អ្នកជំនាញ ៖ យ៉ាងយូរ៥ឆ្នាំទៀតតំបន់ផ្លូវក្រវាត់ក្រុងទី៣ក្នុងខេត្តកណ្តាល និងវិវឌ្ឍន៍ស្រដៀងតំបន់មួយចំនួនក្នុងខណ្ឌដង្កោរ

ដោយ ៖ រ៉ាណេត

ភ្នំពេញ ៖ តំបន់ផ្លូវក្រវាត់ក្រុងទី៣ដែលស្ថិតនៅក្នុងភូមិសាស្ត្រខេត្តកណ្តាលត្រូវបានអ្នកជំនាញនៅក្នុងវិស័យអចលនទ្រព្យជាច្រើនអះអាងថា ជាគោលដៅវិនិយោគ និងអភិវឌ្ឍន៍យ៉ាងសកម្មពីសំណាក់វិស័យឯកជនខណៈមានការព្យាករថាយ៉ាងយូរនៅក្នុងចន្លោះ៣-៥ឆ្នាំខាងមុខទៀត តំបន់ខាងលើនេះអាចនឹងអភិវឌ្ឍន៍ប្រែរូបរាងស្រដៀងគ្នាទៅនឹងតំបន់ផ្លូវក្រវាត់ក្រុងទី៣ស្ថិតនៅក្នុងភូមិសាស្ត្រខណ្ឌដង្កោរ រាជធានីភ្នំពេញ។

អគ្គនាយកក្រុមហ៊ុនភ្នាក់ងារអចនទ្រព្យ Chailin Sear Realty Co.,Ltd លោកស៊ា ឆៃលីន បានមានប្រសាសន៍ប្រាប់តាមទូរស័ព្ទនៅព្រឹកថ្ងៃទី២៣ ខែមីនា ឆ្នាំ២០២១នេះថា ទោះជាស្ថិតនៅក្នុងបរិបទដូចពេលបច្ចុប្បន្ន ប៉ុន្តែការទិញលក់ដីធ្លីនៅតំបន់ផ្លូវក្រវាត់ក្រុទី៣ ជាពិសេសនៅក្នុងភូមិសាស្ត្រខេត្តកណ្តាលនៅតែបន្តមាន ដែលក្នុងនោះការទិញលក់ត្រូវបានបែងចែកចេញជា២ប្រភេទ គឺប្រភេទដីទំហំធំសម្រាប់អភិវឌ្ឍន៍ និងដីទំហំតូចសម្រាប់ប្រើប្រាស់ជាលក្ខណៈឯកជន។

លោកបានបន្តទៀតថា “បច្ចុប្បន្នរាជរដ្ឋាភិបាលកំពុងតែបន្តការសកម្មភាពសាងសង់ និងពង្រីកផ្លូវ ហើយសម្រាប់វិស័យឯកជនក៏កំពុងស្វែងរកទីតាំងសម្រាប់អនុវត្តគម្រោងរបស់ពួកគេ ដែលក្នុងនោះអ្នកខ្លះរកដីទំហំសម្រាប់អភិវឌ្ឍន៍ជាឃ្លាំង ឬសម្រាប់បម្រើឱ្យវិស័យឧស្សាហកម្មដូចជារោងចក្រ សហគ្រាសជាដើម ប៉ុន្តែមិនសូវពុះកញ្ជ្រោលដូចកាលពី១ឆ្នាំ ឬ២ឆ្នាំមុននោះទេ។ ដោយឡែកសម្រាប់ការស្វែងរកទិញដីទំហំតូចល្មមសម្រាប់ប្រើប្រាស់ជាលក្ខណៈឯកជនក៏មានដែរ ហើយពាក់ព័ន្ធទៅនឹងតម្លៃទីផ្សារគឺវាអាស្រ័យទៅតាមតំបន់ដែលមានប្រជាជនរស់នៅស្រាប់ និងតំបន់ដែលមិនមានអ្នករស់នៅ”។

លោកបញ្ជាក់ថា “ផ្អែកតាមល្បឿននៃការអភិវឌ្ឍន៍ និងកំណើនប្រជាជនជាក់ស្ដែងនាពេលបច្ចុប្បន្ននេះ ខ្ញុំគិតថាយ៉ាងយូរអាចចំណាយពេលប្រមាណចន្លោះ ពី៣-៥ឆ្នាំ នៅតំបន់ផ្លូវក្រវាត់ក្រុងទីនេះក្នុងខេត្តកណ្តាលនេះ នឹងមានការវិវឌ្ឍស្រដៀងគ្នាទៅនឹងតំបន់ផ្លូវក្រវាត់ក្រុងទី៣ស្ថិតនៅក្នុងខណ្ឌដង្កោរ ហើយតម្លៃអចលនវត្ថុទៀតសោតក៏បន្តកើនឡើងបន្ថែមទៀត”។

លោកសៅ សាខុំ អនុប្រធានក្រុមប្រឹក្សាភិបាលក្រុមហ៊ុនអចលនទ្រព្យ Cambodian Estate Alliance (CEA) Co.,Ltd បានទទួលស្គាល់នូវសកម្មភាពទិញលក់ដីធ្លីនៅតំបន់ផ្លូវក្រវាត់ទី៣ដែលស្ថិតនៅក្នុងភូមិសាស្ត្រខេត្តកណ្តាល ប៉ុន្តែពាក់ព័ន្ធទៅនឹងតម្លៃត្រូវបានលោកអះអាងថា បច្ចុប្បន្នដីនៅតំបន់ខ្លះបានឡើងខ្ពស់រហូតដល់ជាង៣០០ដុល្លារក្នុងមួយម៉ែត្រការ៉េ ប៉ុន្តែក៏មានដីនៅទីតាំងខ្លះស្ថិតនៅចន្លោះពី៥០-៦០ដុល្លារក៏មានដែរ។ ថ្វីត្បិតស្ថិតនៅជាប់ផ្លូវក្រវាត់ក្រុងទី៣ដូចគ្នា ប៉ុន្តែតម្លៃមិនដូចគ្នានោះទេ ដែលវាអាស្រ័យទៅតាមតំបន់ដែលមានការអភិវឌ្ឍស្រាប់ និងតំបន់ដែលទើបតែចាប់ផ្តើមមានគម្រោងអភិវឌ្ឍន៍។

លោកបានបញ្ជាក់ថា “ចាប់ពីចំណុចផ្លូវបំបែកចេញពីផ្លូវជាតិលេខត្រង់ចំណុចភូមិស្រែអំពិល បើគិជាមធ្យមតម្លៃដីស្ថិតនៅក្នុងរង្វង់៣០០ដុល្លារ ឬលើសនេះតិចតួច ព្រោះជាតំបន់ដែលមានប្រជុំជនរស់នៅច្រើនស្រាប់ មានផ្សារក្នុងតំបន់ដែលអាចប្រកបអាជីវកម្មបាន ប៉ុន្តែបើស្ថិតនៅត្រង់ចំណុចផ្លូវបំបែករង្វង់មូល តម្លៃដីគិតជាមធ្យមធ្លាក់មកនៅត្រឹម២០០ដុល្លារក្នុងមួយម៉ែត្រ ដែលតម្លៃទាំងនេះសម្រាប់ប្រភេទដីទំហំតូចក្រោម១ហិកតា ប៉ុន្តែបើដីទំហំធំជាងនេះតម្លៃដីធ្លាក់ចុះមកត្រឹម១៥០ ឬក្រោមនេះបន្តិច”។

លោកបន្តថា “ដោយឡែកសម្រាប់ដីដែលស្ថិតនៅក្បែរគម្រោងផ្លូវក្រវាត់ក្រុងទី៣ក្នុងភូមិសាស្ត្រស្រុកកៀនស្វាយ ដែលស្ថិតនៅខាងក្នុងតម្លៃដីអាចស្ថិតនៅត្រឹម៥៥ដុល្លារក្នុងមួយម៉ែត្រការ៉េ ហើយតម្លៃទាំងនេះនឹងបន្តឡើងថ្លៃក្រោយពេលគម្រោងអភិវឌ្ឍន៍នានាត្រូវបានចាប់ផ្តើមលេចចេញជារូបរាងកាន់តែច្បាស់ ជាពិសេសការបង្កើត និងសាងសង់ផ្លូវបន្ថែមក្នុងតំបន់ដែលមានទំហំ១៥ម៉ែត្រ និង៣០ម៉ែត្រជាដើម” ៕

“យីហោសណ្ឋាគារលំដាប់កំពូលពីរ” នៅលើពិភពលោកត្រៀមឈានជើងចូលទីផ្សារកម្ពុជា

ដោយៈ ប៊ី

ភ្នំពេញៈ ក្រុមហ៊ុនណាហ្គាខប (NagaCorp) បានប្រកាសជើសរើសយីហោសណ្ឋាគារលំដាប់កំពូលពីរ នៅលើពិភពលោក រួមមានក្រុមហ៊ុន JW Marriott និង Grand Hyatt ដើម្បីគ្រប់គ្រងសណ្ឋាគាររនៅក្នុងគម្រោងណាហ្គា៣ ដែលបានចាប់ផ្តើមសាងសង់ជាផ្លូវការ។ នេះបើយោងតាមសេចក្តីថ្លែងការណ៍របស់ក្រុមហ៊ុនណាហ្គាខបនៅថ្ងៃទី២២ ខែមីនា ឆ្នាំ២០២១។

ក្រុមហ៊ុនណាហ្គាខបបានឱ្យដឹងថាទៀតថា យីហោសណ្ឋាគារលំដាប់កំពូលពីរ នៅលើពិភពលោក គឺ JW Marriott និង Grand Hyatt ត្រូវបានជ្រើសរើសដើម្បីគ្រប់គ្រងប៉មមួយចំនួន។ ក្រុមហ៊ុន Moody’s Investors Service Inc និង S&P Global Ratings Inc ដែលជាភ្នាក់ងារវាយតម្លៃឈានមុខគេពីរនៅលើពិភពលោក បានយល់ព្រមគាំទ្រគម្រោងនេះរួចហើយ។

ណាហ្គា៣ នឹងបន្ថែមបន្ទប់សណ្ឋាគារ និងបន្ទប់ប្រណីតជិត ៣.០០០ ទៅលើមជ្ឈមណ្ឌលណាហ្គាវើលដ៍ ដែលមានស្រាប់ផងដែរ។
កាលពីក្នុងខែមករា ក្រុមកម្មករបានចាប់ផ្តើមបុកគ្រឹះសម្រាប់គម្រោងដ៏ធំមួយនេះ។ ផ្អែកលើការគម្រោងរចនា លក្ខណៈពិសេសរបស់ណាហ្គា៣នឹងជាប៉មសណ្ឋាគារកម្ពស់៧៥ជាន់។

ក្រុមអ្នកអភិវឌ្ឍគម្រោងនេះបានថ្លែងឲ្យដឹងថា “គម្រោងនេះនឹងក្លាយជាអាគារខ្ពស់ជាងគេនៅកម្ពុជា នៅពេលបញ្ចប់ការសាងសង់។ គម្រោងមានទំហំ គិតជាទឹកប្រាក់ចំនួន៣.៥ពាន់លានដុល្លារ ដែលស្ថិតនៅសង្កាត់ទន្លេបាសាក់ រាជធានីភ្នំពេញ ក៏នឹងរួមបញ្ចូលទាំងប្លុកអគារសណ្ឋាគារកម្ពស់៥២ជាន់ ចំនួនពីរផងដែរ”។

នៅក្នុងបរិវេណនោះនឹងមានប្លុកវេទិកាពហុមុខងារចំនួន១៧ជាន់ (ផលិតផលរចនាបថជីវិត សួនឧទ្យានបច្ចេកវិទ្យាខ្ពស់ ការកម្សាន្ត បន្ទប់ប្រជុំ ការលើកទឹកចិត្ត មជ្ឈមណ្ឌលសន្និសីទ និងកន្លែងតាំងពិព័រណ៍នានា (MICE) ជាដើម)។ ជាមួយគ្នានេះដែរ ក៏មានជាន់ក្រោមដីចំនូនសម្រាប់ចំណតរថយន្ត និងសេវាគាំទ្រផ្សេងៗទៀតផងដែរ។

ណាហ្គាខប ដែលជាម្ចាស់កម្មសិទ្ធិណាហ្គា១ និងណាហ្គា២ បានដើរឈានមុខគេក្នុងការលើកស្ទួយមុខមាត់អន្តរជាតិរបស់ប្រទេសកម្ពុជាបង្កើតការងារជាច្រើន និងបានចូលរួមចំណែកយ៉ាងច្រើនក្នុងការអភិវឌ្ឍសេដ្ឋកិច្ចនិងវិស័យទេសចរណ៍ក្នុងតំបន់។

នៅឆ្នាំ២០១៩ ណាហ្គាខបបានចូលរួមចំណែកប្រហែល២៧ភាគរយនៃកំណើនទេសចរណ៍ក្នុងស្រុកនិងប្រមាណ១,២ភាគរយ នៃផលិតផលក្នុងស្រុកនៅកម្ពុជា បើយោងតាមតួលេខដែលចេញផ្សាយដោយវិទ្យាស្ថានជាតិស្ថិតិកម្ពុជា៕

ប្រធានសមាគមចំនួនពីរអះអាងថា វិស័យអចលនទ្រព្យនឹងមានភាពប្រសើរឡើងវិញបន្ទាប់ពីព្រឹត្តិការណ៍២០កុម្ភៈ

ដោយៈ ប៊ី

ភ្នំពេញៈ អ្នកជំនាញអចលនទ្រព្យបានលើកឡើងថា វិស័យអចលនទ្រព្យ នឹងមានភាពប្រសើរឡើងវិញ បន្ទាប់ពីការប្រកាសបិទព្រឹត្តិការណ៍សហគមន៍២០ កុម្ភៈ ដែលជាព្រឹត្តិការណ៍មួយរយៈពេលខ្លីនាពេលខាងមុខដ៏ខ្លី។

លោកច្រឹក សុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា(CVEA)បានថ្លែងប្រាប់គេហទំព័រ Propertyarea.asia នៅថ្ងៃទី២៣ ខែមីនា ឆ្នាំ២០២១ថា ព្រឹត្តិការណ៍២០ កុម្ភៈ កូវីដ១៩ឆ្លងចូលចូលសហគមន៍គឺព្រឹត្តិការណ៍មួយរយៈពេលខ្លី ដែលយើងធ្លាប់មានបទពិសោធន៍ ក្នុងការគ្រប់គ្រងបាននាពេលកន្លងមក តែទាមទារឱ្យប្រជាជន និងស្ថាប័នអស់ទាំងអស់រួមគ្នា ទប់ស្កាត់វិបត្តិមួយនេះ ដើម្បីឈានដល់ការបិទព្រឹត្តិការណ៍ក្នុងពេលខាងមុខដ៏ឆាប់។

លោកបានថ្លែងថា “ខ្ញុំគិតថាព្រឹត្តិការណ៍២០ កុម្ភៈ គឺមានរយៈពេលខ្លីប៉ុណ្ណោះ ហើ យសម្រាប់វិស័យអចលនទ្រព្យ វានឹងមានភាពប្រសើរឡើងវិញផងដែរ បន្ទាប់មានការចូលរួមពីប្រជាជន និងស្ថាប័ន្ធទាំងអស់ក្នុងការបិទព្រឹតិ្តការណ៍ ឆ្លងចូលសហគមន៍មួយនេះ”។

លោកបានថ្លែង បន្ទាប់ពីប្រកាសបិទព្រឹត្តិការណ៍២០ កុម្ភៈនេះ អ្នករកស៊ីទទួលទានក្នុងអចលនទ្រព្យនឹងចាប់ផ្តើមសកម្មភាពវិនិយោគ ឬទិញលក់ឡើងវិញ។

លោកសំ សុខនឿនប្រធានសមាគមអចលនទ្រព្យសកលធ្លាប់បានលើកឡើងថា អ្នកវិនិយោគបានបង្ហាញក្តីសង្ឃឹម ក្រោយពីកម្ពុជាមានវ៉ាក់សាំងកូវីដ១៩ ប៉ុន្តែជាអកុសល ព្រឹត្តិការណ៍សហគមន៍២០កុម្ភៈ បានផ្ទុះឡើងដែលអាចបង្កជាផលប៉ះពាល់ធំ សម្រាប់អ្នកវិនិយោគនៅក្នុងវិស័យនេះ ព្រោះអ្នកទិញ-លក់ អចលនទ្រព្យគឺតែងរំពឹងថានឹងមានផលចំណេញអ្វីមួយ ក្រោយពីការទិញអចលនទ្រព្យ។

លោកបន្តថា “ពេលនេះ ពួកគាត់កំពុងព្រួយបារម្ភថា តើព្រឹត្តិការណ៍នាពេលនេះ នឹងប៉ះពាល់សេដ្ឋកិច្ចបែបណា ដែលធ្វើឲ្យពួកគាត់មានការស្ទាក់ស្ទើរក្នុងការទិញ”។

លោកសំ សុខនឿនបានថ្លែងទៀតថា ព្រឹត្តិការណ៍សហគមន៍នាពេលនេះ មិនបង្កផលប៉ះពាល់រយៈពេលវែង ទៅលើអ្នកវិនិយោគចិន ដែលវិនិយោគលើអចលនទ្រព្យ នៅក្នុងខេត្តព្រះសីហនុឡើង ខណៈរដ្ឋាភិបាលនឹងអាចគ្រប់គ្រងកូវីដ១៩បាន ដោយមានការចូលរួមពីប្រជាជនទាំងអស់៕

អាជ្ញាធរខេត្តមណ្ឌលគីរីចាប់ផ្តើមស្រាវជ្រាវប្រមូលដីដែលត្រូវបំពានខុសច្បាប់មកធ្វើជាកម្មសិទ្ឋរបស់រដ្ឋវិញ

ដោយៈ រ៉ាណេត

មណ្ឌលគីរីៈ ខណៈដែលគម្រោងសាងសង់ព្រលានយន្ដហោះ ខ្នាតតំបន់ខេត្តមណ្ឌគីរី កំពុងត្រូវបានក្រុមហ៊ុនជំនាញចិនពន្លឿនការសិក្សាលម្អិត និងឈានទៅរកការចាប់ផ្តើមបង្កើតម្លង់មេនៃគម្រោងនៅគេសង្កេតឃើញថា សកម្មភាពនៃការទិញលក់ដីធ្លីនៅក្នុងឃុំសែនមនោរម្យ ស្រុកអូររាំងមានភាពមមាញឹក ហើយក្នុងនោះក៏មានករណីបំពានដីធ្វើជាកម្មសិទ្ធិដោយខុសច្បាប់ផងដែរ។

ជាក់ស្ដែងនៅថ្ងៃទី២២ ខែមីនា ឆ្នាំ២០២១ម្សិលមិញនេះ គណៈកម្មការខេត្តមណ្ឌលគិរីក្រោមការវត្តមានរបស់លោក ជាក់ ម៉េងហ៊ាង អភិបាលរងខេត្តមណ្ឌលគីរីបានចុះពិនិត្យ និងផ្ទៀងផ្ទាត់លើទីតាំងដី ដែលបានដកហូតពីការកាន់កាប់ដោយខុសច្បាប់ ស្ថិតនៅឃុំអូររាំង ស្រុកសែនមនោរម្យ ក្រុងសែនមនោរម្យ ពីជនខិលខូចប្រគល់ជូនក្រុមហ៊ុនអ៊ូជីសាន អិលអេសគ្រុប ខូអិលធីឌីគ្រប់គ្រងវិញ។

លោកជាក់ ម៉េងហ៊ាង បានលើកឡើងថា ទីតាំងដីដែលបានដកហូតពីការកាន់កាប់ដោយខុសច្បាប់តាមដីកាលេខ ០០៧/១៩ ដក .បក ចុះថ្ងៃទី២៣ ខែសីហា ឆ្នាំ២០១៩ ដែលមានទំហំជាង៤៧២ហិកតា របស់រដ្ឋបាលខេត្តមណ្ឌលគិរី ស្ថិតនៅភូមិពូរ៉ាង ឃុំសែនមនោរម្យ ស្រុកអូររាំង ខេត្តមណ្ឌលគិរី។

លោកអភិបាលរងខេត្តបានឲ្យដឹងទៀតថា បន្ទាប់ពីមានគោលការណ៍ណែនាំពីលោកស្វាយ សំអ៊ាង អភិបាលខេត្តមណ្ឌលគិរី ក្រុមការងារចម្រុះមួយ ត្រូវបានបង្កើតឡើងដើម្បីចុះស្រាវជ្រាវ និងចាត់វិធានការទប់ស្កាត់សកម្មភាព បំពានរំលោភយកដីសម្ការស្រល់របស់ក្រុមហ៊ុន អ៊ូជីសាន អិលអេសគ្រុប ខូអិលធីឌី និងក្រុមហ៊ុនហួលីង។

លោកបន្តថា បន្ទាប់ពីក្រុមការងារចម្រុះបានចុះផ្ទៀងផ្ទាត់ និងពិនិត្យជាក់ស្តែង ក៏បានរកឃើញមានដីធ្លីមួយចំនួន មានការចូលទៅគ្រប់គ្រងដោយខុសច្បាប់ ហើយដីខ្លះទៀត ជាដីអាស្រ័យផលរបស់ប្រជាពលរដ្ឋក្នុងមូលដ្ឋាន ដែលត្រូវកាត់ជ្វៀល ជូនពួកគាត់ ដើម្បីបញ្ចប់វិវាទដីធ្លីដែលកើតកាលកន្លងទៅ។

ដោយឡែកនៅក្នុងកិច្ចសន្យា ប្រគល់ដីចំនួន៤៧២ហិកតា ដែលរដ្ឋបាលខេត្តបានដកហូតពីការកាន់កាប់ដោយខុសច្បាប់ តាមដីកាលេខ០០៧/១៩ ដក .បក ចុះថ្ងៃទី២៣ ខែសីហា ឆ្នាំ២០១៩ ស្ថិតនៅភូមិពូរ៉ាង ឃុំសែនមនោរម្យ ស្រុកអូររាំង រវាងក្រុមហ៊ុនអ៊ូជីសាន អិលអេសគ្រុប ខូអិលធីឌី ជាមួយ និងគណៈកម្មការខេត្ត បានចុះពិនិត្យផ្ទៀងផ្ទាត់ផ្ទៃក្បាលដីដល់ទីតាំងជាក់ស្តែង តាមខ្លឹមសារនៃដីកាដកហូតលេខ០០៧/១៩ ដោយអញ្ជើញក្រុមហ៊ុនចូលរួម ដែលមានលោកចាន់ ប៊ុនថុល តំណាងឲ្យក្រុមហ៊ុន អ៊ូជីសាន។

ក្នុងកិច្ចសន្យាដដែលនេះ តំណាងក្រុមហ៊ុនបានសន្យាចំពោះមុខគណៈកម្មការ និងសមត្ថកិច្ចចម្រុះនៃរដ្ឋបាលខេត្តមណ្ឌលគិរី ដែលបានចុះពិនិត្យផ្ទៀងផ្ទាត់ផ្ទៃដីសម្បទានសេដ្ឋកិច្ច របស់ក្រុមហ៊ុនដល់ទីតាំងជាក់ស្តែង និងបានបញ្ជាក់បន្ថែមថា ក្រុមហ៊ុនទទួលយកផ្ទៃដី ដែលបានចែងតាមខ្លឹមសារនៃការដកហូតខាងលើ មានទំហំផ្ទៃដីចំនួន៤៧២ហិកតា ដើម្បីថែរក្សាការពារ និងគោរពលក្ខខណ្ឌដូចជា ក្រុមហ៊ុនត្រូវធ្វើការកាយប្រឡាយក្រវ៉ាត់ព្រំជុំវិញដីលើផ្ទៃដី៤៧២ហិកតា លើកស្លាកប៉ាណូផ្សព្វផ្សាយពីព្រំដីបរិវេណដែលបានដកហូត ដកបង្គោលរបងជាវត្ថុតាងល្មើសទាំងអស់ ដឹកជញ្ជូនយកទៅរក្សាទុកនៅស្នាក់ការ សង្កាត់រដ្ឋបាលព្រៃឈើអូររាំង។

មិនត្រឹមតែប៉ុណ្ណោះក្រុមហ៊ុនត្រូវទទួលខុសត្រូវ និងម្ចាស់ស្វ័យការពារផ្ទៃដី ដែលខ្លួនបានទទួលទាំងអស់៤៧២ហិកតា ជាពិសេស ពេលចុះអនុវត្តដកបង្គោលរបងចាស់ ដាំបង្គោលថ្មី និងកាយព្រំប្រឡាយ ក្រុមហ៊ុនត្រូវធ្វើលិខិតស្នើសុំសមត្ថកិច្ចសហការជៀសវាងមានបញ្ហានានាកើតឡើង៕

ដំណឹងល្អៈស្ពានតភ្ជាប់ស្រុកស្ទឹងត្រង់ និងក្រូចឆ្មារដាក់ឲ្យដំណើរការ បណ្តោះអាសន្នហើយ

ដោយៈគង់ សូរិយា

ភ្នំពេញៈ ស្ពានតភ្ជាប់រវាងស្រុកស្ទឹងត្រង់ ខេត្តកំពង់ចាម និងស្រុកក្រូចឆ្មារខេត្តត្បូងឃ្មុំ ត្រូវបានក្រសួងសាធារណការ និងដឹកជញ្ជូន សម្រេចដាក់ឱ្យដំណើរការជាប ណ្តោះអាសន្ននូវស្ពានស្ទឹងត្រង់-ក្រូចឆ្មារ ដែលឆ្លងកាត់ទន្លេមេគង្គ ចាប់ពីថ្ងៃនេះតទៅហើយ។

ក្នុងដំណើរចុះត្រួតពិនិត្យស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារនៅព្រឹកថ្ងៃទី ២៣ ខែមីនានេះ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានថ្លែងថា “ពេលយើងចូលឆ្នាំប្រពៃណីខ្មែរខាងមុខនេះនឹងមានការកកស្ទះ (ឆ្លងស្រឡាង) យើងមិនចង់ឱ្យគាត់ប្រើស្រឡាងទៀតទេ គឺពលរដ្ឋអាចប្រើស្ពាននេះ បានអ៊ីចឹងសម្តេចតេជោលោកបានឯកភាពថា ឱ្យបើកស្ពាននេះ ធ្វើដំណើរបណ្តោះអាសន្នចាប់ពីថ្ងៃនេះតទៅ”។

លោកឱ្យដឹងដែរថា លោកនាយករដ្ឋមន្ត្រី ហ៊ុន សែន នឹងអញ្ជើញសម្ពោធដាក់ឱ្យប្រើប្រាស់ជាផ្លូវការស្ពាននេះ នៅពេលវេលាសមស្របណាមួយ។

បើតាមលោក ស៊ុន ចាន់ថុល តាមគម្រោងស្ពាននេះត្រូវបញ្ចប់នៅខែឧសភា ឆ្នាំ ២០២១ ប៉ុន្តែក្រុមហ៊ុនបានពន្លឿនការសាងសង់ បានបញ្ចប់មុនកាលកំណត់ ដើម្បីជួយសម្រួលដល់ការធ្វើដំណើររបស់ពលរដ្ឋឆ្លងកាត់ ក្នុងឱកាសពិធីបុណ្យចូលឆ្នាំខ្មែរ។

ស្ពានស្ទឹងត្រង់-ក្រូចឆ្មារ ស្ថិតនៅត្រង់ចំណុចភូមិបឹងដែង ឃុំព្រែកកក់ ស្រុកស្ទឹងត្រង់ ខេត្តកំពង់ចាម ឆ្លងកាត់ទន្លេមេគង្គទៅត្រើយខាងកើតស្ថិតនៅភូមិក្តុលលើ ឃុំទ្រា ស្រុកក្រូចឆ្មារ ខេត្តត្បូងឃ្មុំ។ ស្ពាននេះមានប្រវែងសរុប១១៣១ ម៉ែត្រ និងទទឹង១៣,៥០ ម៉ែត្រ ជាប្រភេទស្ពានបេតុងអាមេ ដែលត្រូវបានបើកការដ្ឋានសាងសង់កាលពីថ្ងៃទី ១ខែ ធ្នូ ឆ្នាំ ២០១៧៕

សូចនាការៈអចលនទ្រព្យ៦ប្រភេទកំពុងមានសកម្មភាពច្រើននៅពេលបច្ចុប្បន្ន

ដោយៈ រ៉ាណេត

ភ្នំពេញៈ អចលនវត្ថុដែលកំពុងតែមានសកម្មភាព និងដំណើរការទូទាំងប្រទេសកម្ពុជានៅពេលបច្ចុប្បន្ន ត្រូវបានគេបែងចែកចេញជាប្រភេទផ្សេងៗពីគ្នា ដោយក្នុងនោះ ហើយប្រភេទនីមួយៗ នៅតែមានតម្រូវការជាក់ស្ដែង បើទោះជាស្ថិតនៅក្នុងស្ថានភាពដែលកំពុងរាតត្បាតដោយជំងឺឆ្លងក៏ដោយ។

អ្នកជំនាញនៅក្នុងវិស័យអចលនទ្រព្យកម្ពុជា លោក វ៉ា វីរៈ អគ្គនាយកក្រុមហ៊ុន Century21 Fortuna Investment បានមានប្រសាសន៍ឱ្យដឹងនៅថ្ងៃដើមសប្ដាហ៍នេះថា អចលនវត្ថុដែលកំពុងមានសកម្មភាព នៅលើទីផ្សារកម្ពុជានាពេលបច្ចុប្បន្ន ត្រូវបានគេបែងចែកចេញជា៦ប្រភេទផ្សេងៗពីគ្នា ហើយសម្រាប់តម្រូវការ និងតម្លៃដែលត្រូវបានដាក់លក់ ជួល នៅលើទីផ្សារក៏មានកម្រិតខុសគ្នាផងដែរ។

លោកបានពន្យល់ថា “អចលនវត្ថុទាំង៦ប្រភេទ ដែលត្រូវបានបែងចែកដូចការលើកឡើងខាងលើនេះរួមមានដូចជា ទី១ អចលនវត្ថុបម្រើផ្នែកលំនៅដ្ឋានសម្រាប់ស្នាក់នៅ ទី២ អចលនវត្ថុបម្រើផ្នែកលំនៅដ្ឋាន ឬផ្ទះអាជីវកម្ម ទី៣ អចលនវត្ថុបម្រើផ្នែកទីតាំងជួល ឬលក់រាយ ទី៤ អចលនវត្ថុបម្រើផ្នែកឧស្សាហកម្ម ទី៥ អចលនវត្ថុបម្រើផ្នែកកសិកម្ម និងទី៦ អចលនវត្ថុបម្រើផ្នែកសេវាកម្មផ្សេងៗ ដូចជាការិយាល័យជួល និងទេសចរណ៍។

-ទី១ អចលនវត្ថុបម្រើផ្នែកលំនៅដ្ឋានសម្រាប់ស្នាក់នៅ

អចលនវត្ថុប្រភេទនេះ គឺមានតម្រូវការច្រើនជាងគេនាពេលបច្ចុប្បន្ន ហើយនឹងនៅបន្តទៅថ្ងៃខាងមុខទៀត ខណៈដែលតម្រូវការទីផ្សារនៅមាន ក្នុងកម្រិតខ្ពស់សម្រាប់ប្រជាជនកម្ពុជា។ អចលនវត្ថុប្រភេទនេះ រួមមានផ្ទះល្វែង ផ្ទះវីឡា ដែលស្ថិតនៅជាន់ផ្ទាល់ដី ក៏ដូចជាផ្ទះសហកម្មសិទ្ធិ ឬជាប្រភេទខុនដូ។

-ទី២ អចលនវត្ថុបម្រើផ្នែកលំនៅដ្ឋាន ឬផ្ទះអាជីវកម្ម

សម្រាប់អចលនវត្ថុប្រភេទនេះគឺមានតម្លៃថ្លៃ និងច្រើនស្ថិតនៅជាប់ផ្លូវធំ ជួរមុខ ដែលក្រៅពីសម្រាប់ស្នាក់នៅ ក៏មានភាពងាយស្រួល ក្នុងការប្រកបអាជីវកម្មផ្សេងៗ មិនជាការបើហាងអាហារដ្ឋាន ហាងកាហ្វេ ឬជាអាជីវកម្មប្រចាំគ្រួសារជាច្រើនប្រភេទទៀត។

-ទី៣ អចលនវត្ថុបម្រើផ្នែកទីតាំងជួល ឬលក់រាយ

អចលនវត្ថុប្រភេទនេះ គឺបម្រើដល់ការជួល ឬទីតាំងលក់រាយនៅក្នុង Super Market, Mall , Shopping Mall ឬ Mart ជាដើម។

-ទី៤ អចលនវត្ថុបម្រើផ្នែកឧស្សាហកម្ម

សម្រាប់បម្រើជាទីតាំងសាងសង់រោងចក្រ សហគ្រាស ឃ្លាំង ជាពិសេសតំបន់សេដ្ឋកិច្ចពិសេស ដែលស្ថិតនៅក្នុងវិស័យឧស្សាហកម្ម។

-ទី៥ អចលនវត្ថុបម្រើផ្នែកកសិកម្ម

សម្រាប់បម្រើដល់ការដាំដុះ ការបង្កបង្កើនផល អាចប្រភេទកសិដ្ឋានលក្ខណៈគ្រួសារ ឬសហគមន៍ ក៏ដូចជាកសិដ្ឋានកម្រិតខ្ពស់សម្រាប់ធ្វើការនាំចេញ។

-ទី៦ អចលនវត្ថុបម្រើផ្នែកសេវាកម្មផ្សេងៗ

អចលនវត្ថុប្រភេទនេះ រួមមានដូចជាការិយាល័យជួល សណ្ឋាគារដែលបម្រើផ្នែកបដិសណ្ឋារកិច្ច និងទេសចរណ៍ ក៏ដូចជាតំបន់អភិវឌ្ឍជាមជ្ឈមណ្ឌលកម្សាន្តជាដើម។

គ្រប់ប្រភេទអចលនវត្ថុទាំងអស់ ដូចបានរៀបរាប់ខាងលើនេះ បច្ចុប្បន្នគឺសុទ្ធតែមានសកម្មភាព និងតម្រូវការទីផ្សារទាំងអស់ ហើយមានកម្រិតតម្លៃផ្សេងៗពីគ្នា អាស្រ័យទៅតាមទីតាំង និងភាពមានតម្រូវការចាំបាច់ជាក់ស្ដែង៕

អ្នកជំនាញថាតម្លៃដីនៅតំបន់ភ្នំពេញថ្មីបានឈានដល់តំណាក់កាលទ្រឹង

ដោយៈ រ៉ាណេត

ភ្នំពេញៈ តំបន់ភ្នំពេញថ្មីនៃខណ្ឌសែនសុខ ដែលធ្លាប់តែជាតំបន់មានប្រជាប្រិយភាពក្នុងការទិញលក់ និងអភិវឌ្ឍន៍ក្នុងវិស័យលំនៅដ្ឋានកម្រិតមធ្យម និងលើមធ្យមកាលពីប៉ុន្មានឆ្នាំមុននោះ ពេលនេះបានឈានដល់ដំណាក់កាលទ្រឹង ខណៈដែលតម្លៃបានឡើងខ្ពស់ដល់កម្រិតមួយរួចទៅហើយ។

ប្រធានសមាគមអចលនទ្រព្យសកល លោកសំ សុខនឿន បានមានប្រសាសន៍ប្រាប់ឱ្យដឹងតាមទូរស័ព្ទនៅរសៀលថ្ងៃទី២២ ខែមីនា ឆ្នាំ២០២១នេះថា ភ្នំពេញថ្មីនៅពេលបច្ចុប្បន្ននេះ បានផ្លាស់ប្ដូរមុខមាត់ពីតំបន់ជាយក្រុង មកជាតំបន់ដែលមានការអភិវ ឌ្ឍក្នុងវិស័យលំនៅដ្ឋាន និងកំពុងបន្តឈានទៅបង្កើត ជាតំបន់ពាណិជ្ជកម្មកម្រិតមធ្យមបន្ទាប់តំបន់ទួលគោក។

លោកបានបន្តថា “ភ្នំពេញថ្មីមានវិសាលភាពធំទូលាយ និងមានហេដ្ឋារចនាសម្ព័ន្ធច្រើនជាងតំបន់ដទៃ ដែលស្ថិតនៅក្នុងខណ្ឌសែនសុខរួមគ្នា ក្នុងនោះក៏បានចាក់បំពេញទៅដោយគម្រោងអភិវឌ្ឍន៍លំនៅដ្ឋាន កម្រិតមធ្យមរួចជាស្រេចទៅហើយ” ។ លោកបន្តថា “បច្ចុប្បន្នក៏មិនស័ក្ដិសម ទៅនឹងគម្រោងលំនៅដ្ឋាន ដែលមានតម្លៃជាង ១០ម៉ឺដុល្លារក្នុងមួយខ្នងនោះទៀតដែរ” ។

លោកសំ សុខនឿន បានមានប្រសាសន៍បន្តថា គម្រោងអភិវឌ្ឍន៍លំនៅដ្ឋានកម្រិតមធ្យម ឬក្រោម ១០ម៉ឺនដុល្លារ អាចធ្វើបានចំពោះតំបន់ ដែលមានតម្លៃដីក្រោម៣០០ដុល្លារក្នុងមួយម៉ែត្រការ៉េ ប៉ុន្តែបច្ចុប្បន្នគិតត្រឹមតែនៅតំបន់ជាយភ្នំពេញថ្មី ទាបបំផុតក៏ ៣៥០-៥០០ដុល្លារក្នុងមួយម៉ែត្រការ៉េដែរ ហើយតំបន់ដែលមានប្រជាប្រិយភាពអាចស្ថិតក្នុងចន្លោះ២០០០-២៥០០ដុល្លារក្នុងមួយម៉ែត្រការ៉េ។

យ៉ាងណាក៏ដោយ តម្លៃដីនេះបានឈានដល់ចំណុចមួយខ្ពស់រួចទៅហើយ ដែលអាចនិយាយបានថា ឈានដល់ដំណាក់កាលទ្រឹង ដែលអាចត្រូវការរយៈពេលយូរបន្តិចទើបអាចមានកំណើនកើនឡើងបន្ថែមទៀត។

នាយិកាក្រុមហ៊ុនភ្នាក់ងារអចលនទ្រព្យ AMATAK Property Service លោកស្រីតាំង ហួរ ធ្លាប់បានមានប្រសាសន៍កាលពីថ្ងៃចុងសប្ដាហ៍មុននេះថា បើទោះជាស្ថិតនៅក្នុងស្ថានភាពនៃជំងឺឆ្លងក៏ដោយ ក៏មានភ្ញៀវមួយចំនួនស្វែងរកដី សម្រាប់សាងសង់ជាលំនៅដ្ឋានលក្ខណៈឯកជនដាច់ដោយឡែក ឬសម្រាប់សាងសង់ឃ្លាំង ដែលស្ថិតនៅតាមតំបន់ជាយក្រុង ប៉ុន្តែពិបាករកព្រោះតម្លៃដីរាងខ្ពស់បន្តិច។

លោកស្រីបន្តថា “ជាធម្មតាសម្រាប់ដីសាងសង់លំនៅដ្ឋាន រាងថ្លៃបន្តិចក៏នៅតែមានអ្នកត្រូវការដែរ ព្រោះស្ថិតនៅតំបន់ទីប្រជុំជន ឬតំបន់ដែលមានការអភិវឌ្ឍន៍ស្រាប់ ប៉ុន្តែសម្រាប់ដីសាងសង់ឃ្លាំងទុកជួល បើឡើងខ្ពស់ពេកគេពិបាកទិញយក ព្រោះត្រូវសាងសង់ជាឃ្លាំងហើយ រង់ចាំទទួលយកចំណូលប្រចាំខែ ប្រចាំឆ្នាំត្រឡប់មកវិញ” ៕

ក្រុងសៀមរាបទាក់ទាញគំរោងវិនិយោគអចលនទ្រព្យលំដាប់អន្តរជាតិកាន់តែច្រើន

ដោយៈគង់ សូរិយា

ភ្នំពេញៈ ខេត្តសៀមរាបបាន និងកំពុងត្រៀមចាប់ផ្តើមបញ្ចេញពន្លឺជាថ្មី តាមរយៈការប្តេជ្ញាចិត្តវិនិយោគ លើហេដ្ឋារចនាសម្ព័ន្ឋរបស់រដ្ឋាភិបាល និងការវិនិយោគពីវិស័យឯកជន ដែលបាននិងកំពុងសម្លឹងឃើញសក្តានុពលរបស់ខេត្តនេះ។

ដូចជាវិនិយោគដទៃទៀត ម្ចាស់គម្រោង Angkor Grace Resort បានបង្កើតឡើងនូវគំរោងនេះ ដោយអ្នកអភិវឌ្ឍន៍ដែលអាចទុកចិត្តបាន និងមានប្រវត្តិស្នាដៃល្អ ទំនុកចិត្ត និងផាសុកភាពសម្រាប់អ្នកវិនិយោគ និងអនាគតអ្នកជួលនឹងត្រូវបានធានាយ៉ាងពេញលេញ។

គម្រោង Angkor Grace Resort ដែលនឹងបញ្ចប់ការសាងសង់ក្នុងពេលឆាប់ៗនេះ។ កត្តាសំខាន់សម្រាប់ទំនុកចិត្ត និងផាសុកភាពនេះកើតឡើង ដោយសារអ្នកផ្តើមគំនិតសាងសង់នូវគម្រោង ដែលគិតគូរពីបរិស្ថាន (eco-friendly project) គឺមិនមែនអ្នកណាផ្សេង ក្រៅពីអ្នកអភិវឌ្ឍន៍គម្រោង 240 Phnom Penh និង The Peninsula Private Residences ដែលធ្លាប់ទទួលបានភាពជោគជ័យ និងទទួលពានរង្វាន់ជាច្រើន។

សំរាប់គម្រោង Angkor Grace Resort សំណង់នៃគម្រោង 70% ត្រូវបានបញ្ចប់ជាស្ថាពរ ដែលបានប្រើប្រាស់ សម្ភារដែលមានគុណភាពខ្ពស់ ដូចជា បង្អួចនាំចូលពីប្រទេសបែលហ្ស៊ិក ដែលមានគុណភាពភ្លឺស្អាត ស្រដៀងទៅនឹងសម្ភារដែលប្រើប្រាស់សម្រាប់គម្រោងខុនដូ 240 Phnom Penh ដែរ។ គម្រោង Angkor Grace Resort បានសាងសង់ឡើងដោយក្រុមហ៊ុន ដែលមានកេរ្តិ៍ឈ្មោះល្បី ដោយក្រុមហ៊ុននេះធ្លាប់បានសាងសង់នូវគម្រោងធំៗជាច្រើនដូចជា អាកាសយានដ្ឋានសៀមរាប សណ្ឋាគារប្រណីតលំដាប់ផ្កាយ 5 ដូចជា Anantara Angkor Resort & Spa និងរមណីយដ្ឋានលំដាប់ផ្កាយ5ផ្សេងៗ ដូចជា Alila Villas នៅកោះឫស្សី នោះគឺក្រុមហ៊ុនសំណង់ BSN ដែលទទួលខុសត្រូវក្នុងការសាងសង់គម្រោង Angkor Grace Resort នេះផងដែរ។

ដើម្បីចូលរួមអបអរនៃការបង្កើតគំរោងនេះឡើង អ្នកអភិវឌ្ឍនគំរោងបានសាងសង់នូវវិចិត្រសាលតូចមួយ (Mini Gallery) ដែលមានទីតាំងទល់មុខ ហាងកាហ្វេ Enso Café និង ខុនដូ 240 Phnom Penh។ វិចិត្រសាលតូចមួយនេះ បង្កើតឡើងដើម្បីតាំងបង្ហាញអំពីរលក្ខណៈពិសេស នៃគំរោងក៏ដូចជាភាពពិសេសពិសាល នៃតំបន់អង្គរនៃក្រុងសៀមរាបរាជធានីបុរាណដ៏ល្បីល្បាញរបស់យើង។

ជាមួយនឹងការសាងសង់យ៉ាងមមាញឹក នូវហេដ្ឋារចនាសម្ព័ន្ឋទាំង៣៨ខ្សែ ការកែលំអរស្ទឹងសៀមរាប ឲ្យមានសោភ័ណភាព ខេត្តសៀមរាបបាននិងកំពុងទាក់ទាញគម្រោងវិនិយោគធំៗជាច្រើន ដូចជា គំរោងបោះទុន ៣៥០លានដុល្លាររបស់ក្រុមហ៊ុន Naga Corp, ក្រុមហ៊ុនវិនិយោគកោះសង្សារ កំពុងអភិវឌ្ឍន៍រមណីយដ្ឋានកៅក្បែរប្រាសាទបន្ទាយស្រី ក្រុមហ៊ុនយូណានរបស់ចិនកំពុងសាងសង់ ព្រលានយន្តហោះលំដាប់អន្តរជាតិថ្មី និងគំរោងជាច្រើនទៀត ដែលនឹងបង្ហាញខ្លួននាពេលខាងមុខ និងគំរោងវិនិយោគបុរីដ៏ធំរបស់សហគ្រាសកាណាឌីយ៉ាលើបុរីទេសចរណ៍ជាដើម៕

តោះសិក្សាចំណុចពិសេសៗនៃស្ពានតភ្ជាប់រវាងទីក្រុងកោះពេជ្រ និងកោះនរា

ដោយគង់ សូរិយា

ភ្នំពេញៈ ស្ពានតភ្ជាប់រវាងទីក្រុងពេជ្រ និងកោះនរា និងស្ពានតភ្ជាប់រវាងទីក្រុងកោះនរានិងផ្លូវជាតិលេខ១បាននិងកំពុងសាងសង់យ៉ាងសកម្ម តើស្ពាននេះមានលក្ខណៈពិសេសដូចម្តេច?។

យោងតាមបណ្តាញទំនាក់ទំនងសង្គម របស់មន្ទីរសាធារណៈការ និងដឹកជញ្ជូនដែលបានបង្ហាញកាលពីរសៀលថ្ងៃទី២៥ តុលាកន្លងមកបានឲ្យដឹងថា គម្រោងសាងសង់ស្ពានបេតុងខ្សែកាប តភ្ជាប់ពីទីក្រុងរណបកោះពេជ្រ ឆ្លងកាត់គម្រោងអភិវឌ្ឍន៍កោះនរា ទៅកាន់ផ្លូវជាតិលេខ១ មានបែងចែងលើចំណុចសំខាន់ៗមួយចំនួន រួមមាន ទី១-អំពីគម្រោងសាងសង់ស្ពានខ្សែកាប តភ្ជាប់ពីទីក្រុងរណបកោះពេជ្រ ទៅកាន់គម្រោងអភិវឌ្ឍន៍កោះនរា មានប្រវែងសរុប ៨២៤ម៉ែត្រ ទទឹង ២៤.៥ម៉ែត្រ។

ស្ពាននេះបណ្តោយស្ពានបេតុងអារមេ ប្រវែង៤៨៣ម៉ែត្រ។ សសរស្ពានមានគម្លាត ២០ម៉ែត្រ+២១ម៉ែត្រ+១០៨ម៉ែត្រ+១៨០ម៉ែត្រ+១០៨ម៉ែត្រ+២៣ម៉ែត្រ+២៣ម៉ែត្រ ។ផ្លូវតភ្ជាប់ក្បាលស្ពាន ត្រើយខាងកោះពេជ្រប្រវែង២៤៩ម៉ែត្រ។ ផ្លូវតភ្ជាប់ក្បាលស្ពានកោះនរា ប្រវែង៩២ម៉ែត្រ ។ ជាស្ពានចរាចរទ្វេរទិស មានគន្លងសម្រាប់រថយន្តចំនួន ២ទៅ និងគន្លងចំនួន២មក ដែល១គន្លងមានទទឹង៣.២៥ម៉ែត្រ និងមានគន្លងសម្រាប់ទោចក្រយានយន្តចំនួន១ទៅ និងគន្លងចំនួន១មក ដែលមានទទឹង១.២៥ម៉ែត្រសងខាង។

អំពីល្បឿនចរាចរណ៍

ល្បឿនសុវត្ថិភាព ៤០គីឡូម៉ែត្រ/ម៉ោង ជម្រាលទទឹងស្ពាន ២% ។ សសរសម្រាប់ព្យួរខ្សែកាបមានកំពស់ ៦០ម៉ែត្រ គិតពីផ្ទៃតួស្ពានទៅលើអាកាស។ សសរស្ពានសម្រាប់ព្យួរខ្សែកាបមានចំនួន ២ ដែលសសរស្ពាននីមួយៗប្រើប្រាស់គ្រឹះខួងខំនួន ១៨ដើម មានទំហំអង្កត់ផ្ចិត ២ម៉ែត្រ គ្រឹះខួងសសរទី១មានជម្រៅ ៥៩.៤០ម៉ែត្រ និងសសរទី២មានជម្រៅ៧៣.៤០ម៉ែត្រ។ ផ្នែកខាងកោះពេជ្រមានសសរចំនួន ៣ និងផ្នែកខាងកោះនរាមានសសរចំនួន ៣ ។ ជើងតាងស្ពានមានទំហំ២៤.៣ម៉ែត្រx១៧.៧ម៉ែត្រx៤.៥ម៉ែត្រ។

កំពស់អតិបរមានាវាឆ្លងកាត់ក្រោមស្ពាន ៨ម៉ែត្រនៅរដូវវស្សានីវ៉ូទឹកខ្ពស់បំផុត កំពស់អតិបរមានាវាឆ្លងកាត់ក្រោមស្ពាន ១៨ម៉ែត្រ នៅរដូវប្រាំងនីវ៉ូទឹកទាបបំផុត។ គម្លាតពីសរសរស្ពានខ្សែកាប មានប្រវែង១៨០ម៉ែត្រ។ សសរស្ពានខ្សែកាបនីមួយៗមានខ្សែកាបចំនួន១ជួរ១៦ដើមសងខាង ក្នុង១ដើមមានភ្ជាប់ខ្សែកាបតូចៗពី២៧ដើម ទៅ៣១ដើម ដែលមានអង្កត់ផ្ចឹត ១៥.២មីលីម៉ែត្រ។

រចនាបទខ្មែរ

សសរស្ពានខ្សែកាបទាំង២ មានឆ្លាក់ចម្លាក់រចនាបទខ្មែរ។ មានបំពាក់បង្គោលភ្លើងបំភ្លឺស្ព្ពាន រៀបចំបណ្តាញលូអមសងខាងផ្លូវក្បាលស្ពាន ដាក់ស្លាកសញ្ញាចរាចរ និងលាបគំនូសចរាចរ។

គម្រោងចំណាយសាងសង់ ៣៨.០០០.០០០ដុល្លាអាមេរិក។ រយៈពេលសាងសង់ ៣៥ខែ។ សាងសង់ដោយក្រុមហ៊ុនវិនិយោគទុនអណិកជនកម្ពុជា OCIC ។

២-អំពីគម្រោងសាងសង់ស្ពានបេតុងអាមេ តភ្ជាប់ពីកោះនរា ទៅផ្លូវជាតិលេខ១ បណ្តោយស្ពានសរុបប្រវែង៦០ម៉ែត្រ ទទឹងស្ពាន២១ម៉ែត្រ បណ្តោយស្ពានបេតុង៤៥ម៉ែត្រ ផ្លូវគល់ស្ពានសងខាង១៥ម៉ែត្រ និងចំណាយរយៈពេលសាងសង់១២ខែ ៕

ទីផ្សារអចលនទ្រព្យនៅទីរួមខេត្តកំពង់ឆ្នាំង ត្រូវការពេលវេលាបន្ថែមទៀត ខណៈជប៉ុនសិក្សារកឃើញថា

ដោយៈ រ៉ាណេត

កំពង់ឆ្នាំងៈ ខុសគ្នាពីបណ្តាខេត្តមួយចំនួន ដែលមានពញរំប្រទល់ជាប់គ្នាដូចជាខេត្តកណ្តាល ខេត្តកំពង់ស្ពឺ និងខេត្តពោធិ៍សាត់ដែលទីផ្សារអលនទ្រព្យ នៅក្នុងទីប្រជុំជននៃខេត្តមានសកម្មភាពទិញលក់ជាបន្តបន្ទាប់នោះ សម្រាប់ខេត្តកំពង់ឆ្នាំងនៅតែមានសភាពស្ងប់ស្ងាត់ ខណៈដែលកំណើនប្រជាសាស្ត្រ និងការអភិវឌ្ឍនៅតាមមូលដ្ឋាននៅមានកម្រិតនៅឡើយ។

លោក លី សុភី ប្រធានមន្ទីររៀបចំដែនដី នគរូបនីយកម្ម សំណង់ និងសូរិយោដីខេត្តកំពង់ឆ្នាំង បានមានប្រសាសន៍នៅល្ងាចថ្ងៃទី២២ ខែមីនា ឆ្នាំ២០២១ថា សកម្មភាពនៃការទិញ-លក់អលចនទ្រព្យ ក៏ដូចជាដីធ្លីនៅក្នុងខេត្តកំពង់ឆ្នាំង បើប្រៀបធៀបជាមួយបណ្តាខេត្តដទៃ ដែលស្ថិតនៅជាប់គ្នាគឺមិនសូវមានសន្ទុះខ្លាំងទេ ពោលគឺមានដែរតែមិនមមាញឹក ហើយស្ថិតក្នុងទ្រង់ទ្រាយតូចនៅឡើយ ដែលអាចកើចេញពីប្រជាពលរដ្ឋក្នុងតំបន់ច្រើនជាងក្រុមហ៊ុនអភិវឌ្ឍន៍មកពីតំបន់ក្រុង។

លោកបន្តថា “បើយើងពិនិត្យមើលទៅយើងឃើញ មានសកម្មភាពអភិវឌ្ឍន៍តិចតួចនៅតាមតំបន់មួយចំនួនក្នុងក្រុង ឬទីរួមខេត្ត ក៏ដូចជាស្រុកមួយចំនួនប៉ុណ្ណោះ” ។ លោកបន្តថា “បើមានក្រុមហ៊ុនណា ឬម្ចាស់គម្រោងណាមួយនិយាយខុសពីការពិត ឬប្រកាសលក់គម្រោងដោយគ្មានលិខិតអនុញ្ញាតត្រឹមត្រូវ មន្ទីរតែងតែជូនដំណឹង កុំឱ្យមានការខាតបង់ប្រយោជន៍ដល់អតិថិជន ឬធុរកិច្ច” ។

លោកប្រធានមន្ទីររៀបចំដែនដីរូបនេះបានបញ្ជាក់ថា សម្រាប់អ្នកវិនិយោគដែលមកស្វែងរកទិញដីក្នុងទ្រង់ទ្រាយធំ គឺនៅមិនទាន់មាននោះទេ មានតែឈ្មួញដើរទិញដីដែលមានតម្លៃទាបៗ ដូចជា ប្រភេទដីស្រែ និងដីចំការជាដើម ប៉ុន្តែបើទិញសម្រាប់គម្រោងអភិវឌ្ឍន៍ធំៗនៅមិនទាន់ឃើញមានច្រើននោះទេ។

លោកឧកញ៉ាឃាង ពុទ្ធី ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា បានថ្លែងថាលោក សុំមិនធ្វើអត្ថាធិប្បាយអ្វីឡើយ ពីទីផ្សារអលចនទ្រព្យកម្ពុជានៅក្នុងដំណាក់កាលពេលនេះ ព្រោះជាពេលដែលរាជរដ្ឋាភិបាល និងប្រជាពលរដ្ឋកំពុងប្រឈមនឹងការប្រយុទ្ធប្រឆាំងទៅនឹងជំងឹកូវីដ១៩ ដែលតម្រូវឱ្យមានការចូលរួមអនុវត្តន៍តាមវិធានការរបស់ក្រសួងសុខាភិបាល ទាំងអស់គ្នាដែលជារឿងចាំបាច់បំផុត។

កន្លងមកទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន (JICA) ធ្លាប់បានសិក្សានិងរកឃើញថា ខេត្តកំពង់ឆ្នាំងមានសក្តានុពលជាHubមួយ សម្រាប់ជាមូលដ្ឋានចែកចាយ និងស្តុកទំនិញនាពេលអនាគត ដោយសារខេត្តនេះមានសក្តានុពលទាំងផ្លូវគោក ផ្លូវទឹក និងផ្លូវដែក ប៉ុន្តែខេត្តនេះមិនទាន់មានភាពទាក់ទាញការវិនិយោគនៅឡើយ ដោយសារកត្តាជាច្រើន។

ខេត្តកំពង់ឆ្នាំង មានចម្ងាយប្រមាណ៩០គីឡូម៉ែត្រពីរាជធានីភ្នំពេញ និងជាខេត្តមានព្រលានយន្តហោះ ដែលបានសាងសង់នៅក្នុងរបបកម្ពុជាប្រជាធិបតេយ្យផងដែរ៕