ការផលិតវ៉ាក់សាំងបង្ការជំងឺកូវីដបង្ហាញសញ្ញាវិជ្ជមាន ស្របពេលប្រធានអង្គការសុខភាពពិភពលោកអំពាវនាវ

ដោយៈគង់ ម៉ាលីន

ភ្នំពេញៈ ការផលិតវ៉ាក់សាំងបង្ហាញសញ្ញាវិជ្ជមាន ដោយអាមេរិកបានអនុម័តឲ្យប្រើប្រាស់វ៉ាក់សាំងរបស់ក្រុមហ៊ុន Pfizer-BioNTech អាចចាក់ជូនកុមារចន្លោះពី១២ដល់១៥ឆ្នាំ ស្របពេលប្រធានអង្គការសុខភាពពិភពលោក ស្នើឲ្យមានកិច្ចសហការលើការចែកចាយវ៉ាក់សាំង។

កាលពីថ្ងៃចន្ទសប្តាហ៍នេះ (ពេលវេលានៅវ៉ាស៊ីនតោន) រដ្ឋបាលឱសថ និងចំណីអាហារ (FDA) នៃសហរដ្ឋអាមេរិក បានអនុម័តឲ្យប្រើវ៉ាក់សាំងបង្ការ COVID-19 របស់ក្រុមហ៊ុន Pfizer-BioNTech ទៅលើក្មេងៗវ័យជំទង់អាយុចន្លោះពី ១២-១៥ឆ្នាំ បន្ទាប់ពីក្រុមហ៊ុននេះបានដាក់ពាក្យស្នើសុំ អស់ប៉ុន្មានសប្តាហ៍មកហើយ។ នេះបើតាមការចេញផ្សាយដោយសារព័ត៌មាន CNA នាព្រឹកថ្ងៃអង្គារ ទី១១ ខែឧសភា ឆ្នាំ២០២១។

ការអនុម័តខាងលើនេះត្រូវបានគេមើលឃើញថា នឹងជួយជំរុញការចាក់វ៉ាក់សាំង នៅទូទាំងសហរដ្ឋអាមេរិក ឲ្យមានសន្ទុះកើនឡើងវិញ ខណៈជាងមួយសប្តាហ៍ចុងក្រោយនេះ អត្រានៃការចាក់វ៉ាក់សាំងប្រចាំថ្ងៃ បានធ្លាក់ចុះជាលំដាប់។ ការចាក់វ៉ាក់សាំងទៅដល់ក្មេងជំទង់អាយុពី ១២-១៥ឆ្នាំ ក៏ស្របទៅនឹងផែនការរបស់សហរដ្ឋអាមេរិក ដើម្បីឲ្យក្មេងៗអាចត្រលប់ទៅរៀនវិញដោយសុវត្ថិភាព នៅឆ្នាំក្រោយនេះផងដែរ។

ស្របពេលបញ្ហាប្រឈមនៃការប្រកួតប្រជែងគ្នា ក្នុងការចែកចាយ និងដណ្តើមវ៉ាក់សាំងគ្នា ប្រមុខអង្គការសុខភាពពិភពលោក WHO នៅថ្ងៃចន្ទសប្តាហ៍នេះបានថ្លែងថា ជំនួសឲ្យការប្រកួតប្រជែង និងប្រឈមមុខគ្នា កិច្ចសហប្រតិបត្តិការអន្តរជាតិ គឺជាជម្រើសតែមួយគត់ដើម្បីឈានទៅបញ្ចប់ វិបត្តិជំងឺរាតត្បាតសកល COVID-19។

អគ្គនាយកអង្គការ WHO លោក Tedros Adhanom Ghebreyesus បានថ្លែងដូចខាងលើ ពេលនិយាយពាក់ព័ន្ធនឹងភាពខុសគ្នាខ្លាំង នៃការទទួលបានវ៉ាក់សាំងបង្ការជំងឺ COVID-19 នៅជុំវិញពិភពលោក។ លោក Tedros បានសង្កត់ធ្ងន់ថា “កម្រិតខុសគ្នាដ៏គួរ ឲ្យភ្ញាក់ផ្អើលនេះ នៅតែបន្តជាហានិភ័យធំបំផុតមួយ ចំពោះការឆ្ពោះទៅបញ្ចប់វិបត្តិ COVID-19 ហើយលោកជឿថាកិច្ចសហប្រតិបត្តិការ ជាជម្រើសតែមួយគត់ ដើម្បីសម្រេចបានគោលដៅនេះ”។

បើយោងតាមទិន្នន័យរបស់ WHO ប្រទេសចំណូលមធ្យមកម្រិតខ្ពស់ និងប្រទេសចំណូលខ្ពស់ ដែលស្មើនឹង៥៣ភាគរយនៃ ចំនួនប្រជាជនសរុបនៅលើផែនដី ទទួលបានវ៉ាក់សាំង៨៣ភាគរយ នៃវ៉ាក់សាំង COVID-19 ដែលមាននៅលើពិភពលោក ខណៈប្រទេសចំណូលមធ្យមកម្រិតទាប និងប្រទេសចំណូលទាប ដែលស្មើនឹង៤៧ភាគរយនៃចំនួនប្រជាជនសរុបលើផែនដី ទទួលបានវ៉ាក់សាំងត្រឹមតែ១៧ភាគរយប៉ុណ្ណោះ៕

គំរោងសួនបណ្តុំសហគ្រាសធុនតូចនិងមធ្យមតម្លៃ៣០លានដុល្លារទទួលបាន ការចាប់អារម្មណ៍ច្រើន

ដោយៈគង់ សូរិយា

ភ្នំពេញៈ គម្រោងសួនបណ្តុំសហគ្រាសធុនតូច និងមធ្យម (Worldbridge I4.0 SME Cluster) មានតម្លៃប្រហែល៣០លានដុល្លារ របស់ក្រុមហ៊ុនWorld Bridge Industrial Developmentកំពូងទទួលបានការចាប់អារម្មណ៍ច្រើន។

សួនបណ្តុំសហគ្រាសធុនតូច និងមធ្យមនេះ ត្រូវបានសាងសង់លើផ្ទៃដីសរុប៦ហិកតា ក្នុងសង្កាត់រកាខ្ពស់ក្រុងតាខ្មៅ ខេត្តកណ្តាល ទល់មុខនឹងគម្រោងអភិវឌ្ឍន៍លំនៅឋានតម្លៃសមរម្យ «ទីក្រុងរណបសិរីមង្គល» របស់ក្រុមហ៊ុន Worldbridge Homes Co.,Ltd ដែលជាក្រុមហ៊ុនបុត្រសម្ព័ន្ធរបស់ Worldbridge Group។

អ្នកឧកញ៉ាសៀ ឫទ្ធី ប្រធានក្រុមប្រឹក្សាភិបាលនៃសម្ព័ន្ធក្រុមហ៊ុន វើលដ៍ ប្រ៊ីដ អ៊ិនដាសស្ទ្រៀល ឌីវេឡុបមិន ឯ.ក Worldbrigde Industrial Development Co.,Ltd)បានឲ្យដឹងថា សព្វថ្ងៃគម្រោងនេះដំណើរសាងសង់ជាធម្មតា ប៉ុន្តែអាចនឹងយឺតពេលជាងផែនការគ្រោងទុក។

លោកបន្តថា “យើងកំពុងដំណើរការសាងសង់ ប៉ុន្តែអាចយឺតពេល១ ទៅ២ខែ យើងឃើញថា មានសហគ្រាសធុនតូច និងមធ្យមជាច្រើនបានចាប់អារម្មណ៍ លើបណ្តុំសហគ្រាសធុនតូច និងមធ្យមនេះ”។

សួនបណ្តុំសហគ្រាសធុនតូច និងមធ្យមនេះ ចែកចេញជា៧ផ្នែក រួមមានមជ្ឈមណ្ឌលសេវាកម្ម មជ្ឈមណ្ឌលទ្រទ្រង់គ្រឿងបរិក្ខារ ឧស្សាហកម្មចង្កោមសហគ្រាសធុនតូច និងមធ្យម ហេដ្ឋារចនាសម្ព័ន្ធ មជ្ឈមណ្ឌលភ័ស្តុភារកម្ម និងសេវាកម្ម ភាពងាយស្រួលក្នុងការប្រកបធុរកិច្ច ភាពងាយស្រួលដល់កម្មករក្នុងការប្រកបការងារ និងផ្តល់សេវាកម្មគាំទ្រដទៃទៀត។

ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា លោក តែ តាំងប៉ ប្រាប់ ភ្នំពេញ ប៉ុស្តិ៍ថា បណ្តុំសហគ្រាសធុនតូច និងមធ្យមនេះ គឺមានកម្រិតស្តង់ដាអន្តរជាតិដែលអាចភ្ជាប់ទំនាក់ទំនងជាមួយរោងចក្រ សហគ្រាសនៅក្រៅប្រទេស។

លោកនិយាយថា “ការបើកសួនឧស្សាហកម្មនេះ គឺស័ក្តិសមសម្រាប់សហគ្រាសធុនតូច និងមធ្យមដែលមានស្តង់ដាយើងគាំទ្រគម្រោងនេះ ដើម្បីចូលរួមចំណែកជំរុញសហគ្រាសធុនតូច និងមធ្យម”។លោកថ្លែងថា“យើងបង្កើតសួនឧស្សាហកម្មសហគ្រាសធុនតូច និងមធ្យមនេះ ដើម្បីជួយឧបត្ថម្ភគាំទ្រ និងតម្រង់ទិសពួកគាត់សម្រាប់នាំចេញទំនិញទៅទីផ្សារពិភពលោក”។

លោកចម ប្រសិទ្ធ ថ្លែងទៀតថា សួនឧស្សាហកម្មនេះ ពិតជាមានសារៈសំខាន់ណាស់សម្រាប់ពួកគេផលិតទំនិញនាំចេញ ដើម្បីបំពេញតម្រូវការទីផ្សារ។

លោកអះអាងថា “យើងកំពុងលើកទឹកចិត្តពួកគាត់ ឱ្យចាប់យកបច្ចេកវិទ្យាចុងក្រោយមកចូល នៅក្នុងបណ្តុំសួនឧស្សាហកម្មនេះ សម្រាប់ផលិតនាំចេញទៅតាមតម្រូវការទីផ្សារ”៕

រមណីយដ្ឋានកោះកុងក្រៅ មានសម្រស់ស្អាតដូចឋានសួគ៌

ដោយៈគង់ សូរិយា

កោះកុងៈ ស្ថិតនៅក្នុងភូមិកោះកាពិ ឃុំកោះកាំពិ ស្រុកកោះកុង ខេត្តកោះកុង មានចំងាយ៣០គ.ម ពីក្រុងខេមរភូមិន្ទ ភ្ញៀវទេសចរជាតិ អន្តរជាតិទាំងអស់អាចធ្វើដំណើរទៅកាន់តំបន់នេះបាន តាមរយៈផ្លូវទឹក ដោយចំណាយពេលប្រមាណ ៥០នាទី ទើបដល់កោះដ៏ធំមួយនេះ។

ជាមួយឆ្នេរខ្សាច់សក្បុរ និងសម្រស់ធម្មជាតិ កោះកុងក្រៅពិតជាមានឆ្នេរដ៏ស្រស់ស្អាត ទឹកសមុទ្រខៀវស្រងាត់គួរឲ្យចង់ងូតលេង ទស្សនាត្រជាក់ផ្នែក ពិសេសជាទីតាំងសំរាប់ការសម្រាកលំហែរដ៏សែនមនោរម្យ និងស្ងប់សុខ។

កោះកុងក្រៅមានផ្ទៃដីប្រមាណ៨០គីឡូម៉ែត្រការ៉េ និងកម្ពស់ប្រហែល៤១០ម៉ែត្រ ស្ថិតនៅលើផ្ទៃទឹកសមុទ្រដ៏ធំល្វឹងល្វើយ ដែលមានព៌ណខៀវស្រងាត់ ជាកោះដែលសម្បូរទៅដោយធនធានធម្មជាតិ សត្វព្រៃ មច្ឆា ផ្កាថ្ម និងជីវៈចម្រុះបាតសមុទ្រ មានឆ្នេរខ្សាច់ សម្រាប់កម្សាន្ត០៥ កន្លែង។ សព្វថ្ងៃតំបន់កោះកុងក្រៅនេះស្ថិតនៅក្រោមការគ្រប់គ្រងរបស់អង្គភាពយោធាជើងទឹកផ្នែកលំហសមុទ្រ៕

អាជ្ញាធរខេត្តកែបចាប់ផ្តើមចាត់វិធានការណ៍ក្តៅលើម្ចាស់គំរោងដែលទទួលបានសិទ្ឋ វិនិយោគ ប៉ុន្តែមិនបានធ្វើសកម្មភាព

ដោយៈគង់ សូរិយា

ភ្នំពេញៈ អាជ្ញាធរខេត្តកែបបាន និងកំពុងចាត់វិធានការដកហូតគំរោងអភិវឌ្ឍន៍មួយចំនួន ដែលទទួលបានសិទ្ឋវិនិយោគពីខេត្ត និងពីថ្នាក់ជាតិ ប៉ុន្តែមិនបានធ្វើសកម្មភាពអភិវឌ្ឍតាមផែនការរបស់ខ្លួន។

អភិបាលខេត្តកែប លោកសោម ពិសិដ្ឋបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី១១ ឧសភានេះថា អាជ្ញាធរខេត្តបានដកហូតគំរោងវិនិយោគ របស់ក្រុមហ៊ុនមួយចំនួនរួចហើយ ដែលគំរោងភាគច្រើនជាគំរោងអភិវឌ្ឍន៍ឆ្នេរ និងអចលនទ្រព្យរបស់រដ្ឋក្នុងខេត្ត ដោយសារម្ចាស់គំរោងទាំងនោះ មិនបានធ្វើសកម្មភាពអភិវឌ្ឍន៍តាមផែនការរបស់ខ្លួន។

លោកបន្តថា “យើងមិនអាចឲ្យអ្នកទទួលបានសិទ្ឋទាំងនោះ មិនធ្វើសកម្មភាពដេកដួលរមូល ផ្សំគ្រេចនោះទេ ព្រោះបើមិនធ្វើខេត្តជាអ្នកធ្វើ ដោយរកក្រុមហ៊ុនដៃគូមកវិនិយោគ”។លោកបន្តថា “ម្ចាស់គំរោងទាំងនោះ ក្រុមហ៊ុនឬបុគ្គលមួយចំនួនទទួលបានយូរហើយ តាំងពីមុខមានបញ្ហាជំងឺកូវីដ១៩ ប៉ុន្តែមិនបានធ្វើសកម្មភាពជាយូរមកហើយ”។

លោកសោម ពិសិដ្ឋបានបន្តថា គំរោងដែលអនុម័តដោយអាជ្ញាធរខេត្ត យើងនឹងធ្វើការដកហូតត្រឹមខេត្ត ប៉ុន្តែគំរោងដែលអនុម័តដោយក្រសួងឬថ្នាក់ជាតិ ខេត្តនឹងធ្វើសំណើរមកថ្នាក់ជាតិ ដើម្បីស្នើសុំដកហូតយកមកវិញ ដើម្បីរកដៃគូវិនិយោគផ្សេងៗទៀត ដើម្បីអភិវឌ្ឍន៍។

លោកបន្តថា បច្ចុប្បន្នខេត្តកែប កំពុងសហការជាមួយអាជ្ញាធរខេត្តកំពត ដោយដាក់ប៉ុស្ត៍ត្រួតពិនិត្យនៅព្រំប្រទល់ខេត្តទាំងពីរ ដើម្បីអនុវត្តន៍តាមវិធានការណ៍ដាក់ចេញដោយក្រសួងសុខាភិបាល ដោយអនុវត្តន៍ការឆែកសុខភាព វាស់កំដៅ និងបាញ់អាកុលលាងដៃជាដើម ពិសេសបើមានករណីសង្ស័យខេត្ត នឹងអនុវត្តន៍តាមការណែនាំរបស់ក្រសួង ដោយធ្វើចត្តាឡីស័ក ខណៈខេត្តមិនទាន់មានការឆ្លងរាលដាល ក្នុងសហគមន៍នៅឡើយ ហើយករណីរកឃើញក្នុងខេត្តចំនួន១២ករណីកន្លងមក គឺជាករណីនាំចូលពីក្រៅ។

លោកបន្តថា “ក្នុងស្ថានភាពនេះ ខេត្តមិនទាន់ចង់បានភ្ញៀវទេសចរណ៍ច្រើននៅឡើយទេ ដោយសារយើងគិតដល់អាយុជីវិតរបស់ប្រជាពលរដ្ឋ និងសុខមាលភាពរបស់ប្រជាពលរដ្ឋក្នុងមូលដ្ឋាន ខណៈបច្ចុប្បន្នការឆ្លងក្នុងសហគមន៍នៅតាមរាជធានី ខេត្តជាច្រើនកំពុងបន្ត ដែលវាជាការបារម្ភផងដែរ៕

រោងចក្រអគ្គិសនីដែលមានថាមពលជិត២០០០មេហ្កាវ៉ាត់កំពុងពន្លឿនការសាងសង់ ដើម្បីឆ្លើយតបតម្រូវការ

ដោយៈ គង់ ម៉ាលីនណា

ភ្នំពេញៈ មន្រ្តីជាន់ខ្ពស់នៃក្រសួងរ៉ែ និងថាមពលបានបញ្ជាក់ថា ការអភិវឌ្ឍន៍វិស័យអគ្គិសនីនៅក្នុងអណត្តិនេះ កម្ពុជាកំពុងអភិវឌ្ឍន៍វិស័យអគ្គិសនីធំៗចំនួន៥កន្លែង ដែលមានអនុភាពថាមពលសរុប១៩៧៥មេហ្កាវ៉ាត់ ដើម្បីឆ្លើយតបកំណើនតម្រូវការនៅកម្ពុជា។

ក្រោយពីសាងសង់រួច គម្រោងទាំងនេះនឹងដាក់ចូលក្នុងបណ្តាញជាតិឲ្យប្រើប្រាស់ជាផ្លូវការជាបន្តបន្ទាប់ ដើម្បីឆ្លើយតបតាមតម្រូវការនៃការរីកចម្រើននៅកម្ពុជា។

លោកវិចទ័រ ហ្សូនា អគ្គនាយកនៃអគ្គនាយកដ្ឋានថាមពល នៃក្រសួងរ៉ែ និងថាមពលបានមានប្រសាសន៍ឲ្យដឹង កាលពីថ្ងៃទី១០ ខែឧសភា ឆ្នាំ ២០២១កន្លងមកថា ការអភិវឌ្ឍន៍វិស័យអគ្គិសនីធំៗចំនួន៥កន្លែង ក្នុងនោះគឺមានក្រុមហ៊ុនចំនួន២បានចូលរួម រួមមានក្រុមហ៊ុន Cambodian Tatay Hydropower ដែលកំពុងសាងសង់គម្រោងតាតៃ (ខេត្តកោះកុង) លើមានអនុភាព១៥០មេហ្គាវ៉ាត់ ក្រោយសាងសង់រួច និងដាក់បញ្ចូលបណ្តាញជាតិនៅឆ្នាំ២០២៣។

រីឯគម្រោងវារីអគ្គិសនីស្ទឹងពោធិ៍សាត់១ កំពុងចាប់ផ្តើមសាងសង់ដោយក្រុមហ៊ុន SPHS Cambodia Co. Ltd., ដោយមានអនុភាព៨០មេហ្គាវ៉ាត ក្រោយសាងសង់រួច គឺគ្រោងដាក់បញ្ចូល ក្នុងបណ្តាញជាតិនៅឆ្នាំ២០២៦ខាងមុខ។

លោកបន្តថា ចំពោះរោងចក្រក្រៅពីវារីអគ្គិសនី កម្ពុជាមានរោងចក្រអគ្គិសនីដុតធ្យូងថ្មចំនួន ៣ផ្សេងៗទៀត ក្នុងនោះក្រុមហ៊ុន China Huadain មានអនុភាព៧០០មេហ្គាវ៉ាត កំពុងសាងសង់ហើយក្រោយពីសាងសង់រួច គ្រោងភ្ជាប់ចូលបណ្តាញជាតិនៅឆ្នាំ២០២២ មួយលើកនិងឆ្នាំ២០២៣បន្ថែមទៀត។

ចំណែកគម្រោងក្រុមហ៊ុនរ៉ូយ៉ាល់គ្រុប មានអនុភាព៧០០មេហ្គាវ៉ាត នៅបុទុមសាគរ គ្រោងភ្ជាប់ចូលបណ្តាញជាតិនៅឆ្នាំ២០២៤ចំនួន៣៥០មេហ្គាវ៉ាត និងនៅឆ្នាំ២០២៥ ចំនួន៣៥០មេហ្គាវ៉ាត។ ដោយឡែក ក្រុមហ៊ុនផ្សេងមួយទៀត គឺមានអនុភាព៧០០មេ ហ្គាវ៉ាត ដោយគ្រោងភ្ជាប់ចូលបណ្តាញជាតិចំនួន២លើកផងដែរ គឺនៅឆ្នាំ២០២២ និង ២០២៣ខាងមុខ។

លោកវិកទ័រ ហ្សូនាបានបន្តថា ក្រៅពីការអភិវឌ្ឍន៍វិស័យថាមពលធំៗខាងលើ នៅក្នុងដំណាក់កាលនេះដែរ កម្ពុជានៅមានគម្រោងសាងសង់ថាមពល ពីសូឡាចំនួន២ផ្សេងទៀត ក្នុងនោះក្រុមហ៊ុន Prime Road មានអនុភាព៦០មេហ្គាវ៉ាត និងគម្រោងសាងសង់របស់ក្រុមហ៊ុន Green Sustainable Ventrue ចំនួន២០មេហ្គាវ៉ាត ដោយគ្រោងភ្ជាប់ចូលបណ្តាញជាតិនៅចុងឆ្នាំ២០២១នេះ។

លោកបានបន្ថែមថា “ក្រសួងរ៉ែ និងថាមពល គឺមានផែនការដាក់ចូលបណ្តាញជាតិជាបន្តបន្ទាប់ ដើម្បីជម្រុញឲ្យស្របទៅតាមផែនការអភិវឌ្ឍន៍ថាមពល និងការរីកច្រើននៅកម្ពុជាផងដែរ”។

កាលពីពេលកន្លងទៅនេះ លោក ស៊ុយ សែម រដ្ឋមន្រ្តីក្រសួងរ៉ែ និងថាមពល បានលើកឡើងថា ការផ្គត់ផ្គង់អគ្គិសនី ក្នុងនៅកម្ពុជាមានទំហំសរុបជាង៣ពាន់មេហ្គាវ៉ាត់ ក្នុងនោះការជួបបញ្ហាប្រឈមនៃវិបត្តិកូវីដ១៩ ការប្រើប្រាស់អគ្គិសនីបានធ្លាក់ចុះយ៉ាងខ្លាំង ជាពិសេសនៅពេលយប់ចំនួន នៃការប្រើប្រាស់អគ្គិសនីបានបន្តធ្លាក់ចុះកាន់តែទាប ដែលបញ្ហាទាំងនេះ ជាកក្តាធ្វើឲ្យចំណូលពីការលក់អគ្គសនីបានធ្លាក់ចុះ៕

ដំណឹងល្អៈអាជ្ញាធររាជធានីនឹងបង្រួមតំបន់បិទខ្ទប់ឱ្យមកនៅរួមតូចបំផុតដើម្បីសម្រួលការលំបាកជូនប្រជាពលរដ្ឋ

ដោយៈវឌ្ឈនៈ

ភ្នំពេញៈ ដើម្បីសម្រួលដល់ការរស់នៅ និងប្រកបអាជីវកម្មរបស់ពលរដ្ឋ ក្នុងរាជធានីភ្នំពេញ អាជ្ញាធរបានប្រជុំនិងកំណត់តំបន់បិទខ្ទប់ឱ្យនៅតូចបំផុត និងអាចអនុញ្ញាតឱ្យបងប្អូនប្រជាពលរដ្ឋ ធ្វើដំណើរចេញចូលប្រកបអាជីវកម្ម និងធ្វើការឡើងវិញបាន។

លោកឃួង ស្រេង អភិបាលរាជធានីផ្នំពេញ ក្នុងកិច្ចប្រជុំមួយកាលពីល្ងាចម្សិលមិញបានឱ្យដឹងថា ដើម្បីឱ្យការងារនៃការបង្រួមតំបន់បិទខ្ទប់ អោយនៅរួមតូច មានប្រសិទ្ធ ភាព មានលក្ខណៈគ្រប់ជ្រុងជ្រោយ ដែលអាចសង្ឃឹមបានថា មិនមានហានិភ័យ នៃការរីករាលដាលជំងឺកូវីដ-១៩បន្តទៀត តំបន់ដែលបិទខ្ទប់ត្រូវតែរួមតូច និងអាចធានាបាននូវការឆ្លងរាលដាលបន្ថែមទៀត ហើយវិធានការនេះ នឹងចាប់ផ្ដើមអនុវត្តន៍នៅថ្ងៃទី១២ ឧសភាតទៅ។

លោកបានធ្វើការណែនាំអោយអាជ្ញាធរខណ្ឌទាំង១៤ ត្រូវយកចិត្តទុកដាក់អោយបានម៉ត់ចត់បំផុត គឺមិនអនុញ្ញាតឱ្យមានករណីប្រជាពលរដ្ឋ នៅតំបន់លឿងចូលទៅ តំបន់លឿងទុំ និងតំបន់ក្រម ជាដាច់ខាត ហើយកិច្ចប្រជុំនេះពិភាក្សាគ្នា ដើម្បីកំណត់ទីតាំងតំបន់ប្រឈមនោះមកនៅរួមតូច ដូច្នេះសុំអាជ្ញាធរសិក្សាកំណត់ឱ្យបានច្បាស់ មុននៃការកំណត់ពណ៌ តំបន់នីមួយៗឱ្យនៅរួមតូចនេះ នៅថ្ងៃស្អែកនេះ។

កាលពីថ្ងៃទី០៦ ឧសភា ២០២១កន្លងទៅ រដ្ឋាភិបាលប្រកាសបញ្ចប់ ការបិទខ្ទប់រាជធានីភ្នំពេញ និងក្រុងតាខ្មៅនៃខេត្តកណ្ដាល តែត្រូវបែងចែកតំបន់ជាបី រួមមានតំបន់ពណ៌លឿង តំបន់ពណ៌លឿងទុំ និងតំបន់ពណ៌ ក្រហម ដែលតំបន់ពណ៌ក្រហមគឺនៅរក្សាការអនុវត្តបិទខ្ទប់ដដែល ព្រោះជាតំបន់ដែលមានការប្រឈមនឹងការឆ្លងខ្ពស់៕

អ្នកជំនាញៈ ទីផ្សារខុនដូចាប់ផ្តើមមានសកម្មភាពឡើងវិញជាបណ្តើរៗឡើងវិញ

ដោយៈ ប៊ី

ភ្នំពេញៈ អ្នកជំនាញអះអាងថា ការទិញ លក់ខុនដូចាប់ផ្តើមមានសកម្មភាពឡើងវិញជាបណ្តើរៗ បន្ទាប់ការបញ្ចប់ការបិទខ្ទប់បានបើកចំហជាងមុន ដែលធ្វើប្រជាពលរដ្ឋអាចចេញដំណើរទៅធ្វើការងារ និងប្រកបអាជីវកម្មបានលើកលែងតែតំបន់មួយចំនួន។

អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ ERA Cambodia លោកខន គង្គា មានប្រសាសន៍នៅថ្ងៃទី១០ ខែឧសភា ឆ្នាំ២០២១នេះថា បន្ទាប់ការបញ្ចប់ការបិទខ្ទប់ ការទិញលក់ខុនដូចាប់ផ្តើមមានសកម្មភាពឡើងវិញជាបណ្តើរៗហើយ។

លោកបានថ្លែងថា “បើទោះបីអំឡុងការបិទខ្ទប់ភូមសាស្ត្រភ្នំពេញ និងក្រុងតាខ្មៅ នៅតែមានអ្នកទិញ ឬវិនិយោគិនមួយៗធ្វើការកក់តាមអនឡាញ ប៉ុន្តែល្បឿននៃការកក់ ឬទិញមិនលឿនដូចការបើកចំហរនោះទេ”។ លោកបានថ្លែងបន្តថា “បន្ទាប់ការបញ្ចប់ការបិទខ្ទប់ ភ្ញៀវខ្ញុំផ្ទាល់តែម្តងចាប់ផ្តើមចេញមកចុះកុងត្រា និងបន្តកក់ជាបណ្តើរ”។

លោកបានបន្តថា អ្នកដែលមានធនធានល្អ ឬលំហូរសាច់ប្រាក់វិជ្ជមានគួរវិនិយោគលើខុនដូនាពេលនេះ គឺពេលល្អសម្រាប់វិនិយោគលើខុនដូ។

លោកគង្គាបានបញ្ជាក់ថា “វាមិនមានឱកាសណាល្អជាងពេលនេះទេ ដោយសារតែអំឡុងពេលកូវីដ១៩ តម្លៃខុនដូនៅតែរក្សាតម្លៃដើម ដោយមិនការឡើងថ្លៃ និងការបង់ប្រាក់ក៏មានការបត់បែន ហើយនាពេលតម្លៃខុនដូឡើងថ្លៃ ក្រោយកូវីដ១៩ ដែលនឹងផ្តល់ផលចំណេញដល់អ្នកវិនិយោគ”។

គម្រោងខុនដូថ្មីៗចំនួន៤ ត្រូវបានបញ្ចប់ការសាងសង់នៅត្រីមាសទី១ឆ្នាំនេះ ដោយចូលរួមចំណែកផ្គត់ផ្គង់ ក្នុងទីផ្សារខុនដូចំនួន៧៩៣យូនីត ខណៈការផ្គត់ផ្គង់ខុនដូរំពឹងថានឹងមានចំនួន១០.៨២៥យូនីត នៅក្នុងឆ្នាំ២០២១។ នេះបើយោងតាមរបាយការណ៍របស់ក្រុមហ៊ុន CBRE Cambodia។

លោកស្រីអាន សុធីតាអ្នកជំនាញឯករាជ្យមួយដែលមានបទពិសោធន៍ច្រើនឆ្នាំក្នុងវិស័យអចលនទ្រព្យ បានថ្លែងកាលពីថ្មីៗថា ទីផ្សារខុនដូ ត្រូវបានគេចាត់ថ្នាក់ជាផ្នែកលំនៅដ្ឋាន នៃវិស័យអចលនទ្រព្យ ដូច្នេះចំពោះផ្នែកលំនៅដ្ឋាន គឺមិនសូវជាមានការប៉ះពាល់ជាមួយកូវីដ១៩នេះទេ ប្រសិនបើប្រៀបធៀបជាមួយវិស័យផ្សេងៗ ដូចជាវិស័យបដិសណ្ឋារកិច្ច (សណ្ឋាគារ) និងវិស័យទីផ្សារលក់រាយ ក៏ប៉ុន្ដែវាក៏នៅតែទទួលរងផលប៉ះពាល់ដូចគ្នាផងដែរ។

លោកស្រីបន្ថែមថា “នៅប៉ុន្មានឆ្នាំចុងក្រោយនេះ ទីផ្សារខុនដូមានការផ្ដោតទាំងស្រុងទៅលើភ្ញៀវនៅក្នុងស្រុក ហើយទីផ្សារខុនដូមានការរីកចម្រើនលូតលាស់ ដោយសារអ្នកវិនិយោគក្នុងស្រុក មានបរិបទវិនិយោគដោយមើលឃើញពីកត្តា ដូចជា មានទីតាំងនៅកណ្ដាលក្រុង មានហេដ្ឋារចនាសម្ព័ន្ធគ្រប់គ្រាន់ និងតម្លៃក៏មានភាពសមរម្យ បើប្រៀបធៀបនឹងតម្លៃផ្ទះ នៅតំបន់ជាយក្រុង”។

បើទោះបីជាស្ថានភាពជំងឺកូវីដ១៩ មានការរីករាលដាលក៏ពិតមែន ចំពោះលោកស្រីមានការជឿជាក់ថា វ៉ាក់សាំងត្រូវបានចាក់ជាបណ្ដើរៗ នៅក្នុងប្រទេសកម្ពុជា ក៏ដូចជាបណ្ដាលប្រទេសផ្សេងទៀត ដូច្នេះទាំងអស់គ្នានឹងវិវត្តទៅរកភាពល្អប្រសើរឆាប់ៗ នៅរយៈពេល២ ទៅ៣ខែខាងមុខនេះ៕

សម្តេចតេជោបានបញ្ជាទិញវ៉ាក់សាំងកូវីដ១៩ចំនួន៥លានដូសបន្ថែមទៀត ដើម្បីចាក់ជូនប្រជាពលរដ្ឋ

ដោយៈ ប៊ី

ភ្នំពេញៈ លោកស្រីយក់ សម្បត្តិរដ្ឋលេខាធិការក្រសួងសុខាភិបាល បានបញ្ជាក់ជូនអ្នកសារព័ត៌មាននៅថ្ងៃទី១១ ខែឧសភានេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានបញ្ជាទិញ៥លានដូសបន្ថែមទៀត ដើម្បីចាក់ជូនប្រជាពលរដ្ឋការពារពីជំងឺកូវីដ១៩ ដោយឥតគិតថ្លៃ។

ជាមួយគ្នានេះដែរ លោកស្រី យក់ សម្បត្តិ បានបញ្ជាក់បន្ថែមថា វ៉ាក់សាំងបង្ការជំងឺកូវីដ១៩ ចំនួន១.៥លានដូសនេះ មាន៥០ម៉ឺនដូស នឹងមកដល់នៅថ្ងៃទី១៦ ខែឧសភា និង១លានដូសទៀត នឹងមកដល់នៅថ្ងៃទី២៣ ខែឧសភា ឆ្នាំ២០២១ ខណៈដែលវ៉ាក់សាំងចំនួន៥០ម៉ឺនដូសប្រភេទស៊ីណូវ៉ាក់ (Sinovac) ទើបនឹងត្រូវបានដឹកមកដល់ប្រទេ សកម្ពុជា នៅព្រឹកថ្ងៃទី១១ ខែឧសភានេះ។

លោកស្រីបានឱ្យដឹងទៀតថា “សម្តេចតេជោ ហ៊ុន សែន បានបញ្ជាទិញវ៉ាក់សាំងស៊ីណូវ៉ាក់ចំនួន៥លានដូសបន្ថែមទៀតផងដែរ ពីរដ្ឋាភិបាលចិន ដើម្បីយកមកចាក់ជូនប្រជាពលរដ្ឋឥតគិតថ្លៃ នៅក្នុងប្រទេសកម្ពុជា ក្នុងគោលបំណងបង្កើតភាពស៊ាំ ដើម្បីការ ពារការចម្លងមេរោគកូវីដ១៩”។

គិតចាប់ពីខែកុម្ភៈ ឆ្នាំ២០២១ រហូតមកដល់ពេលនេះ កម្ពុជាទទួលបានវ៉ាក់សាំងជាង ៤.៥លានដូសរួចមកហើយ រួមមាន៖ ស៊ីណូហ្វាមជំនួយរបស់រដ្ឋាភិបាលចិន១.៧លានដូស វ៉ាក់សាំងស៊ីណូវ៉ាក់ទិញពីចិន២.៥លានដូស (បូកជាមួយនឹងវ៉ាក់សាំងស៊ីណូវ៉ាក់មកដល់ថ្ងៃនេះ) និងវ៉ាក់សាំងអាស្ត្រាហ្សេនីកា៣២៤,០០០ដូស ជាជំនួយរបស់ខូវ៉ាក់ តាមរយៈអង្គការសុខភាពពិភពលោកផងដែរ។

តាម “ផែនការយុទ្ធសាស្ត្រយុទ្ធនាការជាតិ ចាក់វ៉ាក់សាំងបង្ការជំងឺកូវីដ-១៩ សំដៅបង្កើតឱ្យបាននូវភាពស៊ាំសង្គម-សេដ្ឋកិច្ចនៅកម្ពុជា ក្នុងឆ្នាំ២០២១” រាជរដ្ឋាភិបាលកម្ពុជា ដែលដឹកនាំដោយសម្តេចតេជោ ហ៊ុន សែន បានដាក់ចេញនូវផែនការស្វែងរកវ៉ាក់សាំងការពារជំងឺកូវីដ-១៩ ដើម្បីចាក់ជូនប្រជាពលរដ្ឋឱ្យរួចរាល់នៅឆ្នាំ២០២២ ខាងមុខនេះ។

តាមផែនការរៀបចំដោយរាជរដ្ឋាភិបាល បានបញ្ជាក់ថា នៅខែឧសភា ឆ្នាំ២០២១នេះ កម្ពុជាគ្រោងទទួលវ៉ាក់សាំង ៣លានដូស ខែមិថុនា នឹងទទួលបានវ៉ាក់សាំង៣លានដូស ខែកក្កដា នឹងទទួលបានវ៉ាក់សាំង១លានដូស ខែសីហា នឹងទទួលបានវ៉ាក់សាំង១លានដូស និងខែកញ្ញា នឹងទទួលបានវ៉ាក់សាំង១,៥លានដូស។

ដោយឡែក តាមការគ្រោងនេះដែរ នៅក្នុងឆ្នាំ២០២២ខាងមុខនេះ កម្ពុជានឹងទទួលបានវ៉ាក់សាំងចំនួន ១០,៤៣០,៦០០ដូស ផងដែរ។

កម្ពុជាបានក្លាយជាប្រទេសចំណាត់ថ្នាក់លេខ២ នៅអាស៊ាន បន្ទាប់ពីសិង្ហបុរី ជាប្រទេសចាក់វ៉ាក់សាំងបានលឿន និងបានច្រើនជូនប្រជាពលរដ្ឋ។ តាមរយៈវត្តមានវ៉ាក់សាំងនេះ នឹងជួយឱ្យកម្ពុជា អាចសម្រេចបាននូវផែនការចាក់វ៉ាក់សាំងរបស់ខ្លួន ដែលគ្រោងចាក់ពលរដ្ឋឱ្យបានជាង ១០លាននាក់ត្រឹមឆមាសទី១ ឆ្នាំ២០២២ ជាមួយការរំពឹងថា នឹងទទួលបានជោគជ័យក្នុងបេសកកម្មប្រយុទ្ធប្រឆាំងជំងឺកូវីដ១៩ ធ្វើឱ្យស្ថានភាពសេដ្ឋកិច្ចបានប្រសើរឡើងវិញ៕

សណ្ឋាគារលំដាប់អន្តរជាតិថ្មីមួយទៀតនឹងបង្ហាញរូបរាងនៅទីក្រុងភ្នំពេញនាឆ្នាំដើម២០២២

ដោយៈ ប៊ី

ភ្នំពេញៈ សណ្ឋាគារលំដាប់អន្តរជាតិមួយទៀត ដែលវិនិយោគដោយក្រុមហ៊ុន Autograph Collection Hotels ដែលជាក្រុមហ៊ុនបុត្រសម្ព័ន្ធក្រុមហ៊ុន Marriott International ដែលមានសណ្ឋាគារជាង១៧០នៅជុំវិញពិភពលោក បង្ហាញរូបរាងនៅក្រុងភ្នំពេញនាឆ្នាំដើមឆ្នាំ២០២២ ។

ក្រុមហ៊ុន Autograph Collection Hotels បានចុះហត្ថលេខាជាមួយសណ្ឋាគារ The Khom Hotel ខណៈសណ្ឋាគារ The Khom Hotel នេះ គ្រោងនឹងបើកដំណើរការនៅដើមឆ្នាំ២០២២ និងមានបន្ទប់សណ្ឋាគារចំនួន១៣០បន្ទប់។ នេះបើយោងតាមការចេញផ្សាយរបស់គេទំហំព័រ Hosptality Net។

ដោយមានទីតាំងស្ថិតនៅលើផ្លូវ ឧកញ៉ា សួនស្រ៊ុន នៅតាមបណ្តោយមហាវិថីព្រះសុរាម្រឹត សណ្ឋាគារ The Khom Hotel នឹងស្ថិតនៅជិតវត្តបទុមវត្តី ដែលជាវត្តចំណាស់ជាងគេ និងសំខាន់បំផុតមួយនៅក្នុងក្រុង ក៏ដូចជាព្រះបរមរាជវាំងនិងវិមានឯករាជ្យ។ តំបន់ទេសចរណ៍សំខាន់ៗផ្សេងទៀត ដែលនៅជិតសណ្ឋាគាររួមមាន ផ្សារកណ្តាល និងវត្តភ្នំ។

លោក Paul Foskey ប្រធានផ្នែកអភិវឌ្ឍន៍ប្រចាំតំបន់អាស៊ីប៉ាស៊ីហ្វិកក្រុមហ៊ុន Marriott International ធ្លាប់មានប្រសាសន៍ថា យើងទន្ទឹងរងចាំធ្វើជាដៃគូជាមួយក្រុមហ៊ុន Wywaza Investment ក្នុងការនាំមកនូវសណ្ឋាគារ The Khom Hotel ដែលជាសណ្ឋាគារដំបូងគេរបស់ក្រុមហ៊ុន Autograph Collection នៅលើទីផ្សារកម្ពុជានេះ” ។

លោក Douk Dien ម្ចាស់និងជានាយកប្រតិបត្តិក្រុមហ៊ុន Wywaza Investment បានមានប្រសាសន៍ថា “យើងមានមោទនភាព ដែលបានសហការជាមួយក្រុមហ៊ុន Marriott International ដើម្បីនាំយកសណ្ឋាគារយីហោក្រុមហ៊ុន Autograph Collection Hotels មកប្រទេសកម្ពុជា” ។ លោកបន្តថា “យើងនឹងគ្រប់គ្រងទីតាំងសណ្ឋាគារ ដែលមានកិត្យានុភាពបំផុតនៅភ្នំពេញ ហើយធ្វើឱ្យមានការស្នាក់នៅ មានកម្រិតស្តង់ដារជាមួយនឹងការរំពឹងទុកខ្ពស់ ដែលទីតាំងតែមួយគត់នៅជាប់នឹងព្រះបរមរាជវាំង និងសេវាផ្សេងៗទៀត” ។

លោកបានបន្តថា រួមជាមួយការប្តេជ្ញាចិត្តរបស់ក្រុមហ៊ុន Marriott International លើការផ្តល់ម៉ាក និងស្តង់ដារសេវាកម្ម យើងជឿជាក់ថាភ្ញៀវទេសចរ និងប្រជាជនក្នុងស្រុកនឹងស្វាគមន៍សណ្ឋាគារ នៅពេលដែលបើកនៅឆ្នាំ២០២២” ៕

លោកឧកញ៉ាហួត អៀងតុងៈការវិនិយោគលើបច្ចេកវិទ្យាហិរញ្ញវត្ថុកាន់តែជារឿងបន្ទាន់និងចាំបាច់

ដោយៈ គង់ ម៉ាលីន

ភ្នំពេញៈ ប្រធានអគ្គនាយកធនាគារហត្ថា លោកឧកញ៉ាហួត អៀងតុងបានមានប្រសាសន៍ថា ការវិនិយោគលើបច្ចេកវិទ្យាហិរញ្ញវត្ថុជារឿងចាំបាច់ និងមានសារៈសំខាន់ ដើម្បីសម្រួលការប្រើប្រាស់សេវាហិរញ្ញវត្ថុរបស់អតិថិជនរបស់យើង។

លោកឧកញ៉ាបានមានប្រសាសន៍ឲ្យដឹងនាសប្តាហ៍មុនថា ការផ្តោតលើបច្ចេកវិទ្យាជារឿងសំខាន់ ហេតុនេះទើបយើងបានបង្កើន ការវិនិយោគលើបច្ចេកវិទ្យាកាន់តែចច្រើន ដើម្បីផ្តល់ជូននូវសេវាកម្មដល់អតិថិជន ឲ្យកាន់តែមានភាពងាយស្រួល សុវត្ថិភាព និងអាចទុកចិត្តបាន ពិសេសអាចឲ្យពួកគេប្រើប្រាស់សេវាកម្មរបស់់យើងបានលឿន ដោយពួកគេះអាចទូទាត់ ឬវេសាច់ប្រាក់ជាមួយធនាគារផ្សេងៗបាន តាមរយៈកម្មវិធី “បាគង”របស់់ធនាគារជាតិនៃកម្ពុជា។

លោកបន្តថា “បច្ចេកវិទ្យាមានការរីកចម្រើនយ៉ាងលឿន ហេតុនេះយើងក៏ត្រូវតែធ្វើបច្ចុប្បន្នភាពសេវាកម្មរបស់យើងជាប់ជាប្រចាំ ព្រោះគោលដៅរបស់យើងគឺផ្តល់សេវាកម្មបានកាន់តែលឿន ងាយស្រួលដល់អតិថិជន និងចង់ឲ្យអតិថិជនប្រើប្រាស់សេវាកម្មឥណទានរបស់យើងបានកាន់តែច្រើន” ។ លោកបន្តថា “ជាមួយនឹងការទទួលបានទំនុកចិត្តពីអតិថិជន ធនាគារហត្ថាបាន និងកំពុងបង្កើនទុន២៥លានដុល្លារនៅឆ្នាំនេះ សម្រាប់សេវាកម្មឥណទានរបស់យើង បន្ទាប់ពីយើងទើបទទួលបានការអនុម័ត ពីធនាគារជាតិនៃកម្ពុជា” ។

លោកឧកញ៉ាហួត អៀងតុង បានបន្តថា បច្ចុប្បន្នធនាគារហត្ថាមានសាខាសរុបចំនួន១៧៧នៅទូទាំងប្រទេស មានបុគ្គលិក៥៦០០នាក់ និងមានទ្រព្យសកម្មសរុបប្រមាណ១៥០០លានដុល្លារអាមេរិក៕

1...1,9891,9901,991...3,311 Page 1,990 of 3,311