ក្រុមហ៊ុនវិស្វកម្មនិងសំណង់ដ៏ធំមួយនឹងឈានជើងចូលផ្សារមូលបត្រកម្ពុជា

ដោយៈ ម៉ាណេត

ភ្នំពេញៈ អាជ្ញាធរសេវាហិរញ្ញវត្ថុមិនមែនធនាគារ បានសម្រេចអនុម័តសំណើសុំបោះផ្សាយលក់មូលបត្រជាសាធារណៈរបស់ក្រុមហ៊ុន ឌី ប៊ី ឌី អ៊ុនជីនារីង (DBD Engineering) ដែលនឹងក្លាយជាក្រុមហ៊ុនទី១ ចុះបញ្ជីលក់មូលបត្រកម្មសិទ្ធិនៅលើទីផ្សារកំណើននៃផ្សារមូលបត្រកម្ពុជា។ នេះបើយោងតាមសេចក្តីប្រកាសព័ត៌មានរបស់និយ័តករមូលបត្រកម្ពុជា នៅថ្ងៃទី២២ ខែមិថុនា ឆ្នាំ២០២២។

នាព្រឹកថ្ងៃទី២២ ខែមិថុនា ឆ្នាំ២០២១ លោកអូន ព័ន្ធមុនីរ័ត្នឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ.) បានអញ្ជើញដឹកនាំកិច្ចប្រជុំក្រុមប្រឹក្សា អ.ស.ហ. លើកទី ២ លើរបៀបវារៈបន្តចំនួន ១. ពីកិច្ចប្រជុំ លើកទី ១ គឺសំណើសុំបោះផ្សាយលក់មូលបត្រជាសាធារណៈរបស់ក្រុមហ៊ុន ឌី ប៊ី ឌី អ៊ុនជីនារីង ម.ក.។

និយ័តករមូលបត្រកម្ពុជាបានឱ្យដឹងថា ជាលទ្ធផល អង្គប្រជុំបានអនុម័តលើសំណើសុំបោះផ្សាយលក់មូលបត្រជាសាធារណៈរបស់ក្រុមហ៊ុន ឌី ប៊ី ឌី អ៊ុនជីនារីង ម.ក. ដោយ ក្រុមហ៊ុនត្រូវបន្តនីតិវិធីនៃការធ្វើបរិវិសកម្ម និងចុះបញ្ជីនៅលើទីផ្សារកំណើននៃក្រុមហ៊ុនផ្សារមូលបត្រកម្ពុជា ស្របតាមបទប្បញ្ញត្តិជាធរមាន។

ក្រុមហ៊ុននេះ ជាក្រុមហ៊ុនពហុមុខងារផ្នែកវិស្វកម្ម និងសំណង់ ដែលផ្តល់ សេវាកម្ម ដូចជា សេវាគូសប្លង់ សាងសង់ ដំឡើង និងថែទាំ ព្រមទាំងមានផ្គត់ផ្គង់ផលិតផលម៉ាកល្បីៗ ដូចជា Schneider, Franklin France, Daikin, Ginde, LG, Mitsubishi, Kumwell, EVT, Tsurumi Pump, និងខ្សែកាបម៉ាក YAZAKI។

និយ័តករមូលបត្រកម្ពុជា បានឱ្យទៀតថា “ក្រុមហ៊ុន ឌី ប៊ី ឌី អ៊ុនជីនារីង ម.ក. នឹងក្លាយជាក្រុមហ៊ុនទី១ ដែលចុះបញ្ជី លក់មូលបត្រកម្មសិទ្ធិនៅលើទីផ្សារកំណើននៃផ្សារមូលបត្រកម្ពុជា”។

ទីផ្សារកំណើន (Growth Board) គឺជាកន្លែងសម្រាប់ឱ្យអាជីវកម្មធុនតូច-ធុនមធ្យមចុះបញ្ជី លក្ខខណ្ឌក្នុងការចុះបញ្ជីមានតិចជាងទីផ្សារគោល។ ក្រុមហ៊ុនដែលចុះបញ្ជីក្នុងទីកំណើន ភាគច្រើនជាក្រុមហ៊ុនតូចៗ និងមានលំនឹងក្រុមហ៊ុនមធ្យមប៉ុ ន្ដែទទួលបានប្រាក់ចំណេញច្រើន ទន្ទឹមនឹងនោះក៏មានហានិភ័យខ្ពស់ដែរ។

សម្រាប់ភាគលាភ ដែលក្រុមហ៊ុនបង់ទៅឱ្យវិនិយោគិនក៌ច្រើនទៅតាមនឹងដែរ។ ចំពោះវិនិយោគិន ដែលចង់ ទទួលបានភាគលាភច្រើន អាចចូលទៅទីផ្សារកំណើនបានសម្រាប់ធ្វើការវិនិយោគ៕

ដំណឹងល្អៈរដ្ឋាភិបាលបញ្ចប់ការសិក្សាផែនការអភិវឌ្ឍហេដ្ឋារចនាសម្ព័ន្ឋធំៗចំនួន៣

ដោយៈគង់ សូរិយា

ភ្នំពេញៈ រដ្ឋាភិបាលកម្ពុជា ដែលមានក្រសួងសាធារណៈការជាសេនាធិកាបានបញ្ចប់ការសិក្សា លើផែនការមេអភិវឌ្ឍហេដ្ឋារចនាសម្ព័ន្ឋធំៗចំនួន៣រួចហើយ ដែលគំរោងនេះនឹងលើកកំពស់សេដ្ឋកិច្ចសង្គមកម្ពុជា។
ទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានមានប្រសាសន៍ឲ្យដឹងកាលពីម្សិលម៉ិញនេះថា ផែនការមេសម្រាប់គម្រោងធំៗចំនួន៣បានបញ្ចប់ការសិក្សាជាស្ថាពររួមមាន គម្រោងសិក្សាសាងសង់រថភ្លើង Monorail និងរថភ្លើងក្រោមដី(Subway) ព្រមទាំងគម្រោងផែនការមេភស្តុភារកម្ម។

លោកបន្តថា ក្រសួងសាធារណៈការ បានសហការជាមួយទីភ្នាក់ងារ JICA ដើម្បីបង្កើតគម្រោងកំពង់ផែ Port EDI គម្រោងសាងសង់កំពង់ផែសមុទ្រទឹកជ្រៅ១៤,៥ម៉ែត្រ ត្រៀមនឹងបញ្ចប់ឆ្នាំ២០២៥ គម្រោងពង្រីកកំពង់ផែស្វ័យតក្រុងភ្នំពេញ គម្រោងអភិវឌ្ឍន៍កំពង់ផែទេសចរណ៍នៅកំពត បានរៀបចំយុទ្ធសាស្ត្រ សម្រាប់ការដឹកជញ្ជូនតាមផ្លូវដែក បានពិភាក្សាជាមួយភាគីវៀតណាម ដើម្បីតភ្ជាប់ផ្លូវដែកពីហូជីមិញមកបាវិត-ម៉ុកបៃ។

ក្រៅពីនេះ ក្រសួងក៏បានបញ្ចប់គម្រោងសិក្សាសាងសង់រថភ្លើង Monorail និងរថភ្លើងក្រោមដី (Subway) ដើម្បីកាត់បន្ថយការកកស្ទះចរាចរណ៍ ក្នុងរាជធានីភ្នំពេញ បានបញ្ចប់ផែនការមេភស្តុភារកម្ម ដើម្បីទាក់ទាញវិនិយោគិន និងដើម្បីប្រែក្លាយកម្ពុជាជាកន្លែងស្តុក ទំនិញឆ្លងកាត់ និងជាតំបន់ចែកចាយទំនិញនៅក្នុងតំបន់ បានចុះកិច្ចព្រមព្រៀងជាមួយក្រុមហ៊ុនYCH របស់ប្រទេសសឹង្ហបុរី ដើម្បីបង្កើតមជ្ឈមណ្ឌលភស្តុភារកម្មភ្នំពេញ និងបានបង្កើតផែនការមេសម្រាប់គ្រប់គ្រងទឹកកខ្វក់ ដើម្បីធ្វើឱ្យប្រសើរឡើងសុខមាលភាពសាធារណៈផងដែរ។

គម្រោងអភិវឌ្ឍន៍ហេដ្ឋារចនាសម្ព័ន្ធ ដែលសម្រេចបាន និងកំពុងអនុវត្តន៍បន្ត និងគម្រោងនាពេលអនាគត ទាក់ទងនឹងការសាងសង់ពង្រីក និងលើកកម្ពស់គុណភាពផ្លូវពីផ្លូវពីរស្រទាប់ស្តើង (DBST) ទៅជាផ្លូវបេតុងកៅស៊ូផ្លូវ(AC) ស្របតាមបរិបទនៃការរីកចម្រើនសេដ្ឋកិច្ចជាតិ ក្នុងនោះរួមមាន គម្រោងសាងសង់ ពង្រីក និងលើកកម្ពស់គុណភាពផ្លូវជាតិលេខ១ ផ្លូវជាតិលេខ២ ផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៥ និងបណ្តាញផ្លូវជាតិជាច្រើនទៀត។

ជាមួយគ្នានេះក្រសួងកំពុងសិក្សា លើគម្រោងសាងសង់ ពង្រីក និងលើកកម្ពស់គុណភាពបណ្តាញផ្លូវ ដោយលោកស៊ុន ចាន់ថុលបានលើកឡើងអំពីគម្រោងស្នើសុំបង្កើតគណៈកម្មការគ្រប់គ្រងដីចំណីផ្លូវ គម្រោងសាងសង់ស្ពានក្រចេះ ការទិញបានគ្រឿងចក្រត្រួតពិនិត្យគុណភាពស្ពាន ការងារសុវត្ថិភាពចរាចរណ៍ បានបង្កើតមណ្ឌលសេវា សាធារណៈដើម្បីបង្ខិតសេវាទៅកៀកនឹងប្រជាពលរដ្ឋ ការចេញបណ្ណបើកបរអន្តរជាតិសម្រាប់៩៩ប្រទេស។

លោកបន្តថា យើងបានធ្វើការជាមួយក្រសួងសង្គមកិច្ច ចេញបណ្ណបើកបរជូនជនពិការ តភ្ជាប់ប្រព័ន្ធជាមួយអគ្គនាយកដ្ឋានគយ និងពន្ធដារដើម្បីត្រួតពិនិត្យការក្លែងបន្លំពន្ធនិងងាយស្រួលក្នុងការប្តូរកម្មសិទ្ធិយានយន្ត បានដាក់ឱ្យដំណើរការសាលាបង្រៀនបើកបរធ្ងន់ធ្ងរ បានដាក់ឱ្យដំណើរការប្រព័ន្ធលក់លេខពិសេស និងលេខពិសេស ផ្ទាល់ខ្លួនបានចំនួន៥៧០០ផ្លាក ដែលមានQR Code ទទួលបានថវិកា៤៦ពាន់លានរៀលចូលថវិកាជាតិ ការប្រើប្រាស់បច្ចេកវិទ្យាទំនើប ដើម្បីរឹតបន្តឹងនិងទប់ស្កាត់ការដឹកជញ្ជូនលើសទម្ងន់កម្រិតកំណត់ គម្រោងដាក់ឱ្យដំណើរការកម្មវិធីកាត់បន្ទុកបណ្ណបើកបរ តាមរយៈទូរសព្ទដៃជាដើម៕

លោកស៊ុន ចាន់ថុលៈស្នើភាគីចិនជួយបណ្តុះបណ្តាលធនធានមនុស្សលើជំនាញ សាងសង់ហេដ្ឋារចនាសម្ព័ន្ឋធំៗ

ដោយៈគង់ សូរិយា

ភ្នំពេញៈ លោកទេសរដ្ឋមន្រ្តីស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានស្នើ់សុំភាគីចិន ជួយផ្តល់សាស្រ្តាចារ្យ និងអ្នកបច្ចេកទេសដើម្បីជួយបណ្តុះបណ្តាលធនធានមនុស្សនៅកម្ពុជា លើការសាងសង់កំពង់ផែ ផ្លូវរថភ្លើងលើនិងក្រោមដី សាងសង់ស្ពានធំៗជាដើម។

ក្នុងកិច្ចប្រជុំតាមរយៈប្រព័ន្ឋZoom ជាមួយលោក Li Xiaopeng រដ្ឋមន្ត្រីដឹកជញ្ជូន នៃសាធារណរដ្ឋប្រជាមានិតចិននាព្រឹកថ្ងៃទី២២ មិថុនានេះ ដោយអង្គប្រជុំបានពិភាក្សាលើការចូលរួមសន្និសីទស្តីពី ការដឹកជញ្ជូនប្រកបដោយចីរភាពជាសាកល នៃអង្គការសហប្រជាជាតិលើកទីពីរ ដែលគ្រោងនឹងប្រព្រឹត្តទៅនៅថ្ងៃទី១៤-១៦ ខែតុលា ឆ្នាំ២០២១ នៅទីក្រុងប៉េកាំង ប្រទេសចិន ការកសាងសមត្ថភាព នៃវិទ្យាស្ថានតេជោ សែន សាធារណការ និងដឹកជញ្ជូន និងការចូលរួមកិច្ចប្រជុំថ្នាក់រដ្ឋមន្ត្រី ដឹកជញ្ជូនអាស៊ាន(ATM) ដែលកម្ពុជាធ្វើជាម្ចាស់ផ្ទះ ដែលនឹងប្រព្រឹត្តទៅដោយផ្ទាល់នៅថ្ងៃទី១១-១២ ខែវិច្ឆិកា ឆ្នាំ២០២១ នៅខេត្តសៀមរាប ប្រទេសកម្ពុជា។

លោកស៊ុន ចាន់ថុល បានជម្រាបជូនអំពីវឌ្ឍនភាពនៃគម្រោងសាង សង់ផ្លូវល្បឿនលឿនភ្នំពេញ ក្រុងព្រះសីហនុ ប្រវែង១៩០គីឡូម៉ែត្រ សម្រេចបាន៥៥,០៥% គិតត្រឹមថ្ងៃ ទី១១ ខែមិថុនា ឆ្នាំ២០២១ និងគ្រោងបញ្ចប់នៅខែកញ្ញា ឆ្នាំ២០២២ មុនការគ្រោងទុករយៈពេល៦ខែ ការសម្ពោធដាក់ឱ្យដំណើរការទីស្តីការក្រសួងសាធារណការ និងដឹកជញ្ជូន និងវិទ្យាស្ថានតេជោសែន សាធារណការ និង ដឹកជញ្ជូន ដែលជាមជ្ឍមណ្ឌលបណ្តុះបណ្តាលវិស្វករកម្ពុជា លើមុខជំនាញបច្ចេកទេសឱ្យចេះសាងសង់ផ្លូវ ស្ពានប្រកបដោយគុណភាពរឹងមាំ។

លោកបានជម្រាបផងដែរអំពីការត្រៀមរៀបចំកិច្ចប្រជុំ ថ្នាក់រដ្ឋមន្ត្រីដឹកជញ្ជូនអាស៊ាន (ATM) ដែលកម្ពុជាធ្វើម្ចាស់ផ្ទះនៅថ្ងៃទី១១-១២ ខែវិច្ឆិកា ឆ្នាំ២០២១ និងបានបន្ថែមថា លោកទេសរដ្ឋមន្ត្រីចង់ឃើញការរៀបចំកិច្ចប្រជុំនេះ ដោយផ្ទាល់នៅខេត្តសៀមរាប ហើយគណៈប្រតិភូ ដែលត្រូវចូល រួមទាំងអស់ តម្រូវឱ្យទទួលការចាក់វ៉ាក់សាំង ដើម្បីបង្ការជំងឺកូវីដ-១៩។

តបតាមការអញ្ជើញពីមិត្តចិន លោកទេសរដ្ឋមន្ត្រី បានយល់ព្រមចូលរួមសន្និសីទស្តីពីការដឹកជញ្ជូន ប្រកបដោយចីរភាពសាកល នៃអង្គការសហប្រជាជាតិលើកទីពីរ ដែលនឹងប្រព្រឹត្តទៅនៅទីក្រុងប៉េកាំង ប្រទេសចិន នៅថ្ងៃទី១៤-១៦ ខែតុលា ឆ្នាំ២០២១ ហើយឯកឧត្តមទេសរដ្ឋមន្ត្រី ក៏បានអញ្ជើញឯកឧត្តម Li Xiaopeng ឱ្យចូលរួមកិច្ចប្រជុំថ្នាក់រដ្ឋមន្ត្រីដឹកជញ្ជូនអាស៊ាន(ATM)ផងដែរ ដើម្បីយកឱកាសនេះមក ទស្សនកិច្ចគម្រោងសាងសង់ផ្លូវល្បឿនលឿនកម្ពុជា ហើយជាការឆ្លើយតបភាគីចិន បានយល់ព្រមតាមការអញ្ជើញនេះ៕

តើស្តង់ដាអាគារពាណិជ្ជកម្ម និងលំនៅដ្ឋានគួរមានលក្ខណៈដូចម្តេចដើម្បីជំរុញការអភិវឌ្ឍដោយចីរភាព

ដោយៈវឌ្ឈនៈ

ភ្នំពេញៈ ការសាងសង់អគារមិនថា តែអគារលំនៅដ្ឋាន ឬអគារពាណិជ្ជកម្មនៅកម្ពុជាមានភាពរីកចម្រើនគួរឱ្យកត់សម្គាល់ នៅក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែស្តង់ដាអាគារបៃតង ដែលគិតគូដល់បរិស្ថានហាក់នៅមានកម្រិត។

អ្នកជំនាញនៃវិស័យអចលនទ្រព្យបានលើកឡើងថា ការសាងសង់អគារនៅពេលបច្ចុប្បន្ន គួរផ្ដោតលើស្តង់ដារអន្តរជាតិ ទើបមានទីផ្សារនិងតម្រូវការខ្ពស់ ។ តើស្តង់ដារនិងទីផ្សារដូចម្ដេច ដែលអ្នកអភិវឌ្ឍន៍អគារនីមួយៗ ត្រូវផ្ដោតការយកចិត្តទុកដាក់ មុននឹងសាងសង់។
លោកឡោ វិចិត្រ អនុប្រធានសមាគមអចលនទ្រព្យសកល ប្រចាំរាជធានីភ្នំពេញ បានមានប្រសាសន៍ឲ្យដឹងកាលពីម្សិលម៉ិញនេះថា ការសាងសង់អគារមិនថា តែអគារពាណិជ្ជកម្ម ការិយាល័យឬអគារលំនៅឋាននោះទេ គឺត្រូវតែគិតគូពីស្តង់ដារជាតិ និងអន្តរជាតិ។ ការសាងសង់អគារគឺត្រូវគិតមុនថា តើអគារនោះជាអគារលំនៅឋាន ឬអគារការិយាល័យ ឬអាគារពាណិជ្ជកម្មដទៃទៀត។

លោកបន្តថា “បើសិនជាអគារលំនៅឋានបែបខុនដូ គឺត្រូវមានស្តង់ដារបៃតង និងត្រូវមានវេរ៉ង់ដារនៅតាមបន្ទប់នីមួយៗ។ បើសិនជាគ្មានវេរ៉ង់ដាទេ យើងសាកស្រម៉ៃមើលបើសិនជាមានហានិភ័យអ្វីមួយកើតឡើង ដូចជាគ្រោះអគ្គីភ័យជាដើម តើនឹងមានអ្វីកើតឡើងចំពោះអ្នកស្នាក់នៅក្នុងអគារនោះ”។ លោកបន្តថា “សម្រាប់អគារការិយាល័យវិញ ក៏ត្រូវគិតគូច្បាស់លាស់ផងដែរ ដូចជា ពិដានត្រូវតែខ្ពស់ជាងអគារស្នាក់នៅ ហើយបន្ទប់ទឹកនៅជាន់នីមួយៗ នៃអគារការិយាល័យក៏ត្រូវតែច្រើនជាងអគារស្នាក់នៅដែរ”។

លោកឡោ វិចិត្របានបន្ថែមថា សម្រាប់អគារការិយាល័យ ក៏ត្រូវតែគិតគូត្រង់ចំនុចច្រកចេញចូលផងដែរថា តើអនុលោមទៅតាមស្តង់ដារដែរឬទេ។ អ្វីដែលត្រូវយកចិត្តទុកដាក់បំផុតនោះគឺកន្លែងសាធារណៈ( Public Area )ថា តើស្របតាមស្តង់ដារជាតិនិងអន្តរជាតិដែរទេ ពីព្រោះម្ចាស់ក្រុមហ៊ុនខ្មែរជាច្រើន នៅមិនទាន់ពេញនិយមក្នុងការទិញឬជួលការិយាល័យអគារខ្ពស់ៗទេ។ ភាគច្រើនអគារិយាល័យបែបនេះ គឺមានតម្រូវការជួលពីសំណាក់ក្រុមហ៊ុនអន្តរជាតិ។

លោកបន្តថា “ដូច្នេះបើសិនជាអគារនោះ មិនមានស្ដង់ដារអន្តរជាតិទេ នឹងគ្មានអ្នកជួលឬអ្នកទិញឡើយ។ សរុបសេចក្តីទៅអគារនីមួយៗ ត្រូវមានលក្ខណៈខុសៗគ្នាស្របទៅតាមស្តង់ដារនីមួយៗទើបទទួលបានជោគជ័យ”។

លោកសំ សុខនឿនអ្នកជំនាញវិស័យអចលនទ្រព្យ ក៏បានលើកឡើងផងដែរថា ការអភិវឌ្ឍអគារនីមួយៗមិនថាអគារស្នាក់នៅ អគារការិយាល័យ អ្វីដែលត្រូវគិតគូរផងដែរនោះ គឺចំណតយានយន្តគ្រប់គ្រាន់ ទើបមិនធ្វើឱ្យអ្នកទទួលសេវាពីអគារនោះ មិនធុញទ្រាន់ នឹងការស្វែងរកកន្លែងចតយានយន្តរបស់ខ្លួន ឬត្រូវចតតាមផ្លូវជាដើម។
លោកបន្តថា “អ្វីដែលអ្នកអភិវឌ្ឍន៍អគារត្រូវគិត

គូរផងដែរនោះ គឺការសម្លឹងមើលពីទីផ្សារ និងតម្រូវការរបស់អតិថិជននៅពេលបច្ចុប្បន្ននេះ តើអតិថិជនប្រភេទណាដែលកំពុងមានតម្រូវការខ្ពស់ទៅលើការប្រើប្រាស់អគារ”៕

រដ្ឋាភិបាលចិនចាប់សាកល្បងឱ្យក្រុមហ៊ុនអចលនទ្រព្យចូលផ្សារហ៊ុនដើម្បីកាត់បន្ថយបន្ទុកហិរញ្ញវត្ថុរដ្ឋ

ដោយៈ គៀតឈូ

សៀងហៃៈ គម្រោងសាកល្បងរបស់ប្រទេសចិន ក្នុងការប្រើទីផ្សារភាគហ៊ុនដ៏ធំមហិមារបស់ខ្លួន ដើម្បីជួយផ្តល់មូលនិធិដល់ការអភិវឌ្ឍហេដ្ឋារចនាសម្ព័ន្ធ និងបន្ធូរបន្ថយបន្ទុកបំណុលដល់រដ្ឋាភិបាលក្នុងតំបន់ កំពុងមានការចាប់ផ្តើមល្អ។ នេះបើយោងតាមការចេញរបស់សារព័ត៌មាន The Edge Market នៅថ្ងៃទី២២ ខែមិថុនា ឆ្នាំ២០២១។

ក្រុមហ៊ុនវិនិយោគលើវិស័យអចលនទ្រព្យចំនួនប្រាំបួន (REITs) ដែលគាំទ្រដោយវិស័យហេដ្ឋារចនាសម្ព័ន្ធបានចាប់ផ្តើមប្រតិបត្តិការដំបូង នៅក្នុងទីផ្សារភាគហ៊ុនធំលំដាប់ទី២ នៅលើពិភពលោកកាលពីថ្ងៃចន្ទ។ ភាគហ៊ុន ដែលបានទិញលក់ជាសាធារណៈ បានកើនឡើងនៅទូទាំងផ្សារហ៊ុន ដោយកើនឡើងជិត១៥ភាគរយក្នុងមួយក្រុមហ៊ុន REIT ដែលផ្តោតលើការវិនិយោគសួនឧស្សាហកម្មមួយនៅភាគខាងត្បូងនៃទីក្រុង Shenzhen។

ក្រុមហ៊ុនវិនិយោគលើឃ្លាំងកំពង់ផែក្នុងខេត្តក្វាងទុង និងផ្លូវហាយវេក្នុងខេត្តស៊ីជាំង (Zhejiang) បានកើនឡើងចន្លោះពី០,៧ភាគរយទៅ១០ភាគរយ ខណៈសន្ទស្សន៍ហ៊ុនCSI 300 បានបញ្ចប់ការជួញដូរភាគហ៊ុន ដោយបានធ្លាក់ចុះ០,២ភាគរយ ពីកាលពីម្សិលមិញ។

ការចុះបញ្ជីរបស់ក្រុមហ៊ុនថ្មី បង្ហាញពីការចាប់ផ្តើមនៃការពិសោធន៍មួយ ដែលនឹងជំរុញឱ្យទីក្រុងប៉េកាំងអាចទាញយកផលចំណេញពីវិស័យឯកជន និងថវិកាគ្រួសារ ដើម្បីជួយដល់ការស្តារសេដ្ឋកិច្ចឡើងវិញ ដោយមិនចាំបាច់បន្ថែមលើគំនរបំណុលរបស់ប្រទេសនេះ។ ប្រសិនបើទទួលបានជោគជ័យ កម្មវិធីដែលបានពង្រីកនេះ នឹងអាចជួយកាត់បន្ថយភាពតានតឹងផ្នែកសារពើពន្ធដ៏ធំ ដែលប្រឈមមុខ ដោយរដ្ឋាភិបាលក្នុងតំបន់របស់ប្រទេសចិន ដែលជាបន្ទុកបង្កការគំរាមកំហែងរយៈពេលវែងដល់ស្ថេរភាពហិរញ្ញវត្ថុរបស់ប្រទេស។

លោក Fu Lichun សហស្ថាបនិកនៃក្រុមហ៊ុនគ្រប់គ្រងវិនិយោគ Shenzhen Yuntai បានមានប្រសាសន៍ថា “វាពិតជាជួយបន្ធូរសម្ពាធខ្លះៗពីរដ្ឋាភិបាលក្នុងតំបន់ ព្រោះការធានានូវការអភិវឌ្ឍន៍ហេដ្ឋារចនាសម្ព័ន្ធដ៏ធំធេងរបស់ចិននឹងជួយធ្វើឱ្យប្រសើរឡើងនូវតារាងតុល្យភាពហិរញ្ញវត្ថុ។ ការគាំទ្រ ដែលក្រុមហ៊ុនREIT ទទួលបានពីវិនិយោគិន បង្ហាញថា មានសក្តានុពលច្រើនសម្រាប់ផលិតផលបែបនេះ។

ក្រុមហ៊ុន REITs ដែលត្រូវបានយកគំរូតាមមូលនិធិសង្គហធន ជួយឱ្យវិនិយោគិនម្នាក់ៗ ទទួលបានការវិនិយោគទំហំធំ ដោយជាធម្មតាគម្រោងអចលនទ្រព្យ រួមទាំងផ្សារទំនើប និងការិយាល័យ។ ក្រៅពីការលក់បំណុល រដ្ឋាភិបាលមូលដ្ឋានជាច្រើន បានលក់ដីដើម្បីប្រមូលទុនសម្រាប់សាងសង់ផ្លូវថ្នល់ ស្ពាន និងផ្លូវទឹក៕

រដ្ឋសភាកម្ពុជាអនុម័តលើការទូទាត់ឱ្យគម្រោងបញ្ជូនអគ្គិសនី១០០០គីឡូវ៉ុលនិងថាមពេលវារីអគ្គិសនី១៥០មេហ្កាវ៉ាត់របស់ក្រុមហ៊ុនចំនួន៤

ដោយៈ ប៊ី

ភ្នំពេញៈ គណៈកម្មាធិការអិចន្រ្តៃយ៍រដ្ឋសភា នៅព្រឹកថ្ងៃទី២២ ខែមិថុនា ឆ្នាំ២០២១ ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុនអគ្គិសនីចំនួន៤ សម្រាប់គម្រោងបញ្ជូនអគ្គិសនី១០០០គីឡូវ៉ុល និងថាមពេលវារីអគ្គិសនី១៥០មេហ្កាវ៉ាត់។

ការអនុម័តយល់ព្រមលើការធានាទូទាត់នេះត្រូវបានធ្វើឡើង ក្នុងកិច្ចប្រជុំគណៈកម្មាធិការអិចន្រ្តៃយ៍រដ្ឋសភា តាមប្រព័ន្ធវីដេអូ ដែលដឹកនាំដោយសម្តេចអគ្គមហាពញាចក្រីហេង សំរិនប្រធានរដ្ឋសភា នៅព្រឹកថ្ងៃទី២២ ខែមិថុនា ឆ្នាំ២០២១នេះ។

សេចក្តីព្រាងច្បាប់ដែលនឹងលើកយកមកពិភាក្សា និងអនុម័តនៅក្នុងសម័យប្រជុំរដ្ឋសភា លើកទី៦ នីតិកាលទី៦ នោះរួមមាន សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ស្មេថេក ខូ អិលធីឌី សម្រាប់គម្រោងអភិវឌ្ឍខ្សែបណ្តាញបញ្ជូនអគ្គិសនី តង់ស្យុង៥០០គីឡូវ៉ុល ពីខេត្តបាត់ដំបង ទៅកាន់ព្រំដែនកម្ពុជា-ថៃ។

សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ស្មេថេក ខូ អិលធីឌី សម្រាប់គម្រោងអភិវឌ្ឍខ្សែបណ្តាញបញ្ជូនអគ្គិសនី តង់ស្យុង៥០០គីឡូវ៉ុល ពីរាជធានីភ្នំពេញ ទៅកាន់ព្រំដែនកម្ពុជា-ឡាវ។

សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន អគ្គិសនីវៀតណាមនៃសាធារណរដ្ឋសង្គមនិយមវៀតណាម សម្រាប់ធានាលើការទិញថាមពលអគ្គិសនីពីប្រទេសវៀតណាម។

សេចក្តីព្រាងច្បាប់ស្តីពី ការអនុម័តយល់ព្រមលើការធានាទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ឆាយណា ណេសិនណល ហេវី ម៉ាស៊ីនណឺរី ខបភើរេសិន សម្រាប់គម្រោងអភិវឌ្ឍវារីអគ្គិសនីស្ទឹងតាតៃលើ អានុភាព១៥០មេហ្កាវ៉ាត់ ខេត្តកោះកុង៕

ADB: គម្រោងថាមពលសូឡា១០០មេហ្គាវ៉ាត់នៅកំពង់ឆ្នាំងនឹងចូលរួមលើកកម្ពស់វិស័យថាមពលនៅកម្ពុជា

ដោយៈ ប៊ី

ភ្នំពេញៈ គម្រោងឧទ្យានថាមពលព្រះអាទិត្យ (សូឡា) ជាតិរបស់ប្រទេសកម្ពុជា ដែលជាគម្រោងថាមពល១០០មេហ្គាវ៉ាត់ ហើយនឹងមានទំហំធំជាងគេបំផុតនៅក្នុងប្រទេសកម្ពុជា ត្រូវបានរំពឹងថានឹងបញ្ចប់នៅដើមឆ្នាំ២០២២។

គម្រោងនេះអាចនឹងធ្វើឱ្យមានការផ្លាស់ប្តូរដ៏ធំមួយនៅក្នុងការផ្គត់ផ្គង់ថាមពលរបស់កម្ពុជា។ នេះបើយោងតាមរបាយការណ៍ដែលចេញផ្សាយដោយធនាគារអភិវឌ្ឍន៍អាស៊ី (ADB) ដែលជាអង្គការអភិវឌ្ឍន៍ដែលបានជួយដឹកនាំគម្រោងនេះ។

នៅក្នុងរបាយការណ៍ “ហិរញ្ញប្បទានថាមពលស្អាតក្នុងការអភិវឌ្ឍអាស៊ី” របស់ខ្លួនធនាគារអភិវឌ្ឍន៍អាស៊ីបានគូសបញ្ជាក់ពីរបៀបដែលកិច្ចខិតខំប្រឹងប្រែងសហប្រតិបត្តិការរបស់ខ្លួនជាមួយរដ្ឋាភិបាល និងវិស័យឯកជន អាចផ្តល់ប្លង់មេរួមសម្រាប់គម្រោងនាពេលអនាគតនៅក្នុងប្រទេសកម្ពុជា និងនៅលើពិភពលោក។

ADB បានមានប្រសាសន៍ថា “ឧទ្យានថាមពលព្រះអាទិត្យកម្ពុជាគឺជារបកគំឃើញដ៏សំខាន់មួយសម្រាប់ប្រទេស និងដើរតួជាគំរូសម្រាប់ការបង្កើតថ្មី នៅក្នុងវិស័យថាមពលនៅក្នុងប្រទេសកំពុងអភិវឌ្ឍន៍ និងវិស័យហេដ្ឋារចនាសម្ព័ន្ធ”។

ហិរញ្ញប្បទានឥណទានរបស់ធនាគារអភិវឌ្ឍន៍អាស៊ីផ្តល់ហិរញ្ញប្បទានដល់ការសាងសង់ឧទ្យាននេះ និងកំណត់ហានិភ័យវិនិយោគឯកជននៅក្នុងគម្រោងនេះ។ គម្រោងនេះគឺស្ថិតនៅក្នុងខេត្តកំពង់ឆ្នាំង។ ដោយមានជំនួយពីការិយាល័យភាពជាដៃគូសាធារណៈ និងឯកជនរបស់ធនាគារអភិវឌ្ឍន៍អាស៊ី របស់អគ្គិសនីកម្ពុជា បានអនុវត្តដំណើរការដេញថ្លៃ ដើម្បីទាក់ទាញមូលនិធិវិនិយោគិនឯកជន សម្រាប់រោងចក្រថាមពល៦០មេហ្គាវ៉ាត់ដំបូងនៅក្នុងឧទ្យាននេះកាលពីដើមឆ្នាំនេះ។

តាមរយៈដំណើរការនេះ ធនាគារអភិវឌ្ឍន៍អាស៊ីបានពិគ្រោះយោបល់ជាមួយអ្នកពាក់ព័ន្ធទាំងអស់ នៅក្នុងឧទ្យាននេះ រួមទាំងរដ្ឋាភិបាលផងដែរ អំពីប្រជាជនដែលរងផលប៉ះពាល់ រស់នៅជុំវិញតំបន់ឧទ្យាននេះ និងក្រុមហ៊ុនឯកជន ដែលចាប់អារម្មណ៍ក្នុងការដេញថ្លៃគម្រោងនេះ។

ធនាគារអភិវឌ្ឍន៍អាស៊ីបានឱ្យដឹងថា “វិធីសាស្រ្ត ដែលមានការចូលរួមខ្លាំងក្លាពីអ្នកពាក់ព័ន្ធ បានកាត់បន្ថយ ជម្លោះជាមួយប្រជាជនដែលរងផលប៉ះពាល់ និងអ្នកពាក់ព័ន្ធដទៃទៀត។ ការតាំងទីលំនៅថ្មីដោយមិនស្ម័គ្រចិត្ត និងការយកចិត្តទុកដាក់ល ជនជាតិដើមភាគតិចត្រូវបានធ្វើឡើង ហើយការការពារសុវត្ថិភាព និងឧបករណ៍ពាក់ព័ន្ធត្រូវបានរៀបចំឡើង”៕

រដ្ឋាភិបាលជំរុញការកែសម្រួលសេចក្តីព្រាង “ក្រមសីលធម៌វិស្វករ” ដើម្បីលើកម្ពស់ប្រសិទ្ធភាព

ដោយៈ ប៊ី

ភ្នំពេញៈ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានជំរុញអគ្គលេខា​ធិការគណ:វិស្វករកម្ពុជា បន្តពិនិត្យកែសម្រួលសេចក្តីព្រាងស្តីពី ក្រមសីលធម៌វិស្វករឱ្យមានភាពគ្រប់ជ្រុងជ្រោយ ដើម្បីលើកម្ពស់ការប្រកបវិជ្ជាជីវៈវិស្វកម្ម គុណភាព និងប្រសិទ្ធភាពនៃការប្រតិបត្តិរបស់វិស្វករ ព្រមទាំងការពារផលប្រយោជន៍សាធារណៈ។

លោកបណ្ឌិតអ៊ិត សំហេងរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាគណៈវិស្វករកម្ពុជា ក្នុងកិច្ចប្រជុំកិច្ចប្រជុំតាម រយៈប្រព័ន្ធ Zoom នៅព្រឹកថ្ងៃទី២១ ខែមិថុនា ឆ្នាំ ២០២១ បានណែនាំឱ្យអគ្គលេខាធិការគណ:វិស្វករកម្ពុជា បន្តពិនិត្យកែសម្រួលសេចក្តីព្រាងនេះ ជាមួយក្រុមអ្នកច្បាប់របស់ក្រសួង មុននឹងដាក់ឆ្លងការ ពិនិត្យសម្រេចម្តងទៀត មុននឹងស្នើសុំការសម្រេចចុះហត្ថលេខា ពីសម្តេចតេជោហ៊ុនសែននាយករដ្ឋមន្រ្តីនៃព្រះរាជាណាចក្រកម្ពុជា។

លោកមានប្រសាសន៍ថា “ការពិនិត្យផ្តល់មតិយោបល់ និងធាតុចូលបន្ថែមលើសេចក្តីព្រាងអនុក្រឹត្យស្តីពី ក្រមសីលធម៌វិស្វករនេះ ដើម្បីឱ្យសេចក្តីព្រាងអនុក្រឹត្យនេះ កាន់​តែ​ស្របតាមលិខិតបទដ្ឋានគតិយុត្ត និងកំណត់ច្បាស់លាស់ អំពីក្រមសីលធម៌វិជ្ជាជីវៈសម្រាប់វិស្វករនៅកម្ពុជា ដើម្បីដាក់ជូនប្រមុខរាជរដ្ឋាភិបាលចុះហត្ថលេខា នាពេលខាងមុខ”។

លោកបានបញ្ជាក់ថា ការបង្កើតសេចក្តីព្រាងនេះ គឺសំដៅលើកកម្ពស់សីលធម៌របស់វិស្វករ សេចក្តីថ្លៃថ្នូរ និងភាពសុចរិតក្នុងការប្រកបវិជ្ជាជីវៈវិស្វកម្ម គុណភាព និងប្រសិទ្ធភាពនៃការប្រតិបត្តិរបស់វិស្វករ ព្រមទាំងការពារផលប្រយោជន៍សាធារណៈ៕

តើក្រុមហ៊ុនអភិវឌ្ឍន៍អចលនទ្រព្យធំជាងគេក្នុងពិភពលោកប្រចាំឆ្នាំ២០២១ មានលុយច្រើនកម្រិតណា?

ដោយៈសុខុម

អន្តរជាតិៈ ជាទូទៅ ក្រុមហ៊ុនអភិវឌ្ឍន៍អចលនទ្រព្យ លំដាប់អន្តរជាតិខ្នាតយក្សនីមួយៗ មានលុយមិនតិចពាន់លានដុល្លារឡើយ ហើយទាំងអស់គ្នាប្រាកដជាចង់ដឹងណាស់ថា តើក្រុមហ៊ុនអភិវឌ្ឍន៍អចលនទ្រព្យមួយណាធំជាងគេបំផុត ក្នុងពិភពលោកប្រចាំឆ្នាំ២០២១។

តើក្រុមហ៊ុននោះមានឈ្មោះអ្វី ស្ថិតនៅក្នុងប្រទេសណា មានលុយច្រើនកម្រិតណា និងមានប្រវត្តិដូចម្ដេច។ អញ្ចឹង មកស្វែងយល់ទាំងអស់គ្នា។

យោងតាមទស្សនាវដ្ដី Forbes បានឱ្យដឹងថា ក្រុមហ៊ុនBrookfield Asset Management គឺជាក្រុមហ៊ុនអភិវឌ្ឍន៍អចលនទ្រព្យធំជាងគេបំផុត ក្នុងពិភពលោកប្រចាំឆ្នាំ២០២១ ក្រោយរក្សាតំណែងកំពូលនេះ អស់រយៈពេល៤ឆ្នាំជាប់ៗគ្នាគួរឱ្យស្ញប់ស្ញែង។

ក្រៅពីអភិវឌ្ឍន៍អគារការិយាល័យ លំនៅដ្ឋាន និងកន្លែងជួលបើកអាជីវកម្ម ក្រុមហ៊ុនយក្សរបស់ប្រទេសកាណាដាមួយនេះ ក៏វិនិយោគលើវិស័យថាមពលកកើតឡើងវិញ និងហេដ្ឋារចនាសម្ព័ន្ធផងដែរ។

យោងតាមទស្សនាវដ្ដី Forbes ឱ្យដឹងថា គិតមកទល់នឹងឆ្នាំ២០២១ ក្រុមហ៊ុននេះមានទ្រព្យសម្បត្តិសរុប រហូតដល់ទៅ៦០២ពាន់លានដុល្លារអាមេរិកឯណោះ។

*ប្រវត្តិក្រុមហ៊ុន
ក្រុមហ៊ុននេះ ត្រូវបានបង្កើតឡើងដោយលោក William Mackenzie និងលោក Frederick Stark Pearson ក្នុងឆ្នាំ១៨៩៩ ពោលគឺកាលពី១២២ឆ្នាំមុន ដោយដាក់ឈ្មោះថា São Paulo Tramway, Light and Power Company។ ពេលនោះក្រុមហ៊ុននេះជាក្រុមហ៊ុនសាងសង់ និងគ្រប់គ្រងគម្រោងអគ្គិសនី ព្រមទាំងហេដ្ឋារចនាសម្ព័ន្ធដឹកជញ្ជូនក្នុងប្រទេសប្រេស៊ីល។

នៅឆ្នាំ១៩០៤ (១១៧ឆ្នាំមុន) ក្រុមហ៊ុន Rio de Janeiro Tramway, Light and Power Company ត្រូវបានបង្កើតឡើងដោយក្រុមហ៊ុន Mackenzie’s Group។

ក្នុងឆ្នាំ១៩១២ (១០៩ឆ្នាំមុន) ក្រុមហ៊ុន Brazilian Traction, Light and Power Company ត្រូវបានចុះបញ្ជីនៅក្រុងតូរ៉ុនតូ (Toronto) ប្រទេសកាណាដា ជាក្រុមហ៊ុនសាធារណៈ ដើម្បីទទួលអភិវឌ្ឍគម្រោងវារីអគ្គិសនី និងសេវាទឹកភ្លើងផ្សេងទៀត នៅក្នុងប្រទេសប្រេស៊ីល ដោយក្លាយជាក្រុមហ៊ុនមេនៃក្រុមហ៊ុនបុត្រសម្ព័ន្ធ São Paulo Tramway Co និងក្រុមហ៊ុន Rio de Janeiro Tramway Co។

ក្នុងឆ្នាំ១៩១៦ (១០៥ឆ្នាំមុន) ក្រុមហ៊ុន Great Lakes Power Company ត្រូវបានចុះបញ្ជី ដើម្បីទទួលអភិវឌ្ឍគម្រោងវារីអគ្គិសនីនៅក្រុង Sault Ste. Marie និងសង្កាត់ Algoma District នៃខេត្ត Ontario ប្រទេសកាណាដា។

ក្នុងឆ្នាំ១៩៦៦ (៥៥ឆ្នាំមុន) ក្រុមហ៊ុន Brazilian Traction, Light and Power Company បានប្ដូរឈ្មោះរបស់ខ្លួនមកជា Brazilian Light and Power Company ហើយជាថ្មីម្ដងទៀតក្នុងឆ្នាំ១៩៦៩ (៥២ឆ្នាំមុន) បានប្ដូរឈ្មោះរបស់ខ្លួនមកជា Brascan Limited។ Brascan គឺជាពាក្យបង្រួមមពីពាក្យថា “Brasil” (ប្រេស៊ីល) “Canada” (កាណាដា)។

ក្នុងឆ្នាំ១៩៧៩ (៤២ឆ្នាំមុន) ទ្រព្យសកម្មនៅប្រេស៊ីល របស់ក្រុមហ៊ុននេះត្រូវបានផ្ទេរកម្មសិទ្ធិឱ្យទៅក្រុមហ៊ុន Eletropaulo and Light S.A. ហើយក្រុមហ៊ុននេះបានចូលប្រឡូកក្នុងវិស័យផ្សេងៗទៀត។

ក្រុមហ៊ុននេះបានផ្ដល់សេវាអគ្គិសនី និងរថភ្លើងនៅក្រុង São Paulo និងក្រុង Rio de Janeiro ប្រទេសប្រេស៊ីល ហើយខាងភាគីប្រេស៊ីល ក្រោយរៀបចំរចនាសម្ព័ន្ធថ្មីនៅតែធ្វើប្រតិបត្តិការជាក្រុមហ៊ុន Light S.A. ដែលជាពាក្យកាត់នៃពាក្យ Brazilian Traction, Light and Power Co. Ltd។

រយៈពេល៣៧ឆ្នាំក្រោយមក ពោលគឺក្នុងឆ្នាំ២០០៥ ក្រុមហ៊ុន Brascan Corp ត្រូវបានប្ដូរឈ្មោះមក Brookfield Asset Management Inc។

នៅឆ្នាំ២០១៨ ក្រុមហ៊ុនបុត្រសម្ព័ន្ធសាធារណៈធំៗរបស់ក្រុមហ៊ុន Brookfield Asset Management Inc រួមមានក្រុមហ៊ុន Brookfield Infrastructure Partners ក្រុមហ៊ុន Brookfield Renewable Partners ក្រុមហ៊ុន Brookfield Property Partners និងក្រុមហ៊ុន Brookfield Business Partners។

នៅខែសីហា ឆ្នាំ២០១៨ ក្រុមហ៊ុន Brookfield Asset Management Inc បានទិញយកក្រុមហ៊ុន Westinghouse Electric Company ជាក្រុមហ៊ុនរ៉េអាក់ទ័រនុយក្លេអ៊ែរដ៏ធំមួយ ក្នុងតម្លៃ៤,៦ពាន់លានដុល្លារ។

នៅថ្ងៃទី១៣ ខែមីនា ឆ្នាំ២០១៩ ក្រុមហ៊ុន Brookfield Asset Management Inc បានប្រកាសថា ខ្លួនបានព្រមព្រៀងទិញយកភាគហ៊ុនភាគច្រើន នៃក្រុមហ៊ុន Oaktree Capital Management ក្នុងតម្លៃប្រមាណ៤,៧ពាន់លានដុល្លារ ដោយធ្វើឱ្យវាក្លាយជាក្រុមហ៊ុនមួយ ក្នុងចំណោមក្រុមហ៊ុនគ្រប់គ្រងលុយធំៗ បំផុតក្នុងពិភពលោក។

នៅថ្ងៃទី៣១ ខែកក្កដា ឆ្នាំ២០១៩ ក្រុមហ៊ុន Brookfield Asset Management Inc បានទិញយកក្រុមហ៊ុន Vodafone New Zealand Limited។

ក្នុងឆ្នាំ២០២០ ឆ្លើយតបទៅនឹងវិបត្តិឆ្លងរាលដាលវីរុសកូវីដ-១៩ លោក Bruce Flatt នាយកប្រតិបត្តិក្រុមហ៊ុន Brookfield Asset Management Inc បានធ្វើការវាយតម្លៃថា វិបត្តិសេដ្ឋកិច្ចលើកនេះគឺ “ងាយស្រួលគ្រប់គ្រងជាងឆ្ងាយ” បើធៀបទៅនឹងវិបត្តិសេដ្ឋកិច្ចលើកមុនៗ។

នៅខែតុលា ឆ្នាំ២០២០ លោក Mark Carney អតីតទេសាភិបាលនៃធនាគារកណ្ដាលអង់គ្លេស Bank of England បានក្លាយជាអនុប្រធានក្រុមហ៊ុនBrookfield Asset Management Inc៕

រដ្ឋាភិបាលនឹងចាប់ផ្តើមសាងសង់ស្ពានឆ្លងកាត់ទន្លេមេគង្គនៅខេត្តក្រចេះឆាប់់ៗនេះ

ដោយៈគង់ សូរិយា

ក្រចេះ កំពង់ធំៈ ទេសរដ្ឋមន្រ្តី ស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានអះអាងថា ស្ពានឆ្លងកាត់ទន្លេមេគង្គក្នុងខេត្តក្រចេះ តភ្ជាប់ទៅកាន់ខេត្តកំពង់់ធំនឹងចាប់ផ្តើមសាងសង់នាពេលឆាប់ៗនេះ។

លោកបានមានប្រសាសន៍ឲ្យដឹងក្នុងពេលចុះពិនិត្យផ្លូវល្បឿនលឿនភ្នំពេញ ព្រះសីហនុកាលពីម្សិលម៉ិញនេះថា ផែនការ និងការសិក្សាស្ពានក្រចេះ-កំពង់ធំ ត្រូវបានត្រៀមរួចរាល់ ខណៈការសាងសង់ គ្រោងនឹងចាប់ផ្ដើមក្នុងពេលឆាប់ៗនេះ ក្រោយសម្ដេចនាយករដ្ឋមន្រ្តី ហ៊ុន សែន សម្រេចអនុម័តជាផ្លូវការ។

លោកបន្តថា “ស្ពាននេះ មិត្តចិនបានព្រមព្រៀង ផ្ដល់ថវិកាកម្ចីហើយ ការសិក្សា និងផែនការក៏សម្រេចហើយដែរ ដោយក៏បានដាក់ទៅឱ្យសម្ដេចនាយករដ្ឋមន្រ្តី ហ៊ុន សែន ត្រួតពិនិត្យ”។

លោកបន្តថា “ក្រោយសម្ដេចអនុម័តហើយ យើងនឹងឈានទៅរកការចុះកិច្ចសន្យាសាងសង់ ក្នុងពេលឆាប់ៗខាងមុននេះ”។

បើយោងតាមការសិក្សារបស់ក្រសួង ស្ពានមួយខ្សែនេះនឹងមានប្រវែង១៧៦១ ម៉ែត្រ ដែលអាចនឹងប្រើប្រាស់រយៈពេលចន្លោះពី២ ទៅ៣ឆ្នាំ ក្នុងការសាងសង់៕