣៤៣ សហវ.ប្រក ចុះថ្ងៃទី ២២ ខែមីនា ឆ្នាំ ២០១៩ ស្តីពីការកំណត់មូលដ្ឋានគិតពន្ធប្រថាប់ត្រា ចំពោះការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ បានកំណត់យ៉ាងច្បាស់ពីមូលដ្ឋានគិតពន្ធប្រថាប់ត្រា ដែលអនុវត្តចំពោះការផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ ដែលជាសំណង់ ឬ/និងដី ស្ថិតក្នុងភូមិសាស្ត្ររដ្ឋបាលរាជធានី ខេត្ត នៃព្រះរាជាណាចក្រកម្ពុជា។

ដើម្បីរកប្រាក់ពន្ធត្រូវបង់ ម្ចាស់អចលនទ្រព្យ ត្រូវរកមូលដ្ឋានគិតពន្ធជាមុនសិន។ គេត្រូវយកតម្លៃអចលនទ្រព្យ គុណនឹង៨០% រួចដកនឹង១០០ ០០០ ០០០៛ នោះអ្នកនឹងរកឃើញពីមូលដ្ឋានគិតពន្ធ។ បន្ទាប់មក គេយកតម្លៃលេខនៃមូលដ្ឋានគិតពន្ធ ទៅគុណនឹង០.១ %នោះ យើងនឹងរកឃើញពីតម្លៃប្រាក់ពន្ធដែលត្រូវបង់នោះហើយ។​
តម្លៃអចលនទ្រព្យនីមួយៗ ត្រូវបានកំណត់ដោយគណៈកម្មការវាយតម្លៃអចលនទ្រព្យ ដោយយោងតាមតម្លៃទីផ្សារ ឬទៅតាមអាយុកាលសំណង់ និងប្រភេទនៃសំណង់ (ឥដ្ឋបេតុង និងមិនមែនឥដ្ឋបេតុង)។

៣ តើត្រូវមានឯកសារអ្វីខ្លះនៅពេលទៅចុះបញ្ជី?
ក្រោយពីម្ចាស់អចលនទ្រព្យ បានវាស់វែង ​និងគណនារកប្រាក់ពន្ធនៃអចលនទ្រព្យរបស់ខ្លួនរួចហើយ គឺត្រូវតែស្នើសុំចុះបញ្ជីអចលនទ្រព្យនោះ។ នៅពេលដាក់ពាក្យស្នើសុំចុះបញ្ជីពន្ធលើអចលនទ្រព្យ ម្ចាស់អចលនទ្រព្យ ត្រូវភ្ជាប់មកជាមួយនូវឯកសារសំខាន់ៗដូចជា

-អត្តសញ្ញាណប័ណ្ណសញ្ជាតិខ្មែរ ឬសំបុត្របញ្ជាក់កំណើត ឬលិខិតឆ្លងដែនសម្រាប់ជនបរទេស។
-សៀវភៅគ្រួសារ ឬ សៀវភៅស្នាក់នៅ ឬ លិខិតបញ្ជាក់ទីលំនៅ
-ប័ណ្ណសម្គាល់សិទ្ធិ ឬប័ណ្ណសម្គាល់សិទ្ធិកាន់កាប់អចលនវត្ថុ ឬវិញ្ញាបនបត្រសម្គា​ល់ម្ចាស់អចលនវត្ថុ ដែលចេញដោយរដ្ឋបាល​សុរិយោដី ឬឯកសារពាក់ព័ន្ធនឹងការកាន់កាប់អចលនទ្រព្យ ដែលបញ្ជាក់ដោយអាជ្ញាធរឃុំ/សង្កាត់ឡើងទៅ។ ក្នុងករណី​ដែលអចលនទ្រព្យបង់រំលស់ ម្ចាស់អចលនទ្រព្យត្រូវភ្ជាប់មកជាមួយ នូវឯកសាររវាងអ្នកទិញ និងអ្នកលក់មកជាមួយផង។

ម្យ៉ាងវិញទៀត ម្ចាស់អចលនទ្រព្យ ត្រូវតែបញ្ជាក់ឱ្យបានច្បាស់ដល់រដ្ឋបាលសារពើពន្ធ អំពីអចលនទ្រព្យត្រូវជាប់ពន្ធទាំងនោះ ក្នុងករណី ៖

-អចលនទ្រព្យរបស់ខ្លួនត្រូវបានបំបែកលក់ ផ្ទេរ ឬផ្តល់អំណោយ ហើយអចលនទ្រព្យដែលបានបំបែកថ្មីត្រូវតែចុះបញ្ជីទៀត
-ដីត្រូវបានយកទៅសាងសង់ផ្ទះ អគារ ឬសំណង់ផ្សេងៗ
-ផ្ទះ អគារ និងសំណង់ផ្សេងៗត្រូវបានសាងសង់បន្ថែម ឬបន្ថយ ឬ រំលាយចោល
-ការផ្លាស់ប្តូរកម្មសិទ្ធិករ អ្នកកាន់កាប់ ឬអ្នកទទួលបានផលប្រយោជន៍ចុងក្រោយ។

អ្នកជាប់ពន្ធ មិនអាចក្លែងបន្លំឯកសារចុះបញ្ជីអចលនទ្រព្យបានទេ។ ប្រសិន​ណាបើមន្ត្រីសារពើពន្ធរកឃើញថា អ្នកជាប់ពន្ធណាម្នាក់ ក្លែងបន្លំ​ឯកសារ​ នោះជននោះត្រូវរងទោសទណ្ឌតាមច្បាប់សារពើពន្ធ ដោយត្រូវពិន័យបង់ពន្ធប្រាក់បន្ថែម ទៅលើពន្ធប្រថាប់ត្រានៃពន្ធអចលនទ្រព្យនោះ។

ដើម្បីភាពងាយស្រួលក្នុងការកាត់បន្ថយពេលវេលា និងការចំណាយនានា អ្នកជាប់ពន្ធ អាចទាញយកពាក្យស្នើសុំនេះ ដោយមិនគិតថ្លៃ នៅលើគេហទំព័ររបស់អគ្គនាយក ដ្ឋានពន្ធដារ (www.tax.gov.kh)៕

ក្រោយរដ្ឋាភិបាលប្រកាសគំរោងសាងសង់ស្ពានពីកោះដាច់មកកាន់ផ្លូវជាតិ៦ ចរន្តទិញ លក់នៅតំបន់កោះដាច់ និង កោះឧកញ៉ាតីកើនឡើងផុសផុល

ដោយៈ សុជាតា

ភ្នំពេញ កណ្តាកៈ អ្នកជំនាញបានអះអាងថា ចរន្តទិញលក់ដីធ្លី នៅតំបន់កោះដាច់ និងកោះឧកញ៉ាតីបានកើនឡើងយ៉ាថងផុសផុល បន្ទាប់ពីរដ្ឋាភិបាលប្រកាសពីគម្រោង​សាងសង់ស្ពានចេញពីកោះដាច់ មកកាន់ផ្លូវជាតិលេខ៦អានាពេលខាងមុខ។

តំបន់កោះដាច់ និង កោះឧកញ៉ាតីជាទឹកដី ដែលមានអាកាសធាតុអំណោយផល មានទន្លេព័ទ្ធជុំវិញ មានដីពោរពេញដោយជីវជាតិ និងមានការត្បាញហូលផាមួងផងនោះ តំបន់ទាំងនេះ ប្រហែលមិនស្ថិតនៅឆ្ងាយទៀតទេ នៅពេលរដ្ឋាភិបាលសាងសង់ស្ពានតភ្ជាប់ និង ផ្លូវក្រវាត់ក្រុងទីបី និងទីបួន ត្រូវបានដំណើរសាងសង់ និងបញ្ចប់គម្រោងនាពេលអនាគត។

លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានប្រាប់ Property Area Asia កាលពីថ្ងៃទី ២០ ខែ កញ្ញ៉ា ឆ្នាំ ២០២១កន្លងមកថា នៅ រយៈពេលចុងក្រោយ ចរន្តទិញ លក់ នៅតំបន់កោះដាច់ និងកោះឧកញ៉ាតី គឺការទិញ លក់គួរអោយកត់សំគាល់ ខណៈដែលផ្លូវក្រវាត់ក្រុងទីបី បានសាងសង់ជិតបញ្ចប់។

លោក​បន្តថា “នៅពេលមានស្ពាន និងគម្រោងផ្លូវក្រវាត់ក្រុងទីបួន ដំណើរការតំបន់នេះ នឹងមានកំណើនទិញ លក់ដីកើនឡើងទ្វេដង។ ចំពោះកម្រោងធំៗ ដែលត្រូវអភិវឌ្ឍនៅតំបន់នោះ គឺមិនទាន់មានរូបរាងនោះទេ ដោយសារហេដ្ឋារចនាសម្ពន្ធធំៗមិនទាន់ចេញរូបរាងនៅឡើយ”។

លោកបញ្ជាក់បន្ថែមទៀតថា តម្លៃដីនៅតំបន់ទាំងពីរនេះ គឹប្រហាក់ប្រហែលគ្នា ដោយមានតម្លៃចន្លោះពិ ៣៥ ដុល្លារទៅ១០០ ដុល្លារក្នុងមួយម៉ែត្រការ៉េ និងកើនឡើងថ្លៃរហូតដល់៣៥០ដុល្លារ ទៅតាមតំបន់ដែលមានសក្តានុពលផងដែរ។

ជាមួយគ្នានេះ លោក សំ សុខនឿន ប្រធានសមាគមអចលនទ្រព្យសកល និងជាប្រធានក្រុមហ៊ុន KW Sam Sn Realty Co.,Ltd បានមានប្រសាសន៍ថា ចំពោះកោះដាច់ គឺស្ថិតខណ្ឌជ្រោយចង្វារ និងកោះឧកញ្ញ៉ាតី គឺស្ថិតនៅខេត្តកណ្តាល ដែលគ្រោងចាត់បញ្ចូលរាជធានីភ្នំពេញ។ ចំពោះផែនការអភិវឌ្ឍអភិវឌ្ឍ គឺក្រវាត់ក្រុងទីបី រដ្ឋាភិបាលបានសាង់សង់បានពាក់កណ្តាល គឺយើងស្ពានឆ្លង់កាត់មកផ្លូវជាតិលេខ១ មកផ្លូវល្វាឯម និង មកខេត្តព្រៃវែងខ្លះៗ និងបន្តសាងសង់ស្ពាន មកដល់កោះដាច់ និងបន្តអភិវឌ្ឍរហូតដល់ កោះឧកញ៉ាតីផងដែរ។

លោកបន្តថា “យើងសង្កេតឃើញថា តំរូវការរបស់ប្រជាជនខ្មែរ ចំពោះដីធ្លីជាប់ទន្ល និង សមុទ្រគឺតែងតែមានតំរូវការខ្ពស់។ រាល់ដីធ្លីទាំងអស់ជាប់ទន្លេ នៅជាយក្រុងភ្នំពេញជាពិសេស កោះដាច់ កោះឧកញ៉ាតី ចរន្តទិញលក់ គឺនៅតែមានខ្លះដដែល”។

លោកព្យាករណ៍ថា កោះដាច់ និង កោះឧកញ៉ាតី នឹងក្លាយទៅទីក្រុង ដែលមានអភិវឌ្ឍ ដោយប្រជាជនចូលចិត្តរស់នៅក្បែរទឹក។ ហើយនៅពេលដែលមានស្ពាន និង ផ្លូវក្រវាត់ក្រុងទីបីសាងសង់រួច តំបន់នេះ នឹងក្លាយទៅជាតំបន់សម្រាប់ លំនៅដ្ឋាន និងបែប រីស៊តដ៏ល្អផងដែរ។

កាលពីពេលថ្មីៗនេះ លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានមានប្រសាសន៍ឲ្យដឹងថា រដ្ឋាភិបាលគ្រោងនឹងពង្រីកផ្លូវក្រវ៉ាត់ក្រុងទី៣ឲ្យបានមួយជុំ ដែលការពង្រីកនេះតម្រូវឲ្យមានការសាងសង់ស្ពានពីក្តីតាកុយ ទៅកាន់តំបន់អរិយក្សត្រ និងស្ពានតភ្ជាប់ពីកោះដាច់ មកកាន់ផ្លូវជាតិលេខ៦អាផងដែរ។

ប៉ុន្តែទោះជាយ៉ាងណា លោកមិនទាន់បញ្ជាក់ឲ្យដឹងពីគំរោងហេដ្ឋារចនាសម្ព័ន្ឋធំៗនេះនឹងចាប់ផ្តើមសាងសង់នាពេលណា និងគ្រោងចំណាយទឹកប្រាក់ប៉ុ​ន្មានលានដុល្លារ​នៅឡើយទេ៕

ការអភិវឌ្ឍហេដ្ឋារចនាសម្ព័ន្ធធំៗក្នុងខេត្តពោធិ៍សាត់កំពុងទាក់ទាញការវិនិយោគ

ដោយៈវឌ្ឍនៈ

ពោធិសាត់ៈ ក្រោយពេលរដ្ឋាភិបាល បានអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់តភ្ជាប់ពីខេត្តមួយនេះ ទៅកាន់បណ្ដាខេត្តសក្ដានុពលជាច្រើន ដូចជា បាត់ដំបងកោះកុងនិងខេត្តផ្សេងៗទៀត។

​ការវិនិយោគលើគំរោងហេដ្ឋារចនាសម្ព័ន្ឋសាធារណៈនេះ ក៏បានទាក់ទាញការវិនិយោគជាបន្តបន្ទាប់ ពីសំណាក់វិនិយោគិនជាតិនិងអន្តរជាតិ ជាក់ស្ដែងគេសង្កេតឃើញ គម្រោងវិនិយោគវិនិយោគរាប់លានដុល្លារ ក៏ចាប់ផ្ដើមសម្លឹងទៅកាន់ខេត្តមួយនេះផងដែរ ។

គម្រោងវិនិយោគធំៗ មួយចំនួនដែលឃើញប្រកាសដាក់ទុនវិនិយោគ នៅក្នុងខេត្តពោធិ៍សាត់រួមមាន គម្រោងបង្កើតរោងចក្រដំឡើងរថយន្តហ្វដ និងសហគ្រាសផលិតកែវក្រដាស ដែលដាក់ដំណើរការជាដើម ព្រមជាមួយនឹងគម្រោងមួយចំនួនទៀតក្នុងទឹកដីនៃខេត្តមួយនេះ ។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ថា ខេត្តពោធិ៍សាត់ជាខេត្តមួយ ដែលកំពុងមានសក្ដានុពល ប្រជាពលរដ្ឋក៏ចាប់ផ្ដើមានជីវភាពធូរធា ហើយការអភិវឌ្ឍហេដ្ឋារចនាសម្ព័ន្ធ ក៏បានធ្វើឱ្យមានការទាក់ទាញកាន់តែខ្លាំង ដល់វិនិយោគិនជាតិ និងអន្តរជាតិ ជាមួយនឹងតំបន់ទេសចរណ៍ក៏កាន់តែទាក់ទាញផងដែរ ។

លោកបន្តថា “តម្លៃដីធ្លីនៅក្នុងខេត្តមួយនេះ មានការប្រែប្រួលខ្លាំង ចាប់ពីតម្លៃត្រឹមតែ១ដុល្លារក្នុងមួយម៉ែត្រការ៉េ ដល់រាប់រយដុល្លារអាមេរិកក្នុងមួយម៉ែត្រការ៉េ ។ ប៉ុន្តែសម្រាប់អ្នកវិនិយោគ មានចក្ខុវិស័យរយៈពេលវែង អាចវិនិយោគដីធ្លីនៅក្នុងខេត្តនេះ គឺមិនខុសទេ”។

លោកបន្ថែមថា ហេដ្ឋារចនាសម្ព័ន្ធក្នុងខេត្តនេះ គឺជាកត្តាទាក់ទាញមួយសម្រាប់វិនិយោគិន ដូចជា ផ្លូវតភ្ជាប់ទៅកាន់ខេត្តផ្សេងទៀត និងទៅកាន់ព្រំដែនកម្ពុជាថៃ ដែលធ្វើ ឱ្យពលរដ្ឋ កាន់តែមានភាពងាយស្រួល ក្នុងការធ្វើដំណើរទៅកាន់ខេត្តផ្សេងៗ និងសម្រាប់ដឹកជញ្ជូនទំនិញជាដើម ។

លោកម៉ៅ ធនិន្ទអភិបាលខេត្តពោធិ៍សាត់បានថ្លែងថា ការបណ្ដាក់ទុនវិនិយោគជាបន្តបន្ទាប់ នៅក្នុងភូមិសាស្ត្រនៃខេត្តពោធិ៍សាត់ នឹងផ្ដល់អត្ថប្រយោជន៍ដល់ប្រជាពលរដ្ឋក្នុងមូលដ្ឋាន ក៏ដូចជា ប្រជាពលរដ្ឋទូទាំងប្រទេសផងដែរ ជាក់ស្ដែងនៅពេលខេត្តនេះមានរោងចក្រសហគ្រាស គឺពលរដ្ឋដែលមានជំនាញនឹងមានអាទិភាព ហើយកូនចៅអ្នកស្រុកក៏អាចធ្វើការនៅជិតផ្ទះ ដោយមិនចាំបាច់ធ្វើដំណើរ ទៅកាន់ខេត្តផ្សេងតំបន់ផ្សេងឬចំណាកស្រុកឡើយ។

រដ្ឋាភិបាលបាននិងកំពុងស្ថាបនាឡើងវិញ និងពង្រីកផ្លូវជាតិលេខ៥ ដែលមានប្រវែងជាង៤០០គីឡូម៉ែត្រពីរាជធានីភ្នំពេញ ទៅកាន់ក្រុងប៉ោយប៉ែត ខេត្តបន្ទាយមានជ័យ និងកំពុងស្ថាបនាផ្លួវថ្មីមួយខ្សែ គឺផ្លូវជាតិលេខ១០ តភ្ជាប់ពីស្រុកសំឡូត ខេត្តបាត់ដំបង មកកាន់ខេត្តពោធិសាត់ ឆ្ពោះទៅកាន់ខេត្តកោះកុង ដើម្បីសម្រួលការដឹកជញ្ជូនទំនិញ និងធ្វើសមាហរណកម្មផ្ទៃក្នុងកម្ពុជា៕

បណ្ដាក្រុមហ៊ុនប្រតិបត្តិករទេសចរណ៍នឹងផ្ដោតសំខាន់លើអេកូទេសចរណ៍ ពេលកម្ពុជា បើកព្រំដែនឡើងវិញ

ដោយៈសុខុម

ភ្នំពេញ: បណ្ដាក្រុមហ៊ុនប្រតិបត្តិករទេសចរណ៍នៅកម្ពុជា ដែលជាប្រទេសចាក់វ៉ាក់សាំងកូវីដ-១៩ បានច្រើនជាងគេបំផុតទី២ ប្រចាំតំបន់អាស៊ីអាគ្នេយ៍ បន្ទាប់ពីប្រទេសសិង្ហបុរី កំពុងដាក់សម្ពាធឱ្យរដ្ឋាភិបាល បើកព្រំដែនឡើងវិញនៅខែវិច្ឆិកា ចុងឆ្នាំនេះ ដើម្បីទទួលស្វាគមន៍ភ្ញៀវទេសចរអន្តរជាតិ ដែលចាក់វ៉ាក់សាំងគ្រប់ដូស។

នៅពេលព្រំដែនបើកឡើងវិញ ភ្ញៀវទេសចរទាំងនោះ នឹងមានឱកាសបានទៅកម្សាន្តនៅគោលដៅអេកូទេសចរណ៍ ដ៏ស្រស់ត្រកាលដែលទើបនឹងបង្កើតថ្មី។ នេះបើយោងតាមសារព័ត៌មាន South China Morning Post ដែលបានចុះផ្សាយកាលពីថ្ងៃទី២០ កញ្ញា។

លោក Nick Ray អ្នកប្រឹក្សាយោបល់ផ្នែកវិស័យទេសចរណ៍សម្រាប់គម្រោង “និរន្តរភាពតំបន់ទេសភាព និងទេសចរណ៍ធម្មជាតិកម្ពុជា” (Cambodia Sustainable Landscape and Ecotourism Project) ហៅកាត់ CSLEP មានប្រសាសន៍ថា “អេកូទេសចរណ៍ កំពុងបោះជំហានឆ្ពោះទៅមុខទូទាំងពិភពលោក ហើយវាពិតជាមានសារៈសំខាន់ណាស់នៅកម្ពុជា”។

អ្នកជំនាញរូបនេះបានបន្ថែមទៀតថា ការរីករាលដាលវីរុសកូវីដ-១៩ បានផ្លាស់ប្តូរស្ថានភាពនេះកាន់តែខ្លាំង នៅពេលមនុស្សចាប់ផ្ដើមងាកទៅស្វែងរកកន្លែងវាលៗ ដែលមិនមានការបិទជិត ដើម្បីជៀសផុតពីការឆ្លងវីរុសកូវីដ-១៩ ហើយពួកគេរីករាយនឹងដំណើរកម្សាន្តដើម្បីគយគន់សម្រស់ធម្មជាតិ។

គម្រោង CSLEP ដែលមានទំហំចំណាយ៥៤លានដុល្លារអាមេរិក តំណាងឱ្យការវិនិយោគវិស័យទេសចរណ៍ ធំបំផុតរបស់ធនាគារពិភពលោក (World Bank) នៅកម្ពុជា។ គម្រោងផ្តួចផ្តើមដែលមានរយៈពេល៥ឆ្នាំនេះ នឹងគ្របដណ្ដប់លើខេត្តចំនួន៧ ដោយរួមបញ្ចូលទាំងជួរភ្នំក្រវាញ ដែលមានព្រៃនាំទឹកភ្លៀង គ្មានអ្នកប៉ះពាល់ធំបំផុតប្រចាំអាស៊ីអាគ្នេយ៍ ព្រៃលិចទឹកនៅបឹងទន្លេសាប និងភ្នំគូលែន ស្ថិតក្នុងខេត្តសៀមរាបផងដែរ។

រហូតមកដល់ពេលនេះ គម្រោងCSLEP បានកំណត់ទីតាំងអេកូទេសចរណ៍ចំនួន១៦កន្លែង ដែលនឹងទាក់ទាញភ្ញៀវទេសចរជាតិ និងអន្តរជាតិ។ ថវិកានៃគម្រោងនេះនឹងត្រូវចំណាយទៅលើការកែលម្អផ្លូវ ចូលទៅកាន់តំបន់ដាច់ស្រយាលទាំងនេះ ដោយអភិ​វ ឌ្ឍផ្លូវឡើងភ្នំ ផ្លូវជិះកង់ និងមជ្ឈមណ្ឌលទេសចរណ៍ ហើយបណ្តុះបណ្តាលពលរដ្ឋក្នុងមូលដ្ឋានផ្នែកបដិសណ្ឋារកិច្ច ការគ្រប់គ្រងសំរាម និងការយល់ដឹងអំពីសំរាម។

នៅទីបំផុត ផ្ទះសំណាក់បែបធម្មជាតិ នឹងត្រូវសាងសង់ឡើង ប៉ុន្តែជាដំបូងនឹងលេចចេញជំរំបោះតង់សិន។
គម្រោងសាកល្បងចំនួន៣នឹងចាប់ផ្តើមអនុវត្តកម្មវិធី CSLEP ដូចជាតំបន់ទេសច​រណ៍ទឹកធ្លាក់ជ្រាវ ក្នុងខេត្តកំពង់ស្ពឺ តំបន់ទេសចរណ៍ច្រកល្អៀង ក្នុងខេត្តពោធិ៍សាត់ និងភូមិអន្លង់ធំ ស្ថិតក្នុងឧទ្យានជាតិភ្នំគូលែន កន្លែងដែលកម្មវិធីភ្នំគូលែន ដែលទទួលបានជំនួយពីអង្គការ NGO Archaeology and Development Foundation បានដំណើរការតាំងពីឆ្នាំ២០០៨។

លោក JB Chevance នាយកអង្គការ NGO Archaeology and Development Foundation មានប្រសាសន៍ថា “យើងលាយបញ្ចូលគ្នានូវការអភិរក្ស ការអភិវឌ្ឍ និងការស្រាវជ្រាវបុរាណវិទ្យា។ ហើយមានសហគមន៍ក្រីក្រខ្លាំងរស់នៅទីនេះ”។

លោក Bill Barnett នាយកគ្រប់គ្រងក្រុមហ៊ុនផ្ដល់ប្រឹក្សាយោបល់ ផ្នែកបដិសណ្ឋារកិច្ចអន្តរជាតិ C9 Hotelworks មានប្រសាសន៍ថា វាពិតជាចាំបាច់ណាស់ ដែលសហគមន៍នានា ត្រូវបានដាក់បញ្ចូលជាចំណុចស្នូលនៃកម្មវិធីផ្ដួចផ្ដើមបែបនេះ។

លោកបានពន្យល់ថា “ត្រូវឱ្យសហគមន៍នានាចូលរួម ហើយធ្វើការជាមួយពួកគេ។ ការធ្វើដូច្នេះនឹងជួយបញ្ចៀសការទន្ទ្រានចូល ការបរបាញ់សត្វ និងការកាប់ឈើខុសច្បាប់។ នៅចុងបញ្ចប់ ប្រទេសកម្ពុជា នឹងមិនចាំបាច់ពឹងផ្អែកលើក្រុងសីហនុ ឬមជ្ឈមណ្ឌទេសចរណ៍ដែលផ្ដោតលើល្បែងស៊ីសង ដែលសម្រាប់តែជនបរទេសទៀតឡើយ”៕ South China Morning Post៕

អ្នកឧកញ៉ាគិត ម៉េងលើកឡើងពីសភមង្គលគ្រួសារ និងប្រាក់

ដោយៈគង់ សូរិយា

        ភ្នំពេញៈ អ្នកឧកញ៉ាគិត ម៉េងមហាសេដ្ឋី ដែលមានមុខជំនួញជាច្រើននៅក្នុងដៃបានលើកឡើងពីសុភមង្គលគ្រួសារ និងទឹកប្រាក់ ដែលអ្នកខ្លះថាមិនអាចទិញសុភមង្គលបាន ប៉ុន្តែក្នុងបរិបទខ្លះវាអាចទិញសុភមង្គលបានច្រើន។

លោកបានសរសរលើបណ្តាញទំនាក់ទំនងសង្គមនៅថ្ងៃទី២០ កញ្ញានេះថា ភរិយារបស់ខ្ញុំតែងតែលើកឡើងថាកូនៗ គឺជាកំណប់ទ្រព្យធំបំផុតរបស់ពួកយើង។  ពួកគាត់គឺជាគ្រាប់ពូជដែលលូតលាស់បានល្អ លុះត្រាតែយើងអប់រំ ចិញ្ចឹមបីបាច់ថែរក្សា និងបង្ហាញចិត្តសប្បុរសរបស់យើងទៅកាន់ពួកគាត់។  ភរិយារបស់ខ្ញុំតែងតែរំលឹកទៀតថា ទង្វើសប្បុ​រសធម៌ ទោះតូចតាចយ៉ាងណាក៏ដោយ ក៏មិនចាត់ទុកជាទង្វើខ្ជះខ្ជាយឡើយ។  ខ្ញុំពិតជាយល់ស្របទាំងស្រុងជាមួយនឹងគំនិតរបស់អូន ចំណាន។

មនុស្សភាគច្រើននិយាយថា “លុយមិនអាចទិញសុភមង្គលបានទេ”។  ក្នុងបរិបទខ្លះ វាគឺជាការពិត។  ទោះយ៉ាងណាក៏ដោយ ក៏ប្រាក់អាចទិញសុភមង្គលច្រើន សម្រាប់អ្នក នៅពេលដែលប្រាក់ទាំងនោះត្រូវបានផ្តល់ ចែករំលែក និងប្រើប្រាស់ដើម្បីសម្រេចបាននូវផលល្អប្រសើរ ដូចជា ការរួមចំណែកសម្រាប់បុព្វហេតុណាមួយ និងគំនិតផ្តួចផ្តើមដែលសំខាន់សម្រាប់សហគមន៍របស់យើង។

លោកបន្តថា “ខ្ញុំ និងក្រុមហ៊ុន រ៉ូយ៉ាល់គ្រុប បានគាំទ្រគំនិតផ្តួចផ្តើមមួយចំនួនដែលយើងជឿជាក់ថា នឹងជួយប្រទេសនិងប្រជាជនរបស់យើងនៅពេលអនាគត។ យុវជន ការអប់រំ និងការថែទាំសុខភាពកុមារ ស្ថិតនៅក្នុងបញ្ជីអាទិភាពរបស់យើង។  ក្នុងនាមជាឪពុកម្តាយ យើងចង់ធ្វើឱ្យបានច្រើនតាមដែលអាចធ្វើទៅបាន ដើម្បីប្រាកដថាកូនៗរបស់យើង និងកុមារកម្ពុជាទទួលបានការអប់រំ និងការថែទាំសុខភាពប្រកបដោយគុណភាព”។

ជាផ្នែកមួយនៃការទទួលខុសត្រូវសង្គមរបស់ក្រុមហ៊ុន រ៉ូយ៉ាល់គ្រុប យើងបានគាំទ្រគំនិតផ្តួចផ្តើមផ្សេងៗ ដូចជា មូលនិធិគន្ធបុប្ផាកម្ពុជា មន្ទីរពេទ្យកុមារអង្គរ និងអង្គការស្នាមញញឹមកម្ពុជា ដែលគាំទ្រដោយក្រុមហ៊ុន វីង ការផ្តល់អាហារូបករណ៍របស់ក្រុមហ៊ុន សែលកាត ដល់សិស្សានុសិស្សក្នុងការសរសេរកូដឌីជីថល ការចែកមួកសុវត្ថិភាពដល់កុមារ ការបង្ហាញអំពីសុវត្ថិភាពចរាចរណ៍ដល់កុមារ ដែលរៀបចំដោយក្រុមហ៊ុន Ezecom និងការអប់រំលំដាប់អន្តរជាតិ ដែលរៀបចំទ្បើងដោយសាលាអន្តរជាតិសៅប្រីដកម្ពុជា។ យើងប្តេជ្ញាចិត្ត ហើយផ្តោតលើការផ្តល់ឱ្យយុវជនរបស់យើងនូវអនាគតភ្លឺស្វាង។

អ្នកអាចចូលរួមចំណែកបានផងដែរ ដោយបរិច្ចាគ ឬរួមចំណែកដល់គំនិតផ្តួចផ្តើមណាមួយដែលសំខាន់ចំពោះអ្នក។ សូមចូលរួម ឬរៀបចំគំនិតផ្តួចផ្តើមរៃអង្គាសប្រាក់ដើ   ​ម្បី​ប្រមូលសៀវភៅ ស្ម័គ្រចិត្តពេលវេលារបស់អ្នក ដើម្បីបង្រៀនក្មេងៗនៅតំបន់ជនបទ។

អ្នកឧកញ៉ាគិត ម៉េងបានបន្តថា “សូមចងចាំថា ទង្វើសប្បុរសធម៌ទោះក្នុងកម្រិតណាក៏ដោយ ក៏ទង្វើទាំងនោះមិនខ្ជះខ្ជាយឡើយ។  សូមរួមគ្នាដោយការបង្ហាញចិត្តសប្បុ​រស នោះយើងនឹងបង្កើតឥទ្ធិពលវិជ្ជមានមកលើប្រទេសកម្ពុជា”៕