គម្រោងភូមិឋានធម្មជាតិក្រុងភ្នំនឹងជួយលើកកម្ពស់សម្រស់ខេត្តសៀមរាប

រហូតមកទល់ពេលនេះ ការលក់គម្រោងភូមិឋានធម្មជាតិក្រុងភ្នំ សម្រេចបានប្រមាណ៩0 ភាគរយហើយ ដោយការលក់គម្រោងទីមួយនេះ នឹងត្រូវបិទបញ្ចប់នៅចុងឆ្នាំ២០២១នេះ។ នេះបើតាមការឲ្យដឹងពីអ្នកគ្រប់គ្រងជាន់ខ្ពស់របស់គម្រោងភូមិឋានធម្មជាតិក្រុងភ្នំ។

គម្រោងភូមិឋានធម្មជាតិក្រុងភ្នំ គឺជាគម្រោងមួយក្នុងចំណោមគម្រោងដទៃទៀតដែលអភិវឌ្ឍដោយក្រុមហ៊ុន វ្យាធបុរៈ ដែលមានទីតាំងស្ថិតនៅក្រុងសៀមរាប ខេត្តសៀមរាប។ គម្រោងនេះមានទីតាំងស្ថិតនៅតាមបណ្តោយផ្លូវ ៦០ម៉ែត្រ និងមានចំងាយប្រមាណ ៤គីឡូម៉ែត្រ ពីសាលារដ្ឋបាលខេត្តសៀមរាប។

លោក សែម សុខខូយ អគ្គនាយកក្រុមហ៊ុន វ្យាធបុរៈ ដែលជាក្រុមហ៊ុនអភិវឌ្ឍន៍គម្រោងភូមិឋានធម្មជាតិក្រុងភ្នំ បានឱ្យដឹងថា កម្រោងទី១នេះ ត្រូវបានសាងសង់ឡើងនៅលើផ្ទៃដីទំហំជាង ២ហិចតា ដែលមានគេហដ្ឋានសរុបចំនួន ៧២ខ្នង។ គម្រោងទី១នេះរួមមាន៖ វីឡាបឹងកាឡូបែបអឺរ៉ុប វីឡាកូនកាត់២ជាន់បែបខ្មែរ វីឡាភ្លោះ២ជាន់បែបជប៉ុន និងផ្ទះល្វែងអាជីវកម្មបែបខុនដូ។

លោកបន្តថា វីឡាបឹងការឡូបែបអឺរ៉ុបមាន ទំហំ១០x២០ម៉ែត្រ វីឡាកូនកាត់២ជាន់បែបខ្មែរ មានទំហំ១០x២០ម៉ែត្រ, វីឡាភ្លោះ២ជាន់បែបជប៉ុនមានទំហំ៧x១៥ម៉ែត្រ និងផ្ទះល្វែងប្រភេទអាជីវកម្មកំពស់៣ជាន់ មានទំហំ ៤.៥x២០ម៉ែត្រ ដែលមានតម្លៃចាប់ពី ៣០០០០ ដុល្លា ឡើងទៅក្នុងមួយយូនិត។

លោកសុខខូយ លើកឡើងថា៖ «អតិថិជនគោលដៅរបស់យើង គឺចាប់ពីអ្នកដែលមានជីវភាពកំរិតមធ្យមឡើងទៅ។» អគ្គនាយករូបនេះបន្តថា ការសាងសង់ គម្រោងភូមិឋានធម្មជាតិក្រុងភ្នំ ដំណាក់កាលទី១ ក៏សម្រេចបានមួយដំណាក់កាលធំហើយដែរ។

លោក ច្រឹក សុនឹម ប្រធានសមាគមអ្នកវាយតម្លៃអចលនវត្ថុកម្ពុជា (CVEA) បានលើកឡើងថា គម្រោងផ្ទះបែបធម្មជាតិនៅខេត្តសៀមរាប ហាក់មិនទាន់ឃើញមានការអភិវឌ្ឍន៍គួរឲ្យកត់សម្គាល់នៅឡើយទេ
ទីផ្សារនៃគម្រោងផ្ទះលំនៅឋានបែបធម្មជាតិនេះ នៅមានតិចតួចខ្លាំងណាស់នៅក្នុងខេត្តសៀមរាបនេះ។

លោក សុខនឹមបន្តថា៖ «ខ្ញុំគិតថាលំនៅឋានធម្មជាតិ និងផ្ទះបែបលំហែរនេះអាចរីកចម្រើនខ្លាំងនាពេលអនាគត ជាពិសេសនៅពេលដែលកត្តាជីវភាពប្រជាជនក្នុងខេត្តសៀមរាបរីករចម្រើន បើប្រជាជនក្នុងខេត្តមានជីវភាពល្អប្រសើរនោះ មិនយូរនោះទេវិស័យផ្ទះលំហែរ និងផ្ទះបែបធម្មជាតិនឹងមានច្រើន ហើយរីកចម្រើនទៀត។»

គួរបញ្ជាក់ថា គម្រោងទី១នៃ ភូមិឋានធម្មជាតិក្រុងភ្នំ បានបញ្ចប់នូវហេដ្ឋារចនាសម្ព័ន្ធទូទៅ ដូចជា ការរៀបចំធ្វើផ្លូវ ប្រព័ន្ធលូរំដោះទឹក សួនច្បារ ប្រព័ន្ធភ្លើងបំភ្លឺផ្លូវ និងចាប់ផ្តើមសាងសង់គ្រប់ប្រភេទផ្ទះ ហើយបច្ចុប្បន្នកំពុងគ្រប់គ្រងគម្រោងទូទៅ ដូចជាសេវាសន្តិសុខ អនាម័យ និងការថែទាំជាដើម។ អគ្គនាយកក្រុមហ៊ុនវ្យាធបុរៈអភិវឌ្ឍន៍បន្តថា៖«គ្រប់សំណង់របស់យើងបានសិក្សាយ៉ាងលម្អិត ពីគុណភាពសំណង់ និងភាពរឹងមាំរបស់សំណង់នីមួយៗ ដោយក្រុមហ៊ុន មានវិស្វករជំនាញៗ ទាំងវិស្វករជាជនខ្មែរ និងបរទេស ជាពិសេសគ្រូវិស្វករដែលមានជំនាញខ្ពស់។»

បើតាមការបញ្ជាក់ពី លោកអគ្គនាយក វ្យាធបុរៈអភិវឌ្ឍន៍ បច្ចុប្បន្នគម្រោងភូមិឋានធម្មជាតិក្រុងភ្នំ មានចំនួន៣ គម្រោងធំៗ គឺ គម្រោង Natural Village គម្រោង The Box Villa និងគម្រោង MINI Villa ដែលនឹងត្រូវបើកនាពេលឆាប់ៗខាងមុខនេះហើយ។

ផ្ទះគម្រូប្រភេទ Mountain View

បន្ទាប់ពីការបង្កើតគម្រោងទាំង៣នេះ លោកអគ្គនាយកក៏បានបង្ហាញពី សក្តានុពលនាពេលអនាគតរបស់គម្រោងភូមិឋានក្រុងភ្នំថា៖« នាពេលបច្ចុប្បន្នតម្លៃផ្ទះនៅធូរថ្លៃ តែប្រសិនបើផ្លូវ៣៨ខ្សែដែលរាជរដ្ឋាភិបាលកំពុងសាងសង់នេះ រួមជាមួយនិងព្រលានយន្តហោះសៀមរាបថ្មីសាងសង់រួចរាល់នាថ្ងៃខាងមុខដ៏ខ្លីនេះ តម្លៃអចលនទ្រព្យនៅក្នុងតំបន់ និងក្នុងគម្រោងនេះផ្ទាល់ នឹងផ្ទុះឡើងខ្លាំងជាក់ជាមិនខាន។»

សូមបញ្ជាក់ថាបច្ចុប្បន្ន ខេត្តសៀមរាបកំពុងសា្ថបនាផ្លូវក្នុងក្រុងចំនួន៣៨ខ្សែ ដែលមានប្រវែងសរុប១០៨,៧៤ គីឡូម៉ែត្រ ក្រោមទឹកប្រាក់សរុបប្រមាណ ១៥០លានដុល្លារ ខណៈមកទល់ពេលនេះរួចរាល់ចំនួន៣០ភាគរយហើយ៕

រដ្ឋាភិបាលចិនដាក់ចេញវិធានការយកពន្ធអចលនទ្រព្យដើម្បីទប់ស្កាត់ភាពជ្រួលច្របល់ក្នុងទីផ្សារ

ដោយៈ សុខុម

ក្រុងប៉េកាំងៈ ក្រុមនិយ័តករចិន កាលពីថ្ងៃអង្គារ ទី១១ ឧសភា បានបើកកិច្ចប្រជុំស្តីពីការកែទម្រង់ និងការងារសាកល្បងអនុវត្តការយកពន្ធលើអចលនទ្រព្យ ដែលគេមើលឃើញថាជាឧបករណ៍ដ៏មានឥទ្ធិពលមួយដើម្បីទប់ស្កាត់ភាពជ្រួលច្របល់នៅក្នុងទីផ្សារលំនៅដ្ឋាន។ នេះបើយោងតាមការចុះផ្សាយរបស់សារព័ត៌មាន CNA។

ក្រសួងហិរញ្ញវត្ថុចិន បានចេញសេចក្តីថ្លែងការណ៍មួយលើគេហទំព័ររបស់ខ្លួនថា អង្គភាពនានារបស់រដ្ឋាភិបាលរួមទាំងក្រសួងហិរញ្ញវត្ថុ ក្រសួងលំនៅដ្ឋាន និងអគ្គនាយកដ្ឋានពន្ធដារផង បានស្នើសុំមតិយោបល់ពីក្រុមតំណាងមកពីទីក្រុងមួយចំនួន ក្រុមអ្នកជំនាញ និងក្រុមអ្នកសិក្សាស្រាវជ្រាវអំពីការងារសាកល្បងអនុវត្តពន្ធលើអចលនទ្រព្យ។

ទោះជាយ៉ាងណា ក្រសួងនេះមិនបានបញ្ជាក់បន្ថែមអំពីចំណុចលម្អិតនៃកិច្ចប្រជុំនេះទេ។

ទីផ្សារអចលនទ្រព្យនៅប្រទេសចិន មានសន្ទុះកើនឡើងខ្លាំងយ៉ាងឆាប់រហ័សក្នុងឆ្នាំ២០២០ បន្ទាប់ពីផ្ទុះវិបត្តិកូវីដ-១៩។ ទោះជាយ៉ាងណា ការហក់ឡើងតម្លៃផ្ទះព្រមគ្នានៅក្នុងទីក្រុងធំៗមួយចំនួន និងដែលឥឡូវនេះកំពុងរាលដាលទៅដល់ទីក្រុងតូចៗ បានបង្កការព្រួយបារម្ភអំពីហានិភ័យហិរញ្ញវត្ថុ និងបញ្ហាសេដ្ឋកិច្ចរីកចម្រើនឆាប់រហ័សពេកដែលនាំឱ្យតម្លៃ ប្រាក់ខែ និងអត្រាការប្រាក់ ។ល។ កើនឡើង។

អ្នកនាំពាក្យក្រសួងហិរញ្ញវត្ថុបានលើកឡើងកាលពីខែមុនថា ប្រទេសចិន នឹងជំរុញការដាក់ចេញច្បាប់ស្ដីពីពន្ធលើអចលនទ្រព្យ និងការធ្វើកំណែទម្រង់ដែលនឹងនាំឱ្យតម្លៃភាគហ៊ុនរបស់បណ្ដាក្រុមហ៊ុនអភិវឌ្ឍន៍អចលនទ្រព្យចិន ធ្លាក់ចុះ។

កាលពីខែមីនា ប្រទេសចិន បានលុបចោលការលើកឡើងអំពីពន្ធលើអចលនទ្រព្យនៅក្នុងផែនការអភិវឌ្ឍន៍សេដ្ឋកិច្ចឆ្នាំ២០២១ របស់ខ្លួនរយៈពេល២ឆ្នាំជាប់ៗគ្នា ស្របពេលដែលរដ្ឋាភិបាលផ្តោតលើការជំរុញការប្រើប្រាស់ដើម្បីបង្កើនសន្ទុះនៃការងើបឡើងសេដ្ឋកិច្ចពីវិបត្តិកូវីដ-១៩។

ទោះជាយ៉ាងណា សេចក្ដីព្រាងច្បាប់នេះនៅតែស្ថិតក្នុងផែនការអភិវឌ្ឍន៍សេដ្ឋកិច្ចរបស់ប្រទេសនេះសម្រាប់ឆ្នាំ២០២១-២០២៥ ដដែល៕

ក្រសួងទេសចរណ៍ៈ ត្រលប់ទៅអតីតកាលមួយសតវត្សរ៍មុន តើភ្នំបូកគោមានប្រវត្តិយ៉ាងណាខ្លះ?

ដោយៈ ប៊ី

ភ្នំពេញៈ ក្រសួងទេសចរណ៍ នៅថ្ងៃនេះ បានលើកយកប្រវិត្តិ “ភ្នំបូកគោ” ដែលជារមណីយដ្ឋានដ៏ពិសិដ្ឋមួយនៅកម្ពុជា ដើម្បពន្យល់បងប្អូនប្រជាពលរដ្ឋស្វែងយល់បន្ថែម។

ក្រសួងទេសចរណ៍បានរៀបរាប់ថា ស្ថិតក្នុងតំបន់ការពារធនធានធម្មជាតិរបស់ក្រសួងបរិស្ថាន ឧទ្យានជាតិព្រះមុនីវង្ស «បូកគោ» ទទួលបានភាពល្បីល្បាញយ៉ាងខ្លាំង ទាំងក្នុងវិស័យទេសចរណ៍ បរិស្ថាន បេតិកភណ្ឌ ជំនឿ ក៏ដូចជាប្រវត្តិសាស្ត្រជាដើម ខណៈរមណីយដ្ឋានដ៏ពិសិដ្ឋមួយនេះ គឺជាទីទស្សនាដ៏ចំណាស់ជាងគេមួយនៅប្រទេសកម្ពុជា ដែលបច្ចុប្បន្នបានទាក់ទាញភ្ញៀវទេសចរឱ្យចូលទស្សនាមកច្រើនជាហូរហែ (មុនពេលមានកូវីដ)។

ឧទ្យានជាតិព្រះមុនីវង្ស «បូកគោ» នេះទៀតសោត ក៏បានក្លាយជាផ្នែកមួយនៃឧទ្យានបេតិកភណ្ឌអាស៊ានតែមួយគត់នៅប្រទេសកម្ពុជា។ ក៏មានដែរនូវភស្តុតាងប្រវត្តិសាស្ត្រមួយចំនួន តាំងពីសម័យអាណានិគមនិយមបារាំង ដែលបានបន្សល់ទុកក្នុងអតីតព្រះរាជឧទ្យានមួយនេះ។

ឯកសារខ្លះបានបញ្ជាក់ថា ភ្នំបូកគោ ត្រូវបានអ្នកស្រាវជ្រាវខ្មែរ-បារាំង ដឹកនាំដោយលោក រូលួស (ជនជាតិបារាំង) ឡើងទៅដល់កំពូលភ្នំ នៅអំលុងគ្រិស្ដសករាជ ១៩១៧ ដោយពួកគេបានរកឃើញទីតាំងពិសេសៗជាច្រើន អមដោយបរិយាសកាសអំណោយផលចំពោះសុខភាព ក្រោមសម្ពាធបរិយាកាសត្រជាក់ស្រស់ស្រាយ។ ក្រោយពីរកឃើញទីតាំងដ៏សែនរមណីយមួយនេះហើយ រាជការខ្មែរបានសហការជាមួយរដ្ឋការអាណានិគមបារាំង រៀបចំអភិវឌ្ឍតំបន់នេះទៅជារមណីយដ្ឋានដ៏ពិសេសមួយ នៅអំលុងគ្រិស្ដសករាជ ១៩២២ ។ ពួកគេក៏បានកសាងព្រះវិហារកាតូលិក ឬ Church (ឆឺច) នៅអំឡុងគ្រិស្ដសករាជ ១៩២៨ ដែលជាវិហារគ្រិស្ដសាសនាដ៏កម្រមួយនៅក្នុងប្រទេសកម្ពុជា។

ដោយសារកត្តាធម្មជាតិ និងអាកាធាតុអំណោយផលដ៏ពិសិដ្ឋផងនោះ សូម្បីតែព្រះករុណា ព្រះបាទសម្ដេច ស៉ីសុវត្ថិ មុនីវង្ស ក៏ព្រះអង្គគាប់ព្រះរាជហឫទ័យជាខ្លាំងចំពោះរមណីយភាពនៅលើភ្នំបូកគោនេះដែរ ដោយព្រះអង្គបានកសាងព្រះរាជដំណាក់ជាច្រើនកន្លែងនៅលើភ្នំបូកគោនេះ។ ក្នុងគ្រិស្ដសករាជ ១៩២៤ ហ្លួងព្រះករុណា ព្រះបាទស៉ីសុវត្ថិ មុនីវង្ស បានចេញព្រះរាជឱង្កាឱ្យគេសាងសង់វត្ត និងព្រះវិហារព្រះពុទ្ធសាសនាមួយ ដោយក្រោយមកបានជាប់ឈ្មោះថា «វត្តសំពៅប្រាំ» ។ ប្រវត្តិសាស្ត្របានសរសេរថា ព្រះបាទស៉ីសុវត្ថិ មុនីវង្ស «ព្រះខត្តិយកោដ្ឋ» បានយាងសោយទិវង្គត ក្នុងព្រះរាជដំណាកលើភ្នំបូកគោនេះ នាចុងគ្រិស្ដសករាជ ១៩៤១ ។

ទំនងដោយសារព្រះរាជវត្តមានរបស់ព្រះករុណា ព្រះបាទសម្ដេច ស៉ីសុវត្ថិ មុនីវង្ស ដូច្នេះហើយ ទើបរាជការខ្មែរនាសម័យអាណានិគមបារាំងបានប្រសិទ្ធនាមទីនោះថា «ឧទ្យានជាតិព្រះមុនីវង្ស-បូកគោ» ជាដរាបរៀងមក។

ភ្ញៀវទេសចរនៅតែពេញនិយមទៅទស្សនា និងសម្រាកលម្ហែនៅរមណីយដ្ឋានភ្នំបូកគោរហូតដល់សម័យសង្គមរាស្ត្រនិយម ប៉ុន្តែរហូតដល់ទសវត្សរ៍ទី ៦០ រមណីយដ្ឋានភ្នំបូកគោនេះត្រូវបានបោះបង់ចោលដល់ទៅ ២ លើកឯណោះ ក្នុងនោះលើកទី១ នៅឆ្នាំ១៩៤០ និងលើកទី២ នៅឆ្នាំ១៩៧២ ។ នៅឆ្នាំ១៩៩៣ រាជរដ្ឋាភិបាលកម្ពុជាបានសម្រេចយកទីតាំងរមណីយដ្ឋានភ្នំបូកគោនេះ បង្កើតជាឧទ្យានជាតិមួយឡើងមានឈ្មោះផ្លូវការថា ឧទ្យានជាតិព្រះមុនីវង្ស «បូកគោ» ។ យោងតាមព្រះរាជក្រឹត្យ ចុះថ្ងៃទី០១ ខែវិច្ឆិកា ឆ្នាំ១៩៩៣ ដែលឡាយព្រះហស្តលេខាដោយព្រះបាទសម្ដេច ព្រះនរោត្តម សីហនុ «ព្រះបរមរតនកោដ្ឋ» បានកំណត់យកផ្ទៃដីនៃឧទ្យានជាតិភ្នំបូកគោនេះត្រឹមតែ ១៤០,០០០ ហិកតាប៉ុណ្ណោះ ដោយបានទុកតំបន់ទ្រនាប់ជាច្រើនអន្លើទៀត សម្រាប់ប្រជាជនរស់នៅជុំវិញទីនោះប្រមូលអនុផលធម្មជាតិ និងប្រកបរបរកសិកម្ម នេសាទជាដើម។

ចាប់ពីបង្កើតជាឧទ្យានជាតិនោះមក នៅលើបរិវេណភ្នំបូកគោមាននៅសេសសល់សំណង់ចម្រុះរចនាប័ទ្មបារាំង-ខ្មែរជាច្រើន ដែលបន្សល់ទុកកាលពីសម័យអាណានិគមបារាំង។ ចំពោះវិហារកាតូលិកដែលត្រូវបានកសាងឡើងនៅគ្រិស្ដសករាជ ១៩២៨ នោះ ត្រូវបានក្រសួងបរិស្ថានបានប្រគល់ឱ្យសមាគមគ្រិស្តបរិស័ទរៀបចំជួសជុលឡើងវិញ នៅឆ្នាំ២០១៧ ។ រីឯព្រះរាជដំណាក់ព្រះបាទ ស៉ីសុវត្ថិ មុនីវង្ស ក៏ត្រូវបានក្រុមហ៊ុន Sokha Hotel ជួសជុលកែលម្អជាសណ្ឋាគារផ្កាយ ៥ តាមលំនាំដើមវិញផងដែរ។ នៅឆ្នាំ២០១០ គេបានកសាងរូបសំណាក «លោកយាយម៉ៅ» ដ៏ធំមួយ មានកម្ពស់ ២៩ ម៉ែត្រ ដែលជារូបសំណាកខ្ពស់ជាងគេបំផុតនៅប្រទេសកម្ពុជា។

ក្រៅពីសំណង់សាសនា និងសម្បត្តិបេតិកភណ្ឌទាំងនេះ ភ្នំបូកគោក៏នៅមានទស្សនីយភាពធម្មជាតិជាច្រើនទៀត ដូចជា ទឹកជ្រោះពពកវិល បឹងទឹកសាប វាលស្រែមួយរយ វាលស្រែប្រាំរយ វាលផ្កាបំពង់ក្រឡោម ដែលឃើញមានដុះតែនៅតំបន់ឧទ្យានជាតិនេះតែមួយគត់។ ពិសេសលើសពីនេះទៀត ពពួកសត្វព្រៃ និងពពួកបក្សីជាច្រើនប្រភេទ ក៏មានវត្តមាននៅតំបន់នេះដែរ ដូចជា ពពួកពានរ ទោច ឈ្លួស ទន្សោង ស្ទាំង កងកេងធំ កងកេងតូចជាដើម។

លោកបណ្ឌិតថោង ខុនរដ្ឋមន្ត្រីក្រសួងទេសចរណ៍ ធ្លាប់បានមានប្រសាសន៍ថា ឧទ្យានជាតិព្រះមុនីវង្ស «បូកគោ» បានក្លាយជាមេដែកមួយយ៉ាងសំខាន់ក្នុងការទាក់ទាញភ្ញៀវទេសចរ ឱ្យមកទស្សនានៅក្នុង «ប៉ូលទេសចរណ៍តំបន់ឆ្នេរ» ផងដែរ។

ឧទ្យានជាតិព្រះមុនីវង្ស «បូកគោ» មានចម្ងាយប្រមាណ ៤៦ គីឡូម៉ែត្រពីទីរួមខេត្តកំពត។ ឧទ្យាននេះមានរយៈកម្ពស់ចន្លោះពី ៧៥០ ដល់ ១,០៧៥ ម៉ែត្រពីនីវ៉ូទឹកសមុទ្រ៕

រដ្ឋាភិបាលបានបើកកិច្ចពិភាក្សាដើម្បីជំរុញគម្រោងផ្លូវល្បឿនលឿនភ្នំពេញ-បាវិត

ដោយៈ ម៉ាណេត

ភ្នំពេញៈ លោកទេសរដ្ឋមន្ត្រីស៊ុន ចាន់ថុលរដ្ឋមន្ត្រីក្រសួងសាធារណការ និងដឹកជញ្ជូន កាលពីថ្ងៃទី១០ ខែឧសភា ឆ្នាំ២០២១ បានដឹកនាំកិច្ចប្រជុំគណៈកម្មការអន្តរក្រសួង ដើម្បីជំរុញដំណើរការអនុវត្តគម្រោងហេដ្ឋារចនាសម្ព័ន្ធផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងបាវិត ខេត្តស្វាយរៀង។

កិច្ចប្រជុំគណៈកម្មការអន្តរក្រសួងនេះ ស្តីពីការជំរុញដំណើរការអនុវត្តគម្រោងហេដ្ឋារចនាសម្ព័ន្ធផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងបាវិត ខេត្តស្វាយរៀង បានបង្ហាញឱ្យឃើញថា គម្រោង ផ្លូវល្បឿនលឿនតភ្ជាប់ពីរាជធានីភ្នំពេញ-បាវិត បាននិងកំពុងដំណើរការទៅមុខមួយជំហានទៀតហើយ។

ក្រុមហ៊ុន China Railway International Group Co., Ltd បានបង្ហាញរបាយការណ៍ស្តីពីលទ្ធផល នៃការសិក្សាបច្ចេកទេសនៃគម្រោងសាងសង់ហេដ្ឋារចនាសម្ព័ន្ធផ្លូវល្បឿនលឿនតភ្ជាប់ពីរាជធានីភ្នំពេញទៅក្រុងបាវិត បន្ទាប់ពីសិក្សារួចរាល។

យោងតាមរបាយការណ៍សិក្សារបស់ក្រុមហ៊ុនបានបង្ហាញកាលពីខែកញ្ញា ឆ្នាំ២០២០ឱ្យដឹងថា គម្រោងសាងសង់ផ្លូវនេះមានបីជម្រើស ផ្អែកតាមទីតាំងភូមិសាស្ត្រនិងផលប៉ះពាល់ ជាផ្លូវរចនាឡើងសម្រាប់ល្បឿនលឿនបំផុតត្រឹម១២០គីឡូ ម៉ែត្រក្នុងមួយម៉ោងស្របតាមអនុស្សរណៈយោគយល់រវាងកម្ពុជា និងវៀតណាម។

យោងតាមឯកសាររបស់ក្រសួងសាធារណៈការ និងដឹកជញ្ជូនបានឲ្យដឹងថា គម្រោងផ្លូវល្បឿនលឿនភ្នំពេញ-បាវិត (Phnom Penh-Bavet Expressway) ផ្លូវល្បឿនលឿនភ្នំពេញ-បាវិត ក៏ជាខ្សែផ្លូវថ្មីទាំងស្រុង ដែលមានប្រវែងសរុបប្រហែល ១៣៥ គ.ម។ ផ្លូវនេះត្រូវសាងសង់ជា៤គន្លង តួផ្លូវមានទទឹង ២៥,៥ ម៉ែត្រ។ ខ្សែផ្លូវនេះ នឹងចេញពីភ្នំពេញនៅចំណុចផ្លូវខ្សែក្រវ៉ាត់ក្រុងទី៣ កាត់តាមខេត្តកណ្តាល ខេត្តព្រៃវែង និងខេត្តស្វាយរៀង ឆ្ពោះទៅក្រុងបាវិត ព្រំដែនកម្ពុជា-វៀតណាម។

យោងតាមរបាយការណ៍សិក្សា របស់ទីភ្នាក់ងារសហប្រតិបត្តិការអន្តរជាតិជប៉ុន (JICA) ផ្លូវល្បឿនលឿននេះ ជាប្រភេទផ្លូវលើអាកាស (Viaduct) ប្រវែងប្រហែល ១២ គ.ម មានលូប្រអប់ (Box Culvert) ប្រវែងប្រហែល ២៨,៤ គ.ម និងជាប្រភេទ ផ្លូវលើកកម្ពស់ (Embankment) ប្រវែងប្រហែល៨៥,៨ គ.ម។ ផ្លូវល្បឿនលឿន ភ្នំពេញ-បាវិត មានផ្លូវបំបែក ប្តូរទិស (Inter-Change) ចំនួន៧កន្លែង កន្លែងឈប់សម្រាក៦កន្លែង និងច្រកទ្វារ ព្រំដែនថ្មីចំនួន១ផងដែរ។

គម្រោងសាងសង់ផ្លូវល្បឿនលឿនភ្នំពេញ-បាវិត ត្រូវបានបញ្ចប់ការសិក្សាសមិទ្ធិលទ្ធភាព និងកំពុងស្ថិតក្នុង ដំណាក់កាលពិភាក្សាលើតម្លៃនៃគម្រោង និងប្រភពថវិកា។

ក្រសួងសាធារណការ និងដឹកជញ្ជូន នៃព្រះរាជាណាចក្រកម្ពុជា និងក្រសួងដឹកជញ្ជូនរបស់ប្រទេសវៀតណាម ក៏បានចុះអនុស្សរណៈយោគយល់គ្នា ស្តីពីការជំរុញការសិក្សា និងសាងសង់ផ្លូវល្បឿនលឿនភ្នំពេញ-បាវិត និងផ្លូវល្បឿនលឿនហូជីមិញ-ម៉ុកបៃ រួចរាល់ផងដែរ៕

ការនាំចេញទៅកាន់ទីផ្សារអាមេរិកឈរក្នុងកំណើនខ្ពស់ដោយកម្ពុជាសម្រេចបានទំហំទឹកប្រាក់១៥០០លានដុល្លារអាមេរិក

ដោយគង់ សូរិយា

ភ្នំពេញៈ ការនាំចេញទំនិញពីកម្ពុជាទៅកាន់ទីផ្សារអាមេរិក នៅតែបង្ហាញសញ្ញាវិជ្ជមាន ដោយត្រីមាសទី១ឆ្នាំនេះ កម្ពុជាបាននាំចេញសម្រេចបានទំហំទឹកប្រាក់សរុបប្រមាណជិត ១ ៥០០ លានដុល្លារអាមេរិក កើនឡើងប្រមាណជាប់២០ភាគរយ ឈរក្នុងលំដាប់ទី១ នៃការនាំចេញផលិតផលពីកម្ពុជា។

យោងតាមទិន្នន័យរបស់អគ្គនាយកដ្ឋានគយ និងរដ្ឋាករ នៃក្រសួងសេដ្ឋកិច្ច និងហិរញ្ញវត្ថុ បានបង្ហាញឲ្យដឹងថា នៅក្នុងត្រីមាសទី១ ឆ្នាំ ២០២១ នេះ ការនាំចេញផលិតពីកម្ពុជាទៅកាន់ទីផ្សារសហរដ្ឋអាមេរិក មានតម្លៃគិតជាទឹកប្រាក់ជាង១៤៩៦ លានដុល្លារអាមេរិក កើនឡើងក្នុងរង្វង់ជិត២០ភាគរយធៀបនឹងឆ្នាំមុន ហើយស្មើនឹងប្រមាណជា៤០ភាគរយ នៃការនាំចេញផលិតផលសរុបទៅកាន់ទីផ្សារសំខាន់ៗដូចជា៖ ទីផ្សារសហគមន៍អឺរ៉ុប, អាស៊ាន, អង់គ្លេស ជប៉ុន និងការនាំចេញទៅកាន់ទីផ្សារផ្សេងៗទៀត។

អ្នកនាំពាក្យ និងជារដ្ឋលេខាធិការក្រសួងពាណិជ្ជកម្ម លោកសៀង ថៃបានមានប្រសាសន៍ឲ្យដឹងថា មុខទំនិញសំខាន់ៗដែលមានកំណើនមធ្យម ដោយមានទំហំទឹកប្រាក់ធំ នាំចេញទៅកាន់ទីផ្សារអាមេរិក នៅក្នុងត្រីមាសទី១ ឆ្នាំ ២០២១ មានដូចជា៖ សម្លៀកបំពាក់ ស្បែកជើង សំភារៈធ្វើដំណើរ កាបូបគ្រប់ប្រភេទជាដើម។

ក្រៅពីការនាំចេញមុខទំនិញខាងលើ កម្ពុជាក៏បាននាំចេញលើមុខទំនិញមួយចំនួនទៀត ដែលទំហំទឹកប្រាក់មិនសូវធំ តែមានការកើនឡើងខ្ពស់ដូចជា ការនាំចេញទោចក្រយាន សង្ហារឹម អំពូលអគ្គិសនី ខ្សែចម្លងអគ្គិសនី និងក្ដារកុងប្ល៉ាកេជាដើម។

លោកសៀង ថៃបានបញ្ជាក់ថា ការនាំចេញរបស់កម្ពុជាទៅកាន់សហរដ្ឋអាមេរិក ដែលមានកំណើនល្អ គឺបានកើតចេញពីការខិតខំបន្តអនុវត្តលើគោលការផ្សេងៗ នៃក្រសួង-ស្ថាប័នពាក់ព័ន្ធ របស់រាជរដ្ឋាភិបាលកម្ពុជា និងការពង្រីកកិច្ចសហប្រតិបត្តិការទ្វេភាគីជាដើម រួមជាមួយជឿទុកចិត្តពីអ្នកបញ្ជាទិញ ព្រោះកម្ពុជាបានបង្ហាញ ពីការកម្ពុជាអាចផ្គត់ផ្គង់ទំនិញបានទាន់ពេល និងគ្រប់ចំនួនតាមការបញ្ជាទិញ ហើយជាពិសេសក្នុងពេលកន្លងមកនេះ រដ្ឋមន្ត្រីក្រសួងពាណិជ្ជកម្ម ក៏បានអំពាវនាវឲ្យក្រុមហ៊ុនបញ្ជាទិញ សូមកុំបញ្ឈប់ការបញ្ជាទិញ និងសូមបន្តការបញ្ជាទិញទំនិញពីកម្ពុជា៕

រដ្ឋបាលរាជធានីភ្នំពេញបន្តដាក់ចេញវិធានការណ៍រដ្ឋបាល១សប្តាហ៍ទៀត ដើម្បីទប់ស្កាត់ការរីករាលដាលជំងឺកូវីដ

ដោយៈគង់ សូរិយា

ភ្នំពេញៈ រដ្ឋបាលរាជធានីភ្នំពេញនៅថ្ងៃទី១២ ខែឧសភា ឆ្នាំ២០២១នេះ បានចេញសេចក្តីសម្រេច ដាក់ចេញវិធានការរដ្ឋបាលបន្ត សម្រាប់ភូមិសាស្ត្ររាជធានីភ្នំពេញ ដើម្បីទប់ស្កាត់ការឆ្លងរាលដាលជំងឺកូវីដ១៩ ដោយបែងចែក “តំបន់ក្រហម” “តំបន់លឿងទុំ”និង “តំបន់លឿង” សម្រាប់រយៈពេល១សប្តាហ៍ទៀត គិតចាប់ពីម៉ោងសូន្យ ថ្ងៃទី១៣ ដល់ ថ្ងៃទី១៩ ខែឧសភា ឆ្នាំ២០២១ ។

យោងតាមសេចក្តីសម្រេចរបស់ លោក ឃួង ស្រេង អភិបាលរាជធានីភ្នំពេញ បានបញ្ជាក់ថា ខណ្ឌចំនួន៦ក្នុងរាជធានីភ្នំពេញ ត្រូវបានកំណត់ជា “តំបន់លឿង” រួមមានខណ្ឌចំការមន ខណ្ឌដូនពេញ ខណ្ឌសែនសុខ ខណ្ឌជ្រោយចង្វារ ខណ្ឌបឹងកេងកង និងខណ្ឌព្រែកព្នៅ។ ចំណែកផ្នែកខ្លះនៃភូមិសាស្ត្រខណ្ឌចំនួន៨ផ្សេងទៀត ត្រូវបានកំណត់ជា “តំបន់លឿងទុំ” និង “តំបន់ក្រហម”ដែលខណ្ឌទាំងនោះរួមមាន ខណ្ឌដង្កោ ខណ្ឌកំបូល ខណ្ឌ៧មករា ខណ្ឌច្បារអំពៅ ខណ្ឌទួលគោក ខណ្ឌពោធិ៍សែនជ័យ ខណ្ឌឫស្សីកែវ និងខណ្ឌមានជ័យ។

រដ្ឋបាលរាជធានីភ្នំពេញបានបញ្ជាក់ថា ក្នុងអំឡុងពេល នៃការអនុវត្តវិធានការរដ្ឋបាលបន្ត ចំពោះការកំណត់ភូមិសាស្ត្ររាជធានីភ្នំពេញ ជា «តំបន់ក្រហម» «តំបន់លឿងទុំ» និង “តំបន់លឿង” ត្រូវអនុលោមតាមគោលការណ៌ដូចជា ទី១ វិធានការដែលត្រូវអនុវត្តចំពោះ “តំបន់ក្រហម” ត្រូវអនុលោមតាមប្រការ៣ នៃសេចក្តីសម្រេចលេខ ១00/២១ សសរ ចុះថ្ងៃទី៥ ខែឧសភា ឆ្នាំ២០២១ របស់រដ្ឋបាលរាជធានីភ្នំពេញ ស្តីពីការដាក់ចេញ វិធានការរដ្ឋបាល សម្រាប់ភូមិសាស្ត្ររាជធានីភ្នំពេញ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ដោយបែងចែកជា “តំបន់ក្រហម” “តំបន់លឿងទុំ” និង “តំបន់លឿង” សម្រាប់រយៈពេល ៧ (ប្រាំពីរ)ថ្ងៃ គិតចាប់ពីម៉ោងសូន្យ នាថ្ងៃទី៦ ខែឧសភា ឆ្នាំ២០២១ រហូតដល់ថ្ងៃទី១២ ខែឧសភា ឆ្នាំ២០២១ ។

ទី២ វិធានការដែលត្រូវអនុវត្តចំពោះ “តំបន់លឿងទុំ” ត្រូវអនុលោមតាមប្រការ៤ នៃសេចក្តីសម្រេចលេខ ១០០/២១ សសរ ចុះថ្ងៃទី៥ ខែឧសភា ឆ្នាំ២០២១ របស់រដ្ឋបាលរាជធានីភ្នំពេញ ស្តីពីការដាក់ចេញ វិធានការរដ្ឋបាល សម្រាប់ភូមិសាស្ត្ររាជធានីភ្នំពេញ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ដោយបែងចែកជា “តំបន់ក្រហម” “តំបន់លឿងទុំ” និង “តំបន់លឿង”សម្រាប់រយៈពេល ៧ (ប្រាំពីរ)ថ្ងៃ គិតចាប់ពីម៉ោងសូន្យ នាថ្ងៃទី៦ ខែឧសភា ឆ្នាំ២០២១ រហូតដល់ថ្ងៃទី១២ ខែឧសភា ឆ្នាំ២០២១ ។

ទី៣ វិធានការដែលត្រូវអនុវត្តចំពោះ “តំបន់លឿង” ត្រូវអនុលោមតាមប្រការ៥ នៃសេចក្តីសម្រេចលេខ ១០០/២១ សសរ ចុះថ្ងៃទី៥ ខែឧសភា ឆ្នាំ២០២១ របស់រដ្ឋបាលរាជធានីភ្នំពេញ ស្តីពីការដាក់ចេញ វិធានការរដ្ឋបាល សម្រាប់ភូមិសាស្ត្ររាជធានីភ្នំពេញ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ដោយបែងចែកជា “តំបន់ក្រហម” “តំតំបន់លឿងទុំ” និង “តំបន់លឿង”សម្រាប់រយៈពេល ៧ (ប្រាំពីរ)ថ្ងៃ គិតចាប់ពីម៉ោងសូន្យ នាថ្ងៃទី៦ ខែឧសភា ឆ្នាំ២០២១ រហូតដល់ថ្ងៃទី១២ ខែឧសភា ឆ្នាំ២០២១ ៕

ការផ្តល់ឥណទានលើវិស័យអចលនទ្រព្យនៅកម្ពុជាសម្រេចបានទំហំទឹកប្រាក់ជាង៥ពាន់លានដុល្លារនៅត្រីមាសទី១ឆ្នាំនេះ

ដោយៈ ម៉ាណេត

ភ្នំពេញៈ ការផ្តល់ឥណទានលើវិស័យអចលនទ្រព្យ សម្រេចបានមានទំហំទឹកប្រាក់ប្រមាណ៥,៣៧ពាន់លានដុល្លារ ក្នុងរយៈពេល៣ខែដើមឆ្នាំនេះ។ នេះបើយោងតាមរបាយការណ៍ចុងក្រោយរបស់ក្រុមហ៊ុនក្រេឌីត ប្យួរ៉ូ ខេមបូឌា ខូ អិលធីឌី (CBC) ។

របាយការណ៍បានឱ្យដឹងថា នៅត្រីមាសទី១ ឆ្នាំ២០២១នេះ សមតុល្យឥណទានលក្ខណៈបុគ្គលមានចំនួន១០,៣៩ពាន់លានដុល្លារ។ កម្ចីអចលនទ្រព្យមានលើសពីពាក់កណ្តាល នៃសមតុល្យឥណទានលក្ខណៈបុគ្គលសរុប ស្មើនឹង៥១,៧២%ឬគិតជាទឹកប្រាក់ប្រមាណ៥,៣៧ពាន់លានដុល្លារ។

លោកអឿ សុធារ័ត្នប្រធាននាយកប្រតិបត្តិនៃក្រុមហ៊ុនក្រេឌីត ប្យួរ៉ូ ខេមបូឌា ខូ អិលធីឌីមានប្រសាសន៍ថា នៅក្នុងត្រីមាសទី១ នៃឆ្នាំ២០២១នេះ ដំណើរការទីផ្សារឥណទានបុគ្គលនៅកម្ពុជានៅតែរក្សារបានភាពរឹងមាំ ដោយសារតែការស្នើរសុំ និងដំណើរការឥណទានប្រចាំត្រីមាសនៅតែមានកំណើនជាបន្តបន្ទាប់។

លោកបានថ្លែងបន្តថា “យ៉ាងណាមិញអនុបាទនៃគណនីប្រាក់កម្ចី ជាមួយនឹងការសងយឺត៣០ថ្ងៃ ហួសកាលបរិច្ឆេទកំណត់ បានកើនឡើងដល់២,២៤% ដែលបង្ហាញពីការធ្លាក់ចុះបន្តិចនៃគុណភាពឥណទាន” ។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានថ្លែងប្រាប់ថា ដើម្បីឱ្យអចលលនទ្រព្យវិស័យនេះ នៅបន្តភាពរឹងមាំកាន់យូរតទៅទៀត យើងគួរតែជួយជំរុញការផ្តល់ឥណទាន ពាក់ព័ន្ធទៅនឹងវិស័យអចលនទ្រព្យនេះ តាមរយៈធនាគារ ឬធនាគារពាណិជ្ជ ដែលជាដៃគូរបស់រដ្ឋាភិបាល ដើម្បីផ្តល់កម្ចីទៅឱ្យអ្នក ដែលពាក់ព័ន្ធ មានលទ្ធភាពយកកម្ចីនេះប្រើប្រាស់បន្តទៀត ដូច្នេះវិស័យអចលនទ្រព្យនៅតែបន្តកំណើនរបស់ខ្លួន និងទ្រទ្រង់ទៅឱ្យផ្នែកផ្សេងៗទៀត។

លោកបានថ្លែងបន្តថា “ប្រាក់កម្ចីនៅតែបន្តកើតមាន ដូច្នេះចរន្តទិញលក់អចលនត្រព្យនៅតែមាន ទោះបីជាមានបញ្ហាប្រឈមនឹងវិបត្តិកូវីដ១៩ក៏ដោយ” ។ លោកបន្តថា “ទោះបីនាបច្ចុប្បន្ន លំហូរវិនិយោគពីប្រទេសត្រូវបានរាំងស្ទះ ដោយសារវិបត្តិកូវិដ១៩ ប៉ុន្តែវិនិយោគិនក្នុងស្រុកបាន និងកំពុងដើរតួនាទីយ៉ាងសំខាន់ ក្នុងការជំរុញវិស័យអចលនទ្រព្យឱ្យមានការរីកចម្រើន” ។

លោកបានថ្លែងបន្តទៀតថា ការជំរុញការផ្តល់កម្ចីដល់វិស័យអចលនទ្រព្យ នឹងជួយវិស័យមានការរីកលូតលាស់បានឆាប់រហ័យឡើងវិញ និងក៏ដូចចូលរួមចំណែកដល់សេដ្ឋកិច្ច បន្ទាប់ពីវិបត្តិកូវីដ១៩ ត្រូវបានគ្រប់គ្រង ឬបញ្ចប់ទាំងស្រុង៕

លោកស៊ុន ចាន់ថុលៈមជ្ឈមណ្ឌលភស្តុភារកម្មភ្នំពេញ ជាគំរោងយុទ្ឋសាស្ត្រមួយសំរាប់ចែកចាយទំនិញក្នុងតំបន់

ដោយៈគង់ សូរិយា

ភ្នំពេញៈ លោកទេសរដ្ឋមន្ត្រី រដ្ឋមន្ត្រីក្រសួងសាធារណៈការនិងដឹកជញ្ជូនបានអះអាងថា មជ្ឈមណ្ឌលភស្តុរកម្មភ្នំពេញ ជាគំរោងយុទ្ឋសាស្ត្រមួយសម្រាប់ចែកចាយទំនិញលើប្រព័ន្ឋដឹកជញ្ជូននានា ពិសេសកម្ពុជាស្ថិតនៅចំចំណុចកណ្តាល នៃបណ្តាប្រទេសក្នុងមហាអនុតំបន់ទន្មេមេគង្គ។

លោកបានថ្លែងក្នុងជំនួបជាមួយ លោកជំទាវ Teo Lay Cheng ឯកអគ្គរដ្ឋទូតសឹង្ហបុរី ដែលទើបតែងតាំងថ្មីកាលពីថ្ងៃទី១១ ឧសភាកន្លងមកថា ក្រសួងបានសម្រេចជ្រើសរើសក្រុមហ៊ុន YCH និង Infrastructure Asia (IA) របស់សាធារណរដ្ឋសិង្ហបុរី ជាដៃគូឯកជនដើម្បីសិក្សា និងអភិវឌ្ឍសំណើគម្រោង មជ្ឈមណ្ឌលភស្តុភារកម្មភ្នំពេញ (Phnom Penh Logistics Complex PPLC)និងភារកិច្ចរបស់ក្រសួងសាធារណការ និងដឹកជញ្ជូនក្នុងការដឹកនាំរៀបចំកិច្ចព្រមព្រៀងក្របខណ្ឌនេះ (Framework Agreement – FA) ជាមួយក្រុមហ៊ុនYCH និងក្រុមហ៊ុន IA ។

លោកទេសរដ្ឋមន្ត្រីបន្តថា “នេះជាគម្រោងយុទ្ធសាស្ត្រមួយ មានទីតាំងស្ថិតនៅចំកណ្តាលប្រទេស ជាមួយនឹងការគាំទ្រពីបណ្តាញផ្លូវជុំវិញទីក្រុងភ្នំពេញ ដើរតួនាទីក្នុងការចែកចាយទំនិញនៅក្នុងប្រទេស និងជាចំណុចតភ្ជាប់នៃការដឹកជញ្ជូនឆ្លងកាត់រួមមាន ផ្លូវថ្នល់ ផ្លូវដែក ផ្លូវទឹក និងផ្លូវអាកាស និងអាចបម្រើជាមណ្ឌល ដឹកជញ្ជូន និងភស្តុភារកម្មក្នុងតំបន់ផងដែរ ដោយហេតុថាកម្ពុជា មានទីតាំងភូមិសាស្ត្រស្ថិតនៅចំកណ្តាល ប្រទេសមហាអនុតំបន់ទន្លេមេគង្គ។

ជាមួយគ្នានេះ លោកទេសរដ្ឋមន្ត្រី ស៊ុន ចាន់ថុល ចាត់ទុកវត្តមានឯកអគ្គរដ្ឋទូតថ្មី សិង្ហបុរី ពិតជាមានសារៈ សំខាន់ខ្លាំងណាស់ដល់ការបន្តថែរក្សា និងលើកកម្ពស់ទំនាក់ទំនងមិត្តភាព និងកិច្ចសហប្រតិបត្តិការលើគ្រប់វិស័យរវាងកម្ពុជា-សិង្ហបុរីឱ្យកាន់តែរឹងមាំនិងរីកចម្រើនខ្លាំង។

លោកទេសរដ្ឋមន្ត្រី បានសម្តែងការស្វាគមន៍ និងអបអរសាទរយ៉ាងជ្រាលជ្រៅចំពោះលោកស្រីឯកអគ្គរដ្ឋទូត ដែលទើបទទួលបានតែងតាំងជាឯកអគ្គរដ្ឋទូតថ្មី នៃសាធារណរដ្ឋសិង្ហបុរីប្រចាំកម្ពុជា ដោយបានគូសបញ្ជាក់ថា “បេសកកម្មការទូតរបស់លោកជំទាវឯកអគ្គរដ្ឋទូតគឺពិតជាមានសារៈ សំខាន់ខ្លាំងណាស់ដល់ការបន្តថែរក្សា និងលើកកម្ពស់ទំនាក់ទំនងមិត្តភាព និងកិច្ចសហប្រតិបត្តិការលើគ្រប់វិស័យរវាងកម្ពុជា-សិង្ហបុរីឱ្យកាន់តែរឹងមាំ និងរីកចម្រើនខ្លាំងក្លាថែមទៀត” ។

លោកជំទាវ Teo Lay Cheng ឯកអគ្គរដ្ឋទូតសាធារណរដ្ឋសិង្ហបុរីប្រចាំនៅកម្ពុជា បានបង្ហាញបំណងបន្តពង្រឹង និងពង្រីកកិច្ចសហប្រតិបត្តិ រវាងប្រទេសទាំងពីរសិង្ហបុរី-កម្ពុជាឱ្យកាន់តែរឹងមាំ ឡើងថែមទៀត តាមរយៈបេសកកម្មការទូតរបស់លោកស្រីនេះ៕

ក្រសួងសាធារណការ សហការជាមួយក្រុមហ៊ុន China Great Wall ជំរុញការប្រើប្រាស់ប្រព័ន្ធជីភីអេស សម្រាប់បំពាក់លើយានយន្ត និងនាវា

ដោយៈគង់ សូរិយា

ភ្នំពេញៈ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានស្នើឲ្យក្រុមហ៊ុនសាជីវកម្ម China Great Wall Industry Corporation ជួយរៀបចំនិងជម្រុញការប្រើប្រាស់ប្រព័ន្ឋ GPS សម្រាប់បំពាក់លើយានយន្ត និងនាវានៅកម្ពុជា។

លោកទេសរដ្ឋមន្ត្រីបានលើកឡើងបែបនេះ ក្នុងឱកាសជួបពិភាក្សាការងារជាមួយនាយកក្រុមហ៊ុនសាជីវកម្ម China Great Wall Industry Corporation (CGWIC) និងគណៈប្រតិភូតាមប្រព័ន្ធវីដេអូពីចម្ងាយ ដោយមានការចូលរួមដោយផ្ទាល់ពីថ្នាក់ដឹកនាំក្រសួង និងភាគីពាក់ព័ន្ធផងដែរកាលពីថ្ងៃទី១១ ខែឧសភា ឆ្នាំ២០២១ នៅទីស្តីការក្រសួង។

ថ្លែងទៅកាន់អង្គប្រជុំនាឱកាសនោះ លោកទេសរដ្ឋមន្ត្រីបានសម្តែងនូវការអបអរសាទរយ៉ាងជ្រាលជ្រៅចំពោះមិត្តចិន ដែលសម្រេចបានជោគជ័យ ក្នុងការប្រកាសដាក់ឱ្យប្រើប្រាស់ជាផ្លូវការនូវប្រព័ន្ធផ្កាយរណប Beiduo GPS នៅទូទាំងពិភពលោក និងបានស្វាគមន៍ ចំពោះក្រុមហ៊ុនដែលត្រៀមបើកការិយាល័យ តំណាងរបស់ខ្លួនប្រចាំកម្ពុជា ដើម្បីការប្រើប្រាស់ប្រព័ន្ធផ្កាយរណប GPS នេះនៅក្នុងតំបន់អាស៊ាន ចូលរួមក្នុងការធានាសុវត្ថិភាព ការដឹកជញ្ជូន ទាំងផ្លូវគោក និងផ្លូវទឹក។

លោកស៊ុន ចាន់ថុលបានបន្តថា “ក្រសួងត្រៀមលក្ខណៈជាស្រេចក្នុងការ សហការលើការ ជំរុញការប្រើប្រាស់ប្រព័ន្ធផ្កាយរណប GPS Beidou នៅកម្ពុជាជាប្រយោជន៍ ដល់ការដឹកជញ្ជូន” ។

លោកបន្តថា ក្រសួងគ្រោងនឹងលើកយកប្រធានបទនេះ ទៅក្នុងកិច្ចប្រជុំរដ្ឋមន្ត្រីដឹកជញ្ជូនអាស៊ាន កិច្ចប្រជុំរដ្ឋមន្ត្រីដឹកជញ្ជូនអាស៊ានបូកកូរ៉េ កិច្ចប្រជុំរដ្ឋមន្ត្រីដឹកជញ្ជូនអាស៊ានបូកចិន និងកិច្ចប្រជុំរដ្ឋមន្ត្រីដឹកជញ្ជូនអាស៊ានបូកជប៉ុន ដែលកម្ពុជា គ្រោងធ្វើជាម្ចាស់ផ្ទះនៅក្នុងខែវិច្ឆិកា ឆ្នាំ២០២១ នៅលើទឹកដីអង្គរដោយផ្ទាល់ ប្រសិនបើស្ថានភាពជំងឺកូវីដ-១៩មានភាពធូរស្រាល ឬតាមប្រព័ន្ធវីដេអូពីចម្ងាយ។

ជាមួយគ្នានោះផងដែរ លោកទេសរដ្ឋមន្ត្រី បានសំណូមពរឱ្យក្រុមហ៊ុន ជំរុញការបំពាក់ BeiDou GPS ៥៥០គ្រឿងដែលបានគ្រោងទុកនោះ ឱ្យបានទាន់ពេលវេលា ដើម្បីក្រសួងអាចយកជាបទពិសោធន៍ និងមានមូលដ្ឋាន ដើម្បីជំរុញការប្រើប្រាស់នៅកម្ពុជា ព្រមទាំង អាចប្រើប្រាស់ដើម្បីពិភាក្សា ជាមួយរដ្ឋមន្ត្រីដឹកជញ្ជូនអាស៊ាននាចុងឆ្នាំ២០២១ខាងមុខនេះ។

ប្រព័ន្ធ Beidou GPS មានសារប្រយោជន៍អាចចូលរួមចំណែក ក្នុងការស្វែងរកដំណោះស្រាយ លើការកាត់បន្ថយគ្រោះថ្នាក់ចរាចរណ៍ ការដឹកជញ្ជូនទំនិញលើសទម្ងន់កម្រិត កំណត់ដោយច្បាប់ ការបើកបរហួសល្បឿនកំណត់ដោយច្បាប់ និងការតាមដានយានយន្តមិនចូលទៅក្នុងស្ថានីយថ្លឹងទម្ងន់ជាដើម។

តាមរយៈការប្រើប្រាស់បច្ចេកវិទ្យាខ្ពស់នៃប្រព័ន្ធ BeiDou GPS នឹងផ្តល់ ដង្ហើមជីវិតថ្មីទៅក្នុងការអភិវឌ្ឍសេដ្ឋកិច្ចនិងសង្គមនៅកម្ពុជា សមស្របជាមួយនឹងយុទ្ធសាស្ត្រចតុកោណ របស់រាជរដ្ឋាភិបាល និងយុទ្ធសាស្ត្រខ្សែក្រវាត់និងផ្លូវរបស់ប្រទេសចិនផងដែរ។

ក្រសួងសាធារណការ និងដឹកជញ្ជូន និងក្រុមហ៊ុនសាជីវកម្ម China Great Wall Industry Corporation (CGWIC) បានចុះហត្ថលេខាលើអនុស្សរណៈនៃការយោគយល់ ស្តីពីការជំរុញ ប្រព័ន្ធ BeiDou GPS បច្ចេកវិទ្យាចាប់រលកសញ្ញាពីចម្ងាយ (Remote Sensing) និងប្រព័ន្ធផែនទីផ្លូវថ្នល់នៅកម្ពុជា កាលពីថ្ងៃទី២៥ ខែវិច្ឆិកា ឆ្នាំ២០២០ ៕

សហគ្រិនខ្មែរ និង UNDP សហការបង្កើតភាពជាដៃគូយុទ្ធសាស្ត្រដើម្បីជំរុញការអភិវឌ្ឍ SMEs នៅកម្ពុជា

ដោយៈ ម៉ាណេត

ភ្នំពេញៈ សហគ្រិនខ្មែរ និងកម្មវិធីអភិវឌ្ឍន៍អង្គការសហប្រជាជាតិ (UNDP) នៅថ្ងៃទី១១ ខែឧសភា ឆ្នាំ២០២១ បានចុះកិច្ចព្រមព្រៀងភាពជាដៃគូយុទ្ធសាស្ត្រ ដើម្បីជំរុញការអភិវឌ្ឍសហគ្រាសធុនតូចនិងមធ្យម (SMEs) និងវិស័យពាណិជ្ជកម្មអេឡិចត្រូនិចនៅកម្ពុជា។

ភាពជាដៃគូថ្មីនេះរវាងសហគ្រិនខ្មែរ ដែលជាសា្ថប័នមួយស្ថិតនៅក្រោមក្រសួងសេដ្ឋកិច្ច និងហិរញ្ញវត្ថុ និង UNDP មានគោលបំណងគាំទ្រ ដល់ការអភិវឌ្ឍប្រកបដោយចីរភាព របស់សហគ្រាសធុនតូច និងមធ្យម និងធពាណិជ្ជកម្មអេឡិចត្រូនិចនៅកម្ពុជា ដូច្នេះវាជាកាតា្តលីករ សម្រាប់សហគ្រាសធុនតូច និងមធ្យម ដើម្បីជំរុញវត្តមានរបស់ពួកគេតាមប្រព័ន្ធអនឡាញ ផ្តល់សេវាកម្មថ្មីៗ និងកំណត់មធ្យោបាយ ដើម្បីធ្វើពាណិជ្ជកម្មអន្តរជាតិ។

កាលពីថ្ងៃទី២៣ ខែធ្នូ ឆ្នាំ២០២០ UNDP និងរាជរដ្ឋាភិបាលកម្ពុជា តាមរយៈក្រសួងពាណិជ្ជកម្ម បានរួមគ្នាបង្កើតជាសមាសធាតុសំខាន់មួយ នៃគម្រោងពន្លឿនការធ្វើពាណិជ្ជកម្ម តាមប្រព័ន្ធអេឡិចត្រូនិកនៅកម្ពុជា។ ភាពជាដៃគូរួមគ្នានេះ មានគោលបំណងជំរុញឱកាសក្នុងស្រុក និងអន្តរជាតិ សម្រាប់សហគ្រាសធុនតូច និងមធ្យមតាមរយៈវេទិកាឌីជីថល និងបង្កើតការងារថ្មីជាង១.០០០កន្លែងនៅឆ្នាំ២០២២ ។

នៅក្នុងគំនិតផ្តួចផ្តើមរួមគ្នានេះ សហគ្រាសធុនតូចនិងមធ្យមចំនួន១២៥ ត្រូវបានរំពឹងថានឹងទទួលបានជំនួយ និងការបណ្តុះបណ្តាលផ្នែកអេឡិចត្រូនិក តាមរយៈសហការផ្តល់មូលនិធិ ពីក្រសួងពាណិជ្ជកម្ម ក្របខ័ណ្ឌសមាហរណកម្មធ្វើឱ្យប្រសើរឡើង (EIF) រដ្ឋាភិបាលអូស្ត្រាលី និង UNDP ។

ជាមួយនឹងភាពជាដៃគូថ្មីនេះ និងមូលនិធិបន្ថែមពីសហគ្រិនខ្មែរ គម្រោងនេះត្រូវបានរំពឹងថា នឹងជំរុញការគាំទ្រសហគ្រាសធុនតូច និងមធ្យមចំនួន៥០ បន្ថែមទៀតនៅក្នុងសកម្មភាពគម្រោងចំនួនពីរ។ សកម្មភាពទាំងនេះ រួមមាន កម្មវិធីបណ្តុះបណ្តាល (បញ្ជាក់សហគ្រាសធុនតូច និងមធ្យមជាមួយនឹងការគាំទ្រជំនាញ និងការត្រៀមលក្ខណៈចាំបាច់) និងកម្មវិធីជំនួយខ្នាតតូច (គាំទ្រការផ្លាស់ប្តូរឌីជីថល)។

ភាពជាដៃគូនេះ នឹងពង្រឹងសមត្ថភាពដែលមានស្រាប់ ទាំងការគាំទ្របច្ចេកទេស និងហិរញ្ញវត្ថុ តាមរយៈការភ្ជាប់បណ្តាញសហគមន៍មូលដ្ឋាន និងជំនាញអន្តរជាតិ។ វាក៏នឹងលើកទឹកចិត្តដល់វិធីច្នៃប្រឌិតថ្មី នៃកម្មវិធីសម្រាប់ប្រព័ន្ធអេកូឡូស៊ីទាំងមូល តាមរយៈការគាំទ្រពីវិស័យឯកជន និងទីភ្នាក់ងារអភិវឌ្ឍន៍អន្តរជាតិ ដើម្បីជួយសហគ្រាសធុនតូចសហគ្រាសធុនតូចនិងមធ្យម និងអេឡិចត្រូនិកនៅកម្ពុជា។

លោកបណ្ឌិតឈាង វណ្ណមុនិណ្ឌអគ្គនាយកសហគ្រិនខែ្មរបានថ្លែងថា ជំងឺកូវីដ១៩ មានអត្ថប្រយោជន៍ ដែលមិនធ្លាប់មានពីមុនមក សម្រាប់អ្នកធ្វើគោលនយោបាយ និងអ្នកបង្កើតប្រព័ន្ធអេកូឡូស៊ី ដើម្បីរក្សាសហគ្រាសធុនតូចនិងមធ្យមឱ្យរីកចម្រើន និងបន្តរស់។

លោកបណ្ឌិតបានឱ្យដឹងថា ដោយមើលឃើញពីកាលៈទេសៈលំបាក ដែលបង្កឡើងដោយជំងឺកូវីដ១៩ តាមរយៈភាពជាដៃគូកម្មវិធីនេះ សហគ្រាសធុនតូចនិងមធ្យម ដែលមានលក្ខណៈសម្បត្តិគ្រប់គ្រាន់ នឹងមានឱកាសផ្សេងជាច្រើន ដើម្បីទទួលបានជំនួយ ដែលត្រូវបានផ្តល់ដោយសហគ្រិនខ្មែរ។

លោកបណ្ឌិតបន្តថា រចនាសម្ព័នកម្មវិធីនេះផ្តល់នូវយន្តការ ដែលមានប្រសិទ្ធភាពក្នុងការផ្តល់ថវិកា និងអាចបណ្តុះបណ្តាលសហគ្រាសធុនតូច និងមធ្យម ដើម្បីឯទៅរកការប្រើប្រាស់ប្រព័ន្ធឌីជីថល។ អន្តរាគមន៍បែបនេះនឹងចូលរួមចំណែក ក្នុងការពន្លឿនយុទ្ធសាស្ត្រចតុកោណរបស់រាជរដ្ឋាភិបាល ក្នុងការជំរុញសេដ្ឋកិច្ចឌីជីថល” ។

លោក Nick Beresford នាយក UNDP ប្រចាំកម្ពុជាបានថ្លែងថា “រួមគ្នាជាមួយក្រសួងពាណិជ្ជកម្ម UNDP មានបំណងគាំទ្រការងាររបស់សហគ្រិនខ្មែរ ក្នុងការផ្លាស់ប្តូរទៅរកសេដ្ឋកិច្ចផ្អែកលើឌីជីថល និងអេឡិចត្រូនិក” ។ លោកបន្តថា “នេះផ្តល់ឱកាសដល់អាជីវកម្មខ្នាតតូចនិងតូច ដើម្បីរីកលូតលាស់លឿន ផ្តល់ការងារ និងវិបុលភាពកាន់តែច្រើន ហើយធ្វើដូច្នេះ ជាមួយនឹងការការពារកាន់តែខ្លាំងប្រឆាំងនឹងកូវីដ១៩” ៕