បណ្ណសម្គាល់សិទ្ធិកាន់កាប់អចលនវត្ថុមួយចំនួនក្នុងក្រុងកំពង់ឆ្នាំងនឹងអស់សុពលភាពត្រឹមដំណាច់ខែនេះ

ដោយ ៖ រ៉ាណេត

កំពង់ឆ្នាំង ៖ នៅត្រឹមដំណាច់ខែមីនា ឆ្នាំ២០២១ សប្ដាហ៍ក្រោយនេះ បណ្ណសម្គាល់សិទ្ធិកាន់កាប់អចលនវត្ថុ (បណ្ណស្លាបមាន់) មួយចំនួនដែលស្ថិតនៅក្នុងសង្កាត់ប្អេរ ក្រុងកំពង់ឆ្នាំង ដែលចេញដោយរដ្ឋបាលសុរិយោដីកន្លងមកក្នុងតំបន់នេះនឹងត្រូវអស់សុពលភាពតាមផ្លូវច្បាប់ដែលតម្រូវឱ្យម្ចាស់អចលនវត្ថុដែលពាក់ព័ន្ធជូនដំណឹងទៅមន្ត្រីរដ្ឋបាលសូរិយោដី ដើម្បីទទួលបានវិញ្ញាបនបត្រសម្គាល់ម្ចាស់អចលនវត្ថុថ្មីជំនួសវិញ ចាប់ពីថ្ងៃទី២៩-៣០ ខែមីនា ឆ្នាំ២០២១ ជាកំហិត។

រដ្ឋបាលខេត្តកំពង់ឆ្នាំង នៅល្ងាចថ្ងៃទី២៦ ខែមីនា ឆ្នាំ២០២១ម្សិលមិញនេះ បានជូនដំណឹងស្តីពីការចែកវិញ្ញាបនបត្រសម្គាល់ម្ចាស់អចលនវត្ថុ និងមោឃៈភាពនៃប័ណ្ណសម្គាល់សិទ្ធិកាន់កាប់ប្រើប្រាស់ដីធ្លី ឬប័ណ្ណសម្គាល់សិទ្ធិកាន់កាប់អចលនវត្ថុ នៅភូមិម៉ុងបារាំង និងភូមិធម្មយុត្តិ សង្កាត់ប្អេរ ក្រុងកំពង់ឆ្នាំង ខេត្តកំពង់ឆ្នាំង។

អភិបាលខេត្តកំពង់ឆ្នាំង មានកិតិ្តយស សូមជម្រាបជូនម្ចាស់ដីនៃក្បាលដីស្ថិតក្នុងតំបន់វិនិច្ឆ័យ នៅភូមិម៉ុងបារាំង និងភូមិធម្មយុត្តិ សង្កាត់ប្អេរ ក្រុងកំពង់ឆ្នាំង ឱ្យបានជ្រាបថាៈ ក្រោមដំណើរការនៃការចុះបញ្ជីដីធ្លីមានលក្ខណៈជាប្រព័ន្ធ មន្ទីររៀបចំដែនដី នគរូបនីយកម្មសំណង់ និងសុរិយោដីខេត្តកំពង់ឆ្នាំង នឹងធ្វើការចែកវិញ្ញាបនប័ត្រសម្គាល់ម្ចាស់អចលនវត្ថុ (ប័ណ្ណកម្មសិទ្ធិ) ជូនដល់ម្ចាស់ក្បាលដី ដែលស្ថិតក្នុងភូមិម៉ុងបារាំង និងភូមិធម្មយុត្តិ សង្កាត់ប្អេរ ក្រុងកំពង់ឆ្នាំង ខេត្តកំពង់ឆ្នាំង ចាប់ពីថ្ងៃទី២៩-៣០ ខែមីនា ឆ្នាំ២០២១ ស្ថិតនៅបរិវេណនៅបរិវេណវត្តកាសេមរតនារាម (ហៅវត្តធម្មយុត្តិ) ស្ថិតក្នុងភូមិភូមិធម្មយុត្តិ សង្កាត់ប្អេរ ក្រុងកំពង់ឆ្នាំង ខេត្តកំពង់ឆ្នាំង។

ចំពោះប័ណ្ណសម្គាល់សិទ្ធិកាន់កាប់ប្រើប្រាស់ដីធ្លី(ប័ណ្ណស្លាប់មាន់) ឬប័ណ្ណសម្គាល់សិទ្ធិកាន់កាប់អចនវត្ថុ ដែលចេញដោយរដ្ឋបាលសុរិយោដីកន្លងមកក្នុងតំបន់នេះ នឹងត្រូវអស់សុពលភាពតាមផ្លូវច្បាប់ ចាប់ពីថ្ងៃចែកវិញ្ញាបនប័ត្រសំគាល់ម្ចាស់អចនវត្ថុ ខាងលើនេះតទៅ។

សេចក្តីដូចបានជម្រាបជូនខាងលើ សូមម្ចាស់ក្បាលដីស្ថិតនៅទីតាំងខាងលើ ដែលមានប័ណ្ណសំគាល់សិទ្ធិកាន់កាប់ប្រើប្រាស់ដីធ្លី ឬប័ណ្ណសម្គាល់សិទ្ធិកាន់កាប់អចលនវត្ថុ កន្លងមកមេត្តាយកប័ណ្ណទាំងនោះមកប្រគល់ឱ្យមន្ត្រីរដ្ឋបាលសូរិយោដី ដើម្បីទទួលយកវិញ្ញាបនបត្រសម្គាល់ម្ចាស់អចលនវត្ថុថ្មីជំនួសវិញ ចាប់ពីថ្ងៃទី២៩-៣០ ខែមីនា ឆ្នាំ២០២១ ជាកំហិត។

ចំពោះម្ចាស់បំណុលដែលបានបញ្ចាំ ឬហ៊ីប៉ូតែកពាក់ព័ន្ធនឹងក្បាលដីក្នុងតំបន់វិនិច្ឆ័យខាងលើ សូមយកប័ណ្ណទាំងនោះមកជូនមន្ត្រីរដ្ឋបាលសូរិយោដីធ្វើនិយ័តកម្ម ដើម្បីធានាប្រាក់របស់លោកអ្នក៕

Lucky One បុរីដ៏ប្រណិតមួយត្រៀមបង្ហាញខ្លួននៅក្បែរផ្សារទំនើបAEON Mall 3

ដោយៈគង់ សូរិយា
ភ្នំពេញៈ ជាមួយនឹងសក្តានុពលនៃទីតាំងភូមិសាស្រ្ត ព័ទ្ឋជុំវិញដោយមជ្ឈមណ្ឌលពាពាណិជ្ជកម្មលំដាប់អន្តរជាតិជាច្រើន ដូចជាផ្សារទំនើបAEON Mall3, Peng Huorth Diamond ជាដើម បុរីLucky Oneកំពុងផ្តល់នូវសក្តានុពលដល់អ្នកវិនិយោគ និងអ្នករស់នៅនាពេលអនាគតឆាប់ៗនេះ។

ប្រធានផ្នែកលក់នៃបុរីLucky One កញ្ញារ័ត្ន សម្បត្តិបានមានប្រសាសន៍ឲ្យដឹងតាមទូរស័ព្ទកាលពីម្សិលម៉ិញនេះថា លំនៅដ្ឋានក្នុងបុរីនេះ បាននិងកំពុងសាងសង់យ៉ាងសកម្ម និងមានផ្ទះប្រភេទ Shop House ឬផ្ទះអាជីវកម្ម វីឡាភ្លោះ និងវីឡាកូនកាត់ ដែលមានតម្លៃចន្លោះពី១៥ទៅ៣០ម៉ឺនដុល្លារអាមេរិក។ ជាមួយនឹងទីតាំងពិសេស ស្ថិតនៅជាប់ផ្លូវ៥០ម៉ែត្រ ក្បែរតំបន់ក្រវ៉ាត់ក្រុងទី២ បុរីLucky One។

កញ្ញាបន្តថា “គោលការណ៍ពិសេសរបស់បុរីមួយនេះ គឺផ្តោតទៅលើគុណភាព សំណង់ ការរចនាម៉ូដផ្ទះបែបទាន់សម័យ និងស៊ីវីល័យ ពិសេសផ្តល់នូវផាសុខភាពក្នុងការរស់នៅ ដោតសារអ្នកវិនិយោគគម្រោងនេះ បានផ្តោតចម្បងទៅលើផាសុខភាព និងបរិស្ថានបៃតង ដែលផ្តល់នូវបរិយាកាសត្រជាក់ និងមានភាពមនោរម្យក្នុងការរស់នៅ”។

ជាមួយនឹងភាពជោគជ័យ និងទទួលបានការគាំទ្រពពីអតិថិជនកន្លងមក បុរីមួយនេះទទួលបានជោគជ័យជាបន្តបន្ទាប់ ព្រោះរហូតមកទល់ពេលនេះយើងបានលក់បញ្ចប់ដោយជោគជ័យ លើគម្រោងរបស់ខ្លួនចំនួន៤រួចហើយ ដោយចំណាយពេលត្រឹមតែពេល១ឆ្នាំប៉ុណ្ណោះ ។

សម្រាប់បុរីLucky One គម្រោងទី៥នេះ បានដែលកំពុងដំណើរការសាងសង់យ៉ាងមមាញឹកក្នុងពេលបច្ចុប្បន្ននេះ ក៏បានចាប់ផ្តើមដាក់បើកលក់ហើយ កំពុងតែមានPromotion យ៉ាងច្រើនសម្រាប់ផ្តល់ជូនអតិថិជន ដែលមានតម្រូវការចង់បានផ្ទះក្នុងក្តីស្រមៃនៅតំបន់ប៉ែកខាងត្បូងដ៏ស៊ីវីល័យមួយនេះ ។

បុរី Lucky one មានច្រើនប្រភេទ សម្រាប់ជ្រើសរើសដូចជា ប្រភេទ ផ្ទះ អាជីវកម្ម ( shop house )ដែលបងប្អូនអាចទិញទុកចំណេញ រឺ ប្រកបអាជីវកម្មបាន ដោយងាយស្រួល ។ រឺឯ វីឡាសម្រាប់ស្នាក់នៅវិញមានប្រភេទ ផ្ទះ វីឡាកូនកាត់ និងប្រភេទផ្ទះវីឡា ភ្លោះ ដែលមានទំហំដីធំទូលាយ ម៉ូតផ្ទះស្អាតប្លែក នឹងធានាគុណភាពសំណង់កម្រិតស្តង់ដាដែលអាចអោយបងប្អូនរស់នៅ ប្រកបដោយផាសុកភាព និងសុវត្ថិភាពខ្ពស់ ។

អតិថិជនដែលទិញក្នុងអំឡុងពេលបុកគ្រឹះ និងទទួលបានផលចំណេញខ្ពស់ងាយស្រួលក្នុងការវិនិយោគ។ រឹតតែពិសេសជាមួយ នឹងលក្ខខណ្ឌបង់ប្រាក់ងាយៗ និងបត់បែនទៅតាមអតិថិជនផងដែរ ដោយមានតែ10%ក៏អាចក្លាយជាម្ចាស់ផ្ទះបានផងដែរ ។

លើសពីនេះបុរីLucky One ក៏សូមចូលរួមចំណែកកាត់បន្ថយ ការរីករាលដាលជំងឺឆ្លងCovid-19 ដោយចង់អោយបងប្អូន ទទួលបានគេហដ្ធានក្នុងក្តីស្រមៃយ៉ាងពិតប្រាកដដូច្នេះនៅក្នុងកំឡុងពេលវិបត្តិCOVID-19នេះ ខាងក្រុមហ៊ុនមានបញ្ចុះតម្លៃ ដ៏ធំអស្ចារ្យចា ប់ពី 5,000$-20,000$ភ្លាមៗ។

អ្វីកាន់តែពិសេសនោះ ក្រុមហ៊ុននឹងធ្វើការផ្ដល់ជូន ប័ណ្ណកម្មសិទ្ធិប្លង់រឹង100% ដល់អតិថិជនទៀតផង៕

📍ទតាំងនៅលើផ្លូវ៥០ម៉ែត្រ ក្រវ៉ាត់ក្រុងទី២ ជួរជាមួយបុរី ប៉េង ហួត គោកអំពិល (Penghuot Meragarden)
ផែនទី ៖ https://goo.gl/maps/qBaa85pesELF7PGeA (https://goo.gl/maps/qBaa85pesELF7PGeA)
សម្រាប់ពត៏មានលម្អិត ទាក់ទងមកកាន់លេខ ៖
012 462 415 / 061 944 566
010 944 566 / 096 7 18 18 18
ឬតាមរយះផេកផ្លូវការ: Lucky One Residential

https://goo.gl/maps/qBaa85pesELF7PGeA

រដ្ឋាភិបាលអនុម័តរោងចក្រអគ្គិសនីតម្លៃជិត ១៣០០លានដុល្លារនៅខេត្តព្រះសីហនុ

ដោយៈ ម៉ាណេត

ភ្នំពេញៈ រាជរដ្ឋាភិបាល តាមរយៈក្រុមប្រឹក្សាអភិវឌ្ឍន៍កម្ពុជា (CDC) បានសម្រេចអនុម័តរោងចក្រអគ្គិសនី មានកម្លាំង ៧០០មេហ្គាវ៉ាត់ ជាមួយទុនវិនិយោគ ១.៣០០លានដុល្លារនៅខេត្តព្រះសីហនុ ។ នេះបើយោងតាមសេចក្តីប្រកាសព័ត៌មានរបស់ CDC នៅថ្ងៃទី២៦ ខែមីនា ឆ្នាំ២០២១ ។

CDC បានឱ្យដឹងថា ក្រុមហ៊ុន Huadian Sihanoukville Power Generation បង្កើតរោងចក្រផលិតថាមពលអគ្គិសនី ប្រើដោយធ្យូងថ្មអានុភាព៧០០មេហ្កាវ៉ាត់ ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុទី១ ស្រុកស្ទឹងហាវ ខេត្តព្រះសីហនុ មានទុនវិនិយោគប្រមាណ ១២៨៣លានដុល្លារអាមេរិក និងអាចបង្កើតការងារបានចំនួន៥២០កន្លែង។

យោងតាមប្រភពព័ត៌មានបានឱ្យដឹងថា រោងចក្រអគ្គិសនីមានកម្លាំង៧០០មេហ្គាវ៉ាត់នេះ គឺជាការវិនិយោគរួមគ្នារវាងក្រុមហ៊ុន Cambodia International Investment Development Group (CIIDG) ជាមួយនឹងក្រុមហ៊ុន Huadian Sihanoukville Power Generation Co., Ltd។

គម្រោងនេះនឹងសាងសង់លើ ផ្ទៃដី ៥៤,៩ហិកតាក្នុងស្រុកស្ទឹងហាវ ខេត្តព្រះសីហនុ ដោយគ្រោងនឹងបញ្ចប់ការសាងសង់នៅចុងឆ្នាំ២០២២ ។

តាមផែនការគម្រោងនេះ នឹងធ្វើឡើងជា២ដំណាក់កាល ដោយដំណាក់កាលនីមួយៗ មានកម្លាំង៣៥០មេហ្គាវ៉ាត់។ ដំណាក់កាលទី១រំពឹងថា អាចនឹងដាក់បញ្ចូលក្នុងបណ្តាញជាតិនាឆ្នាំ២០២៣ និងដំណាក់កាលទី២ នឹងត្រូវដាក់បញ្ចូលនៅឆ្នាំបន្ទាប់។

បច្ចុប្បន្នក្រុមហ៊ុន CIIDG បាននិងកំពុងដំណើរការ រោងចក្រថាមពលដើរដោយធ្យូងថ្មទី១ ដែលមានតម្លៃ៣៨៣លានដុល្លារ និងមានអានុភាព២៧០ មេហ្គាវ៉ាត់នៅខេត្តព្រះសីហនុផងដែរ។ នៅក្នុងគម្រោងនេះក្រុមហ៊ុន មានការបែងចែកជា២ ដំណាក់កាលផងដែរ ដោយដំណាក់កាលទី២ ដែលមានកម្លាំង១៣៥ មេហ្គាវ៉ាត់ នឹងបើកដំណើរការនៅឆ្នាំ២០២១នេះ៕

អ្នកស្រាវជ្រាវសេដ្ឋកិច្ចៈ ការប្រែក្លាយដីស្រែទៅជាគម្រោងអភិវឌ្ឍន៍អចលនទ្រព្យកំពុងតែមានផលសំខាន់ពីរ

ដោយៈ រ៉ាណេត

ភ្នំពេញៈ នៅពេលនិយាយពីទីផ្សារដីឡូតិ៍ភាគច្រើន គេតែងសម្លឹងឃើញទៅលើការអភិវឌ្ឍប្រែក្លាយចេញពីដីស្រែ ដីចម្ការ ដែលមានទំហំធំ និងស្ថិតនៅឆ្ងាយពីតំបន់ក្រុង ឬទីប្រជុំជននៃខេត្ត ជាមួយនឹងការទទួលបានផលចំណេញដល់៣ភាគី ក្នុងពេលតែមួយ ប៉ុន្តែក៏មានភាពប្រឈមនឹងផលប៉ះពាល់ផងដែរ។

ប្រធានមជ្ឈមណ្ឌលសិក្សាចិននៃរាជបណ្ឌិត្យសភាកម្ពុជា លោក គី សេរីវឌ្ឍន៍ បានមានប្រសាសន៍ប្រាប់ឱ្យដឹង កាលពីពេលកន្លងទៅថ្មីៗនេះថា និន្នាការនៃការអភិវឌ្ឍ និងជួញដូរអចលនទ្រព្យនៅលើដីស្រែ ដីចម្ការ គឺជាការវិឌ្ឍថ្មីមួយ ដែលផ្លាស់ប្ដូរពីការអភិវឌ្ឍក្នុងរូបភាពកសិកម្មមកជាឧស្សាហកម្ម ជាពិសេសសម្រាប់ប្រទេស ដែលកំពុងអភិវឌ្ឍន៍ ហើយនៅពេលដែលប្រទេសមានការអភិវឌ្ឍ គួបផ្សំនឹងកំណើនប្រជាសាស្ត្រថែមទៀតនោះ ដីស្រែចម្ការសម្រាប់បង្ករបង្កើនផលបែបកសិកម្ម គឺត្រូវបាត់បង់បន្តិចម្ដងៗ ដែលវាជារឿងធម្មតាហើយ នៅតាមបណ្តាប្រទេសនានាក៏មានរូបភាពបែបនេះដូចគ្នា។

លោកបានបន្តថា “ការប្រែក្លាយពីប្រភេទដីស្រែមកជាដីលំនៅដ្ឋាន ឬដីសម្រាប់អភិវឌ្ឍន៍ក្នុងវិស័យឧស្សាហកម្មបែបទំនើប វានឹងជួយធ្វើឱ្យមានកំណើននៃតម្លៃដីធ្លី និងក្លាយជាវត្ថុដែលគេអាចធ្វើការជួញដូរបាន” ។ លោកបន្តថា “នៅពេលដែលដីបានផ្លាស់ប្ដូរម្ចាស់កម្មសិទ្ធិពីមួយទៅមួយ បានផ្តល់នូវចំណូលដល់សេដ្ឋកិច្ចជាតិ” ។

ចំណូលនោះមាន៣ភាគី ដែលទទួលបានប្រយោជន៍ ទី១ ម្ចាស់ដីផ្ទាល់ទទួលបានចំណូលគ្រួសារពីការលក់ ទី២ គឺក្រុមហ៊ុនភ្នាក់ងារ ឬឈ្មួញទទួលបានកម្រៃជើងសារពីការផ្សារភ្ជាប់រវាងអ្នកទិញដែលជាម្ចាស់ដីថ្មី និងអ្នកលក់ដែលជាម្ចាស់ដីដើម និងទី៣ រដ្ឋាភិបាលក៏ទទួលបានចំណូលជាតិ តាមរយៈការបង់ពន្ធពីការលក់។

លោកបណ្ឌិតគី សេរវឌ្ឍន៍ បានមានប្រសាសន៍បន្តថា “នៅក្នុងចរន្តនៃការទិញលក់ដីធ្លីនេះផងដែរ វានឹងបង្កើតឱ្យមានចរន្តថ្មីមួយទៀត គឺចរន្តនៃការបង្កើតសាច់ប្រាក់ ដែលទាំងអ្នកលក់ ទាំងអ្នកទទួលបានកម្រៃជើងសារ នឹងធ្វើការចាយវាយចូលទៅក្នុងទីផ្សាររួម ដែលបានផ្តល់នូវចំណូលបំពេញបន្ថែម ទៅដល់អាជីវករផ្សេងទៀត ដោយប្រយោល ហើយចរន្តទាំងអស់នេះ សុទ្ធតែជាចលករសំខាន់ នៅក្នុងកិច្ចដំណើរការសេដ្ឋកិច្ចជាតិទាំងអស់” ។

ជាមួយនឹងការលើកឡើងខាងលើនេះ លោកបណ្ឌិតគី សេរីវឌ្ឍន៍បានមានប្រសាសន៍ទៀតថា បើទោះជាការប្រែក្លាយដីស្រែ ទៅជាវត្ថុដែលអាចទិញលក់បាន ក្នុងគោលដៅបម្រើដល់ការអភិវឌ្ឍផ្នែកឧស្សាហកម្ម ឬលំនៅដ្ឋានបានធ្វើឱ្យកើតមាននូវចរន្តសាច់ប្រាក់ ដែលជាចំណែកមួយនៃសេដ្ឋកិច្ចជាតិ ប៉ុន្តែវាក៏អាចមានភាពប្រឈម និងផលប៉ះពាល់ផងដែរ។

លោកពន្យល់ថា នៅពេលការប្រែក្លាយដីស្រែ សម្រាប់គម្រោងអភិវឌ្ឍន៍ជាដីឡូតិ៍ ឬសម្រាប់ឧស្សាហកម្មលើសពីតម្រូវការ ភាពប្រឈមនឹងហានិភ័យអាចនឹងកើតមាន។ សម្រាប់អ្នកដែលមានដើមទុនគ្រប់គ្រាន់ ក្នុងការទិញដីស្រែ និងអភិវឌ្ឍន៍ជាគម្រោងដីឡូតិ៍ អាចមិនសូវជាបញ្ហានោះទេ ព្រោះប្រសិនបើលើសពីតម្រូវការ ដីរបស់ពួកគាត់គឺស្ថិតនៅដំណាក់កាលទ្រឹងមិនមានអ្នកទិញ ដូច្នេះលុយដែលជាទុននឹងកប់នៅក្នុងដី។

ប៉ុន្តែប្រសិនបើអ្នកអភិវឌ្ឍន៍ពឹងផ្អែកទៅលើកម្ចីពីធនាគារ ហើយរំពឹងការទទួលបានចំណូលពីការលក់ ដើម្បីសង់ត្រឡប់ទៅធនាគារវិញនោះ គឺជាបញ្ហាប្រឈមយ៉ាងខ្លាំង។ ជាក់ស្ដែងដូចជាបច្ចុប្បន្ន ដែលកំពុងប្រឈមនឹងការរាលដាល នៃជំងឺកូវីដ១៩ រាល់ការទិញលក់អចលនទ្រព្យ ដីធ្លីផ្សេងៗត្រូវជួបភាពស្ងប់ស្ងាត់ ឬជាប់គាំង ដូច្នេះនេះគឺជាបញ្ហាធំបំផុត៕

ហេតុអីត្រូវវិនិយោគលើអចលនទ្រព្យកំឡុងវិបត្តិ សូមពិនិត្យមើលគុណសម្បត្តិទាំងនេះ

ដោយៈ ស៊ីវ ម៉េង

ភ្នំពេញៈ ការវិនិយោគអចលនទ្រព្យ កំឡុងពេលមានវិបត្តិសេដ្ឋកិច្ចម្តងៗ វាជាពេលវេលាមាស ដែលអាចបង្កើតមាស សម្រាប់អ្នកមានធនធានច្រើន មិនមានបញ្ហាលំហូរសាច់ប្រាក់។

ការទិញអចលនទ្រព្យកំឡុងពេលនេះ អ្នកនឹងទទួលបានផលវិជ្ជមានច្រើន សម្រាប់ពេលអនាគត ឬពេលសេដ្ឋកិច្ចមានភាពល្អប្រសើរឡើងវិញ លោក អ្នកនឹងមានឳកាសកើបលុយ។

សហស្ថាបនិក និងជាអគ្គនាយកគេហទំព័រ Propertyarea.asia ដែលបានតាមដានព៌តមាន និងការវិវត្តនៃវិស័យអចលនទ្រព្យ លោកយិន លាងគង់់ បានថ្លែងថា កំឡុងមានវិបត្តិសេដ្ឋកិច្ច មានបញ្ហា និងឳកាសនៅជាមួយគ្នា។ អ្នកមានបញ្ហាគឺស្ទះលំហូរសាច់ប្រាក់ ចំណែកអ្នកមានឳកាស គឺអ្នកមានធនធានច្រើន ដែលអាចចាប់ឳកាសវិនិយោគកំឡុងពេលនេះ។

ទិញបានតម្លៃល្អ

តាមធម្មតានៅពេលសេដ្ឋកិច្ចមានបញ្ហា ពិសេសកំឡុងវិបត្តិកូវីដ ដែលបានអូសបន្លាយនៅលើពិភពលោក និងកម្ពុជាជាង១ឆ្នាំនេះ បានធ្វើឲ្យមនុស្សជាច្រើនបាត់បង់លុយ ស្ទះលំហូរសាច់ប្រាក់។ ហេតុនេះ ពួកគេនឹងបញ្ចេញអចលនទ្រព្យរបស់ខ្លួន ដើម្បីដោះស្រាយបញ្ហាបំណុលជាមួយធនាគារ ឬជាមួយនឹងដៃគូអាជីវកម្មរបស់ខ្លួនផ្សេងៗទៀត។

បញ្ហាប្រឈមនេះហើយ ដែលពួកគេត្រូវលក់អចលនទ្រព្យរបស់ពួកគេបន្ទាន់ និងតម្លៃអាចទាបជាងទីផ្សារ ដើម្បីបង្វិលលុយដោះស្រាយបំណុលផ្សេង។

ងាយចចារ

នេះជាពេលវេលា ដែលអ្នកទិញមានឧត្តមភាពច្រើនជាងអ្នកលក់ ព្រោះកំឡុងពេលនេះ មានមនុស្សតុចតួចណាស់ហានវិនិយោគ និងមានលុយច្រើនសម្រាប់វិនិយោគ ដូច្នេះចំនួនអ្នកទិញមានតិចជាងអ្នកលក់ ដែលធ្វើឲ្យអ្នកទិញអាចចចាតម្លៃបានល្អ និងងាយស្រួលទាំងលក្ខខ័ណ្ឌបង់ប្រាក់ ក៏ដូចជា ទិញអចលនទ្រព្យបានតម្លៃល្អ និងទាបជាងទីផ្សារ។

ប៉ុន្តែយ៉ាងណាក៏ដោយ វាអាស្រ័យលើសមត្ថភាពនៃការវិនិច្ឆ័យរបស់អ្នកផងដែរថា អ្នកពិតជារកបានអចលនទ្រព្យល្អ និងមានតម្លៃទាបជាងទីផ្សារពិតមែនឬយ៉ាងណា?។

រកប្រភពពីណា

ការស្វែងរកអចលនទ្រព្យតម្លៃទាបជាងទីផ្សារ មិនមែនងាយស្រួលនោះទេ ប៉ុន្តែគ្រប់យ៉ាងសុទ្ឋតែមានដំណោះស្រាយ ដោយអ្នកអាចស្វែងរកមេភូមិ មេឃុំ អ្នកគួកជេនៅមូលដ្ឋាន ដែលលោកអ្នកអាចស៊ើបសួរស្វែងរកព៌តមានបាន។

ជាមួយគ្នានេះ ធនាគារ និងមីក្រូហិរញ្ញវត្ថុ ក៏ជាប្រភពសំខាន់ផងដែរ បើសិនជាអ្នកស្គាល់អ្នកធ្វើការគ្រប់គ្រងផ្នែកឥណទាន ឬប្រធានសាខារបស់ធនាគារណាមួយ ព្រោះមានតែធនាគារិកនេះហើយ ដែលមានព៌តមាន និងទិន្នន័យអតិថិជនក្នុងដៃច្រើន ដោយសារចំនួនពលរដ្ឋបានប្រើប្រាស់ធនាគារ ឬមីក្រូហិរញ្ញវត្ថុច្រើន ដើម្បីទទួលបានឥណទាន។

ហេតុនេះ អ្នកមានបញ្ហាដោះស្រាយមិនចេញ ពួកគេនឹងស្វែងរកជំនួយពីធនាគារ និងមីក្រូហិរញ្ញវត្ថុ ដើម្បីជួយដោះស្រាយបញ្ហាហិរញ្ញវត្ថុរបស់ខ្លួន។

១០ឆ្នាំមានម្តង

ឳកាសល្អៗបែបនេះ មិនមានច្រើនឡើយ ប៉ុន្តែវាតែងតែកើតមានស្ទើររៀងរាល់១០ឆ្នាំម្តង ដែលបណ្តាប្រទេសមានសេដ្ឋកិច្ចធំៗ នៅលើពិភពលោក តែងតែបង្កើតឲ្យមានបញ្ហាបែបនេះ ដើម្បីឲ្យពួកគេអាចគ្រប់គ្រងពិភពលោក និងទប់ស្កាត់កុំឲ្យប្រទេសមួយចំនួនមានសេដ្ឋកិច្ចងើបឡើងលឿនពេក ដែលធ្វើឲ្យមហាអំណាចធំៗពិបាកគ្រប់គ្រង។

វាជាប់ទាក់ទងនឹងបញ្ហាផលប្រយោជន៍ និងភូមិសាស្ត្រនយោបាយ ព្រោះជម្លោះរបស់មហាអំណាចធំៗលើពិភពលោក កើតមានដោសារបញ្ហាផលប្រយោជន៍ និងពង្រីកឥទ្ឋិពលលើពិភពលោកប៉ុណ្ណោះ៕

បច្ចុប្បន្នភាពៈ ក្រុមហ៊ុន NagaCorp កំពុង “ធ្វើផែនការថ្មី” សម្រាប់គម្រោង “បឹងអច្ឆរិយៈអង្គរ” តម្លៃ ៣៥០លានដុល្លារនៅខេត្តសៀមរាប

ដោយៈសុខុម

ភ្នំពេញ: បន្ទាប់ពីមានការព្រួយបារម្ភរបស់អង្គការយូណេស្កូ និង ICC Angkor លើគំរោងវិនិយោគបឹងអច្ឆរិយៈរបស់ក្រុមហ៊ុន Naga Corp តម្លៃ ៣៥០លានដុល្លារនៅខេត្តសៀមរាប បច្ចុប្បន្នក្រុមហ៊ុនលំដាប់អន្តរជាតិនេះ កំពុងរៀបចំផែនការថ្មី ដើម្បីធ្វើយ៉ាងណាឲ្យគម្រោងនេះអាចដំណើរការទៅបាន។

លោក Tim McNally ប្រធានក្រុមហ៊ុនកាស៊ីណូដ៏ល្បីល្បាញ NagaCorp Ltd ប្រចាំតំបន់អាស៊ី បានប្រាប់សារព័ត៌មាន GGRAsia នៅថ្ងៃទី២៦ មីនា នេះថា ក្រុមហ៊ុនបាននិងកំពុង “ធ្វើផែនការថ្មី” សម្រាប់គម្រោងអភិវឌ្ឍន៍រមណីយដ្ឋាន “បឹងអច្ឆរិយៈអង្គរ” ដែលពុំមានបញ្ចូលល្បែងស៊ីសង នៅជិតប្រាសាទអង្គរវត្ត ដែលជាសម្បត្តិបេតិកភណ្ឌពិភពលោករបស់អង្គការយូណេស្កូនោះទេ។

ការលើកឡើងបែបនេះរបស់លោក Tim McNally គឺដើម្បីឆ្លើយតបសំណើរបស់សារព័ត៌មាន GGRAsia ដែលសុំឱ្យលោកបញ្ជាក់ជុំវិញ សេចក្ដីប្រកាសព័ត៌មានចេញផ្សាយកាលពីថ្ងៃអង្គារ ទី២៣ មីនា របស់ក្រសួងវប្បធម៌ និងវិចិត្រសិល្បៈដែលបានលើកឡើងថា សំណើអភិវឌ្ឍន៍គម្រោង “បឹងអច្ឆរិយៈអង្គរ” របស់ក្រុមហ៊ុន NagaCorp ក្នុងទំហំទឹកប្រាក់ ៣៥០លានដុល្លារសហរដ្ឋអាមេរិក នៅលើផ្ទៃដី៧៥ហិកតា ដែលមានចម្ងាយប្រមាណ៥០០ម៉ែត្រពីតំបន់រមណីយដ្ឋានអង្គរនេះ “ពុំអាចអនុវត្តន៍បានទេនៅក្នុងបរិបទនេះ”។

កាលពីខែកុម្ភៈ អង្គការយូណេស្កូ បានសម្តែងការព្រួយបារម្ភចំពោះសំណើរបស់ក្រុមហ៊ុន NagaCorp ដោយបានលើកឡើងថា ភាពនៅកៀកខ្លាំងរបស់គម្រោងនេះ ទៅនឹងតំបន់ទ្រនាប់ការពារនៃប្រាសាទអង្គរវត្ត “ព្រមទាំងទំហំវិសាលភាព និងសកម្មភាពគ្រោងទុកនានា ពិតជាអាចជះផលប៉ះពាល់ដល់ “គុណតម្លៃជាសកលដ៏លេចធ្លោរបស់ប្រាសាទអង្គរវត្ត” ដែលត្រូវបានចុះបញ្ជីជាសម្បត្តិបេតិកភណ្ឌពិភពលោក របស់អង្គការយូណេស្កូ” ។

លោក Tim McNally បានប្រាប់សារព័ត៌មាន GGRAsia ថា “យើងបានទទួលស្គាល់ហើយនូវការព្រួយបារម្ភ ដែលអង្គការយូណេស្កូបានលើកឡើង” ។ លោកបានបន្ថែមថា “ជាលទ្ធផលយើងនឹងបន្តធ្វើផែនការថ្មីៗ ដែលអាចទទួលយកបាន ដើម្បីសម្រេចគោលបំណងបង្កើតតំបន់ទេសចរណ៍ ហើយទន្ទឹមនេះយើងក៏គោរពភាពអច្ឆរិយៈ ផ្នែកប្រវត្តិសាស្ត្រ និងសាសនានៃតំបន់ប្រាសាទអង្គរវត្តផងដែរ” ។

ក្រុមហ៊ុន NagaCorp ដែលចុះបញ្ជីនៅក្រុងហុងកុង គឺជាម្ចាស់កាស៊ីណូណាហ្គាវើល (NagaWorld) ដ៏ធំដែលបើកដំណើរការនៅក្នុងរាជធានីភ្នំពេញ។ ក្រុមហ៊ុននេះទទួលបានអាជ្ញាប័ណ្ណផ្តាច់មុខ ក្នុងការបើកកាស៊ីណូ នៅក្នុងរាជធានីភ្នំពេញ និងនៅតំបន់ជុំវិញភ្នំពេញ។

លោក Tim McNally បានគូសបញ្ជាក់នៅក្នុងអត្ថាធិប្បាយរបស់លោកថា “ដូចដែលខ្ញុំធ្លាប់បានបញ្ជាក់ពីមុនរួចមកហើយថា ក្រុមហ៊ុន NagaCorp មិនដែលធ្វើផែនការ ឬអនុវត្តគម្រោងអ្វីមួយ ដោយអត្តនោម័តនោះឡើយ ហើយតែងតែស្វាគមន៍មតិយោបល់ពីក្រុមផ្សេងៗ” ។

លោកបានបន្ថែមថា “យើងស្តាប់យោបល់ដោយយកចិត្តទុកដាក់បំផុត និងធ្វើការសម្របសម្រួលយ៉ាងជិតស្និទ្ធ ជាមួយតំណាងសំខាន់ៗរបស់រាជរដ្ឋាភិបាលកម្ពុជា” ។

លោក Tim McNally បានគូសបញ្ជាក់ថា “ទោះបីខ្ញុំមិនអាចផ្តល់កាលវិភាគជាក់លាក់បាននៅពេលនេះក្ដី ក៏ខ្ញុំអាចបញ្ជាក់បានថា យើងនឹងបន្តអភិវឌ្ឍន៍ផែនការមួយដែលអាចទទួលយកបាន សម្រាប់តំបន់នេះដែលនឹងជួយបំពេញ និងលើកកម្ពស់វិស័យទេសចរណ៍បម្រើផលប្រយោជន៍របស់កម្ពុជា” ។

លោកបានបន្ថែមថា គោលបំណងរបស់យើង គឺដើម្បីធ្វើឱ្យវិស័យទេសចរណ៍ប្រសើរឡើង ហើយទាញយកផលប្រយោជន៍ពីវិស័យនេះ ឱ្យបានច្រើនបំផុត ព្រមទាំងជួយលើកតម្លៃប្រាសាទអង្គរវត្ត ដែលជាសម្បត្តិបេតិកភណ្ឌពិភពលោក” ៕

ប្រធាន CVEA ថាឆ្នាំ២០២១ ជាពេលវេលាល្អសម្រាប់អ្នកមានទុនទិញអចលនទ្រព្យទុកវិនិយោគ និងអភិវឌ្ឍន៍

ដោយៈ រ៉ាណេត

ភ្នំពេញៈ សម្រាប់ឆ្នាំ២០២១ ដែលកំពុងស្ថិតនៅក្នុងស្ថានភាពប្រឈមយ៉ាងខ្លាំងទៅនឹងការរាតត្បាត នៃជំងឺឆ្លងស្ទើទូទាំងប្រទេស បានបណ្តាលឱ្យវិស័យជាច្រើន ទទួលរងនូវផលប៉ះពាល់យ៉ាងខ្លាំង រាប់ទាំងវិស័យអចលនទ្រព្យផងដែរ។

ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលលោកច្រឹក សុខនីម បានលើកឡើងថា ក្នុងកាលៈទេសៈបែបនេះ វាគឺជាពេលវេលាដ៏ល្អចំពោះអ្នក ដែលមានលុយគ្រប់គ្រាន់ទិញអចលនទ្រព្យទុកវិនិយោគ ឬអភិវឌ្ឍគម្រោងបានយ៉ាងល្អប្រសើរបំផុត។

លោកបន្តថា ឆ្នាំ២០២១ គឺជាពេលវេលាមួយ ដែលស័ក្ដិសមបំផុតសម្រាប់អ្នកដែលមានដើមទុន និងចរន្តសាច់ប្រាក់គ្រប់គ្រាន់ក្នុងការវិនិយោគ ឬចាប់ផ្តើមអភិវឌ្ឍន៍គម្រោងរបស់ខ្លួន សម្រាប់ដាក់បញ្ចូលទៅក្នុងទីផ្សារ នៅអំឡុងចុងឆ្នាំ២០២១ ឬដើមឆ្នាំ២០២២ បន្ទាប់ពីវិបត្តិនៃជំងឺកូវីដ១៩ បញ្ចប់ ក្រោយមានការប្រើប្រាស់វ៉ាក់សាំងជាសាកល។

លោកបន្តថា “ពេលនេះនៅតាមបណ្តាប្រទេសធំៗមួយចំនួន ចាប់ផ្តើមប្រើវ៉ាក់សាំង ហើយនឹងបន្តនាំចែកចាយ ទៅតាមបណ្តាប្រទេសផ្សេងៗ ដោយឡែកនៅកម្ពុជាក៏បាន និងកំពុងប្រើប្រាស់វ៉ាក់សាំងនៅក្នុងប្រទេសដែរ” ។ លោកបន្តថា “ដូច្នេះក្រោយពេលមានការប្រើប្រាស់វ៉ាក់សាំងជាសាកល និងមានប្រសិទ្ធភាពខ្ពស់ ពេលនោះដំណើរការនៃចរន្តសេដ្ឋកិច្ចនឹងចាប់ផ្តើមឡើងវិញ ហើយទីផ្សារអចលនទ្រព្យ ក៏នឹងផ្តើមវិលទៅរកភាពល្អប្រសើរវិញដែរ” ។

លោកច្រឹក សុខនីមបានបន្តថា នៅក្នុងឱកាសនេះ សម្រាប់អ្នកលុយគ្រប់គ្រាន់ គួរទិញដី ឬផ្ទះទុកលក់ ឬជួលយកចំណេញ ក្រោយពេលតម្លៃចាប់ផ្តើមឡើងថ្លៃនៅឆ្នាំក្រោយឬឆ្នាំបន្ទាប់ ព្រោះពេលនេះ មានម្ចាស់អចលនវត្ថុមួយចំនួន កំពុងព្យាយាមលក់ទោះតម្លៃស្ថិតក្រោមទីផ្សារក៏ដោយ។

លោកថា ក្រៅពីតំបន់ជាយក្រុង និងនៅតំបន់ផ្លូវក្រវាត់ក្រុង ជាយរាជធានីភ្នំពេញ ខេត្តមួយចំនួនក៏មានសក្ដានុពលក្នុងទិញដីវិនិយោគ ឬអភិវឌ្ឍន៍គម្រោងផ្សេងៗគួរសម្លឹងទៅកាន់ខេត្តជាប់មាត់សមុទ្រចំនួន២ គឺខេត្តកំពត និងខេត្តកែប ដែលមានសក្ដានុពលផ្នែកទេសចរណ៍។

សម្រាប់ការវិនិយោគ ក្នុងវិស័យដីធ្លីនៅក្នុងខេត្តទាំង២នេះ នៅមានឱកាសទទួលបានចំណេញ ដោយសារតែវិសាលភាពនៃដីទំនេរនៅមានច្រើន ហើយតម្លៃក៏មានទាន់ឡើងខ្ពស់ខ្លាំងនោះដែរ។ ដូច្នេះឱកាសវិនិយោគ នៅតែមានជាពិសេសដី ដែលស្ថិតនៅតាមតំបន់ជិតភ្នំ តំបន់ជាប់ព្រែក ដែលស័ក្ដិសមនឹងការអភិវឌ្ឍន៍ជាតំបន់កម្សាន្ត ឬលំនៅដ្ឋានលំហែរ៕

ដំណឹងល្អៈកម្ពុជា-ចិនពិចារណាប្រើប្រាស់លិខិតបញ្ជាក់សុខភាពដើម្បីជំរុញការធ្វើដំណើរចេញចូលរវាងប្រទេសទាំងពីរ

ដោយៈ ប៊ី

ភ្នំពេញៈ លោកវ៉ាង វិនធានឯកអគ្គរដ្ឋទូតចិនប្រចាំនៅកម្ពុជា បានលើកឡើងនៅថ្ងៃនេះថា កម្ពុជា និងប្រទេសចិនបានពិចារណា ក្នុងការដាក់ឱ្យប្រើប្រាស់លិខិតបញ្ជាក់សុខភាពទម្រង់ជា «QR Code» សម្រាប់ការធ្វើដំណើរចេញចូលរវាង ប្រទេសទាំងពីរ។

ក្នុងពិធីប្រគល់ និងទទួលវ៉ាក់សាំងកូវីដ១៩ របស់ក្រុមហ៊ុនស៊ីណូវ៉ាក់ របស់ចិន ដែលកម្ពុជាបានបញ្ជាទិញ ដឹកមកដល់កម្ពុជានៅព្រឹកថ្ងៃទី២៦ ខែមីនា ឆ្នាំ២០២១ លោកវ៉ាង វិនធានបានថ្លែងថា ការធ្វើបែបនេះ ដើម្បីពន្លឿនដល់ការស្តារឡើងវិញ នូវទំនាក់ទំនង និងសេដ្ឋកិច្ចរវាងប្រទេសទាំងពីរ ដែលបានយាយីដោយជំងឺកូវីដ១៩ អស់រយៈពេលជាងមួយឆ្នាំមកហើយនោះ។

ទំនាក់ទំនងសេដ្ឋកិច្ច និងពាណិជ្ជកម្មរវាងកម្ពុជា និងចិន ត្រូវបានគេមើលឃើញមានសកម្មភាពយ៉ាងមមាញឹក នៅមុនពេលកើតមានជំងឺកូវីដ១៩។ ប៉ុន្តែនៅពេលជំងឺកូវីដ១៩ កើតមាននៅក្នុងប្រទេសចិនកាលពីចុងឆ្នាំ២០១៩ និងកើតមាននៅកម្ពុជាឆ្នាំ២០២០ បានធ្វើឱ្យរាំងស្ទះដល់ការធ្វើទំនាក់ទំនង នៃប្រជាជនប្រទេសទាំងពីរ ក៏ដូចជាប៉ះពាល់ទៅលើវិស័យទេសចរ និងការធ្វើពាណិជ្ជកម្មផងដែរ។

កម្ពុជា និងចិន បានបង្កើតកិច្ចសហប្រតិបត្តិការនឹងគ្នាយ៉ាងជិតស្និទ្ធ ដើម្បីប្រយុទ្ធប្រឆាំងជំងឺកូវីដ១៩។ ជាពិសេសកំពុងបង្កើនការចាក់វ៉ាក់សាំង ជូនប្រជាពលរដ្ឋ ដោយរំពឹងថា វ៉ាក់សាំងនេះធ្វើឱ្យទំនាក់ទំនងសេដ្ឋកិច្ច និងពាណិជ្ជកម្ម រវាងប្រទេសទាំងពីរអាចវិលរកភាពប្រក្រតីឡើងវិញ។

លោកវ៉ាង វិនធាន បានទម្លាយពីគំនិតផ្តួចផ្តើមរបស់លោក ស៊ី ជិនពីង ប្រធានាធិបតីចិន លើការទទួលស្គាល់ទៅវិញទៅមកជាអន្តរជាតិ នូវលិខិតបញ្ជាក់សុខភាពដោយឈរលើមូលដ្ឋានតេស្តរកមេរោគក្រោមទម្រង់ QR Code។

បើតាមលោកឯកអគ្គរដ្ឋទូត យន្តការនេះ ក៏កំពុងពិចារណាអនុវត្តរវាងកម្ពុជា និងចិនផងដែរ។ លោក វ៉ាង វិនធាន បានបញ្ជាក់ថា “យើងក៏មានកិច្ចសហការជាមួយប្រទេសកម្ពុជា ក្នុងការគិតពិចារណាធ្វើការងារទ្វេភាគី ដើម្បីជំរុញការធ្វើដំណើរទៅវិញទៅមកមានភាពងាយស្រួលប្រកបដោយសុវត្ថិភាព និងសណ្តាប់ធ្នាប់សម្រាប់សិស្សនិស្សិត អ្នកវិនិយោគ អ្នកទេសចរ និងបុគ្គលដទៃទៀត”។

លោកវ៉ាង វិនធាន ក៏បានអះអាងផងដែរថា ការធ្វើបែបនេះ ដើម្បីជំរុញការស្តារឡើងវិញនូវទំនាក់ទំនង និងកិច្ចសហប្រតិបត្តិការជាប្រក្រតី លើគ្រប់វិស័យនៃប្រទេសទាំងពីរឱ្យកាន់តែឆាប់រហ័ស៕

រដ្ឋាភិបាលសម្រេចអនុម័តគម្រោងថ្មីៗចំនួន៥បោះទុនវិនិយោគជិត១៣០០លាន ដុល្លារនៅថ្ងៃនេះ

ដោយៈ ប៊ី

ភ្នំពេញៈ រាជរដ្ឋាភិបាល តាមក្រុមប្រឹក្សាអភិវឌ្ឍន៍កម្ពុជា (CDC) បានសម្រេចអនុម័តគម្រោងវិនិយោគចំនួន៥ ដែលបោះទុនវិនិយោគ១.២៩៩,៧លានដុល្លារ ឬ១,២៩ពាន់លានដុល្លារ និងបង្កើតការងាររាប់ពាន់កន្លែងដល់ប្រជាជនក្នុងស្រុក។ នេះបើយោងតាមសេចក្តីប្រកាសព័ត៌មានរបស់ CDC នៅថ្ងៃទី២៦ ខែមីនា ឆ្នាំ២០២១។

តាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជា និងគណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរ ជូនដល់ក្រុមហ៊ុនដូចជា

ទី១ ក្រុមហ៊ុនISLAND LABORATOIRE CO., LTD. គម្រោងបង្កើតរោងចក្រផលិតឱសថ ដែលមានទីតាំងវិនិយោគស្ថិតនៅភូមិបាក់ខែងលើ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ មានទុនវិនិយោគប្រមាណ៦,៣លានដុល្លារអាមេរិក និងអាចបង្កើតការងារបានចំនួន ២៦០កន្លែង។

ទី២ ក្រុមហ៊ុន- “FANG HUA POLYURETHANE MATERIAL (CAMBODIA) CO., LTD” គម្រោងបង្កើតរោងចក្រផលិតអេប៉ុងស៍ ខ្នើយ គ្រែសាឡុងពូក និងគ្រឿងសង្ហារឹម ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ ខេត្តព្រះសីហនុ, មានទុនវិនិយោគចំនួន១លានដុល្លារអាមេរិក និងអាចបង្កើតការងារបានចំនួន ៤២០កន្លែង។

ទី៣-ក្រុមហ៊ុន “HERBA (CAMBODIA) CO., LTD” គម្រោងបង្កើតរោងចក្រកែច្នៃ និងវេចខ្ចប់ផលិតផលកសិកម្ម ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេសភ្នំពេញ មានទុនវិនិយោគប្រមាណ៣,៦លានដុល្លារអាមេរិក និងអាចបង្កើតការងារបានចំនួន១២០កន្លែង។

ទី៤-ក្រុមហ៊ុន “ Y.T PLASTIC CO., LTD” គម្រោងរោងចក្រផលិតសម្ភារៈអគ្គិសនី អំពូលភ្លើង និងគ្រឿងបង្គុំអំពូលគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសសានដុង សាន់សែល ស្វាយរៀង, មានទុនវិនិយោគប្រមាណ ៥,៨លានដុល្លារអាមេរិក និងអាចបង្កើតការងារបានចំនួន ៩៣០កន្លែង។

ទី៥-ក្រុមហ៊ុន “HUADIAN SIHANOUKVILLE POWER GENERATION CO., LTD” គម្រោងរោងចក្រផលិតថាមពលអគ្គិសនី ប្រើដោយធ្យូងថ្ម អានុភាព ៧០០មេហ្កាវ៉ាត់ ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុទី១ ស្រុកស្ទឹងហាវ ខេត្តព្រះសីហនុ មានទុនវិនិយោគប្រមាណ១២៨៣លានដុល្លារអាមេរិក និងអាចបង្កើតការងារបានចំនួន ៥២០កន្លែង៕

ក្រុមហ៊ុនអចលនទ្រព្យធំមួយមកពីក្រុងហុងកុងគ្រោងពង្រីកការវិនិយោគនៅកម្ពុជា

ដោយៈវឌ្ឈនៈ

ភ្នំពេញៈ ក្រុមហ៊ុនអចលនទ្រព្យធំមួយ មានមូលដ្ឋាននៅក្រុងហុងកុង គឺGCC ដែលមានជំនាញក្នុងវិស័យអភិវឌ្ឍអចលនទ្រព្យ វិនិយោគដីធ្លី និងសេវាកម្មហិរញ្ញវត្ថុ បានបង្ហាញពីគំរោងពង្រីកទំហំវិនិយោគរបស់ខ្លួន ក្នុងវិស័យអចលនទ្រព្យនៅក្នុងប្រទេសកម្ពុជា។

យោងតាមសេចក្តីប្រកាសព័ត៌មាន របស់ក្រុមហ៊ុនមួយនេះបានឱ្យដឹងថា បច្ចុប្បន្នក្រុមហ៊ុនGCC បានបណ្ដាក់ទុនវិនិយោគនៅក្នុងប្រទេសកម្ពុជា លើផ្នែកអភិវឌ្ឍលំនៅឋាន ផ្សារទំនើបខ្នាតតូច នៅក្នុងរាជធានីភ្នំពេញ និងនៅខេត្តព្រះសីហនុ ។

សេចក្តីប្រកាសបានបញ្ជាក់ថា ដើម្បីពង្រីកនូវការវិនិយោគរបស់ខ្លួននៅក្នុងប្រទេសកម្ពុជាបន្ថែមទៀតនោះ ក្រុមហ៊ុនបានបង្កើតក្រុមហ៊ុនបុត្រសម្ព័ន្ធបន្ថែមទៀត ដើម្បីផ្ដល់សេវាកម្មថែទាំទ្រព្យសម្បត្តិរបស់អតិថិជន នៅក្នុងបុរីណាឌី ជ្រោយចង្វារ ។

លោកអេរិច ឆុងអគ្គនាយកនៃក្រុមហ៊ុនបុរីណាឌី បានឱ្យដឹងថា GCC ជាអ្នកអភិវឌ្ឍន៍គម្រោង ដែលមានការយកចិត្តទុកដាក់ និងមានទំនុកចិត្តខ្ពស់ ក្នុងការផ្ដល់ជូនសេវាកម្មសម្រាប់អតិថិជនរបស់ខ្លួន ។ការអភិវឌ្ឍរបស់ខ្លួន នៅក្នុងតំបន់ជ្រោយចង្វារនេះឡើង ដោយបានមើលឃើញ ពីសក្ដានុពលនៅក្នុងតំបន់នោះផ្ទាល់ ដែលជាទីតាំងមានគម្រោងអភិវឌ្ឍន៍ជាច្រើន ខ្លះបានបញ្ចប់ការសាងសង់ និងខ្លះទៀតកំពុងសាងសង់ ដូចជាពហុកីឡដ្ឋានជាតិមរតកតេជោ ភ្នំពេញ សាហ្វារី វិមានឈ្នះឈ្នះ សួនដាយណូស័រ ក្លឹបវាយកូនហ្គោលហ្គាដិនស៊ីធី ទីក្រុងរណបជ្រោយចង្វារជាដើម ។

លោកបន្តថា បន្ថែមពីការអភិវឌ្ឍលំនៅឋានជូនពលរដ្ឋកម្ពុជាហើយ ការធ្វើឱ្យអតិថិជនរស់នៅស្រួល មានផាសុខភាពផ្លូវកាយ និងផ្លូវចិត្ត គឺជាចក្ខុវិស័យរបស់ខ្លួនក្នុងអនាគត ។ការពង្រីកការវិនិយោគ ដើម្បីថែទាំទ្រព្យរបស់អតិថិជន គឺជាកត្តាចាំបាច់របស់ខ្លួន ។

យោងតាមអ្នកជំនាញ នៃវិស័យអចលនទ្រព្យកម្ពុជាជាច្រើនព្យាករណ៍ថា តម្រូវការលំនៅឋាន នៅក្នុងប្រទេសកម្ពុជា នឹងនៅតែមានខ្ពស់នៅពេលអនាគត ដោយសារតែកំណើននៃប្រជាពលរដ្ឋ ជាពិសេសនៅក្នុងរាជធានីភ្នំពេញ និងទាមទារឱ្យមានការវិនិយោគបន្ថែមទៀតពីសំណាក់វិនិយោគិនក្នុងនិងក្រៅប្រទេស។

ការសិក្សារបស់ក្រសួងរៀបចំដែនដី នគរូបនីយកម្ម និងសំណង់បានបង្ហាញថា គិតពីឆ្នាំ២០១៥ ដល់ត្រឹមឆ្នាំ២០៣០ខាងមុខ កម្ពុជាត្រូវការលំនៅដ្ឋានជាង៨០ម៉ឺនខ្នង ស្របពេលចំនួនប្រជាពលរដ្ឋរស់នៅតាមទីក្រុង និងទីប្រជុំជននានានឹងកើនដល់៧លាននាក់៕

1...2,0012,0022,003...3,260 Page 2,002 of 3,260