ក្រុមហ៊ុន Zipmex ជួយសម្រួលការទូទាត់ការទិញខុនដូតាមរយៈ Crypto Currency ជាលើកដំបូងនៅអាស៊ីអាគ្នេយ៍

ដោយៈសុខុម

សិង្ហបុរី: យោងតាមគេហទំព័រ Business Times ឱ្យដឹងថា ក្រុមហ៊ុនប្ដូររូបិយប័ណ្ណអេឡិចត្រូនិក Zipmex ដែលមានទីស្នាក់ការកណ្ដាល នៅប្រទេសសិង្ហបុរីបានប្រកាសថា ខ្លួននឹងជួយសម្រួលការទូទាត់ថ្លៃខុនដូប្រណីត ជាមួយរូបិយប័ណ្ណអេឡិចត្រូនិក (Cryptocurrency) ដំបូងបង្អស់នៅអាស៊ីអាគ្នេយ៍។

ក្រុមហ៊ុន Zipmex បាននិយាយកាលពីថ្ងៃពុធ ទី១២ ឧសភាថា ខ្លួនបានចាប់ដៃគូសហការ ជាមួយក្រុមហ៊ុនថៃ One.Six Development ជាក្រុមហ៊ុនស្ថិតនៅពីក្រោយគម្រោងខុនដូប្រណីត មានឈ្មោះថា The Strand ដើម្បីជួយសម្រួលដល់ការទូទាត់ ដោយរូបិយប័ណ្ណអេឡិចត្រូនិកលើអនឡាញ Platform របស់ក្រុមហ៊ុន Zipmex។

លោក Marcus Lim នាយកប្រតិបត្តិក្រុមហ៊ុន Zipmex បានលើកឡើងថា “ជាមួយនឹងការបន្ថែមក្រុមហ៊ុន One.Six ទៅក្នុងបណ្ដាញទូទាត់ ZipSpend របស់យើងនឹងផ្លាស់ប្ដូរបទពិសោធន៍ទិញអចលនទ្រព្យ។ លោកបន្តថា “ពេលខ្លះការផ្ទេរប្រាក់តាមធនាគារក្នុងទំហំនេះ អាចចំណាយពេលច្រើនថ្ងៃ ប៉ុន្តែការទូទាត់ដោយរូបិយប័ណ្ណអេឡិចត្រូនិក មិនថាទំហំប៉ុណ្ណានោះទេ គឺចំណាយពេលធ្វើប្រតិបត្តិការតែប៉ុន្មានវិនាទី ហើយត្រូវបាន Confirm (បញ្ជាក់ថាប្រតិបត្តិការត្រឹមត្រូវ) តែក្នុងរយៈពេលប៉ុន្មាននាទីប៉ុណ្ណោះ។

ក្រុមហ៊ុន Zipmex ក៏បានជួយសម្រួលការទូទាត់ថ្លៃទិញរថយន្ត Lamborghini និងរថយន្ត Tesla ជាមួយរូបិយប័ណ្ណអេឡិចត្រូនិក Bitcoin ដំបូងបង្អស់នៅអាស៊ីផងដែរ។ ZipSpend ដែលជាបណ្តាញទូទាត់របស់ក្រុមហ៊ុន Zipmex ក៏អនុញ្ញាតឱ្យអ្នកស្រលាញ់ចូលចិត្តសិល្បៈគំនូរទិញផ្ទាំងគំនូរ ឬវត្ថុសិល្បៈដោយទូទាត់ ដោយរូបិយប័ណ្ណអេឡិចត្រូនិកផងដែរ។

Platform ទូទាត់មួយនេះ បានធ្វើប្រតិបតិ្តការទូទាត់ ក្នុងទំហំសរុបជាង១ពាន់លានដុល្លារអាមេរិក ចាប់តាំងពីដំណើរការកាលពីចុងឆ្នាំ២០១៩ ។

លោក Chawin Athakravisunthorn នាយកគ្រប់គ្រងក្រុមហ៊ុន One.Six Development បានលើកឡើងថា ការចាប់ដៃគូសហការជាមួយ Zipmex ដោយទទួលយករូបិយប័ណ្ណអេឡិចត្រូនិក គ្រាន់តែជាការចាប់ផ្ដើមប៉ុណ្ណោះ ព្រោះក្រុមហ៊ុនមានគោលដៅទាក់ទាញវិនិយោគិន នៅទូទាំងតំបន់អាស៊ី-ប៉ាស៊ីហ្វិក សម្រាប់គម្រោងរបស់ខ្លួននាពេលអនាគត៕

តើអ្នកណាជាអ្នកមានប្រៀបក្នុងកំឡុងវិបត្តិកូវីដ១៩ ខណៈអ្នកលក់អចលនទ្រព្យនៅតែចង់បានតម្លៃថ្លៃ

ដោយៈ វឌ្ឈនៈ

ភ្នំពេញៈ នៅក្នុងវិបត្តិនៃជំងឺកូវីឌ១៩ និងឈានទៅដល់វិបត្តិសេដ្ឋកិច្ច និងអចលនទ្រព្យផងដែរនោះ ការទិញលក់អចលនទ្រព្យ ហាក់ដូចជាមិនសូវត្រូវរ៉ូវគ្នាប៉ុន្មាននោះទេ ពោលអ្នកទិញចង់បានតម្លៃទាប ចំណែកឯអ្នកលក់វិញក៏ចង់បានតម្លៃខ្ពស់ ដើម្បីបានប្រាក់ចំណេញច្រើន ទោះបីជាក្នុងពេលនេះខ្លួនកំពុងត្រូវការទុនដើម្បីដោះស្រាយក្ដី។

លោកឌឹត ចណ្ណា ប្រធានក្រុមហ៊ុនអចលនទ្រព្យឡាក់គីឱ្យដឹងថា ទោះបីជាមានវិបត្តិដោយសារតែកូវីដក្តី និងបានធ្វើឱ្យដំណើរការនៃសេដ្ឋកិច្ចគាំង ក្នុងវិស័យអចលនទ្រព្យផងដែរក៏ដោយ តែបើក្រលេកទៅមើលតម្លៃនៃអចលនទ្រព្យវិញ នៅតែខ្ពស់ដដែលដោយមិនមានការធ្លាក់ចុះនោះទេ។

លោកបន្តថា “អ្នកទិញចង់បានអចលនទ្រព្យ ដែលមានតម្លៃទាបជាងទីផ្សារ តែអ្នកលក់ក៏មិនបញ្ចុះតម្លៃច្រើន ទៅតាមការចង់បានរបស់អ្នកទិញដែរក្នុងវិបត្តិនេះ ដែលធ្វើឱ្យការទិញលក់មិនសូវជាត្រូវរ៉ូវគ្នា” ។

លោកឌឹត ចណ្ណា បានបន្តថា អ្នកទិញគេអាងថាលុយគេនៅក្នុងខ្លួនគេ ហើយអត់បញ្ចេញក៏អត់មានអ្វីត្រូវខាតដែរ ហើយអ្នកលក់ក៏គិតថារបស់គេនៅតែរបស់គេ បើគេមិនលក់ក៏មិនបាត់បង់ដែរ គឺនៅតែជារបស់គេ ចាំពេលផុតវិបត្តិចាំលក់ក៏មិនខាត តែសម្រាប់អ្នកដែលត្រូវការលក់បន្ទាន់គេ ក៏បានបញ្ចុះតម្លៃមួយកម្រិតដើម្បីឱ្យត្រូវថ្លៃគ្នា ទើបធ្វើឱ្យតម្លៃអចលនទ្រព្យខ្លះ មើលទៅទាបជាងទីផ្សារបន្តិចតែវាមិនទូទៅនោះទេ។

ដោយឡែកលោកកែវ សុជាតិ ភ្នាក់ងារអចលនទ្រព្យមួយរូបនៅខេត្តកំពតបាននិយាយថា ការទិញលក់ដីធ្លីនៅក្នុងខេត្តកំពត អ្នកទិញទាមទារឱ្យម្ចាស់ដីបញ្ចុះតម្លៃ៤០ទៅ៥០ភាគរយទើបគេព្រមទិញ។ ចំណែកអ្នកលក់គាត់អាចមានលទ្ធភាព បញ្ចុះត្រឹម១០ទៅ២០ភាគរយ ហើយតំបន់ខ្លះអាចបញ្ចុះដល់ទៅ៣០ភាគរយ។

តែសម្រាប់តំបន់ណា ដែលអ្នកទិញចង់បាន គេអាចត្រូវរ៉ូវគ្នាត្រឹមបញ្ចុះ២០ភាគរយក៏យកដែរ ។

លោកសុជាតិបានបន្តថា អ្នកទិញខ្លះទៀតចង់បានការបញ្ចុះតម្លៃច្រើនហើយ ត្រូវរើសមើលទីតាំងទៀត តំបន់ណាល្អទើបគេព្រមទិញហើយ ត្រូវបញ្ចុះតម្លៃច្រើនតាមការចង់បានរបស់គេ ទើបធ្វើឱ្យការទិញលក់មួយរយៈកន្លងមក មិនសូវមានការត្រូវគ្នារវាងអ្នកទិញនិងអ្នកលក់។

លោកបន្តថា “អ្នកស្វែងរកទិញដីសម្រាប់វិនិយោគពិតៗ គេនៅតែស្វែងករកនិងទិញនូវទីតាំងណាដែលគេគិតថា ស័ក្ដិសមសម្រាប់គេវិនិយោគិនៅពេលអនាគត ទោះបីមិនមានការបញ្ចុះតម្លៃច្រើនក្ដី” ៕

ធនាគារហូឡង់ FMO ស្នើផ្តល់ឥណទាន២០លានដុល្លារដល់ធនាគារធំមួយនៅកម្ពុជា

ដោយៈ ម៉ាណេត

ភ្នំពេញៈ ប្រភពព័ត៌មានមួយបានឱ្យដឹងថា ធនាគារអភិវឌ្ឍន៍ហូឡង់ FMO បានស្នើសុំផ្តល់ឥណទាន (កម្ចី) ២០លានដុល្លារអាមេរិក ទៅឱ្យធនាគារស្ថាបនា ដែលជាធនាគារឈានមុខគេមួយរបស់ប្រទេសកម្ពុជា ទាក់ទងនឹងផលប័ត្រឥណទាន។ នេះបើយោងតាមការចេញផ្សាយរបស់គេទំព័រសារព័ត៌មាន Deal Street Asia នៅថ្ងៃ១២ ខែឧសភា ឆ្នាំ២០២១ ។

FMO (ស្ថាប័នហិរញ្ញវត្ថុអភិវឌ្ឍន៍ប្រទេសហូឡង់) គឺជាធនាគារអភិវឌ្ឍន៍ហូឡង់ ដែលគាំទ្រការរីកលូតលាស់វិស័យឯកជន ប្រកបដោយនិរន្តរភាព ក្នុងការអភិវឌ្ឍ និងទីផ្សារកំពុងអភិវឌ្ឍ តាមរយៈការវិនិយោគសម្រាប់សហគ្រិនដែលមានមហិច្ឆតា។

FMO ជឿថាវិស័យឯកជនមួយ ដែលរឹងមាំនាំឱ្យមានការអភិវឌ្ឍសេដ្ឋកិច្ច និងសង្គម ការផ្តល់អំណាចដល់ប្រជាជន តាមរយៈការផ្តល់ការងារតាមជំនាញរបស់ពួកគាត់ និងបង្កើនកម្រិតជីវភាពរបស់ពួកគាត់។

FMO បានផ្តោតសំខាន់លើវិស័យបី ដែលមានឥទ្ធិពលដល់ការអភិវឌ្ឍខ្ពស់ រួមមានៈ ស្ថាប័នហិរញ្ញវត្ថុ, ថាមពល, និងវិស័យកសិពាណិជ្ជកម្ម ស្បៀងអាហារ និងទឹក ។ ផ្អែកលើទំហំវិនិយោគចំនួន៨,៨ពាន់លានអឺរ៉ូ FMO គឺជាធនាគារអភិវឌ្ឍវិស័យឯកជនទ្វេភាគីអឺរ៉ុបធំជាងគេមួយក្នុងចំណោមធនាគារធំៗទាំងឡាយ។

យ៉ាងណាក៏ដោយធនាគារនេះ មិនបញ្ជាក់ឲ្យដឹងពីឈ្មោះធនាគារនៅកម្ពុជា ដែលខ្លួននឹងផ្តល់កម្ចីជូននោះនៅឡើយទេ៕

តើអ្វីជាកម្មសិទ្ធិអចលនទ្រព្យ៦ប្រភេទ ដែលបានចែងនៅកម្ពុជា?

ដោយៈគង់ សូរិយា

ភ្នំពេញៈ ប្ររជាជនភាគច្រើនតែងតែយល់ថា កម្មសិទ្ធិអចលនវត្ថុមានតែ២ប្រភេទប៉ុណ្ណោះគឺ កម្មសិទ្ធិឯកជន និងកម្មសិទ្ធិរដ្ឋ ប៉ុន្តែបើយោងតាមច្បាប់ភូមិបាលឆ្នាំ២០០១ និងក្រមរដ្ឋប្បវេណីឆ្នាំ២០០៧ កម្មសិទ្ធិលើអចលនវត្ថុ ត្រូវបានបែងចែកជា៦ទម្រង់ឯណោះ។

តោះមកស្វែងយល់ទាំងអស់គ្នាថា តើមានប្រភេទអ្វីខ្លះ?

១) កម្មសិទ្ធិឯកជន

កម្មសិទ្ធិប្រភេទនេះ គឺកម្មសិទ្ធិលើទ្រព្យដែលយើងស្គាល់ទូទៅ ឧទាហរណ៍ដូចជាដី ឬផ្ទះ ដែលយើងកាន់កាប់ដោយមានប្លង់ត្រឹមត្រូវជាដើម។ តាមមាត្រា១៣៨ នៃក្រមរដ្ឋប្បវេណី បុគ្គលដែលមានបណ្ណកម្មសិទ្ធិ អាចប្រើប្រាស់ អាស្រ័យផល និងចាត់ចែងលើអចលនវត្ថុទាំងនោះស្របច្បាប់។

២) កម្មសិទ្ធិអវិភាគ

កម្មសិទ្ធិអវិភាគ គឺអចលនទ្រព្យដូចជាដី ឬផ្ទះ ដែលមានម្ចាស់ច្រើនអ្នក ប៉ុន្តែទ្រព្យនោះមិនអាចពុះចែកគ្នាបានទេ។ និយាយឱ្យងាយយល់ ឧទាហរណ៍ ការចូលលុយគ្នាទិញផ្ទះមួយខ្នងចំនួន១០នាក់ ផ្ទះនោះមិនអាចពុះចែកគ្នាជា១០ បានទេ ហើយម្ចាស់ទាំង១០ ក៏នឹងទទួលបានប្លង់រឹងតែមួយសន្លឹកប៉ុណ្ណោះ។ ដូច្នេះបើចង់លក់អចលនទ្រព្យ គឺត្រូវមានការយល់ព្រមពីម្ចាស់គ្រប់រូប។

ដូចគ្នានេះម្ចាស់ម្នាក់ៗ ក៏អាចលក់ចំណែករបស់ខ្លួនបាន ដូចការលក់ភាគហ៊ុនដូច្នោះដែរ ប៉ុន្តែត្រូវមានការយល់ស្របពីម្ចាស់ផ្សេងទៀត ហើយត្រូវយកប្លង់ទៅចុះឈ្មោះឡើងវិញជាមួយអាជ្ញាធរ។ ដូច្នេះ ក្នុងនាមជាអ្នកទិញ ជាបឋមអ្នកត្រូវចេះមើលចំណារនៅខាងក្រោយប្លង់រឹងនោះ ថាតើអចលនទ្រព្យនោះ ជាទ្រព្យអវិភាគឬយ៉ាងណា ហើយមានម្ចាស់ប៉ុន្មាននាក់។

ប៉ុន្តែមុននឹងសម្រេចចិត្តទិញ គួរសាកសួរទៅកាន់អាជ្ញាធរក្រសួងដែនដី ដើម្បីទទួលបានព័ត៌មានជាក់លាក់។

៣) សហកម្មសិទ្ធិ

ទ្រព្យសហកម្មសិទ្ធិ គឺជាទ្រព្យដែលមានម្ចាស់កម្មសិទ្ធិច្រើនអ្នក តែខុសពីទ្រព្យអវិភាគ ដោយទ្រព្យនោះត្រូវបានពុះជាកម្មសិទ្ធិឱ្យម្ចាស់ម្នាក់ៗ ហើយម្ចាស់ម្នាក់ៗមានប្លង់រឹងរៀងៗខ្លួន ប៉ុន្តែចំណែកដែលសេសសល់ជាចំណែករួម។ (មាត្រា១៧៥ នៃច្បាប់ភូមិបាល)និយាយឱ្យងាយយល់ គឺអចលនទ្រព្យសហកម្មសិទ្ធិ សំដៅលើខុនដូ ឬដីឡូតិ៍ជាដើម ដែលម្ចាស់ម្នាក់ៗមានប្លង់សម្រាប់យូនីតរៀងៗខ្លួន ប៉ុន្តែកន្លែងសាធារណៈដូចជា សួនច្បារ អាងហែលទឹក ឬជណ្ដើរយន្ត ជាកម្មសិទ្ធិរួមគ្នា មិនមែនជារបស់នរណាម្នាក់ទេ។

សហកម្មសិទ្ធករដែលកំពុងកាន់កាប់ ឬជួលអចិន្ត្រៃយ៍នៅលើចំណែកឯកជន នៃអគារសហកម្មសិទ្ធិនេះ ត្រូវមកដាក់ពាក្យស្នើសុំចុះបញ្ជី ជាមួយនឹងអាជ្ញាធរមានសមត្ថកិច្ច។

៤) កម្មសិទ្ធិសមូហភាព

កម្មសិទ្ធិសហគមន៍ ឬសមូហភាព សំដៅលើអចលនវត្ថុរបស់វត្តអារាម និងអចលនវត្ថុរបស់សហគមន៍ជនជាតិដើមភាគតិច។ អ្នកទិញត្រូវប្រុងប្រយ័ត្ន ព្រោះយោងតាមមាត្រា២០ និង២៣ នៃច្បាប់ភូមិបាលឆ្នាំ២០០១ អចលនទ្រព្យប្រភេទនេះ មិនអាចយកទៅលក់ ផ្លាស់ប្តូរ ធ្វើអំណោយ ឬកាន់កាប់ដោយបុគ្គលផ្សេងបានឡើយ។

ជាក់ស្ដែងនៅលើប្លង់រឹង(វិញ្ញាបនបត្រសម្គាល់ម្ចាស់អចលនវត្ថុ) នឹងមានការបញ្ជាក់ពីប្រភេទកម្មសិទ្ធិនេះ។

៥) កម្មសិទ្ធិសាធារណៈរបស់រដ្ឋ

ជាទ្រព្យសម្បត្តិសាធារណៈរបស់រដ្ឋ មានដូចជា ស្ពាន ផ្លូវ សួនច្បារ សាលារៀនរដ្ឋ មន្ទីរពេទ្យរដ្ឋ ប្រាសាទ បឹងបួរ ទន្លេ សមុទ្រ អគាររដ្ឋបាល ព្រៃឈើជាដើម។ តាមមាត្រា១៥ និង១៦ នៃច្បាប់ភូមិបាល ទ្រព្យនេះជាកម្មសិទ្ធិរួម សម្រាប់បម្រើប្រយោជន៍សាធារណៈជនទូទៅ ហើយមិនអាចលក់ដូរបានដាច់ខាត។

៦) កម្មសិទ្ធិឯកជនរបស់រដ្ឋ

ទ្រព្យឯកជនរបស់រដ្ឋ មានន័យថា គឺអចលនទ្រព្យដែលធ្លាប់ជារបស់រដ្ឋ ដែលត្រូវបានផ្ទេរទៅឱ្យឯកជន ក្នុងទម្រង់ផ្សេង។ ទ្រព្យសម្បត្តិប្រភេទនេះ ភាគច្រើនជាដីសម្បទានសេដ្ឋកិច្ច និងដីសម្បទានសង្គមកិច្ច ដែលរដ្ឋបានលក់ ឬជួលទៅឱ្យឯកជន។

ដូច្នេះ ក្រោយការផ្ទេរ ទ្រព្យនេះគឺអាចលក់ដូរ ជួល ឬផ្ទេរកម្មសិទ្ធិបាន តែត្រូវឋិតក្រោមការកំណត់របស់ច្បាប់ (មាត្រា១៦ ច្បាប់ភូមិបាល)៕

ក្រុមហ៊ុនពាណិជ្ជកម្មអាមេរិកធំមួយគ្រោងបើកការិយាល័យនៅកម្ពុជានិងបណ្តាប្រទេសមួយចំនួនក្នុងតំបន់

ដោយៈ ម៉ាណេត

ភ្នំពេញៈ ក្រុមហ៊ុនធ្វើពាណិជ្ជកម្មគ្រាប់ធញ្ញជាតិអាមេរិក ដែលមានអាយុកាលមួយសតវត្សរ៍ ត្រៀមមកវិនិយោគនៅអាស៊ី ហើយនឹងបើកការិយាល័យថ្មីជាច្រើននៅអាស៊ី ក្នុងនោះក៏មានកម្ពុជាផងដែរ ដោយសារកំណើនចំនួនប្រជាជននៅតំបន់នេះ នឹងជំរុញឱ្យមានតម្រូវការចំណីអាហារ និងចំណីសត្វ។ នេះបើយោងតាមការចេញរបស់សារព័ត៌មាន Bloomberg នៅថ្ងៃទី១២ ខែឧសភា ឆ្នាំ២០២១ ។

លោក Adrian Gasparian នាយកគ្រប់គ្រងក្រុមហ៊ុន Scoular Co ប្រចាំតំបន់អាស៊ីប៉ាស៊ីហ្វិកបានមានប្រសាសន៍ថា ក្រុមហ៊ុនបានពង្រីកអាជីវកម្មរបស់ខ្លួន ទៅកាន់ឥណ្ឌូនេស៊ី និងមីយ៉ាន់ម៉ា ហើយមានផែនការបើកការិយាល័យមួយទៀត នៅក្នុងតំបន់ក្នុងរយៈពេល១២ខែខាងមុខទៀត។

ក្រុមហ៊ុន ដែលមានមូលដ្ឋាននៅទីក្រុងអូម៉ាហា សហរដ្ឋអាមេរិក បច្ចុប្បន្នកំពុងធ្វើអាជីវកម្មនៅក្នុងប្រទេសទាំងពីរ ដោយផ្តោតលើការផ្គត់ផ្គង់ឧស្សាហកម្មម្ហូបអាហារ និងចំណីអាហារក្នុងស្រុក ដែលផលិតចេញពីសណ្តែកសៀង រហូតដល់ចំណីត្រី។

ទីផ្សារកសិកម្មនៅអាស៊ីកំពុងរីកចម្រើន ហើយប្រទេសចិនទិញបរិមាណពោត និងសណ្តែកសៀងអាមេរិកយ៉ាងច្រើន ដើម្បីផលិតជាចំណីជ្រូកជាដើម។ ប៉ុន្តែវាមិនត្រឹមតែប្រទេសចិនប៉ុណ្ណោះទេ ប្រទេសឥណ្ឌូនេស៊ី ក៏បានក្លាយជាប្រទេសនាំចូលធំលំដាប់ទី២ផងដែរ។ ពាណិជ្ជករក៏ត្រូវបានទាក់ទាញឱ្យមានកំណើនខ្ពស់ នៅក្នុងកន្លែង ដូចជាវៀតណាមនិងថៃផងដែរ។

លោក Gasparian បានថ្លែងថា “ប្រសិនបើអ្នកសម្លឹងមើល៥ឆ្នាំខាងមុខ រាប់ចាប់ពីពេលនេះ ខ្ញុំគិតថា យើងនឹងមានវត្តមាននៅកម្ពុជា វៀតណាម ថៃ កូរ៉េ និងហ្វីលីពីន” ។ លោកបន្តថា “ខ្ញុំគិតថា តំបន់អាស៊ីអាគ្នេយ៍ មានអត្រាកំណើនខ្ពស់ជាងនេះ ទាំងផលិតផលក្នុងស្រុក ចំណីអាហារ និងកំណើនឧស្សាហកម្មម្ហូបអាហារ។ ខ្ញុំគិតថា ផ្នែកខ្លះនៃអាស៊ីខាងជើងគួរឱ្យចាប់អារម្មណ៍ផងដែរ” ៕

អភិបាលខេត្តកំពង់ស្ពឺបង្ហាញពីសក្តានុពលធំៗចំនូន៥ ដែលខេត្តកំពង់ស្ពឺលែងត្រូវគេមើលរំលងនិងមើលងាយ

ដោយៈគង់ សូរិយា

កំពង់ស្ពឺៈ អភិបាលខេត្តកំពង់ស្ពឺ លោកវ៉ី សំណាង បានបង្ហើបពីសក្តានុពលធំៗចំនួន៤ ដែលខេត្តកំពង់ស្ពឺកំពុងមាន ខណៈពីមុនខេត្តនេះជាខេត្តដែលគេមើលរំលង និងមើលងាយទៀតហើយ។

លោកបានមានប្រសាសន៍ឲ្យដឹងតាមទូរស័ព្ទកាលពីសប្តាហ៍មុន ដោយបានមានប្រសាសន៍ជាមួយសំណើចថា ពីមុនគេនិយាយពីខេត្តកំពង់ស្ពឺ “ជាបុងបឺ” និយាយពីតំបន់រលាក់កងជើង ពោលគឺជាខេត្តដែលគេមើលងាយ ប៉ុន្តែបច្ចុប្បន្នតំបន់រលាក់កងជើង មានផ្លូវកៅស៊ូហើយ។

លោកបន្តថា “ពីមុនជាខេត្តដែលគេទៅហួស មកហួស ប៉ុន្តែបច្ចុប្បន្នកំពង់ស្ពឺ កំពុងរួមចំណែកអភិវឌ្ឍន៍សេដ្ឋកិច្ចជាតិយ៉ាងលឿន” ។

វិស័យជាច្រើនកំពុងមានភាពពរីកចម្រើន ដូចជា ទី១ មានរោងចក្រ សហគ្រាស តំបន់ឧស្សាហកម្ម ទី២ ជាខេត្ត Central មួយ ដែលគំរោងហេដ្ឋារចចនាសម្ព័ន្ឋធំៗថ្នាក់ជាតិសុទ្ឋតែឆ្លងកាត់ខេត្តនេះដូចជាផ្លូវជាតិលេខ៣ លេខ៤ លេខ៤១ លេខ៥១ ផ្លួវល្បឿនលឿនភ្នំពេញ ព្រះសីហនុជាដើម ទី៣ មានតំបន់ទេសចរណ៍ និងរមណីយដ្ឋានទេសចរណ៍ដ៏សម្បូរបែប ទី៤ មានការអភិវឌ្ឍលើវិស័យសំណង់ និងអចលទ្រព្យយ៉ាងច្រើន និងទី៥ ជាខេត្តមានតំបន់ដាំដុះដំណាំកសិកម្ម និងកសិឧស្សាហកម្មច្រើន សម្រាប់បំរើឲ្យផលប្រយោជន៍នៃការនាំចេញ។

លោកវ៉ី សំណាង បានបន្តថា គិតរហូតមកទល់ពេលនេះ គម្រោងអភិវឌ្ឍន៍សំណង់ ននិងអចលនទ្រព្យ និងគំរោងអភិវឌ្ឈន៍ជាច្រើនទៀតដូចជា គម្រោងសាងសង់រមណីយ ដ្ឋានលំហែរកាយលំដាប់អន្តរជាតិតម្លៃ៥០០លានដុល្លារ នីតែដំណើរការទៅមុខ និងមិនបានផ្អាកដោយសារវិបត្តិជំងឺកូវីដ១៩ឡើយ។

លោកបន្តដោយសម្តែងសុទិដ្ឋិនិយមថា “ក្រោយពេលវិបត្តិជំងឺនេះបញ្ចប់នៅកម្ពុជា និងនៅតាមបណ្តាប្រទេសនានា ខេត្តកំពង់ស្ពឺនឹងទាក់ទាញក្រុមហ៊ុនអន្តរជាតិជាច្រើនទៀតចូលមកវិនិយោគ” ៕

ស្វែងយល់ពីសក្តានុពលនៃអចលនទ្រព្យ៤ប្រភេទមានលក្ខណៈខុសគ្នាបែបណា?

ដោយៈសហការី

ភ្នំពេញៈ អចលនទ្រព្យតត្រូវបានបែងចែកជាប្រភេទ ឬផ្នែកខុសៗគ្នាជាច្រើន ថ្ងៃនេះគេហទំព័រ Propertyarea.asia សូមលើកយកនូវអចលនទ្រព្យចំនូន៤ប្រភេទ សម្រាប់លោក អ្នកអានសិក្សស្វែងយល់។

១-អចលនទ្រព្យលំនៅដ្ឋាន

វាជាអចលនទ្រព្យ ដែលសំដៅដល់សំណង់សាងសង់ថ្មី និងផ្ទះលក់ឡើងវិញ ភាគច្រើនគឺជាគេហដ្ឋានជាលក្ខខណៈគ្រួសា។ ក្រៅពីនោះមានដូចជា ខុនដូ កន្លែងរស់នៅរួម ទីប្រជុំជន ផ្ទះសម្រាប់វិស្សមកាលជាដើម។

២-អចលនទ្រព្យពាណិជ្ជកម្ម

អចលនទ្រព្យពាណិជ្ជកម្ម សំដៅដល់មជ្ឈមណ្ឌលផ្សារទំនើប ឬបែបជា shopping centers និងផ្សារទំនើប អាគារ (strip malls ) អគារវេជ្ជសាស្ត្រ និងអប់រំ សណ្ឋាគារ និងការិយាល័យជាដើម។

អគារផ្ទះល្វែង ជារឿយៗត្រូវបានគេចាត់ទុកថា ជាពាណិជ្ជកម្មទោះបី ជាវាត្រូវបានប្រើសម្រាប់ការស្នាក់នៅក៏ដោយ នេះក៏ព្រោះតែគេប្រើវាជាកម្មសិទ្ធិ ដើម្បីផលិតប្រាក់ចំណូល។

៣-អចលនទ្រព្យឧស្សាហកម្ម

អគាររោងចក្រ ឧស្សាហកម្ម កន្លែងផលិតកម្ម និងឃ្លាំងនានា ត្រូវបានគេចាត់ទុកថាជាអចលនទ្រព្យឧស្សាហកម្ម។ អគារទាំងនេះអាចត្រូវបានប្រើ សម្រាប់ការស្រាវជ្រាវ ផ្នែកផលិតកម្ម ជាកន្លែងផ្ទុកនិងចែកចាយទំនិញ។ គេត្រូវធ្វើការបែងចែកវាឲ្យបានច្បាស់រវាងកន្លែងនីមួយៗដែលបានរៀបរាប់ខាងលើ ព្រោះគោលបំណងនៃការបែងចែក គឺត្រូវកំណត់ឲ្យដាច់ដោយឡែកពីគ្នានូវតំបន់ (Zone) លក្ខខណ្ឌនៃការសាងសង់ ក៏ដូចជាការលក់។

៤-ដីធ្លី

ដីធ្លីសំដៅដល់ការរាប់បញ្ចូលទាំងដីទំនេរ ដីស្រែចំការ និងកសិដ្ឋានដែលត្រូវការប្រើប្រាស់ដីធ្លីធំៗ វាក៏ត្រូវបានគេរាប់ផងដែរនូវ ដីទំនេរ (ទាំងមានការអភិវឌ្ឍ មិនទាន់អភិវឌ្ឍ) ការប្រើឡើងវិញ និងផ្សេងៗទៀត៕

រដ្ឋាភិបាលកំពុងពង្រឹកការដឹកជញ្ជូនតាមផ្លូវទឹក ខណៈកំពង់ផែទេសចរណ៍ខេត្តកោះកុងនឹងចាប់ផ្តើមសាងសង់នៅថ្ងៃស្អែក

ដោយៈ តារា

ភ្នំពេញៈ កំពង់ផែទេសចរណ៍ និងចដឹកជញ្ជូនទំនិញដងទង់ ក្នុងក្រុងខេមរៈភូមិន្ទ ខេត្តកោះកុង នឹងបើកការដ្ឋានសាងសង់ជាផ្លូវការនៅថ្ងៃស្អែកទី១៣ ឧសភានេះហើយ។

នេះជាកំពង់ផែទំនិញរាយ និងទេសចរណ៍ដងទង់ក្នុងខេត្តកោះកុង ដែលគំរោងនេះស្ថិតក្រោមការគ្រប់គ្រងរបស់ក្រសួងសាធារណៈការ និងដឹកជញ្ជូន។

មន្ត្រីសាធារណការខេត្តកោះកុង កំពង់ផែថ្មីមួយនេះ នឹងត្រូវសាងសង់ប្រភេទជាបេតុង មានប្រវែងជិត៧០ម៉ែត្រ និងទទឹង១៦ម៉ែត្រកន្លះ។ ការសាងសង់ផែសមុទ្របន្ថែមមួយទៀតគ្រោងចំណាយថវិកាប្រមាណ១.៥លានដុល្លារ នឹងគ្រោងបញ្ចប់នៅឆ្នាំ២០២២ខាងមុខនេះ។

អភិបាលខេត្តកោះកុងលោកជំទាវភូថង មិថុនាបានមានប្រសាសន៍ឲ្យដឹងនាពេលថ្មីៗនេះថា គំរោងអភិវឌ្ឍន៍កំពង់ផែនេះ ត្រូវបានចុះសិក្សានិងវាយតម្លៃដោយថ្នាក់ដឹកនាំក្រសួងសាធារណៈការ និងដឹកជញ្ជូន ហើយក្នុងនាមអាជ្ញាធរខេត្ត យើងមានក្តីសប្បាយរីករាយ ដោយសារយើងនឹងទទួលបានសមិទ្ឋផលរបស់រដ្ឋាភិបាលថ្មីមួយ ដែលបំរើដល់ការដឹកជញ្ជូនទំនិញ និងទាក់ទាញការដឹកភ្ញៀវទេសចរណ៍ជាតិ និងអន្តរជាតិ។

លោកជំទាវបានបន្តថា “ទោះបីស្ថិតក្នុងវិបត្តិកូវីដ១៩ ប៉ុន្តែខេត្តកោះកុងនៅតែទទួលបានគំរោងវិនិយោគធំៗជាច្រើន ពិសេសការវិនិយោគលើវិស័យបដសណ្ឋារកិច្ច”៕

រដ្ឋាភិបាលនិងវេទិកាសេដ្ឋកិច្ចពិភពលោករៀបចំប្រព័ន្ធទិន្នន័យមួយដើម្បីសម្រួលបរិយាកាសវិនិយោគនៅកម្ពុជា

ដោយៈ ប៊ី

ភ្នំពេញៈ ក្រុមប្រឹក្សាអភិវឌ្ឍន៍កម្ពុជា (CDC) សហការជាមួយវេទិកាសេដ្ឋកិច្ចពិភពលោក (World Economic Forum) ថ្ងៃទី១២ ខែឧសភា ឆ្នាំ ២០២១ បានរៀបចំពិធីដាក់ឱ្យដំណើរការនូវប្រព័ន្ធទិន្នន័យស្តីពី សន្ធានកម្មខ្សែច្រវាក់ផ្គត់ផ្គង់ សំដៅផ្តល់កិច្ចសម្រួលដល់វិនិយោគសម្រាប់អភិវឌ្ឍន៍ចីរភាព។

ការសហការរៀបចំដំណើរការនេះ ត្រូវបានធ្វើឡើង តាមប្រព័ន្ធវិដេអូ ក្រោមអធិបតីភាពលោកសុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា និងលោកបណ្ឌិត ម៉ាធូ ស្តេហ្វិនសុន (Matthew Stephenson) នាយកតោលនយោបាយ និងសហគមន៍ នៃនាយកដ្ឋានវិនិ-យោត និងពាណិជ្ជកម្មអន្តរជាតិ នៃវេទិកាសេដ្ឋកិច្ចពិភពលោក។

ការសហការរៀបចំប្រព័ន្ធទិន្នន័យនេះ មានគោលបំណង ក្នុងផ្ដល់នូវថ្នាលបច្ចេកវិទ្យាព័ត៌មានសម្រាប់សម្រួលដល់ ការធ្វើសន្ធានកម្ម ខ្សែច្រវាក់ផ្គត់ផ្គង់រវាងអ្នកផ្គត់ផ្គង់ក្នុងស្រុក និងអ្នកវិនិយោគ ដោយផ្តោតលើការផ្តល់ កិច្ចសម្រួលវិនិយោគសម្រាប់អភិវឌ្ឍន៍ចីរភាព។

លោករដ្ឋមន្ត្រីប្រតិភូ បានស្នើសុំឱ្យតួអង្គពាក់ព័ន្ធទាំង អស់ចូលរួមប្រើប្រាស់ប្រព័ន្ធទិន្នន័យនេះឱ្យបានទូលំទូលាយ ដោយសង្ឃឹមយ៉ាងមុតមាំថា អ្នកវិនិយោគ និងក្រុមហ៊ុនបរទេសនឹងមើលឃើញថា កម្ពុជាកំពុងបង្កើតនូវបរិស្ថានវិនិយោគ ដែលស្វាគមន៍វត្តមាន របស់ពួកគេ ខណះខិតខំជំរុញការវិនិយោគ ដែលមានទង្វើរធុរកិច្ចប្រកប ដោយការទទួលខុសត្រូវ និងមានចីរភាព។

លោកបណ្ឌិតម៉ាធូ ស្តេហ្វិនសុន បានបញ្ជាក់ថា ក្រុមហ៊ុនបរទេសដែលស្វែងរកការវិនិយោគអនុលោមតាមគោលការណ៍ សង្គម បរិស្ថាន និងអភិបាលកិច្ច (ESG) អាចដាក់ការវិនិយោគនៅកម្ពុជា ជាមួយក្រុមហ៊ុនក្នុងស្រុក ដែលកំពុងប្រតិបត្តិការប្រកបដោយចីរភាព ហើយក្រុមហ៊ុនកម្ពុជាដទៃទៀតអាចបង្វែរការតម្រង់ទិស ប្រតិបត្តិការធុរកិច្ចរបស់ខ្លួនទៅរកការអភិវឌ្ឍ ប្រកបដោយចីរភាពកាន់តែច្រើនថែមទៀត ដើម្បីទាក់ទាញការធ្វើធុរៈកិច្ចរួមគ្នាជាមួយនឹងក្រុមហ៊ុនបរទេស សំដៅលើកកម្ពស់ការធ្វើសន្ធានកម្ម ខ្សែច្រវាក់ផ្គត់ផ្គង់តំបន់ និងសកលលោក។

ការជ្រើសរើសកម្ពុជា ជាដៃគូពិភាក្សារបស់វេទិកាសេដ្ឋកិច្ចពិភពលោក លើការផ្តល់កិច្ចសម្រួលវិនិយោគ សម្រាប់ការអភិវឌ្ឍប្រកបដោយចីរភាព គឺឈរលើមូលដ្ឋានរឹងមាំរបស់កម្ពុជាដែល មានគោលនយោបាយបើកចំហរដ៏ប្រសើរចំពោះការវិនិយោគ។

បន្ថែមពីលើនេះ មានមូលហេតុសំខាន់ៗ ចំនួនបី ដែលវេទិកាសេដ្ឋកិច្ចពិភពលោកសម្រេចជ្រើសយកកម្ពុជា ជាដៃគូក្នុងដំណើរការនេះគឺ(១) កម្ពុជា សម្រេចបាននូវភាពជោគជ័យដ៍ធំធេង ក្នុងការទាក់ទាញវិនិយោគផ្ទាល់ពីបរទេស ក្នុងកំណើនគួរឱ្យមោទនៈជាមធ្យមប្រមាណ៥០% ចាប់ពីឆ្នាំ២០០៥ មកដល់បច្ចុប្បន្ន ហើយវិធានការផ្តល់កិច្ច សម្រួលវិនិយោគបានដើរតួនាទីយ៉ាងសំខាន់ ក្នុងការសម្រេចបាននូវជោគជ័យនេះ។

(២) ខណៈពេល ដែលកម្ពុជាត្រូវការការអភិវឌ្ឍ ស្របពេលដែលកំណើនសេដ្ឋកិច្ចជាមធ្យមប្រមាណ៧% តាំងពីឆ្នាំ ២០១១មក បទពិសោធន៍របស់កម្ពុជា ក្នុងការធ្វើអានុភាវូបនីយកម្មការវិនិយោគ សម្រាប់ការអភិវឌ្ឍអាច ជួយប្រទេសផ្សេងទៀតក្នុងការរៀនសូត្រពីជ្រុងសំខាន់ៗ នៃការអភិវឌ្ឍពាក់ព័ន្ធនឹងកិច្ចសម្រួលវិនិយោគនៅកម្ពុជា។

(៣) កម្ពុជា បានក្រសោបយកនូវកិច្ចសហការធ្វើការរួមគ្នា រវាងរាជរដ្ឋាភិបាលនិងផ្នែកឯកជន តាមរយៈវេទិការាជរដ្ឋាភិបាល-ផ្នែកឯកជន។ វេទិការាជរដ្ឋាភិបាល-ផ្នែកឯកជន លើកទី១៨ កាលពី ខែមីនា ឆ្នាំ២០១៩ កន្លងទៅនេះ បានបង្ហាញនូវការគាំទ្រយ៉ាងសកម្មពីរាជរដ្ឋាភិបាលសម្រាប់កិច្ចសហការ គ្នារវាងរដ្ឋ និងឯកជន ក្នុងការផ្តល់កិច្ចសម្រួលវិនិយោគបន្ថែមទៀត ដែលប្រការនេះគឺស្របគ្នានឹង បេសកកម្មរបស់វេទិកាសេដ្ឋកិច្ចពិភពលោក។

ឈរលើមូលដ្ឋានខាងលើនេះ វេទិកាសេដ្ឋកិច្ចពិភពលោក និងកម្ពុជា បានធ្វើការរួមគ្នា ដើម្បីចែករំលែកនូវរបកគំហើញ និងឧត្តមានុវត្តស្តីពី ការផ្តល់កិច្ចសម្រួលវិនិយោគ ជាពិសេស ដំណើរការនៃការរៀបចំប្រព័ន្ធទិន្នន័យស្តីពី សន្ធានកម្មខ្សែច្រវាក់ផ្គត់ផ្គង់សំដៅផ្តល់ កិច្ចសម្រួលវិនិយោគសម្រាប់អភិវឌ្ឍន៍ចីរភាព ជាមួយប្រទេសដទៃទៀតក្នុងក្របខណ្ឌអង្គការពាណិជ្ជកម្ម ពិភពលោក និងក្របខណ្ឌតំបន់ដទៃទៀត៕

សកម្មភាពនៃការអភិវឌ្ឍន៍នៅទីក្រុងបូកគោចាប់ផ្ដើមមានសន្ទុះបន្ទាប់ពីសម្តេច តេជោអនុម័តជាផ្លូវការ

ដោយៈវឌ្ឈនៈ

ភ្នំពេញៈ បន្ទាប់ពីរាជរដ្ឋាភិបាលបានចេញអនុក្រឹត្យ ការបង្កើតរដ្ឋបាលក្រុងថ្មីក្នុងខេត្តកំពតគឺក្រុងបូកគោរួចមក សកម្មភាពនៃការអភិវឌ្ឍក្នុងតំបន់ក្រុងថ្មីនេះ ចាប់ផ្ដើមមានសន្ទុះជាងមុន បើទោះបីជាបច្ចុប្បន្ននេះ កម្ពុជា កំពុងជួបនឹងវិបត្តិដោយសារកូវីដ១៩ក្ដី។

លោក កែវ សុជាតិប្រធានក្រុមហ៊ុនអចលនទ្រព្យ KW Cambodia ប្រចាំខេត្តកំពតបានឱ្យដឹងតាមទូរស័ព្ទនាថ្ងៃទី១២ ឧសភានេះថា តាមពិតទៅតំបន់ថ្មីនៃក្រុងបូកគោមានការអភិវឌ្ឍតាំងពីមុន មានការប្រកាសបង្កើតរដ្ឋបាលក្រុងថ្មីម្ល៉េះ ប៉ុន្តែក្រោយពេលរដ្ឋាភិបាលប្រកាសបង្កើតរដ្ឋបាលក្រុងបូកគោ ធ្វើឱ្យសន្ទុះនៃការអភិវឌ្ឍចាប់ផ្ដើមមានសន្ទុះជាងមុនបន្ថែមទៀត ទោះពេលនេះកំពុងតែមានវិបត្តិកូវីដ១៩ក្ដី ។

លោកបន្តថា “ការបង្កើតក្រុងថ្មីនៃទឹកដីខេត្តកំពត វាបានធ្វើឱ្យខេត្តកំពតកាន់តែមានសក្ដានុពល និងមានគេស្គាល់ពីទីក្រុងថ្មីមួយនេះបន្ថែមទៀត ហើយនឹងអាចទាក់ទាញវិនិយោគិនក្នុងស្រុក បណ្ដាក់ទុនវិនិយោគបន្ថែមទៀតផងដែរ ជាពិសេសគម្រោងអចលនទ្រព្យ ដែលគាំទ្រដល់វិស័យទេសចរណ៍ វិស័យឧស្សាហកម្មតំបន់សេដ្ឋកិច្ចពិសេស និងកំពង់ផែជាដើម”។លោកថា “ការទិញលក់ដីធ្លី នៅក្នុងក្រុងថ្មីនៃខេត្តកំពតអាចនឹងមានសន្ទុះកាន់តែច្រើនថែមទៀត បើសិនជាមិនមានការបិទខ្ទប់រាជធានីភ្នំពេញ និងក្រុងតាខ្មៅ ក៏ដូចជាតំបន់មួយចំនួននោះទេ ព្រោះម្ចាស់លុយធំៗភាគច្រើនជាអ្នកនៅភ្នំពេញ ហើយនៅពេលមានបញ្ហាបែបនេះ គេក៏ទុកលុយរបស់គេសិនទៅ”។

លោកកែវ សុជាតិបានបន្ថែមថា នៅក្នុងតំបន់ថ្មីនេះដែរ បើទោះបីជាមានការបិទខ្ទប់តំបន់ខ្លះនៅកម្ពុជា តែគម្រោងអភិវឌ្ឍន៍មួយចំនួននៅក្នុងទឹកដី នៃក្រុងបូកគោនៅតែបន្តការអភិវឌ្ឍទាំងយប់ទាំងថ្ងៃ ដើម្បីបញ្ចប់គម្រោងរបស់ខ្លួនទៅតាមផែនការ តែគម្រោងដែលមានទើបចាប់ផ្ដើមហើយ ម្ចាស់គម្រោងជាប់នៅក្នុងតំបន់បិទខ្ទប់ឃើញថា បានផ្អាកសកម្មភាពខ្លះៗដែរ ក្នុងរយៈពេលបិទខ្ទប់ និងចាប់ផ្ដើមមានសន្ទុះឡើងវិញ ក្រោយបញ្ចប់ការបិទខ្ទប់ ។

ជាមួយគ្នានេះ លោកគឹម សង្គ្រាម ភ្នាក់ងារអចលនទ្រព្យប្រចាំខេត្តកំពតមួយរូបដែរនោះបានឱ្យដឹងដែរថា ការបង្កើតក្រុងថ្មីច្បាស់ណាស់វានឹត្រូវការដី សម្រាប់អភិវឌ្ឍអគាររដ្ឋបាលសម្រាប់ធ្វើការ និងការិយាល័យផ្សេងៗទៀតនៃក្រុងថ្មីនេះ ។ សម្រាប់វិស័យឯកជនក៏ដូចគ្នា ពួកគេនឹងចាប់ផ្ដើមសម្លឹងមើលទៅទីតាំងណា ដែលគួរវិនិយោគនិងមានសក្ដានុពលខ្ពស់សម្រាប់ការវិនិយោគរបស់ពួកគេ ។

លោកបន្តថា ចាប់តាំងពីមានការបិទខ្ទប់មក គម្រោងមួយចំនួនត្រូវបានផ្អាកតែមួយចំនួននៅតែបន្ត ហើយជាពិសេសនោះ ក្រោយពេលរដ្ឋាភិបាលប្រកាសបញ្ចប់ការបិទខ្ទប់ សកម្មភាពនៃការទិញ លក់ អចលនទ្រព្យជាពិសេសដីធ្លីក្នុងទឹកដី នៃខេត្តកំពតក៏ចាប់ផ្ដើមមានជាហូរហែឡើងវិញម្ដងបន្តិចៗ និងសង្ឃឹមថានឹងមានសន្ទុះងើបឡើងបន្តទៀតពេលវិបត្តិនៃជំងឺកូវីដ១៩បានកាត់បន្ថយ។

អគ្គនាយកក្រុមហ៊ុនYoungsia Real EstateលោកColor Tanបានមានប្រសាសន៍ថា ខេត្តកំពតនឹងក្លាយជាខេត្តដែលមានការអភិវឌ្ឈយ៉ាងលឿន ក្នុងរយៈពេល៣ទៅ៥ឆ្នាំខាងមុខ ពិសេសការអភិវឌ្ឈទីក្រុងបូកគោ នឹងធ្វើឲ្យខេត្តនេះពង្រីកនូវសក្តានុពលបន្ថែមទៀត ហើយក្រុងកំពត នឹងក្លាយជាក្រុងគុជថ្មីមួយនាតំបន់ឆ្នេរនាពេលអនាគត។

លោកបន្តថា “បច្ចុប្បន្នខេត្តកំពុងពង្រីកសក្តានុពលរបស់ខ្លួន ដោយមានការសាងសង់អាគារពាណិជ្ជកម្មជាច្រើន មានគំរោងវិនិយោគតំបន់ឧស្សាហកម្ម កំពង់ផែទេសចរណ៍ និងរមណីយដ្ឋានទេសចរណ៍ជាច្រើន ដែលផ្នែកទាំងនេះកំពុងរុញសក្តានុពលខេត្តនេះឈានទៅកាន់កម្រិតថ្មីមួយនាពេលអនាគត”៕