ដោយៈស៊ីវ ម៉េង
ភ្នំពេញៈ រាជធានីភ្នំពេញមានទីក្រុងរណបច្រើន ប៉ុន្តែយើងសូមលើកយកតែទីក្រុងចំនួន៧ប៉ុណ្ណោះ យកមកបង្ហាញខណៈទីក្រុងខ្លះបានប្តូរឈ្មោះ ប្តូរម្ចាស់ ប៉ុន្តែសកម្មភាពនៃការអភិវឌ្ឍទីក្រុងទាំងនោះកំពុងឆ្ពោះទៅមុខ និងខ្លះជាប់គាំង។
តើគម្រោងទីក្រុងរណបធំៗទាំង៨ ដែលអនុម័តដោយរាជរដ្ឋាភិបាលកម្ពុជាកំពុងដំណើរការដូចម្តេច និងក្រុងណាខ្លះបានប្តូរឈ្មោះ?
ទី១ ទីក្រុងរណប CAMKO
នេះជាម្ចាស់គម្រោងទីក្រុងរណបទី១នៅក្រុងភ្នំពេញ ស្ថិតនៅបឹងពោងងពាយ ជាតំបន់លិចទឹក ដែលបានចាក់ខ្សាច់បំពេញ ប៉ុន្តែរហូតមកទល់ពេលនេះតំបន់នេះបានក្លាយជាមជ្ឈមណ្ឌលពាណិជ្ជកម្មកណ្តាលក្រុងទៅវិញ។
CAMKO CITY ដែលបានវិនិយោគក្រុមហ៊ុន WORLD CITY របស់ប្រទេសកូរ៉េខាងត្បូង គ្រោងវិនិយោគប្រមាណ២ពាន់លានដុល្លារអាមេរិក មានផ្ទៃក្រឡាសាងសង់១១៩ហិកតា ស្ថិតនៅក្នុងតំបន់អភិវឌ្ឍន៍ បឹងពោងពាយ ខណ្ឌឫស្សីកែវ ខាងជើងរាជធានីភ្នំពេញ។
ប៉ុន្តែគួរឲ្យសោកស្តាយរហូតមកទល់ពេលនេះទីក្រុង CAMKO CITY បានជាប់គាំង ដោយសារជម្លោះ។
ទី២ ទីក្រុង Grand International City
វាជាគំរោងទីក្រុងរណបដំបូងគេ ដែលបានប្តូរម្ចាស់ បន្ទាប់ពីលោកឧបនាយករដ្ឋមន្ត្រីកែ គឹមយ៉ាន ប្រធានក្រុមប្រឹក្សាភិបាលក្រុមហ៊ុន Cambodia YNP និងដៃគូវិនិយោគជនជាតិឥណ្ឌូនេស៊ី បានលក់ជូនក្រុមហ៊ុនជីប ម៉ុងគ្រុប។
តម្លៃគម្រោងចុះបញ្ជីទុនវិនិយោគដំបូង៦០០លានដុល្លារអាមេរិក និងមានផ្ទៃក្រឡាសាងសង់២៦០ហិកតា ស្ថិតនៅសង្កាត់ឃ្មួញ ខណ្ឌឫស្សីកែវ ខាងជើងរាជធានីភ្នំពេញ។
រហូតមកដល់ពេលនេះ ទីក្រុងរណបហ្គ្រេនភ្នំពេញ បានអភិវឌ្ឍសាងសង់ជាច្រើនដូចជា លំនៅដ្ឋាន វីឡា ផ្ទះល្វែង សួនទឹក ទីលានវាយកូនហ្គោល ដែលគម្រោងនីមួយៗ ចំណាយទឹកប្រាក់រាប់រយលានដុល្លារអាមេរិក។
ទី៣ ទីក្រុងរណបកោះពេជ្រ
វាជាទីក្រុងដែលមានការអភិវឌ្ឍលឿនជាងគេ និងបច្ចុប្បន្នក្លាយជាបណ្តុំលំនៅដ្ឋានសម្រាប់អភិជន មជ្ឈមណ្ឌលពាណិជ្ជកម្ម អាគារសហកម្មសិទ្ឋជាដើម។
ក្រុមហ៊ុនវិនិយោគគំរោងនេះ គឺក្រុមហ៊ុន OCIC ដែលមាន អ្នកឧកញ៉ា ពុង ឃាវសែ ជាប្រធានក្រុមប្រឹក្សាភិបាល។
តម្លៃគម្រោងចុះបញ្ជីទុនវិនិយោគ១ពាន់លានដុល្លារអាមេរិក ផ្ទៃក្រឡាសាងសង់ជិត១០០ហិកតា ស្ថិតនៅតាមបណ្តោយទន្លេបាសាក់ សង្កាត់ទន្លេបាសាក់ ខណ្ឌចម្ការមន រាជធានីភ្នំពេញ។
បើតាមលោកទូច សំណា ងអគ្គនាយករងក្រុមហ៊ុន OCIC បានមានប្រសាសន៍ឲ្យដឹងថា បច្ចុប្បន្នផ្ទៃដីលើទីក្រុងកោះពេជ្រទាំងមូល ទើបប្រើប្រាស់បានអស់៥០ភាគរយប៉ុណ្ណោះ ខណៈសំណង់អាគារមជ្ឈមណ្ឌលពាណិជ្ជកម្មជាច្រើនទៀត នឹងសាងសង់នៅលើទីក្រុងនេះ។
ទី៤ ទីក្រុងរណប Phnom Penh City Center
ជាអតីតបឹង ដែលមានទំហំធំជាងគេនៅកណ្តាលរាជធានីភ្នំពេញ Phnom Penh City Center បាននិងកំពុងក្លាយជាមជ្ឈមណ្ឌលពាណិជ្ជកម្មយ៉ាងរសរវើក ជាមួយនឹងផ្សារបែបសហគមន៍ សាលពិព៌ណរថយន្ត អាគារខុនដូ និងលំនៅដ្ឋានលេចឡើងយ៉ាងស្រស់បំព្រង ដែលធ្វើឲ្យរាជធានីភ្នំពេញ ក្លាយជាមជ្ឈមណ្ឌលពាណិជ្ជកម្ម និងហិរញ្ញវត្ថុក្នុងកម្រិតស្តង់ដាជាងមុន។
Phnom Penh City Center ជាកម្មសិទ្ឋរបស់លោកឧកញ៉ា ឡៅ ម៉េងឃិន ប្រធានក្រុមប្រឹក្សាភិបាលក្រុមហ៊ុន ស៊ូកាគូអ៊ីន តម្លៃគម្រោងចុះបញ្ជីទុនវិនិយោគ១៥០០លានដុល្លារអាមេរិក ដែលមានផ្ទៃក្រឡាសាងសង់១១៤ហិកតា។
ទី៥ ទីក្រុងរណបជ្រោយចង្វារ “ទីក្រុងនៃអនាគត”
ក្រុមហ៊ុន OCIC ជាក្រុមហ៊ុនលំដាប់យក្សក្នុងស្រុក ដែលបាននិងកំពុងវិនិយោគទីក្រុងរណបនេះផងដែរ ដោយទំហំទុនវិនិយោគនឹងកើនដល់៦០០០លានដុល្លារអាមេរិក នាពេលអនាគត។
អ្នកអភិវឌ្ឍន៍គម្រោងនេះ ជាអ្នកឧកញ៉ា ពុង ឃាវសែ នៃប្រធានក្រុមប្រឹក្សាភិបាល ក្រុមហ៊ុនបណ្តាក់ទុនវិនិយោគកម្ពុជាក្រៅប្រទេស។
គំរោងនេះមានទំហំជាង១០០ហិកតា ស្ថិតនៅសង្កាត់ទន្លេជ្រោយចង្វារ ខណ្ឌឫស្សីកែវ រាជធានីភ្នំពេញ។
ទីក្រុងរណបនេះ កំពុងដំណើរការទៅមុខយ៉ាងរលូន ក្នុងគម្រោងប្លង់មេ និងមានការសាងសង់អគារពាណិជ្ជកម្មធំៗ ផ្សារទំនើប លំនៅដ្ឋានប្រណីតៗ អគារស្នាក់នៅរួម និង កន្លែងកំសាន្តផ្សេងៗទៀត។ តាមការប៉ាន់ស្មាន នឹងបពា្ចប់គម្រោងសាងសង់ក្នុងឆ្នាំ២០២៦ ។
លោកទូច សំណាង អគ្គនាយករងក្រុមហ៊ុន OCIC ធ្លាប់បានមានប្រសាសន៍ឲ្យដឹងថា ទីក្រុងរណបនេះ មានទស្សនទានអភិវឌ្ឍន៍ជាទីក្រុងឆ្លាតវៃ ដោយក្រុមហ៊ុនបានរៀបចំនូវប្រព័ន្ឋបណ្តាញអគ្គិសនី បណ្តាញហេដ្ឋារចនាសម្ព័ន្ឋក្រោមដី នឹងមានការបែងចែករវាងទឹកភ្លៀង និងទឹកស្អូយដាច់ពីគ្នា។
បច្ចុប្បន្នស្ពានយោងដោយខ្សែកាបមួយ នឹងសាងសង់តភ្ជាប់ពីផ្លូវជាតិលេខ៥ ទៅកាន់ទីក្រុងរណប ដែលកំពុងរីកចម្រើននេះ។
លោកទូច សំណាងបានឲ្យដឹងថា ការអភិវឌ្ឍទីក្រុងជ្រោយចង្វារ នឹងធ្វើឡើងជាតំបន់ពាណិជ្ជកម្ម លំនៅដ្ឋាន ដែលមានភាពស្រដៀងគ្នានឹងតំបន់ពាណិជ្ជកម្មលើមហាវិថីព្រះមុនីវង្ស។
ទី៦ ទីក្រុងរណបតេជោមរកត
វាជាទីក្រុងថ្មីមួយ ដែលមានហេដ្ឋារចនាសម្ព័ន្ឋធំៗជាច្រើនតភ្ជាប់ គឺផ្លូវជាតិលេខ៥ និងផ្លូវជាតិលេខ៦អា ដែលបច្ចុប្បន្នគំរោងនេះបាននិងកំពុងមានសន្ទុះរីកចម្រើនបណ្តើរៗ តាមរយៈការសាងសង់វិមានឈ្នះ ឈ្នះ ការសាងសង់ពហុកីឡាដ្ឋានមរតកតេជោ ការបញ្ចប់នូវសួនសត្វសាហ្វារី វើលដ៏ និងសួនទឹកដ៏ធំ ដែលជាប់លំដាប់ថ្នាក់ទី២ក្នុងតំបន់អាស៊ាន។
អ្នកឧកញ៉ា លី យ៉ុងផាត់ ប្រធានក្រុមប្រឹក្សាភិបាលនៃ ក្រុមហ៊ុន LYP Group ជាអ្នកអភិវឌ្ឍន៍គម្រោងនេះ ដែលតម្លៃគម្រោងចុះបញ្ជីទុនដំបូង មានទំហំ១៥០០លានដុល្លារអាមេរិកផ្ទៃក្រឡាសាងសង់ជាង១០០០ហិកតា ស្ថិតនៅសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
ទី៧ ទីក្រុងរណប ING City
វាជាទីក្រុងរណបដំបូងគេ ដែលបានប្រែក្លាយសក្តានុពល នៅភាគខាងត្បូងរាជធានីភ្នំពេញ ដែលទីក្រុងរណបនេះកំពុងមានការរីកចម្រើនយ៉ាងលឿន ដោយបច្ចុប្បន្នមានបុរីលំនៅដ្ឋានជាច្រើន រួមនឹងផ្សារទំនើបលំដាប់អន្តរជាតិដូចជា AEON Mall3 ផ្សារទំនើបជីប ម៉ុង ផ្សារទំនើប Peng Huoth Diamond និងគំរោងលំនៅដ្ឋានសហកម្មសិទ្ឋជាច្រើន។
អ្នកអភិវឌ្ឍន៍គំរោងនេះ គឺលោកឧកញ៉ា អ៊ឹង ប៊ុនហ៊ូវ ប្រធានក្រុមប្រឹក្សាភិបាលនៃក្រុមហ៊ុន ING HOLDINGS។ តម្លៃគម្រោងចុះបញ្ជីទុនវិនិយោគ ២ពាន់លានដុល្លារអាមេរិកផ្ទៃក្រឡាសាងសង់២៥៧២ហិកតា ស្ថិតនៅក្នុងខណ្ឌមានជ័យ ខណ្ឌដង្កោ។
គំរោងទីក្រុងរណបធំជាងគេនេះ អភិវឌ្ឍន៍ឡើងលើតំបន់ ដែលស្ថិតក្នុងបឹងធម្មជាតិចំនួនពីរ គឺបឹងទំពុន និងបឹងជើងឯក ក្នុងរាជធានីភ្នំពេញ។
ក្រុមហ៊ុនបានសាងសង់ប្រព័ន្ធហេដ្ឋារចនាសម្ព័ន្ធផ្លូវថ្នល់ ក្រវាត់ទីក្រុងរណបនេះ ដូចជា ផ្លូវ៦០ម៉ែត្រឬមហាវិធីសម្តេចតេជោហ៊ុន សែន មហាវិថីសម្តេចហ៊ុន នាង និងមហាវិថីធំៗជាច្រើនទៀត។
អ្នកជំនាញអន្តរជាតិបានលើកឡើងថា ពួកគេមានសុទិដ្ឋិនិយមថា តំបន់នេះនឹងក្លាយជាមជ្ឈមណ្ធលពាណិជ្ជកម្មធំជាងគេ និងរសរវើកជាងគេនាពេលអនាគតដោយសារវាជាតំបន់ថ្មី ដែលផ្តល់ភាពងាយស្រួលក្នុងការរៀបចំហេដ្ឋារចនាសម្ព័ន្ឋនានា។
ទី៨ ទីក្រុងរណបកោះនរា
ទីក្រុងរណបនេះ ក៏បាននិងកំពុងអភិវឌ្ឍន៍ដោយក្រុមហ៊ុន OCIC ផងដែរ ដែលបច្ចុប្បន្នទីក្រុងនេះ មិនទាន់លេចចេញជារូបរាងច្បាស់នៅឡើយទេ ដោយសារក្រុមហ៊ុនកំពុងរៀបចំហេដ្ឋារចនាសម្ព័ន្ឋ តាមរយៈការចាក់ថ្ម ចាក់ខ្សាច់បំពេញ ដែលគ្រាន់តែការចំណាយប្រាក់លើហេដ្ឋារចនាសម្ព័ន្ឋទាំងនេះ ចំណាយប្រាក់អស់ប្រមាណ២០០០លានដុល្លារអាមេរិក។
បច្ចុប្បន្នស្ពានដ៏ស្រស់ស្អាតមួយ តភ្ជាប់រវាងទីក្រុងកោះពេជ្រ និងទីក្រុងកោះនរាបាននិងកំពុងសាងសង់យ៉ាងសកម្ម ខណៈការរៀបចំហេដ្ឋារចនាសម្ព័ន្ឋទីក្រុងទាំងមូលនឹងបញ្ចប់នៅឆ្នាំ២០២៣ខាងមុខនេះ។
បើតាមលោកទូច សំណាង អគ្គនាយករងក្រុមហ៊ុន OCIC បានមានប្រសាសន៍ឲ្យដឹងកាលពីពេលថ្មីៗនេះថា ទីក្រុងរណប ដែលមានផ្ទៃដី១២៥ហិកតានេះ មានទស្សនទានអភិវឌ្ឍន៍ស្រដៀងគ្នានឹងទីក្រុងកោះពេជ្រ។
លោកបន្តថា “បច្ចុប្បន្នម្ចាស់ដីមួយចំនួន ដែលស្ថិតនៅក្បាលកោះទល់មុខនឹងទីក្រុងកោះពេជ្រ អាចសាងសង់គម្រោងរបស់ពួកគេបានបណ្តើរៗហើយ ដោយសារការចាក់ដីបំពេញបានបញ្ចប់” ។ លោកបន្តថា “នៅខែមិថុនាខាងមុខនេះ ក្រុមហ៊ុននឹងប្រកាសគំរោងធំមួយ ដែលនឹងសាងសង់លើទីក្រុងនេះ ប៉ុន្តែទោះជាយ៉ាងណាលោកមិនទាន់បង្ហើបឲ្យដឹងពីគម្រោងនេះនៅឡើយទេ” ៕
