អង់គ្លេស និងឥណ្ឌា គ្រោងចាប់ផ្តើមចរចាកិច្ចព្រមព្រៀងពាណិជ្ជកម្មសេរីជាផ្លូវការឆាប់ៗនេះ

ដោយៈសុខុម

ក្រុងឡុងដ៍ៈ រដ្ឋាភិបាលអង់គ្លេស បានទម្លាយឱ្យដឹងកាលពីថ្ងៃអង្គារ ទី៤ ឧសភាថា អង់គ្លេស និងឥណ្ឌា នឹងចាប់ផ្តើមចរចាកិច្ចព្រមព្រៀងពាណិជ្ជកម្មសេរី (FTA) ជាផ្លូវការនៅចុងឆ្នាំនេះ ក្រោយភាគីទាំង២ព្រមព្រៀងគ្នាជាគោលការណ៍ ដើម្បីជំរុញពាណិជ្ជកម្ម និងការវិនិយោគទ្វេភាគី។ នេះបើយោងតាមការចុះផ្សាយរបស់សារព័ត៌មាន CNA។

ជាមួយនឹងចំនួនប្រជាជនរហូតដល់១៣០០លាននាក់ និងសេដ្ឋកិច្ចរីកចម្រើនយ៉ាងឆាប់រហ័ស ប្រទេសឥណ្ឌា បានរំពឹងខ្ពស់លើការចុះកិច្ចព្រមព្រៀងពាណិជ្ជកម្មជាច្រើនជាមួយអង់គ្លេស ក្រោយអង់គ្លេស ចាកចេញពីប្លុកសហភាពអឺរ៉ុប កាលពីឆ្នាំមុន។

ក្រោមយុទ្ធសាស្ត្រ “ចក្រភពអង់គ្លេស ជាសកល” (Global Britain) ក្រោយចាកចេញពីប្លុកសហភាពអឺរ៉ុប រដ្ឋការនាយករដ្ឋមន្ត្រីBoris Johnson បានផ្ដោតលើគោលគោលនយោបាយ “ងាកមកតំបន់អាស៊ី” ឬ “Pivot to Asia” នៅក្នុងគោលនយោបាយការបរទេសរបស់ខ្លួន ដោយបានចុះកិច្ចព្រមព្រៀងពាណិជ្ជកម្ម ជាមួយប្រទេសនានានៅតំបន់អាស៊ី រួមមានជប៉ុន និងសិង្ហបុរី។

លោកស្រី Liz Truss រដ្ឋមន្ត្រីពាណិជ្ជកម្មអន្តរជាតិអង់គ្លេសបានថ្លែងថា ប្រទេសឥណ្ឌា និងប្រទេសអង់គ្លេស នឹងចាប់ផ្តើមការចរចាកិច្ចព្រមព្រៀងជាផ្លូវការ “នៅរដូវស្លឹកឈើជ្រុះ” បន្ទាប់ពីប្រកាសជាបឋមនូវកិច្ចព្រមព្រៀង Enhanced Trade Partnership (ភាពជាដៃគូពាណិជ្ជកម្មកាន់តែប្រសើរ)។

លោកស្រីបានប្រាប់សារព័ត៌មាន Sky News ក្នុងកិច្ចសម្ភាសន៍ផ្សាយតាមទូរទស្សន៍ថា “យើងចង់ឱ្យការចរចានេះ បញ្ចប់ឱ្យបានឆាប់តាមដែលអាចធ្វើទៅបាន” ។

លោកស្រីបន្ថែមថា “ជាការពិត កិច្ចព្រមព្រៀងពាណិជ្ជកម្មសេរី (FTA) ត្រូវការពេលរាងយូរបន្តិច ហើយនេះជាផលចំណេញភ្លាមៗ ដែលយើងអាចទទួលបានសម្រាប់ប្រទេសទាំងពីរ ដោយជំរុញការបង្កើតការងារថ្មីនៅអង់គ្លេស និងឥណ្ឌា” ហើយថា កិច្ចព្រមព្រៀងនេះមានទំហំ១,៤ពាន់លានដុល្លារ” ។

លោកស្រីគូសបញ្ជាក់ថា ប្រទេសទាំងពីរកំពុងស្វែងរក “អត្ថប្រយោជន៍ភ្លាម” ពីកិច្ចព្រមព្រៀងពាណិជ្ជកម្មសេរី ដូចជា ការកាត់បន្ថយឧបសគ្គរាំងស្ទះដល់ពាណិជ្ជកម្មជាដើម ហើយថា ប្រទេសអង់គ្លេស ចង់បន្ទាបអត្រាពន្ធគយ ឬដកចេញពន្ធគយលើទំនិញនាំចេញផ្សេងៗទៅកាន់ប្រទេសឥណ្ឌា រាប់ចាប់ពីរថយន្តរហូតដល់ស្រាវីស្គី។

ការអត្ថាធិប្បាយនេះ ធ្វើឡើងនៅមុនកិច្ចចរចាតាម Video Conference រវាងនាយករដ្ឋមន្ត្រី Boris Johnson និងនាយករដ្ឋមន្ត្រីឥណ្ឌា Narendra Modi នៅកាលពីថ្ងៃអង្គារ ដដែល។

ការចរចានេះធ្វើឡើង បន្ទាប់ពីលោក Boris Johnson ពន្យារពេលដំណើរទស្សនកិច្ចផ្លូវរដ្ឋទៅកាន់ប្រទេសឥណ្ឌា ជាលើកទី២កាលពីខែមុន ដោយសារស្ថានភាពឆ្លងរាតត្បាតវីរុសកូវីដ-១៩ នៅក្នុងប្រទេសឥណ្ឌា កាន់តែធ្ងន់ធ្ងរទៅ៕

ក្រុមហ៊ុនផលិតវ៉ាក់សាំង Pfizer ចំណូលបានពីវ៉ាក់សាំងកូវីដ-១៩ នឹងកើនរហូតដល់២៦ពាន់លានដុល្លារ

ដោយៈសុខុម

អាមេរិក: ក្រុមហ៊ុនផលិតវ៉ាក់សាំងអាមេរិក Pfizer Inc កាលពីថ្ងៃអង្គារ ទី៤ ឧសភា បានព្យាករថា ខ្លួននឹងទទួលបានចំណូលពីការលក់វ៉ាក់សាំងកូវីដ-១៩ ចំនួន២៦ពាន់លានដុល្លារនៅឆ្នាំ២០២១នេះ ដោយកើនឡើងជាង៧០% បើធៀបនឹងការព្យាករមុននេះ។

យោងតាមសារព័ត៌មាន The Edge Markets ចុះផ្សាយក្នុងថ្ងៃដដែលឱ្យដឹងថា ការដំឡើងការព្យាករនេះ ឆ្លុះបញ្ចាំងកិច្ចព្រមព្រៀងថ្មីៗ ជាមួយរដ្ឋាភិបាលនានាជុំវិញពិភពលោក ដែលកំពុងប្រឹងប្រែងដុតដៃដុតជើង ដើម្បីបញ្ឈប់ការឆ្លងរាតត្បាតវីរុសកូវីដ-១៩ តាមរយៈការចាក់វ៉ាក់សាំងឱ្យបានឆាប់រហ័ស។

នេះបង្ហាញថា វ៉ាក់សាំងកូវីដ-១៩ ចំនួន១,៦ពាន់លានដូស ដែលផលិតឡើងរួមគ្នាជាមួយក្រុមហ៊ុនអាល្លឺម៉ង់ BioNTech SE នឹងត្រូវចែកចាយនៅក្នុងឆ្នាំ២០២១នេះ ខណៈវ៉ាក់សាំងនេះ ក្លាយជាវ៉ាក់សាំងលក់ដាច់បំផុត សម្រាប់ក្រុមហ៊ុន Pfizer Inc នៅក្នុងត្រីមាសទី១ ។

តាមការរំពឹងទុកក្រុមហ៊ុន Pfizer នឹងផលិតបានលើស១ភាគ៣ នៃការលក់ពេញមួយឆ្នាំរបស់ខ្លួន ដោយក្រុមហ៊ុននេះកំពុងចរចាផ្គត់ផ្គង់ ជាមួយប្រទេសជាច្រើនសម្រាប់ឆ្នាំ២០២២ និងលើសពីនេះ។

ការចំណាយថ្លៃដើម និងប្រាក់ចំណេញសុទ្ធ បានពីការលក់វ៉ាក់សាំងនឹងត្រូវបែងចែក៥០-៥០រវាងក្រុមហ៊ុន Pfizer និងក្រុមហ៊ុន BioNTech។ ក្រុមហ៊ុនផលិតឱសទាំងពីរនេះធ្លាប់បាននិយាយថា ខ្លួនមានគោលបំណងផលិត ឱ្យបានរហូតដល់២,៥ពាន់លានដូសក្នុងឆ្នាំនេះ។

ប្រសិនបើក្រុមហ៊ុននេះ លក់បានចំនួននោះមែន ប្រាក់ចំណូលពីការលក់វ៉ាក់សាំងនៅឆ្នាំ២០២១ នេះអាចនឹងខ្ពស់ជាង២៦ពាន់លានដុល្លារ យ៉ាងតិចក៏៥០%ដែរ។

ទន្ទឹមនេះ ក្រុមហ៊ុនផលិតវ៉ាក់សាំងអាមេរិក Moderna ដែលជាគូប្រជែងក៏បានព្យាករដែរថា ចំណូលពីការលក់វ៉ាក់សាំងរបស់ខ្លួន នឹងទទួលបាន១៨,៤ ពាន់លានដុល្លារក្នុងឆ្នាំ២០២១នេះ៕

ស្ថាបត្យករនិងវិស្វករកើនឡើងដល់ជិត៦០០០នាក់ ខណៈវិស័យសំណង់កាន់តែបង្ហាញភាពរឹងមាំ

ដោយៈ ម៉ាណេត

ភ្នំពេញៈ ចំនួនស្ថាបត្យករ និងវិស្វករ ក្នុងវិស័យសំណង់នៅកម្ពុជា កើនឡើងដល់ជាង៥,៨០០នាក់នាពេលបច្ចុប្បន្ន ខណៈវិស័យសំណង់ និងអចលនទ្រព្យកាន់តែមានភាពរឹងមាំ ក្នុងរយៈពេលមួយទសវត្សរ៍ចុងក្រោយនេះ ដោយសារលំហូរចូលនៃការវិនិយោគផ្ទាល់ពីបរទេស គម្រោងអភិវឌ្ឍន៍ក្នុងស្រុក និងអន្តរជាតិជាច្រើន។

តួលេខនេះត្រូវបានបង្ហើបឲ្យដឹងដោយ លោកឧបនាយករដ្ឋមន្ត្រីជា សុផារ៉ារដ្ឋមន្ត្រីក្រសួង រៀបចំដែនដី នគរូបនីយកម្ម និងសំណង់ ដែលបានមានប្រសាសន៍ជំនួបជាមួយឯកឧត្តម MIKAMI Masahiro ឯកអគ្គរដ្ឋទូតជប៉ុនប្រចាំកម្ពុជាកាលពីថ្ងៃទី៤ ឧសភាកន្លងមក ដោយលោកបានឱ្យដឹងថា បច្ចុប្បន្នកម្ពុជាមានស្ថាបត្យករចុះបញ្ជីសរុប១១៨១នាក់។

មុនច្បាប់សំណង់មានតែ៨៣៨នាក់ ក្រោយច្បាប់សំណង់ កើន៣៤៣នាក់ ស្មើ៤០,៩%ថែមទៀត។ ចំណែក វិស្វករក្នុងវិស័យសំណង់ចុះបញ្ជីសរុប៤៦២៣នាក់ នាពេលបច្ចុប្បន្ន។ មុនច្បាប់សំណង់មានតែ២២៧៤នាក់ ក្រោយច្បាប់សំណង់កើន ២៣៤៩នាក់ ស្មើ ១០៣,២%ថែមទៀត។

វិស័យអចលនទ្រព្យ ក៏ដូចជាវិស័យសំណង់ ត្រូវបានរដ្ឋាភិបាលចាត់ទុកថាជាជន្ទល់ជួយទ្រទ្រង់ដល់សេដ្ឋកិច្ចកម្ពុជា ដែលធ្វើឱ្យសេដ្ឋកិច្ចធ្លាក់ចុះយឺត អំឡុងពេលវិបត្តិកូវីដ១៩ ខណៈអ្នកជំនាញបានលើកឡើងថា វិស័យសំណង់ និងអចលនទ្រព្យនឹងមានកំណើនឡើងវិញ បន្ទាប់ពីវិបត្តិនេះត្រូវបានបញ្ចប់។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ធ្លាប់បានមានប្រសាសន៍កាលពីពេលកន្លងទៅថ្មីៗនេះថា នៅក្នុងឆ្នាំ២០២១នេះ សកម្មភាពវិនិយោគ ក្នុងវិស័យសំណង់ភាគច្រើន ជាសកម្មភាពរបស់អ្នកក្នុងស្រុក ដោយឡែកសម្រាប់រំហូរទុនចូលពីក្រៅស្រុកគឺមានតិចតួចបំផុត។

លោកបានថ្លែងបន្តថា “វិបត្តិសេដ្ឋកិច្ចដែលកំពុងកើតមាននៅពេលនេះ គឺជះឥទ្ធិពលគ្រប់ប្រទេស ដែលបណ្តាលឱ្យប៉ះពាល់ដល់គម្រោងវិនិយោគទាំងអស់ ប៉ុន្តែក្រោយពេលវិបត្តិនេះត្រូវបានទប់ស្កាត់ គម្រោងវិនិយោគនានានឹងចាប់ផ្តើមរៀបចំឡើងវិញ”។

លោកបានឱ្យដឹងទៀតថា “តាមខ្ញុំគិត ប្រសិនបើវិបត្តិជំងឺ ដែលកំពុងរាលដាលនេះត្រូវបញ្ចប់នៅត្រឹមចុងឆ្នាំនេះ នោះសកម្មភាពវិនិយោគ នៅក្នុងវិស័យសំណង់អាចនឹងចាប់ផ្តើមនៅដើមឆ្នាំ ឬនៅត្រឹមពាក់កណ្តាលឆ្នាំ២០២២ខាងមុខនេះ” ។

យោងតាមរបាយការណ៍ ដែលផ្តល់ដោយក្រសួងសេដ្ឋកិច្ច និងហិរញ្ញវត្ថុបានឱ្យដឹងថា គម្រោងវិនិយោគក្នុងវិស័យសំណង់គិតត្រឹមខែមីនា(៣ខែ) ឆ្នាំ២០២១ មានប្រមាណ១៦៦២លានដុល្លារអាមេរិក បើប្រៀបធៀបនិងរយៈពេលដូចគ្នានឹងឆ្នាំមុន ទំហំទុនវិនិយោគមានទឹកប្រាក់ ប្រមាណ២.៥៧៤លានដុល្លារអាមេរិក ដោយធ្លាក់ចុះ៣៥,៤% ៕

ធនាគារអភិវឌ្ឍន៍អាស៊ីៈកម្ពុជានៅតែបន្តមានហានិភ័យទាបនៃវិបត្តិបំណុល

ដោយៈ ម៉ាណេត

ភ្នំពេញៈ ធនាគារអភិវឌ្ឍន៍អាស៊ី (ADB) បានឱ្យដឹងថា ស្ថានភាពបំណុលសាធារណៈរបស់កម្ពុជា គឺនៅក្រោមអនុបាតបំណុលនៅឡើយ ដោយកម្ចីរបស់កម្ពុជានៅមានកម្រិតទាបឡើយនៅក្នុងឆ្នាំនេះ និងឆ្នាំក្រោយ។

របាយការណ៍ចុងក្រោយរបស់ ADB បានឱ្យដឹងថា កម្ពុជានៅតែបន្តមានហានិភ័យទាប ចំពោះវិបត្តិបំណុល ជាមួយបំណុលសាធារណៈក្រៅប្រទេសសរុប ដែលត្រូវបានព្យាការណ៍ថានឹងកើនឡើងស្មើនឹង៣៤.៦% នៃGDP ក្នុងឆ្នាំ២០២១ និង៣៥,៩% នៃGDP ក្នុងឆ្នាំ២០២២ បើទោះបីជាមានការកើនឡើងនៃឱនភាពថវិកាក្តី។

របាយការណ៍បានឱ្យដឹងទៀតថា ថវិការដ្ឋក្នុងឆ្នាំ២០២១នេះរំពឹងថា នឹងមានឱនភាពជារួម ដែលកម្រិតសើ្មនឹង៣,១% នៃGDP ជាមួយនឹងចំណូលក្នុងស្រុក ដែលត្រូវបានគ្រោងក្នុងកម្រិត២១,៤% នៃ GDP និងចំណាយក្នុងកម្រិត២៤,៥% ។

លោកសុខ សេនសានអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ ធ្លាប់បានលើកឡើងថា កម្ពុជាមិនងាយរងគ្រោះដោយបំណុលបរទេសនោះទេ។

លោកបានបញ្ជាក់ថា “កម្ពុជាពិតជាមិនភ័យព្រួយរឿងបំណុលបរទេសនោះទេ មិនភ័យព្រួយត្រង់ថា កម្ពុជាមានច្បាប់ត្រឹមត្រូវលើការគ្រប់គ្រងបំណុល ដែលបច្ចុប្បន្នកម្ពុជាខ្ចីក្នុងកម្រិតមួយដែលមានច្បាប់អនុញ្ញាត និងគោរពលើគោលការណ៍ ក្នុងការគ្រប់គ្រងបំណុលសាធារណៈ” ។

ទីភ្នាក់ងារ Moody កាលដើមឆ្នាំនេះ ក៏បានវាយតម្លៃវាយតម្លៃផងដែរថា ភាពងាយរងគ្រោះនៃបំណុលរបស់កម្ពុជា នៅតែស្ថិតនៅក្នុងស្ថានភាព ដែលអាចគ្រប់គ្រងបាន ហើយចក្ខុវិស័យកំណើនផលិតផល ក្នុងស្រុកសរុបដ៏រឹងមាំរបស់កម្ពុជា ជាកត្តាដែលផ្ដល់ទំនុកចិត្តរបស់ខ្លួន លើបន្ទុកបំណុលរបស់ប្រទេសកម្ពុជា។

គិតចាប់ពីឆ្នាំ១៩៩៣ រហូតមកដល់ដំណាច់ឆមាសទី១ ឆ្នាំ២០២០ រាជរដ្ឋាភិបាលបានចុះកិច្ចព្រមព្រៀងខ្ចីឥណទានសម្បទាន ជាមួយដៃគូអភិវឌ្ឍន៍នានា សរុបចំនួន១៤ពាន់លានដុល្លារ ក្នុងនោះវិស័យហេដ្ឋារចនាសម្ព័ន្ធរូបវន្ត គ្របដណ្តប់ប្រមាណ៨៧ភាគរយ និងវិស័យអាទិភាពចំពោះមុខផ្សេងទៀត ប្រមាណ១៣ភាគរយ។ នោះបើយោងតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ៕

កំឡុងវិបត្តិបែបនេះ តើគួរវិនិយោគអចលនទ្រព្យបែបណាដើម្បីបញ្ចៀសហានិភ័យជាប់គាំងលំហូរសាច់ប្រាក់

ដោយៈស៊ីវ ម៉េង

ភ្នំពេញៈ អ្នកជំនាញនៅតែមើលឃើញថា វិស័យនេះនៅតែមានក្តីសង្ឃឹមក្នុងការស្វែងរកផលចំណេញនាពេលអនាគត ខណៈដែលបច្ចុប្បន្នអ្នកវិនិយោគមានភាពប្រុងប្រយ័ត្នជាងមុន ដើម្បីបញ្ចៀសហានិភ័យគាំងលំហូរសាច់ប្រាក់។

លោកស្រីតាំង ហួរ នាយិកាក្រុមហ៊ុន AMATAK Property Service Co, Ltd បានមានប្រសាសន៍ឲ្យដឹងនារសៀ់លថ្ងៃទី៤ ឧសភាកន្លងមកថា ក្នុងវិបត្តិកូវីដនេះចរន្តនៃការស្វែងរកអចលនទ្រព្យល្អៗ ពីសំណាក់ភ្ញៀវបានថយចុះប្រមាណ៥០ភាគរយ ប៉ុន្តែភ្ញៀវដែលមានធនធានហិរញ្ញវត្ថុរ៉ឹងមាំ នៅតែបន្តវិនិយោគលើវិស័យនេះ ដោយសារពួកគេមើលឃើញផលចំណេញខ្ពស់នាពេលអនាគត។

លោកស្រីបន្តថា “សកម្មភាពទិញលក់អចលនទ្រព្យ នឹងងើបឡើងវិញក្រោយពេលរដ្ឋាភិបាល បើកឲ្យមានការធ្វើដំណើរឡើងវិញ ប៉ុន្តែវិស័យនេះនឹងងើបឡើងវិញនៅមានកម្រិតនៅឡើយ។

ជាមួយគ្នានេះ លោកស្រីអាន សុធីតា អ្នកជំនាញអចលនទ្រព្យលំដាប់អន្តរជាតិបានមានប្រសាសន៍ដោយសម្តែងសុទិដ្ឋិនិយមថា ការបើកចំហដោយរដ្ឋាភិបាលឲ្យប្រជាពលរដ្ឋធ្វើដំណើរតាមបណ្តាខេត្តឡើងវិញ ជារឿងល្អប្រសើរណាស់ ដែលធ្វើឲ្យវិស័យនេះនឹងមានសភាពផុសផុល ហើយអ្នកនឹងនៅក្នុងវិស័យនេះនឹងរវល់ការងារច្រើន។

លោកស្រីបន្តថា “អ្នកវិនិយោគអចលនទ្រព្យភាគច្រើននាពេលកន្លងមក ពួកគេបានរង់ចាំមើល ដោយពួកគាត់មិនទាន់សម្រេចចិត្ត ប៉ុន្តែនៅពេលមានការបើកឲ្យមានការធ្វើដំណើរឡើងវិញ ពួកគេនឹងសម្រេចចិត្តវិនិយោគ ប៉ុន្តែវាត្រូវការរយៈពេលមួយចំនួនទៀតផងដែរ” ។

ជាមួយគ្នានេះ លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលវត្ថុកម្ពុជាបានមានប្រសាសន៍ថា អ្នកវិនិយោគមានភាពប្រុងប្រយ័ត្នជាងមុន ក្នុងការវិនិយោគនាពេលបច្ចុប្បន្ននេះ តែអ្នកដែលមានធនធានច្រើន ពួកគេនៅតែបន្តទិញសម្រាប់អចលនទ្រព្យ ដែលពួកគេមើលឃើញផងចំណេញខ្ពស់។

លោកបន្តថា “ការប្រុងប្រយ័ត្ននាពេលនេះ ជាការល្អ ព្រោះការវិនិយោគបើសិនជាមានការជាប់គាំង ឬវិបត្តិអូសបន្លាយ នឹងអាចធ្វើឲ្យមានបញ្ហាលំហូរសាច់ប្រាក់ ហេតុនេះអ្នកវិនិយោគ គួរពិនិត្យមើលមូលដ្ឋានហិរញ្ញវត្ថុរបស់ខ្លួនរ៉ឹងមាំសិន មុនសម្រេចចិត្តវិនិយោគ។ លោកបន្តថា “ហេតុនេះការមានមូលដ្ឋានហិរញ្ញវត្ថុរ៉ឹងមាំ សម្រាប់ត្រៀមរយៈពេលវែងមានសារៈសំខាន់ណាស់ ដើម្បីការពារហានិភ័យពីការគាំងលំហូរសាច់ប្រាក់ បើសិនជាវិបត្តិបន្តអូសបន្លាយ” ៕

វ៉ាក់សាំងបង្ការកូវីដ ចំនួន១លានដូសទៀតនឹងមកដល់កម្ពុជានៅពាក់កណ្តាលខែឧសភានេះ

ដោយ សហការី

ភ្នំពេញ៖ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ ក្របខណ្ឌទូទាំងប្រទេស បានឱ្យដឹងថា វ៉ាក់សាំងបង្ការកូវីដ-១៩ ចំនួនមួយលានដូសទៀត ដែលរាជរដ្ឋាភិបាលកម្ពុជាបានបញ្ជាទិញពីប្រទេសចិន អាចនឹងមកដល់នៅពាក់កណ្ដាលខែនេះ។

លោកជំទាវ ឱ វណ្ណឌីន បានថ្លែងថា “នេះជាការគិតគូររបស់សម្ដេចតេជោនាយករដ្ឋមន្ត្រីគឺការយកវ៉ាក់សាំងចាក់ជូនទៅដល់ប្រជាពលរដ្ឋនៅតំបន់ដែលមានហានិភ័យខ្ពស់មានការឆ្លងកូវីដ១៩ធ្ងន់ធ្ងរ ដោយយើងមានវ៉ាក់សាំងចំនួន៩០ម៉ឺនដូសក្នុងដៃ កំពុងដំណើរការចាក់ជូនដល់ពលរដ្ឋទូទាំងចំនួន៤ខណ្ឌ ក្នុងតំបន់ក្រហម ដោយគ្រូពេទ្យយោធា ដែលមានការរៀបចំដោយក្រសួងការពារជាតិ ប្រព្រឹត្តទៅដោយរលូន ក្នុងមួយថ្ងៃៗចាក់ជូនដល់ពលរដ្ឋបានរាប់ម៉ឺននាក់ ហើយយើងនឹងបន្តរៀបចំចាក់ដល់ប្រជាពលរដ្ឋនៅខណ្ឌដទៃទៀតនៅពេលដែលវ៉ាក់សាំងមកដល់នៅក្នុងពេលឆាប់ៗនេះ” ។

លោកជំទាវ ឱ វណ្ណឌីន បានបញ្ជាក់បន្ថែមដោយអំពាវនាវ សូមបងប្អូនប្រជាពលរដ្ឋមានការអត់ធ្មត់ ចូលរួមសហការ ដែលបច្ចុប្បន្នយើងរង់ចាំការមកដល់នៃវ៉ាក់សាំង ហើយនឹងចាក់ជូនជាបន្តបន្ទាប់ ដល់ប្រជាពលរដ្ឋតាមលទ្ធភាព ខណៈដែលអ្វីដែលគណៈកម្មការចំពោះកិច្ចចាក់វ៉ាក់សាំងកូវីដ១៩កំពុងពិភាក្សា ជាមួយនឹងរដ្ឋបាលរាជធានីភ្នំពេញនោះ គឺការសម្លឹងមើលទីតាំងខណ្ឌមួយចំនួនទៀតយ៉ាងហោចណាស់បួនឬប្រាំខណ្ឌដោយបានចាត់ចែងរៀបចំរួចរាល់ជាស្រេចនូវក្រុមការងារទាំងអស់ រួមទាំងនឹងសិក្សាលម្អិតដើម្បីពិនិត្យមើលពីការផ្ដល់វ៉ាក់សាំងឲ្យបានទូលំទូលាយដើម្បីឲ្យបានលឿននិងពង្រីកទីតាំងចាក់បន្ថែមទៀតដើម្បីឱ្យកាន់តែខិតជិតបងប្អូនប្រជាពលរដ្ឋ។

សូមបញ្ជាក់ថា ដំណើរការចាក់វ៉ាក់សាំងកូវីដ-១៩ ជូនមន្ត្រីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេសរបស់ក្រសួងសុខាភិបាល និងក្រសួងការពារជាតិ គិតត្រឹមថ្ងៃទី០៣ ខែឧសភាម្សិលមិញនេះ បានចំនួន ១,៤៦៥,៩៨៥នាក់នាក់ ក្នុងនោះលើវ៉ាក់សាំង៣ប្រភេទគឺ Sinopharm ចាក់បានចំនួន ៦២៥,៥០៣នាក់ , Sinovac ចាក់បាន៦៨៣,៥៤០នាក់ និង កូវីសែល ទទួលអាជ្ញាបណ្ណផលិតដោយ AstraZeneca ចាក់បាន១៥៦,៩៤២នាក់។

គិតមកដល់ពេលនេះ កម្ពុជាមានវ៉ាក់សាំង សរុបដែលជាចំនួនវ៉ាក់សាំងទទួលបានគឺ ៖ ៤.០២៤.០០០ដូស ក្នុងនោះ ១លាន៧០ម៉ឺនដូសប្រភេទស៊ីណូហ្វាមជាជំនួយរបស់មិត្តចិន , ៣២ម៉ឺន៤ពាន់ដូសប្រភេទកូវីសែល ជាជំនួយតាមរយៈមជ្ឈមណ្ឌលកូវ៉ាក់ និងវ៉ាក់សាំងប្រភេទស៊ីណូវ៉ាក់ចំនួន២លានដូសទៀតជាការបញ្ជាទិញរបស់រដ្ឋាភិបាលកម្ពុជាពីមិត្តចិន៕

ការទិញលក់អចលនទ្រព្យនៅរាជធានីអារ៉ាប់រួមកើនឡើងដល់ជាង៣ពាន់លានដុល្លារនៅត្រីមាស១ឆ្នាំនេះ

ដោយៈ ប៊ី

ឌូបៃៈ ប្រតិបត្តិការទិញលក់អចលនទ្រព្យរាជធានីអាប៊ូដាប៊ី (Abu Dhabi) នៃប្រទេសសហភាពអារ៉ាប់រួមសម្រេចបានទំហំទឹកប្រាក់ប្រមាណ១១.៥ ពាន់លានដាហាម (ប្រមាណ៣,១៣ ពាន់លានដុល្លារ) នៅត្រីមាសទី១ ឆ្នាំ២០២១។ នេះបើយោងតាមការចេញផ្សាយរបស់សារព័ត៌មាន Arab News នៅថ្ងៃទី៤ ខែឧសភា ឆ្នាំ២០២១។

ប្រតិបត្តិការទិញលក់៣.៨៥០ប្រតិបត្តិការ ត្រូវបានធ្វើឡើងពាក់ព័ន្ធដីធ្លី អគារ និងយូនីតលំនៅដ្ឋាន រួមបញ្ចូលប្រតិបត្តិការអចលនទ្រព្យបានឈានដល់៥ពាន់លានដុមហាំ ហើយប្រាក់កម្ចីអចលនទ្រព្យជាង៦.៥ពាន់លានដាហាម។ នេះបើយោងតាមទិន្នន័យពីក្រសួងនគររូបនីយកម្ម និងដឹកជញ្ជូនរបស់ប្រទេសនេះ។ (១ដាហាម ស្មើនឹង០,២៧ដុល្លារ)

តម្លៃនៃការលក់អចលនទ្រព្យខ្ពស់បំផុតគឺនៅកោះ Al Reem ដែលមានទំហំទឹកប្រាក់១,៦ពាន់លានដាហាម បន្ទាប់មកកោះអាប៊ូដាប៊ី (៩០៧ លានដាហាម) និងកោះ Yas (៤៤៦ លានដាហាម)។ កោះ Saadiyat ទីក្រុង Khalifa និងឆ្នេរ Al Raha ក៏មានប្រតិបត្តិការទិញលក់អចលនទ្រព្យច្រើនផងដែរ។

ទីភ្នាក់ងាររដ្ឋាភិបាលបាននិយាយថា ការលក់ដីមានចំនួន៦៦ភាគរយនៃប្រតិបត្តិការទិញលក់អចលនទ្រព្យសរុប។ កំណើននៃប្រតិបត្តិការកម្ចីអចលនទ្រព្យខ្ពស់បានឆ្លុះបញ្ចាំងពីទំនុកចិត្តរបស់ធនាគារនៅក្នុងទីផ្សារអចលនទ្រព្យរបស់អាប៊ូដាប៊ី។

លោក Adeeb Al-Afeefi នាយកប្រតិបត្តិនៃផ្នែកអចលនទ្រព្យនៃក្រសួង បានឱ្យដឹងថា “យើងជឿជាក់យ៉ាងមុតមាំថា វិធីសាស្រ្តរយៈពេលវែងរបស់យើងនឹងរួមចំណែកដល់ជោគជ័យ និងយុទ្ធសាស្រ្តរបស់អាប៊ូដាប៊ីដែលបានធ្វើជាគំរូសកលឆ្នើមមួយស្តីពីវិធី ដើម្បីយកឈ្នះលើបញ្ហាប្រឈមខាងសេដ្ឋកិច្ច បណ្តាលមកពីវិបត្តិសុខភាពពិភពលោក និងសង្គម”៕

អ្នកជំនាញអចលនទ្រព្យមានសុទិដ្ឋិនិយមឡើងវិញលើការទិកញលក់បន្ទាប់ពីរដ្ឋាភិបាលបើកការបិទខ្ទប់រាជធានីភ្នំពេញនិងក្រុងតាខ្មៅ

ដោយៈ លក្ខិណា

ភ្នំពេញ ៖ បន្ទាប់ពីមានការរីករាលដាលនៃជំងឺកូវីដ១៩នៅក្នុងប្រទេសកម្ពុជាមក រដ្ឋាភិបាលបានសម្រេចចាត់វិធានការរឹតបន្តឹងចំពោះការជួបជុំការធ្វើដំណើររហូតដល់មានការបិទខ្ទប់រាជធានីភ្នំពេញទាំងមូល និងក្រុងតាខ្មៅនៃខេត្តកណ្ដាល និងតំបន់មួយចំនួនតាមបណ្ដាខេត្តផងដែរ។

ការបិទខ្ទប់នេះធ្វើឱ្យសកម្មភាពនៃអាជីវកម្ម និងសកម្មភាពនៃការវិនិយោគក៏ត្រូវអាក់ខាន តែក្រោយពេលរដ្ឋាប្រកាសបញ្ចប់ការបិទខ្ទប់ អ្នកជំនាញអចលនទ្រព្យរំពឹងថាការទិញលក់ និងសកម្មភាពនៃវិស័យអចលនទ្រព្យអាចនឹងងើបឡើងវិញ។

លោកសំ សុខនឿនប្រធានសមាគមអចលនទ្រព្យសកល បានមានប្រសាសន៍នៅថ្ងៃទី៤ ខែឧសភា ឆ្នាំ២០២១ថា ការបញ្ចប់ការបិទខ្ទប់រាជធានីភ្នំពេញ និងក្រុងតាខ្មៅ គឺជាលទ្ធផលមួយល្អប្រសើរ សម្រាប់វិស័យសេដ្ឋកិច្ចព្រោះពេលនោះ អ្វីៗនឹងអាចវិលមកប្រក្រតី ហើយរាល់អាជីវកម្មទាំងឡាយអាចសកម្មឡើងវិញ ជាមួយនឹងសកម្មភាពនៃការវិនិយោគជាដើម។

លោកបានថ្លែងថា “ការLockdown នៅកម្ពុជាគឺមានរយៈពេល៣សប្ដាហ៍កន្លងទៅហើយ ហើយបើនិយាយពីការប៉ះពាល់ដល់សេដ្ឋកិច្ច និងវិស័យអចលនទ្រព្យគឺមានផលប៉ះពាល់ខ្លះ”។

លោកបានបន្តថា នៅពេលរដ្ឋាភិបាលប្រកាសបើកឡើងវិញនៅថ្ងៃទី៦ ខែឧសភា ២០២១ខាងមុខនេះ សេដ្ឋកិច្ចកម្ពុជានឹងអាចវិលត្រលប់ទៅសភាពដើមវិញ ប្រជាពលរដ្ឋអាចធ្វើដំណើរពីតំបន់មួយទៅតំបន់មួយឡើងវិញ ដែលអាចធ្វើឱ្យចរន្ត នៃការទិញលក់អចលនទ្រព្យនឹងត្រលប់ទៅសភាពដើមវិញ ប៉ុន្តែការរីកចម្រើន ឬមិនរីកចម្រើននោះ ក៏មិនអាចព្យាករបានដែរ។

លោកបន្ថែមថា ទោះបីជាកម្ពុជាបានសម្រេចបិទខ្ទប់តំបន់មួយចំនួនក៏ពិតមែន តែការចរចានៃការបង្កើតគម្រោងវិនិយោគនៅក្នុងប្រទេសនៅតែមាន ដោយធ្វើទៅតាមប្រព័ន្ធអនឡាញ តែការសម្រេចចិត្ត ឬភាពជោគជ័យនៃការចរចានោះមិនមាននោះឡើយ ព្រោះតែពួកគេមិនអាចជួបគ្នា ដើម្បីជជែកលម្អិតពីគម្រោងនីមួយៗឡើយ។

លោកលឹម រដ្ឋាភ្នាក់ងារអចលនទ្រព្យមួយរូបប្រចាំខេត្តកំពតនិងខេត្តកែបបាននិយាយថា សកម្មភាពទិញនៃការទិញលក់អចលនទ្រព្យ ក្នុងអំឡុងពេលបិទខ្ទប់រាជធានីភ្នំពេញ និងការរាលដាលនៃកូវីដ១៩ គឺធ្វើឡើងតាមរយៈការជួបតាមទូរសព្ទ និងតាមប្រព័ន្ធអនឡាញ ដូច្នេះការសម្រេចចិត្តរបស់អ្នកទិញគឺនៅមានភាពស្ទាក់ស្ទើរ និងមានអ្នកលក់ខ្លះចង់ទៅទីតាំងដីធ្លី ឬអចលនទ្រព្យភ្លាម តែមិនអាចធ្វើបាន ព្រោះតែបម្រាមរបស់អាជ្ញាធរ។

លោកបានបន្តថា ភ្ញៀវទិញដីនៅកំពត និងកែបភាគច្រើនជាភ្ញៀវមកពីភ្នំពេញ ហើយនៅពេលភ្នំពេញបិទខ្ទប់ ពួកគាត់ក៏មិនអាចចេញពីផ្ទះ ដើម្បីទៅមើលទីតាំងបាន ដូច្នេះនៅពេលដែលរដ្ឋាភិបាលប្រកាសបញ្ចប់ការបិទខ្ទប់ លោករំពឹងថា ការទិញលក់អចលនទ្រព្យនឹងអាចដូចដើមវិញ ដោយសារតែពួកគេអាចធ្វើដំណើរចេញពីផ្ទះ និងអាចឆ្លងពីខេត្តមួយទៅខេត្តមួយបានទៀតផង៕

ការទាញយកតម្លៃសេដ្ឋកិច្ចបន្ថែមបាននិងកំពុងកើតមាន ក្រោយពេលរោងចក្រ សហគ្រាសចាកចេញពីទីក្រុង

ដោយៈគង់ សូរិយា

ភ្នំពេញៈ បន្ទាប់ពីអភិបាលក្រុងភ្នំពេញ ប្រកាសឲ្យរោងចក្រ សហគ្រាសចាកចេញពីរាជធានីភ្នំពេញកាលពីឆ្នាំមុន តំបន់រោងចក្រ សហគ្រាសនានាដូចជាផ្លូវជាតិលេខ២ តំបន់ចក្រអង្រែលើ និងចក្រអង្រែក្រោម តំបន់ផ្លូវវេង ស្រេងជាដើមបានផ្លាស់ប្តូរមុខមាត់បណ្តើរៗហើយ។

បច្ចុប្បន្នតំបន់ទាំងនោះ កំពុងក្លាយជាមជ្ឈមណ្ឌលពាណិជ្ជកម្ម លំនៅដ្ឋាន អាគារការិយាល័យជាដើម។

លោកស្រី អាន សុធីតាអ្នកជំនាញអចលនទ្រព្យលំដាប់អន្តរជាតិបានមានប្រសាសន៍តាមទូរស័ព្ទកាលពីពេលថ្មីៗនេះថា តំបន់ខាងលើនេះ មានភាពប្រែប្រួលច្រើន ដែលវាមិនមែនជាតំបន់រោងចក្រដូចកាលពី១០ឆ្នាំមុននោះទេ។

លោកស្រីបានបន្តថា “កាលពីជាង១០មុន តំបន់ដែលស្ថិតនៅតាមផ្លូវជាតិលេខ២ ជាបណ្តុំរោងចក្រ ប៉ុន្តែពេលនេះស្របពេលដែលរដ្ឋាភិបាល ជំរុញឱ្យរោងចក្រទាំងនោះចេញទៅក្រៅក្រុង វាត្រូវបានប្រែក្លាយជាមណ្ឌលពាណិជ្ជកម្មជំនួសវិញ”។

លោកស្រីបន្តទៀតថា បច្ចុប្បន្ននេះ បើទោះជាតំបន់ខាងលើនេះមានភាពប្រែប្រួល និងរីកចម្រើនយ៉ាងណាក្ដី ប៉ុន្តែសម្រាប់តម្លៃអចលនទ្រព្យនៅតំបន់ខាងលើនេះ ហាក់នៅមានកម្រិត។ លោកស្រីបន្ថែមថា តំបន់នេះមិនសូវមានផ្ទៃដីទំនេរ សម្រាប់អភិវឌ្ឍន៍ជាមជ្ឈមណ្ឌលពាណិជ្ជកម្មទំនើប ក្នុងទ្រង់ទ្រាយនោះដែរ ដោយសារតែចំនួននៃលំនៅដ្ឋានរបស់ប្រជាពលរដ្ឋនៅតំបន់នេះមានច្រើន ដែលខុសពីតំបន់អភិវឌ្ឍន៍ថ្មីស្ថិតនៅក្បែរមហាវិថីសម្ដេចតេជោ ផ្លូវ៦០ម៉ែត្រ។

បច្ចុប្បន្ននៅតាមបណ្តោយផ្លូវជាតិលេខ២ ស្ថិតនៅតំបន់ចក្រអង្រែមានមជ្ឈមណ្ឌ លពាណិជ្ជកម្មមួយចំនួនបានលេចរូបរាងហើយ ដូចជា The Factory, WB Arena, Holiday Outlet ជាដើម។

ជាមួយគ្នានេះ លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានមានប្រសាសន៍ថា ការអភិវឌ្ឍក្នុងគម្រោងធំៗ នៅតំបន់ជាប់ផ្លូវជាតិលេខ២ គឺមានកំណត់ ដោយសារតែផ្ទៃដីទំនេរមិនមានច្រើន ហើយតម្លៃឡើងខ្ពស់ស្ថិតនៅក្នុងចន្លោះចាប់ពី៣០០០ -៤០០០ដុល្លារក្នុងមួយម៉ែត្រការ៉េ ដែលមិនអនុញ្ញាតដល់ឱកាសចំណេញលើការវិនិយោគនោះទេ។

លោកបញ្ជាក់ថា “ប្រសិនបើគេមានគម្រោងវិនិយោគធំៗ ភាគច្រើនអ្នកអភិវឌ្ឍន៍នឹងងាកទៅជ្រើសរើសតំបន់អភិវឌ្ឍន៍ថ្មី ខណៈដែលតម្លៃនៅទាប និងមានវិសាលភាពផ្ទៃដីនៅទំនេរច្រើន”។លោកបន្តថា “នេះជានិន្នាការធម្មតានៅតាមប្រទេសនិមួយៗ នៅពេលសេដ្ឋកិច្ចរីកចម្រើន តំបន់ឧស្សាហកម្មនឹងត្រូវផ្លាស់ប្តូរចេញ ពីទីក្រុងជារឿងធម្មតា”។

ជាមួយគ្នានេះ ទីប្រឹក្សាសមាគមអចលនទ្រព្យសកលលោកយិន លាងគង់បានសាទរនឹងគោលនយោបាយថ្មីរបស់រដ្ឋាភិបាល ក្នុងការរុញរោងចក្រ សហគ្រាសចេញពីទីក្រុង ដែលធ្វើឲ្យមានផលប្រយោជន៍យ៉ាងច្រើនដូចជា ទី១ កាត់បន្ថយចំនួនមនុស្សរស់នៅទីក្រុង ដែលមានភាពណែនណាប់តាន់តាប់ ទី២ ធ្វើឲ្យទីក្រុងកាន់តែមានភាពស៊ីវិល័យ កាត់បន្ថយបាននូវសំណង់មិនរៀបរយ ទី៣ ធ្វើឲ្យការទាញយកផលប្រយោជន៍៍ពីដីធ្លី និងអចលនទ្រព្យដទៃទៀតកើនឡើង។

លោកបន្តថា “ការរីកចម្រើនសេដ្ឋកិច្ច តែងតែបង្ខំឲ្យមានការផ្លាស់ប្តូរលក្ខខ័ណ្ឌប្រជាសាស្រ្ត និងនគរូបនីយកម្ម ហើយនេះជានិន្នាការធម្មតាសម្រាប់សង្គមជាតិ នៃបណ្តាប្រទេសរីកចម្រើននានានៅលើពិភពលោក”៕

លោកបណ្ឌិតគីម ហ៊ាងៈ អ្នកវិនិយោគអចលនទ្រព្យគួរធ្វើតាមជំហ៊ានបែបណា ដើម្បីស្របតាមវ័យរបស់ខ្លួន?

ដោយគង់់ ម៉ាលីន

ភ្នំពេញៈ ការវិនិយោគលើវិស័យអចលនទ្រព្យ អាចធ្វើបានសម្រាប់មនុស្សគ្រប់គ្នា អាស្រ័យលើលទ្ឋភាព និងធនធានរបស់ពួកគេ ប៉ុន្តែការវិនិយោគតាមវ័យ និងមានឥស្សរភាពជារឿងមួយទៀត។

តើមនុស្សមានវ័យចន្លោះប៉ុន្មាន គួរវិនិយោគលើអចលនទ្រព្យបែបណា ដើម្បីទទួលបានសេរីភាពហិរញ្ញវត្ថុ លោកឧកញ៉ាបណ្ឌិតគីម ហ៊ាងប្រធានKW Cambodiaបានមានប្រសាសន៍ឲ្យដឹងកាលពីពេលថ្មីៗនេះថា ប្រសិនជាលោក អ្នក មានអាយុចន្លោះពី៣០ ទៅ៤០ឆ្នាំ លោកអ្នកគួរវិនិយោគលើវិស័យដីធ្លី ព្រោះទិញដីមានផលចំណេញខ្ពស់ ហើយវ័យនេះជាវ័យដែលលោក អ្នកកំពុងរកលុយបានច្រើន។

លោកបន្តថា ប៉ុន្តែប្រសិនជាអ្នកមានអាយុ៥០ឆ្នាំ ជាពេលដល់អាយុជិតចូលនិវត្តន៍ អ្នកមិនគួរវិនិយោគលើវិស័យដីធ្លីនោះទេ គឺគួរទិញខុនដូ ទិញដីសាងសង់ផ្ទះជួល ឬទិញផ្ទះល្វែងសម្រាប់ជួល ដែលអាចបានប្រាក់ភ្លាមៗត្រលប់មកវិញ ហើយធ្វើឲ្យស្ថានភាពហិរញ្ញវត្ថុរបស់លោក អ្នកមានស្ថេរភាពនៅពេលវ័យកាន់តែចាស់៕