ដោយៈស៊ីវ ម៉េង

          ភ្នំពេញៈ អ្នកជំនាញបានលើកឡើងថា រឿងសំខាន់ៗជាច្រើន ដែលអ្នកត្រូវដឹងក្រោយពេលបញ្ចប់វិបត្តិកូវីដ១៩ ដែលវាមានជាប់ពាក់ព័ន្ឋនឹងគុណភាពជីវិតរបស់អ្នក ទាំងប្រាក់ចំណូល និងផែនការវិនិយោគ។

អ្នកវិភាគនៅក្នុងវិស័យអចលនទ្រព្យ និងសេដ្ឋកិច្ចបានលើកឡើងថា ជំងឺកូវីដមិនត្រឹមតែប៉ះពាល់លើវិស័យអចលនទ្រព្យទេ គឺគ្រប់វិស័យទាំងអស់ ដែលជំងឺកូវីដបានជះឥទ្ឋិពល ទៅលើបញ្ហាសេដ្ឋកិច្ចចំពោះគ្រួសារ ក្នុងប្រទេស ឬពិភពលោកទាំងមូល ពោលគឺជំងឺនេះបានឲ្យយើងដឹងថា “អ្វីដែលយើងមានគឺខ្លួនយើង និងគ្រួសាររបស់យើង”។

“អ្វីសំខាន់បំផុតគឺការមិនដាក់ស៊ុត ក្នុងកន្រ្តកតែមួយ មានន័យថា យើងត្រូវធ្វើពិពិធកម្ម ដើម្បីបញ្ចៀសហានិភ័យ។ ដូច្នេះបើយើងវិនិយោគ គឺមិនត្រូវវិនិយោគលើវិស័យអចលនទ្រព្យទាំងអស់ទេ”។ លោកស្រីបន្តថា “បើវិនិយោគលើវិស័យស​ណ្ឋាគារ យើងមិនត្រូវវិនិយោគតែលើវិស័យនេះមួយទេ ព្រោះបើយើងវិនិយោគលើវិស័យតែមួយ បើវាដួលគឺដួលទាំងអស់ នេះជាអ្វីដែលជំងឺកូវីដបានបង្រៀនយើង ពីភាពបត់បែនក្នុងការវិនិយោគ”។លោកស្រីអាន សុធីតាអ្នកជំនាញអចលនទ្រព្យលំដាប់អន្តរជាតិបញ្ជាក់ឲ្យដឹង។

លោកស្រីអាន សុធីបានបន្ថែមថា ជាមួយគ្នានេះ យើងក៏មិនត្រូវវិនិយោគរហូតដល់អស់លុយពីក្នុងខ្លួននោះទេ គឺយើងត្រូវតែមានលុយត្រៀម សម្រាប់បង្ការហានិភ័យណាមួយកើតឡើង ព្រោះយើងមិនដឹងថាមានអ្វីនឹងកើតឡើងនោះទេ។

លើសពីនេះ លោកង៉ែត ជូអ្នកវិភាគសេដ្ឋកិច្ចឯករាជ្យធ្លាប់បានមានប្រសាសន៍ឲ្យដឹងកាលពីពេលថ្មីៗនេះថា ប្រជាពលរដ្ឋខ្មែរ ពិសេសយុវជនគួរស្វែងរកឬបង្កើតឲ្យមានចំណូលទី២ ក្នុងជីវិតរបស់ខ្លួនបន្ទាប់ពីវិបត្តិជំងឺកូវីដ ព្រោះការមានប្រភពចំណូលតែមួយ នឹងបង្កហានិភ័យដល់ខ្លួនឯង និងគ្រួសាររបស់ខ្លូននៅពេលមានវិបត្តិកើតមានឡើង ដូចជាវិបត្តិជំងឺកូវីដជាដើម។

បញ្ហាពិតប្រាកដបាន និងកំពុងកើតមានលើគ្រួសារខ្មែរ ដែលពឹងផ្អែកលើប្រភពចំណូលតែមួយ ដោយសារការពឹងផ្អែកលើប្រាក់ខែនៅស្ថាប័នណាមួយ ឬក្រុមហ៊ុនណាមួយ នៅពេលក្រុមហ៊ុននោះបិទទ្វារ ឬក្ស័យទុន នឹងធ្វើឲ្យយើងមានបញ្ហាលំហូរសាច់ប្រាក់សម្រាប់ផ្គត់ផ្គង់ក្នុងគ្រួសារផងដែរ៕

ដោយៈ លក្ខិណា

ភ្នំពេញ៖ សម្ដេចអគ្គមហាសេនាបតីតេជោហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជាបានបញ្ជាជាបន្ទាន់ឱ្យអភិបាលខេត្តត្រូវពិនិត្យនិងកែប្រែឡើងវិញចំពោះ សេចក្តីសម្រេចរឹតបន្តឹងជ្រុលចំពោះពលរដ្ឋត្រលប់ចូលខេត្តវិញ ។

សាររបស់សម្ដេចបានប្រកាសជាបន្ទាន់ក្រោយពេលអភិបាលខេត្តមួយចំនួនបានប្រកាសតម្រូវឱ្យពលរដ្ឋចូលក្នុងខេត្តរបស់ខ្លួនធ្វើចត្តាឡីស័ករយៈ១៤ថ្ងៃ ។សម្ដេចមានប្រសាសន៍ថា ការធ្វើបែបនេះគឺវាមិនខុសពីការការបង្កើតរដ្ឋនៅក្នុងរដ្ឋនោះទេ ហើយដូចជាបិទប្រទេសបិទក្រុងបិទតំបន់និងហាក់បីដូចជាពលរដ្ឋឆ្លងប្រទេសទៅប្រទេសមួយទៀតអញ្ចឹងដែរ ។

សម្ដេចតេជោបានមានប្រសាសន៍បន្តថា យើងត្រូវបន្តគ្រប់គ្រងនិងធ្វើចត្តាឡីស័កចំពោះអ្នកដែលសង្ស័យថាមានហានិភ័យថាមានផ្ទុកកូវីដ១៩ ដើម្បីយកសំណាកនិងធ្វើចត្តាឡីស័ក តែមិនមែនធ្វើចំពោះពលរដ្ឋដែលឆ្លងខេត្តចំពោះខ្លួននោះទេ។ សម្ដេចមានប្រសាសន៍ថា “ខេត្តណាដែលបានចេញសេចក្តីសម្រេចហើយ សូមកែប្រែសេចក្តីសម្រេចនោះជាបន្ទាន់និងឱ្យមានការចរាចរណ៍សម្រាប់ប្រជាពលរដ្ឋ ហើយខ្ញុំនិយាយនេះមិនមែនសំដៅ មិនឱ្យទប់ស្កាត់ចំពោះអ្នកដែលមានករណីសង្ស័យ ដែលយើងតម្រូវឱ្យយកសំណាកនិងនាំទៅដល់ការធ្វើចត្តាឡីស័កដែលចៀសវាងមិនបាននោះទេ”។

សម្ដេចមានប្រសាសន៍បន្ថែមថា បើសិនជាខេត្តនោះតម្រូវឱ្យអ្នកចូលខេត្តខ្លួនធ្វើចត្តាឡីស័កហើយខេត្តផ្សេងៗធ្វើដូច្នេះដែរ បើអញ្ចឹងមិនបាច់រកស៊ីអីទេ ចត្តាលីស័ក១៤ថ្ងៃ គឺខាតពេលខាតវេលារកស៊ីហើយក៏មិនខុសពីការបិទប្រទេសឡើងវិញដែរ និងធ្វើឱ្យគាំងក្បាលម៉ាស៊ីននៃដំណើរការសេដ្ឋកិច្ចសង្គមរបស់ប្រជាពលរដ្ឋជាដើម ។

កាលពីព្រឹកមិញនេះ មានខេត្តពីរបានប្រកាសតម្រូវឱ្យអ្នកដែលចូលខេត្តខ្លួនត្រូវធ្វើចត្តាឡីស័ក១៤គឺខេត្តត្បូងឃ្មុំ និងខេត្តព្រៃវែង ដូច្នេះសម្ដេចបញ្ជាឱ្យខេត្តទាំងពីរនេះ កែសម្រួលសេចក្តីសម្រេចរបស់ខ្លួន ដែលអាចធ្វើឱ្យសេចក្តីសម្រេចនេះជ្រុលហួសនាំទៅដល់ការរំខានដល់ជីវភាពរបស់ប្រជាពលរដ្ឋ និងប៉ះពាល់សេដ្ឋកិច្ចបន្ថែមទៀត៕

ដោយ:សុខុម

គូឡាឡាំពួ: យោងតាមសារព័ត៌មាន The Edge Markets ឱ្យដឹងថា ភាគហ៊ុន និងតម្លៃទំនិញនៅតំបន់អាស៊ី បានហក់ឡើងខ្ពស់នៅថ្ងៃព្រហស្បតិ៍ ទី៦ ឧសភានេះ ស្របពេលមជ្ឈដ្ឋានសាធារណៈមានក្ដីសង្ឃឹមចំពោះការងើបឡើងនៃសេដ្ឋកិច្ច។

ការហក់ឡើងនេះកើតមានឡើង ខណៈរូបិយប័ណ្ណដុល្លារអូស្រ្តាលី ធ្លាក់ថ្លៃ បន្ទាប់ពីមហាយក្សចិន ប្រកាសថា ខ្លួននឹងឈប់ចរចារឿងសេដ្ឋកិច្ចជាមួយរដ្ឋាភិបាលក្រុងកង់បេរ៉ា។

MSCI ដែលជាសន្ទស្សន៍ផ្សារភាគហ៊ុនធំបំផុតនៅតំបន់អាស៊ី-ប៉ាស៊ីហ្វិក ក្រៅពីប្រទេសជប៉ុន បានហក់ឡើង០,២៥% ហើយសន្ទស្សន៍ផ្សារភាគហ៊ុនជប៉ុន Nikkei បានហក់ឡើង១,៨% នៅពេលវាបើកដំណើរការឡើងវិញ បន្ទាប់ពីថ្ងៃបុណ្យឈប់សម្រាករយៈពេល៥ថ្ងៃ។

ភាគហ៊ុនចិន ដែលបានបន្តការជួញដូរជាលើកដំបូងចាប់តាំងពីសប្តាហ៍មុនដែរនេះ ទទួលបានលទ្ធផលចម្រុះនៅក្នុងការជួញដូរដំបូង ដោយសន្ទស្សន៍ផ្សារភាគហ៊ុនក្រុងសៀងហៃ Shanghai Composite បានហក់ឡើង០,៤៥% ហើយសន្ទស្សន៍ផ្សារភាគហ៊ុន CSI300 បានដាំក្បាលចុះ០,២%។

នៅ Wall Street ដែលជាសង្កាត់ផ្សារភាគហ៊ុនដ៏ល្បីល្បាញរបស់សហរដ្ឋអាមេរិក ផ្សារភាគហ៊ុន Dow Jones កាលពីយប់មិញបានហក់ឡើង០,២៩% ចំណែកឯផ្សារភាគហ៊ុន S&P 500 បានហក់ឡើង០,០៧%។

ទោះជាយ៉ាងណា ផ្សារភាគហ៊ុន Nasdaq Composite បានដាំក្បាលចុះ០,៣៧%កាលពីថ្ងៃពុធ ទី៥ ឧសភា នៅពេលដែលភាគហ៊ុនរបស់ក្រុមហ៊ុនបច្ចេកវិទ្យាគ្រាក់ៗបានដាំក្បាលចុះ ក្រោយការធ្លាក់ចុះខ្លាំងកាលពីថ្ងៃអង្គារ ទី៤ ឧសភា។

ភាគហ៊ុនបច្ចេកវិទ្យាដែលមានតម្លៃខ្ពស់បានដាំក្បាលចុះ បន្ទាប់ពីសំណើរបស់លោកស្រី Janet Yellen រដ្ឋមន្រ្តីក្រសួងរតនាគារអាមេរិក ដែលសុំឱ្យដំឡើងអត្រាការប្រាក់ប្រហែលជាមានភាពចាំបាច់ខ្លាំងដើម្បីបញ្ឈប់សេដ្ឋកិច្ចពីការរីកចម្រើនឆាប់រហ័សពេក។ ទោះជាយ៉ាងណា ក្រោយមកលោកស្រីបានលើកឡើងថា លោកស្រីមិនបាន “ព្យាករ ឬណែនាំ” ឱ្យដំឡើងអត្រាការប្រាក់ខែក្នុងរយៈពេលដ៏ខ្លីខាងមុខនេះឡើយ៕