ដោយ៖រតនៈ

ភ្នំពេញ ៖ គេហទំព័រជំនាន់ថ្មីនៃសេវាការងារសាធារណៈរបស់ទីភ្នាក់ងារជាតិមុខរបរ និងការងារ ដែលមានអាស័យដ្ឋាន www.nea.gov.kh នៃក្រសួងការងារ និងបណ្តុះបណ្តាលវិជ្ជាជីវៈ នឹងដាក់ឲ្យប្រើប្រាស់ជាផ្លូវការនៅសប្ដាហ៍ក្រោយនេះដើម្បីជួយសម្រួលដល់ការផ្សព្វផ្សាយព័ត៌មានការងារ ក៏ដូចជាទីផ្សារការងារផងដែរ។

គេហទំព័រហ្វេសប៊ុករបស់ក្រសួងការងារ និងបណ្តុះបណ្តាលវិជ្ជាជីវៈ ដែលចុះផ្សាយនៅថ្ងៃទី៣១ ខែមីនានេះឲ្យដឹងថា គេហទំព័រដែលរួមគ្នាអភិវឌ្ឍក្រោមជំនួយបច្ចេកទេសរបស់សាធារណៈរដ្ឋកូរ៉េ នឹងផ្តល់សេវាជូនតាមប្រព័ន្ធអ៊ីនធើណេត នៅត្រឹមថ្ងៃទី៨ ខែមេសា ឆ្នាំ២០២១សប្ដាហ៍ក្រោយនេះ ដែលកាន់តែងាយស្រួលកាន់តែឆាប់រហ័ស និងកាន់តែចំណេញពេលក្នុងការស្វែងរកការងារធ្វើ ជ្រើសរើសកម្លាំងពលកម្ម ទទួលព័ត៌មានអំពីការអប់រំបណ្ដុះបណ្ដាលដែលទីផ្សារកំពុងត្រូវការប្រឹក្សាយោបល់អំពីអាជីព និងការងារ និងសំំភាសន៍ការងារអនឡាញជាដើម។

គេហទំព័រ www.nea.gov.kh នៃក្រសួងការងារ និងបណ្តុះបណ្តាលវិជ្ជាជីវៈ គឺជាមជ្ឈមណ្ឌលការងារថ្មីនេះមួយ ដែលបានឆ្លុះបញ្ចាំងពីកិច្ចខិតខំប្រឹងប្រែងថ្មីបន្ថែមទៀតរបស់រាជរដ្ឋាភិបាលក្នុងការនាំសេវាការងារ និងព័ត៌មានទីផ្សារការងារ ឱ្យបានកាន់តែឆាប់រហ័ស និងមកកៀកជិតប្រជាពលរដ្ឋ ក៏ដូចជាការប្រឹងប្រែងជាបន្តបន្ទាប់ សំដៅជួយដល់ប្រជាពលរដ្ឋឱ្យទទួលបានការងារធ្វើកាន់តែច្រើន ប្រាក់ចំណូលកាន់តែប្រសើរ និងកាត់បន្ថយភាពក្រីក្រ ដែលជាគោលដៅអាទិភាពរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់របស់ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

មជ្ឈមណ្ឌលនេះនឹងផ្តល់ដល់និយោជកក្នុងការផ្សព្វផ្សាយព័ត៌មានជ្រើសរើសកម្លាំងពលកម្ម ការគាំទ្រនិងការទទួលបានការជួយផ្គូរផ្គងអ្នកស្វែងរកការងារតាមតម្រូវការ ក៏ដូចជាការរីកចម្រើនផ្នែកអាជីវកម្ម និងធុរកិច្ចគ្រប់វិស័យ។ លើសពីនេះ តាមរយៈមជ្ឈមណ្ឌលការងារនេះ គ្រឹះស្ថានអប់រំបណ្តុះបណ្តាលគ្រប់ប្រភេទ ក៏អាចធ្វើការផ្សព្វផ្សាយរាល់កម្មវិធីបណ្តុះបណ្តាលរបស់ខ្លួនបានយ៉ាងទូលំទូលាយ។
បច្ចុប្បន្ន www.nea.gov.kh នៃក្រសួងការងារ និងបណ្តុះបណ្តាលវិជ្ជាជីវៈ បានខិតខំប្រឹងប្រែងពង្រីកសេវាការងារ និងព័ត៌មានទីផ្សារការងារ តាមរយៈបង្កើតមជ្ឈមណ្ឌលការងារ បានកើនឡើងដល់ចំនួន១៣កន្លែងនៅទូទាំងប្រទេស និងមជ្ឈមណ្ឌលការងារចល័តចំនួន១កំពុងរង់ចាំផ្តល់ និងនាំយកសេវាការងារទៅដល់គ្រប់ច្រកល្ហកយ៉ាងទូលំទូលាយជូនប្រជាពលរដ្ឋ៕

ដោយៈ រ៉ាណេត

ភ្នំពេញៈ ទីផ្សារលក់រាយនៅតាមបណ្តាទំនើបនៅកម្ពុជា ដែលកំពុងទទួលរងនូវ ផលប៉ះពាល់ពីវិបត្តិកូវីដ១៩ នៅពេលបច្ចុប្បន្នបានជះឥទ្ធិពលបន្ត ទៅដល់បណ្តាអាជីករដែលជួលទីតាំងលក់រាយ រហូតមានអ្នកខ្លះបានសម្រេចចិត្តបិទទ្វារ ផ្អាកដំណើរការជាបណ្តោះអាសន្ន ដោយសារមិនអាចទប់ទល់នឹងការខាតបង់ជាប់ជាប្រចាំបាន។

អ្នកនា កែវ រស្មី ដែលជាម្ចាស់ក្រុមហ៊ុននាំចូលសម្លៀកបំពាក់ម៉ាក់ល្បីផ្តាច់មុខមកពីប្រទេសសិង្ហបុរី និងកំពុងជួលស្តង់ទីតាំងលក់រាយនៅផ្សារទំនើបចំនួន៤ ក្នុងរាជធានីភ្នំពេញបានមានប្រសាសន៍ប្រាប់ឱ្យដឹងនៅថ្ងៃទី៣១ ខែមីនា ឆ្នាំ២០២១នេះថា បញ្ហានៃវិបត្តិកូវីដ១៩ បានជះឥទ្ធិពលអាក្រក់ដល់បណ្តាអាជីវកម្មលក់ដូរ ស្ទើរគ្រប់ប្រភេទនៅក្នុងផ្សរទំនើប ដោយសារតែមនុស្សភាគច្រើនបាត់បង់ចំណូល និងមិនសូវចេញដើរច្រើនដូចពេលមុន។

អ្នកនាងបានបន្តថា “វិបត្តិកូវីដ១៩កាលពីឆ្នាំ២០២០ ហាក់មានភាពធូរស្រាលជាងនេះដែលយ៉ាងហោចណាស់ ក៏អាចលក់បានដើមទុនខ្លះគ្រាន់បង្វិល និងចំណាយថ្លៃជួលបុគ្គលិក”។អ្នកនាងបន្តថា “ប៉ុន្តែចាប់តាំងពីដើមឆ្នាំ២០២១ ជាពិសេសនៅត្រឹមពាក់ក ណ្តាលខែកុម្ភៈ ការលក់បានធ្លាក់ចុះស្ទើរដល់ចំណុចសូន្យតែម្ដង”។

អ្នកនាងបន្តថា “ខ្ញុំមានស្ដង់លក់នៅក្នុងផ្សារទំនើបចំនួន៤ មាននៅក្នុងផ្សារទំនើប AEON1 ផ្សារAEON2 ផ្សារ OLYMPIA និងផ្សារ PANCIAL ប៉ុន្តែបើបូកចំណូលពីការលក់ទាំង៤ ទីតាំងបញ្ចូលគ្នាស្ទើរមិនស្មើចំណូល១ ទីតាំងកាលពីមិនទាន់ផ្ទុះកូវីដនោះផង”។

អ្នកនាង រស្មី បានបញ្ជាក់ ពេលនេះមានផ្សារខ្លះ គាត់បានផ្អាកមិនយកថ្លៃជួលស្តង់នោះទេ ហើយផ្សារខ្លះគាត់បញ្ចុះតម្លៃជួល៣០ភាគរយ ប៉ុន្តែទោះជាយកថ្លៃជួលស្ដង់ក៏នៅតែខាងបង់ជាប់ជាប្រចាំដែរ ព្រោះយ៉ាងហោចណាស់ ក៏ត្រូវចំណាយទៅលើថ្លៃប្រាក់ខែបុគ្គលិកដែលប្រចាំការលក់នៅស្ដង់ ការចំណាយទៅលើថ្លៃភ្លើង និងការចំណាយទៅលើថ្លៃអនាម័យជាដើម ហើយសម្លៀកបំពាក់ទៀតសោតក៏ហួសសម័យកាល ដែលជាទូទៅទីផ្សារលក់ត្រូវផ្លាស់ប្ដូរយ៉ាងយូរ៣ខែម្ដង ដូច្នេះវាជាការខាតបង់ផ្ទួនៗលើគ្នាតែម្ដង។

ពាក់ព័ន្ធទៅនឹងស្ថានការណ៍ដែលកំពុងប្រឈម និងការផ្គត់ផ្គង់ផ្សារទំនើបនៅពេ​លបច្ចុប្បន្ននេះ អ្នកជំនាញបានអះអាងថា ផ្សារទំនើបនៅពេលនេះកំពុងតែជួបនឹងភាពលើស ហើយតម្រូវការជាក់ស្ដែងមានឱនភាព។

នាយិកាប្រចាំប្រទេសក្រុមហ៊ុនអន្តរជាតិ CBRE Cambodia លោកស្រីអាន សុធីតា បានមានប្រសាសន៍បង្ហាញពីក្ដីបារម្ភថា ប្រសិនបើស្ថានភាពនៅតែបន្តដូចពេលបច្ចុ​ប្បន្ន ហើយបន្ថែមថ្មីនូវចំណែកទីតាំងលក់រាយ រហូតដល់ប្រមាណ១៨ម៉ឺនម៉ែត្រការ៉េ នាដំណាច់ឆ្នាំ២០២១ នោះការផ្គត់ផ្គង់នៅក្នុងវិស័យមួយនេះនឹងលើសតម្រូវការ។

លោកស្រីបញ្ជាក់ថា “បច្ចុប្បន្ននេះការដាក់បញ្ចូលទីតាំងលក់រាយ នៅក្នុងផ្សារទំនើបនៅកម្ពុជា កំពុងតែមានការកើនឡើងជាបន្តបន្ទាប់ ជាពិសេសប្រភេទផ្សារទំនើបបែបសហគមន៍ នៅតាមតំបន់ទីប្រជុំជនមួយចំនួនក្នុងរាជធានីភ្នំពេញ ក៏ដូចជានៅក្នុងអគារពាណិជ្ជកម្មផងដែរ”។ លោកស្រីបន្តថា “កំណើននៃការដាក់បញ្ចូលថ្មីបន្ថែមទាំងនេះកំពុងតែប្រឈមទៅនឹងវិបត្តិ នៃការផ្គត់ផ្គង់លើសពីតម្រូវការ ខណៈដែលបច្ចុប្បន្នអតិថិជនមួយចំនួន ដែលនិយមទិញសម្ភារៈប្រើប្រាស់ ឬចំណីអាហារនៅតាមបណ្តាផ្សារទំនើបបានផ្លាស់ប្ដូរបែបបទ និងទម្លាប់របស់ខ្លួនដោយការទិញតាមអនឡាញ ដែលមានសេវាដឹកជញ្ជូនដល់លំនៅដ្ឋានវិញម្ដងនៅក្នុងដំណាក់កាលនេះ”៕

        ដោយគង់ សូរិយា

        ភ្នំពេញៈ អ្នកនាំពាក្យក្រសួងសាធារណៈការ និងដឹកជញ្ជូនលោកវ៉ា ស៊ីមសូរិយាបានមានប្រសាសន៍ថា បច្ចុប្បន្នក្រុមអ្នកជំនាញការកូរ៉េបានមកដល់កម្ពុជាហើយ និងកំពុងធ្វើការរួមគ្នាជាមួយភាគីកម្ពុជា លើគំរោងសាងសង់ស្ពានឆ្លងកាត់ទន្លេមេគង្គ។

លោកបានមានប្រសាសន៍ឲ្យដឹងតាមទូរស័ព្ទនារសៀលថ្ងៃទី៣១ មិនានេះថា ក្រុមការងារបច្ចេកទេសនៃប្រទេសទាំងពីរ កំពុងធ្វើការរួមគ្នាលើបញ្ហានេះ ប៉ុន្តែការវិវត្តន៍ដល់កម្រិតណា និងមានភាពអំលិតកម្រិតណា លោកមិនទាន់អាចបញ្ជាក់ឲ្យដឹងនៅឡើយទេ ព្រោះព៌តមានលំអិតពីគម្រោងនេះ នឹងដឹងនៅពេលធ្វើសិក្ខាសាលាអន្តរក្រសួង នាពេលខាងមុខ។

លោកបន្តថា “រហូតមកទល់ពេលនេះ ដំណើរការងារបច្ចេកទេសឈានដល់កម្រិតណា លោកមិនទាន់ដឹងនៅឡើយទេ ហើយការសាងសង់ស្ថិតនៅតំបន់ណា ក៏មិនទាន់មានការបញ្ជាក់នោះទេ”។ លោកបន្តថា “ខ្ញុំមិនអាចបញ្ជាក់ពីពេលវេលាជាក់លាក់ណាមួយ លើការចាប់ផ្តើមសាងសង់ស្ពាននេះនៅឡើយទេ”។

ប្រធានាធិបតីកូរ៉េលោកម៉ូន ជេអ៊ីនធ្លាប់បានមានប្រសាសន៍ឲ្យដឹងកាលពីចុងឆ្នាំមុនកំឡុងពេលលោកចូលរួមកិច្ចប្រជុំ នៅប្រទេសវៀតណាមកាលពីចុងឆ្នាំមុនថា រដ្ឋាភិ​បាលកូរ៉េជួយនឹងសាងសង់ស្ពានមិត្តភាពកម្ពុជា កូរ៉េនៅទីក្រុងភ្នំពេញនាពេលខាងមុខនេះ ដែលវាជាជំនួយសម្រាប់ចំណងមិត្តភាពនៃប្រទេសទាំងពីរ។

សម្តេចតេជោហ៊ុន សែននាយករដ្ឋមន្រ្តីនៃកម្ពុជាក្នុងកំឡុងបំពេញទស្សនកិច្ចលើកចុងក្រោយនៅប្រទេសកូរ៉េបានស្នើសុំភាគីកូរ៉េជួយសាងសង់ស្ពានមួយ សម្រាប់ជាចំណងដៃមិត្តភាព និងកិច្ចសហប្រតិបត្តិការរវាងប្រទេសទាំងពីរ ខណៈជប៉ុន និងមហាមិត្តចិនបានជួយសាងសង់ស្ពានសម្រាប់ចំណងមិត្តភាពជាមួយកម្ពុជារួចហើយ៕

ដោយៈ ប៊ី

កោះកុងៈ ប្រធានមន្ទីរសាធារណការ និងដឹកជញ្ចូនខេត្តកោះកុង បានលើកឡើងថា ប្រជាពលរដ្ឋ និងពាណិជ្ជករនឹងទទួលបានប្រយោជន៍ជាច្រើន ពីគម្រោងសាងសង់កំពង់ផែសមុទ្រថ្មី មួយទៀតនៅក្រុងខេមរភូមិន្ទ ខណៈកំពង់ផែទល់មុខសាខាពន្ធដារខេត្តមានសភាពចាស់ទ្រុឌទ្រោមខ្លាំង។

លោកអន ដាវុធប្រធានមន្ទីរសាធារណការ និងដឹកជញ្ចូនខេត្តកោះកុងបានថ្លែងនៅថ្ងៃទី៣១ ខែមីនា ឆ្នាំ២០២១នេះថា គម្រោងសាងសង់កំពង់ផែថ្មីមួយនេះ ប្រភេទជាបេតុងមានប្រវែង៦៩ម៉ែត្រ និងទទឹង៦.៥ម៉ែត្រ។ ស្ពានបេតុងភ្ជាប់ទៅផែប្រវែង២៨ម៉ែត្រ ទទឹង៨ម៉ែត្រ ចំនួន២កន្លែង។

គម្រោងអភិវឌ្ឍន៍ស្ថាបនា ផែសមុទ្រថ្មីស្រឡាងនេះដែរ គ្រោងចំណាយថវិកាសរុបប្រមាណ១.៥លានដុល្លារ ដោយប្រើប្រាស់២ឆ្នាំធ្វើយ៉ាងណាឱ្យបញ្ចប់ នៅឆ្នាំ២០២២ខាង​មុខ។

លោកប្រធានមន្ទីរសាធារណការខេត្តកោះកុង បានអះអាងថា មែនទែនទៅបើកុំតែបញ្ហារីករាលដាលជំងឺកូវីដ១៩ ម្ល៉េះគម្រោងកំពង់ផែថ្មីចាប់អនុវត្តទៅដោយរលូនហើយ។ កំពង់ផែខ្នាតមធ្យមថ្មីនេះ មិនត្រឹមតែជួយសម្រួលដល់ប្រព័ន្ធដឹកជញ្ចូនទំនិញរាយ និងវិស័យទេសចរណ៍ ពោលគឺប្រើប្រាស់បានជាលក្ខណៈពហុវិស័យ ជំនួសឱ្យផែថ្មីចាស់រក្សាទុកនៅកន្លែងដដែល គ្រាមានសភាពទ្រុឌទ្រោមយូរឆ្នាំមកហើយ។

កោះកុង គឺជាខេត្តមួយក្នុងចំណោមខេត្តជាប់សមុទ្រទាំងបួន និងស្ថិតនៅប៉ែកនីរតីបំផុតនៃប្រទេសកម្ពុជា ហើយមានព្រំប្រទល់ខាងកើតជាប់នឹងខេត្តព្រះសីហនុ និងខេត្តកំពង់ស្ពឺ ខាងលិចនិងខេត្តកោះកុងមានក្រុងឈូងសមុទ្រ និងប្រទេសថៃ និងខាងជើងខេត្តកោះកុង មានក្រុងចំនួនេត្តកោះកុងមានក្រុងចំនួន១ និងស្រុកចំនួន៦ ឃុំចំនួន២៦ និងដែលបានបែងចែកជា១១៩ភូមិ និងមានផ្ទៃដីសរុប និងមានផ្ទៃដីសរុបCag១០,០៤៥ គីឡូម៉ែត្រ ជាមួយនឹងធនធានធម្មជាតិ ធនធានធម្មជាតិ និងជីវចម្រុះដ៏សំបូរបែប ខេត្តកោះកុងមានឆ្នេរសមុទ្រសរុបប្រវែង២១៥គីឡូម៉ែត្រ ស្មើនឹងជាង៥០ភាគរយនៃឆ្នេរសមុទ្រ របស់ប្រទេសកម្ពុជាទាំងមូល៕

ដោយៈ ប៊ី

តៃប៉ិៈ មេដឹកនាំកោះតៃវ៉ាន់ បានអះអាងនៅថ្ងៃពុធនេះថា សង្គ្រាមពាណិជ្ជកម្មចិន-អាមេរិក កំពុងជំរុញឱ្យទីក្រុងប៉េកាំង បង្កើនកិច្ចខិតខំប្រឹងប្រែងរបស់ខ្លួន ក្នុងការលួចយកបច្ចេកវិទ្យា និងទេពកោសល្យពីកោះតៃវ៉ាន់ ដើម្បីជំរុញការផលិតផលិតផលឧស្សាហកម្មអេឡិចត្រូនិក ពាក់កណ្តាលសម្រេចរបស់ខ្លួនឱ្យបានគ្រប់គ្រាន់។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី៣១ ខែមីនា ឆ្នាំ២០២១។

ទីក្រុងវ៉ាស៊ីនតោនបានដាក់សម្ពាធ លើឧស្សាហកម្មបច្ចេកវិទ្យារបស់ប្រទេសចិន ក្នុងអំឡុងពេលមានជម្លោះពាណិជ្ជកម្មដ៏ជូរចត់ ដោយដាក់ទណ្ឌកម្មទៅលើក្រុមហ៊ុននានា រួមទាំងឧបករណ៍បច្ចេកវិទ្យាទូរគមនាគមន៍យក្សHuawei Technologies ដោយនិយាយថា ក្រុមហ៊ុនទាំងនេះ គឺជាការគំរាមកំហែងដល់សន្តិសុខជាតិ ដែលបង្កើតឡើងដោយទីក្រុងប៉េកាំង។

កោះតៃវ៉ាន់ គឺជាកន្លែងផលិតឧស្សាហកម្មបន្ទះឈីប ដែលរីកចម្រើន និងឈានមុខគេលើពិភពលោក ហើយរដ្ឋាភិបាលមានការព្រួយបារម្ភជាយូរមកហើយ អំពីការខិតខំប្រឹងប្រែងរបស់ប្រទេសចិន ក្នុងការចម្លងភាពជោគជ័យនេះ តាមរយៈមធ្យោបាយផ្សេង​ៗ។

ថ្លែងនៅក្នុងកិច្ចប្រជុំគណៈកម្មាធិការសភាស្តីពី វិធីឆ្លើយតបទៅនឹង“ខ្សែសង្វាក់ផ្គត់ផ្គង់ពណ៌ក្រហម” ដែលយោងទៅលើពណ៌របស់គណបក្សកុម្មុយនិស្ត កំពុងកាន់អំណាចរបស់ចិន រដ្ឋមន្រ្តីសេដ្ឋកិច្ចតៃវ៉ាន់លោកស្រី Wang Mei-hua បាននិយាយថា សង្គ្រាមពាណិជ្ជកម្មបានបង្កើតហានិភ័យថ្មី។

លោកស្រីបាននិយាយថា “ជាមួយការរងផលប៉ះពាល់ ដោយសង្គ្រាមបច្ចេកវិទ្យាអាមេរិក-ចិន ការអភិវឌ្ឍឧស្សាហកម្ម អេឡិចត្រូនិកចិនដីគោកត្រូវបានរាំងស្ទះ ប៉ុន្តែពួកគេនៅតែប្តេជ្ញាចិត្តចំពោះការអភិវឌ្ឍឧស្សាហកម្មនេះ”។

លោកស្រីបានបន្ថែមថា “ដើម្បីសម្រេចបាននូវភាពគ្រប់គ្រាន់ ដោយខ្លួនឯងនៅក្នុងបណ្តាញផ្គត់ផ្គង់ ការប្រមាញ់ និងការជ្រៀតចូលគឺជាមធ្យោបាយលឿនបំផុតសម្រាប់ចិនដីគោកដើម្បីធ្វើរឿងនេះ”។

លោកស្រីបានបន្ថែមថា “អ្នកធ្វើការលើបន្ទះឈីបរបស់តៃវ៉ាន់មានបទពិសោធន៍ស៊ីជម្រៅ និងនិយាយភាសាដូចគ្នា ដែលមានន័យថា ពួកគេជាគោលដៅសម្រាប់ប្រមាញ់ របស់ចិន”។

ការិយាល័យកិច្ចការកោះតៃវ៉ាន់របស់ចិន មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។

លោក Hu Mu-yuan អនុប្រធានការិយាល័យសន្តិសុខជាតិ កោះតៃវ៉ាន់បានមានប្រសាសន៍ថា កិច្ចខិតខំប្រឹងប្រែងរបស់ចិន គឺជាការគំរាមកំហែងមិនត្រឹមតែកោះតៃវ៉ាន់ប៉ុណ្ណោះទេ ប៉ុន្តែថែមទាំងជប៉ុន និងកូរ៉េខាងត្បូងផងដែរ ដែលកំពុងគំរាមកំហែងដល់ពាណិជ្ជកម្ម និងការប្រកួតប្រជែងជាសកល។

លោកបានបន្ថែមថា “ពួកកុម្មុយនិស្តចិន កំពុងតែលួចកម្មសិទ្ធិបញ្ញារបស់ប្រទេសដទៃទៀត ដើម្បីបង្កើនអំណាចរបស់ពួកគេ”។

កោះតៃវ៉ាន់មានច្បាប់តឹងរឹងក្នុងការព្យាយាម និងបង្ការកុំឲ្យរឿងនេះកើតឡើង ប៉ុន្តែក្រុមមន្រ្តីបានព្រមានថា ចិនព្យាយាមបង្កើតក្រុមហ៊ុនជួរមុខនៅលើកោះនេះ ដោយប្រើក្បាលម៉ាស៊ីនតៃវ៉ាន់ និងវិធីសាស្ត្រផ្សេងទៀត។

លោក Hu បានមានប្រសាសន៍ថា “ការការពារបច្ចេកវិទ្យា និងបុគ្គលិកបច្ចេកវិទ្យាខ្ពស់របស់តៃវ៉ាន់ ពីការជ្រៀតចូលដោយខ្សែសង្វាក់ផ្គត់ផ្គង់ក្រហម បានក្លាយជាភារកិច្ចដ៏សំខាន់មួយ ដើម្បីការពារភាពប្រកួតប្រជែង ក្នុងឧស្សាហកម្មរបស់យើង និងធានាបាននូវសន្តិសុខសេដ្ឋកិច្ចរបស់យើង”៕

ដោយៈ រ៉ាណេត

ភ្នំពេញៈ សម្តេចតេជោហ៊ុន សែន នាយករដ្ឋមន្ត្រីនៃកម្ពុជា បានចេញសារាចរណែ​នាំពីវិធានការបង្ការ និងទប់ស្កាត់ការរាតត្បាតជំងឺកូវីដ១៩ ក្នុងឱកាសឈប់សម្រាកពិធីបុណ្យចូលឆ្នាំខ្មែរ ប្រពៃណីជាតិរយៈពេលថ្ងៃចាប់ពីថ្ងៃទី១៤ ដល់ ១៦ ខែមេសា ឆ្នាំ២០២១ខាងមុខនេះ។

យោងតាមសារាចររបស់សម្តេចតេជោ ហ៊ុន សែន ដែលបានផ្សព្វផ្សាយនៅថ្ងៃទី៣១ ខែមីនា ឆ្នាំ២០២១ បានបញ្ជាក់ថា រាជរដ្ឋាភិបាលសូមណែនាំដល់ក្រសួង-ស្ថាប័នមានសមត្ថកិច្ចពាក់ព័ន្ធ និងអាជ្ញាធរដែនដីគ្រប់លំដាប់ថ្នាក់ និងអំពាវនាវដល់សាធារណជនទូទាំងប្រទេសត្រូវយកចិត្តទុកដាក់គោរព និងអនុវត្តប្រកបដោយភាពម្ចាស់ការ ស្មារតីភ្ញាក់រលឹក និងការទទួលខុសត្រូវខ្ពស់នូវសារាចរណែនាំ ដែលចុះថ្ងៃទី២១ ខែមីនា ឆ្នាំ២០២១ ស្តីពីការឈប់សម្រាក ក្នុងពិធីបុណ្យចូលឆ្នាំខ្មែរប្រពៃណីជាតិនៅថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២១ និងវិធានការបង្ការ និងទប់ស្កាត់ការរាតត្បាតនៃជំងឺកូវីដ-១៩ នៅក្នុងឱកាសឈប់សម្រាកនេះ» ដោយផ្តោតការយកចិត្តទុកដាក់ជាពិសេស លើបណ្ដាវិធានការលម្អិតបន្ថែម ដូចជា

ទី១ក្រសួង-ស្ថាប័នមានសមត្ថកិច្ចពាក់ព័ន្ធ និងអាជ្ញាធរដែនដីគ្រប់លំដាប់ថ្នាក់ ត្រូវចាត់វិធានការចាំបាច់នានា សំដៅគ្រប់គ្រង និងធានាសន្តិសុខ សុវត្ថិភាព និងសណ្តាប់ធ្នាប់សាធារណៈឱ្យបានល្អប្រសើរ ព្រមទាំងធានានូវការគោរព និងអនុវត្តវិធានការសុខាភិបាលបង្ការ និងទប់ស្កាត់ការឆ្លងរាលដាលនៃជំងឺកូវីដ-១៩ដោយម៉ត់ចត់ និងខ្ជាប់ខ្ជួន អនុលោ​មតាមបទប្បញ្ញត្តិច្បាប់ និងលិខិតបទដ្ឋានជាធរមាន ទាំងនៅក្នុងការគ្រប់គ្រងចរាចរ​ណ៍ ការដឹកជញ្ជូនមនុស្ស និងការធ្វើដំណើរឆ្លងកាត់រាជធានី-ខេត្ត និងទាំងនៅតាមទីតាំងសាធារណៈនានា ពិសេសនៅតាមវត្តអារាម រមណីយដ្ឋាន និងទីតាំងផ្សេងទៀត ដែលអាចមានសភាពអ៊ូអរ និងមានមនុស្សជួបជុំគ្នាក្នុងចំនួនច្រើន។

សាធារណជនគ្រប់រូបទាំងអស់ ត្រូវចូលរួមអនុវត្តនូវវិធានការដូចជា ទី២ សូមនៅជួបជុំក្រុមគ្រួសារតាមគេហដ្ឋានរៀងៗខ្លួន ជៀសវាងការធ្វើដំណើរចេញក្រៅផ្ទះដោយមិនចាំបាច់ និងចៀសវាងការធ្វើដំណើរមិនចាំបាច់ឆ្លងកាត់រាជធានី-ខេត្ត ទី៣ ជៀសវាងនូវការធ្វើដំណើរមិនចាំបាច់ ទៅកាន់ឬចេញ-ចូលតំបន់ ឬ ទីកន្លែងដែលមានហានិភ័យខ្ពស់នៃការឆ្លងរាលដាលជំងឺកូវីដ-១៩ កំណត់ដោយក្រសួងសុខាភិ-បាល និងអាជ្ញាធរ​មានសមត្ថកិច្ចពាក់ព័ន្ធ

ទី៤ ជៀសវាងនូវការរៀបចំពិធីផ្សេងៗ រួមទាំងពិធីសាសនាផង ឬការជួបជុំគ្នាទាំងឡាយណាដែលមានសភាពអ៊ូអរ និងមានមនុស្សចូលរួមច្រើន និងទី៥ អនុវត្តវិធានការ «៣ ការពារ» និង «៣ កុំ» ព្រមជាមួយនឹងវិធានការសុខាភិបាលចាំបាច់ផ្សេងទៀត សំដៅបង្ការ និងទប់ស្កាត់ការឆ្លងរាលដាលនៃជំងឺកូវីដ-១៩ ឱ្យបានខ្ជាប់ខ្ជួននិងគ្រប់ៗគ្នា​។

ទី៦ រាជរដ្ឋាភិបាលសូមក្រើនរំលឹក និងអំពាវនាវជាថ្មីម្តងទៀតដល់ក្រុមហ៊ុន និងអាជីវករដឹកជញ្ជូន អ្នកដំណើរគ្រប់ប្រភេទ មិនត្រូវតម្លើងថ្លៃសេវាដឹកជញ្ជូនអ្នកដំណើរឡើយ និងត្រូវយកចិត្តទុកដាក់អនុវត្តវិធានការសុខាភិបាលសំដៅបង្ការ និងទប់ស្កាត់ការឆ្លងរាលដាលនៃជំងឺកូវីដ-១៩ ដោយម៉ត់ចត់ និងខ្ជាប់ខ្ជួនចំពោះអ្នកដំណើរនៅលើយានយន្តរបស់ខ្លួន។

សម្តេចតេជោនាយករដ្ឋមន្ត្រីសង្កត់ធ្ងន់ក្នុងសារាចរថា ទទួលបានសារាចរណែនាំនេះ គ្រប់ក្រសួង-ស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ និងសាធារណជនត្រូវចូលរួមអនុវត្តឱ្យមានប្រសិទ្ធភាព និងដោយស្មារតីទទួលខុសត្រូវខ្ពស់៕

ដោយៈយិន លាងគង់ស្ថាបនិកនិងអគ្គនាយកគេហទំព័រPropertyarea.asia

        ភ្នំពេញៈ ព្រះអាទិត្យកំពុងលិចនៅប្រទេសភូមា រដ្ឋដែលកំពុងចលាចលនេះ កំពុងស្ថិតក្នុងភាពងងឹត និងរកច្រកចេញមិនទាន់រួចនៅឡើយ។

តើអ្នកណាជាអ្នកដោះស្រាយបញ្ហារបស់ប្រទេសនេះបាន? តើពេលពេលវិបត្តិនេះនឹងបញ្ចប់? ហើយឈាមលែងហូរចេញពីប្រជាជាតិ ដែលតាំងខ្លួនឯងជាអ្នកគោរពពុទ្ឋសាសនានេះ។

ដំណោះស្រាយពីអន្តរជាតិ

        ដំណោះស្រាយជាអន្តរជាតិលើវិបត្តិភូមា ដែលបានអូសបន្លាយរហូតមកទល់ពេលនេះមានរយៈពេលពីរខែហើយ មិនឃើញមានអ្វីក្រៅពីការដាក់ទ័ណ្ឌកម្មពីមហាអំណាចនានា ពិសេសសហរដ្ឋអាមេរិក សហគមន៍អឺរ៉ុប និងបណ្តាប្រទេសសម្ព័ន្ឋមិត្តរបស់ពួកគេឡើយ ប៉ុន្តែជាលទ្ឋផលនៃការដាក់ទ័ណ្ឌកម្ម គឺធ្វើឲ្យប្រជាជនភូមារងគ្រោះកាន់តែខ្លាំង ប្រជាជនភូមាឈឺចាប់កាន់តែខ្លាំងទៅវិញទេ។

បណ្តាទ័ណ្ឌកម្ម ដែលបានដាក់ចេញដោយមហាអំណាច ដែលតែងតែលើកយក  លទ្ឋិប្រជាធិបតេយ្យ និងសិទ្ឋមនុស្សមកធ្វើជាខែល ប៉ុន្តែមិនបានធ្វើឲ្យមេទ័ពភូមា ឬមីយ៉ាន់ម៉ាខ្លាចញញើត ឬរាថយនោះឡើយ។

ស្ថានភាពបច្ចុប្បន្ន ប្រជាជនភូមាកាន់តែច្រើនកំពុងរងទុក្ខ និងស្លាប់បាត់បង់ជីវិត ហើយស្ថានភាពនេះ នឹងបន្តអូសបន្លាញរយៈពេលវែង បើសិនជាប្រជាជាតិនេះនៅតែស្រែករកជំនួយ ជាជាងដោះស្រាយបញ្ហានេះដោយខ្លួនឯង។

អង្គការសហប្រជាជាតិ

        អង្គការកំពូលពិភពលោកនេះ បាននិងកំពុងវិវត្តន៍ជា “ខ្លាក្រដាស” ដោយសារមិនអាចធ្វើអ្វីបាន និងកំពុងជ្រកក្រោមឥទ្ឋិពល របស់មហាអំណាចមួយលើពិភពលោក ជាជាងបាន និងកំពុងដើរតួនាទទីឯករាជ្យពេញលេញ ដើម្បីផលប្រយោជន៍មនុស្សជាតិដូចដែលបេសកកម្ម ឬចក្ខុវិស័យស្នូល ដែលបានចែងនៅពេលបង្កើតអង្គការនេះពីដំបូងឡើយ។

ទោះជាយ៉ាងណា ក្រុមប្រឹក្សាសន្តិសុខនៃអង្គការសហប្រជាជាតិ (UNSC) នឹងរៀបចំកិច្ចប្រជុំស្តីវិបត្តិនៅមីយ៉ាន់ម៉ា ក្នុងថ្ងៃពុធសប្តាហ៍នេះ (ពេលវេលានៅញូយ៉ក) ក្រោយការបង្ក្រាបបាតុកម្មដ៏សាហាវនៅមីយ៉ាន់់ម៉ា កាលពីចុងសប្តាហ៍កន្លងទៅ ដែលបានបណ្តាលឲ្យបាតុករជាង១០០នាក់ស្លាប់ ក្នុងនោះមានទាំងកុមារផងដែរ​។

សម័យប្រជុំបិទទ្វារនៃប្រទេសជាសមាជិកUNSC ទាំង១៥ខាងលើនេះ ត្រូវបាន រៀបចំឡើង តបតាមការអំពាវនាវរបស់ចក្រភពអង់គ្លេស។

លោកស្រី គ្រីស្ទីន ស្ក្រាណឺ ប៊ឺជែណឺ (Christine Schraner Burgener) តំណាងពិសេសអង្គការសហប្រជាជាតិ (UN) ទទួលបន្ទុកបញ្ហានៅមីយ៉ាន់ម៉ាបានអះអាងថា “កិច្ចប្រជុំខាងលើនេះ ក៏នឹងធ្វើការរៀបរាប់សង្ខេប អំពីស្ថានការណ៍ដែលបាននិងកំពុងកើតឡើងផងដែរ”។

ទោះជាយ៉ាងណា ក្រុមអ្នកតាមអន្តរជាតិមិនទាន់ច្បាស់នៅឡើយទេថា តើក្រុមប្រឹក្សាសន្តិសុខUN អាចចេញនូវសេចក្តីថ្លែងការណ៍រួមមួយ នៅក្រោយបញ្ចប់កិច្ចប្រជុំដែរ ឬមួយក៏យ៉ាងណានោះ ព្រោះវានឹងតម្រូវឲ្យការឯកភាពគ្នាទាំងស្រុង រវាងប្រទេសជាសមាជិកទាំង១៥។

កាលពីថ្ងៃទី១០ ខែមីនា កន្លងទៅថ្មីៗនេះ ក្រុមប្រឹក្សាសន្តិសុខ UN ក៏បានចេញសេចក្តីថ្លែងការណ៍ ថ្កោលទោសធ្ងន់ៗជាលើកដំបូងផងដែរ ចំពោះការបង្ក្រាបដោយហិង្សាពីសំណាក់ កងកម្លាំងសន្តិសុខមីយ៉ាន់ម៉ា ទៅលើក្រុមបាតុករដែលគ្មានអាវុធក្នុងដៃ ក្នុងនោះរួមមានទាំងស្ត្រី និងកុមារ។

បើប្រជាជនភូមាពឹងផ្អែកសម្លេងអំពាវនាវ ទ័ណ្ឌកម្មពីអន្តរជាតិ គឺបានត្រឹមតែអស់     សង្ឃឹមប៉ុណ្ណោះ មិនអាចដោះស្រាយអ្វីបានឡើយ។ នេះជាយុទ្ឋសាស្រ្តនិងសមរភូមិកាទូតអន្តរជាតិ។

ភូមិសាស្រ្តនយោបាយ

        បញ្ហាភូមិសាស្រ្តនយោបាយ បានក្លាយជារឿងដ៏ក្តៅគគុក ក្នុងពិភពលោកនាសតវត្សរ៍ទី២១នេះ ដោយសារតែការរះឡើងដ៏ចែងចាំងរបស់ចិន ធ្វើឲ្យលោកខាងលិចភ័យស្លន់ស្លោ ហើយព្យាយាមចងសម្ព័ន្ឋមិត្តជាមួយបណ្តាប្រទេសនានា ដើម្បីដាក់គំនាបលើមហាមិត្តចិន។

តើរដ្ឋប្រហារនៅប្រទេសភូមា នាថ្ងៃទី១ កុម្ភៈ ដែលបានធ្វើឲ្យពិភពលោកស្រឡាំ​ងកាំងនេះ មានជាប់ទាក់ទងយ៉ាងដូចម្តេច នឹងបញ្ហាភូមិសាស្រ្តនយោបាយ? តើវាជាសង្រ្គា​មចិត្តសាស្រ្តមួយ របស់មហាអំណាចពិភពលោកទាំងពីរ ឬជាការធ្វើតេស្តរបស់មហាមិត្តចិន លើនយោបាយការបរទេសរបស់រដ្ឋបាលលោកJoe Biden?។

ចម្លើយ? ជាការធ្វើតេស្ត ឬមិនមែនជាការធ្វើតេស្ត។ បើជាការធ្វើតេស្ត គឺអាចដោយសារ ទី១ ប្រទេសចិនអាចសាកល្បងធ្វើតេស្ត រដ្ឋបាលលោកJoe Bidenថា មានដំណោះស្រាយដូចម្តេចលើបញ្ហានេះ និងលោកJoe Biden មានកម្រិតវិជ្ជាជីវៈប៉ុណ្ណា​ក្នុងការដោះស្រាយបញ្ហាលើវិបត្តិនេះ?។

ទី២ តើសម្ព័ន្ឋមិត្តេរបស់អាមេរិក មានដំណោះស្រាយអ្វីលើបញ្ហាភូមា ក្រៅពីការដាក់ទ័ណ្ឌកម្ម? ទី៣ តើនយោបាយការបរទេស និងភាពចាស់ទុំខាងនយោបាយរបស់Joe Biden ពិតជាមានភាពឆ្លៀវឆ្លាត ឬបានត្រឹមតែទុកឲ្យបញ្ហានេះកាន់តែទុំជោរ ហើយអ្នករងនូវសោកនាដកម្មពិតប្រាកដជាប្រជាជនភូមាទៅវិញ។

មិនមែនជាការធ្វើតេស្ត

        ផ្ទុយទៅវិញវិបត្តិនៅភូមា អាចមិនមែនជាការធ្វើតេស្តរបស់មហាយក្សចិននោះទេ ដោយសារទី១ មហាយក្សចិនហាក់មិនចំណេញអ្វីពីវិបត្តិនេះច្រើនឡើយ ប៉ុន្តែជាការខាតបង់ទៅវិញទេ ដោយសារអាចជាការបាក់មុខមាត់របស់ចិន និងធ្វើឲ្យលំហូរពាណិជ្ជកម្មរវាងចិន និងភូមាជាប់គាំង ទី២ អាចជាបញ្ហាផ្ទៃក្នុងរបស់ភូមាច្រើនជាង ព្រោះវាជាការដណ្តើមអំណាចផ្ទៃក្នុងរវាងមេដឹកនាំយោធាភូមា ដែលមានចេតនាដឹកនាំប្រទេសតាមបែបយោធាឡើងវិញ ជាជាងឲ្យរដ្ឋបាលស៊ីវិលដឹកនាំប្រទេស ដែលកំពុងស៊ីរូងប្រជាប្រិយភាពរបស់យោធាភូមា និងធ្វើឲ្យឥទ្ឋិពលយោធាភូមាកាន់តែថមថយពីមួយថ្ងៃទៅមួយថ្ងៃ។

ប្រជាជនភូមាខ្លួនឯងជាអ្នកបញ្ចប់វិបត្តិនេះ

        ប្រជាជនភូមា ដែលគោរពលទ្ឋិព្រះពុទ្ឋសាសនាដ៏ជ្រាលជ្រៅនេះ (លទ្ឋិអញនិយម) បានស្រែកដង្ហោយហៅអន្តរជាតិ ឲ្យជួយរកដំណោះស្រាយសម្រាប់ប្រទេសរបស់ខ្លួន ជាជាងរកវិធីសាស្រ្តដោះស្រាយបញ្ហាប្រទេសរបស់ខ្លួនដោយខ្លួនឯង។

ការបន្តបាតុកម្ម កុបកម្ម និងមានការវាយប្រហារគ្នារវាងយោធាការ៉ែន និងពួកយោធាភូមា បានធ្វើឲ្យមនុស្សរាប់រយនាក់បាត់បងជីវិតនេះ មិនមែនជាដំណោះស្រាយនោះទេ ហើយក៏គ្មានប្រទេសណាមួយ ហ៊ានលូកដៃជ្រៅចូលក្នុងប្រទេសរបស់ខ្លួននោះទេ ក្រៅពីការអំពាវនាវ ការថ្កោលទោស និងការដាក់ទ័ណ្ឌកម្ម ហើយសហគមន៍អាស៊ាន ក៏មិនអាចជួយអ្វីបាននោះទេ ព្រោះរដ្ឋធម្មនុញ្ញាអាស៊ាន គឺមិនលូកលាន់ចូលកិច្ចការផ្ទៃក្នងរបស់ប្រទេសណាមួយទេ មានតែការសម្របសម្រួលប៉ុណ្ណោះ។

ការបន្តបាតុកម្ម កុបកម្ម មានតែការបង្ហូរឈាម និងការស្លាប់ប៉ុណ្ណោះ វាមិនបានចំណេញអ្វីដល់ប្រជាជាតិនេះនេះទេ ក្រៅតែពីការរងទុក្ខវេទនា និរាសព្រាត់ប្រាស់សាច់ញាតិ និងសារលោហិតរបស់ខ្លួន។

ការវិលទៅផ្ទះវិញ ហើយចូលបំពេញការងារនៅតាមស្ថាប័នរបស់ខ្លួនធ្វើការ នឹង    ផ្តល់ឲ្យប្រជាជនភូមា នូវដំណោះស្រាយល្អៗជាច្រើន ដូចជា ទី១ អាចធ្វើឲ្យជីវភាពរបស់ខ្លួនវិលមករកភាពប្រសើរឡើងវិញ ទី២ អាចធ្វើឲ្យសេដ្ឋកិច្ចរបស់ខ្លួនដំណើរការឡើងវិញ ទោះមិនបានល្អប្រសើរតាមខ្លួនចង់បានក្តី ទី៣ អាចចូលរួមបោះឆ្នោតឡើងវិញ ដោយមេដឹកនាំយោធា សន្យាប្រគល់អំណាចឲ្យអ្នកឈ្នះ។

ផ្ទុយទៅវិញប្រសិនជាយោធាមិនព្រមប្រគល់អំណាច ហើយចង់ដឹកនាំប្រទេសឡើងវិញ ក៏ជាការល្អជាជាងទុកស្ថានភាពប្រទេស ក្នុងវិបត្តិកលយុគបែបនេះដែរ ទី៤ មេដឹកនាំភូមា  ដែលជាប់ឆ្នោតក្រោយ អាចនឹងអនុវត្តន៍គោលនយោបាយបើកចំហសេដ្ឋកិច្ច និងនយោបាយឡើងវិញ(ដូចជំនាន់រដ្ឋបាលលោកថេន សេន)។

ហេតុនេះប្រជាជនភូមា ជាកូនសោគន្លឹះ ជាអ្នកបើកជើងមេឃថ្មីសម្រាប់ខ្លួនឯង និងផ្តល់សេរីភាពឲ្យខ្លួនឯង ដើម្បីធ្វើឲ្យព្រះអាទិត្យ នៅប្រទេសរបស់ខ្លួនរះឡើងវវិញ៕