ដំណឹងល្អៈទីផ្សារការិយាល័យបានចាប់ផ្តើមមានសញ្ញាងើបឡើងវិញ ប៉ុន្តែតម្លៃ

ដោយៈគង់ សូរិយា

ភ្នំពេញៈ ទីផ្សារការិយាល័យបានចាប់ផ្តើមមានសញ្ញាងើបឡើងវិញ នៅកំឡូងត្រីមាសទី១ឆ្នាំនេះ ដែលជាសញ្ញាល្អប្រសើរ បើធៀបនឹងត្រីមាសចុងក្រោយនៃឆ្នាំ២០២០។

យោងតាមរបាយការណ៍របស់ក្រុមហ៊ុនCBRE Cambodiaបានឲ្យដឹងថា គិតរហូតមកទល់ពេលបច្ចុប្បន្ននេះទំហំការិយាល័យ ដែលបានផ្គត់ផ្គង់ចូលទីផ្សារមានទំហំ៦០ម៉ឺនម៉ែត្រការ៉េ នៅដំណាច់ឆ្នាំ២០២០ ប៉ុន្តែចំនួននេះនឹងកើនឡើងដល់ប្រមាណ៨០ម៉ឺនម៉ែត្រការ៉េនៅដំណាច់ឆ្នាំ២០២១ខាងមុខ។ ចំនួននេះ រាប់បញ្ចូលទាំងការិយាល័យបែបសហកម្មសិទ្ឋ និងការិយាល័យដែលមានម្ចាស់តែមួយ។

នាយិកាប្រចាំប្រទេសនៃក្រុមហ៊ុនCBRE Cambodia លោកស្រីអាន សុធីតាបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២៦ មិនានេះថា ការកើនឡើងនូវអត្រាប្រើប្រាស់ការិយាល័យនៅដើមឆ្នាំនេះ ដោយសារមានការកើនឡើងនូវការពង្រីកក្រុមហ៊ុន ថ្មីៗច្រើន និងការបើកក្រុមហ៊ុនថ្មី ពីសំណាក់ម្ចាស់អាជីវកម្មក្នុងស្រុកនានា។ លោកស្រីបន្តថា ទោះជាយ៉ាងណាតម្លៃនៃការជួលការិយាល័យ នៅតែបន្តធ្លាក់ចុះក្នុងរង្វង់៥ទៅ១០ភាគរយ។

លោកស្រីបន្តថា “ទីផ្សារការិយាល័យហាក់មិនសូវប៉ះពាល់ខ្លាំង ធៀបនឹងផ្នែកផ្សេងទៀត ប៉ុន្តែអត្រាគ្របដំណ្តប់នៃការប្រើប្រាស់ បានធ្លាក់ចុះក្នុងរង្វង់១០ភាគរយនៅឡើយ ទោះបីជាចំនួនអ្នកជួលបានកើនឡើងក្តី”។លោកស្រីបន្ថែមថា “ការិយាល័យកម្រិតB និងCនៅតែមានការពេញនិយមជាងគេដដែលក្នុងទីផ្សារ ខណៈការិយាល័យកម្រិតA ភាគច្រើនជាគោលដៅនៃក្រុមហ៊ុនធំៗ”។

លោកស្រីអាន សុធីតាបានបន្តទៀតថា គិតពីដើមរហូតមកទល់ពេលនេះ នៅរាជធានីភ្នំពេញ មានអាគារការិយាល័យសរុបចំនួន៧៨អាគារ ដែលបាននិងកំពុងដាក់ដំណើរការក្នុងទីផ្សារ ដែលអាគារការិយាល័យទាំងនោះគឺមានគ្រប់កម្រិត ទាំងកម្រិតA B និងកម្រិតC៕

ធនាគារពិភពលោកនៅតែអះអាងថា សេដ្ឋកិច្ចកម្ពុជានឹងងើបឡើងវិញ៤ភាគរយ នៅឆ្នាំនេះ

ដោយៈ ម៉ាណេត

ភ្នំពេញៈ សេដ្ឋកិច្ចរបស់កម្ពុជាបន្តរងគ្រោះ ដោយសារឥទ្ធិពលនៃការរាតត្បាតជំងឺកូវីដ១៩ តែមានសញ្ញាជាច្រើនបង្ហាញថា សកម្មភាពសេដ្ឋកិច្ចកម្ពុជានឹងកម្រើកឡើងវិញហើយ ហើយធនាគារពិភពលោក (World Bank) នៅតែព្យាករថា សេដ្ឋកិច្ចកម្ពុជានឹងមានកំណើឡើងវិញនៅឆ្នាំនេះ។

សេដ្ឋកិច្ចកម្ពុជាត្រូវបានព្យាករថា បានដក៣,១ភាគរយក្នុងឆ្នាំ២០២០ ប៉ុន្តែត្រូវបានរំពឹងទុកថា នឹងងើបឡើងវិញហើយលូតលាស់បានប្រមាណ៤ភាគរយ ក្នុងឆ្នាំ២០២១។ នេះបើយោងតាមរបាយការណ៍បច្ចុប្បន្នភាពសេដ្ឋកិច្ចចុងក្រោយ សម្រាប់តំបន់អាស៊ីបូព៌ានិងប៉ាស៊ីហ្វ៊ិក របស់ធនាគារពិភពចេញផ្សាយនៅថ្ងៃទី២៦ ខែមីនា ឆ្នាំ២០២១។

របាយការណ៍របស់ធនាគារពិភពលោកបានឱ្យដឹងថា កម្ពុជាស្ថិតនៅគឺជាប្រទេសមួយស្ថិតចំណោមបណ្តាប្រទេស ក្នុងតំបន់អាស៊ីបូព៌ានិងប៉ាស៊ីហ្វ៊ិក ដែលត្រូវបានព្យាករថា នឹងមានកំណើនឡើងវិញនៅឆ្នាំនេះ។

ជាមួយគ្នានេះដែរ របាយការណ៍បច្ចុប្បន្នភាពសេដ្ឋកិច្ច ចុងក្រោយរបស់ធនាគារពិភពចេញផ្សាយនៅថ្ងៃនេះនិយាយថា ទូទាំងតំបន់អាស៊ីបូព៌ានិងប៉ាស៊ីហ្វ៊ិក សន្ទុះងើបឡើងវិញនៃសេដ្ឋកិច្ច នៅតែមានភាពខុសគ្នាខ្លាំងនៅឡើយ ជាងមួយឆ្នាំក្រោយពីមានការរាតត្បាតជំងឺកូវីដ១៩។

មានតែប្រទេសចិន និងវៀតណាមទេ ដែលសេដ្ឋកិច្ចដាំក្បាលចុះហើយងើបឡើងវិញក្នុងទម្រង់ជាអក្សរV ពិសេសកំនើនសេដ្ឋកិច្ចបានកើនឡើងលើស កម្រិតមុនពេលមានការរាតត្បាតជំងឺនេះ។ នៅក្នុងប្រទេសផ្សេងទៀត ទិន្នផលផលសេដ្ឋកិច្ចនៅមានជាមធ្យមប្រហែល៥ភាគរយ គឺទាបជាងកម្រិតមុនគ្រាផ្ទុះការរាតត្បាត។

អ្នករងការប៉ះទង្គិចខ្លាំងបំផុត គឺបណ្តាប្រទេសនៅតាមកោះប៉ាស៊ីហ្វិក។ សកម្មភាពរបស់សេដ្ឋកិច្ច បានពឹងផ្អែកលើប្រសិទ្ធភាពនៃការទប់ស្កាត់វីរុស លើសមត្ថភាពទាញយកអត្ថប្រយោជន៍ពីការងើបឡើងវិញ នៃពាណិជ្ជកម្មអន្តរជាតិ និងសមត្ថភាពរបស់រដ្ឋាភិបាលក្នុងការផ្តល់ការគាំទ្រផ្នែកសារពើពន្ធនិងរូបិយវត្ថុ។

លោកស្រី វិកតូរីយ៉ា ក្វាក្វា អនុប្រធានធនាគារពិភពលោកប្រចាំតំបន់អាស៊ីបូព៌ានិងប៉ាស៊ីហ្វ៊ិកបាននិយាយថា “វិបត្តិសេដ្ឋកិច្ច ដែលបណ្តាលមកពីការរាតត្បាតវីរុសកូវីដ១៩នេះ បានបង្អាក់ការកាត់បន្ថយភាពក្រីក្រ ហើយបង្កើនវិសមភាពវិញ”។

លោកស្រីបានថ្លែងថា ក្នុងគ្រាដែលប្រទេសនានា ចាប់ផ្តើមងើបឡើងវិញ នៅឆ្នាំ២០២១ គេចាំបាច់ត្រូវចាត់វិធានការបន្ទាន់ ដើម្បីការពារប្រជាជនងាយរងគ្រោះនិងធានាឱ្យមានការងើបឡើងវិញ នៃសេដ្ឋកិច្ចដែលមានបរិយាបន្ន មានភាពបៃតង និងភាពធន់។

របាយការណ៍នេះ អំពាវនាវឱ្យមានកិច្ចសហប្រតិបត្តិការអន្តរជាតិ ក្នុងការផលិត និងការអនុម័តវ៉ាក់សាំង ក៏ដូចជា ការបែងចែកវ៉ាក់សាំងដោយផ្អែកលើតម្រូវការ ដើម្បីជួយទប់ស្កាត់ការរាលដាលវីរុសកូវីដ១៩ ។ ការសម្របសម្រួលផ្នែកសារពើពន្ធនឹងជួយបង្កើនឥទ្ធិពលរបស់កម្មភាពរួមគ្នានេះ ពីព្រោះរដ្ឋាភិបាលខ្លះហាក់ ដូចជា ធ្វើអន្តរាគមន៍ជួយផ្នែកសេដ្ឋកិច្ចតិចតួចស្តួចស្តើងណាស់។

ក្រៅពីកិច្ចសហប្រតិបត្តិការ កាត់បន្ថយការបំភាយឧស្ម័ន ជំនួយអន្តរជាតិនឹងជួយប្រទេសកំពុងអភិវឌ្ឍន៍ក្រីក្រ ឱ្យមានលទ្ធភាពចាត់វិធានការអាកាសធាតុ កាន់តែស៊ីជម្រៅថែមទៀត។

របាយការណ៍ក្រោមចំណងជើងថា Uneven Recovery ដែលផ្តោតលើគោលនយោបាយចាក់វ៉ាក់សាំង សារពើពន្ធ និងការប្រែប្រួលអាកាសធាតុ ជាការបន្តពីការធ្វើបច្ចុប្បន្នភាពសេដ្ឋកិច្ចចំនួនពីរលើកមុនរួចមកហើយ សម្រាប់តំបន់នេះក្នុងឆ្នាំ២០២០ ដែលបានពិនិត្យ ទៅលើទិដ្ឋភាពគោលនយោបាយចំនួន៦ ពាក់ព័ន្ធការងើបឡើងវិញពីជំងឺរាតត្បាតរបស់កូវីដ១៩ ក្នុងនោះរួមមានការទប់ស្កាត់ដោយឆ្លាតវៃ ការរៀនសូត្រដោយឆ្លាតវៃ ការបង្កើនកិច្ចគាំពារសង្គម ការគាំទ្រដល់ក្រុមហ៊ុន គោលនយោបាយមានតុល្យភាពសម្រាប់វិស័យហិរញ្ញវត្ថុ និងកំណែទម្រង់ពាណិជ្ជកម្ម៕

រដ្ឋាភិបាលកម្ពុជាស្នើធនាគារពិភពលោកចំនួន៣ចំណុចដើម្បីចូលរួមស្តារសេដ្ឋកិច្ចឡើងវិញ

ដោយៈ ប៊ី

ភ្នំពេញៈ មន្ត្រីជាន់ខ្ពស់នៃរដ្ឋាភិបាលកម្ពុជា បានស្នើទៅកាន់ធនាគារពិភពលោក (World Bank) ចំនួន៣ចំណុច ដើម្បីពិនិត្យពិចារណាលើទិដ្ឋភាពសំខាន់ សម្រាប់ជាមូលដ្ឋាននៃការរៀបចំផែន ការ និងទិសដៅកិច្ចសហប្រតិបត្តិការទៅមុខជាមួយកម្ពុជា អំឡុងជួបវិបត្តិកូវីដ១៩ និងរៀបចំខ្លួនដើម្បីស្តារសេដ្ឋកិច្ច និងសង្គមឡើងវិញក្រោយវិបត្តិនេះ។

ការស្នើដូចនេះ ត្រូវបានធ្វើឡើង ដោយលោកវង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ ក្នុងជំនួបពិភាក្សាការងារជាមួយ លោកស្រី វិចតូរីយ៉ា ខ្វាខ្វា (Victoria Kwakwa) អនុប្រធានធនាគារពិភពលោក ក្នុងសប្តាហ៍នេះ។

លោកវង្សី វិស្សុត បានស្នើសុំឱ្យធនាគារពិភពលោក៣ចំណុច រួមមាន ទី១) ពិនិត្យ និងពិចារណាកែសម្រួលឡើងវិញ លើលក្ខខណ្ឌឥណទាន ដើម្បីឱ្យកម្ពុជាមានលទ្ធភាពទទួលបាននូវហិរញ្ញប្បទាន ដែលមានកម្រិតសម្បទានខ្ពស់ ទី២) កៀរគរហិរញ្ញប្បទានឥតសំណងឱ្យដល់កម្ពុជា ធ្វើយ៉ាងណាឱ្យធាតុអំណោយ(Grant Element) របស់គម្រោ ងនីមួយៗ ឆ្លើយតបទៅនឹងយុទ្ធសាស្ត្រ នៃការគ្រប់គ្រងបំណុលរបស់រាជរដ្ឋាភិបាល និងទី៣) បង្កើនគុណភាពនៃគម្រោងវិនិយោគហិញ្ញប្បទាន ដោយធនាគារពិភពលោក ឱ្យកាន់តែប្រសើរ និងកាន់តែឆ្លើយតបជាងបច្ចុប្បន្ន។

លោកវង្សី វិស្សុត ឱ្យដឹងដែរថា នៅចំពោះមុខនៃវិបត្តិជំងឺកូវីដ១៩ ដែលមិនធ្លាប់មានពីមុនមកនេះ រាជរដ្ឋាភិបាលកម្ពុជាបានផ្តោត លើអាទិភាព៤ រួមមាន៖ ការប្រយុទ្ធប្រឆាំងទៅនឹងជំងឺកូវីដ-១៩ ដើម្បីទប់ស្កាត់ការឆ្លង និងការពារអាយុជីវិតរបស់ប្រជាជន ការរក្សាលំនឹងជីវភាពប្រជាជនពិសេស សម្រាប់ប្រជាជនក្រីក្រក្រុមជនងាយរងគ្រោះ និងអ្នកបាត់បង់ការងារ ការខិតខំជួយឱ្យអស់លទ្ធភាព ដើម្បីជួយឱ្យធុរកិច្ច និងអាជីវកម្មអាចរស់បាន និងរក្សាការងារ ពិសេសការរក្សា និងជំរុញសកម្មភាពសេដ្ឋកិច្ចក្នុងស្រុក ការរក្សាឱ្យបាននូវសន្តិសុខសណ្តាប់ធ្នាប់សាធារណៈ ស្ថិរភាពសង្គម និងស្ថិរភាពសេដ្ឋកិច្ច និងហិរញ្ញវត្ថុ។

នៅក្នុងក្របខណ្ឌនេះ រាជរដ្ឋាភិបាលកម្ពុជា ក៏បានដាក់ចេញនូវវិធានការជាបន្តបន្ទាប់០៧ជុំរួចហើយ តាមរយៈការអនុគ្រោះពន្ធ និងការលើកលែងពន្ធ, ការអនុគ្រោះការ បង់ប្រាក់វិភាគទាន ធានារ៉ាប់រង របបហានិភ័យការងារ និងការថែទាំសុខភាព និងការពន្យារការបង់កាតព្វកិច្ចរបបសន្តិសុខសង្គម ការបង្កើតឧបករណ៍ ហិរញ្ញប្បទានបន្ថែម ការឧបត្ថម្ភជាសាច់ប្រាក់ជូនគ្រួសារក្រីក្រ និងងាយរងគ្រោះ កម្មវិធីសាច់ប្រាក់ពលកម្ម និងការផ្តល់ប្រាក់ឧបត្ថម្ភជូនកម្មករ-និយោជិត និងការរៀបចំវគ្គបណ្តុះបណ្តាល ដល់កម្មករ-និយោជិត ទាំងជំនាញទន់ និងជំនាញបច្ចេកទេស ព្រមទាំងវិធានការផ្សេងៗទៀត គួបផ្សំនឹងវិធានការ រូបិយវត្ថុ ដែលដាក់ចេញដោយធនាគារជាតិនៃកម្ពុជា ដូចជាការកែសម្រួលលក្ខខណ្ឌឥណទាន និងការបង្កើនសន្ទនីយភាព នៅលើទីផ្សារជាដើម។

លោកវង្សី វិស្សុត បានបន្តថា ក្រៅពីការអនុវត្តនូវកម្មវិធីសាច់ប្រាក់ពលកម្ម ដែលបានជួយស្រូបយកកម្លាំងពលកម្ម ដែលបាត់បង់ការងារ និងវិលត្រឡប់ពីបរទេស និងបានជួយបង្កើត នូវសមិទ្ធផលសង្គម-សេដ្ឋកិច្ចនៅតាមជនបទ, រាជរដ្ឋាភិបាលក៏បានអនុវត្តប្រកបដោយភាពជោគជ័យ នូវកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ ។

គិតមកទល់នឹងពេលនេះរាជរដ្ឋាភិបាលបានបញ្ចេញទឹកប្រាក់សរុប ប្រមាណជាង ២៦០លានដុល្លារអាមេរិក តាមប្រព័ន្ធធនាគារ ដោយមានប្រជាពលរដ្ឋជាអ្នកទទួលផលប្រមាណ២.៧លាននាក់។

ជាការឆ្លើយតបលោកស្រី វិចតូរីយ៉ា ខ្វាខ្វា ក៏បានអបអរសាទរ និងវាយតម្លៃខ្ពស់ចំពោះកិច្ចខិតខំប្រឹងប្រែង និងជោគជ័យរបស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំង នឹងជំងឺកូវីដ-១៩ ពិសេសការអនុវត្តកម្មវិធីឧបត្ថម្ភសាច់ប្រាក់ ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ ដែលអាចចងក្រងទុកជាឯកសារ និងចែករំលែកជាបទពិសោធន៍ ជូនទៅបណ្តាប្រទេសនានា។

លោកស្រីបន្ថែមថា “ឆ្លើយតបទៅនឹងសំណើខាងលើ ធនាគារពិភពលោក នឹងធ្វើការជិតស្និទ្ធ ជាមួយភាគីពាក់ព័ន្ធផ្សេងទៀត ដើម្បីរកចម្លើយដ៏សមស្របណាមួយសម្រាប់កម្ពុជា ក្រោមក្របខណ្ឌនៃកិច្ចសហប្រតិបត្តិការ ក្នុងភាពជាដៃគូរឹងមាំ” ៕

ក្រុមហ៊ុន GC គ្រោងពង្រីកអាជីវកម្មគីមីឥន្ធនៈមកកាន់ប្រទេសកម្ពុជា

ដោយៈ ម៉ាណេត

ភ្នំពេញៈ ក្រុមហ៊ុន PTT Global Chemical Public Company ប្រកាសថា ខ្លួននឹងពង្រីកអាជីវកម្មគីមីរបស់ខ្លួនទៅកាន់ប្រទេសកម្ពុជា ឡាវ មីយ៉ាន់ម៉ា និងវៀតណាម (CLMV) ដោយមើលឃើញពីសក្តានុពលក្នុងការវិនិយោគក្នុងប្រទេសទាំងនេះ។ នេះបើយោងតាមការកាសែតបាងកកប៉ុស្តិ៍ នៅក្នុងសប្តាហ៍នេះ។

លោកបណ្ឌិត Kongkrapan Intarajang នាយកប្រតិបត្តិក្រុមហ៊ុន PTT Global Chemical Public Company Limited (GC) បានជូនដំណឹងដល់ផ្សារភាគហ៊ុនថៃ (SET) ស្តីពីការទិញយកភាគហ៊ុនរបស់ក្រុមហ៊ុន Vinythai ដើម្បីពង្រឹងខ្លួនជាមួយអាជីវកម្មគីមីឥន្ធនៈ នៅក្នុងវិស័យឧស្សាហកម្មរបស់ប្រទេសថៃ ហើយក៏ដើម្បីពង្រីកអាជីវកម្មរបស់ខ្លួនទៅកាន់ប្រទេសកម្ពុជា ឡាវ មីយ៉ាន់ម៉ា និងវៀតណាម (CLMV) ផងដែរ។

ការវិនិយោគលើភាគហ៊ុននេះ នឹងជំរុញការរីកចម្រើនរបស់ក្រុមហ៊ុន GC នៅក្នុងអាជីវកម្មឥន្ធនៈរបស់ក្រុមហ៊ុន ដោយអនុញ្ញាតឱ្យក្រុមហ៊ុន GC បង្កើនភាគហ៊ុនយ៉ាងច្រើននៅក្នុងអាជីវកម្មក្រុមហ៊ុន PVC និង Chlor-Alkali នៅក្នុងទីផ្សារ ដែលមានកំណើនខ្ពស់ដូចជាប្រទេសថៃ និងប្រទេស CLMV និងដោយបន្ថែមតម្លៃដល់អាជីវកម្មរបស់ GC។

ជាមួយគ្នាដែរ ក្រុមហ៊ុនប្រេងឥន្ធនៈ និងអាជីវកម្មលក់រាយខ្នាតយក្សរបស់ថៃ PTT Oil and Retail Business (PTTOR) ដែលយើងស្គាល់ថា PTT កាលថ្មីៗនេះ ក៏គ្រោងចំណាយដើមទុនរហូតដល់ទៅ ៧៤,៦ពាន់លានបាត (ប្រមាណ២,៥ពាន់លានដុល្លារអាមេរិក) សម្រាប់ផែនការពង្រីកអាជីវកម្មស្នូលទាំង៣ របស់ខ្លួនពីឆ្នាំ២០២១ ដល់ឆ្នាំ២០២៥ ។ នេះបើយោងតាមការបញ្ជាក់របស់លោកស្រី Jiraphon Kawswat អគ្គនាយិកាស្ដីទីនៃក្រុមហ៊ុននេះ។

សម្រាប់អាជីវកម្មមិនមែនប្រេងឥន្ធនៈរបស់ខ្លួន ក្រុមហ៊ុនមានគម្រោងពង្រីកហាងកាហ្វេ Cafe Amazon ក្នុងប្រទេសថៃ ពីចំនួន ៣.១៨៦ សាខាដល់៥.៨០០ សាខា។ សម្រាប់អាជីវកម្មអន្តរជាតិរបស់ខ្លួន ក្រុមហ៊ុននឹងផ្ដោតលើការពង្រីកស្ថានីយប្រេងឥន្ធនៈ និងសាខាហាងកាហ្វេ Cafe Amazon ក្នុងប្រទេសកម្ពុជា ឡាវ មីយ៉ាន់ម៉ា វៀតណាម និងហ្វីលីពីន៕

តើការបង់រំលស់អចលនទ្រព្យរយៈពេលវែង និងខ្លីមានគុណសម្បត្តិ និងគុណវិបត្តិដូចម្តេច?

ដោយៈ រ៉ាណេត

ភ្នំពេញៈ មនុស្សមួយចំនួនក្នុងប្រទេសកម្ពុជា មានជម្រើសច្រើនក្នុងការបង់រំលស់ទៅលើអលចនទ្រព្យដែលខ្លួនបានទិញ តាមរយៈការបង់ជាមួយម្ចាស់វិនិយោគ និងបង់តាមធនគារ ។ នៅក្នុងការបោះរំលោះនីមួយៗ មានសារៈប្រយោជន៍ផ្សេងៗគ្នាទៅតាមពេលវេលា និងស្ថានភាពជាក់ស្តែង។

លោកឃាង ពុទ្ធី ប្រធានក្រុមប្រឹក្សាភិបាល នៃសមាគមអ្នកជំនាញអលចទ្រព្យកម្ពុជាថ្លែងថា អ្នកដែលទិញអលនទ្រព្យក្នុងរយៈពេលខ្លី (២ ឬ ៣ ឆ្នាំ ) ត្រូវបង់ជាមួយម្ចាស់គម្រោង ដែលគ្មានអត្រាការប្រាក់ ប៉ុន្តែបើបង់ក្នុងរយៈពេលវែង គឺត្រូវបង់ជាមួយនឹងធនាគារ ព្រោះមានអត្រាការប្រាក់ទាប។

លោកថ្លែងថា “បើពលរដ្ឋកម្ពុជាបង់រំលោះផ្ទះ ជាមួយបុរីឬអលចនទ្រព្យក្នុងរយៈពេល ចាប់ពី១០ឆ្នាំ រហូតដល់២០ឆ្នាំ គួរទៅសិក្សាជាមួយនឹងធនាគារ ដែលវាមានភាពចំណេញទៅលើអត្រាការប្រាក់ ព្រោះម្ចាស់គម្រោងយកអត្រាការប្រាក់ខ្ពស់” ។

លោកឃាង ពុទ្ធី ថ្លែងថា នៅពេលដែលបង់ជាមួយធនាគារ ក្នុងរយៈពេលវែង មិនមែនចំណេញអត្រាការប្រាក់នោះទេ ប៉ុន្តែវាមានសុវត្ថិភាពខ្ពស់ ព្រោះខាងធនាគារ គេនឹងសិក្សាលើបណ្ណកម្មសិទ្ធិ និងទីតាំងរបស់ម្ចាស់គម្រោងមុននឹងអនុញ្ញាតឱ្យ អតិថិជនខ្ចីប្រាក់យកទៅទិញលំនៅឋាន ។

លោកថ្លែងថា នេះគឺជាអត្ថប្រយោជន៍បន្ថែម ពីលើការចំណេញការប្រាក់ ប៉ុន្តែបើបង់ត្រឹមតែក្នុងរយៈពេល២ឆ្នាំ មិនយកអត្រាការប្រាក់ គួរតែបង់ជាមួយម្ចាស់គម្រោង ព្រោះគេមិនទាមទានូវលក្ខខណ្ឌផ្សេងៗនោះទេ។

យោងតាមការសិក្សាមួយបង្ហាញថា ការបង់រំលស់ ជាមួយម្ចាស់គមម្រោងអភិវឌ្ឍន៍ ជាលំនៅឋាន ឬជាប្រភេទដីឡូតី៍ ក្នុងរយៈពេលវែងចាប់ពី១០ឆ្នាំឡើង គឺត្រូវបង់ក្នុងអត្រាការប្រាក់ខ្ពស់ ដែលផ្ទុយការយកកម្ចីពីធនាគារដែលមានអត្រាការប្រាក់ទាប៕

តើដីលើទីក្រុងកោះនរាមានតម្លៃប៉ុន្មាននាពេលបច្ចុប្បន្ននេះ ខណៈការកសាងហេដ្ឋារចនាសម្ព័ន្ធមិនទាន់បញ្ចប់

ដោយៈ ស៊ីវ ម៉េង

ភ្នំពេញៈ ស្របពេលការសាងសង់ ហេដ្ឋារចនាសម្ព័ន្ធនានាមិនទាន់បញ្ចប់ តម្លៃដីធ្លីនៅទីក្រុងកោះនរាបាន និងកំពុងស្ថិតក្នុងតម្លៃទាបនៅឡើយ ដែលអ្នកមានលទ្ឋភាពវិនិយោគអាចនឹងទទួលបានផលចំណេញច្រើនាពេលអនាគត។

យោងតាមបណ្តាញទំនាក់ទំនងសង្គមរបស់លោកស្រីចេវ សុឃុន នាយិកាក្រុមហ៊ុន KAT Appraisal បានបង្ហោះព៌តមានអំពីតម្លៃដីនៅលើទីក្រុងកោះនរា ដែលមានទំហំ៤០គុណនឹង៦០ម៉ែត្រ ដែលម្ចាស់ដីនេះ បានដាក់លក់ក្នុងតម្លៃ៣,៦លានដុល្លារអាមេរិក ដែលស្មើនឹង១៥០០ដុល្លារក្នុងមួយម៉ែត្រការ៉េ ប៉ុន្តែទីតាំងនៃដីនេះ មិនត្រូវបានបង្ហាញថាស្ថិតនៅតំបន់ណាជាក់លាក់ នៃទីក្រុងថ្មីដែលមានទំហំ១២៥ហិកតានេះនៅឡើយទេ។

ទីក្រុងកោះនរា ត្រូវបានវិនិយោគដោយក្រុមហ៊ុន OCIC ដែលគ្រាន់តែការកសាងហេដ្ឋារចនាសម្ព័ន្ឋទីក្រុងនេះ គ្រោងចំណាយទឹកប្រាក់អស់២០០០លានដុល្លារអាមេរិក។

អគ្គនាយករងក្រុមហ៊ុន OCIC លោកទូច សំណាង បានមានប្រសាសន៍៍ឲ្យដឹងកាលពីពេលថ្មីៗនេះថា ការកសាងហេដ្ឋារចនាសម្ព័ន្ឋលើទីក្រុងនេះ នឹងបញ្ចប់តាមផែនការរបស់ខ្លូន ដែលពេលវេលាបញ្ចប់នឹងកំណត់នៅឆ្នាំ២០២៣ ខណៈដែលបច្ចុប្បន្នដំណើរការសាងសង់ស្ពានតភ្ជាប់រវាងទីក្រុងកោះពេជ្រ និងទីក្រុងកោះនរានឹងបញ្ចប់ក្នុងពេលដំណាលគ្នាផងដែរ។

លោកបន្តថា “ទស្សនទាននៃការអភិវឌ្ឍទីក្រុងកោះនរា មានសភាពស្រដៀងគ្នានឹងទីក្រុងកោះពេជ្របច្ចុប្បន្ននេះ” ។ លោកបន្តថា “បច្ចុប្បន្នម្ចាស់ដីមួយចំនួន អាចចាប់ផ្តើមសាងសង់គំរោងរបស់ពួកគេបានហើយ ដោយសារតំបន់មួយចំនួនបានបញ្ចប់ការចាក់បំពេញរួចហើយ” ។

ទីប្រឹក្សាសមាគមអចលនទ្រព្យសកល លោកយិន លាងគង់ បានមានប្រសាសន៍ថា ទីក្រុងកោះនរា នឹងក្លាយជាក្លាយជា Landmark ដ៏ឆើតឆាយមួយនាប្រជុំទន្លេចតុមុខ និងទន្លេមេគង្គនាពេលអនាគត ដែលវាមិនត្រឹមតែចូលរួមលើកកំពស់សេដ្ឋកិច្ចប៉ុណ្ណោះទេ ប៉ុន្តែវានឹងក្លាយជាតំបន់ដ៏ស៊ីវិល័យមួយ ដែលជួយលើកកំពស់សោភ័ណភាពរាជធានីភ្នំពេញ។

លោកបន្តថា “តម្លៃដីនៅលើទីក្រុងនេះនាពេលបច្ចុប្បន្ន ជាតម្លៃល្អប្រសើរដែលអ្នកវិនិយោគអាចទិញចំណេញច្រើន ប៉ុន្តែដីនៅលើទីក្រុងនេះនាពេល៥ឆ្នាំខាងមុខ នឹងកើនឡើងចន្លោះពី៣៥០០ទៅ៥០០០ដុល្លារក្នុងមួយម៉ែត្រការ៉េមិនខាន” ។ លោកបន្តដោយកំប្លែងថា “បើខ្ញុំមានលុយ នឹងវិនិយោគទិញដីនៅលើទីក្រុងនេះហើយ ប៉ុន្តែលទ្ឋភាពគឺបានត្រឹមមើលឃើញផលចំណេញ តែលទ្ឋភាពវិនិយោគគឺនៅមានកម្រិតនៅឡើយ” ៕

ហេដ្ឋារចនាសម្ព័ន្ធ និងមជ្ឈមណ្ឌលពាណិជ្ជកម្មដើរតួយ៉ាងសំខាន់ដូចម្តេចក្នុងវិស័យអចលនទ្រព្យ

ដោយៈគង់ សូរិយា

ភ្នំពេញៈ គម្រោងអភិវឌ្ឍន៍របស់រដ្ឋាភិបាលដូចជា ទីក្រុងរណប ផ្សារទំនើប ផ្លូវថ្នល់ អាកាសយានដ្ឋានជាដើម អាចជះឥទ្ធិពលធំទៅលើតម្លៃ និងសក្ដានុពលសម្រាប់ភាពជោគជ័យ ក្នុងការវិនិយោគអចលនទ្រព្យ។

ហេតុនេះ វិនិយោគិនចាំបាច់គួរតាមដានព័ត៌មានពាក់ព័ន្ធ នឹងគម្រោងអភិវឌ្ឍន៍នានាចក្ខុវិស័យនិងផែនការទាំងរយៈពេលខ្លី និងរយៈពេលវែងរបស់រដ្ឋាភិបាលជាប់ជានិច្ច។

គម្រោងអភិវឌ្ឍន៍មួយចំនួននាពេលបច្ចុប្បន្ន រួមមានដូចជា គម្រោងផ្លូវល្បឿនលឿន គម្រោងព្រលានយន្ដហោះជាដើម ដែលអាចញ៉ាំងឱ្យដីឡើងថ្លៃ ឬមានឥទ្ធិពលវិជ្ជមានឬអវិជ្ជមានដល់ដំណើរការសេដ្ឋកិច្ច ។ ដោយហេតុថានេះ ទើបគម្រោងអភិវឌ្ឍន៍របស់រដ្ឋាភិបាលមួយចំនួន មិនត្រូវបានបង្ហាញទូលំទូលាយ ដើម្បីរក្សាស្ថិរភាពតម្លៃដីនិងអចលនទ្រព្យ ។

លោកបណ្ឌិតគីម ហ៊ាង ប្រធាន KW Cambodia បានមានប្រសាសន៍ឲ្យដឹងកាលពីពេលថ្មីៗនេះថា នៅពេលរដ្ឋាភិបាលប្រកាសគម្រោងអភិវឌ្ឍអ្វីមួយ នៅតំបន់ណាមួយនោះ វាបានធ្វើឱ្យតម្លៃដីធ្លីងើបរួចទៅហើយ ទោះជាតំបន់នោះមិនទាន់អភិវឌ្ឍន៍ក្ដី តែគម្រោងអភិវឌ្ឍន៍មួយចំនួន វាបានធ្វើឱ្យតម្លៃអចលនទ្រព្យធ្លាក់ចុះទៅវិញ ជាក់ស្ដែងគម្រោងសង់ស្ពានអាកាស។

លោកបន្តថា “ផ្ទះនិងដី ដែលនៅក្រោមស្ពានអាកាស នឹងមិនអាចហក់ឡើងបានទេ តែវាមានតែថយចុះវិញព្រោះនៅពេលសង់ស្ពានរួច មនុស្សនឹងធ្វើដំណើរតាមលើស្ពាន” ។ លោកបន្តថា “ក្រោមស្ពាននឹងមិនសូវមានអ្នកឆ្លងកាត់ដូចមុននោះឡើយ” ។

ជាមួយគ្នានេះ លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ក៏បានលើកឡើងផងដែរថា ទីណាមានការអភិវឌ្ឍគម្រោងរបស់រដ្ឋទីនោះនឹងទាក់ទាញគម្រោងអភិវឌ្ឍន៍របស់វិស័យឯកជន ជាពិសេសគម្រោងអភិវឌ្ឍន៍ហេដ្ឋារចនាសម្ព័ន្ធ ផ្លូវថ្នល់ ស្ពន ជាដើម។

លោកបន្តថា “ដោយសារកត្តានេះហើយ ទើបរដ្ឋាភិបាលលោកបានពង្រីកហេដ្ឋារចនាសម្ព័ន្ធតភ្ជាប់ ពីទីក្រុងទៅកាន់តំបន់ជាយក្រុង ដើម្បីឱ្យវិនិយោគិទៅអភិវឌ្ឍនៅតំបន់ទាំងនោះជាបន្តបន្ទាប់” ។ លោកបន្តថា “ជាការកត់សម្គាល់តំបន់ជាយរាជធានីភ្នំពេញ ស្ទើរតែគ្រប់ផ្នែក ទទួលបានការអភិវឌ្ឍ ពីគម្រោងអភិវឌ្ឍន៍នានារបស់វិនិយោគិន គ្រាន់តែមានសន្ទុះខុសគ្នាបន្តិបន្តួចប៉ុណ្ណោះ” ៕

តើធ្វើដូចម្តេច ដើម្បីបានកម្ចីពីធនាគារមានអត្រាការប្រាក់សមរម្យ?

ដោយៈរ៉ាណេត

ភ្នំពេញៈ ដើម្បីទទួលបានកម្ចីពីធនាគារ ដែលមានអត្រាការប្រាក់សមរម្យ អ្នកអភិវឌ្ឍន៍ អ្នកវិនិយោគ និងអ្នកដែលរកស៊ីក្នុងវិស័យណាមួយ ត្រូវប្រមូលទិន្នន័យឬ ព័ត៌មានឱ្យបានច្រើនពីធនាគារនានា ព្រោះធនាគារនីមួយៗមានអត្រាការប្រាក់ខុសៗគ្នា។

លោកង៉ែត ជូ អ្នកវិភាគសេដ្ឋកិច្ចឯករាជ្យថ្លែងថា អ្នកដែលមានលុយឱ្យយើងខ្ចី (ធនាគារ) មិនមែនជាអ្នកមានប្រៀបលើយើងនោះទេ អ្នកនោះគឺជាអ្នកលក់នូវផលិតផលរបស់ខ្លួន និងជាអ្នកត្រូវការអតិថិជនប៉ុណ្ណោះ ។ ក្នុងនាមយើងម្នាក់ៗ ជាម្ចាស់អាជីវកម្ម អ្នកវិនិយោគ និងអ្នករកស៊ី គឺជាអតិថិជនរបស់របស់គេ ក្នុងការបង់ការប្រាក់ឱ្យគាត់ ឬទិញផលិតរបស់គាត់ប៉ុណ្ណោះ។

លោកបន្ថែមថា ភាគីទាំងពីរ គឺមានភាពស្មើគ្នា នៅក្នុងការចចារនិងពិគ្រោះយោបល់ជាមួយគ្នា ហើយអ្នកខ្លះមានការការភ័យខ្លាច ចំពោះធនាគារ ដែលខ្លាចមិនអោយខ្ចីលុយដើម្បីយកមកវិនិយោគ ឬធ្វើអាជីវកម្ម។ តាមពិតទៅ មកពីយើងគ្មានទំនុកចិត្តក្នុងការទំនាក់ទំនងចចារជាមួយធនគារទេ។

លោក ង៉ែត ជូ បញ្ជាក់ថា ចំណុចទី ១ យើងត្រូវមានជំនឿចិត្តជាមុនសិន ទី២ មិនត្រូវចចារជាមួយធនាគារណា ដែលយើងធ្លាប់ធ្វើការជាមួយនោះទេ គឺយើងគួរធ្វើការទំនាក់ទំនងក្នុងរូបភាពមួយ (Lady Shopping) ។

លោក ង៉ែត ជូ ពន្យល់ថា “នៅពេលដែលគាត់ដើរផ្សារ ជាស្រី្ត គឺមិនអាចឱ្យអ្នកលក់កោគាត់បានទេ គឺគាត់បានប្រមូលព័ត៌មានបានច្រើន ពោលគឺចេញពីហាងមួយទៅហាងមួយទៀត” ។

ក្នុងន័យនេះ ដើម្បីទទួលបានកម្ចីធនាគារ ដែលមានអត្រាការប្រាក់សមរម្យ យើងត្រូវតែធ្វើស្តាយ Lady Shopping គឺយើងត្រូវប្រមូលព័ត៌មានពីធនាគារនានា ឱ្យបានច្រើន មុននឹងសម្រេចិត្តខ្ចី ព្រោះធនាគារនីមួយៗមានលក្ខខន្ធកម្ចីផ្សេងៗគ្នាច្រើន ។ ដូចជារយៈពេលផ្តល់កម្ចី និងអត្រាការប្រាក់ ទ្រព្យធនា និងលក្ខខណ្ឌផ្អែកលើលំហូរសាច់ប្រាក់ជាដើម។

នៅពេលយើងប្រមូលព័ត៌មានបានហើយ យើងត្រូវធ្វើកាប្រៀបធៀប ចុងក្រោយយើងអាចសម្រេចថា ធនាគារណាដែលមានលក្ខខន្ធសមស្របណាសម្រាប់យើង។

ក្រៅតែពីយុទ្ធសាស្ត្រនៃ Lady Shopping យើងគួរតែពិនិត្យមើលទៅលើធនាគារថ្មីៗ ព្រោះ ធនាគារថ្មីៗ ស្រេកឃ្លាន ក្នុងការទទួលយកនូវអតិថិជនខ្លាំងណាស់ ព្រោះគាត់ត្រូវការលក់ផលិតផលរបស់គាត់ និងធនាគារណាដែលមិនសូវល្បី ក៏គួរពិចារណាផងដែរ ព្រោះ ធនាគារដែលមិនល្បីនេះ ពួកគេដាក់ខ្លួនបន្តិច និងមានភាពបត់បែន ដើម្បីបញ្ចេញនូវផលិតផលរបស់ខ្លួនឱ្យបានច្រើន និងមួយវិញទៀត យើងក៏គួគិតគូទៅលើមីក្រូហិរញ្ញវត្ថុ ដែលបំឡែងខ្លួនទៅជាធនាគារ ដែលអាចមានភាបែបបត់ខ្លួន ដើម្បីទទួលបានអតិថិជន៕

ទីផ្សារដីធ្លីនៅតាមផ្លូវជាតិលេខ២ខេត្តតាកែវ កំពុងទាក់ទាញការវិនិយោគ

ដោយ ៖ រ៉ាណេត

តាកែវ ៖ ស្ថិតនៅក្នុងផែនការនៃការអភិវឌ្ឍរបស់រាជរដ្ឋាភិបាលកម្ពុជាទៅលើការរៀបចំ និងស្ថាបនាផ្លូវជាតិលេខ២ឱ្យមានលក្ខណៈធំទូលាយ និងល្អប្រសើរបង្កភាពងាយស្រួលក្នុងការធ្វើដំណើរ និងបម្រើដល់វិស័យដឹកជញ្ជូននោះ បច្ចុប្បន្នបាន និងកំពុងជំរុញឱ្យមានតម្រូវការប្រើប្រាស់ដីនៅសងខាងផ្លូវសម្រាប់ការវិនិយោគ និងអភិវឌ្ឍន៍ជាគម្រោងលំនៅដ្ឋាន និងគម្រោងឧស្សាហកម្មរោងចក្រផងដែរ។

លោកស្រីអាន សុធីតានាយិកាប្រចាំប្រទេសក្រុមហ៊ុន CBRE Cambodia បានមានប្រសាសន៍ឱ្យដឹងនៅរសៀលថ្ងៃទី២៥ ខែមីនា ឆ្នាំ២០២១ថា ទីផ្សារដីធ្លីនៅតាមបណ្តោយផ្លូវជាតិលេខ២ បច្ចុប្បន្នកំពុងបង្ហាញពីសក្តានុពល និងអំណោយផលដល់ការវិនិយោគ អភិវឌ្ឍន៍ក្នុងវិស័យលំនៅដ្ឋាន ក៏ដូចជាការវិនិយោគក្នុងវិស័យឧស្សាហកម្មផងដែរ។

លោកស្រីបន្តថា “ជាធម្មតានៅពេលដែលមានគម្រោងអភិវឌ្ឍន៍របស់រដ្ឋាភិបាលគឺតែងអនុគ្រោះដល់ការវិនិយោគ និងអភិវឌ្ឍន៍របស់វិស័យឯកជន។ ជាមួយគ្នានេះ សម្រាប់គម្រោងស្ថាបនា និងកែលម្អផ្លូវជាតិលេខ២នៅពេលនេះ ក៏បានជួយធ្វើឱ្យវិសយអចលនទ្រព្យនៅតំបន់នេះមានភាពរីកចម្រើនផងដែរ ព្រោះនៅពេលដែលមានហេដ្ឋារចនាសម្ព័ន្ធផ្លូវថ្នល់ល្អស្អាត ងាយស្រួលធ្វើដំណើរ វានឹងជំរុញឱ្យមានមនុស្សចូលទៅរស់នៅ ហើយក៏មានរោងចក្រ សហគ្រាសចូលទៅដែរ ព្រោះងាយស្រួលក្នុងការដឹកជញ្ជូន។ អ្វីដែលសំខាន់ គឺនៅពេលមានតម្រូវការប្រើប្រាស់ដី តម្លៃដីគឺនឹងឡើងថ្លៃជាបន្តបន្ទាប់មិនខាន”។

លោកស្រីអាន សុធីតាបានបន្តថា បើគិតពីផ្លូវបំបែកផ្លូវ៦០ម៉ែត្រ មកផ្លូវជាតិលេខ២ តម្លៃដីមានការកើនឡើងថ្លៃពី១០០ ទៅ ៣០០ ដុល្លារអាមេរិកក្នុងមួយម៉ែត្រកការ៉េ ហើយរហូតដល់ផ្លូវបំបែកលេខ២០ ត្រង់រង្វង់មូលគួរស្រូវ គឺឡើងទ្វេងដង បើធៀបនឹង២ឆ្នាំមុន ហើយបន្តិចទៀតអាចនឹងបន្តឡោះងថ្លៃជាងនេះ ព្រោះជាតំបន់សាងសង់លំនៅដ្ឋាន ជាតំបន់ជាយក្រុងងាយស្រួលក្នុងធ្វើដំណើរចូលក្រុង និងងាយស្រួលក្នុងការធ្វើពាណិជ្ជកម្មខ្នាតតំបន់ផងដែរ។ ដោយឡែកបើគិតពីរង្វង់មូលគួរស្រូវទៅចូលស្រុកកណ្តាលស្ទឹង តម្លៃដីនៅតាមបណ្តោយផ្លូវនេះ មិនមានការរឡើងថ្លៃប៉ុន្មានទេ អាចស្ថិតក្នុងចន្លោះពី ៨០ ទៅ ១០០ ដុល្លារប៉ុណ្ណោះក្នុងមួយម៉ែត្រការ៉េ។ យ៉ាងណាក៏ដោយ តម្លៃដីធ្លីវាអាចនឹងប្រែប្រួលទៅតាមប្រភេទដី និងទីតាំងដែលមានសក្តានុពល។

បច្ចុប្បន្ន ផ្លូវជាតិលេខ២កំពុងតែដំណើរការស្ថាបនា ពង្រីក និងកែលម្អឱ្យកាន់តែល្អប្រសើរ បន្ទាប់បានពីបើកការដ្ឋានសាងសង់កាលពីអំឡុងខែកុម្ភៈ ឆ្នាំ២០២០ ដោយគ្រោងបញ្ចប់នៅក្នុងឆ្នាំ២០២២។ ផ្លូវជាតិមួយខ្សែនេះ នឹងដើរតួជាផ្លូវសេដ្ឋកិច្ចដ៏សំខាន់មួយទៀតរបស់កម្ពុជា ដោយតភ្ជាប់ទៅកាន់ផ្លូវជាតិលេខ១ ផ្លូវជាតិលេខ៣ និងជាពិសេសតភ្ជាប់ផ្លូវ៦០ម៉ែត្រ និងផ្លូវលេខ២០ ឆ្ពោះមកកាន់ទីក្រុងភ្នំពេញ ដែលមានភាពងាយស្រួលក្នុងការធ្វើដំណើរ និងចំណាយពេលតិច៕

សេដ្ឋកិច្ចនៅតំបន់អាស៊ីប៉ាស៊ីហ្វិកនឹងកើនដល់៧,៨ភាគរយខ្ពស់ជាងការរំពឹងទុកនៅឆ្នាំនេះ

ដោយៈ ប៊ី

ភ្នំពេញៈ ភ្នាក់ងារវាយតម្លៃសេដ្ឋកិច្ច និងហិរញ្ញវត្ថុ S&P Global Ratings របសសហរដ្ឋអាមេរិកបានឱ្យដឹងនៅថ្ងៃព្រហស្បតិ៍នេះថា ការងើបឡើងវិញនៃសេដ្ឋកិច្ចនៅតំបន់អាស៊ីប៉ាស៊ីហ្វិកពីវិបត្តិកូវីដ១៩នឹងត្រូវបានជំរុញ ដោយកការដាក់ចេញនូវកញ្ចប់ថវិកាស្តារសេដ្ឋកិច្ចរបស់សហរដ្ឋអាមេរិក និងតម្រូវការសកលកាន់តែខ្លាំង។ នេះបើយោងតាមការចេញផ្សាយរបស់សារព័ត៌មាន Business Standard នៅថ្ងៃទី២៥ ខែមីនា ឆ្នាំ២០២១។

របាយការណ៍ ដែលមានចំណងជើងថា “ទស្សនវិស័យសេដ្ឋកិច្ចអាស៊ីប៉ាស៊ីហ្វិកត្រីមាស២ ឆ្នាំ២០២១ បានឱ្យដឹងថា ការចែកចាយវ៉ាក់សាំងកូវីដ១៩នៅក្នុងតំបន់នេះប្រហែលយឺតប្រទេសដទៃទៀត ប៉ុន្តែវានឹងអាចគ្រប់គ្រាន់ក្នុងការជំរុញការចំណាយរបស់អ្នកប្រើប្រាស់ និងតម្រូវការក្នុងស្រុកនៅចុងឆ្នាំឆ្នាំ២០២១នេះ។

ការវាយតម្លៃរបស់ភ្នាក់ងារ S&P Global បានព្យាករឡើងវិញថា កំណើនសេដ្ឋកិនៅអាស៊ីប៉ាស៊ីហ្វិកកើនឡើងដល់៧,៨ភាគរយនៅឆ្នាំ២០២១នេះ ដែលខុសពីការព្យាករណ៍ពីលើកមុន ដែលថា កំណើនសេដ្ឋកិច្ចនៅក្នុងតំបន់មាន៦,៨ភាគរយ។

ការចែកចាយវ៉ាក់សាំងសកល ដែលមានល្បឿនលឿនជាងការរំពឹងទុក កញ្ចប់ថវិការស្តារសេដ្ឋកិច្ចរបស់សហរដ្ឋអាមេរិក និងការកើនឡើងនៃការដោះដូរពាណិជ្ជកម្ម និងផលិតកម្មបានជំរុញឱ្យការព្យាករណ៍របស់ខ្លួនកើនឡើងខ្ពស់។

លោក Shaun Roache ប្រធានសេដ្ឋវិទូប្រចាំនៅអាស៊ីប៉ាស៊ីហ្វិកនៃភ្នាក់ងារ S&P Global Ratings បានមានប្រសាសន៍ថា “យើងក៏រំពឹងផងដែរអំពីការចាក់វ៉ាក់សាំងជាបណ្តើរៗនៅក្នុងតំបន់ នឹងលើកទឹកចិត្តការចំណាយខ្ពស់លើសេវាកម្ម ការងារកាន់តែច្រើន និងការរកប្រាក់ចំណូលបានកើនឡើង”។

ខណៈពេលដែលការងើបឡើងវិញក្នុងល្បឿនមួយដ៏លឿន បានកើតឡើងនៅអាស៊ីប៉ាស៊ីហ្វិក ភ្នាក់ងារ S&P Global Ratings រំពឹងថាប្រទេសដែលមានកំណើនយឺតយ៉ាវ នឹងមានសន្ទុះឡើងវិញនៅចុងឆ្នាំ២០២១នេះ។

ប្រទេសដែលនៅតែរក្សាកំណើនសេដ្ឋកិច្ច រួមមានចិន នូវែលហ្សេឡង់ កោះតៃវ៉ាន់ និងវៀតណាម៕