ដោយៈ រាជរដ្ឋាភិបាលកម្ពុជាបានសម្តែងសុទិដ្ឋិនិយម ដោយរំពឹងថា កម្ពុជានឹងទទួលបានភ្ញៀវក្នុងស្រុក១១លាននាក់ នៅឆ្នាំ២០២៣ និងភ្ញៀវអន្តរជាតិ៧លាននាក់ នៅឆ្នាំ២០២៥ បន្ទាប់ពីមានការដាក់ចេញ ផែនទីចង្អុលផ្លូវ (Roadmap) ស្តីពី ផែនការស្តារ និងលើកស្ទួយវិស័យទេសចរណ៍កម្ពុជាក្នុង និងក្រោយវិបត្តិជំងឺកូវីដ-១៩។

រាជរដ្ឋាភិបាលកម្ពុជាដាក់ចេញផែនទីចង្អុលផ្លូវស្ដីពី ផែនការស្តារ និងលើកស្ទួយវិស័យទេសចរណ៍កម្ពុជា ក្នុងនិងក្រោយវិបត្តិជំងឺកូវីដ-១៩ ដោយបែងចែកជា៣ដំណាក់កាល ដំណាក់កាលទី១ (Resilience & Restart) សំដៅការគ្រប់គ្រងវិបត្តិក្នុងដំណាក់កាលទម្លាប់ថ្មី និងរៀបចំផែនការសម្រាប់ការស្តារទេសចរណ៍ឡើងវិញ (២០២០-២០២១) ហើយធ្វើឱ្យអាជីវកម្មនៅរស់រាន និងអាចរក្សាការងារក្នុងវិស័យទេសចរណ៍ឱ្យមានភាពធន់ ហើយស្ដែងចេញតាមរយៈការអន្ដរាគមន៍ របស់រាជរដ្ឋាភិបាលជាបន្ដបន្ទាប់ចំនួន៧ជុំរួចហើយ និងការជំរុញចលនាទេសចរណ៍ក្នុងស្រុក អមជាមួយការដាក់ចេញនូវ “វិធានសុវត្ថិភាពទេសចរណ៍”។

ដំណាក់កាលទី២ (Recovery) ដើម្បីស្តារឡើងវិញនៃវិស័យទេសចរណ៍កម្ពុជា ក្រោយវិបត្តិជំងឺកូវីដ-១៩ (ឆ្នាំ២០២២-២០២៣) និងកាត់បន្ថយផលប៉ះពាល់នៃវិបត្តិជំងឺកូវីដ-១៩ ឱ្យបានជាអតិបរមា រាជរដ្ឋាភិបាល នឹងបន្តផ្ដល់ការបណ្តុះបណ្តាលជំនាញវិជ្ជាជីវៈទេសចរណ៍ ជំនាញឌីជីថល និងជំនាញថ្មីៗឱ្យស្របតាមតម្រូវការទីផ្សារក្រោយវិបត្តិជំងឺកូវីដ-១៩ និងការខិតខំលើកកម្ពស់កិត្យានុភាពកម្ពុជាជា គោលដៅទេសចរណ៍ប្រកប​ដោយសុវត្ថិភាព ក្រោយវិបត្តិជំងឺកូវីដ-១៩។

ដំណាក់កាលទី៣ (Relaunch) ការរៀបចំឆ្ពោះទៅកាន់អនាគតថ្មី (ឆ្នាំ២០២៤-២០២៥) នៃវិស័យទេសចរណ៍កម្ពុជា សំដៅទាញយកផលប្រយោជន៍ពីការអភិវឌ្ឍវិស័យទេសចរណ៍កម្ពុជា ឱ្យបានជាអតិបរមាប្រកបដោយនិរន្តរភាព និងការទទួលខុសត្រូវឱ្យបានលើសមុនពេលវិបត្តិ ដោយចាប់យកឱកាសនៃវិបត្តិជំងឺកូវីដ-១៩ កសាងអនាគតនៃវិស័យទេសចរណ៍កម្ពុជាឱ្យមាននិរន្តភាព គុណភាព និងឆ្លាតវៃ។

ជំងឺកូវីដ១៩ បានបង្កឱ្យមានវិបត្តិដែលមិនធ្លាប់កើតមានឡើង និងបានផ្តល់ការភ្ញាក់ផ្អើលយ៉ាងខ្លាំងសម្រាប់កម្ពុជា តំបន់ និងសកលលោក។ ផលប៉ះពាល់នៃជំងឺកូវីដ-១៩ បាននាំឱ្យភ្ញៀវទេសចរអន្តរជាតិ មកទស្សនាកម្ពុជាធ្លាក់ចុះ៨០.២ភាគរយ និងភ្ញៀវទេសចរក្នុងស្រុក ធ្លាក់ចុះក្នុងរង្វង់ប្រមាណ២០ភាគរយ ជាមួយនឹងការខាតបង់ប្រាក់ចំណូលប្រមាណ៣ពាន់លានដុល្លារអាម៉េរិក នៅឆ្នាំ២០២០៕

ដោយៈសុខុម

ភ្នំពេញ: យោងតាមការព្យាករបង្ហាញថា ក្រុមហ៊ុនវិស្វកម្មខ្នាតយក្សរបស់ម៉ាឡេស៊ី Muhibbah Engineering Bhd នឹងទទួលបានប្រាក់ចំណូលខ្ពស់ ក្នុងឆ្នាំសារពើពន្ធ ២០២១-២០២២ ដោយសារអាជីវកម្មសម្បទានអាកាសយានដ្ឋាន (Airport Concession) របស់ខ្លួនទទួលបានប្រាក់ចំណូលខ្ពស់ ហើយផ្នែកសំណង់របស់ខ្លួនក៏ងើបឡើងវិញ។ នេះបើយោងតាមសារព័ត៌មាន Malaysian Reserve ចុះផ្សាយកាលពីថ្ងៃទី១ មេសា។

ធនាគារវិនិយោគម៉ាឡេស៊ី MIDF Amanah Investment Bank បានលើកឡើងកាលពីថ្ងៃទី៣១ មីនា ថា កម្មវិធីចាក់វ៉ាក់សាំងកូវីដ-១៩ ដែលទទួលបានជោគជ័យទូទាំងពិភពលោក នឹងជួយជំរុញសន្ទុះនៃការងើបឡើងក្នុងវិស័យហោះហើរ ដែលអាចជួយឱ្យក្រុមហ៊ុនដ៏ធំមួយនេះ ទទួលបានចំណូលខ្ពស់ពីអាជីវកម្មសម្បទាន ព្រលានយន្តហោះរបស់ខ្លួន។

តាមរយៈរបាយការណ៍មួយ ធនាគារនេះបានលើកឡើងថា “យើងយល់ឃើញថា ទស្សនវិស័យនៃអាកាសយានដ្ឋាននៅកម្ពុជា ដែលក្រុមហ៊ុននេះកាន់កាប់២១% និងដែ​លជួយរកចំណូលបានរហូតដល់ទៅ៧០% នៃប្រាក់ចំណូលសរុបរបស់ក្រុមនេះ នឹងងើបឡើងសន្សឹមៗរយៈពេល២ឆ្នាំ បន្ទាប់ដោយសារការបង្កើនល្បឿនចាក់វ៉ាក់សាំងកូវីដ-១៩ ទូទាំងពិភពលោក ជាពិសេសប្រទេសចិន សហរដ្ឋអាមេរិក និងអាស៊ីអាគ្នេយ៍”។

របាយការណ៍ដដែលបន្ថែមទៀតថា ការហោះហើរអន្តរជាតិក៏នឹងមានសន្ទុះកើនឡើងផងដែរ នៅពេលព្រំដែននៃប្រទេសនានាបើកឡើងវិញ ដែលអាកាសយានដ្ឋាននៅកម្ពុជា នឹងទាក់ទាញអ្នកដំណើរជនជាតិចិន នៅក្នុងស្រុកបានច្រើន។

ធនាគារវិនិយោគខាងលើបានលើកឡើងថា យើងយល់ថា ការណ៍នេះទំនងជានឹងជួយបង្កើនចំនួនអ្នកធ្វើដំណើរផ្លូវអាកាស សម្រាប់អាកាសយានដ្ឋាននានារបស់ក្រុមហ៊ុននេះនៅកម្ពុជា។ ជាការកត់សម្គាល់ប្រហែល១ភាគ៣ នៃអ្នកដំណើរទៅកាន់អាកាសយានដ្ឋានទាំងនេះជាពលរដ្ឋចិន។ ដូចនេះ សន្ទុះនៃកំណើនប្រាក់ចំណូល សម្រាប់ក្រុមនេះត្រូវបានគេមើលឃើញថា កំពុងស្ថិតនៅលើផ្លូវឆ្ពោះទៅរកលទ្ធផលវិជ្ជមាន ដោយពឹងផ្អែកលើការងើបឡើងវិញ នៃកំណើនថ្លៃសំបុត្រយន្តហោះក្នុងតំបន់ និងចំនួនអ្នកធ្វើដំណើរនៅអាកាសយានដ្ឋាននានារបស់ខ្លួននៅកម្ពុជា”។

កត្តានេះក៏ទំនងជាធ្វើឱ្យថ្លៃសំបុត្រយន្តហោះ ឡើងថ្លៃជិតដល់កម្រិតមុនពេលផ្ទុះវិបត្ដិកូវីដ-១៩ផងដែរ។

ទន្ទឹមនេះ ផ្នែកសំណង់និងដងស្ទូចរបស់ក្រុមហ៊ុន Muhibbah Engineering ក៏កំពុងឆ្ពោះទៅរកការងើបឡើងវិញផងដែរ ដោយផ្អែកលើការបញ្ជាទិញដងស្ទូចយ៉ាងច្រើ​នក្នុងទំហំទឹកប្រាក់រហូតដល់១០១,៤ លានរីងហ្គីត (២៤,៥ លានដុល្លារអាមេរិក) ដែលក្រុមហ៊ុនបុត្រសម្ព័ន្ធរបស់ខ្លួន Favelle Favco Bhd ទទួលបានក្នុងត្រីមាសទី១ ដើមឆ្នាំ២០២១៕

ដោយៈរតនៈ

ភ្នំពេញៈ ក្រសួងពាណិជ្ជកម្មបានឲ្យដឹងថា នៅឆ្នាំ២០២០ ទំហំពាណិជ្ជកម្មកម្ពុជាមានចំនួន៣៥,៨ពាន់លានដុល្លារអាមេរិក ខណៈការនាំចេញមានទឹកប្រាក់ចំនួន១៧២ ១៥.៣៧លានដុល្លារអាមេរិក និងការនាំចូលមានទឹកប្រាក់ជាង១៨,៥៩០លានដុល្លារអាមេរិក។

យោងតាមរបាយការណ៍ក្រសួងពាណិជ្ជកម្ម ដែលបានចេញផ្សាយកាលពីម្សិលម៉ិញនេះបានបញ្ជាក់ថា ទំហំពាណិជ្ជកម្មឆ្នាំ២០២០ កើនឡើង២.៥៤ភាគរយ ក្នុងនោះការនាំចេញមាន១៧,២១៥លានដុល្លារអាមេរិក កើនឡើង១៦.៧២ភាគរយ  តែការនាំចូលមានជាង១៨,៥៩០លានដុល្លារអាមេរិក ថយចុះ៧.៨៤ភាគរយ បើធៀបនឹងឆ្នាំ២០១៩។

ក្រសួងក៏បានផ្ដល់អាជ្ញាប័ណ្ណនាំចូល ចំនួន១០ច្បាប់ មានទឹកប្រាក់១២៤១ ២៧៥ដុល្លារអាមេរិក និងបានពន្យារអាជ្ញាប័ណ្ណនាំចូលចំនួនមួយច្បាប់។

របាយការណ៍ដដែលឲ្យដឹងទៀតថា ក្រសួងបានផ្ដល់អាជ្ញាប័ណ្ណនាំចេញចំនួន៥៣ច្បាប់ មានទឹកប្រាក់៥,៣០៧,៨៥៨ដុល្លារអាមេរិក និងពន្យារអាជ្ញាប័ណ្ណនាំចេញចំនួន២៣ច្បាប់ និងផ្ដល់លិខិតជូនដំណឹងទំនិញ ឆ្លងកាត់ចំនួន៣៣ច្បាប់៕

ដោយៈសហការី

កំពង់ស្ពឺៈ ធនាគារហត្ថា ដែលជាធនាគារពាណិជ្ជមានបណ្តាញការិយាល័យធំជាងគេលំដាប់ទី២ក្នុង​ប្រទេសកម្ពុជា បានបរិច្ចាគគ្រែពេទ្យចំនួន១០ ជូនដល់មន្ទីរពេទ្យបង្អែកឧដុង្គ នៅថ្ងៃទី០១ ខែមេសា ឆ្នាំ២០២១។

ការចូលរួមបរិច្ចាគនេះផងដែរ គឺធ្វើឡើងក្នុងគោលបំណងឱ្យប្រជាពលរដ្ឋ នៅក្នុងសហគមន៍ទាំងមូល ទទួលបានសេវាថែទាំសុខភាព និងការថែទាំជំងឺពេញលេញប្រកដោយផាសុកភាពបំផុត ជាពិសេសស្របពេលដែរមន្ទីរពេទ្យ កំពុងតែត្រូវការគ្រែជាចាំបាច់សម្រាប់ត្រៀមថែរទាំ អ្នកជំងឺក្នុងកំឡុកពេលដែលជំងឺកូវីដ១៩ កំពុងតែរីករាលដាលយ៉ាងខ្លាំងក្នុងប្រទេសកម្ពុជាយើងផងដែរ។

ការឧបត្ថម្ភគ្រែពេទ្យនេះ មិនមែនជាសកម្មភាពការងារសង្គមលើកទីមួយរបស់ ធនាគារ ហត្ថានោះទេ។  កន្លងមក ធនាគារ បានផ្តួចផ្តើម និងចូលរួមការងារសង្គមផ្សេងៗទៀតយ៉ាងសកម្មបំផុត​ និងបានឧបត្ថម្ភគ្រែពេទ្យជាច្រើន ដល់មន្ទីរពេទ្យបង្អែកនៅតាមទីជនបទ ដើម្បីឱ្យមន្ទីរពេទ្យមានគ្រែគ្រប់គ្រាន់ សម្រាប់អ្នកជំងឺសំរាកព្យាបាល និងប្រាកដថាប្រជាពលរដ្ឋ នឹងទទួលបានសេវាថែទាំសុខភាពបានយ៉ាងល្អ ពីសំណាក់លោកគ្រូអ្នកគ្រូពេទ្យរបស់យើង។

ទន្ទឹមនឹងនេះផងដែរ គណៈគ្រប់គ្រង​  ព្រមទាំងបុគ្គលិកទាំងអស់ នៃធនាគារ ហត្ថា តែងតែផ្តោតសំខាន់ និងចូលរួមយ៉ាងសស្រាក់សស្រាំ ក្នុងការលើកកម្ពស់សុខុមាលភាពប្រជាពលរដ្ឋតាមសហគមន៍ ឱ្យទទួលបានសេវាថែទាំសុខភាពស្មើៗគ្នា និងប្រកបដោយគុណភាពខ្ពស់។

ការឧបត្ថម្ភមួយនេះ មិនត្រឹមតែជួយលើកកម្ពស់សុខុមាលភាព តែមួយមុខនោះទេ តែនេះគឺជាទង្វើដ៏ល្អប្រពៃមួយ ដែរបញ្ជាក់ពីការជួយគ្នាក្នុងគ្រាខ្វះខាត ជាពិសេសជាការឆ្លើយតប ខណៈពេលដែលប្រទេសជាតិយើង កំពុងតែជួបទុក្ខលំបាកដោយសារជំងឺកូវីដ១៩។

អំពីធនាគារហត្ថា

ធនាគារហត្ថា បានកម្លាយខ្លួនជាផ្លូវការ ទៅជាធនាគារពាណិជ្ជពីគ្រឹះស្ថានមីក្រូហិរញ្ញវត្ថុហត្ថា កសិករ លីមីតធីត នៅខែសីហា ឆ្នាំ២០២០ បន្ទាប់ពីបានផ្តល់សេវាហិរញ្ញវត្ថុក្នុងប្រទេសកម្ពុជាជាង២៦ឆ្នាំ។ គិតត្រឹមខែមីនា ឆ្នាំ២០២១  ធនាគារ ហត្ថា មានការិយាល័យសាខាសរុបចំនួន១៧៧ ម៉ាស៊ីនអេធីអឹមចំនួន ១៣៧ សមតុល្យប្រាក់បញ្ញើសន្សំសរុប៨២២លានដុល្លារអាមេរិក និងផលប័ត្រឥណទានសម្រេចបាន១,៤១២លានដុល្លារអាមេរិក។

នាពេលបច្ចុប្បន្ននេះ ធនាគារហត្ថា ផ្តល់សេវាកម្មហិរញ្ញវត្ថុយ៉ាងច្រើនសម្បូរបែបដល់អតិថិជន ដូចជា សេវាឥណទាន សេវាប្រាក់បញ្ញើសន្សំ សេវាផ្ទេរប្រាក់ក្នុងស្រុក សេវាផ្ទេរប្រាក់​ឆ្លង​ធនាគារ​ក្នុង​ស្រុក សេវាអេធីអឹម សេវាធនាគារចល័ត សេវាបើកប្រាក់បៀវត្ស ព្រមទាំង​ជាភ្នាក់ងារណែនាំលក់សេវាធានារ៉ាប់រង។

ធនាគារហត្ថា គឺជាបុត្រសម្ព័ន្ធរបស់ធនាគារក្រុងស្រ៊ី ដែលជាធនាគារពាណិជ្ជធំជាងគេលំដាប់ទី៥ នៅព្រះរាជាណាចក្រថៃឡង់ដ៏ និងជាសមាជិករបស់សម្ព័ន្ធហិរញ្ញវត្ថុអន្តរជាតិ Mitsubishi UFJ Financial Group (MUFG) ដែលជាសម្ព័ន្ធហិរញ្ញវត្ថុធំជាងគេបំផុតនៅប្រទេសជប៉ុន ព្រមទាំងជាសម្ព័ន្ធសេវាហិរញ្ញវត្ថុដ៏ធំមួយ ក្នុងចំណោមសម្ព័ន្ធហិរញ្ញវត្ថុធំជាងគេលើសកលលោក៕