ដោយៈ ម៉ាណេត

ភ្នំពេញៈ ព្រឹទ្ធសភាកម្ពុជាឯកភាពទាំងស្រុងលើសេចក្តីព្រាងច្បាប់ស្តីពីការអនុម័តយល់ព្រមលើការធានាទូទាត់របស់រាជរដ្ឋាភិកម្ពុជាឱ្យក្រុមហ៊ុនឆាយណា ណេសិនណល ហេវីម៉ាស៊ីនណឺរីខបភើរេសិន លើគម្រោងអភិវឌ្ឍវារីអគ្គិសនីស្ទឹងតាតៃលើអានុភាព១៥០មេហ្កាវ៉ាត់ខេត្តកោះកុង។

ការពិនិត្យនិងឱ្យយោបល់ឯកភាពទាំងស្រុងលើសេចក្តីព្រាងច្បាប់នេះ ត្រូវបានធ្វើឡើង ក្នុងប្រជុំពេញអង្គព្រឹទ្ធសភាដឹកនាំដោយ សម្តេចវិបុលសេនាភក្តី សាយឈុំ ប្រធានព្រឹទ្ធសភានៅថ្ងៃទី២ ខែកក្កដា ឆ្នាំ២០២១។
លោកម៉ម ប៊ុននាងសមាជិកអចិន្រ្តៃយ៍និងជាអ្នក នាំពាក្យព្រឹទ្ធសភាបានមាន ប្រសាសន៍ថា អង្គប្រជុំព្រឹទ្ធស ភា បានពិនិត្យនិងឱ្យយោបល់ឯកភាពទាំងស្រុងលើសេចក្តីព្រាងច្បាប់ទាំងមូលដោយឥតកែប្រែចំនួន៤០សំឡេងនៃចំនួនសមាជិកព្រឹទ្ធសភាទាំងមូល។

សេចក្តីព្រាងច្បាប់នេះតាក់ តែងឡើងមាន៣មាត្រាត្រូវបានរដ្ឋសភានៃព្រះរាជាណាចក្រកម្ពុជា អនុម័តយល់ព្រមជាលើកដំបូងចំនួន៧៩ សំឡេងនៃចំនួនសមាជិករដ្ឋ សភាទាំងមូល កាលពីថ្ងៃទី២៤ ខែមិថុនា ឆ្នាំ២០២១នាសម័យប្រជុំរដ្ឋសភាលើកទី៦ នីតិកាលទី៦។

លោកស៊ុយ សែម រដ្ឋមន្រ្តីក្រសួងរ៉ែ និងថាមពល អមដោយតំណាងក្រសួងសេដ្ឋ កិច្ចនិងហិរញ្ញវត្ថុ ថ្នាក់ដឹកនាំ មន្ត្រីជាន់ខ្ពស់ និងមន្ត្រីជំនាញ បានអញ្ជើញមកការពារសេចក្តីព្រាងច្បាប់នេះ។

គម្រោងអភិវឌ្ឍវារីអគ្គិសនីស្ទឹងតាតៃលើនេះ មានទំហំទុនវិនិយោគសរុបចំនួន៣៨៩ ៤១៤ ០០៤ដុល្លារអាមេរិក (បីរយប៉ែតសិបប្រាំបួនលាន បួនរយដប់បួនពាន់ បួនដុល្លារអាមេរិក)ស្ថិតនៅចំណុចប្រ សព្វនៃដៃស្ទឹងចំនួន២គឺស្ទឹងតាតៃនិងស្ទឹងកែបក្នុងភូមិ សាស្ត្រឃុំឫស្សីជ្រុំនិងឃុំតាតៃលើស្រុកថ្មបាំងខេត្តកោះកុង។

គម្រោងនេះ វិនិយោគក្រោមរូបភាពការសាងសង់អាជីវកម្មផ្ទេរ(BOT)ដែលមានរយៈ ពេលសម្បទាន៣៩ឆ្នាំសាង សង់០៤ឆ្នាំនិងរយៈពេលធ្វើ អាជីវកម្ម៣៥ឆ្នាំ ដែលអាចផលិតថាមពលអគ្គិសនីប្រចាំ ឆ្នាំប្រមាណ៥២៧លានគីឡូវ៉ាត់ម៉ោង។

នៅក្នុងសម័យប្រជុំលើកទី៧ព្រឹទ្ធសភានីតិកាលទី៤នេះដែរ អង្គប្រជុំក៏ពិនិត្យនិងឱ្យយោបល់លើសេចក្តីព្រាងច្បាប់ស្តីពីការអនុម័តយល់ព្រមលើការធានាទូទាត់របស់រាជរដ្ឋាភិបាលកម្ពុជាឱ្យក្រុមហ៊ុនស្នេថេកខូអិលធីឌីសម្រាប់គម្រោងអភិវឌ្ឍខ្សែបណ្តាញបញ្ជូនអគ្គិសនីតង់ ស្យុង៥០០គីឡូវ៉ុលពីខេត្ត បាត់ដំបងទៅកាន់ព្រំដែនកម្ពុជា-ថៃ។

សេចក្តីព្រាងច្បាប់ស្តីពីការអនុម័តយល់ ព្រមលើការធានាទូទាត់របស់រាជរដ្ឋាភិបាលកម្ពុជាឱ្យក្រុមហ៊ុនស្នេថេកខូអិលធីឌីសម្រាប់គម្រោងអភិវឌ្ឍខ្សែបណ្តាញបញ្ជូនអគ្គិសនីតង់ស្យុង៥០០គីឡូវ៉ុលពីរាជធានីភ្នំពេញទៅកាន់ព្រំដែនកម្ពុជា-ឡាវ និងសេចក្តីព្រាងច្បាប់ស្តីពីការអនុម័តយល់ព្រមលើការធានាទូទាត់របស់រាជរដ្ឋាភិបាលកម្ពុជាឱ្យក្រុមហ៊ុនអគ្គិសនីវៀតណាម សម្រាប់ធានាលើការទិញថាមពលអគ្គិសនីពីប្រទេសវៀតណាមផងដែរ៕

ដោយៈ គៀតឈូ

មែលប៊នៈ តម្លៃប្រេងលើទីផ្សារអន្តរជាតិនៅថេរនៅពីថ្ងៃសុក្រនេះ បន្ទាប់ពីបណ្តារដ្ឋមន្រ្តីប្រទេសOPEC បានពន្យាពេលកិច្ចប្រជុំស្តីពីគោលនយោបាយផលិតប្រេង ខណៈប្រទេសអារ៉ាប់រួមបានបញ្ឈប់ផែនការផលិតប្រេងបន្ថែម២លានបារ៉ែលក្នុងមួយថ្ងៃនៅក្នុងមួយឆមាសទីពីរ ឆ្នាំនេះ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២ ខែកក្កដា ឆ្នាំ២០២១។

ប្រេងឆៅប្រេងនៅរដ្ឋតិចសាស សហរដ្ឋអាមេរិក (WTI) បានកើនឡើង៥សេន ស្មើនឹង៧៥,២៨ដុល្លារក្នុងមួយបារ៉ែលនិង បានកើនឡើង២,៤ភាគរយកាលពីថ្ងៃព្រហស្បតិ៍ ជាកម្រិតខ្ពស់បំផុត ចាប់តាំងពីខែតុលា ឆ្នាំ ២០១៨។

ប្រេងឆៅប្រភេទ Brent បានកើនឡើង៤សេន ស្មើនឹង៧៥,៨៨ដុល្លារក្នុងមួយបារ៉ែល បន្ទាប់ពីឡើងថ្លៃ១,៦ ភាគរយកាលពីថ្ងៃព្រហស្បតិ៍។

ប្រេងឆៅទាំងពីរប្រភេទបានកើនឡើងគួរឱ្យកត់សម្គាល់ កាលពីថ្ងៃព្រហស្បតិ៍ តាមគម្រោង ដែលគាំទ្រដោយប្រទេសអារ៉ាប់ប៊ីសាអូឌីត និងរុស្ស៊ី សម្រាប់អង្គការនៃប្រទេសប្រេង និងសម្ព័ន្ធមិត្ត ដែលត្រូវបានគេស្គាល់ថាជា OPEC ក្នុងការបន្ថែមការផលិតប្រេង៤០០,០០០បារ៉ែលក្នុងមួយខែ ចាប់ពីខែសីហា ដល់ខែធ្នូឆ្នាំ ២០២១ ក៏បានមានការប្រុងប្រយ័ត្នខ្ពស់ជាងការរំពឹងទុករបស់វិនិយោគិន។

តម្លៃប្រេងបានធ្លាក់ចុះវិញ បន្ទាប់បណ្តាប្រទេស OPEC ពន្យារពេលកិច្ចប្រជុំថ្នាក់រដ្ឋមន្រ្តីដល់ថ្ងៃសុក្រនេះ។

អ្នកវិភាគនៅក្រុមហ៊ុន ING បាននិយាយថា “ការខកខានមិនបានឈានដល់កិច្ចព្រមព្រៀង (បន្ថែមការផលិតប្រេង) អាចមានន័យថានិងបន្តជាមួយនឹងកម្រិតផលិត ដូចបច្ចុប្បន្ន ដែលមានន័យថាទីផ្សារផលិតប្រេងនឹងស្ថិតនៅកម្រិតទាប ឬទាបជាងមុន៕

ដោយៈ ប៊ី

ភ្នំពេញៈ ព្រឹទ្ធសភាកម្ពុជាបានគាំទ្រនូវសំណើសេចក្តីព្រាងច្បាប់ចំនួន៤ របស់រាជរដ្ឋាភិបាល ចំពោះការធានាទូទាត់លើគម្រោងវិនិយោគវិស័យថាមពលអគ្គិសនី ដែលមានតម្លៃសរុបជិត១ពាន់លានដុល្លារអាមេរិក។ នេះបើយោងតាមការចេញផ្សាយរបស់សារព័ត៌មានរដ្ឋនៅថ្ងៃទី២ ខែកក្កដា ឆ្នាំ២០២១។

យោងតាមសេចក្តីព្រាងច្បាប់ ដែលត្រូវបានព្រឹទ្ធសភាអនុម័ត ក្រោយពីបានពិភាក្សានិងឱ្យយោបល់ ក្រោមការដឹកនាំរបស់សម្តេចវិបុលសេនាភក្តីសាយ ឈុំប្រធានព្រឹទ្ធសភា នៅព្រឹកថ្ងៃទី២ ខែកក្កដានេះ មានដូចជាៈ – ការធានាទូទាត់របស់រាជរដ្ឋាភិបាលកម្ពុជាឱ្យក្រុមហ៊ុន ស្នេថេក ខូ អិលធីឌី សម្រាប់គម្រោងអភិវឌ្ឍន៍ខ្សែបណ្តាញបញ្ជូនអគ្គិសនីតង់ ស្យុង៥០០គីឡូវ៉ុល ពីខេត្ត បាត់ដំបងទៅកាន់ព្រំដែនកម្ពុជា-ថៃ។

– ការធានាទូទាត់របស់រាជរដ្ឋាភិបាលកម្ពុជាឱ្យក្រុមហ៊ុន ស្នេថេក ខូ អិលធីឌី សម្រាប់គម្រោងអភិវឌ្ឍន៍ខ្សែបណ្តាញបញ្ជូនអគ្គិសនី តង់ស្យុង ៥០០គីឡូវ៉ុល ពីរាជធានីភ្នំពេញទៅកាន់ព្រំដែនកម្ពុជា-ឡាវ។

– ការធានាទូទាត់របស់រាជរដ្ឋាភិបាលកម្ពុជា ឱ្យក្រុមហ៊ុនអគ្គិសនីវៀតណាម សម្រាប់ធានាលើការទិញថាមពលអគ្គិសនីពីប្រទេសវៀតណាម និងការ ធានាទូទាត់របស់រាជរដ្ឋាភិ បាលកម្ពុជា ឱ្យក្រុមហ៊ុន ឆាយណា ណេសិនណល ហេវី ម៉ាស៊ីនណឺរី ខបភើរេសិន សម្រាប់គម្រោងអភិវឌ្ឍន៍វារីអគ្គិសនីស្ទឹងតាតៃលើអានុភាព១៥០មេហ្កាវ៉ាត់ ខេត្តកោះកុង។

គម្រោងវិនិយោគចំនួន៣ ក្រៅពីការធានាលើការទិញថាមពលអគ្គិសនីពីប្រទេសវៀតណាម គឺស្ថិតក្នុងរូបភាពសាងសង់ អាជីវកម្ម ផ្ទេរ(BOT) ក្នុងទុនសរុបជិត១.០០០លានដុល្លារអាមេរិក ក្នុងនោះគម្រោងអភិវឌ្ឍន៍វារីអគ្គិសនីស្ទឹងតាតៃលើអានុភាព១៥០មេហ្កាវ៉ាត់ ខេត្តកោះកុង មានតម្លៃជាង ៣៨៩លានដុល្លារ ក្នុងរយៈ ពេលសម្បទាន៣៩ ឆ្នាំ។

ចំណែក គម្រោងអភិវឌ្ឍន៍ខ្សែបណ្តាញបញ្ជូនអគ្គិសនីតង់ស្យុង ៥០០គីឡូវ៉ុល ពីខេត្តបាត់ដំបងទៅកាន់ព្រំដែនកម្ពុជា-ថៃ មានតម្លៃសរុបជាង ១១០លានដុលារ ក្នុងរយៈ ពេលសម្បទាន២៧ឆ្នាំ ខណៈគម្រោងអភិវឌ្ឍន៍ខ្សែបណ្តាញបញ្ជូនអគ្គិសនី តង់ស្យុង ៥០០គីឡូវ៉ុល ពីរាជធានីភ្នំពេញទៅកាន់ព្រំដែនកម្ពុជា-ឡាវ មានទុនសរុបជាង៣៣០លានដុល្លារ ក្នុងរយៈពេលសម្បទាន២៨ឆ្នាំ។

លោកស៊ុយ សែមរដ្ឋមន្ត្រីក្រសួងរ៉ែ និងថាមពល បានបញ្ជាក់ថា គម្រោងវិនិយោគទាំង៤នេះ ត្រូវបានរាជរដ្ឋាភិបាលកម្ពុជា ធ្វើកិច្ចសន្យាធានាការទូទាត់ឱ្យទៅក្រុមហ៊ុនវិនិយោគ ក្នុងករណីអគ្គិសនីកម្ពុជាមិនទទួលទិញថាមពលអគ្គិសនីក្រោយពីផលិតបាន ការបញ្ចប់គម្រោងវិនិយោគ ឬ ប្រធានសក្តិណាមួយផ្នែកនយោបាយដែលរាំងស្ទះដល់ការអភិវឌ្ឍ ក្នុងរយៈពេលនៃការផ្តល់សិទ្ធិសម្បទាន។

រាជរដ្ឋាភិបាលកម្ពុជា បានអនុញ្ញាតឱ្យក្រុមហ៊ុនទីប្រឹក្សាមកពីប្រទេសជប៉ុន សហការជាមួយគណៈកម្មការអន្តរ ក្រសួង ដែលដឹកនាំដោយក្រសួងរ៉ែ និងថាមពល ធ្វើការសិក្សានិងរៀបចំផែនការមេអភិវឌ្ឍវិស័យថាមពលសម្រាប់ឆ្នាំ២០២០ ដល់ឆ្នាំ២០៣០ និងសម្រាប់រយៈពេលវែងពីឆ្នាំ២០២០ ដល់ឆ្នាំ២០៤០ ដើម្បីបំពេញឱ្យបានតាមតម្រូវការប្រើប្រាស់អគ្គិសនីផង និងក្នុងស្មារតីប្រុងប្រយ័ត្នខ្ពស់ ដែលអាចធានាបានថា ការអភិវឌ្ឍវិស័យថាមពលស្ថិតក្នុងកម្រិតសមស្រប។

តាមការវិភាគ និងព្យាករណ៍របស់អ្នកជំនាញ ប្រសិនបើពុំមានអ្វីប្រែប្រួលទេ កំណើននៃសេចក្តីត្រូវការអគ្គិសនីនៅកម្ពុជា នឹងបន្តកើនឡើងខ្ពស់ក្នុងរយៈពេលប៉ុន្មានឆ្នាំទៅមុខ មុននឹងថយចុះបន្តិចវិញមកក្បែរអត្រាកំណើនប្រហាក់ប្រហែលប្រទេសជិតខាង៕

ដោយៈ ម៉ាណេត

ស្វាយរៀងៈ ក្រុមហ៊ុន Shane (Cambodia) Furniture Co., Ltd ដែលវិនិយោគដោយក្រុមហ៊ុនពីតៃវ៉ាន់ បានមកបណ្តាក់ទុនវិនិយោគប្រមាណ៤៧.៧លានដុល្លារអាមេរិក នៅកម្ពុជាក្នុងឆ្នាំ២០២១ ដើម្បីបង្កើតរោងចក្រផលិតគ្រឿងសង្ហារឹមគ្រប់ប្រភេទ ដោយប្រើប្រាស់វត្ថុធាតុដើមនាំចូល។

ការបង្កើតរោងចក្រផលិតគ្រឿងសង្ហារឹមត្រូវបានធ្វើឡើង លើផ្ទៃដីទំហំ៣៥ហិកតា នៅក្នុងតំបន់សេដ្ឋកិច្ចពិសេសស៊ីន បាវិត ស្ថិតនៅក្រុងបាវិត ខេត្តស្វាយរៀង ដែលអាចបង្កើតការងាររហូតដល់ជាង២០០០កន្លែង។ នេះបើយោងតាមសេចក្តីប្រកាសព័ត៌មានរបស់CDC កាលពីម្សិលមិញ។

នៅក្នុងឱកាសបំពេញទស្សនកិច្ចនៅទីតាំងរោងចក្ររបស់ក្រុមហ៊ុនទាំងពីរនេះ លោកសុខ ចិន្តាសោភារដ្ឋមន្ត្រីប្រតិភូអមនាយករដ្ឋមន្រ្តី អគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC) នៅថ្ងៃទី១ ខែកក្កដា ឆ្នាំ២០២១ បានសម្តែងការស្វាគមន៍គម្រោងវិនិយោគ របស់ក្រុមហ៊ុនដែលនឹងចូលរួមចំណែក ដល់ការធ្វើពិពិធកម្មសេដ្ឋកិច្ចកម្ពុជា។

ជាមួយគ្នានេះដែរ លោករដ្ឋមន្ត្រី បានស្នើឱ្យក្រុមហ៊ុន Shane (Cambodia) Furniture Co., Ltd ពិចារណាទិញវត្ថុធាតុដើមក្នុងស្រុក ព្រោះការប្រើប្រាស់វត្ថុធាតុដើមក្នុងស្រុកនឹងធ្វើឱ្យក្រុមហ៊ុនអាចនាំចេញដោយបង់ពន្ធក្រោមអត្រា ០% ឬអត្រាទាប។

បន្ថែមពីនេះ លោករដ្ឋមន្ត្រីក៏បានសំណូមពរក្រុមហ៊ុន ធ្វើយ៉ាងណាចៀសវាងឱ្យខាងតែបាននូវផលប៉ះពាល់បរិស្ថាន តាមរយៈការសាងសង់អាងប្រព្រឹត្តិកម្មទឹកកខ្វក់ ក៏ដូចជាការធ្វើប្រព្រឹត្តិកម្មសំណល់គ្រប់ប្រភេទ និងសហការជាមួយគ្រប់គ្រឹះស្ថានអប់រំ នៅក្នុងខេត្តស្វាយរៀង ជាពិសេស សាកលវិទ្យាល័យស្វាយរៀង និងវិទ្យាស្ថានពហុបច្ចេកទេសភូមិភាគតេជោសែនស្វាយរៀង ដើម្បីផ្តល់ឱកាសការងារដល់ក្មួយៗនិស្សិត។

លោករដ្ឋមន្ត្រីបានប្រាប់ឱ្យក្រុមហ៊ុនបានដឹងថា ដើម្បីលើកទឹកចិត្តដល់វិនិយោគិន សេចក្តីព្រាងច្បាប់ស្តីពីវិនិយោគថ្មី ដែលនឹងត្រូវគោរពដាក់ ជូនកិច្ចប្រជុំពេញអង្គគណៈរដ្ឋមន្ត្រីពិនិត្យ និងពិភាក្សានៅថ្ងៃទី៩ ខែកក្កដា ឆ្នាំ២០២១ ខាងមុខនេះ នឹងផ្តល់ការលើកទឹកចិត្តដល់វិនិយោគិន តាមរយៈការអនុញ្ញាតឱ្យកាត់កងចំណាយរហូតដល់១៥០% ពីមូលដ្ឋានគិតពន្ធ ចំពោះការចំណាយលើមធ្យោបាយដឹកជញ្ជូន ប្រកបដោយផាសុកភាពដល់កម្មករនិយោជិត, ការសាងសង់កន្លែងស្នាក់នៅ, កន្លែងបរិភោគអាហារ, ឬអាហារដ្ឋានដែលមានតម្លៃសមរម្យ ជាដើម។

តំណាងក្រុមហ៊ុនទាំងពីរ បានថ្លែងអំណរគុណរាជរដ្ឋាភិបាល ក្រសួង ស្ថាប័នពាក់ព័ន្ធ ជាពិសេស CDC និងអាជ្ញាធរដែនដី ដែលបានផ្តល់ការគាំទ្រគម្រោងវិនិយោគរបស់ក្រុមហ៊ុន និងបានចុះមកពិនិត្យ ទីតាំងរោងចក្រជាក់ស្តែងនាថ្ងៃនេះ។

ទន្ទឹមនឹងនេះដែរ តំណាងក្រុមហ៊ុនបានសម្តែងការស្វាគមន៍សេចក្តីព្រាងច្បាប់ស្តីពីវិនិយោគថ្មី និងបានសន្យាថានឹងយកចិត្តទុកដាក់ក្នុងការចាត់វិធានការការពារបរិស្ថាន និងលើកកម្ពស់សុខុមាលភាពរបស់បងប្អូនកម្មករនិយោជិត។ ជាក់ស្តែង ក្រុមហ៊ុនបានឱ្យដឹងថា ក្រុមហ៊ុនកំពុងសាងសង់កន្លែងស្នាក់នៅរបស់កម្មករនិយោជិត៕