ក្នុងគ្រាដ៏លំបាកដែលបណ្ដាលមកពីការរីករាលដាលនៃជំងឺឆ្លងកូវីដ-១៩ និងអំឡុងពេលបិទខ្ទប់ទីក្រុងមួយរយៈនេះ ធ្វើឲ្យកម្មករសំណង់ជាច្រើនម៉ឺននាក់ជួបប្រទះបញ្ហាផ្អាកការងារជាបណ្តោះអាសន្ន ដែលការងារនេះជាមុខរបរចិញ្ចឹមក្រពះតែមួយគត់របស់គាត់។ ក្នុងចំណោមក្រុមហ៊ុនសំណង់ធំៗដែលផ្តល់ការងារដល់កម្មកររាប់ម៉ឺននាក់មានដូចជាបុរី ប៉េងហួត និងក្រុមហ៊ុនបុរីផ្សេងៗជាច្រើនទៀត ។ល។

ដើម្បីជួយសម្រួលដល់ជីវភាពប្រចាំថ្ងៃរបស់បងប្អូនកម្មករជាង ​ ៧០០០នាក់ ក្នុងអំឡុងពេលបិទខ្ទប់ នៅថ្ងៃទី២៥ ខែមេសា ឆ្នាំ២០២១ ក្រុមហ៊ុន ប៉េង ហួត គ្រុប បាននាំយកនូវគ្រឿងឧបភោគនិងបរិភោគដែលមាន អង្ករ ត្រីខ មី និងទឹកស៊ីអ៊ីវ ចែកជូនដល់កម្មករគ្រប់ការដ្ឋានក្នុងតំបន់នានាក្នុងភូមិសាស្រ្ដទីក្រុងភ្នំពេញដូចជា៖

១) គម្រោង ហ្គ្រេនស្តា ផ្លាទីនីម ​(បុរីប៉េងហួតបឹងស្នោ)​ ស្ថិតនៅតាមបណ្តោយផ្លូវជាតិលេខ១
២)    គម្រោង ដឹស្ដា មេរាហ្កាដិន ស្ថិតនៅផ្លូវក្រវ៉ាត់ក្រុងទី២

៣)    គម្រោង ដឹស្ដា ដាយមិន ស្ថិតនៅមហាវិថីសម្ដេចតេជោ ហ៊ុន សែន (ផ្លូវ៦០ម៉ែត្រ)

៤)     គម្រោង ដឹស្ដា មុនីរ៉ាហ៍ ស្ថិតនៅផ្លូវជាតិលេខ ៦A

ឆ្លើយតបនឹងទឹកចិត្តដ៏ថ្លៃថ្លានេះ បងប្អូនកម្មករសំណង់គ្រប់ការដ្ឋានសម្ដែងនូវអំណរសាទរយ៉ាងក្រៃលែងចំពោះការយកចិត្តទុកដាក់របស់ក្រុមហ៊ុនចំពោះជីវភាពរបស់ពួកគាត់ក្នុងគ្រាលំបាកនេះ។   “សូមអរគុណខ្លាំងណាស់ដល់ក្រុមហ៊ុនដែលបានចែកអំណោយមាន អង្ករ មី ត្រីខ ទឹកស៊ីអ៊ីវ ឲ្យយើងខ្ញុំ។ មួយរយៈនេះពិបាកមែនហ្នឹងឯង…សង្ឃឹមថាអាកូវីដនេះនឹងចប់ឆាប់ៗ អាលនឹងបានធ្វើការវិញ។ ជូនពរឲ្យក្រុមហ៊ុនរីកចម្រើន កម្មករសម្បូរការងារធ្វើ”។  នេះជាការលើកឡើងរបស់បងស្រីកម្មករម្នាក់មកពីខេត្តព្រៃវែងដែលបានធ្វើជាកម្មករសំណង់ជាងពីរឆ្នាំមកហើយក្នុងការដ្ឋានមួយរបស់ បុរី ប៉េង ហួត។

ចំពោះសកម្មភាពចែករំលែកនេះ លោក ចាន់រដ្ឋា តំណាងក្រុមហ៊ុនបានលើកឡើងថា៖ “ការចែករំលែក និងការជួយគ្នាក្នុងគ្រាលំបាក ​គឺគុណតំលៃរបស់ក្រុមហ៊ុន និងទឹកចិត្តដ៏ប្រពៃរបស់ថ្នាក់ដឹកនាំក្នុងការចូលរួមជាមួយរាជរដ្ឋាភិបាល តាំងពីក្រុមហ៊ុនចាប់ផ្តើមដំបូង និងរីកចម្រើនរហូតមកដល់ពេលនេះ ហើយក៏នឹងបន្តនៅពេលខាងមុខទៀតផងដែរ។ ទន្ទឹមនឹងនេះ ក៏សូមថ្លែងអំណរគុណដល់កងកម្លាំង និងអជ្ញាធរដែលបានខិតខំយ៉ាងយកចិត្ដទុកដាក់ដោយមិនគិតពីភាពនឿយហត់ក្នុងការទប់ស្កាត់ការីករាលដាលជំងឺកូវីដ-១៩ និងជួយសម្រួលដល់ក្រុមការងាររបស់ក្រុមហ៊ុន ក្នុងការដឹកជញ្ជូនគ្រឿងឧបភោគនិងបរិភោគ ដើម្បីចែកជូនដល់បងប្អូនកម្មករទាំងអស់គ្នាក្នុងអំឡុងពេលបិទខ្ទប់នេះ”។ ចុងក្រោយសូមថ្លែងអំណរគុណដល់ភាពអំណត់របស់បងប្អូនកម្មករ ហើយសង្ឃឹមថាយើងនឹងឆ្លងផុតគ្រាលំបាកនេះទាំងអស់គ្នា។ សូមបងប្អូនបន្តអនុវត្តវិធានការ “៣ការពារ និង៣កុំ” ឲ្យបានខ្ជាប់ខ្ជួន។

រាជរដ្ឋាភិបាលបានសម្រេចបន្តការបិទខ្ទប់ភូមិសាស្រ្តរាជធានីភ្នំពេញ និងក្រុងតាខ្មៅ រយៈពេល ៧ថ្ងៃទៀតរហូតដល់ថ្ងៃទី៥ ខែឧសភា ឆ្នាំ២០២១  ដើម្បីប្រយុទ្ធឆាំង និងទប់ស្កាត់ការឆ្លងរាលដាលនៃជំងឺកូវីដ-១៩។

ដោយគង់ ម៉ាលី​ន

ភ្នំពេញៈ ការវិនិយោគអចលនទ្រព្យ មិនថាការទិញដី ឬទិញលំនៅដ្ឋានសម្រាប់ស្នាក់នៅ ឬទុកលក់យកផលចំណេញវិញ មិនមែនជារឿងងាយស្រួលនោះទេ ហើយក៏មិនមែនជារឿងដែលពិបាកនោះដែរ។

លោកច្រឹក សុខនីម ប្រធានសមាគមភ្នាក់ងារ និងវាយតម្លៃអចលនវត្ថុកម្ពុជានឹងចូលខ្លួនមកបកស្រាយលើប្រធានបទ “តើគួរប្រើប្រាស់បំណុលបែបណា ដើម្បីទទួលបានប្រសិទ្ធភាពខ្ពស់ ក្នុងវិស័យអចលនទ្រព្យកម្ពុជា”?។

លោកច្រឹក សុខនីម បានឱ្យដឹងថា ជាទូទៅនៅក្នុងពិភពលោក តែងតែមានបំណុ​លដែលបំណុលទាំងនេះ មានលក្ខណៈជាគ្រួសារ សហគមន៍ ឯកជន ក្រុមហ៊ុន និងប្រទេសជាតិ  ហើយនៅពេលដែលប្រើប្រាស់បំណុលទាំងនេះ មានប្រសិទ្ធិភាពនោះ នឹងជំរុញឱ្យជីវភាព នៅក្នុងស្ថានភាពសេដ្ឋកិច្ចគ្រួសារ សហគន៍ ប្រទេស និង ក្រុមហ៊ុន មានការរីកចំរើន។

លោកពន្យល់ថា “បំណុលគឺជាការប្រើប្រាស់ធនធានអ្នកដទៃ តាមរយៈការប្រើប្រា​ស់ជាថវិកាឬជាទ្រព្យសម្បត្តិ និងអ្វីផ្សេងៗទៀតសម្រាប់ធ្វើការការដោះដូរ និងជាប្រយោ​ជន៍ក្នុងការវិស័យជំនួញឱ្យមានប្រសិទ្ធិភាព”។

លោកបន្តថា នៅក្នុងការវិនិយោគលើវិស័យអចលនទ្រព្យ អ្នកវិនិយោគអាចស្វែងរកបំណុល តាមរយៈធនាគារដែលជាស្ថាប័នឯករាជ្យ ក្នុងការផ្តល់ប្រាក់កម្ចីដល់អតិថិជនទូទៅ ក្នុងការទិញលំនៅឋានសម្រាប់ស្នាក់នៅ ឬទិញលំនៅឋានសម្រាប់ធ្វើការវិនិយោគ​បន្ត ។

លោកពន្យល់ថា “មុនដំបូងយើងត្រូវធ្វើការសិក្សានូវគុណតម្លៃ នៃវិស័យអចលនទ្រព្យដែលយើងត្រូវវិនិយោគ តើជាប្រភេទអចលនទ្រព្យបែបណា ។ ឧទាហរណ៍បើយើងវិនិយោគលើលំនៅឋាន ដូចជាផ្ទះ ឬខុនដូ ឬមួយជាគម្រោងដែលកំពុងសាងសង់ សម្រាប់ទុកវិនិយោគបន្ត ឬសម្រាប់ជួលជាដើមនោះ យើងត្រូវសិក្សាពីចំណូល និងកំណើនតម្លៃអចលនទ្រព្យនៅពេលខាងមុខ ដោយធៀបជាមួយនឹងបំណុល”។

លោកបន្ថែមទៀតថា នៅពេលដែល យើងមានគម្រោងដាក់ទុនវិនិយោគលើវិស័យអចលនទ្រព្យប្រកបដោយចីរភាព យើងត្រូវវិភាគអំពីឱកាសនៅក្នុងការវិនិយោគ រួមផ្សំជាមួយនឹងការសងត្រឡប់ បូកជាមួយប្រាក់បំរ៉ុងទុក។ បើយើងមានធនធានទាំងអស់នេះ បំណុលនៅក្នុងវិស័យអចលនទ្រព្យ គឺទុន និងជាលទ្ធភាពល្អបំផុត ពីព្រោះ នៅពេលដែលយើងប្រើប្រាស់បំណុលធ្វើឱ្យយើងចំណេញពេលវេលា និងអាចធ្វើឱ្យជីវភាពដើរលឿនជាអ្នកដែលមិនប្រើប្រាស់បំណុល។

លោកបញ្ជាក់ថា “ដូច្នេះនៅពេលដែលយើងប្រើប្រាស់បំណុលបានត្រឹមត្រូវ ហើយ ស្ទង់មើលនូវឥទ្ធិពល នៅក្នុងកម្រិតដែលជាវិជ្ជមាន គឺជាហេតុផលចម្បងដែលធ្វើឱ្យសេដ្ឋកិច្ចក្រុមគ្រួសារ មានការរីកចំរើន ។ ការប្រើប្រាស់បំណុល ជាទ្រព្យសម្បត្តិ នឹងទទួលបាននូវគុណតម្លៃពីការវិនិយោគ”។

លោកបន្ថែមថា ជាមួយគ្នានេះដើម្បីទទួលបាននូវព័ត៌មានជុំវិញ ការប្រើប្រាស់បំណុលើការវនិយោគវិស័យអចលចនទ្រព្យ លោកអ្នកអាចប្រឹក្សាយោបល់ជាមួយភ្នាក់​ងារអចលនវត្ថុ ឬ ក៏មន្ត្រីធនាគារ៕

ដោយៈគង់ សូរិយា

ភ្នំពេញៈ ប្រភេទលំនៅដ្ឋានមានច្រើនប្រភេទ ដែលផ្គត់ផ្គង់ទៅតាមលទ្ធភាព និងចំណង់ចំណូលចិត្ត នៃការរស់នៅរបស់ប្រជាពលរដ្ឋកម្ពុជា។ ជាក់ស្តែងប្រភេទលំនៅដ្ឋាននៅកម្ពុជាបច្ចុប្បន្នមានដូចជា ផ្ទះប្រកបអាជីវកម្ម ផ្ទះល្វែង វីឡាភ្លោះ វីឡាទោល ជាដើម។ អ្នកជំនាញថា វីឡាភ្លោះកំពុងពេញនិយមសម្រាប់ការរស់នៅ ដោយសារហេតុផលចំនួន ២។

អ្នកជំនាញអចលនទ្រព្យ និងជានាយិកាក្រុមហ៊ុនអចលនទ្រព្យ Amatak Property Service លោកស្រីតាំង ហ៊ួរ បានថ្លែងប្រាប់តាមទូរសព្ទមកកាន់គេហទំព័រ PropertyAreaថា បច្ចុប្បន្នប្រភេទលំនៅដ្ឋាន ដែលកំពុងពេញនិយមខ្លាំង សម្រាប់ការរស់នៅគឺជា វីឡា ភ្លោះ។ លោកស្រីបន្តថា មូលហេតុដែលប្រភេទផ្ទះវីឡាភ្លោះលក់ដាច់នោះ ដោយសារតែទំហំផ្ទះមានភាពសមល្មម ក្បាលដីត្រឹម៧ ទៅ៨ម៉ែត្រ ងាយស្រួលសម្រាប់ការរស់នៅ។ ម្យ៉ាងសម្រាប់អ្នកមានលទ្ធភាពសមល្មម ពួកគាត់គិតថាការរស់នៅក្នុងវីឡាភ្លោះមានភាពថ្លៃថ្នូរផងដែរ។

នាយិការូបនេះបានបញ្ជាក់ថា ថ្វីត្បិតតែវីឡាភ្លោះមានភាពទូលាយក្តី ប៉ុន្តែក្រឡេកមើលតម្លៃវិញ បើសិនជាចង់រស់នៅក្នុងវីឡាភ្លោះ ដែលមានតម្លៃសមរម្យក៏ទីតាំងនៅឆ្ងាយពីក្រុងដែរ ច្រើនតែនៅជាយៗក្រុង។

ជាមួយនឹងការបញ្ជាក់ពីចំណុចវិជ្ជមាន នៃប្រភេទលំនៅដ្ឋានខាងលើនេះ អគ្គនាយ​កក្រុមហ៊ុនភ្នាក់ងារអចលនទ្រព្យអន្តរជាតិ Century21 Advance Property លោក ឡុង គីមសួគ៌ ធ្លាប់មានប្រសាសន៍ថា គ្រប់ប្រភេទលំនៅដ្ឋានទាំងអស់ គឺសុទ្ធតែមានគុណសម្បត្តិ ក្រោមគោលបំណងចម្បងសម្រាប់រស់នៅ និងស្ថិតនៅទីតាំងដែលមានភាពស្ងប់ស្ងាត់ និងមានធម្មជាតិជុំវិញ។

លោកថា “អ្នកវិនិយោគខ្លះសម្រេចចិត្តទិញទុកសម្រាប់ជួលបន្ត ដើម្បីយកចំណូលប្រចាំខែ ប្រចាំឆ្នាំ ហើយអត្រានៃចំណេញក្រោយការលក់ទាំងស្រុង ក៏មានខ្ពស់ផងដែរ ដែលលំនៅដ្ឋាននៅតំបន់ខ្លះ អាចទទួលបានផលចំណេញទ្វេដងនៃតម្លៃដើម”។

ទន្ទឹមនេះ នាយកគ្រប់គ្រងក្រុមហ៊ុន Daily Realty លោក ហៃ រ៉ាវី បានរៀបរាប់ថា ដោយសារតែអតិថិជន មានបំណងចង់ជាវទុកសម្រាប់ឱ្យកូន ក្រែងលោត្រូវឡើងពីខេត្តមកសិក្សានៅទីក្រុង ឬក៏គូស្នេហ៍មួយចំនួនដែលទើបរៀបការ ដូច្នេះតម្រូវការមានផ្ទះរស់នៅគឺនៅតែមាន។ មិនតែប៉ុណ្ណោះ ការរចនាមានភាពស្រស់ស្អាត មិនថាផ្នែកខាងក្រៅ និងការឌីសាញខាងក្នុង ជាពិសេសមានសួនលំហែកាយជាដើម៕

          ដោយៈស៊ីវ ម៉េង

ភ្នំពេញៈ ការមានលុយទិញដីធ្លីមិនប្រាកដថា ទទួលបានប្រាក់ចំណេញលឿននោះទេ ហើយជួនកាលក៏ធ្វើឲ្យការវិនិយោគរបស់ខ្លួនត្រូវជាប់គាំងផងដែរ ប្រសិនជាអ្នកវិនិយោគមិនដឹងពីគន្លឹះច្បាស់លាស់។

ទិញដីធ្លីនៅតំបន់មានប្រជាជនរស់នៅច្រើន

អចលនទ្រព្យឡើងថ្លៃ ពិតជាអាស្រ័យលើកត្តាប្រជាសាស្រ្ត ព្រោះការឡើងថ្លៃដីធ្លី ឬអចលនទ្រព្យដទៃពិតជាទាក់ទងនឹងចរន្តមនុស្ស។ នៅទីណាមានមនុស្សរស់នៅច្រើនទីនោះនឹងមានសកម្មភាពអាជីវកម្មច្រើន ធ្វើឲ្យចរន្តសេដ្ឋកិច្ចតំបន់នោះរីកចម្រើន។

គេមិនអាចទៅទិញដីកណ្តាលព្រៃ ដែលគ្មានមនុស្សរស់នៅដើម្បីឲ្យតម្លៃដីកើនឡើង និងទទួលបានប្រាក់ចំណេញនោះទេ។

ឧស្សាហ៍អានព័ត៌មាន

នៅពេលយើងអានព័ត៌មានច្រើន យើងនឹងទទួលបានព័ត៌មានច្រើន ពីការអភិវឌ្ឍន៍ ពីផែនការរបស់រដ្ឋាភិបាលទាក់ទងនឹងការកសាងផ្លូវ កសាងតំបន់សេដ្ឋកិច្ចពិសេស ឬគំរោងអភិវឌ្ឈន៍របស់រដ្ឋាភិបាលជាច្រើនទៀត។ នៅពេលយើងមានចំណេះដឹង មានព័ត៌មា​នក្នុងដៃគ្រប់គ្រាន់ហើយ មូលដ្ឋាននៃការសម្រេចចិត្តរបស់យើង គឺមានភាពត្រឹមត្រូវជាជាងការវិនិយោគដោយប្រថុយប្រថាន ដែលប្រឈមនឹងហានិភ័យខ្ពស់។

ព័ត៌មានដែលអាចទុកចិត្តបាន ប្រកបដោយក្រមសីលធម៌ ពិតជាមូលដ្ឋានសំខាន់ ដែលអ្នកវិនិយោគត្រូវអាន ដើម្បីយកមកធ្វើជាមូលដ្ឋានសំរាប់ពិចារណាឲ្យបានគ្រប់ជ្រុង ជ្រោយមុនសម្រេចចិត្តទិញដីនៅតំបន់ណាមួយ។

ឧទាហរណ៍នៅតំបន់ផ្លូវជាតិលេខ៥៥ ពីមុនដីនៅតំបន់នោះគ្មានហាងឆេង និងគ្មានអ្នកចាប់អារម្មណ៍ទេ ប៉ុន្តែក្រោយពេលសាងសង់ផ្លូចរួច ដីនៅតាមតំបន់នោះបានឡើងថ្លៃយ៉ាងគំហុក ហេតុនេះបើយើងនឹងព៌តមានពីការសាងសង់ផ្លូវ ហើយយើងទិញនៅពេលផ្លូវចាប់ផ្តើមសាងសង់ ច្បាស់ណាស់យើងនឹងរកផលចំណេញបានលឿន និងបានឆាប់រហ័ស។

តាមដានគោលនយោបាយរបស់រដ្ឋាភិបាល

រដ្ឋាភិបាលតែងតែមានចេញគោលនយោបាយជាបន្តបន្ទាប់ រៀងរាល់៣ទៅ៥ឆ្នាំម្ត​ង ដើម្បីរៀបចំផែនការអភិវឌ្ឍន៍ប្រទេស ហេតុនេះបើសិនជាយើងតាមដានដឹងពីគោលនយោបាយរបស់រដ្ឋាភិបាលជាមុន យើងមានឱកាសចំណេញច្រើន ពីការវិនិយោគរបស់ខ្លួន។

ឧទាហរណ៍ជាក់ស្តែង កាលពីខែតុលាឆ្នាំ២០១៥ រដ្ឋាភិបាលបានប្រកាសដាក់ចេញនូវគោលនយោបាយអភិវឌ្ឈន៍ វិស័យឧស្សាហកម្មឆ្នាំ២០១៥ ២០២៥ ដោយក្នុងគោលនយោបាយនោះ រដ្ឋាភិបាលបានជ្រើសរើសយកទីក្រុង២ និងខេត្ត១ជាតំបន់សំរាប់អភិវឌ្ឈន៍វិស័យឧស្សាហកម្មជាពិសេស។ ខេត្តនោះរួមមាន ខេត្តព្រះសីហនុ ក្រុងប៉ោយប៉ែត និងក្រុងបាវិត។

ជាលទ្ឋផលក្រុងព្រះសីហនុ ក្រុងបាវិត និងក្រុងប៉ោយប៉ែត កំពុងមានការរីកចម្រើន និងកំពុងស្ថិតក្នុងក្រសែភ្នែកអ្នកវិនិយោគជាតិ និងអន្តរជាតិចូលទៅវិនិយោគយ៉ាងច្រើន ដែលធ្វើឲ្យគ្រប់គ្នាស្ទើរមិននឹងស្មានដល់។

ហេតុនេះការតាមដាន ការអានព៌តមានតាមទូរទស្សន៍ វេបសាយ កាសែត ពិតជាមានសារៈសំខាន់ ដែលអ្នកវិនិយោគគ្រប់គ្នាត្រូវតែដឹង ត្រូវតែអាន ដើម្បីដឹងពីផែនការ ដឹងពីដំណើរនៃការអភិវឌ្ឈន៍ប្រទេសជាតិ។

សិក្សាលើទិដ្ឋភាពច្បាប់

ទិដ្ឋភាពនិងមូលដ្ឋានច្បាប់ ពិតជាមានសារៈសំខាន់ណាស់ ព្រោះវាជាឧបករណ៍មួយយ៉ាងសំខាន់ ដែលអ្នកវិនិយោគជាតិ ពិសេសអ្នកវិនិយោគអន្តរជាតិតែងតែសិក្សាមុនគេ មុនចូលទៅវិនិយោគនៅប្រទេសណាមួយ។ ច្បាប់ពន្ឋលើប្រាក់ចំណេញ ច្បាប់វិនិយោគ ច្បាប់លើកទឹកចិត្តដល់ការវិនិយោគនានា សុទ្ឋតែជាកត្តាសំខាន់នៅក្នុងការទាក់ទាញការវិនិយោគផ្ទាល់ពីបរទេស។

ឧទាហរណ៍ ច្បាប់វិនិយោគកម្ពុជាបានអនុញ្ញាត ឲ្យជនបរទេសអាចបណ្តាក់ទុនរកស៊ី១០០ភាគរយនៅកម្ពុជាបាន ដោយមិនចាំបាច់សហការជាមួយក្រុមហ៊ុនក្នុងស្រុក។ច្បាប់នេះពិតជាមានសារៈសំខាន់បំផុត ដែលបាននិងកំពុងធ្វើឲ្យកម្ពុជាឈានឡើង និងមានការរីកចម្រើនយ៉ាងលឿនហើយសេដ្ឋកិច្ចកម្ពុជាសម្រេចបានកំនើនជាមធ្យម៧,៧ភាគរយក្នុងរយៈពេលពីរទសវត្សរ៍ចុងក្រោយនេះ។

មូលដ្ឋានទាំងនេះ គឺនៅតែឈរលើកត្តាសុខសន្តិភាព ស្ថេរភាពនយោបាយ ស្ថេ​រភាពសង្គម និងកំនើនសេដ្ឋកិច្ចដ៏រ៉ឹងមាំរបស់កម្ពុជា ព្រោះបើប្រទេសជាតិគ្មានចំណុចប៉ុន្មាននេះទេ តម្លៃអចលនទ្រព្យ និងការវិនិយោគក៏មិនអាចកើនឡើងបានដែរ៕