ដោយៈ គង់ សូរិយា

    ភ្នំពេញៈ ការស្ទង់មតិមួយបានបង្ហាញថា ប្រជាពលរដ្ឋកម្ពុជា៩៩,៨ភាគរយគាំទ្ររដ្ឋាភិបាល ក្នុងការយកករណីប្រាសាទតាមាន់តូច តាមាន់ធំ ប្រាសាទតាក្របី និងតំបន់មុំបីទៅដោះស្រាយនៅតុលាការយុត្តិធ៌មអន្តរជាតិ(ICJ)។

យោងតាមការស្ទង់មតិរបស់វិទ្យាស្ថានចក្ខុវិស័យអាស៊ី (AVI)​ដែលបានសម្ភាសន៍ជាមួយប្រជាពលរដ្ឋជាយុវជន វ័យកណ្តាល និងវ័យចំណាស់ចំនួន១៥៨៨នាក់ តាមរយៈប្រព័ន្ឋអនឡាញបានបង្ហាញទៀតថា ប្រជាជនចំនួន៩៣,៦ភាគរយពេញចិត្ត ចំពោះចំណាត់ការទូទៅរបស់រាជរដ្ឋាភិបាលកម្ពុជា ក្នុងការដោះស្រាយជម្លោះជាមួយថៃ ក្នុងនោះដែរ ប្រជាជនបានផ្តល់តម្លៃដល់ការចចារទ្វេរភាគី (២៩,៣ភាគរយ) ដរាបណាមានការតភ្ជាប់ជាមួយតុលាការយុត្តិធ៌មអន្តរជាតិ។

ការស្ទាបស្ទង់មតិដដែលបានបង្ហាញទៀតថា ប្រជាពលរដ្ឋកម្ពុជា៨៨,៧ភាគរយពេញចិត្ត ចំណាត់ការរបស់រដ្ឋាភិបាលក្នុងការវបិទព្រំដែនក្នុងការឆ្លើយតបការបិទព្រំដែនជាឯកតោភាគីពីភាគីថៃ និង៨៨,៦ភាគរយគាំទ្រដល់ការប្រើប្រាស់ផលិតផលក្នុងស្រុក។

សួមអានសេចក្តីប្រកាសលំអិត…………………..

ដោយ: គង់ លាងហួរ
អន្តរជាតិ: រដ្ឋបាលរបស់ប្រធានាធិបតីអាមេរិកលោក ដូណាល់ ត្រាំ បានស្នើដាក់លក់ដីសាធារណៈរាប់លានហិកតា ដើម្បីជួយផ្តល់មូលនិធិដល់ផែនការកាត់បន្ថយពន្ធ និងការចំណាយរបស់រដ្ឋបាលលោក ត្រាំ។

ផ្ទៃដីប្រហែល១,២លានហិកតាដែលជាកម្មសិទ្ធិរបស់ការិយាល័យគ្រប់គ្រងដីធ្លី និងសេវាកម្មព្រៃឈើរបស់រដ្ឋាភិបាលអាមេរិក នឹងត្រូវបានលក់ ដែលអាចកៀរគរទំហំទឹកប្រាក់ចំនួន១០ពាន់លានដុល្លារក្នុងរយៈពេល១០ឆ្នាំ។

ការលក់ដីនេះជាផ្នែកមួយនៃផែនការក្នុងការប្រមូលទំហំទឹកប្រាក់ឱ្យបានចំនួន២៩ពាន់លានដុល្លារតាមរយៈការបង្កើនការលក់ប្រេង ឧស្ម័ន ធ្យូងថ្ម រួមទាំងការខួងយកប្រេងនៅក្នុងដែនជម្រកសត្វព្រៃជាតិអាកទិករបស់រដ្ឋអាឡាស្កា។

គម្រោង​លក់​ដី​សាធារណៈ​ដើម្បី​ប៉ះប៉ូវការបាត់បង់ប្រាក់ចំណូល ដោយសារការកាត់បន្ថយពន្ធ ​បាន​បង្ក​ឱ្យមានភាពចម្រូងចម្រាស់។ ក្នុងនោះ សំណើលក់ដីប្រមាណ៥០០.០០០ហិកតានៅរដ្ឋ Utah និងរដ្ឋ Nevada ត្រូវបានដកចេញពីសភា បន្ទាប់ពីមានការប្រឆាំងពីសមាជិកគណបក្សសាធារណរដ្ឋមួយចំនួន។

រដ្ឋបាលលោក ត្រាំ បានអះអាងថា ការលក់ដីទាំងនេះមានភាពចាំបាច់ដើម្បីផ្តល់ដីតម្លៃថោកក្នុងគោលបំណងជួយដោះស្រាយវិបត្តិលំនៅដ្ឋាន និងដើម្បីជួយរដ្ឋភាគខាងលិច ដែលកាន់កាប់ដីសាធារណៈយ៉ាងច្រើន និងស្ដារតំបន់ទាំងនោះឱ្យមានផលប្រយោជន៍សេដ្ឋកិច្ច។

គណៈកម្មាធិការថាមពលព្រឹទ្ធសភាអាមេរិកបានលើកឡើងថា ផែនការនេះនឹងប្រើប្រាស់ចំនួនមិនដល់១ភាគរយផងនៃដីសាធារណៈសម្រាប់សាងសង់លំនៅដ្ឋាន។ ផែនការនេះនឹងបង្កើតការងាររាប់ពាន់កន្លែង និងជួយឱ្យពលរដ្ឋអាមេរិករាប់លាននាក់មានផ្ទះសម្បែង និងកាត់បន្ថយឱនភាព។

ផែនការនេះមានគោលដៅស្របនឹងផែនការរបស់រដ្ឋបាលលោក ដូ ណាល់ត្រាំ ដើម្បីប្រែក្លាយដីទំនេរមិនបានប្រើប្រាស់ទៅជាតំបន់មានការអភិវឌ្ឍន៍៕

ដោយៈ គង់ សូរិយា

    ភ្នំពេញៈ ការធ្វើពិពិធកម្មសេដ្ឋកិច្ចកម្ពុជា បានធ្វើឲ្យវិស័យយានយន្តនៅកម្ពុជា ទាក់ទាញទុនវិនិយោគដល់៦៤៧លានដុល្លារ ស្របពេលការនាំចេញ បានកើនដល់ទឹកប្រាក់១១៤០លានដុល្លារអាមេរិកផងដែរ។

ក្រោយពីបានដាក់ចេញនូវផែនទី បង្ហាញផ្លូវនាពេលកន្លងមក ការធ្វើពិពិធកម្មសេដ្ឋកិច្ច បានលេចចេញជាផ្លែផ្កាគួរជាទីមោទនៈ។ ជាក់ស្ដែង នៅឆ្នាំ២០២៤ វិស័យយានយន្តកម្ពុជាទទួលបានទំហំទុនវិនិយោគប្រមាណ៧៤៦លានដុល្លារអាម៉េរិក ខណៈការនាំចេញបានកើនឡើងដល់ប្រមាណ១.១៤០លានដុល្លារអាមេរិក លើសផែនការសម្រាប់ឆ្នាំ២០២៧ មួយផ្នែកធំបានមកពីការវិនិយោគ លើការផលិតសំបកកង់រថយន្តដែលបច្ចុប្បន្នកម្ពុជា ទទួលបានគម្រោងវិនិយោគផលិតសំបកកង់រថយន្តចំនួន៧ ដែលនឹងផ្តល់ជាទីផ្សារធំសម្រាប់កៅស៊ូកម្ពុជា។

ដោយឡែក ការវិនិយោគ និងការនាំចេញក្នុងវិស័យអេឡិចត្រូនិក ក៏បានបង្ហាញនូវនិន្នាការនៃការកើនឡើង បើទោះបីជាបានថយល្បឿនបន្តិចនៅឆ្នាំ២០២៤ ដោយសារនិន្នាការគាំពារនិយម នៅក្នុងពាណិជ្ជកម្មសាកល។

ទិន្ន័យទាំងនេះ ត្រូវបានបង្ហាញនាព្រឹកថ្ងៃទី១៧ ខែមិថុនា ឆ្នាំ២០២៥ នៅទីស្ដីការក្រុមប្រឹក្សាអភិវឌ្ឍន៍កម្ពុជា ក្នុងកិច្ចប្រជុំមួយក្រោមអធិបតីភាពដ៏ខ្ពង់ខ្ពស់ពីលោកស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក.អ.ក. និងជាប្រធានគណៈកម្មាធិការប្រតិបត្តិ ដឹកនាំការអនុវត្តផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកកម្ពុជា។

គោលបំណងនៃកិច្ចប្រជុំនេះ ធ្វើឡើងដើម្បីពិនិត្យ និងពិភាក្សាលើសេចក្ដីព្រាងរបាយការណ៍ វាយតម្លៃលើការអនុវត្តផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកកម្ពុជា ក្នុងឆ្នាំ២០២៣-២០២៤ មុននឹងដាក់ឆ្លងគណៈកម្មាធិការ គោលនយោបាយសេដ្ឋកិច្ច និងហិរញ្ញវត្ថុ (គ.ស.ហ.) នាពេលខាងមុខ។

លោកឧបនាយករដ្ឋមន្រ្តីស៊ុន ចាន់ថុល បានស្វាគមន៍យ៉ាងកក់ក្ដៅដល់ភ្ញៀវកិត្តិយសទាំងអស់ ដែលបានអញ្ជើញចូលរួមក្នុងកិច្ចប្រជុំខាងលើ ក៏ដូចជាថ្លែងអំណរគុណ ចំពោះកិច្ចខិតខំប្រឹងប្រែងរបស់ភាគីពាក់ព័ន្ធ ក្នុងការជំរុញការអនុវត្ត វិធានការផែនទីបង្ហាញផ្លូវ ប្រកបដោយស្មារតីទទួលខុសត្រូវខ្ពស់ និងបុរេសកម្ម ក្នុងចក្ខុវិស័យប្រែក្លាយកម្ពុជា ជា “មជ្ឈមណ្ឌលប្រមូលផ្ដុំ សកម្មភាពផលិតគ្រឿងបង្គុំយានយន្ត និងបរិក្ខារអេឡិចត្រូនិក សម្រាប់នាំចេញទៅទីផ្សារក្នុងតំបន់ និងសកលលោក” ចាប់តាំងពីការដាក់ចេញផែនទីបង្ហាញផ្លូវនេះ នៅចុងឆ្នាំ២០២២ រហូតទទួលបាន “សេចក្ដីព្រាងរបាយការណ៍វាយតម្លៃលើការអនុវត្តផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិកកម្ពុជា ក្នុងឆ្នាំ២០២៣-២០២៤” ។

ជាមួយគ្នានេះ លោកលឹម វិសាល អគ្គលេខាធិការរងគណៈកម្មាធិការវិនិយោគកម្ពុជានៃ ក.អ.ក. និងជាអនុប្រធានលេខាធិការដ្ឋានដឹកនាំ និងសម្របសម្រួលការអនុវត្ត គោលនយោបាយអភិវឌ្ឍវិស័យឧស្សាហកម្មកម្ពុជាឆ្នាំ២០១៥-២០២៥ (លេខាធិការដ្ឋាន IDP) បានធ្វើបទបង្ហាញអំពី “សាវតារ និងវឌ្ឍនភាពការងាររបស់ ក.អ.ក. ក្នុងក្របខណ្ឌជំរុញការអនុវត្តផែនទីបង្ហាញផ្លូវ” ព្រមទាំង លោក កែន ដាវីត ទីប្រឹក្សាអម ក.អ.ក. និងជាប្រធានក្រុមស្រាវជ្រាវនៃលេខាធិការដ្ឋាន IDP បានធ្វើបទបង្ហាញស្ដីពី“ សេចក្ដីព្រាងរបាយការណ៍វាយតម្លៃលើការអនុវត្តផែនទីបង្ហាញផ្លូវ ការអភិវឌ្ឍវិស័យយានយន្ត និងអេឡិចត្រូនិកកម្ពុជា ក្នុងឆ្នាំ២០២៣-២០២៤” ដែលមានការចូលរួមពិនិត្យ និងពិភាក្សាលើសេចក្ដីព្រាងរបាយការណ៍នេះ យ៉ាងផុសផុលពីសំណាក់អង្គប្រជុំ។

ជាមួយគ្នានេះ លោកស៊ុន ចាន់ថុលបានស្នើឱ្យក្រសួង ស្ថាប័នពាក់ព័ន្ធ ពន្លឿនការផ្ដល់យោបល់ជាលាយលក្ខណ៍អក្សរលើសេចក្ដីព្រាងរបាយការណ៍ ឱ្យបានចប់សព្វគ្រប់ មុនដាក់ឆ្លងគ.ស.ហ. ដើម្បីពិនិត្យ និងអនុម័ត នៅក្នុងខែមិថុនា ឬខែកក្កដា ឆ្នាំ២០២៥៕

ដោយៈ គង់ សូរិយា

កោះកុងៈ នៅទីបំផុតការស្ថាបនាពង្រីក និងលើកកំពស់គុណភាពផ្កូវជាតិលេខ៤៨ឋ ដែលភ្ជាប់ទៅកាន់ខេត្តកោះកុងពីផ្លូវជាតិលេខ៤ សម្រេចបានឆ១០០ភាគរយហើយ។

រដ្ឋលេខាធិការក្រសួងសាធារណការ និងដឹកជញ្ជូន សូរ វ៉ិចទ័រ ដែលជានាយកគម្រោង បានដឹកនាំក្រុមការងារបច្ចេកទេសក្រសួង ក្រុមហ៊ុនទីប្រឹក្សាបច្ចេកទេស KCIeng & KECC Joint Venture និងក្រុមហ៊ុនសាងសង់សម្ព័ន្ធក្រុមហ៊ុនកូរ៉េ ILSUNG & HANIL Joint Venture ចុះពិនិត្យគុណភាព និងបច្ចេកទេសលើការអនុវត្តគម្រោងលើកកម្រិតគុណភាពផ្លូវជាតិលេខ៤៨ ដើម្បីធ្វើពិធីប្រគល់-ទទួល។

ការចុះពិនិត្យនេះ គឺពិនិត្យឡើងវិញគុណភាពនៃការសាងសង់ ផ្លាកសញ្ញាចរាចរណ៍ និងគំនូសសញ្ញាចរាចរណ៍ជាដើម ដោយក្នុងនោះបានធ្វើការពិនិត្យទៅលើកម្រាស់ និងការបង្ហាប់ស្រទាប់កៅស៊ូ AC (ខួង និងពិសោធន៍) ធ្វើតេស្តជម្រាបទឹកលើស្រទាប់កៅស៊ូ និងពិនិត្យចំណុចបច្ចេកទេសមួយទៀតផងដែរ។

ក្រោយពីបានត្រួតពិនិត្យរួចរាល់ នៅរសៀលថ្ងៃដដែល លោករដ្ឋលេខាធិការ បានអញ្ជើញដឹកនាំក្រុមការងារប្រជុំវាយតម្លៃ និងបានឯកភាពធ្វើការប្រគល់-ទទួល ផ្លូវជាតិលេខ៤៨ជាផ្លូវការ។ ក្នុងនោះផងដែរ ក្រុមហ៊ុនសាងសង់មានកាតព្វកិច្ចត្រូវថែទាំផ្លូវនេះ រយៈពេលធានាពីរឆ្នាំបន្ថែមទៀតបន្ទាប់ពីការប្រគល់-ទទួលនេះ។

ឆ្លៀតក្នុងឱកាសនោះ លោកសូ វិកទ័រ ក៏បានកោតសរសើរដល់កិច្ចខិតខំប្រឹងប្រែង ដល់ក្រុមការងារបច្ចេកទេសសាងសង់ទាំងអស់ ដែលបានសម្រេចការងារសាងសង់នេះ ទោះបីជាស្ថានភាពភូមិសាស្ត្រពិបាកក្នុងការសាងសង់ក៏ដោយ និងបានធ្វើការផ្តាំផ្ញើដល់ក្រុមហ៊ុនដឹកជញ្ជូនទាំងអស់ កុំដឹកលើកទម្ងន់កម្រិតកំណត់ដោយច្បាប់ ដែលនាំឱ្យខូចខាតដល់ផ្លូវថ្នល់ ដែលជាសមិទ្ធផលរបស់ប្រទេសជាតិយើង។

គម្រោងលើកកម្រិតគុណភាពផ្លូវជាតិលេខ៤៨ មានប្រវែង១៤៨ គីឡូម៉ែត្រ ត្រូវបានសាងសង់ជាប្រភេទស្រទាប់កៅស៊ូAC បានបើកការដ្ឋានសាងសង់នៅ ថ្ងៃទី៣ ខែមករា ឆ្នាំ២០២២ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា។

ផ្លូវនេះ ត្រូវបានស្ថាបនាជាបួនគន្លង ចំនួន៥ទីតាំង ប្រវែង៣០គីឡូម៉ែត្រ និងពីរកន្លង ប្រវែង១១៨គីឡូម៉ែត្រ។ តាមផែនការគម្រោង គ្រោងបញ្ចប់នៅខែមេសា ឆ្នាំ២០២៤ ប៉ុន្តែដោយស្ថានភាពការរីករាលដាលនៃកូវីដ-១៩ និងកត្តាភូមិសាស្ត្រតំបន់ភ្នំ ធ្វើឱ្យគម្រោងនេះពន្យាពេលសាងសង់ជាង១ឆ្នាំ ពោលគឺបញ្ចប់ការសាងសង់នៅ ខែឧសភា ឆ្នាំ២០២៥ វិញ។

គម្រោងនេះ តភ្ជាប់ជាមួយផ្លូវជាតិលេខ១០ និងតភ្ជាប់ទៅខេត្តពោធិ៍សាត់ ខេត្តបាត់ដំបង និងខេត្តប៉ៃលិន មកកាន់តំបន់ឆ្នេរកម្ពុជា ដែលភ្ជាប់ប្រទេសកម្ពុជាទៅប្រទេសថៃ ត្រូវបានចាត់ទុកជាសរសៃឈាមសេដ្ឋកិច្ចដ៏មានសក្តានុពលរបស់កម្ពុជា ក្នុងការជួយសម្រួលដល់ការតភ្ជាប់ទំនាក់ទំនងគមនាគមន៍ និងការធ្វើសមាហរណកម្មតភ្ជាប់ផ្ទៃក្នុងប្រទេស ជាពិសេសកំពង់ផែទឹកជ្រៅនៅក្រុងព្រះសីហនុ សំដៅរួមចំណែកក្នុងការជំរុញការដោះដូរពាណិជ្ជកម្ម វិនិយោគ និងការដឹកជញ្ជូនដំណាំកសិផល និងកសិឧស្សាហកម្ម ឱ្យកាន់តែមានប្រសិទ្ធភាពខ្ពស់ ឆាប់រហ័ស និងចំណាយតិច៕

:: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT)

– Facebook: https://www.facebook.com/mpwt.gov.kh

– Telegram: https://t.me/mpwtnews

– TikTok: https://www.tiktok.com/@mpwt.tiktok

– YouTube: https://www.youtube.com/@mpwt.youtube

ដោយៈ សហសេវិក

    បាងកកៈ សារព័ត៌មានដែលមាននិន្នាការបែបជាតិនិយមរបស់ថៃ The Nationបានចុះផ្សាយពីជំហររបស់កម្ពុជា ដោយហៅសម្តេចតេជោហ៊ុន សែនប្រធានព្រឹទ្ឋសភានៃកម្ពុជាថា “លោក”។

គេហទំព័រ Popertyarea.asia សូមបកប្រែក្រៅផ្លូវការពីការសរសេររបស់សារព័ត៌មានខាងលើថា បណ្តាញព័ត៌មាន Fresh News របស់កម្ពុជា បានចុះផ្សាយនៅថ្ងៃទី១៦ ខែមិថុនានេះថា កម្ពុជាបានអះអាងសារជាថ្មីអំពីជំហរផ្លូវការរបស់ខ្លួន ក្នុងការដោះស្រាយជម្លោះព្រំដែនដែលកំពុងបន្តជាមួយប្រទេសថៃ តាមរយៈយន្តការច្បាប់អន្តរជាតិ គឺតុលាការយុត្តិធម៌អន្តរជាតិ (ICJ) ពាក់ព័ន្ធនឹងការទាមទារត្រួតស៊ីគ្នាជុំវិញតំបន់ត្រីកោណមរកត តាមឿងធំ តាមាន់តូច និងប្រាសាទតាក្របី។

លោក ហ៊ុន សែន ប្រធាន​ព្រឹទ្ធសភា​កម្ពុជា បាន​ជំរុញ​សហគមន៍​អន្តរជាតិ ជាពិសេស​អ្នក​ដែល​ស្រឡាញ់​សន្តិភាព និង​បដិសេធ​សង្គ្រាម គាំទ្រ​សំណុំរឿង​ផ្លូវច្បាប់​របស់​កម្ពុជា ​នៅ​តុលាការ​យុត្តិធម៌​អន្តរជាតិ។

លោក ហ៊ុន សែន ចាត់​ទុក​ចំណាត់​ការ​របស់​ប្រទេស​កម្ពុជា​ថា​មិន​គ្រាន់​តែ​ជា​យុទ្ធសាស្ត្រ​ផ្លូវ​ច្បាប់​ប៉ុណ្ណោះ​ទេ ប៉ុន្តែ​ជា​ជំហរ​សីលធម៌​ក្នុង​ការ​ប្រឈម​មុខ​នឹង​ភាព​តានតឹង​ក្នុង​តំបន់។

លោកបានប្រកាសថា “មានតែចោរទេដែលខ្លាចតុលាការ បើគេស្លូតត្រង់ មិនចាំបាច់ខ្លាចយុត្តិធម៌ទេ”។លោកបន្ថែមថា “វិធីសាស្រ្តរបស់កម្ពុជា គឺចាក់ឫសដោយសន្តិភាព និងដំណោះស្រាយស្របច្បាប់ តាមរយៈកិច្ចសន្ទនាទ្វេភាគី និងយន្តការអន្តរជាតិ មិនមែនការប្រឈមមុខគ្នាខាងយោធាទេ”។

លោក ហ៊ុន សែន អំពាវនាវឲ្យប្រទេស ដែលប្រកាន់ខ្ជាប់ច្បាប់អន្តរជាតិ គាំទ្រគំនិតផ្តួចផ្តើមរបស់កម្ពុជា ដោយគូរប្រៀបធៀបករណីអាស៊ានកន្លងមក ដូចជាករណីពាក់ព័ន្ធម៉ាឡេស៊ី ឥណ្ឌូណេស៊ី និងសិង្ហបុរី ដែលសុទ្ធតែបាននាំជម្លោះទឹកដីនៅចំពោះមុខតុលាការ ICJ៕

ដោយៈ គង់ ម៉ាណា

    ភ្នំពេញៈ មន្រ្តីក្រសួងសាអធារណៈការ និងដឹកជញ្ជូនបានឲ្យដឹងថា គិតត្រឹមពាក់កណ្តាលខែមិថុនា ឆ្នាំ២០២៥ នេះ គម្រោងស្ថាបនាស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) សម្រេចបានប្រមាណ៣៦%ហើយ។

ព័ត៌មានពីវឌ្ឍនភាពលើការសាងសង់ស្ពាននេះ បានបង្ហាញនាថ្ងៃអង្គារ ទី១៧ ខែមិថុនា ឆ្នាំ២០២៥ អង្គភាពគ្រប់គ្រងគម្រោងសាងសង់ស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) ដឹកនាំដោយលោក សួង ហេង រដ្ឋលេខាធិការ និងជានាយកគម្រោង ចុះពិនិត្យ តាមដានការអនុវត្តគម្រោង ដែលគិតត្រឹមពាក់កណ្តាលខែមិថុនា ឆ្នាំ២០២៥នេះ សម្រេចបានប្រមាណ៣៦% ហើយ បន្ទាប់ពីសម្ពោធបើកការដ្ឋានសាងសង់ នាថ្ងៃទី១៩ ខែកុម្ភៈ ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

បច្ចុប្បន្នការងារស្ពានផ្នែកខាងកើត សម្រេចបាន៖ ១/ផ្នែកគ្រឹះស្ពាន សម្រេចបានប្រមាណ៦៦,៥០% ក្នុងនោះសសរគ្រឹះចំនួន ១៥៦ដើម សម្រេចបាន១៣៧ដើម ២០ជើងតាងសម្រេចបានចំនួន៩ និងធ្នឹមភ្ជាប់ក្រោមចំនួន១២ សម្រេចបាន៨ធ្នឹម។ ២/រចនាសម្ព័ន្ធក្រោមស្ពានសម្រេចបាន២៥,១២% រួមមានតួសសរស្ពាន១២ សម្រេ​ចបានចំនួន៦សសរ សសរស្ពាន៥២ សម្រេចបាន២៤ និងធ្នឹមភ្ជាប់ក្បាលសសរទទឹងស្ពានចំនួន៣៤ សម្រេចបាន១០ធ្នឹម ព្រមទាំងការងារសំខាន់ៗមួយចំនួនទៀត។

រយៈពេលសាងសង់គិតត្រឹមខែឧសភា ឆ្នាំ២០២៥នេះ សម្រេចបាន ១៦ខែហើយ ស្មើនឹង ៣៨,១០% នៃផែនការសាងសង់៤២ខែ  ដោយមិនមានការយឺតយ៉ាវជាងកម្មវិធីការងារ ដែលគ្រោងទុកទេ ដែលត្រៀមបញ្ចប់នៅដើមឆ្នាំ២០២៨។

ក្រុមការងារវាយតម្លៃខ្ពស់ ចំពោះក្រុមហ៊ុនសំណង់សៀងហៃ ដែលបានអនុវត្តគម្រោងដែលបញ្ចប់ និងកំពុងដំណើរការបានគោរពតាមបទដ្ឋានបច្ចេកទេស និងកិច្ចសន្យាបច្ចេកទេសប្រកបដោយគុណភាព និងសោភណ័្ឌភាព ។ អង្គភាពគ្រប់គ្រងគម្រោងបានជំរុញឱ្យក្រុមហ៊ុនពន្លឿន ការងារសាងសង់ផ្លូវតភ្ជាប់ទៅផ្លូវជាតិលេខ១ និងបន្តពង្រឹងសុវត្ថិភាពការងារបន្តទៀត ដោយហេតុថារដូវវស្សាទឹកទន្លេចាប់ផ្តើមឡើង និងបន្តថែទាំ និងបំពាក់បន្ថែមពោងសុវត្ថិភាពលើទឹក ដើម្បីសុវត្ថិភាពអ្នកប្រើប្រាស់មធ្យោបាយដឹកជញ្ជូនតាមផ្លូវទឹក៕