ដោយៈគង់ សូរិយា

        ភ្នំពេញៈ អាជ្ញាធរខេត្តមណ្ឌលគិរី បានចាត់វិធានការណ៍៍ ដើម្បីចុះស្រាវជ្រាវ និងចាត់វិធានការទប់ស្កាត់សកម្មភាព បំពានរំលោភយកដីសម្ការស្រល់របស់ក្រុមហ៊ុន អ៊ូជីសាន អិលអេសគ្រុប ខូអិលធីឌី និងក្រុមហ៊ុន ហួលីង។

លោកជាក់ ម៉េងហ៊ាង អភិបាលរងខេត្ត និងលោកស៊ន សារុន នាយករដ្ឋបាលសាលាខេត្តមណ្ឌលគិរី រួមទាំងមន្ត្រីជំនាញ បានចុះពិនិត្យ និងផ្ទៀងផ្ទាត់លើទីតាំងដី ដែលបានដកហូតពីការកាន់កាប់ ដោយខុសច្បាប់តាមដីកាលេខ ០០៧/១៩ ដក .បក ចុះថ្ងៃទី២៣ ខែសីហា ឆ្នាំ២០១៩ ដែលមានទំហំចំនួន៤៧២,៨០៩ហិកតា របស់រដ្ឋបាលខេត្តមណ្ឌលគិរី ស្ថិតនៅភូមិពូរ៉ាង ឃុំសែនមនោរម្យ ស្រុកអូររាំង ខេត្តមណ្ឌលគិរី។

លោកជាក់ ម៉េងហ៊ាង អភិបាលរងខេត្តបានឲ្យដឹងថា បន្ទាប់ពីមានគោលការណ៍ណែនាំពីលោក ស្វាយ សំអ៊ាង អភិបាលខេត្តមណ្ឌលគិរី ក្រុមការងារចម្រុះមួយ ត្រូវបានបង្កើតឡើងដើម្បីចុះស្រាវជ្រាវ និងចាត់វិធានការទប់ស្កាត់សកម្មភាព បំពានរំលោភយកដីសម្ការស្រល់របស់ក្រុមហ៊ុន អ៊ូជីសាន អិលអេសគ្រុប ខូអិលធីឌី និងក្រុមហ៊ុនហួលីង។

អភិបាលរងខេត្តបន្តថា “បន្ទាប់ពីក្រុមការងារចម្រុះ បានចុះផ្ទៀងផ្ទាត់ និងពិនិត្យជាក់ស្តែង ក៏បានរកឃើញមានដីធ្លីមួយចំនួន មានការចូលទៅគ្រប់គ្រងដោយខុសច្បាប់ ហើយដីខ្លះទៀត ជាដីអាស្រ័យផលរបស់ប្រជាពលរដ្ឋក្នុងមូលដ្ឋាន ដែលត្រូវកាត់ជ្វៀល ជូនពួកគាត់ ដើម្បីបញ្ចប់វិវាទដីធ្លីដែលកើតកាលកន្លងទៅ”។

នៅក្នុងកិច្ចសន្យាប្រគល់ដីចំនួន៤៧២ហិកតា ដែលរដ្ឋបាលខេត្ត បានដកហូតពីការកាន់កាប់ដោយខុសច្បាប់តាមដីកាលេខ០០៧/១៩ ដក .បក ចុះថ្ងៃទី២៣ ខែសីហា ឆ្នាំ២០១៩ ស្ថិតនៅភូមិពូរ៉ាង ឃុំសែនមនោរម្យ ស្រុកអូររាំង រវាងក្រុមហ៊ុនអ៊ូជីសាន អិលអេសគ្រុប ខូអិលធីឌី ជាមួយ និងគណៈកម្មការខេត្ត បានចុះពិនិត្យផ្ទៀងផ្ទាត់ផ្ទៃក្បាលដី ដល់ទីតាំងជាក់ស្តែង តាមខ្លឹមសារនៃដីកាដកហូតលេខ០០៧/១៩ ដោយអញ្ជើញក្រុមហ៊ុនចូលរួម ដែលមានលោក ចាន់ ប៊ុនថុល តំណាងឲ្យក្រុមហ៊ុន អ៊ូជីសាន។

ក្នុងកិច្ចសន្យាដដែលនេះ តំណាងក្រុមហ៊ុន បានសន្យាចំពោះមុខគណៈកម្មការ និង​សមត្ថកិច្ចចម្រុះនៃរដ្ឋបាលខេត្តមណ្ឌលគិរី ដែលបានចុះពិនិត្យផ្ទៀងផ្ទាត់ ផ្ទៃដីសម្បទានសេដ្ឋកិច្ច របស់ក្រុមហ៊ុនដល់ទីតាំងជាក់ស្តែង និងបានបញ្ជាក់បន្ថែមថា ក្រុមហ៊ុនទទួលយកផ្ទៃដី ដែលបានចែងតាមខ្លឹមសារនៃការដកហូតខាងលើ មានទំហំផ្ទៃដីចំនួន៤៧២ហិកតា ដើម្បីថែរក្សាការពារ និងគោរពលក្ខខណ្ឌដូចជា ក្រុមហ៊ុនត្រូវធ្វើការកាយប្រឡាយក្រវ៉ាត់ព្រំជុំវិញដីលើផ្ទៃដី៤៧២ហិកតា លើកស្លាកប៉ាណូផ្សព្វផ្សាយពីព្រំដីបរិវេណដែលបានដកហូត ដកបង្គោលរបងជាវត្ថុតាងល្មើសទាំងអស់ ដឹកជញ្ជូនយកទៅរក្សាទុកនៅស្នាក់ការ សង្កាត់រដ្ឋបាលព្រៃឈើអូររាំង។

មិនត្រឹមតែប៉ុណ្ណោះក្រុមហ៊ុន ត្រូវទទួលខុសត្រូវ និងម្ចាស់ស្វ័យការពារផ្ទៃដី ដែលខ្លួនបានទទួលទាំងអស់៤៧២ហិកតា ជាពិសេស ពេលចុះអនុវត្តដកបង្គោលរបងចាស់ ដាំបង្គោលថ្មី និងកាយព្រំប្រឡាយ ក្រុមហ៊ុនត្រូវធ្វើលិខិតស្នើសុំសមត្ថកិច្ច សហការជៀសវាងមានបញ្ហានានា៕

ដោយៈគង់ សូរិយា

ភ្នំពេញៈ លោក វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ នៅថ្ងៃទី២៦ ខែមីនា ឆ្នាំ២០២១នេះ បានបញ្ជាក់ឲ្យដឹងថា កម្ពុជាមានធនធានថវិកាគ្រប់គ្រាន់ សម្រាប់ការទប់ទល់នៃវិបត្ដិកូវីដ-១៩ ក្នុងរយៈពេល២ឆ្នាំខាងមុខទៀត។

ការបញ្ជាក់ឲ្យដឹងបែបនេះ ធ្វើឡើងក្នុងឱកាសដែល លោក វង្សី វិស្សុត តំណាងសម្តេចតេជោ ហ៊ុន សែន នាយករដ្ឋមន្ត្រីកម្ពុជា អញ្ជើញទទួលវ៉ាក់សាំង (Sinovac) របស់ចិនប្រមាណជា១.៥លានដូស នៅអាកាសយានដ្ឋានអន្តរជាតិភ្នំពេញ នាព្រឹកថ្ងៃទី២៦ ខែមីនា ឆ្នាំ២០២១នេះ។

លោកបន្តថា “ខ្ញុំថាបើសិនជាកូវីដ-១៩ នៅតែបន្ដត្រឹមឆ្នាំនេះ និងឆ្នាំក្រោយទេ យើងនឹងមានធនធានគ្រប់គ្រាន់សម្រាប់ទប់ទល់”។

ទោះបីជាយ៉ាងនេះក្ដី លោក វង្សី វិស្សុត ក៏បានឲ្យដឹងផងដែរថា ប៉ុន្ដែបើសិនជាជំងឺកូវីដនេះ នៅតែបន្ដរីករាលដាលហួសពីឆ្នាំនេះ និងឆ្នាំក្រោយទៀតនោះ លោកមិនទាន់ហ៊ានធានាអំពីធនធាននោះទេ ដោយតែបញ្ហានេះមិនមែនតែបញ្ហារបស់កម្ពុជានោះទេ គឺជាបញ្ហាពិភពលោកទាំងមូល។

ចំពោះការវាយតម្លៃ ពីស្ថានភាពសេដ្ឋកិច្ច ក្នុងឆ្នាំ២០២១នេះ លោកវង្សី វិស្សុត បានប្រាប់ថា លោកមិនទាន់អាចវាយតម្លៃនោះឡើយ ដោយត្រូវរកចាំមើលសិន ចំពោះការរីករាលដាលនៃជំងឺកូវីដ-១៩ ព្រឹត្ដិការណ៍សហគមន៍ ២០កុម្ភៈ បន្ដធ្ងន់ធ្ងរកម្រិតណា។

លោក វង្សី វិស្សុត បានថ្លែងថា យើងមិនអាចវាយតម្លៃ បានលឿនពេកនោះទេ យើងត្រូវរកចាំមើលសិន ប៉ុន្ដែបើសិនជានៅបន្ដយូរ វាអាចនឹងប៉ះពាល់ ដល់កំណើនសេដ្ឋកិច្ច របស់ប្រទេសយើង ហើយក៏ប៉ះពាល់ដល់ជីវភាពប្រជាជន”។

កញ្ចប់ថវិកា១,១៦៤លានដុល្លារ ដែលរាជរដ្ឋាភិបាលកម្ពុជា បានបម្រុងសម្រាប់ដោះស្រាយបញ្ហាជំងឺកូវីដ-១៩ និងស្ដារសេដ្ឋកិច្ចជាតិ ក្នុងឆ្នាំ២០២០ បានប្រើប្រាស់អស់មួយចំនួនធំហើយ ខណៈថវិកានៅសល់នឹងត្រូវបន្តចំណាយសម្រាប់ឆ្នាំ២០២១នេះ។

ឆ្នាំ២០២១នេះ រាជរដ្ឋាភិបាលកម្ពុជា បានត្រៀមបម្រុងកញ្ចប់ថវិកាជាង៨០០លានដុល្លារថែមទៀត សម្រាប់ជួយដោះស្រាយបញ្ហាវិបត្តិជំងឺកូវីដ១៩ និងស្ដារសេដ្ឋកិច្ចកម្ពុជា ក្រោយកូវីដ-១៩៕

ដោយៈ រ៉ាណេត

ភ្នំពេញៈ នៅក្នុងបរិបទដែលកម្ពុជា ទទួលរងនូវការគំរាមកំហែងពីវិបត្តិសេដ្ឋកិច្ចដែលបណ្តាលមកពីជំងឺឆ្លងកូវីដ១៩ សម្រាប់តម្លៃនៃផលិតផលសរុប នៅក្នុងវិស័យឧស្សា​ហកម្មសម្រាប់ផ្គត់ផ្គង់ទីផ្សារទាំងក្នុង និងក្រៅស្រុកសម្រេចបានជាង៩៦០០លានដុល្លារក្រោមដំណើរប្រតិបត្តិការបណ្តារោងចក្រ សហគ្រាសតូចធំសរុបជិត២០០០ទីតាំងនៅទូទាំងប្រទេស។

រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោកហេង សុខគង់ បានមានប្រសាសន៍នៅថ្ងៃទី២៦ ខែមីនា ឆ្នាំ២០២១នេះថា តម្លៃផលិត​ផលសរុបនៃរោងចក្រ សហគ្រាសទាំងអស់នៅកម្ពុជា ឆ្នាំ២០២០ មានទំហំទឹកប្រាក់ជាង៩៦០០លានដុល្លារ ដោយក្នុងនោះមានតម្លៃនៃការផ្គត់ផ្គង់ ទីផ្សារក្នុងស្រុកមានចំនួនជាង៣២០០លានដុល្លារ ខណៈដែលតម្លៃនៃការផ្គត់ផ្គង់ទីផ្សារនាំចេញ លើផលិតផលផ្នែកកម្មន្តសាលនេះមានទំហំជាង៦៣០០លានដុល្លារអាមេរិក។

លោកបន្តថា “តម្លៃដែលបានថមថយចុះនេះ ដោយសារតែនៅក្នុងឆ្នាំ២០២០ ពិភពលោក បានជួបនឹងវិបត្តិនៃការរីករាលជម្ងឺកូវីដ-១៩ ដោយក្នុងនោះប្រទេសចិនបានផ្អាកការនាំវត្ថុធាតុដើម ព្រោះចិនជាទីផ្សារបម្រើផលិតផល និងវត្ថុធាតុដើមពិភពលោក”។លោកបន្តថា “ដោយឡែកសម្រាប់កម្ពុជា ដោយសារមានទំនាក់ទំនងល្អជាមួយប្រទេសចិន ទើបយើងក៏ទទួលបានការនាំចូលវត្ថុធាតុដើមមុនគេ សម្រាប់បម្រើទីផ្សារក្នុងស្រុក ដូច្នេះនៅក្នុងឆ្នាំ ២០២១នេះរំពឹងថា តម្លៃបរិមាណផលិតផលនឹងមានការកើនឡើង”។

លោកហេង សុខគង់ បានបញ្ជាក់ឲ្យដឹងថា នៅក្នុងឆ្នាំ ២០២០ ការអភិវឌ្ឍន៍វិស័យរោងចក្រ សហគ្រាស ក្នុងនោះរោងចក្រធុនធ្ងន់ដែលបានដំណើរការ មានចំនួន១ ៨៦៤ រោងចក្របានកើនឡើងជាង៧ភាគរយ បើធៀបទៅឆ្នាំ២០១៩ រោងចក្រកកើតថ្មីមានចំនួន២៣៥រោងចក្រ ថយចុះជាង១២ភាគរយ រោងចក្របិទទ្វារមានចំនួន១០១រោងចក្រ កើនឡើងជាង៥០ភាគរយ និងរោងចក្រដែលបានផ្អាក និងព្យួរការងារក្រោមឥទ្ធិពលជំងឺកូវីដ១៩ទាំងក្នុងរយៈពេលខ្លី និងវែងមានចំនួន៣៩២រោងចក្រ បើធៀបទៅនឹងរយៈពេលដូចគ្នាក្នុងឆ្នាំ២០១៩ ៕

ដោយៈ រ៉ាណេត

ភ្នំពេញៈ រដ្ឋបាលរាជធានីភ្នំពេញ នឹងធ្វើការស្ថាបនាផ្លូវ និងច្រាំងទន្លេត្រើយខាងកើតអំពីបេតុងចាប់ពីគល់ស្ពានព្រះមុនីវង្សចាស់ ក្នុងសង្កាត់ច្បារអំពៅទី២ រហូតដល់តំបន់អភិវឌ្ឍកោះនរាក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ដើម្បីលើកកម្ពស់សោភ័ណភាព ការពារការបាក់ច្រាំងទន្លេ។

យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញ នៅថ្ងៃទី២៦ ខែមីនា ឆ្នាំ២០២១នេះបានឱ្យដឹងថា ដើម្បីលើកកម្ពស់សោភ័ណភាព ការពារការបាក់ច្រាំងទន្លេ ដោះស្រាយលំហូរចរាចរ និងរៀបចំសណ្តាប់ធ្នាប់ នៅតាមច្រាំងទន្លេត្រើយខាងកើត ក្នុងភូមិសាស្រ្តខណ្ឌច្បារអំពៅ នៃរាជធានីភ្នំពេញ សម្រាប់បម្រើឱ្យប្រយោជន៍សាធារណៈនោះ រដ្ឋបាលរាជធានីភ្នំពេញនឹងចាប់ផ្តើមស្ថាបនាផ្លូវ និងច្រាំងទន្លេត្រើយខាងកើតអំពីបេតុង ចាប់ពីគល់ស្ពានព្រះមុនីវង្សចាស់ ក្នុងសង្កាត់ច្បារអំពៅទី២ រហូតដល់តំបន់អភិវឌ្ឍកោះនរា ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ចាប់ពីថ្ងៃទី០៥ ខែមេសា ឆ្នាំ២០២១តទៅ។

សេចក្តីជូនដំណឹងដដែលបានឱ្យដឹងទៀតថា ដើម្បីឱ្យការអនុវត្តគម្រោងស្ថាបនាហេដ្ឋារចនាសម្ព័ន្ធសាធារណៈខាងលើ ដំណើរការទៅដោយរលូន ស្របតាមប្រតិទិនការងារដែលបានគ្រោងទុក រដ្ឋបាលរាជធានីភ្នំពេញ ស្នើបងប្អូនប្រជាពលរដ្ឋដែលមានការពាក់ព័ន្ធនឹងដីចំណីទន្លេ ត្រង់ទីតាំងអនុវត្តគម្រោង ត្រូវបង្កលក្ខណៈងាយស្រួល និងផ្តល់កិច្ចសហការល្អ ដល់ក្រុមមន្ត្រីជំនាញរបស់រដ្ឋបាលរាជធានីភ្នំពេញ ដែលចុះអនុវត្តការងារខាងលើ។

រដ្ឋបាលរាជធានីភ្នំពេញសង្ឃឹមជឿជាក់ថា បងប្អូនប្រជាពលរដ្ឋ ដែលមានការពាក់ព័ន្ធនឹងដីចំណីទន្លេ ត្រង់ទីតាំងអនុវត្តគម្រោងខាងលើ នឹងចូលរួមសហការជាមួយរដ្ឋបាលរាជធានីភ្នំពេញ ដើម្បីឱ្យការអនុវត្តការងារស្ថាបនាផ្លូវ និងច្រាំងទន្លេនេះ ទទួលបានជោគជ័យ។

បន្ថែមពីនេះ ស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ រដ្ឋបាលខណ្ឌច្បារអំពៅ មន្ទីរសាធារណការ និងដឹកជញ្ជូនរាជធានីភ្នំពេញ  អង្គភាពពាក់ព័ន្ធនានា ចំណុះរដ្ឋបាលរាជធានីភ្នំពេញ សាធារណជន និងបងប្អូនប្រជាពលរដ្ឋទាំងអស់ជ្រាប និងចូលរួមអនុវត្តន៍ឱ្យមានប្រសិទ្ធភាពខ្ពស់៕

        ដោយៈគង់ សូរិយា

        ភ្នំពេញៈ ទិន្នន័យបណ្តោះអាសន្នពីការសាកល្បង ដំណាក់កាលចុងក្រោយនៅប្រទេសទួរគី បានបង្ហាញថា វ៉ាក់សាំងការពារជំងឺកូវីដ១៩ ដែលបង្កើតឡើងដោយក្រុមហ៊ុន Sinovac Biotech របស់ប្រទេសចិន  មានប្រសិទ្ធភាព៩១,២៥ភាគរយ។

លទ្ធផលដ៏ប្រសើរនេះ មានភាពល្អប្រសើរជាងការសាកល្បងមួយ ដាច់ដោយឡែក ដែលគេរាយការណ៍នៅក្នុងប្រទេសប្រេស៊ីល។

ក្រុមអ្នកស្រាវជ្រាវទួរគីបាននិយាយថា “មិនមានផលប៉ះពាល់ធ្ងន់ធ្ងរណាមួយ ត្រូវបានគេឃើញក្នុងពេលសាកល្បងទេ ពោលគឺមានមនុស្សតែម្នាក់ប៉ុណ្ណោះ ដែលមានប្រតិកម្មអាឡ័កស៊ី”។ ពួកគេនិយាយថា “ផលប៉ះពាល់ទូទៅដែលបណ្តាលមកពីវ៉ាក់សាំងនេះមានដូចជាគ្រុនក្តៅ ឈឺតិចតួចនិងអស់កម្លាំងបន្តិច”។

ក្រុមអ្នកស្រាវជ្រាវបាននិយាយថា ការសាកល្បងនៅទួរគី បានចាប់ផ្តើមកាលពីថ្ងៃទី១៤ខែកញ្ញា និងមានការចូលរួមពីអ្នកស្ម័គ្រចិត្តជាង៧,០០០នាក់។ លទ្ធផលដែលប្រកាសនេះ គឺផ្អែកទៅលើទិន្នន័យពីមនុស្សចំនួន១,៣២២នាក់។

Sinovac ជាក្រុមហ៊ុនផលិតវ៉ាក់សាំងចិនដំបូងបង្អស់ ដែលបញ្ចេញព័ត៌មានលម្អិតពីការសាកល្បងដំណាក់កាលចុងក្រោយ បន្ទាប់ពីការបញ្ចេញលទ្ធផលវិជ្ជមានពីផលិត​ផលជាគូប្រជែង ដែលបង្កើតដោយក្រុមហ៊ុន Pfizer, Moderna និង AstraZeneca កាលពីខែមុន។

ប្រទេសទួរគី បានទិញវ៉ាក់សាំងរបស់ក្រុមហ៊ុន Sinovac ចំនួន៥០លានដូសរួចទៅហើយ។

នៅ​ព្រឹក​ថ្ងៃទី​២៦ ខែមីនា ឆ្នាំ​២០២១​នេះ វ៉ាក់សាំង​ប្រភេទ Sinovac របស់​សាធា​រណរដ្ឋ​ប្រជាមានិត​ចិន​ចំនួន​១.៥​លាន​ដូ​ស ដែល​រដ្ឋាភិបាល​កម្ពុជា​បាន​បញ្ជា​ទិញ​ពី​ប្រទេ​ស​ចិន នឹង​មកដល់​អាកាសយានដ្ឋាន​អន្តរជាតិ​ភ្នំពេញ​ហើយ តាម​ជើងហោះហើរ​របស់​ក្រុមហ៊ុន​អាកាសចរណ៍ China Southern​។

ពិធី​ទទួល​វ៉ាក់សាំង​នេះ នឹងធ្វើ​ឡើង​ក្រោម​វត្តមាន​របស់លោក វ​ង្ស៊ី វិស្សុត រដ្ឋមន្ត្រី​ប្រតិភូ​អម​នាយករដ្ឋមន្ត្រី និង​ជា​រដ្ឋលេខាធិការ​ក្រសួង​សេដ្ឋកិច្ច និង​ហិរញ្ញវត្ថុជា​តំណាង​រាជរដ្ឋាភិបាល​កម្ពុជា ចំណែកឯ​ភាគី​ចិន តំណាង​ដោយ​លោក វ៉ាង វិ​ន​ធាន ឯកអគ្គរដ្ឋទូត​ចិន​ប្រចាំ​កម្ពុជា ហើយក៏​នឹង​មាន​ការចូលរួម​ពី​អ្នក​ពាក់ព័ន្ធ​ជា​ច្រើន​ទៀតផង​ដែរ​៕

        ដោយៈគង់ ម៉ាលីនណា

        កែបៈ គំរោងអភិវឌ្ឍន៍សំខាន់ៗចំនួន៤បាននិងកំពុងបន្តដំណើរការសាងសង់ នៅក្នុងខេត្តកែប ទោះបីស្ថិតក្នុងវិបត្តិកូវីដ១៩ក្តី ប៉ុន្តែការសាងសង់គម្រោងហេដ្ឋារចនាសម្ព័ន្ឋទេសចរណ៍ដំណាក់កាលទី២មិនបានផ្អាកនោះទេ។

អភិបាលខេត្តកែប លោកសោម ពិសិដ្ឋបានចុះពិនិត្យវឌ្ឍនភាពនៃគំរោងទាំងនោះ​បានមានប្រសាសន៍ឲ្យដឹងកាលពីថ្ងៃម្សិលម៉ិញនេះថា បើទោះបីស្ថិតក្នុង ដំណាក់កាលរួមគ្នាទប់ស្កាត់ជំងឺកូវីដ-១៩ ក៏ខេត្តនៅបន្តគម្រោងអភិវឌ្ឍន៍តាមផែនការដដែល ដោយគម្រោ​ងអភិវឌ្ឍន៍ជាច្រើនរបស់ខេត្ត​ បាននិងកំពុងដំណើរការសាងសង់យ៉ាងមរមាញឹក ដូចជា គម្រោងផ្សាររាត្រី(ខាងត្បូងផ្សារក្តាម)​ កំពុងផែរទេសចរណ៍កោះទន្សាយ កំណាត់ផ្លូវអ៊ុតកៅស៊ូ AC ,ផ្លូវDBST និងផ្លូវបេតុងជាច្រើនខ្សែនៅទូទាំងខេត្ត ជាពិសេសគម្រោងហេដ្ឋារចនាសម្ព័ន្ធទេសចរណ៍ជំហានទី២នេះ គឺជាគម្រោងទីលានចាក់សម្រាម ក្រោមឥណទានរបស់ធនាគារអភិវឌ្ឍន៍អាស៊ី (ADB)។

លោកបន្ថែមថា ការដ្ឋានសាងសង់ទីលានចាក់សម្រាមទំហំ៨ហិចតានេះ នឹងជួយឱ្យ ខេត្តកែប មានទីតាំងទុកដាក់សម្រាមប្រកបដោយស្តង់ដា និងអាចគ្រប់គ្រងបរិស្ថានបានកាន់តែល្អប្រសើរ ក្នុងការកែលម្អរសោភ័ណភាពខេត្ត និងរក្សាបាននូវ និរន្តរភាពបរិស្ថាន ជាខេត្តដែលមាន​ ដីស្អាត ទឹកស្អាត និងខ្យល់ស្អាត”។

លោកអភិបាលខេត្តសង្កត់ធ្ងន់ថា ដើម្បីបំពេញសម្បទាជាខេត្ត គោលដៅទេសច​រណ៍សម្រាកលំហែរប្រណីតកម្រិតខ្ពស់ ស្របតាមចក្ខុវិស័យរបស់រាជរដ្ឋាភិបាលកម្ពុជា រដ្ឋបាលខេត្តកែប​ បានធ្វើការយ៉ាងជិតស្និតជាមួយគណ:កម្មការអន្តរក្រសួង ក្នុងការកសាងផែនការអភិវឌ្ឍន៍វិស័យទេសចរណ៍ខេត្តកែប សម្រាប់ឆ្នាំជាបន្តបន្ទាប់ ដើម្បីជាត្រីវិស័យឆ្ពោះទៅការអភិវឌ្ឍខេត្តប្រកបដោយចិរភាព និងនិរន្តភាព សំដៅទាក់ទាញភ្ញៀវទេសច​រណ៍ទាំងក្នុងតំបន់ ក៏ដូចជាពិភពលោក។

ប្រធានសាងសង់គម្រោងទីលាន ចាក់សម្រាម នៅខេត្តកែប លោក ទិត្យ ទីគា បានអោយដឹងថា គម្រោងសាងសង់ទីលាននេះ បានដំណើរការតាំងពីចុងខែឧសភា ឆ្នាំ២០២០មកម្លេះ រហូតមកដល់ពេលនេះ គម្រោងសាងសង់សម្រេចបាន៧៥%ហើយ ។ លោកបន្ថែមថា ជំហានទីមួយ គឺធ្វើការសាងសង់ផ្លូវបេតុង ប្រវែង៣៥០០ម៉ែត ទទឹង ៧ម៉ែត្រ រួមទាំងសំណង់សិល្បការ្យមួយចំនួនផងដែរ ជំហានទី២ គឺសាងសង់ អាងស្ទុកសម្រាមចំនួន៣ មកដល់ពេលនេះសម្រេចបានបីអាងហើយ ក្រៅពីនេះមានការងារសាងសង់អាគារញ៉ែកសម្រាម អគារបុគ្គលិក និងការអ៊ុតកៅស៊ូបាតអាងស្តុកសម្រាមផងដែរ ។ លោកប្រធានគម្រោងបញ្ជាក់ថា គម្រោងសាងសង់ទីលានចាក់សម្រាមនេះ គ្រោងនឹងបញ្ចប់នៅថ្ងៃទី១១ ខែតុលា ឆ្នាំ២០២១ខាងមុខ ហើយគ្រោងសាងសង់រួចទីលាននេះ​ និងអាចស្ទុកសម្រាមបានរយៈពេល២០ឆ្នាំ៕

        ដោយៈវឌ្ឈនៈ

ភ្នំពេញៈ នៅក្នុងពេលដែលវិបត្តិកូវីដ១៩ មិនទាន់មានសញ្ញាធូរស្រាលនៅឡើយ គាប់ជួនកម្ពុជាជួបប្រទះព្រឹត្តិការណ៍ឆ្លងចូលសហគមន៍២០ កុម្ភៈ ២០២១ រដ្ឋាភិបាលកម្ពុជាបានសម្រេច ផ្ដល់នូវការអនុគ្រោះសម្រាប់អាជីវកម្ម ដែលរងផលប៉ះពាល់ពីវិបត្តិកូវីដ១៩ ក្នុងនោះវិស័យទេសចរណ៍ ជាអ្នកទទួលរងផលប៉ះពាល់ពីវិបត្តិនេះធ្ងន់ជាង ដូច្នេះរដ្ឋាភិបាលក៏បានអនុគ្រោះដល់វិស័យនេះជាអាទិភាពផងដែរ។

យោងតាមសេចក្តីប្រកាសព័ត៌មានរបស់រាជរដ្ឋាភិបាលស្ដីពី វិធានការដើម្បីគ្រប់​គ្រងផលប៉ះពាល់លើវិស័យសំខាន់ៗ នៃសេដ្ឋកិច្ច ក្នុងបរិការណ៍នៃវិបត្តិបានឱ្យដឹងថា រដ្ឋាភិបាលបានសម្រេច លើកលែងការបង់ពន្ធប្រចាំខែគ្រប់ប្រភេទ ចំពោះផ្ទះសំណាក់ ស  ណ្ឋាការ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ដែលបានចុះបញ្ជីជាមួយអគ្គនាយកដ្ឋានពន្ធដារ និងមានសកម្មភាពអាជីវកម្មនៅតំបន់ចំនួន៧នៅកម្ពុជា។

សេចក្ដីប្រកាសដដែលបានបង្ហាញពីតំបន់ ដែលរដ្ឋាភិបាលបានផ្ដល់ការអនុគ្រោះ ចំពោះការលើកលែងពន្ធក្នុងនោះរួមមាន រាជធានីភ្នំពេញ ខេត្តសៀមរាប ខេត្តកំពត ខេត្តព្រះសីហនុ ខេត្តកែប ក្រុងបាវិតនៃខេត្តស្វាយរៀង និងក្រុងប៉ោយប៉ែតនៃខេត្តបន្ទាយមានជ័យ។

ប្រតិបត្តិករទេសចរជាច្រើន បានបញ្ចេញទស្សនៈរៀងខ្លួនជុំវិញ ការងើបឡើងវិញនៃវិស័យទេសចរណ៍ក្នុងឆ្នាំ២០២១នេះ។

លោក ធួន ស៊ីណាន ប្រធានសមាគមទីភ្នាក់ងារទេសចរណ៍អាស៊ីប៉ាស៊ីហ្វិកកម្ពុជាបានឱ្យដឹងថា ក្នុងឆ្នាំ២០២១នេះ វិស័យទេសចរណ៍មិនងើបឡើងវិញបាននោះទេ ខណៈជំងឺកូវីដ១៩ នៅតែចោទជាបញ្ហា និងបន្តឆ្លងរាលដាលនៅលើពិភពលោក។

លោកបន្តថា “បើទោះបីជាកម្ពុជាអាចទប់ស្កាត់ ការឆ្លងជំងឺកូវីដ១៩ ក្នុងប្រទេសបានក្ដី តែនៅលើពិភពលោកនៅតែបន្តឆ្លងដដែលនោះ ភ្ញៀវទេសចរអន្តរជាតិក៏មិនអាចចូលមកកម្ពុជាបានដែរ”។ លោកបន្តថា “គ្មានភ្ញៀវទេសចរណាមកទស្សនានៅកម្ពុជាត្រូវធ្វើចត្តាឡីស័ក១៤ថ្ងៃ សិនទើបអាចធ្វើដំណើរបាននោះទេ។ នៅពេលត្រលប់ទៅស្រុកគេវិញក៏ត្រូវធ្វើចត្តាឡីស័ក១៤ថ្ងៃទៀត ទើបមានសេរីភាព ដូច្នេះគេមិនចំណាយធ្វើដំណើរឆ្លងប្រទេសនោះទេ”។

ចំណែកលោកហូ វណ្ឌីទីប្រឹក្សានៃសមាគមទីភ្នាក់ងារទេសចរណ៍កម្ពុជា បានលើកឡើងថា មានតែគោលនយោបាយវ៉ាក់សាំងប៉ុណ្ណោះ ដែលអាចជួយដល់ទេសចរណ៍កម្ពុជាឱ្យងើបឡើងវិញ។ កម្ពុជាគួរបើកឱ្យទេសចរ ដែលចាក់វ៉ាក់សាំងរួចចូលមកហើយធ្វើចត្តាឡីស័កត្រឹមរយៈពេលខ្លី អាចធ្វើដំណើរទស្សនានៅតំបន់រមណីយដ្ឋាននានាបាន ។

លោកបន្តថា “បើសិនជាប្រទេសណាហ៊ានធ្វើបែបនេះមុនគេ ប្រទេសនោះនឹងទទួលបានភ្ញៀវទេសចរអន្តរជាតិមុនគេ និងផលប្រយោជន៍មុនគេផងដែរ”៕

ដោយៈគង់ សូរិយា

        ភ្នំពេញៈ ក្រុមហ៊ុនទូរគមនាគមន៍ចំនួន៤បានសហការគ្នា បង្កើតសមាសមាគម​ប្រតិបត្តិករ​ទូរគមនាគមន៍​នៅ​ព្រះរាជាណាចក្រ​កម្ពុជា (ATOC) ដើម្បីធ្វើការជិតស្និទ្ឋជាមួយរដ្ឋាភិបាល។

សមាគមនេះ ត្រូវ​បាន​ដាក់ឱ្យ​ដំណើរការ​ជា​ផ្លូវការ​ហើយ​កាលពី​ថ្ងៃទី​ ២៥ ខែ មីនា ឆ្នាំ​ ២០២១ ដែល​នេះ​គឺជា​ការបោះជំហាន​មួយ​ក្នុង​ការបង្កើត​សំឡេង​តែ​ ១ ​គត់ ដើម្បី​ទំនាក់ទំនង​ជាមួយ​ដៃគូ​ពាក់ព័ន្ធ​នានា និង​រាជរដ្ឋាភិបាល​ក្នុង​ការចូលរួម​ចំណែក​អភិវឌ្ឍ​ឧស្សាហកម្ម​ទូរគមនាគមន៍​នៅ​កម្ពុជា​។

ATOC ត្រូវបាន​បង្កើតឡើង​ដោយ​សមាជិក​ស្ថាបនិក​ចំនួន​ ៤ រួមមាន ក្រុមហ៊ុន Smart Axiata Co.,Ltd ក្រុមហ៊ុន CAMGSM Co.,Ltd ក្រុមហ៊ុន​ VIETTEL (Cambodia) Pte, Ltd និង​ក្រុមហ៊ុន South East Asia Telecom (Cambodia) Co., Ltd)​។ ATOC ក៏​បើកទទួល​ក្រុមហ៊ុន​ប្រតិបត្តិករ​ទូរគមនាគមន៍​ផ្សេងទៀត​ដើម្បី​ចូលរួម​ជា​សមាជិក​របស់ខ្លួន​ផងដែរ​។

សមាគមនេះបង្កើតឡើង មាន​គោលបំណង និង​គោលដៅ​សំខាន់ៗ​ធ្វើជា​អ្នកតំណាង​ស្របច្បាប់​ឱ្យដល់​សមាជិក​របស់ខ្លួន​ក្នុងការ​ទាក់ទង​ជាមួយ​តួអង្គ​ផ្សេង​ទៀត​នៅក្នុង​វិស័យ​ឯកជន និង​សាធារណៈ ការចែករំលែក និង​ការផ្លាស់ប្តូរ​គំនិត និង​ព័ត៌មាន ការធ្វើ​បច្ចុប្បន្នភាព​ច្បាប់ និង​បទប្បញ្ញត្តិ ការលើក​ឡើង និង​ការសម្ដែង​មតិ​ពី​ការបារម្ភ​របស់​សមាជិក​ខ្លួន ហើយ​ការផ្ដល់​យោបល់ និង​ការគាំទ្រ​ដល់​សមាជិក​របស់ខ្លួន​សម្រាប់​កិច្ចដំណើរការ​អាជីវកម្ម​របស់​ខ្លួន​ក្នុងប្រទេស​កម្ពុជា និង​ដើម្បី​ចូលរួម​ចំណែក​បន្ថែមទៀត​ក្នុង​ការអភិវឌ្ឍ​ឧស្សាហកម្ម​ទូរគមនាគមន៍​»​។ នេះ​បើ​យោង​តាម​សេចក្ដីប្រកាស​ព័ត៌មាន​។

លោកលី តៃសេង ប្រធាន ATOC បានឱ្យ​ដឹងថា សមាគម​នេះ​នឹង​ដើរតួនាទី​ដ៏សំខាន់​ក្នុង​ការធ្វើ​ការងារ​ជាមួយ​ភាគី​ពាក់ព័ន្ធ ក្រសួង និង​ស្ថាប័ន​របស់​រាជរដ្ឋាភិបាល​កម្ពុជា ដើម្បី​អភិវឌ្ឍ​ឧស្សាហកម្ម​មួយ​នេះ​ប្រកប​ដោយ​និរន្តរភាព​។

លោកបានថ្លែងថា “​វា​ជា​លើកដំបូង​ហើយ ​ដែល​សមាគម​ប្រតិបត្តិករ​ទូរគម​នាគមន៍​មួយ​នេះ ​ត្រូវបាន​បង្កើតឡើង​នៅកម្ពុជា​។ សមាគម​នេះ​នឹង​ដើរតួនាទី​យ៉ាងសំខាន់​នៅក្នុង​ការបង្កើត​សំឡេង និង​តំណាង​សម្រាប់​សមាជិក​របស់ខ្លួន​ មកពី​ឧស្សាហកម្ម​ទូរគម​នាគមន៍​នៅក្នុង​វេទិកា​រវាង​រដ្ឋាភិបាល និង​វិស័យ​ឯកជន និង​ក៏​ដើរតួ​នាទី​ជា​វេទិកា​មួយ​សម្រាប់​ការផ្លាស់ប្តូរ​គំនិត និង​សហការគ្នា​ក្នុង​ចំណោម​សមាជិក​របស់ខ្លួន និង​ភាគី​ពាក់ព័ន្ធ​ផ្សេងៗ​ទៀត​ ជាមួយ​ទស្សនៈ​ដើម្បី​លើកកម្ពស់​សុខភាព និង​ការប្រកួតប្រជែង​ប្រកប​ដោយ​ក្រមសីលធម៌ និង​សេវាកម្ម​កាន់តែ​ប្រសើរ​ដល់​អតិថិជន”។

​          ការជាវ​ទូរស័ព្ទ​ចល័ត​ដ៏សកម្ម​នៅក្នុង​ប្រតិបត្តិករ​ទាំង ៦ នៅ​កម្ពុជា​មាន​ចំនួន២០, ៤lលាននាក់ គិត​ត្រឹម​ចុងខែ​ឧសភា ឆ្នាំ​ ២០២០ ធ្លាក់​ ០,០៨ ​ភាគរយ​ ធៀប​នឹង​កាលពី​ចុងខែ​ឧសភា ឆ្នាំ​ ២០១៩​។ នេះ​បើ​យោងតាម​ទិន្នន័យ​បានមកពី TRC​៕