ព្រលានយន្តហោះតម្លៃ១៥០០លានដុល្លារបង្ហាញរូបរាងបណ្តើរៗហើយ

ដោយៈគង់ សូរិយា

ភ្នំពេញៈ ព្រលានយន្តហោះថ្មីអន្តរជាតិភ្នំពេញថ្មី តម្លៃ១៥០០លានដុល្លារអាមេរិកបានចាប់ផ្តើមបង្ហាញរូបរាងបណ្តើរៗហើយ ខណៈក្រុមការងារវិស្វករ និងកម្មករកំពុងមមាញឹក ដើម្បីឲ្យព្រលាននេះសាងសង់ចប់តាមកាលវិភាគគ្រោងទុក។

ព្រលានយន្តហោះនេះ ស្ថិតនៅស្រុកកណ្តាលស្ទឹង និងស្រុកបាទីខេត្តតាកែវ ចាប់ផ្តើមដំណើរការសាងសង់ជាងមួយឆ្នាំ ពេលនេះគ្រោងអគារធំបានផុសត្រដែត លើផ្ទៃដី២៦០០ហិកតា ខណៈក្រុមវិស្វករនៅតែបន្តពន្លឿនការងារឲ្យចប់ទាន់ផែនការ។

ព្រលានយន្តហោះភ្នំពេញថ្មី ដែលស្ថិតនៅចម្ងាយប្រមាណ១០គីឡូម៉ែត្រពីកន្ទុយមហាវិថីសម្តេចតេជោហ៊ុន សែន។ ព្រលានយន្តហោះកម្រិត 4F ការសាងសង់មាន៣ដំណាក់កាល ខណៈដំណាក់កាលទី១ នឹងបញ្ចប់នៅឆ្នាំ២០២៣ ដែលចំណាយថវិកាប្រហែល ១៥០០លានដុល្លារអាមេរិក។

ដំណាក់កាលទី១ ដែលនឹងដាក់ឲ្យប្រើប្រាស់នៅឆ្នាំ២០២៣ អាចទទួលអ្នកដំណើរបានរហូតដល់១៣លាននាក់ ខណៈដំណាក់កាលទី២ នឹងបញ្ចប់នៅឆ្នាំ២០៣០ អាចទទួលអ្នកដំណើរបាន៣០លាននាក់ និងដំណាក់កាលទី៣ នឹងបញ្ចប់នៅឆ្នាំ២០៥០ អាចទទួលអ្នកដំណើរបាន៥០លាននាក់ក្នុង១ឆ្នាំ។

ក្រុមហ៊ុន OCAC ដែលជាបុត្រសម្ព័ន្ឋរបស់ក្រុមហ៊ុន OCIC ជាអ្នកវិនិយោគគំរោងនេះ ដែលមានអ្នកឧកញ៉ាពុង ឃាវសែ ជាប្រធាន៕

លោកចូ បៃដិនជំរុញការយកពន្ធ២៥%ពីក្រុមហ៊ុននានាដើម្បីជួយដល់ការអភិវឌ្ឍ ហេដ្ឋារចនាសម្ព័ន្ធ

ដោយៈ ប៊ី

អាមេរិកៈ ប្រធានាធិបតីអាមេរិក លោកចូ បៃដិន (Joe Biden) បានបញ្ជាក់ថា អត្រាពន្ធក្រុមហ៊ុនចន្លោះពី២៥ ទៅ២៨%នឹងអាចជួយចំណាយ សម្រាប់ហេដ្ឋារចនាសម្ព័ន្ធដែលត្រូវការជាចាំបាច់។ នេះបើយោងតាមការចុះផ្សាយរបស់សារព័ត៌មានរយទ័រ នៅថ្ងៃទី៧ ខែឧសភា ឆ្នាំ២០២១។

លោកបានឱ្យដឹងថា លោកអាចទទួលយកអត្រាទាបជាងអ្វី ដែលលោកបានស្នើសុំ ក្នុងការស្វែងរកការគាំទ្រ ពីគណបក្សសាធារណរដ្ឋសម្រាប់ មូលនិធិនេះ។

លោកបៃដិន បាននិយាយក្នុងដំណើរទស្សនកិច្ចនៅរដ្ឋLouisiana ថា“មធ្យោបាយ ដែលអាចដោះស្រាយរឿងនេះ គឺត្រូវប្រាកដថាក្រុមហ៊ុនធំៗត្រូវបង់ពន្ធ និងកាត់បន្ថយការកាត់ពន្ធសាជីវកម្មឆ្នាំ ២០១៧ពីចន្លោះ២៥ ទៅ២៨%”។

នៅក្នុងផែនការហេដ្ឋារចនាសម្ព័ន្ធ ដែលមានទឹកប្រាក់២.៣ទ្រីលានដុល្លារ ដំបូងប្រធានាធិបតី បានស្នើឱ្យដំឡើងអត្រាពន្ធសាជីវកម្មពី២១% ទៅ២៨%។ អ្នកជំនាញពន្ធ និងជំនួយការសភា បានប្រាប់រ៉យទ័រកាលពីខែមេសាថា អត្រា២៥% ទំនងជានឹងមានការសម្របសម្រួល។

អត្រាពន្ធសាជីវកម្មរបស់សហរដ្ឋអាមេរិក បានធ្លាក់ចុះមកត្រឹម២១% ពី៣៥%ប ន្ទាប់ពីការកាត់បន្ថយពន្ធឆ្នាំ ២០១៧ ដែលជំរុញដោយលោកប្រធានាធិបតីដូណាល់ត្រាំ និងគណបក្សសាធារណរដ្ឋរបស់លោក ប៉ុន្តែក្រុមហ៊ុនធំៗ ជាច្រើនរបស់អាមេរិកចំណាយតិចជាងនេះ។

ការបង្កើននូវអ្វីដែលក្រុមហ៊ុន បានចំណាយទៅក្នុងថវិកា សហព័ន្ធចំនួនជាង៤ទ្រីលានដុល្លារ គឺជាផ្នែកសំខាន់មួយនៃផែនការរបស់លោក Biden ដើម្បីរៀបចំរចនាសម្ព័ន្ធសេដ្ឋកិច្ចសហរដ្ឋអាមេរិកឡើងវិញ ដើម្បីកាត់បន្ថយវិសមភាព និងព្យាយាមទប់ទល់នឹងការកើនឡើងរបស់ប្រទេសចិន៕

មហាយក្សចិនស្នើរៀបចំកិច្ចប្រជុំរដ្ឋមន្ត្រីការបរទេសជាមួយអាស៊ាននៅខែក្រោយ ដើម្បីដោះស្រាយវិបត្តិនៅមីយ៉ាន់ម៉ា

ដោយៈ សុខុម

ប្រទេសចិន: មហាយក្សចិន បានស្នើសុំរៀបចំកិច្ចប្រជុំរដ្ឋមន្ត្រីការបរទេស ជាមួយអាស៊ាន-១០ ប្រទេសនៅខែមិថុនាក្នុងប្រទេសនេះ ដើម្បីពិភាក្សារកវិធីដោះស្រាយបញ្ចប់វិបត្តិនៅប្រទេសមីយ៉ាន់ម៉ា។ នេះបើយោងតាមប្រភពរដ្ឋាភិបាលទម្លាយឱ្យដឹងកាលពីថ្ងៃសុក្រ ទី៧ ឧសភា។

រដ្ឋាភិបាលចិន បាននិងកំពុងព្យាយាមរឹតទំនាក់ទំនង ឱ្យកាន់តែជិតស្និទ្ធជាមួយបណ្ដាប្រទេសជាសមាជិកអាស៊ាន ស្របពេលដែលសហរដ្ឋអាមេរិក បាននិងកំពុងពង្រឹងទំនាក់ទំនង ជាមួយបណ្ដាប្រទេសប្រជាធិបតេយ្យផ្សេងៗទៀត ដូចជា ជប៉ុន កូរ៉េខាងត្បូងជាដើម ដើម្បីទប់ឥទ្ធិពលរីកកាន់តែធំរបស់រដ្ឋាភិបាលក្រុងប៉េកាំង ទាំងក្នុងតំបន់ និងពិភពលោក។

នៅឯកិច្ចប្រជុំរដ្ឋមន្ត្រីការបរទេសរបស់ក្រុមប្រទេស G7 ក្នុងទីក្រុងឡុងដ៍ ប្រទេសអង់គ្លេស កាលពីដើមខែនេះ ប្រទេសព្រុយណេ ក្នុងឋានៈជាប្រធានប្ដូរវេននៃកិច្ចប្រជុំអាស៊ាននៅឆ្នាំនេះ ត្រូវបានអញ្ជើញឱ្យចូលរួមជាភ្ញៀវកិត្តិយស។ នេះឆ្លុះបញ្ចាំងឱ្យឃើញថា មហាយក្សចិន និងបណ្ដាប្រទេសប្រជាធិបតេយ្យធំៗបាន និងកំពុងប្រកួតប្រជែងដណ្ដើមឥទ្ធិពលនៅក្នុងតំបន់ស៊ីអាគ្នេយ៍។

ប្រភពបានទម្លាយឱ្យដឹងថា ការដឹកនាំរបស់ប្រធានាធិបតីចិន ស៊ី ជីនភីង បាននិងកំពុងពិចារណារធ្វើជាម្ចាស់ផ្ទះ ទទួលរៀបចំកិច្ចប្រជុំជាមួយ បណ្ដាប្រទេសជាសមាជិកអាស៊ាន ក្នុងទីក្រុងមួយរបស់ចិន ក្រៅពីក្រុងប៉េកាំង។

ខណៈឆ្នាំនេះ ជាខួបឆ្នាំទី៣០ នៃទំនាក់ទំនងកិច្ចសន្ទនាចិន-អាស៊ាន រដ្ឋាភិបាលក្រុងប៉េកាំង មានបំណងពង្រឹងកិច្ចសហប្រតិបត្តិការទ្វេភាគី។ ទោះជាយ៉ាងណា គ្មានប្រភពច្បាស់ការថា តើលោក Maung Lwin រដ្ឋមន្ត្រីការបរទេសមីយ៉ាន់ម៉ា ដែលតែងតាំងដោយរបបយោធា នឹងធ្វើទស្សនកិច្ចទៅកាន់ប្រទេសចិន ឬយ៉ាងណានោះទេ។

នៅប្រទេសមីយ៉ាន់ម៉ា កងកម្លាំងប្រដាប់អាវុធ នៅតែបន្តបង្ក្រាបយ៉ាងសាហាវទៅលើក្រុមបាតុករ ដែលតវ៉ាប្រឆាំងរដ្ឋប្រហារយោធា ដែលបានផ្ទុះឡើងកាលពីខែកុម្ភៈ។

ក្រុមអ្នកជំនាញខាងកិច្ចការបរទេសនិយាយថា ប្រសិនបើកិច្ចប្រជុំរដ្ឋមន្ត្រីការបរទេសនេះ ពិតជាត្រូវបានរៀបចំឡើងដូចការគ្រោងទុកមែន “ការព្រមព្រៀងជាឯកច្ឆន្ទ៥ចំណុច” រួមទាំងការបញ្ជូនប្រេសិតពិសេស ទៅកាន់ប្រទេសមីយ៉ាន់ម៉ាផង ប្រហែលជានឹងក្លាយជាប្រធានបទក្ដៅ ដែលត្រូវលើកយកមកពិភាក្សា៕

យល់ដឹងពីប្លង់កម្មសិទ្ធអចលនទ្រព្យៈ តើប្លង់ទន់ និងប្លង់រ៉ងមានសុពលភាព ផ្លូវច្បាប់ដូចម្តេច?

ដោយៈគង់ សូរិយា

ភ្នំពេញៈ ប្លង់កាន់កាប់អចលនទ្រព្យមានសារៈសំខាន់ណាស់ ដើម្បីបង្ហាញពីអត្តសញ្ញាណម្ចាស់កម្មសិទ្ឋអចលនទ្រព្យ ពិសេសចូលរួមបញ្ចៀសហានិភ័យ និងជម្លោះដីធ្លីឬអចលនទ្រព្យនានាផងដែរ។

លោកស្រីចេវ សុឃុននាយិកាក្រុមហ៊ុនអចលនទ្រព្យKhat Appraisalបានបង្ហាញនូវចំណេះដឹងមួយចំនួនពីប្លង់សម្គាល់អចលនទ្រព្យ គឺប្លង់ទន់ និងប្លង់រ៉ឹង។

ដូចម្តេចដែលហៅថាប្លង់ទន់?

បើតាមលោកស្រីចេវ សុឃុនបានមានប្រសាសន៍ឲ្យដឹងថា ប្លង់ទន់ គឺជាប្រភេទប្លង់កម្មសិទ្ធិ ដែលមិនទាន់ស្របច្បាប់ ១០០% ទេជាកម្មសិទ្ធិបែបភោគៈ មានន័យថា អ្នករស់នៅ និងអាស្រ័យផល មិនទាន់បានចុះបញ្ជីនៅរដ្ឋបាលសុរិយោដីនៅឡើយ ប៉ុន្តែអ្នកកាន់កាប់ដីនោះ អាចនឹងមានឯកសារ បញ្ជាក់ដូចជា៖ ពាក្យស្នើសុំកាន់កាប់ដីធ្លី និងផ្ទះសម្បែង លិខិតផ្ទេរសិទ្ធិប្រើប្រាស់ដីធ្លី និងផ្ទះសម្បែង លិខិតផ្ទេរសិទ្ធិកាន់កាប់ និងប្រើប្រាស់ដីធ្លី ឬចុងសន្លឹក ឬឯកសារផ្សេងទៀត ។

សំគាល់: ឯកសារប្រភេទនេះ ត្រូវបានចេញ និងបញ្ជាក់ដោយអាជ្ញាធរមូលដ្ឋាន មានដូចជា មេភូមិ មេឃុំ/ចៅសង្កាត់ អភិបាលស្រុក-ខណ្ឌ ដាច់ដោយឡែក ឬរួមគ្នា។

ដូចម្តេចដែលហៅថាប្លង់រឹង?

*ប្លង់រឹង គឺជាប្រភេទប្លង់កម្មសិទ្ធិ ដែលចេញដោយអាជ្ញាធរ ឬរដ្ឋបាលសុរិយោដីថ្នាក់ខេត្ត -ក្រុង-រាជធានី ហើយប្លង់រឹងនេះ មាន២ប្រភេទ ដូចជា ទី1.វិញ្ញាបនប័ត្រសម្គាល់សិទ្ធិកាន់កាប់អចលនវត្ថុ: ជាប្រភេទប្លង់រឹង ប្លង់ប្រភេទឬជំនាន់ទីពីរ ដែលចេញដោយរដ្ឋបាលសុរិយោដីថ្នាក់ខេត្ត-ក្រុង-រាជធានី ហើយប្លង់ប្រភេទនេះជាប្លង់គំរូថ្មី ដែលបង្កើតឡើងក្នុងន័យបំបាត់ចោលនូវប្លង់ប្រភេទ ឬជំនាន់ទីមួយ គឺ “ប័ណ្ណសំគាល់ សិទ្ធិកាន់កាប់ប្រើប្រាស់ដីធ្លី”។

ទី2.វិញ្ញាបនប័ត្រសម្គាល់ម្ចាស់អចលនវត្ថុ: ជាប្រភេទប្លង់រឹងស្របច្បាប់១០០% និងចុងក្រោយបង្អស់ដែលកំពុងអនុវត្ត និងប្រើប្រាស់ក្នុងប្រទេសកម្ពុជា ។

វាជាប្រភេទប្លង់កម្មសិទ្ធិ ដែលបញ្ជាក់ពីភាពជាម្ចាស់ស្របច្បាប់១០០% នៃដីដែលអ្នកកំពុងតែកាន់កាប់ និងអាស្រ័យផល។ យើងអាចហៅម្យ៉ាងទៀតថា ជា “ប្លង់ LMAP” ឬ “ប្លង់ប្រព័ន្ធ” ដោយប្លង់នេះនាពេលបច្ចុប្បន្នមានប្រព័ន្ធកូដ QR Code៕

ក្រុមហ៊ុនថៃជាង៤០០ស្វែងរកឱកាសពង្រីកធុរកិច្ចទៅកម្ពុជា

ដោយៈ ម៉ាណេត

បាងកកៈ សមាគម Thai Subcontracting Promotion Association (Thai Subcon) ដែលមានសមាជិកក្រុមហ៊ុននវានុវត្ត និងឧស្សាហកម្មសរុបជាង ៤០០ក្រុមហ៊ុន កំពុងស្វែងរកដៃគូអាជីវកម្ម និងឱកាសពង្រីកប្រតិបត្តិការធុរកិច្ចទៅកាន់ប្រទេសកម្ពុជា ក្រោយវិបត្តិជំងឺកូវីដ១៩។ នេះបើតាមកិច្ចពិភាក្សារវាងលោក Kiattisak Jirakajonvong ដែលជាប្រធានសមាគម ជាមួយលោកអ៊ូក សោភ័ណ ឯកអគ្គរាជទូតកម្ពុជាប្រចាំប្រទេសថៃ ។

នៅក្នុងជំនួបតាមប្រព័ន្ធ Video Conference កាលពីរសៀលថ្ងៃសុក្រ ទី៧ ខែឧសភា ប្រធានសមាគមរូបនេះ បានស្នើសុំស្ថានទូតកម្ពុជាប្រចាំប្រទេសថៃ សហការរៀបចំកម្មវិធីជំនួបធុរកិច្ច និងទស្សនកិច្ចស្វ័យសិក្សានៅតាមរោងចក្រដែលជាសមាជិក Thai Subcon និងនៅតាមតំបន់សេដ្ឋកិច្ចពិសេសក្នុងប្រទេសកម្ពុជា ដើម្បីផ្តល់ឱកាសដល់វិស័យឯកជននៃប្រទេសទាំងពីរ ធ្វើការពង្រឹង និងពង្រីកកិច្ចសហប្រតិបត្តិការទ្វេភាគី។

ជាការឆ្លើយតប លោកអ៊ូក សោភ័ណ បានថ្លែងប្រាប់ប្រតិភូ Thai Subcon ថា គោលនយោបាយការទូតសេដ្ឋកិច្ច យុទ្ធសាស្ត្រថៃបូក១ និងកិច្ចប្រឹងប្រែងរបស់រាជរដ្ឋាភិបាលកម្ពុជា នឹងគាំទ្រ និងលើកកម្ពស់បរិយាសធុរកិច្ច-វិនិយោគ ការធ្វើពិពិធកម្មទីផ្សារតាមរយៈការចុះកិច្ចព្រមព្រៀងពាណិជ្ជកម្មសេរី (FTA) ទ្វេភាគី ជាមួយប្រទសចិន កូរ៉េខាងត្បូង និងការចូលរួមជាមួយប្លុក RCEP ជាដើម។

លោកឯកអគ្គរាជទូត បានថ្លែងថា ការរៀបចំបង្កើតឱ្យមានក្រុមប្រឹក្សាធុរកិច្ចកម្ពុជា (CBC) ប្រចាំទីក្រុងបាងកក នឹងជួយសម្រួលការធ្វើពាណិជ្ជកម្ម និងវិនិយោគទ្វេភាគីកម្ពុជា-ថៃ ក៏ដូចជាជំរុញវិស័យទេសចរណ៍ និងវប្បធម៌ សំដៅឆ្លើយតបយុទ្ធសាស្ត្រការទូតសេដ្ឋកិច្ចកម្ពុជា និងបំណងប្រាថ្នារបស់ប្រមុខដឹកនាំនៃប្រទេសទាំងពីរ ក្នុងការបង្កើនទំហំពាណិជ្ជកម្មទ្វេភាគី ឱ្យបានដល់ទឹកប្រាក់ ១៥ប៊ីលានដុល្លារ នៅក្រោយវិបត្តិជំងឺកូវីដ១៩៕

ក្រុមហ៊ុនថាមពលម៉ាឡេស៊ីរំពឹងរកបានផលចំណេញខ្ពស់ពីទីផ្សារកំពុងលេចឡើងរបស់កម្ពុជា

ដោយៈប៊ី

ភ្នំពេញៈ ក្រុមហ៊ុន PESTECH របស់ម៉ាឡេស៊ី គេរំពឹងថានឹងទទួលបានកំណើនអាជីវកម្មពីគម្រោងថ្មីៗ និងការរីកចម្រើននៃគម្រោង ដែលមានស្រាប់ ទាំងនៅកម្ពុជា និងតំបន់អាស៊ាន។ នេះបើយោងតាមការចេញផ្សាយរបស់ The Malaysia Reserve នៅថ្ងៃទី៧ ខែឧសភា ឆ្នាំ២០២១ ។

លោក Daniel Wong អ្នកវិភាគនៅឯធនាគារ Hong Leong Investment Bank Bhd (HLIB) បាននិយាយនៅក្នុងរបាយការណ៍មួយ កាលពីម្សិលមិញថា ក្រុមហ៊ុនPestech មានការបញ្ជាទិញយ៉ាងរឹងមាំ ដែលមានតម្លៃ២,២ពាន់លានរីងហ្គីត នៅក្នុងដៃ ហើយនឹងទទួលបានការដេញថ្លៃចន្លោះពី១ ពាន់លានរីងហ្គីត ដល់១,២ពាន់លានរីងហ្គីត។ (១រីងហ្គីតស្មើនឹង០,២៤ដុល្លារ)។

HLIB រំពឹងថា ប្រាក់ចំណូលស្នូលរបស់ Pestech នឹងកើនឡើងក្នុងអត្រាកំណើនប្រចាំឆ្នាំប្រចាំឆ្នាំ (CAGR) ៣២,៧% សម្រាប់ឆ្នាំ២០២១ ដល់ឆ្នាំ២០២៣ ដោយសារការរួមបញ្ចូលគ្នា នៃការចូលរួមវិភាគទានគម្រោងថ្មី និងការដំណើរការធម្មតានៃគម្រោងរបស់ខ្លួន។

លោក Wong បានកត់សម្គាល់ថា ក្រុមហ៊ុននេះ មានសក្តានុពលកំណើនខ្លាំងនៅក្នុងប្រទេសម៉ាឡេស៊ី និងគម្រោងថាមពលនៅអាស៊ាន ការវិនិយោគហេដ្ឋារចនាសម្ព័ន្ធផ្លូវដែក និងអាជីវកម្ម Startup នៃថាមពលកកើតឡើងវិញ (RE) និងការអភិវឌ្ឍហេដ្ឋារចនាសម្ព័ន្ធយានយន្តអេឡិចត្រូនិច (EV) ស្របតាមផែនការថាមពលពណ៌បៃតង របស់ម៉ាឡេស៊ី និងអាស៊ាន។

នៅក្នុងគម្រោង RE និង EV បច្ចុប្បន្ននេះក្រុមហ៊ុន Pestech មានគម្រោងថាមពលពន្លឺព្រះអាទិត្យទំហំ២០មេហ្គាវ៉ាត់ នៅក្នុងប្រទេសកម្ពុជា ហើយរំពឹងទទួលបានអត្ថប្រយោជន៍ពីគម្រោងនៅអាស៊ាន ដែលមានកម្លាំង៣៥ ជីហ្គាវ៉ាត់ ដល់៤០ជីហ្គាវ៉ាត់ នៃសមត្ថភាពផលិតថាមពេលកកើតឡើងវិញ នៅត្រឹមឆ្នាំ២០២៥ ។

លោក Wong បានបន្ថែមថា ថ្នាក់ដឹកនាំក្រុមហ៊ុន កំពុងពិភាក្សាជាមួយភាគីផ្សេងៗសម្រាប់ស្ថានីយ៍សាក EV នៅក្នុងអគារពាណិជ្ជកម្ម ខុនដូ និងតាមបណ្តោយផ្លូវហាយវេ ដែលមានលក្ខណៈអំណោយ ជាមួយនឹងគម្រោងកាបូនទាប ដែលត្រូវបានស្នើថ្មីៗនេះដោយមជ្ឈមណ្ឌលបច្ចេកវិទ្យាបៃតង និងការផ្លាស់ប្តូរអាកាសធាតុរបស់ម៉ាឡេស៊ី ដើម្បីពន្លឿនការអនុម័ត EV ជាតិ។

លោក Wong បាននិយាយថា “ក្រុមហ៊ុន Pestech កំពុងទទួលបានអត្ថប្រយោជន៍ពីក្រុមហ៊ុន Tenaga Nasional Bhd (TNB) និងការវិនិយោគដ៏សំខាន់នៅប្រទេសកម្ពុជាលើហេដ្ឋារចនាសម្ព័ន្ធថាមពល” ។

ក្រុមហ៊ុន TNB កំពុងផ្តោតលើការវិនិយោគ និងចែកចាយ (T&D) ដែលមានតម្លៃ២៨ពាន់លានរីងហ្គីត សម្រាប់ឆ្នាំ២០២១ ដល់២០២៣ ដើម្បីធានាបាននូវនិរន្តរភាពរយៈពេលវែង និងឆ្លើយនឹងការផ្គត់ផ្គង់អគ្គិសនីម៉ាឡេស៊ីនាពេលអនាគត(MESI) 2.0 ។

លោកបានថ្លែងបន្តថា “ដូចគ្នានេះដែរ ប្រទេសកម្ពុជានឹងបន្តវិនិយោគយ៉ាងខ្លាំងលើ T&D ដើម្បីសម្រេចបាននូវគោលដៅអគ្គិសនីរបស់ខ្លួន សម្រាប់៩០%នៃគ្រួសារនៅកម្ពុជា នៅឆ្នាំ២០៣០ និងបំពេញតាមតម្រូវការ ដែលបានប៉ាន់ស្មានទ្វេដងនៃតម្រូវការថាមពលខ្ពស់ និងសមត្ថភាពផលិតថាមពលនៅឆ្នាំ២០៣០ ជាមួយនឹងការធ្វើសមាហរណកម្មជាមួយថាមពលកកើតឡើងវិញ”៕

រដ្ឋាភិបាលចាក់វ៉ាក់សាំងបង្ការជំងឺកូវីដជូនប្រជាពលរដ្ឋបានជាង១,៦លាននាក់ហើយ

ដោយៈគង់ សូរិយា

ភ្នំពេញៈ ជាមួយនឹងយុទ្ឋនាការចាក់វ៉ាក់សាំងយ៉ាងលឿនជូនប្រជាពលរដ្ឋ តាមរយៈយុទ្ឋសាស្ត្រផ្ការីក រដ្ឋាភិបាលកម្ពុជាបានចាក់វ៉ាក់សាំង ជូនប្រជាពលដ្ឋបានជាង១,៦លាននាក់រួចហើយ គិតត្រឹមយប់ថ្ងៃទី៧ ឧសភាកន្លងមកនេះ។

យោងតាមរបាយការណ៍របស់ក្រសួងសុខាភិបាល និងក្រសួងការពារជាតិបានឲ្យដឹងថា គិតត្រឹមយប់ថ្ងៃទី០៧ ខែឧសភា ឆ្នាំ២០២១ ក្រុមគ្រូពេទម្យនៃស្ថាប័នថ្នាក់ជាតិទាំងពីរ បានចាក់វ៉ាក់សាំងការពារកូវីដ១៩ជូនមន្ត្រីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេសសរុបចំនួន ១,៦៦៣,២៤៩នាក់។

រដ្ឋាភិបាលគ្រោងចាក់វ៉ាក់សាំងវង្ការជំងឺកូវីដ១៩ ជូនប្រជាពលរដ្ឋចំនួន១០លាននាក់ នៅទូទាំងប្រទេសនាពាក់កណ្តាលឆ្នាំ២០២២ខាងមុខនេះ៕

កម្ពុជានិងវៀតណាមពន្លឿនការអភិវឌ្ឍហេដ្ឋារចនាសម្ព័ន្ធពាណិជ្ជកម្មតាមព្រំដែន

ដោយៈ ម៉ាណេត

ភ្នំពេញៈ រាជរដ្ឋាភិបាលកម្ពុជា និងរដ្ឋាភិបាលវៀតណាម ឯកភាពពន្លឿនការអនុវត្តផែនការមេ ដើម្បីអនុវត្តអនុស្សរណៈនៃការយោគយល់គ្នា ស្តីពីការតភ្ជាប់ និងការអភិវឌ្ឍហេដ្ឋារចនាសម្ព័ន្ធពាណិជ្ជកម្ម តាមព្រំដែនរវាងរដ្ឋាភិបាលទាំងពីរ។ នេះបើយោងតាមចេញផ្សាយរបស់សារព័ត៌មាន VNA នៅថ្ងៃទី៧ ខែឧសភា ឆ្នាំ២០២១ ។

ការឯកភាពនេះត្រូវបានធ្វើឡើង ក្នុងកិច្ចប្រជុំរវាងរដ្ឋមន្ត្រីក្រសួងឧស្សាហកម្ម និងពាណិជ្ជកម្មលោក Nguyen Hong Dien និងលោកចាយ ណាវុធឯកអគ្គរាជទូតកម្ពុជាប្រចាំវៀតណាមនៅទីក្រុងហាណូយនៅថ្ងៃទី៦ ខែឧសភា ដើម្បីពិភាក្សាពីវិធានការ និងពង្រឹងទំនាក់ទំនងទ្វេភាគីលើវិស័យពាណិជ្ជកម្ម ឧស្សាហកម្ម និងថាមពល។

ភាគីទាំងពីរប្តេជ្ញាពន្លឿនការអនុវត្តផែនការមេ ដើម្បីអនុវត្តអនុស្សរណៈនៃការយោគយល់គ្នា ស្តីពីការតភ្ជាប់ និងការអភិវឌ្ឍហេដ្ឋារចនាសម្ព័ន្ធពាណិជ្ជកម្ម តាមព្រំដែនរវាងរដ្ឋាភិបាលទាំងពីរ។

កាលពីពេលថ្មីៗនេះ ប្រទេសវៀតណាមបានបញ្ចប់នូវផែនការមេ និងអនុម័តគំរោងសាងសង់ផ្លូវល្បឿនលឿន មកកាន់ព្រំដែនកម្ពុជា នាក្រុងបាវិត ខេត្តស្វាយរៀងផងដែរ ខណៈកម្ពុជាកំពុងឲ្យក្រុមហ៊ុនចិនសិក្សាលំអិតបន្ថែមទៀត លើការសាងសង់ផ្លូវល្បឿនលឿនភ្នំពេញ បាវិតនាពេលខាងមុខផងដែរ៕

មជ្ឈមណ្ឌលពាណិជ្ជកម្ម China Zun Tower ស្ថាបត្យកម្មនៃសតវត្សរ៍ទី២១របស់ចិន

ដោយៈសហការី

ប៉េកាំង មហាយក្សចិនមិនបញ្ឈប់ការសម្ញែង អាគារកប់ពពករបស់ខ្លួននោះទេ ដោយទីក្រុងប៉េកាំង បាននិងកំពុងតែសាងសាងសង់អគារ ខ្ពស់កប់ពពកមួយទៀត មានឈ្មោះថា CITIC Tower ឬ China Zun Tower ដែលគ្រោងនឹងបញ្ចប់នៃការសាងសង់របស់ខ្លួននៅក្នុងឆ្នាំ២០១៩កន្លងមកនេះ។

ស្ថាបត្យកម្ម ដែលជាមជ្ឈមណ្ឌលពាណិជ្ជកម្មកម្រិតពិភពលោកនេះ មានកម្ពស់ ១៩០ជាន់ ស្មើនឹង៥២៨ម៉ែត្រ និងត្រូវបានសាងសង់នៅក្នុងខណ្ឌ ដែលមានសេដ្ឋកិច្ចរីកចម្រើន នាទីក្រុងប៉េកាំង។ វាក៏នឹងក្លាយជាអគារ ដែលខ្ពស់ជាងគេនៅក្នុងទីក្រុងផងដែរ។

អគារ CITIC Tower មានកម្ពស់ខ្ពស់ជាងអគារ China World Trade Center Tower III ។

មជ្ឈមណ្ឌលពាណិជ្ជកម្ម China Zun គឺជាប្រភេទអគារប្រើប្រាស់រួម មានទាំងអគារការិយាល័យ អាផាតមិន សណ្ឋាគារ និងស្កាយបារនៅជាន់លើផងដែរ។

អគារនេះ ត្រូវបានចាប់ផ្តើមសាងសង់នៅក្នុងឆ្នាំ ២០១១ ហើយនឹងបញ្ចប់នៅក្នុងឆ្នាំ ២០១៩ នេះ អភិវឌ្ឍន៍ដោយ CITIC Real Estate ដែលបានចំណាយទឹកប្រាក់២.៥ ពាន់លានដុល្លារ ៕

អង្គការសុខភាពពិភពលោកប្រកាសទទួលស្គាល់វ៉ាក់សាំង Sinopharm របស់ចិនជាផ្លូវការហើយ

ដោយ វឌ្ឍនា

ពិភពលោក៖ អង្គការសុខភាពពិភពលោក (WHO) នៅទីបំផុតបានប្រកាសទទួលស្គាល់វ៉ាក់សាំង Sinopharm របស់ចិនជាផ្លូវការ។ នេះបើយោងតាមការចេញផ្សាយរបស់សារព័ត៌មាន AFP នៅយប់ថ្ងៃទី០៧ ខែឧសភា ឆ្នាំ២០២១ ។

វ៉ាក់សាំងនេះជាវ៉ាក់សាំងដ៏សំខាន់មួយ ក្នុងចំណោមវ៉ាក់សាំងសំខាន់ៗពីររបស់ចិន ដែលបានផ្តល់ឱ្យប្រជាជនរាប់រយលាននាក់រួចទៅហើយនៅក្នុងប្រទេសចិន និងនៅបរទេស។ វាបានក្លាយជាវ៉ាក់សាំងបង្ការជំងឺ COVID-19 ដំបូងគេរបស់ប្រទេសមិនមែនលោកខាងលិច ដែលទទួលបានការគាំទ្រពីអង្គការសុខភាពពិភពលោក (WHO)។ ហើយនេះក៏ជាលើកទី១ ផងដែរ ដែលអង្គការអន្តរជាតិមួយនេះ បានផ្តល់ការអនុញ្ញាតិឲ្យប្រើប្រាស់បន្ទាន់ នូវវ៉ាក់សាំងចិនសម្រាប់បង្ការជំងឺឆ្លងណាមួយ។

ការចុះបញ្ជីរបស់អង្គការសុខភាពពិភពលោកនេះ គឺជាការទទួលស្គាល់ពីសុវត្ថិភាព និងប្រសិទ្ធភាពរបស់វ៉ាក់សាំងចិនមួយនេះ ក៏ដូចជាការអនុញ្ញាតឱ្យដាក់បញ្ចូលវ៉ាក់សាំងនេះ ទៅក្នុងកម្មវិធីវ៉ាក់សាំងចែកចាយសកល ដែលហៅកាត់ថា Covax របស់អង្គការមួយនេះផងដែរ។

គួរបញ្ជាក់ថា WHO បានអនុម័តយល់ព្រមឲ្យប្រើប្រាស់ក្នុងករណីបន្ទាន់ ចំពោះវ៉ាក់សាំងបង្ការជំងឺ COVID-19 ចំនួន០៤ប្រភេទរួចមកហើយ ក្នុងនោះរួមមានដូចជាវ៉ាក់សាំងដែលអភិវឌ្ឍន៍ដោយក្រុមហ៊ុន Pfizer-BioNTech ក្រុមហ៊ុន AstraZeneca ក្រុមហ៊ុន Johnson & Johnson និងក្រុមហ៊ុន Moderna៕