ដោយ ៖ លក្ខិណា
ភ្នំពេញ៖ ចាប់តាំងពីកម្ពុជាបានជួបនូវការឆ្លងរាលដាលនៃជំងឺកូវីដ១៩ក្នុងសហគមន៍២០ កុម្ភៈ ២០២១មក អាជីវកម្ម នៅតាមវិស័យជាច្រើនដែលគាំទ្រដល់កំណើនសេដ្ឋកិច្ចកម្ពុជា បានស្ងប់ស្ងាត់ជាបន្តបន្ទាប់ និងធ្វើឱ្យប្រតិបត្តិករនៅក្នុងវិស័យទាំងនោះផ្អាកដំណើរការ ឬបិទអាជីវកម្មតែម្ដង។ យ៉ាងណាក្ដី ក្នុងចំណោមវិស័យសំខាន់ៗ គេឃើញថាមានតែវិស័យ ឧស្សាហកម្ម ជាពិសេសឧស្សាហកម្មកាត់ដេរ នៅតែទទួលបានគម្រោងវិនិយោគថ្មីៗជាបន្តបន្ទាប់។

បើតាមលោកប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានឱ្យដឹងថា ចាប់តាំងពីកម្ពុជា ជួបនឹងប្រទះនឹងរលកទី៣នៃជំងឺកូវីដ១៩ឆ្លងចូលសហគមន៍ គេឃើញថាវិស័យជាច្រើនដែលបានកម្រើកឡើងវិញនៅដើមឆ្នាំ២០២១នោះបានជួបប្រទះនឹងបញ្ហាសាជាថ្មី រហូតបាត់បង់ឱកាសពង្រីកអាជីវកម្ម កាត់បន្ថយបុគ្គលិក ឬផ្អាកដំណើរការតែម្ដងនៅក្នុងដំណាក់កាលដ៏លំបាកមួយនេះ។

លោកបន្តថា ដោយឡែកពាក់ព័ន្ធនឹងការទិញលក់អចលនទ្រព្យ ដូចជាផ្ទះ ខុនដូ និងដីធ្លីសម្រាប់អភិវឌ្ឍន៍ជារោងចក្រធំៗក៏មានភាពស្ងប់ស្ងាត់ដែរ បើទោះជាមានគម្រោងវិនិយោគថ្មីត្រូវបានអនុម័តគាំទ្រដោយក្រុមប្រឹក្សាអភិវឌ្ឍន៍កម្ពុជាជាបន្តបន្ទាប់ក៏ដោយ។ លោកបន្ថែមថា អ្វីដែលយើងទាំងអស់គ្នាត្រូវធ្វើនៅពេលនេះ គឺត្រូវទប់ស្កាត់ការឆ្លងជំងឺក្នុងសហគមន៍ ជាពិសេសត្រូវទប់ស្កាត់ការឆ្លងចូលក្នុងវិស័យឧស្សាហកម្មរោងចក្រកាត់ដេរ ព្រោះពួកគាត់ភាគច្រើនធ្វើការជាបណ្ដាញ និងមានទំនាក់ទំនងគ្នាជាបន្តបន្ទាប់ ។

លោកអាត់ ធន់ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បានឱ្យដឹងថា រដ្ឋាភិបាលត្រូវតែទប់ស្កាត់ការឆ្លងរាលដាលនៅក្នុងរោងចក្រឱ្យបាន បើសិនជាកម្មករណាមួយមានពាក់ព័ន្ធ គឺត្រូវធ្វើចត្តាឡីស័កឱ្យបានត្រឹមត្រូវ និងត្រូវផ្អាកដំណើរការរោងចក្រនោះដើម្បីស្រាវជ្រាវឱ្យបានច្បាស់លាស់សិន ទើបបើកដំណើរការឡើងវិញ បើពុំនោះទេ នឹងមានផលអាក្រក់កាន់តែខ្លាំងទៅលើវិស័យនេះ ។

យោងតាមរបាយការណ៍កន្លងមកបង្ហាញថានៅក្នុងវិបត្តិកូវីដ១៩ តាំងពីដើមឆ្នាំ ២០២០ ការនាំចេញក្នុងវិស័យកាត់ដេរគិតត្រឹមឆមាសទី៤ឆ្នាំ២០២០ បានរួមចំណែករហូតដល់៧០ភាគរយនៃការនាំចេញសរុប ខណៈវិស័យដែលគាំទ្រសំខាន់សេដ្ឋកិច្ច ដូចជាទេសចរណ៍ជាដើមបានធ្លាក់ចុះយ៉ាងគំហុក ស្ទើរ១០០ភាគរយ៕

ដោយ ៖ រ៉ាណេត

ភ្នំពេញ ៖ ទោះជាស្ថិតនៅក្នុងកំឡុងពេលនៃវិបត្តិកូវីដ១៩យ៉ាងណាក៏ដោយ សម្រាប់ទំហំពាណិជ្ជកម្មទ្វេភាគីរវាងកម្ពុជា-សិង្ហបុរី បានកើនឡើងដល់ចំនួន ៤,២៤ពាន់លានដុល្លារអាមេរិក ជាមួយនឹងគម្រោងបង្កើនការវិនិយោគនៅក្នុងវិស័យផ្សេងៗជាច្រើនទៀតនៅក្នុងប្រទេសទាំង២។

សម្តេចវិបុលសេនាភក្តី សាយ ឈុំ ប្រមុខរដ្ឋស្តីទីកម្ពុជាបានមានប្រសាសន៍ថានៅព្រឹកថ្ងៃទី២៥ ខែមីនា ឆ្នាំ២០២១នេះថា ទោះបីជាស្ថិតក្នុងវិបតិ្តនៃជំងឺកូវីដ-១៩ក៏ដោយ ក៏ពាណិជ្ជកម្មទ្វេភាគីរបស់ប្រទេសទាំងពីរកម្ពុជា-សិង្ហបុរីមានទំហំ៤,២៤ពាន់លានដុល្លារ ហើយការវិនិយោគរបស់ប្រទេសសិង្ហបុរីនៅព្រះរាជាណាចក្រកម្ពុជាមានទំហំទៅដល់១,២៩ពាន់លានដុល្លារក្នុងរយៈពេល២៦ឆ្នាំកន្លងមកនេះ ពោលគឺចាប់ពីឆ្នាំ១៩៩៤ ដល់ឆ្នាំ២០២០។

ឯកអគ្គរដ្ឋទូតសិង្ហបុរីប្រចាំនៅកម្ពុជា លោកស្រីធាវ ឡេ ឈិង (Teo Lay Cheng) បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំងពីរក្នុងវិស័យជាច្រើនដូចជា៖ វិស័យសេដ្ឋកិច្ច វិស័យសុខាភិបាល ក៏ដូចជាទំនាក់ទំនងរវាងប្រជាជននៃប្រទេសទាំងពីរ។

វិស័យសេដ្ឋកិច្ច និងការវិនិយោគរវាងប្រទេសទាំងពីរមានការកើនឡើងជាលំដាប់ ជាពិសេសអ្នកវិនិយោគសិង្ហបុរីបានសហការយ៉ាងជិតស្និទ្ធជាមួយនឹងអ្នកវិនិយោគកម្ពុជាក្នុងការអភិវឌ្ឍលើកកម្ពស់វិស័យបច្ចេកវិទ្យា និងវិស័យឌីជីថល ក្នុងនោះវិស័យដែលលេចធ្លោជាងគេ គឺវិស័យទេសចរណ៍ និងវិស័យបដិសណ្ឋារកិច្ច។

លោកស្រីបានបញ្ជាក់ថា ការហោះហើរត្រង់ពីប្រទេសសិង្ហបុរីមកព្រះរាជាណាចក្រកម្ពុជា គឺមានការកើនឡើង៩ដងក្នុងមួយសប្តាហ៍ ដែលអាចជំរុញលើកកម្ពស់ទំនាក់ទំនង និងការផ្សារភ្ជាប់រវាងប្រជាជននៃប្រទេសទាំងពីរផងដែរ។ ក្រៅពីកិច្ចសហប្រតិបត្តិការទ្វេភាគី ប្រទេសទាំងពីរក៏មានកិច្ចសហប្រតិបត្តិការដ៏ល្អជាមួយគ្នាក្នុងក្របខ័ណ្ឌកិច្ចសហប្រតិបត្តិការថ្នាក់តំបន់ និងអន្តរជាតិ។

ជាមួយគ្នានេះលោកស្រីក៏បានសន្យាជួយជំរុញការធ្វើវិនិយោគ និងការផ្លាស់ប្តូរពាណិជ្ជកម្មរវាងប្រទេសទាំងពីរ ដើម្បីរួមចំណែកយ៉ាងសំខាន់ដល់ការអភិវឌ្ឍសេដ្ឋកិច្ច-សង្គមរបស់ប្រទេសទាំងពីរក្រោយដំណាក់កាលនៃការរីករាលដាលនៃជំងឺកូវីដ១៩៕

ដោយ ៖ រ៉ាណេត

ភ្នំពេញ ៖ គម្រោងស្ថាបនា និងកែលម្អផ្លូវទាំង៣៨ខ្សែនៅទូទាំងក្រុងសៀមរាបដែលកំពុងដំណើរការយ៉ាងសកម្មនៅពេលបច្ចុប្បន្នកមពុងត្រូវបានក្រុមការងារជំនាញបច្ចេកទេសសិក្សាលម្អិត និងឈានទៅរកការសម្រួលបញ្ជីប៉ាន់ស្មានតម្លៃនៃគម្រោងទាំងមូល។

លោកសួង ហេង រដ្ឋលេខាធិការក្រសួងសាធារណៈការ និងដឹកជញ្ជូន នៅរសៀលថ្ងៃទី២៣ ខែមីនា ឆ្នាំ២០២១បានដឹកនាំកិច្ចប្រជុំក្រុមការងារជំនាញបច្ចេកទេសក្រសួងដើម្បីពិនិត្យនិងកែសម្រួលបញ្ជីប៉ាន់តម្លៃនៃគម្រោងសាងសង់ហេដ្ឋារចនាសម្ព័ន្ធផ្លូវ៣៨ខ្សែ នៅក្រុងសៀមរាប ខេត្តសៀមរាប ឱ្យបានចប់សព្វគ្រប់នៅចុងខែមីនានេះ ដើម្បីដាក់ជូនថ្នាក់ដឹកនាំពាក់ព័ន្ធធ្វើការពិនិត្យសម្រេចពីរាជរដ្ឋាភិបាលកម្ពុជា។

ក្នុងដំណាក់ដំបូង កាលពីចុងឆ្នាំ២០២០កន្លងទៅថ្មីៗនេះ រាជរដ្ឋាភិបាលបានសម្រេចបញ្ចេញកញ្ចប់ថវិកាអភិវឌ្ឍន៍ហេដ្ឋារចនាសម្ព័ន្ធផ្លូវចំនួន៣៨ខ្សែក្នុងក្រុងសៀមរាប ខេត្តសៀមរាប ប្រវែងសរុប៩៨,៣៤គីឡូម៉ែត្រ ក្នុងគោលបំណងដើម្បីចូលរួមលើកកម្ពស់វិស័យសេដ្ឋកិច្ច សោភ័ណភាពទីក្រុងឱ្យសាកសមជាទីក្រុងទេសចរណ៍វប្បធម៌ និងប្រវត្តិសាស្ត្រ ព្រមទាំងតភ្ជាប់ពីទីប្រជុំជនក្រុងសៀមរាបទៅតំបន់ដាច់ ស្រយាលនៅជាយក្រុង និងជួយសម្រួលដល់ការធ្វើដំណើររបស់បងប្អូនប្រជាពលរដ្ឋ និងភ្ញៀវទេសចរណ៍ផងដែរ ដោយគ្រោយចំណាយប្រមាណ១៤០លានដុល្លារ។

គម្រោងនេះអនុវត្តដោយអង្គភាពសាងសង់ចំនួន០៨ រួមមាន៖ ១) កងវិស្វកម្មលេខ១៧៨ស្ពាន-ថ្នល់ នៃនាយកដ្ឋានវិស្វកម្ម ២) កងវិស្វកម្មសម្តេចតេជោ ខេត្តសៀមរាប ៣) កងវិស្វកម្មតេជោ ហ៊ុន សែន សៀមរាប ៤) អគ្គនាយកដ្ឋាន សាធារណការ ៥) អគ្គនាយកដ្ឋានប្រព័ន្ធចម្រោះទឹកកខ្វក់ ៦) នាយកដ្ឋាន គ្រឿងចក្រនិងស្ថាបនាផ្លូវ ៧) នាយកដ្ឋាន ជួសជុល និងថែទាំផ្លូវថ្នល់ និង ៨) មន្ទីរសាធារណការ និងដឹក ជញ្ជូន ខេត្តសៀមរាប ដើម្បី ពិនិត្យលើ លក្ខណៈបច្ចេកទេសសាងសង់ និងការអនុវត្តតាមលក្ខខណ្ឌតម្រូវ នៃស្តង់ដាបច្ចេកទេស ធានា បាននូវ គុណភាពជាប់រឹងមាំ ប្រើប្រាស់បានយូរអង្វែងតាមអាយុកាលមាន ប្រសិទ្ធភាពខ្ពស់ និងសម្រេចការងារឱ្យបានទាន់ពេលវេលា ដែលរហូតមកដល់ពេលនេះសម្រេចលទ្ធផលការងារបាន១៨ភាគរយហើយ៕

ដោយៈ ប៊ី

ភ្នំពេញៈ កម្ពុជា និងប្រទេសចំនួន៥ក្នុងតំបន់មេគង់-ឡានឆាង បានប្តេជ្ញាបង្កើនកិច្ចសហប្រតិបត្តិការកសាងខ្សែក្រវ៉ាត់អភិវឌ្ឍន៍សេដ្ឋកិច្ចមេគង្គ-ឡានឆាង ដើម្បីធានាឱ្យបាននូវការងើបឡើងវិញនៃសេដ្ឋកិច្ចសង្គម បន្ទាប់ពីវិបត្តិនៃជំងឺរាតត្បាតកូរឹត-១៩។

លោកប្រាក់ សុខុនរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានថ្លែងក្នុងលិខិតអបអរសាទរ ក្នុងឱកាស “ទិវាសប្តាហ៍នៃកិច្ចសហប្រតិបត្តិការមេគង្គ-ឡានឆាងឆ្នាំ២០២១” កាលពីម្សិលមិញថា ក្នុងអំឡុងរយៈពេល៥ឆ្នាំកន្លងមក កិច្ចសហប្រតិបត្តិការមេគង្គ-ឡានឆាងបានបង្ហាញយ៉ាងច្បាស់ នូវគុណតម្លៃនៃក្របខណ្ឌកិច្ចសហប្រតិបត្តិការ។

លោកបានថ្លែងថា ក្របខណ្ឌកិច្ចសហប្រតិបត្តិការជំរុញឱ្យកិច្ចសហប្រតិបត្តិការកាន់តែជិតស្និទ្ធរវាង ប្រទេសតាមដងទន្លេទាំង៦ ក្នុងការដោះស្រាយបញ្ហាប្រឈមនានាក្នុងតំបន់ ដោយឈរលើស្មារតីបើកចំហ បរិយាប័ន្ន និងបំពេញបន្ថែមជាមួយយន្តការកិច្ចសហប្រតិបត្តិការអនុតំបន់ផ្សេងទៀត។

ក្នងគោលបំណងធានាឱ្យបាននូវការងើបឡើងវិញនៃសេដ្ឋកិច្ចសង្គមប្រកបដោយក្តីសង្ឃឹមខ្ពស់ បន្ទាប់ពីវិបត្តិនៃជំងឺរាតត្បាតកូរឹត-១៩ត្រូវបានបញ្ចប់ នៅក្នុងកិច្ចប្រជុំកំពូលនៃកិច្ចសហប្រតិបត្តិការមេគង្គ ឡានឆាងលើកទី៣ កាលពីខែសីហា ឆ្នាំ២០២០ កន្លងទៅ ថ្នាក់ដឹកនាំនៃបណ្តាប្រទេសមេគង្គ-ឡានឆាង បានអះអាងជាថ្មីនូវការប្តេជ្ញាចិត្តយ៉ាងមុតមាំក្នុងការដោះស្រាយផលប៉ះពាល់ធ្ងន់ធ្ងរ ដែលបណ្តាលមកពី ជំងឺរាតត្បាតកូវដ-១៩ ដោយបង្កើនកិច្ចសហប្រតិបត្តិការលើវិស័យសុខភាពសាធារណៈ តាមរយៈការបង្កើត សហគមន៍សុខភាពសាធារណៈនៃកិច្ចសហប្រតិបត្តិការមេគង្គ-ឡានឆាង។

លោកប្រាក់ សុខុនបានថ្លែងទៀតថា ថ្នាក់ដឹកនាំទាំងអស់បានប្តេជ្ញាចិត្ត ដើម្បីដោះស្រាយបញ្ហាពិភពលោក និងតំបន់ផ្សេងៗទៀត ដោយធានានូវប្រភពកំណើនថ្មី តាមរយៈការកសាងខ្សែក្រវ៉ាត់អភិវឌ្ឍន៍សេដ្ឋកិច្ចមេគង្គ-ឡានឆាង និងការជំរុញការធ្វើសហកម្មជាមួយច្រករបៀង ពាណិជ្ជកម្មអន្តរជាតិថ្មីតាមផ្លូវគោក-សមុទ្រ។

សម្រាប់កិច្ចសហប្រតិបត្តិការធនធានទឹក ថ្នាក់ដឹកនាំទាំងអស់ បានសម្រេចចិត្តពង្រឹងកិច្ចសហប្រតិបត្តិការលើទិន្នន័យជលសាស្ត្រ និងការចែករំលែកព័ត៌មាន ដើម្បីធានា និរន្តរភាពធនធានទឹក និងពង្រឹងកិច្ចសហប្រតិបត្តិការលើវិស័យគ្រប់គ្រងបន្ទាន់គ្រោះទឹកជំនន់ គ្រោះរាំងស្ងួត និងគ្រោះមហន្តរាយផ្សេងៗទៀត។

ក្នុងចំណោមគម្រោងទាំងនេះ ប្រទេសកម្ពុជា ទទួលបានអត្ថប្រយោជន៍ពីគម្រោងចំនួន៥៥ ដែលបានគាំទ្រដល់សកម្មភាពកិច្ចសហប្រតិបត្តិការលើវិស័យ អភិវឌ្ឍន៍ជនបទ ការបង្កើតអាជីវកម្មសហគមន៍ ធនធានទឹក កសិកម្ម ការតភ្ជាប់ផ្លូវអាកាស ការអប់រំ និងបេតិកភណ្ឌវប្បធម៌ជាដើម។

ឆ្នាំ២០២០ត្រូវបានគ្របដណ្តប់ដោយជំងឺរាតត្បាតកូវ៥-១៩ ហើយផលប៉ះពាល់ដ៏ធំធេងរបស់វា បានបង្កបញ្ហាប្រឈមជាច្រើនទៅលើសុវត្ថិភាពសុខភាពសាធារណៈ ការបំលាស់ទីរបស់ប្រជាជន និងខ្សែ ច្រវាក់ផ្គត់ផ្គង់សកល។ ស្ថិតក្រោមវិបត្តិជាសកលនាពេលបច្ចុប្បន្ននេះ យើងត្រូវតែបន្តបង្ហាញនូវសាមគ្គីភាព ក្នុងការដោះស្រាយបញ្ហា ដែលជាក្តីកង្វល់រួម តាមរយៈកិច្ចសហប្រតិបត្តិការ និងសកម្មភាពជាក់ស្តែងក្នុង ការផ្តល់នូវវ៉ាក់សាំង និងការផ្គត់ផ្គង់ផ្នែកវេជ្ជសាស្ត្រឱ្យបានពេញលេញ ដែលប្រទេសមេគង្គ-ឡានឆាងអាច សម្រេចបាននូវគោលដៅរួមគ្នានៃសុខុមាលភាព និងការអភិវឌ្ឍប្រកបដោយចីរភាព សម្រាប់អនុតំបន់ របស់យើង និងក្រៅតំបន់។

មេគង្គ-ឡានឆាង មានផ្ទៃទន្លេសរុបប្រវែងប្រមាណ ៤,៨៨០គីឡូម៉ែត្រ ហូរកាត់ប្រទេសចំនួន៦ គឺ៖ ចិន មីយ៉ាន់ម៉ា ថៃ ឡាវ កម្ពុជា និងវៀតណាម។ មានផ្ទៃស្ដុកទឹក ៧៩៥,០០០គីឡូម៉ែត្រការ៉េ ផ្គត់ផ្គង់ប្រជាជនប្រមាណ ៣២៦លាននាក់នៅក្នុងអនុតំបន់មេគង្គ-ឡានឆាង៕

ដោយៈ ម៉ាណេត

ភ្នំពេញៈ ក្រុមហ៊ុន PTT Global Chemical Public Company ប្រកាសថា ខ្លួននឹងម្បីពង្រីកអាជីវកម្មគីមីរបស់ខ្លួនទៅកាន់ប្រទេសកម្ពុជា ឡាវ មីយ៉ាន់ម៉ា និងវៀតណាម (CLMV) ដោយមើលឃើញពីសក្តានុពលក្នុងការវិនិយោគក្នុងប្រទេសទាំងនេះ។ នេះបើយោងតាមការកាសែតបាងកកប៉ុស្តិ៍ នៅក្នុងសប្តាហ៍នេះ។

លោកបណ្ឌិត Kongkrapan Intarajang នាយកប្រតិបត្តិក្រុមហ៊ុន PTT Global Chemical Public Company Limited (GC) បានជូនដំណឹងដល់ផ្សារភាគហ៊ុនថៃ (SET) ស្តីពីការទិញយកភាគហ៊ុនរបស់ក្រុមហ៊ុន Vinythai ដើម្បីពង្រឹងខ្លួនជាមួយអាជីវកម្មគីមីឥន្ធនៈ នៅក្នុងវិស័យឧស្សាហកម្មរបស់ប្រទេសថៃ ហើយក៏ដើម្បីពង្រីកអាជីវកម្មរបស់ខ្លួនទៅកាន់ប្រទេសកម្ពុជា ឡាវ មីយ៉ាន់ម៉ា និងវៀតណាម (CLMV) ផងដែរ។

ការវិនិយោគលើភាគហ៊ុននេះ នឹងជំរុញការរីកចម្រើនរបស់ក្រុមហ៊ុន GC នៅក្នុងអាជីវកម្មឥន្ធនៈរបស់ក្រុមហ៊ុន ដោយអនុញ្ញាតឱ្យក្រុមហ៊ុន GC បង្កើនភាគហ៊ុនយ៉ាងច្រើននៅក្នុងអាជីវកម្មក្រុមហ៊ុន PVC និង Chlor-Alkali នៅក្នុងទីផ្សារ ដែលមានកំណើនខ្ពស់ដូចជាប្រទេសថៃ និងប្រទេស CLMV និងដោយបន្ថែមតម្លៃដល់អាជីវកម្មរបស់ GC។

ជាមួយគ្នាដែរ ក្រុមហ៊ុនប្រេងឥន្ធនៈ និងអាជីវកម្មលក់រាយខ្នាតយក្សរបស់ថៃ PTT Oil and Retail Business (PTTOR) ដែលយើងស្គាល់ថា PTT  កាលថ្មីៗនេះ ក៏គ្រោងចំណាយដើមទុនរហូតដល់ទៅ៧៤,៦ពាន់លានបាត (ប្រមាណ២,៥ពាន់លានដុល្លារអាមេរិក) សម្រាប់ផែនការពង្រីកអាជីវកម្មស្នូលទាំង៣ របស់ខ្លួនពីឆ្នាំ២០២១ ដល់ឆ្នាំ២០២៥​។ នេះបើយោងតាមការបញ្ជាក់របស់លោកស្រី Jiraphon Kawswat អគ្គនាយិកាស្ដីទីនៃក្រុមហ៊ុននេះ។

សម្រាប់អាជីវកម្មមិនមែនប្រេងឥន្ធនៈរបស់ខ្លួន ក្រុមហ៊ុនមានគម្រោងពង្រីកហាងកាហ្វេCafe Amazon ក្នុងប្រទេសថៃ ពីចំនួន៣.១៨៦ សាខាដល់៥.៨០០ សាខា។ សម្រាប់អាជីវកម្មអន្តរជាតិរបស់ខ្លួន ក្រុមហ៊ុននឹងផ្ដោតលើការពង្រីកស្ថានីយប្រេងឥន្ធនៈ និងសាខាហាងកាហ្វេ Cafe Amazon ក្នុងប្រទេសកម្ពុជា ឡាវ មីយ៉ាន់ម៉ា វៀតណាម និងហ្វីលីពីន៕

ដោយៈ រ៉ាណេត

កែបៈ រដ្ឋបាលខេត្តកែបបាន និងកំពុងពន្លឿនការរៀបចំតំបន់ឆ្នេរឆ្នេរអង្កោល ឱ្យក្លាយទៅជាតំបន់ទេសចរណ៍ថ្មី ដ៏ទាក់ទាញប្រចាំខេត្តកែប ជាមួយនឹងការសាងសង់រូបសំណាកបុច្ឆានុព្វនៅក្នុងសមុទ្រ ដោយតភ្ជាប់ចេញពីឆ្នេរដីគោកប្រវែង១៥០ម៉ែត្រ និងមានកម្ពស់ជាង៤ម៉ែត្រ ក្នុងនាមជាសមិទ្ធផលថ្មីប្រចាំឆ្នាំ២០២១នេះ។

អភិបាលខេត្តកែប លោកសោម ពិសិដ្ឋបានមានប្រសាសន៍ឱ្យនៅល្ងាចថ្ងៃទី២៤ ខែមីនា ឆ្នាំ២០២១ថា ឆ្នេរអង្កោលត្រូវបានក្រុមអ្នកទេសចរណ៍ កំពុងមានការចាប់អារម្មណ៍យ៉ាងខ្លាំង បន្ទាប់ពីក្រុមការងារបានបំផុសដល់ប្រជាពលរដ្ឋ នៅតំបន់នោះឱ្យយកចិត្តទុកដាក់លើផ្នែកបរិស្ថាន ពិសេសការធ្វើអនាម័យជាប្រចាំ ជាពិសេសកំពុងត្រូវបានរៀបចំជាតំបន់ឆ្នេរទេសចរណ៍ដ៏ទាក់ទាញប្រចាំខេត្តកែប។

លោកបន្តថា  “គម្រោងសាងសង់រូបសំណាក់មច្ឆានុព្វនេះ គឺជាគោលដៅទេសច​រណ៍មួយក្រោយចប់ជំងឺកូវីដ១៩ ហើយគម្រោងនេះ ក៏នឹងដើម្បីទាក់ទាញភ្ញៀវទេសចរ និងជំរុញគោលដៅទេសចរណ៍ ឲ្យទៅដល់ទីជនបទតាមតំបន់ឆ្នេរ និងពង្រីកសក្តានុពលតំប​ន់ឆ្នេរ ហើយទីនេះនឹងក្លាយទៅជាទីកន្លែង សម្រាប់លំហែកាយសាធារណៈ របស់ភ្ញៀវទេសចរជាតិ អន្តរជាតិទូទៅ”។

លោកអភិបាលបញ្ជាក់ថា ក្រៅតែពីរូបសំណាកមច្ឆនុព្វនេះ យើងក៏នឹងរំលេចនូវរូបសំណាក់ធនធានជលផលកម្រមួយចំនួន របស់ខេត្តកែបនៅទីតាំងជុំវិញ ដើម្បីទុកបង្ហាញភ្ញៀវទេសចរឲ្យស្គាល់នូវធនធានកម្រទាំងនោះ។ គម្រោងរូបសំណាក់មច្ឆានុព្វនេះ ក៏ជាសមិទ្ធផលប្រវត្តិសាស្រ្តរបស់ខេត្តផង និងជាកេរតំណែលទុកសម្រាប់ឲ្យកូនចៅជំនាន់ក្រោយបានដឹង និងស្គាល់ពីធនធានជលផលដែលខេត្តកែបមាន។

លោក ខេង យ័ន្ត នាយករងទីចាត់ការផែនការវិនិយោគ នៃសាលាខេត្តកែបបានឲ្យដឹងដែរថា ស្របពេលដែលប្រទេសយើងកំពុងមានបញ្ហា ដោយសារការរាតត្បាតនៃជំងឺកូវីដ១៩បានធ្វើឲ្យយើងមានបញ្ហាថវិកា ហើយការសាងសង់រូបសំណាក់នាងមច្ឆានុព្វនេះ យើងធ្វើឡើងក្នុងបីដំណាក់កាល ក្នុងរយៈពេល៣ឆ្នាំ ដោយពេលនេះយើងកំពុងសាងសង់ផ្ទៃខាងក្រោម។

លោកបន្តថា “រូបសំណាក់មច្ចានុព្វនេះ យើងសាងសង់ចូលក្នុងផ្ទៃសមុទ្រប្រវែង ១៥០ម៉ែត្រ ដោយគិតទាំងផ្លូវចូលនិងទីធ្លារូបសំណាក់ ដោយឡែកសម្រាប់រូបសំណាក់យើងសាងសង់ក្នុងកំពស់រហូតជាង៤ម៉ែត្រ”។

ឆ្នេរអង្កោលគឺជាគោលដៅទេសចរណ៍មួយ ប្រកបដោយទេសភាពទាក់ទាញបំផុតដែលមិនអាចមើលរំលង ហើយក្រោយពេលធ្វើការអភិវឌ្ឍបានរួចរាល់ ភ្ញៀវច្បាស់ជាសម្រុកទៅលំហែកម្សាន្តនៅទីនោះច្រើន ក្រោយភាពស្ងប់ស្ងាត់ជំងឺឆ្លងកូវីដ ក្នុងសហគមន៍។ ដោយឡែកផ្លូវទៅកាន់រមណីយដ្ឋានឆ្នេរអង្កោល ទេសចរអាចធ្វើដំណើរតាមផ្លូវមួយខ្សែចេញពីឆ្នេរកែប ប្របតាមឆ្នេរសមុទ្រប្រវែងប្រមាណ១០គីឡូម៉ែត្រ។

ផែនការទីផ្សារទេសចរណ៍ខេត្តកែបនេះ នឹងដើរតួជាផែនទីបង្ហាញផ្លូវសម្រាប់ការធ្វើទីផ្សារទេសចរណ៍ក្នុងរយៈពេល៥ឆ្នាំខាងមុខ ប្រកបដោយទស្សនៈវែងឆ្ងាយ ដើម្បីចង្អុ​លបង្ហាញ និងរួមចំណែកក្នុងកិច្ចខិតខំប្រឹងប្រែង ដើម្បីទាក់ទាញ “ទីផ្សារទេសចរណ៍មានគុណភាព” តាមរយៈការទាក់ទាញចំណែកទីផ្សារសក្តានុពល ដូចជា “ទេសចរលំដាប់ខ្ពស់” “ទេសចរវ័យចំណាស់ ចូលនិវត្តន៍” និង “ ទេសចរធ្វើដំណើរជាមួយគ្រួសារ”។

រដ្ឋាភិបាលតាមរយៈក្រសួងទេសចរណ៍បាន និងកំពុងរៀបចំផែនការមេអភិវឌ្ឍន៍ទេសចរណ៍ខេត្តកែប ដើម្បីក្លាយជាគោលដៅទេសចរណ៍ធម្មជាតិ ស្ងប់ស្ងាត់កម្រិតខ្ពស់ប្រកបដោយភាពទាក់ទាញ និងភាពប្រកួតប្រជែងនៅក្នុងតំបន់ និងពិភពលោក៕