គម្រោងអចលទ្រព្យតែមួយគត់ដែលបង្កើនតម្លៃ ផ្ទុយពីទីផ្សារបច្ចុប្បន្ន

កូវីដ១៩ បានជះឥទ្ធិពលយ៉ាងខ្លាំងធ្វើឲ្យប៉ះពាល់ដល់ស្ទើរតែគ្រប់វិស័យចាប់តាំងពីដើមឆ្នាំ២០២០ រហូតដល់បច្ចុប្បន្ន ក្នុងនោះក៏មានវិស័យអចលនទ្រព្យដែរ។ ដោយសារតែស្ថានភាពធ្ងន់ធ្ងរលើសកលលោក រាល់ការហោះហើរ និងការធ្វើដំណើរត្រូវសម្រេចចិត្តផ្អាកដំណើរការរហូតដល់ពេលស្ថានភាពប្រសើរឡើងវិញ។

កំឡុងពេលនៃជំងឺរាតត្បាតនេះដែរ ស្ទើរតែទីផ្សារទាំងមូលត្រូវបានថយចុះយ៉ាងខ្លាំង ហេតុផលនេះធ្វើឲ្យអ្នកទិញមានអតិភាព និងឥទ្ធិពលច្រើនជាងអ្នកលក់ក្នុងការចចារតម្លៃ ដែលធ្វើឲ្យគម្រោងជាច្រើនបានប្រើប្រាស់យុទ្ធសាស្ត្របញ្ចុះតម្លៃ ដើម្បីទាក់ទាញអតិថិជន និងបង្កើនការលក់។

ប៉ុន្តែ គម្រោង Le Condé BKK1 បានដំណើរការយ៉ាងរលូនក្នុងរយៈពេល២ត្រីមាសចុងក្រោយនៃឆ្នាំ២០២០ ហើយសម្រេចបានអត្រាលក់យ៉ាងល្អគួរឲ្យកត់សម្គាល់ ដែលធ្វើឲ្យគម្រោងនេះក្លាយជាគម្រោងដែលលក់ដាច់ខ្លាំងជាងគេនៅក្នុងទីផ្សារ។ ដូចគ្នានេះដែរ គម្រោងនេះមានការទទួលស្គាល់ថាជាគម្រោងខុនដូដ៏ល្បីមួយនៅក្នុងទីផ្សារកម្ពុជា។

ចាប់ពីថ្ងៃទី២៣ មេសា ២០២១ Le Condé BKK1 សូមជូនដំណឹងថាតម្លៃយ៉ូនីតនឹងកើនឡើង ៥%។ ដូចនេះ សូមអបអរសាទរដល់ម្ចាស់ផ្ទះនៃគម្រោងLe Condé BKK1 អចលនទ្រព្យរបស់អ្នកទទួលបានផលចំណេញ៥% បន្ធែម។

តាមការយល់ឃើញរបស់អតិថិជន និងភ្នាក់ងារអចលនទ្រព្យ បានលើកឡើងថា Le Condé BKK1 គឺជាគម្រោងខុនដូដ៏កម្រ និងលេចធ្លោមួយដែលមានលទ្ធិភាពល្អប្រសើរសម្រាប់ការរស់នៅ និងវិនិយោគ។ ហេតុនេះហើយបានជាកេរ្តិ៍ឈ្មោះនៃគម្រោងនេះត្រូវបានទទួលស្គាល់ និងបានឈ្នះពានរង្វាន់ពី PropertyGuru។

ស្ថិតនៅទីតាំងដ៏ល្អនៃតំបន់បឹងកេងកង១ Le Condé BKK1 ត្រូវបានគិតគូរយ៉ាងល្អិតល្អន់ ក្នុងការរចនាគម្រោងខុនដូដែលមានភាពលេចធ្លោមួយនេះនៅក្នុងទីផ្សារកម្ពុជា ដោយផ្សារភ្ជាប់ទៅនឹងបរិយាកាសល្អក្នុងការរស់នៅដែលមានផាសុកភាព ភាពប្រណិត និងស្មាតហូម។ កត្តាចម្បងៗទាំងនេះធ្វើឲ្យគម្រោងនេះជាជម្រើសដ៏ល្អសម្រាប់ការរស់នៅ និងងាយស្រួលជួលត្រឡប់ជាមួយអត្រាខ្ពស់ នៅក្នុងទីផ្សារដែលធ្វើឲ្យមានតម្រូវការជាច្រើនពីអតិថិជនទូទៅ ជាពិសេសបច្ចេកវិទ្យាស្មាតហូម។

គោលការណ៍សំខាន់មួយគឺ Le Condé BKK1 មានគោលជំហររឹងមាំក្នុងការការពារអត្ថប្រយោជន៍របស់ម្ចាស់ផ្ទះនៃគម្រោង។ ហេតុដូចនេះ ការវិនិយោគរបស់អ្នកជាមួយគម្រោង Le Condé BKK1 គឺនៅតែមានសុវត្ថិភាពខ្ពស់ជាបន្តបន្ទាប់។

Le Condé BKK1 ពិតជាសប្បាយរីករាយណាស់ចំពោះការទុកចិត្តពីអតិថិជនទាំងអស់មកលើក្រុមការងារពួកគេ ហើយពួកគេសន្យាថានឹងធ្វើឲ្យការវិនិយោគនេះសាកសមទៅនឹងតម្លៃ ដើម្បីទំនាក់ទំនងដ៏វែងឆ្ងាយ។

ក្រៅពីខុនដូប្រភេទប្រណិត ជាមួយបច្ចេកវិទ្យាស្មាតហូម និងបរិក្ខារដ៏សំបូរបែប ដើម្បីធ្វើឲ្យគម្រោងនេះក្លាយជាសហគមន៍ដ៏គួរឲ្យចង់រស់នៅ Le Condé BKK1 នឹងណែនាំផលិតផលថ្មីមួយក្នុងពេលឆាប់ៗនេះ អ្នកអភិវឌ្ឍគម្រោងនឹងប្រកាសជូននូវព័ត៌មានលម្អិតក្នុងខែឧសភានេះ។
រង់ចាំតាមដានទាំងអស់គ្នា!

ក្រុមហ៊ុន PropNex របស់សិង្ហបុរីទទួបានជោគជ័យខ្លាំងក្នុងការផ្តល់សេវាកម្មអចលនទ្រព្យ

ដោយៈ ប៊ី

ភ្នំពេញៈ ក្រុមហ៊ុន PropNex Realty ក្លាយជាភ្នាក់ងារអចលនទ្រព្យធំជាងគេនៅប្រទេសសិង្ហបុរី ដែលមានភ្នាក់ងារលក់អចលនទ្រព្យជាង៨,៨០០នាក់នៅដោយបានភាពជោគជ័យមួយដ៏គួរឱ្យកត់សម្គាល់រយៈពេលជិតពីរទសវត្តរ៍ចុងក្រោយនេះ។

ក្រុមហ៊ុនបានចាប់ផ្តើមដំណើរការនៅឆ្នាំ១៩៩៩ ដោយមានចក្ខុវិស័យគាំទ្ររបស់ក្រុមហ៊ុនចំនួនពីរ រួមមានក្រុមហ៊ុន Prulink និងក្រុមហ៊ុន Nooris។ ជាមួយនឹងចក្ខុវិស័យរួម នៃការផ្តល់នូវសេវាកម្មមានគុណភាពខ្ពស់ ដែលអតិថិជនជឿទុកចិត្ត ក្រុមហ៊ុននេះត្រូវបានបង្កើតឡើងដោយលោក Mohamed Ismail Gafoor និងដៃគូសហការ កាលពីឆ្នាំ២០០០។ ការបង្កើតនេះអនុញ្ញាតឱ្យក្រុមហ៊ុន និងអតិថិជនទទួលបានអត្ថប្រយោជន៍ពីកំណើនសេដ្ឋកិច្ចរបស់ប្រទេសនេះ។

ដោយផ្អែកលើគោលការណ៍គ្រឹះរបស់ខ្លួន ក្រុមហ៊ុន PropNex Realty ទទួលបានកេរ្ដិ៍ឈ្មោះល្បីល្បាញខាងសេវាកម្ម ហើយបានប្រកាន់ខ្ជាប់នូវគោលការណ៍ “សេវាកម្មដែលអ្នកទុកចិត្ត” ក្នុងឆ្នាំ ២០០៨ ដើម្បីបំពេញបន្ថែមខ្លឹមសារនៃម៉ាកយីហោរបស់ខ្លួន។ ទំនុកចិត្តលើសេវាកម្មនេះបានជំរុញឱ្យក្រុមហ៊ុនរបស់ខ្លួន ក្លាយជាក្រុមហ៊ុនអចលនទ្រព្យធំជាងគេមួយនៅប្រទេសសិង្ហបុរី ដែលមានចំណែកទីផ្សារច្រើនទាំងនៅក្នុងទីសាធារណៈ និងឯកជន។

ក្រុមហ៊ុន PropNex ត្រូវបានសាធារណៈជនជឿទុកចិត្តលើចំណេះដឹងអំពីទីផ្សារអចលនទ្រព្យ។ ក្រៅពីផ្តល់សេវាឈ្មួញកណ្តាល ក្រុមហ៊ុន PropNex ក៏មានផ្តល់សេវាប្រឹក្សាយោបល់ តាមរយៈអង្គភាពអាជីវកម្មយុទ្ធសាស្រ្តមួយចំនួន ដូចជាគម្រោងធ្វើទីផ្សារ គម្រោងការលក់ ការវិនិយោគ វាយតម្លៃ ក្រុមហ៊ុនភតិសន្យា និងក្រុមហ៊ុនលក់ដេញថ្លៃ។ អង្គភាពអាជីវកម្មយុទ្ធសាស្រ្តទាំងនេះត្រូវបានដឹកនាំដោយអ្នកដឹកនាំតាមរដូវ ដែលមានបទពិសោធជាច្រើនឆ្នាំនៅក្នុងវិស័យពាក់ព័ន្ធរបស់ពួកគេ។

ក្រុមហ៊ុននេះបានដឹកនាំជានិច្ចក្នុងការលើកកម្ពស់ស្តង់ដារវិជ្ជាជីវៈនៅក្នុងវិស័យអចលនទ្រព្យ ហើយបានឈ្នះពានរង្វាន់ជាច្រើនឆ្នាំកន្លងមក ហើយជាទីភ្នាក់ងារអចលនទ្រព្យតែមួយគត់នៅប្រទេសសិង្ហបុរី ដែលទទួលបានរង្វាន់ទាំងថ្នាក់សេវាកម្មសិង្ហបុរី (S-Class) និង Singapore Quality Class កាលពីឆ្នាំ២០១៥៕

សិក្សាមូលដ្ឋានទាំង៥នេះ ដើម្បីទិញដីវិនិយោគហើយងាយស្រួលលក់ចេញ និងចំណេញច្រើន

ដោយៈស៊ីវ ម៉េង

ភ្នំពេញៈ ជាមួយនឹងការបង្ហាញនូវសូចនាករចំនួន៥ លើការវិនិយោគដីធ្លីដើម្បីងាយលក់ចេញ និងទទួលបានផលចំណេញលឿន អ្នកវិនិយោគគួរសិក្សាលើចំណុចខាងក្រោមនេះ។

ដីមានរូបរាងច្បាស់លាស់

ការទិញដីដែលមានរូបរាងច្បាស់លាស់ ពិសេសដីដែលមានក្បាលជាប់ផ្លួវមានទំហំធំ គឺជាប្រភេទដីដែលអ្នកវិនិយោគបន្ត ទោះបីជាអ្នកវិនិយោគបន្តជាយកទៅធ្វើអ្វីក៏ដោយ ក៏ពួកគេពេញចិត្តដែរ។

ដីដែលមានរូបរាងជាចតុកោណកែវ ឬការ៉េត្រឹមត្រូវត្រង់ មិនវៀចវេ ដែលជារាងមិនច្បាស់លាស់ ពិតជាពិបាករកម្ចាស់ថ្មីណាស់ បើសិនជាអ្នកទិញដីប្រភេទនេះ ហេតុនេះអ្នកវិនិយោគត្រូវតែសិក្សា និងជ្រើសរើសឲ្យបានត្រឹមត្រូវ។

ដីជាប់ផ្លូវធំ

ដីដែលមានផ្លួវទាល់ តែងតែពិបាកលក់ និងមិនងាយបានផលចំណេញនោះទេ ប៉ុន្តែដីនៅជាប់ផ្លូវធំ ទោះជាដីនោះនៅជាយក្រុង ឬតំបន់ជនបទក្តី ក៏វាជាអចលនទ្រព្យដែលទទួលបានការចាប់អារម្មណ៍លឿនបំផុតពីអ្នកវិនិយោគ ព្រោះដីជាប់ផ្លូវធំងាយមានសកម្មភាពសេដ្ឋកិច្ច ការអភិវឌ្ឍជាដើម។

ហេតុនេះដីដែលស្ថិតនៅលើផ្លូវមេ ជាប់ផ្លូវបន្ទាប់ពីផ្លូវមេ និងមិនមែនជាផ្លូវទាល់ គួរតែជាដីដែលគួរវិនិយោគ ព្រោះផែនការអភិវឌ្ឍន៍របស់រដ្ឋាភិបាលក្តី វិស័យឯកជនក្តីតែងតែផ្តោតលើដីដែលជាប់ផ្លូវធំ ដោយសារមានមនុស្សធ្វើដំណើរច្រើន ងាយស្រួលចេញចូលយានយន្ត។

ដីមានមនុស្សរស់នៅច្រើន

តាមធម្មតា ទោះជាដីនោះល្អបែបណាក្តី តែបើនៅជនបទរហោស្ថាន មិនងាយទទួលបានការអភិវឌ្ឍ និងដីឡើងថ្លៃឡើយ ប៉ុន្តែនៅទីណាដែលមានមនុស្សរស់នៅច្រើន តែងតែងាយឡើងថ្លៃ និងមានតម្រូវការច្រើន ទោះជាដីតំបន់នោះមានតម្លៃហាក់ខ្ពស់បន្តិចក៏ដោយ។

តាមធម្មតា មនុស្សរស់នៅទីណាច្រើន តែងតែបង្កើតសកម្មភាពសេដ្ឋកិច្ចនៅមូល ដ្ឋាន នៅពេលមូលដ្ឋានណាមួយមានសេដ្ឋកិច្ចរសរវើក តំបន់នោះតែងតែមានមនុស្សរស់នៅច្រើន ពិសេសតម្រួវការដីធ្លីក៏កើនឡើងផងដែរ។

ដីស្ថិតក្នុងផែនការអភិវឌ្ឍន៍

តាមធម្មតានៅតំបន់ណា ដែលស្ថិតនៅក្នុងផែនការអភិវឌ្ឍន៍របស់រដ្ឋាភិបាល តម្រូវការដីធ្លីតែងតែកើនឡើង ហើយតម្លៃដីធ្លីក៏កើនឡើងខ្ពស់ផងដែរ បើសិនជាតំបន់នោះស្ថិតក្នុងគោលនយោបាយអភិវឌ្ឍន៍របស់វិស័យឯកជន និងរដ្ឋាភិបាល។

ជាក់ស្តែងដូចជា ខេត្តមណ្ឌលគិរី នៅពេលរដ្ឋាភិបាលប្រកាស ផែនការអភិវឌ្ឍដូចជាសាងសង់ព្រលានយន្តហោះថ្មី កសាងតំបន់សេដ្ឋកិច្ច បានធ្វើឲ្យតម្លៃដីតំបន់នោះកើនឡើង ស្របពេលចរន្តទិញលក់កើនឡើងយ៉ាងគំហុក។

ជាមួយគ្នានេះ ក្រុងព្រះសីហនុ ក្រុងប៉ោយប៉ែត ក្រុងបាវិត មានការរីកចម្រើនលឿន ដោយសារតែក្រុងទាំងបីនេះ ស្ថិតក្នុងផែនការអភិវឌ្ឍន៍ជាអាទិភាព ក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥ ២០២៥ ។

សិក្សាលើទិដ្ឋភាពច្បាប់

មូលដ្ឋានច្បាប់ បទដ្ឋានគតិយុទ្ឋនានាជារឿងចាំបាច់ ដែលអ្នកវិនិយោគដីធ្លីត្រូវសិក្សា ដើម្បីកុំឲ្យទិញដីបានបញ្ហា ពិសេសតំបន់ដែលមានការអភិវឌ្ឍលឿន មានចរន្តដោះដូរដីធ្លីច្រើន។

ជាក់ស្តែងដូចជាខេត្តមណ្ឌលគិរី ដីតំបន់ខ្លះមានការចេញប្លង់កម្មសិទ្ឋត្រួតគ្នាលើសពីមួយ ដែលធ្វើឲ្យអ្នកវិនិយោគដីធ្លីអាចជួបរឿងក្តីក្តាំ អស់លុយ ខាតពេលវេលា និងអាចបាត់បង់ទាំងពីរតែម្តង គឺខាតទាំងលុយ និងពេលវេលា៕

ចំណេះដឹងហិញ្ញវត្ថុៈតើអ្វីទៅជាកម្ចីល្អនិងកម្ចីអាក្រក់?

ដោយៈ សាវុធ

ភ្នំពេញៈ មុននឹងអ្នកសម្រេចចិត្តខ្ចីប្រាក់ វាពិតជាមានសារៈសំខាន់ណាស់ ក្នុងការស្វែងយលអំពីភាពខុសគ្នា រវាងកម្ចីល្អនិងកម្ចីអាក្រក់។ ប្រសិនបើអ្នកផ្ដោតទៅការដែលមិនចង់ជំពាក់បំណុល អ្នកគួតែដឹងជាមុនថា តើកម្ចីប្រភេទកម្ចីម្ដេចខ្លះជាកម្ចីល្អហើយម្ដេចខ្លះទៀតជាកម្ចីអាក្រក់។

ទាំងនេះគឺជាវិធីក្នុងការបែងចែកអំពីភាពខុសគ្នារវាងវាទាំងពីរ៖

កម្ចីល្អ

កម្ចីល្អសំដៅទៅលើការវិនិយោគ ដែលធ្វើឲ្យប្រាក់ចំណូលរបស់អ្នក កើនឡើងនៅក្នុងរយៈពេលវែងខាងមុខ នេះមានន័យថាអ្នកខ្ចីប្រាក់ ដើម្បីបង្កើតប្រាក់។ហើយវាមិនគួរមានផលអវិជ្ជមានទៅលើហិរញ្ញវត្ថុរបស់អ្នកនោះទេ។ កម្ចីល្អមានដូចជា៖

ការអប់រំ: ការខ្ចីប្រាក់ដើម្បីបន្តការសិក្សា ពីព្រោះការអប់រំគឺជាឧទាហរណ៏ដ៏ល្អបំផុតសម្រាប់នៃកម្ចីល្អ។ វាបានអនុញ្ញាត្តិឲ្យអ្នកទទូលបានអាជីព សម្រាប់ការងារនាថ្ងៃអនាគតរបស់អ្នក។

ពង្រីកអាជីវកម្ម: ការរកប្រាក់ចំណូល គឺជាអត្ថប្រយោជន៍ចំបងរបស់ម្ចាស់អាជីវកម្ម។ វាគឺជាកម្ចី ដែលធ្វើឲ្យយកទៅបង្កើន នូវអាជីវកម្មរបស់អ្នកឲ្យកាន់តែប្រសើរ។ ហើយប្រសិនបើអាជីវកម្មរបស់អ្នក មានតំណើរការល្អថែមទៀត ប្រាក់ដែលអ្នកបានទទួលនឹងលើសពីប្រាក់កម្ចីដែលអ្នកបានខ្ចីពីធនាគារ។

ផ្ទះឬអចលនទ្រព្យ: អចលនទ្រព្យដូចជាផ្ទះឬដី ទុកកាន់តែយូរកាន់តែចំណេញ នេះចាត់ទុកថា ជាការវិនិយោគយកលុយបង្កើតលុយ។ ការខ្ចីប្រាក់ធនាគារយកទៅបណ្ដាក់ទុនកាន់តែច្រើន និងហុចផលចំណេញច្រើនតាមហ្នឹងត្រឡប់មកវិញ។

កម្ចីអាក្រក់

បំណុលអាក្រក់គឺជាបំណុល ដែលអ្នកចំណាយទៅលើវត្ថុ ដែលមិនចាំបាច់និងងាយ បាត់បង់តម្លៃយ៉ាងឆាប់រហ័ស ហើយមិនបានបង្កើតចំណូលក្នុងរយៈពេលវែងបាន។ វត្ថុទាំងឡាយណា ដែលងាយនឹងធ្លាក់ចុះតម្លៃឆាប់រហ័ស បន្ទាប់ពីពេលដែលអ្នកបានទិញ ត្រូវបានចាត់ទុកថាជាបំណុលអាក្រក់។ ខាងក្រោមនេះគឺជាឧទាហរណ៍

អំពីបំណុលអាក្រក់ៈ

រថយន្ដ: រថយន្ដនៅកម្ពុជាមានតម្លៃថ្លៃណាស់។ ប្រសិនបើអ្នកទិញរថយន្ដមិនមែនសម្រាប់ប្រកបរបរអាជីវកម្មទេ សូមកុំខ្ចីប្រាក់ដើម្បីចំនាយទៅលើវាឲ្យសោះ ពីព្រោះបំណុលប្រភេទនេះ បានចាត់ទុកថាជាប្រភេទបំណុលអាក្រក់។ ដោយសារឡានដែលអ្នកបានទិញតែងតែធ្លាក់ថ្លៃរហូត។

ឧទាហរណ៍ ឧបមាអ្នកបានប្រើប្រាស់កម្ចីទិញឡាន តែចៃដន្យអ្នកបានបាត់បង់ការងារ នោះអ្នកប្រហែលជាបញ្ចប់ ដោយការជំពាក់ប្រាក់ធនាគារ ជាហេតុដែលអ្នកត្រូវបង្ខំចិត្តលក់ឡានរបស់អ្នក ដើម្បីសងប្រាក់ធនាគារ ទីបញ្ចប់អ្នកអស់ទាំងឡានព្រមទាំងជំពាក់ប្រាក់ធនាគារថែមទៀត។

ទូរសព្ទ័ ឬគ្រឿងអេឡិចត្រូនិចៈ ពីមួយឆ្នាំទៅមួយឆ្នាំ ទូរសព្ទ័ថ្មីៗចេញមកដេញជើងគ្នា ហើយតម្លៃវិញកប់ពពក។ បើសិនអ្នកមានប្រាក់គ្រប់គ្រាន់ សម្រាប់ទិញនោះមិនមែនជាបញ្ហានោះទេ ក្នុងករណីខ្លះអ្នកខ្ចីលុយធនាគារយកទៅទិញ នោះគឺជារឿងដែលគួរឲ្យបារម្ភ ព្រោះរបស់ទាំងនោះនឹងធ្លាក់ចុះតាមពេលវេលា។

វិស្សមកាលគ្រឿងអង្ការនិងសំលៀកពាក់ថ្លៃ: ប្រសិនបើអ្នកមិនអាចមានលទ្ធភាពគ្រប់គ្រាន់ក្នុងការទិញ នូវវត្ថុទាំងនោះ សូមកុំខ្ចីប្រាក់ដើម្បីទិញវា ជាពិសេសសម្រាប់យុវវ័យតែម្ដង។ អ្នកអាចរងចាំលុះត្រាតែអ្នកមានប្រាក់គ្រប់គ្រាន់ ក្នុងការទិញ ព្រោះការជំពាក់បំណុល សម្រាប់វិស្សមកាលឬស្បែកជើងថ្លៃៗ គឺជាកម្ចីមួយប្រភេទដែលគួឲ្យខ្លាចបំផុត។

តាមច្បាប់ទូទៅ ដើម្បីជៀសវាងបំណុលអាក្រក់បាន គឺ “ប្រសិនបើអ្នកមិនមានលទ្ធភាពក្នុងការទិញវា ហើយអ្នកមិនត្រូវការវាទៀត នោះសូមកុំទិញវា” ។ មនុស្សភាគច្រើនបានគិតថា ឲ្យតែបំណុលសុទ្ធតែមិនល្អទាំងអស់។ តែផ្ទុយទៅវិញបំណុលល្អអាចជួយឲ្យអ្នកកសាងទ្រព្យសម្បត្តិរបស់អ្នកបាន ខណៈពេលដែលបំណុលអាក្រក់ ធ្វើឲ្យអ្នកខាតបង់ដោយមិនបានធ្វើឲ្យប្រាក់ របស់អ្នកកើនឡើងដូចជាបំណុលល្អទេ៕ Spean៕

កំនើនផ្សារសហគមន៍ក្នុងទីក្រុងភ្នំពេញកំពុងធ្វើឲ្យជីវិតនៅក្រុងភ្នំពេញកាន់តែរសរវើក

ដោយៈ គង់ សូរិយា

ភ្នំពេញៈ នៅក្នុងរយៈពេលប៉ុន្មានឆ្នាំកន្លងមកនេះ ផ្សារសហគមន៍បែបទំនើប (Community Mall) មានការកើនឡើងគួរឱ្យកត់សម្គាល់ តាមការស្រាវជ្រាវរបស់ក្រុមហ៊ុន CBRE Cambodia មានចំនួនជាង១០ទីតាំងហើយកំពុងប្រតិប្តតិការ ខណៈគម្រោង ផ្សារបែបនេះមួយចំនួនទៀត ត្រៀមបើកដំណើរការនៅឆ្នាំនេះ។

លោកស្រីអាន សុធីតា អតីតនាយិកាប្រចាំប្រទេសនៃក្រុមហ៊ុន CBRE Cambodia បានប្រាប់គេហទំព័រ Propertyarea.asia ឱ្យដឹងកាលពីពេលថ្មីៗនេះ ផ្សារសហគមន៍បែបទំនើបនេះ ខុសប្លែកពីផ្សារទំនើប ដោយសារតែមានទំហំលក្ខណៈតូចជាង និងបង្កភាពងាយស្រួល ក្នុងការចេញ ចូលជាង ជាពិសេសលក់នូវផលិតផលដែលប្រើប្រាស់ប្រចាំថ្ងៃដែលជាតម្រូវការរបស់អតិថិជន។

លោកស្រីបន្តថា ផ្សារសហគមន៍បែបទំនើបនេះ ក៏មានបំរើនូវកន្លែងកម្សាន្តផងដែរ ដូចជា រោងភាពយានយន្តផងដែរជាពិសេសនោះ មានកន្លែងចតឡាន និងភាពងាយស្រួល ដែលស្របទៅនឹងតម្រូវចិត្តអតិថិជន ចេញចូលគ្រប់ពេល ខណៈដែលផ្សារទំនើបវិញ គឺភាគច្រើនអតិថិជនទៅដើរទិញរបស់ឥវាន់រៀងរាល់ចុងសប្តាហ៍។

លោកស្រីបន្ថែមថា “ការវិនិយោគលើផ្សារសហគមន៍បែបនេះ មានភាពងាយស្រួ ល និងចំណាយក្នុងទំហំទឹកប្រាក់ចន្លោះពី៥ ទៅ១០លានដុល្លារអាមេរិក អាស្រ័យទៅលើទីតាំង ការជួលដី និងទិញដីសម្រាប់ធ្វើការវិនិយោគក្នុងគម្រោងមួយ” ។

លោកស្រីថា បើសិនជាអ្នកវិនិយោគទិញដី យកមកវិនិយោគនៅកន្លែង ដែលមានតម្លៃខ្ពស់ ការវិនិយោគផ្សារបែបនេះអាចនឹងកើនចំណាយ ដល់៥០លានដុល្លារអាមេរិក សម្រាប់ផ្សារសហគមន៍នីមួយៗ ជារួមតាមការប៉ាន់ស្មាន គឺមានតម្លៃវិនិយោគចន្លោះ៥ ទៅ៥០លានដុល្លារអាមេរិក។

នាយិកាក្រុមហ៊ុន Khat Appraisal លោក ស្រី ចេវ សុឃុន បានឱ្យដឹងថា ការររីកចំរើនលើផ្សារទំនើបបែបសហគមន៍នាពេលបច្ចុប្បន្ននេះ មិនទាន់គ្រប់គ្រាន់នៅឡើយទេ ក្នុងការឆ្លើយតបទៅនឹងតម្រូវការទីកផ្សាររបស់ប្រទេសកម្ពុជា។

លោកស្រីបន្តថា “មនុស្សជាច្រើន ជាពិសេសអ្នកវិនិយោគ និងអ្នកធ្វើការ ចូលចិត្តទៅផ្សារប្រភេទនេះ ដោយសារតែក្រៅពីងាយស្រួល ក្នុងស្វែងទិញទំនិញគោលដៅ ពួកគាត់អាចមានជម្រើសច្រើន ក្នុងការទិញទំនិញដទៃទៀត ដែលមាននៅក្នុងផ្សារនោះស្រាប់” ។

លោកស្រីបន្ថែមទៀតថា ម្យ៉ាងទៀតពួកគាត់អាចធ្វើការណាត់ជួប ពិភាក្សាការងារផ្សេងៗជាមួយដៃគូជំនួញ និងអតិថិជននៅក្នុងផ្សារទំនើបនេះបាន ដោយងាយស្រួលផងដែរ” ។ លោកស្រីបញ្ជាក់ថា “ជាមួយកំណើនសេដ្ឋកិច្ច និងការអភិវឌ្ឍន៍ប្រទេសកម្ពុជាដែលកំពុងកើនមាននាពេលបច្ចុប្បន្ន និងបន្តទៅពេលអនាគត នៅមានតែមានតម្រូវផ្សារសហគមន៍បែបទំនើបប្រភេទនេះបន្ថែមទៀត” ។

ប្រទេសកម្ពុជាក្នុងយៈពេលប៉ុន្មានកន្លងមកនេះ មានការីកចំរើនលើគ្រប់វិស័យទាំងវិស័យសេដ្ឋកិច្ច ហេដ្ឋរចនាសម្ព័ន្ធ និងសំណង់អគារទំនើបៗជាច្រើន ដែលជំរុញឱ្យមានការផ្លាស់ប្តូរនូវឥរិយាបទរបស់ប្រជាពលរដ្ឋ ទាំងការប្រើប្រាស់ និងរស់នៅតាមបែបទំនើប និងស៊ីវិល័យ តាមរយៈការប្រើប្រាស់របស់ទំនើប និងពិសារអាហារនៅក្នុងទីកន្លែងដែលមានភាពទាន់សម័យ៕

ថៃបោះទុនវិនិយោគទឹកប្រាក់៩០០០លានដុល្លារលើការពង្រីកព្រលានយន្តហោះដើម្បីក្លាយជាច្រកអន្តរជាតិទី៣សម្រាប់ប្រទេស

ដោយៈសហការី

បាងកកៈ រដ្ឋាភិបាលថៃបានចុះកិច្ចព្រមព្រៀង ជាមួយសម្ព័ន្ធក្រុមហ៊ុនក្នុងស្រុកដើម្បីវិនិយោគព្រលានយន្តហោះរបស់ខ្លូន ដោយគ្រោងចំណាយលុយជាង៩០០០ពាន់លានដុល្លារ លើគម្រោងធ្វើឱ្យប្រសើរឡើងនូវព្រលានយន្តហោះមួយក្នុងប្រទេសថៃ។

គម្រោងវិនិយោគនេះគឺជា ការពង្រីកនូវព្រលានយន្តហោះ U-tapao ដែលស្ថិតនៅក្នុងខេត្តរ៉ាក់យ៉ង ប្រទេសថៃ និងជាព្រលានយន្តហោះសាធារណៈស៊ីវិល-យោធាដែលបម្រើដល់ទីក្រុងរ៉ាក់យ៉ង និងប៉ាតាយ៉ាក្នុងប្រទេសថៃ។ វាក៏មានតួនាទីជាអាកាសយាន ដ្ឋានកងទ័ពជើងទឹក និងជាផ្ទះរបស់កងទ័ពអាកាសរបស់រាជវង្សថៃផងដែរ។

រដ្ឋាភិបាលថៃបានចុះហត្ថលេខា លើកិច្ចព្រមព្រៀងចំនួន២៩០ពាន់លានបាត ឬស្មើនឹងទឹកប្រាក់ (៩,៣៦ពាន់លានដុល្លារ) ជាមួយសម្ព័ន្ធក្រុមហ៊ុនក្នុងស្រុក ដើម្បីធ្វើឱ្យប្រសើរឡើងនិងពង្រីកព្រលានយន្តហោះ U-Tapao និងតំបន់ជុំវិញឱ្យប្រែក្លាយជាច្រកទ្វារអន្តរជាតិទីបីសម្រាប់ទីក្រុងបាងកក។

វាជាផ្នែកមួយនៃគម្រោងហេដ្ឋារចនាសម្ព័ន្ធ របស់រដ្ឋាភិបាលដ៏សំខាន់មួយ នៅក្នុងតំបន់ឧស្សាហកម្មភាគខាងកើតរបស់ខ្លួន ហើយនឹងធ្វើឱ្យ U-tapao ក្លាយជាមជ្ឈមណ្ឌលពាណិជ្ជកម្មទី៣បម្រើដល់រដ្ឋធានីថៃ និងឆ្នេរសមុទ្រភាគខាងកើតឧស្សាហកម្ម បន្ទាប់ពីអាកាសយានដ្ឋានសុវណ្ណភូមិ និងស្ថានីយចំណតដុនមឿង។

កិច្ចព្រមព្រៀងនេះ ក៏គ្របដណ្តប់លើការសាងសង់ ព្រលានយន្តហោះទីក្រុងជាប់នឹងព្រលានយន្តហោះ ដែលជាមជ្ឈមណ្ឌលដឹកជញ្ជូន និងឧស្សាហកម្មគាំទ្រ ដូចជា ការថែទាំយន្តហោះ ការជួសជុល ការបណ្តុះបណ្តាលអាកាសចរណ៍ និងការផ្ទុកប្រេង។

U-tapao មានចម្ងាយធ្វើដំណើរ ដោយចំណាយពេលប្រហែល២ម៉ោង ចេញពីទីក្រុងបាងកក។ ចំណែកឯផែនការដាច់ដោយឡែក ដើម្បីបង្កើតផ្លូវដែកក៏ត្រូវបានអនុម័តរួចជាស្រេច៕

គម្រោងវិនិយោគចំនួនធំៗតម្លៃជិត២០ពាន់លានដុល្លារនឹងកែប្រែមុខខេត្តព្រះសីហនុនាពេលអនាគត

ដោយៈ ម៉ាណេត

ភ្នំពេញៈ គម្រោងអភិវឌ្ឍណ៍ធំៗចំនួន៣ នឹងផ្លាស់ប្តូរមុខព្រះសីហនុកាន់តែខ្លាំងបន្ថែម បន្ទាប់ពីគម្រោងទាំងអស់បញ្ចប់នាពេលខាងមុខ ខណៈគម្រោងទាំងបីនេះមានទុនវិនិយោគសរុបប្រមាណ១៩.២ពាន់លានដុល្លារ។

ទី១) គម្រោងទីក្រុងរាម

ក្រុមហ៊ុន Canopy Sands Development ដែលជាសមាជិករបស់ក្រុមហ៊ុន ព្រីនស៍ ហូឌីង គ្រុប ដែលជាក្រុមហ៊ុនពហុផលិតផលដ៏ធំ និងកំពុងមានភាពរីកចម្រើនលឿនជាងគេមួយនៅកម្ពុជា បានអនុម័តផែនការគោលសម្រាប់ទីក្រុងរាម ដែលបានអភិវឌ្ឍន៍ដោយក្រុមហ៊ុន Surbana Jurong Group ដែលជាក្រុមហ៊ុន ផ្ដល់ប្រឹក្សាផ្នែកសេវាកម្មក្នុងការគ្រប់គ្រង និងហេដ្ឋារចនាសម្ព័ន្ធទីក្រុងទូទាំងពិភពលោក ដែលមានទីស្នាក់ការកណ្តាល នៅប្រទេសសិង្ហបុរី។

ផែនការគោលបានបញ្ជាក់អំពីប្លង់ដីសម្រាប់ប្រើប្រាស់ ក្នុងគម្រោងដែលមានទំហំ៨៣៤ហិកតា ដែលការវិនិយោគសរុប ត្រូវបានគេប៉ាន់ស្មានប្រមាណ១៦ពាន់លានដុល្លារ ហើយនឹងត្រូវបានអភិវឌ្ឍន៍ នៅលើដីដែលបានចាក់បំពេញ ដែលមានទីតាំងនៅជិតអាកាសយានដ្ឋានអន្តរជាតិខេត្តព្រះសីហនុ។

ទីក្រុងរាម នឹងដើរតួជាកត្តាជំរុញ សម្រាប់សក្ដានុពលរីកចម្រើន នៃតំបន់ខេត្តព្រះសីហនុទាំងមូល ដែលជាទីក្រុងធំជាងគេលំដាប់ទីបី និងជាកំពង់ផែទឹកជ្រៅរបស់កម្ពុជា។

ទីក្រុងរាម នឹងផ្លាស់ប្តូរខេត្តព្រះសីហនុ តាមរយៈការណែនាំនូវប្រព័ន្ធអេកូឡូស៊ី ប្រកបដោយចីរភាពសម្រាប់សកម្មភាពផ្នែក ទេសចរណ៍ ផ្នែកពាណិជ្ជកម្ម និងលំនៅដ្ឋាន ដែលមានសក្ដានុពល អាចផ្ដល់ជាកន្លែងស្នាក់នៅ ដល់ប្រជាជនរហូតដល់១៣០,០០០នាក់។ នៅពេលបញ្ចប់ ផែនការគោលដែលផ្តោតសំខាន់ទៅលើ ការសាងសង់កន្លែងលំហែសម្រាប់គ្រួសារ ខុនដូ ផ្ទះដែលមានទីធ្លា និងផ្ទះជាប់ឆ្នេរ និងលំនៅដ្ឋាន ដែលមានតម្លៃសមរម្យ ផ្សារទំនើប មជ្ឈមណ្ឌលពាណិជ្ជកម្ម រមណីយដ្ឋានតាមមាត់ឆ្នេរ សណ្ឋាគារ ខុនដូតែល កប៉ាល់និងក្លឹបកំពង់ផែកំសាន្ត និងទីលានវាយកូនហ្គោល។

ទី២) គម្រោងរោងចក្រអគ្គិសនីកម្លាំង៧០០មេហ្គាវ៉ាត់

រាជរដ្ឋាភិបាល តាមរយៈក្រុមប្រឹក្សាអភិវឌ្ឍន៍កម្ពុជា (CDC) បានសម្រេចអនុម័តរោងចក្រអគ្គិសនីដែលមានកម្លាំង៧០០មេហ្គាវ៉ាត់ ដែលបោះទុនវិនិយោគ១.៣០០លានដុល្លារ នៅខេត្តព្រះសីហនុ។

CDC បានឱ្យដឹងថា ក្រុមហ៊ុន Huadian Sihanoukville Power Generation បង្កើតរោងចក្រផលិតថាមពលអគ្គិសនី ប្រើដោយធ្យូងថ្ម អានុភាព៧០០មេហ្កាវ៉ាត់ ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុទី១ ស្រុកស្ទឹងហាវ ខេត្តព្រះសីហនុ មានទុនវិនិយោគប្រមាណ១២៨៣លានដុល្លារអាមេរិក និងអាចបង្កើតការងារបានចំនួន៥២០កន្លែង។

ទី៣) គម្រោងការសាងសង់ផ្លូវល្បឿនលឿនភ្នំពេញ-សីហនុ

គម្រោងការសាងសង់ផ្លូវល្បឿនលឿនភ្នំពេញ-សីហនុ ដែលស្ថាបនាសម្រេចបានប្រមាណ៤០ភាគរយ ពេលនេះត្រៀមចាក់អ៊ុតកៅស៊ូហើយ ដែលគំរោងនេះ នឹងបញ្ចប់តាមផែមការគ្រោងទុក។

ផ្លូវនេះ មានប្រវែងជាង១៩០គីឡូម៉ែត្រ សាងសង់ដោយក្រុមហ៊ុន Cambodian PPSHV Expressway Co., Ltd ក្រោមថវិកាប្រមាណ២ពាន់លានដុល្លារ និងប្រើរយៈពេលសាងសង់៤៨ខែ។ វាជាផ្លូវប្រវត្តិសាស្ត្រថ្មីមួយរបស់កម្ពុជា និងចិន ដែលបង្ហាញនូវតម្លៃមិត្តភាពកិច្ចសហប្រតិបត្តិការ ដោយឈរលើភាពជាដៃគូយុទ្ឋសាស្ត្រ គ្រប់ជ្រុងជ្រោយ នៃសហគមន៍ពីរវាសនាតែមួយ។

គិតចាប់ពីឆ្នាំ២០១៧ ដល់ខែធ្នូ ឆ្នាំ២០២០ ខេត្តព្រះសីហនុមាន សំណង់សរុបបានអនុញ្ញាតឲ្យសាងសង់មានចំនួន១,៥១៤អគារ មានក្រឡាផ្ទៃសរុប១៤,៧៣៦,៥៥៩ម៉ែត្រការ៉េ និងទុនវិនិយោគសរុប ៨,០៤៩,៦៩២,៨៣១ដុល្លារអាមេរិក៕

ដំណឹងល្អៈទីក្រុងភ្នំពេញនិងក្រុងតាខ្មៅនឹងបើកឡើងវិញក្រោយថ្ងៃទី៥ ឧសភា លើកលែងតែតំបន់

ដោយៈគង់ សូរិយា

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា នៅយប់ថ្ងៃទី០២ ខែឧសភា ឆ្នាំ២០២១នេះ បានប្រកាសច្បាស់ៗថា នឹងមិនបន្ដបិទរាជធានីភ្នំពេញ និងតាមបណ្ដាខេត្តទៀតនោះទេ ពោលអាចនឹងបិទតំបន់តូចៗមួយចំនួនដែលមានហានិភ័យខ្ពស់ លើការឆ្លងជំងឺកូវីដ១៩តែប៉ុណ្ណោះ។

ការប្រកាសបែបនេះរបស់សម្ដេចតេជោ ហ៊ុន សែន គឺឆ្លើយតបទៅនឹងអ្នក Comment ដែលបានចូលទៅ Comment ក្នុងហ្វេសបុករបស់សម្ដេចថា ចង់អំពីស្ថានភាពក្រោយថ្ងៃទី០៥ ខែឧសភា ឆ្នាំ២០២១ ដែលជាថ្ងៃកំណត់បើករាជធានីភ្នំពេញឡើងវិញ ក្រោយបិទខ្ទប់រយៈពេល៣សប្ដាហ៍ ដើម្បីទប់ស្កាត់ការឆ្លងរីករាលដាលជំងឺកូវីដ១៩ ។

ម្ចាស់គណនីហ្វេសបុកឈ្មោះ Tuo បានសរសេរយ៉ាងដូច្នេះថា «សម្តេចថ្ងែទី៥នេះ សូមសម្តេចបើកផ្លូវវិញមែនទែនមក។ ក្មួយជាប់នៅខេត្តយូរថ្ងែមកហើយដែរ មិនទាន់ចូលទៅភ្នំពេញវិញបាន ព្រោះត្រូវឡើងមកចាក់វ៉ាក់សាំង ហើយថវិកាក៏ជិតអស់ សំណាងហើយក្មួយស្គាល់គេគេឲ្យផ្ទះស្នាក់នៅអត់គិតអ្វីពីក្មួយ» ។

សម្ដេចតេជោ ហ៊ុន សែន បានមានប្រសាសន៍ឆ្លើយតបយ៉ាងដូច្នេះថា «ពុំមានហេតុផលបន្តបិទ ទេយើងនិងបើកតែខេត្ត ឬរាជធានីអាចបិទ តំបន់តូចៗ ដែលនៅមានហានិភ័យលើការឆ្លងខ្ពស់។ ការបិទកន្លងមក គឺជាការបង្ខំចិត្តដើម្បីកាត់បន្ថយការឆ្លង និងការស្លាប់របស់ប្រជាជនយើង។ សូមយោគយល់ដល់ការលំបាករួមរបស់ជាតិ» ។

គួរជម្រាបថា រាជរដ្ឋាភិបាលកម្ពុជា សម្រេចជ្រើសយកវិធានការបន្ដបិទខ្ទប់រាជធានីភ្នំពេញ និងក្រុងតាខ្មៅ ខេត្តកណ្ដាល ដើម្បីទប់ស្កាត់ការឆ្លងរីករាលដាលជំងឺកូវីដ១៩ ហើយការកំណត់បិទខ្ទប់នេះ ត្រឹមថ្ងៃទី០៥ ខែឧសភា ឆ្នាំ២០២១ខាងមុខនេះ។ បើគិតដល់ថ្ងៃទី០៥ ខែឧសភា ការបិទខ្ទប់នេះមានរយៈពេល៣សប្ដាហ៍៕

ធនាគារនិងមីក្រូហិរញ្ញវត្ថុចាប់ផ្ដើមជំរុញអតិថិជនទូទាត់តាមអេឡិចត្រូនិក

ដោយៈលក្ខិណា

ភ្នំពេញៈ ក្នុងពេលដែលជំងឺកូវីដ១៩ នៅតែបន្តរាលដាលក្នុងប្រទេសកម្ពុជា វិធានការរបស់ក្រសួងសុខាភិបាលក៏ត្រូវបានរឹតបន្តឹង ដើម្បីទប់ស្កាត់ការឆ្លងរីករាលដាលកាន់តែខ្លាំង ដោយបានណែនាំឱ្យពលរដ្ឋរក្សាគម្លាត ជៀសវាងកាន់របស់រួមគ្នា ក្នុងនោះក្រដាសប្រាក់ក៏ជាវត្ថុមួយ ដែលត្រូវកាន់តៗគ្នាពីម្នាក់ទៅម្នាក់ ដែលជាកត្តាប្រឈមមួយក្នុងការចម្លងជំងឺនេះ។

ដោយសារតែការយល់ឃើញនូវកត្តានេះ ធនាគារជាតិនៃកម្ពុជាក៏បានអំពាវនាវនិងជំរុញឱ្យធនាគារនិងមីក្រូហិរញ្ញវត្ថុនៅកម្ពុជា ងាកមកបម្រើការទូទាត់ការចំណាយរបស់អតិថិជនតាមប្រព័ន្ធអេឡិចត្រូនិក និងកាត់បន្ថយការប្រើប្រាស់ក្រដាស់ប្រាក់ ដើម្បីទូទាត់ របស់ខ្លួន។

ឆ្លើយតបនឹងការអំពាវនាវរបស់ធនាគារជាតិនៃកម្ពុជា បណ្ដាធនាគារធំៗក្នុងស្រុកនិងមីក្រូហិរញ្ញវត្ថុជាច្រើន ក៏បានងាកមកជំរុញការទូទាត់ និងចាយចាយតាមប្រព័ន្ធអេឡិចត្រូនិក ដើម្បីចូលរួមទប់ស្កាត់ការឆ្លងនិងចម្លងជំងឺកូវីដ១៩ កាន់តែធំថែមទៀត ។

ធនាគារអេស៊ីលីដា ភីអិលស៊ី បានប្រកាសថាខ្លួនបានធ្វើបច្ចុប្បន្នភាព កម្មវិធីអេបរបស់ធនាគារ ដើម្បីសម្រួលឱ្យអតិថិជន កាន់តែមានភាពងាយស្រួលក្នុងការប្រើប្រាស់ ក្នុងពេលប្រជាពលរដ្ឋទូទាំងរាជធានី ត្រូវស្នាក់ក្នុងផ្ទះដើម្បីបញ្ចប់ជំងឺកូវីដ១៩ ។

ប្រធាននាយកប្រតិបត្តិធនាគារអេស៊ីលីដា លោកអ៊ិន ចាន់នីបានថ្លែងថា មានកម្មវិធីទូរសព្ទដៃមួយនៅផ្ទះ គឺដូចជាមាននាយកធនាគារមួយនៅក្នុងផ្ទះអញ្ចឹងដែរ ដោយអតិថិជន អាចទូទាត់ការចំណាយនានារបស់ខ្លួន អាចធ្វើប្រតិបត្តិការផ្សេងៗនិងអាចបញ្ជាការទិញទំនិញតាមអនឡាញបានទៀតផង ។

ជាមួយគ្នានេះ នាយកប្រតិបត្តិគ្រឹះស្ថានមីក្រូហិរញ្ញវត្ថុអេអឹមខេវិញ លោកគា បូរាណក៏បានឱ្យដឹងថា ការទូទាត់តាមបច្ចេកវិទ្យាអេឡិចត្រូនិក ជាពិសេសតាមកម្មវិធីស្កែនQR នឹងជួយឱ្យអតិថិជន ក៏ដូចជា ម្ចាស់អាជីវកម្មកាន់តែមានភាពងាយស្រួល ព្រោះមិនត្រូវការពិនិត្យសាច់ប្រាក់យូរ ខាតពេលវេលានោះទេ ហើយអាចទូទាត់តាមគ្រប់ពេលវេលាផងដែរ។

គ្រឹះស្ថានមួយនេះបានតែ បន្ថែមមុខងារមួយទៀត សម្រាប់ជួយដល់ពលរដ្ឋជាប់ក្នុងតំបន់ខ្ទប់ហើយខ្វះខាតលទ្ធភាព គឺអាចខ្ចីប្រាក់ពីគ្រឹះស្ថានត្រឹមតែមួយថ្ងៃ តាមរយៈកម្មវិធីទូរសព្ទដៃ ដែលអាចជួយដល់ពលរដ្ឋមានការលំបាកបានទាន់ពេលវេលា។

ជាមួយគ្នានេះធនាគារហត្ថាបាន និងកំពុងវិនិយោគបន្ថែមលើប្រព័ន្ឋទូទាត់តាមឌីជីថល ដើម្បីផ្តល់ភាពងាយស្រួលដល់អតិថិជន។

លោកឧកញ៉ាហួត អៀងតុងប្រធានអគ្គនាយកធនាគារហត្ថាបានមានប្រសាសន៍ថា គោលដៅរបស់យើងធ្វើយ៉ាងណា ផ្តល់សេវាកម្មប្រកបដោយទំនុកចិត្ត មានភាពងាយស្រួលដល់អតិថិជន ដោយយើងធ្វើយ៉ាងណាឲម្យអតិថិជនរបស់យើង ទទួលបានសេវាកម្មកាន់តែងាយស្រួល និងប្រកបដោយទំនុកចិត្តខ្ពស់ ពិសេសយើងផ្តល់ភាពកក់ក្តៅដល់អតិថិជន តាមរយៈសេវាកម្មប្រកបដោយភាពរួសរាយរាក់ទាក់៕

លោកចូ បៃឌិននឹងចាក់រ៉ុកមេដឹកនាំកូរ៉េឲ្យប្រឆាំងចិនបន្តទៀត ក្នុងជំនួបកំពូល ចុងខែឧសភានេះ?

ដោយៈសុខុម

សេអ៊ូល: រដ្ឋាភិបាលក្រុងសេអ៊ូល និងសេតវិមាន កំពុងកែសម្រួល និងសម្រិតសម្រាំងរបៀបវារៈ សម្រាប់ជំនួបកំពូលដំបូងរវាងប្រធានាធិបតី Moon Jae-in និងប្រធានាធិបតីសហរដ្ឋអាមេរិក លោក Joe Biden ដោយជំនួបរបស់លោកទាំងពីរនឹងត្រូវធ្វើឡើងនៅថ្ងៃទី២១ ឧសភានៅសហរដ្ឋអាមេរិក។ នេះបើយោងតាមសារព័ត៌មាន Korea Times ចុះផ្សាយនៅថ្ងៃទី០១ ឧសភានេះ។

ក្រោយការប្រកាសដំណាលគ្នា អំពីកាលវិភាគនៃជំនួបកំពូលនេះ នៅទីក្រុងវ៉ាស៊ីនតោន និងក្រុងសេអ៊ូល កាលពីថ្ងៃសុក្រ ទី៣០ មេសា មន្ត្រីជាន់ខ្ពស់មួយរូបនៅវិមានប្រធានាធិបតីកូរ៉េខាងត្បូង បានប្រាប់ក្រុមអ្នកយកព័ត៌មានថា របៀបវារៈជាក់លាក់សម្រាប់ជំនួបកំពូលនេះ កំពុងស្ថិតក្នុងដំណាក់កាលពិភាក្សា នៅឡើយរវាងរដ្ឋាភិបាលទាំងពីរ។

មន្ត្រីរូបនេះបានច្រានចោលក្ដីរំពឹង របស់មជ្ឈដ្ឋានសាធារណៈដែលយល់ថា ការចូលរួមរបស់រដ្ឋាភិបាលក្រុងសេអ៊ូល ក្នុងក្រុមសម្ព័ន្ធមិត្តជាយុទ្ធសាស្ត្រដឹកនាំ ដោយសហរដ្ឋអាមេរិក ដែលមានឈ្មោះថាQuad (កិច្ចសន្ទនាសន្តិសុខចតុភាគី) នឹងក្លាយជាប្រធានបទដ៏សំខាន់បំផុត នៅក្នុងរបៀបវារៈអំឡុងជំនួបកំពូលនេះ។

មន្ត្រីដដែលបានលើកឡើងទៀតថា “រដ្ឋាភិបាលក្រុងសេអ៊ូល នឹងរក្សាជំហរថា ប្រទេសកូរ៉េ អាចនឹងចូលរួមជាមួយក្រុមពិគ្រោះយោបល់ ថ្នាក់ពិភពលោកណាមួយ ប្រសិនបើវាស្របតាមគោលការណ៍បើកចំហ ប្រកបដោយបរិយាប័ន និងតម្លាភាពរបស់រដ្ឋាភិបាល”។

បញ្ហាដែលរដ្ឋាភិបាលក្រុងសេអ៊ូល អាចនឹងចូលរួមក្នុងក្រុមសម្ព័ន្ធមិត្ត Quad ដែលបច្ចុប្បន្នរួមមានប្រទេសអូស្ត្រាលី ឥណ្ឌា ជប៉ុន និងសហរដ្ឋអាមេរិក បានទាក់ទាញការចាប់អារម្មណ៍យ៉ាងខ្លាំង ក្នុងចំណោមអ្នកសង្កេតការណ៍ផ្នែកការទូត ដោយធ្វើឱ្យរដ្ឋាភិបាលក្រុងប៉េកាំង ព្រួយបារម្ភយ៉ាងខ្លាំងអំពីបញ្ហានេះ។ សម្ព័ន្ធមិត្ត៤ភាគី ឬ Quad នេះត្រូវបានគេមើលឃើញថាជា “សម្ព័ន្ធចិត្តប្រឆាំងចិន” នៅក្នុងតំបន់។

បញ្ហាសហរដ្ឋអាមេរិក ផ្គត់ផ្គង់វ៉ាក់សាំងកូវីដ-១៩ ទៅដល់ប្រទេសផ្សេងៗក៏ត្រូវបានគេរំពឹងថា នឹងក្លាយជាប្រធានបទដ៏សំខាន់ដែរ សម្រាប់ជំនួបកំពូលក្នុងពេលដ៏ខ្លីខាងមុខនេះ។ ទន្ទឹមនេះក៏មានសារព័ត៌មានចុះផ្សាយដែរថា បញ្ហាកំណត់យកប្រទេសកូរ៉េខាងត្បូង ធ្វើជាមជ្ឈមណ្ឌលវ៉ាក់សាំង-១៩ ប្រចាំតំបន់អាស៊ី ក៏អាចស្ថិតក្នុងរបៀបវារៈនេះដែរ។

អ្នកជំនាញមួយចំនួនបានលើកឡើងនៅមុននេះថា ប្រទេសកូរ៉េខាងត្បូង ដែលមានទាំងសមត្ថភាព និងកន្លែងផលិតវ៉ាក់សាំងកូវីដ-១៩ គួរតែត្រូវបានកំណត់ជាមជ្ឈមណ្ឌលផលិតវ៉ាក់សាំងប្រចាំតំបន់អាស៊ី តាមរយៈការផ្ទេរបច្ចេកវិទ្យាពីសហរដ្ឋអាមេរិក។

ទោះជាយ៉ាងណា មន្រ្តីខាងលើបានបញ្ជាក់ជាថ្មីថា របៀបវារៈសម្រាប់ជំនួបកំពូលនេះមិនទាន់មានការសម្រេចជាផ្លូវការនៅឡើយទេ៕