ផ្លូវជាតិលេខ៥១នឹងក្លាយទៅជាប៉ូលឧស្សាហកម្មខណៈវិស័យអចលនទ្រព្យនៅតំបន់នេះកំពុងរីកចម្រើន

ដោយៈ ម៉ាណេត

ភ្នំពេញៈ ផ្លូវជាតិលេខ៥១ បាននិងកំពុងផ្លាស់ប្តូរមុខមាត់ថ្មីក្នុងការក្លាយទៅជាប៉ូលឧស្សាហកម្ម ខណៈវិស័យអចលនទ្រព្យក្នុងតំបន់នេះ នៅតែរីកចម្រើន ដោយសារផ្លូវជាតិលេខ៥១នេះ ស្ថិតក្នុងផែនការមេអភិវឌ្ឍន៍ផ្លូវក្រវ៉ាត់ក្រុងនាពេលខាងមុខ។

លោកសំ សុខនឿនប្រធានសមាគមអចលនទ្រព្យសកល(GRA) បានឲ្យដឹងនៅថ្ងៃទី២២ ខែកក្កដា ឆ្នាំ២០២១ថា សកម្មភាពអភិវឌ្ឍន៍នៅតំបន់ផ្លូវលេខ៥១ នៅតែដំណើការប្រសើរពីមួយថ្ងៃទៅមួយថ្ងៃ ខណៈផ្លូវ៥១នេះគឺប៉ូលសំខាន់មួយសម្រាប់ការអភិវឌ្ឍឧស្សាហកម្ម។

លោកបានឱ្យដឹងថា ទោះបីស្ថិតក្នុងវិបត្តិកូវីដ១៩យ៉ាងណាក្តី ចលនាអភិវឌ្ឍន៍នៅតាមផ្លូវ៥១ កើនឡើង ហើយបច្ចុប្បន្ននេះ តំបន់ផ្លូវ៥១ គឺប៉ូលសម្រាប់ការអភិវឌ្ឍសួនឧស្សាហកម្ម ព្រោះតំបន់នេះជាតំបន់អភិវឌ្ឍន៍ឧស្សាហកម្ម និងកំពុងមានការរីកចម្រើនឆ្ពោះទៅរកការអភិវឌ្ឍផ្នែកឧស្សាហកម្ម។

លោកបានថ្លែងថា ផ្លូវ៥១គឺផ្លូវមួយស្ថិតនៅតំបន់ផ្លូវក្រវ៉ាត់ក្រុងទី៤ របស់ផែនការមេ ហើយតំបន់នឹងបន្តរីកចម្រើនទៅមុខ ខណៈការអភិវឌ្ឍអចលនទ្រព្យ ដែលកំពុងមានការកើនឡើង នៅតំបន់នេះ គឺភាគច្រើនផោ្តតលំនៅដ្ឋាន ដែលបំពេញតម្រូវការឱ្យប្រជាជននៅតំបន់ឧស្សាហកម្ម។

លោកបានឱ្យដឹងទៀតថា តម្លៃដីនៅតាមបណ្តោយផ្លូវ៥១ អាចរកបាន៥០ដុល្លារ ទៅ២០០ដុល្លារក្នុងមួយម៉ែត្រការ៉េ អាស្រ័យស្ថានភាពដី និងទំហំដីជាក់ស្តែង។

លោកសន សៀបស្ថាបនិក និងនាយកប្រតិបត្តិរបស់ក្រុមហ៊ុន ឃី រៀលអ៊ីស្ទេត ធ្លាប់បានឱ្យដឹងថា ដីធ្លីតាមបណ្តោយផ្លូវជាតិលេខ៥១ មានសក្តានុពលខ្លាំង សម្រាប់វិស័យឧស្សាហកម្ម និងលំនៅដ្ឋាន។

លោកបានពន្យល់ថា តំបន់នេះជាតំបន់ខ្ពង់រាបមិនលិចទឹក ដោយតភ្ជាប់គ្នារវាងផ្លូវជាតិសំខាន់ៗ មានផ្លូវវរថភ្លើងឆ្លងកាត់ ពីចំណុចផ្សារបាត់ដឹង និងស្ថិតនៅជាប់តំបន់វិនិយោគថ្មី នៃខណ្ឌព្រែកព្នៅ។ ចំណុចទាំងនេះ ជាអំណោយផលល្អ សម្រាប់តំបន់ទាំងមូល។

លោកបានថ្លែងថា មានវិនិយោគិនជាច្រើន កំពុងសម្លឹងមើលពីសក្តានុពលនៅទីតាំងនេះ និងបានចាប
ផ្តើមទិញដីក្នុងទ្រង់ទ្រាយធំ សម្រាប់ការវិនិយោគនាពេលអនាគត។

ផ្លូវជាតិលេខ៥១ តភ្ជាប់ពីផ្លូវជាតិលេខ៤ ត្រង់ចំណុចថ្នល់ទទឹង ទៅផ្លូវជាតិលេខ៥ ត្រង់ចំណុចផ្សារឧដុង្គ ដែលមានប្រវែង៣៧.៩៥គីឡូម៉ែត្រ និងចម្ងាយប្រមាណជាង១៨គីឡូម៉ែត្រពីទីក្រុងភ្នំពេញ (គិតពីចោមចៅ ទៅផ្សារថ្នល់ទទឹង)។ ផ្លូវជាតិលេខ៥១នេះ ត្រូវបានសាសង់ក្រោមមហិរញ្ញប្បទានពីរាជរដ្ឋាភិបាលចិន និងថវិកាបដិភាគរបស់រាជរដ្ឋាភិបាលកម្ពុជា៕

តើខេត្តកែបមានសក្តានុពលអ្វីខ្លះ ដែលអ្នកធ្លាប់បានដឹង និងមិនធ្លាប់ដឹង?

ដោយៈគង់ សូរិយា

កែបៈ ជាខេត្តដ៏តូចច្រឡឹង តែប្រៀបដូចជាកូនក្រមុំមួយដែលលាក់ខ្លួន ខេត្តកែបមានលក្ខណៈពិសេសបំផុត ដោយវាជាខេត្តទី១នៅកម្ពុជា ដែលមានឧទ្យានជាតិកណ្តាលក្រុងតែមួយគត់។

គោលនយោបាយរបស់រដ្ឋាភិបាល
ខេត្តនេះត្រូវបានទទួលស្គាល់ពីគណកម្មការ វាយតម្លៃទីក្រុងស្អាតរបស់អាស៊ាន ដែលបានផ្តល់ពានរង្វាន់ជាខេត្តមាន “ដីស្អាត ទឹកស្អាត និងខ្យល់ស្អាត”។

លើសពីនេះរដ្ឋាភិបាល តាមរយៈក្រសួងទេសចរណ៍ ក៏បានរៀបផែនការមេ ដើម្បីប្រែក្លាយខេត្តនេះជា “តំបន់វិស្សមកាលកម្រិតខ្ពស់”មួយនៅកម្ពុជា តាមរយៈការមិនឲ្យមានរោងចក្រ សហគ្រាស និងកាស៊ីណូ ដើម្បីប្រែក្លាយខេត្ត ដែលមានតែស្រុកមួយ និងក្រុងចំនួន១នេះ ជាតំបន់ទេសចរណ៍ដ៏ពិសិដ្ឋ។

អភិបាលខេត្តកែប លោកសោម ពិសិដ្ឋ បានជំរុញ និងលើកទឹកចិត្ត ដល់អាជីវករ វិនិយោគិនលើវិស័យទេសចរណ៍ សណ្ឋាគារ ដើម្បីចូលរួមអភិវឌ្ឍន៍ខេត្តកែបឲ្យកាន់តែរីកចម្រើនបន្ថែមទៀត ខណៈខេត្តជាប់មាត់សមុទ្រមួយនេះ បាននឹងកំពុងរៀបចំឆ្ពោះទៅកាន់ភាពសុខដុម ជាមួយនឹងផែនការអភិវឌ្ឍន៍នាពេលអនាគតកាន់តែច្បាស់លាស់។

លោកបានបន្តថា ដោយមានការអញ្ជើញចូលរួមពីសំណាក់ម្ចាស់សណ្ឋាគារ ផ្ទះសំណាក់ អ្នកវិនិយោគគិន រួមជាមួយនូវភ្ញៀវជាតិ អន្តរជាតិជាច្រើនរូប។ លោកបន្តថា ក្នុងគោលបំណងដើម្បីទាក់ទាញភ្ញៀវទេសចរជាតិ និងអន្តរជាតិអោយមកសម្រាកកំសាន្ត នៅខេត្តកែប ទីក្រុងទេសចរណ៍កាន់តែច្រើនថែមទៀត ខេត្តកែបមានសក្តានុពលសំខាន់ៗ ដើម្បីទាក់ទាញភ្ញៀវទេសចរណ៍ ទាំងធនធានធម្មជាតិ លើគោក ធានធានធម្មជាតិក្នុងសមុទ្រ ឩទ្យាជាតិកែប កោះ ឆ្នេរ សមុទ្រ ស្អាតៗ ជាច្រើនកន្លែង ។

លោកសោម ពិសិដ្ឋបានបន្តថា ថ្នាក់ដឹកនាំខេត្តកែប បានកំណត់ចក្ខុវស័យរួចហើយថា ខេត្តកែប ជាតំបន់ទេសចរណ៍ សម្រាកលម្អែកំសាន្តប្រណិតកម្រិតខ្ពស់ បរិស្ថានល្អ កំណើនភ្ញៀវទេសចរជាតិ អន្តរជាតិ និងមកស្នាក់នៅរយៈពេលយូរ សន្តិសុខសណ្តាប់ធ្នាប់សាធារណៈល្អ ប្រជាពលរដ្ឋគោរពច្បាប់ សុខុមាលភាព សមភាពយេនឌ័រ សីលធម៌រស់នៅថៃ្លថ្នូរ វប្បធម៌រុងរឿង ដើម្បីរួមចំណែកកាត់បន្ថយភាពក្រីក្ររបស់ប្រជាពលរដ្ឋ។

ជាមួយគ្នានេះខេត្តកែប ក៏កំពុងរៀបចំឆ្នេរថ្មីៗ ដើម្បីបំរើដល់ការកំសាន្តរបស់ភ្ញៀវទេសចរណ៍ជាតិ និងអន្តរជាតិផងដែរ។

មានគ្រឿងសមុទ្រឆ្ងាញ់ជាងគេ
ក្នុងចំណោមខេត្តជាប់តំបន់ឆ្នេរទាំងអស់ ខេត្តកែបជាខេត្តដែលមានគ្រឿងសមុទ្រឆ្ងាញ់ជាងគេទាំងអស់ ដោយអ្នកជំនាញបានពន្យល់ថា ដោយសារខេត្តនេះមានលក្ខណៈអំណោលផលពីធនធានធម្មជាតិ ព្រោះទឹកសមុទ្រខេត្តនេះមានសារ៉ាយសមុទ្រច្រើន និងមានជីវៈចម្រុះសម្បូរបែប។

លោកសោម ពិសិដ្ឋបានឲ្យដឹងផងដែរថា ដើម្បីសម្រេចចក្ខុវិស័យនេះ រដ្ឋបាលខេត្តបាន រៀបចំហេដ្ឋារចនាសម្ពន្ធ ដូចជាពង្រីកប្រព័ន្ធផ្លូវគមនាគមន៍ អោយបានធំទូលាយ រៀបចំអោយមានចំណតរថយន្តត្រឹមត្រូវ រក្សាសុវត្ថិភាព សណ្តប់ធ្នាប់សាធារណៈ បានយ៉ាងល្អ មានប្រព័ន្ធភ្លើងអគ្គីសនី២៤/២៤ម៉ោង ជាពិសេសមានប្រព័ន្ធទឹកស្អាតដែលកំពុងប្រើប្រាស់ទូទាំងខេត្ត។

ហេដ្ឋារចនាសម្ព័ន្ឋពីរកំពុងលើកស្ទួយមុខមាត់ខេត្ត
បច្ចុប្បន្នក្រសួងសាធារណៈការ និងដឹកជញ្ជូនកំពុងសាងសង់កំពង់ផែទេសចរណ៍កោះទន្សាយ ដែលគ្រោងនឹងបញ្ចប់នៅដំណាច់ឆ្នាំនេះ ឬដើមឆ្នាំ២០២២ខាងមុខនេះ ដែលកំពង់ផែនេះ ដើរតួនាទីសម្រាប់សេវាកម្មទេសចរណ៍ លើកដាក់ទំនិញក្នុងស្រុកផង និងសេវាកម្មសំរាប់តភ្ជាប់ការដឹកជញ្ជូនភ្ញៀវទេសចរណ៍ នៅក្នុងតំបន់ផងដែរ។
ជាមួយគ្នានេះ ខេត្តកែបក៏បាននិងកំពុងសាងសង់ផ្សាររាត្រីជាលើកដំបូងរបស់ខ្លួន ជាប់មាត់សមុទ្រផងដែរ ដើម្បីឲ្យភ្ញៀវទេសចរណ៍បានទៅទស្សនាខេត្តនេះ មានកន្លែងដើរកំសាន្តនាពេលរាត្រី។

លើសពីនេះ អាជ្ញាធរខេត្តបាននិងកំពុងរៀបចំឆ្នេរពីរកន្លែងផងដែរ ដើម្បីទាក់ទាញភ្ញៀវទេសចរណ៍ជាតិ អន្តរជាតិនាពេលខាងមុខនេះ៕

ស្ថាប័នប្រមូលចំណូលពន្ធ២នៅកម្ពុជារកចំណូលបានជាង២៦០០លានដុល្លារក្នុងរយៈពេល១ឆមាស

ដោយៈលក្ខិណា

ភ្នំពេញៈ ស្ថាប័នរកចំណូលពន្ធពីរដ៏សំខាន់ បានចេញរបាយការណ៍ពីការរកចំណូលបានប្រមាណ២៦០០លានដុល្លារអាមេរិក ក្នុងរយៈពេល៦ខែដើមឆ្នាំ២០២១នេះ ដែលធ្វើឱ្យកម្ពុជា នៅតែមានលទ្ធភាព ក្នុងការគ្រប់គ្រងការចំណាយក្នុងបរិបទកូវីដ១៩នេះ ។

យោងតាមរបាយការណ៍ បូកសរុបរបស់អគ្គនាយកដ្ឋានពន្ធដារ កាលពីថ្ងៃទី២០ កក្កដា២០២១នេះឱ្យដឹងថា ក្នុងរយៈពេល៦ខែឬ១ឆមាសដំបូងនៃឆ្នាំ២០២១នេះ អគ្គនាយកដ្ឋានពន្ធដារ រកចំណូលបានប្រមាណ១.៥១៥,៩០លានដុល្លារអាមេរិក ស្មើនឹងប្រមាណ៦៧,៥៨ភាគរយ នៃផែនការច្បាប់ហិរញ្ញវត្ថុ សម្រាប់ការគ្រប់គ្រងឆ្នាំ២០២១ ហើយបើធៀបនឹងចំណូលពន្ធអាករ ក្នុងរយៈពេលដូចគ្នាក្នុងឆ្នាំ២០២០កន្លងទៅមានថយចុះប្រមាណ១០,៦០ភាគរយ ឬថយប្រមាណ ១៧៩,៧៥លានដុល្លារអាមេរិក ។

របាយការណ៍ដដែលនេះ បានបង្ហាញផងដែរថា នៅក្នុងខែមិថុនា២០២១នេះ អគ្គនាយកដ្ឋានប្រមូលពន្ធ បានចំនួន១៦៧,៦១លានដុល្លារអាមេរិក ស្មើនឹងប្រមាណ៧,៤៧ភាគរយ នៃផែនការច្បាប់ហិរញ្ញវត្ថុ សម្រាប់ការគ្រប់គ្រងឆ្នាំ២០២១នេះ ហើយបើធៀបនឹងខែមិថុនា២០២០ឃើញថា មានការថយចុះរហូតដល់១៦,១១ភាគរយ ឬប្រមាណ៣២,១៩លានដុល្លារអាមេរិក ។

របាយការណ៍ក៏បានបង្ហាញថា គិតត្រឹមថ្ងៃទី២០ កក្កដា ២០២១ អគ្គនាយកដ្ឋានពន្ធដារប្រមូលពន្ធសរុបបានចំនួន១.៥៩០,៣៨លានដុល្លារអាមេរិក ដោយក្នុងរយៈពេល២០ថ្ងៃនេះ ខែកក្កដា ២០២១អគ្គនាយកដ្ឋានពន្ធដារ ប្រមូលចំណូលពន្ធបាន៧៤,៣២លានដុល្លារអាមេរិកផងដែរ ។

សម្រាប់ស្ថាប័នប្រមូលពន្ធដ៏សំខាន់មួយទៀត គឺអគ្គនាយកដ្ឋានគយ និងរដ្ឋាករកម្ពុជាក្នុងឆមាសទី១ឆ្នាំ២០២១នេះ ក៏រកចំណូលបានប្រមាណ ១.១៥៩,៥លានដុល្លារអាមេរិក តែបើធៀបនឹងឆមាសទី១ឆ្នាំ ២០២០កន្លងទៅមានការថយចុះ ប្រមាណ៨,៩ភាគរយ ដែលចំណូលពីពន្ធគយក្នុងឆមាសទី១នេះ សម្រេចបាន៤៩ភាគរយ នៃផែនការឆ្នាំដែលបានកំណត់ដោយច្បាប់ស្ដីពី ហិរញ្ញវត្ថុសម្រាប់ការគ្រប់គ្រងឆ្នាំ២០២១ ។

បើតាមមន្ត្រីជាន់ខ្ពស់កម្ពុជាមួយរូបកន្លងមកបានឱ្យដឹងថា ឆ្នាំ២០២១នេះ កម្ពុជាត្រូវបង្កើនការចំណាយច្រើនជាងឆ្នាំមុន ជាពិសេសការចំណាយទៅលើការទប់ស្កាត់កូវីដ១៩ ខណៈស្ថានភាពកូវីដ១៩ក្នុងប្រទេស នៅតែកើនឡើងខ្ពស់ក្នុងឆ្នាំ២០២១នេះ ។តែយ៉ាងណាក៏ដោយ ក៏កម្ពុជានៅតែអាចគ្រប់គ្រង ការចំណាយរបស់ខ្លួនបាន ហើយក៏មិនធ្វើឱ្យសេដ្ឋកិច្ចដួលរលំនៅក្នុងវិបត្តិកូវីដ១៩នេះដែរ៕

សារព៌តមានអន្តរជាតិៈបើស្ថានភាពកូវីដ-១៩ ធូរស្រាល កម្ពុជាគឺជាគោលដៅទេសចរដែលមិនត្រូវមើលរំលង

ដោយៈម៉ាណេត

អន្តរជាតិៈ សារព៌តមានល្បីឈ្មោះរបស់អឺរ៉ុប (Euronews) ក្នុងមាតិកា “ដំណើកម្សាន្ត” របស់ខ្លួន បានចាត់ទុកកម្ពុជា ស្ថិតក្នុងចំណោមប្រទេស/តំបន់តូចចំនួន៧ ដែលទេសចរមិនត្រូវមើលរំលង នៅពេលដែលស្ថានភាពកូវីដ-១៩ធូរស្រាល។

ពេលណាកូវីដចប់?មិនមានចម្លើយនោះឡើយ ប៉ុន្តែ Euronews ក៏ដូចជា Stasher ដែលជាបណ្តាញគ្រប់គ្រង ទិន្នន័យវ៉ាលិសដ៏ធំក្នុងពិភពលោក បានបង្ហាញពីលក្ខខណ្ឌដ៏សមប្រកបលើសក្តានុពលទេសចរណ៍របស់កម្ពុជា និងដែនដី៦ផ្សេងទៀត។

”រដូវក្ដៅរបស់កម្ពុជា ជារដូវត្រជាក់នៅអឺរ៉ុប វាជាពេលវេលាដ៏ល្អឥតខ្ចោះសម្រាប់ទេសចរ ក្នុងការស្រូបយកពន្លឺព្រះអាទិត្យនៅកម្ពុជា។ កម្ពុជាមានសីតុណ្ហភាពប្រហែល ៣០អង្សា នៅចន្លោះខែមេសា ដល់វិច្ឆិកា ដែលធ្វើឱ្យទេសចរណ៍ប្រទេសមួយនេះ មានភាពទាក់ទាញគ្រប់ផ្នែកទាំងអស់”។ នេះបើតាមការចុះផ្សាយរបស់គេហទំព័រ Euronews។

បណ្តាញទូរទស្សន៍ដ៏ធំនៅអឺរ៉ុប ដែលមានទីស្នាក់ការកណ្តាលនៅក្រុងលីយ៉ុង ប្រទេសបារាំងមួយនេះ បានសរសេរបញ្ជាក់ថា បើទេសចរចង់ដើរកម្សាន្ត និងទស្សនានៅតំបន់ទេសចរណ៍បែបវប្បធម៌ប្រវត្តិសាស្ត្រ អ្នកដំណើរគួរទៅលេងនៅតំបន់អង្គរ ក្នុងខេត្តសៀមរាប។ តែបើទេសចរចង់សម្រាកលម្ហែលើឆ្នេរខ្សាច់សក្បុស ទេសចរគួរជ្រើសរើសទៅកម្សាន្តនៅកោះរ៉ុង ក្នុងខេត្តព្រះសីហនុ។

ក្រៅពីកម្ពុជា គោលដៅទេសចរណ៍៦ផ្សេងទៀត ដែល Euronews និង Stasher បានណែនាំនោះរួមមាន ប្រទេសអ៊ុយរូហ្កាយ អាល់បានី ហ្ស៊កដានី ហ្គ្រើណាដ កោះសី ស្ហែល និងក្រុងម៉ាកាវ ប្រទេសចិន៕

វិភាគសង្គមៈ ខ្លួនទីពឹងខ្លួន ក្លាយជាសក់អ្នកណាក្បាលអ្នកហ្នឹង កំពុងសម្លាប់សង្គមខ្មែរ

ដោយៈយិន លាងគង់ៈស្ថាបនិកនិងជាអគ្គនាយក Propertyarea.asia

ភ្នំពេញៈ ពាក្យខ្លួនទីពឹងខ្លួន បានក្លាយជាឈាមខ្មែររាប់រយឆ្នាំមកហើយ ចាប់តាំងពីខ្មែរទទួលយកលទ្ឋិព្រះពុទ្ឋសាសនា ដែលសាសនានេះ បានប្រដៅមនុស្សឲ្យមានផ្នត់គំនិត “ខ្លួនទីពឹងខ្លួន” ប៉ុន្តែទាំងសង្ឃ និងអ្នកប្រាជ្ញសាសនានេះ មិនបានបកស្រាយឬពន្យល់ឲ្យបានក្បោះក្បាយ ដើម្បីធ្វើឲ្យជាតិសាសន៍នេះ យល់ពីជម្រៅនៃពាក្យប្រដៅមួយឃ្លានេះឡើយ។

ការបង្រៀនមិនច្បាស់ក្លាយជាការបំពុល
នៅក្នុងជម្រៅនៃពាក្យខ្លួនទីពឹងខ្លួន ឬអត្តាហិ អន្តោ នាថោ មិនមានខុសឡើយ ប៉ុន្តែវាត្រូវបានគេយកទៅប្រើខុស ដោយសារអ្នកប្រាជ្ញជ្រៅជ្រះក្នុងសង្គម និងក្នុងសាសនាមិនបានពន្យល់ក្បោះក្បាយនោះទេ។

មិនពន្យល់រឿងអ្វី? ការពិតខ្លួនទីពឹងខ្លួន ជាការសំដៅដល់ការពង្រឹងសមត្ថភាពបុគ្គលនិមួយៗឲ្យមានចំណេះ ជំនាញ សីលធ៌ម គុណធ៌ម ដើម្បីប្រឡូកក្នុងសង្គម និងធ្វើឲ្យគុណភាពជីវិតរបស់ខ្លួនប្រសើរឡើង តាមរយៈការពង្រឹងសមត្ថភាព និងចំណេះដឹង ជំនាញរបស់ខ្លួន។

ប៉ុន្តែនៅពេលប្រឡូកក្នុងសង្គម ទាំងសង្គមគ្រួសារ សង្គមការងារ សង្គមជាតិ មនុស្សត្រូវសាមគ្គីគ្នា លើកស្ទួយគ្នា ណែនាំគ្នា ដើម្បីប្រសិទ្ឋភាពការងារផង ទទួលបានប្រសិទ្ឋផលផងនៅក្នុងជីវិតការងារ និងជីវិតគ្រួសាររបស់ខ្លួនផង ប៉ុន្តែមូលដ្ឋានត្រូវចាប់ផ្តើមពាក្យខ្លួនទីពឹងខ្លូនជាមុន ដើម្បីទទួលបាននូវគុណតម្លៃជីវិត និងអាចធ្វើឲ្យសង្គមគ្រួសារ សហគមន៍៍ និងសង្គមជាតិមានភាពសុខសាន្ត។

វាក្លាយជាការបំពុល
និយាយត្រលប់ឡើងវិញម្តងទៀត ដោយសារការមិនពន្យល់បានច្បាស់លាស់ ដោយសារ ការមិនយល់ស៊ីជម្រៅនៃអត្ថន័យប្រៀនប្រដៅនេះ បានធ្វើឲ្យប្រជាជនខ្មែរកម្លាយពាក្យនេះទៅជា “សក់អ្នកណា ក្បាលអ្នកហ្នឹង” ឬក្រៅពីអញ មានតែអញជាដើម។

ដោយប្រកាន់យកសក់អ្នកណាក្បាលអ្នកហ្នឹង បានធ្វើឲ្យជាតិសាសន៍ខ្មែរកើតជំងឺអញនិយមកាន់តែខ្លាំង ស្លាប់អ្នកណាក៏បានឲ្យតែអញរស់ “ជាក់ស្តែងព្រឹត្តិការណ៍បិទខ្ទប់រាជធានីភ្នំពេញ និងក្រុងតាខ្មៅនាពេលនេះ” បានធ្វើឲ្យអាជីវករ អ្នកជំនួញមួយចំនួនបានលក់ទំនិញដំឡើងថ្លៃតាមតែចិត្តរបស់ខ្លួន ដោយមិនគិតពីទុក្ខលំបាករបស់ជនរួមជាតិរបស់ខ្លូន ដែលកំពុងភ័យខស្លន់ស្លោ និងមានបញ្ហាសេដ្ឋកិច្ចនោះទេ។

បញ្ហានៃការបំពុលដោយប្រយោលនូវពាក្យមួយឃ្លានេះ កុំថាឡើងសង្គមជាតិបែកបាក់ សូម្បីតែសង្គមគ្រួសារខ្មែរភាគច្រើន(អាចលើស៨០ភាគរយ) ដែលបងប្អូនបង្កើត ក៏ឈ្លោះគ្នា ដណ្តើមយកប្រៀបឈ្នះ ដណ្តើមយកឧត្តមភាពរៀងៗ ខ្លួនគួរឲ្យអាណិតអាសូរផងដែរ។

ប្រព័ន្ឋអប់រំរបស់ជាតិ
ក្រោមការដឹកនាំរបស់ប្រព័ន្ឋអប់រំជាតិ ដោយរដ្ឋមន្ត្រីបច្ចុប្បន្ន និងរដ្ឋមន្ត្រីក្រសួងអប់រំមុនៗ បានបន្តយករឿង “កុលាបប៉ៃលិន” យកមកដាក់ក្នុងកម្មវិធីសិក្សាមធ្យមសិក្សាទុតិយភូមិ ដែលក្នុងរឿងនេះបានឲ្យតម្លៃទៅលើពាក្យ “ខ្លួនទីពឹងខ្លូនរបស់តួអង្គចៅ ចិត្រ” ដែលជាកូនកសិករក្រីក្រ ប៉ុន្តែបានតស៊ូរហូតទទួលបានតួអង្គនាង “ឃុននារី” ដែលជាកូនថៅកែត្បូងនៅបរប៉ៃលិន។

ដោយខិតខំរំលេចនូវអត្ថបន័យ “ខ្លួនទីពឹងខ្លួន” អ្នកនិពន្ឋរឿងនេះ ដែលធ្លាប់បួសជាសង្ឃ បានព្យាយាមពន្លេចចេញនូវ “ចរិកតួអង្គ ដែលគោរពនូវពាក្យខ្លួនទីពឹងខ្លួន” ឡើង ប៉ុន្តែអ្នកនិពន្ឋ មិនបានពន្យល់ពីសារច្បាស់លាស់ណាមួយថា “ខ្លួនទីពឹងខ្លួន គួរមានអត្ថន័យ និងគួរប្រតិបត្តិបែបណាឡើយ” ។

ការចាក់បញ្ចូលនូវសារធាតុពណ៌ប្រផេះ (បញ្ញាញ្ញាណ) លើមនុស្ស ក្នុងកម្មវិធីសិក្សាសម្រាប់យុវជន ដែលប្រព័ន្ឋនៃការគិតរបស់ពួកគេនៅមានកម្រិត ការស្រូបយកនូវទស្សនណាមួយ កាន់តែយូរ បន្តិចម្តងៗ វាបានក្លាយជាឈាម ឬស្ថិតនៅក្នុងផ្នត់គំនិតខ្មែរតាំងពីដើមរៀងមក ហើយប្រព័ន្ឋនៃការគិត ឬគំនិតដែលមិនច្បាស់លាស់បែបនេះ វាបានក្លាយជាការបំពុលសង្គមរបស់ខ្លួន។

ត្រូវចងចាំថា គេរំលាយប្រទេសមួយ ឬធ្វើឲ្យប្រទេសមួយទន់ខ្សោយបាន គឺតាមរយៈមនោគមវិជ្ជា ដោយមិនចាំបាច់ប្រើប្រាស់អាវុធនោះទេ។ ហេតុនេះមនោគមន៍វិជ្ជាដែលហួសសម័យកាល និងមិនពន្យល់ឲ្យមានភាពច្បាស់លាស់ គួរត្រូវពិចារណាដកចេញពីកម្មវិធីសិក្សា ឬយកមកពន្យល់ខ្មែរឲ្យបានច្បាស់លាស់ ជាជាងសូត្រតែធ៌មបាលី និងសំង្ក្រឹត ដែលអត្ថន័យបែបណា មិនត្រូវបានពន្យល់ដល់អ្នកស្តាប់នោះឡើយ៕

លំនឹងសេដ្ឋកិច្ចល្អនិងស្ថាភាពនយោបាយដ៏រឹងមាំជំរុញឱ្យកម្ពុជាកាន់តែមានសក្កានុពលសម្រាប់ការវិនិយោគ

ដោយៈ ប៊ី

ភ្នំពេញៈ អ្នកជំនាញបានលើកឡើងថា លំនឹងសេដ្ឋកិច្ចល្អ និងស្ថាភាពនយោបាយដ៏រឹងមាំបានធ្វើឱ្យប្រទេសកម្ពុជា មានសក្ដានុពលសម្រាប់ការវិនិយោគ ពិសេសក្នុងវិស័យអចលនទ្រព្យ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីមបានថ្លែងនៅថ្ងៃទី២១ ខែកក្កដា ឆ្នាំ២០២១ ថា វិនិយោគិនជាច្រើន បានចាត់ទុកប្រទេសកម្ពុជាជាប្រទេស ដែលមានសក្ដានុពលសម្រាប់ការវិនិយោគ ដោយសារលំនឹងសេដ្ឋកិច្ចល្អប្រសើរ និងមាននយោបាយដ៏រឹងមាំក្នុងតំបន់អាស៊ានជាដើម។

លោកបានថ្លែងថា “ការរកប្រកបរបរទទួលទាន នៅក្នុងប្រទេសកម្ពុជា និងប្រទេសក្នុងតំបន់អាំស៊ាន ប្រទេសដែលមានសក្ដានុពលខ្លាំងជាងគេ និងត្រូវបានគេផ្ដល់ភាពជឿជាក់ខ្លាំងមានប្រទេសកម្ពុជា ដោយសារតែប្រទេសកម្ពុជា មានលំនឹងសេដ្ឋកិច្ចល្អ និងមាននយោបាយដ៏រឹងមាំ ជាងបណ្ដាប្រទេសផ្សេងៗទៀត ក្នុងតំបន់អាស៊ានជាដើម”។

លោកបានបន្ថែមថា កត្តាមួយទៀតគឺកម្ពុជា ស្ថិតនៅចំណុចកណ្តាលក្នុងតំបន់អាស៊ាន។ ចំណែកឯតម្លៃអចលនទ្រព្យនៅកម្ពុជា មានតម្លៃធូរថ្លៃជាងបណ្ដាប្រទេសជិតខាង ដូច្នេះឱកាសវិនិយោគនៅបន្ដកើតមានឡើង ហើយចំពោះកម្លាំងពលកម្មរបស់កម្ពុជា មានសក្ដានុពល នៅក្នុងរយៈពេលវែងនៃការវិនិយោគ ប៉ុន្ដែទីផ្សារកម្ពុជាមានចំណុចខ្លះ ដែលត្រូវការបំប៉នបន្ថែមទៀត ដើម្បីពង្រឹងសមត្ថភាពប្រជាជន ដើម្បីទទួលបានការវិនិយោគធំៗ ពីបណ្ដាប្រទេសជិតខាងមកកាន់កម្ពុជា។ លោកបញ្ជាក់ថា និយាយជារួមទីផ្សារអចលនទ្រព្យ ក្នុងពេលនេះវិនិយោគិន នៅបន្ដចាប់អារម្មណ៍ខ្លាំង។

លោកស្រី Grace Rachny Fong អគ្គនាយិកាក្រុមហ៊ុន Century 21 Cambodia ក៏បានបង្ហាញពីប្រទេសមួយចំនួន ដែលបាននិងកំពុងចាប់អារម្មណ៍ និងមានការវិនិយោគលើវិស័យអចលនទ្រព្យ នៅក្នុងប្រទេសកម្ពុជាផងដែរថា មានប្រទេសជាច្រើនដូចជា ប្រទេសសឹង្ហបុរី ប្រទេសម៉ាឡេស៊ី ប្រទេសកូរ៉េជាដើម។

លោកស្រីបានឲ្យដឹងទៀតថា និយាយចំពោះប្រទេសសឹង្ហបុរី ដែលបានចូលមកវិនិយោគនៅកម្ពុជា និងបានវិនិយោគដោយផ្ទាល់ ជាមួយក្រុមហ៊ុន Century 21 Cambodia គឺវិនិយោគិនជាអ្នកវិនិយោគច្បាស់លាស់ ក្នុងនោះលំហូរដែលជាគម្រោងធំៗ នៅរាជធានីភ្នំពេញ ខេត្តព្រះសីហនុ ជាការវិនិយោគដោយផ្ទាល់ ពីក្រុមហ៊ុនឯកជន និងក្រុមហ៊ុនដែលបានសហការ ជាមួយរាជរដ្ឋាភិបាល៕

សូចនាករចំនួនបី ដែលអាចយកមកវិភាគពីតម្លៃអចលនទ្រព្យរបស់អ្នកនាពេលអនាគត

ដោយៈគង់ សូរិយា

ភ្នំពេញៈ ទីប្រឹក្សាសមាគមអចលនទ្រព្យសកល លោកយិន លាងគង់ បានមានប្រសាសន៍ឲ្យដឹងកាលពីពេលថ្មីៗនេះថា ការវិនិយោគលើអចលនទ្រព្យ ទាំងដីធ្លី ផ្ទះសម្បែង តែងតែមានផលចំណេញនាពេលអនាគត ប្រសិនជាអ្នកទិញបានក្នុងតម្លៃសមរម្យ ទីតាំងត្រឹមត្រូវ ជាតំបន់ដែលស្ថិតក្នុងផែនការអភិវឌ្ឍរបស់រដ្ឋាភិបាលជាដើម។

លោកបន្តថា ប៉ុន្តែដើម្បីទិញដីធ្លី ឬផ្ទះត្រូវ និងឡើងថ្លៃខ្ពស់នាពេលអនាគត អ្នកវិនិយោគត្រូវសម្លឹងលើកត្តាមួយចំនួន ដូចជា ពេលវេលាសមស្រប កត្តាសេដ្ឋកិច្ច ផែនការអភិវឌ្ឍន៍ គោលនយោបាយរបស់រដ្ឋាភិបាលជាដើម។

ពេលវេលាសមស្រប
ពេលវេលាសមស្រប គឺសំដៅដល់ការទិញដីឬផ្ទះ នៅក្នុងពេលមានវិបត្តិសេដ្ឋកិច្ច ដែលតម្លៃដីធ្លី ឬផ្ទះសម្បែងតែងតែចុះថ្លៃ ឬស្ថិតក្នុងតម្លៃទ្រឹង។ ហេតុនេះការវិនិយោគដីធ្លីក្នុងកំឡុងពេលបែបនេះ នឹងមានឳកាសចំណេញខ្ពស់ ពិសេសនៅពេលសេដ្ឋកិច្ចងើបឡើងវិញឆាប់រហ័ស។

ការវិនិយោគដីធ្លី ឬអចលនទ្រព្យដទៃទៀត សម្រាប់អ្នកវិនិយោគឆ្លាតវៃ ពួកគេមិនសូវទុកយូរពេកនោះទេ នៅពេលចំណេញបាន៥០ភាគរយ ឬមួយគុណនឹងពីរ គេលក់ចេញ ដើម្បីទៅវិនិយោគនៅកន្លែងដទៃទៀតហើយ។ លើកលែងតែអ្នកវិនិយោគប្រើយុទ្ឋសាស្ត្រ Land Banking ឬ House Banking។

កត្តាសេដ្ឋកិច្ច
នៅពេលសេដ្ឋកិច្ចមានភាពរសរវើក និងកំណើនល្អប្រសើរ វាតែងតែមានរយៈពេលកំណត់របស់វា។ ហេតុនេះអ្នកវិនិយោគត្រូវតែតាមដានព៌តមាន និងវដ្តនៃវិបត្តិសេដ្ឋកិច្ចពិភពលោក ដែលតែងតែកើតមានស្ទើរតែរៀងរាល់១០ឆ្នាំម្តង។ ហេតុនេះ បើសិនជាស្ថានភាពសេដ្ឋកិច្ចមានកំណើនល្អប្រសើរ រយៈពេល៣ទី៥ឆ្នាំ តម្លៃដីរបស់អ្នកបានហក់ឡើងខ្ពស់រួចទៅហើយ។ វាជាពេលវេលាសមស្រប ដែលអ្នកគួរបញ្ចេញ ដើម្បីកុំឲ្យមានភាពស្តាយក្រោយ ដូចករណីអ្នកនៅក្រុងព្រះសីហនុជាដើម។

ហេតុនេះ សេដ្ឋកិច្ចគឺជាប់ពាក់ព័ន្ឋនឹងតម្លៃដីធ្លី ឬអចលនទ្រព្យដទៃទៀត ដូច្នេះអ្នកវិនិយោគឆ្លាតវៃ ត្រូវតែតាមដានស្ថានភាពសេដ្ឋកិច្ចពិភពលោក ដើម្បីមានមូលដ្ឋានក្នុងការសម្រេចចិត្តត្រឹមត្រូវ។

ផែនការអភិវឌ្ឍន៍និងគោលនយោបាយរដ្ឋាភិបាល
រដ្ឋាភិបាលកម្ពុជា តែងតែដាក់ចេញផែនការអភិវឌ្ឍន៍ជាតិ រយៈពេលមធ្យម(5ឆ្នាំ) ផែនការអភិវឌ្ឍន៍ជាតិរយៈពេលវែងមានចំនួន១០ឆ្នាំ ដែលផែនការនេះជាការធ្វើពិពិធកម្មនូវមូលដ្ឋាននៃការអភិវឌ្ឍសេដ្ឋកិច្ច សង្គម និងរៀបចំប៉ូលសេដ្ឋកិច្ចរបស់ជាតិ។

ឧទាហរណ៍ នៅឆ្នាំ២០២០កន្លងមក រដ្ឋាភិបាលបានប្រកាស ពីការវិនិយោគព្រលានយន្តហោះខេត្តមណ្ឌលគិរី ពីផែនការអភិវឌ្ឍន៍សាងសង់់ ផ្លូវល្បឿនលឿនភ្នំពេញ ក្រុងបាវិតជាដើម។

ដូច្នេះ ប្រសិនជាអ្នកទិញដីនៅតំបន់ស្ថិត នៅក្នុងផែនការអភិវឌ្ឍរបស់រដ្ឋាភិបាល តម្លៃដីរបស់អ្នក នឹងឡើងថ្លៃនៅក្នុងរយៈពេលកំណត់មួយ។ ហេតុនេះការវិនិយោគដីធ្លីឬអចលនទ្រព្យដទៃទៀត អ្នកវិនិយោគដែលតែងតែទុកដីបានយូរ ចំណេញច្រើន តែងតែជាអ្នកសក្តាប់បាននូវទិសដៅ ផែនការអភិវឌ្ឍន៍របស់ជាតិ ពិសេសអានព៌តមានជាប្រចាំ៕

ក្រុមហ៊ុនFreeport Indonesiaចុះកិច្ចព្រមព្រៀងជាមួយក្រុមហ៊ុនចិនTsingshan សាងសង់រោងចក្រតម្លៃ៣ពាន់លានដុល្លារ

ដោយៈ សុខុម

ហ្សាការតា: ក្រុមហ៊ុនរ៉ែមាស និងទង់ដែងឥណ្ឌូនេស៊ី PT Freeport Indonesia (PTFI) បានចុះកិច្ចព្រមព្រៀងមួយដែលមានតម្លៃ៣ពាន់លានដុល្លារអាមេរិក ដើម្បីសាងសង់រោងចក្រចម្រាញ់រ៉ែទង់ដែនមួយ។

យោងតាមសារព័ត៌មាន Jakarta Post ចុះផ្សាយនៅថ្ងៃទី២១ កក្កដា នេះឱ្យដឹងថា គម្រោងសាងសង់រោងចក្រនេះធ្វើឡើងនៅក្នុងទីក្រុង Gresik ខេត្តជ្វាខាងកើត (East Java) ប្រទេសឥណ្ឌូនេស៊ី ដោយបញ្ចប់នូវមន្ទិលសង្ស័យរយៈពេលរាប់ឆ្នាំជុំវិញផែនការរបស់ក្រុមហ៊ុនរ៉ែមួយនេះ។

តាមរយៈសេចក្តីថ្លែងការណ៍មួយចេញកាលពីថ្ងៃទី១៥ កក្កដា ក្រុមហ៊ុន Freeport Indonesia បានបញ្ជាក់ថា ខ្លួនបានចុះកិច្ចព្រងព្រៀងវិស្វកម្ម លទ្ធកម្ម និងសាងសង់ (EPC) មួយជាមួយក្រុមហ៊ុនជប៉ុន PT Chiyoda International Indonesia (PTCII) ដើម្បីសាងសង់រោងចក្រចម្រាញ់រ៉ែទង់ដែងនៅសួនឧស្សាហកម្ម Java Integrated Industrial and Port Estate (JIIPE) នៅក្នុងទីក្រុង Gresik ខេត្តជ្វាខាងកើត (East Java)។

រោងចក្រចម្រាញ់នេះនឹងផលិតបន្ទះស្ពាន់ ដែលជាវត្ថុធាតុដើមមួយក្នុងចំណោមវត្ថុធាតុដើមសំខាន់ៗដែលត្រូវប្រើប្រាស់នៅក្នុងការផលិតអាគុយ និងខ្សែភ្លើង។ រ៉ែដែលត្រូវចម្រាញ់នឹងត្រូវផ្គត់ផ្គង់ដោយអណ្ដូងរ៉ែ Grasberg mine របស់ក្រុមហ៊ុន Freeport Indonesia នៅខេត្តប៉ាពួ (Papua) ដែលជាអណ្ដូងរ៉ែមាស និងទង់ដែងធំបំផុតមួយក្នុងពិភពលោក។

ក្រុមហ៊ុនបានបញ្ជាក់ថា ក្រោយសាងសង់រួចរាល់ជាស្ថាពរ រោងចក្រចម្រាញ់នេះនឹងមានសមត្ថភាពចម្រាញ់រ៉ែទង់ដែងបានរហូតដល់ទៅ១,៧លានតោនក្នុងមួយឆ្នាំៗ។

ប្រទេសឥណ្ឌូនេស៊ី ជាសមាជិកមួយរបស់សមាគមប្រជាជាតិអាស៊ីអាគ្នេយ៍ ហៅកាត់ថាអាស៊ាន។ ជាមួយចំនួនប្រជាជនជាង២៧០លាននាក់ ប្រទេសនេះជាប់ឈ្មោះជាប្រទេសដែលមានប្រជាជនច្រើនបំផុតទី៤ ក្នុងពិភពលោក និងជាប្រទេសមានអ្នកកាន់សាសនាអ៊ីស្លាម ច្រើនបំផុតក្នុងពិភពលោក៕

មន្ត្រីអាកាសចរស៊ីវិលៈ អាកាសយានដ្ឋានអន្តរជាតិភ្នំពេញថ្មីសម្រេចបានជិត១៨ភាគរយតាមការវាស់វែងវិជ្ជាជីវៈ

ដោយៈ ប៊ី

ភ្នំពេញៈ ដំណើរការសាងសង់ព្រលានយន្តហោះអន្តរជាតិភ្នំពេញថ្មី សម្រេចបានជិត១៩ភាគរយហើយ បើទោះបីជាប្រទេសកម្ពុជាកំពុងរងការគំរាមកំហែងដោយសារជំងឺកូវីដ-១៩យ៉ាងធ្ងន់ធ្ងរក៏ដោយ ។

លោកស៊ីន ចាន់សិរីវុត្ថាអ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល ត្រូវបានដកស្រង់សម្តីពីសារព័ត៌មានរដ្ឋនៅថ្ងៃ២១ ខែកក្កដា ឆ្នាំ២០២១ ដោយលោកបានលើកឡើងថា បើទោះបីជាកម្ពុជាកំពុងទទួលរងផលប៉ះពាល់ពីជំងឺកូវីដ-១៩ ហើយបានធ្វើឱ្យប៉ះពាល់ខ្លះដល់ដំណើរការសាងសង់ក៏ពិតមែន តែក្រុមហ៊ុនវិនិយោគទុនអាណិកជនកម្ពុជាហៅកាត់ថា (OCIC )នៅតែបន្តដំណើរការ សាងសង់ជាប្រក្រតី ដើម្បីឱ្យសម្រេចតាមគោលដៅដែលបានគ្រោងទុក ។

លោកបានបញ្ជាក់ដូច្នេះថា អាកាសយានដ្ឋានអន្តរជាតិភ្នំពេញថ្មី បើយើងគិតឱ្យត្រឹមត្រូវទៅ គឺសម្រេចបានជាង១៨ភាគរយហើយ ប៉ុន្តែសម្រាប់ការវាស់វែងនេះ គឺជាការវាស់វែងតាមវិជ្ជាជីវៈ ហើយនឹងតាមក្បួនដែលមានការទទួលស្គាល់ពីក្រុមហ៊ុនសាងសង់ ដូច្នេះគឺគាត់សម្រេចបានចំនួន១៨,៩ភាគរយ”។

លោកបានថ្លែងបន្តថា នៅពេលដែលព្រលានយន្តហោះអន្តរ ជាតិភ្នំពេញថ្មីសាងសង់រួច រាល់ហើយនោះ ព្រលាននេះនឹងជួយលើកមុខមាត់ប្រទេសកម្ពុជា ទាំងវិស័យអាកាស ចរណ៍ ទាំងវិស័យពាក់ព័ន្ធផ្សេងៗជាច្រើនទៀត ជាពិសេសរួមចំណែកយ៉ាងសំខាន់ ក្នុងការលើកស្ទួយសេដ្ឋកិច្ចជាតិឱ្យកាន់តែប្រសើរឡើងបន្ថែមទៀត។

អាកាសយានដ្ឋានអន្តរជាតិភ្នំពេញថ្មី ស្ថិត នៅស្រុកកណ្តាលស្ទឹង ខេត្ត កណ្តាល តាមផ្លូវជាតិលេខ២ មានចម្ងាយប្រមាណ២០ គីឡូ ម៉ែត្រពីរាជធានីភ្នំពេញ មាន ផ្ទៃដីសរុបចំនួន២៦០០ហិកតា ដែលគម្រោងសាងសង់នេះមាន៣ដំណាក់កាល គឺដំណាក់កាលទី១ សាងសង់រួចរាល់នៅឆ្នាំ២០២៣ខាង មុខ អាចទទួលអ្នកដំណើរបានប្រមាណ១៣លាននាក់ក្នុងមួយឆ្នាំ។

ដំណាក់កាលទី២នឹងបញ្ចប់នៅឆ្នាំ២០៣០ ដែលអាចទទួលបានអ្នក ដំណើរប្រមាណជា៣០លាននាក់ក្នុង១ឆ្នាំ និងក្នុងដំណាក់ កាលចុងក្រោយនឹងបញ្ចប់នៅឆ្នាំ២០៥០ អាចនឹងទទួលបានអ្នកដំណើររហូតដល់៥០ លាននាក់ក្នុងមួយឆ្នាំ ដែលវិនិយោគក្នុងទឹកប្រាក់ប្រមាណ ១,៥០០លានដុល្លារសហអាមេរិក៕

រដ្ឋាភិបាលកម្ពុជាគ្រោងស្ថាបនាផ្លូវជាច្រើនទៀតក្នុងឆ្នាំនេះទោះស្ថិតនៅក្នុងវិបត្តិក្ដី

ដោយៈ វឌ្ឍនៈ

ភ្នំពេញៈ ទោះបីជាកម្ពុជាបានជួបប្រទះនឹងវិបត្តិដោយសារជំងឺកូវីដ១៩ និងតម្រូវការចំណាយរបស់រដ្ឋាភិបាលច្រើនជាងមុនក្ដី តែរដ្ឋាភិបាលក៏មានគម្រោងក្នុងការសាងសង់ផ្លូវជាច្រើនខ្សែដើម្បីសម្រួលដល់ការធ្វើដំណើររបស់ពលរដ្ឋឆ្លងកាត់ នៅក្នុងឆ្នាំ២០២១នេះ។ នេះបើតាមលោកស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូននៅព្រឹកថ្ងៃទី២១ ខែកក្កដា ឆ្នាំ២០២១។

លោកស៊ុន ចាន់ថុលបានមានប្រសាស៍ថា ក្នុងរយៈពេលប៉ុន្មានឆ្នាំមកនេះ រាជរដ្ឋាភិបាលកម្ពុជាបានសាងសង់ផ្លូវជាច្រើនខ្សែតភ្ជាប់ពីភ្នំពេញទៅបណ្ដាខេត្ត និងពីបណ្ដាខេត្តមួយទៅបណ្ដាខេត្តមួយទៀត ដើម្បីសម្រួលដល់ការធ្វើដំណើររបស់ប្រជាពលរដ្ឋ។

លោកបានថ្លែងបន្តថា មកដល់ពេលនេះ បើទោះបីជាកម្ពុជាមានវិបត្តិដោយសារតែកូវីដ១៩ក្ដី តែផ្លូវជាច្រើនខ្សែ ដែលបានបើកការដ្ឋានសាងសង់ហើយនោះ នៅតែដំណើរការជាបន្តបន្ទាប់ដោយមិនមានផ្អាកឬបញ្ឈប់ទេ តែក៏មានការដ្ឋានផ្លូវមួយចំនួនបានបន្ថយសកម្មភាពខ្លះ ពីព្រោះតែកម្មករធ្វើផ្លូវឆ្លងជំងឺកូវីដ១៩ និងតម្រូវឱ្យកម្មករដទៃទៀតធ្វើចត្តាឡីស័ក។

លោកបានបន្តថា ក្នុងឆ្នាំ២០២១នេះយើងសង្ឃឹមថានឹងបើកការដ្ឋានសាងសង់ផ្លូវលេខ៣១ពីបែកគុសទៅកំពង់ត្រាច ផ្លូវ៣៣ពីកែបទៅកំពត ផ្លូវ៤១ តភ្ជាប់ពីផ្លូវលេខ៤ទៅលេខ៣ ស្ពានឆ្លងទន្លេមេគង្គ នៅក្រចេះ តភ្ជាប់ផ្លូវពីក្រចេះ ទៅកំពង់ ដូច្នេះពលរដ្ឋចង់ទៅក្រចេះអាចធ្វើដំណើរឆ្លងស្ពានទៅកំពង់ធំតែម្ដង។

លោកបានបន្ថែមថា ក្រៅពីផ្លូវទាំងនេះ យើងក៏កំពុងសិក្សាសាងសង់កំពង់ផែទឹកជ្រៅមួយទៀតនៅក្បែរកំពង់ផែចាស់ដែលមានជម្រៅទឹក១៤,៥ម៉ែត្រ នឹងអាចអនុញ្ញាតឱ្យនាវា៩៣ភាគរយនៅតំបន់អាស៊ីប៉ាហ្វិក ចូលចតកំពង់ផែរបស់យើងនៅក្រុងព្រះសីហនុ ហើយយើងក៏កំពុងសិក្សាសាងសង់កំពង់ផែទឹកជ្រៅជម្រៅ១៧,៥ម៉ែត្រទៀត ដែលអាចអនុញ្ញាតឱ្យនាវាទាំងអស់ លើពិភពលោកអាចចូលចតកំពង់ផែក្រុងព្រះសីហនុបាននៅពេលអនាគ។

លោកបានបញ្ជាក់ដូច្នេះថា “ការសាងសង់ហេដ្ឋារចនាសម្ព័ន្ធថ្មីៗនៅក្នុងប្រទេសកម្ពុជា គឺដោយសារតែការចាយវាយសន្សំសំចៃរបស់រាជរដ្ឋាភិបាល និងកម្ចីឥណទានពីខាងក្រៅប្រទេសផង និងជំនួយឥតសំណងផង ដែលធ្វើឱ្យរដ្ឋាភិបាលអាចមានលទ្ធភាព ក្នុងការសាងសង់ហេដ្ឋារចនាសម្ព័ន្ធជាបន្តបន្ទាប់ខ្វាត់ខ្វែងបែបនេះ”។

ការសាងសង់ហេដ្ឋារចនាសម្ប័ន្ធជាបន្តបន្ទាប់នេះ មិនត្រឹមតែសម្រួលដល់ការធ្វើដំណើររបស់ពលរដ្ឋប៉ុណ្ណោះទេ តែក៏នឹងទាក់ទាញវិនិយោគិនចូលមកបណ្ដាក់ទុនវិនិយោគនៅក្នុងប្រទេសកម្ពុជា ជាពិសេសនឹងជំរុញការនាំចេញនាំចូលរបស់កម្ពុជាទៅកាន់ប្រទេសជិតខាងនិងជុំវិញពិភពលោកផងដែរ៕

1...1,8681,8691,870...3,304 Page 1,869 of 3,304