ដោយៈ រតនៈ

កណ្តាលៈ ខណៈដែលពិភពលោកក៏ដូចជាកម្ពុជាផងដែរ កំពុងរងវិបត្តិកូវីត ហើយវិនិយោគិនមួយចំនួនផ្អាកបោះទុនវិនិយោគ អ្នកជំនាញផ្នែកអចលនទ្រព្យនៅតែមើលឃើញថា ដីនៅតំបន់តាមព្រំដែន នៅតែមានតម្រូវការសម្រាប់ក្រុមអ្នកវិនិយោគ ព្រោះថា គេមើលឃើញពីសក្ដានុពលសំរាប់ពេលអនាគត។

លោកស្រីចេវ សុឃុន ទីប្រឹក្សា សមាគមអ្នកជំនាញអចលនទ្រព្យកម្ពុជា និងជាសា្ថបនិកក្រុមហ៊ុន KAT APPRAISAL មានប្រសាសន៍ប្រាប់Propertyareaដឹងនាព្រឹកថ្ងៃទី៣១ ឧសភានេះថា ក្នុងអំឡុងកើតមានវិបត្តិកូវីតនេះក្រុមអ្នកវិនិយោគ និងឈ្មួញមួយចំនួនហាក់មិនហ៊ានទម្លាក់ទុន ដើម្បីវិនិយោគលើវិស័យអចលនទ្រព្យទេ ដោយខ្លាចកប់ដើមលើវិស័យមួយនេះ ប៉ុន្តែអ្នកស្រីអះអាងថា ក្នុងនោះក៏មានអ្នកវិនិយោគប្រមាណ២០ភាគរយ ដែលហ៊ានបោះទុនវិនិយោគ លើវិស័យមួយនេះនៅតាមតំបន់ព្រំដែន ដោយគិតថានៅទីនោះ អាចនឹងមានសក្ដានុពលនៅពេល ដែលប្រទេសកម្ពុជាបើកច្រកចេញចូលទៅប្រទេសផ្សេង ហើយវិបត្តិកូវីតបានថយចុះក្នុងកម្រិតប៉ះពាល់តិចបំផុត។

លោកស្រីបន្តថា “ខ្ញុំចុះសិក្សាការទិញលក់អចលនទ្រព្យនៅតំបន់ព្រំដែន តម្លៃលក់ចេញហាក់នៅទ្រឹង ចំណែកសំណង់ផ្សេងៗ ហាក់ផ្អាកសកម្មភាពជាច្រើនកន្លែង ប៉ុន្តែក៏នៅតែមានឈ្មួញ និងវិនិយោគិនមួយចំនួននៅតែបន្តទិញដីដដែល ជាពិសេសដីដែលមានទំហំធំ ហើយលក់ក្នុងតម្លៃក្រោមទីផ្សារ”។

បើតាមលោកស្រីចេវ សុឃុន ការលក់ដូរអចលនទ្រព្យនៅតំបន់ព្រំដែន មានអ្នកដាក់លក់ចេញមានរហូតដល់ទៅប្រមាណ៨០%។ ចំណែកការលក់បានដោយជោគជ័យ មានតែប្រមាណ២០%ប៉ុណ្ណោះ។

ក្នុងកិច្ចសំភាសន៍ជាមួយ Propertyarea នាពេលថ្មីៗនេះ លោកសំ សុខនឿន ប្រធានសមាគមអចលនទ្រព្យសកល (GRA) មានប្រសាសន៍ថា ក្នុងបញ្ហាគឺតែងតែមានឱកាស ក្នុងនោះសម្រាប់ការទិញ ដូរអចលនទ្រព្យក៏ដូចគ្នា អ្នកទិញអចលនទ្រព្យមានឱកាសច្រើនក្នុងការទិញក្នុងតម្លៃមួយសមរម្យ មិនថាតែអ្នកទិញសម្រាប់ធ្វើអាជីវកម្មទិញលក់ ឬទិញសម្រាប់ស្នាក់នៅនោះទេ។

លោកបន្តថា “អ្នកទិញអចលនទ្រព្យដែលមានឱកាសបំផុត គឺអ្នកដែលមានលុយហើយទិញដីឬផ្ទះទុកសម្រាប់ចំណេញ”។

អំឡុងពេលមានវិបត្តិកូវីតនេះ កម្ពុជាបានបិទច្រកចេញចូលជាមួយ ប្រទេសជិតខាងដូចជាថៃ ឡាវ វៀតណាម ដោយអនុញ្ញាតិចេញចូល លើសេវាសំខាន់ៗប៉ុណ្ណោះ។ ការណ៍បានធ្វើឲ្យចរន្តសេដ្ឋកិច្ច តាមតំបន់ព្រំដែនហាក់ថយបន្តិច។

ទោះជាយ៉ាងណារកទ្វារព្រំដែន ម៉ឺនជ័យ មានទីតាំងនៅក្នុងស្រុកកំចាយមារ ខេត្តព្រៃវែង ជាប់ច្រកទ្វារតំបន់ព្រំដែន តឺនណាម ខេត្តតៃនិញ ប្រទេសវៀតណាមដែលត្រូវបានរដ្ឋាភិបាលកម្ពុជាសម្រេចដំឡើងពីកម្រិតច្រកទ្វារតំបន់ ទៅជាច្រកទ្វារព្រំដែន-អន្តរជាតិ កាលពីខែមេសា ឆ្នាំ ២០១៤ គ្រោងនឹងបើកដំណើរការជាផ្លូវការនៅពេលឆាប់ៗផងដែរ។

ច្រកព្រំដែនជ្រៃធំ ស្រុកកោះធំ ខេត្តកណ្តាលជាតំបន់មានសក្តានុពលខ្លាំងមុនពេលេរដ្ឋាភិបាលបិទហេ្គមអនឡាញ ដោយតម្លៃដីបានហក់ឡើងខ្ពស់ និងសកម្មភាពអភិវឌ្ឍន៍មានសកម្មភាពយ៉ាងមមាញឹក ប៉ុន្តែបន្ទាប់ពីហ្គេមអនឡាញបិទបញ្ចប់។

ការទិញលក់ និងតម្លៃដីធ្លីហាក់ស្រុតចុះ ប៉ុន្តែអ្នកជំនាញនៅតែមានសុទិដ្ឋិនិយមថា តំបន់នេះនឹងមានការរីកចម្រើនលឿននាពេលអនាគត ដោយយសារតំបន់នេះមានប្លង់គោលអភិវឌ្ឈន៍រួចហើយ និងជាព្រំដែន ដែលមានសកម្មភាពដោះដូរពាណិជ្ជកម្មយ៉ាងសកម្ម ជាមួយប្រទេសជិតខាង៕

ដោយៈ ប៊ី

ភ្នំពេញៈ ច្រកព្រំដែនអន្តរជាតិម៉ឺនជ័យ-តឺនណាមប្រកាសបើកដំណើរការបណ្តោះអាសន្នត្រឹមកម្រិតថ្នាក់ខេត្ត នៃខេត្តព្រៃវែង(កម្ពុជា) និងខេត្តតៃនិញ(វៀតណាម) ដើម្បីសម្រួលដល់ការដោះដូរទំនិញរវាងកម្ពុជា និងវៀតណាំ។

ពិធីប្រកាសដាក់ឲ្យដំណើរការច្រកទ្វារព្រំដែនអន្តរជាតិ ម៉ឺនជ័យ-តឺនណាម បណ្តោះអាសន្នត្រឹមកម្រិតថ្នាក់ខេត្ត នៃខេត្តព្រៃវែង(កម្ពុជា) និងខេត្តតៃនិញ(វៀតណាម) ត្រូវបានធ្វើឡើងនៅព្រឹកថ្ងៃទី៣១ ខែឧសភា ឆ្នាំ២០២១។

លោកអ៊ុ ប៉ូល័ក្ខប្រធានទីស្នាក់ការត្រួតពិនិត្យច្រកទ្វារព្រុំដែនអន្តរជាតិម៉ឺនជ័យបានលើកឡើងថា ក្រោមការដឹកនាំ និងចង្អុលបង្ហាញរបស់សម្ដេចក្រឡាហោមសខេងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងឯកឧត្តម ជា សុមេធី អភិបាលខេត្តបានធ្វើឲ្យច្រកទ្វារព្រុំដែនអន្តរជាតិម៉ឺនជ័យនេះមានការរីកចំរើនយ៉ាងច្រើនជាខ្លាំង។

លោកបានបន្តទៀតថា ច្រកទ្វារព្រំដែនអន្តរជាតិម៉ឺនជ័យ មានទីតាំងភូមិសាស្ត្រខាងកើតទល់នឹងស្ទឹង ឆ្លងស្ពានថ្មជាប់នឹងប៉ុស្តិ៍ ៨៣៣ ស្ថិតនៅក្នុង ភូមិតាំងណាម ឃុំតឹងប៊ិន ស្រុកតឹងបៀង ខេត្តតៃនិញ នៃសាធារណៈរដ្ឋសង្គមនិយមវៀតណាម មានគោលខ័ណ្ឌសីមាទន្លេព្រំដែន ចែកដាច់ពីគ្នា ដោយយកខ្សែទឹកពាក់កណ្តាលម្ខាងម្នាក់ជាខ្សែបន្ទាត់ព្រំដែនកម្ពុជា-វៀតណាម។

លោកបានបន្ថែមទៀតថា កម្ពុជាបានសហការជាមួយភាគីវៀតណាមក្នុងការបង្កលក្ខណៈងាយស្រួលដល់ការឆ្លងកាត់ និងការដោះដូរទំនិញលក្ខណៈព្រំដែន ពិសេសទំនិញផ្នែកកសិកម្មជូនប្រជាពលរដ្ឋ, បានសហការជាមួយភាគីវៀតណាមក្នុងការ ក្នុងការហាមឃាត់ដូចជាអំពើរត់ពន្ធ ឧក្រិដ្ឋកម្ម ការជួញដូរ និងបទល្មើសផ្សេងៗឆ្លងដែនខុសច្បាប់ និងបានសហការជាមួយភាគីវៀតណាមក្នុងការបង្ការ និងទប់ស្កាត់ការឆ្លងរីករាលដាលនៃជំងឺផ្សេងៗ ជាពិសេសគឺជំងឺ កូវីដ១៩ ដែលកំពុងកើតមាននៅទូទាំងពិភពលោក ដោយអនុវត្តតាមវិធានការ និងគោលការណ៍ណែនាំរបស់រាជរដ្ឋ ភិបាល និងក្រសួងសុខាភិបាល ពិសេសវិធានការ ៣ការពារ និងពាកុំ។

លោកជា សុមេធីអភិបាលខេត្ត បានថ្លែងថា ចំពោះ ការតម្លើងកម្រិតច្រកទ្វារព្រំដែនកម្ពុជា-វៀតណាមនេះ គឺដើម្បីបង្ករភាពងាយស្រួល និងលើកកម្ពស់ដល់ការធ្វើដំណើរចេញចូលឆ្លងកាត់ព្រំដែន ការផ្លាស់ប្តូរទំនិញកសិផលនៅតំបន់ព្រំដែន ក៏ដូចជាការផ្លាស់ប្តូរពាណិជ្ជកម្មរវាងប្រទេសទាំងពីរ ដើម្បីទាក់ទាញវិនិយោគិនក្នុង និងក្រៅតំបន់ ជាពិសេសរវាងប្រជាពលរដ្ឋខេត្តព្រៃវែង និងប្រជាពលរដ្ឋខេត្តតៃនិញកាន់តែល្អប្រសើរ និងពង្រឹងជម្រុញកិច្ចសហប្រតិបត្តិការលើការទប់ស្កាត់ការរីករាលដាលជំងឺកូវីដ-១៩ អោយមានប្រសិទ្ធភាព។

ក្នុងនោះលោកអភិបាលខេត្តក៏នៅតែណែនាំដល់មន្ត្រីប្រចាំការនៅតាមច្រកទ្វារអន្តរជាតិនេះត្រូវតែបន្តអនុវត្តឱ្យបានម៉ឺងម៉ាត់នូវវិធានការរបស់ក្រសួងសុខាភិបាល ក៏ដូចជាសេចក្តីណែនាំរបស់រាជរដ្ឋាភិបាល ដែលត្រូវអនុវត្តឲ្យបាននូវវិធានការ ៣ ការពារ ៣កុំ ដើម្បីបង្កាទប់ស្កាត់ការរីករាលដាលឆ្លងនៃជំងឺកូវីដ១៩ រវាងប្រទេសទាំងពីរ។

សង់សំណង់អគារ និងហេដ្ឋារចនាសម្ព័ន្ឋនានា សម្រេចបានមួយចំនួន មាន៖ សាងសង់អគារទីស្នាក់ការត្រួតពិនិត្យបណ្តោះអាសន្ន ចំនួន ០១អគារ ស្មើនឹង៦បន្ទប់ សាងសង់អគារទីស្នាក់ការត្រួតពិនិត្យជាសំណង់រឹងមាំ ចំនួន ០២អគារ ស្មើនឹង១៤បន្ទប់ សាងសង់ខ្លោងទ្វាររូបប្រាសាទអង្គរវត្ត ចំនួន១ សាងសង់អគារស្នាក់នៅ ចំនួន១អគារ ស្មើនឹង៧បន្ទប់ សាងសង់ផ្ទះបាយ ចំនួន ០១អគារ សាងសង់ប៉ុស្តិ៍ត្រួតពិនិត្យ ចំនួន១ សាងសង់ផ្លូវសម្រាប់ចរាចរចេញចូល ចំនួន២ខ្សែ និងហេដ្ឋារចនាសម្ព័ន្ឋផ្សេងៗ៕

ដោយៈ ម៉ាណេត

ភ្នំពេញៈ ការសិក្សា ដែលត្រូវបានធ្វើឡើងថ្មីៗនេះ បានបង្ហាញថា មហាយក្សចិនត្រូវចាត់ទុកថាជាដៃគូអន្តរជាតិសំខាន់បំផុតរបស់ប្រទេសកម្ពុជា ក្នុងវិស័យជាច្រើន រួមមានការទូតបរទេស សេដ្ឋកិច្ច ពាណិជ្ជកម្ម និងហេដ្ឋារចនាសម្ព័ន្ធ។ នេះបើយោងតាមការចេញផ្សាយរបស់សារព័ត៌មាន Xinhua កាលពីចុងសប្តាហ៍កន្លងមកនេះ។

ការស្ទង់មតិនេះមានចំណងជើងថា “តើប្រជាជនកម្ពុជាគិតយ៉ាងដូចម្តេច? គំនិត និងអាកប្បកិរិយាចំពោះសង្គម និងនយោបាយនៅកម្ពុជា” ត្រូវបានធ្វើឡើងរួមគ្នាដោយមូលនិធិនយោបាយអាឡឺម៉ង់ខុនរ៉ាដ និងក្រុមហ៊ុនប្រឹក្សារបស់ក្រុមហ៊ុន Kantar។

ការស្ទង់មតិនេះបានសម្ភាសពលរដ្ឋកម្ពុជាចំនួន១.០១៥នាក់ ដែលមានអាយុចន្លោះពី១៦ទៅ៦៤ ឆ្នាំនៅតាមទីតាំងភូមិសាស្ត្រសំខាន់ៗចំនួន៥ រួមមានរាជធានីភ្នំពេញ វាលទំនាប ភ្នំ បឹងទន្លេសាប និងតំបន់ឆ្នេរសមុទ្រ កាលខែតុលា ឆ្នាំ២០២០។

ការស្ទង់មតិនេះបានឱ្យដឹងថា ប្រទេសកម្ពុជានិងចិនមានប្រវត្តិទំនាក់ទំនងនយោបាយរឹងមាំយូរអង្វែង ហើយបានបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយនៃកិច្ចសហប្រតិបត្តិការក្នុងឆ្នាំ២០១០ និងបានបន្ថែមទៀតថា ប្រទេសទាំងពីរបានប្តេជ្ញាអនុវត្តវិធានការផ្សេងៗគ្នានៅទូទាំងដែននយោបាយ សន្តិសុខ សេដ្ឋកិច្ច និងទំនាក់ទំនងរវាងប្រជាជន និងប្រជាជន។

ការស្ទង់មតិនេះបានឱ្យដឹងថា ប្រទេសចិនត្រូវបានអ្នកឆ្លើយតបចាត់ទុកថាជាដៃគូល្អបំផុត សម្រាប់ប្រទេសកម្ពុជា នៅពេលនិយាយអំពីពាណិជ្ជកម្ម ការទូតការបរទេស និងប្រជាជន។ ប្រជាជនកម្ពុជាចាត់ទុលប្រទេសចិនថាជាដៃគូបរទេសដ៏ល្អបំផុត សម្រាប់ប្រទេសរបស់ពួកគេនៅក្នុងកិច្ចការងារជាច្រើន។

ការស្ទង់មតិនេះបានបន្ថែមទៀតថា ប្រទេសជប៉ុន និងសហរដ្ឋអាមេរិក ដែលជាអ្នកផ្តល់ជំនួយបរទេសធំជាងគេដល់ប្រទេសកម្ពុជា បន្ទាប់ពីប្រទេសចិន ក៏បានជាប់ចំណាត់ថ្នាក់ខ្ពស់ក្នុងភាពដៃគូអន្តរជាតិដ៏សំខាន់ផងដែរ៕

ដោយៈ ម៉ាណេត

ភ្នំពេញៈ ធនាគារអភិវឌ្ឍន៍អាស៊ី (ADB) បានព្យាករថា សេដ្ឋកិច្ចកម្ពុជានឹងកើនឡើងរង្វង់៤ភាគរយនៅឆ្នាំនេះ និង៥,៥ ភាគរយនៅឆ្នាំក្រោយ ដោយសារការងើបឡើងវិញដ៏រឹងមាំនៃដៃគូពាណិជ្ជកម្មសំខាន់ៗរបស់ខ្លួន។ នេះបើយោងតាមទស្សនវិស័យសេដ្ឋកិច្ចអាស៊ីរួម ឆ្នាំ២០២១ ដែលត្រូវបានប្រកាសនៅចុងសប្តាហ៍កន្លងមកនេះ។

ADB បានព្យាករណ៍ថា ផលិតកម្មឧស្សាហកម្មរបស់ប្រទេសនេះនឹងកើនឡើង៧,១ភាគរយនៅឆ្នាំនេះ និង៧ ភាគរយនៅឆ្នាំក្រោយ ដោយសារការងើបឡើងវិញនៃផលិតផលសម្លៀកបំពាក់ ស្បែកជើង និងផលិតផលធ្វើដំណើរ ក៏ដូចជាកំណើននៃការគ្រឿងអេឡិចត្រូនិក និងកង់។

វិស័យកសិកម្មត្រូវបានគេរំពឹងថានឹងកើនឡើង១,៣ភាគរយ ក្នុងឆ្នាំ២០២១ និង១,២ ភាគរយនៅឆ្នាំ២០២២ ខណៈសេវាកម្មអាចនឹងងើបឡើងវិញយឺតៗ ដោយកើនឡើង៣,៣ភាគរយក្នុងឆ្នាំ២០២១ និង៦,២ភាគរយនៅឆ្នាំ២០២២ ។ ធនាគារអភិវឌ្ឍន៍អាស៊ីបានកត់សម្គាល់ថា ព្រឹត្តិការណ៍ឆ្លងជំងឺកូវីស១៩ចូលសហគមន៍ ធ្វើឱ្យសកម្មភាពក្នុងវិស័យសេវាកម្មធ្លាក់ចុះ។

នាយកប្រចាំប្រទេសរបស់ធនាគារអភិវឌ្ឍន៍អាស៊ីប្រចាំនៅកម្ពុជាលោក Sunniya Durrani Jamal បានសង្កត់ធ្ងន់ថា ក្នុងបរិយាកាសដ៏លំបាកនេះ គោលនយោបាយសារពើពន្ធនៅតែមានសារៈសំខាន់ នៅពេលការដាក់ចេញកញ្ចប់សង្គ្រោះសេដ្ឋកិច្ចទូលំទូលាយបានដើរតួនាទីយ៉ាងសំខាន់ក្នុងការគាំទ្រដល់សេដ្ឋកិច្ច៕

ដោយៈ សុខុម

វ៉ាស៊ីនតោន: ប្រធានាធិបតីសហរដ្ឋអាមេរិក លោក ចូ បៃឌិន បានបញ្ចេញថវិកាប្រចាំឆ្នាំដំបូងរបស់លោក គឺគម្រោងចំណាយរហូតដល់ទៅ៦ទ្រីលានដុល្លារ ដោយក្នុងនោះរួមមានទាំងការដំឡើងពន្ធយ៉ាងច្រើនសន្ធឹកសន្ធាប់ទៅលើពលរដ្ឋអាមេរិក ដែលមានស្ដុកស្ដម្ភផងដែរ ដើម្បីជំរុញកំណើនសេដ្ឋកិច្ចបន្ថែម។ នៅបើយោងតាមសារព័ត៌មាន BBC ចុះផ្សាយកាលពីថ្ងៃអាទិត្យ ទី២៩ ខែឧសភា ឆ្នាំ២០២១។

សំណើថវិកាដ៏ធំនេះរួមមានទាំងកម្មវីធីសង្គមធុះៗ និងការវិនិយោគថ្មីៗដើម្បីប្រយុទ្ធប្រឆាំងការប្រែប្រួលអាកាសធាតុផងដែរ។
ទោះជាយ៉ាងណា សំណើថវិកានេះត្រូវការការអនុម័តពីរដ្ឋសភា ទីដែលលោក Lindsey Graham តំណាងរាស្ត្រមកពីគណបក្សសាធារណរដ្ឋបានថ្កោលទោសថា សំណើថវិកានោះវាធំធេងខ្លងពេកហើយ។

នៅក្រោមផែនការចំណាយនេះ បំណុលនឹងឈានដល់១១៧%នៃផលិតផលក្នុងស្រុកសរុប (GDP) នៅត្រឹមឆ្នាំ២០៣១ ដោយឡើងហួសកម្រិតអំឡុងសង្គ្រាមលោកលើកទី២ ទៅទៀត បើទោះបីជាមានការដំឡើងពន្ធដែលត្រូវបានស្នើឡើងយ៉ាងតិច៣ទ្រីលានដុល្លារលើក្រុមហ៊ុនសាជីវកម្ម ផលចំណេញជាមូលធន និងប្រាក់ចំណូលយ៉ាងណាក្ដី។

លោក ដូណាល់ ត្រាំ អតីតប្រធានាធិបតីសហរដ្ឋអាមេរិក ដែលមកពីគណបក្សសាធារណរដ្ឋ ក៏បានចំណាយឱនភាពថវិកាយ៉ាងច្រើនសន្ធឹកសន្ធាប់ដែរក្នុងមួយឆ្នាំៗ អំឡុងពេលលោកនៅកាន់អំណាច ហើយសំណើផែនការចំណាយប្រចាំឆ្នាំលើកចុងក្រោយបង្អស់របស់លោកមានរហូតដល់ទៅ៤,៨ទ្រីលានដុល្លារឯណោះ។

សំណើថវិការបស់លោកចូ បៃឌិន រួមមានទាំងសំណើ១,៥ទ្រីលានដុល្លារសម្រាប់ការចំណាយប្រតិបត្តិការសម្រាប់មន្ទីរបញ្ចកោណ និងស្ថាប័នផ្សេងៗទៀតរបស់រដ្ឋាភិបាលផងដែរ។ កញ្ចប់ថវិកានេះក៏រួមមានទាំងផែនការ២ដែលលោកធ្លាប់បានប្រកាសមុននេះផងដែរ នោះគឺផែនការការងារដែលមានទំហំ២,៣ទ្រីលានដុល្លារ និងផែនការគ្រួសារដែលមានទំហំ១,៨ទ្រីលានដុល្លារផងដែរ។

លោកចូ បៃឌិន ដែលមកពីគណបក្សប្រជាធិបតេយ្យបានគូសបញ្ជាក់ថា សំណើកញ្ចប់ថវិការបស់លោក “វិនិយោគដោយផ្ទាល់ទៅលើពលរដ្ឋអាមេរិក ហើយនឹងពង្រឹងសេដ្ឋកិច្ចរបស់ប្រជាជាតិយើង និងធ្វើឱ្យសារពើពន្ធរបស់យើងកាន់តែរឹងមាំសម្រាប់រយៈពេលវែង”៕