ដោយៈវឌ្ឈនៈ
ភ្នំពេញៈ រាជរដ្ឋាភិបាលនៃកម្ពុជា បានសម្រេចង្កើតក្រុងបូកគោនៃខេត្តកំពត ដោយមានសង្កាត់ចំនួន៣ ដោយកាត់ចេញពីឃុំចំនួន៣នៃស្រុកទឹកឈូ ខេត្តកំពត គឺឃុំបឹងទូក ឃុំកោះតូច និងឃុំព្រែកត្នោត ។ នេះបើតាមអនុក្រឹត្យស្ដីពីការបង្កើតក្រុងបូកគោនៃខេត្តកំពត កាលពីថ្ងៃទី១០ មីនា ២០២១និងទទួលបាននៅថ្ងៃទី ៣០ មីនា ២០២១នេះ ។

យោងតាមអនុក្រឹត្យដដែលបានឱ្យដឹងថា ការរៀបចំរចនាសម្ព័ន្ធ និងប្រព័ន្ធគ្រប់គ្រងរដ្ឋបាលក្រុងបូកគោ ត្រូវអនុលោមតាមច្បាប់ស្តីពី ការគ្រប់គ្រងរដ្ឋបាលរាជធានីខេត្ត ក្រុង ស្រុក ខណ្ឌ ហើយការកំណត់ចំនួនសមាជិកក្រុមប្រឹក្សាក្រុងបូកគោ និងក្រុមប្រឹក្សាស្រុកឈូ ត្រូវអនុលោមតាមមាត្រា១៨ថ្មី នៃច្បាប់ស្តីពីការគ្រប់គ្រងរដ្ឋបាលរាជធានីខេត្ត ក្រុង ស្រុក ខណ្ឌ និងមាត្រា៣ថ្មីនៃច្បាប់ស្ដីពី ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក និងក្រុមប្រឹក្សាខណ្ឌ ។

បូកគោគឺជាតំបន់រមណីយដ្ឋានមួយនៅខេត្តកំពត និងមានការអភិវឌ្ឍគួរឱ្យកត់សម្គាល់នៅរយៈពេលប៉ុន្មានឆ្នាំចុងក្រោយនេះ ហើយវិនិយោគិនជាតិនិងអន្តរជាតិក៏បានចាប់អារម្មណ៍លើការអភិវឌ្ឍតំបន់នេះផងដែរ ដោយមានក្រុមហ៊ុនឯកជន បានអភិវឌ្ឍន៍ជាតំបន់លំនៅឋាន ដីឡូត៍ ហើយក៏ទទួលបានការចាប់អារម្មណ៍ពីពលរដ្ឋកម្ពុជាផងដែរ ។

ភ្នាក់ងារអចលនវត្ថុម្នាក់នៅខេត្តកំពតបានឱ្យដឹងថា បើទោះបីជាកម្ពុជាជួបប្រទះនឹងជំងឺកូវីដ១៩ក៏ខេត្តមួយនេះ ទទួលបានការវិនិយោគលើដីធ្លី ពីសំណាក់វិនិយោគិនក្នុងស្រុកជាពិសេសវិនិយោគិនមកពីរាជធានីភ្នំពេញ។អភិបាលខេត្តកំពតលោកជាវ តាយបានមានប្រសាសន៍ឲ្យដឹងកាលពីពេលថ្មីៗនេះថា ការវិនិយោគនៅក្នុងខេត្តនៅតែបន្តកើនឡើង ទោះបីស្ថិតក្នុងបរិបទជំងឺកូវីដ១៩ក្តី ដោយសារខេត្តនេះមានសក្តានុពលច្រើន ដោយបច្ចុប្បន្ននេះគំរោងសាងសង់មជ្ឈមណ្ឌលពាណិជ្ជកម្មជាច្រើនបាននិងកំពុងសាងសង់នៅក្នុងក្រុងកំពត។លោកបន្តថា ចំណែកតំបន់ជើងភ្នំបូកគោ ក៏បាននិងកំពុងទាក់ទាញការវិនិយោគពីសំណាក់អ្នកវិនិយោគជាតិ និងអន្តរជាតិជាប្រចាំផងដែរ។

លោកបន្តថា “សកម្មភាពអភិវឌ្ឍន៍ និងគំរោងវិនិយោគក្នុងខេត្តនៅតែបន្តកើនឡើង ហើយគ្មានគំរោងណាមួយត្រូវបានពន្យាពេលនោះទេ”៕

ដោយ ៖ រ៉ាណេត
បាត់ដំបងៈ គម្រោងសិក្សាលើការស្តារ និងធ្វើឱ្យប្រសើរឡើងវិញនូវព្រលានយន្តហោះខ្នាតតំបន់ក្នុងខេត្តបាត់ដំបង កំពុងជួបបញ្ហាដោយសារវិបត្តិនៃជំងឺកូវីដ១៩ ដែលកំពុងមានការរីករាលនៅក្នុងប្រទេស ក៏ដូចជា ក្នុងខេត្តបាត់ដំបងដែលធ្វើឱ្យក្រុមមន្ត្រីជំនាញសម្រេចផ្អាកការជួបជុំពិភាក្សាមួយរយៈពេល។

អភិបាលរងខេត្តបាត់ដំបង លោក សឿម ប៊ុនរិទ្ធិ បានមានប្រសាសន៍ប្រាប់ឱ្យដឹងនៅថ្ងៃទី២៩ ខែមីនា ឆ្នាំ២០២១ថា ពាក់ព័ន្ធទៅនឹងគម្រោងស្ដារព្រលានយន្តហោះខ្នាតតំបន់ស្ថិតនៅក្នុងខេត្តបាត់ដំបង រាជរដ្ឋាភិបាលបានបង្កើតគណៈកម្មការអន្តរក្រសួងរួចហើយ ដើម្បីសិក្សាពីលទ្ធភាពក្នុងកិច្ចអនុវត្ត ដែលដឹកនាំដោយលោកបណ្ឌិត ម៉ៅ ហាវ ណ្ណាល រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលកម្ពុជា។

លោកបន្តឱ្យដឹងថា “ដោយសារតែស្ថានភាពនៃការផ្ទុះជំងឺកូវីដ១៩ ក្នុងសហគមន៍បានធ្វើឱ្យដំណើរការនៃការសិក្សា ពីផលប៉ះពាលគម្រោងត្រូវបានផ្អាកមួយរយៈពេលសិន រង់ចាំងស្ថានភាពស្ងប់ស្ងាត់បន្តិច ទើបចាប់អនុវត្តបន្ត”។ លោកបញ្ជាក់ថា “នេះមិនមែនជាការពន្យា លើគម្រោងស្តារព្រលានយន្តហោះនេះទេ គម្រោងនៅតែដំណើរការដដែលទេ ប៉ុន្តែសម័យកាលនៃការផ្ទុះជំងឺកូវីដ១៩ នៅក្នុងសហគមន៍នេះ យើងមិនអាចជួបប្រជុំគ្នាបាន”។

រដ្ឋលេខាធិការដ្ឋានអាកាសចរស៊ីវិល លោកស៊ីន ចាន់សិរីវុត្ថា ធ្លាប់បានថ្លែងថា អាកាសយានដ្ឋានខេត្តបាត់ដំបង នៅពេលបច្ចុប្បន្ននេះ គឺជាប្រភេទអាកាសយានដ្ឋានក្នុងស្រុក មានលក្ខណៈតូចចង្អៀត និងទ្រុឌទ្រោម ដែលត្រូវតែពិនិត្យដើម្បីស្ដារ និងកែលម្អរឡើងវិញ ដោយបានប្រគល់ការងារឱ្យក្រុមមន្ត្រីជំនាញ សិក្សាលម្អិត ថាតើត្រូវកែលម្អរ និងអភិវឌ្ឍន៍អាកាសយានដ្ឋានមួយនេះរបៀបណា។

លោកបញ្ជាក់ថា “ជាជំហានដំបូងយើងគិតថា ត្រូវស្ដារឡើងវិញដើម្បីឱ្យបានគ្រប់ស្ដង់ដារសុវត្ថិភាពត្រឹមកម្រិត4C ដែលយើងអាចទទួលចុះចតយន្តហោះក្នុងស្រុកប្រកបដោយសុវត្ថិភាព”។ លោកបន្តថា “បន្ទាប់មកទៀត យើងបានពិនិត្យមើលផែនការអភិវឌ្ឍន៍របស់នគរូបនីយកម្មនៅខេត្តបាត់ដំបង ដែលបានបង្ហាញពីភាពសមស្របទៅនឹងផែនការនៃការអភិវឌ្ឍ និងយល់ស្របក្នុងការកែសម្រួល និងស្តារអាកាសយានដ្ឋានមួយនេះឡើងវិញសម្រាប់ប្រើប្រាស់ក្នុងរយៈពេលខ្លី និងមធ្យម ប៉ុន្តែសម្រាប់រយៈពេលវែង គឺចាំបាច់ត្រូវតែមានការផ្លាស់ប្ដូរទីតាំងថ្មី”។

ព្រលានយន្តហោះខេត្តបាត់ដំបង បានផ្តើមបើកដំណើរការដំបូងនាអំឡុងឆ្នាំ១៩៦៧ ហើយត្រូវបិទដំណើរការទាំងស្រុងត្រឹមឆ្នាំ១៩៧៥ ក្រោយរបបខ្មែរក្រហមឡើងកាន់កាប់អំណាច។ បន្ទាប់ពីរបបនេះបានដួលរលំ ព្រលានយន្តហោះខេត្តបាត់ដំបងក៏ត្រូវបើកដំណើរការឡើងវិញ ប៉ុន្តែបម្រើឱ្យតែវិស័យអាកាសចរណ៍យោធាប៉ុណ្ណោះ ហើយក្រោយមកទៀតនាអំឡុងឆ្នាំ១៩៩១ ចំណតអាកាសយានដ្ឋាននេះ ត្រូវបិទដំណើរការរហូតបច្ចុប្បន្ន៕

ដោយ: គង់ សូរិយា
ភ្នំពេញ: រដ្ឋាភិបាលកម្ពុជា បានទាក់ទាញទុនវិនិយោគលើទឹកប្រាក់រហូតដល់១៣ពាន់លានដុល្លារអាមេរិក លើផ្នែកកម្មន្តសាល ក្នុងនោះវិស័យឧស្សាហកម្មធំៗចំនួន៥ទទួលបានការវិនិយោគខ្ពស់ជាងវិស័យផ្សេងៗ។

យោងតាមរបាយការណ៍បូកសរុបលទ្ធផលការងារឆ្នាំ២០២០ និងលើកទិសដៅអនុវត្តការងារឆ្នាំ២០២១ របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឲ្យដឹងថា ក្នុងឆ្នាំ២០២០កន្លងទៅ ការវិនិយោគលើផ្នែកកម្មន្តសាលមានទំហំទឹកប្រាក់ប្រមាណ១៣,៥៥៤លានដុល្លារ ក្នុងនោះការវិនិយោគលើវិស័យឧស្សាហកម្មកាត់ដេរសម្លៀកបំពាក់ មានទំហំទឹកប្រាក់ជាង៣៣០០លានដុល្លារ វិស័យម្ហូបអាហារជាង១ ៦០០លានដុល្លារ។ កៅស៊ូនិងប្លាស្ទិកជាង១៣០០លានដុល្លារ ផលិតផលពីរ៉ែលោហៈជាង១ ២០០លានដុល្លារ ភេសជ្ជៈជាង១២០០លានដុល្លារ និងផលិតផលស្បែកសរុបប្រមាណ១០០០លានដុល្លារ។

ក្រៅពីការវិនិយោគវិស័យធំៗខាងលើ វិស័យកម្មន្តសាលនេះ កម្ពុជាទទួលបានការវិនិយោគ លើវិស័យមួយចំនួនផ្សេងៗទៀតជិត ២០ប្រភេទផងដែរដូចជា គ្រឿងបរិក្ខាអគ្គិសនី គ្រឿងម៉ាស៊ីន ក្រដាស លោហៈធាតុមូលដ្ឋាន ប្រេងកាត បរិក្ខាដឹកជញ្ជូន វាយនភណ្ឌ ថ្នាំជក់ គ្រឿងសង្ហារឹម និងលើវិស័យផ្សេងៗទៀត។

ដោយឡែក ទាក់ទិនតម្លៃបរិមាណនៃការនាំចេញ លើផ្នែកកម្មន្តសាលនៅឆ្នាំ២០២០ឯណេះវិញ កម្ពុជាបាននាំចេញសម្លៀកបំពាក់ មានទំហំទឹកប្រាក់ប្រមាណជាង ៣ ០០០លានដុល្លារ, ស្បែកនិងផលិតផលធ្វើពីស្បែកជាង១២០០លានដុល្លារ បរិក្ខាអគ្គិសនីជាង៤៨២លានដុល្លារ បរិក្ខាដឹកជញ្ជូនជាង៣៧៣លានដុល្លារ ម្ហូបអាហារជាង ២៤១លានដុល្លារ កៅស៊ូនិងប្លាស្ទិកជាង១៧១លានដុល្លារ និងការនាំចេញវិស័យផ្សេងៗទៀត សរុបជាទឹកប្រាក់មានទំហំជាង៦៣៧៣លានដុល្លា៕