ដោយៈ ស៊ីវ ម៉េង

          ភ្នំពេញៈ ក្នុងនាមជាមិត្តដែកថែបរបស់កម្ពុជា និងជាដៃគូយុទ្ឋសាស្រ្តគ្រប់ជ្រុងជ្រោ យ រដ្ឋាភិបាល និងក្រុមហ៊ុននានារបស់មហាមិត្តចិន បានប្រកាសនិងផ្តល់ជំនួយចំនួន៤លើកដល់កម្ពុជា ក្នុងរយៈពេលត្រឹម៣ថ្ងៃប៉ុណ្ណោះ។

ថ្ងៃទី២៧ មេសា

ជាក់ស្តែងក្រុមហ៊ុនចិនមួយមានឈ្មោះថា «ZHOUFANG GROUP» បានបន្ដការឧបត្ថម្ភម៉ាសជាង១លានម៉ាស និងសម្លៀកបំពាក់ពេទ្យចំនួន៣ម៉ឺនកំប្លេរថែមទៀត ដល់រាជរដ្ឋាភិបាលកម្ពុជា និងប្រជាជនកម្ពុជា ដើម្បីចូលរួមប្រយុទ្ធប្រឆាំងជំងឺកូវីដ១៩ ដែលកំពុងមានការកើនឡើង ដោយសារព្រឹត្តិការណ៍សហគមន៍២០កុម្ភៈ។

ពិធីប្រគល់ និងទទួលជំនួយដ៏ថ្លៃថ្លារបស់ក្រុមហ៊ុនចិនខាងលើនេះ បានធ្វើឡើងកាលពីថ្ងៃទី២៧ ខែមេសា ឆ្នាំ២០២១ ប្រគល់ដោយក្រុមហ៊ុនមួយរបស់ចិន «ZHOUFANG GROUP» ជូនដល់អគ្គកុងស៊ុលកម្ពុជាប្រចាំ នៅទីក្រុងសៀងហៃ លោក នាង សំរិតកុមារ។

នេះជាជំនួយដ៏ច្រើនម្ដងទៀត របស់ក្រុមហ៊ុននៅក្នុងប្រទេសចិន ដើម្បីរួមចំណែកទុក្ខលំបាកជាមួយរដ្ឋាភិបាលកម្ពុជា ក្នុងការប្រយុទ្ធប្រឆាំងជំងឺកូវីដ ក្រោយពេលដែលកម្ពុជា បានជួបព្រឹត្តិការណ៍២០កុម្ភៈ ដែលធ្វើឲ្យមានអ្នកឆ្លងរហូតដល់ជាង ១ម៉ឺននាក់ និងស្លាប់ជិត១០០នាក់។

ថ្ងៃទី២៨ មេសា

វ៉ាក់សាំងកូវីដ១៩ ស៊ីណូហ្វាម ដែលជាជំនួយរបស់រដ្ឋាភិបាលចិន ចំនួន ៤០ម៉ឺនដូសទៀត បានដឹកមកដល់កម្ពុជានៅយប់ថ្ងៃទី២៨ ខែមេសា ឆ្នាំ២០២១នេះ ដើម្បីចូលរួមប្រយុទ្ធប្រឆាំងជំងឺកូវីដ១៩ និងធានាការពារសុខុមាលភាពប្រជាពលរដ្ឋកម្ពុជា ពីការរាតត្បា​តជំងឺកូវីដ១៩។

វ៉ាក់សាំងស៊ីណូហ្វាមចំនួន ៤០ម៉ឺនដូសនេះ គឺជាជំនួយរបស់មិត្តចិន ដឹកមកដល់កម្ពុជាលើកទី៣ហើយ។ លើកទី១ ដឹកមកដល់ថ្ងៃទី០៧ ខែកុម្ភៈ ចំនួន ៦០ម៉ឺនដូស និងលើកទី២ ដឹកមកដល់ថ្ងៃទី៣១ ខែមីនា ចំនួន ៧០ម៉ឺនដូស។

វ៉ាក់សាំងកូវីដ១៩ ជាឧបករណ៍ដ៏សំខាន់មួយបន្ថែមទៀត ក្នុងប្រតិបត្តិការប្រយុទ្ធប្រឆាំងជំងឺកូវីដ១៩ និងជួយការពារសុខភាពរបស់មនុស្ស ពីការវាយប្រហារដោយជំងឺកូវីដ១៩។ រាជរដ្ឋាភិបាលបានប្រឹងប្រែង និងស្វះស្វែងយ៉ាងខ្លាំង ក្នុងការរកវ៉ាក់សាំងចាក់ជូនប្រជាពលរដ្ឋកម្ពុជា។

កម្ពុជា ទទួលបានវ៉ាក់សាំងចំនួនជិត៤លានដូសរួចមកហើយ ហើយភាគច្រើនបំផុ​តជាវ៉ាក់សាំងជាជំនួយ និងទិញពីប្រទេសចិន។ វ៉ាក់សាំងដែលកម្ពុជាទទួលបានរួចមកហើយនោះ រួមមាន៖ វ៉ាក់សាំងស៊ីណូហ្វាម ជាជំនួយរបស់រដ្ឋាភិបាលចិនចំនួន ១.៣លានដូស, វ៉ាក់សាំងស៊ីណូវ៉ាក់ ទិញពីប្រទេសចិន ចំនួន ២លានដូស និងវ៉ាក់សាំងអាស្ត្រាហ្សេនីកា ជំនួយរបស់ខូវ៉ាក់ តាមអង្គការសុខភាពពិភពលោកចំនួន ៣២៤,០០០ដូស។

ជំនួយកាន់តែច្រើននៅថ្ងៃដដែល

ស្ថានទូតចិន តាមរយៈទំព័រ Facebook ផ្លូវការបានលើកឡើងថា ចិន និងកម្ពុជា ជាបងប្អូនល្អប្រៀបដូចដៃ និងជើង ជាដៃគូល្អដែលស្គាល់ចិត្តគ្នាទៅវិញទៅមក។ ក្នុងកិច្ចប្រយុទ្ធប្រឆាំងនឹងជំងឺវីរុស រដ្ឋាភិបាល និងប្រជាជនចិន តែងឈរជាមួយរាជរដ្ឋាភិបាល និងប្រជាជនកម្ពុជាជានិច្ច រួមគ្នាពុះពាររាល់ឧបសគ្គទាំងឡាយ។

បច្ចុប្បន្នក្រោមស្ថានភាពដ៏តឹងតែង នៃជំងឺវីរុសកូវីដ-១៩ ក្នុងប្រទេសកម្ពុជា ភាគីចិនតែងខិតខំពង្រឹងកិច្ច សហប្រតិបត្តិការទប់ស្កាត់នឹងជំងឺវីរុស តាមគ្រប់មធ្យោបាយជាមួយភាគីកម្ពុជា។

នៅយប់ថ្ងៃទី២៨ ខែមេសា ឆ្នាំ២០២១នេះ ជំនួយឥតសំណងជំហានទី៣ របស់ភាគីចិន ជូនចំពោះភាគីកម្ពុជា ជាវ៉ាក់សាំងកូវីដចំនួន៤០ម៉ឺនដូស បានមកដល់រាជធានីភ្នំពេញ តាមរយៈជើងហោះហើរស៊ីវិល។ នេះជាជំនួយឥតសំណងរបស់ចិនជាវ៉ាក់សាំងជំហានទី៣ បន្ទាប់ពីជំហានទី១ ចំនួន៦០ម៉ឺនដូស និងជំហានទី២ ចំនួន៧០ម៉ឺនដូស សរុប១លាន៧សែនដូស។

ថ្ងៃទី២៩ មេសា

          រដ្ឋាភិបាលចិន បានផ្តល់ឳសថបុរាណចិនLianhua Qingwen ចំនួន៨៨០០០ប្រអប់ដល់កម្ពុជា​ ដែលឳសថនេះ ត្រូវបានប្រគល់ជូនរាជរដ្ឋាភិបាលកម្ពុជាហើយ នៅព្រឹកថ្ងៃទី២៩ ខែមេសា ឆ្នាំ២០២១នេះ។

ជំនួយថ្នាំបុរាណចិននេះ ត្រូវបានរៀបចំពិធីប្រគល់-ទទួល នៅទីស្តីការក្រសួងសុខាភិបាល ក្រោមវត្តមានរបស់ លោកសាស្រ្តាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល រួមជាមួយលោក វ៉ាង វិនធៀន ឯកអគ្គរដ្ឋទូតចិនប្រចាំកម្ពុជា។

សេចក្តីប្រកាសព័ត៌មានរបស់ក្រសួងសុខាភិបាល ដែលបណ្តាញព័ត៌មាន Fresh News ទទួលបាននៅព្រឹកថ្ងៃនេះ បានបញ្ជាក់ថា ក្នុងជំនួបទទួលអំណោយថ្នាំនោះ លោករដ្ឋមន្ត្រីក្រសួងសុខាភិបាលបានគូសបញ្ជាក់ថា ក្រោមការដឹកនាំដ៏ឈ្លាសវៃ និងប្រកប​ដោ​យគតិបណ្ឌិតរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាកិច្ចសហប្រតិបត្តិការកម្ពុជា-ចិន ត្រូវបានពង្រឹង និងពង្រីកឥតឈប់ឈរពីមួយថ្ងៃទៅមួយថ្ងៃ លើគ្រប់វិស័យទាំងអស់ ជាពិសេសវិស័យសុខាភិបាល បានទទួលនូវជំនួយឥតសំណងយ៉ាងច្រើនឥតគណនា និយាយជារួម និងការជួយឧបត្ថម្ភគាំទ្រ ក្នុងការប្រយុទ្ធនឹងការរាតត្បាតជំងឺកូវីដ-១៩ នៅកម្ពុជា ទាំងបច្ចេកទេស ថវិកា និងឧបករណ៍សម្ភារៈបរិក្ខារវេជ្ជសាស្ត្រ រួមទាំងវ៉ាក់បង្ការជំងឺកូវីដ-១៩ និយាយដោយឡែក។

ជំនួយសម្ភារៈសំរាប់ប្រើប្រាស់ប្រយុទ្ឋជំងឺកូវីដ

ដោយមើលឃើញថា សម្លៀកបំពាក់ការពារ, វែនតាការពារ និងបរិក្ខាពេទ្យប្រយុទ្ធប្រឆាំងជំងឺកូវីដ១៩ គឺជាតម្រូវការចាំសម្រាប់កម្ពុជា ដើម្បីប្រយុទ្ធប្រឆាំងនឹងជំងឺកូវីដ១៩នេះ ក្រុមហ៊ុន Shoukang Medical Science and Technology ដែលជាក្រុមហ៊ុនដ៏ល្បីល្បាញមួយក្នុងខេត្តសានដុង (Shandong) មានមូលដ្ឋានក្នុងទីក្រុង ជីណាន (Jinan) បានធ្វើការឆ្លើយតបភ្លាមៗ ដើម្បីចូលរួមយ៉ាងសកម្មក្នុងការប្រយុទ្ធប្រឆាំង COVID-19 នៅក្នុងប្រទេសកម្ពុជា។

ក្រុមហ៊ុននេះ តាមរយៈស្ថានកុងស៊ុលកម្ពុជាប្រចាំទីក្រុង Kunming ប្រទេសចិន ផ្តល់ជំនួយដូចជារបាំងមុខការពារ វ៉ែនតាការពារ ស្រោមដៃការពារ សម្លៀកបំពាក់ការពារ និងបរិក្ខាពេទ្យមួយចំនួនទៀត។

អំណោយនេះត្រូវបានស្ថានកុងស៊ុលកម្ពុជា ប្រចាំទីក្រុង Kunming ទាក់ទងជាបន្ទាន់ជាមួយជើងហោះហើរ ដើម្បីដឹកជញ្ជូនពីទីក្រុង Kunming ទៅកាន់ប្រទេសកម្ពុជា នៅថ្ងៃទី២៨ ខែមេសា ឆ្នាំ២០២១ ដើម្បីធានាឱ្យបានថា សម្ភារ ឬបរិក្ខាប្រយុទ្ធប្រឆាំង COVID-19 នានា នឹងអាចទៅដល់ដៃបុគ្គលិកសុខាភិបាលជួរមុខ ឱ្យបានឆាប់រហ័សបំផុត តាមដែលអាចធ្វើទៅបាន។

សារដ៏កក់ក្តៅពីស្ថានទូតចិននៅកម្ពុជា

          ស្ថានទូតចិន តាមរយៈទំព័រ Facebook ផ្លូវការបានលើកឡើងថា ចិន និងកម្ពុជា ជាបងប្អូនល្អប្រៀបដូចដៃ និងជើង ជាដៃគូល្អដែលស្គាល់ចិត្តគ្នាទៅវិញទៅមក។ ក្នុងកិច្ចប្រយុទ្ធប្រឆាំងនឹងជំងឺវីរុស រដ្ឋាភិបាល និងប្រជាជនចិន តែងឈរជាមួយរាជរដ្ឋាភិបាល និងប្រជាជនកម្ពុជាជានិច្ច រួមគ្នាពុះពាររាល់ឧបសគ្គទាំងឡាយ។

បច្ចុប្បន្ន ក្រោមស្ថានភាពដ៏តឹងតែង នៃជំងឺវីរុសកូវីដ-១៩ ក្នុងប្រទេសកម្ពុជា ភាគីចិនតែងខិតខំពង្រឹង កិច្ចសហប្រតិបត្តិការទប់ស្កាត់នឹងជំងឺវីរុស តាមគ្រប់មធ្យោបាយជាមួ យភាគីកម្ពុជា។

ម៉្យាងវិញទៀតភាគីចិន បានប្រគល់ជំនួយ និងវ៉ាក់សាំងតាមការបញ្ជាទិញយ៉ាងទាន់ពេលវេលា ជូនដល់ភាគីកម្ពុជា មួយវិញទៀត ក៏បានជួយភាគីកម្ពុជា លើកកម្ពស់សមត្ថភាពក្នុងការតេស្តរកជំងឺវីរុសកូវីដ-១៩។ ស្ថានទូតចិនបានអះអាងទៀតថា មន្ទីរពិសោធន៍តេស្តសំណាក ក្នុងខេត្តព្រះសីហនុ ដែលជាជំនួយរបស់រដ្ឋាភិបាលចិន ជូនចំពោះប្រទេសកម្ពុជា ត្រូវបានប្រគល់ និងដាក់ឲ្យប្រើប្រាស់ជាផ្លូវការ កាលពីប៉ុន្មានថ្ងៃមុន។

ស្ថានទូតចិន បានបន្ថែមទៀតថា ដើម្បីជួយអ្នកជំងឺកូវីដមានអាការៈធូរស្បើយ ភាគីចិនថ្មីៗនេះ បានផ្តល់ជំនួយជាឱសថបុរាណចិន LIANHUA QINGWEN ដែលមានតម្លៃសរុប២០ម៉ឺនដុល្លារអាមេរិក ជូនដល់ក្រសួងសុខាភិបាលកម្ពុជា ដែលទាំងនេះបានបង្ហា ញពីមិត្តភាព ដ៏សែនជ្រាលជ្រៅបំផុតរបស់ប្រជាជនចិន ជូនចំពោះប្រជាជនកម្ពុជា។

ស្ថាតទូតចិន បានបង្ហាញនូវជំនឿជឿជាក់ថា ស្ថិតក្រោមម្លប់បារមីដ៏ត្រជាក់ត្រជំរបស់ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយ ករដ្ឋមន្រ្តីនៃកម្ពុជា ប្រជាជនកម្ពុជា ប្រាកដជាអាចពុះពាររាល់ឧបសគ្គ និងអាចយកឈ្នះយ៉ាងជោគជ័យជាមួយជំងឺវីរុសកូវីដ-១៩ ក្នុងពេលឆាប់ៗនេះជាមិនខាន៕

រៀបរៀងនិងកត់ត្រា ដោយយិន លាងគង់

ដោយៈ ប៊ី

ភ្នំពេញៈ ក្រុមហ៊ុន Cambodia Airports ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនអាកាសចរណ៍ VINCI Airports បានសម្រេចជ្រើសរើសក្រុមហ៊ុន Amadeus Flow ដែលផ្តល់សេវាកម្ម ដំណោះស្រាយបច្ចេកវិទ្យារបស់ប្រទេសអេស្បាញ ដើម្បីបំពេញតម្រូវការអ្នកដំណើរ។ នេះបើយោងតាមការចេញផ្សាយរបស់គេហទំព័រ Airport Technology នៅថ្ងៃទី២៨ ខែមេសា ឆ្នាំ២០២១។

Amadeus Flow គឺជាវេទិកាបច្ចេកវិទ្យា modular airport cloud ដែលជួយគ្រប់គ្រងសេវាកម្ម អ្នកដំណើរទាំងស្ថានីយខាងក្នុង និងខាងក្រៅអាកាសយានដ្ឋាន។

ក្រុមហ៊ុនបានសម្គាល់ថា ដំណោះស្រាយបច្ចេកវិទ្យានេះ នឹងធ្វើឱ្យអាកាសយាន   ដ្ឋានកម្ពុជា អាចដាក់ពង្រាយសមត្ថភាពគ្រប់គ្រងអ្នកដំណើរថ្មី តាមInternet បានយ៉ាងឆាប់រហ័ស។

វានឹងអនុញ្ញាតឱ្យក្រុមហ៊ុន Cambodia Airports ដែលប្រតិបត្តិការលើព្រលានយន្តហោះអន្តរជាតិចំនួនបីរបស់ កម្ពុជា គ្រប់គ្រងតាមបច្ចេកវិទ្យា cloud និងផ្តល់សេវាកម្មអ្នកដំណើរពីទីតាំងណាមួយរបស់ខ្លួន។

អ្នកគ្រប់គ្រងទូទៅនៅអាកាសយានដ្ឋានភ្នំពេញលោក Hervé Bonin បានថ្លែងថា “អ្នកដំណើររំពឹងថា នឹងទទួលបានបទពិសោធន៍រលូន និងផ្លាស់ទៅប្រើប្រាស់cloud ជាមួ​យក្រុមហ៊ុន Amadeus មានន័យថា យើងអាចផ្តល់ជូនសេវាកម្មនាពេលបច្ចុប្បន្ន និងអនាគតបានយ៉ាងប្រសើរ”។

លោកបានបន្តថា “ដោយមានការចែករំលែកចក្ខុវិស័យរយៈពេលវែងរបស់យើង ក្រុមហ៊ុន Amadeus គឺជាដៃគូដ៏ត្រឹមត្រូវ ក្នុងការជួយដោះស្រាយភាពស្មុគស្មាញផ្សេងៗ ដូច្នេះយើងអាចដាក់ចេញនូវការច្នៃប្រឌិតថ្មីៗ ដែលងាយស្រួល សម្រាប់អតិថិជន អ្នកដំណើរ និងក្រុមហ៊ុនអាកាសចរណ៍ ដែលជាចំណុចស្នូល នៃព្រលានយន្តហោះរបស់យើង”។

លោកបានឱ្យដឹងទៀតថា ការរួមបញ្ចូលគ្នានូវបច្ចេកវិទ្យាឈានមុខគេ ជាមួយនឹងការវិនិយោគសំខាន់ៗថ្មីៗ ក្នុងការធ្វើឱ្យប្រសើរឡើង វេទិការបស់យើង ត្រូវបានរៀបចំយ៉ាងល្អ ដើម្បីស្វាគមន៍ដំណាក់កាលរីកចម្រើនបន្ទាប់”។

ក្រុមហ៊ុន Amadeus បានបញ្ជាក់ថា ស្ថាបត្យកម្មបើកចំហនៃបច្ចេកវិទ្យា cloud អនុញ្ញាត ឱ្យតំឡើងភាពច្នៃប្រឌិតថ្មីងាយស្រួល រួមមានបច្ចេកវិទ្យាគមនាគមន៍ និងសេវាកម្មស្វ័យប្រវត្តិ។

សេវាកម្មទាំងនេះ ជួយបំពេញតម្រូវការអ្នកដំណើរ សម្រាប់ការធ្វើដំណើរប្រក​បដោយសុវត្ថិភាព និងអនាម័យ។

កាលពីខែមុន ប្រតិបត្តិករអាកាសយានដ្ឋានហ្វាំងឡង់ Finavia បានសហការជាមួ​យក្រុមហ៊ុន Amadeus ដើម្បីធ្វើទំនើបកម្ម ក្នុងការផ្តល់ដំណោះស្រាយដល់អ្នកដំណើរនៅអាកាសយានដ្ឋានចំនួន១១ ក្នុងប្រទេសហ្វាំងឡង់។

ក្រុមហ៊ុន Finavia នឹងតម្លើងវេទិកាAmadeus Flow ដើម្បីគាំទ្រដល់ការទូទាត់ដោយមិនចាំបាច់មានទំនាក់ទំនងផ្ទាល់ (Contactless Payment) បន្ទាប់ពីនោះព្រលានយន្តហោះនឹងអាចភ្ជាប់ជាមួយ Amadeus តាមរយៈបណ្តាញ Internet តែមួយ៕

ដោយៈ ប៊ី

ភ្នំពេញៈ អង្គការសុខភាពពិភពលោក (WHO) បានឱ្យដឹងថា ខ្លួននឹងធ្វើការសម្រេចចិត្តនៅចុងសប្តាហ៍នេះថាតើត្រូវផ្តល់ការចុះបញ្ជីការប្រើប្រាស់បន្ទាន់ សម្រាប់វ៉ាក់សាំងកូវីដ១៩របស់ក្រុមហ៊ុន Sinopharm ដែលអាចឈានដល់ការចែកចាយជាសកល។ នេះបើយោងតាមការចេញផ្សាយរបស់សារព័ត៌មាន CGTN កាលពីម្សិលមិញ។

ក្រុមប្រឹក្សាបច្ចេកទេសរបស់អង្គការសុខភាពពិភពលោក បានបើកការត្រួតពិនិត្យលើវ៉ាក់សាំង Sinopharm កាលពីថ្ងៃចន្ទ ដោយធ្វើឱ្យវ៉ាក់សាំង Sinopharm ក្លាយវ៉ាក់សាំងចិនដំបូងគេ ដែលត្រូវបានត្រួតពិនិត្យដោយនិយតករពិភពលោក។

លោកស្រី Mariangela Simao ជំនួយការអគ្គនាយកអង្គការសុខភាពពិភពលោកទទួលបន្ទុកផ្នែកឱសថ និងវ៉ាក់សាំង បានថ្លែងថា “យើងរំពឹងថាក្រុមហ៊ុន Sinopharm នឹងទទួលបានការសម្រេចមួយ មុនដំណាច់សប្តាហ៍នេះ”។

លោកស្រីបានបន្ថែមទៀតថា ការសម្រេចលើវ៉ាក់សាំង Sinopharm ដែលនឹងត្រូវពិនិត្យឡើងវិញ ចាប់ពីថ្ងៃទី៣ ខែឧសភា ទំនងជាធ្វើឡើង “នៅចុងសប្តាហ៍ក្រោយ” ។

វ៉ាក់សាំង Sinopharm ត្រូវបានអនុម័តនៅក្នុងប្រទេសចិន ប៉ាគីស្ថាន និងអារ៉ាប់រួម ប៉ុន្តែវាមិនត្រូវបានចែកចាយនៅភាគខាងលិចទេ។ ភ្លើងខៀវពីអង្គការសុខភាពពិភពលោកនឹងអាចជួយបង្កើតការចែកចាយនៅទូទាំងពិភពលោក និងជួយធ្វើឱ្យវ៉ាក់សាំងចិនដើរតួនាទីយ៉ាងសំខាន់ក្នុងការប្រយុទ្ធប្រឆាំងនឹងជំងឺរាតត្បាតនេះ។

ការអនុម័តក៏នឹងបង្ហាញនូវភាពជោគជ័យដ៏ធំមួយ សម្រាប់ឧស្សាហកម្មជីវបច្ចេកវិទ្យារបស់ចិន។ អង្គការសុខភាពពិភពលោកបានផ្តល់ការចុះបញ្ជីប្រើប្រាស់ជាបន្ទាន់ដល់វ៉ាក់សាំងតែ៣ប៉ុណ្ណោះ រួមមាន Pfizer-BioNTech, Johnson and Johnson និង AstraZeneca (រាប់បញ្ចូលទាំងវ៉ាក់សាំង ដែលផលិតដោយ SKBio នៅប្រទេសកូរ៉េខាងត្បូងនិងវិទ្យាស្ថាន Serum នៃប្រទេសឥណ្ឌា)។

ការទទួលបានការអនុម័តពីអង្គការសុខភាពពិភពលោកក៏អាចផ្តល់ភាពជឿជាក់ជាសកលចំពោះវ៉ាក់សាំងចិនផងដែរ បន្ទាប់ពីមន្រ្តីកំពូលគ្រប់គ្រងជំងឺឆ្លងរបស់ទីក្រុងប៉េកាំងបានចោទជាសំណួរអំពីប្រសិទ្ធភាពនៃការចាក់វ៉ាក់សាំងនេះនៅប្រទេសខ្លួន។

ក្រុមហ៊ុន Sinopharm មិនបានផ្តល់ព័ត៌មានលម្អិតជាសាធារណៈទេ ប៉ុន្តែបាននិយាយកាលពីខែធ្នូ ឆ្នាំមុនថា ការសាកល្បងដំណាក់កាលទី៣ បង្ហាញថា វ៉ាក់សាំង Sinopharm មានប្រសិទ្ធភាព៧៩,៣៤ភាគរយ។

ទិន្នន័យពីប្រទេសឈីលីបានរកឃើញថា វ៉ាក់សាំង Sinovac មានប្រសិទ្ធិភាព៥៦,៥ ភាគរយ និង៥០ភាគរយនៅប្រេស៊ីល។

ប្រសិនបើទទួលបានការចុះបញ្ជីប្រើប្រាស់ជាបន្ទាន់នោះ វ៉ាក់សាំងទាំងនេះអាចត្រូវបានបញ្ចូលទៅក្នុងកម្មពិធី COVAX ដែលដឹកនាំដោយអង្គការសុខភាពពិភពលោក ដែលជាកម្មវិធីផ្តល់វ៉ាក់សាំងដល់ប្រទេស ដែលមានប្រាក់ចំណូលទាប៕

ប៉ុន្តែការសិក្សាមួយដែលធ្វើឡើងនៅទីក្រុង អាប៊ូដាប៊ី កាលពីថ្មីៗនេះ បានបង្ហាញថា វ៉ាក់សាំង Sinopharm មានប្រសិទ្ធិភាពជាង៩០ភាគរយ ក្នុងការប្រឆាំងនឹងការឆ្លងជំងឺកូវីដ១៩។

អាជ្ញាធរនិយាយថា ការសិក្សាស្រាវជ្រាវបានរកឃើញថា មានការថយចុះគួរឲ្យកត់សម្គាល់ នៃអត្រាឆ្លងជំងឺកូវីដ១៩ ក្នុងចំណោមមនុស្ស ដែលបានវ៉ាក់សាំងដូសទី២រួច នៅក្នុងប្រទេសអារ៉ាប់រួម។

ការសិក្សា ដែលធ្វើឡើងដោយមជ្ឈមណ្ឌលសុខភាព
អាប៊ូដាប៊ី បានបង្ហាញថា ភាគច្រើននៃអ្នកឆ្លង បន្ទាប់ពីបញ្ចប់ការសិក្សា គឺមានអាការៈស្រាល និងមិនត្រូវការការព្យាបាលនៅក្នុងមន្ទីរពេទ្យទេ។

យោងតាមការស្រាវជ្រាវបានឱ្យដឹងថា វ៉ាក់សាំងនេះត្រូវបានកំណត់ថាមានប្រសិទ្ធភាព៩៣ភាគរយ ក្នុងការទប់ស្កាត់បញ្ជូនទៅព្យាបាលក្នុងមន្ទីរពេទ្យ និងប្រសិទ្ធភាព៩៥ភាគរយ ប្រឆាំងការបញ្ជូនទៅសង្គ្រោះបន្ទាន់។

ជាមួយគ្នានេះដែរ អ្នកឯកទេសខាងផ្នែករោគសាស្ត្រនៃសាកលវិទ្យាល័យ Chulalongkorn លោកវេជ្ជបណ្ឌិតYong Poovorawan បាននិយាយនៅលើបណ្តាញសង្គម Facebook ថា វ៉ាក់សាំងប្រឆាំងកូវីដ១៩ ដែលអភិវឌ្ឍឡើងដោយក្រុមហ៊ុនផលិតឱសថចិន Sinovac អាចផ្ដល់ភាពស៊ាំ ដែលមានសមត្ថភាពរហូតដល់៩៩.៤ភាគរយប្រឆាំងនឹងជំងឺ បន្ទាប់ពីការចាក់រួចលើកទី២បានមួយខែ៕