ដោយៈ​សុខុម

អាមេរិក:  ក្រុមហ៊ុន​វិភាគ​ហ្សែ​ន Invitae Corp បានប្រកាស​កាលពី​ថ្ងៃ​ច័ន្ទ ទី៥ ខែមេសា​ថា វិនិយោគិន​មួយក្រុម​រួមទាំង​ក្រុមហ៊ុន​ជប៉ុន SoftBank Group Corp ផង​នឹង​វិនិយោគ​ក្នុង​ទំហំ​ទឹកប្រាក់១,១៥ពាន់​លាន​ដុល្លារ​អាមេរិក នៅក្នុង​ក្រុមហ៊ុន​របស់ខ្លួន។ នេះ​បើ​យោងតាម​ការចុះផ្សាយ​រប​ស់​សារព័ត៌មាន The Edge Markets។

ក្រុមហ៊ុន​វិភាគ​ហ្សែ​ន​របស់​សហរដ្ឋអាមេរិក Invitae Corp និយាយថា ការវិនិយោគ ដែល​នឹងត្រូវ​យកទៅ​ប្រើប្រាស់ សម្រាប់​ជំរុញ​កំណើន​របស់ខ្លួន​នេះ នឹង​ចេញ​ជា​ទម្រង់​មូល​ប​ត្រ​បំណុល ដែលមាន​ការប្រាក់ ១,៥% ក្នុង​មួយឆ្នាំ ហើយ​មូល​ប​ត្រ​បំណុល​នេះ​នឹងមាន​តម្លៃ​ចាប់ផ្ដើម៤៣,១៨ដុល្លារ​ក្នុង​មួយ​ភាគហ៊ុន។

កាលពីដើម​ឆ្នាំនេះ ក្រុមហ៊ុន SoftBank ក៏បាន​វិនិយោគ​ក្នុង​ទំហំ​ទឹកប្រាក់៩០០លាន​ដុល្លារ​អាមេរិក នៅក្នុង​ក្រុមហ៊ុន​វិភាគ​ហ្សែ​ន​មួយទៀត របស់​សហរដ្ឋអាមេរិក Pacific Biosciences of California Inc. ផងដែរ។

ក្រុមហ៊ុន Invitae ដែលមាន​មូលដ្ឋាន​នៅ​ក្រុង​សាន​ហ្វ្រា​ន​ស៊ី​ស្កូ ផ្តល់​សេវាកម្ម​ធ្វើតេស្ត​ហ្សែ​ន សម្រាប់​ជំងឺ​ជាច្រើន រួមមាន ជំងឺ​សើ​ស្បែក ភ្នែក​ជំងឺ ជំងឺមហារីក ព្រមទាំង​សុខភាព​បន្ត​ពូជ​ទាំង​នៅក្នុង និង​ក្រៅ​សហរដ្ឋអាមេរិក។

ភាគហ៊ុន​របស់​ក្រុមហ៊ុន ដែល​បានចាប់ផ្តើម​ដំណើរការ ក្នុង​ឆ្នាំ២០១០ នេះ​បាន​កើនឡើង៣ដង ក្នុង​រយៈពេល១២ខែ​កន្លងមកនេះ ធ្វើឱ្យ​តម្លៃ​សរុប​របស់​វា​នៅក្នុង​ទីផ្សារ​ឡើងដល់៧,៧ពាន់​លាន​ដុល្លារ។

ក្រុមហ៊ុន J Wood Capital Advisors LLC និង​ក្រុមហ៊ុន Perella Weinberg Partners LP គឺជា​ទីប្រឹក្សា​ហិរញ្ញវត្ថុ​របស់​ក្រុមហ៊ុន Invitae នៅក្នុង​ការវិនិយោគ​នេះ៕

ដោយៈសុខុម

ក្រុងឡុងដ៍:  ក្រុមហ៊ុនលក់សម្លៀកបំពាក់រាយ ដែលមានឈ្មោះថា Next របស់អង់គ្លេស បានប្រកាសផ្អាកបញ្ជាទិញសម្លៀកបំពាក់ ពីរោងចក្រនានានៅក្នុងប្រទេសមីយ៉ាន់ម៉ា ក្រោយពីក្រុមហ៊ុនអឺរ៉ុប ជាច្រើនទៀតបានធ្វើដូច្នេះ ដើម្បីឆ្លើយតបទៅនឹងរដ្ឋប្រហារយោធាកាលពីខែកុម្ភៈ។ នេះបើយោងតាមសារព័ត៌មាន The Star ចុះផ្សាយកាលពីថ្ងៃទី៤ មេសា។

ប្រទេសមីយ៉ាន់ម៉ា បានផ្ទុះបាតុកម្មហិង្សាចាប់ តាំងពីកងទ័ពបានធ្វើរដ្ឋប្រហារនៅថ្ងៃទី០១ កុម្ភៈ ដើម្បីផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុង សានស៊ូជី ដែលជាជ័យលាភីទទួលរង្វាន់ណូបែលសន្តិភាព ក្រោមលេសថា មានការលួចសន្លំសន្លឹឆ្នោតនៅក្នុងការបោះឆ្នោតខែវិច្ឆិកា ឆ្នាំ២០២០។

យោងតាមអង្គការសិទ្ធិមនុស្សមួយដែលមានឈ្មោះថា “សមាគមផ្ដល់ជំនួយដល់អ្នកទោសនយោបាយ”(AAPP) ឱ្យដឹងថា ជនស៊ីវិលយ៉ាងតិច៥៣៦នាក់ បានបាត់បង់ជីវិតនៅក្នុងបាតុកម្មហិង្សា ដោយក្នុងនោះមាន ១៤១ នាក់បានស្លាប់កាលពីថ្ងៃសៅរ៍ ទី៣ មេសា ដែលជាថ្ងៃបង្ហូរឈាមច្រើនបំផុតនៅក្នុងការតវ៉ានេះ។

ផលិតផលវាយនភណ្ឌ ក្រណាត់ និងអំបោះរបស់ប្រទេសមីយ៉ាន់ម៉ា បានសាងឈ្មោះល្បីល្បាញពេញពិភពលោក ហើយឧស្សាហកម្មកាត់ដេរ ជាប្រភពការងារដ៏សំខាន់នៅក្នុងប្រទេសនេះ។

លោក Simon Wolfson នាយកប្រតិបត្តិក្រុមហ៊ុនNext បានប្រាប់ទីភ្នាក់ងារព័ត៌មានReuters ថា ក្រុមហ៊ុនរបស់លោក នឹងមិនធ្វើការបញ្ជាទិញពីប្រទេសមីយ៉ាន់ម៉ា ទៀតឡើយនៅពេលនេះ ហើយនឹងងាកទៅបញ្ជាទិញពីប្រទេសផ្សេងទៀត។

លោកបានបញ្ជាក់ថា “ការបញ្ជាទិញរបស់ក្រុមហ៊ុន Next ដែលធ្លាប់បានទៅលើប្រទេសមីយ៉ាន់ម៉ា ឥឡូវនេះនឹងត្រូវបានបែងចែករវាង៣ ប្រទេសរួមមានបង់ក្លាដែស កម្ពុជា និងចិន”។

កាលពីថ្ងៃពុធ សប្ដាហ៍មុន ក្រុមហ៊ុន Associated British Foods ប្រកាសថា ប៊្រែនសម្លៀកបំពាក់ Primark របស់ខ្លួនបានផ្អាកបញ្ជាទិញពីប្រទេសមីយ៉ាន់ម៉ា បន្ទាប់ពីមានចំណាត់ការស្រដៀងគ្នាពីក្រុមហ៊ុនH&M របស់ស៊ុយអែត ដែលជាក្រុមហ៊ុនលក់រាយស   ម្លៀកបំពាក់ធំបំផុតទី២ របស់ពិភពលោក និងក្រុមហ៊ុន Benetton Group របស់អ៊ីតាលី។

កាលពីថ្ងៃច័ន្ទ សប្ដាហ៍មុន ក្រុមហ៊ុនលក់សម្លៀកបំពាក់រាយOVS របស់អ៊ីតាលី បានប្រកាសថា ខ្លួននឹងរក្សាទុក “វត្តមានមានកំណត់” របស់ខ្លួននៅក្នុងប្រទេសមីយ៉ាន់ម៉ា ប៉ុន្តែនឹងបញ្ឈប់អាជីវកម្មរបស់ខ្លួន ជាមួយបណ្ដាក្រុមហ៊ុនផ្គត់ផ្គង់ ដែលរើសអើងចំពោះកម្មករ ដែលចូលរួមក្នុងបាតុកម្មប្រឆាំងរបបយោធារបស់ប្រទេសនេះ។

ក្រុមហ៊ុន Marks & Spencer របស់អង់គ្លេសបាននិយាយថា ខ្លួននឹងរក្សាទុកការបញ្ជាទិញដែលបានកក់ទុករួចហើយ ប៉ុន្តែនឹងពិចារណាឡើងវិញ ចំពោះការបញ្ជាទិញនៅពេលអនាគត។

ដោយឡែកពីគ្នាកាលពីថ្ងៃព្រហស្បតិ៍ សប្ដាហ៍មុន ប្រទេសអង់គ្លេសបានដាក់ទណ្ឌកម្ម លើក្រុមហ៊ុនមេដ៏ធំមួយរបស់មីយ៉ាន់ម៉ា ដោយសារក្រុមហ៊ុននោះ មានទំនាក់ទំនងជិតស្និទ្ធ ជាមួយមេដឹកនាំយោធា ដែលបានសម្លាប់ជនស្លូតត្រង់យ៉ាងច្រើន រួមទាំងកុមារផងដែរ៕

ដោយៈគង់ សូរិយា

        ភ្នំពេញៈ រដ្ឋបាលខេត្តកំពង់ចាមបាននិងកំពុងស្ថាបនា ច្រាំងទន្លេប្រវែងវែងមួយ នៅតាមបណ្តោយដងទន្លេមេគង្គ ស្ថិតក្នុងភូមិសាស្រ្តស្រុកចំនួនពីរ ដើម្បីកាត់បន្ថយការប្រាក់ច្រាំងទន្លេ នៅរដូវទឹកជំនន់។

អភិ​បាលខេត្តកំពង់ចាម លោកអ៊ុន ចាន់ដា បានដឹកនាំកិច្ចប្រជុំពិនិត្យ ពិភាក្សា និងពន្លឿនក្នុងការសាងសង់ច្រាំងទន្លេប្រវែង២,០០០ម៉ែត្រ នៅក្នុងស្រុកស្រីសន្ធរ និងស្រុកកងមាស ដោយមានការអញ្ចើញចូលរួមពីមន្ទីរ អង្កភាពពាក់ព័ន្ធ និងមន្ត្រីបច្ចេកទេសរបស់ក្រុមហ៊ុន រីវើសាយ ឌីវេឡុបម៉ិន ឯ.ក។

បន្ទាប់ពីកិច្ចពិភាក្សាលើវឌ្ឍនភាព នៃគម្រោងរៀបបាវខ្សាច់(Geo-textile) ទប់ការពារការបាក់-ស្រុតច្រាំងទន្លេ ប្រវែង២.០០០ម៉ែត្រ នៅឃុំឬស្សីស្រុក ឃុំកោះអណ្តែត ស្រុកស្រីសន្ធរ និងឃុំសូរគង ស្រុកកងមាស។

លោកអភិបាលខេត្ត បានឯកភាពទៅលើគំរូប្លង់ ដែលក្រុមហ៊ុនបានស្នើឡើង និងស្នើឲ្យក្រុមហ៊ុនទទួលការសាងសង់ពន្លឿនការងារ ខណៈរដូវវស្សានឹងជិតចូលមកដល់នាពេលខាងមុខ។ ជាមួយគ្នានេះក្រុមហ៊ុន ត្រូវគោរពតាមបទដ្ឋានបច្ចេកទេស ក្នុងការបូមដីកោះដុះថ្មី និងដីខ្សាច់ តម្រង់ចរន្តទឹកហូរ នៅតំបន់កោះតូច ចន្លោះរវាងស្រុកស្រីសន្ធរ និងស្រុកកងមាស ដើម្បីបញ្ជៀសការបាក់-ស្រុតច្រាំងទន្លេ។

តាមការបញ្ជាក់ពីអ្នកបច្ចេកទេស របស់ក្រុមហ៊ុន រីវើសាយឌីវេឡុបម៉ិន ឯ.ក បានធ្វើបទបង្ហាញ អំពីគម្រោងប្លង់បច្ចេកទេស រៀបចំបាវខ្សាច់(Geo-textile) ដើម្បីទប់ច្រាំងទន្លេ ប្រវែង២០០០ ម៉ែត្រ ដោយចាប់ផ្តើម បូមខ្សាច់ធ្វើបាតជាបណ្តើរៗ ចាប់ពីដើមខែមេសានេះតទៅហើយ ក្នុងជំហានទី១ ឲ្យបានកំពស់ ០៤ម៉ែត្រ និងចាប់រៀបចំបាវខ្សាច់ បន្តក្នុងជំហានទី២ ឲ្យបាន៨,៥ ម៉ែត្រ ស្មើនឹង៥០% នៃកំពស់ច្រាំងទន្លេ រួចត្រូវបន្តធ្វើជំហានទី៣ ទៀត រហូតដល់កំពស់ ១២ ម៉ែត្រ បញ្ចប់ គម្រោង ដែលស្មើនឹង៧៥% នៃកំពស់ច្រាំងទន្លេ។ ក្រុមហ៊ុន បានប្រើប្រាស់ទន្និន័យមូលដ្ឋានអំពីកំពស់ទឹកទន្លេ ពីមន្ទីរធនធានទឹក និងឧតុនិយមខេត្ត និងទិន្នន័យ ផែនទីបាតទន្លេ ពីវេបសាយ របស់គណៈកម្មាធិការទន្លេមេគង្គ៕

        ដោយៈរតនៈ

ភ្នំពេញៈ លោកសាស្ដ្រាចារ្យវេជ្ជបណ្ឌិតម៉ម ប៊ុនហេង បានមានប្រសាសន៍ថា ព្រឹត្ដិការណ៍សហគមន៍២០កុម្ភៈអាចចប់ក្នុងពេលដ៏ឆាប់ គឺប្រជាពលរដ្ឋត្រូវបន្ដរួមគ្នា ប្រកាន់ខ្ជាប់នូវគោលការណ៍៣ការពារ ៣កុំ បូកនឹងការចាក់វ៉ាក់សាំងការពារជំងឺកូវីដ១៩ ហើយមិនចេញពីផ្ទះបើមិនចាំបាច់។

រដ្ឋមន្ដ្រីក្រសួងសុខាភិបាល លោកសាស្ដ្រាចារ្យ ម៉ម ប៊ុនហេង បានមានប្រសាសន៍ដូចនេះក្នុងឱកាសអញ្ជើញចុះមកពិនិត្យ ម៉ាស៊ីនតេស្ដសំណាករកមេរោគកូវីដ១៩ នៅមជ្ឈមណ្ឌលជាតិផ្ដល់ឈាម នាថ្ងៃទី៥ ខែមេសា ។

លោកសាស្ត្រាចារ្យបន្តថា “បើមិនចាំបាច់ទេ សូមប្រជាពលរដ្ឋនៅផ្ទះ ព្រោះការនៅផ្ទះមិនមានប៉ះពាល់ជាមួយអ្នកដទៃ ដែលធ្វើឲ្យគ្មានហានិភ័យឆ្លងជំងឺកូវីដ១៩ ពីគេមកខ្លួន​និងចម្លងមកគ្រួសារ លើកលែងតែយើងមានភារកិច្ចចាំបាច់ តែត្រូវប្រកាន់ខ្ជាប់៣កា​រ​ពារ និង៣កុំ”។

កម្ពុជាបានរកឃើញអ្នកឆ្លងសរុបចំនួន២៧៥២នាក់ ក្នុងនោះករណីសហគមន៍២០កុម្ភៈ ចំនួន២២២២នាក់ អ្នកជាសះស្បើយចំនួន១៧៤៧នាក់, អ្នកកំពុងសម្រាកព្យាបាលចំនួន៩៧៩នាក់ អ្នកស្លាប់ចំនួន ២១នាក់ និងស្លាប់ដោយជំងឺផ្សេង ពេលកំពុងព្យាបាលកូវីដ១៩ចំនួន៥នាក់។

របាយការណ៍នេះ គិតត្រឹមម៉ោង៧ ព្រឹកថ្ងៃទី០៥ ខែមេសា ឆ្នាំ២០២១នេះ៕

ដោយ: គង់ សូរិយា

ភ្នំពេញ: ក្រសួងពាណិជ្ជកម្មបានឲ្យដឹងថា ការចុះបញ្ជីម៉ាកពាណិជ្ជកម្ម រួមទាំងការចុះបញ្ជីម៉ាក ជាលក្ខណៈអន្តរជាតិតាមប្រព័ន្ធម៉ាឌ្រីដ នៅក្រសួងពាណិជ្ជកម្ម បានកើនឡើងរហូត៣០ភាគរយកាលពីឆ្នាំ២០២០ បើធៀបរយៈពេលដូចគ្នានឹងឆ្នាំ២០១៩។ នេះបើតាមការឲ្យដឹងពីក្រសួងពាណិជ្ជកម្ម។

យោងតាមរបាយការណ៍បូកសរុប លទ្ធផលការងារពាណិជ្ជកម្មឆ្នាំ២០២០ និងទិសដៅការងារពាណិជ្ជកម្មឆ្នាំ២០២១ របស់ក្រសួងពាណិជ្ជកម្ម បានបង្ហាញឲ្យដឹងទៀតថា គិតចាប់ពីខែមករា រហូតខែធ្នូ ឆ្នាំ២០២០ ការងារចុះបញ្ជីម៉ាកពាណិជ្ជកម្មទាំងក្រុមហ៊ុនក្នុងស្រុក និងក្រុមហ៊ុនបរទេសមានចំនួន៧ ៩៩៧ កើនឡើង៣០ភាគរយ បើធៀបនឹងរយៈពេលដូចគ្នានឹងឆ្នាំ២០១៩ ដែលមានចំនួន៦១៧៥ ក្នុងនោះការចុះបញ្ជីម៉ាកក្រុមហ៊ុនក្នុងស្រុក៥ ៦២៨ និងក្រុមហ៊ុនបរទេស៤ ២៧៣។

ទាក់ទងម៉ាកសម្គាល់ភូមិសាស្រ្តទំនិញ នៅក្នុងប្រទេសកម្ពុជា ក្រសួងពាណិជ្ជកម្ម បានឲ្យដឹងថា “ទឹកឃ្មុំព្រៃមណ្ឌលគិរី” ដែលគ្រោងដាក់សម្ពោធក្នុងខែមេសាឆ្នាំនេះ, ដាក់ពាក្យសុំចុះបញ្ជីម៉ាកសម្គាល់ភូមិសាស្រ្តទំនិញ “ម្រេចកំពត” ជាអន្តរជាតិនៅ ៣២ប្រទេ​ស ក្រោមច្បាប់ទីក្រុងហ្សឺណែវ នៃកិច្ចព្រមព្រៀងទីក្រុងលីស្បោន និងបានចុះបញ្ជីជាផ្លូវការកាលពីចុងឆ្នាំ២០២០ កំពុងអនុវត្តគម្រោងចុះបញ្ជីម៉ាក សម្គាល់ភូមិសាស្រ្តទំនិញ “អំបិល និងផ្កាអំបិលកំពត”។

ក្រសួងកំពុងអនុវត្តគម្រោងកសាងកេរ្តិ៍ឈ្មោះ និងសមត្ថភាពរបស់សមាគម តាមរយៈការជំរុញឲ្យប្រើប្រាស់រូបសញ្ញាជាតិ ម៉ាកសម្គាល់ភូមិសាស្រ្តទំនិញ “ម្រេចកំពត” “ស្ករត្នោតកំពង់ស្ពឺ” និង “ក្រូចថ្លុងកោះទ្រង់”។ និងសិក្សាស្រាវជ្រាវផលិត អង្ករថ្មគោល និងធុរេនកំពត ដើម្បីត្រៀមចុះបញ្ជីម៉ាកសម្គាល់ភូមិសាស្រ្តទំនិញនា។

ក្រៅពីម៉ាកសម្គាល់ភូមិសាស្រ្តទំនិញ កម្ពុជាក៏មានម៉ាកសមូហភាពទៀតដែរ ដែលក្នុងនោះ កំពុងរៀបចំចុះបញ្ជីម៉ាកសមូហភាព “អំបុកកំពង់ធំ” “នំបញ្ចុកសៀមរាប” “ចម្លា​ក់ប្រាក់-ស្ពាន់ ឃុំកំពង់លួង-កោះចិនខេត្តកណ្តាល” “ស្មូនឆ្នាំងដីខេត្តកំពង់ឆ្នាំង” និង“ពងទាកូនស្រែរនោង-ខេត្តតាកែវ”។ កំពុងសិក្សាស្រាវជ្រាវផលិតផលសក្តានុពល សូត្រខ្មែរ អង្ករសេរីរាង្គព្រះវិហារ ក្រូចពោធិ៍សាត់ អង្ករស្មាច់ស្វាយរៀង ធុរេនសំឡូត មៀនប៉ៃលិន អង្ករនាងអំ ដើម្បីត្រៀមរៀបចំចុះបញ្ជីម៉ាកសមូហភាព៕

បញ្ជូនតង់ស្យុងខ្ពស់ថ្មី

        ដោយៈរតនៈ

ភ្នំពេញៈ ខ័ណ្ឌថ្មីចំនួន៣នីរាជធានីភ្នំពេញ បានទទួលថាមពលអគ្គិសនីមានកម្រិតង់ស្យុងខ្ពស់ដល់ទៅ១១៥ គីឡូវ៉ុលចាប់ពីអនុស្ថានីយអគ្គិសនីទី៣ ស្ថិតនៅសង្កាត់អូរបែកក្អម ខណ្ឌសែនសុខ ទៅកាន់អនុស្ថានីយអគ្គិសនីពោធិ៍ចិនតុង ស្ថិតនៅសង្កាត់កាកាប ខណ្ឌពោធិ៍សែនជ័យ ដើម្បីផ្គត់ផ្គង់អគ្គិសនីជូនប្រជាពលរដ្ឋ នៅខណ្ឌពោធិ៍សែនជ័យ ខណ្ឌដង្កោ និងមួយផ្នែកនៃខណ្ឌសែនសុខ។

លោក កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកអគ្គិសនីកម្ពុជា ឲ្យដឹងថា អគ្គិសនីកម្ពុជាបានបញ្ចប់ការសាងសង់ និងបានដាក់ឲ្យដំណើរការអនុស្ថានីយអគ្គិសនីតង់ស្យុងខ្ពស់ ១១៥/២២ គីឡូវ៉ុល កម្លាំង ៧៥ មេហ្កាវ៉ុលអាំពែរ ដែលមានទីតាំងស្ថិតក្នុងបរិវេណបញ្ជាការដ្ឋានការពារអាកាស និងខ្សែបញ្ជូនអគ្គិសនីអាកាស និងកប់ដីតង់ស្យុងខ្ពស់ ១១៥ គីឡូវ៉ុល បែកខ្នែងចេញពីផ្លូវ Northbridge ប្រវែងប្រមាណ២គីឡូមែ ត្រ។

លោកបានបន្តថា “អនុស្ថានីយថ្មីនេះ បានដាក់ឲ្យដំណើរការនៅដើមរដូវប្រាំងខាងមុខនេះ ដែលជាពេលវេលាដ៏ល្អសមស្របមួយ ដើម្បីផ្គត់ផ្គង់បន្ទុកប្រើប្រាស់ដែលកំពុងកើនឡើងខ្លាំងក្នុងតំបន់នេះ ព្រមទាំងជួយសម្រាលការប្រើប្រាស់ ចេញពីអនុស្ថានីយជុំវិញ ដែលកំពុងលើសបន្ទុក និងបង្កើនប្រសិទ្ធភាពនៃការផ្គត់ផ្គង់ជូនរាជធានីភ្នំពេញ”។

អនុស្ថានីយនេះដែរ ស្ថិតក្នុងតំបន់ដែលកំពុងមានសកម្មភាព អភិវឌ្ឍន៍រីកដុះដាលច្រើនរបស់ប្រជាពលរដ្ឋ ក៏ដូចជាអគារពាណិជ្ជកម្មប៊ូយ៉ុងថោន អគារអ៊ែតវូត អគារពាណិ​ជ្ជកម្ម ផ្សារទំនើប ជាពិសេសសម្រាប់ត្រៀមបំពេញតម្រូវការ ប្រើប្រាស់របស់អាកាសយានដ្ឋានអន្តរជាតិភ្នំពេញ ដែលនឹងត្រលប់មកដំណើរការជាប្រក្រតីឡើងវិញ បន្ទាប់ពីស្ថានភាពរាតត្បាតនៃជំងឺកូវីដ១៩ បានធូរស្រាល។

លោកកែវ រតនៈ បានបញ្ជាក់បន្ថែមថា “ទីតាំងដីអនុស្ថានីយនេះជាអំណោយរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជានាយករដ្ឋមន្រ្តី បានផ្ទេរឲ្យមកអគ្គិសនីកម្ពុជា ដែលជាក្រុមហ៊ុនរបស់រដ្ឋនូវទំហំដី ៣,៣៧៥ ម៉ែត្រការ៉េ សម្រាប់ការអភិវឌ្ឍហេដ្ឋរចនាសម្ព័ន្ធអគ្គិសនីដ៏សំខាន់នេះ”។

អគ្គិសនីកម្ពុជាគ្រោងបន្ថែមត្រង់ស្វូម៉ាទ័រ៧៥ មេហ្កាវ៉ុលអាំពែរ មួយទៀត ដើម្បីឲ្យមានកម្លាំងសរុបដល់១៥០មេហ្កាវ៉ុលអាំពែរ ដើម្បីធានាវិសាលភាពនៃការផ្គត់ផ្គង់ផង និងបង្កើនស្ថិរភាព និងគុណភាពអគ្គិសនីជូនដល់ប្រជាពលរដ្ឋផងដែរ៕

ដោយៈ ស៊ីវ ម៉េង

        ភ្នំពេញៈ សម្តេចតេជោហ៊ុន សែននាយករដ្ឋមន្រ្តីនៃកម្ពុជាបានអនុម័តរួចហើយ នូវគម្រោងបង្កើតទីក្រុងGrand City Siem Reap ដែលមានទីតាំងជិតព្រលានយន្តហោះអ្តរជាតិថ្មី នៃខេត្តសៀមរាប។

រដ្ឋមន្រ្តីក្រសួងទេសចរណ៍ លោកបណ្ឌិតថោង ខុនបានមានប្រសាសន៍ឲ្យដឹងនាព្រឹកថ្ងៃទី៥ មេសានេះថា Master Planរបស់ទីក្រុងថ្មីនេះ ត្រូវបានសម្តេចតេជោអនុម័តរួចហើយ ស្របពេលក្រសួងបាននិងកំពុងផ្ញើរឯកសារ និងផែនការអភិវឌ្ឍន៍ទីក្រុងនេះ ទៅកាន់ស្ថាប័នពាក់ព័ន្ឋពិនិត្យ​ ព្រោះការងារនេះត្រូវធ្វើជាអន្តរក្រសួង។លោកបន្តថា ទីក្រុងថ្មីនេះ មានទីតាំងនៅក្បែរព្រលានយន្តហោះថ្មី ក្នុងស្រុកសូទ្រនិគម ខេត្តសៀមរាប ដែលជាតំបន់មិនស្ថិតក្រោមការ​ការពាររបស់់អាជ្ញាធរអប្សរានោះទេ។

លោកបន្តថា “រហូតមកទល់ពេលនេះ ទីក្រុងថ្មីនេះមិនទាន់មានសកម្មភាពអភិវឌ្ឍ​ន៍ជាដុំកំភួនអ្វីនៅឡើយទេ ខណៈការរៀបចំសិក្ខាសាលាផ្សព្វផ្សាយ ពីផែនការនេះត្រូវបានផ្អាក ដោយសារវិបត្តិកូវីដ១៩”។ លោកបន្តថា “ទោះជាយ៉ាងណា យើងមិនទាន់អាច​បញ្ជាក់ពីទំហំផ្ទៃដី និងផែនការលំអិតរបស់ទីក្រុងនេះបាននៅឡើយទេ ប៉ុន្តែអ្វីៗបានរៀបចំរួចរាល់ហើយ ព្រោះសម្តេចបានអនុម័តរួចហើយ”។

លោករដ្ឋមន្រ្តីបានបន្តថា បច្ចុប្បន្នការងារស្ថាបនាផ្លូវចំនួន៣៨ខ្សែ នៅក្នុងទីក្រុងសៀមរាប បាននិងកំពុងជម្រុញយ៉ាងសកម្ម ដើម្បីលើកកំពស់សោភ័ណភាពក្រុង ទាក់ទាញទេសចរណ៍ជាតិ និងអន្តរជាតិ។

រដ្ឋាភិបាលបាន និងកំពុងសហការជាមួយក្រុមហ៊ុនយូណាន មានមូលដ្ឋាននៅប្រទេសចិន ដើម្បីដំណើរការសាងសង់ព្រលានយន្តហោះខ្នាតអន្តរជាតិ នៅក្នុងស្រុកសូទ្រនិគម ដែលស្ថិតនៅលើផ្ទៃដី៧០០ហិកតា និងគ្រោងបោះទុនវិនិយោគប្រមាណ៩០០លានដុល្លារអាមេរិក។ តាមផែនការព្រលានយន្តហោះនេះ នឹងបញ្ចប់ការសាងសង់នៅដើមឆ្នាំ២០២៣ខាងមុខនេះ៕

        ដោយៈឧត្តម

ភ្នំពេញៈ រដ្ឋបាលរាជធានីភ្នំពេញ បានដាក់វិធានការក្តៅចំនួន៩ដើម្បីឱ្យពលរដ្ឋ កម្មករ កម្មការិនី នៅភ្នំពេញ ចូលរួមអនុវត្តន៍វិធានការសន្តិសុខ សណ្ដាប់ធ្នាប់ និងរបៀបរៀបរយក្នុងឳកាសពិធីបុណ្យចូលឆ្នាំខ្មែរ ប្រពៃណីជាតិខាងមុខនេះ។

យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញបានឲ្យដឹងថា រដ្ឋបាលរាជធានីភ្នំពេញ បានដាក់ចេញនូវគោលការណ៍ណែនាំ នូវចំណុចសំខាន់ៗដូចខាងក្រោមដូចជា ទី១ ត្រូវបង្កើតស្មារតីប្រុងប្រយ័ត្នខ្បស់ចំពោះ ភ្លើងទៀត ធូប ភ្លើងចង្រ្កាន ការប្រើប្រាស់ប្រេងឥន្ធនៈ ឧស្ម័នហ្គាស និងចរន្តអគ្គិសនី ដើម្បីបង្ការទប់ស្កាត់គ្រោះអគ្គិភ័យជាយថាហេតុ និងដើម្បីបញ្ចៀសការបាត់បង់ទ្រព្យសម្បត្តិនិងអាយុវជីវិប្រជាពលរដ្ឋទូទៅ ។​

ទី២ ហាមដាច់ខាត ការលេងល្បែងស៊ីសងគ្រប់ប្រភេទ និងការលេងបាញ់ទឹក ជះទឹក គប់ស្បោងទឹក ប៉ាតម្សៅ លាបធ្យូង វាយដោយរំពាត់ ឬឧបករណ៍ផ្សេងៗ ដែលជាសកម្មភាពខុសច្បាប់។ ទី៣ ជៀសវាងការធ្វើដំណើរចេញក្រៅលំនៅឋាន ឬទីសំណាក់ដែលមិនចាំបាច់ និងចៀសវាងការធ្វើដំណើរកម្សាន្ត ឬធ្វើដំណើរទៅកាន់ខេត្តផ្សេងៗ ដែ​លអាចជាហានិភ័យខ្ពស់ នៃការចម្លងជំងឺកូវីដ១៩ ទៅបុគ្គលដទៃ គ្រួសារផ្សេងទៀត និងក្នុងសហគមន៍កាន់តែធ្ងន់ធ្ងរ ព្រោះថារាជធានីភ្នំពេញ ត្រូវបានក្រសួងសុខាភិបាល កំណ​ត់ថាជាទីតាំងភូមិសាស្ត្រក្នុងចំណោម៥ រាជធានីខេត្ត មានការឆ្លងរាលដាល នៃជំងឺកូវីដ១៩ក្នុងព្រឹត្តិការណ៍សហគមន៍ ២០ កុម្ភៈ ២០២១ ។

ទី៤ ផ្អាកការរៀបចំសង្ក្រាន្តវត្តភ្នំ និងការរៀបចំសង្ក្រាន្តតាមបណ្ដាខណ្ឌទាំង១៤ ក្នុងឱកាសនៃពិធីបុណ្យចូលឆ្នាំខ្មែរប្រពៃណីជាតិ នាពេលខាងមុខនេះ ។ ទី៥ ហាមដាច់ខាតការប្រមូលផ្ដុំរៀបចំកម្មវិធីកម្សាន្តបែបប្រពៃណី កម្មវិធីរាំច្រៀង ពិធីជប់លៀង និងការជួបជុំគ្រប់ប្រភេទ ដែលមានសភាពអ៊ូអរ និងមានមនុស្សចូលរួមច្រើន លើកលែងតែមានការជួបជុំក្នុងចំណោមសមាជិកគ្រួសារ ដែលរស់នៅក្នុងលំនៅឋាន ឬទីសំណាក់ជាមួយគ្នា។

ទី៦ គ្រប់វត្តអារាម ទីកន្លែងសក្ការៈបូជា រមណីយដ្ឋាន ភោជនីយដ្ឋាន អាហារដ្ឋាន អាជីវកម្មដ្ឋាននិងទីតាំងសប្បាយនានា ត្រូវផ្ដល់កិច្ចសហការល្អជាមួយអាជ្ញាធរមូលដ្ឋាន និងមន្ត្រីជំនាញមានសមត្ថកិច្ច ក្នុងនោះ គណៈគ្រប់គ្រងឬម្ចាស់ទីតាំង ត្រូវចាត់ចែងអនុវត្ត ដូចជាមានអ្នកវាស់កម្ដៅ បាញ់អាល់កុល ចែកម៉ាស និងចូលរួមអនុវត្តការស្កែន QR Code ទប់ស្កាត់កូវីដ។ អនុវត្តន៍កាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ឱ្យបានត្រឹមត្រូវ រៀបចំទីតាំងឱ្យមានខ្យល់ចេញចូល ជាអតិរមា ចៀសវាងដាច់ខាតការប្រជ្រៀតគ្នា ឬប្រមូលផ្ដុំមនុស្សច្រើន ខុសពីវិធានការសុខាភិបាល ។

ទី៧ ចំពោះក្រុមហ៊ុនដឹកជញ្ជូនអ្នកដំណើរគ្រប់ប្រភេទ ក្នុងមូលដ្ឋានរាជធានីភ្នំពែញ មិនត្រូវដំឡើងថ្លៃសេវាដឹកជញ្ជូនអ្នកដំណើរឡើយ និងត្រូវយកចិត្តទុកដាក់អនុវត្តវិធានការសុខាភិបាល សំដៅបង្ការនិងទប់ស្កាត់ការឆ្លងរាលដាលនៃជំងឺ កូវីដ១៩ ក្នុងចំណោមអ្នកបើកបរ បុគ្គលិក និងអ្នកដំណើរទាំងឡាយ ដែលប្រើប្រាស់សេវាកម្មដឹកជញ្ជូនរបស់ក្រុមហ៊ុនខ្លួន ។

ទី៨ សូមលើកទឹកចិត្តចំពោះការសម្រាកជួបជុំ ក្រុមគ្រួសារនៅក្នុងលំនៅឋានរៀងៗខ្លួន ហើយប្រសិនជាមានតម្រូវការចាំបាច់ខានមិនបាន ក្នុងការធ្វើដំណើរ ត្រូវប្រកាន់ខ្ជាប់ជានិច្ចការគោរពច្បាប់ច្បាប់ស្ដីពី ចរាចរណ៍ផ្លូវគោកនិងលិខិតបទដ្ឋានគតិយុត្តពាក់ព័ន្ធជាធរមាន។

ទី៩ ត្រូវង្កើនស្មារតីយកចិត្តទុកដាក់អនុវត្តវិធានការការពារខ្លួន គ្រួសារ និងសហគមន៍  ស្របតាមរបត់ថ្មីគឺការរស់នៅធម្មតា តាមបែបគន្លងថ្មី ក្នុងបរិបទប្រយុទ្ធនឹងជំងឺកូវីដ១៩ តាមរយៈការប្រកាន់ខ្ជាប់ នូវគោលការណ៍ណែនាំរបស់ក្រសួងសុខាភិបាល និងវិធានការ ៣ការពារ ៣កុំ របស់សម្ដេចតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ៕