ដោយៈ ម៉ាណេត

ភ្នំពេញៈ រដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុយកចិត្តទុកដាក់ខ្ពស់មិនត្រឹមតែលើប្រភពហិរញ្ញប្បទាន និងតម្លៃប៉ាន់ស្មានប៉ុណ្ណោះទេ ថែមទាំងផ្តោតការយកចិត្តទុកដាក់ផងដែរលើផែនការមេ ផែនការអភិវឌ្ឍន៍ និងផែនការវិនិយោគនៃទីក្រុង ដើម្បីធានាឱ្យការអភិវឌ្ឍន៍មានប្រសិទ្ធភាព។ នេះបើយោងតាមការលើកឡើងរបស់មន្ត្រីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុ។

លោកវង្សី វិស្សុតរដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ និងជាប្រធានអនុគណ:កម្មាធិការសិក្សាអំពីការស្រង់ថ្លៃដើម (Cost Recovery) ដើម្បីកំណត់ថ្លៃសេវា និងរៀបចំយន្តការបង់ថ្លៃប្រើប្រាស់ប្រព័ន្ធលូ និងប្រព័ន្ធប្រព្រឹត្តកម្មទឹកកខ្វក់ បានលើកឡើងដូច្នេះនៅព្រឹកថ្ងៃទី២១ ខែកក្កដា ឆ្នាំ២០២១នេះ ក្នុងកិច្ចប្រជុំតាមប្រព័ន្ធវីដេអូ (Virtual Meeting) ជាមួយតំណាងប្រទេសអូស្ត្រាលី លោក Andreas Zurbrugg អនុប្រធានបេសកកម្មការទូតអូស្ត្រាលីប្រចាំនៅកម្ពុជា និងលោក Nam Le ប្រធានក្រុមទីប្រឹក្សានៃកម្មវិធីភាពជាដៃគូដើម្បីហេដ្ឋារចនាសម្ព័ន្ធ (P4I) ក្រោមជំនួយបច្ចេកទេសពីរដ្ឋាភិបាលអូស្ត្រាលី។

ក្នុងកិច្ចពិភាក្សានេះ លោកវង្សី វិស្សុតបានលើកឡើងថា តម្រូវការខាងហេដ្ឋារចនាសម្ព័ន្ធទឹកកខ្វក់នៅកម្ពុជានាពេលបច្ចុប្បន្នមានការកើនឡើងយ៉ាងខ្លាំង ក៏ដូចជាអនុវិស័យហេដ្ឋារចនាសម្ព័ន្ធសាធារណៈដទៃទៀត ខណៈពេលដែលធនធានហិញ្ញវត្ថុរបស់រាជរដ្ឋាភិបាល សម្រាប់វិនិយោគលើវិស័យនេះ នៅមានកម្រិតនៅឡើយ។

លោកបានថ្លែងថា វាបានក្លាយជាបញ្ហាប្រឈមកាន់តែខ្លាំងសម្រាប់រាជរដ្ឋាភិបាលក្នុងការផ្តល់ហិរញ្ញប្បទានវិនិយោគលើហេដ្ឋារចនាសម្ព័ន្ធទឹកកខ្វក់ ដើម្បីរត់ប្រដេញតាមឱ្យទាន់តម្រូវការមានអនាម័យកាន់តែប្រសើរ, ការដោះស្រាយបញ្ហាបរិស្ថាន, និងការឆ្លើយតបទៅនឹងកំណើន និងការអភិវឌ្ឍយ៉ាងឆាប់រហ័សនៃទីក្រុង និងទីប្រជុំជន។

លោកបានថ្លែងដូច្នេះថា “ជាគោលការណ៍ ក្នុងការធ្វើសេចក្តីសម្រេចលើគម្រោងវិនិយោគនៅទីក្រុងណាមួយ ក្រសួងសេដ្ឋកិច្ច និងហិរញ្ញវត្ថុយកចិត្តទុកដាក់ខ្ពស់មិនត្រឹមតែលើប្រភពហិរញ្ញប្បទាន និងតម្លៃប៉ាន់ស្មានប៉ុណ្ណោះទេ ថែមទាំងផ្តោតការយកចិត្តទុកដាក់ផងដែរលើផែនការមេ, ផែនការអភិវឌ្ឍន៍ និងផែនការវិនិយោគនៃទីក្រុង និងជាពិសេស គឺនិរន្តរភាពនៃការងារទាំងនេះ ព្រមទាំងការអភិវឌ្ឍស្ថាប័នផងដែរ ដោយសារតែទំហំរបស់វាកាន់តែធំឡើង និងកាន់តែស្មុគស្មាញឡើង”។

លោករដ្ឋមន្រ្តីប្រតិភូក៏បានបន្ថែមថា សម្រាប់គម្រោងហេដ្ឋារចនាសម្ព័ន្ធទឹកកខ្វក់ ត្រូវមានផែនការ និងយន្តការហិរញ្ញប្បទាន និងការស្រង់ថ្លៃដើមច្បាស់លាស់ដើម្បីធានាពីប្រសិទ្ធភាពនៃការប្រើប្រាស់ថ្លៃដើម និងនិរន្តរភាពរបស់គម្រោង។

លោកបានគូសបញ្ជាក់បន្ថែមទៀតថា ក្រៅពីបញ្ហាថវិកា គម្រោងវិនិយោគលើហេដ្ឋារចនាសម្ព័ន្ធទឹកកខ្វក់នៅមានបញ្ហាមួយចំនួនទៀត ដែលត្រូវដោះស្រាយដូចជា ការរៀបចំ និងបង្កើនសមត្ថភាព ស្ថាប័ន ការគ្រប់គ្រង និងគោលនយោបាយស្តីពីការបង់ថ្លៃសេវាប្រើប្រាស់ប្រព័ន្ធលូ និងប្រព័ន្ធប្រព្រឹត្តកម្មទឹកកខ្វក់ ព្រមទាំងការជំរុញការអនុវត្តច្បាប់ និងបទប្បញ្ញត្តិជាធរមានទាំងអស់គ្នា។

លោកបានថ្លែងបន្តថា ខុសគ្នាពីសេវាសាធារណៈដទៃទៀត ដូចជា សេវាទឹកស្អាត អគ្គិសនី ជាដើម ហេដ្ឋារចនាសម្ព័ន្ធទឹកកខ្វក់រងការលំបាកដោយសារម្ខាងបណ្តាលមកពីទស្សនៈអាចគេចវេសបាន និងមានកម្រៃសេវាទាប និងម្ខាងទៀត ហិរញ្ញប្បទានសម្រាប់វិស័យនេះនាំឱ្យបាត់បង់ឱកាសក្នុងការវិនិយោគលើហេដ្ឋារចនាសម្ព័ន្ធរូបវ័ន្តផ្សេងទៀត។

ដើម្បីដោះស្រាយបញ្ហាទាំងនេះ អនុគណៈកម្មាធិការស្រង់ថ្លៃដើមមានភារកិច្ចរៀបចំក្របខ័ណ្ឌស្រង់ថ្លៃដើម និងហិរញ្ញប្បទានលើហេដ្ឋារចនាសម្ព័ន្ធទឹកកខ្វក់ ដែលជាគោលការណ៍ណែនាំមួយសម្រាប់ការធ្វើសេចក្តីសម្រេចលើគម្រោងវិនិយោគសាធារណៈនាពេលអនាគត ដើម្បីធានាបាននូវប្រសិទ្ធភាពសេដ្ឋកិច្ច ហិរញ្ញវត្ថុ និងសង្គម ហើយមាននិរន្តរភាព ទាំងក្នុងក្របខ័ណ្ឌរដ្ឋបាលថ្នាក់ជាតិ និងថ្នាក់ក្រោមជាតិ៕

ដោយៈ ម៉ាណេត

ភ្នំពេញៈ អ្នកជំនាញលើកឡើងថា គម្រោងបង្កើតឱ្យមានទីក្រុងធំទី២របស់រដ្ឋាភិបាល បន្ទាប់ពីរាជធានីភ្នំពេញ នឹងអាចសម្រាលនូវសម្ពាធ នៃកំណើនហួសហេតុនៃចំនួនប្រជាជន ក្នុងតំបន់ប្រមូលផ្ដុំតែមួយ ដោយសារពីមួយឆ្នាំទៅមួយឆ្នាំចំនួនប្រជាជនរស់នៅកណ្តាលក្រុងកើនឡើងកាន់ច្រើនៗឡើង។

លោកប៉ូ អ៊ាវគង់ប្រធានក្រុមហ៊ុនអចលនទ្រព្យ Advance បានថ្លែងប្រាប់នៅថ្ងៃទី២១ ខែកក្កដា ឆ្នាំ២០២១ ថា ការអភិវឌ្ឍន៍ទីក្រុងធំទី២ បន្ទាប់ទីក្រុងអាចធ្វើទៅបាន ដោយសារចំនួនប្រជាជនរស់នៅកណ្តាលក្រុង កើនឡើងកាន់ច្រើនៗឡើងពីមួយឆ្នាំទៅមួយឆ្នាំ ដូច្នេះដើម្បីដោះស្រាយបញ្ហានេះ វាទាមទារឱ្យការពង្រីក្រុង ឬបង្កើតតំបន់ក្រុងរណបថ្មីៗជាដើម។

ជាគ្នានេះដែរលោកបានថ្លែងបន្តថា ការពង្រីកក្រុង ឬការរៀបចំទីក្រុងថ្មីមួយ ទាម​ទារឱ្យការអភិវឌ្ឍប្រព័ន្ធហេដ្ឋារចនាសម្ព័ន្ធត្រឹមត្រូវ ដូចជាមានប្រព័ន្ធផ្លូវ ទឹក លូរ និងភ្លើង។

យោងតាមប្លង់គោលប្រើប្រាស់ដី រាជធានីភ្នំពេញបានឱ្យដឹងថា គោលនយោបាយរៀបចំដែនដី នឹងជំរុញនូវការគ្រោងឱ្យមានទីក្រុងធំទី២ បន្ទាប់ពីរាជធានីភ្នំពេញ ហើយទីក្រុងទីក្រុងធំទី២នេះ អាចនឹងស្ថិតនៅលើអ័ក្ស រាជធានីភ្នំពេញ-ក្រុងព្រះស៊ីហនុ។

លោកបានឱ្យដឹងថា ការរៀបចំទីក្រុងធំទី២ បន្ទាប់ទីក្រុងភ្នំពេញ ដែលអាចនឹងស្ថិតនៅលើអ័ក្ស រាជធានីភ្នំពេញ-ក្រុងព្រះស៊ីហនុអាចធ្វើទៅរួច ដោយសារទីតាំងនៅទីនោះមានដីធំ សម្រាប់ការអភិវឌ្ឍន៍ ប៉ុន្តែតាមអ្វីដែលលោកដឹង គឺថា គម្រោងទីក្រុងថ្មីមួយ នឹងកើតឡើងនៅតំបន់ជ្រោយចង្វារ ព្រោះតំបន់នេះត្រូវបានមើលឃើញថា មានការអភិវឌ្ឍជាបន្តបន្ទាប់ ដូចជាការរៀបចំក្រុងរណបជាដើម។

យោងតាមប្លង់គោលប្រើប្រាស់ដីរាជធានីភ្នំពេញបានឱ្យដឹងថា គោលនយោបាយរៀបចំដែនដី នឹងជំរុញនូវការគ្រោងឱ្យមានទីក្រុងធំទី២ បន្ទាប់ពីរាជធានីភ្នំពេញ ដើម្បីបង្កើតឱ្យមានការអភិវឌ្ឍប្រកបដោយសមភាព តុល្យភាព រួមចំណែក ទទួលចែករំលែកនូវបន្ទុកសេវាកម្មសាធារណៈ ឲ្យមានកម្រិតប្រសើរឡើង សម្រាប់ដែនដី ទាំងមូលរបស់ប្រទេស។

នេះជាមធ្យោយោបាយមួយ ដើម្បីសម្រាលនូវសម្ពាធនៃកំណើនហួស ហេតុប្រជាជនក្នុងតំបន់ប្រមូលផ្ដុំតែមួយ ជាពិសេសក្នុងទីកណ្ដាលរាជធានីភ្នំពេញ ដែលត្រូវតែគ្រប់គ្រងការពង្រាយការអភិវឌ្ឍឱ្យបានល្អ។ ការអភិវឌ្ឍដោយផ្អែកលើប៉ូលនានានៅលើអ័ក្ស រាជធានីភ្នំពេញ-ក្រុងព្រះស៊ីហនុ គឺជាគោលការណ៍អភិវឌ្ឍន៍មួយនៅក្នុងតំបន់និរតីនៃប្រទេស។

លោកសាស្ត្រាចារ្យទួស សាភឿនអគ្គលេខាធិការរងនៃគណៈស្ថាបត្យករកម្ពុជាធ្លាប់ថ្លែងប្រាប់ថា ភ្នំពេញគឺជាបណ្តុំនៃសេដ្ឋកិច្ច ហើយជាចំណុចកណ្តាលមួយ ដែលមានការវិនិយោគ ការរស់នៅ និងការធ្វើពាណិជ្ជកម្មច្រើន ដូច្នេះតម្រូវការទីផ្សារខ្ពស់។

លោកបានថ្លែងថា “យើងគិតថា ទីក្រុងភ្នំពេញមានទំហំធំ ប៉ុន្តែសម្រាប់ខ្ញុំគិតថា វាមិនធំនោះទេ។ ពីមួយថ្ងៃទៅមួយថ្ងៃ ឥទ្ធិពលនៃទីក្រុងភ្នំពេញ បានរីកសាយទៅតំបន់ជិតខាង ដែលនឹងធ្វើឱ្យទីក្រុងភ្នំពេញ ត្រូវការពង្រីកខ្លួនបន្ថែម ដើម្បីឆ្លើយតបនឹងតម្រូវការទាំងអស់ទាំងនេះ”។ លោកលើកបែបនេះ សំដៅកាន់តម្រូវការទីផ្សារ កំណើនប្រជាជន និងកំណើនសេដ្ឋកិច្ច៕

ដោយៈ ម៉ាណេត

ភ្នំពេញៈ ក្រសួងសាធារណការ និងដឹកជញ្ជូន បានដាក់ឱ្យដំណើរការជាផ្លូវការមណ្ឌលផ្តល់សេវាសាធារណៈ ក្រសួង សាធារណការ និងដឹកជញ្ជូន នៅផ្សារទំនើប ហេរីថេក វក ខេត្តសៀមរាប ដើម្បីលើកកម្ពស់ប្រសិទ្ធភាព គុណភាព និងទំនើបកម្ម នៃការផ្តល់សេវារដ្ឋបាល ឱ្យកាន់តែប្រសើរឡើងជូនប្រជាពលរដ្ឋ។

ការដាក់ឱ្យដំណើរការនេះ ត្រូវបានធ្វើនៅថ្ងៃទី២១ ខែកក្កដា ឆ្នាំ២០២១ ក្រោមអធិបតីភាព លោកទេសរដ្ឋមន្តី្រស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងលោកទៀ សីហា អភិបាល នៃគណៈអភិបាល ខេត្តសៀមរាប។

លោកទៀ សីហាអភិបាលនៃគណៈអភិបាលខេត្តសៀមរាប បានមានប្រសាសន៍​ក្នុងពិធីបើកដំណើរការសេវាកម្មនេះ នាព្រឹកថ្ងៃទី២១ កក្កដានេះថា នេះគឺជាសមិទ្ធផលថ្មីមួយទៀត របស់ក្រសួងសាធារណការ និងដឹកជញ្ជូន ដែលបានខិតខំយកចិត្តទុកដាក់យ៉ាង ខ្លាំងក្នុងការបង្ខិតយកសេវារបស់ខ្លួន មកដាក់បម្រើជូនប្រជាពលរដ្ឋដល់តាមបណ្តាខេត្ត ព្រមទាំងការខិតខំប្រឹងប្រែងបង្កើត និងកែប្រែប្រភេទសេវាមួយចំនួនទៅជាការស្នើសុំ តាមរយៈប្រព័ន្ធស្វ័យប្រវត្តិកម្ម (Online) ផងដែរ ។

លោកបន្តថា “ការដាក់ដំណើរការសេវានេះ ជាការបង្កលក្ខណៈកាន់តែងាយស្រួល ជូនប្រជាពលរដ្ឋនៅក្នុងខេត្តសៀមរាប ក្នុងការស្នើសុំសេវា ដោយមិនចាំបាច់ធ្វើដំណើរទៅស្នើសុំសេវានៅរាជធានីភ្នំពេញ”។

ងបរិបទនៃជំងឺកូវីដ-១៩ និងដើម្បីចូលរួមបង្ការទប់ស្កាត់ការឆ្លងរីករាលដាល នៃជំងឺកូវីដ-១៩ ឱ្យស្របតាមគោលការណ៍របស់ក្រសួងសុខាភិបាល ការរៀបចំកម្មវិធីនឹងត្រូវធ្វើឡើងដោយមានការចូលរួមត្រឹមតែ គណៈប្រតិភូក្រសួង និងគណៈប្រតិភូរដ្ឋបាលខេត្តមួយចំនួនតូចតែប៉ុណ្ណោះ។

“មណ្ឌលផ្តល់សេវាសាធារណៈ” ថ្មីនេះជាមណ្ឌលទី៥ បង្កើតឡើងក្នុងគោលបំណ​ង ដើម្បីជួយសម្រួលក្នុងការផ្តល់សេវាសាធារណៈ កាត់បន្ថយពេលវេលាទទួលសេវាកាត់បន្ថយចំណាយក្រៅផ្លូវការ លុបបំបាត់នីតិវិធីស្មុគស្មាញ បង្ខិតសេវាឱ្យទៅជិតប្រជាពលរដ្ឋ ព្រមទាំងអាចគ្រប់គ្រងតាមដានពង្រឹងប្រសិទ្ធភាព និងតម្លាភាព នៃការផ្តល់សេវាឱ្យកាន់តែមានភាពប្រសើរឡើង។

តាមរយៈមណ្ឌលផ្តល់សេវាសាធារណៈថ្មីនេះ បងប្អូនប្រជាពលរដ្ឋអាចមកទទួលសេវាប្ដូរបណ្ណបើកបរ យានយន្តចុះបញ្ជីយានយន្ត ផ្ទេរកម្មសិទ្ធិយានជំនិះ និងដាក់ពាក្យស្នើសុំត្រួតពិនិត្យលក្ខណៈបច្ចេកទេស យានជំនិះ(ឆៀក) ជារៀងរាល់ថ្ងៃ ចាប់ពីម៉ោង ៨ព្រឹក រហូតដល់ម៉ោង៨យប់ ស្ថិតនៅជាន់ទី២ នៃផ្សារទំនើបThe Heritage

ដោយៈឧត្តម

អាមេរិកៈ អ្នកណាក៏ដឹងដែរថា សហរដ្ឋអាមេរិក គឺជាមហាអំណាចសេដ្ឋកិច្ចទី១ របស់ពិភពលោក ឬនិយាយដោយសាមញ្ញថា ជាប្រទេសដែលមានសេដ្ឋកិច្ចធំជាងគេបំផុតក្នុងពិភពលោក។

ប៉ុន្តែតើអ្នកទាំងអស់គ្នាដឹងទេថា ប្រទេសមហាអំណាចដ៏មានឥទ្ធិពលមួយនេះបោះពុម្ពក្រដាសប្រាក់ចំនួនប៉ុន្មានក្នុងមួយឆ្នាំៗ ហើយស្ថាប័នមួយណាជាអ្នកទទួលបន្ទុកបោះពុម្ព? តើវាជាធនាគារកណ្ដាល ឬក៏ជាស្ថាប័នផ្សេងពីនេះ? តោះ មកដឹងទាំងអស់គ្នា!

Federal Reserve គឺជាធនាគារកណ្ដាលរបស់សហរដ្ឋអាមេរិក ហើយស្ថាប័នមួយនេះ មានតួនាទីគ្រប់គ្រងការផ្គត់ផ្គង់ ក្រដាសប្រាក់ដុល្លារអាមេរិក។ ដោយសារតែហេតុផលនេះហើយ ទើបបានជាមនុស្សយ៉ាងច្រើនយល់ថា ធនាគារកណ្ដាលមួយនេះជាអ្នក “បោះពុម្ពក្រដាសប្រាក់”។ ប៉ុន្តែតាមពិតអ្នកដែលមានពុម្ពក្រដាសប្រាក់ និងជាអ្នកមានសិទ្ធិតែមួយគត់ នៅក្នុងការបោះពុម្ពក្រដាក់ប្រាក់ដុល្លារអាមេរិក គឺក្រសួងរតនាគារអាមេរិក។

*តើសហរដ្ឋអាមេរិក បោះពុម្ពក្រដាសប្រាក់ចំនួនប៉ុន្មានក្នុងមួយឆ្នាំៗ?

គណៈអភិបាល (Board of Governors) ដែលជាអាជ្ញាធរចេញក្រដាសប្រាក់សម្រាប់ធនាគារកណ្ដាល បានអនុម័ត និងដាក់សំណើឆ្នាំសារពើពន្ធ២០២១ របស់ខ្លួនជូនទៅការិយាល័យឌីហ្សាញ និងបោះពុម្ពក្រដាសប្រាក់ (Bureau of Engraving and Printing (BEP)) នៃក្រសួងរតនាគារសហរដ្ឋអាមេរិក នៅថ្ងៃទី១៤ ខែសីហា ឆ្នាំ២០២០។

សំណើសុំបោះពុម្ពក្រដាសប្រាក់ សម្រាប់ឆ្នាំសារពើពន្ធ២០២១នេះ គឺដោយសារការរងផលប៉ះពាល់ធ្ងន់ធ្ងរ ពីវិបត្តិឆ្លងរាលដាលវីរុសកូវីដ-១៩ នៅពេលធនាគារកណ្ដាលជួបប្រទះ នូវតម្រូវការក្រដាសប្រាក់ច្រើនសន្ធឹកសន្ធាប់មិនធ្លាប់មាន។ សំណើសុំបោះពុម្ពក្រដាសប្រាក់នេះ ឆ្លុះបញ្ចាំងពីការប៉ាន់ប្រមាណរបស់គណៈអភិបាល អំពីតម្រូវការក្រ​ដាសប្រាក់ពីសំណាក់អតិថិជនក្នុងស្រុក និងអន្តរជាតិអំឡុងឆ្នាំសារពើពន្ធ២០២១។

ខុសពីឆ្នាំមុនៗ ដែលហេតុផលចម្បង នៃការចេញសំណើសុំបោះពុម្ព គឺដើម្បីជំនួយក្រដាសប្រាក់ចាស់ៗ ដែលត្រូវច្រៀកបំផ្លាញចោលនៅធនាគារកណ្ដាល។ សំណើសុំបោះពុម្ពក្រដាសប្រាក់ សម្រាប់ឆ្នាំសារពើពន្ធ២០២១ នេះធ្វើឡើងដោយសារការកើនឡើងនូវការទូទាត់សុទ្ធ (net payment)។

ដើម្បីដោះស្រាយឱ្យបានល្អប្រសើរ នូវការផ្លាស់ប្ដូរដែលអាចកើតមានក្នុងតម្រូវការ និងការផលិតក្រដាសប្រាក់ ដោយសារវិបត្តិឆ្លងរាតត្បាតវីរុសកូវីដ-១៩ សំណើសុំបោះពុម្ពក្រដាសប្រាក់សម្រាប់ឆ្នាំសារពើពន្ធ២០២១ នេះត្រូវបានសង្ខេបដោយបញ្ជាក់ពីចំនួននៃទំហំក្រដាសប្រាក់នីមួយៗដែលត្រូវបោះពុម្ព។

អំឡុងឆ្នាំសារពើពន្ធ២០២១ គណៈអភិបាល និងការិយាល័យឌីហ្សាញ និងបោះពុម្ពក្រដាសប្រាក់ នឹងធ្វើការកែសម្រួលការផលិត ទំហំក្រដាសប្រាក់នីមួយៗ ដើម្បីឱ្យស្របទៅតាមតម្រូវការជាក់ស្ដែងពេញមួយឆ្នាំ ដែលរាប់ចាប់ពីក្រដាសប្រាក់១ដុល្លារ  ២ដុល្លារ ៥ដុល្លារ ១០ដុល្លារ ២០ដុល្លារ ៥០ដុល្លារ និង ១០០ដុល្លារ សរុបចន្លោះពី៧,៦ពាន់លានដុល្លារ ទៅ៩,៦ពាន់លានដុល្លារ បើធៀបនឹងសំណើសុំបោះពុម្ពក្រដាសប្រាក់ពី១,៧ពាន់លានដុល្លារ ទៅ៣,៨ពាន់លានដុល្លារ ក្នុងឆ្នាំសារពើពន្ធ២០២០ ពោលគឺកើនឡើងពី៣០,៦%ទៅ៦៥,៩%។

ក្រដាសប្រាក់ដែលកំពុងធ្វើចរាចរណ៍ ដែលជារង្វាស់ផ្ទាល់នៃតម្រូវការក្រដាសប្រាក់របស់ធនាគារកណ្ដាល បានកើនឡើងចំនួន៥,១ពាន់លានសន្លឹក ឬស្មើនឹង២២៦,៦ពាន់លានដុល្លារ ចន្លោះពីខែមិថុនា ឆ្នាំ២០១៩ ដល់ខែមិថុនា ឆ្នាំ២០២០។

ផ្ទុយមកវិញ អំឡុងរយៈពេលដូចគ្នានេះកាលពីឆ្នាំមុន ក្រដាសប្រាក់ដែលកំពុងធ្វើចរាចរណ៍បានកើនឡើង១,៣ពាន់លានសន្លឹក ឬស្មើនឹង៧៥,៨ពាន់លានដុល្លារ។ នេះបើយោងតាមទិន្នន័យ ដែលបានចុះផ្សាយក្នុងគេហទំព័រ federalreserve.gov របស់ធនាគារកណ្ដាលអាមេរិក៕

ដោយៈ សាវុធ

ភ្នំពេញៈ អគ្គនាយកដ្ឋានពន្ធដារ ប្រមូលចំណូលពន្ធ-អាករគ្រប់ប្រភេទ តាមប្រព័ន្ធគ្រប់គ្រងទិន្នន័យចំណូលអនឡាញ សរុបជាទឹកប្រាក់មានចំនួនជាង៦ ៤៤១ប៊ីលានរៀល ស្មើនឹងប្រមាណ១ ៥៩០,២៩លានដុល្លារអាមេរិកគិតត្រឹមថ្ងៃទី ២០ ខែ កក្កដា ឆ្នាំ២០២១។

នេះបើយោងតាមសេចក្តីប្រកាសព័ត៌មាន ស្តីពីកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែ មិថុនា និងប្រចាំឆមាសទី១ ឆ្នាំ ២០២១ របស់អគ្គនាយកដ្ឋានពន្ធដារ នៅថ្ងៃទី២០ ខែកក្តដា ឆ្នាំ ២០២១នេះ។

ការប្រមូលចំណូលពន្ធ និងអាករគ្រប់ប្រភេទ របស់អគ្គនាយកដ្ឋានពន្ធដារ ប្រមូលចំណូលបានមានចំនួនជាង ៦៧៨ ប៊ីលានរៀល ត្រូវប្រមាណជិត១៦៨លានដុល្លារអាមេរិក ស្មើជាង៧% នៃផែនការច្បាប់ហិរញ្ញវត្ថុ សម្រាប់ការគ្រប់គ្រងឆ្នាំ២០២១ ប្រៀបធៀបនឹងចំណូលពន្ធ-អាករ ប្រចាំខែមិថុនា ឆ្នាំ២០២០ ឃើញថា ចំណូលនេះបានថមថយចុះជាង១៣០ប៊ីលានរៀល ត្រូវប្រមាណជា៣២លានដុល្លារអាមេរិក ស្មើ-១៦,១១%។

ដោយឡែកការប្រមូលចំណូលនៅក្នុងឆមាសទី១ ឆ្នាំ២០២១ នេះវិញ ចំណូលពន្ធ-អាករដែលអគ្គនាយកដ្ឋានពន្ធដារប្រមូលបាន តាមប្រព័ន្ធគ្រប់គ្រងទិន្នន័យចំណូលអនឡាញ សរុបមានចំនួនជាង៦ ១៣៩ពាន់លានរៀល ត្រូវជិត១ ៥១៦លានដុល្លារអាមេរិក ស្មើជាង៦៧% នៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ ២០២១ ក្នុងនោះបើធៀបចំណូលពន្ធ-អាករ ក្នុងរយៈពេលដូចគ្នាឆ្នាំ២០២០ ឃើញថា ថយចុះជិត ៧២៨ ប៊ីលានរៀល ត្រូវប្រមាណជាង១៧៩លានដុល្លារអាមេរិក ស្មើ-១០,៦០%។

បើគិតមកដល់ថ្ងៃទី ២០ ខែកក្កដា ឆ្នាំ២០២១ នេះវិញ អគ្គនាយកដ្ឋានពន្ធដារប្រមូលចំណូលពន្ធ-អាករគ្រប់ប្រភេទ បានចំនួនជាង ៦ ៤៤១ ប៊ីលានរៀល ត្រូវជាង ១ ៥៩០ លានដុល្លារអាមេរិក ខណៈដែលក្នុងរយៈពេល ២០ ថ្ងៃ នៃខែកក្កដា ឆ្នាំ ២០២១ នេះ បានប្រមូលចំណូលសរុបចំនួនជាង ៣០១ ប៊ីលានរៀល ត្រូវជាង ៧៤ លានដុល្លារអាមេរិក។

លោកគង់ វិបុល រដ្ឋមន្ត្រីប្រតិភូអមនាយករដ្ឋមន្រ្តី និងទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានបញ្ជាក់ថា ការអូសបន្លាយនៃការរាតត្បាតនៃជំងឺកូវីដ-១៩ ក្នុងឆ្នាំ២០២០ និងការផ្ទុះឡើងនៃព្រឹត្តិការណ៍សហគមន៍ “២០កុម្ភៈ” បានជះឥទ្ធិពលជាអវិជ្ជមាន មកលើការគ្រប់គ្រងប្រមូលចំណូលពន្ធ-អាករយ៉ាងខ្លាំង។

លោកបានថ្លែងបន្តថា ក៏ប៉ុន្តែការដាក់ចេញនូវវិធានការ និងការអនុវត្តតាមប្រព័ន្ធអនឡាញ និងប្រព័ន្ធបច្ចេកវិទ្យាព័ត៌មាន ដែលអគ្គនាយកដ្ឋានពន្ធដារបានបង្កើតជាបន្តបន្ទាប់ គឺជាការអនុវត្តប្រកបដោយបុរេសកម្ម និងបានឆ្លើយតបទៅនឹងបញ្ហាប្រឈមព្រមទាំងការលំបាកនានាក្នុងបរិបទនៃការរីករាតត្បាតនៃជំងឺកូវីដ-១៩នេះ ដែលបានឆ្លុះបញ្ចាំងតាមរយៈលទ្ធផលប្រមូលចំណូលក្នុងឆមាសទី១ ឆ្នាំ២០២១ សម្រេចបានរហូតដល់ ៦៧,៥៨% នៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០២១៕