ដោយៈសុខុម

គូឡាឡាំពួ: អ្នកជំនាញបានបង្ហើបថា ឧស្សាហកម្មលំនៅដ្ឋាន និងអចលនទ្រព្យចាំបាច់ត្រូវដោះស្រាយបញ្ហាប្រឈមធំៗចំនួន៣ គឺនិរន្តរភាព នវានុវត្តន៍ (ការច្នៃប្រឌិតថ្មី) និងបច្ចេកវិទ្យាដើម្បីស្ដារឧស្សាហកម្មនេះ និងសេដ្ឋកិច្ចឡើងវិញក្នុងយុគសម័យកូវីដ-១៩។

ក្នុងសុន្ទរកថាស្វាគមន៍អំឡុងកិច្ចប្រជុំកំពូលស្តីពី លំនៅដ្ឋាន និងអចលនទ្រព្យម៉ាឡេស៊ី ឆ្នាំ២០២១ (2021 Malaysian Housing and Property Summit) កាលពីថ្ងៃអង្គារ ទី២៧ កក្កដា លោក Tan Sri Michael Yeoh ប្រធានវិទ្យាស្ថានយុទ្ធសាស្រ្ត KSI សម្រាប់អាស៊ី-ប៉ាស៊ីហ្វិក (KSI Strategic Institute for Asia Pacific) បានថ្លែងថា ឧស្សាហកម្មនេះ ចាំបាច់ត្រូវរៀបចំផែនការរបស់ខ្លួន ដើម្បីធ្វើឱ្យសេដ្ឋកិច្ចមានដំណើរទៅមុខឡើងវិញ។

លោកលើកឡើងថា “គ្រួសារ និងអាជីវកម្មច្រើនណាស់ ដែលបានរងផលប៉ះពាល់ ហើយយើងត្រូវធ្វើការរួមគ្នាដើម្បីស្ដារឡើងវិញ។ យើងក៏ត្រូវការឱ្យរដ្ឋាភិបាល មានវិធានការឆ្លើយតបឱ្យបានច្រើនជាងមុនទៅនឹងតម្រូវការ”។

លោកបន្តថា ”គិតពីសហគមន៍អាជីវកម្ម ដោយធ្វើការរួមគ្នាជាមួយវិស័យឯកជន។ កិច្ចសហការនេះ ពិតជាមានសារៈសំខាន់ណាស់ ហើយឧស្សាហកម្មលំនៅដ្ឋាន និងអចលនទ្រព្យអាចនឹងនាំមុខនៅក្នុងការកសាងសេដ្ឋកិច្ច”។

លោកគូសបញ្ជាក់ថា សម្រាប់និរន្តរភាព យើងត្រូវធ្វើឱ្យប្រាកដថា យើងអាចរក្សាបាននូវនិរន្តរភាព ពីព្រោះនិរន្តរភាពមានសារៈសំខាន់ សម្រាប់ឧស្សាហកម្មលំនៅដ្ឋាន និងអចលនទ្រព្យ។ ឧស្សាហកម្មនេះត្រូវតែមានភាពច្នៃប្រឌិតខ្ពស់ ដោយយើងត្រូវមានសមត្ថភាពបង្កើតភាពច្នៃប្រឌិត ពីព្រោះវាជាគន្លឹះនៅក្នុងការកែប្រែឧស្សាហកម្មនេះ។

ចំណុចចុងក្រោយគឺបច្ចេកវិទ្យា។ បច្ចេកវិទ្យាគឺជាអ្នកនាំមកនូវការផ្លាស់ប្ដូរដ៏អស្ចា រ្យសម្រាប់គ្រប់វិស័យនៃសេដ្ឋកិច្ច។ ឧស្សាហកម្មលំនៅដ្ឋាន និងអចលនទ្រព្យចាំបាច់ត្រូវមានសមត្ថភាពប្រើប្រាស់បច្ចេកវិទ្យា ដើម្បីពន្លឿនការដាក់ចេញ ប្រព័ន្ធសាងសង់បែបឧស្សាហកម្ម (Industrialised Building System (IBS)) ដើម្បីធនាបានថា បច្ចេកវិទ្យាចាក់ឫសកាន់តែជ្រៅនៅក្នុងឧស្សាហកម្មនេះ”។

កិច្ចប្រជុំកំពូលដែលធ្វើឡើងតាម Video Conference នេះត្រូវបានរៀបចំឡើងដោយវិទ្យាស្ថាន KSI Strategic Institute for Asia Pacific និង International Real Estate Federation (Fiabci) Malaysia ដែលជាស្ថាប័នសាងបណ្ដាញអាជីវកម្ម។ អ្នកចូលរួមជាង២៧០នាក់ បានចុះឈ្មោះចូលរួមក្នុងកិច្ចប្រជុំកំពូលរយៈពេលមួយថ្ងៃនេះ។

លោក Datuk Seri Koe Peng Kang ប្រធានរបស់ Fiabci Malaysia បានជំរុញ ឱ្យឧស្សាហកម្មលំនៅដ្ឋាន និងអចលនទ្រព្យបន្តព្យាយាម និងបោះជំហានឆ្ពោះទៅមុខ ព្រោះស្ថានភាព ដ៏អាក្រក់ជិតកន្លងផុតហើយ ដោយប្រទេសម៉ាឡេស៊ី ប្រហែលជាអាចសម្រេចបានភាពស៊ាំសហគមន៍? (Herd immunity) នៅត្រឹមខែតុលា ដែលនឹងអនុញ្ញាតឱ្យបើកសេដ្ឋកិច្ចឡើងវិញ។

ក្នុងសុន្ទរកថាបើកកិច្ចប្រជុំដដែលនេះ លោកស្រី Datuk Zuraida Kamaruddin រដ្ឋមន្រ្តីក្រសួងលំនៅដ្ឋានបានធ្វើការកត់សម្គាល់ថា បណ្ដាក្រុមហ៊ុនអភិវឌ្ឍន៍បានធ្វើការកែសម្រួលយុទ្ធសាស្ត្រអាជីវកម្មរបស់ពួកគេ ឱ្យសមស្របទៅនឹងការធ្លាក់ចុះនៃទីផ្សារដើម្បីរក្សាការប្រកួតប្រជែង ក៏ដូចជាដើម្បីជម្នះបញ្ហាប្រឈម និងស្ថាបភាពមិនច្បាស់លា​ស់នានា។ លោកស្រីជឿថា បណ្ដាក្រុមហ៊ុនអភិវឌ្ឍន៍ បានសម្របខ្លួនទៅនឹងបរិបទថ្មីនៅក្នុងបរិយាកាសអាជីវកម្មអំឡុងសម័យកូវីដ-១៩។

ទោះជាយ៉ាងណា លោកស្រីយល់ថា អចលនទ្រព្យប្រហែលជាមានតម្លៃមិនធូរអំឡុងសម័យកូវីដ-១៩៕

ដោយៈ ម៉ាណេត

ភ្នំពេញៈ អាគារពាណិជ្ជកម្ម សំដៅទៅគម្រោងអភិវឌ្ឍន៍ អចលនទ្រព្យទាំងឡាយណា ដែលប្រើសម្រាប់ការធ្វើអាជីវកម្ម ដែលរួមសណ្ឋាគារ ផ្សារទំនើប អគារការិយាល័យ ហាងលក់ទំនិញដុំនិងរាយ អាគារសេវាកម្មចម្រុះ និងអគារអាផាតមិនជាដើម។

ក្នុងរយៈកាលចុងក្រោយនេះ គម្រោងសំណង់អគារបានកើនឡើងយ៉ាងច្រើន នៅទីក្រុងភ្នំពេញ។ បច្ចុប្បន្ន វិស័យសំណង់អចលនទ្រព្យ ពិសេស អាគារពាណិជ្ជកម្ម បាននិងកំពុងរីកដុះដាលយ៉ាងខ្លាំង នៅក្នុងប្រទេសកម្ពុជា ពិសេសទីក្រុងភ្នំពេញ និងក្រុងពះសីហនុ។

ទាក់ទងនឹងអាគារពាណិជ្ជកម្មបែបចម្រុះនេះ អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ ERA Cambodia លោកខន គង្គា បានថ្លែងប្រាប់កាលពីថ្មីៗនេះ អាគារពាណិជ្ជកម្មបែបចម្រុះ (mixed-use development) មានលក្ខណៈពិសេសជាច្រើន រួមបញ្ចូលទាំងខុនដូ ការិយាល័យ ផ្សារទំនើប និងសេវាកម្មជាច្រើនទៀត។

ជាមួយគ្នានេះដែរ លោកបានលើកឡើងថា ប្រទេសជិតខាង ដូចជាប្រទេសសិង្ហបុរី និងថៃជាដើម បានអភិវឌ្ឍន៍អាគារពាណិជ្ជកម្មច្រើនរួចទៅហើយ ហើយបច្ចុប្បន្នអ្នកអភិវឌ្ឍន៍ បាននាំមកការអភិវឌ្ឍបែបនេះមកកម្ពុជាដែរ ដូចជាគម្រោង Bridge គម្រោង The Peak និងគម្រោងជាច្រើនចាប់ផ្តើម មានការអភិវឌ្ឍន៍ជាអាគារពាណិជ្ជកម្ម បែបចម្រុះជាបន្តបន្ទាប់។

លោកបានលើកឡើងថា មូលហេតុដែលអ្នកអភិវឌ្ឍន៍ ធ្វើការអភិវឌ្ឍពាណិជ្ជកម្មបែបចម្រុះបែបនេះ គឺដោយសារ វាមានភាពងាយស្រួលសម្រាប់អ្នកធ្វើការ អ្នករស់នៅ និងអ្នកប្រកបអាជីវកម្ម នៅកន្លែងគម្រោងអាគារពាណិជ្ជកម្មតែម្តង។ វាថែមទាំងជួយសន្សំពេលវេលា។

លោកបានឱ្យដឹងទៀតថា “ឧទាហរណ៍ បើសិនជាយើងធ្វើការ ឬរកស៊ី យើងស្នាក់នៅ និងធ្វើការក្នុងអាគារ ដែលមានសេវកម្មចម្រុះនៅនឹងមួយកន្លែងតែម្តង ដូច្នេះវាធ្វើឱ្យយើងចំណេញពេលវេលាក្នុងការធ្វើដំណើរ”។
លោកខន គង្គាបានបន្តថា គោលបំណងរបស់អ្នកអភិវឌ្ឍន៍ អាគារពាណិជ្ជកម្មបែបចម្រុះ ដើម្បីបម្រើសេវាកម្មដល់ទាំងអ្នកធ្វើការ និងអ្នករស់នៅក្នុងគម្រោងរបស់ខ្លួន។

ក្នុងរយៈពេល១០ឆ្នាំចុងក្រោយនេះ គេអាចសង្កេតឃើញមានវត្តមានអគារពាណិ​ជ្ជកម្មជាច្រើន កំពុងត្រូវបានសាងសង់ និងលេចជារូបរាងបណ្ដើរៗ តួយ៉ាងដូចជា អាគារ The Prince Happiness Plaza អគារ The Peak និង អគារ Prince International Plaza ជាដើម៕

ដោយៈគង់ សូរិយា

ភ្នំពេញៈ លោក អ្នកបានឃើញអាគារខុនដូខ្ពស់ៗនៅកម្ពុជា កាន់តែលូតលាស់ច្រើនរៀងរាល់ថ្ងៃ ប៉ុន្តែមិនដឹងតម្លៃសំណង់ឬថ្លៃសាងសង់អស់ប៉ុន្មាននោះទេ តើវាថ្លៃខ្ពស់ដូចយូនីតដែលបានលក់ចេញឬទេ?។

លោកឧកញ៉ាបណ្ឌិតគីម ហ៊ាងបានមានប្រសាសន៍ឲ្យដឹងតាមទូរស័ព្ទកាលពី ល្ងាចថ្ងៃទី២៧ កក្កដាកន្លងមកថា ការសាងសង់ខុនដូសម្រាប់លក់ តម្លៃសំណង់មានចន្លោះពី៤០០ទៅ៦០០ដុល្លារប៉ុណ្ណោះ ដោយតម្លៃនេះមិនទាន់គិតបញ្ចូលតម្លៃដីនៅឡើយទេ ប៉ុន្តែបើដីមួយម៉ែត្រការ៉េថ្លៃ២០០០ ទៅ៤០០០ដុល្លារក្នុងមួយម៉ែត្រការ៉េ តែអាចសាងសង់បានកំពស់៣០ទៅ៤០ជាន់ ហេតុនេះតម្លៃដីនៅសល់ត្រឹម២០០ទៅ៣០០ដុល្លារប៉ុណ្ណោះក្នុងមួយម៉ែត្រការ៉េ។

ហេតុនេះបើបូកបញ្ចូលគ្នាលើថ្លៃសំណង់ ថ្លៃដី ខុនដូមួយម៉ែត្រការ៉េមានតម្លៃចន្លោះ៦០០ទៅ៨០០ដុល្លារប៉ុណ្ណោះក្នុងមួយម៉ែត្រការ៉េ។

លោកឧកញ៉ាបណ្ឌិតគីម ហ៊ាងបានបន្តថា បើគិតលើតម្លៃនេះ គឺការលក់មិនគួរបារម្ភទេ បើដាក់លក់មួយម៉ែត្រការ៉េតម្លៃ២០០០ទៅ២៥០០ដុល្លារ លក់តែមួយម៉ែត្រការ៉េត្រឹម១២០០ក៏លក់បាន និងចំណេញច្រើនផងដែរ។

លោកបន្តថា “អ្វីដែលសំខាន់នៅត្រង់ថា អ្នកវិនិយោគសាងសង់ខុនដូលក់ គឺតែងតែឡើងថ្លៃ មិនឃើញចុះ បើឡើងបាន តែបញ្ហាស្ថិតត្រង់ឡើងបាន តែចុះមិនបាន”។លោកបន្តថា “ហេតុនេះទីផ្សារខុនដូមិនគួរបារម្ភនោះទេ បើលក់មួយម៉ែត្រការ៉េ១២០០ នឹងមានអ្នកទិញច្រើនមិនខាន ហើយតម្លៃនេះក៏នៅទទួលបានផលចំណេញខ្ពស់”។

លោកឧកញ៉ាបណ្ឌិតគីម ហ៊ាងបានបន្តទៀតថា អ្វីដែលលោកមើលឃើញគឺការសាងសង់ខុនដូ និងធ្វើឲ្យមានទីផ្សារមិនពិបាកពេកទេ សំខាន់លក់តម្លៃសមរម្យ៕

ដោយៈសុខហេង

ភ្នំពេញៈ បច្ចេកវិទ្យាកំពុងផ្លាស់ប្តូរពិភពលោក និន្នាការសង្គម និងសេដ្ឋកិច្ច ពិសេ​សវានឹងបង្ហាញភាពអស្ចារ្យ យ៉ាងច្រើនសំរាប់ទស្សនីយភាព នៅលើអាគារឬសំណ​ង់អ្វីមួយ។

ជាក់ស្តែងគំរោងអាគារពហុបំណងបំពាក់ LED ធំជាងគេលើលោក នឹងរំលេចខ្លួននៅតំបន់ជ្រោយចង្វារ នឹងផុសឡើងនៅទឹកដីជ្រោយចង្វារ ដែលវានិងក្លាយជានិមិត្តរូបថ្មីនៃក្រុងភ្នំពេញនាសម័យបច្ចេកវិទ្យា។ព៌តមាននេះ ត្រូវបានបង្ហាញឡើងដោយផេកមួយឈ្មោះ ASEAN Urbanist កាលពីល្ងាចថ្ងៃទី២៧ កក្កដាកន្លងមកនេះ។

គំរោងនេះនឹងបង្ហាញនូវក្តីរំភើប សម្រាប់ ព្រឹត្តការណ៍ដ៏អស្ចារ្យ Sea game 2023 ដែលកម្ពុជានឹងធ្វើជាម្ចាស់ផ្ទះលើកដំបូងនៅខែមិថុនា ឆ្នាំ២០២៣ខាងមុខនេះ៕