ដោយ: សហសេវិក
អន្តរជាតិ: យោងតាមកាសែត Reuters បានរាយការណ៍ថា ទីផ្សារអចលនទ្រព្យរបស់ប្រទេសអ៊ីតាលីអាចនឹងវ៉ាដាច់បណ្តាប្រទេសដទៃទៀតនៅតំបន់អឺរ៉ុបនៅឆ្នាំ២០២៦ ដោយសារស្ថិរភាពនយោបាយ និងភាពអំណោយផលនៃបទប្បញ្ញត្តិ។

ក្រុមហ៊ុនស្រាវជ្រាវអចលនទ្រព្យ Scenari Immobiliari ព្យាករថា ប្រតិបត្តិការទិញ-លក់របស់ទីផ្សារអចលនទ្រព្យនៅប្រទេសអ៊ីតាលីនឹងកើនឡើង៨,៤ភាគរយនៅឆ្នាំនេះដល់ទំហំទឹកប្រាក់ចំនួន១៧៥,៨ពាន់លានអឺរ៉ូ (ប្រមាណ២០៥ពាន់លានដុល្លារ) ដោយទីផ្សារលំនៅឋាននឹងគ្របដណ្តប់ចំនួនជាង៨០ភាគរយ។

កំណើននេះនឹងវ៉ាដាច់កំណើន៧ភាគរយនៅក្នុងទីផ្សារអចលនទ្រព្យរបស់ប្រទេសអេស្ប៉ាញ កំណើន៦,៦ភាគរយនៅចក្រភពអង់គ្លេស កំណើន៤,១ភាគរយនៅអាល្លឺម៉ង់ និងកំណើន៣,២ភាគរយនៅបារាំង។

ស្ថិរភាពនយោបាយនៅក្នុងប្រទេសអ៊ីតាលីក្រោមការដឹកនាំរបស់លោកស្រីនាយករដ្ឋមន្ត្រី Giorgia Meloni ដែលកាន់អំណាចអស់រយៈពេល៣ឆ្នាំកន្លងមកនេះ កំពុងជួយទាក់ទាញបណ្តាវិនិយោគិន។

ប្រតិបត្តិការនៅក្នុងទីផ្សារអចលនទ្រព្យរបស់ប្រទេសអ៊ីតាលីបានកើនឡើងជិត៧ភាគរយកាលពីឆ្នាំ២០២៥ ដែលជាទីផ្សារអចលនទ្រព្យទាក់ទាញបំផុតទី២ របស់ទ្វីបអឺរ៉ុប បន្ទាប់ពីប្រទេសអេស្ប៉ាញ។នេះបើយោងតាមក្រុមហ៊ុន Scenari Immobiliari៕ប្រភព: Reuters៕

ដោយៈ គង់ ម៉ាលីនណា

    ភ្នំពេញៈ មន្រ្តីជាន់ខ្ពស់ក្រសួងសាធារណការ និងដឹកជញ្ជូន និងជប៉ុន បានបើកសិក្ខាសាលាស្តីពីទឹកស្អាត និងប្រព័ន្ធទឹកកខ្វក់ កម្ពុជា-ជប៉ុន ២០២៦ លើកទី១៨ ដើម្បីពង្រីកកិច្ចសហប្រតិបត្តិការ ឱ្យកាន់តែល្អប្រសើររវាងប្រទេសទាំងពីរ។

សិក្ខាសាលានេះ អញ្ជើញជាអធិបតីពីលោករស់ វណ្ណា រដ្ឋលេខាធិការ សហការរៀបចំដោយក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ (MISTI) ក្រសួងសាធារណការ និងដឹកជញ្ជូន(MPWT) ក្រសួងរៀបចំដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន (MLIT) អង្គភាពទឹកស្អាត និងប្រព័ន្ធអនាម័យ ទីក្រុង Kitakyushu សមាគមអាជីវកម្មទឹកក្រៅប្រទេស នៃទីក្រុង Kitakyushu (KOWBA) និងសមាគមអ្នកផ្គត់ផ្គង់ទឹកស្អាតកម្ពុជា (CWA) ដោយបានការគាំទ្រពី ស្ថានទូតជប៉ុន និងទីភ្នាក់ងារសហប្រតិបត្តិការអន្តរជាតិជប៉ុន(JICA)។

សិក្ខាសាលានេះ មានការអញ្ជើញចូលរួមពីលោកស៊ឹម ស៊ីថា រដ្ឋលេខាធិការ តំណាងដ៏ខ្ពង់ខ្ពស់លោកហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ឯកឧត្តម ISHI Hiroyuki អនុរដ្ឋមន្ត្រីសម្រាប់វិស័យទឹកស្អាត និងទឹកកខ្វក់នៃក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន លោកUENO Atsushi ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំព្រះរាជាណាចក្រកម្ពុជា លោក EGUCHI Tetsuro អភិបាលរងទីក្រុងគីតាឡីសឺ និងមន្រ្តីពាក់ព័ន្ធ។

គោលបំណងនៃសិក្ខាសាលានេះ គឺដើម្បីចែករំលែកអំពីបច្ចុប្បន្នភាព និងស្ថានភាពនៃការគ្រប់គ្រងទឹកស្អាត និងប្រព័ន្ធទឹកកខ្វក់ ព្រមទាំងបង្កើន ពង្រឹង និងពង្រីកនូវកិច្ចសហប្រតិបត្តិការ ឱ្យកាន់តែល្អប្រសើររវាងប្រទេសទាំងពីរ កម្ពុជា-ជប៉ុន លើវិស័យទឹកស្អាត និងទឹកកខ្វក់ ដោយផ្តោតជាសំខាន់លើការអភិវឌ្ឍ និងការធានានូវធនធានមនុស្សលើវិស័យទឹកស្អាត និងទឹកកខ្វក់ ដើម្បីកែលម្អគុណភាពជីវិតរបស់ប្រជាពលរដ្ឋ និងបរិស្ថាន ព្រមទាំងការឆ្លើយតបទៅនឹងយុទ្ធសាស្ត្រអភិវឌ្ឍន៍ជាតិ ដែលបានផ្តល់អាទិភាព លើការអភិវឌ្ឍធនធានមនុ​ស្ស ការកែលម្អសេវាសាធារណៈ និងការអភិវឌ្ឍហេដ្ឋារចនាសម្ព័ន្ធប្រ​ក​​​បដោយចីរភាព និងនិរន្តរភាព៕

ដោយៈ និស្ស័យ

    ភ្នំពេញៈ រដ្ឋលេខាធិការក្រសួងសាធារណការ និងដឹកជញ្ជូនលោកជំទាវ កុយ សុដានី បានអនុញ្ញាតឱ្យក្រុមជំនាញការនៃក្រុមហ៊ុនទីប្រឹក្សាបច្ចេកទេសជប៉ុន របស់គម្រោងអភិវឌ្ឍន៍ផែនការមេ ដើម្បីប្រែក្លាយកំពង់ផែក្រុងព្រះសីហនុ ទៅជាកំពង់ផែ និងមជ្ឈមណ្ឌលឡូជីស្ទីកថ្នាក់តំបន់។

កិច្ចពិភាក្សានេះ មានការចូលរួមពីក្រុមជំនាញការទីភ្នាក់ងារសហប្រតិបត្តិការអន្តរជាតិជប៉ុន (JICA) ដឹកនាំដោយ លោក KOICHI MIYAKE ប្រធានវិទ្យាស្ថានអភិវឌ្ឍន៍តំបន់ឆ្នេរសមុទ្រ ក្រៅប្រទេសនៃប្រទេសជប៉ុន (OCDI) ។

កិច្ចប្រជុំនេះ ត្រូវបានរៀបចំឡើងក្នុងគោលបំណង ដើម្បីពិនិត្យនិងពិភាក្សាលើការរៀបចំរបាយការណ៍បឋម និងផែនការសកម្មភាព (Workplan) សម្រាប់ការផ្តើមអនុវត្តគម្រោងរៀបចំផែនការមេ ការកំណត់នូវសមាសភាពស្ថាប័នពាក់ព័ន្ធ ក្នុងការបង្កើតក្រុមការងារជំនាញ (Working Group) ការងារត្រៀមរៀបចំកិច្ចប្រជុំគណៈកម្មការសម្របសម្រួលរួមលើកទី១ (1st JCC) និងការរៀបចំសិក្ខាសាលាពិគ្រោះយោបល់ សម្រាប់ការអនុវត្តគម្រោងអភិវឌ្ឍន៍ផែនការមេ ដើម្បីប្រែក្លាយកំពង់ផែក្រុងព្រះសីហនុ ទៅជាកំពង់ផែ និងមជ្ឈមណ្ឌលឡូជីស្ទីកថ្នាក់តំបន់។

លោកជំទាវរដ្ឋលេខាធិការប្រចាំការ បានថ្លែងអំណរគុណចំពោះសមាជិកអង្គប្រជុំ និងភាគីជប៉ុន ដែលបានមកធ្វើបទបង្ហាញពីការរៀប​ចំផែនការការងារគម្រោង និងការចុះទៅជួបប្រជុំផ្ទាល់ជាមួយក្រសួងស្ថាប័នពាក់ព័ន្ធ ដើម្បីប្រមូលនូវធាតុចូលបន្ថែម ក្នុងការរៀបចំផែនការមេ និងណែនាំឱ្យក្រុមជំនាញការ នៃក្រុមហ៊ុនទីប្រឹក្សាបច្ចេកទេស គួរពិនិត្យបន្ថែមលើការកំណត់វិសាលភាព នៃការរៀបចំផែនការមេនេះ ការរៀបចំបង្កើត Working Group, ការកំណត់នូវរបៀបវារៈនៃកិច្ចប្រជុំ JCC និងកាលបរិច្ឆេទនៃការរៀបចំ សិក្ខាសាលាពិគ្រោះយោបល់ក្នុងខែកុម្ភៈ ខាងមុខ។

តាមរយៈកិច្ចប្រជុំនេះផងដែរ លោកជំទាវក៏បានបញ្ជាក់ដល់ក្រុមហ៊ុនទីប្រឹក្សាបច្ចេកទេស អំពីការត្រៀមលក្ខណៈជានិច្ចរបស់ថ្នាក់ដឹកនាំទទួលបន្ទុក និងមន្រ្តីបច្ចេកទេសនៃក្រសួងសាធារណការ និងដឹកជញ្ជូន ក្នុងការផ្តល់កិច្ចសហការបន្ថែមទៀត ធ្វើយ៉ាងណាជំរុញឱ្យការសិក្សាផែនការលម្អិតរបស់គម្រោងនេះ មានភាពច្បាស់លាស់ គ្រប់ជ្រុងជ្រោយ និងត្រឹមត្រូវតាមលក្ខណៈបច្ចេកទេស សំដៅឱ្យការសិក្សាទទួលបានលទ្ធផលផ្លែផ្កា ស្របតាមផែនការដែលបានគ្រោងទុក៕

ដោយ៖ សហការី

ភ្នំពេញ៖ ទីស្តីការក្រុមប្រឹក្សាអភិវឌ្ឍន៍កម្ពុជា៖ កាលពីព្រឹកថ្ងៃពុធ ១១រោច ខែបុស្ស ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី១៤ ខែមករា ឆ្នាំ២០២៦ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានរៀបចំកិច្ចប្រជុំច្រកចេញចូលតែមួយ ដើម្បីពិនិត្យពិភាក្សាលើសំណើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់ចំនួន ៩គម្រោង ក្រោមអធិបតីភាព លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា ដោយមានការអញ្ជើញចូលរួមពីសំណាក់តំណាងក្រសួង-ស្ថាប័ន និងរដ្ឋបាលរាជធានី ខេត្តពាក់ព័ន្ធ។

គម្រោងវិនិយោគទាំងនេះ មានទុនវិនិយោគសរុបប្រមាណ ៦៧លានដុល្លារអាម៉េរិក ដែលអាចបង្កើតការងារបានប្រមាណ ៣ពាន់កន្លែង និងមានមុខសញ្ញាវិនិយោគក្នុងវិស័យឧស្សាហកម្មទាំង៩គម្រោង (ខារអំបោះនិងជ្រលក់ពណ៌, ផលិតម្សៅកាល់ស្យូមធុនធ្ងន់ ម្សៅកាល់ស្យូមអ៊ីដ្រុកស៊ីតនិងម្សៅបៀកជញ្ជាំង, ផលិតត្រីខកំប៉ុងនិងទឹកត្រី, ផលិតវ៉ែនតានិងសម្ភារៈបន្ទាប់បន្សំវ៉ែនតាគ្រប់ប្រភេទ, ផលិតគ្រឿងតុបតែងសក់, ផលិតអំពូលភ្លើង បរិក្ខារអគ្គិសនី និងម៉ាស៊ីនបូមធូលី, ផលិតសំបកកំប៉ុង និងគម្របកំប៉ុង, ផលិតដើមណូអែល គ្រឿងលម្អដើមណូអែល និងគ្រឿងបន្លាស់ដើមណូអែល, ផលិតអំពូលភ្លើង អំពូលភ្លើងលម្អគ្រប់ប្រភេទនិងសម្ភារៈបន្ទាប់បន្សំអំពូលភ្លើង)។

គម្រោងវិនិយោគទាំង៩ដូចបានរៀបរាប់ខាងលើនេះ បានបោះទីតាំងនៅរាជធានីភ្នំពេញ ខេត្តកណ្តាល កំពង់ស្ពឺ កំពង់ឆ្នាំង កែប និងបាត់ដំបង។

ដោយៈ ម៉ាលីនណា

    ភ្នំពេញៈ លោកស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានផ្តល់កិច្ចសម្ភាសន៍ពិសេសមួយជូនភ្នាក់ងារសារព័ត៌មានNikkei Asia ដែលជាស្ថាប័នព័ត៌មានសេដ្ឋកិច្ច និងនយោបាយឈានមុខគេមួយនៅអាស៊ី និងជាសំឡេងដ៏មានឥទ្ធិពលក្នុងចំណោមវិនិយោគិន និងអ្នកកំណត់គោលនយោបាយជុំវិញពិភពលោក។

ការជ្រើសរើសផ្តល់កិច្ចសម្ភាសន៍ជូន Nikkei Asia ដែលជាស្ថាប័នល្បីល្បាញខាងការវិភាគ ស៊ីជម្រៅលើចង្វាក់ផ្គត់ផ្គង់សកល និងភូមិសាស្ត្រនយោបាយ គឺជាយុទ្ធសាស្ត្រដ៏សំខាន់ ក្នុងការបញ្ជូនសារស្តីពី ការបង្កើនភាពជឿជាក់ កាលានុវត្តភាព និងឧត្តមភាពរបស់កម្ពុជាទៅកាន់មជ្ឈដ្ឋានធុរកិច្ចអន្តរជាតិ។

ក្នុងជំនួបសម្ភាសន៍នេះ ឯកឧត្តមឧបនាយករដ្ឋមន្ត្រី បានលើកឡើងនូវចំណុចគន្លឹះមួយចំនួន រួមមានដូចជា ទី១ បច្ចុប្បន្នភាពនៃបរិ​យាកាសវិនិយោគ៖ ការបង្ហាញពីភាពរឹងមាំនៃស្ថិរភាពនយោបាយ និងច្បាប់វិនិយោគដែលមានភាពបត់បែន និងផ្តល់នូវកញ្ចប់លើកទឹកចិត្តប្រកបដោយភាពទាក់ទាញបំផុត សម្រាប់ការវិនិយោគដោយផ្ទាល់ពីបរទេស។

ទី២ ការធ្វើពិពិធកម្មរចនាសម្ព័ន្ធឧស្សាហកម្ម៖ របត់នៃការវិនិយោគដែលកំពុងផ្លាស់ប្តូរពីឧស្សាហកម្មកាត់ដេរ ឆ្ពោះទៅកាន់ឧស្សាហកម្មដែលមានតម្លៃបន្ថែមខ្ពស់ ជាអាទិ៍ ឧស្សហកម្មបង្គុំគ្រឿងអេឡិកត្រូនិចឧស្សាហកម្មកែច្នៃចំណីអាហារ និងឧស្សាហកម្មយានយន្ត ជាដើម។

ទី៣ ភាពធន់ក្នុងបរិការណ៍ប្រែប្រួលនៃពិភពលោក៖ ការត្រៀមលក្ខណៈរបស់កម្ពុជា តាមរយៈការកសាងហេដ្ឋារចនាសម្ព័ន្ធនានា ការបណ្តុះបណ្តាលកម្លាំងពលកម្មជំនាញ និងការបង្កើនការចាប់យកឌីជីថលូបនីយកម្មលើកំណែទម្រង់សេវាសាធារណៈ ដើម្បីឆ្លើយតបនឹងការប្រែប្រួលឥតឈប់ឈរនៃសេដ្ឋកិច្ចសកល។

ទី៤ យុទ្ធសាស្ត្រព្រំដែន និងស្ថិរភាពតំបន់៖ ការបញ្ជាក់ពីជំហរការទូត និងយុទ្ធសាស្ត្រឆ្លើយតបនឹងបញ្ហាព្រំដែនកម្ពុជា-ថៃ ដោយផ្តោតលើការកសាងតំបន់ព្រំដែនសន្តិភាព និងកិច្ចសហប្រតិបត្តិការសេដ្ឋកិច្ចដែលផ្តល់ផលប្រយោជន៍ឱ្យគ្នាទៅវិញទៅមក។

កិច្ចសម្ភាសន៍នេះ គឺជាសក្ខីភាពនៃការបើកចំហ និងការត្រៀមខ្លួនជាស្រេចរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយទស្សនវិស័យមុតស្រួចរបស់ សម្តេចធិបតីនាយករដ្ឋមន្ត្រី ក្នុងការធ្វើការងារយ៉ាងជិតស្និទ្ធជាមួយដៃគូអន្តរជាតិ ជាពិសេសតាមរយៈបណ្តាញព័ត៌មានដែលមានវិជ្ជាជីវៈខ្ពស់ ដូចជាNikkei Asia ដើម្បីបង្កើនទំនុកចិត្ត សំដៅទាក់ទាញទុនវិនិយោគប្រកបដោយគុណភាព សម្រាប់ជំរុញកំណើនសេដ្ឋកិច្ចជាតិ ប្រកបដោយចីរភាព និងសម្រេចឱ្យបាននូវ ចក្ខុវិស័យកម្ពុជាឆ្នាំ២០៥០ ជាប្រទេសមានចំណូលខ្ពស់៕