ដោយៈឧត្តម

អារ៉ាប៊ីសាអូឌីតៈ ប្រភពព៌តមានជាក់លាក់បានទម្លាយឱ្យដឹងថា ក្រុមហ៊ុន Bechtel Corp. ដែលមានមូលដ្ឋាននៅសហរដ្ឋអាមេរិក និងក្រុមហ៊ុនអន្តរជាតិដទៃទៀត កំពុងទារលុយរាប់ពាន់លានដុល្លារ ដែលដ្ឋាភិបាលអារ៉ាប៊ីសាអ៊ូឌីត ជំពាក់ថ្លៃការងារសាងសង់ក្នុងគម្រោងផ្លូវរថភ្លើងក្រោមដីក្នុងទីក្រុងរីយ៉ាដ។ នេះបើយោងតាមសារព័ត៌មាន Aljazeera ចុះផ្សាយនៅថ្ងៃទី៦ មេសា នេះ។

រដ្ឋាភិបាលអារ៉ាប៊ីសាអូឌីត បានជំពាក់ក្រុមហ៊ុន Bechtel Corp. រហូតដល់ទៅប្រមាណ១ពាន់លានដុល្លារ ថ្លៃការងារសាងសង់ប្រព័ន្ធដឹកជញ្ជូន ដែលជាមូលដ្ឋាននៃកិច្ចប្រឹងប្រែងរបស់រដ្ឋាភិបាលប្រទេសនេះ ដើម្បីកែលម្អហេដ្ឋារចនាសម្ព័ន្ធក្រុងរីយ៉ាដ ដែលមានចរាចរណ៍ស្ទះកកកុញ។ ក្រុមហ៊ុនអនុវត្តន៍គម្រោងនេះ ដែលរួមមានក្រុមហ៊ុនបារាំង អេស្ប៉ាញ និងអ៊ីតាលី កំពុងព្យាយាមទារលុយជំពាក់ជាច្រើនពាន់លានដុល្លារ ដោយក្រុមហ៊ុន Bechtel Corp. មានចំនួនច្រើនជាងគេ។

ការទូទាត់យឺតយ៉ាវនេះ គឺដោយសារការពន្យារពេលសាងសង់ និងការចំណាយហួសកម្រិត បណ្តាលមកពីការឆ្លងរាតត្បាតវីរុសកូវីដ-១៩ ដែលបានធ្វើឱ្យកម្មករខ្លះត្រូវជាប់នៅខាងក្រៅប្រទេសនេះ ហើយបានជះផលប៉ះពាល់ ដល់ការអនុវត្តគម្រោងនេះឱ្យទាន់ពេលវេលា។ ជម្លោះជុំវិញការទូទាត់ប្រាក់នេះ បានបង្កឱ្យមានភាពតានតឹងផ្នែកការទូតកាលពីឆ្នាំមុន នៅពេលស្ថានទូតសហរដ្ឋអាមេរិក ស្ថានទូតបារាំង និងស្ថានទូតអេ    ស្ប៉ាញ នៅទីក្រុងរីយ៉ាដ បានលើកឡើងពីបញ្ហានេះ តាមរយៈលិខិតមួយច្បាប់ផ្ញើជូនរដ្ឋាភិបាលអារ៉ាប៊ីសាអូឌីត។

បណ្ដាក្រុមហ៊ុនម៉ៅការបានតវ៉ាជាច្រើនឆ្នាំមកហើយ អំពីការទូទាត់យឺតយ៉ាវនេះ ចាប់តាំងពីតម្លៃប្រេងដាំក្បាលចុះក្នុងឆ្នាំ២០១៥ បានជំរុញឱ្យរដ្ឋាភិបាលផ្អិបថវិកាទុករាប់សិបពាន់លានដុល្លារ ដើម្បីជួយទប់ឱនភាពថវិកា ដែលកំពុងប៉ោងឡើងកាន់តែធំ។ ប៉ុន្តែខណៈសេចក្តីសម្រេចនោះ បានជួយគ្រប់គ្រងការចំណាយរបស់រដ្ឋកុំឱ្យមានបញ្ហា វាបានធ្វើឱ្យប៉ះពាល់ដល់ទំនុកចិត្តរបស់វិស័យឯកជន ដែលពឹងផ្អែកយ៉ាងខ្លាំងទៅលើកិច្ចសន្យារបស់រដ្ឋាភិបាល។

ក្រុមមន្រ្តីនិយាយថា ពួកគេប្តេជ្ញាចិត្តធ្វើការទូទាត់ប្រាក់ ឱ្យបានទាន់ពេលវេលា ហើយបានចាត់វិធានការចាំបាច់នានា ដើម្បីដោះស្រាយបញ្ហានេះ។ ប៉ុន្តែការដាំក្បាលចុះនៃតម្លៃប្រេងឆៅកាលពីឆ្នាំមុន បានបណ្ដាលឱ្យមានការពន្យារពេលស្រដៀងគ្នា សម្រាប់ក្រុមហ៊ុនមួយចំនួន។

ទោះជាយ៉ាងណា ពេលទាក់ទងដើម្បីសុំការបំភ្លឺជុំវិញករណីនេះ ក្រុមហ៊ុន Bechtel Corp. មិនបានឆ្លើយតបនោះទេ។

គណៈកម្មាធិការក្រុងរីយ៉ាដ (Royal Commission for Riyadh City) ដែលគ្រប់​គ្រងគម្រោងនេះ បានចេញសេចក្តីថ្លែងការណ៍បំភ្លឺជុំវិញករណីនេះថា “ការទូទាត់ប្រាក់ទៅឱ្យក្រុមហ៊ុនម៉ៅការ ត្រូវបានធ្វើឡើងទាន់ពេលវេលា” ហើយ “ការអះអាងខាងលើនេះកំពុងត្រូវបានវាយតម្លៃ ទៅតាមដំណើរការដោះស្រាយជម្លោះ ដូចមានចែងក្នុងកិច្ចសន្យា”។

ក្រុមហ៊ុនផ្សេងៗទៀត ដែលចូលរួមក្នុងគម្រោងនេះ រួមមាន ក្រុមហ៊ុនអេស្ប៉ាញ Fomento de Construcciones & Contratas SA ក្រុមហ៊ុនអង់គ្លេស WS Atkins Ltd និងក្រុមហ៊ុនអ៊ីតាលី Salini Impregilo SpA។

គម្រោងផ្លូវរថភ្លើងក្រោមដីនេះ ពិតជាមានសារៈសំខាន់ណាស់ សម្រាប់ផែនការរបស់ព្រះអង្គម្ចាស់រាជទាយាទ Mohammed bin Salman នៅក្នុងការពង្រីកទំហំទីក្រុងនេះទ្វេដង និងប្រែក្លាយវាទៅជាមជ្ឈមណ្ឌលពាណិជ្ជកម្មអន្តរជាតិ។ ប្រភពដដែលបានបញ្ជាក់ថា វាស្ថិតក្នុងចំណោមគម្រោងប្រភេទនេះៗ ធំបំផុតនៅលើពិភពលោក ដោយផ្លូវរថភ្លើងក្រោមដី៦ខ្សែ កំពុងត្រូវបានសាងសង់ដោយក្រុមចំនួន៣ ហើយការងារសាងសង់សម្រេចបានប្រហែល៩០%ហើយ៕

        ដោយៈសហសេវិក

        ភ្នំពេញៈ រដ្ឋមន្រ្តីក្រសួងសុខាភិបាល លោកវេជ្ជបណ្ឌិត ម៉ម ប៊ុនហេង បានផ្ញើលិខិតមួយប្រាប់ដល់អភិបាលរាជធានី-ខេត្តទាំងអស់ ឱ្យត្រៀមបម្រុងក្រុមគ្រូពេទ្យ ដើម្បីថែទាំ និងព្យាបាលអ្នកជំងឺកូវីដ១៩ នៅតាមផ្ទះ ក្នុងមូលដ្ឋាន។

លិខិតជូនដំណឹងរបស់ក្រសទួងសុខាភិបាល ដែលបានចេញនៅថ្ងៃទី៦ មេសានេះ រដ្ឋមន្រ្តីក្រសួងសុខាភិបាល បានធ្វើឡើងបន្ទាប់ពីមានអនុសាសន៍ណែនាំរបស់ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ឱ្យក្រសួងសុខាភិបាល និងអ្នកពាក់ព័ន្ធគិតគូរ រៀបចំទុកជាមុន ពីលទ្ធភាពផ្តល់ការព្យាបាល នៅតាមផ្ទះសម្រាប់អ្នកជំងឺកូវីដ១៩ ដែលមានស្ថានភាពស្រាល។

លិខិតរបស់ លោករដ្ឋមន្រ្តីក្រសួងសុខាភិបាល បានបញ្ជាក់ថា ដើម្បីជួយសម្រាលបន្ទុកមន្ទីរពេទ្យរដ្ឋនានាក្នុងរាជធានី-ខេត្ត ក្រសួងស្នើឱ្យត្រៀមបម្រុងបង្កើតក្រុមគ្រូពេទ្យថែទាំ និងព្យាបាលនៅតាមផ្ទះ សម្រាប់អ្នកជំងឺកូវីដ១៩ ដែលគ្មានរោគសញ្ញា និងករណីជំងឺស្រាល ក្នុងលក្ខខណ្ឌដែលមានការរាតត្បាតធ្ងន់ធ្ងរជាយថាហេតុ ដែលហួសពីចំណុះមន្ទីរពេទ្យរដ្ឋ ឬកន្លែងព្យាបាលដែល រាជធានី-ខេត្តនីមួយបានរៀបចំរួចជាស្រេចហើយ។

លោកវេជ្ជបណ្ឌិតម៉ម ប៊ុនហេង បានបន្ថែមថា “ការត្រៀមបម្រុងនេះ ត្រូវយកក្រុមគ្រូពេទ្យ នៅតាមមូលដ្ឋានសុខាភិបាលផ្ទាល់របស់ខ្លួន ដោយរៀបចំជាក្រុម និងដឹកនាំដោយប្រធានការិយាល័យសុខាភិបាលស្រុកប្រតិបត្តិ”។

ក្រសួងសុខាភិបាល នឹងធ្វើការបណ្តុះបណ្តាលក្រុមគ្រូពេទ្យទាំងនោះ ដោយអនុវត្តតាមនីតិវិធីប្រតិបត្តិស្តង់ដារ (SOP) ដែលក្រសួងនឹងរៀបចំជូន។ នេះបើតាមការបញ្ជាក់បន្ថែមទៀតរបស់ លោក ម៉ម ប៊ុនហេតុ។

សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានធ្វើការណែនាំថ្មីមួយ ដោយឱ្យក្រសួងសុខាភិបាល និងអ្នកពាក់ព័ន្ធគិតគូរ និងរៀបចំទុកជាមុនពីលទ្ធភាពផ្តល់ការព្យាបាលនៅតាមផ្ទះសម្រាប់អ្នកជំងឺកូវីដ១៩ ដែលមានស្ថានភាពស្រាល។

ក្នុងសារសំឡេង ដែលត្រូវាបានចែកចាយលើបណ្តាញសង្គម នាព្រឹកថ្ងៃទី៦ ខែមេសា សម្តេចតេជោ បានចាត់ទុកនេះ គឺជាការគិតគូរ និងជាការរៀបចំផែនការទុកជាមុនក្នុងករណីអ្នកជំងឺកើនឡើងកាន់តែច្រើន ហើយមិនអាចមានទីតាំងសម្រាប់ព្យាបាល។

ការផ្តួចផ្តើមឱ្យគិតគូរព្យាបាលជំងឺតាមផ្ទះ ពីសំណាក់សម្តេចតេជោហ៊ុន សែន បានធ្វើឡើង បន្ទាប់ពីការឆ្លងរាលដាលនៃជំងឺកូវីដ១៩ ក្នុងព្រឹត្តិការណ៍សហគមន៍២០កុម្ភៈ នៅតែបន្តកើនឡើង។

គិតរហូតដល់ពេលនេះ កម្ពុជារកឃើញអ្នកឆ្លងជំងឺកូវីដ១៩ សរុបចំនួន២៨២៤នាក់ ក្នុងនោះព្យាបាលជាសះស្បើយចំនួន១៧៩៤ និងស្លាប់សរុប២២នាក់៕

        ដោយៈដែន ឧត្តម

ភ្នំពេញៈ ភ្នំនៅទឹកដីខេត្តកំពត មានភាពល្បីល្បាញជាងគេ នោះគឺភ្នំបូកគោ ដែលមានកំពស់ខ្ពស់ជាងគេ ។ ចម្ងល់នៅត្រង់ថាតើ់ខេត្តនេះមានភ្នំសរុបចំនួនប៉ុន្មានជាក់លាក់?។

យោងតាមរបាយការណ៍របស់ខេត្តបានឲ្យដឹងថា ​ខេត្តកំពតមាន​ចំនួន​១៤៧​ភ្នំ ដែលភ្នំ​ខ្លះ​មាន​អាជ្ញាប័ណ្ណ​ ធ្វើ​អាជីវកម្ម​ស្ទើរ​បាត់​រូបរាង ភ្នំ​ខ្លះ​កំពុង​ដាក់​គ្រឿង​បំផ្ទុះ​ធ្វើ​អាជីវកម្ម។

ខេត្តកំពត​មានស្រុក​ និង​ក្រុង​ចំនួន​៨ ដែល​មាន​ចំនួន​១៤៧​ភ្នំ  ដែលរាយប៉ាយនៅតាមបណ្តាក្រុង ស្រុកនានារបស់ខេត្តជាប់តំបន់ឆ្នេរមួយនេះ។

នៅ​ស្រុក​អង្គរ​ជ័យ​មាន​ភ្នំ​៦ គឺ​១-​ភ្នំ​ខ្ញា មាន​ការដ្ឋាន​ថ្ម​, ២-​ភ្នំ​ស្នាយ​អ​ញ្ជិ​ត មាន​ការដ្ឋាន​ថ្ម​របស់​យាយ​អ៊ុ​ន ។ ភ្នំ​មាន​ការដ្ឋាន​ថ្ម​ទាំង​២​នេះ​នៅ​ជិត​គ្នា ជិត​រលាយ​ហើយ ។ ៣-​ភ្នំ​កុង នៅ​ក្រោយ​សាលាស្រុក​មាន​គ្រឿងចក្រ​ជា​ច្រើន​កំពុង​កាយ​ក្រួស​ក្រហម។ ៤-​ភ្នំ​ត្នោត ក៏​មាន​កាយ​ដី​ក្រួស​ក្រហម​ដែរ ។ ៥-​ភ្នំ​សែន​ហាន វែង​ឆ្ងាយ​ណាស់​ជាប់​៥​គីឡូម៉ែត្រ មើលទៅ​ដាច់​កន្ទុយភ្នែក ។ ៦-​ជួរ​ភ្នំ​ច្រក​សៀម ។

ស្រុក​បន្ទាយមាស​មាន​ភ្នំ​ចំនួន​១១ គឺ​ទី​១-​ភ្នំ​ល្ងៀង ។ ២-​ភ្នំ​ស្ដេច​គង់ កំពុង​រង​ការ​ដាក់​គ្រឿង​បំផ្ទុះ ។ ៣-​ភ្នំ​រំពើន ។ ៤-​ភ្នំ​កន្លង់ ។ ៥-​ភ្នំ​ទទុង​ទូក​មាស រោងចក្រ​សុ​ី​ម៉​ង់​ត៍​។ ៦-​ភ្នំ​ទូក​មាស រោងចក្រ​សុ​ី​ម៉​ង់​ត៍ ។ ៧-​ភ្នំ​ច្រក​សៀម ។ ៨-​ភ្នំ​តូច ។ ៩-​ភ្នំ​កូន​សត្វ ។ ១០-​ភ្នំ​ច្រ​លួ​ញ កំពុង​ដាក់​បំផ្ទុះ ។ ១១-​ភ្នំ​ខ្លុង ។ ស្រុក​ដងទង់​មាន​ភ្នំ​ចំនួន​១៥គឺ​១-​ភ្នំ​តូច ។ ២-​ភ្នំស្រូវ រង​កា​ដាក់​គ្រឿង​បំផ្ទុះ ។ ៣-​ភ្នំ​ក្បាល​ទីង ។ ៤-​ភ្នំ​តា​សាក់ ។ ៥-​ភ្នំ​ប៉ា​ង​ហាង​ហៅ​ឡ​១០​។ ៦-​ភ្នំ​ទទឹងថ្ងៃ ។ ៧-​ភ្នំ​តា​សៀម ។ ៨-​ភ្នំ​ងោក​មាន​ថ្ម​ធ្យូង ។ ៩-​ភ្នំ​ត្រពាំង​ចក ។ ១០-​ភ្នំពេញ​មានឈ្មោះ​ដូច​ក្រុងភ្នំពេញ​ដែរ​ភ្នំ​នេះ​កំពុង​រង ការ​ដាក់​បំផ្ទុះ​ជិត​រលាយ​ហើយ ។ ១១-​ភ្នំ​ថ្ម​ដុប ។ ១២-​ភ្នំ​ល្អាង​រោងចក្រ​សុ​ី​ម៉​ង់​ត៍ ។ ១៣-​ភ្នំ​ត្រ​យឹ​ង ។ ១៤-​ភ្នំ​ទឹ​ព្វ រង​ការ​ដាក់​គ្រឿង​បំផ្ទុះ ។ ១៥-​ភ្នំ​តូច​ស្រ​ងឹល ។

ស្រុក​កំពង់ត្រាច​មាន​ភ្នំ​ចំនួន​១៦ មាន​ភ្នំ​រមណីយដ្ឋាន​កំពង់ ត្រាច ។ ២-​ភ្នំ​ថ្កូវ គេ​កាយ​យក​ក្រួស ។ ៣-​ភ្នំ​អង្គរ​ជ័យ គេ​កាយ​យក​ដី​ក្រួស​ជិត​រលាយ​ហើយ ។ ៤-​ភ្នំ​ស្រ​ង៉ា​ប​មាន​គេ​កាយ​ក្រួស ។ ៥-​ភ្នំ​លក ។ ៦-​ភ្នំ​ដំរី ។ ៧-​ភ្នំ​ទឹក ។ ៨-​ភ្នំ​ថ្មដា ភ្នំ​នេះ​មាន​គេ​លួច​កាយ​ក្រួស​លក់ ។ ៩-​ភ្នំ​តា​ម៉ុ​ក ។ ១០-​ភ្នំ​ប្រាសាទ ។ ១១-​ភ្នំ​សសៀ​មាន់ ។ ១២-​ភ្នំ ខ្យង ។ ១៣-​ភ្នំ​ស ។ ១៤-​ភ្នំ​គ្រោ​ល​គោ ។ ១៥-​ភ្នំ​បុណ្យ ។ ១៦-​ភ្នំ​ទទឹងថ្ងៃ ។

ស្រុក​ទឹកឈូ​មាន​ភ្នំ​ចំនួន​២៩ គឺ​ទី​១-​ភ្នំ​កំចាយ ។ ២-​ភ្នំ​សាលា​បុណ្យ ។ ៣-​ភ្នំ​កំបោ ។ ៤-​ភ្នំ​ទំនប់​ប្រទាក់​ក្រឡា ។ ៥-​ភ្នំ​កែវ ។ ៦-​ភ្នំ​ស្រ​ងិ​ល ។ ៧-​ភ្នំ​ដុប​ស្រឡៅ ។ ៨-​ភ្នំ​ខ្នុរ មានផ្ទះ​ជនជាតិ​បារាំង​ជា​ច្រើន ។ ៩-​ភ្នំ​ខ្ពប​ទ្វារ​ថ្វី ។ ១០-​ភ្នំ​គុក​ធ្យូង ។ ១១-​ភ្នំ​រោងចក្រ​សុ​ី​ម៉​ង់​ត៍​ចក្រី​ទីង ។ ១២-​ភ្នំ​បុស​ញិញ ។ ១៣-​ភ្នំ​តា​ប៉ុក ។ ១៤-​ភ្នំ​ប្រវឹក​ពង ។ ១៥-​ភ្នំ​ខ្ជាយ ។ ១៦-​ភ្នំ​ធំ ។ ១៧-​ភ្នំ​តូច ។ ១៨-​ភ្នំ​ដង​ន​ង្គ​ល​។ ១៩-​ភ្នំ​ឈ្ងោក​។ ២០-​ភ្នំ​កូន​សត្វ មាន​ចម្ការ​ម្រេច​រាប់រយ​ហិ​កតា និង​សំណង់​អត់​ច្បាប់ ។ ២១-​ភ្នំ​បទ​ទ្វារ​យាយ​ម៉ៅ​។ ២២-​ភ្នំ​បន្ទាយ​ចាស់​កាយ​ក្រួស ។ ២៣-​ភ្នំ​ឃ្លៃ​កាយ​ក្រួស ។ ២៤-​ភ្នំ​ត្នោត មាន​ការដ្ឋាន​ថ្ម​កាយ​ភ្នំ​យក​ថ្ម​ជម្រៅ​ជាប់​២០០​ម៉ែត្រ​ទៅ​ហើយ ។ ២៥-​ភ្នំ​ច​ង្ហោ​ន កាយ​យក​ថ្ម​ដែរ ។ ២៦-​ភ្នំ​ដង្កូវ​វែង ។ ២៧-​ភ្នំ​ស ។ ២៨-​ភ្នំ​ធ្លើ​យ និង​២៩-​ភ្នំ​ក្បាល​រមាស ។

ក្រុង​កំពត​មាន​ភ្នំ​ចំនួន​២ គឺ​ភ្នំ​កកេះ និង​ភ្នំ​ដូង នៅ​ជាប់មាត់​សមុទ្រ ។

ស្រុក​ជុំ​គឺ​រី​មាន​ភ្នំ​ចំនួន​៣៩១-​ភ្នំ​ដងរ៉ែក ។ ២-​ភ្នំ​ព្រះ​វិហារ ។ ៣-​ភ្នំ​ដំបង ។ ៤-​ភ្នំ​ពោត ។ ៥-​ភ្នំ​ស្រាប ។ ៦-​ភ្នំ តូច ។ ៧-​ភ្នំ​ចម្ការ​គរ ។ ៨-​ភ្នំ​តា​ទាន់ ។ ៩-​ជ្រោះ​ជ្រ​ឡូង ។ ១០-​ភ្នំ​យាយ​គង់ ។ ១១-​ភ្នំ​ជ្រោះ​ត្រាច ។ ១២-​ភ្នំ​ខ្នង​តា ម៉ុ​ក ។ ១៣-​ភ្នំ​គៀន​ម្កាក់ ។ ១៤-​ភ្នំ​ដាក់​ស្រូវ ។ ១៥-​ភ្នំ​ឆ្កែ​អើត ។ ១៦-​ភ្នំ​ថ្មគោល ។ ១៧-​ភ្នំ​ស្រាប​ច​ង្កែ​។ ១៨-​ភ្នំ​ថ្លាន់ ។ ១៩-​ភ្នំ​វាល​សំ​តូច ។ ២០-​ភ្នំ​ជ្រោះ​ជ្រៅ ។ ២១-​ភ្នំ​ស្រី​បុក​នំ ។ ២២-​ភ្នំ​អន្លង់​ដំរី ។ ២៣-​ភ្នំ​ចំបក់​ធំ ។ ២៤-​ភ្នំ​ស្រែ​សំ​ប៊ូ ។ ២៥-​ភ្នំ​លះបង់ ។ លោក កែប វ៉​ន មេឃុំ​ច្រេស និយាយ​ថា ភ្នំ​លះបង់​នេះ​កាល​ឆ្នាំ​១៩៧៩ ប្រជា​ពលរដ្ឋ​ស្លាប់​ច្រើន​ណាស់ ភាគច្រើន​ចាស់ជរា និង​កូន​ក្មេង ព្រោះ​ចាស់​ៗ​ឡើង​ភ្នំ​លះបង់​នេះ មិន​រួច ត្រូវ​គេ​ទុក​ចោល​ដាច់​បាយ​ស្លាប់​រួម​ទាំង​រថយន្ត និង​រទេះគោ​ផង​ដែរ ។

២៦-​ភ្នំ​ដំរី​រមៀល ។ ២៧-​ភ្នំ​តូច ។ ២៨-​ភ្នំ​តា កុ​ច ។ ២៩-​ភ្នំ​ថ្ម​ពូន ។ ៣០-​ភ្នំ​រកា​ធំ ។ ៣១-​ភ្នំ​រការ​តូច ។ ៣២-​ភ្នំ​ចំណុច ។ ៣៣-​ភ្នំ​អណ្ដើក​ធ្វើបុណ្យ ។ ៣៤-​ភ្នំ​ទ្វារ​ប្រាំបី ។ ៣៥-​ភ្នំ​កាត់​ច្រក ។ ៣៦-​ភ្នំ​បាញ់​ប្រើស ។ ៣៧-​ភ្នំ​ជ្រោះ​កណ្ដោល ។ ៣៨-​ភ្នំ​ទឹក​ចេញ ។ ៣៩-​ភ្នំ​ថ្ម​អាន ។

ស្រុក​ឈូក​មាន​ភ្នំ​ចំនួន​២៦១-​ភ្នំ​មានបុណ្យ ។ ២-​ភ្នំ​ត្នោត ។ ៣-​ភ្នំ​ពោត​អាចម៍ក្របី ។ ៤-​ភ្នំ​នា​រាយ ។ ៥-​ភ្នំ​កូន​ឆ្កែ ។ ៦-​ភ្នំ​ព្រៃ​ខ្មៅ ។ ៧-​ភ្នំ​ខ្នង​គោ​រត់ ។ ៨-​ភ្នំ​វិហារ​។ ៩-​ភ្នំ​កំបោរ ។ ១០-​ភ្នំ​បាញ់​ទន្សោង ។ ១១-​ភ្នំ​ជ្រោះ​កំពង់​សិលា ។ ១២-​ភ្នំ​ទទឹង ។ ១៣-​ភ្នំ​អូរ​ចោទ ។ ១៤-​ភ្នំ​ខ្នាយ​ជ្រូក​បី ។ ១៥-​ភ្នំ​កូន​បុណ្យ​។ ១៦-​ភ្នំ​ព្រះ ។ ១៧-​ភ្នំ​ធំ ។ ១៨-​ភ្នំ​ស្ពាន​យក្ស ។ ១៩-​ភ្នំ​ខ្នង​អា​រ៉ែ​ង ។ ២០-​ភ្នំ​ជាំ​ម្លូរ ។ ២១-​ភ្នំ​ចង​ឯក ។ ២២-​ភ្នំ​ជ្រោះ​ប្រ​ហូត​។ ២៣-​ភ្នំ​គ្រើល ។ ២៤-​ភ្នំ​ខ្នាច​កង្កែប ។ ២៥-​ភ្នំ​ឆ្កែ​កូន ។ ២៦-​ភ្នំ​វាល​ចំបក់ ។

ភ្នំ​ទាំងអស់​ដែល​បាន​រៀបរាប់​មកនេះ ​សុទ្ធតែ​មានការ​អះអាង​ពី​អាជ្ញាធរ​មូលដ្ឋាន និង​មន្ត្រី​ជំនាញ ​ដែល​មាន​ឯកសារ​កត់ត្រា​ប្រចាំ​មន្ទីរ។ ភ្នំ​ខ្លះ​ត្រូវ​បាន​ក្លាយជា​ដីចម្ការ​ស្វាយ​របស់​ឧកញ៉ា​ខ្លះ​ ដែល​ខំប្រឹង​ប្រែង​រំលោភ​យក​ដី​របស់​រដ្ឋ​ធ្វើ​ជា​កម្ម​សិទ្ធ។ ដោយឡែក​ឧទ្យាន​ជាតិ​ព្រះ​មុនី​វ​ង្យ​ភ្នំ​បូកគោ ​មិន​បាន​រាប់​បញ្ចូល​ទេ ។

ភ្នំ​ភាគច្រើន​មាន​ប្រវត្តិសាស្ត្រ និង​រឿងរ៉ាវ​ពី​បុរាណ​ដែល​មិន​អាច​ដកស្រង់​អស់។ ប៉ុន្តែ​ប៉ុន្មាន​ឆ្នាំ​ចុង​ក្រោយ​នេះ ភ្នំ​ខ្លះ​ត្រូវ​បាន​ធ្វើ​អាជីវកម្ម ដូច​ជា​ដាក់​គ្រឿង​បំផ្ទុះ​យក​ថ្ម​ផលិត​ស៊ីម៉​ង់​ត៍ ភ្នំ​ខ្លះ​គេ​អះអាង​ថា មាន​អាជ្ញាប័ណ្ណ ភ្នំ​ខ្លះ​ទៀត​ដាំ​ម្រេច កៅស៊ូ ស្វាយ និង​ទុរេន ជាដើម៕

        ដោយៈគង់ សូរិយា

        ភ្នំពេញៈ មន្រ្តីជាន់ខ្ពស់ក្រសួងរ៉ែ និងថាមពលបានថ្លែងថា រដ្ឋាភិបាលកំពុងខិតខំស្វះស្វែងរកអ្នកវិនិយោគក្នុង និងក្រៅប្រទេស ដើម្បីវិនិយោគលើ«រោងចក្រចម្រាញ់ប្រេងកាត»។ការស្វែករកនេះ បន្ទាប់ពីកម្ពុជាប្រកាសទទួលបានដំណក់ប្រេងដំបូង កាលចុងឆ្នាំ២០២០។

លោកជៀប សួរ អគ្គនាយកនៃអគ្គនាយកដ្ឋានប្រេងកាតនៃក្រសួងរ៉ែ និង ថាមពល បានថ្លែងប្រាប់ស៊ីស៊ីថាមស៍នៅថ្ងៃទី៥ ខែមេសា ឆ្នាំ២០២១កន្លងមកថា បច្ចុប្បន្នកម្ពុជាមានតែក្រុមហ៊ុនKrisenergyតែប៉ុណ្ណោះ ដែលកំពុងធ្វើការផលិតប្រេងនៅក្នុងប្លុកA ហើយក៏ពុំមានក្រុមហ៊ុនណាធ្វើសកម្មភាពទៀតទេ ដោយសារបញ្ហាកូវីដ១៩។

ទោះជាយ៉ាងណាក៏កម្ពុជា កំពុងតែជំរុញទាក់ទាញអ្នកវិនិយោគ ឲ្យមកដាក់ទុនវិនិយោគនៅក្នុងវិស័យនេះថែមទៀត ហើយខាងក្រសួងរ៉ែ និងថាមពលនឹងជួយសម្រួលដល់ក្រុមហ៊ុនដែលចង់មកវិនិយោគ និងធ្វើការសិក្សានៅកម្ពុជាផងដែរ។

លោកជៀប សួរបានបន្តថា បច្ចុប្បន្ននេះកម្ពុជាមានក្រុមហ៊ុនតែពីរប៉ុណ្ណោះ ដែលមានកិច្ចព្រមព្រៀងប្រេងកាត ទីមួយគឺក្រុមហ៊ុនKrisenergy ដែលកំពុងធ្វើការផលិត ប្រេង នៅក្នុងប្លុកA និងទីពី គឺក្រុមហ៊ុនមួយទៀត ដែលបានកិច្ចព្រមព្រៀងប្រេងកាតធ្វើការសិក្សាស្រាវជ្រាវនៅក្នុងប្លុកD ប៉ុន្តែក្រុមហ៊ុននេះ មិនទាន់អាចដំណើរការការសិក្សាស្វែងរុករកបាននៅឡើយទេដោយសារបញ្ហាកូវីដ១៩។

ទោះជាកម្ពុជាកំពុងផលិតប្រេងឆៅមែន តែកម្ពុជាក៏ពុំទាន់មានរោងចក្រចម្រាញ់ប្រេងកាត ដែលអាចចម្រាញ់ប្រេងលក់ នៅក្នុងទីផ្សាររបស់ប្រទេសកម្ពុជាបាននៅឡើយទេ។ ដូចនេះតម្លៃប្រេងដែលនាំចូលមកពីប្រទេសផ្សេងៗ យកមកលក់នៅក្នុងប្រទេសកម្ពុជា គឺវាអាស្រ័យទៅលើថ្លៃទីផ្សារជាអន្តរជាតិ ដែលប្រទេសនានានៅលើពិភពលោកក៏ជួបប្រទះដូចប្រទេសកម្ពុជា។

តាមរបាយការណ៍របស់ក្រុមហ៊ុន krisenergy ការផលិតប្រេងជាមធ្យមបានចំនួនប្រមាណ២.៨០០បារ៉ែលក្នុងមួយថ្ងៃ ហើយខាងក្រសួងកំពុងធ្វើការងានេះ ជាមួយក្រុមហ៊ុនKrisenergy ដើម្បីរកទីផ្សារលក់ប្រេងឆៅដែលផលិតបានទាំងនេះ។

ក្រសួងរ៉ែ និងថាមពលបានសម្តែងសុទិដ្ឋិនិយមថា ប្រេងឆៅដែលផលិតបាននេះនឹងជួយជំរុញអភិវឌ្ឍន៍វិស័យប្រេងកាត នៅក្នុងប្រទេសកម្ពុជាឲ្យរីកចំរើន ជួយទាក់ទាញអ្នកវិនិយោគបន្ថែមទៀត និងជាពិសេសគឺវានឹងបង្កើតចំណូល ដល់រាជរដ្ឋាភិបាលក្នុងការចូលរួមអភិវឌ្ឍសេដ្ឋកិច្ច ឲ្យកាន់តែរីកចម្រើនថែមទៀត ជាពិសេសវិស័យអាទិភាពគឺសុខាភិបាលនិងវិស័យអប់រំ៕

        ដោយៈគង់ សូរិយា

        ភ្នំពេញៈ ក្រសួងប្រៃសណីយ៍ និងទូរគមនាគមន៍បានស្នើដល់ម្ចាស់បុរី និងអគារខ្ពស់នានាទូទាំងប្រទេស កុំឲ្យផ្តល់សិទ្ឋផ្តាច់មុខដល់ក្រុមហ៊ុនសេវាកម្មអ៊ីនធើណេត និងក្រុមហ៊ុនទូរស័ព្ទណាមួយផ្តាច់មុខ។

ក្នុងសេចក្តីណែនាំនេះ ក្រសួងបានស្នើឲ្យម្ចាស់បុរី និងអាគារខ្ពស់ៗនានាចូលរួមអនុវត្តន៍គោលការណ៍ថ្មី៤ចំណុចសំខាន់ៗ ដើម្បីពង្រឹងគុណភាពសេវាទូរគមនាគមន៍កម្ពុជា។ នេះបើតាមសេចក្តីណែនាំ ស្តីពីវិធានការបង្កើនប្រសិទ្ធភាព និងពង្រឹងគុណភាពសេវាទូរគមនាគមន៍កាលពីថ្មីៗនេះ។ គោលការណ៍ទាំង៤នោះរួមមាន ទី១ មិនត្រូវចុះកិច្ចសន្យាផ្តល់សិទ្ធិផ្តាច់មុខ ជាមួយក្រុមហ៊ុនទូរស័ព្ទ និងអ៊ីនធឺណិត ណាមួយឡើយ។ ពោលគឺ ត្រូវបើកចំហរឱ្យអ្នករស់នៅក្នុងបូរី ឬខុនដូ មានសិទ្ធិជ្រើសរើសសេវាទូរស័ព្ទ និងអ៊ីនធឺណិតរបស់ក្រុមហ៊ុនណាក៏បានដោយខ្លួនឯង និងដោយសេរី។

ទី២ ត្រូវរៀបចំទីតាំងសម្រាប់សាងសង់ស្ថានីយអង់តែន ក្នុងបុរី ឬរៀបចំបង្គោល  ឱ្យរួចជាស្រេច ដើម្បីបង្កើនភាពងាយស្រួល ក្នុងការអូសខ្សែបណ្ដាញទូរស័ព្ទ ឬអ៊ីនធឺណិត។ ទី៣ ចំពោះអគារខ្ពស់ ត្រូវសហការជាមួយក្រុមហ៊ុនទូរគមនាគមន៍នានា (ទូរស័ព្ទ និងអ៊ីនធឺណិត ជាដើម) ដើម្បីបំពាក់ប្រព័ន្ធផ្តល់សេវាក្នុងអគារ (In-building Solutions)។

ទី៤ ម្ចាស់បុរី និងអគារខ្ពស់ ត្រូវចាត់ទុកថាសេវាទូរគមនាគមន៍នានា គឺជាសេវាចាំបាច់ ដូចគ្នានឹងសេវាអគ្គិសនី និងទឹកដែរ។

ក្រសួងប្រៃសណីយ៍ និងទូរគមនាគមន៍ បាននិងកំពុងខិតខំបញ្ចប់ការរៀបចំលិខិតបទដ្ឋានគតិយុត្តិ ទាក់ទិននឹងការពិន័យអន្តរការណ៍ និងទណ្ឌកម្មផ្សេងៗ លើក្រុមហ៊ុនទូរគមនាគមន៍ និម្ចាស់គម្រោងដែលមិនគោរពច្បាប់៕

ដោយៈ ប៊ី

ភ្នំពេញៈ មន្ត្រីជាន់ខ្ពស់នៃក្រសួងពាណិជ្ជកម្ពុជាបានបញ្ជាក់ថា ក្រុមហ៊ុនផលិតរថយន្ត អគ្គិសនីរបស់អាមេរិកTesla របស់លោក Elon Musk កំពូលមហាសេដ្ឋីលើពិភពលោក មិនទាន់មាននៅក្នុងបញ្ជីពាណិជ្ជកម្មរបស់ក្រសួងនៅឡើយទេ ប៉ុន្តែការលើកស្លាកនេះអាចជាអ្នកទទួលសិទ្ធិផ្តាច់មុខ ក្នុងការចែកចាយលក់នៅកម្ពុជា។

លោកប៉ែន សុវិជាតិអនុរដ្ឋលេខាធិការ និងអ្នកនាំពាក្យក្រសួងពាណិជ្ជកម្មបានថ្លែ​ងប្រាប់គេទំព័រPropertyarea.asia នៅថ្ងៃទី៦ ខែមីនា ឆ្នាំ២០២១ថា ចំពោះករណីដែលលេចឮពត៌មានក្នុងសង្គមហ្វេសប៊ុក និងបណ្តាញសារពត៌មានថា ក្រុមហ៊ុន TESLA ដែលជាក្រុមហ៊ុនផលិតរថយន្តអគ្គីសនី បានមកបោះទីតាំងនៅកម្ពុជា ដោយមានការលើកស្លាកសញ្ញាTESLAនៅទីតាំងតាមមហាវិថីសហព័ន្ធរុស្សីជាដើម ប៉ុន្តែក្រុមហ៊ុននេះមិនទាន់បានចុះបញ្ជីរជាផ្លូវការនៅកម្ពុជាទេ។

លោកបានថ្លែងថា “តាមការពិនិត្យជាក់ស្តែងក្នុងបញ្ជីពាណិជ្ជកម្ម ក្រុមហ៊ុន TESLA របស់មហាសេដ្ឋី Elon Musk មិនទាន់មាននៅក្នុងបញ្ជីពាណិជ្ជកម្មរបស់ក្រសួងនៅឡើយទេ”។ លោកបានថ្លែងទៀតថា ការលើកស្លាកនេះ អាចជាអ្នកទទួលសិទ្ធិផ្តាច់មុខ ក្នុងការចែកចាយលក់នៅកម្ពុជា (Exclusive distributor/dealership) ដែលទទួលសិទ្ធិបន្តពីតំណាងTELSA ក្នុងតំបន់ឬទទួលសិទ្ធិផ្ទាល់ពីម្ចាស់ដើម”។

ដូចករណីតំណាងចែកចាយរថយន្ត ម៉ាកផ្សេងទៀត ដូចជាMAZDA, Volvo, MITSHUBISHI ជាដើម ឬគ្រាន់តែជាអ្នកនាំចូលរថយន្តម៉ាកនេះ មកលក់ធម្មតា ហើយលើកស្លាកក្នុងបំណងផ្សព្វផ្សាយពាណិជ្ជកម្មលើទីផ្សារ។

លោកប៉ែន សុវិជាតិបានឱ្យដឹងទៀតថា ក្រសួងនឹងតាមដានបន្តទៅទៀតចំពោះករណីនេះ ប៉ុន្តែជារួមក្រសួងពាណិជ្ជកម្មស្វាគមន៍ នូវរាល់ការរីកចំរើនសម្បូរបែបនៃមុខទំនិញម៉ាកល្បីៗ ដែលចូលមកក្នុងទីផ្សារកម្ពុជា ដែលនេះជាសញ្ញាមួយនៃទំនុកចិត្តរបស់ធុរៈជននិងអាជីវកម្មធំៗ ដែលផ្តល់ការជឿជាក់មកលើបរិយាកាសធុរៈកិច្ច ប្រកបដោយតម្លាភាព និងស្ថេរភាពរបស់កម្ពុជា ហើយក៏ជាភស្តុតាងមួយ ដែលបង្ហាញថាទីផ្សារកម្ពុជាមានកម្លាំងទិញគ្រប់គ្រាន់ ដែលអាចស្រូបទាញទំនិញម៉ាកល្បីទាំងនេះ អោយចូលមកបាន។

លោកបានបញ្ជាក់ទៀតថា ចំពោះអ្នកទទទួលសិទ្ធិផ្តាច់មុខ ក្នុងការចែកចាយលក់រថយន្តTESLAនេះ ក្រសួងក៏បានពិនិត្យបញ្ជីទទួលតម្កល់សិទ្ធិផ្តាច់មុខ ខាងកម្មសិទ្ធិបញ្ញាដែរ ហើយបានរកឃើញថា ពុំទាមានបុគ្គលឬក្រុមហ៊ុនណា បានទទួលសិទ្ធិផ្តាច់មុខនិងបានយកមកតម្កល់នៅក្រសួងពាណិជ្ជកម្មនៅឡើយទេ ចំពោះទំនិញម៉ាក TESLAនេះ៕

ដោយៈឧត្តម

ប្រទេសចិនៈ មហាយក្សចិន បានកំញើញប្រទេសជប៉ុន កុំឱ្យលូកដៃចូល “កិច្ចការផ្ទៃក្នុង” របស់ខ្លួនដែលរួមមានបញ្ហាក្រុងហុងកុង  និងតំបន់ស្វយ័តស៊ីនជាំង (Xinjiang) ខណៈដែលនាយករដ្ឋមន្រ្តីជប៉ុន លោកYoshihide Suga ត្រៀមខ្លួនជួបជាមួយប្រធានាធិ​បតីសហរដ្ឋអាមេរិក លោក ចូ បៃឌិន នៅចុងខែនេះ។ នេះបើយោងតាមសារព័ត៌មាន The Edge Markets ចុះផ្សាយនៅថ្ងៃទី៦ មេសា នេះ។

យោងតាមសេចក្ដីថ្លែងការណ៍ របស់រដ្ឋាភិបាលក្រុងប៉េកាំង នៅថ្ងៃអង្គារទី៦ មេសា នេះឱ្យដឹងថា រដ្ឋមន្រ្តីការបរទេសចិន លោក វ៉ាង អ៊ី (Wang Yi) បានប្រាប់ទៅរដ្ឋមន្ត្រីការបរទេសជប៉ុន លោកToshimitsu Motegi ថា លោកសង្ឃឹមយ៉ាងមុតមាំថា ប្រទេសជប៉ុន នឹងអាចចាត់ទុកការអភិវឌ្ឍរបស់មហាយក្សចិនក្នុងផ្លូវវិជ្ជមាន។

ក្រសួងការបរទេសជប៉ុន បានចេញសេចក្ដីថ្លែងការណ៍ដាច់ដោយឡែកមួយថា លោ​កToshimitsu Motegi បានគូសបញ្ជាក់ជាថ្មីអំពីការព្រួយបារម្ភយ៉ាងខ្លាំងរបស់ប្រទេសជប៉ុន ចំពោះបញ្ហាមួយចំនួន រួមមាន ស្ថានភាពនៅក្រុងហុងកុង និងតំបន់ស្វយ័តស៊ីនជាំង ព្រមទាំងការអនុម័តរបស់មហាយក្សចិន នូវច្បាប់មួយដែលអនុញ្ញាតឱ្យឆ្មាំសមុទ្ររបស់ខ្លួនបាញ់ទៅលើនាវាបរទេសតាមអំពើចិត្ត។

នាយករដ្ឋមន្រ្តីជប៉ុន លោក Yoshihide Suga នឹងក្លាយជាមេដឹកនាំបរទេសដំបូងគេដែលនឹងជួបលោកចូ បៃឌិន ដោយផ្ទាល់ ហើយនេះឆ្លុះបញ្ចាំងពីការផ្តោតយកចិត្តទុក​ដាក់របស់សហរដ្ឋអាមេរិក លើការរក្សាទំនាក់ទំនងល្អជាមួយសម្ព័ន្ធមិត្តនៅក្នុងតំបន់ នៅពេលប្រទេសមហាអំណាចលេខ១ របស់ពិភពលោកមួយនេះ ព្យាយាមដាក់សម្ពាធលើមហាយក្សចិន កាន់តែខ្លាំងរាប់ចាប់ពីបញ្ហាគោរពសិទ្ធិមនុស្ស ការធ្វើពាណិជ្ជកម្មរហូតដល់ការស៊ើបអង្កេតរកប្រភពដើមនៃវីរុសកូវីដ-១៩។

លោក Yoshihide Suga បានទទួលរងសម្ពាធពីសមាជិកមួយចំនួននៅក្នុងគណបក្សកាន់អំណាចផ្ទាល់ខ្លួនរបស់លោក ដែលចង់ឱ្យប្រទេសជប៉ុន ដើរតាមគន្លងបណ្ដាប្រ​ទេសប្រជាធិបតេយ្យធំៗដទៃទៀត នៅក្នុងការដាក់ទណ្ឌកម្មលើមន្រ្តីចិន ដែលជាប់ពាក់ព័ន្ធនឹងការបង្ខិតបង្ខំមនុស្ស ឱ្យធ្វើការជាទម្ងន់នៅតំបន់ស៊ីនជាំង ជាពិសេសនៅមុនជំនួបកំពូលនៅសេតវិមាននាថ្ងៃទី១៦ ខែមេសា និងកិច្ចប្រជុំកំពូល G7 នៅប្រទេសអង់គ្លេស នាខែមិថុនា។

ប្រទេសជប៉ុនយល់ថា ខ្លួនកាន់តែពិបាកខ្លាំងឡើងៗ នៅក្នុងរក្សាតុល្យភាពនៃទំនាក់ទំនងរបស់ខ្លួនជាមួយសហរដ្ឋអាមេរិក ដែលជាសម្ព័ន្ធមិត្តយោធាតែមួយគត់របស់ខ្លួន និងមហាយក្សចិន ដែលជាដៃគូពាណិជ្ជកម្មដ៏ធំបំផុតរបស់ខ្លួន។ ប្រទេសជប៉ុន បានបង្កើនវោហារសាស្ត្ររបស់ខ្លួនកាន់តែខ្លាំងឡើង នៅពេលរដ្ឋការរបស់លោកចូ បៃឌិន បានបង្ហាញសញ្ញាពីការយកចិត្តទុកដាក់ជាថ្មី លើបញ្ហាគោរពសិទ្ធិមនុស្សនៅក្នុងគោលនយោបាយការបរទេស ប៉ុន្តែប្រទេសនេះខ្វះក្របខណ្ឌគតិយុត្តិដើម្បីដាក់ទណ្ឌកម្ម។

សហរដ្ឋអាមេរិក ប្រទេសកាណាដា សហភាពអឺរ៉ុប និងប្រទេសអង់គ្លេស សុទ្ធតែបានដាក់ទណ្ឌកម្មលើមហាយក្សចិន ចំពោះការរំលោភសិទ្ធិមនុស្សធ្ងន់ធ្ងរ ប្រឆាំងក្រុមជនជាតិភាគតិចវីហ្គួ នៅតំបន់ស៊ីនជាំង ជាហេតុជំរុញឱ្យក្រុមសមាជិកសភា អំពាវនាវឱ្យប្រទេសជប៉ុន ដើរតាមគន្លងប្រទេសប្រជាធិបតេយ្យធំៗទាំងនោះ៕