តើអ្នកមានចំណូលចាប់ពីប៉ុណ្ណាឡើងអាចវិនិយោគលើដីធ្លីបាន?

ដោយៈ រតនៈ

ភ្នំពេញៈ អ្នកជំនាញអចលនទ្រព្យអះអាងថា អ្នកមានចំណូលចាប់ពី៣០០ដុល្លារឡើងទៅអាចបង់រំលស់ដីបាន និងអាចទាញចំនូលវិញពីការទិញបង់រំលស់នេះ ដោយមិនចាំបាច់ចំណាយកម្លាំង។

លោកឧកញ៉ាម៉ាន់ ច័ន្ទឌី អគ្គនាយកក្រុមហ៊ុនPREMIUM Group បានប្រាប់គេហទំព័រPropertyarea.asia នាព្រឹកថ្ងៃទី៣១ មិនានេះថា ចរន្តនៃការទិញពុះដីឡូត៍លក់នៅពេលនេះមានច្រើនកន្លែង ហើយក្នុងតម្លៃមួយសមរម្យ ដែលអាចឲ្យអ្នកដែលមានចំណូលចាប់ពី៣រយដុល្លារសហរដ្ឋអាមេរិក អាចទិញដីឡូត៍បានដោយបង់រំលោះបាន។

លោកបន្តថា “ប្រសិនបើអ្នកមានចំណូឡត្រឹម៣០០ដុល្លារ គឺគាត់អាចបង់១៥០ដុល្លា និងទុក១៥០ដុល្លាផ្សេងទៀតសម្រាប់ផ្គត់ផ្គង់ជីវភាពប្រចាំថ្ងៃ”។

លើសពីនេះលោកច័ន្ទឌីបានពន្យល់ថា ដីឡូត៍ដែលអ្នកទិញទាំងនោះ អាចបង្កើនចំណូលផងដែរ ព្រោះថា ប្រសិនបើគាត់ទិញដីចំកន្លែងដែលអភិវឌ្ឍន៍លឿន គឺតម្លៃដីក៏ឡើងលឿអនដូចគ្នាផងដែរ ប្រាក់ចំណេញពីការបង់រំលស់នោះក៏ចំនេញច្រើន ដោយមិនចាំបាច់ចំណាយពេលវេលាយូរ និងចំណាយកម្លាំងទៅរកស៊ីនោះទេ ។

តែទោះជាយ៉ាងណា អ្នកជំនាញអចលនទ្រព្យរូបនេះអះអាងថា មុននឹងសម្រេចចិត្តបង់រំលស់ដីធ្លីនៅតំបន់ណាមួយនោះ គឺត្រូវសិក្សាពីឯកសារច្បាប់ឲ្យបានច្បាស់លាស់សិន ជៀសវាងការទិញដីហើយ មានបញ្ហាទៅថ្ងៃក្រោយ ដែលធ្វើឲ្យខាតបង់ទាំងពេលវេលា និងប្រាក់កាក់៕

រដ្ឋាភិបាលជម្រុញឱ្យក្រុមហ៊ុនផ្តល់សេវាអ៊ីនធឺណេតពង្រឹងគុណភាពនិងបង្កើន ល្បឿនបម្រើជូនសាធារណៈ

ល្បឿនបម្រើជូនសាធារណៈ

ដោយៈ រ៉ាណេត

ភ្នំពេញៈ ក្នុងគោលបំណងលើកកម្ពស់ផលប្រយោជន៍សាធារណៈ និងការធ្វើអាជីវកម្មប្រកបដោយសុច្ចរិតភាព និងការទទួលខុសត្រូវចំពោះសង្គម តាមរយៈការបង្កើនប្រសិទ្ធភាព នៃការផ្តល់សេវាទូរគមនាគមន៍ និងពង្រឹងគុណភាពសេវាទូរសព្ទចល័តក៏ដូចជា សេវាអ៊ីនធឺណេត រដ្ឋាភិបាលបានតម្រូវឱ្យក្រុមហ៊ុន ក៏ដូចជានិយ័តកត្រូវមានភាពទទួលខុសត្រូវខ្ពស់ និងបង្កើនគុណភាពរបស់ខ្លួនឱ្យបានប្រសើរ។

ក្រសួងប្រៃសណីយ៍ និងទូរគមនាគមន៍ (ក.ប.ទ) នៅព្រឹកថ្ងៃទី៣១ ខែមីនា ឆ្នាំ២០២១នេះ បានចេញសេចក្ដីណែនាំស្ដីពី វិធានការបង្កើនប្រសិទ្ធភាព និងពង្រឹងគុណភាពសេវាទូរគមនាគមន៍នៅកម្ពុជា ទៅដល់បណ្តាក្រុមហ៊ុន ក៏ដូចជា នីយ័តកទាំងអស់ដែលកំពុងប្រតិបត្តិការនៅក្នុងប្រទេសកម្ពុជានាពេលបច្ចុប្បន្ន។

ក្រសួងបានបញ្ជាក់ថា បច្ចុប្បន្នក្រុមមន្ត្រីជំនាញបាន និងកំពុងខិតខំបញ្ចប់ការរៀបចំលិខិតបទដ្ឋានគតិយុត្តពាក់ព័ន្ធ ការពង្រឹងគុណភាពសេវាទូរគមនាគមន៍ ការពិន័យអន្តរការណ៍ និងទណ្ឌកម្មផ្សេងៗ ចំពោះប្រតិបត្តិករទូរគមនាគមន៍ ដែលមិនគោរពច្បាប់ស្តីពីទូរគមនាគមន៍ លិខិតបទដ្ឋានគតិយុត្តពាក់ព័ន្ធ និងគោលការណ៍ នៃការផ្តល់សេវាប្រកបដោយគុណភាព។

ទន្ទឹមនឹងនេះ ក.ប.ទបាននិងកំពុងវាស់ស្ទង់គុណភាព សេវាទូរគមនាគមន៍នៅតាមតំបន់នីមួយៗ ដើម្បីកំណត់ចំណុចខ្សោយ ឬបញ្ហានានាពាក់ព័ន្ធនឹងគុណភាពសេវា និងដាក់ចេញនូវវិធានការជាក់ស្តែង។ បន្ថែមលើនេះ ក.ប.ទ នឹងតម្រូវឱ្យប្រតិបត្តិករទូរគមនាគមន៍វិនិយោគ លើហេដ្ឋារចនាសម្ព័ន្ធចាំបាច់ ដោយក្រសួងនឹងសហការជាមួយស្ថាប័នពាក់ព័ន្ធ ដើម្បីសម្របសម្រួលឱ្យមានប្រសិទ្ធភាពខ្ពស់។ ការងារទាំងអស់ខាងលើនេះ គឺជាសកម្មភាពអាទិភាពបំផុត នៃកម្មវិធីកំណែទម្រង់វិស័យទូរគមនាគមន៍របស់ក្រសួង។

ជាមួយគ្នានេះ ប្រតិបត្តិករទូរគមនាគមន៍ត្រូវគោរពច្បាប់ស្តីពី ទូរគមនាគមន៍និងលិខិតបទដ្ឋានគតិយុត្តពាក់ព័ន្ធឱ្យបានខ្ជាប់ខ្លួន ត្រូវសិក្សា និងធ្វើបច្ចុប្បន្នភាពផែនការសាងសង់ស្ថានីយអង់តែន ឆ្លើយតបនឹងការប្រើប្រាស់ ចំនួនអ្នកប្រើប្រាស់ និងទីតាំងភូមិសាស្ត្រ ដោយត្រូវផ្តល់ផែនការនេះ មកនិយ័តករទូរគមនាគមន៍កម្ពុជា មុនសាងសង់ស្ថានីយអង់តែន និងបណ្តាញទូរគមនាគមន៍ ស្របតាមមាត្រា១៤ និង១៧ នៃច្បាប់ស្តីពីទូរគមនាគមន៍ រួមជាមួយនឹងការគោរព និងអនុវត្តឱ្យស្របទៅនឹងបទបញ្ញត្តិដែលបានចែង។

ដោយឡែក ក្នុងនាមជាអ្នកប្រើប្រាស់សេវាទូរគមនាគមន៍ ត្រូវសហការរាយការណ៍ពីបាតុភាពនានាពាក់ព័ន្ធនឹង គុណភាពសេវា មានជាអាទិ៍ ភាពមិនគ្រប់គ្រាន់នៃវិសាលភាពគ្របដណ្តប់ភាពយឺតនល្បឿនអឺនធឺណិត ឬភាពរអាក់រអួលនៃការហៅចេញ និងការទទួលទូរសព្ទនៅតាមទីតាំងនានា ទៅកាន់ភ្នាក់ងារបម្រើ សេវាអតិថិជនរបស់បណ្តាប្រតិបត្តិករទូរគមនាគមន៍ តាមរយៈលេខទូរសព្ទដូចមានក្នុងបញ្ជីជូនភ្ជាប់ជាមួយ។

សម្រាប់ព័ត៌មានបន្ថែម អ្នកប្រើប្រាស់សេវាទូរគមនាគមន៍ អាចទាក់ទងមកនិយ័តករទូរគមនាគមន៍កម្ពុជា តាមរយៈលេខ១២៧២ នៅរៀងរាល់ម៉ោងធ្វើការដោយឥតគិត ថ្លៃ។

ប្រជាពលរដ្ឋកម្ពុជា ពិសេសប្រជាពលរដ្ឋរស់នៅក្រុងភ្នំពេញភាគច្រើន បានរអ៊ូរទាំពីសេវាកម្មរបស់ក្រុមហ៊ុនInternetនៅកម្ពុជា ដែលភាគច្រើនសេវាកម្មរបស់ពួកគេមិនបានគោរពស្តង់ដាវិជ្ជាជីវៈ និងខសេវាអ៊ីនធើណេតមានភាពយឺតយ៉ាវ ដែលពិបាកក្នុងការប្រើប្រាស់លើអាជីវកម្មរបស់ពួកគេ៕

ក្រុមហ៊ុនកូរ៉េបោះទុន២០លានដុល្លារលើរោងចក្រដំឡើងរោងងចក្រផលិត ម៉ូតូកង់បីនៅកម្ពុជា

ដោយៈ ប៊ី

ភ្នំពេញៈ បន្ទាប់ពីក្រុមហ៊ុន Onion Mobility Co., Ltd បោះទុនវិនិយោគប្រមាណ២០លានដុល្លារអាមេរិក បង្កើតរោងចក្រដំឡើងកង់បីអគ្គិសនី នៅក្នុងខេត្ដកណ្ដាល កង់បីអគ្គិសនី ONiON ដែលរចនាបង្កើតឡើងនៅកូរ៉េ បានបង្ហាញរូបរាងជាផ្លូវការហើយនៅក្នុងទីផ្សារកម្ពុជាហើយកាលពីសប្តាហ៍មុន។ នេះបើយោងតាមការចេញផ្សាយរបស់គេហទំព័រ Khmerinkorea កាលពីថ្មីៗនេះ។

ឆ្លងកាត់ការតំឡើង និងសាកល្បងដ៏ជោគជ័យ ក្នុងរយៈពេល១០ថ្ងៃកន្លងទៅ កង់បីអគ្គិសនីONiON នឹងចាប់ផ្ដើមបង្ហាញទីតាំងបង្ហាញ (ONiON Showroom) និងសា្ថនីយ៍សាកអាគុយ (ONiON Station) របស់ខ្លួន ជាបន្ដបន្ទាប់ទៀតតាមការគ្រោងទុក។

កង់បីអគ្គិសនី ONiON ត្រូវបានតម្លើងនៅក្នុងខេត្ដកណ្ដាល មានទីតាំងស្ថិតនៅក្នុងតំបន់សេដ្ឋកិច្ចពិសេស សុវណ្ណភូមិ ដោយមានទុនវិនិយោគប្រមាណ២០លានដុល្លារអាមេរិក និងអាចបង្កើតការងារបានចំនួន៣៨០កន្លែង។

លោក Kay Woo ជានាយកប្រតិបត្ដិ របស់ក្រុមហ៊ុន Onion Mobility Co., Ltd បានបង្ហាញឆន្ទៈរបស់ខ្លួនថា នេះជាការនាំយកមកនូវភាពពេញនិយមក្នុងការប្រើប្រាស់ កង់បីអគ្គិសនីនៅក្នុងប្រទេសកម្ពុជា តាមរយៈការផលិតយានជំនិះ ដែលមានសេវាកម្មប្រកួតប្រជែង ភ្ជាប់ជាមួយមធ្យោបាយកក់ការធ្វើដំណើរ TADA។

ក្នុងពេលជាមួយគ្នានោះផងដែរ យើងក៏បង្កើតឲ្យមានប្រព័ន្ធអេកូឡូស៊ីមួយ ដែលអាចជួយផ្នែកសេដ្ឋកិច្ច ដល់អ្នកបើកកង់បីផងដែរ។

លោកនាយកប្រតិបត្តិបានបន្តទៀតថា “ការបង្ហាញរូងរាងកង់បីអគ្គិសនីOnion ជាផ្លូវការនៅលើទីផ្សារកម្ពុជា នឹងរួមចំណែកបង្កើនប្រាក់ចំណូលជូនដល់អ្នកបើកបរ បង្កើតការធ្វើដំណើរដោយផាសុកភាព សម្រាប់អ្នកដំណើរ បង្កើតការងារក៏ដូចជាគុណភាពក្នុងការរស់នៅរបស់សហគមន៍ទាំងមូល”។ លោកបន្តថា “ពួកយើងនឹងព្យាយាមក្លាយខ្លួនជាយានជំនិះ ដែលអាចជួយអ្នកទាំងអស់គ្នា កំឡុងពេលនៃការរាតត្បាតសកលនៃមេរោគ Covid19 នេះ”។

កង់បីអគ្គិសនីដំបូងគេនេះ បានទាក់ទាញចំណាប់អារម្មណ៍សាធារណៈ ជាពិសេសគឺ អ្នកបើកបរកង់បីនៅក្នុងប្រទេសកម្ពុជាយ៉ាងខ្លាំង ដោយសារកង់បីនេះ ជាកង់បីដំបូងដែលប្រើប្រាស់អគ្គិសនី ជួយកាត់បន្ថយការចំណាយរបស់អ្នកបើក ផ្ដោតលើគុណភាពយូរអង្វែង មានរូបរាងទំនើប មានសម្លេងស្ងាត់ និងកាត់បន្ថយការបំពុលបរិស្ថានផងដែរ។

ចំនុចដែលគួរឱ្យចាប់អារម្មណ៍អំពីកង់បីអគ្គិសនី ONiON ម៉ូតថ្មីក្នុងទីផ្សារកម្ពុជានេះ គឺវាត្រូវបានរចនាឡើង និងបញ្ចេញគំនិតឡើង (Develop) នៅប្រទេសកូរ៉េ។ លើសពីនេះទៀត ដោយប្រើប្រាស់អគ្គិសនី កង់បីនេះអាចធ្វើដំណើរបានដល់១០០ គីឡូម៉ែត្រសម្រាប់ការសាកអាគុយអគ្គិសនីពេញម្តង ដែលតម្រូវការចំណាយប្រៀបទៅនឹងប្រភេទកង់បីប្រើប្រាស់ហ្គាស LPG គឺចំណេញជាងដល់ទៅ២០%ឯណោះ។

បើតាមគេហទំព័ររបស់ក្រុមហ៊ុនផ្ទាល់ ការចំណាយលើការធ្វើដំណើរដល់១០០គីឡូម៉ែត្រ គឺត្រឹមតែ២ដុល្លារប៉ុណ្ណោះ ហើយក្រុមហ៊ុនផ្តល់ការធានារហូតដល់៨ម៉ឺនគីឡូម៉ែត្រ ឬរយៈពេល៣ឆ្នាំទៀតផង។

កង់បីអគ្គិសនី ONiON នេះជាផលិតផលរបស់ក្រុមហ៊ុន Onion Mobility Co., Ltd ជាបុត្រសម្ព័ន្ធមួយជាមួយ នឹងក្រុមហ៊ុនបុត្រសម្ព័ន្ធ MVL TADA (Cambodia) Co., Ltd ដែលត្រូវបានគេស្គាល់ថា ជាក្រុមហ៊ុនផ្ដល់សេវាកម្មកក់យានជំនិះ ធ្វើដំណើរនៅកម្ពុជា តាមរយៈកម្មវិធីទូរស័ព្ទ (TADA App)។ ក្រុមហ៊ុនបុត្រសម្ព័ន្ធនេះ ជាផ្នែកមួយនៃក្រុមហ៊ុន MVLLABS Pte Ltd (MVL) របស់ប្រទេសសិង្ហបុរី៕

អាគារការិយាល័យចំនួន៤ទៀតនឹងដាក់ចូលទីផ្សារនៅដំណាច់ឆ្នាំនេះ

ដោយៈគង់ សូរិយា

ភ្នំពេញៈ អាគារការិយាល័យចំនួន៤ទៀត នឹងដាក់ចូលទីផ្សារនៅក្រុងភ្នំពេញនាដំណាច់ឆ្នាំនេះ ដែលធ្វើឲ្យទំហំការិយាល័យរួម នៅក្នុងទីផ្សារកើនជិតដល់៨០ម៉ឺនម៉ែត្រការ៉េ។

លោកស្រីអាន សុធីតានាយិកាប្រចាំប្រទេសនៃក្រុមហ៊ុនCBRE Cambodiaបានមានប្រសាសន៍ឲ្យដឹងកាលពីចុងសប្តាហ៍មុនថា ជាមួយនឹងការឈានទៅបញ្ចប់ត្រីមាសទី១ឆ្នាំនេះ យើងសង្កេតឃើញថា ទីផ្សារការិយាល័យមានភាពល្អប្រសើរ បើធៀបនឹងចុងត្រីមាសទី៤ឆ្នាំមុន។ ជាមួយនឹងទំហំការិយាល័យសរុបកើនដល់៦០ម៉ឺនម៉ែតត្រការ៉េ គិតត្រឹមដំណាច់ឆ្នាំមុន ទំហំការិយាល័យជិត២០ម៉ឺនម៉ែត្រការ៉េទៀត នឹងដាក់ដំណើរការនៅឆ្នាំនេះ។

លោកស្រីបន្តថា “អាគារការិយាល័យដែលនឹងដាក់ចូលទីផ្សារនៅឆ្នាំនេះ រួមមានអាគារការិយាល័យធនាគារស្ថាបនា អាគារGIA TOWER, Platiron TowerនិងអាគារCEO Kt Pacific”។ លោកស្រីបន្តថា “ទោះជាមានភាពប្រសើរឡើងក្តី ប៉ុន្តែតម្លៃជួលការិយាល័យរួមនៅក្នុងទីផ្សារបានថយចុះចន្លោះពី៥ទៅ១០ភាគរយ”។

បច្ចុប្បន្ននៅរាជធានីភ្នំពេញ មានអាគារការិយាល័យសរុបចំនួន៧៨កំពុងដំណើរការនៅលើទីផ្សារជួល ដែលចំនួននេះរួមបញ្ចូលនូវអាគារការិយាល័យកម្រិតA កម្រិតB និងការិយាល័យកម្រិតC ប៉ុន្តែក្នុងចំណោមអាគារការិយាល័យទាំងនោះ អាគារការិយាល័យកម្រិតBមានចំនួនច្រើនជាងគេ ដោយសារការិយាល័យកម្រិតB មានតម្លៃសមរម្យ និងសមស្របនឹងលក្ខខ័ណ្ឌចំណាយរបស់ក្រុមហ៊ុនថ្មិៗ។

អ្នកជំនាញបាននិយាយថា ការជួលការិយាល័យ នៅតាមអាគារការិយាល័យផ្សេងៗ បានផ្តល់នូវភាពល្អប្រសើរសម្រាប់ក្រុមហ៊ុននិមួយៗ ដោយពួកគេអាចកសាងបណ្តាញជាមួយក្រុមហ៊ុន នៅក្នុងអាគាររួមដើម្បីពង្រីកឬទំនាក់ទំនងអាជីវកម្មរបស់ពួកគេ ហេតុនេះទើបនិន្នាការជួលការិយាល័យនៅតាមផ្ទះល្វែង និងវីឡាបានថយចុះនៅកម្ពុជា៕

ក្រុមហ៊ុនផលិតស្មាតហ្វូនយក្សរបស់ចិន Xiaomi គ្រោងវិនិយោគជាង ១០ពាន់លានដុល្លារ ដើម្បីផលិតរថយន្តអគ្គិសនី

ដោយៈសុខុម

សៀងហៃ: ក្រុមហ៊ុនផលិតទូរស័ព្ទស្មាតហ្វូនយក្សរបស់ចិន Xiaomi បានប្រកាសកាលពីថ្ងៃអង្គារ ទី៣០ មីនាថា ខ្លួនបានចូលប្រឡូកក្នុងឧស្សាហកម្ម ផលិតរថយន្តអគ្គិសនី (EV) ជាផ្លូវការហើយនៅពេលនេះ ជាមួយនឹងការបង្កើតក្រុមហ៊ុនបុត្រសម្ព័ន្ធមួយ។ នេះបើយោងតាមការចុះផ្សាយរបស់សារព័ត៌មាន CAN ។

ជាដំបូងក្រុមហ៊ុននេះ នឹងបោះទុនវិនិយោគចំនួន១០ពាន់លានយ័ន (១,៥២ ពាន់លានដុល្លារអាមេរិក) នៅក្នុងក្រុមហ៊ុនបុត្រសម្ព័ន្ធមួយ ដែលខ្លួនកាន់កាប់ទាំងស្រុង ជាមួយនឹងគោលដៅវិនិយោគសរុប១០ ពាន់លានដុល្លារអាមេរិក នៅរយៈពេល១០ឆ្នាំក្រោយ។

ក្រុមហ៊ុននេះបានបញ្ជាក់ថា លោក Lei Jun ដែលជានាយកប្រតិបត្តិក្រុមហ៊ុន Xiaomi ក៏នឹងកាន់តំណែងជានាយកប្រតិបត្តិ នៃក្រុមហ៊ុនបុត្រសម្ព័ន្ធនេះផងដែរ។ ចំណាត់ការរបស់ក្រុមហ៊ុននេះ នៅក្នុងការហក់ចូលប្រឡូក ក្នុងឧស្សាហកម្មរថយន្តអគ្គិសនី ធ្វើឡើងក្រោយ ពីក្រុមហ៊ុនបច្ចេកវិទ្យាខ្នាតយក្សផ្សេងៗទៀត ទាំងនៅប្រទេសចិន និងក្រៅប្រទេស សម្រុកចូលប្រឡូកក្នុងឧស្សាហកម្មនេះជាបន្តបន្ទាប់។

នៅខែមករា ដើមឆ្នាំ២០២១ ក្រុមហ៊ុនស្រាវជ្រាវខ្នាតយក្សរបស់ចិន Baidu បានប្រកាសថា ខ្លួននឹងបង្កើតរោងចក្រផលិតរថយន្តអគ្គិសនី តាមរយៈភាពជាដៃគូសហការជាមួយក្រុមហ៊ុនផលិតរថយន្ត ក្នុងស្រុក Geely Automobile Holdings។

នៅខែកុម្ភៈ ដើមឆ្នាំ២០២១ ទីភ្នាក់ងារព័ត៌មាន Reuters បានចុះផ្សាយថា បច្ចុប្បន្នក្រុមហ៊ុនបច្ចេកវិទ្យាផលិតស្មាតហ្វូន ខ្នាតយក្សរបស់ចិន Huawei Technologies កំពុងចរចា ជាមួយក្រុមហ៊ុនផលិតរថយន្តគ្រប់គ្រងដោយរដ្ឋ Changan Automobile និងក្រុមហ៊ុនផ្សេងៗទៀតដើម្បីផលិតរថយន្តអគ្គិសនី។

យោងតាមសារព័ត៌មានចុះផ្សាយឱ្យដឹងថា ក្រុមហ៊ុនយក្សរបស់សហរដ្ឋអាមេរិក Apple ក៏បាននិងកំពុងរៀបចំផែនការចូលប្រឡូក ក្នុងទីផ្សារផលិតរថយន្តអគ្គិសនីដែរ។

កាលពីសប្តាហ៍មុន ទីភ្នាក់ងារព័ត៌មាន Reuters បានចុះផ្សាយថា ក្រុមហ៊ុន Xiaomi កំពុងចរចាចាប់ដៃគូសហការ ជាមួយក្រុមហ៊ុនផលិតរថយន្តចិន Great Wall Motor Co សម្រាប់ការជួយជ្រោមជ្រែង នៅក្នុងការផលិតរថយន្តអគ្គិសនី។

ទោះជាយ៉ាងណា ក្រុមហ៊ុន Xiaomi បានបដិសេធមិនធ្វើអត្ថាធិប្បាយទេជុំវិញព័ត៌មានចុះផ្សាយនេះ ចំណែកឯក្រុមហ៊ុន Great Wall បានប្រាប់ថា ខ្លួនមិនបានចរចាចាប់ដៃគូសហការបែបនេះ ជាមួយក្រុមហ៊ុន Xiaomi នោះឡើយ៕

ADB តំបន់អាស៊ានប្រឈមកង្វះខាតការវិនិយោគលើហេដ្ឋារចនាសម្ព័ន្ធជាង ១០០ពាន់លានដុល្លារក្នុងមួយឆ្នាំ

ដោយៈ ម៉ាណេត

ភ្នំពេញៈ តំបន់អាស៊ីអាគ្នេយ៍ កំពុងប្រឈមមុខនឹងកង្វះខាត ការវិនិយោគលើហេដ្ឋារចនាសម្ព័ន្ធជាង១០០ពាន់លានដុល្លារក្នុងមួយឆ្នាំ ដែលស្ថានភាពនេះអាចនឹងពិបាកជាងនេះ ខណៈពេលដែលមានការរីករាលដាលនៃកូវីដ១៩ ។ នេះបើយោងតាមការលើកឡើងរបស់ធនាគារអភិវឌ្ឍន៍អាស៊ី (ADB) នៅថ្ងៃទី៣០ ខែមីនា ឆ្នាំ២០២១ ។

ជាមួយគ្នានេះដែរADBបានឱ្យដឹងថា មូលនិធិហិរញ្ញវត្ថុបៃតង ជាចលករសម្រាប់អាស៊ាន (ASEAN Catalytic Green Finance Facility ឬACGF) អាចដើរតួយ៉ាងសំខាន់ក្នុងការជួយជ្រោមជ្រែងមូលនិធិ ដែលត្រូវការយ៉ាងច្រើនពីមូលធនឯកជន ដើម្បីជំរុញការងើបឡើងវិញនៃសេដ្ឋកិច្ចបៃតង ប្រកបដោយនិរន្តរភាពនៅក្នុងតំបន់ ចំពោះហេដ្ឋារចនាសម្ព័ន្ធប្រកបដោយនិរន្តរភាព បរិស្ថានកាបូនកម្រិតទាប ភាពធន់នឹងអាកាសធាតុ និងឆ្លើយតបនឹងតម្រូវការរបស់សហគមន៍មូលដ្ឋាន។

មូលនិធិ ACGF ជាគំនិតផ្តួចផ្តើមមូលនិធិហេដ្ឋារចនាសម្ព័ន្ធអាស៊ាន ដែលគ្រប់គ្រងដោយមជ្ឈមណ្ឌលច្នៃប្រឌិតអាស៊ីអាគ្នេយ៍របស់ ADB ។ វាជួយរដ្ឋាភិបាលអាស៊ីអាគ្នេយ៍រៀបចំ និងផ្តល់ហិរញ្ញប្បទានដល់គម្រោងហេដ្ឋារចនាសម្ព័ន្ធនានា លើកកម្ពស់និរន្តរភាពបរិស្ថាន និងរួមចំណែកដល់គោលដៅបំរែបំរួលអាកាសធាតុ។

មូលនិធិ ACGF ផ្តល់ឱ្យបណ្តាប្រទេសអាស៊ាន នូវការទទួលបានប្រាក់កម្ចីជាង១,៤ពាន់លានដុល្លារ រួមជាមួយជំនួយបច្ចេកទេស ដែលជួយពង្រឹងបរិយាកាសបទប្បញ្ញត្តិ និងបង្កើនការវិនិយោគហេដ្ឋារចនាសម្ព័ន្ធបៃតង។ មូលនិធិ ACGF ផ្តល់ហិរញ្ញប្បទានដល់គម្រោង ដែលឆ្លើយតបទៅនឹងគោលការណ៍វិនិយោគបៃតង ដែលបានបោះ ផ្សាយរបស់ខ្លួន រួមបញ្ចូលគ្នារវាងសូចនាករអាកាសធាតុ និងបរិស្ថាន សូចនាករភាពហិរញ្ញវត្ថុហិរញ្ញវត្ថុ និងផែនទីបង្ហាញផ្លូវ សម្រាប់ទាក់ទាញការវិនិយោគមូលធនឯកជន៕

ទីក្រុងបូកគោថ្មីនឹងជំរុញឱ្យវិស័យអចលនទ្រព្យតំបន់នេះកាន់តែរីកចំរើន

ដោយៈ រ៉ា ណេត

ភ្នំពេញៈ អ្នកជំនាញបង្ហាញសុទ្ធិដ្ឋិនិយមថា ទីក្រុងបូកគោថ្មី ដែលប្រមុខនៃរាជរដ្ឋាភិបាលបានសម្រេចបង្កើតជាផ្លូវការ វានឹងជួយជំរុញឱ្យវិស័យអចលនទ្រព្យ នៅក្នុងតំបន់នេះ កាន់តែមានសន្ទុះរីកចំរើនកាន់តែខ្លាំងបន្ថែមទៀត។

លោកឃាង ពុទ្ធី ប្រធានក្រុមប្រឹក្សាភិបាល នៃសមាគមអ្នកជំនាញអចលនទ្រព្យកម្ពុជាមានប្រសាសន៍ឲ្យដឹងកាលពីរសៀលថ្ងៃទី៣០ មិនាកន្លងមកថា ក្រៅតែអំពីការបង្កើតប្រព័ន្ធគ្រប់គ្រង់រដ្ឋបាលថ្មី នៅក្នុងទីក្រុងថ្មីនេះ វានឹងជួយជំរុឱ្យមានការអភិវឌ្ឍន៍នូវប្រព័ន្ធហេដ្ឋារចនាសម្ព័ន្ធ ហើយវាក៏នឹងធ្វើឱ្យវិស័យអលចនទ្រព្យរីកចំរើនផងដែរ។

លោកបន្តថា “នៅក្នុងទីក្រុងបូកគោថ្មីនេះ ក៏ជាកន្លែងទេសចរណ៍ដ៏ទាក់ទាញ ហើយជាស្វ័យប្រវត្តិវិស័យអចលនទ្រព្យ នឹងមានសន្ទុះរីកចំរើន និងមានការចាប់អារម្មណ៍ជាងមុនពេលដែលមិនទាន់បង្កើត។លោកថ្លែងថា« យើងមានសុទិដ្ឋិនិយមថា អ្វីៗ វានឹងល្អជាងមុន ទាំងតម្លៃដីក៏វាអាចថានឹងកើនឡើង ប៉ុន្តែក៏វាអាស្រ័យលលើការរៀបចំ និងអភិវឌ្ឍន៍របស់មន្ត្រី ដែលនឹងទៅគ្រប់គ្រងនៅទីនេះដែរ។ បើមានតែទីក្រុង ប៉ុន្តែអត់មានការអភិវឌ្ឍន៍ វាក៏នៅទ្រឺងដែរ” ។

លោកវិត វឌ្ឍនា អ្នកនាំពាក្យរដ្ឋបាលខេត្តកំពតថ្លែងថា ការសម្រេចបង្កើតក្រុងបូកគោនេះ គឺជាការល្អមួយសម្រាប់ខេត្តកំពត ដែលវានឹងបង្កភាពងាយស្រួលក្នុងការគ្រប់គ្រងភូមិកសាស្ត្រ និងជំរុញល្បឿននៃការអភិវឌ្ឍន៍។

លោកបន្តថា “គោលដៅដែលថ្នាក់ដឹកនាំបង្កើតក្រុងនេះ ក្នុងកគោលដៅអភិវឌ្ឍន៍ ព្រោះតំបន់នេះ មានការវិនិយោគច្រើន និងធ្វើឱ្យសេដ្ឋកិច្ចនៅក្នុងតំបន់នេះ មានរីកចំរើនលឿនទៅមុខ” ។

លោកវិត វឌ្ឍនាបានថ្លែងថា រដ្ឋបាលខេត្ត និងរាជរដ្ឋាភិបាល ក៏បានត្រៀមបំរ៉ុងរួចហើយនូវកញ្ចប់ថវិកា សម្រាប់យកទៅអភិវឌ្ឍន៍ហេដ្ឋារចនាសម្ព័ន្ធ ក្រុង និងសាលាក្រុង នៅក្នុងក្រុងថ្មីមួយនេះ។ ទោះជាយ៉ាងណា លោក មិនបានបញ្ជាក់ពីទំហំកញ្ចប់ថវិកាប៉ុន្មាសម្រាប់អភិវឌ្ឍន៍នោះទេ។

លោកបញ្ជាក់ទៀតថា “នៅពេលដែលចប់កូវីដ តំបន់នេះនឹងមានការរីកចំរើនច្រើន ព្រោះវាទៅជាក្រុង ។ ទោះជាយ៉ាងណា បច្ចុប្បន្ននេះ ការអភិវឌ្ឍន៍ហេដ្ឋារចនាសម្ព័ន្ធនៅក្នុងតំបន់នេះ មិនទាន់សូវមានការលូតលាស់ខ្លាំងទេ។លោកបន្ថែមថា “ប៉ុន្តែរដ្ឋបាលខេត្តមានថវិកាហើយ សូម្បីថវិការបស់ក្រសូងក៏ត្រៀមរួចហយដែរ សម្រាប់ការរៀបចំសាលាក្រុង និងការរៀបចំផ្សេងៗទៀត មានដី” ។

លោក វិត វឌ្ឍនា នៅក្នុងមូលដ្ឋានខេត្តកំពត កាលពីមុននេះ មាន៨ក្រុង ស្រុក (ក្រុង១ និងស្រុក ៧) ប៉ុន្តែបច្ចុប្បនេះ ខេត្តមានក្រុងចំនួន២ និងស្រុកចំនួន ៦ ។

សម្តេចនាយករដ្ឋមន្ត្រី ហ៊ុន សែន បានចេញអនុក្រឹត្យ លេខ ៣៨.អនក្រ. បក ចុះថ្ងៃទី ១៦ ខែមីនា ឆ្នាំ ២០២១សម្រេច បង្កើត ក្រុងបូកគោ នៃខេត្ត ដោយកាត់យកឃុំចំនួន ៣ ពីស្រុកទឹកឈូ គឺឃុំបឹងទូក ឃុំកោះតូច និងឃុំព្រែកត្នោ ដើម្បីមានភាពងាយស្រួលក្នុងការគ្រប់គ្រង និងការអភិវឌ្ឍន៍ ឱ្យកាន់តែមានការរីកចំរើនបន្ថែមទៀត៕

រដ្ឋាភិបាលនិងដៃគូកំពុងសិក្សាលទ្ធភាពអភិវឌ្ឍន៍អាកាសយានដ្ឋានមណ្ឌលគិរីឲ្យបានជោគជ័យដោយនិរន្តរភាព

ដោយៈ ប៊ី

ភ្នំពេញៈ រដ្ឋលេខាធិការដ្ឋានអាកាសចរស៊ីវិល បានដឹកនាំកិច្ចប្រជុំដើម្បីស្វែងយល់និងផ្តល់ធាតុចូលបន្ថែម លើរបាយការណ៍សង្ខេបស្តីពី ការសិក្សាសមិទ្ធិលទ្ធភាពពេញលេញ សម្រាប់ការអភិវឌ្ឍអាកាសយានដ្ឋានមណ្ឌលគិរីថ្មី។

លោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលបានថ្លែងក្នុងកិច្ចប្រជុំកាលពីថ្ងៃទី៣០ មិនាកន្លងមក ដោយបានផ្តល់អនុសាសន៍២ចំណុច ដើម្បីឱ្យរបាយការណ៍នេះកាន់តែប្រសើរឡើង ដូចជា ទី១ ត្រូវយកចិត្តទុក្ខដាក់បញ្ចូលបន្ថែម នូវសកម្មភាពអភិវឌ្ឍទេសចរណ៍ និងសេដ្ឋកិច្ចតំបន់ស្របតាមគោលនយោបាយរបស់ក្រសួងទេសចរណ៍។

ទី២ ត្រូវរកវិធីសាស្ត្រថ្មីៗ ដើម្បីទាក់ទាញក្រុមហ៊ុនអាកាសចរណ៍ ឱ្យធ្វើការហោះហើរទៅតំបន់នោះ ដូចជា ផលិតផលទេសចរណ៍ថ្មីៗ សកម្មភាពសេដ្ឋកិច្ច និងវិនិយោគថ្មី។

បន្ទាប់ពីទទួលបានអនុសាសន៍ណែនាំ និងធាតុចូលបន្ថែមពីសំណាក់ លោករដ្ឋ មន្ត្រីរួចមក អ្នកពិគ្រោះយោបល់ Consultant នឹងខិតខំសិក្សានូវធាតុចូលបន្ថែមទៀតទៅក្នុងរបាយកាណ៍នេះ។

រាជរដ្ឋាភិបាល បានសម្រេចជ្រើសរើសក្រុមហ៊ុនចិន Powerchina International Group ឱ្យសិក្សា និងអភិវឌ្ឍន៍លើគម្រោងសាងសង់ អាកាសយានដ្ឋានថ្មីខ្នាតតំបន់ នៅខេត្តមណ្ឌលគិរី និងអនុញ្ញាត្តឱ្យរដ្ឋលេខាធិការដ្ឋានអាកាចរស៊ីវិល ដឹកនាំរៀបចំកិច្ចព្រមព្រៀងក្របខ័ណ្ឌជាមួយក្រុមហ៊ុនអភិវឌ្ឍន៍។

តាមការឱ្យដឹងថា អាកាសយានដ្ឋានខេត្តមណ្ឌលគិរី គ្រោងចំណាយទុនវិនិយោគប្រមាណ១០០លានដុល្លារអាមេរិក ដើម្បីសាងសង់ជាប្រភេទ 4C លើផ្ទៃដីទំហំប្រមាណជាង៣០០ហិកតា។ បច្ចុប្បន្នក្រុមការងារបច្ចេកទេស និងក្រុមហ៊ុនចិន បានកំពុងសិក្សានិងចរចារួមគ្នា មុនឈានដល់ការដំណើរការសាងសង់ អាចឈានទៅដល់ចុងឆ្នាំ២០២១ ឬដើមឆ្នាំ២០២២ ។

រដ្ឋាភិបាលកម្ពុជាបានអនុម័ត គម្រោងអភិវឌ្ឍន៍ព្រលានយន្តហោះខេត្តមណ្ឌលគិរី ជូនដល់ក្រុមហ៊ុន Power China Group ដើម្បីវិនិយោគសាងសង់ និងរៀបចំព្រលានយន្តហោះអន្តរជាតិនេះឲ្យដំណើរការដោយរលូន និងជោគជ័យ៕

ឆ្នាំ២០២១ ខេត្តចំនួន៦ នឹងបន្តមានភាពលេចធ្លោជាងគេ ទោះជាប្រឈមវិបត្តិសេដ្ឋកិច្ច

ដោយស៊ីវ ម៉េង

ភ្នំពេញៈ អ្នកជំនាញអចលនទ្រព្យជាច្រើន សុទ្ឋតែលើកឡើងពីសក្តានុពលលើបណ្តាខេត្តទាំងនេះ នៅឆ្នាំ២០២១នេះ ដែលវាមិនមែនជាការព្យាករណ៍ ឬចេះតែលើកឡើង ដោយគ្មានមូលដ្ឋាននោះទេ។

ខេត្តកំពត ព្រះសីហនុ សៀមរាប កណ្តាល កំពង់ស្ពឺ មណ្ឌលគិរី សុទ្ឋតែជាតំបន់ដែលមានសក្តានុពល ដែលបាននិងកំពុងលេចឡើងអ្នកជំនាញ ក្នុងស្រុកជាច្រើនបានអះអាងថា នឹងមានការរីកចម្រើនលើវិស័យអចលនទ្រព្យ។

មូលដ្ឋាននៃការអះអាងទាំងនេះ ជាមូលដ្ឋានបែបវិទ្យាសាស្ត្រ ដោយសារតែការវិនិយោគលើហេដ្ឋារចនាសម្ព័ន្ឋរបស់រដ្ឋាភិបាល និងការវិនិយោគពីវិស័យឯកជនជាតិ និងអន្តរជាតិ។

ខេត្តកណ្តាល

រដ្ឋាភិបាលកំពុងវិនិយោគ លើហេដ្ឋារចនាសម្ព័ន្ឋយ៉ាងខ្វាត់ខ្វែង ដូចជាផ្លូវជាតិលេខ២កំពុងត្រូវពង្រីក ផ្លូវជាតិលេខ៣កំពុងពង្រីក ការសាងសង់ផ្លូវក្រវ៉ាត់ក្រុងទី៣ គំរោងផ្លូវក្រវ៉ាត់ក្រុងទី៤ ស្ពានឆ្លងកាត់តំបន់កោះអន្លង់ចិន មកកាន់ស្រុកកៀនស្វាយ ខេត្តកណ្តាល ពិសេសព្រលានយន្តហោះអន្តរជាតិភ្នំពេញថ្មី ដែលបាននិងកំពុងសាងសង់ និងគ្រោងបញ្ចប់ដំណាក់កាលទី១ នៅឆ្នាំ២០២៣ខាងមុខនេះ។

ខេត្តព្រះសីហនុ

ខេត្តព្រះសីហនុ ត្រូវបានប្រមុខរាជរដ្ឋាភិបាលចាត់ទុកជាតំបន់ក្បាលនាគ ហើយក្នុងគោលនយោបាយ អភិវឌ្ឍន៍វិស័យឧស្សាហកម្មរបស់រដ្ឋាភិបាល បានរៀបចំខេត្តព្រះ

សីហនុ ជាតំបន់សេដ្ឋកិច្ចពហុបំណង ដែលធ្វើឲ្យខេត្តនេះមានការរីកចម្រើនស្ទើរមិនគួរឲ្យជឿ។ ជាក់ស្តែងគ្រាន់តែទុនវិនិយោគលើវិស័យសំណង់ និងអចលនទ្រព្យ ខេត្តនេះទាក់ទាញបានលំហូរទុនវិនិយោគ ៨០០០លានដុល្លារអាមេរិក ក្នុងរយៈពេល៤ឆ្នាំកន្លងមកនេះ។

ខេត្តព្រះសីហនុ ក៏ជាតំបន់ស្ថិតនៅក្នុងគោលនយោបាយផ្លូវសូត្រ ឬខ្សែក្រវ៉ាត់១ ផ្លូវ១របស់ប្រទេសចិន។

អ្វីកាន់តែពិសេសរដ្ឋាភិបាលបាន និងកំពុងត្រៀមបញ្ចប់ការសាងសង់ផ្លូវចំនួន៤៦ខ្សែ នៅក្នុងក្រុងព្រះសីហនុ ដែលវានឹងលើកមុខមាត់ទីក្រុងនេះ ទៅកាន់លំដាប់អន្តរជាតិ ដែលនឹងទាក់ទាញការវិនិយោគ កាន់តែច្រើនថែមទៀតនាពេលអនាគត បន្ទាប់ពីជំងឺកូវីតបញ្ចប់ជាមួយនឹងវត្តមានវ៉ាក់សាំងបង្ការជំងឺនេះ ដែលនឹងមកដល់នៅខែកុម្ភៈខាងមុខ។

ខេត្តកំពត

មានចម្ងាយ១៤៨គីឡូម៉ែត្រពីរាជធានីភ្នំពេញ ខេត្តកំពតក៏មានសក្តានុពលសម្បើមផងដែរ ដែលវានឹងជម្រុញល្បឿននៃការអភិវឌ្ឍនៅខេត្តជាប់តំបន់ឆ្នេរនេះ ជាមួយនឹងការបញ្ចប់ការស្ថាបនា និងពង្រីកផ្លូវជាតិលេខ៣ ការបញ្ចប់កំពង់ផែ និងតំបន់សេដ្ឋកិច្ចពិសេសលើកដំបូងរបស់ខេត្ត ពិសេសកំពង់ផែទេសចរណ៍ដ៏ស្រស់ស្អាត ដែលអាចទាក់ទាញភ្ញៀបវទេសចរណ៍ពីក្នុងតំបន់ នឹងលើកកំពស់សក្តានុពលទេសចរណ៍ នៅក្នុងខេត្តនេះកាន់តែច្រើននាពេលអនាគត។

ជាមួយនឹងសក្តានុពលភ្នំបូកគោ ដែលទាក់ទាញទេសចរណ៍ជាតិ និងអន្តរជាតិ រដ្ឋាភិបាលក៏បាននិងកំពុងរៀបចំទីក្រុងឆ្លាតវៃថ្មី នៅជើងភ្នំបូកគោ ដែលវិនិយោគដោយក្រុមហ៊ុន Sokha Group ផងដែរ។

ធនធានធម្មជាតិនៅជាប់មាត់ព្រែកកំពត កំពុងធ្វើឲ្យខេត្តនេះមានភាពរសរវើករួចទៅហើយ ខណៈអាគារពាណិជ្ជកម្មភ្លោះកំពស់៤៥ជាន់ថ្មីមួយ ដែលវិនិយោគដោយក្រុមហ៊ុនថៃ ប៊ុនរ៉ុងគ្រុបកំពុងសាងសង់។ វានឹងក្លាយជា Landmark ថ្មីមួយសម្រាប់ផ្លាស់ប្តូរមុខមាត់របស់ខេត្តនេះនាពេលខាងមុខ។

ខេត្តមណ្ឌលគិរី

មណ្ឌលគិរី ដែលមានចម្ងាយផ្លូវគោកជិត៥០០គីឡូម៉ែត្រ នឹងលែងជាបញ្ហាលើការធ្វើដំណើរទៀតហើយ ដោយសាររដ្ឋាភិបាលបានអនុញ្ញាត្ត ឲ្យក្រុមហ៊ុន Powerchina Group វិនិយោគនៅក្នុងខេត្តនេះ ដែលបច្ចុប្បន្នខេត្តនេះកំពុងមានភាពរីកចម្រើន និងទាក់ទាញលំហូរទុនវិនិយោគយ៉ាងសម្បើម ពិសេសអ្នកវិនិយោគក្នុងស្រុក ដែលមើលឃើញផលចំណេញពីការកើនឡើងតម្លៃដីធ្លី និងកំនើនទេសចរណ៍នាពេលអនាគត។

ខេត្តនេះត្រូវបានក្រសួងទេសចរណ៍ ឬរាជរដ្ឋាភិបាលកម្ពុជារៀបចំអភិវឌ្ឍន៍ជាតំបន់ឧស្សាហកម្ម និងសេដ្ឋកិច្ចបែបពហុបំណងផងដែរ ពិសេសក្រសួងទេសចរណ៍រៀបចំផែនការមេដាំផ្កា ដើម្បីទាក់ទាញទេសចរណ៍ និងដាំបន្លែដើម្បីផ្គត់ផ្គង់មូលដ្ឋានទេសចរណ៍នានានៅទូទាំងប្រទេស។

សៀមរាប

ជាគ្រាប់គុជទេសចរណ៍ និងរតនៈសម្បត្តិរបស់ពិភពលោក ខេត្តសៀមរាបកំពុងត្រៀមបញ្ចេញពន្លឺចែងចាំងជាថ្មី ក្រោយវិបត្តិកូវីត១៩ ដែលបច្ចុប្បន្នរដ្ឋាភិបាលកំពុងរៀបចំស្ថាបនាឡើងវិញនូវផ្លូវចំនួន៣៤ខ្សែទូទាំងខេត្ត ការកែលំអរដងស្ទឹងសៀមរាប ក៏បាននិងកំពុងលើកកំពស់មុខមាត់ និងកិត្យានុភាពខេត្តនេះកាន់តែមានភាពស្រស់បំព្រង និងចាមូលដ្ឋានសម្រាប់ទាក់ទាញភ្ញៀវទេសចរណ៍មួយផ្នែកផងដែរ។

ក្រុមហ៊ុនលំដាប់យក្ស Naga Corp កំពុងរៀបចំបោះទុនវិនិយោគ ៣៥០លានដុល្លារ ដើម្បីធ្វើពិពិធកម្មផលិតផលទេសចរណ៍ក្នុងខេត្តនេះកាន់តែសម្បូរបែប ដូចជាទីក្រុងចិនឬ China Town តំបន់ជិះទូកកំសាន្ត និងសេវាកម្មបដិសណ្ឋារកិច្ចជាច្រើនទៀត។

ក្រុមហ៊ុនចិនដ៏ធំ ក៏បាននិងកំពុងវិនិយោគ ព្រលានយន្តហោះអន្តរជាតិសៀមរាបថ្មី ដែលព្រលាននេះ នឹងបញ្ចប់ការសាសងសង់នាឆ្នាំ២០២៣ខាងមុខ ដើម្បីទទួលភ្ញៀវទេសចរណ៍ និងអាកាសចរណ៍ដែលហោះឆ្លងទ្វីបបាន។

ខេត្តកំពង់ស្ពឺ

ដោយសារមានភូមិសាស្ត្រកៀកនឹងរាជធានីភ្នំពេញ ពិសេសជាតំបន់ដែលរដ្ឋាភិបាលបានដាក់ទិសដៅរៀបចំជាតំបន់ឧស្សាហកម្ម ខេត្តនេះកំពុងទាក់ទាញការវិនិយោគពីអ្នកវិនិយោគជាតិអន្តរជាតិ លើរោងចក្រ ឧស្សាហកម្ម លំនៅដ្ឋាន និងសកម្មភាពពុះដីឡូត៍យ៉ាងគគ្រឹកគគ្រេង។

ផ្លូវជាតិលេខ៤១ ផ្លូវជាតិលេខ៥១ ផ្លូវជាតិលេខ៤ ដែលកំពុងពង្រីកនិងកែលំអរដោយរដ្ឋាភិបាល បាននិងកំពុងធ្វើឲ្យខេត្តនេះកាន់តែពង្រីកមូលដ្ឋាននៃការរីកចម្រើនរបស់ខ្លួនកាន់តែច្រើនថែមទៀតនាពេលអនាគត៕

អ្នកជំនាញប្រាប់ពីក្បាច់ ស6 ដើម្បីលក់ដាច់ក្នុងសម័យ Covid 19

ដោយៈ គង់ សូរិយា

ភ្នំពេញៈ ក្នុងសមម័យ កូវីដ19 នេះ អ្នករកស៊ី អ្នកលក់ជាច្រើនជួបបញ្ហាក្នុងការងាររកស៊ី និងលក់ដូរ។ ស្ថិតក្នុងស្ថានភាពនេះ យោងលើបទពិសោធន៍ ចំណេះដឹង និងការសិក្សាស្រាវជ្រាវ បានបង្ហាញនូវគន្លឹះឬក្បាច់សំខាន់ៗចំនួន៦ ដើម្បីឲ្យអាជីវកម្មលោក អ្នកទទួលបានជោគជ័យ។

ជាថ្នាក់ដឹកនាំមួយរូបនៃ CEO Master Club និងជាតំណាងចែកចាយផ្តាច់មុខ ZINGI ប្រចាំប្រទេសកម្ពុជា លោកខាត់ បូរ៉ា បានមានប្រសាសន៍ឲ្យដឹងថា យោងតាមបទពិសោធន៍របស់លោក ដែលបានប្រឡូក និងសិក្សារៀនសូត្រកន្លងមក លោកសូមចែករំលែកយុទ្ធសាស្ត្រមួយ ដែលអាចជួយដល់អ្នករកស៊ីលក្ខណ:គ្រួសារ ឬមិនទាន់ស្តង់ដារ ឬអ្នកលក់ផលិតផល ឬសេវាកម្មផ្សេងៗ ។

លោកបន្តថា “យុទ្ធសាស្ត្រនេះខ្ញុំដាក់ឈ្មោះថា៖ “ក្បាច់ ស6 ដើម្បីលក់ដាច់ក្នុងសម័យកូវីដ19” ។ ក្បាច់ទាំងនោះរួមមាន៖

ទី1. សិក្សាកំណត់គោលដៅ និងតម្រូវការពិតរបស់អតិថិជន

ក្បាច់នេះអ្នករកស៊ី/អ្នកលក់ ត្រូវស្វែងរកឲ្យឃើញនរណាជាអតិថិជនរបស់អ្នក ស្រីឬ ប្រុស ចាស់ឬក្មេង មនុស្សធម្មតាឬអ្នកមានទំងន់ឬអ្នកគេងនៅពេទ្យ… គាត់នៅទីតាំងណា នៅខេត្តឬនៅភ្នំពេញ បើនៅភ្នំពេញនៅតំបន់ណា ខណ្ឌណា ឬប្លុកណា។ ហើយនៅក្នុងពេលកូវីដ19នេះ អ្នកត្រូវសិក្សារកអោយឃើញថា អតិថិជននោះត្រូវការអ្វីខ្លះដើម្បីរស់នៅស្រួល និងសុវត្ថិភាព ដើម្បីកូនៗគាត់រៀនស្រួល ដើម្បីស្រួល និងសុវត្ថិភាពក្នុងការរកស៊ី ដើម្បីស្រួល និងសុវត្ថិភាពដល់ក្រុមការងារ ដៃគូ បុគ្គលិក និងដើម្បីងាយស្រួលលក់ដូរ។

បើកាលណាយើងដឹងពីតម្រូវការអតិថិជនច្បាស់ យើងបង្កើតផលិតផល/សេវាកម្ម ដែលមានតម្រូវការខ្ពស់ធ្វើឲ្យយើងស្រួលលក់ ស្រួលធ្វើទីផ្សារ និងជួយផ្តល់ដំណោះស្រាយល្អៗ ងាយៗជូនដល់អតិថិជន។ សេវាសាមញ្ញៗដូចជា បង្កើត Page, Boost page, វាយអត្ថបទ, សរសេរ Caption, ថតរូប, ថតវីដេអូ , កាត់តរូបភាព កាត់តវីដេអូ…..ម្ហូប ចំណីអាហារ អាហារសំរ៉ន់ ….។

ទី2. សម្រាំងរកផលិតផលល្អបំផុត

ក្បាច់នេះអ្នករកស៊ី/អ្នកលក់ ត្រូវកំណត់ជ្រើសរើសផលិតផល ដែលខ្លួនត្រូវលក់អោយច្បាស់ ផលិតផលត្រូវតែជាតម្រូវការពិតរបស់អតិថិជន ផលិតផលដែលខ្លួនាចធ្វេីបានស្រួល មា នតម្រូវការច្រើនទីផ្សារធំ ស្រួលលក់ ស្រួលប្រើ គុណភាពល្អពិត ស្រួលចំណេញ ស្រួលពង្រីកទីផ្សារអោយបានធំលឿន ជាពិសេសអាចបង្កើតចំណូលបានធំ និងបានលឿន។

ទី3. សារ៉េ រកយុទ្ធសាស្ត្រឈ្នះក្នុងការធ្វើទីផ្សារនិងលក់

ក្បាច់នេះអ្នករកស៊ី/ អ្នកលក់ត្រូវសិក្សាអំពីវិធីសាស្ត្រធ្វើទីផ្សារ និងលក់ដែលមានប្រសិទ្ធភាពបំផុត ដែលធានាថាអតិថិជនគោលដៅ គាត់អាចទទួលបានព័ត៌មានអំពីផលិតផល/សេវាកម្មរបស់អ្នក បានលឿនបំផុត និងរៀបចំរបៀបដែលអតិថិជនអាចងាយស្រួលក្នុងការទិញ។

វិធីសាស្ត្រ ល្អបំផុតក្នុងការលក់ និងធ្វើទីផ្សារក្នុងពេលនេះគឺ 1).ក្រុមលក់តាមប្រព័ន្ធ Online 2). លក់តាមដៃគូទីផ្សារដូចជា E-commerce, Foodpanda,… 3).លក់តាមសម្ព័ន្ធមិត្តល្អពូកែ។

ទី4. សម្រុកធ្វើសកម្មភាពអោយបានលឿបំផុត

ក្បាច់នេះ គឺអ្នករកស៊ី/អ្នកលក់ត្រូវតែដឹកនាំ រៀបចំចាត់ចែងក្រុមការងារអនុវត្តន៍ផែនការយុទ្ធសាស្ត្រឈ្នះ ដែលបានកំណត់យកនៅក្នុងក្បាច់ទី3 អោយបានលឿនបំផុត និងមានប្រសិទ្ធភាពបំផុត។ លឿននៅក្នុងការបញ្ជូនទំនិញ ឬសេវាកម្ម គឺជាការចាំបាច់បំផុត។ អ្នកដែលធ្វើសកម្មភាពលឿន អ្នកដែលផ្តល់សេវាលឿ គឺជាអ្នកដែលយកបេះដូងអតិថិជនបាន។

ទី5. សកម្មបំផុត និងរហ័សរហួនបំផុត

ក្បាច់នេះអ្នករកស៊ី /អ្នកលក់ត្រូវតែដឹកនាំធ្វើសកម្មភាព ឲ្យបានសកម្មបំផុត កំអោយធ្លាក់ដៃអោយសោះ។ ត្រូវរៀបចំរបៀបរបបការលក់អោយបានល្អបំផុត ដើម្បីក្រុមការងារអាចរក្សាការអនុវត្តបានលឿន និងមានប្រសិទ្ធភាពបំផុត។ ត្រូវរៀបចំរបៀបតបស្នង និងលើកទឹកចិត្តក្រុមការងារ និងដៃគូទាំងអស់ ដើម្បីរក្សាលទ្ធផលអោយបាននៅតែល្អ។ ត្រូវបង្កើតស្តង់ដានៃកាបញ្ជូលទំនិញនីមួយៗ អោយច្បាស់ និងដឹកនាំអនុវត្តអោយល្អបំផុត។

ទី6. ស្ថិរភាពនៃគុណភាពផលិតផល /សេវាកម្ម និងការផ្តល់ជូនអតិថិជន

ក្បាច់នេះអ្នករកស៊ី/អ្នកលក់ ត្រូវរក្សាគុណភាពផលិតផល/សេវាកម្ម និងសេវាកម្មអតិថិជន អោយនៅគុណភាពដដែល ឬអាចល្អលើសធម្មតា ។ ការកស៊ីមួយចំនួនពេលដែលលក់ដាច់ខ្លាំងពេកទៅ គុណភាពផលិតផល/សេវាកម្ម និងការផ្តល់សេវាកម្មអតិថិជន អាចធ្លាក់ចុះគុណភាព។

ការធ្លាក់ចុះគុណភាព ជាការសំលាប់ខ្លួនឯង។ ត្រូវបង្កើតស្តង់ដារ រូបមន្ត របៀប និងគលការណ៍ប្រតិបត្តិល្អអោយច្បាស់ និងដឹកនាំអនុវត្តអោយល្អបំផុត។

លោកខាត់ បូរ៉ាបានបន្ថែមថា “ជារួមខ្ញុំជឿជាក់ថាបើអ្នករកស៊ី លក្ខណៈគ្រួសារ អ្នករកស៊ីមិនទាន់ស្ងង់ដា និងអ្នកលក់ផលិតផល/សេវាកម្ម អាចអនុវត្តក្បាច់ស6 នេះ អាជីវម្ម ឬការលក់ដូរពិតជាអាចរស់រានបានក្នុងសម័យកូវីដ19 នេះ” ៕