សណ្ឋាគារដ៏ល្បីឈ្មោះរបស់អាមរិកត្រៀមបើកដំណើរការនៅទីផ្សារកម្ពុជានាឆ្នាំក្រោយ

ដោយៈ ម៉ាណេត

ភ្នំពេញៈ គម្រោងសណ្ឋាគារ Hilton Phnom Penh ដែលមាន២៨០បន្ទប់ និងនៅចំកណ្តាលរាជធានីភ្នំពេញ គ្រោងនឹងដាក់ដំណើរនៅឆ្នាំ២០២២ នេះ។ នេះបើយោងតាមការចុះផ្សាយគេហទំព័រ Hospitalitynet កាលពីថ្មីៗនេះ។

ក្រុមហ៊ុនបដិសណ្ឋារកិច្ច Hilton របស់អាមេរិក ដែលជាក្រុមហ៊ុនបដិសណ្ឋារកិច្ចដ៏ល្បីឈ្មោះមួយនៅលើពិភពលោក និងក្រុមហ៊ុនអភិវឌ្ឍន៍អចលនទ្រព្យក្រុមហ៊ុន GFC Company Limited បានប្រកាសចុះហត្ថលេខា លើកិច្ចព្រមព្រៀងជាមួយគ្នា ក្នុងការបើកដំណើរការសណ្ឋាគារថ្មីមួយនេះ នៅចំកណ្តាលរាជធានីភ្នំពេញ។

សណ្ឋាគារនេះ ស្ថិតនៅចម្ងាយតែ៩គីឡូម៉ែត្រ ពីអាកាសយានដ្ឋានអន្តរជាតិភ្នំពេញ ពោលនៅជិតទីតាំងល្បីៗមួយចំនួនរបស់រាជធានី ដូចជា ផ្សារកណ្តាល ផ្សារថ្មី និងអគារ Vattanac Capital Tower ជាដើម។

សណ្ឋាគារ Hilton Phnom Penh នឹងចូលរួមលើកស្ទួយវិស័យបដិសណ្ឋារកិច្ចកម្ពុជា និងបណ្តុំទៅដោយភោជនីយដ្ឋាន ហាងកាហ្វេ បារ និងកន្លែងទទួលភ្ញៀវ ដើម្បីបំពេញតាមចំណង់ចំណូលចិត្តរបស់អតិថិជន។ ក្រៅពីនេះ ក៏មានកន្លែងប្រជុំ និងកន្លែងរៀបចំព្រឹត្តិការណ៍នានា ដែលមានទីតាំង១៥០០ម៉ែត្រក្រឡា រួមទាំងបន្ទប់មានទំហំ៨៧៥ម៉ែត្រក្រឡា។

សណ្ឋាគារនេះ ក៏នឹងមានកន្លែងជួបជុំពិភាក្សាលើជំនួញ មជ្ឈមណ្ឌលហាត់ប្រាណ និងអាងហែលទឹកផងដែរ។

សណ្ឋាគារ Hilton គឺជានិមិត្តសញ្ញាដ៏ល្បីល្បាញរបស់សហរដ្ឋអាមេរិក ដែលបំរើដល់វិស័យសណ្ឋាគារ និងបដិសណ្ឋារកិច្ច នៅទូទាំងពិភពលោក៕

ប្រធានអង្គការសុខភាពិភពលោកៈតេស្តរហ័ស ទោះបីអវិជ្ជមានកូវីដតែជនមានហានិភ័យខ្ពស់់ត្រូវ

ដោយៈគង់ សូរិយា

ភ្នំពេញៈ ប្រធានអង្គការសុខភាពពិភពលោក លោកស្រីវេជ្ជបណ្ឌិត Li Ailan បានព្រមានថា ថ្វីត្បិតតែឧបករណ៍តេស្តរហ័សមានអត្ថប្រយោជន៍យ៉ាងច្រើន ដូចជាងាយស្រួលប្រើ និងមានលទ្ធផលតេស្តបានលឿនក៏ដោយ តែមិនមានលក្ខណៈល្អប្រសើរជាងការធ្វើតេស្តតាម RT-PCR ឡើយ។

លោកស្រីវេជ្ជបណ្ឌិតបានបន្តថា ការធ្វើតេស្តតាមឧបករណ៍តេស្តរហ័ស ទោះជាលទ្ធផលអវិជ្ជមានក៏ដោយ ក៏មិនអាចសន្និដ្ធានបានថា អ្នកដែលទទួលការធ្វើតេស្តនេះមិនបានឆ្លងជំងឺកូវីដ១៩ឡើយ។

លោកស្រីបន្ថែមថា “យើងសូមផ្តល់យោបល់ដល់រដ្ឋាភិបាលថា ទោះបីជាលទ្ធផលនៃការធ្វើតេស្ត តាមឧបករណ៍តេស្តរហ័ស ចេញមកអវិជ្ជមានក៏ដោយ ចាំបាច់ត្រូវតែអោយអ្នកដែលមានហនិភ័យខ្ពស់ បន្តដាក់ឱ្យនៅដាច់ដោយឡែកពីគេដដែល” ។

លោកស្រីវេជ្ជបណ្ឌិត Li Ailan បានបញ្ជាក់ផងដែរថា ក្នុងករណីខ្លះ ក្រសួងក៏នឹងធ្វើតេស្តតាម RT-PCR ដែរ ដើម្បីជៀសវាងមានបញ្ហាថ្លោះធ្លោយ។ អង្គការសុខភាពពិភពលោក នឹងវាយតម្លៃវ៉ាក់សាំងស៊ីណូហ្វាម និងស៊ីណូវ៉ាក់ ដើម្បីអនុញ្ញាតឱ្យប្រើប្រាស់ជាលក្ខណៈបន្ទាន់។

យោងតាមទិន្នន័យរបស់អង្គការសុខភាពពិភពលោក គិតត្រឹមថ្ងៃទី៩ ខែមេសាកន្លងមកនេះ អ្នកដែលបានទទួលវ៉ាក់សាំង ការពារជំងឺកូវីដ១៩មានចំនួនជាង៧០០លានដូស នៅទូទាំងពិភពលោកប៉ុន្តែការរីករាលដាល នៃពិភពលោកមាននិន្នាការកើនឡើងទៅវិញ។

មូលហេតុមួយ គឺដោយសារតែការចែកចាយវ៉ាក់សាំងមិនស្មើគ្នា ដោយក្នុងនោះមាន៨៧ភាគរយនៃវ៉ាក់សាំង ត្រូវបានប្រមូលផ្តុំនៅក្នុងប្រទេសអ្នកមាន ដែលធ្វើអោយប្រទេសជាច្រើន មិនបានទទួលវ៉ាក់សាំងគ្រប់គ្រាន់ ដើម្បីចាក់វ៉ាក់សាំងដល់បុគ្គលិកពេទ្យនិងក្រុមដែលមានហានិភ័យខ្ពស់នោះទេ។

លោកវេជ្ជបណ្ឌិត Li Ailan បានសង្កត់ធ្ងន់ថា “វ៉ាក់សាំងគឺជាឧបករណ៍ ដ៏មានឥទ្ធិពលមួយ ក្នុងការប្រយុទ្ធប្រឆាំងនឹងការរីករាលដាលនៃជំងឺនេះ ប៉ុន្តែវ៉ាក់សាំងតែមួយមុខមិនគ្រប់គ្រាន់ដើម្បីបញ្ចប់ការរីករាលដាលនោះទេ” ។

លោកស្រីបញ្ជាក់ថា វ៉ាក់សាំងអាចជួយកាត់បន្ថយអត្រាចូលមន្ទីរពេទ្យ និងជំងឺធ្ងន់ធ្ងរ។ ដូច្នេះហើយត្រូវតែរក្សារការពារកុំអោយប្រព័ន្ធសុខាភិបាលដួលរលំ ប៉ុន្តែលោកស្រីបានព្រមានថា ប៉ុន្តែមិនមានភ័ស្តុតាងគ្រប់គ្រាន់ ដើម្បីបង្ហាញថាវ៉ាក់សាំង គឺគ្រប់គ្រាន់ដើម្បីការពារមនុស្សពីការឆ្លងជំងឺកូវីដ១៩ឡើយ។ ដូច្នេះទោះបីជាអ្នកដែលទទួលការចាក់វ៉ាក់សាំងហើយក៏ដោយ អ្នកនៅតែអាចឆ្លង និងចម្លងទៅអ្នកដទៃបានដដែល ប៉ុន្តែវាគ្រាន់តែអាចកាត់បន្ថយជំងឺអោយមានស្ថានភាពធូរស្រាល” ៕

ឧកញ៉ាម៉ន សុខាៈការសម្រេចឱ្យមានការធ្វើដំណើរឆ្លងខេត្ត ជាការយកចិត្តទុកដាក់លើសុខមាលភាព និងសេដ្ឋកិច្ចរបស់រដ្ឋាភិបាល

ដោយៈ រ៉ាណេត

ភ្នំពេញៈ ជាមួយនឹងការសាទរ និងគាំទ្រទាំងស្រុងទៅនឹងសេចក្ដីសម្រេចរបស់រាជរដ្ឋាភិបាល ឧកញ៉ាម៉ន សុខាបានលើកឡើងថា ការសម្រេចបញ្ចប់ហាមឃាត់ការធ្វើដំណើរ និងបញ្ចប់ការបិទរមណីយដ្ឋានទេសចរណ៍នៅទូទាំងប្រទេស គឺជាការបង្ហាញឱ្យឃើញពីការយកចិត្តទុកដាក់ខ្ពស់ របស់រាជរដ្ឋាភិបាលទៅលើសុខមាលភាពសង្គម និងសេដ្ឋកិច្ចជាតិកម្ពុជា។

ប្រធានសមាគមអ្នកអភិវឌ្ឍន៍ដីឡូត៍កម្ពុជា (CLDA) ឧកញ៉ាម៉ន សុខា បានមានប្រសាសន៍ឲ្យដឹងតាមទូរស័ព្ទ នៅល្ងាចថ្ងៃទី២៥ ខែមេសា ឆ្នាំ២០២១ថា ក្នុងនាមជាប្រជាពលរដ្ឋមួយរូប និងជាប្រធានសមាគមអ្នកអភិវឌ្ឍន៍ដីឡូត៍កម្ពុជា សូមគាំទ្រយ៉ាងពេញទំហឹង និងគោរពតាមវិធានការនានា ដែលបានដាក់ចេញដោយរាជរដ្ឋាភិបាលកម្ពុជា ដោយមានសម្ដេចតេជោ ហ៊ុន សែន ជាប្រមុខដឹកនាំប្រទេស។

លោកឧកញ៉ាបន្តថា ការចេញសេចក្ដីសម្រេចលេខ៥៣ សសរ ចុះថ្ងៃទី២៥ ខែមេសា ឆ្នាំ២០២១នេះ គឺជាការបង្ហាញឱ្យឃើញពីការយកចិត្តទុកដាក់យ៉ាងខ្ពស់ ពីសំណាក់រាជរដ្ឋាភិបាលកម្ពុជា ទៅលើការសម្រួលដល់ស្ថានភាពលំបាក របស់ប្រជាពលរដ្ឋទូទៅ ជាពិសេសការយកចិត្តទុកដាក់ខ្ពស់ ទៅលើសុខមាលភាពសង្គម និងសេដ្ឋកិច្ចជាតិផងដែរ។

លោកឧកញ៉ាម៉ន សុខា បានបញ្ជាក់ថា ការអនុញ្ញាតឱ្យមានចរាចរណ៍ឆ្លងកាត់ពីតំបន់មួយទៅតំបន់មួយ ពីខេត្តមួយទៅខេត្ត និងបើកឱ្យដំណើរការឡើងវិញនូវតំបន់រមណីយដ្ឋាននានាទូទាំងប្រទេស លើកលែងតែតំបន់បិទខ្ទប់មួយចំនួន ដូចជារាជធានីភ្នំពេញ ក្រុងតាខ្មៅ នៃខេត្តកណ្តាក ក្រុងព្រះសីហនុ និងតំបន់ផ្សេងៗមួយចំនួនទៀតនោះគឺអាចបង្ហាញបានថា ដង្ហើមក៏ដូចជាចរន្តសេដ្ឋកិច្ច នឹងមានភាពល្អប្រសើរជាងអំឡុងពេលដែលមានការបិទចរាចរណ៍កាលពីពេលកន្លងទៅថ្មីៗនេះ។

យ៉ាងណាក៏ដោយ លោកឧកញ៉ាបានបញ្ជាក់ថា បើទោះជាមានការសម្រេចអនុ ញ្ញាតឱ្យមានការធ្វើចរាចរណ៍ឆ្លងកាត់តំបន់ និងបណ្តាខេត្តក្រុងទូទាំងប្រទេសលើកលែងតែភូមិសាស្ត្របិទខ្ទប់ ជាពិសេសការបើកឱ្យមានដំណើរការ នូវតំបន់រមណីយដ្ឋាននានាទូទាំងប្រទេសនៅពេលនេះ គឺសំដៅតែចំពោះតំបន់ ដែលមិនមានការរីករាលដាលដែលត្រូវបានហាមឃាត់តែប៉ុណ្ណោះ ពោលគឺមិនមែនជាការបង្ហាញ ឱ្យឃើញពីភាពធូស្បើយនៃការឆ្លងជំងឺនោះឡើយ។

ជាក់ស្ដែងក្នុងរយៈពេលប៉ុន្មានថ្ងៃចុងក្រោយនេះ កំណើននៃចំនួនអ្នកឆ្លងជំងឺកូវីដ១៩ មានរាប់រយនាក់ជាប់ជាប្រចាំ ដែលតម្រូវឱ្យប្រជាពលរដ្ឋនៅទូទាំងប្រទេសចូលរួមពង្រឹងការអនុវត្តវិធានការ ណែនាំរបស់រាជរដ្ឋាភិបាលកម្ពុជា ក៏ដូចជាក្រសួងសុខាភិបាល ៣កុំ ៣ការពារ ឱ្យបានខ្ជាប់ខ្ជួនជាទីបំផុត៕

រាជរដ្ឋាភិបាលកម្ពុជា ចេញសេចក្តីសម្រេចបញ្ចប់ការហាមឃាត់ធ្វើដំណើរ និងបញ្ចប់ការបិទរមណីយដ្ឋានទេសចរណ៍នៅទូទាំងប្រទេស

ភ្នំពេញៈ រាជរដ្ឋាភិបាលបានសម្រេចបញ្ចប់ការហាមឃាត់ការធ្វើដំណើរឆ្លងកាត់ចេញចូលភូមិសាស្ត្រខេត្តមួយទៅខេត្តមួយ និងការបិទរមណីយដ្ឋានទេសចរណ៍នៅទូទាំងប្រទេស ដែលត្រូវបានសម្រេចដោយសេចក្តីសម្រេចលេខ ៤៤ សសរ ចុះថ្ងៃទី៦ ខែមេសា ឆ្នាំ២០២១ និងសេចក្តីសម្រេចលេខ ៥១ សសរ ចុះថ្ងៃទី១៧ ខែមេសា ឆ្នាំ២០២១ របស់រាជរដ្ឋាភិបាល។

សម្រាប់ការធ្វើដំណើរចេញ-ចូល និងឆ្លងកាត់ភូមិសាស្ត្រនានាដែលត្រូវបានបិទខ្ទប់ ត្រូវអនុវត្តតាមសេចក្តីសម្រេចរបស់រាជរដ្ឋាភិបាលស្តីពីការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាល និងសេចក្តីសម្រេចពាក់ព័ន្ធនានារបស់រដ្ឋបាលរាជធានី ខេត្ត ដែលមានជាធរមាន។

យោងតាមសេចក្តីសម្រេចលេខ ៥៣ សសរ ចុះថ្ងៃទី២៥ ខែមេសា ឆ្នាំ២០២១!

តើមេរោគកូវីដ១៩ដែលកំពុងរាលដាលនៅកម្ពុជាជាប្រភេទមេរោគបំលែងថ្មី ឬយ៉ាងណា

ដោយៈស៊ីវ ម៉េង

ភ្នំពេញៈ ប្រធានអង្គការសុខភាពពិភពលោកប្រចាំកម្ពុជា លោកស្រី Li Ailan បានមានប្រសាសន៍ថា មូលហេតុដែលបណ្តាលឱ្យមានការផ្ទុះឡើងខ្លាំង នៃជំងឺកូវីដ១៩ខ្លាំងឡើងៗ ជាវីរុសកូវីដ១៩បំលែងថ្មីប្រភេទ B.1.1.7 ដែលវាមានការឆ្លងកាន់តែខ្លាំង។

ការរីករាលដាលមេរោអនេះ ដែលមិនអាចគ្រប់គ្រងគឺមានកត្តាធំ៣យ៉ាង រួមមាន ទី១ បច្ចុប្បន្នវីរុសកូវីដ១៩ដែលកំពុងចរាចរក្នុងប្រទេសកម្ពុជា គឺជាវីរុសកូវីដ១៩បំលែងថ្មីប្រភេទ B.1.1.7 ដែលវាមានការឆ្លងកាន់តែខ្លាំង។ ទី២ ការកើនឡើងនៃអ្នកដែលបានឆ្លង ដែលមិនចេញរោគសញ្ញា បណ្តាលអោយការយឺតយ៉ាវ ក្នុងធ្វើតេស្តរកឃើញករណីថ្មី នៃវិជ្ជមានកូវីដ១៩ ។ ទី៣ ការគោរពវិធានការបង្ការការរាលដាលនៃជំងឺកូវីដ១៩ របស់ប្រជាជនចាប់ផ្តើមធ្លាក់ចុះ។

លោកស្រីក៏បានសម្តែងការព្រួយបារម្ភ អំពីបរិយាកាសការងារ នៅក្នុងរោងចក្រនិងទីផ្សារ នៅក្នុងប្រទេសកម្ពុជាផងដែរ ដោយលោកស្រីចង្អុលបង្ហាញថា នៅទីនោះភាគច្រើន គឺមិនបានបំពេញតាមស្តង់ដារ បង្ការជំងឺឆ្លងវីរុសកូវីដ១៩នោះទេ ដោយកន្លែងទាំងនោះខ្វះខ្យល់ចេញចូល បរិយាកាសការងារចង្អៀត ដែលមានមនុស្សច្រើនកុះករ និងពិបាករក្សាអនាម័យជាដើម។

លោកស្រី Li Ailan បានចង្អុលបង្ហាញថា ការបិទទីក្រុងគ្រាន់តែជាគោលនយោបាយបណ្តោះអាសន្នតែប៉ុណ្ណោះ ព្រោះវានឹងជះឥទ្ធិពលយ៉ាងខ្លាំងដល់សង្គម និងសេដ្ឋកិច្ច ហើយនឹងមានសំពាធកាន់តែតានតឹងជាខ្លាំង ចំពោះក្រុមមនុស្សដែលងាយរងគ្រោះមួយចំនួននៅក្នុងសង្គម។ ដូច្នេះហើយវិធានការបិទខ្ទប់ វាមិនមែនជាដំណោះស្រាយសម្រាប់រយៈពេលវែងនោះទេ។

លោកស្រីបន្តថា “គ្រាន់តែបិទទីក្រុងគឺមិនគ្រប់គ្រាន់ទេ។ យោងតាមបទពិសោធន៍ពីបណ្តាប្រទេសផ្សេងៗបង្ហាញថា មានតែវិធានការអនាម័យជាមូលដ្ឋានដូចជា ការលាងដៃញឹកញាប់ ពាក់ម៉ាស កុំទៅកន្លែងដែលមានមនុស្សច្រើន បញ្ឈប់ការប្រមូលផ្តុំ និង ថែរក្សាស្តង់ដារការពារការរាតត្បាត នៅតាមកន្លែងធ្វើការជាដើម” ។ លោកស្រីបន្តថា “បើមិនដូច្នោះទេ ទោះបីរយៈពេលខ្លីមានការថយចុះ នៃចំនួនវិជ្ជមានកូវីដ១៩ក៏ដោយ វានឹងកើនឡើងវិញ ប្រសិនបើមិនគោរពរឺអនុវត្តតាមវិធានការខាងលើ” ។

លោកស្រីបានបញ្ជាក់ថា រាល់វិធានការណ៍បង្ការការឆ្លងរីករាលដាល គឺមានលក្ខណៈប្រទាក់ក្រឡាគ្នា ប្រសិនបើប្រជាជនទាំងអាច សុទ្ធតែអាចគោរពបានយ៉ាងតឹងរឹង នូវរាល់វិធានការបង្ការការរីករាលដាលទាំងនោះ ប្រាកដជាអាចកាត់ផ្តាច់ខ្សែចម្លងនៃមេរោគកូវីដ១៩បាន៕

ដំណឹងល្អៈ ចិនត្រៀមជួយកម្ពុជាក្នុងការប្រយុទ្ធជាមួយនឹងជំងឺកូវីដ១៩

ដោយៈ គង់ សូរិយា

ភ្នំពេញៈ លោក ចាវ លីចៀន ( Zhao Lijian ) អ្នកនាំពាក្យក្រសួងការបរទេសចិន បានថ្លែងថា ក្នុងនាមជាមិត្តដែកថែបជាមួយកម្ពុជា ចិននឹងបន្តជួយកម្ពុជាតាមសមត្ថភាព សម្រាប់ការទប់ស្កាត់ និងគ្រប់គ្រងជំងឺរាតត្បាតកូវីដ១៩ ទៅតាមការស្នើសុំជាបន្តបន្ទាប់ទៀត។ នេះបើយោងតាមការចុះផ្សាយ ដោយគេហទំព័ររបស់ក្រសួងការបរទេសចិន នៅថ្ងៃសៅរ៍ ទី២៤ ខែមេសា ឆ្នាំ២០២១នេះ។

ការបញ្ជាក់របស់មន្ត្រីជាន់ខ្ពស់ក្រសួងការបរទេសចិនខាងលើ បានធ្វើឡើងក្នុងសន្និសីទសារព័ត៌មានមួយ នៅថ្ងៃទី២៣ ខែមេសា ឆ្នាំ២០២១កន្លងមកនេះ ដើម្បីឆ្លើយតបនឹងសំណួររបស់សារព័ត៌មាន China Daily ដែលបានសួរពាក់ព័ន្ធនឹងចំនួន អ្នកឆ្លងកូវីដ១៩ នៅកម្ពុជាប្រចាំថ្ងៃ ដែលបន្តរក្សាចំនួន ៣ខ្ទង់ រហូតដល់មានការបិទខ្ទប់រាជធានីភ្នំពេញ និងក្រុងតាខ្មៅ ថែមទាំងមានការរឹតត្បិតការធ្វើដំណើរជាដើម។

លោកចាវ លីចៀន បានថ្លែងថា ចិនកំពុងតាមដានស្ថានការណ៍រីករាលដាលជំងឺកូវីដ១៩ នៅកម្ពុជាយ៉ាងយកចិត្តទុកដាក់។ តាមអ្នកនាំពាក្យរូបនេះ ចិនជឿជាក់ថា ក្រោមព្រះរាជកិច្ចគាំពាររបស់ព្រះករុណា ព្រះបាទសម្តេច ព្រះបរមនាថ នរោត្តម សីហមុនី និងក្រោមការដឹកនាំដ៏រឹងមាំរបស់សម្តេចតេជោ ហ៊ុន សែន ប្រជាជនកម្ពុជ ច្បាស់ជាអាចទទួលបានដំណោះស្រាយដ៏ល្អ ឆ្លើយតបនឹងវិបត្តិបច្ចុប្បន្ននេះ ហើយក៏ធានាបាននូវជ័យជម្នះលើជំងឺកូវីដ១៩ យ៉ាងឆាប់រហ័ស។

លោកបន្ថែមថា “តាំងពីឆ្នាំមុន ចិន និងកម្ពុជាបានឈររួមគ្នាគ្រប់កាលៈទេសៈ។ អំឡុងពេលមានស្ថានភាពប្រកបដោយគ្រោះថ្នាក់ គឺពេលដែលចិនកំពុងប្រយុទ្ធនឹងកូវីដ១៩ សម្តេចតេជោ ហ៊ុន សែនបានធ្វើទស្សនកិច្ចនៅចិន ជានិមិត្តរូបនៃការគាំទ្រ។លោកបន្តថា “ទំនាក់ទំនងទ្វេភាគី និងមិត្តភាពរវាងប្រជាជន នៃប្រទេសទាំងពីរ បានស្តែងចេញកាន់តែខ្លាំងឡើងៗ នៅក្នុងការរួមគ្នាឆ្លើយតបនឹងវិបត្តិជាសកលនេះ” ។

អ្នកនាំពាក្យក្រសួងការបរទេស បញ្ជាក់ទៀតថា “ក្នុងនាមជាមិត្តដែកថែប វាជាក្រិតក្រមធម្មជាតិទៅហើយ នៅពេលដែលកម្ពុជា កំពុងតែប្រយុទ្ធប្រឆាំងនឹងជំងឺកូវីដ១៩ ចិននឹងប្រឹងប្រឹងឲ្យអស់លទ្ធភាព ដើម្បីសហការជាមួយកម្ពុជា ក្នុងការធ្វើសង្គ្រាមប្រឆាំងនឹងជំងឺនេះ។ នេះមិនត្រឹមតែជាសក្ខីបទ បង្ហាញពីទំនាក់ទំនងពិសេសរបស់យើងទេ ប៉ុន្តែថែមទាំងផ្នែកដ៏សំខាន់មួយ នៅក្នុងការប្រឹងប្រឹងរួមគ្នា កសាងសហគមន៍រួមវាសនាតែមួយ” ។

លោកចាវ លីជាង ក៏បានលើកឡើងពីជំនួយរបស់ចិន ទាំងផ្នែកហិរញ្ញវត្ថុ វ៉ាក់សាំង និងគ្រឿងបរិក្ខានានា ក្នុងគោលដៅចូលរួមសមរភូមិកូវីដ១៩ នៅកម្ពុជាផងដែរ។

លោកបន្តថា ក្នុងនាមជាមិត្តដែកថែបជាមួយកម្ពុជា) ចិននឹងបន្តជួយកម្ពុជាតាមសមត្ថភាព សម្រាប់ការទប់ស្កាត់ និងគ្រប់គ្រងជំងឺរាតត្បាតកូវីដ១៩ ទៅតាមការស្នើសុំជាបន្តបន្ទាប់ទៀត» ។ នេះជាការបញ្ជាក់ច្បាស់ៗ ពីអ្នកនាំពាក្យក្រសួងការបរទេសចិន។

ដើម្បីចូលរួមប្រយុទ្ធប្រឆាំងនឹងជំងឺកូវីដ១៩ ចិនបានផ្តល់ឲ្យកម្ពុជា ទាំងផ្នែកហិរញ្ញវត្ថុ វ៉ាក់សាំង និងគ្រឿងបរិក្ខាជាច្រើន។ សរុបមកទល់ពេលនេះ វ៉ាក់សាំងដែលជាជំនួយរបស់ចិនផ្ដល់ជូនកម្ពុជា ប្រភេទស៉ីណូហ្វាម មានចំនួន ១,៣lលានដូស។

ដើម្បីគាំទ្ររាជរដ្ឋាភិបាលកម្ពុជា ក្នុងកិច្ចប្រយុទ្ធប្រឆាំងនឹងកូវីដ-១៩រដ្ឋាភិបាលចិន ក៏បានសម្រេចផ្តល់ជំនួយ ឥតសំណងជាវ៉ាក់សាំងស៉ីណូហ្វាមចំនួន៤០ម៉ឺនដូស បន្ថែមទៀតដល់ភាគីកម្ពុជា។ បើតាមការប្រកាសរបស់ស្ថានទូតចិននៅកម្ពុជា វ៉ាក់សាំងទាំងនេះ នឹងដឹកជញ្ជូនមកដល់កម្ពុជា នាចុងខែមេសា ឆ្នាំ២០២១ខាងមុខនេះ តាមរយៈជើងហោះហើរពាណិជ្ជកម្ម៕

ប្រភព៖ Fresh News

សម្ដេចតេជោ ៖កម្ពុជាត្រៀមខ្លួនជានិច្ចជាមួយអាស៊ានដើម្បីជួយមីយ៉ាន់ម៉ាត្រលប់ទៅរកភាពដើមវិញ

ភ្នំពេញ ៖ ថ្លែងនៅក្នុងកិច្ចប្រជុំកំពូលអាស៊ានកាលពីថ្ងៃទី២៤ មមេសា ២០២១នេះ សម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានបញ្ជាក់កម្ពុជាត្រៀមខ្លួនជានិច្ចក្នុងការចូលរួមជាមួយប្រទេសអាស៊ានផ្សេងទៀត ដើម្បីជួយមីយ៉ាន់ម៉ា ត្រឡប់ទៅរកភាពប្រក្រីឡើងវិញ ។

សម្តេចតេជោ បានបន្តថា ក្នុងនាមជាគ្រួសារអាស៊ានតែមួយ កម្ពុជាបានតាមដានយ៉ាងយកចិត្តទុកដាក់ អំពីស្ថានការណ៍នៅមីយ៉ាន់ម៉ារ ដែលកាន់តែមានសភាពស្រួចស្រាល និងស្មុគ្រស្មាញគួរឲ្យព្រួយបារម្ភ។ ជាមួយគ្នានេះដែរ កម្ពុជាគាំទ្រសេចក្តីថ្លែងការណ៍ របស់ប្រធានអាស៊ាន កាលពីថ្ងៃទី១ខែកុម្ភៈ និងក្រោយពីកិច្ចប្រជុំរដ្ឋមន្រ្តីការបរទេសអាស៊ាន ថ្ងៃទី២ខែមីនា ដែលអំពាវនាវឱ្យគ្រប់ភាគីរក្សាការអត់ធ្មត់ ចៀសវាងអំពើហឹង្សា និងធ្វើការចរចារកដំណោះស្រាយដោយសន្តិវិធី។

សម្ដេចបន្ថែមថា កម្ពុជាគាំទ្រដល់តួនាទីសម្របសម្រួលរបស់ប្រធានអាស៊ាន ក៏ដូចជាអគ្គលេខាធិការអាស៊ាន និងសមាជិកអាស៊ានផ្សេងទៀត ដែលអាចដើរតួនាទីជាបេសកជនពិសេស របស់អាស៊ាន ក្នុងការបង្កើតបរិយាកាសអនុគ្រោះ ដើម្បីជំរុញឱ្យមានការចរចាប្រកបដោយលក្ខណ:ស្ថាបនា ដើម្បីជួយមីយ៉ាន់ម៉ាដោះស្រាយវិបត្តិ និងទប់ស្កាត់កុំឱ្យស្ថានការណ៍ធ្លាក់កាន់តែដុនដាប ពោលគឺយើងអាចពិចារណាប្រើយន្តការអាស៊ានត្រីភាគី (ASEAN Troika) ដើម្បីជួយសម្របសម្រួលរវាងភាគីពាក់ព័ន្ធ ដើម្បីជំរុញការចរចាដោយស្ងាត់ៗ រវាងភាគីពាក់ព័ន្ធ។ ផ្ទុយទៅវិញបើមានការជួយសម្របសម្រួល នោះភាគីដែលកំពុងប្រឈមមុខដាក់គ្នា អាចងាកមករកការដោះស្រាយដោយសន្តិវិធីវិញ ពោលគឺគ្មានភាគីណាចង់ឃើញការបង្ហូរឈាម និងបាត់បង់ជីវិតប្រជាជននោះទេ។

នៅក្នុងកិច្ចប្រជុំពិសេសក្រៅផ្លូវការនេះ គឺមានការយាង និងអញ្ជើញចូលរួមពី ប្រមុខរដ្ឋ ប្រមុខរដ្ឋាភិបាល នៃប្រទេសអាស៊ាន (លើកលែងតែប្រធានាធិបតីហ្វីលីពីន នាយករដ្ឋមន្រ្តីឡាវ នាយករដ្ឋមន្រ្តីថៃ)ដែលកិច្ចប្រជុំនេះគឺប្រព្រឹត្តទៅនៅទីក្រុងហ្សាកាតា សាធារណរដ្ឋឥណ្ឌូនេស៊ី ក្រោមគំនិតផ្តួចផ្តើមរបស់ ឯកឧត្តម យូកូ វីដូដូ ប្រធានាធិបតីនៃសាធារណរដ្ឋឥណ្ឌូនេស៊ី និងព្រះចៅស៊ុលតង់ ហាជី ហាសសាណាល់ បុលគីយ៉ាស់ មុយអ៊ីហ្សាឌីន វ៉ាឌូឡាហ៍ នៃប្រទេសប្រុយណេ ក្នុងនាមជាប្រធានអាស៊ាន។ សម្រាប់កិច្ចប្រជុំកំពូលពិសេសក្រៅផ្លូវការនេះ ប្រទេសមីយ៉ាន់ម៉ា ត្រូវបានអញ្ជើញចូលរួមដោយ ឯកឧត្តមឧត្តមសេនីយ៍ មីន អោង ហ្លេង ប្រមុខយោធាមីយ៉ាន់ម៉ា ៕

ខ្វះលុយក៏អាចទិញបានដែរ! ផ្ទះវីឡាទោល 34,990$ (បញ្ចុះ15,000$) និងវីឡាកូនកាត់ 14,990 (បញ្ចុះ7,000$)

ភ្នំពេញ ៖ ទីក្រុងពាណិជ្ជកម្មភ្នំតូច ដែលមានទំហំ ១០០ហិកតារបស់ក្រុមហ៊ុន ខេអេច លែន (KH Land Co., Ltd) ចាប់ផ្ដើមបើកលក់ ផ្ទះវីឡាទោល និងផ្ទះវីឡាកូនកាត់ ជាង៩០០ផ្ទះ និងឱកាសត្រឹមតែជាង ៣០ខ្នងប៉ុណ្ណោះ ដែលទទួលបានតំលៃដ៏ទាបបំផុត ព្រមជាមួយនឹងការផ្ដល់ជូនកាដូដ៏ពិសេសអស្ចារ្យជាច្រើនសន្ធឹកសន្ធាប់ទៀត ដល់អតិថិជនក្នុងសម័យកូវីដ ដើម្បីមានលទ្ធភាពទទួលបានផ្ទះដ៏ស្រស់ស្អាតសម្រាប់រស់នៅ។

អតិថិជនដែលទិញនៅថ្ងៃនេះ នឹងទទួលបានការលក់ជូនក្នុងតំលៃពិសេស ព្រមទាំងទទួលបានកាដូជាច្រើនបន្ថែមទៀត។

ផ្ទះវីឡាទោលតម្លៃ 34,990$ (បញ្ចុះតម្លៃ 15,000$)
សាច់ដីទំហំ 10m x 22m
ទំហំផ្ទះ ធំទូលាយខ្លាំង 8m x 11m
នៅជាប់ផ្លូវបេតុងទំហំ 10m
វីឡាកូនកាត់តម្លៃ 14,990$ (បញ្ចុះតម្លៃ 7,000$)
ទំហំដី 4.1m x 20m
ផ្ទះទំហំ 4.1m x 14m
នៅជាប់ផ្លូវបេតុងទំហំ 10m
ផ្ដល់ជូនកាដូបន្ថែម ៖
ផ្ដល់ជូនម៉ាស៊ីនត្រជាក់ម៉ាកល្បី ១គ្រឿង និង៤គ្រឿង
ផ្ដល់ជូនទូទឹកកកចំនួន 1 គ្រឿង
សំភារៈផ្ទះបាយទំនើបទាន់សម័យនិងគុណភាពខ្ពស់
មានហេដ្ឋារចនាសម្ព័ន្ធគ្រប់គ្រាន់ និងផ្ដល់ជូនការតភ្ជាប់ចរន្តអគ្គីសនី ១០អំពែ និង២០អំពែ
មានការរៀបចំសួនច្បារមុខផ្ទះយ៉ាងស្រស់ស្អាត
ផ្ដល់ជូនប្លង់រឹងស្របច្បាប់ 100%
ផ្ទះស្រស់ស្អាត មានគុណភាព សោភ័ណភាព ផាសុកភាព និង សុវត្ថិភាព
ឪកាសមានត្រឹមតែជាង ៣០ផ្ទះប៉ុណ្ណោះ!
លក្ខខណ្ឌបង់ប្រាក់ងាយស្រួលបំផុត ! ទោះខ្វះលុយ ក៏អាចទិញផ្ទះវីឡាដ៏ស្រស់ស្អាតបានដែរ !

នៅក្នុងកម្រោងទីក្រុងពាណិជ្ជកម្មភ្នំតូច ក្រៅពីមានការអភិវឌ្ឍលំនៅដ្ឋាន ក៏មានការអភិវឌ្ឍផ្សេងទៀតយ៉ាងសម្បូរបែបផងដែរដូចជា អាជីវកម្មទំនើបទាំង១០ប្រភេទ ផ្សារ និងទីធ្លាសម្រាប់តាំងពិព័រណ៍ជាដើម។

ទីតាំងគម្រោងទីក្រុងពាណិជ្ជកម្មភ្នំតូច ស្ថិតនៅផ្លូវជាតិ៥១ ក្បែរនឹងផ្លូវល្បឿនលឿនភ្នំពេញ-ក្រុងព្រះសីហនុ និងសួនឧស្សាហកម្មកាណាឌីយ៉ា៥០០ហិកតា ដែលជាតំបន់ប៉ូលសេដ្ឋកិច្ចដ៏សំខាន់ មានការអភិវឌ្ឍរបស់រដ្ឋនិងឯកជន បណ្ដុំទៅដោយរោងចក្រ សហគ្រាសធំៗ លំនៅដ្ឋាន មានប្រជាជនរស់នៅកុះករ មានផ្សារ សាលារៀន និងមន្ទីរពេទ្យជាដើម។

តើអង្គការសុខភាពពិភពលោកវាយតម្លៃស្ថានភាពការរីករាលដាលជំងឺកូវីដនៅកម្ពុជាបែបណា?

ដោយៈ គង់ សូរិយា

ភ្នំពេញៈ ស្របពេលរាជធានីភ្នំពេញ និងក្រុងតាខ្មៅប្រទេសកម្ពុជាកំពុងបិទខ្ទប់ការរីករាលដាលជំងឺកូវីដ១៩ ការរីករាលដាលនេះនៅតែមានកំនើន ហើយផ្សារទាំងអស់បានចាប់ផ្តើមបិទទ្វារកាលពីយប់ថ្ងៃទី២៣ មេសាកន្លងមកនេះ។

តើអង្គការសុខភាពពិភពលោកប្រចាំកម្ពុជា ពិសេសថ្នាក់ដឹកនាំអង្គការនេះ ដែលកំពុងជួយកម្ពុជាយល់ឃើញដូចម្តេច? លោកស្រីវេជ្ជបណ្ឌិត Li Ailan តំណាងអង្គការសុខភាពពិភពលោកប្រចាំនៅកម្ពុជាបានថ្លែងថា ការរីករាលដាលជំងឺនេះនៅតែធ្ងន់ធ្ងរហើយការបិទខ្ទប់ ក្នុងរយៈពេលមួយសប្តាហ៍គឺ មិនគ្រប់គ្រាន់ទេក្នុងការកាត់ផ្តាច់ខ្សែចម្លងនៃជំងឺកូវីដ១៩។

លោកស្រីបន្តថា “មេរោគកូវីដ១៩នៅតែចរាចរ ពាសពេញសហគមន៍ ដោយឡែកករណីវិជ្ជមានថ្មី នឹងមិនអាចបញ្ចប់បានភ្លាមៗនោះទេ”។

លោកស្រីវេជ្ជបណ្ឌិត Li Ailanនៅក្នុងបទសម្ភាសន៍ជាមួយ《ស៊ីស៊ីថាមស៍》បានសម្តែងការព្រួយបារម្ភថ “ករណីវិជ្ជមានថ្មីនៃជំងឺកូវីដ១៩ នៅរាជធានីភ្នំពេញក្នុងរយៈពេលមួយសប្តាហ៍នេះ បានបន្តកើនឡើង ហើយស្ថានភាពដូចគ្នានេះ បានកំពុងកើតឡើងនៅក្រុងព្រះសីហនុនាពេលថ្មីៗនេះផងដែរ”។

លោកស្រីបន្តថា បច្ចុប្បន្ននេះ នៅក្នុងសហគមន៍ នៅតែមានអ្នកជម្ងឺដែលមិនមានចេញរោគសញ្ញាជាច្រើន ដែលពួកគេកំពុងរងចាំការធ្វើតេស្ត ដូច្នេះនៅសប្តាហ៍ខាងមុខនឹងនៅតែមានករណីវិជ្ជមានកូវីដ១៩ថ្មីជាបន្តបន្ទាប់ទៀត។

លោកស្រីសង្កត់ធ្ងន់ថា “ទោះបីជាពិបាកក្នុងការដឹងមុនថា ចំនួនករណីឆ្លងថ្មីនឹងមានកម្រិតណានោះទេ ដោយសារមានកត្តាមិនច្បាស់លាស់ជាច្រើន តែការកើនឡើងរឺក៏ការធ្លាក់ចុះនៃចំនួនករណីឆ្លងថ្មី គឺវាអាស្រ័យលើការគោរពលើវិធានការណ៍ បង្ការការរីករាលដាលនៃជំងឺកូវីដ១៩ របស់ប្រជាជនទាំងមូល”។លោកស្រីបន្ថែមថា “យើងមានក្តីសង្ឃឹម ប៉ុន្តែយើងត្រូវតែត្រៀមខ្លួនឲ្យបានពេញលេញ ដើម្បីប្រឈមនឹងបញ្ហាអាក្រក់បំផុតដែលអាចកើតមានឡើង”។

លោកវេជ្ជបណ្ឌិត Li Ailanបានចង្អុលបង្ហាញថា ដោយមានការអន្តរាគមន៍ពីរដ្ឋាភិបាល និងការរឹតបន្តឹងនៃការអនុវត្តច្បាប់ ការគោរពវិធានការណ៍របស់ប្រជាជនទូទៅមានការកើនឡើងគួរអោយកត់សម្គាល់ ហើយសង្ឃឹមថាប្រជាជន នឹងបន្តគោរពវិធានការបន្ថែមទៀត ពិព្រោះមានតែធ្វើដូចនេះទេ ទើបអាចទប់ស្កាត់ការរីករាលដាលនៃជំងឺកូវីដ១៩បានយ៉ាងពិតប្រាកដ។

លោកស្រីក៏បានជំរុញឱ្យរដ្ឋាភិបាលកម្ពុជា ផ្តល់ជំនួយដល់ក្រុមដែលងាយរងគ្រោះ និងជនទន់ខ្សោយ ដែលកំពុងជួបការលំបាក ដើម្បីកុំឲ្យពួកគេចេញទៅក្រៅប្រកបដោយភាពគ្រោះថ្នាក់និងហានិភ័យ ដែលអាចនាំឱ្យមានចន្លោះប្រហោង ក្នុងការបង្ការការរីករាលដាល។

លោកស្រីបានអំពាវនាវឱ្យប្រជាជនកម្ពុជា ទូទៅរួបរួមគ្នាជាធ្លុងមួយនិងគោរពនូវវិធានការណ៍ការពារការឆ្លងរាលដាលនេះ។

លោកស្រីបន្តថា “ការចម្លងនៃវីរុសកូវីដ១៩ មានភាពរាលដាលយ៉ាងឆាប់រហ័សហើយអត្រាឆ្លងខ្ពស់ណាស់។ យើងកំពុងតែត្រូវរត់ប្រណាំងប្រឆាំងនឹងវីរុសនេះ បើមិនដូច្នេះទេវានឹងយឺតពេលជាមិនខាន”។

លោកវេជ្ជបណ្ឌិត Li Ailanនិយាយថា គ្រាន់តែវិធានការបិទខ្ពប់ពិបាក ក្នុងការបញ្ឈប់ការរីករាលដាលណាស់ លោកស្រីបាននិយាយកោតសរសើរថា ទោះបីជាធនធានមានកំណត់ក៏ដោយ តែក្រោមវិធានការណ៍យ៉ាងម៉ឺងម៉ាត់ ប្រទេសកម្ពុជាបានរក្សាការការពារកុំអោយឆ្លងទ្រង់ទ្រាយធំ រហូតដល់ខែកុម្ភៈឆ្នាំនេះ ហើយទទួលបានជោគជ័យនូវកំណត់ត្រាដ៏អស្ចារ្យ ដែលមិនមានករណីស្លាប់ និងមិនមានការឆ្លងមេរោគកូវីដ១៩ដល់បុគ្គលិកពេទ្យ។

លោកស្រីបន្តថា “អ្វីដែលជាការគួរឱ្យសោកស្តាយនោះគឺ មានការចន្លោះប្រហោងក្នុងវិធានការការពារនៅក្នុងខែកុម្ភៈឆ្នាំនេះ”។

លោកស្រីបន្តថា មូលហេតុដែលបណ្តាលឱ្យមានការផ្ទុះឡើង នៃជំងឺកូវីដ១៩ខ្លាំងឡើងៗ និងមិនអាចគ្រប់គ្រងគឺមានកត្តាធំៗ៣យ៉ាង រួមមាន ទី១ បច្ចុប្បន្នវីរុសកូវីដ១៩ដែលកំពុងចរាចរក្នុងប្រទេសកម្ពុជា គឺជាវីរុសកូវីដ១៩បំលែងថ្មីប្រភេទB.1.1.7 ដែលវាមានការឆ្លងកាន់តែខ្លាំង។ ទី២ ការកើនឡើងនៃអ្នកដែលបានឆ្លង ដែលមិនចេញរោគសញ្ញា បណ្តាលអោយការយឺតយ៉ាវ ក្នុងធ្វើតេស្តរកឃើញករណីថ្មី នៃវិជ្ជមានកូវីដ១៩។ ទី៣ ការគោរពវិធានការបង្ការការរាលដាលនៃជំងឺកូវីដ១៩ របស់ប្រជាជនចាប់ផ្តើមធ្លាក់ចុះ។

លោកស្រីក៏បានសម្តែងការព្រួយបារម្ភ អំពីបរិយាកាសការងារនៅក្នុងរោងចក្រនិងទីផ្សារ នៅក្នុងប្រទេសកម្ពុជាផងដែរ ដោយលោកស្រីចង្អុលបង្ហាញថា នៅទីនោះភាគច្រើន គឺមិនបានបំពេញតាមស្តង់ដារ បង្ការជំងឺឆ្លងវីរុសកូវីដ១៩នោះទេ ដោយកន្លែងទាំងនោះខ្វះខ្យល់ចេញចូល បរិយាកាសការងារចង្អៀត ដែលមានមនុស្សច្រើនកុះករ និងពិបាករក្សាអនាម័យជាដើម។

លោកស្រី Li Ailan បានចង្អុលបង្ហាញថា ការបិទទីក្រុងគ្រាន់តែជាគោលនយោបាយបណ្តោះអាសន្នតែប៉ុណ្ណោះ ព្រោះវានឹងជះឥទ្ធិពលយ៉ាងខ្លាំងដល់សង្គម និងសេដ្ឋកិច្ច ហើយនឹងមានសំពាធកាន់តែតានតឹងជាខ្លាំង ចំពោះក្រុមមនុស្សដែលងាយរងគ្រោះមួយចំនួននៅក្នុងសង្គម។ ដូច្នេះហើយវិធានការបិទខ្ទប់ វាមិនមែនជាដំណោះស្រាយសម្រាប់រយៈពេលវែងនោះទេ។

លោកស្រីបន្តថា “គ្រាន់តែបិទទីក្រុងគឺមិនគ្រប់គ្រាន់ទេ។ យោងតាមបទពិសោធន៍ពីបណ្តាប្រទេសផ្សេងៗបង្ហាញថា មានតែវិធានការអនាម័យជាមូលដ្ឋានដូចជា ការលាងដៃញឹកញាប់ ពាក់ម៉ាស កុំទៅកន្លែងដែលមានមនុស្សច្រើន បញ្ឈប់ការប្រមូលផ្តុំ និង ថែរក្សាស្តង់ដារការពារការរាតត្បាត នៅតាមកន្លែងធ្វើការជាដើម”។ លោកស្រីបន្តថា “បើមិនដូច្នោះទេ ទោះបីរយៈពេលខ្លីមានការថយចុះ នៃចំនួនវិជ្ជមានកូវីដ១៩ក៏ដោយ វានឹងកើនឡើងវិញ ប្រសិនបើមិនគោរពរឺអនុវត្តតាមវិធានការខាងលើ”។

លោកស្រីបានបញ្ជាក់ម្តងហើយម្តងទៀតថា រាល់វិធានការណ៍បង្ការការឆ្លងរីករាលដាលគឺមានលក្ខណៈប្រទាក់ក្រឡាគ្នា ប្រសិនបើប្រជាជនទាំងអាច សុទ្ធតែអាចគោរពបានយ៉ាងតឹងរឹង នូវរាល់វិធានការបង្ការការរីករាលដាលទាំងនោះ ប្រាកដជាអាចកាត់ផ្តាច់ខ្សែចម្លងនៃមេរោគកូវីដ១៩បាន។

លោកស្រីបន្តថា “មនុស្សទាំងអស់នៅក្នុងសង្គម នរណាម្នាក់ក៏ដោយសុទ្ធតែមានកតព្វកិច្ច រួមគ្នាគោរពយ៉ាងតឹងរឹង នូវរាល់វិធានការបង្ការការរីករាលដាល នៃវីរុសកូវីដ១៩ បើធ្វើដូច្នេះបានពួកយើង នឹងអាចគ្រប់គ្រងការផ្ទុះនៃជំងឺកូវីដ១៩លើកនេះបាន”។លោកស្រីបន្តថា “ប្រសិនបើមនុស្សមួយចំនួននៅតែមិនគោរព រឺអនុវត្តតាមវិធានការខាងលើ ពេលនោះ យើងនឹងប្រឈមបញ្ហាកាន់តែធ្ងន់ធ្ងរ ហើយការផ្ទុះឡើងលើកនេះនឹងបន្តកាន់តែយូរ ហើយយើងនឹងប្រឈមមុខនឹងស្ថានភាពកាន់តែលំបាកខ្លាំងថែមទៀត”។

ទោះបីជាទីក្រុងត្រូវបិទឬមិនបិទក៏ដោយ យើងត្រូវតែចងចាំថា ត្រូវតែគោរពជានិច្ចនូវវិធានការណ៍បង្ការការរីករាលដាលក្នុងបរិបទរស់នៅតាមបែបគន្លងថ្មី។ ទោះបីមុនពេល រឺអំឡុងពេល រឺក៏ក្រោយពេលនៃការបិទទីក្រុងក៏ដោយ យើងដាច់ខាតត្រូវតែបន្តគោរពវិធានការការពារជាប់ជានិច្ច។

ដោយសារតែការរីករាលដាលកាន់តែខ្លាំងឡើងៗ វិទ្យាស្ថានជាតិសុខភាពសារធាណៈ(NIPH) កាលពីថ្ងៃទី១៩ខែមេសានេះ បានសម្រេចប្រើប្រាស់ឧបករណ៍តេស្តរហ័ស (Rapid Antigen Test COVID-19) សម្រាប់រកមេរោគកូវីដ១៩៕

ក្រសួងសុខាភិបាលនិងរដ្ឋបាលក្រុងភ្នំពេញកំពុងបញ្ជូនគ្រូពេទ្យចុះយកសំណាកនៅតំបន់ក្រហម

ដោយៈគង់ សូរិយា

ភ្នំពេញៈ មន្រ្តីក្រសួងសុខាភិបាល និងរដ្ឋបាលរាជធានីភ្នំពេញ កំពុងបញ្ចូនមន្រ្តីចុះយកសំណាកប្រជាពលរដ្ឋ ដែលរស់នៅតំបន់ក្រហម ដែលកំពុងពិបាកក្នុងការធ្វើដំណើរចេញក្រៅលំនៅដ្ឋាន។

អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានប្រាប់បណ្តាញព័ត៌មានផ្លូវការ Fresh News នៅព្រឹកថ្ងៃទី២៤ ខែមេសា ឆ្នាំ២០២១នេះថា ក្រោយទទួលបានការលើកឡើងជាច្រើន ពាក់ព័ន្ធនឹងការយកសំណាក នៅតំបន់ក្រហមនោះ នៅពេលនេះ ក្រសួងសុខាភិបាល និងសាលារាជធានី នឹងបញ្ជូនក្រុមគ្រូពេទ្យទៅយកសំណាកនៅជិតលំនៅដ្ឋានរបស់បងប្អូនទាំងឡាយណា ដែលពិបាកធ្វើដំណើរចេញមកក្រៅ និងមកកាន់កន្លែងយកសំណាកដែលអាជ្ញាធររៀបបានត្រៀមរៀបចំ។

លោកបញ្ជាក់ថា សម្រាប់ជនពិការ ចាស់ជរា ស្រ្តីមានផ្ទៃពោះ ស្រ្តីបំបៅកូន អ្នកមើលថែទារក និងអ្នកដែលមានជំងឺប្រចាំកាយ មិនអាចធ្វើដំណើរមកកាន់កន្លែងយកសំណាកបាននោះ ខាងក្រសួងសុខាភិបាល និងអាជ្ញាធររាជធានីភ្នំពេញ នឹងបញ្ជូនក្រុមគ្រូពេទ្យទៅយកសំណាកនៅកន្លែងពួកគាត់ ពោលនៅជិតលំនៅដ្ឋានផ្ទាល់តែម្តង ដើម្បីជួយសម្រួលដល់ពួកគាត់។

កាលពីយប់ថ្ងៃទី២៣ ខែមេសា ឆ្នាំ២០២១ រដ្ឋបាលរាជធានីភ្នំពេញ បានប្រកាសអំពីការប្រមូលសំណាករបស់ប្រជាពលរដ្ឋទាំងអស់ ដែលកំពុងស្នាក់នៅក្នុងភូមិសាស្ដ្រតំបន់ដែរដ្ឋបាលរាជធានី “ចាត់ទុកជាតំបន់ក្រហម”។

ក្រោយការប្រកាសរបស់សាលារាជធានីភ្នំពេញខាងលើនេះ ក៏មានការលើកឡើងជាច្រើនរបស់ប្រជាពលរដ្ឋ នៅតំបន់ក្រហមនោះផងដែរថា ខ្លះពួកគាត់រស់នៅក្នុងបុរីមួយដែលនៅដាច់ដោយឡែក គ្រាន់តែស្ថិតនៅតំបន់ក្រហម ហើយមិនមានការផ្ទុះ ករណីកូវីដនោះឡើយ ហើយបើពួកគាត់ទាំងអស់ទៅយកសំណាក ពួកគាត់គិតពីការមានហានិភ័យខ្ពស់ជាក់ជាមិនខាន ដោយសារនៅកន្លែងយកសំណាក គឺប្រមូលទៅដោយមនុស្សច្រើន។

ជាមួយគ្នានេះក៏មានការលើកឡើងថា គ្រួសារខ្លះពួកគាត់មិន ដែលបានចេញពីផ្ទះនោះឡើយ ចាប់តាំងពីការផ្ទុះជំងឺមួយនេះ ដោយបានចូលរួមជាមួយអាជ្ញាធរយ៉ាងមានប្រសិទ្ធភាព។ ដូច្នេះបើឲ្យពួកគាត់ទៅយកសំណាកនោះ នឹងធ្វើឲ្យមានការបារម្ភនៃការចម្លងមេរោគមកវិញ។

ចំពោះប្រជាពលរដ្ឋដែលរស់នៅក្នុងទីតាំង ដែលត្រូវបានកំណត់ជាតំបន់ក្រហម នៃសង្កាត់ស្ទឹងមានជ័យទី១ សង្កាត់ស្ទឹងមានជ័យទី២ និងសង្កាត់ស្ទឹងមានជ័យទី៣ ខណ្ឌមានជ័យ ទៅយកសំណាកនៅ៖

* ទី១៖ ទីលានចាក់សំរាមចាស់ ក្នុងភូមិដំណាក់ធំ
* ទី២៖ ទីតាំងបណ្តោយផ្លូវលេខ ១០១៩ (ផ្លូវទ្រុងមាន់) ក្នុងភូមិទ្រា
* ទី៣៖ វិហារព្រះយេស៊ូ ទំល់មុខបញ្ជាការដ្ឋានកងរាជអាវុធហត្ថរាជធានីភ្នំពេញ។

ចំពោះប្រជាពលរដ្ឋដែលរស់នៅក្នុងទីតាំង ដែលត្រូវបានកំណត់ជាតំបន់ក្រហម នៃសង្កាត់ចោមចៅទី១ ខណ្ឌពោធិ៍សែនជ័យទៅយកសំណាកនៅ៖

* ទី១៖ សាលាបឋមសិក្សាសុភមង្គម ក្នុងភូមិបប៉ែកខាងជើង
* ទី២៖ ផ្សារ K-Mall ក្នុងភូមិត្រពាំងថ្លឹង១
* ទី៣៖ ដីឡូតិ៍ខាងក្រោយផ្សារឯករាជ្យ ក្នុងភូមិត្រពាំងថ្លឹង១។

ចំណែកប្រជាពលរដ្ឋដែលរស់នៅក្នុងទីតាំង ដែលត្រូវបានកំណត់ជាតំបន់ក្រហម នៃភូមិ១៤ ភូមិ១៦ និងភូមិ១៧ សង្កាត់បឹងសាឡាង ខណ្ឌទូលគោក ទៅយកសំណាកនៅ ក្នុងបរិវេណមជ្ឈមណ្ឌលវប្បធម៌ចេនឡា។

ក្នុងករណីប្រជាពលរដ្ឋណាម្នាក់មិនព្រមសហការ ឬគេចវេះមិនទៅយកសំណាកធ្វើតេស្តរកវីរុសកូវីដ-១៩ តាមការណែនាំនេះ នឹងត្រូវទទួលទោស ដូចមានកំណត់ក្នុងច្បាប់ស្តីពី វិធានការទប់ស្កាត់ការឆ្លងរាលដាល នៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋានគតិយុត្តពាក់ព័ន្ធជាធរមាន៕